പാറക്കെട്ടിനുമേൽ പണിത പള്ളി പാറേൽ പള്ളിയായി : Deepika.com Nattu Visesham

KOTTAYAM

പാറക്കെട്ടിനുമേൽ പണിത പള്ളി പാറേൽ പള്ളിയായി

Friday, December 4, 2020 10:51 PM IST

ചങ്ങനാശേരി: ചങ്ങനാശേരി അതിരൂപതയിലെ മരിയവണക്കത്തിന്‍റെ ഒൗദ്യോഗിക പ്രതീകമാണ് പ്രശസ്തമായ പാറേൽ മരിയൻ തീർഥാടന കേന്ദ്രം. പാറേൽ പള്ളിയിൽ എട്ടിനാണ് അമലോത്ഭവ തിരുനാൾ ആഘോഷിക്കുന്നത്. കോവിഡ് നിബന്ധനകൾ പാലിച്ചാണ് ആഘോഷ പരിപാടികൾ ക്രമീകരിച്ചിരിക്കുന്നത്. ചങ്ങനാശേരി- വാഴൂർ റോഡരുകിൽ കരിന്പാറക്കെട്ടുകളുടെമേൽ പണിയപ്പെട്ട പള്ളിയാണ് പാറേൽ പള്ളി എന്ന പേരിൽ അറിയപ്പെടുന്നത്. 1904 മുതലുള്ള പാരന്പര്യമാണ് പാറേൽപ്പള്ളി തിരുനാളിന്‍റെ ചരിത്രത്താളുകളിലുള്ളത്.

ഒന്പതാം പീയൂസ് മാർപാപ്പാ പരിശുദ്ധ മറിയം അമലോത്ഭവയാണെന്ന വിശ്വാസസത്യം പ്രഖ്യാപിച്ചതിന്‍റെ സ്മരണയ്ക്കായാണ് ചങ്ങനാശേരിയിൽ പാറേൽ കപ്പേള സ്ഥാപിച്ചത്. കപ്പേള സ്ഥാപനത്തിനു മുൻകൈയെടുത്തത് ചങ്ങനാശേരിയുടെ വികസനത്തിനും പുരോഗതിക്കും സേവനം ചെയ്ത മോണ്‍. സിറിയക് കണ്ടങ്കരിയാണ്. കപ്പേള സ്ഥാപിക്കാൻ അദ്ദേഹവും ചെത്തിപ്പുഴ കൊവേന്തയുടെ ശ്രേഷ്ഠനായിരുന്ന ഫാ. എസ്തപ്പാനോസും വിവിധ സ്ഥലങ്ങൾ സന്ദർശിച്ചശേഷമാണ് പാറക്കെട്ടുകളും കുറ്റിക്കാടുകളും നിറഞ്ഞ ഈ സ്ഥലം കണ്ടെത്തിയത്.

1904 ഓഗസ്റ്റ് 26നാണ് കപ്പേള സ്ഥാപനത്തിന് മാർ മാത്യു മാക്കീൽ അനുമതി നൽകിയത്. 1906 ഡിസംബർ ഏഴിന് പള്ളി കൂദാശ ചെയ്യുകയും എട്ടിന് ആദ്യ പെരുന്നാൾ ആഘോഷപൂർവം നടത്തുകയും ചെയ്തു. മാർ മാത്യു മാക്കീൽ ആദ്യമായി പള്ളിയിൽ പൊന്തിഫിക്കൽ തിരുനാൾ കുർബാനയർപ്പിച്ചു. ചെത്തിപ്പുഴ കൊവേന്തയുടെ ശ്രേഷ്ഠൻ എസ്തപ്പാനോസച്ചൻ ഫ്രാൻസിൽനിന്നു കത്തിടപാടുകളിലൂടെ വരുത്തിയ അമലോത്ഭവ മാതാവിന്‍റെ മൂന്ന് രൂപങ്ങളിൽ കലാഭംഗിയിൽ മികവുള്ള രൂപമാണ് പാറേൽ കപ്പേളയിൽ ആദ്യമായി സ്ഥാപിച്ചത്.

ഇപ്പോഴത്തെ ദേവാലയം കൂദാശ ചെയ്തത് 1974 ഡിസംബർ അഞ്ചിനാണ്. 1981 ജൂണ്‍ ഒന്നിനാണ് ഇടവക പദവി ലഭിച്ചത്. പള്ളിയുടെ മുന്പിലുള്ള കുരിശടി 1952ലെ തിരുനാളിനോടനുബന്ധിച്ച് ആർച്ച്ബിഷപ് മാർ മാത്യു കാവുകാട്ടാണ് ആശിർവദിച്ചത്.