തീക്കോയി: തീക്കോയി പഞ്ചായത്ത് 2023-24 വാർഷിക പദ്ധതിക്ക് ജില്ലാ ആസൂത്രണസമിതി അംഗീകാരം നൽകി. 6,57,86,123 രൂപ അടങ്കൽ തുക വരുന്ന 120 പ്രോജക്‌ടുകൾക്കാണ് അംഗീകാരം നൽകിയത്.
ഉത്പാദന മേഖലയ്ക്ക് 47,33,275 രൂപയും സേവന മേഖലയ്ക്ക് 3,39,20,336 രൂപയും പശ്ചാത്തല മേഖലയ്ക്ക് 1,54,68,512 രൂപയുടെയും പദ്ധതികളാണ് വിഭാവനം ചെയ്തിരിക്കുന്നത്. ലൈഫ് ഭവന പദ്ധതിക്കായി 25,50,640 രൂപ വകയിരുത്തി.
ആരോഗ്യ മേഖലയിൽ പാലിയേറ്റീവ് കെയർ, അതിദരിദ്രർക്ക് മൈക്രോപ്ലാൻ, ആർദ്രം, ആയുർവേദം-ഹോമിയോ- പിഎച്ച്സി മരുന്നുവാങ്ങൽ, വാതിൽപ്പടി സേവനം, സമഗ്ര ആരോഗ്യം തുടങ്ങിയവയാണ് പദ്ധതികൾ. അങ്കണവാടി പോഷകാഹാരം, അങ്കണവാടി ഹോണറേറിയം, ജാഗ്രത സമിതി, ഭിന്നശേഷി സ്കോളർഷിപ്പ്, ഭിന്നശേഷി കലോത്സവം, വയോജനങ്ങൾക്ക് കട്ടിൽ തുടങ്ങിയ പദ്ധതികളും പട്ടികജാതി-പട്ടികവർഗ ഉപപദ്ധതി പ്രകാരം1,16,64,000 രൂപയുടെ 10 പദ്ധതികളും ഉണ്ട്. 34 ഗ്രാമീണ റോഡുകളുടെ പുനരുദ്ധാരണത്തിന് 1,25,23,992 രൂപയാണ് വകയിരുത്തിയിരിക്കുന്നത്.
വിവിധ സ്ഥാപനങ്ങളുടെ മെയിന്‍റനൻസിന് 32,03,000 രൂപയുടെയും ശുചിത്വം - കുടിവെള്ളം മേഖലയിൽ കിണറുകളുടെ നവീകരണം, പൊതു കുടിവെള്ള പദ്ധതികൾ, ഹരിത ചെക്ക് പോസ്റ്റ്, ബയോബിൻ, സ്മാർട്ട് ഗാർബേജ് മോണിറ്ററിംഗ് സിസ്റ്റം, ശൗചാലയ നവീകരണം, പൊതുകുളങ്ങൾ, കിണറുകൾ എന്നിവയുടെ അറ്റകുറ്റപ്പണി, ടേക്ക് എ ബ്രേക്ക്, ഹരിതകർമസേനയുടെ പ്രവർത്തനങ്ങൾ, കുടിവെള്ള ടാങ്കുകൾ, നിരീക്ഷണ കാമറകൾ സ്ഥാപിക്കൽ, അതിദരിദ്രർക്ക് ഭക്ഷണക്കിറ്റ്, വീട് വാസയോഗ്യമാക്കൽ, ആശ്രയ പദ്ധതി തുടങ്ങിയ പദ്ധതികളുമാണുള്ളത്. ഏപ്രിൽ ആദ്യം തന്നെ പദ്ധതി നിർവഹണം ആരംഭിക്കുമെന്നും നടപ്പുവർഷം നൂറു ശതമാനം പദ്ധതിത്തുകയും ചെലവഴിക്കുമെന്നും പ്രസിഡന്‍റ് കെ.സി. ജയിംസ് അറിയിച്ചു.