ADVERTISEMENT

ADVERTISEMENT

മാര്‍ത്തോമ്മ കണ്‍വന്‍ഷന്‍ പ്രസംഗസംഘം വാർഷിക സമ്മേളനം ഇന്നു മുതൽ

മാരാമൺ: മലങ്കര മാര്‍ത്തോമ്മ സുറിയാനിസഭ കണ്‍വന്‍ഷന്‍ പ്രസംഗസംഘം വാര്‍ഷിക കോൺഫറൻസും സപ്തതി സമാപന സമ്മേളനവും ഇന്നു മുതൽ 22 വരെ മാരാമണ്‍ റിട്രിറ്റ് സെന്‍ററില്‍ നടക്കും.

വാര്‍ഷിക കോണ്‍ഫ്രന്‍സിന്‍റെ ഉദ്ഘാടനം ഇന്നു വൈകുന്നേരം ആറിന് ഡോ. തിയഡോഷ്യസ് മാര്‍ത്തോമ്മ മെത്രാപ്പോലീത്ത നിര്‍വഹിക്കും.

മാര്‍ത്തോമ്മസഭാ സെക്രട്ടറി റവ. എബി ടി. മാമ്മന്‍, മാര്‍ത്തോമ്മാ സുവിശേഷ പ്രസംഗസംഘം ജനറല്‍ സെക്രട്ടറി റവ. എബി കെ. ജോഷ്വാ, മെട്രോപ്പോലീത്തന്‍ സെക്രട്ടറി റവ. കെ.ഇ. ഗീവര്‍ഗീസ്, ഡോ. തോമസ് ജോര്‍ജ് കൊച്ചി, ബ്രദര്‍ റെജി ജേക്കബ് ചുങ്കത്തറ, ബ്രദര്‍ ജോയി പുല്ലാട് എന്നിവര്‍പ്രഭാഷണങ്ങള്‍ നിര്‍വഹിക്കും.

ADVERTISEMENT

പോസിറ്റീവ് ചിന്തകള്‍ വളര്‍ത്തണം: ചിറ്റയം ഗോപകുമാര്‍

പത്തനംതിട്ട: ജീവിതത്തില്‍ നല്ലതെന്നു തോന്നുന്ന ഏതു മേഖലയിലും തനിക്ക് നേട്ടങ്ങള്‍ കൈവരിക്കാനാകുമെന്ന ചിന്ത കുട്ടികളില്‍ വളര്‍ത്തിക്കൊണ്ടുവരണമെന്ന് ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍. വായനപക്ഷാചരണത്തോടനുബന്ധിച്ച് പത്തനംതിട്ട പ്രസ്‌ക്ലബ് ലൈബ്രറി ആന്‍ഡ് മീഡിയ റിസര്‍ച്ച് സെന്‍റര്‍ ഹൈസ്‌കൂള്‍ വിദ്യാര്‍ഥികള്‍ക്കായി നടത്തിയ കേട്ടെഴുത്ത് മത്സരത്തിലെ വിജയികള്‍ക്കുള്ള സമ്മാനദാനം നിര്‍വഹിച്ചു പ്രസംഗിക്കുകയായിരുന്നു അദ്ദേഹം. നിര്‍മിത ബുദ്ധിയുടെ ഈ കാലയളവില്‍ ജീവിതത്തെക്കുറിച്ചുള്ള നല്ല സ്വപ്‌നങ്ങള്‍ മെനയണം. അതിലൂടെ തനിക്ക് എന്തുകൊണ്ട് അതു സാധ്യമായിക്കൂടാ എന്ന ചിന്ത വളര്‍ന്നുവരണമെന്നും ചിറ്റയം ഗോപകുമാര്‍ അഭിപ്രായപ്പെട്ടു. കേട്ടെഴുത്ത് മത്സരത്തില്‍ ഒന്നാം സ്ഥാനം - എ. അദിന്‍, മാധവ് രാജീവ് (നേതാജി എച്ച്എസ്എസ്, പ്രമാടം), രണ്ടാം സ്ഥാനം - അഭിനവ് രവി, നിരഞ്ജന ദേവി (ആര്യഭാരതി എച്ച്എസ്, ഓമല്ലൂര്‍), പൂജ ഗോപന്‍, ടി.എസ്. സ്‌നേഹ (മാര്‍ത്തോമ്മ എച്ച്എസ്എസ്, പത്തനംതിട്ട), മൂന്നാം സ്ഥാനം - എ. ഗായത്രി, ടി.എസ്. റിമ (കാതോലിക്കേറ്റ് എച്ച്എസ്എസ്, പത്തനംതിട്ട) എന്നീ കുട്ടികള്‍ കരസ്ഥമാക്കി. ഇതോടനുബന്ധിച്ച ഭാഷാ സെമിനാറിന് പ്രഫ. മാലൂര്‍ മുരളീധരന്‍ നേതൃത്വം നല്‍കി. പ്രസ്‌ക്ലബ് ലൈബ്രറി പ്രസിഡന്‍റ് ജി. വിശാഖന്‍ അധ്യക്ഷത വഹിച്ചു. ബിജു കുര്യന്‍, അനില്‍ വള്ളിക്കോട് എന്നിവര്‍ പ്രസംഗിച്ചു.

എഴുമറ്റൂർ സ്മാർട്ട് വില്ലേജ് ഓഫീസ് ഉദ്ഘാടനം ചെയ്തു

എഴുമറ്റൂർ: ആധുനികവത്കരിക്കപ്പെട്ട സേവനങ്ങളിലേക്ക് കടക്കുന്ന കാലത്ത് വില്ലേജുകള്‍ സ്മാര്‍ട്ട് ആകേണ്ടത് അനിവാര്യമാണെന്ന് മന്ത്രി കെ. രാജൻ. എഴുമറ്റൂർ സ്മാർട്ട് വില്ലേജ് ഓഫീസ് ഉദ്ഘാടനം ഓൺലൈനായി നിർവഹിച്ചു പ്രസംഗിക്കുകയായിരുന്നു അദ്ദേഹം. റവന്യു വകുപ്പില്‍ വിപ്ലവകരമായ മാറ്റമാണ് നടക്കുന്നത്. ജനങ്ങളുടെ പ്രശ്‌നം പരിഹരിക്കാന്‍ സ്മാര്‍ട്ട് വില്ലേജുകള്‍ക്ക് ആകുമെന്നും മന്ത്രി പറഞ്ഞു. പ്രമോദ് നാരായൺ എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, ജില്ലാ കളക്ടര്‍ എസ്. പ്രേം കൃഷ്ണൻ, തിരുവല്ല സബ് കളക്ടര്‍ സുമിത് കുമാര്‍ ഠാക്കൂര്‍, എഡിഎം ബി. ജ്യോതി, കോയിപ്രം ബ്ലോക്ക് പഞ്ചായത്ത് പ്രസിഡന്‍റ് ജെസി സൂസന്‍ ജോസഫ്, എഴുമറ്റൂര്‍ ഗ്രാമപഞ്ചായത്ത് പ്രസിഡന്‍റ് ഉഷാ ജേക്കബ്, ത്രിതല പഞ്ചായത്ത് അംഗങ്ങൾ, വിവിധ രാഷ്‌ട്രീയ പാര്‍ട്ടി പ്രതിനിധികൾ, ഉദ്യോഗസ്ഥര്‍ എന്നിവര്‍ പ്രസംഗിച്ചു.

മില്ലറ്റ് കഫേ ഉദ്ഘാടനം ചെയ്തു

തിരുവല്ല: പെരിങ്ങര ഗ്രാമപഞ്ചായത്തിന്‍റെയും കുടുംബശ്രീ പെരിങ്ങര സിഡിഎസിന്‍റെയും ജഗൻസ് മില്ലറ്റ് ബാങ്ക് തിരുവല്ലയുടെയും സംയുക്താഭിമുഖ്യത്തിൽ പെരിങ്ങര ജംഗ്ഷനിൽ ആരംഭിച്ച റെഡി ടു ഈറ്റ് മില്ലറ്റ് കഫേയുടെ ഉദ്ഘാടനം ജില്ലാ പഞ്ചായത്തംഗം മായ അനിൽകുമാർ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് ഏബ്രഹാം തോമസ് ചെറു ധാന്യങ്ങളിൽ പാകം ചെയ്ത ഭക്ഷണത്തിന്‍റെ ആദ്യ വിതരണം നടത്തി. സിഡിഎസ് ചെയർപേഴ്സൺ ഗീതാ പ്രസാദ് അധ്യക്ഷത വഹിച്ചു. ഗ്രാമപഞ്ചായത്ത് അംഗങ്ങൾ, കുടുംബശ്രീ സിഡിഎസ് അംഗങ്ങൾ എന്നിവർ പ്രസംഗിച്ചു. സ്വാദിഷ്ടമായ ഭക്ഷണങ്ങൾ മില്ലറ്റ് അവൽ, മില്ലറ്റ് തൈര് സാദം, വെജിറ്റബിൾ സലാഡ് തുടങ്ങിയ വ്യത്യസ്തങ്ങളായ മറ്റ് ന്യൂട്രി ഫുഡ് ഭക്ഷണങ്ങളും ലഭ്യമാണ്.

സീനിയര്‍ ജേര്‍ണലിസ്റ്റ് ഫോറം വിളംബര സമ്മേളനം

പത്തനംതിട്ട: ഓഗസ്റ്റ് 19 മുതല്‍ 21 വരെ തിരുവനന്തപുരത്തു നടക്കുന്ന സീനിയര്‍ ജേര്‍ണലിസ്റ്റ് ഫോറം കേരളയുടെ ദേശീയ സമ്മേളനത്തിന്‍റെ വിളംബരം പത്തനംതിട്ട പ്രസ്‌ ക്ലബ് അങ്കണത്തില്‍ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ ഉദ്ഘാടനം ചെയ്തു. സീനിയര്‍ ജേര്‍ണലിസ്റ്റ് ഫോറം കേരള ജില്ലാ കമ്മിറ്റി സംഘടിപ്പിച്ച സമ്മേളനത്തില്‍ പ്രസ് ക്ലബ് പ്രസിഡന്‍റ് ബിജു കുര്യന്‍ അധ്യക്ഷത വഹിച്ചു. ഫോറം സംസ്ഥാന സെക്രട്ടറി പി. അജയകുമാര്‍ മുഖ്യപ്രഭാഷണം നടത്തി. മുന്‍ എംഎല്‍എ ജോസഫ് എം. പുതുശേരി, ഫോറം ജില്ലാ പ്രസിഡന്‍റ് ക്രിസ്് തോമസ്, സെക്രട്ടറി ബാബു കൃഷ്ണകല, ട്രഷറാര്‍ പ്രസാദ് മൂക്കന്നൂര്‍, വൈസ് പ്രസിഡന്‍റ് സാം ചെമ്പകത്തില്‍, ജോയിന്‍റ് സെക്രട്ടറിമാരായ കെ.എന്‍. രാജേശ്വരന്‍, സജിത് പരമേശ്വരന്‍, എക്‌സിക്യൂട്ടീവ് അംഗങ്ങളായ ഷിജു സ്്കറിയ, കെ.ജി. മധുപ്രകാശ്, പ്രസ്‌ക്ലബ് സെക്രട്ടറി ജി. വിശാഖന്‍ തുടങ്ങിയവര്‍ പ്രസംഗിച്ചു.

അറിവിനൊപ്പം ചിന്തയും ഉണര്‍ത്തുന്നതാണ് വായനയെന്ന് ജില്ലാ കളക്ടര്‍

പത്തനംതിട്ട: വായനപക്ഷാചരണത്തോടനുബന്ധിച്ച് പത്തനംതിട്ട ജില്ലാ ഭരണകൂടവും ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ് വകുപ്പും ചേർന്നു സംഘടിപ്പിച്ച ആസ്വാദനക്കുറിപ്പ് മത്സരവിജയികള്‍ക്കുള്ള സമ്മാനവും സര്‍ട്ടിഫിക്കറ്റ് വിതരണവും ജില്ലാ കളക്ടര്‍ എസ്. പ്രേംകൃഷ്ണന്‍ നിര്‍വഹിച്ചു. മത്സര വിജയികളായ ആര്‍. ഋതുനന്ദ (ജിയുപിഎസ് പൂഴിക്കാട്), ആര്‍ദ്രലക്ഷ്മി (ജിവിഎച്ച്എസ്എസ് ആറന്മുള), ശ്രദ്ധ സന്തോഷ് (തെങ്ങമം യുപിഎസ്), ആല്യ ദീപു (ഭവന്‍സ് വിദ്യാമന്ദിര്‍ പത്തനംതിട്ട), ദേവനന്ദ (സെന്‍റ് ജോര്‍ജ് മൗണ്ട് എച്ച്എസ്എസ് കൈപ്പട്ടൂര്‍), അഭിരാമി അഭിലാഷ് (ടെക്‌നിക്കല്‍ ഹയര്‍ സെക്കന്‍ഡറി സ്‌കൂള്‍ മല്ലപ്പള്ളി) എന്നിവര്‍ കളക്ടറില്‍നിന്ന് സമ്മാനവും സര്‍ട്ടിഫിക്കറ്റും ഏറ്റുവാങ്ങി. ജില്ലയിലെ യുപി, ഹൈസ്‌കൂള്‍ കുട്ടികള്‍ക്കായാണ് ആസ്വാദനക്കുറിപ്പ് മത്സരം സംഘടിപ്പിച്ചത്. ജില്ലാ ഇന്‍ഫര്‍മേഷന്‍ ഓഫീസര്‍ സി. ടി. ജോണ്‍, അസിസ്റ്റന്‍റ് എഡിറ്റര്‍ രാഹുല്‍ പ്രസാദ്, അസിസ്റ്റന്‍റ് ഇന്‍ഫര്‍മേഷന്‍ ഓഫീസര്‍ പ്രവീണ്‍ ജി. നായര്‍ എന്നിവര്‍ പങ്കെടുത്തു.

ഉമ്മൻ ചാണ്ടിയെ അനുസ്മരിച്ചു : അപൂർവ വ്യക്തിത്വത്തിനുടമയെന്ന് മാർ ക്രിസോസ്റ്റമോസ്

തിരുവല്ല: അപരന്‍റെ വേദന സ്വന്തം വേദനയായി കരുതി ആ വേദന അകറ്റാൻ സമർപ്പണത്തോടുകൂടി പ്രവർത്തിച്ച അപൂർവ വ്യക്തിത്വമാണ് ഉമ്മൻ ചാണ്ടിയുടേതെന്ന് ഡോ. യൂഹാനോൻ മാർ ക്രിസോസ്റ്റമോസ് മെത്രാപ്പോലീത്ത. യുഡിഎഫ് തിരുവല്ല നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ നടത്തിയ ഉമ്മൻചാണ്ടി അനുസ്മരണം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. എല്ലാ രംഗങ്ങളിലും മൂല്യച്യുതി സംഭവിക്കുമ്പോൾ അത്തരം അപഭ്രംശങ്ങളിൽ പെട്ടുപോകാതെ ജീവിച്ചു കാണിച്ച ഉമ്മൻ ചാണ്ടി എല്ലാ രംഗങ്ങളിലുള്ളവർക്കും മാതൃകയും വെല്ലുവിളിയുമാണെന്നും മെത്രാപ്പോലീത്ത അഭിപ്രായപ്പെട്ടു. യുഡിഎഫ് ചെയർമാൻ ലാലു തോമസ് അധ്യക്ഷത വഹിച്ചു. പ്രഫ. സതീഷ് കൊച്ചുപറമ്പിൽ, ജോസഫ് എം. പുതുശേരി, വർഗീസ് മാമ്മൻ, കുഞ്ഞുകോശി പോൾ, റെജി തോമസ് തുടങ്ങിയവർ പ്രസംഗിച്ചു. ‌തിരുവല്ല: ബ്ലോക്ക് കോൺഗ്രസ് കമ്മിറ്റിയുടെ ആഭിമുഖ്യത്തിൽ നടന്ന ഉമ്മൻ ചാണ്ടി അനുസ്മരണം കെപിസിസി രാഷ്‌ട്രീയകാര്യസമിതിയംഗം പ്രഫ. പി.ജെ. കുര്യൻ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് ഈപ്പൻ കുര്യൻ അധ്യക്ഷതവഹിച്ച യോഗത്തിൽ ചാണ്ടി ഉമ്മൻ എംഎൽഎ മുഖ്യപ്രഭാഷണവും ആന്‍റോ ആന്‍റണി എംപി അനുസ്മരണ പ്രഭാഷണവും നടത്തി. എൻ. ഷൈലാജ്, ജിജോ ചെറിയാൻ, ഏബ്രഹാം കുന്നുകണ്ടം തുടങ്ങിയവർ പ്രസംഗിച്ചു. പ്രമാടം: മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമവാർഷികത്തിന്‍റെ ഭാഗമായി പ്രമാടം മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച അനുസ്മരണ സമ്മേളനം യുഡിഎഫ് കൺവീനർ അടൂർ പ്രകാശ് എംപി ഉദ്ഘാടനം ചെയ്തു. മണ്ഡലം കോൺഗ്രസ് കമ്മിറ്റി പ്രസിഡന്‍റ് റോബിൻ മോൻസി അധ്യക്ഷത വഹിച്ച യോഗത്തിൽ ഡിസിസി വൈസ് പ്രസിഡന്‍റ് റോബിൻ പീറ്റർ, ഡിസിസി ജനറൽ സെക്രട്ടറി രഘുനാഥ് കുളനട, യൂത്ത് കോൺഗ്രസ് ജില്ലാ പ്രസിഡന്‍റ് വിജയ് ഇന്ദുചൂഡൻ, മഹിളാ കോൺഗ്രസ് ജില്ലാ വൈസ് പ്രസിഡന്‍റുമാരായ ലീലാരാജൻ, പ്രസീതാ രഘു യുഡിഎഫ് നിയോജകമണ്ഡലം ചെയർമാൻ എസ്. സന്തോഷ് കുമാർ, യുഡിഎഫ് പ്രമാടം പഞ്ചായത്ത് കൺവീനർ ജോസ് പനച്ചിക്കൽ, ബ്ലോക്ക് പഞ്ചായത്തംഗങ്ങൾ, ഗ്രാമപഞ്ചായത്തംഗങ്ങൾ തുടങ്ങിയവർ പ്രസംഗിച്ചു. അടൂർ: സമാനതകളില്ലാത്ത കാരുണ്യത്തിന്‍റെ ആൾരൂപമാണ് ഉമ്മൻ ചാണ്ടിയെന്ന് അടൂർ സെന്‍റ് സിറിൾസ് കോളജ് മുൻ പ്രിൻസിപ്പൽ ഡി.കെ. ജോൺ. സാന്ത്വനം സോഷ്യൽ വെൽഫെയർ ഫൗണ്ടേഷൻ സംഘടിപ്പിച്ച ഉമ്മൻ ചാണ്ടി സ്മൃതി സംഗമം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഫൗണ്ടേഷൻ പ്രസിഡന്‍റ് ഡോ. ജോൺ സി. വർഗീസ് കോർ എപ്പിസ്കോപ്പ അധ്യക്ഷത വഹിച്ച യോഗത്തിൽ ഫാ. ജോസഫ് ശാമുവേൽ തറയിൽ, ഫാ. പി.എം. ഏബ്രഹാം, തോമസ് ജോൺ മോളേത്ത് തുടങ്ങിയവർ പ്രസംഗിച്ചു.

പേഷ്യന്‍റ് ഫസ്റ്റ് മൂവ്മെന്‍റ് പദ്ധതി ബിലീവേഴ്സ് ആശുപത്രിയിൽ

തിരുവല്ല : ആശുപത്രിയിൽ എത്തുമ്പോൾ മുതൽ മടങ്ങിപ്പോകുന്നതുവരെയുള്ള കാലയളവിൽ രോഗികൾക്ക് പ്രഥമ പരിഗണന നൽകുന്നതിനും അവരെ കേന്ദ്രീകരിച്ച് മാത്രം ആശുപത്രിയിലെ എല്ലാ വിഭാഗങ്ങളും സംയുക്തമായി പ്രവർത്തിക്കുന്നതിനും പ്രത്യേകമായി ആസൂത്രണം ചെയ്തു നടപ്പിലാക്കുന്ന പേഷ്യന്‍റ് ഫസ്റ്റ് മൂവ്മെന്‍റ് പദ്ധതി ബിലീവേഴ്സ് ആശുപത്രിയിൽ തുടക്കംകുറിച്ചു. അടുത്ത ഒരു വർഷം നീണ്ടുനിൽക്കുന്ന ആസൂത്രണ പരിപാടികളുടെ ഉദ്ഘാടനം വെല്ലൂർ സിഎംസി അസോസിയേറ്റ് ഡയറക്ടറും ഹെപ്പറ്റോളജി വിഭാഗം മേധാവിയുമായ ഡോ. ഉദയ് സക്കറിയ നിർവഹിച്ചു. ബിലീവേഴ്സ് ആശുപത്രി ഡയറക്ടറും സിഇഒയുമായ ഡോ. ജോർജ് ചാണ്ടി മറ്റീത്ര അധ്യക്ഷത വഹിച്ചു. ബിലീവേഴ്സ് ചർച്ച് മെഡിക്കൽ കോളജ് ഫാർമക്കോളജി വിഭാഗം മേധാവി ഡോ. ജേക്കബ് ജസുറൻ പേഷ്യന്‍റ് ഫസ്റ്റ് മൂവ്മെന്‍റിനെക്കുറിച്ച് ആമുഖ പ്രഭാഷണം നടത്തി. അസോസിയേറ്റ് ഡയറക്ടർ ഡോ. ജോൺ വല്യത്ത്, സൈക്യാട്രി വിഭാഗം അസിസ്റ്റന്‍റ് പ്രഫസർ ഡോ. സുമൻ വർഗീസ് സാം, ഫിസിക്കൽ മെഡിസിൻ ആൻഡ് റീഹാബിലിറ്റേഷൻ വിഭാഗം മേധാവി ഡോ. തോമസ് മാത്യു, സാമൂഹ്യ സേവന വിഭാഗം മേധാവി ആൻ ജോർജ് എന്നിവർ പ്രസംഗിച്ചു. ആരോഗ്യപ്രവർത്തകരും രോഗികളും തമ്മിലുള്ള ആശയവിനിമയം മെച്ചപ്പെടുത്തുന്നതുമുതൽ കാത്തിരിപ്പു സമയം കുറയ്ക്കുന്നതിനും പാർക്കിംഗ്, കാന്‍റീൻ തുടങ്ങിയ സേവനങ്ങൾ മെച്ചപ്പെടുത്തുന്നതിനും വിവിധ മെഡിക്കൽ വിഭാഗങ്ങളുടെ സംയുക്ത സഹകരണത്തിലൂടെ രോഗികൾക്ക് മെച്ചപ്പെട്ട ചികിത്സയും ആരോഗ്യവും പ്രദാനം ചെയ്യുന്നതുമായ കാര്യങ്ങളിൽവരെ സ്വാധീനം ഉണ്ടാക്കാൻ കഴിയുന്ന വിവിധ തലത്തിലുള്ള പ്രവർത്തനങ്ങളാണ് പേഷ്യന്‍റ് ഫസ്റ്റ് മൂവ്മെന്‍റ് പരിപാടിയിൽ ഉൾപ്പെടുത്തിയിരിക്കുന്നതെന്ന് ആശുപത്രി ഡയറക്ടർ ഡോ. ജോർജ് ചാണ്ടി മറ്റീത്ര പറഞ്ഞു.

പുഷ്പഗിരി നഴ്സിംഗ് കോളജിൽ ബിരുദദാനവും കോളജ് ദിനാഘോഷവും

തിരുവല്ല: പുഷ്പഗിരി നഴ്സിംഗ് കോളജിൽ ബിരുദദാനവും കോളജ് ഓഫ് നഴ്സിംഗ് ദിനാഘോഷവും കേരള ആരോഗ്യ സർവകലാശാല വിദ്യാർഥി കാര്യാലയ മേധാവി ഡോ. ആർ. ആശിഷ് ഉദ്ഘാടനം ചെയ്തു. ബിരുദ സർട്ടിഫിക്കറ്റ് വിതരണവും അദ്ദേഹം നിർവഹിച്ചു. തിരുവല്ല അതിരൂപതാധ്യക്ഷൻ ആർച്ച്ബിഷപ് ഡോ. തോമസ് മാർ കൂറിലോസ് മെത്രാപ്പോലീത്ത അനുഗ്രഹപ്രഭാഷണവും അവാർഡ്‌വിതരണവും നിർവഹിച്ചു. പുഷ്പഗിരി മെഡിക്കൽ സൊസൈറ്റി സിഇഒ റവ.ഡോ. ബിജു വർഗീസ് പയ്യമ്പള്ളിൽ അധ്യക്ഷത വഹിച്ചു. കോളജ് ഓഫ് നഴ്സിംഗ് ഡയറക്ടർ ഫാ. മാത്യു പുത്തൻപുരയിൽ,‌ കോളജ് ഓഫ് നഴ്സിംഗ് പ്രിൻസിപ്പൽ പ്രഫ. വിനീത ജേക്കബ്, സിഎൻഒ സുവർണ എസ്. പണിക്കർ, പിടിഎ പ്രസിഡന്‍റ് കെ. സഞ്‌ജീവ് കുമാർ, സിസ്റ്റർ മേരി ജ്യോതി, രഞ്ജിനി ദേവി എന്നിവർ പ്രസംഗിച്ചു. തുടർന്ന് കോളജ് ദിനാഘോഷവും വിദ്യാർഥികളുടെ വിവിധ കലാപരിപാടികളും ഇതോടനുബന്ധിച്ചു നടന്നു. കഴിഞ്ഞ അധ്യയന വർഷത്തിൽ മികച്ച വിജയം കരസ്ഥമാക്കിയ വിദ്യാർഥികളെ അനുമോദിച്ചു.

പട്ടയമേള: നാളെ 268 പേർക്ക് പട്ടയം നൽകും

പത്തനംതിട്ട: ജില്ലാതല പട്ടയമേള നാളെ രാവിലെ 10ന് പത്തനംതിട്ട റോയല്‍ ഓഡിറ്റോറിയത്തില്‍ മന്ത്രി കെ. രാജന്‍ ഉദ്ഘാടനം ചെയ്യും. മന്ത്രി വീണാ ജോര്‍ജ് അധ്യക്ഷത വഹിക്കും. നിയമസഭാ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ മുഖ്യപ്രഭാഷണം നടത്തും. കോന്നി, റാന്നി, ആറന്മുള, തിരുവല്ല നിയോജക മണ്ഡലങ്ങളിലെ 268 പേര്‍ക്ക് പട്ടയം വിതരണം ചെയ്യും. സര്‍ക്കാരിന്‍റെ എല്ലാവര്‍ക്കും ഭൂമി, എല്ലാ ഭൂമിക്കും രേഖ എന്ന പ്രഖ്യാപിത നയത്തിന്‍റെ അടിസ്ഥാനത്തിലാണ് ജില്ലാതല പട്ടയമേള സംഘടിപ്പിക്കുന്നതെന്ന് കളക്ടർ എസ്. പ്രേംകൃഷ്ണൻ പറഞ്ഞു. പട്ടയമിഷന്‍റെ ഭാഗമായി പട്ടയഡാഷ്‌ബോര്‍ഡില്‍ ഉള്‍പ്പെടുത്തിയ കോയിപ്രം വില്ലേജിലെ തെറ്റുപാറ കോളനിയിലെ 10 കൈവശക്കാര്‍ക്കും പട്ടയം ലഭിക്കും. പട്ടയവിഷയത്തില്‍ സര്‍ക്കാര്‍ നേരിട്ട് നടപടി എടുക്കേണ്ടവയാണ് പട്ടയഡാഷ് ബോര്‍ഡില്‍ ഉള്‍പ്പെടുത്തുന്നത്. റാന്നി, കോന്നി മേഖലയിലെ മലമ്പണ്ടാര വിഭാഗത്തിലെ 49 കുടുംബങ്ങളും ഭൂമിയുടെ സ്ഥിരം അവകാശികളാകും. വനാവകാശ നിയമപ്രകാരം ഒരേക്കര്‍ ഭൂമി വീതം ലഭ്യമാക്കും. കോന്നിയില്‍ 32, റാന്നിയില്‍ 17 കുടുംബങ്ങള്‍ക്കും പട്ടയം ലഭിക്കും. കോന്നി, സീതത്തോട് ഗ്രാമപഞ്ചായത്തുകളിലെ മൂഴിയാര്‍ ഭാഗത്ത് സായിപ്പിന്‍ കുഴി, ഗുരുനാഥന്‍ മണ്ണിലെ ചിപ്പന്‍ കുഴി, ഗവി, കക്കി എന്നിവിടങ്ങളില്‍ താമസിക്കുന്ന 32 മലമ്പണ്ടാര കുടുംബങ്ങള്‍ക്ക് കൈവശ രേഖ നല്‍കും. റാന്നി ചാലക്കയം, പ്ലാപ്പള്ളി എന്നിവ ഉള്‍പ്പെടുന്ന ശബരിമല കാടുകളില്‍ താമസിച്ചിരുന്ന 37 മലമ്പണ്ടാര കുടുംബങ്ങളിലെ 20 പേര്‍ക്ക് 2023ല്‍ ഭൂമി നല്‍കിയിരുന്നു. റാന്നി - പെരുനാട് ഗ്രാമപഞ്ചായത്തിലെ മഞ്ഞത്തോട് പ്രകൃതിയിലാണ് ഇവര്‍ക്ക് ഇടമൊരുക്കിയത്. ശേഷിക്കുന്ന 17 കുടുംബങ്ങള്‍ക്ക് നാളെ കൈവശരേഖ നല്‍കും. ആന്‍റോ ആന്‍റണി എംപി, എംഎല്‍എമാരായ മാത്യു ടി. തോമസ്, കെ.യു. ജനീഷ്‌കുമാര്‍, പ്രമോദ് നാരായണ്‍, ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, പത്തനംതിട്ട നഗരസഭാധ്യക്ഷന്‍ ടി. സക്കീര്‍ ഹുസൈന്‍, ജില്ലാ കളക്ടര്‍ എസ്. പ്രേംകൃഷ്ണന്‍, തിരുവല്ല സബ് കളക്ടര്‍ സുമിത് കുമാര്‍ ഠാക്കൂര്‍, അടൂര്‍ ആര്‍ഡിഒ എം. ബിപിന്‍കുമാര്‍, റാന്നി ട്രൈബല്‍ ഡെവലപ്മെന്‍റ് ഓഫീസര്‍ എസ്.എ. നജീം, ത്രിതല പഞ്ചായത്തംഗങ്ങള്‍, രാഷ്‌ട്രീയകക്ഷി പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുക്കും. പെരുന്പെട്ടി പട്ടയം നടപടികൾ പൂർത്തിയായില്ല പെരുമ്പെട്ടി വില്ലേജില്‍ ഡിജിറ്റല്‍ സര്‍വേ നപടി പൂര്‍ത്തിയാക്കുന്നതനുസരിച്ച് കൈവശക്കാരുടെ പട്ടയ അപേക്ഷയില്‍ നടപടി സ്വീകരിക്കുമെന്ന് റവന്യു അധികൃതർ അറിയിച്ചു. 512 കർഷകരാണ് പെരുന്പെട്ടിയിൽ കാലങ്ങളായി പട്ടയത്തിനുവേണ്ടി കാത്തിരിക്കുന്നത്. വനഭൂമിയുമായി ബന്ധമില്ലാത്ത പ്രദേശമായിരുന്നിട്ടുകൂടി തർക്കങ്ങൾ ഉണ്ടായതോടെ പതിറ്റാണ്ടുകളായി പട്ടയം അപേക്ഷ കുരുങ്ങിക്കിടക്കുകയായിരുന്നു. ഇതിനു പരിഹാരമായാണ് ഡിജിറ്റൽ സർവേ നടത്തി വനഭൂമി ആദ്യം കൃത്യമായി നിർണയിച്ചത്. ഇതിനുശേഷം റവന്യൂഭൂമി അളന്നു തിരിച്ചു. വലിയകാവ് വനത്തിന്‍റെ അളവ് പൂർത്തിയാക്കിയപ്പോൾ നേരത്തേയുള്ള നോട്ടിഫിക്കേഷൻ പ്രകാരമുള്ള 1771 ഏക്കറും വനംവകുപ്പിന്‍റെ ഉടമസ്ഥതയിൽ തന്നെയെന്ന് വ്യക്തമായിട്ടുണ്ട്. ഇതോടെ റവന്യു ഭൂമിയുടെമേൽ വനംവകുപ്പിന് അവകാശം ഇല്ലാതായി. കൈവശ കർഷകരുടെ ഭൂമിയും ഇതിലുൾപ്പെടുന്നതാണ്. പൊന്തൻപുഴ - പെരുന്പെട്ടി പട്ടയ പ്രശ്നം പരിഹരിക്കാൻ പ്രത്യേക സംഘത്തെ റവന്യുമന്ത്രിതന്നെ നിയോഗിച്ചിരുന്നു. ഡിജിറ്റൽ സർവേ കഴിയുന്നതോടെ പട്ടയം നൽകാനാകുമെന്നാണ് റവന്യു വകുപ്പിന്‍റെ പ്രതീക്ഷ. കേന്ദ്രാനുമതിക്കായി നൽകിയ പട്ടയങ്ങൾ എവിടെ ? പത്തനംതിട്ട: കേന്ദ്രാനുമതിക്കായി ജില്ലയിൽനിന്നു സമർപ്പിച്ച 6362 പട്ടയങ്ങളെ സംബന്ധിച്ച് ഇത്തവണയും തീരുമാനമില്ല. പതിറ്റാണ്ടുകളായി പട്ടയത്തിനു കാത്തിരിക്കുന്ന റാന്നി, കോന്നി താലൂക്കിലെ വിവിധ മേഖലകളിൽപ്പെട്ട പട്ടയങ്ങളാണിവയിലേറെയും. പെരുന്പെട്ടി - പൊന്തൻപുഴ പട്ടയവും ഇതിന്‍റെ ഗണത്തിലുൾപ്പെടുത്തിയിരുന്നെങ്കിലും അതിപ്പോൾ കണക്കിൽപ്പെടുന്നില്ല. 1977 ജനുവരി ഒന്നിനു മുന്പായി കൈവശഭൂമിയിൽ താമസമാക്കിയിവരെങ്കിലും വനത്തോടു ചേർന്ന പ്രദേശമെന്ന പേരിൽ കാലങ്ങളായി പട്ടയം നിഷേധിക്കപ്പെട്ട കുടുംബങ്ങളാണ് കേന്ദ്രാനുമതി‍യില്ലെന്ന പേരിൽ തഴയപ്പെടുന്നത്. 2015 - 16ൽ അന്നത്തെ യുഡിഎഫ് സർക്കാർ വിതരണം ചെയ്യുകയും പിന്നീടുവന്ന എൽഡിഎഫ് സർക്കാർ റദ്ദാക്കുകയും ചെയ്ത 1400 പട്ടയങ്ങളും ഇതിലുൾപ്പെടുന്നു. 6362 പട്ടയങ്ങൾക്കുള്ള അപേക്ഷ 2021ൽ കേന്ദ്രസർക്കാരിലേക്കു നൽകിയതാണ്. 2016 - 21 മന്ത്രിസഭയുടെകാലത്തു തുടങ്ങിവച്ച നടപടിക്രമങ്ങൾ പൂർത്തീകരിച്ച് ഇപ്പോഴത്തെ റവന്യുമന്ത്രി കെ. രാജൻ ചുമതലയേറ്റശേഷമാണ് കേന്ദ്രാനുമതിക്കായി അപേക്ഷ നൽകിയത്. പട്ടയം ലഭിക്കുന്നതിനുള്ള അപേക്ഷയുമായി ബന്ധപ്പെട്ട് കേന്ദ്രസംഘം സ്ഥലപരിശോധന നടത്തുകയും ചെയ്തിരുന്നു. ഇതിനിടെ പലതവണ പട്ടയം അപേക്ഷകൾ പല കാരണങ്ങൾ നിരത്തി കേന്ദ്രം തിരികെ അയച്ചു. ഇവയ്ക്കെല്ലാം വിശദീകരണം നൽകുകയും ചെയ്തിരുന്നു. 2023ൽ പട്ടയം ലഭിക്കുമെന്ന പ്രതീക്ഷയാണുണ്ടായിരുന്നത്. എന്നാൽ വീണ്ടും രണ്ടുവർഷങ്ങൾ പിന്നിട്ടു. കോന്നി, റാന്നി വനമേഖലയോടു ചേർന്ന റവന്യു ഭൂമിയിൽ കഴിയുന്ന കുടുംബങ്ങളുടെ പട്ടയങ്ങളാണ് ഇതിലുള്ളത്. ഓരോ പ്രദേശത്തും ഓരോ കാരണങ്ങളാണ് പട്ടയം നിരസിക്കുന്നതിനു പിന്നിലുള്ളതെന്ന് പറയുന്നു. അപേക്ഷകളെല്ലാം ഒന്നിച്ചു നൽകിയതോടെ വിശദീകരണങ്ങളും വ്യത്യസ്തമാണ്.

മാതൃവേദി ഫൊറോന അസംബ്ലി

റാന്നി: കാഞ്ഞിരപ്പള്ളി രൂപത മാതൃവേദി റാന്നി ഫൊറോന അസംബ്ലി സിറ്റഡൽ റെസിഡൻഷ്യൽ സ്കൂളിൽ ഫൊറോന പള്ളി വികാരി ഫാ. തോമസ് മുണ്ടിയാനിയിൽ ഉദ്ഘാടനം ചെയ്തു. ഫൊറോന ഡയറക്ടർ ഫാ. ജോസഫ് മരുതോലിലിന്‍റെ അധ്യക്ഷതയിൽ നടന്ന സമ്മേളനത്തിൽ മാതൃവേദി രൂപത ഡയറക്ടർ ഫാ. മാത്യു ഓലിക്കൽ മുഖ്യ പ്രഭാഷണം നടത്തി. ഫൊറോന സെക്രട്ടറി കുഞ്ഞുമോൾ റിപ്പോർട്ട് അവതരിപ്പിച്ചു. രൂപത ആനിമേറ്റർ സിസ്റ്റർ റോസ്മി, രൂപത പ്രസിഡന്‍റ് ജിജി ജേക്കബ് എന്നിവർ പ്രസംഗിച്ചു. ഫൊറോന പ്രസിഡന്‍റ് ലൗലി ജോസ് സ്വാഗതവും അനിമേറ്റർ സിസ്റ്റർ ജെസ്മി സിഎംസി നന്ദിയും പറഞ്ഞു.

യുവാവ് അറസ്റ്റില്‍

പത്തനംതിട്ട: പഠനം കഴിഞ്ഞ് വീട്ടിലേക്ക് പോകാനായി പത്തനംതിട്ട കെഎസ്ആര്‍ടിസി സ്റ്റാന്‍ഡിലെത്തിയ പെൺകുട്ടി ഉൾപ്പെടെയുള്ള സ്ത്രീകളെ ശല്യം ചെയ്ത യുവാവിനെ പത്തനംതിട്ട പോലീസ് അറസ്റ്റ് ചെയ്തു. വള്ളിക്കോട് കുടമുക്ക് മാമ്മൂട് പുല്ലുംവിളയില്‍ വീട്ടില്‍ ബി. ബിനുവാണ് (36) അറസ്റ്റിലായത്.

അടിയന്തരാവസ്ഥയുടെ 50 വർഷങ്ങൾ: കാതോലിക്കേറ്റ് സ്കൂളിൽ സെമിനാർ നടന്നു

പത്തനംതിട്ട: അടിയന്തരാവസ്ഥയുടെ 50 വർഷങ്ങൾ സമകാലീന ഇന്ത്യയിൽ ജനാധിപത്യം, മതേതരത്വം, ദേശീയത എന്നീ മേഖലയിൽ നേരിടുന്ന വെല്ലുവിളികൾ എന്ന വിഷയത്തിൽ പത്തനംതിട്ട കാതോലിക്കേറ്റ് ഹയർ സെക്കൻഡറി സ്കൂളിൽ സെമിനാർ നടന്നു. ഓർത്തഡോക്സ് സഭ തുമ്പമൺ ഭദ്രാസന സെക്രട്ടറി ജോൺസൺ കല്ലട്ടതിൽ കോർ എപ്പിസ്കോപ്പ ഉദ്ഘാടനം ചെയ്തു. മുൻ എംഎൽഎ രാജു ഏബ്രഹാം, മാധ്യമ പ്രവർത്തകൻ ഇ.എൻ. നന്ദകുമാർ എന്നിവർ വിഷയാവതരണം നടത്തി. അപു ജോൺ ജോസഫ് മോഡറേറ്ററായിരുന്നു. സ്കൂൾ പ്രിൻസിപ്പൽ ജേക്കബ് ജോർജ് കുറ്റിയിൽ സ്വാഗതവും സ്റ്റാഫ് സെക്രട്ടറി ബിനോദ് മാത്യു നന്ദിയും പറഞ്ഞു. കാതോലിക്കേറ്റ് ഹയർസെക്കൻഡറി സ്കൂൾ ഇൻസ്റ്റിറ്റ്യൂട്ട് ഓഫ് പാർലമെന്‍ററി അഫയേഴ്‌സിന്‍റെ നേതൃത്വത്തിലാണ് സെമിനാർ സംഘടിപ്പിച്ചത്. ഹ്യുമാനിറ്റീസ് വിഭാഗത്തിലെ150 വിദ്യാർഥികൾ പങ്കെടുത്തു.

ലൈംഗിക അതിക്രമക്കേസില്‍ ഏഴുവർഷം കഠിനതടവും പിഴയും

പത്തനംതിട്ട: വിദ്യാർഥിനിയെ ക്ലാസിനിടെ ലൈംഗിക അതിക്രമത്തിന് ഇരയാക്കിയയാൾക്ക് ഏഴുവർഷം കഠിനതടവും ഒരു ലക്ഷം രൂപ പിഴയും. കൊല്ലം ശക്തികുളങ്ങര കാവനാട് കുരീപ്പുഴ പനമൂട്ടില്‍ കിഴക്കേതില്‍ വീട്ടില്‍ മുഹമ്മദ് സാലിഹിനെയാണ് (58) ശിക്ഷിച്ചത്. പത്തനംതിട്ട അതിവേഗ സ്‌പെഷല്‍ കോടതി ജഡ്ജി ടി. മഞ്ജിത്തിന്‍റേതാണ് വിധി.

സ്വകാര്യ ബസുകൾ 22 മുതൽ പണിമുടക്കും

പത്തനംതിട്ട: വിവിധ ആവശ്യങ്ങള്‍ ഉന്നയിച്ച് സ്വകാര്യ ബസുകള്‍ 22 മുതല്‍ അനിശ്ചിതകാലത്തേക്ക് സര്‍വീസ് നിര്‍ത്തിവയ്ക്കുമെന്ന് ബസുടമ സംയുക്ത സമിതി ജില്ലാ ഭാരവാഹികള്‍ പത്രസമ്മേളനത്തില്‍ പറഞ്ഞു. വിദ്യാര്‍ഥികളുടെ കണ്‍സഷന്‍ നിരക്ക് 50 ശതമാനമായി ഉയര്‍ത്തണമെന്ന് ജസ്റ്റീസ് എം. രാമചന്ദ്രന്‍ കമ്മീഷനുംഡോ. കെ. രവിവർമ കമ്മീഷനും ശിപാർശ നൽകിയിട്ടും നടപടിയില്ല. 14 വർഷമായി കൺസഷൻ നിരക്ക് വർധനയ്ക്കുവേണ്ടി സംഘടന സമര രംഗത്താണ്. സ്വകാര്യ ബസ് വ്യവസായ മേഖല പിടിച്ചുനിൽക്കാനാകാത്ത സ്ഥിതിയാണ്. 140 കിലോമീറ്ററിനു മുകളിലുള്ള പെർമിറ്റുകൾ പുതുക്കി നൽകാതെ വന്നതോടെ നിരവധി ബസുകളാണ് ഷെഡ്ഡിൽ കയറിയത്. യാത്രക്കാരുടെ കുറവു കാരണം പല റൂട്ടുകളും നിലച്ചു. നിരത്തുകളിൽ സ്വകാര്യ ബസുകളുടെ എണ്ണം ഗണ്യമായി കുറഞ്ഞു. ബസ് ജീവനക്കാര്‍ക്ക് പിസിസി നിര്‍ബന്ധമാക്കിയ കരിനിയമം പിന്‍വലിക്കണം. ലിമിറ്റഡ് സ്റ്റോപ്പ്, ദീര്‍ഘദൂര ബസുകളുടെ പെര്‍മിറ്റുകള്‍ അതേപടി പുതുക്കി നല്‍കണം. ഇ-ചലാന്‍ വഴിയുള്ള അന്യായ പിഴ ചുമത്തല്‍ അവസാനിപ്പിക്കണം തുടങ്ങിയ ആവശ്യങ്ങളും സംഘടന മുന്നോട്ടുവച്ചിട്ടുണ്ട്. ആവശ്യങ്ങള്‍ ഉന്നയിച്ച് വിവിധ നിവേദനങ്ങള്‍ സര്‍ക്കാരിന് നല്‍കുകയും തുടർന്ന് സമരങ്ങള്‍ നടത്തിയിട്ടും അനുകൂല നടപടിയില്ല. 22ന് രാവിലെ കളക്ടറേറ്റ് പടിക്കലേക്ക് മാര്‍ച്ചും തുടര്‍ന്ന് ധര്‍ണയും നടത്തും.

നൂറുമേനി ഗ്രാന്‍ഡ്ഫിനാലെ മഹാസംഗമം സെപ്റ്റംബര്‍ 12, 13 തീയതികളില്‍

ചങ്ങനാശേരി: ഈശോയുടെ മനുഷ്യാവതാരത്തിന്‍റെ ജൂബിലി വര്‍ഷത്തില്‍ അതിരൂപതയുടെ കുടുംബ വചന മനഃപാഠ പദ്ധതിയായ നൂറുമേനി സീസണ്‍ 3 ഗ്രാന്‍ഡ് ഫിനാലെയും വിജയികളുടെ മഹാസംഗമവും സെപ്റ്റംബര്‍ 12, 13 തീയതികളിൽ എസ്ബി കോളജ് കാവുകാട്ട് ഹാളില്‍ നടക്കും. അതിരൂപതയിലെ 250 ഇടവകകളില്‍നിന്നുള്ള മത്സരത്തില്‍ വിജയികളായ വ്യക്തികള്‍, കുടുംബങ്ങള്‍, സന്യാസിനികള്‍, സന്യാസാര്‍ഥിനികള്‍, സെമിനാരി വിദ്യാര്‍ഥികള്‍, ആതുരസേവന രംഗത്ത് പ്രവര്‍ത്തിക്കുന്നവര്‍, വീഡിയോ മത്സര വിജയികള്‍ തുടങ്ങി 5000-ത്തിലധികം പേര്‍ ഈ മഹാസംഗമത്തില്‍ പങ്കെടുക്കും. 13ന് രാവിലെ ഒമ്പതിന് എസ്ബി കോളജ് കാവുകാട്ട് ഹാളില്‍ ആരംഭിക്കുന്ന മഹാസംഗമം കെസിബിസി പ്രസിഡന്‍റ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്ക ബാവ ഉദ്ഘാടനം ചെയ്യും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. ആര്‍ച്ച്ബിഷപ് മാര്‍ ജോസഫ് പെരുന്തോട്ടം അനുഗ്രഹ പ്രഭാഷണം നടത്തും. മഹാസമ്മേളനത്തില്‍ സീസണ്‍ 3 ഗ്രാന്‍ഡ്ഫിനാലെ വിജയികളെ ആദരിച്ച് സമ്മാനങ്ങള്‍ വിതരണം ചെയ്യും. 12ന് രാവിലെ പത്തിന് നൂറുമേനി സീസണ്‍ 3 ഗ്രാന്‍ഡ്ഫിനാലെ മത്സരം കാവുകാട്ട് ഹാളില്‍ നടക്കും. ജൂബിലി വര്‍ഷത്തില്‍ നടന്ന നൂറുമേനി മത്സരത്തില്‍ കുടുംബകൂട്ടായ്മ, ഇടവക, ഫൊറോന, റീജിയന്‍ തല മത്സരങ്ങളില്‍ ഒന്നാമതെത്തിയ അഞ്ച് ടീമുകള്‍ ഗ്രാന്‍ഡ്ഫിനാലെയില്‍ മാറ്റുരയ്ക്കും. അതിരൂപത കുടുംബ കൂട്ടായ്മ-ബൈബിള്‍ അപ്പൊസ്തലേറ്റ് അതിരൂപതാ ഡയറക്ടര്‍ ഫാ. ജോര്‍ജ് മാന്തുരുത്തില്‍, നൂറുമേനി ചെയര്‍മാന്‍ സണ്ണി ഇടിമണ്ണിക്കല്‍, പ്രഫ. ജോസഫ് ടിറ്റോ എന്നിവര്‍ നേതൃത്വം നല്‍കും.

പെട്ടിഓട്ടോ മോഷ്ടിച്ച് കടത്തിയ സംഘം പിടിയിൽ

പത്തനംതിട്ട: കുമ്പഴ മത്സ്യമാര്‍ക്കറ്റിന് മുന്നില്‍ നിര്‍ത്തിയിട്ടിരുന്ന പെട്ടി ഓട്ടോ മോഷ്ടിച്ച് കടത്തിയ കേസില്‍ രണ്ടുപേർ പിടിയിൽ. മലയാലപ്പുഴ അട്ടച്ചാക്കല്‍ ഈസ്റ്റ് താന്നിമൂട്ടില്‍ വീട്ടില്‍ സുനില്‍ തോമസ്(39), അട്ടച്ചാക്കല്‍ ഈസ്റ്റ് താന്നിമൂട്ടില്‍ വീട്ടില്‍ ജോബി തോമസ് (45) എന്നിവരാണ് അറസ്റ്റിലായത്. ഇരുവരും ബന്ധുക്കളാണ്. 15ന് രാത്രിയാണ് കുമ്പഴ കിഴക്കേ മുറിയില്‍ മോഹന്‍ ജോര്‍ജിന്‍റെ ഭാര്യയുടെ ഉടമസ്ഥതയിലുള്ള പെട്ടിഓട്ടോ മോഷണം പോവുന്നത്. സുനില്‍ പത്തനംതിട്ട പോലീസ് ഈവര്‍ഷം രജിസ്റ്റര്‍ ചെയ്ത മറ്റൊരു ക്രിമിനല്‍ കേസില്‍കൂടി പ്രതിയാണ്. പത്തനംതിട്ട ഡിവൈഎസ്പി ന്യൂമാന്‍റെ നിര്‍ദേശാനുസരണം ഇന്‍സ്പെക്ടര്‍ കെ. സുനിമോന്‍, എസ്ഐമാരായ ജി. ജോണ്‍, കെ.ആര്‍. രാജേഷ് കുമാര്‍ തുടങ്ങിയവരടങ്ങുന്ന സംഘമാണ് അറസ്റ്റ് രേഖപ്പെടുത്തിയത്.

രണ്ടുകിലോഗ്രാം കഞ്ചാവുമായി ജാര്‍ഖണ്ഡ് സ്വദേശി അറസ്റ്റില്‍

പത്തനംതിട്ട: ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തിനു പിന്നാലെ രണ്ട് കിലോയോളം കഞ്ചാവുമായി ജാര്‍ഖണ്ഡ് സ്വദേശി അറസ്റ്റില്‍. ജാര്‍ഖണ്ഡ് ടുംക റാണിശ്വര്‍ ടോണ്‍ഗ്ര മണികടിഹ് സുരേഷ് മറാണ്ടിയാണ് (18) അറസ്റ്റിലായത്. ശനിയാഴ്ച പുലര്‍ച്ചെ 1.45ന് പന്തളം ടൗണില്‍ ബസിറങ്ങിയപ്പോഴാണ് ഇയാൾ പോലീസിന്‍റെ വലയിലായത്. ജാര്‍ഖണ്ഡ് സ്വദേശികളായ മറ്റ് തൊഴിലാളികള്‍ക്കൊപ്പമാണ് ഇയാള്‍ ബസിൽ പന്തളത്ത് ഇറങ്ങിയത്. പന്തളം പോലീസ് ഇന്‍സ്‌പെക്ടര്‍ ടി.ഡി. പ്രജീഷ്, എസ്ഐ സി.വി. വിനോദ് കുമാര്‍ നടപടികള്‍ക്ക് നേതൃത്വം നല്‍കി. ചെങ്ങന്നൂര്‍ ഭാഗത്തുനിന്ന് തിരുവനന്തപുരത്തേക്കുവന്ന ബസിൽനിന്നാണ് ഇയാൾ പിടിയിലായത്. കഞ്ചാവ് എത്തിക്കുന്നുണ്ടെന്ന് രഹസ്യ വിവരം അറിഞ്ഞതിനേത്തുടര്‍ന്ന് ഡാന്‍സാഫ് ഉള്‍പ്പെടെയുള്ള പോലീസ് സംഘം പന്തളം ടൗണില്‍ നിലയുറപ്പിച്ചിരുന്നു. കഞ്ചാവ് എവിടെനിന്നുമാണ് എത്തിക്കുന്നത്, കൂട്ടാളികളുണ്ടോ തുടങ്ങിയ കാര്യങ്ങളില്‍ വിശദമായ അന്വേഷണം പുരോഗമിക്കുകയാണ്.

മൈലപ്ര പ്രവാസി സൗഹൃദ കൂട്ടായ്മ കുടുംബസംഗമം ഇന്ന്

പത്തനംതിട്ട: മൈലപ്ര പ്രവാസി സൗഹൃദ കൂട്ടായ്മയുടെ നേതൃത്വത്തില്‍ ഇന്ന് ഉച്ചകഴിഞ്ഞ് മൂന്നിന് മൈലപ്ര സെന്‍റ് ജോർജ് ഓഡിറ്റോറിയത്തില്‍ ഹാര്‍മണി 2025 എന്ന പേരില്‍ കുടുംബ സംഗമം സംഘടിപ്പിക്കും. ലോകത്തിന്‍റെ വിവിധ ഇടങ്ങളിലുള്ള മൈലപ്ര സ്വദേശികളായ പ്രവാസികള്‍ തമ്മില്‍ പരസ്പരം ആശയവിനിമയത്തിനും സൗഹൃദ വേദികള്‍ ഒരുക്കുന്നതിനും സാമൂഹ്യ പ്രതിബദ്ധത മുന്‍നിര്‍ത്തിയുള്ള പരിപാടികള്‍ സംഘടിപ്പിച്ചും പ്രവാസി സൗഹൃദ ട്രസ്റ്റ് പ്രവര്‍ത്തിച്ചുവരികയാണെന്ന് ഭാരവാഹികള്‍ പത്രസമ്മേളനത്തില്‍ പറഞ്ഞു. കുടുംബസംഗമം മന്ത്രി വീണാ ജോര്‍ജ് ഉദ്ഘാടനം ചെയ്യും. ആന്‍റോ ആന്‍റണി എംപി മുഖ്യാതിഥിയായിരിക്കും. കെ.യു. ജനീഷ് കുമാര്‍ എംഎല്‍എ മുഖ്യപ്രഭാഷണം നടത്തും. മൈലപ്ര പ്രവാസി സൗഹൃദ ട്രസ്റ്റിന്‍റെ മെംബര്‍ഷിപ്പ് വിതരണ ഉദ്ഘാടനവും സമൂഹത്തില്‍ വിവിധ ശ്രേണികളില്‍ വ്യക്തിമുദ്രപതിച്ചവര്‍ക്കുള്ള ആദരവും പ്രവാസി സ്‌നേഹസ്പര്‍ശം ചാരിറ്റി പ്രോജക്റ്റ് ഉദ്ഘാടനവും വിതരണവും ഇതോടൊപ്പം നടക്കും. മൈലപ്ര പ്രവാസി കൂട്ടായ്മയിലെ കുടുംബാഗങ്ങളുടെ കലാ പരിപാടികളും പ്രശസ്ത നാടന്‍ പാട്ട് ഗായകനും ഹോക് ലോര്‍ അക്കാഡമി ഡയറക്ടറുമായ അഡ്വ. സുരേഷ് സോമ നയിക്കുന്ന ബഡാ ബുറാ സംഗീത വിരുന്നും ഉണ്ടായിരിക്കുമെന്ന് സൗഹൃദ കൂട്ടായ്മ ട്രസ്റ്റ് പ്രസിഡന്‍റ് മുരളി എസ്. പണിക്കര്‍, സെക്രട്ടറി ലിനു, ജോയിന്‍റ് സെക്രട്ടറി അനീഷ് മൈലപ്ര, ട്രഷറര്‍ മാത്യു വർഗീസ് എന്നിവര്‍ പറഞ്ഞു.

വകുപ്പുകള്‍ ഉണര്‍ന്നു; സ്‌കൂളുകളില്‍ സുരക്ഷ ഓഡിറ്റിംഗ്

പത്തനംതിട്ട: കൊല്ലം തേവലക്കര ഗവണ്‍മെന്‍റ് ബോയ്‌സ് സ്‌കൂള്‍ വളപ്പില്‍നിന്ന് ഷോക്കേറ്റ് മിഥുന്‍ എന്ന കുട്ടി മരിച്ചതിനു പിന്നാലെ ഉത്തരവാദിത്വപ്പെട്ട സര്‍ക്കാര്‍ വകുപ്പുകള്‍ ഉണര്‍ന്നു. സംസ്ഥാനത്തെ സ്‌കൂളുകളില്‍ തിരക്കിട്ട പരിശോധനകളും അടിയന്തര യോഗങ്ങളും. ശനിയുടെ ആലസ്യം വിട്ട് ഇന്നലെയും പരിശോധനകളും യോഗങ്ങളും നടന്നു. സ്‌കൂള്‍ വളപ്പിലെ പഴയ കെട്ടിടങ്ങളുടെ കണക്കെടുപ്പ്, ശോച്യാവസ്ഥ, വൈദ്യുതി ലൈനുകളുടെ സ്ഥിതി, വയറിംഗ് ‌സംബന്ധമായ പ്രശ്‌നങ്ങള്‍, മേല്‍ക്കൂരയുടെ സ്ഥിതി, കിണറുകളുടെ സുരക്ഷിതത്വം, സ്‌കൂള്‍ കെട്ടിടങ്ങളുടെ അവസ്ഥ തുടങ്ങിയ സുരക്ഷാ പരിശോധനകള്‍ വിവിധ വകുപ്പുകള്‍ ആരംഭിച്ചു. കെഎസ്ഇബി ജീവനക്കാര്‍ തിരക്കിട്ട പരിശോധനകളിലാണ്. ചെറിയ പോരായ്മകള്‍പോലും കണ്ടെത്തി അവര്‍ റിപ്പോര്‍ട്ട് ചെയ്തുതുടങ്ങി. തദ്ദേശസ്ഥാപന എന്‍ജിനിയര്‍മാരും വീണ്ടും പരിശോധനകള്‍ക്ക് ഇറങ്ങിയിട്ടുണ്ട്. പരിശോധനകൾ പൂർത്തിയാക്കി സുരക്ഷാ ഓഡിറ്റ് റിപ്പോർട്ട് സമാഹരിച്ചു നൽകുന്നത് അതത് വിദ്യാഭ്യാസ ഓഫീസർമാരായിരിക്കും. പരിശോധനകൾ കൃത്യമെന്ന് ഉറപ്പാക്കി പ്രഥമാധ്യാപകർ റിപ്പോർട്ട് നൽകുകയും വേണം. സുരക്ഷയുമായി ബന്ധപ്പെട്ട് വിദ്യാഭ്യാസ ഓഫീസർമാർ പ്രഥമാധ്യാപകരുടെ അടിയന്തര യോഗങ്ങൾ വിളിച്ചു. പരിശോധനകള്‍ സ്‌കൂള്‍ തുറക്കുന്നതിനു മുമ്പായി നടത്തി റിപ്പോര്‍ട്ട് നല്‍കിയിരിക്കണമെന്നതായിരുന്നു നിര്‍ദേശം. പരിശോധനകള്‍ നടത്തിയോ അല്ലാതെയോ എല്ലാ സ്‌കൂളുകളും ഫിറ്റ്‌നസ് സര്‍ട്ടിഫിക്കറ്റ് വാങ്ങിയാണ് അധ്യയനം പുനരാരംഭിച്ചത്. ഫിറ്റ്‌നസ് സര്‍ട്ടിഫിക്കറ്റ് ഇല്ലെങ്കില്‍ ജൂണ്‍ മാസത്തെ ശമ്പളം മുടങ്ങുമെന്നതിനാല്‍ യാതൊരു തടസവുമില്ലാതെ ഇതു നൽകുകയും ചെയ്തു. നൂലാമാലകൾ നീക്കാൻ നിർദേശം, പഴയ കെട്ടിടങ്ങൾ പൊളിക്കും സ്കൂൾ വളപ്പുകളിലെ പഴയതും ഉപയോഗ ശൂന്യവുമായ കെട്ടിടങ്ങൾ അടിയന്തരമായി പൊളിച്ചു നീക്കാൻ നിർദേശം. വർഷങ്ങളായി അപകടാവസ്ഥയിൽ നിൽക്കുന്ന കെട്ടിടങ്ങൾ പൊളിക്കുന്നതിലേക്ക് പലയിടത്തും സ്കൂൾ അധികൃതർ അപേക്ഷ നൽകി മടുത്തിരിക്കുകയാണ്. ഇത്തരം കെട്ടിടങ്ങൾ പൊളിക്കാൻ വിദ്യാഭ്യാസ വകുപ്പ് പ്രാഥമിക അനുമതി നൽകണം. അതുപോലും പലയിടത്തും ലഭിച്ചിട്ടില്ല. വിദ്യാഭ്യാസ വകുപ്പിന്‍റെ അനുമതി ലഭിച്ചാൽ ബന്ധപ്പെട്ട തദ്ദേശസ്ഥാപന എൻജിനിയർ പരിശോധിച്ച് പൊളിച്ചുനീക്കാനുള്ള എസ്റ്റിമേറ്റ് തയാറാക്കി ടെൻഡർ വിളിക്കും. എയ്ഡഡ് സ്കൂളുകളിൽ മാനേജർക്ക് വിദ്യാഭ്യാസ വകുപ്പ് അനുമതി നൽകിയാൽ മതിയാകും. പൊളിച്ചുനീക്കലിന്‍റെ സാങ്കേതിക പ്രശ്നങ്ങളിൽ കുടുങ്ങിക്കിടക്കുന്ന കെട്ടിടങ്ങൾ പലതും പൊളിഞ്ഞുവീണു തുടങ്ങിയതോടെ ബന്ധപ്പെട്ട വകുപ്പുകൾ ഉണർന്നത്. ഓരോ സ്കൂളിലും പൊളിച്ചുനീക്കേണ്ട കെട്ടിടങ്ങളുടെ കണക്കെടുപ്പ് വീണ്ടും നടക്കുന്നുണ്ട്. നൂറ്റാണ്ട് പിന്നിട്ട കെട്ടിടങ്ങൾ‌ കവിയൂർ കെഎൻഎം ഗവൺമെന്‍റ് ഹൈസ്കൂൾ വളപ്പിലുള്ളത് 113 വർഷം പിന്നിട്ട കെട്ടിടമാണ്. സ്കൂളിന്‍റെ ആരംഭകാലത്തെ ഓഫീസ് പ്രവർത്തിച്ചിരുന്ന കെട്ടിടം ഏഴുവർഷമായി അടച്ചിട്ടിരിക്കുകയാണ്. പൊളിച്ചു നീക്കണമെന്ന ആവശ്യം സ്കൂൾ അധികൃതരും പഞ്ചായത്തു മുന്നോട്ടുവച്ചിട്ടുതന്നെ വർഷങ്ങളായി. നടപടികൾ പൂർത്തീകരിച്ച് 26നു ലേലം ചെയ്യുമെന്നാണ് ഇപ്പോൾ പറയുന്നത്. കെട്ടിടത്തിനകത്തേക്ക് ആരും കടക്കാതിരിക്കാൻ വേലി കെട്ടി സംരക്ഷിച്ചിട്ടുണ്ടെന്നുള്ളതാണ് ഏക ആശ്വാസം. കുറ്റൂർ ഗവൺമെന്‍റ് എച്ച്എസ്എസിന്‍റെ പഴയ കെട്ടിടം പൊളിച്ചു നീക്കണമെന്നാവശ്യപ്പെട്ട് കത്തു നൽകിയിട്ടും നടപടി ഉണ്ടായില്ല. നൂറുവർഷം പഴക്കമുള്ള കെട്ടിടമാണിത്. ക്ലാസ്മുറികളായി ഉപയോഗിച്ചിരുന്ന കെട്ടിടം പിന്നീട് ഓഡിറ്റോറിയമായി. രണ്ടു വർഷമായി ഉയോഗിക്കുന്നില്ല. പുതിയ കെട്ടിടം നിർമാണം പൂർത്തിയായതിനു പിന്നാലെ ക്ലാസുകൾ അങ്ങോട്ടേക്ക് മാറ്റുകയായിരുന്നു. പഴയ കെട്ടിടത്തിനു ബലക്ഷയമുണ്ടെന്ന് അധികൃതർ റിപ്പോർട്ട് ചെയ്തിരുന്നു. കുട്ടികൾ കെട്ടിടവളപ്പിൽ കയറുന്നത് ആശങ്ക ഉളവാക്കുന്നുണ്ട്. പൂട്ടിപ്പോയ കെട്ടിടം കാടുകയറി അയിരൂർ നോർത്ത് ഗവൺമെന്‍റ് എൽപി സ്കൂൾ 2002ൽ പൂട്ടിയതാണ്. കുട്ടികൾ കുറവായ സ്കൂളുകൾ നിർത്തലാക്കാൻ സർക്കാർ തീരുമാനിച്ചതോടെയാണ് സ്കൂളിനു പൂട്ടു വീണത്. എന്നാൽ സ്കൂൾ കെട്ടിടം സർക്കാർ അനാഥമാക്കി. സ്കൂൾ പൂട്ടിയതിനു പിന്നാലെ കംപ്യൂട്ടർ പരിശീലന സ്ഥാപനം തുടങ്ങിയെങ്കിലും അതും നിലച്ചു. അനാഥമായ കെട്ടിടത്തിനു ചുറ്റും ഇപ്പോൾ കാടുകയറി കിടക്കുകയാണ്. ഹരിതകർമ സേന അംഗങ്ങൾ ശേഖരിക്കുന്ന മാലിന്യങ്ങൾ കൂട്ടിവയ്ക്കുന്നത് ഇവിടെയാണ്. ആസ്ബസ്റ്റോസ് ഷീറ്റിട്ട നല്ല ക്ലാസ് മുറികളാണ് പൂട്ടുന്പോൾ സ്കൂളിനുണ്ടായിരുന്നത്. ഉപയോഗമില്ലാതെ വന്നതോടെ കെട്ടിടത്തിനു ശോച്യാവസ്ഥയായി. നിലവിൽ സ്കൂൾ പരിസരത്തേക്കു കയറാനാകാത്ത സ്ഥിതിയുണ്ട്. പൂട്ടിപ്പോയ സ്കൂളുകളുടെ കെട്ടിടങ്ങളും സ്ഥലവും കൈമാറ്റം ചെയ്യാൻ യാതൊരു നടപടിയും ഉണ്ടാകുന്നില്ല. വിദ്യാഭ്യാസ വകുപ്പിന്‍റെ സ്ഥലവും കെട്ടിടവമാണ് കാടുകയറുന്നത്. പൂട്ടിപ്പോയ എയ്ഡഡ് വിദ്യാലയങ്ങളും മാനേജ്മെന്‍റുകൾക്ക് കൈമാറിയിട്ടില്ല. പൂർത്തിയാകാത്ത സ്കൂൾ കെട്ടിടത്തിൽ മാലിന്യശേഖരണം പന്തളം:നഗരസഭാ പരിധിയിലെ കടയ്ക്കാട് തെക്ക് എസ്‌വിഎൽപി സ്കൂളിന്‍റെ പണി പൂർത്തിയാകാത്ത കെട്ടിടത്തിൽ ഹരിത കർമസേനയുടെ പ്ലാസ്റ്റിക് ശേഖരണം. നഗരസഭാ വാർഡ് പരിധിയിൽനിന്നു ശേഖരിക്കുന്ന പ്ലാസ്റ്റിക് മാലിന്യങ്ങളാണ് വർഷങ്ങളായി ഇവിടെ ശേഖരിച്ചുവയ്ക്കുന്നത്. ഇതോടെ കെട്ടിടം ക്ഷുദ്രജീവികളുടെ വാസകേന്ദ്രമായി മാറിയിട്ടുണ്ട്. സമീപത്തു സ്കൂൾ പ്രവർത്തിക്കുന്നുമുണ്ട്. കുട്ടികളുടെ സുരക്ഷയെ ബാധിക്കുന്ന വിഷയമാണെങ്കിലും അധികൃതർ ഇതു ഗൗനിച്ചിട്ടില്ല. മാലിന്യ സംഭരണത്തെത്തുടർന്ന് കെട്ടിടം തകർന്നുവീഴാറായ നിലയിലാണ്. കുട്ടികളുടെ ജീവനുപോലും ഭീഷണിയാകുന്ന മാലിന്യ നിക്ഷേപത്തിനെതിരേ പ്രക്ഷോഭത്തിനുള്ള തയാറെടുപ്പിലാണ് പ്രദേശവാസികൾ.

അയിരൂര്‍ ജില്ലാ ആയുര്‍വേദ ആശുപത്രിക്ക് ആയുഷ് കായകല്‍പ് അവാര്‍ഡ്

പത്തനംതിട്ട: ജില്ലാ തലത്തിലെ പ്രഥമ ആയുഷ് കായകല്‍പ് അവാര്‍ഡ് അയിരൂര്‍ ആയുര്‍വേദ ആശുപത്രിക്ക്. 92.78 ശതമാനം മാര്‍ക്കോടുകൂടി കമന്‍ഡേഷന്‍ അവാര്‍ഡും സമ്മാനത്തുകയായ 150000 രൂപയും കരസ്ഥമാക്കി. ഹെല്‍ത്ത് ആന്‍ഡ് വെല്‍നസ് സെന്‍റര്‍ വിഭാഗത്തില്‍ 97.92 ശതമാനം മാര്‍ക്കോടെ കല്ലേലി സര്‍ക്കാര്‍ ആയുര്‍വേദ ഡിസ്‌പെന്‍സറിയും ഹോമിയോപ്പതിയില്‍ 99.58 ശതമാനം മാര്‍ക്കോടുകൂടി അരുവാപ്പുലം സര്‍ക്കാര്‍ ഹോമിയോപ്പതി ഡിസ്‌പെന്‍സറിയും ഒന്നാം സ്ഥാനം കരസ്ഥമാക്കി. ഹോമിയോ, ആയുര്‍വേദ സ്ഥാപനങ്ങളായ തുമ്പമണ്‍ സര്‍ക്കാര്‍ ആയുര്‍വേദ ഡിസ്‌പെന്‍സറി, കുന്നന്താനം സര്‍ക്കാര്‍ ആയുര്‍വേദ ഡിസ്‌പെന്‍സറി, കവിയര്‍ സര്‍ക്കാര്‍ ആയുര്‍വേദ ഡിസ്‌പെന്‍സറി, പുതുശേരിമല സര്‍ക്കാര്‍ ഹോമിയോ ഡിസ്‌പെന്‍സറി, ചുങ്കപ്പാറ സര്‍ക്കാര്‍ ഹോമിയോ ഡിസ്‌പെന്‍സറി, പള്ളിക്കല്‍ സര്‍ക്കാര്‍ ഹോമിയോ ഡിസ്‌പെന്‍സറി തുടങ്ങിയവ ആയുഷ് ഹെല്‍ത്ത് ആന്‍ഡ് വെല്‍നസ് സെന്‍റര്‍ വിഭാഗത്തില്‍ കമന്‍ഡേഷവന്‍ അവാര്‍ഡും 30000 രൂപയും കരസ്ഥമാക്കി.

തോട്ടക്കോണം സ്കൂളിൽ ഇംഗ്ലീഷ് എന്‍‌റിച്ച്മെന്‍റ് പ്രോഗ്രാമിനു തുടക്കം

പന്തളം: വിദ്യാർഥികളുടെ ഇംഗ്ലീഷ് ഭാഷാ പരിജ്ഞാനം മെച്ചപ്പെടുത്തുക എന്ന ലക്ഷ്യത്തോടെ പൊതു വിദ്യാഭ്യാസ വകുപ്പ് നടപ്പാക്കുന്ന ഇംഗ്ലീഷ് എൻറിച്ച്മെന്‍റ് പ്രോഗ്രാമിന് തോട്ടക്കോണം ഗവ. ഹയർ സെക്കൻഡറി സ്കൂളിൽ തുടക്കം. പന്തളം നഗരസഭ കൗൺസിലർ കെ.ആർ. വിജയകുമാർ പദ്ധതിയുടെ ഉദ്ഘാടനം നിർവഹിച്ചു. പിടിഎ പ്രസിഡന്‍റ് ടി.എം. പ്രമോദ് അധ്യക്ഷത വഹിച്ചു. എസ്എംസി ചെയർമാൻ കെ.എച്ച്. ഷിജു, സ്കൂൾ പ്രൻസിപ്പൽ എൻ. ഗിരിജ, പ്രഥമാധ്യാപകൻ പി. ഉദയൻ, സിനീയർ അധ്യാപിക എൻ.ജി. ജയന്തി, അധ്യാപികമാരായ നീതു, രമ്യ, വിദ്യാർഥി പ്രതിനിധി മാസ്റ്റർ അതുൽ എന്നിവർ പ്രസംഗിച്ചു. ഇംഗ്ലീഷ് ഭാഷയെ അടുത്തറിയാനും കുട്ടികൾക്ക് ഭാഷയിൽ മികവ് നേടാനുമാണ് പദ്ധതി നടപ്പിലാക്കുന്നത്. അഞ്ച്, ആറ് ക്ലാസുകളിലെ വിദ്യാർഥികളാണ് പദ്ധതിയുടെ ഭാഗമാകുന്നത്. നടത്തിപ്പിനായി ഓരോ സ്കൂളിലേക്കും ഒരു റിസോഴ്സ് അധ്യാപകനെ നിയമിച്ചിട്ടുണ്ട്. ഡിജിറ്റൽ, വിഷ്വൽ, ഓഡിയോ രൂപത്തിൽ മൂന്ന് മാസം നീണ്ടുനിൽക്കുന്നതാണ് ക്ലാസ്. അഞ്ച്, ആറ് ക്ലാസുകളിലെ 50 കൂട്ടികൾ വീതം ഉൾപ്പെടുന്ന രണ്ട് ബാച്ചുകളായാണ് പരിശീലനം.

ചെണ്ടുമല്ലി കൃഷിയുമായി കലഞ്ഞൂർ ഗവ. എൽപി സ്കൂൾ

കലഞ്ഞൂർ: ഓണാഘോഷത്തിനാവശ്യമായ പൂവ് ഉത്പാദിപ്പിക്കുക, വിദ്യാർഥികളിൽ കാർഷികാഭിമുഖ്യവും പരിസ്ഥിതി സ്നേഹവും വളർത്തുക എന്നീ ലക്ഷ്യങ്ങളുമായി കലഞ്ഞൂർ ഗവ. എൽപി സ്കൂളിൽ ആരംഭിച്ച ചെണ്ടുമല്ലി കൃഷിയുടെ നടീൽ കർമം പ്ലാസ്ഥാനത്തുമഠത്തിൽ ആർ. കൃഷ്ണൻ പോറ്റി നിർവഹിച്ചു. ഹയർ സെക്കൻഡറി വിഭാഗം നാഷണൽ സർവീസ് സ്കീം അംഗങ്ങളാണ് കൊച്ചു കുട്ടികൾക്കായി നിലമൊരുക്കിയത്. സ്കൂൾ മാനേജിംഗ് കമ്മിറ്റി ചെയർപേഴ്സൺ ആര്യ ഷിജു അധ്യക്ഷത വഹിച്ചു. പ്രിൻസിപ്പൽ എം. സക്കീന, പ്രഥമാധ്യാപകൻ ഫിലിപ്പ് ജോർജ്, പ്രോഗ്രാം ഓഫീസർ സജയൻ ഓമല്ലൂർ, കലഞ്ഞൂർ പ്രസന്നകുമാർ, സാദിക്മോൻ, സീനിയർ അധ്യാപിക കെ.പി. ബിനിത, വിദ്യാർഥി പ്രതിനിധികളായ എൻ. ധ്രുവ്കുമാർ, എസ്. മീനാക്ഷി എന്നിവർ പ്രസംഗിച്ചു.

തുവയൂർ ഇൻഫന്‍റ് ജീസസ് സ്കൂളിൽ ഇൻവെസ്റ്റിച്ചർ സെറിമണി

തുവയൂർ: ഇൻഫന്‍റ് ജീസസ് സെൻട്രൽ സ്കൂളിൽ 2025 -26 അധ്യയനവർഷത്തെ വിവിധ ഹൗസുകളുടെയും ക്ലബ്ബുകളുടെയും പ്രവർത്തനങ്ങൾക്ക് തുടക്കംകുറിച്ചുകൊണ്ട് ഇൻവെസ്റ്റിച്ചർ സെറിമണി നടന്നു. സ്കൂൾ അസംബ്ലിയിൽ നടന്ന ചടങ്ങിൽ സ്കൂളിലെ പൂർവ വിദ്യാർഥി ഫയർ ആൻഡ് റെസ്ക്യൂ ഓഫീസർ വി. വിനോദ് കുമാർ മുഖ്യാതിഥിയായിരുന്നു. ഹെഡ് ബോയ് എസ്.ആർ. അദ്വൈത്, ഹെഡ് ഗേൾ അക്ഷര ബിമൽ എന്നിവരെ സാഷേ അണിയിച്ച് അംഗീകാരം നൽകി. ക്ലബ് ഹൗസ് ലീഡേഴ്സിനെയും സാഷേ, ബാഡ്ജ് എന്നിവ അണിയിച്ചു. ചടങ്ങിന്‍റെ ഭാഗമായി ഹൗസ് അടിസ്ഥാനത്തിലുള്ള വിദ്യാർഥികളുടെ മാർച്ച് പാസ്റ്റും നടന്നു. സ്കൂൾ പ്രിൻസിപ്പൽ സിസ്റ്റർ ഷീജ, അസിസ്റ്റന്‍റ് ഡയറക്ടർ ഫാ. സഖറിയ പുത്തൻപുരക്കൽ, വൈസ് പ്രിൻസിപ്പൽ റീന ഡാനിയേൽ, അധ്യാപകരായ മനുപ്രിയ, രജനി മേരി വർഗീസ് തുടങ്ങിയവർ പ്രസംഗിച്ചു.

ക്ഷീരകർഷകർ നേരിടുന്ന പ്രശ്നങ്ങൾ പരിഹരിക്കാൻ നടപടി: ചിറ്റയം ഗോപകുമാർ

അടൂർ: ക്ഷീരകർഷകർ നേരിടുന്ന പ്രശ്നങ്ങൾ പരിഹരിക്കുവാൻ നടപടി സ്വീകരിക്കുമെന്ന് ഡെപ്യൂട്ടി സ്പീക്കർ ചിറ്റയം ഗോപകുമാർ. ക്ഷീരവികസന വകുപ്പിന്‍റെയും മേലൂട് ക്ഷീരോത്പാദക സഹകരണ സംഘത്തിന്‍റെയും നേതൃത്വത്തിൽ നടത്തിയ കർഷക സമ്പർക്ക പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പാൽ ഉത്പാദനത്തിൽ സ്വയം പര്യാപ്തത കൈവരിക്കാൻവേണ്ടി ക്ഷീരകർഷകരെ എല്ലാ തരത്തിലും സഹായിക്കുമെന്ന് ചിറ്റയം പറഞ്ഞു. മേലൂട് ക്ഷീരോത്പാദക സഹകരണ സംഘം പ്രസിഡന്‍റ് എ.പി. ജയൻ അധ്യക്ഷത വഹിച്ചു. ബ്ലോക്ക് പഞ്ചായത്തംഗം എ.പി. സന്തോഷ്, ഗ്രാമപഞ്ചായത്ത് അംഗം ഷൈലജപുഷ്പൻ, വി.എൻ. വിദ്യാധരൻ, ബ്ലോക്ക് ക്ഷീരവികസന ഓഫീസർ കെ. പ്രദീപ് കുമാർ, ഡെയറി ഫാം ഇൻസ്ട്രക്ടർമാരായ ബാബു ശാമുവേൽ, എസ്. പ്രീത, സംഘം സെക്രട്ടറി അശ്വതി എന്നിവർ പ്രസംഗിച്ചു.

ഫുഡ്‌സ്‌കേപ്പിഗ് പദ്ധതി: മൂന്നാംഘട്ടത്തിന് തുടക്കം

പത്തനംതിട്ട: നഗരസഭ ഉറവിടമാലിന്യ സംസ്‌കരണത്തിന്‍റെ ഭാഗമായി ആരംഭിച്ച ഫുഡ്സ്‌കേപ്പിംഗ് പദ്ധതിയുടെ മൂന്നാംഘട്ട ഉദ്ഘാടനം ജില്ലാ കളക്ടറുടെ ഔദ്യോഗിക വസതിയില്‍ നഗരസഭ അധ്യക്ഷന്‍ ടി. സക്കീര്‍ ഹുസൈന്‍ നിര്‍വഹിച്ചു. ജില്ലാ കളക്ടര്‍ എസ്. പ്രേംകൃഷ്ണന്‍ വിശിഷ്ടാതിഥിയായി. ഓണക്കാലത്തേക്കുള്ള വിഷരഹിത പച്ചക്കറിയാണ് ലക്ഷ്യം. എന്‍റെ കേരളം പ്രദര്‍ശന വിപണന മേളയിലെ കുടുംബശ്രീ ഭക്ഷണശാലയിലെ ജൈവ മാലിന്യം ശേഖരിച്ച് തയാറാക്കിയ വളം കൃഷിക്ക് ഉപയോഗിക്കും. ഹരിത കര്‍മസേന പരിപാലനം ഉറപ്പു വരുത്തും. നഗരസഭ ഫാര്‍മേഴ്സ് ക്ലബ്ബിന്‍റെ സഹകരണത്തോടെയാണ് ജൈവ പച്ചക്കറിത്തോട്ടം ആരംഭിക്കുന്നത്. നഗരസഭ ആരോഗ്യ സ്ഥിരം സമിതി ചെയര്‍പേഴ്‌സന്‍ ജെറി അലക്‌സ്, അംഗ എസ്. ഷൈലജ, എഡിഎം ബി. ജ്യോതി, നഗരസഭ ഫാര്‍മേഴ്സ് ക്ലബ് സെക്രട്ടറി ചന്ദ്രനാഥന്‍, ഹരിത കേരളം ജില്ലാ കോഓര്‍ഡിനേറ്റര്‍ അനില്‍കുമാര്‍, കൃഷി ഓഫീസര്‍ ഷിബി എന്നിവര്‍ പങ്കെടുത്തു.

നഗരസഭകളിൽ ഇ മാലിന്യം വില കൊടുത്തു വാങ്ങാൻ ഹരിതകർമ സേനയ്ക്കു പദ്ധതി

പത്തനംതിട്ട: വീടുകളിലും സ്ഥാപനങ്ങളിലും നിറയുന്ന ഇ മാലിന്യം വില നൽകി ശേഖരിക്കാനൊരുങ്ങി ഹരിതകർമസേന. ഓഗസ്റ്റ് 15 വരെ നടക്കുന്ന ജില്ലയിലെ എല്ലാ നഗരസഭകളിലും ഇതു നടപ്പാക്കും. ഇതിനായി തദ്ദേശ സ്വയംഭരണ വകുപ്പിന്‍റെ നേതൃത്വത്തിൽ പ്രവർത്തനങ്ങൾ ജില്ലയിൽആരംഭിച്ചു. ക്ലീൻ കേരള കമ്പനിയാണ് ഹരിത കർമസേന വഴി ശേഖരിക്കുന്ന ഇ മാലിന്യങ്ങൾ നഗരസഭകളിൽ നിന്ന് ഏറ്റെടുക്കുന്നത്. ശുചിത്വ മിഷൻ, ഹരിതകേരള മിഷൻ, കുടുംബശ്രീ മിഷൻ എന്നിവയുടെ പൂർണ പിന്തുണയോടെയും അതാത് നഗരസഭകളുടെ നേതൃത്വത്തിലുമാണ് ശേഖരണം നടപ്പിലാക്കുന്നത്. എല്ലാ വീടുകളിൽനിന്നും സ്ഥാപനങ്ങളിൽനിന്നും ഇ മാലിന്യം ശേഖരിക്കും. മാലിന്യത്തിന്‍റെ അളവ് അനുസരിച്ച് പണം നൽകും. അപകടരമല്ലാത്ത ഇലക്ട്രോണിക്, ഇലക്ട്രിക്കൽ ഗണത്തിൽപെടുന്ന 44 ഇനങ്ങൾക്കാണ് ഹരിത കർമസേന വില നൽകി ശേഖരിക്കുന്നത്. ഓരോ ഇനത്തിനും കിലോഗ്രാം നിരക്കിലാണ് വില നൽകുന്നത്. ആദ്യഘട്ടത്തിൽ കോർപറേഷൻ, നഗരസഭ പരിധിയിലുള്ള വീടുകൾ, സ്ഥാപനങ്ങൾ എന്നിവിടങ്ങളിൽനിന്നായിരിക്കും മാലിന്യം ശേഖരിക്കുക. രണ്ടാംഘട്ടത്തിൽ പഞ്ചായത്തുകളിലേക്കും വ്യാപിപ്പിക്കും. പുനഃചംക്രമണത്തിന് യോഗ്യമായ മാലിന്യത്തിനാണ് പണം ലഭിക്കുക. ശേഖരിക്കുന്ന മാലിന്യം ഹരിതകർമസേന ക്ലീൻ കേരള കമ്പനിക്ക് കൈമാറും. കമ്പനി ഹരിത കർമ സേനാംഗങ്ങൾക്ക് ഇ മാലിന്യങ്ങളുടെ പണം നൽകും. ശേഖരിക്കേണ്ട മാലിന്യങ്ങൾ, പുനഃചംക്രമണ സാധ്യമായവ, അപകടകരമായവ, ശേഖരിക്കുമ്പോഴും കൊണ്ടുപോകുമ്പോഴും പാലിക്കേണ്ട സുരക്ഷാമാനദണ്ഡങ്ങൾ, ഇ മാലിന്യത്തിന്‍റെ വില, ഭവിഷ്യത്തുകൾ എന്നിവയിൽ ഹരിതകർമ സേനാംഗങ്ങൾക്ക് ക്ലീൻ കേരള കമ്പനി പരിശീലനവും നൽകും. നിലവിൽ അജൈവ പാഴ്‌വസ്തു ശേഖരണ കലണ്ടർ പ്രകാരം സംസ്ഥാനത്തെ തദ്ദേശ സ്ഥാപനങ്ങളിൽനിന്നും ഹരിതകർമസേന മുഖേന വർഷത്തിൽ രണ്ട് തവണ ഇ-മാലിന്യം ശേഖരിക്കുന്നതിന് ക്രമീകരണമുണ്ട്. എന്നാൽ ഇ മാലിന്യം കൃത്യമായി ഹരിതകർമസേനയ്ക്ക് കൈമാറാൻ ഉപഭോക്താക്കളെ പ്രേരിപ്പിക്കുന്നതിനായാണ് അവയ്ക്കു വില നൽകാൻ സർക്കാർ തീരുമാനിച്ചത്. ഇത്തരത്തിൽ ശേഖരിക്കുന്ന മാലിന്യം എംസിഎഫിൽ സൂക്ഷിക്കും. നിശ്ചിത ദിവസം ക്ലീൻ കേരള കമ്പനിയിലേക്ക് കൈമാറും. കമ്പനി ഇത് ശാസ്ത്രീയ പുനഃചംക്രമണത്തിന് അയയ്ക്കും. അപകടകരമായ ഇ മാലിന്യങ്ങൾ അമ്പലമുകളിലെ കേരള എൻവയോൺമെന്‍റ് ഇൻഫ്രാസ്ട്രക്ചർ ലിമിറ്റഡ് മുഖാന്തരം സംസ്കരിക്കും. അതിനുള്ള തുക നഗരസഭയിൽനിന്ന് ക്ലീൻ കേരള കമ്പനിക്ക് നൽകണം. പന്തളം നഗരസഭയിൽ ഇന്നും പത്തനംതിട്ട നഗരസഭയിൽ 21നും അടൂർ, തിരുവല്ല നഗരസഭകളിൽ 22 നും പരിശീലനം നൽകും.

മാടമൺ നടപ്പാലത്തിനു സ്ഥലപരിശോധന നടത്തി

റാന്നി: മാടമൺ നടപ്പാലത്തിന്‍റെ സ്ഥലപരിശോധന നടത്തി. പമ്പാനദിയിൽ മാടമൺ കടവുകളെ ബന്ധിപ്പിച്ച് പുതിയ നടപ്പാലം നിർമിക്കുന്നതിന് പ്രമോദ് നാരായൺ എംഎൽഎയുടെ ഫണ്ടിൽ നിന്നും അഞ്ചു കോടി രൂപയാണ് അനുവദിച്ചിരിക്കുന്നത്. മാടമൺ ശ്രീനാരായണ കൺവൻഷൻ നഗറിലേക്കുള്ള പാത എന്ന പ്രത്യേകത കൂടി ഇതിനുണ്ട്. മാടമൺ നിവാസികൾ ബസ് കയറാനും മറ്റും മറുകരയിൽ എത്തുന്നതിന് നിലവിൽ കടത്തു വള്ളത്തെയാണ് ആശ്രയിക്കുന്നത്. അല്ലെങ്കിൽ കിലോമീറ്ററുകൾ ചുറ്റി സഞ്ചരിച്ച് ബംഗ്ലാംകടവിലോ മുക്കത്തോ എത്തി വേണം പോകാൻ . എല്ലാ വർഷവും മാടമൺ ശ്രീനാരായണ കൺവൻഷൻ നടക്കുമ്പോൾ പമ്പാനദിക്ക് കുറുകെ നടപ്പാലം നിർമിച്ചാണ് ആളുകൾ കൺവൻഷൻ നഗറിലേക്ക് എത്തുന്നത്. ഇവരുടെ ബുദ്ധിമുട്ടുകൾ മനസിലാക്കിയാണ് നടപ്പാലം നിർമിക്കുന്നതിന് എംഎൽഎ ഫണ്ട് അനുവദിച്ചിരിക്കുന്നത് പൊതുമേഖലാ സ്ഥാപനമായ കെല്ലിനാണ് നിർമാണച്ചുമതല. പ്രമോദ് നാരായൺ എംഎൽഎ, പെരുനാട് ഗ്രാമപഞ്ചായത്ത് പ്രസിഡന്‍റ് പി.എസ്. മോഹനൻ, എസ്എൻഡിപി റാന്നി യൂണിയൻ അഡ്മിനിസ്ട്രേറ്റർ മണ്ണടി മോഹൻ എന്നിവരുടെ നേതൃത്വത്തിലാണ് സ്ഥല പരിശോധന നടത്തിയത്.

കൊടുമൺ ജംഗ്ഷനിലെ വെയ്റ്റിംഗ്ഷെഡ് ശോച്യാവസ്ഥയിൽ

കൊടുമൺ: എഴംകുളം - കൈപ്പട്ടൂർ റോഡിൽ കൊടുമൺ ജംഗ്ഷനിൽ സ്ഥിതിചെയ്യുന്ന വെയ്റ്റിംഗ് ഷെഡ് ശോച്യാവസ്ഥയിൽ. തിരക്കേറിയ ജംഗ്ഷനിൽ ബസുകളെ ആശ്രയിച്ചു യാത്രചെയ്യുന്ന യാത്രക്കാരും ഏറെയാണ്. ബസ് കാത്തുനിൽക്കുന്ന സ്ത്രീകളും കൈക്കുഞ്ഞുങ്ങളുമായി വരുന്നവരും അടക്കം ഏറെനേരം ബസ് കാത്തു നിൽക്കേണ്ടിവരുന്നത് ഇടുങ്ങിയ സ്ഥല സൗകര്യമുള്ള വെയ്റ്റിംഗ് ഷെഡിലാണ്. വർഷങ്ങൾക്കു മുന്പ് നിർമിച്ച വെയ്റ്റിംഗ് ഷെഡിന്‍റെ ശോച്യാവസ്ഥ അധികൃതരുടെ ശ്രദ്ധയിൽപ്പെടുത്തിയിട്ടും നടപടി ഉണ്ടാകുന്നില്ലെന്ന് യാത്രക്കാർ പറഞ്ഞു. ഏഴംകുളം - കൈപ്പട്ടൂർ റോഡ് പുനർനിർമാണത്തിനിടെ കൊടുമൺ ജംഗ്ഷനിലെ വെയ്റ്റിംഗ് ഷെഡിലെ ഇരിപ്പിടങ്ങൾ മുറിച്ചു മാറ്റി. എന്നാൽ റോഡ് പണി പൂർത്തീകരിച്ചിട്ടും വെയ്റ്റിംഗ് ഷെഡ് പുനർ നിർമിച്ചിട്ടില്ല. വെയിറ്റിംഗ് ഷെഡ് ഉപയോഗയോഗ്യമാക്കിത്തിർത്ത് യാത്രക്കാരുടെ ബുദ്ധിമുട്ടുകൾ പരിഹരിക്കുവാൻ അടിയന്തര നടപടി സ്വീകരിക്കണമെന്ന്കേരള കോൺഗ്രസ്‌ കൊടുമൺ മണ്ഡലം കമ്മിറ്റി ആവശ്യപ്പെട്ടു. പ്രസിഡന്‍റ് ബിജു ജോഷ്വായുടെ അധ്യക്ഷതയിൽ കൂടിയ യോഗം ഉന്നതാധികാര സമിതി അംഗം ഡോ. ജോർജ് വർഗീസ് കൊപ്പാറ ഉദ്ഘാടനം ചെയ്തു. ജേക്കബ് ജോർജ് കുറ്റിയിൽ, അനിൽ പി. വർഗീസ്, ജസ്റ്റസ് നാടാവള്ളിൽ, ജേക്കബ് കുറ്റിയിൽ, ഷാജി പ്ലാംകീഴ്, എബി വർഗീസ്, ബാബുജി ജോർജ്, എന്നിവർ പ്രസംഗിച്ചു.

എട്ടിന്‍റെ പണിയുമായി ടികെ റോഡ് : നവീകരണമില്ല; യാത്രക്കാർ ദുരിതത്തിൽ

‌പത്തനംതിട്ട: ജില്ലയുടെ ഹൃദയഭാഗത്തുകൂടിയുള്ള തിരുവല്ല - കുന്പഴ റോഡ് തകർച്ചയിൽ. ബിഎം ബിസി നിലവാരത്തിൽ ജില്ലയൊട്ടാകെ റോഡുകൾ നവീകരിച്ചതായി പ്രഖ്യാപനങ്ങളുണ്ടാകുന്പോഴാണ് സംസ്ഥാന പാത എട്ടിനോടുള്ള അവഗണന. ബിഎം ബിസി ടാറിംഗ് ആദ്യഘട്ടത്തിൽ നടത്തിയ റോഡുകളിലൊന്നാണിത്. ഒന്പതു വർഷം മുന്പാണ് റോഡ് അവസാനം മെച്ചപ്പെടുത്തിയത്. യുഡിഎഫ് സർക്കാരിന്‍റെ അവസാനകാലഘട്ടത്തിൽ റോഡ് നിർമാണത്തിന് അനുമതി നൽകി പണികൾ പൂർത്തീകരിച്ച് പിന്നീടു വന്ന എൽഡിഎഫ് സർക്കാർ ഉദ്ഘാടനം ചെയ്തു. അഞ്ചുവർഷത്തെ കരാറിലായിരുന്നു നിർമാണം. ഇതു കഴിഞ്ഞശേഷം അറ്റകുറ്റപ്പണികൾ ഇല്ലാതായതോടെ റോഡ് തകർന്നു തുടങ്ങി. മഴ കൂടി ആരംഭിച്ചതോടെ തിരക്കേറിയ പാതയിൽ യാത്ര നന്നേ ബുദ്ധിമുട്ടായി. ദീർഘദൂര ബസുകളടക്കം കെഎസ്ആർടിസിയുടെ അന്പതിലധികം ഷെഡ്യൂളുകൾ ദിവസവും കടന്നു പോകുന്ന പാതയാണിത്. ഇതുകൂടാടെ സ്വകാര്യബസുകളും ടികെ റോഡിൽ ഇടതടവില്ലാതെ പായുന്നു. പല പ്രധാന പാതകളും വിവിധയിടങ്ങളിലായി ടികെ റോഡുമായി സന്ധിക്കുന്നതോടെ തിരക്ക് വർധിക്കും. ചരക്ക് വാഹനങ്ങളും സ്വകാര്യ വാഹനങ്ങളും ടൂറിസ്റ്റ്, ടാക്സി വാഹനങ്ങളും അടക്കം തിരക്കേറിയ പാതയിൽ തിരുവല്ല മുതൽ പത്തനംതിട്ട വരെ നിരവധി പ്രധാന ജംഗ്ഷനുകളാണുള്ളത്. കൂടാതെ റാന്നി, ചെങ്ങന്നൂർ, മല്ലപ്പള്ളി തുടങ്ങിയ സ്ഥലങ്ങളിൽ നിന്നുള്ള റോഡുകൾ പലയിടങ്ങളിലായി ടികെ റോഡുമായി സന്ധിക്കുന്നുണ്ട്. പത്തനംതിട്ട ജില്ല ആസ്ഥാനത്തു നിന്ന് എംസി റോഡുമായി ബന്ധപ്പെട്ട യാത്രകൾക്ക് പ്രധാനമായും ആശ്രയിക്കുന്നത് ടികെ റോഡിനെയാണ്. നെടുന്പാശേരി വിമാനത്താവളം, ചെങ്ങന്നൂർ, തിരുവല്ല റെയിൽവേ സ്റ്റേഷൻ യാത്രക്കാരും ഈ റോഡാണ് ഉപയോഗിക്കുന്നത്. റോഡിന്‍റെ തകർച്ചയോടെ ഗതാഗതക്കുരുക്കും രൂക്ഷമായി. കുഴികളിൽ വാഹനങ്ങൾ ബ്രേക്ക് ചവിട്ടി ഇറങ്ങിക്കയറി വരുന്പോഴേക്കും വാഹനങ്ങളുടെ നിര രൂപപ്പെടുകയും ഗതാഗതക്കുരുക്കിനു കാരണമാകുകയും ചെയ്യുന്നു. അപകടസാധ്യത ഏറെയുള്ള ഭാഗങ്ങളിലാണ് റോഡ് തകർച്ച പൂർണമായിരിക്കുന്നത്. ഈ ഭാഗത്ത് അടിയന്തര അറ്റകുറ്റപ്പണികളും ആവശ്യമാണ്. 2015ലാണ് തിരുവല്ല- കുമ്പഴ 33 കിലോമീറ്റർ പാതയുടെ നിർമാണം ആരംഭിച്ചത്. അതേവരെ നിലനിന്ന അലെയ്ൻമെന്‍റിൽ നേരിയ മാറ്റങ്ങൾ വരുത്തിയ ശേഷം പഴയ റോഡ് പൊളിച്ച് ആധുനിക രീതിയിൽ പുതിയ പാത നിർമിച്ചത്. നിർമാണം ഇഴഞ്ഞുനീങ്ങിയതിനാൽ 2016ൽ തെരഞ്ഞെടുപ്പ് പ്രഖ്യാപനം വരുന്നതിനു ദിവസങ്ങൾക്കു മുമ്പുമാത്രമാണ് പൂർത്തീകരിച്ചത്. പിണറായി സർക്കാർ അധികാരത്തിൽ വന്നതോടെ കൊട്ടിഘോഷിച്ച് ഉദ്ഘാടനം ചെയ്തു. പ്രതികൂല കാലാവസ്ഥയും രണ്ട് വെള്ളപ്പൊക്കവും അതിജീവിച്ചാണ് ഒന്പതു വർഷം പാത നിലനിന്നത്. റോഡു നിറയെ കുണ്ടും കുഴിയും ടികെ റോഡിന്‍റെ പ്രധാന ജംഗ്ഷനുകൾ കേന്ദ്രീകരിച്ചാണ് കുഴികൾ ഏറെയും രൂപപ്പെട്ടിരിക്കുന്നത്. പത്തനംതിട്ടയ്ക്കും ഇലന്തൂരിനും മധ്യേ വാര്യാപുരം മുതൽ റോഡ് തകർച്ച നേരിടുകയാണ്. പത്തനംതിട്ട ടൗൺ ഭാഗത്തും റോഡ് മോശമല്ലാത്ത സ്ഥിതിയിലാണ്. കുന്പഴ ഭാഗം ഇതിനോടകം പല തവണ അറ്റകുറ്റപ്പണികൾ നടത്തി. ഇലന്തൂർ നെടുവേലി ജംഗ്ഷനിൽ വൻ കുഴികളാണ് റോഡിൽ രൂപപ്പെട്ടിരിക്കുന്നത്. ഓമല്ലൂർ റോഡ് കൂടി വന്നുചേരുന്ന ഭാഗത്തെ കുഴികൾ ഇതിനോടകം പല അപകടങ്ങൾക്കും കാരണമായി. ഇരുചക്ര വാഹന യാത്രക്കാരാണ് ഏറെയും അപകടത്തിൽപ്പെടുന്നത്. ഇലന്തൂർ മുതൽ നെല്ലിക്കാല വരെയുള്ള ഭാഗത്ത് റോഡിന്‍റെ സ്ഥിതി ഏറെ ശോചനീയമാണ്. നല്ല റോഡാണെന്ന് കരുതി വാഹനം അതിവേഗം ഓടിക്കുന്നവർക്ക് മുന്നിൽ അപ്രതീക്ഷിതമായാണ് ഗട്ടർ പ്രത്യക്ഷപ്പെടുക. വാഹനം ഒഴിക്കാൻ ശ്രമിക്കുന്നത് അപകടത്തിന് കാരണമാകും. ഇരുചക്രവാഹന യാത്രക്കാരെയണ് ഇത്തരം കുഴികൾ ഏറെ ബാധിക്കുന്നത്. വേഗത്തിൽ വരുന്ന വാഹനം കുഴി ഒഴിവാക്കി ഓടിക്കാൻ ശ്രമിക്കുന്നത് അപകടം വരുത്തിവയ്ക്കും. കുഴിയിൽ ചാടി നിയന്ത്രണംവിട്ട് അപകടങ്ങൾക്കുള്ള സാധ്യതയും ഏറെയാണ്. കാരംവേലി, തെക്കേമല, കോഴഞ്ചേരി ഭാഗങ്ങളിലും റോഡിന്‍റെ സ്ഥിതി ശോചനീയമാണ്. കോഴഞ്ചേരിക്കും ഇരവിപേരൂരിനും മധ്യേ പല സ്ഥലങ്ങളിലും കുഴികൾ രൂപപ്പെട്ടിട്ടുണ്ട്. ഭാഗിക നിർമാണങ്ങൾ ടികെ റോഡുമായി ബന്ധപ്പെട്ട് ഇടയ്ക്കു നടത്തിയ ചില നിർമാണങ്ങൾ തകർച്ച രൂക്ഷമാക്കി. പൈപ്പ് പൊട്ടിയതുമായി ബന്ധപ്പെട്ട കുഴി അടയ്ക്കൽ, ഓടകൾ അടഞ്ഞത്, സമീപന റോഡുകളിൽ നിന്നുള്ള വെള്ളം ഒഴുക്ക്, കലുങ്ക് നിർമാണങ്ങൾ ഇവയാണ് സംസ്ഥാന പാതയുടെ തകർച്ച വേഗത്തിലാക്കിയത്. ഇലന്തൂർ ജംഗ്ഷനു സമീപം കലുങ്ക് നിർമാണത്തിനുശേഷം റോഡ് ഉയർത്തി ടാർ ചെയ്യാതെ വന്നതോടെ ഇതിനു രണ്ടു വശങ്ങളും തകർന്നു. കലുങ്കുകളും ഓടകളും മാസങ്ങളായി അടഞ്ഞു കിടക്കുകയാണ്. നേരത്തേ പൈപ്പ് പൊട്ടി രൂപപ്പെട്ട കുഴി ടാർ ചെയ്ത് അടച്ച ഭാഗം ഉയർന്നും താഴ്ന്നും നിൽക്കുന്നു. അവിടെനിന്നും 300 മീറ്റർ ഭാഗം അറ്റകുറ്റപ്പണികൾ നടത്തിയെങ്കിലും പൂർണമായും നിരപ്പല്ല. ബിഎം ബിസി നിലവാരത്തിലല്ല പണികൾ നടന്നത്. ഇടയ്ക്ക് പൈപ്പ് ഇടാനും മറ്റും പാത്തി പോലെ ടാർ ഇളക്കി മാറ്റിയത് അടച്ചിട്ടുണ്ടെങ്കിലും കുഴി പൂർണമായും മൂടിയിട്ടില്ല. ഇലന്തൂർ പാലച്ചുവട്ടിൽ വെള്ളക്കെട്ട് നിലനിന്നിരുന്ന ഭാഗം ഒരു വർഷം മുമ്പ് ടാർ ഇളകി വശങ്ങളിൽ ഓടയും കലുങ്കും നിർമിച്ച ശേഷം റോഡ് അല്പം ഉയർത്തി സാധാരണ രീതിയിലാണ് ടാർ ചെയ്തിരുന്നത്. നിലവാരമുള്ള പാതയിൽ നിന്നും പഴയ രീതിയിൽ നിർമിച്ച ഭാഗത്തേക്ക് വാഹനം കയറുമ്പോൾ കുലുക്കം ഏറെയാണ്. വാഹനം ഇടതു വശത്തു കൂടി വേഗത്തിൽ പത്തനംതിട്ടയിലേക്ക് പായുമ്പോൾ പാലച്ചുവടിനും മിൽമാ പടിക്കും മധ്യേ റോഡ് പൊട്ടിക്കിടക്കുന്നതു കാണാം. അടുത്തുവരുമ്പോൾ മാത്രമെ ഇത് ദൃഷ്ടിയിൽപ്പെടുകയുള്ളൂ. ഇരുചക്രവാഹന യാത്രക്കാർ പൊളിഞ്ഞ ഭാഗം ഒഴിവാക്കാൻ ശ്രമിച്ചാൽ പിന്നാലെ വരുന്ന വാഹനങ്ങൾ തട്ടി അപകടത്തിൽപ്പെടാം. വാര്യാപുരം വളവ് നേരേയാക്കാൻ പദ്ധതികൾ ഏറെയുണ്ടായെങ്കിലും നടപ്പായില്ല. വളവ് കഴിഞ്ഞത്തുന്ന ഭാഗത്തെ ഇറക്കവും അപകട മേഖലയായി മാറിയിരിക്കുകയാണ്. പുല്ലാട്, ഇരവിപേരൂർ, മഞ്ഞാടി തുടങ്ങിയ സ്ഥലങ്ങളിൽ സമീപകാലത്തു നടന്ന കലുങ്ക് നിർമാണങ്ങളേ തുടർന്ന് ടാറിംഗ് ശരിയായ രീതിയിൽ നടക്കാതെ വരുന്പോൾ കുഴികൾ രൂപപ്പെട്ട് തകർച്ച പൂർണമാകുന്ന സ്ഥിതിയാണ്.

ബിലീവേഴ്സ് ചർച്ച് മെഡിക്കൽ കോളജ് യൂണിയൻ ഉദ്ഘാടനം

തിരുവല്ല: ബിലീവേഴ്സ് ചർച്ച് മെഡിക്കൽ കോളജിൽ 2025- 2026 വർഷത്തെ കോളജ് യൂണിയൻ ഉദ്ഘാടനം ഡയറക്ടറും സിഇയുമായ ഡോ.ജോർജ് ചാണ്ടി മറ്റീത്ര നിർവഹിച്ചു. കേരള ആരോഗ്യ സർവകലാശാല സെനറ്റ് അംഗവും ബിലീവേഴ്സ് ചർച്ച് മെഡിക്കൽ കോളജ് ആശുപത്രി മാനേജറുമായ ഫാ. സിജോ പന്തപ്പള്ളിൽ അധ്യക്ഷത വഹിച്ചു. പ്രിൻസിപ്പൽ ഡോ.എലിസബത്ത് ജോസഫ്, വൈസ് പ്രിൻസിപ്പൽമാരായ ഡോ.വിജയമ്മ , ഡോ.ഏബൽ കെ.സാമുവൽ , സ്റ്റുഡൻസ് യൂണിയൻ അഡ്വൈസർ ഡോ.ജേക്കബ് ജസുറാൻ, ഫാ.തോമസ് വർഗീസ്, വൈസ് ചെയർപേഴ്സൺ യൂസഫ് ഹുസൈൻ എന്നിവർ പ്രസംഗിച്ചു.

പുഷ്പഗിരി നഴ്സിംഗ് കോളജിൽ ബിരുദദാനവും കോളജ് ദിനാഘോഷവും

തിരുവല്ല: പുഷ്പഗിരി നഴ്സിംഗ് കോളജിൽ ബിരുദ ദാനവും കോളജ് ദിനാഘോഷവും ഇന്നു രാവിലെ 10 ന് കോളേജ് ഓഫ് നഴ്സിംഗ് ഓഡിറ്റോറിയത്തിൽ നടക്കും. കേരള യൂണിവേഴ്സിറ്റി ഓഫ് ഹെൽത്ത് സയൻസിന്‍റെ വിദ്യാർഥി കാര്യാലയ വിഭാഗത്തിന്റെ മേധാവിയും എൻഎസ്എസ് പ്രോഗ്രാം കോർഡിനേറ്ററുമായ ഡോ. ആർ. ആശിശ് ഉദ്ഘാടനവും ബിരുദ ദാന സർട്ടിഫിക്കറ്റ് വിതരണവും നിർവഹിക്കും. തിരുവല്ല അതിരൂപതാധ്യക്ഷൻ ഡോ. തോമസ് മാർ കൂറിലോസ് മെത്രാപ്പോലീത്ത അനുഗ്രഹ പ്രഭാഷണം നടത്തും. പുഷ്പഗിരി മെഡിക്കൽ സൊസൈറ്റി സിഇഒ ഫാ. ഡോ. ബിജു വർഗീസ് പയ്യമ്പള്ളിൽ അധ്യക്ഷത വഹിക്കും. ഉച്ചകഴിഞ്ഞ് രണ്ടിന് വിദ്യാർഥികളുടെ വിവിധ കലാപരിപാടികളും കഴിഞ്ഞ അധ്യയന വർഷത്തിൽ മികച്ച വിജയം കരസ്ഥമാക്കിയ വിദ്യാർഥികൾക്കുള്ള അനുമോദനവും നടക്കും.

പരാതി നൽകി

മണ്ണടി: വെടിവഴിപാടിനിടെ വെടിമരുന്നിനു തീ പിടിച്ച് കരാറുകാരന് പൊളളലേറ്റ സംഭവത്തിൽ അന്വേഷണം നടത്തണമെന്നാവശ്യപ്പെട്ട് ഡിവൈഎസ്പിയ്ക്ക് പരാതി. എസ്എൻഡിപി യോഗം മണ്ണടി 169-ാം നമ്പർ ശാഖായോഗം ഭാരവാഹികളാണ് പരാതി നൽകിയത്. ഇന്നലെ രാവിലെ 11നാണ് വെടിമരുന്നിന് തീ പിടിച്ച് മണ്ണടി മുളമൂട്ടില്‍ അരവിന്ദാക്ഷന്‍ പിള്ളയ്ക്കു പൊളളലേറ്റത്. ക്ഷേത്രത്തില്‍ വെടിവഴിപാട് നടക്കുന്നതിനിടെയാണ് സംഭവം. കൈയ്ക്കും കാലിനുമാണ് പരിക്ക്. ഇദ്ദേഹത്തെ തിരുവനന്തപുരം മെഡിക്കൽ കോളജിൽ പ്രവേശിപ്പിച്ചു.

കോളജ് റോഡിന് മൂന്നു കോടി രൂപയുടെ ഭരണാനുമതി

തിരുവല്ല: മാർത്തോമ്മ കോളജ് റോഡിന്‍റെ നിർമാണത്തിന് മൂന്നു കോടി രൂപയുടെ ഭരണാനുമതി ലഭിച്ചതായി മാത്യു ടി. തോമസ് എംഎൽഎ അറിയിച്ചു. മഴക്കാലത്ത് വെളളം കയറി ഗതാഗത തടസം ഉണ്ടാകുന്ന കോളജ് ഹോസ്റ്റലിന്‍റെ ഭാഗത്തു ഡ്രെയിനേജും കലുങ്ക് നിർമാണവും ആവശ്യമുള്ള സ്ഥലങ്ങളിൽ ഉയർത്തി സംരക്ഷണഭിത്തി നിർമിക്കുന്നതിനും ബിഎം ബിസി ടാറിംഗ് നടത്താനുമുള്ള പദ്ധതിക്കാണ് അനുമതി ലഭിച്ചിട്ടുള്ളത്. കുറ്റപ്പുഴയിൽ നിന്നും മാർത്തോമ്മ കോളജിന്‍റെ മുമ്പിൽ കൂടി കുറ്റപ്പുഴ പാലം ഭാഗത്തും കിഴക്കൻ മുത്തൂരിലും മല്ലപ്പള്ളി റോഡിൽ എത്തിച്ചേരുന്ന വിധമാണ് പദ്ധതി. 2025- 26 വർഷത്തെ ബജറ്റിൽ ഇതിനായി ഇരുപത് ശതമാനം തുക വകകൊള്ളിച്ചിരുന്നു. 1.6 കിലോ മീറ്റർ നീളത്തിലാണ് നിർമാണം നടത്തുന്നത്. തിരുവല്ലയിലെ പ്രധാന വിദ്യാഭ്യാസ സ്ഥാപനമായ മാർത്തോമ്മ കോളജിലേക്കുള്ള പ്രധാന വഴിയെന്ന നിലയിൽ തിരുവല്ല - മല്ലപ്പള്ളി റോഡിന്‍റെ ബൈപാസായും ഇതുപയോഗിക്കാവുന്നതാണ്.

ജനറൽ ആശുപത്രി സംവിധാനങ്ങൾ മാറ്റുന്നതിന് എച്ച്എംസി അംഗീകാരം

ബി ആൻഡ് സി ബ്ലോക്ക് അറ്റകുറ്റപ്പണികൾ നവംബറിൽ പൂർത്തിയാകുമെന്ന് മന്ത്രി പത്തനംതിട്ട: ജനറൽ ആശുപത്രിയുടെ ബി ആൻഡ് സി ബ്ലോക്ക് അറ്റകുറ്റപ്പണികൾക്കായി അടച്ചിടുന്ന സാഹചര്യത്തിൽ ശസ്ത്രക്രിയ വിഭാഗങ്ങൾ കോന്നി സർക്കാർ മെഡിക്കൽ കോളജിലേക്ക് മാറ്റുന്നതിന് ആശുപത്രി മാനേജ്മെന്‍റ് കമ്മിറ്റി അംഗീകാരം നൽകി. 23നകം ബി ആൻഡ് സി ബ്ലോക്കിലെ ശസ്ത്രക്രിയ യൂണിറ്റുകൾ കോന്നി മെഡിക്കൽ കോളജിലെത്തിച്ച് പ്രവർത്തിപ്പിച്ചു തുടങ്ങുമെന്നും നവംബറിൽ കെട്ടിടം പൂർത്തീകരിച്ച് ഉപകരണങ്ങൾ തിരികെ എത്തിക്കുമെന്നും മന്ത്രി വീണാ ജോർജ് യോഗത്തെ അറിയിച്ചു. പ്രധാന ശസ്ത്രക്രിയ വിഭാഗങ്ങളായ ഒബ്സ്റ്റട്രിക്സ് ആൻഡ് ഗൈനക്കോളജി, അസ്ഥിരോഗവിഭാഗം, ജനറൽ സർജറി, ഇഎൻടി എന്നിവയാണ് മെഡിക്കൽ കോളജിലേക്ക് മാറ്റുന്നത്.കോന്നി മെഡിക്കൽ കോളജുമായി ചേർത്ത് ഇവ ഒറ്റ യൂണിറ്റായി പ്രവർത്തിപ്പിക്കും. ഒപി വിഭാഗം ജനറൽ ആശുപത്രിയിൽ പ്രവർത്തിക്കുമെങ്കിലും ശസ്ത്രക്രിയകൾ മെഡിക്കൽ കോളജിലായിരിക്കും. ഗൈനക്കോളജി വിഭാഗം പ്രവർത്തനം പൂർണമായി മെഡിക്കൽ കോളജിലാകും. ജനറൽ ആശുപത്രിയിൽ നിന്നു ഡോക്ടർമാരെ ഷിഫ്റ്റ് അടിസ്ഥാനത്തിൽ മെഡിക്കൽ കോളജിലേക്ക് നിയമിക്കും. 47 ഹെഡ്നഴ്സുമാരടക്കമുള്ളവരെയും മെഡിക്കൽ കോളജിലേക്ക് താത്കാലികമായി മാറ്റും. ആശുപത്രി മാറ്റം സംബന്ധിച്ച് ആരോഗ്യ വകുപ്പ് സെക്രട്ടറി രാജൻ ഖൊബ്രഗഡെ വിശദമായ ഉത്തരവിറക്കിയിട്ടുണ്ട്. ജനറൽ ആശുപത്രി ഒപിയിൽ ചികിത്സയ്ക്കെത്തുന്നവരിൽ അടിയന്തര ശസ്ത്രക്രിയ വേണ്ടവരെ സൗജന്യമായി ആംബുലൻസിൽ അവിടെ എത്തിക്കാനാണ് തീരുമാനം. ജനറൽ ആശുപത്രിയിൽ എച്ച്എംസി നിയോഗിച്ചിട്ടുള്ള കരാർ ജീവനക്കാരുടെ ജോലി സംബന്ധിച്ച് പഠിക്കുന്നതിനും പിരിച്ചുവിട്ടവരെ തിരിച്ചെടുക്കുന്നതുമായ വിഷയം പരിശോധിക്കാനുമായി ഒന്പതംഗം സബ്കമ്മിറ്റിയെ ചുമതലപ്പെടുത്തി. ആശുപത്രിയിലെ ഒരു ഡോക്ടർക്കെതിരേ ഉ‍യർന്ന കൈക്കൂലി ആരോപണങ്ങൾ സംബന്ധിച്ച് എച്ച്എംസി യോഗത്തിൽ ആരോപണമുയർന്നു.

കെഎസ്ആർടിസി ബസ് മതിലിൽ ഇടിച്ചു, യാത്രക്കാർക്കു പരിക്ക്

റാന്നി: കെഎസ്ആർടിസി ബസ് മതിലിലേക്ക് ഇടിച്ചു കയറി യാത്രക്കാർക്ക് പരിക്ക്. തിരുവല്ലയിൽ നിന്നും റാന്നിയിലേക്ക് വന്ന കെഎസ്ആർടിസി ബസ് കുന്പളന്താനം - റാന്നി റോഡിൽ അങ്ങാടി ഉന്നക്കാവ് പോസ്റ്റ് ഓഫീസിന് സമീപമാണ് ഇന്നലെ ഉച്ചയ്ക്ക് 12.30 ടെ അപകടത്തിൽപ്പെട്ടത്. അങ്ങാടി ഗ്രാമപഞ്ചായത്തംഗം ഏലിയാമ്മ ഷാജിയുടെ വീടിന്‍റെ മതിലിലാണ് ബസ് ഇടിച്ചു കയറിയത്. കെഎസ്ആർ‌ടിസി ബസിന്‍റെ എതിർദിശയിൽ നിയന്ത്രണംവിട്ടുവന്ന കാർ ഇടിക്കാതിരിക്കാൻ വെട്ടിച്ചതിനേ തുടർന്ന് മതിലിലേക്ക് ഇടിച്ചു കയറുകയായിരുന്നു. ബസിന്‍റെ മുൻഭാഗം പൂർണമായി തകർന്നു. ബസിലുണ്ടായിരുന്ന പതിനഞ്ചോളം യാത്രക്കാർക്കും ബസ് ജീവനക്കാർക്കും പരിക്കേറ്റു. ഇവരെ റാന്നി താലൂക്ക് ആശുപത്രിയിൽ പ്രവേശിപ്പിച്ചു. കരിയംപ്ലാവ് പുതുപറന്പിൽ മറിയാമ്മ സാജൻ (40), കരികുളം സ്വദേശികളായ ലക്ഷി (25), മീനാകുമാരി( 42), മുത്തൂർ ഷാജി മൻസിലിൽ ഷാജി മോൻ(62), പൂവന്‍മല വളയ്ക്കാട്ട് ജോണ്‍(76),ചേത്തയ്ക്കല്‍ കാക്കനാട്ട് വിജയന്‍പിള്ള (61),ഇടമണ്‍ അരുവിക്കുഴിയില്‍ റെയ്ച്ചല്‍(48), വെച്ചൂച്ചിറ കുളത്തുങ്കല്‍ സുബിന്‍ (25), വൃന്ദാവനം മുണ്ടപ്പള്ളി ബിന്ദു (39), ജോബിയ(13), ഉതിമൂട് വേങ്ങമൂട്ടില്‍ സണ്ണി വി.ജോര്‍ജ്(52), ജിനോ(21), റാന്നി ചാമക്കാലയില്‍ ജലജ(54), അടൂര്‍ ചരിവുവിള പുത്തന്‍വീട്ടില്‍ കരണ്‍(21), കണ്ടംരൂര്‍ ഉപ്പോലില്‍ മധു(53), കക്കുടിമണ്‍ പതാലിപ്പറമ്പില്‍ പി.എ തോമസ് (73), ഇടമുറി പുള്ളോലില്‍ സജിനി(21) എന്നിവർക്കാണ് പരിക്കേറ്റത്. ആരുടെയും പരിക്ക് ഗുരുതരമല്ല.

ഉമ്മൻ ചാണ്ടിയെ അനുസ്മരിച്ച് നാട്

‌പത്തനംതിട്ട: സാധാരണ ജനങ്ങളോടൊപ്പം ജീവിക്കുകയും അവരുടെ സുഖദുഃഖങ്ങളിൽ പങ്കാളിയാകുകയും ചെയ്ത മഹനായ മനുഷ്യസ്നേഹിയായിരുന്നു ഉമ്മൻ ചാണ്ടിയെന്ന് കെപിസിസി അംഗം പി. മോഹൻ രാജ്. മുൻ മുഖ്യമന്ത്രി ഉമ്മൻ ചാണ്ടിയുടെ രണ്ടാമത് അനുസ്മരണ സമ്മേളനം പത്തനംതിട്ട ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ പ്രകാശധാര സ്കൂളിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ജെറി മാത്യു സാം അധ്യക്ഷത വഹിച്ചു. തുമ്പമൺ ഭാഭാസനാധിപൻ ഡോ. ഏബ്രാഹാം മാർ സെറാഫിം മെത്രാപ്പോലീത്ത മുഖ്യ പ്രഭാഷണം നടത്തി. ഫാ. റോയി വർഗീസ്, ഡിസിസി വൈസ് പ്രസിഡന്‍റ് എ. സുരേഷ് കുമാർ, സാമുവൽ കിഴക്കുപുറം, കെ.ജി. അനിത, വിജയ് ഇന്ധുചൂഡൻ, മണ്ഡലം കോൺഗ്രസ് പ്രസിഡന്‍റുമാരായ റെനീസ് മുഹമ്മദ്, ജോമോൻ പുതുപറമ്പിൽ, കെ.പി. മുകുന്ദൻ, എം.കെ. മണികണ്ഠൻ തുടങ്ങിയവർ പ്രസംഗിച്ചു. ബ്ലോക്ക് കോൺഗ്രസ് കമ്മിറ്റി പ്രകാശധാര സ്കൂളിന് വാട്ടർപ്യൂരിഫയർ മെഷീൻ ഡോ. ഏബ്രഹാം മാർ സെറാഫിം മെത്രാപ്പോലീത്തയ്ക്കു കൈമാറി. കോന്നി: ഉമ്മൻ ചാണ്ടിയുടെ രണ്ടാമത് ചരമവാർഷിക ദിനത്തിൽ ഓർമ്മയിൽ കുഞ്ഞൂഞ്ഞ് എന്ന പരിപാടിയുടെ ഭാഗമായി കോന്നി മണ്ഡലത്തിലെ എല്ലാ വാർഡ് കേന്ദ്രങ്ങളിലും ഛായാചിത്രത്തിൽ പുഷ്പാർച്ചനയും അനുസ്മരണവും നടത്തി. മണ്ഡലം തല ഉദ്ഘാടനം അട്ടച്ചാക്കൻ ജംഗ്ഷനിൽ ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ദീനാമ്മ റോയി നിർവഹിച്ചു. കോൺഗ്രസ് ഭവനിൽ നടത്തിയ അനുസ്മരണ സദസ് മുതിർന്ന കോൺഗ്രസ് നേതാവ് മണ്ഡലം സെക്രട്ടറി റ്റി.കെ. ബഷീർ ഉദ്ഘാടനം ചെയ്തു. മണ്ഡലം പ്രസിഡന്‍റ് പ്രവീൺ പ്ലാവിളയിൽ അധ്യക്ഷത വഹിച്ചു. എസ്. സന്തോഷ് കുമാർ, റോജി ഏബ്രഹാം, ഐവാൻ വകയാർ, രാജീവ് മള്ളൂർ, ജയപ്രകാശ് കോന്നി, സി.കെ ലാലു, ഷിജു അറപ്പുരയിൽ, പി. വി. ജോസഫ്, ജഗറുദ്ദീൻ, ഡെയ്സി, ജോളി തോമസ്, സജി തോമസ്, തോമസ് കുട്ടി എന്നിവർ പ്രസംഗിച്ചു. ഇന്ന് ഉച്ചയ്ക്ക് കോന്നി ഗാന്ധിഭവൻ ദേവലോകത്തിലെ അന്തേവാസികളോടൊപ്പം സ്നേഹ കൂട്ടായ്മയും താലൂക്ക് ആശുപത്രിയിലെ കിടപ്പ് രോഗികൾക്ക് സ്നേഹപൊതി വിതരണവും നടത്തും. നാളെ വൈകുന്നേരം നാലിന് കോന്നി ടൗണിൽ സ്നേഹ സംഗമം പ്രാർഥനസദസ് എന്നിവ നടത്തും. അടൂർ. മുൻ മുഖ്യ മന്ത്രി ഉമ്മൻ ചാണ്ടിയുടെ രണ്ടാം ചരമ വാർഷിക ത്തോടനു ബന്ധിച്ച് കോൺഗ്രസ്‌ - ഐ മണ്ഡലംകമ്മിറ്റിയുടെ നേതൃത്വത്തിൽ അടൂർ ജനറൽ ആശുപത്രിയിൽ രോഗികൾക്കും കൂട്ടിരിപ്പുകാർക്കും പ്രഭാത ഭക്ഷണം വിതരണം ചെയ്തു. മണ്ഡലം പ്രസിഡന്‍റ് ഷിബു ചിറക്കരോട്ടിന്‍റെ അധ്യക്ഷതയിൽ കോട്ടമുകൾ ജുമാ മസ്ജിദ് ഇമാം മുഹമ്മദ്‌ മുഹ്സിൻ അൽ ഖാസിമി അനുസ്മരണപ്രഭാഷണം നടത്തി. ഫാ. അജി ചെറിയാൻ, ഏഴംകുളം അജു, ബിജു വർഗീസ്, ഉമ്മൻ തോമസ്, ബാബു ദിവാകരൻ,കുഞ്ഞുഞ്ഞമ്മ ജോസഫ്,നിസാർ കാവിളയിൽ, സി. ടി. കോശി, കെ. പി. ആനന്ദൻ തുടങ്ങിയവർ പ്രസംഗിച്ചു. പന്തളം:കേരള കൺസ്ട്രക്ഷൻ ജനറൽ വർക്കേഴ്സ് കോൺ ഗ്രസ് (ഐഎൻടിയുസി) ജില്ലാ കമ്മിറ്റിയുടെ ആഭിമുഖ്യത്തിൽ മുൻ മുഖ്യമന്ത്രി ഉമ്മൻചാണ്ടിയുടെ രണ്ടാംഅനുസ്മരണ സമേളനം സംസ്ഥാന വൈസ് പ്രസിഡന്‍റ് ഷാജി കുളനട ഉദ്ഘാടനം ചെയ്തു. ജില്ലാ സെക്രട്ടറി സോളമൻ വരവുകാലായിൽ അധ്യക്ഷത വഹിച്ച യോഗത്തിൽ അംജത്ത് അടുർ , സുരേഷ് പാണിൽ, ആ നി ജേക്കബ്, ദിനാമ്മ പീറ്റർ, അബ്ദുൾ കലാം ആസാദ്, രാധാമണി, ഷാനവാസ്, അഹമ്മദ് കബീർ, രാജപ്പൻ എന്നിവർ പ്രസംഗിച്ചു. മല്ലപ്പള്ളി:കോൺഗ്രസ്‌ ബ്ലോക്ക് കമ്മറ്റിയുടെ നേതൃത്വത്തിൽ മുൻ മുഖ്യമന്ത്രി ഉമ്മൻ ചാണ്ടിയുടെ രണ്ടാം ചരമവാർഷിക ദിനാചരണം കെപിസിസി മുൻ എക്സിക്യൂട്ടീവ് അംഗം റെജി തോമസ് ഉദ്ഘാടനം ചെയ്തു. കോൺഗ്രസ്‌ ബ്ലോക്ക് പ്രസിഡന്‍റ് എബി മേക്കരിങ്ങാട്ട് അധ്യക്ഷത വഹിച്ചു. ഡിസിസി ജനറൽ സെക്രട്ടറി കോശി പി. സക്കറിയ, ഇൻകാസ് ഖത്തർ ട്രഷറര്‍ ഈപ്പൻ തോമസ്, ഡിസിസി അംഗം കീഴ് വായ്പൂര് ശിവരാജൻ, റെജി പണിക്കമുറി, സാം പട്ടേരി, ചെറിയാൻ മണ്ണഞ്ചേരി, കെ. ജി. സാബു തുടങ്ങിയവർ പ്രസംഗിച്ചു. പ്രമാടം: മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിലുള്ള മുൻ മുഖ്യമന്ത്രി ഉമ്മൻചാണ്ടി അനുസ്മരണം ഇന്നു രാവിലെ ഒന്പതിന് യുഡിഎഫ് കൺവീനർ അടൂർ പ്രകാശ് എംപി ഉദ്ഘാടനം ചെയ്യും. മണ്ഡലം പ്രസിഡന്‍റ് റബിൻ മോൻസി അധ്യക്ഷത വഹിക്കും. മൈലപ്ര: മുൻ മുഖ്യമന്ത്രിയും കോൺഗ്രസ് നേതാവുമായിരുന്ന ഉമ്മൻ ചാണ്ടിയുടെ രണ്ടാം ചരമവാർഷികം മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പുഷ്പാർച്ചന, അനുസ്മരണ സമ്മേളനം എന്നീ വിവിധ പരിപാടികളോടെ മൈലപ്രായിൽ ആചരിച്ചു. അനുസ്മരണ സമ്മേളനം ഡിസിസി ജനറൽ സെക്രട്ടറി സാമുവൽ കിഴക്കുപുറം ഉദ്ഘാടനം ചെയ്തു. മണ്ഡലം പ്രസിഡന്‍റ് വിത്സൺ തുണ്ടിയത്ത് അധ്യക്ഷത വഹിച്ചു. ഡിസിസി അംഗങ്ങളായ പി.കെ. ഗോപി, ജയിംസ് കീക്കരിക്കാട്ട്, കർഷക കോൺഗ്രസ് ജില്ലാ സെക്രട്ടറി ബേബി മൈലപ്ര,ബ്ലോക്ക്, മണ്ഡലം ഭാരവാഹികളായ ലിബു മാത്യു, ജോബിൻ തോമസ് മൈലപ്ര, ജോർജ് യോഹന്നാൻ, ബിജു സാമുവൽ, ഓമന വർഗീസ്, രാജു പുല്ലൂർ തുടങ്ങിയവർ പ്രസംഗിച്ചു.

പ‍ഞ്ചായത്ത് പ്രസിഡന്‍റിനെ അപകീര്‍ത്തിപ്പെടുത്തിയാല്‍ പ്രതിരോധിക്കും: സിപിഐ

കോഴഞ്ചേരി: മല്ലപ്പുഴശേരി ഗ്രാമപ‍ഞ്ചായത്ത് പ്രസിഡന്‍റിനെ അപകീര്‍ത്തിപ്പെടുത്താനുള്ള ശ്രമം ആരുടെ ഭാഗത്തുനിന്നും ഉണ്ടായാലും ശക്തമായി പ്രതിരോധിക്കുമെന്ന് സിപിഐ ലോക്കല്‍ കമ്മിറ്റി. കഴിഞ്ഞ സാമ്പത്തിക വർഷം വിഭവ സമാഹാരണത്തിലും പദ്ധതി തുക വിനിയോഗത്തിലും നൂറു ശതമാനം നേട്ടം കൈവരിച്ച ജില്ലയിലെ ഏക പഞ്ചായത്തെന്ന ബഹുമതി നേടിയ മല്ലപ്പുഴശേരി പഞ്ചായത്ത് ഭരണസമിതിയെയും പ്രസിഡന്‍റിനെയും ദുരാരോപണങ്ങളിലൂടെ അപകീർത്തിപെടുത്താനുള്ള ശ്രമിക്കുന്നതായി ആരോപിച്ചാണ് സിപിഐ മല്ലപ്പുഴശേരി ലോക്കല്‍ കമ്മിറ്റി പ്രതിഷേധം യോഗം സംഘടിപ്പിച്ചത്. സിപിഐ ജില്ലാ എക്സി അംഗം അടൂർ സേതു ഉദ്ഘാടനം ചെയ്തു. ലോക്കൽ കമ്മിറ്റി സെക്രട്ടറി തോമസ് യേശുദാസ് അധ്യക്ഷത വഹിച്ചു. ജില്ലാ എക്സിക്യൂട്ടീവ് അംഗം ശരത് ചന്ദ്രകുമാർ, മണ്ഡലം സെക്രട്ടറി ബി. ഹരിദാസ്, മണ്ഡലം കമ്മിറ്റി അംഗങ്ങളായ സുമേഷ് ബാബു, ഗീതാ സദാശിവൻ, ഗ്രാമപഞ്ചായത്ത് പ്രസിഡന്‍റ് മിനി ജിജു ജോസഫ്, അശ്വതി പി. നായർ, ബിജു ആലുംകുറ്റി, മോഹൻദാസ്, ജീമോൻ, രജനി, ഗോപി എന്നിവർ പ്രസംഗിച്ചു.

പോലീസ് ഓഫീസേഴ്സ് അസോസിയേഷൻ ഭരണാനുകൂല വിഭാഗത്തിനു ഭൂരിപക്ഷം

പത്തനംതിട്ട: കേരള പോലീസ് ഓഫീസേഴ്സ് അസോസിയേഷൻ പത്തനംതിട്ട ജില്ലാ കമ്മിറ്റിയിലേക്കുള്ള തെരഞ്ഞെടുപ്പിന് നാമനിർദ്ദേശപത്രിക സമർപ്പിക്കുന്നതിനുള്ള സമയം പൂർത്തിയായപ്പോൾ, ജില്ലയിലെ മുഴുവൻ ലോക്കൽ പോലീസ് സ്റ്റേഷനുകളിൽ നിന്നും സ്പെഷൽ യൂണിറ്റുകളിൽ നിന്നും നിലവിലെ ഭരണാനുകൂല പാനലിലെ മുഴുവൻ പേരും എതിരില്ലാതെ തെരഞ്ഞെടുക്കപ്പെട്ടു. പത്തനംതിട്ട ഡിഎച്ച്ക്യു ക്യാമ്പിൽ മാത്രമാണ് എതിർവിഭാഗക്കാർ മത്സരിക്കുന്നത്. ഡിഎച്ച്ക്യുവിലെ ഒന്പത് സീറ്റുകളിൽ ആറു സീറ്റുകളിലേക്ക് അവർ നാമനിർദ്ദേശപത്രിക സമർപ്പിച്ചിട്ടുണ്ട്. നിലവിലെ ജില്ലാ സെക്രട്ടറി കെ.ബി.അജി പന്തളം പോലീസ് സ്റ്റേഷനിൽ നിന്നും ജില്ലാ പ്രസിഡന്‍റ് ബി.എസ്. ശ്രീജിത്ത് എന്നിവർ മലയാലപ്പുഴ പോലീസ് സ്റ്റേഷനിൽ നിന്നും എതിരില്ലാതെ തെരഞ്ഞെടുക്കപ്പെട്ടു. നിലവിലെ മറ്റു ജില്ലാ ഭാരവാഹികളും ജില്ലാ എക്സിക്യൂട്ടീവ് കമ്മിറ്റി അംഗങ്ങളും എതിരില്ലാതെ തെരഞ്ഞെടുക്കപ്പെട്ടവരിൽ ഉൾപ്പെടുന്നു. ഏഴ് വനിതകളും ലോക്കൽ പോലീസ് സ്റ്റേഷനുകളിൽ നിന്നും എതിരില്ലാതെ തെരഞ്ഞെടുക്കപ്പെട്ടിട്ടുണ്ട്. പിൻവലിക്കാനുള്ള സമയത്തിന് ശേഷവും മത്സരമുള്ള പക്ഷം 26ന് വോട്ടെടുപ്പ് നടക്കും.

നടപടി നൂലാമാല; ജീർണാവസ്ഥയിലായ സ്കൂൾ കെട്ടിടങ്ങൾ‌ പൊളിച്ചുനീക്കാനാകുന്നില്ല

പത്തനംതിട്ട: ഉപയോഗശൂന്യമായ കെട്ടിടങ്ങൾ പൊളിച്ചുനീക്കി അപകടങ്ങൾ ഒഴിവാക്കണമെ ന്ന ആവശ്യങ്ങൾക്കു പരിഹാരമില്ലാത്തതിനു പിന്നിലും നടപടിക്രമങ്ങളിലെ നൂലാമാലകൾ. വർഷങ്ങൾ പഴക്കമുള്ള കടമ്മനിട്ട ഗവൺമെന്‍റ് ഹയർ സെക്കൻഡറി സ്കൂളിന്‍റെ പഴയ കെട്ടിടം തകർന്നു വീണതോടെയാണ് കെട്ടിടം പൊളിച്ചുനീക്കലിന്‍റെ നൂലാമാലകൾ സംബന്ധിച്ച പ്രശ്നങ്ങൾ ചർച്ച ചെയ്യപ്പെട്ടു തുടങ്ങിയത്. കടമ്മനിട്ട സ്കൂളിന്‍റെ കെട്ടിടം അപകടാവസ്ഥയിൽ ആയതിനാൽ മൂന്നു വർഷമായി ഉപയോഗിക്കാതെ കിടക്കുകയായിരുന്നു. 2022 മുതൽ കെട്ടിടത്തിൽ നിന്ന് ക്ലാസ് മുറികൾ നീക്കിയിരുന്നു. വിവരം അന്നു തന്നെ വിദ്യാഭ്യാസ വകുപ്പിനെ അറിയിച്ചിരുന്നതാണെന്ന് സ്കൂൾ അധികൃതർ പറയുന്നു. എന്നാൽ നടപടി ഒന്നും ഉണ്ടായില്ല. ഒടുവിൽ നവകേരള സദസിൽ എത്തിയ നാട്ടുകാർ കെട്ടിടം അപകടാവസ്ഥയിലാണെന്നും അടിയന്തരമായി പൊളിച്ച് കളിസ്ഥലം നിർമിക്കണമെന്നും ആവശ്യപ്പെട്ട് മുഖ്യമന്ത്രി പിണറായി വിജയന് നിവേദനം നൽകിയിരുന്നു. സ്ഥലം എംഎൽഎ കൂടിയായ മന്ത്രി വീണാ ജോർജ് ഇതിനെ പിന്തുണച്ചെങ്കിലും നടപടികൾ മുന്നോട്ടു പോയില്ല. കെട്ടിടം പൊളിച്ചു മാറ്റാനുള്ള നടപടി ഇഴഞ്ഞു നീങ്ങുന്നതിടെയാണ് വ്യാഴാഴ്ച രാത്രി മഴ സമയത്ത് തകർന്നു വീണത്. സ്‌കൂൾ ആരംഭിച്ച കാലത്ത് നിർമിച്ച കെട്ടിടമാണിത്. മേൽക്കൂര ഏതാണ്ട് പൂർണമായും ദ്രവിച്ച അവസ്ഥയിലായിരുന്നു. ഭിത്തി ഉൾപ്പെടെയാണ് പൊളിഞ്ഞു വീണത്. കെട്ടിടത്തിന്‍റെ ശേഷിച്ച ഭാഗവും ഏത് നിമിഷവും നിലം പൊത്താം. കെട്ടിടം അപകടാവസ്ഥയിലായതിനാൽ വിദ്യാർഥികളെ സമീപത്തേക്ക് പോകാൻ അനുവദിച്ചിരുന്നില്ലെന്ന് പ്രാധാന അധ്യാപിക ശ്രീലത പറയുന്നത്. എന്നാൽ കളിക്കളം തൊട്ടടുത്തായതിനാൽ മഴ പെയ്യുന്പോഴൊക്കെ ഇവിടെ കയറാറുണ്ടെന്നാണ് കുട്ടികൾ പറയുന്നത്. നാട്ടുകാരും ഇത് സാക്ഷ്യപ്പെടുത്തുന്നു. സ്കൂൾ വിട്ടുകഴിഞ്ഞാൽ നാട്ടുകാരും കെട്ടിട പരിസരങ്ങളിൽ എത്തുന്നതു കാണാം. അപകടം സംഭവിച്ചത് രാത്രിയിലായതിനാൽ ആരും ഇതിൽ ഉൾപ്പെട്ടില്ല. കെട്ടിടം പൊളിച്ചുനീക്കാൻ ടെൻഡർ നടപടികൾ കഴിഞ്ഞയിടെയാണ് ആരംഭിച്ചത്. 28നാണ് ലേലം വച്ചിരിക്കുന്നത്. 1997 ൽ ആരംഭിച്ച ഹയർസെക്കൻഡറി വിഭാഗം ഈ തകർന്ന കെട്ടിടത്തിലാണ് പ്രവർത്തിച്ചിരുന്നത്. എട്ട് ബാച്ചുകളും ലാബും ഇവിടെ തന്നെയായിരുന്നു. പിന്നീട് 2002ലാണ് പുതിയ കെട്ടിടത്തിലക്ക് ഹയർ സെക്കൻഡറി ഭാഗം മാറ്റിയത്. മൊത്തം 400 കുട്ടികൾ പഠിക്കുന്നുണ്ട്. കെട്ടിടം വീണതറിഞ്ഞ് പോലീസ്, റവന്യു, വിദ്യാഭ്യാസം വകുപ്പ് അധികൃതർ സ്ഥലം സന്ദർശിച്ചു. ജില്ലാ പഞ്ചായത്തിന്‍റെ നിയന്ത്രണത്തിലാണ് സ്കൂൾ പ്രവർത്തിക്കുന്നത്. പത്തനംതിട്ടയിലുമുണ്ട് പഴയ കെട്ടിടങ്ങൾ സ്കൂൾ വളപ്പിൽ സുരക്ഷിതമല്ലാത്ത കെട്ടിടങ്ങളിൽ ക്ലാസ് നടത്താൻ അനുവാദമില്ലെങ്കിലും ഇത് പൊളിച്ചു നീക്കാൻ സ്കൂൾ അധികൃതർക്കാകില്ല. ഇതിന് പ്രത്യേകാനുമതി വേണം. ടെൻഡർ വിളിച്ച് വിദ്യാഭ്യാസ വകുപ്പു തന്നെ നടപടികൾ നടത്തണം. പത്തനംതിട്ട ഗവൺമെന്‍റ് എച്ച്എസ്എസിലും പഴയ കെട്ടിടം ഇപ്പോഴും നിലനിൽക്കുകയാണ്. സ്കൂൾ കവാടത്തിൽ തന്നെയാണ് പഴയ കെട്ടിടം. ഏറെ ശോച്യാവസ്ഥയിലായപ്പോൾ ക്ലാസ് മുറികൾ ഷിഫ്റ്റ് ചെയ്തു. അപകടാവസ്ഥയിലായ കെട്ടിടത്തിന്‍റെ വരാന്തകളിൽ കുട്ടികളെ കാണാം. കുട്ടികൾ കയറരുതെന്ന് മുന്നറിയിപ്പുണ്ടെങ്കിലും ഓഫീസും മറ്റും മുകൾ ഭാഗത്തായതിനാൽ അധ്യാപകർ കാണാറില്ല. സ്കൂൾ വിട്ട് കുട്ടികൾ വാഹനം കാത്തുനിൽക്കുന്പോഴും മഴയത്തുമൊക്കെ ഇവിടെ കുട്ടികളെ കാണാം. അധ്യാപകരുടേതടക്കം വാഹനങ്ങളും ഇവിടെ കയറ്റിവയ്ക്കാറുണ്ട്. സർക്കാർ സ്കൂളുകളുടെ വളപ്പുകളിലാണ് ഇത്തരത്തിൽ കെട്ടിടങ്ങൾ അപകടാവസ്ഥി ഏറെയും അവശേഷിക്കുന്നത്. വായ്പൂര് എംആർഎസ്എൽബിവി എച്ച്എസ്എസിൽ വായ്പൂര് എംആർഎസ് എൽബിവി എച്ച്എസ്എസ് വളപ്പിൽ ഏതുനിമിഷവും നിലംപൊത്താവുന്ന കെട്ടിടം പൊളിച്ചുമാറ്റണമെന്നാവശ്യപ്പെട്ട് നാട്ടുകാർ പ്രക്ഷോഭത്തിനിറങ്ങിയിട്ടും നടപടിയില്ല. സ്കൂൾ വളപ്പിൽ അപകടാവസ്ഥയിലായ കെട്ടിടം കുട്ടികളെ സുരക്ഷയെ കരുതി പൊളിച്ചു മാറ്റണമെന്നതാണ് ആവശ്യം. പക്ഷേ അധികൃതർ ഇതു കേട്ടതായി ഭാവിക്കുന്നില്ല. തിരുവിതാംകൂർ രാജകുടുംബാംഗത്തിന്‍റെ നാമധേയത്തിലുള്ള സംസ്ഥാനത്തെ അപൂർവം വിദ്യാലയങ്ങളിലൊന്നാണിത്. സ്കൂളിന്‍റെ ആദ്യകാല കെട്ടിടങ്ങളിലൊന്നാണ് അപകടാവസ്ഥയിലായിരിക്കുന്നത്. ക്ലാസ് മുറികൾ നീക്കിയെങ്കിലും കെട്ടിടം പൊളിച്ചുനീക്കാൻ നടപടി ഉണ്ടായില്ല. ഓടിട്ട കെട്ടിടം ജീർണാവസ്ഥയിൽ ഏതുനിമിഷവും നിലംപൊത്താവുന്ന സ്ഥിതിയിലാണ്. കെട്ടിടം പൊളിക്കാൻ ബ്ലോക്ക് പഞ്ചായത്ത് എഇ തയാറാക്കിയ 60265 രൂപയുടെ വാല്യുവേഷൻ റിപ്പോർട്ടിന് ജില്ലാ പഞ്ചായത്ത് അംഗീകാരം നൽകിയതാണ്. അടൂരിൽ നൂറുവർഷം പിന്നിട്ട കെട്ടിടം അടൂർ ഗവൺമെന്‍റ് ബോയ്സ് ഹയർ സെക്കൻഡറി സ്കൂൾ വളപ്പിൽ നൂറുവർഷത്തിലേറെ പഴക്കമുള്ളകെട്ടിടമുണ്ട്. നിലവിൽ ഇവിടെ ക്ലാസുകളില്ലെങ്കിലും കെട്ടിടം നീക്കാൻ അനുമതിയില്ല. മഴ ശക്തമായതോടെ അപകടാവസ്ഥ കണ്ട് അധ്യാപകർ ഭീതിയിലാണ്. മേൽക്കൂര പലപ്പോഴും അടർന്നു വീഴുന്നുണ്ട്. ഏതു നിമിഷവും നിലംപൊത്താവുന്ന സ്ഥിതിയാണ്. ശ്രീമൂലം തിരുനാളിന്‍റെ ഷഷ്ടിപൂർത്തി സ്മാരകമായി നിർമിച്ച കെട്ടിടമാണിത്. പൈതൃകമായി സംരക്ഷിച്ചു നിർത്താൻ പദ്ധതിയിട്ടിരുന്നു. എന്നാൽ നടപടികൾ നീണ്ടുപോയി. അടിയന്തര അറ്റകുറ്റപ്പണി നടത്തി സംരക്ഷിക്കാൻ ജില്ലാ പഞ്ചായത്ത് ഇതിനിടെ ഫണ്ട് അനുവദിച്ചു. ഇതു പോരാതെ വന്നതോടെ ഒന്നും നടന്നില്ല. നിരവധി കുട്ടികൾ പഠിക്കുന്ന വിദ്യാലയത്തിന്‍റെ വളപ്പിൽ അപകടാവസ്ഥയിലുള്ള കെട്ടിടം നിലനിർത്തുന്നതിലെ പ്രശ്നങ്ങൾ സ്കൂൾ അധികൃതർ പലതവണ ശ്രദ്ധയിൽപ്പെടുത്തിയിരുന്നതായി പറയുന്നു. പൂട്ടിപ്പോയ സ്കൂളുകളും അപകടാവസ്ഥയിൽ കുട്ടികൾ ഇല്ലാത്തതിന്‍റെ പേരിൽ പൂട്ടിപ്പോയ ഒരു സ്കൂളും ഇതേവരെ നടപടിക്രമങ്ങൾ പൂർത്തീകരിച്ച് കെട്ടിടം ബന്ധപ്പെട്ടവർക്കു കൈമാറിയിട്ടില്ല. 2001 - 02 കാലയളവു മുതൽ ജില്ലയിൽ അടച്ചുപൂട്ടിയ നിരവധി സർക്കാർ, എയ്ഡഡ് സ്കൂളുകളുടെ കെട്ടിടങ്ങളാണ് ഏതുനിമിഷവും നിലംപൊത്താവുന്ന സാഹചര്യത്തിലായത്. ഇവയിലേറെയും എയ്ഡഡ് മാനേജ്മെന്‍റ് മേഖലയിലാണെങ്കിലും നടപടിക്രമങ്ങൾ പൂർത്തീകരിച്ച് ബന്ധപ്പെട്ടർക്ക് കെട്ടിടം കൈമാറാൻ വിദ്യാഭ്യാസ വകുപ്പ് തയാറായിട്ടില്ല. അയിരൂർ പഞ്ചായത്തിൽ ഒരു സർക്കാർ, രണ്ട് എയ്ഡഡ് പ്രൈമറി വിദ്യാലയങ്ങളുടെ കെട്ടിടങ്ങളാണ് സംരക്ഷണമില്ലാതെ നശിക്കുന്നത്. കല്ലൂപ്പാറ, എഴുമറ്റൂർ, കൊറ്റനാട് ഗ്രാമപഞ്ചായത്തുകളിലും ഇത്തരം സ്കൂളുകളുണ്ട്. ഇരവിപേരൂരിൽ പൂട്ടിയ സ്കൂൾ മാത്രമാണ് സ്പോർട്സ് ഹോസ്റ്റലിനായി നൽകിയത്.

യുവാവ് അറസ്റ്റിൽ

പത്തനംതിട്ട : മുൻവിരോധം കാരണംയുവാവിനെ വടിവാൾ കൊണ്ട് വെട്ടിക്കൊലപ്പെടുത്താൻ ശ്രമിച്ച കേസിൽ ഒരാൾ അറസ്റ്റിൽ. തിരുവല്ല തിരുമൂലപുരം കദളിമംഗലം അമ്പലത്തിന് സമീപം പ്ലാവേലിൽ പി. ആർ. അർജുനാണ് (27) അറസ്റ്റിലായത്. പാണ്ടനാട് കിഴക്കേ മായ്ക്കര വന്മഴി വീട്ടിൽ ഷിബിനെ (26) 16നു വൈകുന്നേരം 5.30 ഓടെ പാലിയേക്കര പള്ളിക്ക് എതിർവശം റോഡിൽ തടഞ്ഞുനിർത്തി പ്രതി മർദ്ദിച്ചു. പിന്നീട് ചവുട്ടി താഴെയിട്ടശേഷം കൈയിൽ കരുതിയ വടിവാൾ കൊണ്ട് വെട്ടിപ്പരിക്കേവ്പിച്ച് കൊലപ്പെടുത്താൻ ശ്രമിക്കുകയായിരുന്നു. ഷിബിന്‍റെ മൊഴി രേഖപ്പെടുത്തി തിരുവല്ല പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. പ്രതിയെ മണിക്കൂറുകൾക്കുള്ളിൽ കാവുംഭാത്തുനിന്നും കസ്റ്റഡിയിലെടുത്തു. വൈദ്യപരിശോധനയ്ക്കു ശേഷം സ്റ്റേഷനിൽ എത്തിച്ച് വിശദമായി ചോദ്യം ചെയ്തു.

സ്നേഹഭവനം സമ്മാനിച്ചു

പത്തനംതിട്ട: സാമൂഹിക പ്രവർത്തക ഡോ.എം.എസ്. സുനിൽ ഭവനരഹിതരായി സുരക്ഷിതമല്ലാത്ത സാഹചര്യങ്ങളിൽ കഴിയുന്ന നിരാലംബർക്ക് പണിതു നൽകുന്ന 358- മത് സ്നേഹഭവനം ചാരുവേലി ഇലവുങ്കൽ അനു രമേശിനും കുടുംബത്തിനും ആയി അറ്റാൻഡ മെട്രോ മലയാളി അസോസിയേഷന്‍റെ സഹായത്താൽ നിർമിച്ചു നൽകി. വീടിന്‍റെ താക്കോൽദാനവും ഉദ്ഘാടനവും അസോസിയേഷൻ അംഗം സന്ദീപ് ജോസഫ് നിർവഹിച്ചു. ഗ്രാമപഞ്ചായത്ത് പ്രസിഡന്‍റ് സിറിൽ തോമസ്, പ്രോജക്ട് കോഓഡിനേറ്റർ കെ.പി. ജയലാൽ, പി.വി. ജോസഫ്, പ്രിൻസ് സുനിൽ തോമസ്, ജയിംസ് ടി. സൈമൺ, അർജുൻ സുരേഷ്, സാന്ദ്ര ബോസ് എന്നിവർ പ്രസംഗിച്ചു.

ശ്രാദ്ധപ്പെരുന്നാളിനു കൊടിയേറി

റാന്നി: അങ്ങാടി ഹോളി ട്രിനിറ്റി ആശ്രമ ചാപ്പൽ സ്ഥാപകനും ഓർത്തഡോക്സ് സഭ തിരുവനന്തപുരം ഭദ്രാസനാധിപനുമായിരുന്ന ഗീവർഗീസ് മാർ ദിയസ്കോറസിന്‍റെ 26 ാമത് ശ്രാദ്ധപ്പെരുന്നാളിന് കൊടിയേറി. ഹോളി ട്രിനിറ്റി ആശ്രമ ചാപ്പലിൽ വിശുദ്ധ കുർബാനയ്ക്കുശേഷം നിലയ്ക്കൽ ഭദ്രാസനാധിപൻ ഡോ.ജോഷ്വാ മാർ നിക്കോദിമോസ് കൊടിയേറ്റി. 23നു സമാപിക്കും. 20 മുതൽ എല്ലാദിവസവും രാവിലെ വിശുദ്ധ കുർബാന ഉണ്ടാകും. 22നു രാവിലെ യൂഹാനോൻ മാർ ദിയസ്കോറസ് വിശുദ്ധ കുർബാന അർപ്പിക്കും. ഉച്ചകഴിഞ്ഞ് മൂന്നിന് തീർഥാടകർക്കു സ്വീകരണം. വൈകുന്നേരം ആറിന് സന്ധ്യാപ്രാർഥന. തുടർന്ന് ഡോ.കെ.എൽ. മാത്യു വൈദ്യൻ കോർ എപ്പിസ്കോപ്പ അനുസ്മരണ പ്രഭാഷണം നടത്തും. 23നു രാവിലെ ഏഴിന് പ്രഭാത പ്രാർഥന, എട്ടിന് കുർബാനയ്ക്ക് ഡോ. ഗബ്രിയേൽ മാർ ഗ്രീഗോറിയോസ് മുഖ്യകാർമികനാകും. ഡോ.യുഹാനോൻ മാർ തേവോദോറസ്, ഡോ.ഏബ്രഹാം മാർ സെറാഫിം എന്നിവർ സഹകാർമികരായിരിക്കും. വിദ്യാഭ്യാസ അവാർഡുദാനം, കബറിങ്കൽ ധൂപപ്രാർഥന, നേർച്ചവിളന്പ് എന്നിവയോടെ പെരുന്നാൾ സമാപിക്കും.

റാന്നി - ഇട്ടിയപ്പാറ ശിലാഫലകങ്ങളുടെ ശവപ്പറമ്പാക്കുന്നു: കോൺഗ്രസ്

റാന്നി: പഴവങ്ങാടി ഗ്രാമപഞ്ചായത്തിന്‍റെ ആസ്ത‌ിയിൽപെട്ട സ്ഥലങ്ങൾ ഏറ്റെടുത്ത് രാഷ്‌ട്രീയ നേട്ടങ്ങൾക്കുള്ള ശിലാഫലകങ്ങളുടെ ശവപ്പറന്പാക്കി മാറ്റുകയാണെന്ന് കോൺഗ്രസ്. പദ്ധതികൾ പലതും പ്രഖ്യാപിക്കുകയും കല്ലിടുകയും ചെയ്യുന്നതല്ലാതെ തുടർ നടപടികളുണ്ടാകില്ലെന്ന് കോൺഗ്രസ് മണ്ഡലം കമ്മിറ്റി കുറ്റപ്പെടുത്തി. വർഷങ്ങൾക്ക് മുമ്പ് അന്നത്തെ എംഎൽഎയുടെ നിർദ്ദേശപ്രകാരം കെഎസ്ആർടിസി ഡിപ്പോ, ശബരിമല പിൽഗ്രിം സെന്‍റർ എന്നിവയ്ക്കായി പഴവങ്ങാടി ഗ്രാമപഞ്ചായത്ത് മൂന്നേക്കർ സ്ഥലം ഏറ്റെടുത്തു നൽകുകയും അതിന്‍റെ പേരിലുള്ള കോടതി വ്യവഹാരങ്ങളെ തുടർന്ന് പഞ്ചായത്ത് ഓഫീസ് കെട്ടിടം ജപ്തി ചെയ്യുന്ന സ്ഥിതി വരെ ഉണ്ടായി. നിലവിലെ യുഡിഎഫ് ഭരണസമിതി നിയമ വഴിയിൽ മുന്നോട്ട് പോയാണ് ബാധ്യത ഒഴിവാക്കി എടുത്തത്. നാളിതുവരെ പിൽഗ്രിം സെന്‍റർ നിർമാണം നടത്താനായിട്ടില്ല. പുതിയ എംഎൽഎ ചുമതലയേറ്റ് നാലുവർഷത്തിനു ശേഷം ബസ് ടെർമിനലിന് സ്ഥലം ആവശ്യപ്പെട്ട് കത്തു നൽകി. പിൽഗ്രിം സെന്‍ററിനും കെഎസ്ആർടിസി ഓപ്പറേറ്റിംഗ് സെന്‍ററിന് വാടകയ്ക്ക് നൽകിയ സ്ഥലത്തിനും മധ്യേ 25 സെന്‍റ് സ്ഥലം നൽകുവാൻ ഭരണസമിതി ഐകകണ്ഠ്യേന തീരുമാനിച്ചിരുന്നു. എന്നാൽ ഇതുമായി ബന്ധപ്പെട്ട് എംഎൽഎ ഇപ്പോൾ സ്വീകരിച്ച നിലപാട് അപലപനീയമാണെന്ന് കോൺഗ്രസ് യോഗം കുറ്റപ്പെടുത്തി. പഞ്ചായത്തിന് തനതുവരുമാനം ലഭിക്കുന്നതും സാധാരണക്കാരായ ആളുകൾ കച്ചവടം ചെയ്യുന്നതുമായ കടമുറികൾ പൊളിച്ച് നിലവിലെ ടെർമിനലിനോടുചേർന്ന് വീണ്ടും ഒരു ബസ് ടെർമിനൽ നിർമിക്കുന്നതിനോടു യോജിക്കാനാകില്ലെന്ന് കോൺഗ്രസ് സംയുക്ത പഴവങ്ങാടി മണ്ഡലം കമ്മിറ്റി ചൂണ്ടിക്കാട്ടി. പഞ്ചായത്ത്‌ സ്‌ഥലം നൽകി 35 ലക്ഷം രൂപ മുടക്കി നിർമിച്ച അമിനിറ്റി സെന്‍റർ ജനങ്ങൾക്ക് തുറന്നു കൊടുക്കാത്തതിൽ എംഎൽഎ മറുപടി പറയണമെന്നും പല വികസന പ്രവർത്തനങ്ങളുടെയും സ്തംഭനാവസ്ഥയ്ക്ക് ഉത്തരവാദിത്വം ഏറ്റെടുക്കണമെന്നും മണ്ഡലം പ്രസിഡന്‍റുമാരായ പ്രമോദ് മന്ദമരുതി, തോമസ് ഫിലിപ്പ് എന്നിവർ ആവശ്യപ്പെട്ടു. രാഷ്‌ട്രീയ ലക്ഷ്യത്തോടെ അപമാനിക്കാൻ ശ്രമം: പഞ്ചായത്ത് പ്രസിഡന്‍റ് റാന്നി: രാഷ്‌ട്രീയ ലക്ഷ്യത്തോടെ വ്യക്തിഹത്യ നടത്താനും അപമാനിക്കാനുമുള്ള ശ്രമം അപലപനീയമെന്ന് പഴവങ്ങാടി ഗ്രാമപഞ്ചായത്ത് പ്രസിഡന്‍റ് റൂബി കോശി. വികസന ആവശ്യത്തിനു സ്ഥലം വിട്ടുകൊടുക്കാൻ ഗ്രാമപഞ്ചായത്ത് തയാറായതാണ്. എന്നാൽ പഞ്ചായത്തിന്‍റെ തനതുവരുമാനം ഇല്ലാതാക്കാനും വ്യാപാരികളെ ഇറക്കിവിടാനുമുള്ള നീക്കത്തോടു യോജിപ്പില്ല. ടെർമിനൽ നിർമാണത്തിനു പഞ്ചായത്ത് സ്ഥലം കണ്ടെത്തി നൽകിയതാണ്. ഐകകണ്ഠ്യേനയുള്ള തീരുമാനത്തിലായിരുന്നു ഇത്. പിന്നീട് ഇതിന് എതിർപ്പ് അറിയിക്കുകയും നിലവിൽ വ്യാപാര സ്ഥാപനങ്ങൾ പ്രവർത്തിച്ചുവരുന്ന സ്ഥലം ഒഴിപ്പിച്ചു നൽകണമെന്ന പേരിൽ പഞ്ചായത്ത് ഭരണസമിതിയെയും പ്രസിഡന്‍റിനെയും വികസന വിരോധികളായി ചിത്രീകരിച്ച് അപമാനിക്കാനാണ് ശ്രമിക്കുന്നതെന്ന് റൂബി കോശി കുറ്റപ്പെടുത്തി.

കായകല്പ് പുരസ്‌കാര നിറവിൽ കല്ലേലി സർക്കാർ ആയുർവേദ ഡിസ്പെൻസറി

പത്തനംതിട്ട: സംസ്ഥാന ആരോഗ്യ വകുപ്പ് കായകല്പ് പുരസ്കാരത്തിന് പത്തനംതിട്ട ജില്ലയിലെ അരുവാപ്പുലം ഗ്രാമ പഞ്ചായത്തിലെ കല്ലേലി ഗവ. ആയുർവേദ മോഡൽ ഡിസ്‌പെൻസറി ഒന്നാം സ്ഥാനം നേടി, ഒരു ലക്ഷം രൂപയാണ് സമ്മാനത്തുക. ആശുപത്രി പരിപാലനം, ശുചിത്വം, അണുബാധാ നിയന്ത്രണം, മാലിന്യ നി‌ർമാർജനം എന്നിവ ഉള്‍പ്പെടെയുള്ള വിവിധ മാനദണ്ഡങ്ങളുടെ അടിസ്ഥാനത്തില്‍ നടത്തിയ മൂല്യ നിര്‍ണയം ജില്ലാ, സംസ്ഥാന കായകല്‍പ് കമ്മിറ്റികള്‍ വിലയിരുത്തിയാണ് പുരസ്കാരം നിർണയിച്ചത്. എൻഎബിഎച്ച് എൻട്രി ലെവൽ സർട്ടിഫിക്കറ്റ് കരസ്ഥമാക്കിയിട്ടുള്ള കല്ലേലി ആയുർവേദ ഡിസ്‌പെൻസറിക്ക് മാലിന്യ മുക്ത നവകേരളം - പത്തനംതിട്ടയിലെ മികച്ച സർക്കാർ സ്ഥാപനത്തിനുള്ള അവാർഡും ലഭിച്ചിട്ടുണ്ട്.

ധനലക്ഷ്മി ബാങ്ക് അടൂർ ശാഖ പുതിയ കെട്ടിടത്തിൽ

അടൂർ: ധനലക്ഷ്മി ബാങ്ക് അടൂർ ശാഖ പുതിയ കെട്ടിടത്തിൽ പ്രവർത്തനമാരംഭിച്ചു. ഡെപ്യൂട്ടി സ്പീക്കർ ചിറ്റയം ഗോപകുമാർ പ്രവർത്തനോദ്ഘാടനം നിർവഹിച്ചു. കെപി റോഡിൽ സെൻട്രൽ ടോളിന് കിഴക്ക് ജംസ് ആർക്കേഡിലാണ് പ്രവർത്തനം ആരംഭിച്ചത്. എടിഎം, ലോക്കർ സൗകര്യം, എൻആർഐ സേവനങ്ങൾ, വിശാലമായ പർക്കിംഗ് സൗകര്യം എന്നിവ ഉൾപ്പെടുത്തിയാണ് പുതിയ കെട്ടിടത്തിൽ പ്രവർത്തനം ആരംഭിച്ചതെന്ന് ബാങ്ക് അധികൃതർ പറഞ്ഞു. അടൂർ നഗരസഭാധ്യക്ഷൻ മഹേഷ് കുമാർ, സക്കറിയാസ് മാർ അപ്രേം മെത്രാപ്പോലീത്ത, ധനലക്ഷ്മി ബാങ്ക് ചെയർമാൻ കലഞ്ഞൂർ മധു, വ്യാപാരി വ്യവസായി ഏകോപനസമിതി പ്രസിഡന്‍റ് ജോർജ് ബേബി, ബാങ്ക് എക്സിക്യൂട്ടീവ് ഡയറക്ടർ പി.സൂര്യരാജ്, ഡെപ്യൂട്ടി ജനറൽ മാനേജർ സണ്ണി ജോർജ്ജ്, തിരുവനന്തപുരം റീജിയണൽ ഹെഡ് വി.വി.ശ്രീകാന്ത്, അടൂർ ശാഖാ മാനേജർ സെബി ഏബ്രഹാം എന്നിവർ പങ്കെടുത്തു.

സ്കൂട്ടർ മോഷണം: രണ്ടുപേർ പിടിയിൽ

പത്തനംതിട്ട: ഓമല്ലൂർ അഞ്ജലി ഓഡിറ്റോറിയത്തിൽ പാർക്ക് ചെയ്തിരുന്ന സ്കൂട്ടർ മോഷ്ടിച്ച കേസിൽ രണ്ടുപേരെ പത്തനംതിട്ട പോലീസ് അറസ്റ്റ് ചെയ്തു. ആലപ്പുഴ കാർത്തികപ്പള്ളി ചിങ്ങോലി ചേപ്പാട് കാഞ്ഞാർ സ്വേശി വിഷ്ണു (33), ഓമല്ലൂർ ആറ്റരികം പടിഞ്ഞാറേ കടുംപള്ളിൽ ശശിക്കുട്ടൻ (64) എന്നിവരാണ് പിടിയിലായത്. വിഷ്ണു മോഷ്ടിച്ചു കടത്തിയ സ്കൂട്ടർ ശശിക്കുട്ടന് കൈമാറുകയായിരുന്നു. മോഷണ മുതലാണെന്ന് അറിഞ്ഞു കൊണ്ടാണ് ഇയാൾ വിഷ്ണുവിൽ നിന്നും സ്കൂട്ടർ വാങ്ങിയതെന്ന് അന്വേഷണത്തിൽ വെളിവായി. 13 ന് വൈകുന്നേരം 6. 30 നാണ് ഓമല്ലൂർ പുത്തൻപീടിക പാറപ്പാട്ട് തെക്കേമുറിയിൽ ലിജോയുടെ സ്കൂട്ടർ വിഷ്ണു മോഷ്ടിച്ചു കടത്തിക്കൊണ്ടുപോയത്. 16 ന് പത്തനംതിട്ട പോലീസ് കേസെടുത്തു അന്വേഷണം ആരംഭിച്ചു. സ്ഥലത്തെ സിസിടിവി കാമറകൾ പരിശോധിക്കുകയും വർക്ക് ഷോപ്പുകൾ കേന്ദ്രീകരിച്ച് വ്യാപകമായ അന്വേഷണം നടത്തുകയും ചെയ്തു. തുടർന്ന്, മോഷ്ടിച്ചയാളെന്നു കണ്ടെത്തി വിഷ്ണുവിനെ വീടിന് സമീപത്തുനിന്നും ഉടൻതന്നെ കസ്റ്റഡിയിലെടുത്തു. തുടർന്ന് ശശിക്കുട്ടനെയും അറസ്റ്റു ചെയ്തു. പത്തനംതിട്ട പോലീസ് ഇൻസ്പെക്ടർ കെ. സുനുമോന്‍റെ മേൽനോട്ടത്തിൽ എസ്ഐ പി. പി. ദീപക്കിന്‍റെ നേതൃത്വത്തിലാണ് അന്വേഷണം നടത്തി പ്രതികളെ പിടികൂടിയത്.

പോലീസുകാരനെതിരേ ഭീഷണി മുഴക്കിയ ടിപ്പർ ഡ്രൈവർ അറസ്റ്റിൽ

തിരുവല്ല: യൂണിഫോം ഇടാതെയും സിഗ്‌നല്‍ തെറ്റിച്ചും ടിപ്പര്‍ ഓടിച്ചതിന്‍റെ ചിത്രം പകര്‍ത്തിയ പോലീസ് ഉദ്യോഗസ്ഥനെതിരേ ഭീഷണിയും അസഭ്യവർഷവും നടത്തിയ ഡ്രൈവർ അറസ്റ്റിൽ. തിരുവല്ല നെടുമ്പുറം അമിച്ചങ്കേരി വളക്കോട്ട് കെ. ടി. രാജേഷ‌ാണ് (48) അറസ്റ്റിലായത്. അസഭ്യം വിളിച്ചതിനും ഭീഷണിപ്പെടുത്തിയതിനും ഔദ്യോഗിക കൃത്യനിര്‍വഹണം തടസപ്പെടുത്തിയതിനും ട്രാഫിക് നിയമങ്ങള്‍ ലംഘിച്ചതിനുമാണ് കേസ്.ട്രാഫിക് എസ്ഐയുടെ റിപ്പോര്‍ട്ടിന്‍റെ അടിസ്ഥാനത്തില്‍ തിരുവല്ല പോലീസ് ഇന്‍സ്പെക്ടര്‍ എസ്. സന്തോഷാണ് കേസ് രജിസ്റ്റർ ചെയ്ത് അറസ്റ്റ് രേഖപ്പെടുത്തിയത്. മുത്തൂര്‍ ജംഗ്ഷനില്‍ ട്രാഫിക് ഡ്യൂട്ടി ചെയ്ത ട്രാഫിക് യൂണിറ്റിലെ എസ്‌സിപിഒ ബി. ശ്രീജിത്തിനു നേരെയാണ് ടിപ്പര്‍ ഡ്രൈവറായ രാജേഷ് ഭീഷണിയും അസഭ്യവര്‍ഷവും നടത്തിയത്. കഴിഞ്ഞ 12 നും 14നും ഇതാവര്‍ത്തിച്ച ഡ്രൈവർ, പോലീസ് ഉദ്യോഗസ്ഥനുമായി വാക്കുതര്‍ക്കത്തില്‍ ഏര്‍പ്പെടുന്നത് വീഡിയോയില്‍ പകര്‍ത്തുകയും, സാമൂഹിക മാധ്യമങ്ങളിലൂടെ പ്രചരിപ്പിക്കുകയും ചെയ്തു. രണ്ടു ദിവസവും യൂണിഫോം ധരിക്കാതെയും ട്രാഫിക് സിഗ്‌നല്‍ തെറ്റിച്ചുമാണ് ഇയാള്‍ ടിപ്പര്‍ ഓടിച്ചത്. ഇതിന്‍റെ ഫോട്ടോ മൊബൈലില്‍ എടുത്തതിന്‍റെ വിരോധം കാരണം, ഇയാള്‍ ഇങ്ങനെ പ്രവര്‍ത്തിച്ചതാണെന്ന് അന്വേഷണത്തില്‍ കണ്ടെത്തി.

കോഴഞ്ചേരി സെന്‍റ് മാത്യൂസ് പള്ളി ശതോത്തര സുവർണ ജൂബിലി ഉദ്ഘാടനം 20ന്

പത്തനംതിട്ട: കോഴഞ്ചേരി സെന്‍റ് മാത്യൂസ് ഓർത്തഡോക്സ് വലിയപളളി ശതോത്തര സുവർണ ജൂബിലി ഉദ്ഘാടനം 20 ന് നടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. രാവിലെ 7.45 ന് കുർബാനയ്ക്ക് മലബാർ ഭദ്രാസനാധിപൻ ഗീവർഗീസ് മാർ പക്കോമിയോസ് മെത്രാപ്പോലീത്ത കാർമികത്വം വഹിക്കും. 10.30നു ചേരുന്ന സമ്മേളനം മന്ത്രി വീണാ ജോർജ് ഉദ്ഘാടനം നിർവഹിക്കും. ആന്‍റോ ആന്‍റണി എംപി ജീവകാരുണ്യ പദ്ധതികൾ ഉദ്ഘാടനം ചെയ്യും. ഗീവർഗീസ് മാർ പക്കോമിയോസ് മെത്രാപ്പോലീത്ത അനുഗ്രഹപ്രഭാഷണം നടത്തും. മലങ്കര ഓർത്ത ഡോക്‌സ് സഭാ സെക്രട്ടറി ബിജു ഉമ്മൻ ജൂബിലി ലോഗോ പ്രകാശനം ചെയ്യും. ഭദ്രാസന സെക്രട്ടറി ജോൺസൺ കല്ലിട്ടതിൽ കോർ എപ്പിസ്കോപ്പ ജൂബിലി സന്ദേശം നൽകും. ഗ്രാമപഞ്ചായത്ത് പ്രസിഡന്‍റ് സാലി ഫിലിപ്പ് പ്രസംഗിക്കും. ശതോത്തര ജൂബിലി ഭാഗമായി ജീവ കാരുണ്യ പ്രവർത്തനങ്ങൾക്ക് പ്രാധാന്യം നൽകും. ഭവനദാനം, ചികിൽസാ സഹായം, വിദ്യാഭ്യാസ സഹായം, മെഡിക്കൽ ക്യാമ്പ്, സെമിനാറുകൾ, സാംസ്കാരിക സമ്മേളനം, കുട്ടിക്കൂട്ടം, ജൂബിലി സ്മരണ പദ്ധതി പ്രഖ്യാപനം എന്നിവയാണ് പ്രധാന പദ്ധതികൾ. റോയി എം. മാത്യു മുത്തൂറ്റ് കോ ഓർഡിനേറ്ററായി ജൂബിലി കമ്മിറ്റി പ്രവർത്തിച്ചുവരുന്നു. 2026 മാർച്ച് ഏഴിന് ജൂബിലി ആഘോഷങ്ങളുടെ സമാപനം നടക്കും. ഇടവക വികാരി ഫാ. സാജൻ ബി.വറുഗീസ്, ട്രസ്റ്റി വി. ജോൺ മാത്യു, സെക്രട്ടറി മാത്യു കെ. തോമസ്, ജനറൽ കൺവീനർമാരായ ജോൺ ഫിലിപ്പോസ്, കെ. തോമസ് ജോൺ, പബ്ലിസിറ്റി കൺവീനർ സി.വറുഗീസ് എന്നിവർ പത്രസമ്മേളനത്തിൽ പങ്കെടുത്തു.

ബസ് സ്റ്റാൻഡ് നിർമാണോദ്ഘാടനം നടത്തി

കോന്നി: എംഎൽഎ ഫണ്ടിൽ നിന്നും തുക അനുവദിച്ചു നിർമിക്കുന്ന കോന്നി മെഡിക്കൽ കോളജ് ബസ് സ്റ്റാൻഡ് നിർമാണോദ്ഘാടനം കെ.യു. ജനീഷ് കുമാർ എംഎൽഎ നിർവഹിച്ചു. കോന്നി മെഡിക്കൽ കോളജിന് മുൻവശത്തുള്ള 50 സെന്‍റ് റവന്യു ഭൂമിയിലാണ് ബസ് സ്റ്റാൻഡും അമിനിറ്റി സെന്‍ററും നിർമിക്കുന്നത്. കോന്നി മെഡിക്കൽ കോളജിൽ തിരക്കേറിയതോടെ ധാരാളം കെഎസ്ആർടിസി ബസുകളും സ്വകാര്യ ബസുകളും സർവീസ് നടത്തുന്നുണ്ട്. ഇവയെല്ലാം മെഡിക്കൽ കോളജിനുള്ളിൽ പ്രവേശിച്ച് അത്യാഹിത വിഭാഗത്തിനു മുന്നിലാണ് പാർക്ക് ചെയ്യുന്നത്. മെഡിക്കൽ കോളജിലെ പ്രവേശന കവാടവും മതിലും പൂർത്തിയാകുന്നതോടെ സർവീസ് ബസുകൾ ആശുപത്രി കോമ്പൗണ്ടിനുള്ളിൽ പ്രവേശിക്കുന്നത് വലിയ ബുദ്ധിമുട്ടും തിരക്കും സൃഷ്ടിക്കും. ഇതിനു പരിഹാരായിട്ടാണ് മെഡിക്കൽ കോളജിന്‍റെ മുന്നിലുള്ള 50 സെന്‍റ് റവന്യു ഭൂമിയിൽ എംഎൽഎ ഫണ്ടിൽ നിന്നും ഒരു കോടി രൂപ മുടക്കി ബസ് സ്റ്റാൻഡും അമിനിറ്റി സെന്‍ററും നിർമിക്കുന്നതിന് എംഎൽഎ തുക അനുവദിച്ചത്. പൊതുമരാമത്ത് നിരത്ത് വിഭാഗത്തിനാണ് പ്രവൃത്തിയുടെ നിർവഹണച്ചുമതല. കോന്നി മെഡിക്കൽ കോളജ് ജംഗ്ഷനിൽ നടന്ന ചടങ്ങിൽ കെ. യു. ജനീഷ് കുമാർ എംഎൽഎ ബസ് സ്റ്റാൻഡിന്‍റെ നിർമാണോദ്ഘാടനം നിർവഹിച്ചു.അരൂവാപ്പുലം ഗ്രാമപഞ്ചായത്ത് വൈസ് പ്രസിഡന്‍റ് മണിയമ്മ രാമചന്ദ്രൻ നായർ അധ്യക്ഷത വഹിച്ചു. ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ വർഗീസ് ബേബി, പഞ്ചായത്ത്‌ അംഗങ്ങളായ ശ്രീകുമാർ, ഷീബ, സിന്ധു, മിനി രാജീവ്, ജോജു വർഗീസ്, ശ്രീലത, മെഡിക്കൽ കോളജ് വൈസ് പ്രിൻസിപ്പൽ ഡോ.സെസി ജോബ്, മെഡിക്കൽ കോളജ് സൂപ്രണ്ട് ഡോ. ഷാജി, പൊതുമരാമത്ത് എക്സിക്യൂട്ടീവ് എൻജിനിയർ ബാബുരാജൻ, പൊതുമരാമത്ത് അസി.എക്സിക്യൂട്ടീവ് എൻജിനിയർ മുരുകേഷ് കുമാർ, അസി. എൻജിനിയർ രൂപക് ജോൺ എന്നിവർ പ്രസംഗിച്ചു.

മരത്തിൽ കുടുങ്ങിയ തൊഴിലാളിയെ ഫയർഫോഴ്സ് രക്ഷപ്പെടുത്തി

അത്തിക്കയം: മരം മുറിക്കുന്നതിനിടെ ലക്ഷ്യം തെറ്റിയുണ്ടായ അപകടത്തിൽ മരത്തിൽ കുടുങ്ങിയെ തൊഴിലാളിയെ ഫയർഫോഴ്സ് സംഘം രക്ഷപ്പെടുത്തി. ചിറ്റാർ സ്വദേശി രാജനാണ് (50) അപകടത്തിൽപ്പെട്ടത്. ഇന്നലെ രാവിലെ 10.30 ഓടെ അത്തിക്കയം ടൗണിനു സമീപമാണ് അപകടം. ഒന്നാം കലുങ്കിനു സമീപം കൈമുട്ടുംപറമ്പിൽ പടിയിൽ അത്തിക്കയം - മടന്തമൺ റോഡരികിലെ ഉയരമുള്ള ആഞ്ഞിലി മരത്തിൽ കയറി ഇടമുറിക്കാൻ ശ്രമിക്കുന്നതിനിടയിൽ പെട്ടെന്ന് മരത്തിന്‍റെ മുകൾ ഭാഗം മുറിച്ച് മറ്റൊരു മരത്തിൽ തട്ടി വൈദ്യുതി ലൈനുകളിലേക്കും അതിലെ കേബിളിലേക്കും പതിക്കുകയായിരുന്നു. വീഴ്ചയുടെ ആഘാതത്തിൽ ഒരു വൈദ്യുത പോസ്റ്റ് പൂർണമായും തകർന്നു. സമീപ പോസ്റ്റുകൾക്കും നാശനഷ്ടമുണ്ടായി. ഇതിലെ ലൈനുകളെല്ലാം തകർന്നു.ആഞ്ഞിലി മരത്തിൽ മുറിച്ചു കൊണ്ടിരുന്ന തൊഴിലാളിക്ക് മരത്തിന്‍റെ ലക്ഷ്യം തെറ്റിയുള്ള വീഴ്ചയിൽ നിലതെറ്റി പരിക്കേറ്റെങ്കിലും വീഴാതെ കയറിൽ പിടിച്ചു കിടന്നു. അപകടം കണ്ട് ഒപ്പമുണ്ടായിരുന്നയാൾ കയറിൽ കയറി ബോധക്ഷയം ഉണ്ടാകുന്നതിനു മുമ്പ് താങ്ങി നിർത്തി. രാജന് കൈയ്ക്കു സാരമായി പരിക്കേറ്റു. നാട്ടുകാർ അറിയിച്ചതനുസരിച്ച് സ്ഥലത്തെത്തിയ ഫയർഫോഴ്സ് സംഘം ഏണി ഉപയോഗിച്ച് മരത്തിൽ കയറി രക്ഷിച്ച് ആശുപത്രിയിലെത്തിക്കുകയായിരുന്നു. മരം വീണുള്ള തകർച്ചയേത്തുടർന്ന് ഈ ലൈനിലെ വൈദ്യുതി ബന്ധം താറുമാറായി. പുനഃസ്ഥാപിക്കാൻ രണ്ടു ദിവസമെങ്കിലും വേണ്ടിവരുമെന്ന് വൈദുതി വകുപ്പ് ഉദ്യോഗസ്ഥർ പറഞ്ഞു. റോഡിൽ ഏറെ നേരത്തേക്ക് ഗതാഗതം മുടങ്ങിയെങ്കിലും ഉച്ചയോടെ പുനഃസ്ഥാപിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]