വെള്ളൂര്: കുടിവെള്ള വിതരണം വെള്ളൂര് പഞ്ചായത്തില് കാര്യക്ഷമമായി നടക്കാത്തതില് പ്രതിഷേധിച്ച് പഞ്ചായത്ത് ഭരണസമിതിയുടെ നേതൃത്വത്തില് വെട്ടിക്കാട്ടുമുക്കിലുള്ള ജല അഥോറിറ്റിയുടെ കുടിവെള്ള വിതരണ ടാങ്കും ഓഫീസും ഉപരോധിച്ചു. വിവിധ വാര്ഡുകളില്പ്പെട്ട വെള്ളൂര് പമ്പ് ഹൗസ്, ചെമ്മഞ്ചി, മടത്തേടം, പള്ളിക്കുന്ന്, ചന്ദ്രാമല, മൂഴിക്കോട്, മൂഴിക്കോട്, അങ്കണവാടി ഭാഗം, കോട്ടപ്പുറം, ഇരട്ടാനിക്കാവ്, കാശാങ്കാല, പാറപ്പുത്തുകാവ് ഭാഗം, നീര്പ്പാറ, തട്ടുമ്പുറം, ആഞ്ഞിലിതറ, സിഎസ്ഐ പള്ളി ഭാഗം എന്നീ പ്രദേശങ്ങളില് കുടിവെള്ളം കിട്ടിയിട്ട് ദിവസങ്ങളായി.
പലവട്ടം പരാതി പറഞ്ഞിട്ടും വെള്ളം കിട്ടുന്നതിനുള്ള നടപടികള് ജല അഥോററ്റി സ്വീകരിക്കാത്തത്തില് പ്രതിഷേധിച്ചായിരുന്നു പഞ്ചായത്ത് പ്രസിഡന്റും അംഗങ്ങളും ഉപരോധ സമരം നടത്തിയത്. വെള്ളൂര്-വെളിയന്നൂര് പദ്ധതിയിലൂടെ വിവിധ പഞ്ചായത്തുകളിലേക്കും ജപ്പാന് കുടിവെള്ള പദ്ധതിയിലൂടെ ആലപ്പുഴ ജില്ലയിലേക്കും കുടിവെള്ള വിതരണം നടക്കുമ്പോള് വെള്ളൂര് പഞ്ചായത്തിന് ആവശ്യമായ പരിഗണന ലഭിക്കുന്നില്ലെന്നാണ് പഞ്ചായത്ത് അംഗങ്ങള് പറയുന്നത്.
സമരത്തെ തുടര്ന്ന് വൈക്കം എഎക്സ്ഇ പി.എ. ബാസ്റ്റിന്, മറ്റ് ഉദ്യോഗസ്ഥര് എന്നിവരുമായി ജനപ്രതിനിധികള് നടത്തിയ ചര്ച്ചയില്, പഞ്ചായത്തിന്റെ ആവശ്യങ്ങള് ഉടന് പരിഹരിക്കും എന്ന രേഖമൂലമുള്ള ഉറപ്പില് സമരം അവസാനിപ്പിച്ചു. പഞചായത്ത് പ്രസിഡന്റ് ആര്. നികിതകുമാര്, വൈസ് പ്രസിഡന്റ് ജയ അനില്, അംഗങ്ങളായ വി.കെ. മഹിളാമണി, ഒ.കെ. ശ്യാംകുമാര്, ലൂക്ക് മാത്യു, കെ.എന്. സോണിക, ശാലിനി മോഹന്, നിയാസ് കോടിയേഴത്ത്, ബേബി പുച്ചൂകണ്ടത്തില് തുടങ്ങിയവര് പങ്കെടുത്തു.