കോട്ടയം: ജില്ലാ അത്‌ലറ്റിക് അസോസിയേഷന്‍റെ ആഭിമുഖ്യത്തില്‍ സംഘടിപ്പിക്കുന്ന 65- മത് ജില്ല അത്‌ലറ്റിക് മത്സരങ്ങള്‍ ഇന്നു മുതല്‍ എട്ടു വരെ പാലാ മുനിസിപ്പല്‍ സിന്തറ്റിക് സ്റ്റേഡിയത്തില്‍ നടക്കും.
ഇന്നു രാവിലെ ഏഴിന് 20 കിലോമീറ്റര്‍ നടത്ത മത്സരത്തോടെയാണ് തുടക്കം. ജില്ലയിലെ വിവിധ സ്‌കൂള്‍, കോളജ്, ക്ലബുകളെ പ്രതിനിധീകരിച്ച് 700ലധികം താരങ്ങള്‍ ചാമ്പ്യന്‍ഷിപ്പില്‍ പങ്കെടുക്കും. 14, 16, 18,20 സീനിയര്‍ വനിത പുരുഷ വിഭാഗങ്ങളിലാണ് ചാമ്പ്യന്‍ഷിപ്പ്.
ഇന്നു രാവിലെ നടക്കുന്ന ഉദ്ഘാടന സമ്മേളനത്തില്‍ പാലാ മുനിസിപ്പല്‍ കൗണ്‍സിലറും വിദ്യാഭ്യാസ, കലാ, കായിക സ്റ്റാന്‍ഡിംഗ് കമ്മിറ്റി ചെയര്‍മാനുമായ തോമസ് പീറ്റര്‍ മീറ്റ് ഉദ്ഘാടനം ചെയ്യും.
അസോസിയേഷന്‍ പ്രസിഡന്‍റ് പ്രഫ. പ്രവീണ്‍ തര്യന്‍ അധ്യക്ഷത വഹിക്കും. അല്‍ഫോന്‍സാ കോളജ് പ്രിന്‍സിപ്പല്‍ ഡോ. സിസ്റ്റര്‍ റെജീനമ്മാ ജോസഫ്, കൗണ്‍സിലര്‍മാരായ ഷാജു തുരുത്തന്‍, ബിജി ജോജോ, ബിനു പുളിക്കകണ്ടം, ബൈജു കൊല്ലംപറമ്പില്‍ ബിന്ദു മനു, നീന ജോര്‍ജ് എന്നിവര്‍ പ്രസംഗിക്കും.
മുന്‍ കായിക അധ്യാപകര്‍ ആയിരുന്ന വി.സി. ജോസഫ്, ജോസഫ് മനയാനി, ദ്രോണാചാര്യ കെ. പി. തോമസ്, കെ.പി. സതീഷ് കുമാര്‍, പ്രഫ. നൈനാമ തോമസ്, പ്രഫ. മേഴ്‌സി ജോസഫ്, ഡോ. വി.സി. അലക്‌സ് എന്നിവരെ ചടങ്ങില്‍ ആദരിക്കും. ലഹരി വിരുദ്ധ ദിനാചരണത്തിന്‍റെ ഭാഗമായി കായികതാരങ്ങള്‍ ലഹരി വിരുദ്ധ പ്രതിജ്ഞയെടുക്കും.
ചാമ്പ്യന്മാരാകുന്ന ടീമിന് ജൂണിയര്‍ വിഭാഗത്തിലും സീനിയര്‍ വിഭാഗത്തിലും പ്രത്യേകം ഓവറോള്‍ ട്രോഫികള് സമ്മാനിക്കും. കൂടാതെ ഓരോ വിഭാഗത്തിലും ജേതാക്കള്‍ ആകുന്ന ടീമിനും ട്രോഫികള് സമ്മാനിക്കും.