ആലപ്പുഴ: കടലും കടൽ സമ്പത്തും സംരക്ഷിക്കാനുള്ള വിഴിഞ്ഞം സമരത്തോടുള്ള പൊതു സമൂഹത്തിന്റെ ഐക്യപ്പെടൽ കൂടുതൽ ദൃഢതയുള്ളതാകണമെന്ന് എൻഎപിഎം ദേശീയ സമിതി അംഗം പ്രഫ. കുസുമം ജോസഫ്. വിഴിഞ്ഞം സമരത്തിന് ഐക്യദാർഢ്യം പ്രഖ്യാപിച്ച് ആലപ്പുഴ കളക്ട്രേറ്റ് നടയിൽ ജില്ലാ ഐക്യദാർഢ്യ സമിതി സംഘടിപ്പിച്ച പ്രതിഷേധ സംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അവർ.
പ്രകൃതിയുടെ താളപ്പിഴകൾ പൊതു സമൂഹത്തെ വേട്ടയാടിയപ്പോൾ കൈയ്യും മെയ്യും മറന്ന് എത്തിയവർ ജീവിതത്തിന്റെ രണ്ടറ്റം മുട്ടിക്കാൻ അതിജീവന സമരം നടത്തുമ്പോൾ അതിനെ തകർക്കാൻ കോർപറേറ്റുകളെ കൂട്ടുപിടിച്ച് പ്രതിരോധ സമരം സംഘടിപ്പിച്ച് കലാപം ഉണ്ടാക്കിയതിന്റെ ക്രെഡിറ്റിനു വേണ്ടിയുള്ള മുന്നണികളുടെ മത്സരമാണ് കേരളത്തിൽ നടക്കുന്നതെന്നും അവർ പറഞ്ഞു.
ഐക്യദാർഢ്യ സമതി ജില്ലാ ചെയർമാൻ കെ.ജി. ജഗദീശൻ അധ്യക്ഷത വഹിച്ചു. വികാരി ജനറാൾ ഫാ. ജോയി പുത്തൻവീട്ടിൽ, കെ.എസ്. മനോജ്, ഫാ. വി.പി. ജോസഫ് വലിയവിട്ടിൽ, കമാൽ എം. മാക്കയിൽ, ഫാ. സേവ്യർ കുടിയാംശേരിൽ, പി.കെ.ബിജു, നാസർ അറാട്ടുപുഴ, ഫാ.ജോൺസൻ പുത്തൻവീട്ടിൽ, അഡ്വ. പി.ജെ. മാത്യു, ഷീജ കെ. ജെ., എ.ആർ. ജോയി, ഫാ. തോമസ് മാണിയാപൊഴി, ജാക്സൺ പൊള്ളയിൽ, ക്ലീറ്റസ് കളത്തിൽ , ബി. ഭദ്രൻ, നവീൻജി നാദമണി, അർജുൻ രാമദാസ്, ഉമ്മച്ചൻ ചക്കുപുരയ്ക്കൽ, രാജു ആശ്രയം എന്നിവർ പ്രസംഗിച്ചു.