ADVERTISEMENT

ADVERTISEMENT

തലവടിയില്‍ കോളറ സ്ഥിരീകരിച്ചതായി സൂചന

എടത്വ: തലവടിയില്‍ കോളറ സ്ഥിരീകരിച്ചതായി സൂചന. രോഗി വെന്‍റിലേറ്ററില്‍. തലവടി പഞ്ചായത്ത് ആറാം വാര്‍ഡില്‍ നീരേറ്റുപുറം പുത്തന്‍പറമ്പില്‍ പി.ജി. രഘു(48)വിനാണ് കോളറ സ്ഥിരീകരിച്ചതായി സൂചന. തിരുവല്ല ബിലിവേഴ്‌സ് സ്വകാര്യ മെഡിക്കല്‍ കോളജില്‍ ചികിത്സയിലാണ്.
കോളറയുടെ സൂചനയുള്ള പശ്ചാത്തലത്തില്‍ ആരോഗ്യവകുപ്പിന്‍റെയും പഞ്ചായത്തിന്‍റെയും നേതൃത്വത്തില്‍ പരിശോധന ഊര്‍ജിതമാക്കും.

ADVERTISEMENT

കാറിടിച്ച് സ്കൂട്ടർ യാത്രികൻ മരിച്ചു

ചെങ്ങന്നൂർ: എംസി റോഡിൽ കല്ലിശേരി ടിബി ജംഗ്ഷനിൽ നിയന്ത്രണം വിട്ട കാറിടിച്ച് സ്കൂട്ടർ യാത്രികൻ മരിച്ചു. പാണ്ഡവൻപാറ പള്ളിമലയിൽ ജെനു ജോർജ് (55) ആണ് മരിച്ചത്. ഇന്നലെ വൈകുന്നേരം അഞ്ചോടെയായി രുന്നു അപകടം. റോഡ് ക്രോസ് ചെയ്യുകയായിരുന്ന ഇരുചക്ര വാഹനത്തിൽ ഇടിച്ചശേഷം നിയന്ത്രണം തെറ്റിയ കാർ തുടർന്ന് മറ്റൊരു ഇരുചക്രവാഹനത്തിലും റോഡരികിൽ പാർക്ക് ചെയ്തിരുന്ന പച്ചക്കറി വില്പന നടത്തുന്ന പെട്ടി ഓട്ടോയിലും ഇടിക്കുകയായിരുന്നു. രണ്ടാമത് ഇടിച്ച സ്കൂട്ടറിൽ സഞ്ചരിച്ച പെൺകുട്ടിക്ക് നിസാര പരിക്കേറ്റു. പച്ചക്കറി കച്ചവടം നടത്തിയിരുന്ന അതിഥി തൊഴിലാളിയുടെ കാൽ ഒടിഞ്ഞു. ഗുരുതരമാ യി പരിക്കേറ്റ ജെനുവിനെ ഉടൻ തന്നെ കല്ലിശേരിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടത്തിൽ സ്കൂട്ടർ പൂർണമായും തകർന്നു. ചെങ്ങന്നൂർ പോലീസ് സ്ഥലത്ത് എത്തി മേൽ നടപടി സ്വീകരിച്ചു. മരിച്ച ജെ നു ജോർജിന്‍റെ ഭാര്യ: ഷൈജു (നഴ്സ്, സൗദി). മക്കൾ: സ്നേഹ (നഴ്സിംഗ് വിദ്യാർഥിനി), സെൻ (എൻജിനിയറിംഗ് വിദ്യാ ർഥി).

ചക്കുളത്തുകടവ് പാലത്തിന്‍റെ നിർമാണം അവസാനഘട്ടത്തിൽ

മാങ്കാംകുഴി: വെട്ടിയാർ -വെൺമണി പ്രദേശങ്ങളെ തമ്മിൽ ബന്ധിപ്പിക്കുന്ന അച്ചൻകോവിലാറിനു കുറുകേ നിർമിക്കുന്ന ചക്കുളത്തുകടവ് പാലത്തിന്‍റെ നിർമാണം അവസാനഘട്ടത്തിലെ ത്തി. ജൂലൈ അവസാനത്തോടെ പാലത്തിന്‍റെ നിർമാണ പ്രവൃത്തികൾ പൂർത്തിയാക്കാൻ കഴിഞ്ഞദിവസം മന്ത്രി സജി ചെറിയാന്‍റെ സാന്നിധ്യത്തിൽ ചേർന്ന അവലോകനയോഗത്തിൽ ധാരണയായി. 2022ലാണ് 15.84 കോടി രൂപ ചെലവഴിച്ചുള്ള പാലത്തിന്‍റെ നിർമാണം ആരംഭിച്ചത്. 215.5 മീറ്ററാണ് പാലത്തിന്‍റെ നീളം. 26 മീറ്ററിന്‍റെ മൂന്നു സ്പാനുകളും 12.5 മീറ്ററിന്‍റെ 11 സ്പാനുകളുമാണുള്ളത്. വാഹനഗതാഗതത്തിനുള്ള 7.5 മീറ്ററും ഒരുവശത്ത് നടപ്പാതയുമുൾപ്പെടെ 9.75 മീറ്ററാണ് പുതിയ പാലത്തിന്‍റെ വീതി. പാലത്തിലേക്കുള്ള അനുബന്ധപാതയുടെ നിർമാണം ഇരുവശത്തും പൂർത്തിയായിട്ടുണ്ട്. ആറിനുമുകളിൽവരുന്ന ഭാഗത്തെ കോൺക്രീറ്റിംഗ് മാത്രമാണ് ഇനി അവശേഷിക്കുന്നത്. വെൺമണി പഞ്ചായത്തിലെ ഒറ്റപ്പെട്ട പ്രദേശമായ പടിഞ്ഞാറെ തുരുത്തി ഭാഗവും വെട്ടിയാർ മാങ്കാംകുഴി പ്രദേശങ്ങളെയും പുറംലോകവുമായി എളുപ്പത്തിൽ ബന്ധിപ്പിക്കാൻ പാലം യാഥാർഥ്യമാകുന്നതോടെ സഹായകരമായിത്തീരും. ഇനി വെൺമണി പടിഞ്ഞാറെ തുരുത്തിയിൽനിന്ന് ഒന്നരകിലോ മീറ്റർ സഞ്ചരിച്ചാൽ മാങ്കാംകുഴിയിലെത്താം. നിലവിൽ വെൺമണിയിൽ എത്താൻ വെട്ടിയാർ പുലക്കടവ് പാലം വഴി ആറര കിലോമീറ്ററിലധികം സഞ്ചരിക്കണം. ചക്കുളത്ത് കടവിൽ തഴക്കര പഞ്ചായത്ത് ഏർപ്പെടുത്തിയ കടത്തുവള്ളമായിരുന്നു നേരത്തേ അച്ചൻ കോവിലാറിന്‍റെ ഇരുകരകളിലുള്ളവരുടെയും ഏക യാത്രാമാർഗം. പടിഞ്ഞാറെ തുരുത്തിയിൽനിന്ന് കുട്ടികൾ വെട്ടിയാറിലെ സ്കൂളുകളിലെത്തുന്നതും വെട്ടിയാറിലെ കർഷകർ വെൺമണിയിലെ കൃഷിയിടങ്ങളിലേക്കു പോകുന്നതും ഈ കടത്തുവള്ളത്തെ ആശ്രയിച്ചായിരുന്നു. ചക്കുളത്തുകടവിൽനിന്ന് ഒരു കിലോമീറ്റർ സഞ്ചരിച്ചാൽ മാങ്കാംകുഴി -പന്തളം റോഡിലെ കല്ലുവിളയിൽ മുക്കിലെത്താം. ഈ റോഡ് വീതികൂട്ടി വികസിപ്പിച്ചാലേ പാലംകൊണ്ടുള്ള പൂർണ പ്രയോജനം ലഭിക്കൂ. എന്നാൽ, ഈ റോഡിന് ആവശ്യമായ ഭൂമി ഏറ്റെടുത്ത് റോഡിന് വീതി കൂട്ടാനുള്ള നടപടികൾ നടന്നുവരികയാണ്.

ചെറുതനയിലും വീയപുരത്തും തെരുവുനായ ആക്രമണം

ഹരിപ്പാട്: ചെറുതന പുത്തൻതുരുത്തിൽ തെരുവുനായയുടെ ആക്രമണം. ആറു പേർക്കു കടിയേറ്റു. ആക്രമണത്തിനുശേഷം നായ ചത്തു. തിങ്കളാഴ്ച രാത്രി ഒൻപതരയോടെ ചെറുതന പുന്നൂർ പറമ്പിൽ നസീമയുടെ മകൾ അൻസിറയെ(12)യാണ് നായ ആദ്യം കടിച്ചത്. ഇവരുടെ വീട്ടിലെ വളർത്തുനായക്കുട്ടിക്ക് ഭക്ഷണം കൊടുക്കാനായി പുറത്തിറങ്ങിയപ്പോൾ തെരുവുനായ വളർത്തുനായക്കുട്ടിയെ ആക്രമിക്കുകയായിരുന്നു. പുറത്തിറങ്ങിയ അൻസിറയെ കണ്ടതോടെ കുട്ടിയുടെ നേർക്കുതിരിഞ്ഞ് ആക്രമിക്കുകയും തുടർന്ന് ഇവിടെനിന്നു ഓടിപ്പോയ നായ ചൊവ്വാഴ്ച പുലർച്ചെ ആറിന് ജോലിക്കും മറ്റു ആവശ്യങ്ങൾക്കായി ഇറങ്ങിയ അഞ്ചു പേരെ കൂടി ആക്രമിക്കുകയായിരുന്നു. കാൻസർ രോഗിയായ വീയപുരം കാർത്തിക ഭവനത്തിൽ റെജിമോന്‍റെ വലതുകാലിന്‍റെ മുട്ടിന്‍റെ താഴെ ഭാഗത്താണ് നായ യുടെ കടിയേറ്റത്. ചെറുതന പാണ്ടി സ്വദേശികളായ പുതിയ വീട്ടിൽ പ്രകാശ്, ദേവസ്വം തുരുത്ത് പുതുവൽ ദിനേശൻ, ചെറുതന ഗോകുൽ ഭവനത്തിൽ ഗോകുൽ, ആനാരി വടക്ക് വടക്കോട്ടിൽ കുട്ടൻ, ചെറുതനയിലെ ഭാര്യ വീട്ടിൽ വന്ന ചെന്നിത്തല സ്വദേശി സുരേഷ് എന്നിവർക്കാണ് നായയുടെ കടിയേറ്റത്. ഇവരെല്ലാം വണ്ടാനം മെഡിക്കൽ കോളജ് ആശുപത്രിയിൽ ചികിത്സതേടി. ചെറുതന പുത്തൻതുരുത്തേൽ, മോഹനന്‍റെ പൂർണഗർഭിണിയായ ആടിന്‍റെ മൂക്ക് നായ കടിച്ചുപറിച്ചു. വീയപുരം പുത്തൻ തുരുത്തേൽ ഇബ്രാഹിമിന്‍റെ കറവയുള്ള പശുവിന്‍റെ കണ്ണിന്‍റെ ഭാഗത്തും ഇതിന്‍റെ കിടാവിന്‍റെ കാലിലും നായയുടെ കടിയേറ്റു. ആക്രമണങ്ങൾക്കുശേഷം നായയെ തോടിനു സമീപം ചത്ത നിലയിൽ കണ്ടെത്തി. തുടർന്ന് അധികൃതർ എത്തി നായയുടെ ജഡം പരിശോധനകൾക്കായി തിരുവല്ല മഞ്ഞാടിയിലുള്ള പക്ഷി നിരീക്ഷണ കേന്ദ്രത്തിൽ എത്തിച്ച് പോസ്റ്റ്മോർട്ടം നടത്തി പേ വിഷബാധസ്ഥിരീകരിച്ചു. നായയുടെ കഴുത്തിൽ ബെൽറ്റ് ഉള്ളതിനാൽ വളർത്തുനായ ആണോ എന്നും സംശയമുണ്ട്. ആയാപറമ്പ്, പാണ്ടി, ചെറുതന, വീയപുരം ഭാഗങ്ങളിൽ തെരുവ് നായശല്യം അതിരൂക്ഷമാണ്. അധികാരികൾ നടപടികൾ സ്വീകരിക്കുന്നില്ലെന്നു നാട്ടുകാർക്കു പരാതിയുണ്ട്. തെരുവുനായകളുടെ ശല്യം കാരണം ആളുകൾക്കു പുറത്തിറങ്ങാൻ കഴിയാത്ത അവസ്ഥയാണുള്ളത്. വേനലവധി കഴിഞ്ഞ് സ്കൂൾ തുറക്കുന്ന ദിവസം അടുക്കുന്നതോടെ രക്ഷിതാക്കൾക്ക് ആധിയാണ്. തെരുവുനായ ശല്യം ഇല്ലാതാക്കാൻ അധികൃതർ അടിയന്തര നടപടികൾ സ്വീകരിക്കണമെന്നാണ് നാട്ടുകാർ ഒന്നടങ്കം ആവശ്യപ്പെടുന്നത്.

ഇറിഗേഷൻ ടൂറിസം പദ്ധതി പുരോഗമന പാതയിൽ: മന്ത്രി റോഷി അഗസ്റ്റിൻ

ചെങ്ങന്നൂർ: സംസ്ഥാന സർക്കാർ പുതുതായി ആവിഷ്കരിച്ച ഇറിഗേഷൻ ടൂറിസം പദ്ധതി പുരോഗമിക്കുകയാണെന്ന് ജലവിഭവമന്ത്രി റോഷി അഗസ്റ്റിൻ. വിനോദസഞ്ചാര മേഖലയ്ക്ക് കൂടുതൽ പ്രയോജനകരമാകുന്ന തരത്തിൽ നദികളും ഡാമുകളും അവയോടനുബന്ധിച്ചുള്ള നിർമിതികളും ആകർഷകമാക്കുന്ന പദ്ധതികളാണ് തയാറാക്കുന്നത്. വരട്ടാർ പുനരുജ്ജീവന പദ്ധതിയുടെ ഭാഗമായി ആദി പമ്പയ്ക്ക് കുറുകെ ഇടനാടിനെയും കോയിപ്രത്തെയും ബന്ധിപ്പിക്കുന്ന ഇടനാട് വഞ്ഞിപ്പോട്ടിൽ കടവ് പാലത്തിന്‍റെ നിർമാണോദ്ഘാടനം നിർവഹിച്ചു സംസാരിക്കുകയായിരുന്നു അദ്ദേഹം. മന്ത്രി സജി ചെറിയാൻ അധ്യക്ഷനായി. വരട്ടാർ ഉൾപ്പെടെ ചെങ്ങന്നൂരിലെ ഒഴുക്ക് നിലച്ച എല്ലാ നദികളും പു നരുജ്ജീവിപ്പിക്കുമെന്നും വരട്ടാറിലെ പ്രധാന അഞ്ച് പാലങ്ങളുടെ നിർമാണം പൂർത്തീകരിച്ചുവെന്നും ചെങ്ങന്നൂരിലെ ടൂറിസത്തിന്‍റെ പ്രധാന കേന്ദ്രമായി വരട്ടാർ മാറുമെന്നും മന്ത്രി സജി ചെറിയാൻപറഞ്ഞു. അഡ്വ. പി.ആർ. പ്രദീപ് കുമാർ, ചെങ്ങന്നൂ ർ നഗരസഭാധ്യക്ഷ അഡ്വ. ശോഭ വർഗീസ്, കോയിപ്രം ബ്ലോക്ക് പഞ്ചായത്ത് പ്രസിഡന്‍റ് ജെ.സി. സൂസൻ ജോസഫ്, കോയിപ്രം പഞ്ചായത്ത് പ്രസിഡന്‍റ് പി. സുജാത തുടങ്ങിയവർ പ്രസംഗിച്ചു.

മാനവികത നിർബന്ധിത പാഠ്യവിഷയമാക്കണം: രമേശ് ചെന്നിത്തല

ഹരിപ്പാട്: യുവജനങ്ങൾക്കിടയിൽ വളർന്നുവരുന്ന ഭീകരവാദവും മദ്യം, മയക്കുമരുന്ന്, രാസലഹരി എന്നിവയോടുള്ള അമിത താത്പര്യം നിയന്ത്രിക്കുന്നതിനായി സ്കൂൾ, കോളജ് തലത്തിൽ മാനവികത പ്രത്യേക നിർബന്ധിത പാഠ്യവിഷയമാക്കി മാറ്റണമെന്ന് രമേശ് ചെന്നിത്തല. കേരള നിയമസഭാ അന്താരാഷ്ട്ര പുസ്തകോത്സവത്തിന്‍റെ മൂന്നാം പതിപ്പുമായി ബന്ധപ്പെട്ട് എംഎൽഎ ഫണ്ടിൽനിന്ന് നിയോജകമണ്ഡലത്തിലെ സ്കൂളുകൾക്കും ഗ്രന്ഥശാലകൾക്കും 20,000 രൂപ വീതം വിലവരുന്ന പുസ്തകങ്ങൾ നൽകുന്ന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. നഗരസഭാ ചെയർമാൻ കെ.കെ. രാമകൃഷ്ണൻ അധ്യക്ഷനായി. അമ്പലപ്പുഴ കുഞ്ചൻ നമ്പ്യാർ സ്മാരക സമിതി ചെയർമാൻ പ്രഫ. ഗോപിനാഥപിള്ള, മുൻ എംഎൽഎ അഡ്വ. ബി. ബാബുപ്രസാദ്, താലൂക്ക് ലൈബ്രറി സെക്രട്ടറി സി.എൻ.എൻ. നമ്പി, ജില്ലാ പഞ്ചായത്ത് അംഗം ജോൺ തോമസ്, കുഞ്ചൻ നമ്പ്യാർ സ്മാരക സമിതി അംഗം മുഞ്ഞിനാട്ട് രാമചന്ദ്രൻ, യുവജന ക്ഷേമ ബോർഡ് അംഗം എസ്. ദീപു, സുബി പ്രജിത്,കെ.കെ. സുരേന്ദ്രനാഥ്, ബിദു രാഘവൻ, രവിപുരത്തു രവീന്ദ്രൻ എന്നിവർ പ്രസംഗിച്ചു.

ബൈക്ക് മരത്തിലിടിച്ചുണ്ടായ അപകടത്തില്‍ യുവാവ് മരിച്ചു

മാവേലിക്കര: നിയന്ത്രണം തെറ്റിയ ബൈക്ക് മരത്തിലിടിച്ചുണ്ടായ അപകടത്തില്‍ യുവാവ് മരിച്ചു. മാവേലിക്കര പ്രായിക്കര കുന്നില്‍ വീട്ടില്‍ പരേതനായ കാര്‍ത്തികേയന്‍റെയും സുമയുടെയും മകന്‍ കലേഷ് കാര്‍ത്തികേയന്‍(31) ആണ് മരിച്ചത്. ഉമ്പര്‍നാടുള്ള അമ്മവീട്ടില്‍നിന്നു പ്രായിക്കരയിലുള്ള വീട്ടിലേക്ക് വരവേ ഇന്നലെ പുലര്‍ച്ചെ 12.05 ഓടെ കുടുംബക്കോടതിക്കു സമീപമായിരുന്നു സംഭവം. നിയന്ത്രണം തെറ്റിയ ബൈക്ക് റോഡരികില്‍ നിന്ന മരത്തിലിടിച്ച് മറിയുകയായിരുന്നു. പിന്നാലെ വന്ന സഹോദരന്‍ വിഷ്ണുവിന്‍റെ ബൈക്ക് റോഡില്‍ വീണുകിടന്ന കലേഷിന്‍റെ ബൈക്കില്‍ ഇടിച്ചു വിഷ്ണുവിന് നിസാര പരിക്കേറ്റു. തലയ്ക്കു ഗുരുതരമായി പരിക്കേറ്റ കലേഷിനെ ഉടന്‍തന്നെ മാവേലിക്കര ജില്ലാ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഇയാള്‍ പെയിന്‍റിംഗ് തൊഴിലാളിയായിരുന്നു. സംസ്‌കാരം നടത്തി.

പുളിക്കീഴ് ബിവറേജസ് ഗോഡൗണിൽ വൻ അഗ്നിബാധ, കെട്ടിടങ്ങൾ കത്തി അമർന്നു

തിരുവല്ല: പുളിക്കീഴ് ബീവറേജസ് ഗോഡൗണിൽ വൻ അഗ്നിബാധ. ഇന്നലെ രാത്രി എട്ടോടെയായിരുന്നു സംഭവം. ഔട്ട്‌ലെറ്റിന്‍റെ കെട്ടിടവും ഗോഡൗണും പൂർണമായും കത്തി നശിച്ചു. ആർക്കും പരിക്കില്ല. ഗോഡൗണിന്‍റെ പിൻവശത്ത് വെൽഡിംഗ് ജോലികൾ ഇന്നലെ ഉച്ചകഴിഞ്ഞ് ഉണ്ടായിരുന്നു. ഇതിൽ നിന്നും തീ പടർന്നതാകാമെന്നാണ് പ്രാഥമിക നിഗമനം. തിരുവല്ല, ചങ്ങനാശേരി, തകഴി എന്നീ യൂണിറ്റുകളിൽ നിന്നും എത്തിയ അഗ്നിശമനസേന തീ നിയന്ത്രണ വിധേയമാക്കി. ഗോഡൗണിന്‍റെ മേൽക്കുര അലൂമിനിയം ഷീറ്റ് ഉപയോഗിച്ച് നിർമിച്ചിട്ടുള്ളതിനാൽ തീ പെട്ടെന്ന് വ്യാപിച്ചു. മേൽക്കൂര പൂർണമായും കത്തിനശിച്ചു. മദ്യം നിറച്ച കുപ്പികൾ പൊട്ടിത്തെറിച്ചതും തീ പടരാൻ കാരണമായി. ലക്ഷക്കണക്കിന് രൂപയുടെ നാശനഷ്ടമാണ് സംഭവിച്ചിരിക്കുന്നത്.

ഇടിമണ്ണിക്കൽ വെഡിംഗ് ഫെസ്റ്റിവൽ ഓഫറുകൾ 31 വരെ

ചങ്ങനാശേരി: ഇടിമണ്ണിക്കൽ ഗോൾഡ് ആൻഡ് ഡയമണ്ട്സിന്റെ ചങ്ങനാശേരി കറുകച്ചാൽ, കോട്ടയം ഷോറുമുകളിൽ നടക്കുന്ന വെഡിംഗ് ഫെസ്റ്റിവൽ ഓഫറുകൾ 31 വരെ നടക്കും. ലൈറ്റ് വെയ്‌റ്റ് വെഡിംഗ് സ്വർണാഭരണങ്ങളുടെ പുതിയ കളക്ഷനുകളുമായുളള ഈ ഫെസ്റ്റിവലിൽ സ്വർണാഭരണങ്ങൾക്ക് പണിക്കൂലിയിൽ 50 ശതമാനം വരെ കിഴിവും, അതോടൊപ്പം ഡയമണ്ട് ക്യാരറ്റിന് 15,000 രൂപാ വരെ കിഴിവും ലഭിക്കും. ഒരു പവൻ മുതൽ നാല് പവൻ വരെയുള്ള എക്‌സിക്ലൂസീവ് വെഡിംഗ് സെറ്റും കൂടാതെ റോസ് ഗോൾഡ്, ചെട്ടിനാട്, കേരള ട്രഡീഷണൽ, ആൻ്റിക്, റോയൽ ആന്‍റിക് തുടങ്ങിയവയുടെ പുതിയ കളക്ഷൻസാണ് വെഡിംഗ് ഫെസ്റ്റിവലിന്‍റെ പ്രധാന ആകർഷത. കൂടാതെ 50,000 രൂപ മുതലുള്ള ഡയമണ്ട് സെറ്റുകളും ഏറ്റവും പുതിയ കളക്ഷ്നുകളുമാണ് ഫെസ്റ്റിവലിൽ ഒരുക്കിയിരിക്കുന്നത്. ടർക്കിഷ്, ഇറ്റാലിയൻ തുടങ്ങി ലൈറ്റ് വെയിറ്റ് ജ്വല്ലറിയിലെ ലോകോത്തര ഡിസൈനുകളും, പുതിയ ട്രെൻഡുകളും ഇടിമണ്ണിക്കൽ വെഡിംഗ് ഫെസ്റ്റിവലിൽ ഒരുക്കിയിട്ടുണ്ട്. 97459 00917.

എടത്വ പള്ളിയില്‍ ഇന്ന്

രാവിലെ 5.30ന് സപ്രാ, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന -ഫാ. ഏലിയാസ് കരിക്കണ്ടത്തില്‍, 7.30ന് സപ്രാ, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. മാര്‍ട്ടിന്‍ തൈപ്പറമ്പില്‍. 10ന് റാസ കുര്‍ബാന -ഫാ. സ്‌കറിയാ പറപ്പള്ളില്‍, സന്ദേശം-ഫാ. മാത്യു പുഞ്ചയില്‍. ഉച്ചകഴിഞ്ഞ് രണ്ടിന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന -റവ. ഡോ. സ്‌കറിയാ കന്യാകോണില്‍ നാലിന് പ്രദക്ഷിണം. കുരിശടിയിലേക്ക്. ഫാ. ജോസഫ് മുണ്ടുവേലില്‍ തുടര്‍ന്ന് കൊടിയിറക്ക്. രാത്രി 9.30ന് തിരുസ്വരൂപം പള്ളി യില്‍ പ്രതിഷ്ഠിക്കും.

കണ്ണാടി സെന്‍റ് റീത്താസ് തീർഥാടനം 16ന്

പുളിങ്കുന്ന്: ഫൊറോന മാതൃ-പിതൃവേദിയുടെ ആഭിമുഖ്യത്തില്‍ കണ്ണാടി സെന്‍റ് റീത്താസ് പള്ളിയിലേക്ക് തീര്‍ഥാടനം 16ന് നടക്കും. രാവിലെ 8.30ന് ഫൊറോന പള്ളി അങ്കണത്തിൽ ഡോ. ടോം പുത്തന്‍കളം റാലി ഫ്ളാഗ് ഓഫ് ചെയ്യും. ഫാ. ടോം ആര്യങ്കാലാ ആമുഖ സന്ദേശം നല്‍കും. പിതൃവേദി ഫൊറോന പ്രസിഡന്‍റ് സണ്ണി അഞ്ചിലിനും മാതൃവേദി പ്രസിഡന്‍റ് ബീന ജോസഫിനും പതാക കൈമാറുന്നതോടെ റാലി ആരംഭിക്കും. ഓരോ ദിവസങ്ങളിലായി കാവാലം, കേസറിയ, കായല്‍പുറം, മങ്കൊമ്പ്, വെളിയനാട്, പഴയകാട്ട്, മാമ്പുഴക്കരി, മിത്രക്കരി, രാമങ്കരി, മണലാടി, പള്ളിക്കൂട്ടുമ്മ, വേഴപ്ര, പുന്നക്കുന്നത്തുശേരി എന്നിവിടങ്ങളില്‍ പ്രയാണത്തിനുശേഷം പുളിങ്കുന്ന് ഫൊറോന പള്ളിയില്‍ 15ന് ആത്മീയ യാത്ര സമാപിക്കും. പതിനാറിന് നടക്കുന്ന കണ്ണാടി തീര്‍ഥാടന റാലിയോടൊപ്പം അതിരൂപത ഭാരവാഹികളായ ജോര്‍ജ് തോമസ്, ഗ്രേസി സഖറിയാസ് നെല്ലിവേലി എന്നിവര്‍ ഛായചിത്രവും വഹിച്ചു കണ്ണാടി സെന്‍റ് റീത്താസ് പള്ളിയില്‍ എത്തിച്ചേരുമ്പോള്‍ ഫാ.കുര്യന്‍ ചക്കുപുരയ്ക്കല്‍, കൈക്കാരന്മാര്‍, വിവിധ സംഘടനാ ഭാരവാഹികള്‍, സ്വാഗതസംഘം ഭാരവാഹികള്‍ എന്നിവര്‍ ചേര്‍ന്ന് ഊഷ്മളമായ വരവേല്‍പ്പ് നല്‍കി തീര്‍ഥാടന റാലിയെയും ആത്മീയ യാത്രയെയും സ്വീകരിക്കും. തുടര്‍ന്ന് ഫൊറോനാ വികാരിയുടെ മുഖ്യകാര്‍മികത്വത്തില്‍ ഫൊറോനായിലെ 19 വൈദികര്‍ ചേര്‍ന്ന് പരിശുദ്ധ കുര്‍ബാന അര്‍പ്പിക്കും. ആർച്ച്ബി ഷപ് മാര്‍ ജോസഫ് പെരുന്തോട്ടം സന്ദേശം നല്‍കും. തുടര്‍ന്ന് നേര്‍ച്ച ഭക്ഷണത്തോടുകൂടി പരിപാടികള്‍ സമാപിക്കും. ഫൊറോന മാതൃവേദി -പിതൃവേദി ആനിമേഷന്‍ ടീം അംഗങ്ങളുടെ നേതൃത്വത്തില്‍101 അംഗ സ്വാഗതസംഘം കമ്മിറ്റി രൂപീകരിച്ച് വിപുലമായ പ്രവര്‍ത്തനങ്ങള്‍ നടന്നുവരുന്നു.

നൂറുമേനി ഫൊറോനാതല മത്സരം നാളെ

ചങ്ങനാശേരി: ചങ്ങനാശേരി അതിരൂപത ബൈബിൾ അപ്പൊസ്ത‌ലേറ്റും മാക് ടിവിയും ശാലോം ടിവിയും സംയുക്തമായി ജൂബിലി വർഷത്തിൽ നടത്തുന്ന കുടുംബ ബൈബിൾ വചന മനഃപ്പാഠ പദ്ധതി നൂറുമേനി സീസൺ-3 ഫൊറോനാ മത്സരം നാളെ ഉച്ചകഴിഞ്ഞ് രണ്ടിന് അതിരൂപതയുടെ 18 ഫൊറോനകളിലെ പരീക്ഷാകേന്ദ്രങ്ങളിൽ വച്ച് നടത്തപ്പെടും. ഫൊറോന വികാരിമാർ മത്സരം ഉദ്ഘാടനം ചെയ്യും. കുടുംബക്കൂട്ടായ്‌മ - ബൈബിൾ അപ്പൊസ്തലേറ്റ് ഫൊറോന ഡയറക്ടറും ആനിമേറ്ററും ഫൊറോന സമിതിയും മത്സരത്തിന് നേതൃത്വം നൽകും. നൂറുമേനി ഫൊറോനാ മത്സരത്തിൽ പങ്കെടുക്കാൻ യോഗ്യത ലഭിച്ചവരുടെ പേരു വിവരങ്ങൾ നൂറുമേനി സൈറ്റിൽ അപ്‌ലോഡ് ചെയ്തതിന്‍റെ പ്രിന്‍റെടുത്ത് ഇടവക വികാരിയുടെ ഒപ്പോടുകൂടിയ സാക്ഷ്യപത്രം സമർപ്പിക്കണമെന്ന് ഡയറക്ടർ ഫാ. ജോർജ് മാന്തുരുത്തിൽ, നൂറുമേനി ചെയർമാൻ സണ്ണിച്ചൻ ഇടിമണ്ണിക്കൽ എന്നിവർ അറിയിച്ചു. വിശദാംശങ്ങൾക്ക് ഫോൺ: +91 99613 69380, +91 73062 08356.

മെഡിക്കൽ കോളജ് ആശുപത്രി പരിസരം സാമൂഹ്യവിരുദ്ധരുടെ താവളം

അമ്പലപ്പുഴ: എയ്ഡ് പോസ്റ്റ് പോലീസ് നോക്കുകുത്തി ആശുപത്രി പരിസരം മദ്യപാനികളുടെയും ലഹരിവസ്തുക്കളുടെയും താവളമാകുന്നു. ആലപ്പുഴ മെഡിക്കൽ കോളജ് ആശുപത്രി എയ്ഡ് പോസ്റ്റ് പോലീസാണ് കാഴ്ചവസ്തുവായി മാറിയിരിക്കുന്നത്. രണ്ട് എസ്ഐമാരുൾപ്പെടെ പത്തു പോലീസുകാരെയാണ് നിയമിച്ചിരിക്കുന്നത്. എന്നാൽ ഒരു സമയം നാലു പോലീസുകാർ മാത്രമേ പലപ്പോഴും ഡ്യൂട്ടിക്ക് കാണൂ. ഡ്യൂട്ടിയുള്ള പോലീസുകാർ കൃത്യമായി ജോലി ചെയ്യാത്തതുമൂലം ആശുപത്രി പരിസരം മദ്യപാനികളുടെയും ലഹരി ഉപയോഗിക്കുന്നവരുടെയും താവളമായി മാറിയിരിക്കുകയാണ്. സൂപ്പർ സ്പെഷാലിറ്റി കെട്ടിടത്തിനു സമീപം സന്ധ്യ കഴിഞ്ഞാൽ മദ്യപരുടെയും ലഹരി ഉപയോഗിക്കുന്നവരുടെയും താവളമാണ്. ജെ ബ്ലോക്കിനു സമീപത്തെ ഇടനാഴിയും കാൻസർ വിഭാഗം, മാനസിക വിഭാഗം ഒ പി എന്നിവയ്ക്കു സമീപവും മദ്യപാനികളുടെ അഴിഞ്ഞാട്ടമാണ്. ഇതിൽ അന്യ സംസ്ഥാന തൊഴിലാളികളും രോഗികളുടെ കൂട്ടിരിപ്പുകാരും ഉൾപ്പെടും. അത്യാഹിത വിഭാഗത്തോടു ചേർന്നു പ്രവർത്തിക്കുന്ന എയ്ഡ് പോസ്റ്റിലെ പോലീസുകാർ മദ്യപാനികൾ താവളമാക്കിയ ഇടങ്ങളിലേക്ക് തിരിഞ്ഞുനോക്കാറില്ല. ഏതാനും നാൾ മുൻപ് ജില്ലാ പോലീസിന് ലഭിച്ച രഹസ്യവിവരത്തെത്തുടർന്ന് അമ്പലപ്പുഴ പോലീസും പുന്നപ്ര പോലീസും സംയുക്‌തമായി നടത്തിയ മിന്നൽ പരിശോധനയിൽ പതിനഞ്ചു പേരെ പിടികൂടി കേസെടുത്തിരുന്നു. വിവരം ലഭിച്ചാലും എയ്ഡ് പോസ്റ്റ് പോലീസ് മദ്യപാനികളെ പിടികൂടാനായി പരിശോധനയ്ക്ക് ഇറങ്ങാറില്ല. പി ജി, നഴ്സിംഗ് കോളജ് ക്വാർട്ടേഴ്സിനു സമീപവും മദ്യപസംഘം കൈയടക്കിയിരിക്കുകയാണ്. ആശുപത്രിയിലെ ക്രമസമാധാന പാലനത്തിനായി ചുമതലപ്പെടുത്തിയ എയ്ഡ് പോസ്റ്റ് പോലീസ് വെറും കാഴ്ച വസ്തുവായി മാറിയിരിക്കുകയാണ്.

ഓർമകളിലെ പോരാട്ടം അയവിറക്കി ധീരജവാൻ ടി.കെ. മോഹനൻ

ചെങ്ങന്നൂർ: 1969ൽ ഇന്ത്യൻ ആർട്ടിലറിയിൽ ഹവിൽദാർ ആയി ചേർന്ന ചെങ്ങന്നൂർ കാരയ്ക്കാട് തുളസി സദനത്തിൽ ടി. കെ. മോഹനൻ, പരിശീലനത്തിനു ശേഷം പശ്ചിമബംഗാളിലേക്ക് നിയമിതനായി. 1970കളുടെ അവസാനത്തിൽ കിഴക്കൻ ബംഗാളിൽ ആഭ്യന്തര കലാപം കൊടുമ്പിരികൊണ്ട സമയം. പശ്ചിമ പാകിസ്ഥാനും ഇന്ത്യയും തമ്മിൽ യുദ്ധം പടിവാതിൽക്കലെത്തി നിൽക്കുകയായിരുന്നു-അദ്ദേഹം ഓർക്കുന്നു. ഞങ്ങളുടെ റെജിമെന്‍റ് റോഡ് മാർഗം തുറ (ആസാം) വഴി യുദ്ധഭൂമിയിലേക്ക് നീങ്ങി. 1971 ഡിസംബറിലാണ് യുദ്ധം പ്രഖ്യാപിച്ചത്. കിഴക്കൻ പാകിസ്ഥാനിലെ പട്ടാളക്കാരെ പടിഞ്ഞാറോട്ടും പടിഞ്ഞാറൻ പാകിസ്ഥാനിലെ പട്ടാളക്കാരെ കിഴക്കോട്ടും അയച്ചാണ് അവർ ഇന്ത്യയുമായി യുദ്ധം തുടങ്ങിയത്. അന്നെനിക്ക് വെറും 22 വയസായിരുന്നു. റെജിമെൻ്റ് ധീരമായി പോരാടി മുന്നേറി ധാക്കയിൽ എത്തിച്ചേർന്നു. പിന്തിരിഞ്ഞോടിയ പാകിസ്ഥാൻ സൈന്യം വഴിയിലുള്ള പാലങ്ങളെല്ലാം തകർത്തിരുന്നു. ഒടുവിൽ വെടിനിർത്തൽ പ്രഖ്യാപിക്കുകയും യുദ്ധം അവസാനിക്കുകയും ചെയ്തു. ഈ ധീരതയ്ക്ക് അദ്ദേഹത്തിന് ഈസ്റ്റേൺ സ്റ്റാർ മെഡൽ ലഭിച്ചു. അങ്ങനെ ബംഗ്ലാദേശിന് സ്വാതന്ത്ര്യം ലഭിച്ചു. 1990-ൽ സർവീസിൽ നിന്ന് വിരമിച്ചു. ഭാസുരംഗിയാണ് ഭാര്യ. ഇദ്ദേഹത്തിന് രണ്ട് മക്കളാണ് ആതിര മോഹനും ആര്യ മോഹനും. കാലം ഒരുപാട് മാറി. ഇന്ന് ഭീകരരെ ഇല്ലാതാക്കാൻ ശേഷിയുള്ള അത്യാധുനിക മിസൈലുകൾ ഭാരതത്തിനുണ്ട്. അത് നിയന്ത്രിക്കാൻ കഴിവുള്ള സൈനികരും നമുക്കുണ്ട് എന്നദ്ദേഹം അഭിമാനത്തോടെ പറയുന്നു.

പള്ളിക്കൂട്ടുമ്മ ഫാത്തിമമാതാ പള്ളിയിൽ തിരുനാൾ

മങ്കൊമ്പ്: പള്ളിക്കൂട്ടുമ്മ ഫാത്തിമമാതാ പള്ളിയിൽ തിരുനാളിനു തുടക്കമായി. വികാരി ഫാ.ബിജു കണ്ണാടിപ്പാറ കൊടിയേറ്റി. ഇന്നു രാവിലെ 6.45ന് സപ്ര, ആഘോഷമായ വിശുദ്ധ കുർബാന, വൈകുന്നേരം അഞ്ചിന് ജപമാല, ദിവ്യകാരുണ്യ പ്രദക്ഷിണം, 6.30ന് പട്ടണപ്രദക്ഷിണം, ആകാശവിസ്മയം. പ്രധാന തിരുനാൾ ദിനമായ നാളെ രാവിലെ 6.30ന് സപ്ര, വിശുദ്ധ കുർബാന, 9.30ന് ആഘോഷമായ തിരുനാൾ കുർബാന: ഫാ.ജേക്കബ് നടുവിലേക്കളം, തിരുനാൾ സന്ദേശം: ഫാ.ജസ്റ്റിൻ ആലുങ്കൽ, തിരുനാൾ പ്രദക്ഷിണം, കൊടിയിറക്ക്, ലേലം.

കഞ്ചാവുമായി ഇതരസംസ്ഥാന തൊഴിലാളി പിടിയിൽ

മാന്നാർ: ചെന്നിത്തലയിൽ ഒന്നര കിലോയോളം കഞ്ചാവുമായി ഇതരസംസ്ഥാന തൊഴിലാളിയെ മാന്നാർ പോലീസ് പിടികൂടി. ബീഹാർ സ്വദേശി സഞ്ജീവ് ഘരാമി(41)നെയാണ് അറസ്റ്റ് ചെയ്തത്. ചെന്നിത്തല വലിയ പെരുമ്പുഴ പാലത്തിനു സമീപം ആലപ്പുഴ ജില്ലാ ലഹരി വിരുദ്ധ സ്ക്വാഡും മാന്നാർ പോലീസും ചേർന്നാണ് പ്രതിയെ പിടികൂടി ബാഗിൽ സൂക്ഷിച്ചിരുന്ന കഞ്ചാവ് കണ്ടെടുത്തത്. ചില്ലറ വില്പനയ്ക്കായി ബാഗിൽ സൂക്ഷിച്ച നിലയിലാണ് കഞ്ചാവ് കണ്ടെടുത്തത്. ആലപ്പുഴ ജില്ലാ പോലീസ് മേധാവിക്കു ലഭിച്ച രഹസ്യ വിവരത്തിന്‍റെ അടിസ്ഥാനത്തിൽ ലഹരി വിരുദ്ധ സ്ക്വാഡും മാന്നാർ പോലീസും ചേർന്ന് പരിശോധന നടത്തിയപ്പോഴാണ് കഞ്ചാവുമായി അന്യ സംസ്ഥാന തൊഴിലാളിയെ പിടികൂടിയത്. 1.400 ഗ്രാം കഞ്ചാവാണ് പിടിച്ചെടുത്തത്. മാന്നാർ പോലീസ് ഇൻസ്പെക്ടർ രജീഷ് കുമാറിന്‍റെ നിർദേശപ്രകാരം , എസ്ഐ സി.എസ്. അഭിറാം, ഗ്രേഡ് എസ്ഐ സുദീപ്, സീനിയർ സിവിൽ പോലീസ് ഓഫിസർമാരായ ശ്രീകുമാർ, അജിത്, സുധീഷ്, സിപിഒ ഷിനു ഹോം ഗാർഡ് ഉണ്ണികൃഷ്ണൻ എന്നിവരടങ്ങിയ പോലീസ് സംഘമാണ് പരിശോധന നടത്തി പ്രതിയെ പിടികൂടിയത്.

വിശ്വംഭരന്‍റെ മൃതദേഹം ഇനി വൈദ്യശാസ്ത്ര പഠനത്തിന്

അമ്പലപ്പുഴ: അമ്പലപ്പുഴ വണ്ടാനം മണലയിൽ വീട്ടിൽ കെ. വിശ്വംഭര(81)ന്‍റെ മൃതദേഹം വൈദ്യശാസ്ത്ര പഠനത്തിനായി വിട്ടുനൽകി. ആലപ്പുഴ ഇരട്ടക്കുളങ്ങര റൂട്ടിൽ സർവീസ് നടത്തിയിരുന്ന സ്വകാര്യ ബസിലെ കണ്ടക്ടറും യുക്തിവാദിസംഘം പ്രവർത്തകനും വണ്ടാനം എസ്എൻഡിപി ശാഖ മുൻ സെക്രട്ടറിയുമായിരുന്നു. ഭാര്യ: സരസ്വതി. മക്കൾ: ഉഷ (മെഡിക്കൽ കോളജ്, തൃശൂർ), ഷിബി (അറവുകാട് ഹയർ സെക്കൻഡറി സ്കൂൾ), ബാബു(മസ്കറ്റ്). മരുമക്കൾ: വി പി പ്രകാശ്, ടി ജി ചന്ദ്രപ്രകാശ്, സന്ധ്യ.

ഓൺലൈൻ ത‌ട്ടിപ്പ്: പ്രതികൾ തമ്മിലുള്ള ബന്ധത്തിനു തെളിവായി പണമിടപാടുകൾ

ആലപ്പുഴ: ചേർത്തലയിലെ ഡോക്ടർ ദമ്പതികളിൽ നിന്ന് 7.65 കോടി രൂപ തട്ടിയെടുത്ത കേസിൽ അറസ്റ്റിലായ തയ്‌വാൻ സ്വദേശികൾ ഉൾപ്പെടെ നാലു പ്രതികൾക്ക് ഒരേ ക്രിപ്റ്റോ വാലറ്റിൽനിന്നു ക്രിപ്റ്റോ കറൻസി അയച്ചതായി കണ്ടെത്തി. തട്ടിപ്പിലൂടെ സ്വന്തമാക്കുന്ന പണത്തിന്‍റെ കമ്മീഷനാണ് ഇതെന്നാണു വിലയിരുത്തൽ. തമ്മിൽ പരിചയമില്ലെന്നും ഇടപാട് ഇല്ലെന്നും പറഞ്ഞിരുന്ന പ്രതികൾക്ക് ഒരേ ക്രിപ്റ്റോ വാലറ്റിൽനിന്നുള്ള പണം നിർണായക തെളിവാകും. കേസിൽ ആദ്യം പിടിയിലായ രണ്ടു തയ്‌വാൻകാരും പ്രധാന പ്രതികളിൽ ഒരാളായ കർണാടക തുമാകുരു ജില്ലയിലെ മധുഗിരി സ്വദേശി ഭഗവാൻ റാം ഡി.പട്ടേലും (22) തമ്മിൽ പരിചയമുണ്ടെന്നു സ്ഥിരീകരിച്ചിരുന്നു. എന്നാൽ പിന്നീട് അറസ്റ്റിലായ തയ്‌വാൻ സ്വദേശികളായ സുങ് മു ചീ (മാർക്ക്-42), ചാങ് ഹോ യൻ (മാർക്കോ-34) എന്നിവർ ഒപ്പം അറസ്റ്റിലായ ജാർഖണ്ഡ് സ്വദേശിയായ സെയ്ഫ് ഗുലാം ഹൈദറുമായോ (28) തട്ടിപ്പു കേസിലെ മറ്റുപ്രതികളുമായോ ബന്ധമുണ്ടെന്നു ചോദ്യം ചെയ്യലിൽ സമ്മതിച്ചിരുന്നില്ല. കേസിൽ തട്ടിയെടുത്ത പണം പിൻവലിച്ചവരെയും തട്ടിപ്പിനു സാങ്കേതിക സഹായം നൽകിയവരെയുമാണ് ഇതുവരെ പിടികൂടിയിട്ടുള്ളത്.

പേവിഷബാധയേറ്റ് പ്ലസ് വൺ വിദ്യാർഥി മരിച്ചു

അമ്പലപ്പുഴ: പേവിഷബാധയേറ്റ് പ്ലസ് വൺ വിദ്യാർഥി മരിച്ചു. തകഴി പഞ്ചായത്ത് ഒന്നാം വാർഡ് കരുമാടി കിഴക്കേമുറി പുഷ്പമംഗലം വീട്ടിൽ ശരത്-ഗീതാകുമാരി മകൻ സൂരജ്(17) ആണ് മരിച്ചത്. കഴിഞ്ഞ മാസം ശരത്തിന്‍റെ സഹാേദരി സീമയുടെ അമ്പലപ്പുഴയിലുള്ള വീട്ടിലെ നായയുടെ നഖം കൊണ്ട് പോറൽ ഏറ്റിരുന്നതായി പറയുന്നു. കഴിഞ്ഞ ദിവസം പനിയും കാലിൽ വേദനയും അനുഭവപ്പെട്ടതിനെത്തുടർന്ന് സൂരജ് തകഴിയിലുള്ള സ്വകാര്യ ആശുപത്രിയിൽ ചികിത്സ തേടിയിരുന്നു. പിന്നീട് ആലപ്പുഴ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. തുടർന്നു നടത്തിയ പരിശോധനയിലാണ് പേവിഷബാധയേറ്റതായി അറിയുന്നത്. ഇവിടെ പ്രതിരോധ കുത്തിവയ്പ് നടത്തിയെങ്കിലും വെള്ളിയാഴ്ച രാവിലെ മരിച്ചു. സൂരജ് മൃഗങ്ങളോട് അടുത്ത് ഇടപഴുകുന്ന സ്വഭാവക്കാരനായിരുന്നെന്നു പറയുന്നു. പിതൃസഹോദരിയുടെ മകന്‍റെ വിവാഹത്തോടനുബന്ധിച്ചു കുറച്ചു ദിവസമായി സൂരജ് ഇവിടെയായിരുന്നു. ഇവിടെവച്ചാണ് വളർത്തുനായയുടെ നഖംകൊണ്ട് കാലിന് പോറൽ ഏറ്റത്. മുറിവ് ശ്രദ്ധയിൽപ്പെട്ട വീട്ടുകാർ വിവരം തിരക്കിയെങ്കിലും മുള്ളുകമ്പി കൊണ്ടതാണെന്നാണു പറഞ്ഞത്. വളർത്തുനായയ്ക്ക് പ്രതിരോധ കുത്തിവയ്പ് എടുത്തിട്ടുള്ളതായി ബന്ധുക്കൾ പറഞ്ഞു. തകഴി ദേവസ്വം ബോർഡ് ഹയർസെക്കൻഡറി സ്കൂൾ പ്ലസ് വൺ വിദ്യാർഥിയാണ് സൂരജ്. സഹോദരൻ: സഗജ്.

വിചിത്രരൂപത്തില്‍ പിറന്ന പശുക്കിടാവ്‌ വിസ്‌മയക്കാഴ്‌ചയായി

ചേർത്തല: വിചിത്ര രൂപത്തിലുള്ള തലയുമായി പിറന്ന പശുക്കിടാവ്‌ നാട്ടുകാര്‍ക്ക് വിസ്‌മയകാഴ്‌ചയായി. ചേർത്തല തെക്ക്‌ പഞ്ചായത്ത്‌ 11-ാം വാർഡിൽ അരീപ്പറമ്പ്‌ കണിയാടിക്കൽ അനിരുദ്ധന്‍റെ പശുവാണ് വിചിത്രരൂപമുള്ള കിടാവിനു ജന്മം നൽകിയത്‌. കണ്ണുകളില്ല. വായുടെ ഭാഗത്ത്‌ ചെറുദ്വാരത്തിലൂടെ നാവ്‌ പുറത്തു കാണാം. മൂക്കിനു പകരം ചെറുദ്വാരം മാത്രം. പ്രസവിച്ചയുടനെ നടന്നെങ്കിലും പിന്നീട്‌ കിടപ്പിലായി. പാൽ കുടിക്കാനാകാത്ത അവസ്ഥയാണ്. കുപ്പിപ്പാൽ നൽകാൻ ശ്രമിച്ചെങ്കിലും വിജയിച്ചില്ല. ലക്ഷ്‌മിയുടെ രണ്ടാം പ്രസവത്തിലാണ് ഇങ്ങനെയൊരു കിടാവ്‌ പിറന്നത്‌. സാമാന്യം ആരോഗ്യമുള്ള കിടാരിയാണ്. അത്യപൂർവമായി ഇത്തരം കിടാരികൾ പിറക്കാറുണ്ടെന്നാണ് മൃഗസംരക്ഷണവകുപ്പ്‌ അധികൃതർ പറയുന്നത്‌.

കർഷകരുടെ അധ്വാനത്തിന് വിലപേശി മില്ലുടമകൾ

അമ്പലപ്പുഴ: കർഷകരുടെ മാസങ്ങൾ നീണ്ട അധ്വാനത്തിന് വിലപേശി 27 കിലോ വരെ കിഴിവ് ആവശ്യപ്പെട്ട് മില്ലുടമകൾ. നെല്ല് നശിപ്പിക്കാനൊരുങ്ങി കർഷകർ. അമ്പലപ്പുഴ വടക്ക് പഞ്ചായത്ത് കഞ്ഞിപ്പാടം കാട്ടുകോണം, പട്ടത്താനം, അമ്പലക്കടവ് തുടങ്ങിയ പാടശേഖരങ്ങളിൽ നിന്ന് കൊയ്തെടുത്ത കോടിക്കണക്കിനു രൂപയുടെ നെല്ലാണ് സംഭരണം തടസപ്പെട്ടതിനെത്തുടർന്ന് പാടശേഖരങ്ങളിലും റോഡരികിലുമായി കൂട്ടിയിട്ടിരിക്കുന്നത്. 15 ദിവസം മുൻപ് കൊയ്ത്ത് പൂർത്തിയാക്കിയതാണ്. ഏക്കറിന് 25,000 രൂപ വരെ ചെലവിട്ടാണ് കർഷകർ തങ്ങളുടെ അധ്വാനം വിയർപ്പാക്കിയത്. ഇതിനിടെ ഉണ്ടായ ഉപ്പുവെള്ള ഭീഷണിയെ അതിജീവിച്ചാണ് കർഷകർ സ്വർണം പണയം വച്ചും അമിത പലിശയ്ക്ക് വായ്പയെടുത്തും കൊയ്ത്ത് പൂർത്തിയാക്കിയത്. സപ്ലൈകോ ചുമതലപ്പെടുത്തിയ മില്ലുടമകളുടെ ഏജന്‍റുമാർ എത്തിയെങ്കിലും 23 കിലോ വരെ കിഴിവാണ് ആവശ്യപ്പെട്ടത്. പിന്നീടിത് 27 വരെയായി. ഈ കിഴിവിലും നെല്ല് നൽകാൻ കർഷകർ തയാറായെങ്കിലും പിന്നീട് നെല്ല് മോശമാണെന്നു പറഞ്ഞ് മില്ലുടമകൾ സംഭരണത്തിൽ നിന്ന് പിൻമാറി. ഇതിന് ശേഷം പാഡി ഓഫീസർ എത്തിയെങ്കിലും സംഭരണകാര്യത്തിൽ സർക്കാർ അന്തിമ തീരുമാനമെടുക്കുമെന്ന് പറഞ്ഞ് മടങ്ങി. ഇതോടെയാണ് കർഷകർ ദുരിതത്തിലായത്. 50 ലോഡ് നെല്ല് മഴ ഭീഷണിയിൽ കെട്ടിക്കിടക്കുകയാണ്. കോടിക്കണക്കിനു രൂപയുടെ നെല്ല് കെട്ടിക്കിടന്നിട്ടും സംഭരണ കാര്യത്തിൽ അന്തിമ തീരുമാനമായിട്ടില്ല. കൂട്ടിയിട്ടിരിക്കുന്ന നെല്ല് പലയിടത്തും കിളിർക്കാനും തുടങ്ങി. ഇതോടെയാണ് നെല്ല് നശിപ്പിക്കാൻ കർഷകർ തീരുമാനിച്ചത്. കൃഷി ചെയ്തില്ലെങ്കിൽ ആനുകൂല്യങ്ങളൊന്നും ലഭിക്കില്ലെന്ന് ഉദ്യോഗസ്ഥർ പറഞ്ഞതിന്‍റെ അടിസ്ഥാനത്തിലാണ് ഇവർ മാസങ്ങൾ നീണ്ട അധ്വാനത്തിനൊടുവിൽ കൃഷി പൂർത്തിയാക്കിയത്. ഒടുവിൽ സർക്കാർ തങ്ങളെ ഉപേക്ഷിച്ചെന്നാണ് ഇവരുടെ പരാതി.

മികച്ച വിജയത്തോടെ മൂവര്‍ സംഘത്തോടൊപ്പം ആറ് ജോഡി ഇരട്ടകള്‍

മാവേലിക്കര: മറ്റം സെന്‍റ് ജോണ്‍സ് ഹയര്‍ സെക്കൻഡറി സ്‌കൂളില്‍നിന്ന് എസ്എസ്എല്‍സി പരീക്ഷയില്‍ മികച്ച വിജയം കരസ്ഥമാക്കിയ മൂവര്‍ സംഘത്തോടൊപ്പം ആറ് ജോഡി ഇരട്ടകള്‍ മൂവര്‍ സംഘമായ കായംകുളം നന്മ വീട്ടില്‍നിന്നു റോണി റജി, ടോണി റജി (ഇരുവര്‍ക്കും എല്ലാ വിഷയത്തിനും എ പ്ലസ്), ബോണി റജി (ഒന്‍പത് എ പ്ലസ്, ഒരു എ) ഇരട്ടകളായ ഏവൂര്‍ സാകേതത്തില്‍ നിന്നു ഗൗരി മോഹന്‍ (നാല് എ പ്ലസ്, നാല് എ, ഒരു ബി പ്ലസ്, ഒരു സി പ്ലസ്), ഗൗതം മോഹന്‍ (ആറ് എ പ്ലസ്, രണ്ട് എ, ഒരു ബി പ്ലസ്, ഒരു ബി). മുട്ടം സാരംഗത്തില്‍ നിന്നും എസ്. അഭിരാം (എല്ലാ വിഷയത്തിനും എ പ്ലസ്), എസ്. അഭിമന്യു (ഒന്‍പത് എ പ്ലസ്, ഒരു ബി പ്ലസ്). കരിപ്പുഴ പനാറാത്തുനിന്ന് അനാമിക (നാല് എ പ്ലസ്, രണ്ട് എ, രണ്ട് ബി പ്ലസ്, ഒരു ബി, ഒരു സി പ്ലസ്), അവന്തിക (മൂന്ന് എ പ്ലസ്, രണ്ട് എ, ഒരു ബി പ്ലസ്, മൂന്ന് ബി, ഒരു സി പ്ലസ്). കണ്ണമംഗലം വഞ്ചിപ്പുര പടീറ്റതില്‍നിന്ന് എസ്. സരയു (മൂന്ന് എ പ്ലസ്, നാല് എ, ഒരു ബി പ്ലസ്, രണ്ട് സി പ്ലസ്), എസ്. സാഗര (രണ്ട് എ പ്ലസ്, ഒരു എ, നാല് ബി പ്ലസ്, ഒരു ബി, രണ്ട് സി പ്ലസ്). കൊയ്പ്പള്ളി കാരാൺമ വേങ്ങാട്ട് പുത്തന്‍വീട്ടില്‍ ഐ. കൃഷ്ണേന്ദു, എസ്. രാജ് കൃഷ്ണ (ഇരുവര്‍ക്കും മുഴുവന്‍ വിഷയത്തിനും എ പ്ലസ്). ചെട്ടികുളങ്ങര ഈരേഴ തെക്ക് ഉത്തമ ഭവനം സൂര്യ പ്രസാദ് (ഒരു എ പ്ലസ്, രണ്ട് എ, രണ്ട് ബി പ്ലസ്, രണ്ട് ബി, മൂന്ന് സി പ്ലസ്), ദേവ പ്രസാദ് (രണ്ട് എ പ്ലസ്, ഒരു എ, മൂന്ന് ബി പ്ലസ്, മൂന്ന് ബി, ഒരു സി പ്ലസ്)

ബീച്ച് ആശ്രമ ദേവാലയത്തിൽ തിരുനാളിന് തുടക്കം

ആലപ്പുഴ: ആലപ്പുഴ ബീച്ച് ആശ്രമ ദേവാലയത്തിൽ വിശുദ്ധ ഫ്രാൻസിസ് സേവ്യറിന്‍റെയും തിരുക്കുടുംബത്തിന്‍റെയും കേരളീയ വിശുദ്ധരുടെയും സംയുക്ത തിരുനാളിന് തുടക്കമായി. നാളെ സമാപിക്കും. ആശ്രമ സുപ്പീരിയർ ഫാ. ജോസ് കൊല്ലംപറമ്പിൽ സിഎംഐ കൊടിയേറ്റി. തുടർന്ന് മധ്യസ്ഥ പ്രാർഥന, വചന സന്ദേശം എന്നിവ നടന്നു. തിരുകർമങ്ങൾക്ക് ഫാ. പോൾ തുണ്ടുപറമ്പിൽ സിഎംഐ കാർമികത്വം വഹിച്ചു. ഇന്നു രാവിലെ 6.30 ന് സീവ്യു വാർഡ് സെന്‍റ് സെബാസ്റ്റ്യൻ പള്ളിയിൽനിന്ന് ജപമാല പ്രദക്ഷിണം ആരംഭിച്ച് ഏഴിന് ബീച്ച് പള്ളിയിലെത്തും. തുടർന്ന് ലത്തീൻ റീത്തിൽ ആഘോഷമായ തിരുനാൾ ദിവ്യബലിയും വചന സന്ദേശവും ദിവ്യകാരുണ്യപ്രദക്ഷിണവും നടക്കും. നാളെ രാവിലെ 6.30ന് സപ്ര, കരുണക്കൊന്ത. തുടർന്ന് ആലപ്പുഴ മെത്രാൻ ഡോ. ജയിംസ് റാഫേൽ ആനാപറമ്പിൽ ജൂബിലി വർഷ ഉദ്ഘാടന കർമം നിർവഹിച്ച് അനുഗ്രഹപ്രഭാഷണം നടത്തും. സീറോ മലബാർ റീത്തിൽ ആഘോഷമായ വിശുദ്ധ കുർബാന, വചന സന്ദേശം എന്നിവ നടക്കും. ഫാ. അഖിൽ കാരിക്കാത്തറ സിഎംഐ കാർമികത്വം വഹിക്കും.

പുതുക്കരി സെന്‍റ് സേവ്യേഴ്‌സ് പള്ളി തിരുനാളിനു കൊടിയേറി

മങ്കൊമ്പ്: പുതുക്കരി സെന്‍റ് സേവ്യേഴ്‌സ് പള്ളിയിൽ ഇടവകമധ്യസ്ഥന്‍റെ തിരുനാളിനു തുടക്കമായി. വികാരി ഫാ. ജോർജ് കപ്പാംമൂട്ടിൽ കൊടിയേറ്റി. ഇന്നു രാവിലെ ആറിന് സപ്ര, ആഘോഷമായ വിശുദ്ധ കുർബാന, കുട്ടികളുടെ ആഘോഷമായ വിശുദ്ധ കുർബാന സ്വീകരണം. ചങ്ങനാശേരി ആർച്ചുബിഷപ് മാർ തോമസ് തറയിൽ. 6.30ന് ബൈബിൾ നാടകം. നാളെ രാവിലെ 6.30ന് സപ്ര, സുറിയാനി കുർബാന, 9.30ന് സപ്ര, വിശുദ്ധ കുർബാന, 4.15ന് റംശാ, വചനപ്രഘോഷണം, ദിവ്യകാരുണ്യ പ്രദക്ഷിണം, ആഘോഷമായ തിരുനാൾ പ്രദക്ഷിണം, ലൈറ്റ് ആന്‍റ് സൗണ്ട് ഷോ. പ്രധാന തിരുനാൾ ദിനമായ 12ന് രാവിലെ 6.15ന് സപ്ര, വിശുദ്ധ കുർബാന, 9.15ന് സപ്ര, ആഘോഷമായ തിരുനാൾ റാസ, ഫാ.ടോണി മണക്കളം, തിരുനാൾ സന്ദേശം, ഫാ.ഫിലിപ്പോസ് തുണ്ടുവാലിച്ചിറ, തിരുനാൾ പ്രദക്ഷിണം, കൊടിയിറക്ക്.

ഇടിമണ്ണിക്കൽ ഗോൾഡ് ആൻഡ് ഡയമണ്ട് ഇനി ചെങ്ങന്നൂരിലും

ചെങ്ങന്നൂർ: പതിറ്റാണ്ടുകളായി പരിശുദ്ധിയുടെ തിളക്കവും മാറ്റേറുന്ന വിശ്വാസവും ചേർന്ന ഇടിമണ്ണിക്കൽ ഗോൾഡ് ആൻഡ് ഡയമണ്ടിന്‍റെ ഏറ്റവും പുതിയ ഷോറൂം ചെങ്ങന്നൂരിൽ തുറക്കുന്നു. 12ന് രാവിലെ 10.30ന് സജി ചെറിയാൻ എംഎൽഎ ഷോറൂമിന്‍റെ ഉദ്ഘാടനം നിർവഹിക്കും. ചലച്ചിത്ര താരം മംമ്ത മോഹൻദാസ് മുഖ്യാതിഥിയായി പങ്കെടുക്കും. കൂടാതെ സാമൂഹിക സാംസ്കാരിക രംഗത്തെ പ്രമുഖർ ചടങ്ങിൽ സന്നിഹിതരാകുമെന്നും ഉദ്ഘാടന വേളയിലേക്ക് ചെങ്ങന്നൂരിനെ സ്വാഗതം ചെയ്ത് കൊണ്ട് മാനേജിംഗ് ഡയറക്ടർ ഷാജി തോമസ് അറിയിച്ചു. ഉദ്ഘാടനത്തോട് അനുബന്ധിച്ച് മികച്ച ഓഫറുകളാണ് ഇടിമണ്ണിക്കൽ ഗോൾഡ് ആൻഡ് ഡയമണ്ട് ഒരുക്കിയിരിക്കുന്നത്. നറുക്കെടുപ്പിലൂടെ അഞ്ച് പേർക്ക് അരപവൻ വീതം സ്വർണനാണയം സമ്മാനമായി നൽകും. കൂടാതെ ഉദ്ഘാടനത്തിന് ശേഷമുള്ള ആദ്യത്തെ ആറ് ദിവസം ആറ് ഡയമണ്ട് റിംഗുകളും നറുക്കെടുപ്പിലൂടെ സമ്മാനമായി നേടാം. ഒപ്പം 45 ദിവസം നീണ്ടുനിൽക്കുന്ന മികച്ച ഓഫറുകളും സ്വന്തമാക്കാം. സ്വർണം, ഡയമണ്ട്, ലൈറ്റ് വെയ്റ്റ്, വെഡിംഗ് ആഭരണങ്ങളുടെ ഏറ്റവും മികച്ച ശേഖരമാണ് പുതിയ ഷോറൂമിൽ ഒരുക്കിയിട്ടുള്ളത്. പുത്തൻ ഡിസൈനുകളും മികച്ച കളക്‌ഷനും സ്വന്തമാക്കാൻ പുതിയ ഷോറൂമിലേക്ക് ഏവരെയും സ്വാഗതം ചെയ്യുന്നു.

ചിരട്ടയാണ് ഇപ്പോൾ താരം ദേവരാജൻ പൂച്ചാക്കൽ

പൂച്ചാക്കൽ: തേങ്ങയെടുത്ത് കഴിഞ്ഞാൽ അടുപ്പിലേക്കും പറമ്പിലേക്കും ചിരട്ട വലിച്ചെറിഞ്ഞ കാലമൊക്കെ കഴിഞ്ഞു. വിലയുടെ കാര്യത്തിൽ ചിരട്ട ഇപ്പോൾ മുന്നിലാണ്. ചിരട്ട നമ്മളിൽനിന്നു കൈവിട്ടുപോകുന്ന ലക്ഷണമാണ് കാണുന്നത്. കാരണം ഇപ്പോൾ ചിരട്ടയ്ക്ക് പൊന്നും വിലയാണ്. ഒരു കിലോ ചിരട്ടയുടെ വില കേട്ടാൽ ഞെട്ടും. കിലോ 40 രൂപയ്ക്കാണ് മൊത്ത കച്ചവടക്കാർ ചെറുകിട കച്ചവടക്കാരിൽനിന്ന് ചിരട്ട സംഭരിക്കുന്നത്. ഒരുകിലോ ചിരട്ടയ്ക്ക് നാട്ടിൻപുറത്തെ ആക്രിക്കടകളിൽ 20 രൂപ മുതൽ വില ലഭിക്കുന്നുണ്ട്. പാലക്കാട്ടുനിന്നു തമിഴ്നാട്ടിൽനിന്നുമെത്തുന്ന മൊത്തക്കച്ചവടക്കാരാണ് ഇത് സംഭരിച്ച് കൊണ്ടുപോകുന്നത്. പൂച്ചാക്കൽ, അരൂക്കുറ്റി ഭാഗത്തെ ആക്രിക്കടകളിൽനിന്ന് ഒരുമാസം നാല് ലോഡ് ചിരട്ടവരെ കയറ്റി അയയ്ക്കുന്നുണ്ട്. തമിഴ്നാട്ടിൽ ചിരട്ടക്കരി ഉത്പാദിപ്പിക്കുന്ന നിരവധി കമ്പനികളുണ്ട്. സൗന്ദര്യവർധക വസ്തുക്കളുടെ നിർമാണത്തിന് ഇത് ഒരു ഘടകമാണ്. ഇതിനു പുറമേ പഴച്ചാർ, പഞ്ചസാര, വെള്ളം എന്നിവ ശുദ്ധീകരിക്കുന്നതിന് ചിരട്ടക്കരി ഉപയോഗിക്കാറുണ്ട്. കൗതുകവസ്തുവായി ഓൺലൈനിൽ വാങ്ങാൻ ലഭിക്കുന്ന പോളിഷ് ചെയ്ത രണ്ടു ചിരട്ടകൾക്ക് 500 രൂപയാണ് വില. ചിരട്ടയ്ക്ക് ഇത്രയും വില ആദ്യമായിട്ടാണെന്ന് 25 വർഷമായി തേങ്ങ, ചിരട്ട വിൽപ്പന നടത്തുന്ന പാണാവള്ളി സ്വദേശി ലോറൻസ് ചേട്ടൻ പറയുന്നു.

കഞ്ചാവുമായി യുവാവ് പിടിയിൽ

ചെങ്ങന്നൂർ: എക്സൈസ് നടത്തുന്ന ഓപ്പറേഷൻ ക്ലീൻ സ്ലേറ്റ് സ്പെഷൽ ഡ്രൈവിന്‍റെ ഭാഗമായി ചെങ്ങന്നൂരിൽ ഒന്നേകാൽ കിലോ കഞ്ചാവുമായി ഒരാൾ പിടിയിലായി. ചെങ്ങന്നൂർ എക്സൈസ് റേഞ്ച് പാർട്ടി നടത്തിയ വാഹന പരിശോധനയിലാണ് കഞ്ചാവ് കണ്ടെടുത്തത്. ചെങ്ങന്നൂർ താലൂക്കിൽ പാണ്ടനാട് വില്ലേജിൽ പണ്ടനാട് പടിഞ്ഞാറ് മുറിയിൽ ഒത്തന്‍റെ കുന്നിൽവീട്ടിൽ അനു (42) ആണ് പിടിയിലായത്. പാണ്ടനാട് ഇല്ലിമല പാലത്തിനു സമീപം ബൈക്കിൽ ചില്ലറ വിൽപ്പനയ്ക്കായി കൊണ്ടുപോവുകയായിരുന്ന കഞ്ചാവാണ് എക്സൈസ് സംഘം പിടികൂടിയത്. മുൻപും മയക്കുമരുന്ന്, ക്രിമിനൽ കേസുകളിൽ പ്രതിയായ ഇയാൾ എക്സൈസ് സംഘത്തിന്‍റെ നിരീക്ഷണത്തിലായിരുന്നു. ചെങ്ങന്നൂർ റേഞ്ച് ഇൻസ്‌പെക്ടർ വി. സജീവിന്‍റെ നേതൃത്വത്തിലുള്ള എക്സൈസ് സംഘമാണ് പ്രതിയെ പിടികൂടിയത്. പട്രോളിംഗ് പാർട്ടിയിൽ അസി.എക്സൈസ് ഇൻസ്‌പെക്ടർമാരായ ജോഷി ജോൺ, ബിജു പ്രകാശ്, കെ. അനി, പ്രിവന്‍റീവ് ഓഫീസർ (ഗ്രേഡ്) മാരായ അബ്ദുൾ റഫീഖ്, എസ്കെ. ആഷ്‌വിൻ, സിവിൽ എ ക്സൈസ് ഓഫീസർമാരായ രാജേഷ്, അജീഷ്കു മാർ, ശ്രീരാജ്, ജി. പ്രവീൺ, വനിത സിവിൽ എക്സൈസ് ഓഫീസർ വി. ജയലക്ഷ്മി എന്നിവരും പങ്കെടുത്തു. കഴിഞ്ഞദിവസം ബംഗളൂരൂവിൽനിന്ന് ചെങ്ങന്നൂരിൽ വില്പനയ്ക്കെത്തിച്ച രാസലഹരിയും എക്സൈസ് സംഘം പിടികൂടിയിരുന്നു.

കേരള യൂത്ത് ഫ്രണ്ട്-എം തീരദേശ സംരക്ഷണ ജാഥ ജില്ലയിൽ പര്യടനം പൂർത്തിയാക്കി

ആലപ്പുഴ: കേരള യൂത്ത്ഫ്രണ്ട്-എം സംസ്ഥാന പ്രസിഡന്‍റ് സിറിയക് ചാഴികാടൻ നയിക്കുന്ന തീരദേശ സംരക്ഷണ ജാഥയുടെ ജില്ലയിലെ പര്യടനം പൂർത്തിയാക്കി. ആലപ്പുഴ ജില്ലയിലെ വലിയഴീക്കലിൽ നടന്ന ജില്ലയിലെ പര്യടനത്തിന്‍റെ സമാപനസമ്മേളനം ജോബ് മൈക്കിൾ എംഎൽഎ ഉദ്ഘാടനം ചെയ്തു. കർഷകത്തൊഴിലാളികളുടെ പാർട്ടിയായ കേരള കോൺഗ്രസിന് മാത്രമേ സാധാരണക്കാരായ മത്സ്യത്തൊഴിലാളികളുടെ പ്രശ്‌നങ്ങൾ പരിഹരിക്കാൻ ഇത്തരത്തിൽ ഇടപെടാൻ നടത്താൻ സാധിക്കൂ എന്ന് ജോബ് മൈക്കിൾ എംഎൽഎ പറഞ്ഞു. കേരളത്തിലെ ഏറ്റവും വലിയ തൊഴിലാളി ശൃംഖലയാണ് മത്സ്യത്തൊഴിലാളികൾ. കേരളത്തിന്‍റെ തീരദേശത്തെ മാത്രം ആശ്രയിച്ചാണ് ഇവർ ജീവിക്കുന്നത്. ഇവരുടെ ജീവിതം ഇല്ലാതാക്കാൻ ആരു ശ്രമിച്ചാലും കേരള കോൺഗ്രസും യൂത്ത് ഫ്രണ്ടും പോരാട്ടത്തിനായി മുന്നിലുണ്ടാകുമെന്നും അദ്ദേഹം പറഞ്ഞു. സമാപനസമ്മേളത്തിൽ കേരള യൂത്ത്ഫ്രണ്ട്-എം ജില്ലാ പ്രസിഡന്‍റ് വർഗീസ് ആന്‍റണി അധ്യക്ഷത വഹിച്ചു. കേരള കോൺഗ്രസ്-എം സംസ്ഥാന ഉന്നതാധികാര സമിതി അംഗം ജെന്നിംഗ്സ് ജേക്കബ്, സംസ്ഥാന സ്റ്റിയറിംഗ് കമ്മിറ്റി അംഗങ്ങളായ അഡ്വ. ജോസഫ് ജോൺ, സാജൻ തൊടുക, ജില്ലാ ജനറൽ സെക്രട്ടറി തോമസ് ഫിലിപ്പോസ്, ഷേയ്ക്ക് അബ്ദുള്ള തുടങ്ങിയവർ പ്രസംഗിച്ചു.

നിയന്ത്രണം തെറ്റിയ കാർ വൈദ്യുതിത്തൂണിൽ ഇടിച്ചുതകർന്നു

ചേര്‍ത്തല: നിയന്ത്രണം തെറ്റിയ കാർ വൈദ്യുതിത്തൂണിലിടിച്ച്‌ തകർന്നു. കുറുപ്പംകുളങ്ങര-കണിച്ചുകുളങ്ങര റോഡിൽ അരിപ്പറമ്പിൽ പഞ്ചായത്ത്‌ ഓഫീസിനു സമീപം ബുധനാഴ്ച പുലർച്ചെ മൂന്നോടെയാണ് അപകടമുണ്ടായത്‌. ചെത്തി സ്വദേശി ജോസഫിന്‍റെ ഉടമസ്ഥതയിലെ കാറാണ് അപകടത്തിൽപ്പെട്ടത്‌. ഇദ്ദേഹത്തിന്‍റെ ഭാര്യയും രണ്ടു കുട്ടികളും അർത്തുങ്കൽ സ്വദേശിയായ ഡ്രൈവറുമാണ് കാറിലുണ്ടായിരുന്നത്‌. രാത്രിയില്‍ തിയറ്ററിൽ സിനിമ കണ്ടു മടങ്ങുമ്പോഴാണ് അപകടം. ഡ്രൈവര്‍ ഉറങ്ങിപ്പോയതാണ് അപകടത്തിനു കാരണമെന്ന് കരുതുന്നു. പഞ്ചായത്ത്‌ ഓഫീസിനു വടക്കുഭാഗത്തെ വളവുതിരിയാതെ എതിർവശത്തേക്കു കയറിയ കാർ റോഡിൽനിന്ന്‌ ഇറങ്ങി സമീപത്തെ കടയുടെ ചെറുഭാഗം തകർത്തു മുന്നോട്ടുനീങ്ങി വൈദ്യുതിത്തൂണിലിടിച്ച്‌ നില്‍ക്കുകയായിരുന്നു. തൂണൊടിഞ്ഞതിനാൽ അരീപ്പറമ്പ്‌ ഭാഗത്ത്‌ വൈദ്യുതിവിതരണം മുടങ്ങി. കാറിന്‍റെ മുൻഭാഗം തകർന്നു. കാറിലുണ്ടായിരുന്നവർ പരിക്കുകളില്ലാതെ തലനാരിഴയ്‌ക്ക്‌ രക്ഷപ്പെട്ടു. കെഎസ്‌ഇബി 22,000 രൂപ നഷ്ടപരിഹാരമായി ഈടാക്കി.

നൂറനാട് മേഖലയിൽ കർഷകർ ആശങ്കയിൽ

ചാരുംമൂട്: കർഷകരുടെ ഉറക്കം കെടുത്തി കാട്ടുപന്നി ശല്യത്തിനു പിന്നാലെ നൂറനാട് മേഖലയിൽ മുള്ളൻപന്നി ശല്യവും വ്യാപകമായി. പന്നിശല്യം കൊണ്ട് പൊറുതിമുട്ടിയ കർഷകരും നാട്ടുകാരും നൊട്ടോട്ടം ഓടുന്നതിനിടയിലാണ് നൂറനാട്-പാലമേൽ പഞ്ചായത്തു പ്രദേശങ്ങളിൽ മുള്ളൻപന്നി ശല്യവും രൂക്ഷമായിരിക്കുന്നത്. മറ്റപ്പള്ളി, മുതുകാട്ടുകര, തത്തംമുന്ന, ഇടക്കുന്നം ഭാഗങ്ങളിലെ കനാൽ പ്രദേശങ്ങളിലാണ് മുള്ളൻപന്നികളുടെ സാന്നിധ്യമുള്ളത്. രാത്രികാലങ്ങളിൽ ഒറ്റയ്ക്കു സഞ്ചരിക്കുന്ന മുള്ളൻപന്നികളെ തെരുവുനായ്ക്കൾ കൂട്ടം കൂടി ആക്രമിക്കുന്നതും പതിവായി. മുള്ള് നായ്ക്കളുടെ ശരീരത്തിലേക്ക് ആഴത്തിൽ ഇറക്കിയാണ് മുള്ളൻപന്നികൾ രക്ഷപ്പെടുന്നത്. കഴിഞ്ഞദിവസം ഇടക്കുന്നം സ്വദേശി വി. രാജേന്ദ്രന്‍റെ വീടിനു മുന്നിൽ മുള്ള് ആഴത്തിൽ തറച്ചുകയറിയ തെരുവുനായയെ അവശനിലയിൽ കണ്ടെത്തി. മാവേലിക്കര സ്വദേശിയും മൃഗസംരക്ഷകനുമായ ദീപുവിനെ വിവരം അറിയിച്ചതിനെത്തുടർന്ന് അദ്ദേഹം സ്ഥലത്തെത്തി നായയെ രക്ഷപ്പെടുത്തി. ഏതാനും ദിവസം മുമ്പ് സമാനമായ സംഭവം ചെട്ടികുളങ്ങര ദേവീക്ഷേത്രത്തിനു മുന്നിലെ ആലിന് സമീപം നടന്നതായി ദീപു പറഞ്ഞു. കാട്ടുപന്നികളും തെരുവുനായ്ക്കളും മനുഷ്യർക്ക് ഉപദ്രവകാരികളായി മാറിയിട്ടും സർക്കാരിന്‍റെ ഭാഗത്തുനിന്ന് യാതൊരു നടപടിയും ഇല്ലാതെ ജനം വലയുമ്പോഴാണ് മുള്ളൻപന്നികളും നാട്ടിൽ ശല്യമായി തീരുന്നത്. കാടുപിടിച്ച കെഐപി കനാലുകളാണ് ഇവയുടെയെല്ലാം താവളമെന്നാണ് നാട്ടുകാർ പറയുന്നത്.

ചര്‍ച്ചാ വേദി സാഹിത്യ ക്യാമ്പ് 10ന്

എടത്വ: തലവടി ചര്‍ച്ചാ വേദിയുടെ മൂന്നാമത് സാഹിത്യ ക്യാമ്പും ചര്‍ച്ചാ വേദി സംസ്ഥാനതലത്തില്‍ നടത്തിയ കഥ, കവിത രചനാമത്സരങ്ങളില്‍ വിജയികളാകുന്നവര്‍ക്ക് ഏര്‍പ്പെടുത്തിയിട്ടുള്ള മുട്ടാര്‍ സോമന്‍ കാവ്യപുരസ്‌കാരവും ബിയാര്‍ പ്രസാദ് കഥാപുരസ്‌കാര സമര്‍പ്പണവും 10ന് രാവിലെ ഒൻപതുമുതല്‍ വൈകിട്ട് അഞ്ചു വരെ ആനപ്രമ്പാല്‍ റിവര്‍ ബ്ലിസ് റിസോര്‍ട്ടിൽ വിവിധ പരിപാടികളോടെ നടക്കും. കേരളാ സാഹിത്യ അക്കാദമി അവാര്‍ഡ് ജേതാവ് എം.ആര്‍. രേണുകുമാര്‍ അവാര്‍ഡു ദാനം നിര്‍വഹിക്കും. ചര്‍ച്ചാ വേദി പ്രസിഡന്‍റ് പി.വി. രവീന്ദ്രനാഥ് അധ്യക്ഷത വഹിക്കും. മുട്ടാര്‍ സോമരാജ്, വിധു പ്രസാദ് എന്നിവര്‍ പ്രസംഗിക്കും. തിരുവനന്തപുരം ഗീതാ കൃഷ്ണ രചിച്ച കവിതയിലെ ബഹുവചനം എന്ന പഠന ഗ്രന്ഥവും റജിമോള്‍ മുഹമ്മ രചിച്ച ദീപ്തയാനം എന്ന കവിതാസമാഹാരവും എം.ആര്‍. രേണുകുമാര്‍ പ്രകാശനം ചെയ്യും. എം.ജി. കൊച്ചുമോന്‍, ജോസുകുട്ടി സെബാസ്റ്റ്യന്‍ എന്നിവര്‍ കൃതികള്‍ പരിചയപ്പെടുത്തും. തുടര്‍ന്ന് നടക്കുന്ന കഥയരങ്ങില്‍ ചന്ദ്രമോഹന്‍ദാസ് ഹരിപ്പാട്, ശ്രീരഞ്ജിനി മാന്നാര്‍, ഗീതാകൃഷ്ണ തിരുവനന്തപുരം, സുശീല രാജു എന്നിവര്‍ കഥകളവതരിപ്പിക്കും. ഉച്ചയ്ക്ക് രണ്ടിന് കവിയരങ്ങ് ആരംഭിക്കും. വിജയന്‍ കലവൂര്‍, ലളിതാംബിക അന്തര്‍ജനം ചങ്ങനാശേരി, ഗീതാജ്ഞലി തൈച്ചിറ, കലവൂര്‍ ലളിതാജി, ശ്രീരജ്ഞിനി മാന്നാര്‍, സിബിച്ചന്‍ നെടുമുടി, രജിമോള്‍ മുഹമ്മ, ഗീതാ ലക്ഷ്മി പള്ളിപ്പാട്, അനാമിക ഹരിപ്പാട്, സുലു ആലപ്പുഴ, ജ്യോതി ലക്ഷ്മി കരുമാടി, കണ്ണന്‍ തലവടി, പ്രകാശ് തലവടി എന്നില്‍ കവിതകളവതരിപ്പിക്കും. വൈകിട്ട് 3.30ന് സൗഹൃദ സാഹിത്യസായാഹ്ന സദസ് നടക്കും. എം.ജി. കൊച്ചുമോന്‍ അധ്യക്ഷത വഹിക്കും. പി.കെ. ഗായിക മേദിനി ഉദ്ഘാടനം നിര്‍വഹിക്കും.

യുവാവിന്‍റെ ആക്രമണത്തിൽ പഞ്ചായത്ത് പ്രസിഡന്‍റിനു പരിക്ക്

തുറവൂർ: യുവാവിന്‍റെ ആക്രമണത്തിൽ തുറവൂർ പഞ്ചായത്ത് പ്രസിഡന്‍റ് മോളി രാജേന്ദ്രന് ഗുരുതരപരിക്ക്. ആറിന് രാത്രി ഒൻപ തിനായിരുന്നു ആക്രമണം. പ്രസിഡന്‍റിന്‍റെ അയൽവാസിയായ ലക്ഷംവീട് കോളനിയിലെ രാജേഷിന്‍റെ ഭാര്യാപിതാവിനെ രാജേഷ് മർദിച്ചതിനെത്തുടർന്ന് ശബ്ദം കേട്ട് പ്രസിഡന്‍റും ഭർത്താവും ആക്രമണം തടയാൻ ശ്രമിക്കുന്നതിനിടെ രാജേഷ് പ്രകോപനമില്ലാതെ പ്രസിഡന്‍റിനെ കഴുത്തിനുപിടിച്ച് എറിയുകയായിരുന്നു. വീഴ്ചയിൽ പ്രസിഡന്‍റിന് തലയ്ക്കും കൈകാലുകൾക്കും ഗുരുതരമായി പരിക്കേൽക്കുകയും ചെയ്തു. ഓടിക്കുടിയ നാട്ടുകാർ തുറവൂർ താലൂക്ക് ആശുപത്രിയിൽ പ്രവേശിപ്പിച്ചു. പരിക്ക് ഗുരുതരമായതിനെത്തുടർന്ന് ചേർത്തലയിലെ സ്വകാര്യ ആശുപത്രിയിൽ ചികിത്സയിലാണ്. പ്രസിഡന്‍റിന്‍റെ പരാതിയിൽ കുത്തിയതോട് പോലീസ് കേസെടുത്തു അന്വേഷണം ആരംഭിച്ചു. കോൺഗ്രസ് കമ്മിറ്റി പ്രതിഷേധിച്ചു തുറവൂർ: പഞ്ചായത്ത് പ്രസിഡന്‍റിനെ ആക്രമിച്ചതിൽ തുറവൂർ മണ്ഡലം ഈസ്റ്റ്, വെസ്റ്റ് കോൺഗ്രസ് കമ്മിറ്റികൾ പ്രതിഷേധിച്ചു. മദ്യപിച്ചും മയക്കുമരുന്ന് ഉപയോഗിച്ചും പ്രദേശത്ത് പ്രശ്നമുണ്ടാക്കുന്ന രാജേഷ് എന്ന യുവാവിനെതിരേ മുൻപും നിരവധി പരാതികൾ ഉയർന്നിട്ടും പോലീസ് നടപടിയെടുക്കാത്തതിനെത്തുടർന്നാണ് ഇത്തരത്തിലുള്ള പ്രശ്നങ്ങൾ ഉണ്ടായതെന്ന് മണ്ഡലം കോൺഗ്രസ് കമ്മിറ്റി ആരോപിച്ചു. അടിയന്തരമായി ഇയാളെ അറസ്റ്റ് ചെയ്യണമെന്നും ഇയാൾക്കെതിരേ ശക്തമായ നടപടി സ്വീകരിക്കണമെന്നും ഭാരവാഹികൾ ആവശ്യപ്പെട്ടു.

കുട്ടനാടിന് നെല്ലും കൂണും: ട്രാവന്‍കോ കൂണ്‍കൃഷി പദ്ധതിക്ക് തകഴിയില്‍ തുടക്കം

എടത്വ: കുട്ടനാട്ടിലെ 64 പഞ്ചായത്തുകളിലെ നെല്‍കര്‍ഷകര്‍ക്കു നെല്‍കൃഷിയോടൊപ്പം ഒരു അധികവരുമാനം വിഭാവനം ചെയ്യുക എന്ന ലക്ഷ്യത്തോടെ അടൂര്‍ ആസ്ഥാനമാക്കി പ്രവര്‍ത്തിക്കുന്ന ട്രാവന്‍കൂര്‍ റൂറല്‍ ഡെവലപ്മെന്‍റ് പ്രൊഡ്യൂസര്‍ കമ്പനിയുടെയും (ട്രാവന്‍കോ) വിവിധ തദ്ദേശ സ്വയംഭരണ സ്ഥാപനങ്ങളുടെയും കൃഷിവകുപ്പിന്‍റെയും സംയുക്ത സംരംഭം ട്രാവന്‍കോ-പ്രോജെക്ട് സണ്‍ റൈസിന് തകഴി പഞ്ചായത്തില്‍ തുടക്കമായി. തകഴി പഞ്ചായത്തു പ്രസിഡന്‍റ് എസ്. അജയകുമാര്‍ അധ്യക്ഷത വഹിച്ച കൂണ്‍ കൃഷി പദ്ധതി വിശദീകരണയോഗം ട്രാവന്‍കോ ചെയര്‍മാൻ സി. ദിവാകരന്‍ ഉദ്ഘാടനം ചെയ്തു. വൈറ്റമിന്‍ സമ്പുഷ്ടമായ ഗുണമേന്മ ഏറെയുള്ള ഭക്ഷ്യവസ്തുവായ കൂണിന് മികച്ച അന്തരാഷ്ട്ര വിപണി സുസ്ഥിരമായി നിലനില്‍ക്കുന്നു. ഇന്ത്യയില്‍ ഉത്പാദിപ്പിക്കുന്ന കൂണിന്‍റെ ഏറിയ പങ്കും വിദേശ രാജ്യങ്ങളിലേക്കു കയറ്റി അയക്കപ്പെടുന്നു. ആഭ്യന്തരവിപണി ലക്ഷ്യം വയ്ക്കുന്നതിനൊപ്പം കൂണിന്‍റെ ഈ അന്താരാഷ്ട്ര വിപണിയിലേക്കാണ് കുട്ടനാട്ടിലെ കര്‍ഷകരെ ട്രാവന്‍കോ കൈപിടിച്ച് നടത്തുന്നതെന്ന് അദ്ദേഹം പറഞ്ഞു. കേരളത്തിലാകമാനം നടപ്പില്‍ വരുത്താനുദ്ദേശിക്കുന്ന പദ്ധതിയിലേക്ക് രാജ്യത്തെ ദേശസാല്‍കൃത ബാങ്കുകളെ ഭാഗവാക്കാക്കുവാനുള്ള ചര്‍ച്ചകള്‍ ദ്രുതഗതിയില്‍ പുരോഗമിക്കുന്നതായി പദ്ധതി അവതരണം നടത്തിയ ട്രാവന്‍കോ ചീഫ് എക്‌സിക്യൂട്ടീവ് ഓഫീസര്‍ എം.ആര്‍. സേതു അറിയിച്ചു. പഞ്ചായത്ത് വൈസ് പ്രസിഡന്‍റ് അംബികാ ഷിബു, സെക്രട്ടറി വി. സുരേഷ്, വികസനകാര്യ സ്റ്റാൻഡിംഗ് കമ്മിറ്റി ചെയര്‍മാന്‍ കെ. ശശാങ്കന്‍, ക്ഷേമകാര്യ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ സിന്ധു ജയപ്പന്‍, വാര്‍ഡ് മെംബര്‍മാരായ ജയചന്ദ്രന്‍ കല്ലശേരി, മഞ്ജു വിജയകുമാര്‍, ഗീതാഞ്ജലി തുടങ്ങിയവര്‍ പ്രസംഗിച്ചു. നെല്‍കൃഷിയില്‍ വ്യാപൃതരായിരിക്കുന്ന കുട്ടനാട്ടിലെ 64 പഞ്ചായത്തുകളിലെ നെല്‍കര്‍ഷകര്‍ക്ക് ഒരധികവരുമാനം എന്ന നിലയിലാണ് പ്രോജക്ട് സണ്‍ റൈസ് വിഭാവനം ചെയ്യപ്പെട്ടിട്ടുള്ളത്. കര്‍ഷകര്‍ക്് കൂണ്‍കൃഷി തുടങ്ങുന്നതിനാവശ്യമായ ഇന്‍ഫ്രാസ്ട്രക്ചര്‍, സാങ്കേതിക വിദ്യ, പരിശീലനം, ശാസ്ത്രീയമായ നിരന്തര മൂല്യനിര്‍ണയം, സാമ്പത്തിക പിന്തുണ എന്നിവയ്ക്കു പുറമേ ഉത്പാദിപ്പിക്കുന്ന കൂണിന് വിപണി വില നല്‍കി ട്രാവന്‍കോ ഏറ്റെടുക്കുകയും ചെയ്യുമെന്ന് ട്രാവന്‍കോ ഭാരവാഹികള്‍ പറഞ്ഞു.

ക്ലാസിക്കുകളും മെഗാഹിറ്റുകളും കോര്‍ത്തിണക്കി ഫിലിം ഫെസ്റ്റിവല്‍

ആലപ്പുഴ: ഒരിക്കല്‍കൂടി തിയറ്ററില്‍ കാണണമെന്ന് കൊതിക്കുന്ന പഴയ ക്ലാസിക്, ഹിറ്റ് സിനിമകളുണ്ടോ നിങ്ങളുടെ ഓര്‍മകളുടെ വെള്ളിത്തിരയില്‍..എങ്കില്‍ ആലപ്പുഴ ബീച്ചില്‍ നടക്കുന്ന എന്‍റെ കേരളം പ്രദര്‍ശനമേളയിലേക്ക് വരൂ...പതിറ്റാണ്ടുകള്‍ക്ക് മുമ്പ് തിയറ്ററുകളെ പൂരപ്പറമ്പാക്കി മാറ്റിയ ജനപ്രിയ സിനിമകള്‍ മുതല്‍ ലോകസിനിമയ്ക്ക് മലയാളം സമ്മാനിച്ച ക്ലാസിക് ചിത്രങ്ങള്‍ വരെയുള്ള അപൂര്‍വപ്രദര്‍ശനമാണ് എന്‍റെ കേരളത്തിലെ മിനി തിയറ്ററില്‍ ഒരുക്കിയിരിക്കുന്നത്. ചെമ്മീനും കൊടിയേറ്റവും നിർമാല്യവും സ്വയംവരവും പെരുന്തച്ചനും പോലുള്ള മലയാള സിനിമയിലെ എവര്‍ഗ്രീന്‍ ക്ലാസിക്കുകള്‍ മുതല്‍ ഗോഡ്ഫാദറും കിരീടവും പ്രാഞ്ചിയേട്ടനും വരെയുള്ള ജനപ്രിയ സിനിമകളുമുണ്ട് മിനി തിയറ്റര്‍ പ്രദര്‍ശനപ്പട്ടികയില്‍. സംസ്ഥാന ചലച്ചിത്രവികസന കോർപറേഷനാണ് (കെഎസ്എഫ്ഡിസി) ഇതാദ്യമായി എന്‍റെ കേരളം പ്രദര്‍ശനവിപണനമേളയില്‍ സിനിമപ്രേമികള്‍ക്കായി മിനി തിയറ്റര്‍ അനുഭവം ഒരുക്കിയത്. 21.5 അടി നീളവും 11.5 അടി ഉയരവുമുള്ള എൽഇഡി സ്‌ക്രീനും അത്യാധുനിക സൗണ്ട് സിസ്റ്റവും മികച്ച സാങ്കേതിക വിദ്യകളുമായി നിർമിച്ച താത്കാലിക മിനി തിയറ്ററിൽ ഒരേ സമയം 70ലധികം ആളുകൾക്ക് സിനിമ ആസ്വദിക്കാം. അന്തരിച്ച സംവിധായകൻ ഷാജി എൻ. കരുൺ അനുസ്മരണത്തിന്‍റെ ഭാഗമായി ചൊവ്വാഴ്ച ഫിലിം ഫെസ്റ്റിവലിൽ അദ്ദേഹം സംവിധാനം ചെയ്ത മമ്മൂട്ടി ചിത്രം കുട്ടി സ്രാങ്ക് പ്രദർശിപ്പിച്ചു. ചെറിയാച്ചന്‍റെ ക്രൂരകൃത്യങ്ങൾ, ഒഴിമുറി, തനിയാവർത്തനം, ന്യൂസ് പേപ്പര്‍ ബോയ്, എലിപ്പത്തായം, അനുഭവങ്ങള്‍ പാളിച്ചകള്‍, കുമ്മാട്ടി, വൈശാലി, 1921, ഭൂതക്കണ്ണാടി, കാവ്യമേള, ബി 32 മുതല്‍ 44 വരെ, നിഷിദ്ധോ, നഖക്ഷതങ്ങള്‍ തുടങ്ങിയ ഒട്ടേറെ സിനിമകളാണ് മേയ് 12 വരെ നടക്കുന്ന എന്‍റെ കേരളം പ്രദര്‍ശനമേളയില്‍ പ്രേക്ഷകരെ കാത്തിരിക്കുന്നത്. ദിവസവും നാലു സിനിമകൾ വീതമാണ് പ്രദർശനം.

എന്‍റെ കേരളം പ്രദര്‍ശനവിപണന മേള; മാഗസിൻ മുഖചിത്രമാകാം; 360 ഡിഗ്രിയില്‍ വീഡിയോയും എടുക്കാം

ആലപ്പുഴ: ഒരു മാഗസിന്‍ മുഖചിത്രമാകാന്‍ ആര്‍ക്കാണാഗ്രഹമില്ലാത്തത്? അതും മലയാളി ഹൃദയത്തോട് എന്നെന്നും ചേര്‍ത്തുവയ്ക്കുന്ന സ്വന്തം നാടിന്‍റെ പേരിലുള്ള മാഗസിനായാലോ...? എങ്കില്‍ ആലപ്പുഴ ബീച്ചില്‍ നടക്കുന്ന എന്‍റെ കേരളം പ്രദര്‍ശനവിപണന മേളയിലേക്ക് പോരൂ... വിവര പൊതുജന സമ്പർക്കവകുപ്പ് ഒരുക്കിയ പവലിയനിലാണ് സെല്‍ഫിക്കാലത്തെ പുതുരസങ്ങളായ മാഗസിന്‍ മുഖചിത്ര ഫ്രെയിമും ത്രീ സിക്സ്റ്റി സെൽഫി വീഡിയോ സംവിധാനവുമുള്ളത്. രണ്ടാം പിണറായി വിജയൻ മന്ത്രിസഭയുടെ നാലാം വാർഷികത്തിന്‍റെ ഭാഗമായി 12 വരെയാണ് ബീച്ചില്‍ മേള നടക്കുന്നത്. പ്രദര്‍ശനനഗരിയുടെ കവാടത്തോട് ചേര്‍ന്നുള്ള പിആര്‍ഡിയുടെ പവലിയനിലെ ഫോട്ടോ പോയിന്‍റിലെത്തിയാൽ ഓരോരുത്തര്‍ക്കും മാഗസിൻ മുഖചിത്രമാകാൻ അവസരമൊരുക്കുന്ന ഫ്രെയിം കാണാം. ഇനി ഇഷ്ട പോസില്‍നിന്ന് പടമെടുക്കുകയേ വേണ്ടൂ...നിങ്ങളായി എന്‍റെ കേരളം കവര്‍ ചിത്രം. എന്‍റെ കേരളം എന്ന ഹാഷ് ടാഗോടെ സാമൂഹിക മാധ്യമങ്ങളിൽ ചിത്രം അപ്‌ലോഡ് ചെയ്യാം. പവലിയന്‍റെ പ്രവേശന കവാടത്തിനു സമീപം തന്നെ ഒരുക്കിയിരിക്കുന്ന 360 ഡിഗ്രിയിൽ വീഡിയോ എടുക്കുന്നതിനുള്ള സംവിധാനവും ഒട്ടേറെ പേരെ ആകര്‍ഷിക്കുന്നുണ്ട്. സ്റ്റാന്‍ഡില്‍ കയറി ചെറുചിരിയോടെനിന്നാല്‍ കാമറയും ലൈറ്റും 360 ഡിഗ്രിയില്‍ കറങ്ങി രസകരമായ വീഡിയോ സമ്മാനിക്കും. സർക്കാരിന്‍റെ വികസന നേട്ടങ്ങളിലൂടെയുള്ള ഹ്രസ്വസഞ്ചാരമാണ് പിആർഡി പവലിയൻ. കഴിഞ്ഞ ഒൻപതുവർഷത്തിനുള്ളിൽ സംസ്ഥാനം കൈവരിച്ച നേട്ടങ്ങൾ ഫോട്ടോകളിലൂടെയും എൽഇഡി വോളുകളിലൂടെയും വിശദമായി കണ്ടു മനസിലാക്കാനുള്ള അവസരം സ്റ്റാളിലുണ്ട്. കേരളത്തിന്‍റെ വികസനങ്ങളുടെ വിവരങ്ങൾ, ചിത്രങ്ങൾ എന്നിവ ഒറ്റ ടച്ചിൽ കാണാൻ കഴിയുന്ന ഡിജിറ്റൽ ബുക്കിന്‍റെ മാതൃകയും അവതരിപ്പിച്ചിട്ടുണ്ട്. കൃഷി, വിദ്യാഭ്യാസം, ആരോഗ്യം എന്നിങ്ങനെ രേഖപ്പെടുത്തിയിരിക്കുന്ന നേട്ടങ്ങളുടെ ക്യൂബും (റൊട്ടേറ്റ് ദ് ക്യൂബ്) ഇവിടെയുണ്ട്. ഇവയിൽ ഏതിനെക്കുറിച്ചാണോ കൂടുതൽ അറിയേണ്ടത് ആ ഭാഗം അടിയിൽ വരത്തക്കവിധം സ്റ്റാൻഡിൽ ക്യൂബ് വച്ചാൽ അതേക്കുറിച്ചുള്ള ഹ്രസ്വ വീഡിയോ സ്‌ക്രീനിൽ തെളിയും. കുട്ടികളും മുതിർന്നവരും ഉൾപ്പെടെ നിരവധിപ്പേരാണ് വിജ്ഞാനവും വിനോദവും പകരുന്ന പവലിയന്‍ സന്ദർശിച്ച് മടങ്ങുന്നത്.

ചെറിയനാട് റെയിൽവേ അടിപ്പാതയിലെ വെള്ളക്കെട്ടിനു പരിഹാരമാകുന്നു

ചെങ്ങന്നൂർ: ചെറിയനാട് റെയിൽവേ അടിപ്പാതയിലെ ദുരിതത്തിനൊടുവിൽ പരിഹാരമാകുന്നു. ചെങ്ങന്നൂർ-മാവേലിക്കര-കോഴഞ്ചേരി റോഡിലെ ചെറിയനാട് റെയിൽവേ അടിപ്പാതയിലെ വെള്ളക്കെട്ട് ഒഴിവാക്കുന്നതിനുള്ള പ്രവർത്തനങ്ങൾ ആരംഭിച്ചു. ചെറിയ മഴയിൽ പോലും അടിപ്പാതയിൽ വെള്ളം നിറയുന്നത് പതിവായതോടെ ചെറിയനാട് പഞ്ചായത്ത് എട്ടു ലക്ഷം രൂപ ചെലവഴിച്ച് ഓട നിർമിച്ചിരുന്നു. എന്നാൽ, ഈ ഓടയിലേക്ക് വെള്ളം ഒഴുകിയെത്താനുള്ള സൗകര്യമില്ലാതിരുന്നത് വീണ്ടും വെള്ളക്കെട്ടിനു കാരണമായി. ഇപ്പോൾ, ആ പ്രശ്നം പരിഹരിക്കാനുള്ള പണികളാണ് ആരംഭിച്ചിരിക്കുന്നത്. നിർമാണ പ്രവർത്തനങ്ങൾ നടക്കുന്നു എന്ന ശരിയായ അറിയിപ്പ് ബോർഡ് സ്ഥാപിക്കാത്തതിനാൽ ഇവിടെ പണി നടക്കുന്നുവെന്ന് അറിയാതെ രാത്രികാലങ്ങളിൽ ചെങ്ങന്നൂർ ഭാഗത്തുനിന്ന് വരുന്ന വാഹനങ്ങൾ ഇവിടെ വെളിച്ചക്കുറവ് കാരണം അപടത്തിൽപ്പെടാൻ സാധ്യതയുണ്ടെന്ന് നാട്ടുകാർ പറയുന്നു. ഏകദേശം അഞ്ചു വർഷം മുൻപ് എംകെ റോഡ് നവീകരിച്ചതിനുശേഷമാണ് പാലത്തിന്‍റെ ഇരുവശവും ഉയർന്നത്. വലിയ കുഴികൾ ഇതാണ് ഇരുവശങ്ങളിൽനിന്നുമുള്ള വെള്ളം അടിപ്പാതയിലേക്ക് ഒഴുകിയെത്തുന്നതിനും വെള്ളക്കെട്ട് രൂപപ്പെടുന്നതിനും പ്രധാന കാരണം. ഇത് കണ്ടെത്തിയതിനെത്തുടർന്ന് ഏകദേശം പതിനഞ്ചു മാസങ്ങൾക്കു മുൻപ് ഈ ഭാഗം ലെവൽ ചെയ്ത് ടാർ ചെയ്തിരുന്നു. എന്നിരുന്നാലും ചെറിയ മഴയിൽ പോലും ഇവിടെ വെള്ളം കെട്ടി നിൽക്കുകയും അടിപ്പാതയിൽ വലിയ കുഴികൾ രൂപപ്പെടുകയും ചെയ്തു. ഈ കുഴികളിൽ വീണ് ഇരുചക്രവാഹന യാത്രക്കാർ ഉൾപ്പെടെ നിരവധിപേർക്ക് അപകടങ്ങൾ സംഭവിച്ചിട്ടുണ്ട്. അടിപ്പാതയിൽ എത്തുന്ന വെള്ളം ഒഴുകിപ്പോകാൻ ശരിയായ ഒരു സംവിധാനം ഇല്ലാത്തതായിരുന്നു ഇവിടത്തെ പ്രധാന പ്രശ്നം. ചെളിവെള്ളം തെറിച്ച് ഇരുചക്രവാഹന യാത്രക്കാരുടെയും കാൽനട യാത്രക്കാരുടെയും ദേഹത്ത് വീഴുന്നത് ഇവിടെ പതിവാണ്. ഇതു പലപ്പോഴും തർക്കങ്ങൾക്ക് ഇടയാക്കിയിട്ടുണ്ട്. ഓടയിലേക്ക് വെള്ളം ഇരുവശത്തുനിന്നും വളഞ്ഞു വരുന്ന വാഹനങ്ങൾ പെട്ടെന്നാണ് വെള്ളക്കെട്ട് കാണുന്നത്. റോഡ് പരിചയമില്ലാത്ത ഡ്രൈവർമാർ പെട്ടെന്ന് ബ്രേക്ക് ചെയ്യുമ്പോൾ പിന്നാലെ വരുന്ന വാഹനങ്ങൾ ഇടിച്ചുണ്ടാകുന്ന അപകടങ്ങളും ഇവിടെ നിത്യസംഭവമായിരുന്നു. അധ്യയനവർഷം ആരംഭിക്കുമ്പോൾ വിജേശ്വരി ഹൈസ്കൂൾ, ദേവസ്വം ബോർഡ്സ് ഹയർ സെക്കൻഡറി സ്കൂൾ, സെന്‍റ് ജോസഫ് ഇംഗ്ലീഷ് മീഡിയം സ്കൂൾ, ആല ഗവ. ഹയർ സെക്കൻഡറി സ്കൂൾ, ചെറിയനാട് എസ്എൻ ട്രസ്റ്റ് ഹയർ സെക്കൻഡറി സ്കൂൾ എന്നിവിടങ്ങളില വദ്യാർഥികൾ സൈക്കിളിലും കാൽനടയായും ഈ വഴിയിലൂടെയാണ് പോകുന്നത്. ഇവർക്ക് വെള്ളക്കെട്ട് വലിയ ദുരിതമായിരുന്നു സൃഷ്ടിച്ചിരുന്നത്. എന്നാൽ, ഇപ്പോൾ ഓടയിലേക്ക് വെള്ളം ഒഴുക്കുന്നതിനുള്ള നടപടികൾ ആരംഭിച്ചതോടെ ഒരു വലിയ ആശ്വാസമായിരിക്കുകയാണ്. ഇവിടത്തെ ദുരിതത്തെക്കുറിച്ചുള്ള വാർത്തകൾ ശ്രദ്ധയിൽപ്പെട്ടതിനെ തുടർന്ന് ചെങ്ങന്നൂർ എംഎൽഎയും മന്ത്രിയുമായ സജി ചെറിയാനും മാവേലിക്കര എംപി കൊടിക്കുന്നിൽ സുരേഷും ശക്തമായി ഇടപെട്ടതിനെത്തുടർന്നാണ് റെയിൽവേ അധികൃതർ അടിയന്തരമായി വെള്ളക്കെട്ട് ഒഴിവാക്കുന്നതിനുള്ള പ്രവർത്തനങ്ങൾ ആരംഭിച്ചത്.

കോൺക്രീറ്റ് മിക്സുമായി വന്ന ലോറി നടുറോഡിൽ തകരാറിലായി

അമ്പലപ്പുഴ: കോൺക്രീറ്റ് മിക്സുമായി വന്ന ലോറി നടുറോഡിൽ തകരാറിലായി. ദേശീയപാതയിൽ മണിക്കൂറുകളാളം ഗതാഗതക്കുരുക്ക്. അമ്പലപ്പുഴ കച്ചേരിമുക്കിൽ ഇന്നലെ ഉച്ചയ്ക്ക് 12 നായിരുന്നു സംഭവം. വടക്കു ഭാഗത്തേക്ക് പോയ കർണാടക രജിസ്ട്രേഷൻ ലോറിയാണ് നടുറോഡിൽ തകരാറിലായത്. ഇതോടെ കെഎസ്ആർടിസി ബസുകൾ ഉൾപ്പെടെ നിരവധി വാഹനങ്ങൾ ഗതാഗതക്കുരുക്കിൽപ്പെട്ടു. പിന്നീട് ജെസിബിയെത്തിച്ച് ദേശീയപാത നിർമാണത്തിന്‍റെ ഭാഗമായി സ്ഥാപിച്ച സ്ളാബുകൾ നീക്കം ചെയ്താണ് ലോറി മാറ്റി ഗതാഗതം പുനഃസ്ഥാപിച്ചത്.

കണ്ടെയ്നർ ലോറിയിടിച്ച് ബൈക്ക് യാത്രികൻ മരിച്ചു

ആലുവ: കണ്ടെയ്നർ ലോറിയിടിച്ച് ബൈക്ക് യാത്രികൻ മരിച്ചു. മുപ്പത്തടം വെള്ളയിൽ വീട്ടിൽ സെബാസ്റ്റ്യൻ (60) ആണ് മരിച്ചത്. പെരുന്പാവൂർ ദേശസാത്കൃത റോഡിൽ ചാലക്കലിൽ ഇന്നലെ ഉച്ചക്ക് രണ്ടോടെയാണ് അപകടം. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കെട്ടിട നിർമാണ കരാറുകാരനായ സെബാസ്റ്റ്യൻ സൈറ്റിൽനിന്ന് വീട്ടിലേക്ക് വരുന്പോഴാണ് അപകടം. തലയടിച്ച് വീണതാണ് മരണകാരണം. മൃതദേഹം ആലുവ ജില്ലാ ആശുപത്രി മോർച്ചറിയിലേക്ക് മാറ്റി. ഇന്ന് പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുകൊടുക്കും. ഭാര്യ: വിജി. മക്കൾ: ബർട്ടിൻ, മെറിൻ.

തൈക്കാട്ടുശേരി റൂട്ട് മറന്ന് കെഎസ്ആർടിസി; സർവീസ് നിലച്ചിട്ട് വർഷങ്ങൾ

പൂച്ചാക്കൽ: തൈക്കാട്ടുശേരിയിൽനിന്നു എംഎൽഎ റോഡ് വഴിയുള്ള കെഎസ്ആർടിസി സർവീസുകൾ നിലച്ചിട്ട് വർഷങ്ങൾ കഴിയുന്നു. തൈക്കാട്ടുശേരിയിൽനിന്നു രാവിലെ അഞ്ചിന് ആരംഭിച്ച് കോട്ടയം മെഡിക്കൽ കോളജ് വരെ ഉണ്ടായിരുന്ന കെഎസ്ആർടിസി സർവീസ് ഉൾപ്പെടെ നിരവധി ബസുകളാണ് സർവീസ് നിർത്തിയത്. കോവിഡ് കാലത്താണ് ഇതുവഴിയുള്ള സർവീസുകൾ നിർത്തിവച്ചത്. എൻഎസ്എസ് കോളജ് വഴി തൃച്ചാറ്റുകുളം വരെ എത്തുന്ന എംഎൽഎ റോഡ് വഴി പോയിരുന്ന എല്ലാ സർവീസുകൾക്കും വളരെ നല്ല കളക്ഷൻ ലഭിച്ചിരുന്നു. പള്ളിപ്പുറത്തുള്ള ഇൻഫോപാർക്കിലും ഫുട്പാർക്കിലും 5000 ൽ അധികം തൊഴിലാളികൾ ജോലി ചെയ്യുന്ന സ്ഥാപനങ്ങളുണ്ട്. ബസ് സർവീസുകൾ നിർത്തലാക്കിയതിനെത്തുടർന്ന് വാഹന സൗകര്യം ഇല്ല എന്ന കാരണത്താൽ ഇൻഫോപാർക്കിലെ ചില സ്ഥാപനങ്ങൾ കൊച്ചിയിലേക്ക് തിരികെ പോവുകയുണ്ടായി. തുറവൂർ - തൈക്കാട്ടുശേരി പാലം തുറന്നാൽ തുറവൂരിൽനിന്നു തൈക്കാട്ടുശേരി വഴി ചേർത്തല വരെ പോകുന്ന സർവീസുകൾ ആരംഭിക്കുമെന്ന് അന്ന് അധികൃതർ പ്രഖ്യാപിച്ചെങ്കിലും പ്രഖ്യാപനം ജലരേഖയാകുകയാണ്. വിളക്കുമരം പാലം തുറന്നുകൊടുക്കുമ്പോൾ ചേർത്തലയിൽനിന്നു പള്ളിപ്പുറം തൈക്കാട്ടുശേരി മേഖലകളുമായി ബന്ധിപ്പിച്ച് പുതിയ സർവീസുകൾ ഉൾപ്പെടെ നിർത്തിവച്ച എല്ലാ സർവീസുകളും ആരംഭിച്ചിച്ചില്ലെങ്കിൽ സമരപരിപാടികൾ സംഘടിപ്പിക്കുമെന്ന് തൈക്കാട്ടുശേരി കേന്ദ്രമായി പ്രവർത്തിക്കുന്ന പാസഞ്ചേഴ്സ് അസോസിയേഷൻ ഭാരവാഹികളായ പ്രസിഡന്‍റ് പി. ശശികല, സെക്രട്ടറി വി.എൻ. ഷണ്മുഖൻ, കെ.പി. ഉദയപ്പൻ, പി.ആർ. വിജയ പ്രസാദ് എന്നിവർ പറഞ്ഞു.

കേരള യൂത്ത് ഫ്രണ്ട്-എം തീരദേശ സംരക്ഷണ ജാഥ

ആലപ്പുഴ: കേരള യൂത്ത് ഫ്രണ്ട്-എം തീരദേശ സംരക്ഷണ ജാഥ ആലപ്പുഴ ജില്ലയിൽ പര്യടനം നടത്തി. ഇന്നലെ രാവിലെ ജില്ലയിൽ പ്രവേശിച്ച ജാഥയ്ക്ക് മത്സ്യത്തൊഴിലാളികളും നാട്ടുകാരും ചേർന്ന് സ്വീകരണം നൽകി. ജാഥാ ക്യാപ്റ്റൻ സിറിയക് ചാഴികാടനെ മാലയിട്ടും ഹർഷാരവങ്ങളോടെയുമാണ് സ്വീകരിച്ചത്. മത്സ്യത്തൊഴിലാളികളുടെ പ്രതിസന്ധിയിൽ എന്നും കേരള കോൺഗ്രസും യൂത്ത് ഫ്രണ്ടും ഒപ്പമുണ്ടാകുമെന്ന് സിറിയക് ചാഴികാടൻ പറഞ്ഞു. കേരളം മുഴുവൻ ഒറ്റക്കെട്ടായി മത്സ്യത്തൊഴിലാളികൾക്കുവേണ്ടി രംഗത്തിറങ്ങും. കേന്ദ്രസർക്കാരിന് കേരളത്തിന്‍റെ ജനകീയ പ്രതിഷേധങ്ങൾക്കൊടുവിൽ മത്സത്തൊഴിലാളികളെ സംരക്ഷിക്കേണ്ടിവരുമെന്നും അദ്ദേഹം പറഞ്ഞു. കേരള യൂത്ത്ഫ്രണ്ട്-എം ജില്ലാ പ്രസിഡന്‍റ് വർഗീസ് ആന്‍റണി അധ്യക്ഷത വഹിച്ചു. വിവിധ സ്വീകരണ കേന്ദ്രങ്ങളിൽ കേരള കോൺഗ്രസ്-എം ജില്ലാ പ്രസിഡന്‍റ് വി.സി. ഫ്രാൻസിസ്, കേരള കോൺഗ്രസ്-എം രാഷ്ട്രീയകാര്യസമിതി അംഗം വി.ടി. ജോസഫ്, ജെന്നിംഗ്സ് ജേക്കബ്, വിജി എം. തോമസ്, സാജൻ തൊടുക, ജോസഫ് കെ. നെല്ലുവേലി, ഷേയ്ക്ക് അബ്ദുള്ള, അജിതാ സോണി തുടങ്ങിയവർ വിവിധ കേന്ദ്രങ്ങളിൽ പ്രസംഗിച്ചു.

സമ്പൂര്‍ണ കുടിവെള്ള പദ്ധതി: ടെന്‍ഡറിന് അംഗീകാരം

ചെങ്ങന്നൂര്‍: സമ്പൂര്‍ണ കുടിവെള്ള പദ്ധതി ചെറിയനാട് തുരുത്തിമേല്‍ ഉപരിതല ജലസംഭരണി ഉള്‍പ്പെടുന്ന പദ്ധതിയുടെ ടെന്‍ഡറിന് അംഗീകാരം. സംസ്ഥാന സര്‍ക്കാര്‍ നടപ്പാക്കുന്ന ചെങ്ങന്നൂര്‍ സമ്പൂര്‍ണ കുടിവെള്ള പദ്ധതിയുടെ ഭാഗമായി ആലാ, പുലിയൂര്‍, ബുധനൂര്‍, പാണ്ടനാട്, മുളക്കുഴ, വെണ്‍മണി, തിരുവന്‍വണ്ടൂര്‍ പഞ്ചായത്തുകളിലേക്കും ചെങ്ങന്നൂര്‍ മുനിസിപ്പാലിറ്റിയിലേക്കുമുള്ള 520 കോടി രൂപയുടെ ജലവിതരണ പദ്ധതിക്ക് സര്‍ക്കാര്‍ മുൻപുതന്നെ അനുമതി ലഭ്യമാക്കിയതനുസരിച്ച് വിവിധ പഞ്ചായത്തുകളില്‍ പൈപ്പ്‌ലൈൻ സ്ഥാപിക്കുന്നത് ഉള്‍പ്പെടെയുള്ള ജോലികള്‍ പുരോഗമിച്ചു വരുന്നു. ചെറിയനാട്, പുലിയൂര്‍, ബുധനൂര്‍, പാണ്ടനാട് പഞ്ചായത്തുകളില്‍ ഉന്നതതല ജലസംഭരണികളും 213 കിലോമീറ്റർ പൈപ്പ് ലൈനും സ്ഥാപിക്കുന്നതിനുള്ള ടെന്‍ഡറുക ള്‍ സര്‍ക്കാര്‍ അനുമതിക്ക് സമര്‍പ്പിച്ചിരുന്നു. ഇതില്‍ ചെറിയനാട് തുരുത്തിമേല്‍ നിര്‍മിക്കുന്ന 3.6 ലക്ഷം ലിറ്റര്‍ ഉപരിതല ജലസംഭരണിയും 250 എംഎംഡി എൻക്ലിയര്‍ വാട്ടര്‍ പമ്പിംഗ് മെയിന്‍ തുരുത്തിമേല്‍ ടാങ്കിലേക്കുള്ള പ്രവൃത്തിയുടെ ടെന്‍ഡര്‍ അധിക നിരക്കിന് സര്‍ക്കാര്‍ അംഗീകാരം നല്‍കി. ചെറിയനാട് പഞ്ചായത്തിലെയും സമീപ പഞ്ചായത്തുകളിലെയും ഉയര്‍ന്ന പ്രദേശങ്ങളില്‍ ജലവിതരണം സാധ്യമാക്കുന്നതിന് തുരുത്തിമേല്‍ ഉപരിതല ജലസംഭരണിയുടെ നിര്‍മാണം അനിവാര്യമാണ്. പ്രവൃത്തി ഏറ്റെടുക്കാന്‍ ആരും തയാറാകാത്തതിനാല്‍ പദ്ധതി നഷ്ടപ്പെടുമെന്ന സാഹചര്യത്തില്‍ മന്ത്രി സജി ചെറിയാന്‍റെ ഇടപെടലിനെത്തുടര്‍ന്നാണ് പ്രവൃത്തി നടപ്പിലാക്കാനുള്ള അനുമതി ഇപ്പോള്‍ ലഭ്യമായിട്ടുള്ളത്.

ഗതാഗതതടസമായി ഉപയോഗശൂന്യമായ ഓഫീസ് കെട്ടിടവും ശുചിമുറിയും

പൂച്ചാക്കൽ: പാണാവള്ളി ജെട്ടി റോഡിൽ ഓഫീസ് കെട്ടിടവും ശുചിമുറിയും ഗതാഗതത്തിനു തടസമാകുന്നു. പാണാവള്ളി ബോട്ട് ജെട്ടിയിലാണ് റോഡിനോട് ചേർന്ന് ജലഗതാഗതവകുപ്പിന്‍റെ പഴയ ഓഫീസ് കെട്ടിടവും പൊതുജനങ്ങൾക്കായി വർഷങ്ങൾക്ക് മുൻപ് നിർമിച്ച ശുചിമുറിയും യാത്രക്കാർക്ക് മാർഗതടസമാകുന്നത്. ജെട്ടിയോട് ചേർന്ന് പുതിയ ഓഫീസ് കെട്ടിടം നിർമിക്കുകയും പ്രവർത്തനങ്ങൾ തുടങ്ങി വർഷങ്ങൾ കഴിഞ്ഞിട്ടും തകർന്ന പഴയ കെട്ടിടം പൊളിച്ചുമാറ്റുന്നതിന് അധികൃതർ നടപടി സ്വീകരിച്ചില്ല. പാണാവള്ളി ബോട്ട് ജെട്ടിയിൽനിന്ന് പെരുമ്പളം, പൂത്തോട്ട, നോർത്ത് പറവൂർ തുടങ്ങിയ സ്ഥലങ്ങളിലേക്ക് നൂറുകണക്കിന് ആളുകളാണ് ദിവസേന യാത്ര ചെയ്യുന്നത്. പാണാവള്ളി - പെരുമ്പളം ജങ്കാർ സർവീസ് കൂടി ഉള്ളതിനാൽ ഇവിടെ വാഹനങ്ങളുടെ തിരക്കും വർധിച്ചു. രാവിലെയും വൈകിട്ടും വലിയ ലോറികൾ വരെ ജങ്കാറിൽ കയറ്റി പെരുമ്പളത്തേക്ക് കൊണ്ടുപോകാവുന്നതിനാൽ ബോട്ട് ജെട്ടിയിൽ വലിയ തിരക്കാണ് അനുഭവപ്പെടുന്നത്. പെരുമ്പളം കവലയിൽനിന്നു ജെട്ടി വരെയുള്ള വീതി കുറഞ്ഞ റോഡിൽ വാഹനങ്ങൾ തിരിക്കാൻ പോലും സ്ഥലമില്ല. നിലവിൽ ഉപയോഗശൂന്യമായ കെട്ടിടങ്ങൾ പൊളിച്ചുനീക്കിയാൽ വാഹനങ്ങൾ പാർക്ക് ചെയ്യാനുള്ള സ്ഥലം ലഭിക്കുകയും ഗതാഗതക്കുരുക്കില്ലാതെ വാഹനങ്ങൾ കടന്നുപോകാനും സാധിക്കുമെന്ന് നാട്ടുകാർ പറഞ്ഞു. ബോട്ട് യാത്രക്കാരുടെ ഇരുചക്രവാഹനങ്ങൾ അധികവും റോഡിന്‍റെ വശങ്ങളിലാണ് പാർക്ക് ചെയ്തിരിക്കുന്നത്. സർക്കാർ ചെലവിൽ മദ്യവും മയക്കുമരുന്നും ഉപയോഗിക്കുന്നവർക്ക് സൗകര്യമൊരുക്കുന്ന ഇടമായി മാറി പഴയ ഓഫിസ് കെട്ടിടം എന്ന ആക്ഷേപവും ഉയരുന്നുണ്ട്. രാത്രികാലങ്ങളിൽ ഇവിടെ സാമൂഹ്യവിരുദ്ധരുടെ ശല്യവും രൂക്ഷമാണ്.

അതിരൂപത ദിനാചരണം വിളംബര ദീപം തെളിഞ്ഞു

ചങ്ങനാശേരി: 20ന് മെത്രാപ്പോലീത്തന്‍ പള്ളിയങ്കണത്തില്‍ നടക്കുന്ന 139-ാമത് ചങ്ങനാശേരി അതിരൂപത ദിനാചരണത്തിനു മുന്നോടിയായി നടന്ന വിളംബര സമ്മേളനം അതിരൂപത വികാരി ജനറാള്‍ മോൺ. ആന്‍റണി എത്തയ്ക്കാട്ട് ഉദ്ഘാടനം ചെയ്തു. മെത്രാപ്പോലീത്തന്‍ പള്ളിയില്‍ നടന്ന ചടങ്ങില്‍ വികാരി ഫാ. ജോസഫ് വാണിയപ്പുരയ്ക്കല്‍ അധ്യക്ഷത വഹിച്ചു. അതിരൂപത ദിന കോ-ഓര്‍ഡിനേറ്റര്‍ ഫാ. ജോബിന്‍ ആനക്കല്ലുങ്കല്‍, ഫൊറോന കൗണ്‍സില്‍ സെക്രട്ടറി സൈബി അക്കര തുടങ്ങിയവര്‍ പ്രസംഗിച്ചു. പരിപാടികളുടെ വിജയത്തിനായി വികാരി ജനറാള്‍ ജനറല്‍ മോണ്‍. ആന്‍റണി എത്തയ്ക്കാട് ജനറല്‍ കണ്‍വീനറായി 501 അംഗ സ്വാഗതസംഘത്തിനു രൂപം നല്‍കിയിട്ടുണ്ട്. ഫാ. ജോബിന്‍ ആനക്കല്ലുങ്കല്‍, ഫാ. ചെറിയാന്‍ കക്കുഴി, ഫാ. ജിന്‍സ് ചോരേട്ട് ചാമക്കാല, (കോ-ഓർഡിനേറ്റര്‍മാര്‍), മെത്രാപ്പോലീത്തന്‍പള്ളി വികാരി ഫാ. ജോസഫ് വാണിയപ്പുരയ്ക്കല്‍, ഫാ. ജോഷി പുത്തന്‍പുരയ്ക്കല്‍, ഫാ. മാത്യൂ നടമുഖത്ത്, ഫാ. ഐബിന്‍ പകലോമറ്റം, ഫാ. തോമസ് കൊറ്റത്തില്‍, ഫാ. മിന്‍റു മൂന്നുപറയില്‍, ഫാ. ജിന്‍റോ മുര്യങ്കരി, ഫാ. ജേക്കബ് പാറയ്ക്കല്‍, ഫാ. ജിജോ മാറാട്ടുകളം തുടങ്ങിയവര്‍ വിവിധ കമ്മിറ്റികളുടെ കണ്‍വീനർമാരാണ്.

നടൻ ശ്രീനാഥ് ഭാസി ചേർത്തല കോടതിയിൽ മൊഴി നൽകി

ചേർത്തല: ഹൈബ്രിഡ് കഞ്ചാവ്‌ കേസിൽ നടൻ ശ്രീനാഥ് ഭാസി ചേർത്തല കോടതിയിലെത്തി മൊഴി നൽകി. കേസിലെ മുഖ്യപ്രതി തസ്‌ലിമ സുൽത്താനെതിരേ ശ്രീനാഥ് ഭാസി രഹസ്യമൊഴി നൽകിയെന്നാണ് സൂചന. ആലപ്പുഴയിലെ രണ്ടു കോടിയുടെ ഹൈബ്രിഡ് കഞ്ചാവ് കേസിൽ നടൻ ശ്രീനാഥ് ഭാസി ചേർത്തല ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി ഒന്നിൽ ഷെറിൻ കെ. ജോർജ് മുമ്പാകെ ഹാജരായി മൊഴി നൽകിയത്. ബുധനാഴ്ച ഉച്ചകഴിഞ്ഞ് മൂന്ന് മണിയോടെയാണ് എക്സൈസ് സംഘം ശ്രീനാഥ് ഭാസിയെ ചേർത്തല കോടതിയിലെത്തിച്ചത്. കേസിൽ ശ്രീനാഥ് ഭാസിയെ എക്സൈസ് സാക്ഷിയാക്കിയിരുന്നു. ഇതിനു പിന്നാലെയാണ് മൊഴി നൽകാനായി എത്തിയത്. ഒരു മണിക്കൂറിനുള്ളിൽ മൊഴി നൽകിയ ശേഷം ശ്രീനാഥ് ഭാസി സ്വന്തം വാഹനത്തിലാണ് മടങ്ങിയത്.

ചങ്ങനാശേരി എസ്ബി എച്ച്എസ്എസ് കാമ്പസില്‍ വളകിലുങ്ങും

പ്ലസ്ടു വിഭാഗത്തില്‍ പെണ്‍കുട്ടികളെ പ്രവേശിപ്പിക്കാന്‍ മാനേജ്‌മെന്‍റ് തീരുമാനം ചങ്ങനാശേരി: ചങ്ങനാശേരിയിലെ ആണ്‍കുട്ടികളുടെ പ്രശസ്ത വിദ്യാലയമായ എസ്ബി ഹയര്‍ സെക്കന്‍ഡറി സ്‌കൂളിലെ പ്ലസ്ടു വിഭാഗത്തില്‍ 2025-26 വര്‍ഷം പെണ്‍കുട്ടികള്‍ക്കുകൂടി പ്രവേശനം നല്‍കാന്‍ മാനേജ്‌മെന്‍റ് തീരുമാനം. മാനേജ്‌മെന്‍റിന്‍റെ ആവശ്യപ്രകാരം ഹയര്‍ സെക്കന്‍ഡറി വിഭാഗം ഡയറക്ടർ ഇതുസംബന്ധിച്ച ഉത്തരവിറക്കി. പെണ്‍കുട്ടികള്‍ക്കുള്ള എല്ലാ സൗകര്യങ്ങളും ഏര്‍പ്പെടുത്തിയിട്ടുണ്ട്. 1891ല്‍ മെട്രിക്കുലേഷന്‍ ക്ലാസും അതിനു തൊട്ടുതാഴെയുള്ള ഫിഫ്ത് ക്ലാസും (ഇന്നത്തെ പ്ലസ്ടു, പ്ലസ് വണ്‍) ആരംഭിച്ചുകൊണ്ട് തുടക്കംകുറിച്ച ചങ്ങനാശേരി ബര്‍ക്ക്മാന്‍സ് കോളജ് സ്‌കൂള്‍ കേരളത്തിലെ സുറിയാനി ക്രിസ്ത്യാനികളുടെ ആദ്യത്തെ ഉന്നതവിദ്യാഭ്യാസ കേന്ദ്രമാണ്. പടിപടിയായി വളര്‍ന്ന് സര്‍വകലാശാലയായി മാറണമെന്ന് ആഗ്രഹത്തോടെ ബിഷപ് മാർ ചാള്‍സ് ലവീഞ്ഞ് സ്ഥാപിച്ചതാണ് സ്‌കൂള്‍. 1922ല്‍ ഡിഗ്രി ക്ലാസുകള്‍ ആരംഭിച്ചു. തുടര്‍ന്ന് സ്‌കൂളില്‍ നടന്നിരുന്ന മെട്രിക്കുലേഷന്‍ ക്ലാസ് കോളജിന്‍റെ ഭാഗമായി മാറി. എസ്ബി സ്‌കൂളിന്‍റെ വനിതാവിഭാഗമാണ് ചങ്ങനാശേരിയിലെ പ്രശസ്തമായ സെന്‍റ് ആന്‍സ് സ്‌കൂളായി വളര്‍ന്നത്. ഹയര്‍ സെക്കന്‍ഡറി ആരംഭിച്ചിട്ട് 27 വര്‍ഷം പിന്നിടുമ്പോള്‍ പെണ്‍കുട്ടികള്‍ക്ക് അവസരം ചങ്ങനാശേരി മേഖലയില്‍ ഹയര്‍സെക്കന്‍ഡറി വിഭാഗത്തില്‍ പെണ്‍കുട്ടികള്‍ക്ക് പഠിക്കാനുള്ള സീറ്റുകളുടെ ദൗര്‍ലഭ്യം കണക്കിലെടുത്താണ് ചങ്ങനാശേരി അതിരൂപത നേരിട്ടു നിയന്ത്രിക്കുന്ന എസ്ബി സ്‌കൂളിനെ മിക്‌സഡ്‌ സ്‌കൂളാക്കി മാറ്റാന്‍ തീരുമാനിക്കുകയും ഇക്കാര്യത്തിന് സര്‍ക്കാരിന്‍റെ അംഗീകാരം വാങ്ങുകയും ചെയ്തത്. 1998ല്‍ കോളജുകളില്‍നിന്ന് പ്രീഡിഗ്രി ഡീലിങ്ക് ചെയ്തപ്പോഴാണ് എസ്ബി സ്‌കൂള്‍ ഹയര്‍ സെക്കന്‍ഡറിയായി ഉയര്‍ത്തപ്പെട്ടത്. ബയോളജി, കമ്പ്യൂട്ടര്‍, കൊമേഴ്‌സ് എന്നീ വിഷയങ്ങളില്‍ രണ്ടു ബാച്ചുകളിലായി മുന്നൂറു വിദ്യാര്‍ഥികള്‍ക്കാണ് ഇവിടെ പ്രവേശനം ലഭിക്കുന്നത്. ശാന്തമായ കാമ്പസ്, ആധുനിക സൗകര്യങ്ങൾ, ഉന്നത പഠനനിലവാരം ശാന്തമായ അന്തരീക്ഷമുള്ള കാമ്പസ്, മികച്ച പഠനമുറികള്‍, ലബോറട്ടറികള്‍, ലൈബ്രറി, പ്ലേ ഗ്രൗണ്ടുകള്‍ എന്നിവകൊണ്ട് അനുഗ്രഹീതമായ സ്‌കൂള്‍ ചങ്ങനാശേരി അതിരൂപത നേരിട്ടു നടത്തുന്ന ഏക എയ്ഡഡ് ഹയര്‍ സക്കന്‍ഡറി സ്‌കൂളാണ്. ആര്‍ച്ച്ബിഷപ് മാര്‍ തോമസ് തറയില്‍ രക്ഷാധികാരിയും ഫാ. ടോണി ചെത്തിപ്പുഴ ലോക്കല്‍ മാനേജരുമായുള്ള സമിതിയാണ് സ്‌കൂളിന്‍റെ ഭരണച്ചുമതല നിര്‍വഹിക്കുന്നത്. ഫാ. ആന്‍റണി മൂലയില്‍ കോര്‍പറേറ്റ് മാനേജറുമാണ്. 1891ല്‍ മദ്രാസ് സര്‍വകലാശാലയോട് അഫിലിയേറ്റ് ചെയ്താണ് ഇന്നത്തെ ഹയര്‍ സെക്കന്‍ഡറിക്കു തുല്യമായതും അക്കാലത്ത് സര്‍വകലാശാല നടത്തിയിരുന്നതുമായ മെട്രിക്കുലേഷന്‍ ക്ലാസ് തുടങ്ങിക്കൊണ്ട് വിശുദ്ധ സെന്‍റ് ബര്‍ക്കുമാന്‍സിന്‍റെ നാമധേയത്തില്‍ വിദ്യാലയത്തിനു തുടക്കംകുറിച്ചത്. സുറിയാനി ക്രിസ്ത്യാനികള്‍ക്കുവേണ്ടി ആരംഭിച്ച വിദ്യാലയത്തില്‍ എല്ലാ ജാതി-മതസ്ഥരേയും ഒരേബെഞ്ചിലിരുത്തി പഠിപ്പിച്ചപ്പോള്‍ എസ്ബി സ്‌കൂള്‍ ചരിത്രത്തില്‍ വേറിട്ട വിദ്യാലയമായി മാറിയതിനൊപ്പം മധ്യതിരുവിതാംകൂറിലെ ഉന്നത വിദ്യാഭ്യാസ കേന്ദ്രമായി വളര്‍ന്നു പന്തലിക്കുകയും ചെയ്തു. അതിരൂപതയുടെ കീഴിലുള്ള എസ്ബി, അസംപ്ഷന്‍ കോളജുകളില്‍ കഴിഞ്ഞ അധ്യയനവര്‍ഷം മിക്‌സഡ് കലാലയമാക്കിയിരുന്നു.

കായൽപ്പുറം പള്ളിയിൽ തിരുനാൾ

മങ്കൊമ്പ്: പുളിങ്കുന്ന് കായൽപ്പുറം സെന്‍റ് ജോസഫ്സ് പള്ളിയിൽ വിശുദ്ധ യൗസേപ്പിതാവിന്‍റെ തിരുനാളിന്‍റെ ഭാഗമായി ഇന്നു രാവിലെ 6.45ന് സപ്ര, വൈകുന്നേരം 4.30ന് ജപമാല, വിശുദ്ധ കുർബാന. നാളെ വൈകുന്നേരം 4.30ന് ജപമാല, വിശുദ്ധ കുർബാന, സന്ദേശം, മധ്യസ്ഥപ്രാർഥന, രാത്രി ഏഴിന് നാടകം. പത്തിന് വിശുദ്ധ കുർബാന സ്വീകരണം, രാവിലെ 6.45ന് സപ്ര, വിശുദ്ധ കുർബാന, സന്ദേശം, വൈകുന്നേരം മൂന്നിന് തിരുസ്വരൂപം പ്രധാന കവാടത്തിൽ എഴുന്നള്ളിച്ചുവയ്ക്കുന്നു. തുടർന്ന് വാഹനവെഞ്ചരിപ്പ്, 3.30ന് ജപമാല, വിശുദ്ധ കുർബാന, ദിവ്യകാരുണ്യ ആരാധന, 5.30ന് ദിവ്യകാരുണ്യ പ്രദക്ഷിണം, തുടർന്ന മധ്യസ്ഥപ്രാർഥന, ലദീഞ്ഞ്, തുറവശേരി ജംഗ്ഷനിലേക്ക് പ്രദക്ഷിണം. പ്രധാന തിരുനാൾ ദിനമായ 11ന് രാവിലെ ആറിന് വിശുദ്ധ കുർബാന, വചനസന്ദേശം, ഫാ. ജയ്‌സൺ മാവേലിൽ, എട്ടിനും 12നും വൈകുന്നേരം 3.30നും നടക്കുന്ന വിശുദ്ധ കുർബാനകൾക്ക് റവ.ഡോ. ടോം പുത്തൻകളം, ഫാ. ജോബി പരുവപ്പറമ്പിൽ, ഫാ. ജേക്കബ് കാട്ടടി എന്നിവർ മുഖ്യകാർമികത്വം വഹിക്കും. 10ന് തിരുനാൾ കുർബാന ഫാ. ജിജോ കുറിയന്നൂർപറമ്പിൽ, വൈകുന്നേരം അഞ്ചിന് മധ്യസ്ഥപ്രാർഥന, തിരുനാൾ പ്രദക്ഷിണം, ഫാ. ജയിംസ് കണിക്കുന്നേൽ, ആറിന് കൊടിയിറക്ക്. വികാരി ഫാ. അഗസ്റ്റിൻ പൊങ്ങനാംതടത്തിൽ, കൈക്കാരൻ ജോസഫ് ജോസഫ് തെക്കേവയലാറ്റ്, തിരുനാൾ കമ്മിറ്റി പ്രസിഡന്‍റ് സാബു കോയിപ്പള്ളി, സാബു പുന്നൂർ, ജോസ് ആക്കാത്തറ, അനോജ് മൂലേപ്പറമ്പിൽ തുടങ്ങിയവർ നേതൃത്വം നൽകും. കണ്ണാടി സെന്‍റ് റീത്താസ് പള്ളിയിൽ തിരുനാൾ പുളിങ്കുന്ന്: കണ്ണാടി സെന്‍റ് റീത്താസ് പള്ളിയിൽ ഇടവക മധ്യസ്ഥയായ വിശുദ്ധ റീത്തായുടെ തിരുനാൾ നാളെ മുതൽ 18 വരെ ആഘോഷിക്കും. നാളെ വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം-ഫാ. ജോൺ മഠത്തിപ്പറന്പിൽ. പത്തിന് വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, കുട്ടികളുടെ വിശുദ്ധ കുർബാന സ്വീകരണം, സന്ദേശം-ഫാ. ജോസഫ് മാലിത്തറ. 11ന് രാവിലെ 6.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം- റവ.ഡോ. അലക്സ് കൊല്ലംകളം, ഫാ. ചാക്കോ ആക്കാത്തറ സിഎംഐ. 12ന് വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം-ഫാ. ജേക്കബ് കാട്ടടി. 13ന് വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം-ഫാ. ജോസ് കോനാട്ട് സിഎംഐ. 14ന് വൈകുന്നേരം 4.30ന് കൊടിയേറ്റ്, ലദീഞ്ഞ്-വികാരി ഫാ. ചക്കുപുരയ്ക്കൽ. മധ്യസ്ഥപ്രാർഥന, വിശുദ്ധ കുർബാന, സന്ദേശം-ഫാ. സിറിയക് പഴയമഠം. തുടർന്ന് ഇടവകദിനം, പൂർവികസ്മരണ, കലാസന്ധ്യ. 15ന് വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം-ഫാ. ജസ്റ്റിൻ കായംകുളത്തുശേരി, ഫാ. ജെന്നി കായംകുളത്തുശേരി. തുടർന്ന് ദിവ്യകാരുണ്യ പ്രദക്ഷിണം. തീർഥാടന ദിനമായ 16ന് രാവിലെ 8.30ന് പുളിങ്കുന്ന് ഫൊറോന പള്ളിയിൽനിന്നു തീർഥാടനം ആരംഭിക്കും. തുടർന്ന് 10.45ന് തീർഥാടകർക്ക് സ്വീകരണം. സന്ദേശം - ആർച്ച്ബിഷപ് എമിരറ്റസ് മാർ ജോസഫ് പെരുന്തോട്ടം. തുടർന്ന് സമൂഹബലി-റവ.ഡോ. ടോം പുത്തൻകളം മുഖ്യകാർമികത്വം വഹിക്കും. മധ്യസ്ഥപ്രാർഥന, നേർച്ചഭക്ഷണം. രാത്രി ഏഴിന് കാഞ്ഞിരപ്പള്ളി അമലയുടെ നാടകം "തച്ചൻ'. 17ന് വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം-അതിരൂപത വികാരി ജനറാൾ ഫാ. ആന്‍റണി എത്തക്കാട്ട്. തുടർന്ന് തിരുനാൾ പ്രദക്ഷിണം-ഫാ. റ്റിബിൻ ഒറ്റാറയ്ക്കൽ. തിരുനാൾദിനമായ 18ന് രാവിലെ ആറിന് വിശുദ്ധ കുർബാന. 9.30ന് തിരുനാൾ കുർബാന, സന്ദേശം-ഫാ. ജോർജ് നെടുംപറന്പിൽ ഒഎഫ്എം ക്യാപ്. തുടർന്ന് പ്രദക്ഷിണം, കൊടിയിറക്ക്.

നിയമക്കുരുക്കുകൾ മറികടന്ന് അർത്തുങ്കൽ മത്സ്യബന്ധന തുറമുഖം യാഥാർഥ്യത്തിലേക്ക്

ചേർത്തല: നിയമക്കുരുക്കുകൾ തരണം ചെയ്ത് അർത്തുങ്കൽ മത്സ്യബന്ധന തുറമുഖത്തിന്‍റെ പുലിമുട്ട് നിർമാണ ടെൻഡറിന് സംസ്ഥാന മന്ത്രിസഭ അംഗീകാരം നൽകിയതായി കൃഷിമന്ത്രി പി. പ്രസാദ് അറിയിച്ചു. പുലിമുട്ടുകളുടെ ശേഷിക്കുന്ന നിർമാണത്തിന് 103 കോടി രൂപയുടെ കരാറിനാണ് അംഗീകാരം. തീരദേശത്തിന്‍റെ സ്വപ്നപദ്ധതിയായ അർത്തുങ്കൽ മത്സ്യബന്ധന തുറമുഖത്തിന്‍റെ ഏറ്റവും പ്രധാനപ്പെട്ട ഭാഗമായ പുലിമുട്ട് നിർമാണത്തിന്‍റെ കരാർ നിയമക്കുരുക്കുകളിൽ അകപ്പെട്ടിരുന്നു. ഫിഷറീസ് മന്ത്രി സജി ചെറിയാനുമായി ചേർന്ന് നടത്തിയ നിരന്തര പരിശ്രമഫലമായാണ് നിയമതടസങ്ങളെല്ലാം മറികടന്ന് കരാറിന് അംഗീകാരമായത്. രണ്ടുഘട്ടങ്ങളായി അനുവദിച്ച പണം ഉപയോഗിച്ച് നിര്‍മാണം പൂർത്തിയാക്കാൻ സാധിച്ചിരുന്നില്ല. നിലവിൽ വടക്കേ പുലിമുട്ട് 260 മീറ്ററും തെക്കേ പുലിമുട്ട് 510 മീറ്ററുമണ് പൂർത്തിയായിട്ടുള്ളത്. രാജ്യത്ത് ആദ്യമായി കടലിലെ ചെളി മൂലമുള്ള സിങ്കേജ് കാരണം പണി മുടങ്ങുമെന്ന ഘട്ടത്തിൽ കൃഷിമന്ത്രിയുടെയും ഫിഷറീസ് മന്ത്രിയുടെയും ഇടപെടലിന്‍റെ ഫലമായി രാജ്യത്ത് ആദ്യമായി എഫ്ഐഡിഎഫ് പദ്ധതിയിൽ ഉൾപ്പെടുത്തി നബാർഡ് മുഖേന വായ്പ ലഭിച്ചതാണ് പദ്ധതിക്ക് പുനർജന്മമേകിയത്. പൂർണമായും തിരിച്ചടയ്ക്കേണ്ട വായ്പയായി ലഭിക്കുന്ന പണം ഉപയോഗിച്ചുള്ള കരാറിനാണ് ഇപ്പോൾ അംഗീകാരം ലഭിച്ചത്. 5.07% വാർഷിക പലിശയിൽ ലഭിക്കുന്ന തുകയ്ക്ക് രണ്ട് വർഷത്തെ മൊറട്ടോറിയം ഉൾപ്പെടെ 12 വർഷമാണ് തിരിച്ചടവ് കാലാവധി. പണി പൂർത്തിയാക്കാനുള്ള സമയപരിധി മേയ് 2025 ആയിരുന്നെങ്കിലും പിന്നീട് അത് 2027 വരെ ദീർഘിപ്പിച്ചു നൽകിയിട്ടുണ്ട്. പുലിമുട്ട് നിർമാണം പുനരാരംഭിക്കുന്നതിന് ഹാർബർ എന്‍ജിനിയറിംഗ് വകുപ്പ് ടെൻഡർ ചെയ്തെങ്കിലും ഒരു കരാറുകാരൻ കോടതിയെ സമീപിച്ചതോടെ മുന്നോട്ട് പോയില്ല. ടെൻഡർ റദ്ദാക്കി പുതിയതു ക്ഷണിച്ചെങ്കിലും നിയമ പ്രശ്നങ്ങൾ തുടർന്നു. തുടർന്ന് അഡ്വക്കറ്റ് ജനറലിന്‍റെ നിയമോപദേശത്തിന്‍റെ അടിസ്ഥാനത്തിലാണ് മന്ത്രിസഭാ തീരുമാനം. കരാർ നടപടികൾ ഇതോടെ ഇനി നിർമിക്കാനുള്ള 655 മീറ്റർ തെക്കേ പുലിമുട്ട്, 190 മീറ്റർ വടക്കേ പുലിമുട്ട് എന്നിവയുടെ നിർമാണം ഉടൻ ആരംഭിക്കുവാൻ സാധിക്കും. കൂടാതെ പദ്ധതിയുടെ ഭാഗമായുള്ള ടോയ്‌ലറ്റ് ബ്ലോക്ക്, ലോക്കർ റൂം, ഫിഷ് ലാൻഡിംഗ് സെന്‍റർ - ഫിഷിംഗ് ഹാർബർ റോഡ് തുടങ്ങിയവയുടെ നിർമാണം ഏകദേശം പൂർത്തിയായിട്ടുണ്ട്. ഓവർഹെഡ് വാട്ടർ ടാങ്ക് നിർമാണം, ഐസ് പ്ലാന്‍റ്, ഹൈഡ്രോഗ്രാഫിക് സർവേയറുടെ കാര്യാലയം എന്നിവയുടെ കരാർ നടപടികൾ പുരോഗമിക്കുകയുമാണ്.

എടത്വ പള്ളിയില്‍ ദര്‍ശന സായൂജ്യമേകി തിരുനാള്‍ പ്രദക്ഷിണം

തമിഴ് മക്കള്‍ മടങ്ങി, ഇനി നാട്ടുകാരുടെ തിരുനാള്‍ എടത്വ: ഭക്തിനിറവില്‍ ഭക്തലക്ഷങ്ങള്‍ക്ക് ദര്‍ശനസായൂജ്യമേകി എടത്വ സെന്‍റ് ജോര്‍ജ് ഫൊറോനാ പള്ളിയില്‍ വിശുദ്ധ ഗീവര്‍ഗീസിന്‍റെ അത്ഭുത തിരുസ്വരൂപവും വഹിച്ചുള്ള തിരുനാള്‍ പ്രദക്ഷിണം നടന്നു. പ്രദക്ഷിണം തുടങ്ങുമ്പോള്‍ വഴികളെല്ലാം എടത്വ പള്ളിയെന്ന ലക്ഷ്യത്തിലേക്ക് നീളുകയായിരുന്നു. ആണ്ട് വട്ടത്തില്‍ ഒരിക്കല്‍ മാത്രമാണ് വിശുദ്ധ ഗീവര്‍ഗീസ് സഹദായുടെ പുണ്യരൂപം പുറത്തേക്ക് എഴുന്നള്ളിക്കുന്നത്. പ്രദക്ഷിണത്തില്‍ പങ്കെടുക്കാന്‍ രാവിലെ മുതല്‍ പള്ളിയങ്കണത്തിലേക്ക് വിശ്വാസികളുടെ പ്രവാഹമായിരുന്നു. ചെണ്ടയും ബാന്‍റുകളും ദ്രുതതാളം മീട്ടി. വൈദ്യുതദീപാലങ്കാരങ്ങളാല്‍ അലംകൃതമായ പള്ളി അഭൗമതേജസില്‍ ആറാടിനിന്നു. വിശുദ്ധന്‍റെ തിരുസ്വരൂപത്തില്‍ വെറ്റിലകളും പൂക്കളും വാരിയെറിഞ്ഞ് വിശ്വാസികള്‍ പ്രാര്‍ഥനാനിരതരായി. പാരീഷ് കമ്മിറ്റി അംഗങ്ങളും സ്‌പെഷല്‍ കമ്മിറ്റി അംഗങ്ങളും കൈവലയം തീര്‍ത്ത് തിരുസ്വരൂപത്തിനു സംരക്ഷണമേകി. പള്ളിക്ക് പ്രദക്ഷിണം വച്ച വിശുദ്ധ ഗീവര്‍ഗീസിന്‍റെ തിരുസ്വരൂപം ഏഴിന് ദേവാലയത്തിന്‍റെ പ്രധാന കവാടത്തിലെത്തിയപ്പോള്‍ പ്രത്യേക പ്രാര്‍ഥനാശുശ്രൂഷകളോടെ തിരുനാള്‍ പ്രദക്ഷിണത്തിനു സമാപനമായി. തമിഴ് മക്കള്‍ മടങ്ങിയതോടെ നാട്ടുകാരുടെ തിരുനാളിനു തുടക്കമായി. ഇനി കേരളത്തിന്‍റെ ഇതര ഭാഗങ്ങളില്‍നിന്നുള്ള തീര്‍ഥാടകരാണ് എത്തുക. 14നാണ് എട്ടാമിടം. അന്ന് വൈകുന്നേരം നാലിന് വിശുദ്ധ ഗീവര്‍ഗീസിന്‍റെ ചെറിയ രൂപവും വഹിച്ചുകൊണ്ടുള്ള പ്രദക്ഷിണം കുരിശടിയിലേക്ക് നടക്കും. രാത്രി ഒന്‍പതിന് വിശുദ്ധ ഗീവര്‍ഗീസ് സഹദായുടെ അദ്ഭുത തിരുസ്വരൂപം പ്രധാന നടയില്‍ പ്രതിഷ്ഠിക്കുന്നതോടെ തിരുനാള്‍ കാലത്തിനു സമാപനമാവും. എടത്വ പള്ളിയില്‍ ഇന്ന് രാവിലെ 5.30ന് സപ്രാ, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. ജോസഫ് വെമ്പേനിക്കല്‍, 7.30ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. ജോസഫ് പുതുവീട്ടില്‍കളം, 10ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. മാത്യു താന്നിയത്ത്, വൈകിട്ട് നാലിന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. സേവ്യര്‍ വെട്ടിത്താനം, 5.30ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. വര്‍ക്കി മണക്കളം. ഏഴിന് മധ്യസ്ഥപ്രാര്‍ഥന (കുരിശടിയില്‍).

ചെങ്ങന്നൂർ റെയിൽവേ സ്റ്റേഷൻ നവീകരണം ; 98.46 കോടി രൂപയുടെ പദ്ധതിക്ക് അന്തിമ അംഗീകാരം

ചെങ്ങന്നൂർ: റെയിൽവേ സ്റ്റേഷന്‍റെ സമഗ്ര നവീകരണത്തിന് 98.46 കോടി രൂപയുടെ പദ്ധതിക്ക് അന്തിമ അംഗീകാരം ലഭിച്ചതായി കൊടിക്കുന്നിൽ സുരേഷ് എംപി അറിയിച്ചു. നിരവധി തീർഥാടകരുടെയും യാത്രക്കാരുടെയും പ്രധാന ഗതാഗതകേന്ദ്രമായ ചെങ്ങന്നൂരിനെ ആധുനിക സൗകര്യങ്ങളോടെയും ഉയർന്ന നിലവാരത്തോടെയും പ്രാപ്തമാക്കുകയാണ് പദ്ധതിയിലൂടെ ലക്ഷ്യമിടുന്നത്. ശബരിമലയുടെ കവാടം എന്ന നിലയിൽ കേരളത്തിന്‍റെ പാരമ്പര്യ വാസ്തു ശില്പ പാരമ്പര്യം ഉറപ്പാക്കുന്ന തരത്തിലുള്ള രീതിയിലാണ് സ്റ്റേഷന്‍റെ പുനർനിർമാണം. സ്റ്റേഷൻ വികസനത്തിന്‍റെ ഭാഗമായി പുതിയ ടെർമിനൽ ബിൽഡിംഗ്, തീർഥാടന കേന്ദ്രം, ഓഫീസുകൾ, റെയിൽവേ ക്വാർട്ടേഴ്സ് എന്നിവ നിർമിക്കും. ആറു മീറ്റർ വീതിയുള്ള പുതിയ ഫുട് ഓവർ ബ്രിഡ്ജ്, 12 മീറ്റർ വീതിയുള്ള എയർ കോൺകോഴ്‌സ് എന്നിവയും ഒരുക്കും. വാഹനങ്ങൾക്കായി കവർ ചെയ്ത ഡ്രൈവ് വേ, ഓട്ടോ, ടാക്‌സി പ്രവേശനം, തീർഥാടന കാലത്തേക്ക് പ്രത്യേക ബസുകൾക്കുള്ള പ്രവേശന മാർഗം എന്നിവയും ഉണ്ടായിരിക്കും. പുറപ്പെടുന്നവരുടെയും എത്തുന്നവരുടെയും യാത്രാ ദിശകൾ വേർതിരിച്ച് സംവിധാനങ്ങൾ, പ്ലാറ്റ്ഫോമുകളുടെ നവീകരണം, 12 യൂണിറ്റ് റെയിൽവേ ക്വാർട്ടേഴ്സ്, നിലവിലെ രണ്ടു ലിഫ്റ്റുകൾക്ക് പുറമേ 9 ലിഫ്റ്റുകളും നിലവിലെ രണ്ടു എസ്കലേറ്ററുകൾക്ക് പുറമേ ആറ് എസ്കലേറ്ററുകളും സ്ഥാപിക്കും. മണ്ഡലത്തിലെ യാത്രാസൗകര്യങ്ങളുടെ പുരോഗതിക്കായി എടുത്ത നടപടികളുടെ ഭാഗമാണിതെന്നും പദ്ധതിയുടെ കൃത്യമായ പരിഗണനയും സമയബന്ധിതമായ പൂര്‍ത്തീകരണവും ഉറപ്പാക്കുമെന്നും കൊടിക്കുന്നിൽ സുരേഷ് എംപി അറിയിച്ചു. തീർഥാടകരുടെയും നാട്ടുകാരുടെയും സൗകര്യത്തിനായി ഏറെ ക്കാലമായി ആവശ്യപ്പെട്ടിരുന്ന വികസനമാണ് ഇപ്പോള്‍ യാഥാർഥ്യമാകുന്നതെന്നും എംപി കൂട്ടിച്ചേർത്തു.

പത്തിയൂർ പാലത്തിന്‍റെ പുനർനിർമാണം; പാലം പൊളിക്കുന്നതിനുള്ള നടപടി തുടങ്ങി

കായംകുളം: പത്തിയൂർ പാലം പുനർനിർമിക്കുന്നതിനു മുന്നോടിയായി നിലവിലെ പാലം പൊളിക്കുന്നതിനുള്ള നടപടി തുടങ്ങി. കരിപ്പുഴ തോടിനു കുറുകെയാണ് പത്തിയൂർ പാലം നിർമിച്ചിരിക്കുന്നത്. പാലം പൊളിക്കുമ്പോൾ യാത്രക്കാർക്ക് നടന്നുപോകുന്നതിന് സംവിധാനമൊരുക്കുമെന്ന് അധികൃതർ പറഞ്ഞു. ആറുമാസത്തിനുള്ളിൽ പാലം പണി പൂർത്തിയാകുമെന്നാണ് പ്രതീക്ഷിക്കുന്നത്. പാലം നിർമിക്കുന്നതിന് 2.78 കോടി രൂപ അനുവദിച്ചിട്ടുണ്ട്. പാലത്തിന് 27 മീറ്റർ നീളവും രണ്ടുവരി ഗതാഗതത്തിനാവശ്യമായ 7.5 മീറ്റർ കാര്യേജ് വേയും ഇരുവശങ്ങളിൽ നടപ്പാതയുമുൾപ്പെടെ 11 മീറ്ററാണ് ആകെ വീതി. കിഫ്ബി പദ്ധതിയിലുൾപ്പെടുത്തി ഭഗവതിപ്പടി - കരീലക്കുളങ്ങര മല്ലിക്കാട് കടവ് റോഡിന്‍റെ പുനർനിർമാണത്തിന്‍റെ അനുബന്ധമായി പത്തിയൂർപാലം നിർമാണവും ഉൾപ്പെട്ടിരുന്നു. പദ്ധതിക്കായി 20.24 കോടി രൂപയാണ് അനുവദിച്ചിരുന്നത്. ഡിസൈൻ ലഭ്യമാക്കുന്നതിലും യൂട്ടിലിറ്റി ഷിഫ്റ്റിംഗിനുള്ള കാലതാമസവും പാലം നിർമാണം വൈകുന്നതിന് കാരണമായി. തുടർന്ന് റോഡ് നിർമാണപ്രവർത്തനങ്ങൾ പൂർത്തിയായ ശേഷം പാലം നിർമാണത്തിനായി 2.78 കോടി രൂപയുടെ സാങ്കേതികാനുമതി നൽകി പുതിയ കമ്പനിക്ക് കരാർ നൽകുകയായിരുന്നു. കേരള റോഡ് ഫണ്ട് ബോർഡിനാണ് നിർമാണച്ചുമതല. പാലം പൊളിക്കുന്നതിനു മുന്നോടിയായി ഇതുവഴിയുള്ള വാഹനഗതാഗതം നിരോധിച്ചിരിക്കുകയാണ്. കരീലക്കുളങ്ങര ഭാഗത്ത് നിന്ന് ഭഗവതിപ്പടി ഭാഗത്തേക്കു പോകേണ്ട വാഹനങ്ങൾ ചീറ്റാകേരി ജംഗ്ഷനിൽനിന്ന് വലത്തോട്ടുതിരിഞ്ഞ് എരുവ പാലം കയറി ഇടത്തോട്ടുതിരിഞ്ഞ് പത്തിയൂർ ആൽത്തറ വഴി ഭഗവതിപ്പടി ഭാഗത്തേക്കു പോകേണ്ടതാണ്. ഭഗവതിപ്പടി ഭാഗത്തുനിന്ന് കരീലക്കുളങ്ങര ഭാഗത്തേക്കുപോകേണ്ട വാഹനങ്ങളും ഇതേവഴി ഉപയോഗിക്കണം. താത്കാലിക സംവിധാനം ഒരുക്കണം: യൂത്ത് കോൺഗ്രസ് പത്തിയൂർ പാലം പൊളിച്ചുമാറ്റുന്നതിനു മുമ്പ് താത്കാലിക സംവിധാനം ഒരുക്കണമെന്ന് യൂത്ത് കോൺഗ്രസ് ആവശ്യപ്പെട്ടു. സമാന്തരമായി താത്കാലിക പാലം പണിതില്ലെങ്കിൽ ആൾക്കാർ രണ്ടു കിലോമീറ്റർ ചുറ്റിക്കറങ്ങി യാത്ര ചെയ്യേണ്ടിവരും.

വനിതാ ഡോക്ടറുടെ മ്യൂറൽ പെയിന്‍റിംഗുകൾ വേറിട്ട കാഴ്ചയാകുന്നു

അമ്പലപ്പുഴ: വനിതാ ഡോക്ടർ വരച്ച മ്യൂറൽ പെയിന്‍റിംഗുകൾ വേറിട്ട കാഴ്ചയാകുന്നു. അമ്പലപ്പുഴ പടിഞ്ഞാറേ നടയിൽ സൗഗന്ധികം വീട്ടിൽ ഡോ. വി.വേണുഗോപാലിന്‍റെ ഭാര്യ ഡോ. ഉമാ വേണുഗോപാലാണ് മ്യൂറൽ പെയിന്‍റിംഗിൽ വിസ്മയം തീർത്തത്. 10 വർഷമായി ആലപ്പുഴ സതീഷ് വാഴവേലിൽ, സുനിൽ വാക ഗുരുവായൂർ എന്നിവരുടെ ശിക്ഷണത്തിലാണ് ചുവർച്ചിത്ര പഠനം നടത്തുന്നത്. 50 ലേറെ ചിത്രങ്ങൾ വരച്ചിട്ടുണ്ട്. 10ഓളം ചിത്രങ്ങൾ മറ്റുള്ളവർക്ക് സമ്മാനിച്ചിട്ടുണ്ട്. അമ്പലപ്പുഴ ക്ഷേത്രത്തിൽ സമർപ്പിച്ച കാളിയ മർദനം, ഗുരുവായൂരപ്പൻ എന്നീ ചിത്രങ്ങൾ നാടകശാലയിൽ പ്രദർശിപ്പിച്ചു പോരുന്നു. അമ്പലപ്പുഴ കുഞ്ചൻ നമ്പ്യാർ സ്മാരകത്തിന്‍റെ ഉദ്ഘാടനത്തോടനുബന്ധിച്ച് 40ലേറെ ചിത്രങ്ങൾ ഉൾപ്പെടുത്തിയ പ്രദർശനവും സംഘടിപ്പിച്ചിരുന്നു. ശ്രീകൃഷ്ണന്‍റെ പല ഭാവത്തിലുള്ള ചിത്രങ്ങൾ കൂടാതെ അനന്ത ശയനം, ഗണപതി, സരസ്വതി, മഹാലക്ഷ്‌മി, ശിവൻ, ഹനുമാൻ, യേശുക്രിസ്തു, കന്യാമറിയം, മദർ തെരേസ, കഥകളി, തെയ്യം എന്നിവയെല്ലാം ചിത്രരചനയ്ക്കു വിഷയമായിട്ടുണ്ട്. വസ്ത്രങ്ങളിലും ക്ലോക്ക്, ഫ്ലവർ വേസ് എന്നിവയിലും മ്യൂറൽ പെയിന്‍റ് ചെയ്തിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]