പാലാ: സ്കൗട്ട് ആന്‍ഡ് ഗൈഡ് സംസ്ഥാന ഘടകത്തിന്റെ കീഴില്‍ നടപ്പിലാക്കിവരുന്ന വിഷന്‍ 2021-26 പദ്ധതിയുടെ ഭാഗമായി ഏറ്റുമാനൂര്‍ ലോക്കല്‍ അസോസിയേഷന്‍റെ ആഭിമുഖ്യത്തില്‍ ചേര്‍പ്പുങ്കല്‍ ഹോളിക്രോസ് ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥിനിക്കായി നിര്‍മിച്ച സ്‌നേഹഭവനത്തിന്‍റെ നിര്‍മ്മാണ പ്രവൃത്തികള്‍ പൂര്‍ത്തിയായി. 580 സ്‌ക്വയര്‍ ഫീറ്റിലാണ് വീട് നിര്‍മിച്ചിരിക്കുന്നത്.
സ്വന്തമായി സ്ഥലം ഇല്ലാതിരുന്ന കുടുംബത്തിന് ചേര്‍പ്പുങ്കല്‍ ഹോളിക്രോസ് ഇടവക മൂന്നു സെന്‍റ് സ്ഥലം സൗജന്യമായി നല്‍കുകയായിരുന്നു. ജനപ്രതിനിധികള്‍, വിദ്യാഭ്യാസ വകുപ്പ് മേധാവികള്‍, അധ്യാപകര്‍, വിദ്യാര്‍ഥികള്‍, രക്ഷിതാക്കള്‍,നാട്ടുകാര്‍, വ്യാപാരികള്‍, സ്ഥാപനങ്ങള്‍ തുടങ്ങി സമൂഹത്തിന്‍റെ നാനാ തുറയിലുള്ളവര്‍ വീട് നിർമാണത്തിൽ പങ്കാളികളായി.
നാളെ രാവിലെ 10.30ന് ഏറ്റുമാനൂര്‍ ലോക്കല്‍ അസോസിയേഷന്‍ പ്രസിഡന്‍റ് ലൗലി ജോര്‍ജ് അധ്യക്ഷത വഹിക്കുന്ന യോഗത്തില്‍ കിടങ്ങൂര്‍ ഗ്രാമപഞ്ചായത്ത് പ്രസിഡന്‍റ് ബോബിച്ചന്‍ സ്‌നേഹഭവനം സമര്‍പ്പിക്കും. ജില്ലാ വിദ്യാഭ്യാസ ഓഫീസര്‍ കെ. ജയശ്രീ മുഖ്യപ്രഭാഷണം നടത്തും. ജില്ലാ പഞ്ചായത്ത് മെംബര്‍ ജോസ്‌മോന്‍ മുണ്ടക്കല്‍, പഞ്ചായത്ത് മെംബര്‍ ഇ.എം. ബിനു, ഉപജില്ലാ വിദ്യാഭ്യാസ ഓഫീസര്‍ ശ്രീജ പി. ഗോപാല്‍, സ്‌കൂള്‍ പ്രിന്‍സിപ്പൽ ഡോ. ബെല്ലാ ജോസഫ്, ഹെഡ്മാസ്റ്റര്‍ ജോജി തോമസ്, പിടിഎ പ്രസിഡന്‍റ് ടെഡി ജോര്‍ജ്, സ്കൗട്ട് ആന്‍ഡ് ഗൈഡ് ജില്ലാ കമ്മീഷണര്‍ പി.ജെ. സിബി, ജില്ലാ സെക്രട്ടറി ടി.യു. ജോബി, ഏറ്റുമാനൂര്‍ ലോക്കല്‍ അസോസിയേഷന്‍ സെക്രട്ടറി സിസ്റ്റര്‍ ട്രീസ മരിയ, ജില്ലാ ട്രെയിനിംഗ കമ്മീഷണര്‍ വിന്‍സ് ടോം എന്നിവര്‍ പ്രസംഗിക്കും.