കൊല്ലം: ഓൾ കേരള കോൺഗ്രസ് ഓഫ് ഒബ്സെറ്റിക്സ് ആൻഡ് ഗൈനക്കോളജിയുടെ സംസ്ഥാന സമ്മേളനം 10 മുതൽ 12 വരെ കൊല്ലം റാവിസ് ഹോട്ടലിൽ നടക്കും. 10 ന് വൈകുന്നേരം അഞ്ചിന് റാവിസ് ഹോട്ടലിൽ നടക്കുന്ന ചടങ്ങിൽ മന്ത്രി വീണാ ജോർജ് സമ്മേളനം ഉദ്ഘാടനം ചെയ്യും.
ഡോ. സെറീന ഗിൽവാസ് അധ്യക്ഷത വഹിക്കും. ഗാനരചയിതാവ് വയലാർ ശരത്ചന്ദ്ര വർമ മുഖ്യാതിഥിയായിരിക്കും. കേരളത്തിനുപുറമേ ഇതര സംസ്ഥാനങ്ങളിൽ നിന്നും വിദേശരാജ്യങ്ങളിൽ നിന്നുമുളള ലോകപ്രശസ്തരായ സ്ത്രീരോഗവിദഗ്ധർ സമ്മേളനത്തിൽ പ്രബന്ധങ്ങൾ അവതരിപ്പിക്കും.
കേരളത്തിലെ മാതൃമരണ നിരക്ക് വികസിത രാജ്യങ്ങൾക്ക് സമാനമായി കുറയ്ക്കാനുള്ള പ്രയത്നത്തിന് ചുക്കാൻ പിടിക്കുന്ന ഡോ. വി.പി. പലി, ഡോ.പി.കെ. ശേഖരൻ, ഡോ.രാജശേഖരൻ നായർ തുടങ്ങിയ പ്രമുഖ ഡോക്ടർമാർ പങ്കെടുക്കും. ഡോ. നോസർ പെരിയർ, ഡോ. ജയദീപ് ടാങ്ക്, ഡോ. ടോണി ടാൻ തുടങ്ങി പ്രമുഖ ഡോക്ടർമാരും സമ്മേളനത്തിന്റെ ഭാഗമാകും.
സ്ത്രീരോഗ - പ്രസവ ചികിത്സാരംഗത്തെ നൂതനമ അറിവുകളും, അനുഭവപാഠങ്ങളും പങ്കുവയ്ക്കുന്ന വിവിധ സെഷനുകൾ സമ്മേളനത്തിന്റെ ഭാഗമായി നടക്കും. ബിരുദാനന്തര ബിരുദ വിദ്യാർഥികൾ ഉൾപ്പടെ എഴുന്നൂറോളം പേർ സമ്മേളനത്തിൽ പങ്കെടുക്കും.
പ്രഭാഷണങ്ങൾ, പ്രബന്ധാവതരണം, സംവാദങ്ങൾ, പാനൽ ചർച്ചകൾ എന്നിവയും നടക്കും. ചികിത്സാരീതികൾ സംബന്ധിച്ച് പ്രായോഗിക പരിശീലനത്തിനും ക്രമീകരണമുണ്ട്. സ്ത്രികൾ നേരിടുന്ന ആരോഗ്യ പ്രശ്നങ്ങൾ, പ്രസവത്തോടനുബന്ധിച്ചുണ്ടാകുന്ന സങ്കീർണതകൾ, മാതൃമരണത്തിലേക്ക് നയിക്കുന്ന പ്രശ്നങ്ങൾ ഒഴിവാക്കാൻ സ്വീകരിക്കേണ്ട മുൻകരുതലുകൾ, ലൈംഗികാതിക്രമത്തിന് വിധേയരായ പെൺകുട്ടികളെ പരിശോധിക്കുമ്പോൾ ശ്രദ്ധിക്കേണ്ട കാര്യങ്ങൾ തുടങ്ങിയ വിഷയങ്ങളിൽ സംഘടിപ്പിക്കുന്ന ചർച്ചകളിൽ ബന്ധപ്പെട്ട മേഖലകളിലെ വിദഗ്ധർ ആശയങ്ങൾ പങ്കുവയ്ക്കും.
ഓർഗനൈസിംഗ് ചെയർ പേഴ്സൺ ഡോ സജിനി, സെക്രട്ടറിമാരായ ഡോ. എൻ.ആർ.റീന, ഡോ മിനു പ്രിയ, സയന്റിഫിക് കമ്മിറ്റി ചെയർ പേഴ്സൺ ഡോ.കവിത വാസുദേവൻ എന്നിവർ പത്രസമ്മേളനത്തിൽ സംബന്ധിച്ചു.