വീടില്ലാത്ത ആദിവാസി ഊരുമൂപ്പത്തിക്ക് വിദേശമലയാളികളുടെ സഹായഹസ്തം : Deepika.com Nattu Visesham

KOTTAYAM

വീടില്ലാത്ത ആദിവാസി ഊരുമൂപ്പത്തിക്ക് വിദേശമലയാളികളുടെ സഹായഹസ്തം

Thursday, January 20, 2022 12:35 AM IST

കടുത്തുരുത്തി: വീടില്ലാതെ കഴിഞ്ഞിരുന്ന ആദിവാസി ഊരുമൂപ്പത്തിക്കു വിദേശ മലയാളിയും സുഹൃത്തുക്കളും ചേർന്നു വീട് നിർമിച്ചു നൽകുന്നു. മാഞ്ഞൂർ പഞ്ചായത്തിലെ താമസക്കാരായ ഊരുമൂപ്പത്തി ഉഷാ തന്പിക്കും കുടുംബത്തിനുമാണ് ഓസ്ട്രേലിയൻ മലയാളിയായ കുറുപ്പന്തറ വലിയവീട്ടിൽ ജേക്കബ് ചാക്കോയും സുഹൃത്തുക്കളും ചേർന്നു വീട് നിർമിച്ചു നൽകുന്നത്. 600 ചതുരശ്രയടി വിസ്തീർണമുള്ള വീടിന് ഏഴ് ലക്ഷത്തിൽ അധികം രൂപ ചെലവാകുമെന്നാണ് പ്രതീക്ഷിക്കുന്നത്. രണ്ട് കിടപ്പ് മുറികളും ഹാളും അടുക്കളയും ശുചിമുറിയും അടക്കമുള്ള സൗകര്യങ്ങളോടെയാണ് വീട് നിർമിക്കുന്നത്.

ഓസ്ട്രേലിയൻ സുഹൃത്‌സംഘം എല്ലാവർഷവും ഓരോ വീട് പലയിടങ്ങളിലായി നിർമിച്ചു നൽകുന്നുണ്ട്. ഇതിന്‍റെ ഭാഗമായി ഇക്കുറി നിർമിക്കുന്ന വീടാണ് ഉഷയ്ക്കും കുടുംബത്തിനുമായി നൽകുന്നത്. ഉഷ തന്പിയും ഭർത്താവ് തന്പിയും (ബാബു) രണ്ടു പെണ്‍കുട്ടികൾ ഉൾപ്പെടെ മൂന്ന് മക്കളുമടങ്ങുന്ന കുടുംബം സ്വന്തക്കാരുടെ വീടുകളിൽ മാറി, മാറിയാണ് കഴിഞ്ഞിരുന്നത്. ഇവരുടെ ദുരവസ്ഥ മനസിലാക്കിയാണ് വിദേശ മലയാളി സംഘം സഹായത്തിനെത്തിയത്.

2006 ൽ ചാമക്കാല ചിറപ്പാടം ഏഴുമറ്റം ചിറയിൽ തന്പി മൂന്ന് സെന്‍റ് സ്ഥലം വാങ്ങിയിരുന്നു. ഈ സ്ഥലത്താണ് ഇവർക്കായി വീട് നിർമിക്കുന്നത്. വീടിന്‍റെ കല്ലിടീൽ കർമം ജേക്കബ് വലിയവീട്ടിൽ നിർവഹിച്ചു. ഗോത്ര ആചാരപ്രകാരം നടന്ന പൂജാകർമങ്ങൾക്കു ശേഷമായിരുന്നു കല്ലീടിൽ. ജില്ലാ മൂപ്പനായിരുന്ന കുട്ടപ്പൻ മൂപ്പൻ കർമങ്ങൾക്കു നേതൃത്വം നൽകി. പഞ്ചായത്ത് മെന്പർ ബിനോയി ഇമ്മാനുവലിനെയാണ് വീട് നിർമാണ ചുമതല ജേക്കബ് ചാക്കോ ഏല്പിച്ചിരിക്കുന്നത്. ഏറ്റവും അർഹതപ്പെട്ടവർക്ക് വീട് നൽകണമെന്ന സുഹൃത് സംഘത്തിന്‍റെ കാഴ്ചപ്പാടാണ് ഊരുമൂപ്പത്തിയുടെ തെരഞ്ഞെടുപ്പിന് ഇടയാക്കിയത്. മൂന്ന് മാസത്തിനുള്ളിൽ വീട് നിർമിച്ചു താക്കോൽ കൈമാറുമെന്നും ഇവർ പറഞ്ഞു. പഞ്ചായത്തംഗങ്ങളായ മിനി സാബു, ബിനോയി ഇമ്മാനുവൽ തുടങ്ങിയവർ കല്ലീടിൽ ചടങ്ങിൽ പങ്കെടുത്തു.