ADVERTISEMENT

ADVERTISEMENT

ദാഹജലം ഒരുക്കാൻ റസിഡന്‍റ്സ് അസോസിയേഷനുകൾ സഹകരിക്കണമെന്ന് ജില്ലാ കളക്ടർ

കോട്ടയം: കൊടുംവരൾച്ചയിൽ പൊതുജനങ്ങൾക്കും പക്ഷികൾക്കും ദാഹജലമൊരുക്കാൻ ജില്ലയിലെ റസിഡന്‍റ്സ് അസോസിയേഷനുകൾ സഹകരിക്കണമെന്ന് കളക്ടർ വി. വിഗ്നേശ്വരി ആവശ്യപ്പെട്ടു.

കളക്ടറേറ്റ് കോൺഫറൻസ് ഹാളിൽ വിളിച്ചുകൂട്ടിയ ജില്ലാ റസിഡന്‍റ്സ് അസോസിയേഷൻ പ്രതിനിധികളോടാണ് കളക്ടർ ഈ ആവശ്യം ഉന്നയിച്ചത്. പൊതുസ്ഥലങ്ങളിൽ തണ്ണീർപ്പന്തൽ ഒരുക്കുന്നതും ആലോചിക്കണം.

വിദ്യാഭ്യാസ സ്ഥാപനങ്ങളിലും ആശുപത്രികളിലും വോൾ ഓഫ് ലൗ പദ്ധതി ഒരുക്കാനും അടുത്ത പാർലമെന്‍റ് തെരഞ്ഞെടുപ്പിൽ പരമാവധി ആളുകളെ വോട്ടു ചെയ്യിപ്പിക്കാൻ ശ്രമിക്കണമെന്നും ഏറ്റവും കൂടുതൽ വോട്ടു ചെയ്യിപ്പിക്കുന്ന റസിഡന്‍റ്സ് അസോസിയേഷന് സമ്മാനം നൽകുമെന്നും കളക്ടർ അറിയിച്ചു. ജില്ലാ അപ്പക്സ് കൗൺസിൽ പ്രസിഡന്‍റ് കെ.എം. രാധാകൃഷ്ണപിള്ള അധ്യക്ഷത വഹിച്ചു.-

ADVERTISEMENT

ദുക്റാന തിരുനാൾ ഭക്തിനിർഭരമായി

ചെമ്പ്: വൈക്കം ചെമ്പ് സെന്‍റ് തോമസ് കത്തോലിക്ക പളളിയിലും സെന്‍റ് തോമസ് യാക്കോബായപള്ളികളിലേയും ദുഖ്റാന തിരുനാൾ ആഘോഷം ഭക്തിനിർഭരമായി. ഇരു ദേവാലയങ്ങളിലും വിശുദ്ധന്‍റെ അനുഗ്രഹം തേടി തിരുനാൾ കുർബാനയിലും പ്രദക്ഷിണത്തിലും നൂറുക ണക്കിനാളുകൾ പങ്കെടുത്തു. കുരിശടികളിലേക്കു നടന്ന പ്രദക്ഷിണത്തിന് വർണക്കുടകൾ , വാദ്യഘോഷം എന്നിവ മിഴിവേകി.വിശുദ്ധന്‍റെ തിരുസ്വരൂപത്തിൽ പുഷ്പവൃഷ്ടി നടത്തിയും മെഴുകുതിരി തെളിച്ചും നേർച്ചകൾ സമർപിച്ചും വിശ്വാസികൾ അനുഗ്രഹം തേടി. തിരുനാളിനോടനുബന്ധച്ചു നടന്ന നേർച്ചസദ്യയിലും നൂറുകണക്കിനു വിശ്വാസികൾ പങ്കെടുത്തു. സെന്‍റ് തോമസ് കത്തോലിക്ക പള്ളിയിൽ തിരുക്കർമങ്ങൾക്ക് വികാരി ഫാ. ഹോർമിസ് തോട്ടക്കര,സഹവികാരി ഫാ. ഷൈജുആട്ടോക്കാരൻ സിഎംഐഎന്നിവർ കാർമികത്വം വഹിച്ചു. സെന്‍റ് തോമസ് യാക്കോബായ പള്ളിയിൽ വികാരി ഫാ.ജോയി ആനക്കുഴി, ഫാ. പോൾ തോട്ടയ്ക്കാട്ട്, റവ.ഡോ. മാത്യൂസ് മോർ ഇവാനിയോസ്, ട്രസ്റ്റി കുര്യാക്കോസ് പാലത്തിങ്കൽ, സെക്രട്ടറി ഇ.എം.സാബു തുടങ്ങിയവർ നേതൃത്വം നൽകി.

കല്ലറയില്‍ വിരിപ്പുകൃഷി ഉപേക്ഷിക്കേണ്ടിവരുമോ?

കടുത്തുരുത്തി: തുടര്‍ച്ചയായ മഴയും വെള്ളക്കെട്ടും കല്ലറയില്‍ ഈ വര്‍ഷത്തെ വിരിപ്പ് (വര്‍ഷ) കൃഷി ആരംഭിക്കാന്‍ വൈകും. പാടശേഖരത്തെ വെള്ളം വറ്റാത്തതിനാല്‍ വിത്ത് വിതയ്ക്കാൻ നിലം ഒരുക്കുന്നതുള്‍പ്പെടെയുള്ള അടിസ്ഥാന സൗകര്യങ്ങള്‍ ഉറപ്പാക്കുന്നതിനുള്ള തടസമാണ് കൃഷി വൈകാന്‍ കാരണമാകുന്നത്. ജൂണ്‍ പകുതിയോടെ വിത തുടങ്ങണമെന്നായിരുന്നു കര്‍ഷകരുടെയും കൃഷിവകുപ്പ് ഉദ്യോഗസ്ഥരുടെയും തീരുമാനം. കാലാവസ്ഥയില്‍ വന്ന മാറ്റം കര്‍ഷകരുടെ കണക്കുകൂട്ടലാകെ താളം തെറ്റിച്ച അവസ്ഥയാണ്. ഇരുപ തിലധികം പാടങ്ങളിലായി 685 ഹെക്ടറിലാണ് ഈ വര്‍ഷം വിരിപ്പുകൃഷി ചെയ്യാൻ തീരുമാനിച്ചിരുന്നത്. വിരിപ്പുകൃഷി ചെയ്യുന്ന പാടശേഖരങ്ങളിലധികവും മുണ്ടാര്‍ മേഖലയിലാണ്. ചില പാടശേഖരങ്ങളില്‍ വിരിപ്പുകൃഷിക്കുള്ള ഒരുക്കങ്ങളെല്ലാം നടന്നിരുന്നതാണ്. ഇതിനിടെയാണ് കഴിഞ്ഞ മേയ് 26ന് മഴ തുടങ്ങിയത്. ഇതോടെ കരിയാറും കെവി കനാലും ഉള്‍പ്പെടെയുള്ള പുഴകളും തോടുകളും കരകവിഞ്ഞു. പല പാടശേഖരങ്ങളിലും ബണ്ട് കവിഞ്ഞ് വെള്ളം കയറി. മുണ്ടാര്‍ ഒന്നാം ബ്ലോക്ക്, പുലയ കോളനി, കങ്ങള-രണ്ട് എന്നീ പാടശേഖരങ്ങളില്‍ പെട്ടിയും പറയും തള്ളിപ്പോയതോടെ പാടങ്ങള്‍ വെള്ളത്തില്‍ മുങ്ങി. കോലത്തുകരി-വലിയകരി, ആനച്ചാംകുഴി, തട്ടാപറമ്പ് തെക്ക്, കങ്ങഴ-എട്ട് എന്നിങ്ങനെ നിരവധി പാടശേഖരങ്ങളില്‍ മടവീഴ്ചയുണ്ടായി. വെള്ളം കുറഞ്ഞാല്‍ മാത്രമേ പാടശേഖരത്തെ മോട്ടോറുകള്‍ പ്രവര്‍ത്തിപ്പിക്കാനാകൂവെന്നാണ് കര്‍ഷകര്‍ പറയുന്നത്. ഉയരമുള്ള ശക്തമായ പുറംബണ്ടുകള്‍ ഇല്ലാത്തതാണ് കര്‍ഷകര്‍ നേരിടുന്ന മറ്റൊരു പ്രതിസന്ധി. പരിഹാരം കാണണം തോടുകളെല്ലാം പോളയും പായലും വളര്‍ന്ന് അടഞ്ഞുകിടക്കുകയാണ്. ഇത് തെളിക്കാത്തതുമൂലം വെള്ളം കായലിലേക്ക് ഒഴുകിപ്പോകാന്‍ മാര്‍ഗമില്ല. കാര്‍ഷിക മേഖലയെ ആശ്രയിച്ചു ജീവിക്കുന്നവരാണിവിടുത്തെ ജനങ്ങള്‍. കൃഷി മുടങ്ങിയാല്‍ കര്‍ഷകരുടെ ഉപജീവനമാര്‍ഗമാണ് ഇല്ലാതാവുന്നത്. സര്‍ക്കാരും കൃഷി വകുപ്പും അടിയന്തരമായി ഇടപെട്ടില്ലെങ്കില്‍ വിരിപ്പുകൃഷി ഉപേക്ഷിക്കേണ്ട അവസ്ഥയാണുള്ളതെന്ന് മുണ്ടാര്‍ പറമ്പന്‍കരി പാടശേഖരത്തിലെ കര്‍ഷകനായ സലി കാക്കത്തുരുത്തേല്‍ പറഞ്ഞു.

തെരുവുനായ ആക്രമണം: രണ്ടുപേർക്ക് കടിയേറ്റു

കടുത്തുരുത്തി: ആപ്പാഞ്ചിറ പോളിടെക്‌നിക്ക് കോളജിനു സമീപം തെരുവുനായയുടെ ആക്രമണം. പോളിടെക്‌നിക്ക് ജീവനക്കാരനും മുക്കം സ്വദേശിക്കുമാണ് നായയുടെ കടിയേറ്റത്. ഇന്നലെ വൈകുന്നേരം ആറോടെയാണ് സംഭവം. പോളിടെക്നിക്ക് കോളജിനു സമീപത്ത് നില്‍ക്കുകയായിരുന്ന സെക്യൂരിറ്റി ജീവനക്കാരനെ കടിച്ച നായ സമീപത്തു നിന്ന പടിഞ്ഞാറേമുക്ക് തങ്കപ്പ (70) നെയും കടിക്കുകയായിരുന്നുവെന്ന് ദൃക്‌സാഷികള്‍ പറഞ്ഞു. തുടര്‍ന്ന് ഇവിടെനിന്ന് ഓടിപ്പോയ നായ വഴിയിലുണ്ടായിരുന്ന മറ്റു നായ്ക്കളെയും കടിച്ചതായി പറയുന്നു. നായയെ കണ്ടെത്താനായിട്ടില്ല. ഈ ഭാഗത്ത് തെരുവ് നായശല്യം രൂക്ഷമാണെന്ന് നാട്ടുകാര്‍ പറയുന്നു. കടിയേറ്റ ഇരുവരും വൈക്കം താലൂക്ക് ആശുപത്രിയില്‍ ചികിത്സ തേടി.

കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളിയില്‍ ദുക്റാന തിരുനാള്‍ ആഘോഷിച്ചു

കടുത്തുരുത്തി: കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളിയില്‍ ദുക്റാന തിരുനാള്‍ ആഘോഷിച്ചു. ഭാരതസഭയുടെ പിതാവായ വിശുദ്ധന്‍റെ ഓര്‍മദിനം സഭാദിനമായിട്ടാണ് ആചരിക്കുന്നത്. ഇന്നലെ രാവിലെ നടന്ന വിശുദ്ധ കുര്‍ബാനയ്ക്കു ഫൊറോനാ വികാരി ഫാ. മാത്യു ചന്ദ്രന്‍കുന്നേല്‍ കാര്‍മികത്വം വഹിച്ചു സന്ദേശം നല്‍കി. വിശുദ്ധ കുര്‍ബാനയെത്തുടര്‍ന്ന് വിശുദ്ധന്‍റെ തിരുസ്വരൂപവും വഹിച്ചുക്കൊണ്ടു നടന്ന പ്രദക്ഷിണത്തില്‍ നൂറുകണക്കിന് വിശ്വാസികള്‍ പങ്കെടുത്തു. തിരുനാള്‍ റാസയ്ക്കു സഹവികാരി ഫാ.ജോണ്‍ നടുത്തടം കാര്‍മികത്വം വഹിച്ചു. സഹവികാരി ഫാ.ഏബ്രഹാം പെരിയപ്പുറം സന്ദേശം നല്‍കി.

വനമഹോത്സവം സംസ്ഥാനതല ഉദ്ഘാടനം നിർവഹിച്ചു

കോട്ടയം: കേരളത്തില്‍ വനവിസ്തൃതി വര്‍ധിപ്പിക്കുക എന്നത് സാധ്യമല്ലെങ്കിലും ട്രീ ബാങ്കിംഗ് പോലുള്ള പദ്ധതികളിലൂടെ മരം നടാനുള്ള പ്രേരണ ഉണര്‍ത്തി മരങ്ങളെ മനുഷ്യന്‍റെ മിത്രങ്ങളാക്കണമെന്ന് മന്ത്രി എ.കെ. ശശീന്ദ്രന്‍. കോട്ടയം സിഎംഎസ് കോളജില്‍ വനം-വന്യജീവി വകുപ്പ് സംഘടിപ്പിച്ച വനമഹോത്സവം 2025ന്‍റെ സംസ്ഥാനതല ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു അദ്ദേഹം. അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ ആന്‍ഡ് ഹെഡ് ഓഫ് ഫോറസ്റ്റ് ഫോഴ്സ് ഡോ. പി. പുകഴേന്തി അധ്യക്ഷത വഹിച്ചു. വനംവകുപ്പ് നടപ്പാക്കുന്ന ട്രീ ബാങ്കിംഗ് പദ്ധതിയുടെ സംസ്ഥാനതല ഉദ്ഘാടനം പദ്ധതിയുടെ അഞ്ചു ഗുണഭോക്താക്കള്‍ക്ക് ചന്ദനത്തൈ വിതരണം ചെയ്തു മന്ത്രി നിര്‍വഹിച്ചു. ഇക്കോ - ടൂറിസം വെബ്സൈറ്റ് ഉദ്ഘാടനം, മറയൂര്‍ ചന്ദന സംരക്ഷണ പ്രവര്‍ത്തനങ്ങള്‍ സംബന്ധിച്ച മിസ്റ്റിക് മറയൂര്‍ എന്ന ഡോക്യുമെന്‍ററിയുടെ പ്രകാശനം എന്നിവയും നടന്നു.

‘ഫാ. ഗ്രിഗറി പരുവപ്പറമ്പില്‍ സഭയ്ക്കും സമൂഹത്തിനും വെളിച്ചം പകര്‍ന്ന കര്‍മയോഗി’

ചങ്ങനാശേരി: സഭയ്ക്കും സമൂഹത്തിനും വെളിച്ചം പകര്‍ന്നു കടന്നുപോയ കര്‍മയോഗിയായിരുന്നു ഫാ. ഗ്രിഗറി പരുവപ്പറമ്പിലെന്ന് അതിരൂപത വികാരിജനറാൾ മോണ്‍. മാത്യു ചങ്ങങ്കേരി. ചെത്തിപ്പുഴ സെന്‍റ് തോമസ് നഴ്‌സിംഗ് കോളജ് സ്ഥാപക ഡയറക്ടറും അതിരൂപത പ്രൊക്യുറേറ്ററുമായിരുന്ന ഫാ. പരുവപ്പറമ്പില്‍ അനുസ്മരണ സമ്മേളനവും സംസ്ഥാനതല ക്വിസ് മത്സരവും ഉദ്ഘാടനം ചെയ്യുകയായിരുന്നു വികാരി ജനറാള്‍. കേരളത്തിലെ നഴ്‌സിംഗ് വിദ്യാഭ്യാസ രംഗത്തും അതിരൂപതയ്ക്കും അദ്ദേഹത്തിന്‍റെ സേവനങ്ങള്‍ അവിസ്മരണീയമാണെന്നും അദ്ദേഹം കൂട്ടിച്ചേര്‍ത്തു. കോളജ് എക്‌സിക്യുട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷനായിരുന്നു. അസിസ്റ്റന്‍റ് ഡയറക്ടര്‍ ഫാ. ജേക്കബ് അത്തിക്കളം, പ്രിന്‍സിപ്പല്‍ പ്രഫ.ഡോ. ഷൈല ഐപ്പ് വര്‍ഗീസ്, ഫൗണ്ടേഷന്‍ സെക്രട്ടറി ജസ്റ്റിന്‍ ബ്രൂസ്, ഫിലിപ്പ് പരുവപ്പറമ്പില്‍, ജറില്‍ ചെറിയാന്‍, വൈസ് പ്രിന്‍സിപ്പല്‍ ഷേര്‍ളി സെബാസ്റ്റ്യന്‍, ജോമോള്‍ സ്‌ക്കറിയ എന്നിവര്‍ പ്രസംഗിച്ചു. ഫാ. പരുവപ്പറമ്പില്‍ ഫൗണ്ടേഷന്‍ മെമ്മോറിയല്‍ സംസ്ഥാന തല ക്വിസ് മത്സരത്തില്‍ ഒന്നും രണ്ടും മൂന്നും സ്ഥാനങ്ങള്‍ നേടിയവര്‍. ഗവൺമെന്‍റ് കോളജ് ഓഫ് നഴ്‌സിംഗ് തിരുവനന്തപുരം, ഹോളിഫാമിലി കോളജ് ഓഫ് നഴ്‌സിംഗ് മുതലക്കോടം, ലൂര്‍ദ് കോളജ് ഓഫ് നഴ്‌സിംഗ് എറണാകുളം.

ക്ഷീരവികസന വകുപ്പിന്‍റെ വിവിധ പദ്ധതികൾ നടപ്പാക്കാൻ അപേക്ഷ ക്ഷണിച്ചു

കോട്ടയം: ക്ഷീര വികസന വകുപ്പിന്‍റെ 2025-26 സാമ്പത്തിക വര്‍ഷത്തിലെ വിവിധ പദ്ധതികള്‍ നടപ്പാക്കാന്‍ താത്പര്യമുള്ളവരില്‍നിന്ന് ഓണ്‍ലൈനായി അപേക്ഷ ക്ഷണിച്ചു. 20 വരെ ക്ഷീര വികസന വകുപ്പിന്‍റെ www.kshee rasree.kerala.gov.in എന്ന പോര്‍ട്ടല്‍ മുഖേന രജിസ്റ്റര്‍ ചെയ്ത് അപേക്ഷിക്കാം. പുല്‍കൃഷി വികസനം, മില്‍ക്ക് ഷെഡ് വികസനം, ഡയറി ഫാം ശുചിത്വം മെച്ചപ്പെടുത്തുന്നതിനുള്ള പദ്ധതി തുടങ്ങിയവയ്ക്ക് ഇപ്പോള്‍ അപേക്ഷിക്കാം. 20 സെന്‍റിന് മുകളിലേക്കുള്ള പുല്‍കൃഷി, തരിശുഭൂമിയിലുള്ള പുല്‍കൃഷി, ചോളകൃഷി പദ്ധതികളും, പുല്‍കൃഷിക്ക് വേണ്ടിയുള്ള യന്ത്രവത്കരണ ധനസഹായം, ജലസേചന ധനസഹായം എന്നിവയും ഉള്‍പ്പെടുന്നതാണ് പുല്‍കൃഷി വികസന പദ്ധതി. ഡയറി ഫാമുകളുടെ ആധുനികവത്കരണവും യന്ത്രവത്കരണവും കയര്‍-മത്സ്യബന്ധന മേഖലകള്‍ക്കായുള്ള പ്രത്യേക പുനരധിവാസ പദ്ധതി, പശു യൂണിറ്റ് പദ്ധതികള്‍, യുവജനങ്ങള്‍ക്കായി 10 പശു അടങ്ങുന്ന സ്മാര്‍ട്ട് ഡയറി ഫാം പദ്ധതി, കറവയന്ത്രം വാങ്ങിക്കുന്നതിനുള്ള ധനസഹായം, തൊഴുത്ത് നിര്‍മാണ ധനസഹായം എന്നിവ ഉള്‍പ്പെടുന്ന മില്‍ക്ക് ഷെഡ് വികസന പദ്ധതികള്‍ക്കും ഡയറി ഫാമിന്‍റെ ശുചിത്വം മെച്ചപ്പെടുത്തുന്നതിനായുള്ള പദ്ധതികള്‍ക്കും ksheerasree.kerala.gov.in എന്ന പോര്‍ട്ടലിലൂടെ അപേക്ഷിക്കാം. കൂടുതല്‍ വിവരങ്ങള്‍ക്ക് ബ്ലോക്ക് തലത്തില്‍ പ്രവര്‍ത്തിക്കുന്ന ക്ഷീരവികസന യൂണിറ്റുമായി ബന്ധപ്പെടണമെന്ന് ക്ഷീരവികസന വകുപ്പ് ഡയറക്ടര്‍ അറിയിച്ചു.

റോഡിലെ കട്ടിംഗ് ഭീഷണിയായി

പള്ളിക്കത്തോട്: റോഡിലെ ടാറിംഗിന്‍റെ കട്ടിംഗ് കാൽനടയാത്രക്കാർക്കും ഇരുചക്ര വാഹനയാത്രികർക്കും ഭീഷണിയാകുന്നു. പള്ളിക്കത്തോട് ടൗണിൽ കോട്ടയം റോഡിലാണ് ടാറിംഗ് അരികിലെ കട്ടിംഗ് ഭീഷണിയായി മാറിയിരിക്കുന്നത്. റീ ടാറിംഗ് കഴിഞ്ഞപ്പോൾ ഒരടിയോളം റോഡ് ഉയർന്നതാണ് പ്രശ്നമായത്. കുഴി കോൺക്രീറ്റ് ചെയ്യാതെ മണ്ണിട്ടു നികത്തിയത് മഴ ആരംഭിച്ചതോടെ വെള്ളമൊഴുകി മണ്ണൊലിച്ചു പോയി. ഇപ്പോൾ മിറ്റിലിളികി കുഴിഞ്ഞു കിടക്കുന്ന ഇവിടെ സ്ത്രീകളും പ്രായമായവരും കുട്ടികളും ഉൾപ്പെടെയുള്ളവർ വീണു പരിക്കേൽക്കുന്നത് പതിവായിരിക്കുകയാണ്. ഇരുചക്ര വാഹനയാത്രികരും അപകടത്തിൽപ്പെടുന്നു. പിഡബ്ല്യുഡി അധികൃതരും പഞ്ചായത്തും പ്രശ്നപരിഹാരത്തിനായി ഇടപെടണമെന്നും അപകടാവസ്ഥ ഒഴിവാക്കണമെന്നും കേരള കോൺഗ്രസ് മണ്ഡലം കമ്മിറ്റി യോഗം ആവശ്യപ്പെട്ടു. അടിയന്തര പരിഹാരം ഉണ്ടാകുന്നില്ലെങ്കിൽ ശക്തമായ പ്രതിഷേധ സമരം സംഘടിപ്പിക്കുമെന്ന് മണ്ഡലം പ്രസിഡന്‍റ് സജി ആക്കിമാട്ടേൽ പറഞ്ഞു. റോയപ്പൻ കരിപ്പാപറമ്പിൽ, ജോസ് തയ്യിൽ, മനോജ് തുടങ്ങിയവർ പ്രസംഗിച്ചു.

ചാര്‍ട്ടേഡ് അക്കൗണ്ടന്‍റ്സ് ദിനം ആഘോഷിച്ചു

കോട്ടയം: ഇന്‍സ്റ്റിറ്റ്യൂട്ട് ഓഫ് ചാര്‍ട്ടേഡ് അക്കൗണ്ടന്‍റ്സ് ഓഫ് ഇന്ത്യയുടെ കോട്ടയം ബ്രാഞ്ചില്‍ ചാര്‍ട്ടേഡ് അക്കൗണ്ടന്‍റ്സ് ദിനം ആഘോഷിച്ചു. തോമസ് ചാഴികാടന്‍ ഉദ്ഘാടനം ചെയ്തു. ഇന്‍സ്റ്റിറ്റ്യൂട്ടിന്‍റെ സാമൂഹിക ഉത്തരവാദിത്വ പ്രവര്‍ത്തനങ്ങള്‍ കെ. സുരേഷ് കുറുപ്പ് ഉദ്ഘാടനം ചെയ്തു. ഫാ. അലക്സ് പ്രായിക്കളം സിഎംഐ, തിരക്കഥാകൃത്ത് സഞ്ജയ് ചെറിയാന്‍, എന്‍. രമ്യ, എബ്രാഹാം കെ. തോമസ്, വിജു ചാക്കോ എന്നിവര്‍ പ്രസംഗിച്ചു.

നിലമ്പൂര്‍ റോഡ് കോട്ടയം എക്‌സ്പ്രസ് : പുനലൂരിലേക്ക് നീട്ടിയേക്കും

വേളാങ്കണ്ണി ട്രെയിന്‍ എല്ലാ ദിവസവും സര്‍വീസ് നടത്താന്‍ സാധ്യത ചങ്ങനാശേരി: മലബാറില്‍നിന്നും മധ്യകേരളത്തിലേക്ക് ഏറ്റവും അധികം യാത്രക്കാര്‍ ഉപയോഗപ്പെടുത്തുന്ന നിലമ്പൂര്‍ റോഡ് കോട്ടയം എക്‌സ്പ്രസ് കൊല്ലം വഴി പുനലൂരിലേക്ക് സര്‍വീസ് നീട്ടണമെന്ന് കൊടിക്കുന്നില്‍ സുരേഷ് എംപി കേന്ദ്ര റെയില്‍വേ മന്ത്രി അശ്വിനി വൈഷ്ണവിനെയും റെയില്‍വേ ബോര്‍ഡ് ഓപ്പറേഷന്‍ ഡയറക്ടറെയും നേരില്‍ക്കണ്ട് ആവശ്യപ്പെട്ടു. ഈ ട്രെയില്‍ ആരംഭിച്ചാല്‍ ഈ വഴി രാത്രികാലങ്ങളില്‍ ട്രെയിനില്ലെന്നുള്ള പ്രശ്‌നത്തിനു പരിഹാരമാകും. ട്രെയിന്‍ പുനലൂരിലേക്ക് നീട്ടുന്നതിനെ സംബന്ധിച്ചുള്ള റിപ്പോര്‍ട്ട് റെയില്‍വേ ബോര്‍ഡില്‍ നിന്നും ദക്ഷിണ റെയില്‍വേയോട് ആവശ്യപ്പെട്ടിട്ടുണ്ട്. അതോടൊപ്പം രാത്രിയില്‍ ഈ റൂട്ടില്‍ ഏര്‍പ്പെടുത്തുന്ന ഫിക്‌സഡ് ടൈം കോറിഡോര്‍ ബ്ലോക്ക് നിലമ്പൂര്‍ റോഡ് കോട്ടയം എക്‌സ്പ്രസ് പുനലൂരിലേക്ക് നീട്ടുന്നതിന് ആവശ്യമായ തരത്തില്‍ ക്രമീകരിക്കുവാനും നിര്‍ദേശം നല്‍കിയിട്ടുണ്ട്. വേളാങ്കണ്ണി ട്രെയിന്‍ എല്ലാദിവസവും നിലവില്‍ ആഴ്ചയില്‍ രണ്ട് ദിവസം സര്‍വീസ് നടത്തുന്ന എറണാകുളം-വേളാങ്കണ്ണി എക്‌സ്പ്രസ് ആഴ്ചയില്‍ എല്ലാ ദിവസവും സര്‍വീസ് നടത്തുന്ന തരത്തില്‍ ഡെയ്‌ലി എക്‌സ്പ്രസായി മാറ്റണമെന്ന ആവശ്യത്തിലും റെയില്‍വേ മന്ത്രിയുടെ ഭാഗത്തുനിന്നും അനുകൂല നിലപാടാണെന്ന് എംപി പറഞ്ഞു. നേരത്തെ ഇതു സംബന്ധിച്ച് നിവേദനം നല്‍കിയിരുന്നതായും എംപി പറഞ്ഞു. നിലവില്‍ ഉപയോഗിച്ചുകൊണ്ടിരുന്ന റേക്ക് കാലപ്പഴക്കം മൂലം യാത്രക്കാര്‍ക്ക് ബുദ്ധിമുട്ടുണ്ടാക്കിയിരുന്നതിനാല്‍ ആധുനിക എല്‍എച്ച്ബി കോച്ചുകള്‍ അനുവദിക്കണമെന്നാവശ്യപ്പെട്ടതിന്‍റെ അടിസ്ഥാനത്തില്‍ പുതിയ കോച്ചുകളും ലഭ്യമാക്കിയിട്ടുണ്ട്. മധുര ഡിവിഷന്‍റെ പരിധിയിലുള്ള റെയില്‍വേ സ്റ്റേഷനുകളിലെ പ്ലാറ്റ്‌ഫോമുകളുടെ നീളം വര്‍ധിപ്പിക്കുന്ന നടപടി പൂര്‍ത്തിയാകുന്നതോടുകൂടി വേളാങ്കണ്ണി എക്‌സ്പ്രസ് 22 കോച്ചുകള്‍ ഉള്ള ട്രെയിനായി ഉയര്‍ത്താമെന്നും മന്ത്രി ഉറപ്പു നല്‍കിയിട്ടുണ്ട്. നേരത്തെ മീറ്റര്‍ ഗേജ് പാതയുടെ കാലത്ത് സര്‍വീസ് നടത്തിയിരുന്ന കൊല്ലം-കോയമ്പത്തൂര്‍ ട്രെയിനിന് പകരമായി പ്ലാറ്റ്‌ഫോം ലഭ്യതയുള്ള കോട്ടയത്തനിന്നും സര്‍വീസ് ആരംഭിച്ച് കൊല്ലം, പുനലൂര്‍, മധുര, പളനി വഴി ഈറോഡിലേക്ക് പുതിയ എക്‌സ്പ്രസ് ട്രെയിന്‍ എന്ന ആവശ്യവും റെയില്‍വേ മന്ത്രിയും ബോര്‍ഡും അംഗീകരിച്ചു. ഈ സര്‍വീസ് ആരംഭിക്കുന്നതോടുകൂടി മധ്യകേരളത്തില്‍നിന്നും മധുര, പളനി തുടങ്ങിയ ക്ഷേത്രങ്ങിലേക്ക് ചുരുങ്ങിയ ചെലവില്‍ തീര്‍ഥാടകര്‍ക്ക് എത്താന്‍ ആകും. കോയമ്പത്തൂരില്‍ പ്ലാറ്റ്‌ഫോം ലഭ്യമല്ലാത്തതിനാലാണ് ഈറോഡില്‍ സര്‍വീസ് അവസാനിപ്പിക്കുന്നത്. മെമുവിൽ കോച്ചുകള്‍ വര്‍ധിപ്പിക്കും കേരളത്തില്‍ നിലവില്‍ സര്‍വീസ് നടത്തുന്ന ഭൂരിഭാഗം മെമു ട്രെയിനുകളിലും കോച്ചുകളുടെ എണ്ണം എട്ടെണ്ണം മാത്രമാണ്. വലിയ തിരക്കുള്ള ഈ ട്രെയിനുകളില്‍ എട്ടു കോച്ചുകള്‍ എന്നുള്ളത് സ്ഥിരം യാത്രക്കാര്‍ക്ക് കടുത്ത ബുദ്ധിമുട്ടാണ് സൃഷ്ടിക്കുന്നത്. ഇതിന് പരിഹാരമായി നിലവില്‍ എട്ടു കോച്ചുള്ള മെമു ട്രെയിനുകള്‍ 12 കോച്ചുകളായും 12 കോച്ചുകള്‍ ഉള്ളവ 16 കോച്ചുള്ള ട്രെയിനുകളായി ഉയര്‍ത്താമെന്നും എംപിയുടെ ആവശ്യത്തിൽ മന്ത്രി ഉറപ്പു നല്‍കി. ചെന്നൈ എഗ‌്മൂര്‍ സ്റ്റേഷനിലെ പുനരുദ്ധാരണ പ്രവര്‍ത്തനങ്ങള്‍ പൂര്‍ത്തീകരിക്കുന്ന മുറയ്ക്ക് കോട്ടയത്ത് നിന്നും കൊല്ലം വഴി താമ്പരത്തേക്ക് പുതിയ എസി വീക്കിലി എക്‌സ്പ്രസ് ട്രെയിന്‍ ആരംഭിക്കണമെന്നുള്ള ആവശ്യം അനുഭാവപൂര്‍വം പരിഗണിക്കാമെന്നും മന്ത്രി അറിയിച്ചതായി എംപി പറഞ്ഞു. പാര്‍ക്കിംഗ് ഫീസ് വര്‍ധന കുറയ്ക്കണം മന്ത്രിയുമായി നടത്തിയ ചര്‍ച്ചയില്‍ തിരുവനന്തപുരം ഡിവിഷനില്‍ അനിയന്ത്രിതമായി ഉയര്‍ത്തിയ പാര്‍ക്കിംഗ് ഫീവര്‍ധനവ് പുനഃപരിശോധിക്കണമെന്നും നിലവിലെ വര്‍ധനവ് സ്ഥിരംയാത്രക്കാര്‍ക്ക് കടുത്ത സാമ്പത്തിക ബാധ്യത ഉണ്ടാക്കുമെന്നും മന്ത്രിയെ ബോധ്യപ്പെടുത്തി. ഇതിന്‍റെ അടിസ്ഥാനത്തില്‍ മന്ത്രിയുടെ ഓഫീസില്‍നിന്നും തിരുവനന്തപുരം ഡിവിഷന്‍ ജനറല്‍ മാനേജര്‍രോട് മന്ത്രിയുടെ ഓഫീസ് അടിയന്തര റിപ്പോര്‍ട്ട് തേടിയതായും എംപി പറഞ്ഞു.

വലിയ ശബ്ദം; പിന്നാലെ നിലവിളി, കൂട്ടക്കരച്ചിൽ

കോട്ടയം: മെഡിക്കല്‍ കോളജ് ആശുപത്രി പതിനാലാം വാര്‍ഡ് ഇടിഞ്ഞുവീണെന്ന വാര്‍ത്ത ഞെട്ടലോടെയാണു കേട്ടറിഞ്ഞത്. വാര്‍ഡ് അപ്പാടെ ഇടിഞ്ഞുവീണെന്ന് വാര്‍ത്തകള്‍ പരന്നു. കൂട്ടനിലവിളി കേട്ട് സമീപ വാര്‍ഡുകളിലെ രോഗികളും കൂട്ടിരുപ്പുകാരും മെഡിക്കല്‍ കോളജ് ജീവനക്കാരുമാണ് പതിനാലാം വാര്‍ഡിലേക്ക് ഓടിയെത്തിയത്. അവരെത്തുമ്പോള്‍ ശുചിമുറി നടുമുറ്റത്തേക്ക് ഇടിഞ്ഞുവീണിരിക്കുന്നു. ജീവനക്കാര്‍ ആദ്യം രോഗികളെ മറ്റു വാര്‍ഡുകളിലേക്ക് സുരക്ഷിതമായി മാറ്റി. പോലീസും ഫയര്‍ഫോഴ്‌സും പാഞ്ഞെത്തി. തെള്ളകത്തെ മുഖ്യമന്ത്രിയുടെ അവലോകന യോഗ സ്ഥലത്തുനിന്ന് മന്ത്രിമാരായ വീണാ ജോര്‍ജും വി.എന്‍. വാസവനും സ്ഥലത്തെത്തി. നാലുഭാഗവും കെട്ടിടങ്ങളാല്‍ മറഞ്ഞ നടുമുറ്റത്തേക്കാണ് ശുചിമുറി ഭാഗം ഇടിഞ്ഞുവീണത്. നടുമുറ്റം നിറയെ ചെടികളാണ്. ആരും അപകടത്തില്‍പ്പെട്ടിട്ടില്ലെന്നും ഉപയോഗശൂന്യമായ കെട്ടിടത്തില്‍ ആരുമില്ലെന്നുമായിരുന്നു മന്ത്രിമാരുടെ വിശദീകരണം. എന്നാല്‍, ഇതേസമയം മണ്ണിനടിയില്‍ ആളുണ്ടെന്ന് പലരും പറഞ്ഞിരുന്നു. ഒടുവില്‍ രണ്ടര മണിക്കൂറിനുശേഷം മെഡിക്കല്‍ കോളജ് രണ്ടാം കവാടത്തിലൂടെ ചെറുമതിലുകളും നടകളും ഇടിച്ചുനിരത്തി അകത്തെത്തിച്ച മൂന്നു ഹിറ്റാച്ചികള്‍ അവശിഷ്ടങ്ങള്‍ മാറ്റിയാണ് ബിന്ദുവിന്‍റെ മൃതദേഹം പുറത്തെടുത്തത്. രക്ഷാപ്രവര്‍ത്തനം വൈകിയതിനെ ചൊല്ലി നാട്ടുകാരും പൊതുപ്രവര്‍ത്തകരും ഫയര്‍ഫോഴ്‌സ് അധികൃതരുമായി ബഹളമുണ്ടായി. പ്രതിഷേധം ശമിച്ചതിനുശേഷമാണ് അവശിഷ്ടങ്ങള്‍ മാറ്റിത്തുടങ്ങിയത്. ജനങ്ങളെ അകത്തേക്ക് കടത്താതെ പോലീസ് കയറുകെട്ടി വേര്‍തിരിച്ചിരുന്നു. ഈ സമയം മന്ത്രിമാരായ വി.എന്‍. വാസവനും വീണാ ജോര്‍ജും മെഡിക്കല്‍ കോളജ് പ്രിന്‍സിപ്പല്‍ ഓഫീസിലിരുന്നു കാര്യങ്ങള്‍ വിലിയിരുത്തി. സ്ഥലത്തെത്തിയ ജനപ്രതിനിധികളും രാഷ്‌ട്രീയ നേതാക്കളും ആശുപത്രി അധികൃതരുടെയും സര്‍ക്കാരിന്‍റെയും അനാസ്ഥയെ കുറ്റപ്പെടുത്തി. എംഎല്‍എമാരായ ചാണ്ടി ഉമ്മനും തിരുവഞ്ചൂര്‍ രാധാകൃഷ്ണനും ക്ഷോഭത്തോടെയാണ് കുറ്റപ്പെടുത്തിയത്. ആളുകള്‍ ഉപയോഗിച്ചിരുന്ന കെട്ടിടം എങ്ങനെ ഉപയോഗശൂന്യമായ കെട്ടിടമാണെന്ന് പറയാന്‍ മന്ത്രിമാര്‍ക്ക് കഴിഞ്ഞെന്നും രക്ഷാ പ്രവര്‍ത്തനത്തില്‍ ഗുരുതരമായ വീഴ്ച സംഭവിച്ചെന്നും ഇരുവരും പറഞ്ഞു. കെട്ടിടത്തിന്‍റെ കാലപ്പഴക്കവും പൊട്ടിപ്പൊളിഞ്ഞതും പലരും ചൂണ്ടിക്കാണിക്കുന്നുണ്ടായിരുന്നു. അവശിഷ്ടങ്ങള്‍ ഭൂരിഭാഗം നീക്കം ചെയ്തശേഷം മന്ത്രിമാര്‍ മാധ്യമ പ്രവര്‍ത്തകരെ കണ്ടു. പല നായീകരണങ്ങളും മന്ത്രിമാര്‍ നിരത്തിയെങ്കിലും ചോദ്യശരങ്ങള്‍ക്കു മുമ്പില്‍ മന്ത്രിമാര്‍ക്ക് ഉത്തരം മുട്ടി. ഇതിനിടയില്‍ മെഡിക്കല്‍ കോളജിലേക്ക് വിവിധ സംഘടനകളുടെ നേതൃത്വത്തില്‍ പ്രതിഷേധ സമരപരിപാടികളും നടന്നു. വൈകുന്നേരത്തോടെ മുഖ്യമന്ത്രിയും സ്ഥലത്തെത്തി. പ്രിന്‍സിപ്പല്‍ ഓഫീസില്‍ അവലോകന യോഗം നടത്തി മുഖ്യമന്ത്രി പിരിയുമ്പോഴും പുറത്ത് പ്രതിഷേധം തുടര്‍ന്നു. റോഡില്‍ മുഖ്യമന്ത്രിയെ വിവിധ സംഘടനകള്‍ കരിങ്കൊടി കാട്ടി പ്രതിഷേധിച്ചു. ആശുപത്രിയില്‍നിന്നു മടങ്ങിയ ആരോഗ്യമന്ത്രി വീണാ ജോര്‍ജിനെയും മുഖ്യമന്ത്രി യെയും പുതുപ്പള്ളിയില്‍ യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി കാണിച്ചു. കെട്ടിടത്തിലേക്ക് പ്രവേശനം നിരോധിച്ചിരുന്നു: മെഡി. കോളജ് പ്രിൻസിപ്പൽ കോട്ടയം: കിഫ്ബിയുടെ ഫണ്ട് ഉപയോഗിച്ച് പുതുതായി പണികഴിപ്പിച്ച സര്‍ജിക്കല്‍ ബ്ലോക്കിലേക്ക് പൂര്‍ണമായും മാറുന്ന പ്രക്രിയ നടക്കുന്നതിനിടയിലാണ് 11, 14, 10 വാര്‍ഡുകളോടു ചേര്‍ന്നുള്ള ടോയ്‌ലറ്റ് കോംപ്ലക്സ് ഇടിഞ്ഞുവീണതെന്ന് മെഡിക്കല്‍ കോളജ് പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ്. ഈ കോംപ്ലക്‌സിലേക്ക് 11, 14 വാര്‍ഡുകളില്‍നിന്നുള്ള പ്രവേശനം നിരോധിച്ചതും ഉപയോഗത്തിലില്ലാത്തതുമാണെന്നും ഡോ. വര്‍ഗീസ് പി. പുന്നൂസ് പറഞ്ഞു. അപകടത്തിന്‍റെ പശ്ചാത്തലത്തില്‍ ഈ വാര്‍ഡുകളിലെ കിടപ്പുരോഗികളെ മറ്റ് വാര്‍ഡുകളിലേക്ക് മാറ്റുകയും ഐസിയു, ഓപ്പറേഷന്‍ തിയറ്റര്‍ തുടങ്ങിയവ പുതുതായി പണികഴിപ്പിച്ച സര്‍ജിക്കല്‍ ബ്ലോക്കിലേക്ക് മാറ്റുന്നതിനുള്ള പ്രവര്‍ത്തനങ്ങള്‍ നടക്കുകയായിരുന്നെന്നും ഡോ. വര്‍ഗീസ് പി. പുന്നൂസ് പറഞ്ഞു. ആറു വാര്‍ഡുകളിലെ രോഗികളെ പുതുതായി നിര്‍മിച്ച സര്‍ജിക്കല്‍ ബ്ലോക്കിലേക്ക് മാറ്റുമെന്നും അപകടം പറ്റിയ വാര്‍ഡ് പൂര്‍ണമായി അടയ്ക്കുമെന്നും മന്ത്രിമാരായ വീണ ജോര്‍ജും വി.എന്‍. വാസവനും പറഞ്ഞു.

മകളുടെ സുരക്ഷയ്ക്കെത്തി; അമ്മയ്ക്കു ദാരുണാന്ത്യം

തലയോലപ്പറമ്പ്: രോഗബാധിതയായ മകൾക്ക് കൂട്ടിരിക്കാനെ ത്തിയ അമ്മയ്ക്ക് ആശുപത്രി ക്കെട്ടിടം തകര്‍ന്നുണ്ടായ അപകടത്തില്‍ ദാരുണാന്ത്യം സംഭവിച്ചത് നാടിനെ നടുക്കി. കഴുത്തിന് കലശലായ വേദനയെത്തുടര്‍ന്ന് മകളും അവസാനവര്‍ഷ നഴ്‌സിംഗ് വിദ്യാര്‍ഥിയായ നവമിയെ കഴിഞ്ഞ ഒന്നിനാണു കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്. ഇന്നലെ രാവിലെ മകളെ കുളിപ്പിച്ച് വാര്‍ഡിലാക്കിയശേഷം മാതാവ് ബിന്ദു കുളിക്കാനായിപോയപ്പോഴായിരുന്നു കെട്ടിടം തകര്‍ന്നു വന്‍ അപകടമുണ്ടായത്. തലയോലപ്പറമ്പ് ഉമ്മാംകുന്നില്‍ പണിതീരാത്ത വീട്ടിലാണ് നിര്‍ധന കുടുംബം താമസിക്കുന്നത്. ഭര്‍ത്താവ് വിശ്രുതനും മക്കളായ നവനീത്, നവമി എന്നിവര്‍ക്ക് പുറമെ 90 കാരിയായ അമ്മ സീതാലക്ഷ്മിയും ബിന്ദുവിന്‍റെ സംരക്ഷണയിലായിരുന്നു. പ്രിയപ്പെട്ട മകളുടെ മരണ വിവരമറിഞ്ഞ് നിര്‍ത്താതെ അലമുറയിട്ടു കരഞ്ഞുകൊണ്ടിരിക്കുന്ന മാതാവിന്‍റെ നൊമ്പരം കാണാനാവാതെ വീട്ടില്‍ തടിച്ചുകൂടിയ സ്ത്രീകളടക്കമുള്ളവര്‍ കണ്ണീര്‍വാര്‍ത്തു.

ശ്യാമും ജോയലും കണ്ടു; നടുക്കുന്ന ആ കാഴ്ച

ഗാന്ധിനഗര്‍: അടുത്തടുത്ത കട്ടിലുകളില്‍ കിടന്ന് സംസാരിച്ചുകൊണ്ടിരിക്കെ ശ്യാം സുബിനും ജോയലും ആ കാഴ്ച കണ്‍മുന്‍പില്‍ കണ്ടു. കൂറ്റന്‍ അലമാര നിലംപൊത്തുന്നപോലെ പതിനാലാം വാര്‍ഡിനോടു ചേര്‍ന്ന ടോയ്‌ലറ്റ് ചെരിഞ്ഞുമറിയുന്നു. പിന്നാലെ വലിയൊരു ശബ്ദവും. സംഭവിച്ചതോ തോന്നിയതോ എന്നറിയാന്‍ കട്ടിലില്‍നിന്ന് ഇറങ്ങി നോക്കുമ്പോള്‍ ശൗചാലം ഇരുന്ന കെട്ടിടം അവിടെയില്ല. ഉദരസംബന്ധമായ രോഗത്തിന് ചികിത്സ തേടിയെത്തിയ ഇരുവരും ഭയന്ന് പുറത്തേക്ക് ഓടി. ശ്യാമിന്‍റെ അമ്മ അഗിയും ജോയലിന്‍റെ അമ്മ ആനന്ദയും കൂടെ ഓടി. തിരികെയെത്തുമ്പോള്‍ ശസ്ത്രിക്രിയ കഴിഞ്ഞുകിടക്കുന്ന രോഗികളുടെ നിലവിളി കേള്‍ക്കാം. അവരെ അതിവേഗം പുറത്തെത്തിക്കാന്‍ ജീവനക്കാരുടെയും കൂട്ടിരിപ്പുകാരുടെയും തീവ്രശ്രമം നടക്കുന്നു. വയറുവേദന മറന്ന് ശ്യാമും ജോയലും വയോധികാരായ രോഗികളെ ട്രോളിയിലും സ്ട്രെച്ചറിലും പുറത്തെത്തിക്കാനുള്ള ശ്രമത്തില്‍ പങ്കുചേര്‍ന്നു. ഒളശ കോയിമാടത്ത് സുബിന്‍റെ മകനായ ശ്യാം ഒളശ സ്‌കൂളില്‍ എട്ടാം ക്ലാസ് വിദ്യാര്‍ഥിയാണ്. ജോയല്‍ എറണാകുളം കുമ്പളങ്ങി സ്വദേശിയും. മരിച്ച ബിന്ദു അപകടത്തിന് തൊട്ടുമുന്‍പ് കുളിമുറിയിലേക്ക് പോകുന്നത് ജോയലിന്‍റെ അമ്മ ആനന്ദ കണ്ടിരുന്നു. ബിന്ദു അവിടേക്കു പോയിട്ടുണ്ടെന്നും തിരികെ വന്നിട്ടില്ലെന്നും ഉറ്റവരോടൊക്കെ ഇവര്‍ തീര്‍ച്ച പറഞ്ഞതോടെയാണ് തെരച്ചില്‍ ഊര്‍ജിതമാക്കാനിടയായത്. ബംഗളൂരുവില്‍ അവസാന വര്‍ഷ നഴ്‌സിംഗ് വിദ്യാര്‍ഥിയാണ് ജോയല്‍. പതിനാലാം വാര്‍ഡില്‍ ഇവര്‍ കിടന്ന കട്ടിലിന് വിളിപ്പാടകലെയായിരുന്നു ശൗചാലയം. ഇവ രോഗികളും കൂട്ടിരിപ്പുകാരും രാപകല്‍ ഉപയോഗിച്ചിരുന്നതായും ആ ഭാഗത്ത് കൂട്ടിരിപ്പുകാര്‍ രാത്രി കിടക്കാറുണ്ടെന്നും തുണി ഉണങ്ങാനിടുന്നുണ്ടെന്നും ഇവര്‍ പറഞ്ഞു.

ആശുപത്രിക്കെട്ടിടം അത്യാസന്ന നിലയില്‍

കോട്ടയം: അറുപതുവര്‍ഷം പഴക്കമുള്ളതാണ് ആര്‍പ്പൂക്കരയില്‍ ഇന്നലെ അപകടമുണ്ടായ മെഡിക്കല്‍ കോളജ് കെട്ടിടം. പലപ്പോഴായി വിപുലീകരിക്കുകയും നവീകരിക്കുകയും ചെയ്ത കെട്ടിടം പത്തു വര്‍ഷം മുന്‍പ് പൊളിച്ചുമാറ്റേണ്ടതാണ്. 10, 11, 14 വാര്‍ഡുകള്‍ ഈ കെട്ടിടത്തിലുണ്ട്. അതായത് ഒരേസമയം മൂന്നു വാര്‍ഡുകളിലായി നാനൂറോളം രോഗികളും കൂട്ടിരിപ്പുകാരും സന്ദര്‍ശകരും ഡോക്ടര്‍മാരും നഴ്‌സുമാരും മെഡിക്കല്‍ വിദ്യാര്‍ഥികളും മറ്റ് ജീവനക്കാരും ഉള്‍പ്പെടെ കുറഞ്ഞത് ആയിരത്തോളം പേർ ഈ കെട്ടിടത്തിലുണ്ടാകും. ശൗചാലയത്തിന് സമീപത്തു തന്നെയാണ് പതിനൊന്നാം വാര്‍ഡ്. ശസ്ത്രക്രിയ കഴിഞ്ഞവരും അതിനായി കാത്തിരിക്കുന്നവരുമാണ് ഇവിടത്തെ രോഗികള്‍. ശൗചാലയം വീണ ആഘാതത്തില്‍ കെട്ടിടത്തിനു പൂര്‍ണമോ ഭാഗികമോ ആയ തകര്‍ച്ചസംഭവിച്ചിരുന്നെങ്കില്‍ ദുരന്തത്തിന്‍റെ വ്യാപ്തി അചിന്ത്യമാകുമാ യിരുന്നു. കേരളത്തിലെ മൂന്നാമത്തെ മെഡിക്കല്‍ കോളജായി 1962 ഡിസംബര്‍ മൂന്നിനാണ് അന്നത്തെ ആരോഗ്യമന്ത്രി എം.പി. ഗോവിന്ദന്‍ നായരുടെ സാന്നിധ്യത്തില്‍ മുഖ്യമന്ത്രി ആര്‍. ശങ്കര്‍ ഉദ്ഘാടനം നിര്‍വഹിച്ചത്. കോട്ടയം, ഇടുക്കി, ആലപ്പുഴ, പത്തനംതിട്ട, എറണാകുളം ജില്ലകളിലെ രോഗികള്‍ക്ക് സേവനം നല്‍കുന്ന ആശുപത്രിയില്‍ ദിവസേന മൂവായിരം ഒപിയും അഞ്ഞൂറിലേറെ അത്യാഹിത രോഗികളും എത്തുന്നു. കോട്ടയം മെഡിക്കല്‍ കോളജിലെ ആദ്യ ബാച്ച് എംബിബിഎസ് വിദ്യാര്‍ഥികള്‍ പഠനം തുടങ്ങിയത് തിരുവനന്തപുരം മെഡിക്കല്‍ കോളജിലാണ്. ഒന്നര വര്‍ഷത്തെ പഠനത്തിനുശേഷം കോട്ടയത്ത് മടങ്ങിയെത്തി ആദ്യകാല ക്ലിനിക്കല്‍ പരിശീലനം കോട്ടയം ജില്ലാ ആശുപത്രിയിലായിരുന്നു. പിന്നീടാണ് ആര്‍പ്പൂക്കരയില്‍ ഗാന്ധിനഗര്‍ എന്ന പേരില്‍ മെഡിക്കല്‍ കോളജ് ആശുപത്രി സജീവപ്രവര്‍ത്തനം തുടങ്ങിയത്. അക്കാലത്ത് പണിത കെട്ടിടത്തിന്‍റെ ഭാഗമാണ് ഇന്നലെ തകര്‍ന്നത്. പുതിയ സർജിക്കൽ ബ്ലോക്കിൽ മൂന്നു വാർഡുകൾ പ്രവർത്തനം ആരംഭിച്ചു

കോട്ടയം: മെഡിക്കൽ കോളജിലെ 12, 13, 15 വാർഡുകൾ പുതുതായി നിർമിച്ച സർജിക്കൽ ബ്ലോക്കിലേക്ക് മാറ്റി പ്രവർത്തനം ആരംഭിച്ചു. മൂന്നാം നിലയിലാണ് പ്രവർത്തിക്കുന്നത്. ഇന്നലെ വൈകുന്നേരം തന്നെ വാർഡുകൾ പൂർണ സജ്ജമായി. 10, 17, സിഎൽ 4-1 എന്നീ വാർഡുകൾ മാറ്റാനുള്ള നടപടിയായി. മാറ്റി പ്രവർത്തനം ആരംഭിച്ചു കോട്ടയം: മെഡിക്കൽ കോളജിലെ 10,11,12,13,14, 15,17,24 എന്നീ വാർഡുകളും റേഡിയോ ഡയഗ്നോസിസ് വകുപ്പും സെൻട്രൽ സ്റ്റെറൈൽ സപ്ലൈ വകുപ്പും പുതിയ സർജിക്കൽ ബ്ലോക്കിലേക്കും സി.എൽ. 4 വാർഡിലേക്കുമായി മാറ്റി പ്രവർത്തനം ആരംഭിച്ചു. രോഗികളെ പുതിയ വാർഡുകളിലേക്ക് മാറ്റി.

അത് ബിന്ദുവാകരുതേ എന്നു പ്രാർഥിച്ചു, പക്ഷേ...

ഗാന്ധിനഗര്‍: എന്‍റെ അടുത്തുനിന്നു ചികിത്സയിലുള്ള മകള്‍ക്ക് ഭക്ഷണം കൊടുക്കാന്‍ പോയ അവള്‍ മരണത്തിലേക്കാണു പോയതെന്ന് അറിഞ്ഞിരുന്നില്ല. 14-ാം വാര്‍ഡിലെ ശുചിമുറി അടക്കമുള്ള കെട്ടിടഭാഗങ്ങള്‍ ഇടിഞ്ഞുവീണു മരണപ്പെട്ട ബിന്ദുവിന്‍റെ ഭര്‍ത്താവ് വിശ്രുതന്‍റെ വാക്കുകളാണിത്. ഇതു പറയുമ്പോള്‍ വിശ്രുതന്‍ നെഞ്ച് പൊട്ടിക്കരയുകയായിരുന്നു. ഇന്നലെ രാവിലെ വരെ കൂടെയുണ്ടായിരുന്ന ഭാര്യയുടെ വേര്‍പാട് അയാള്‍ക്ക് താങ്ങാവുന്നതിലു മധികമായിരുന്നു. ഇവരുടെ മകള്‍ നവമിയെ ചികിത്സയ്ക്കായി അഡ്മിറ്റ് ചെയ്തതോടെയാണ് ബിന്ദുവിനൊപ്പം വിശ്രുതന്‍ ആശുപത്രിയില്‍ എത്തുന്നത്. ഇന്നലെ രാവിലെ ഡോക്ടര്‍മാര്‍ വിവിധ രക്തപരിശോധനയ്ക്കായി കുറിച്ചുനല്‍കിയിരുന്നു. ഇതിനുള്ള രക്തസാമ്പിളുമായി വിശ്രുതനും ബിന്ദുവുമാണ് ലാബിലേക്ക് പോയത്. ലാബില്‍ ചെന്നപ്പോള്‍ തിരക്കായതിനാല്‍ വിശ്രുതനെ ക്യൂവില്‍ നിര്‍ത്തി മകള്‍ക്ക് ഭക്ഷണം കൊടുക്കാനായി ബിന്ദു വാര്‍ഡിലേക്ക് പോയി. പിന്നീട് ബാത്ത് റൂമിലേക്ക് പോയപ്പോഴാണ് അപകടമുണ്ടായത്. ആശുപത്രിയില്‍നിന്നു ബഹളവും നിലവിളിയുമൊക്കെ കേട്ട് ഓടിയെത്തുമ്പോള്‍ വാര്‍ഡില്‍നിന്ന് എല്ലാവരെയും പുറത്തേക്കിറക്കുകയായിരുന്നു. മകളെ കണ്ടു അമ്മയെ തിരക്കിയപ്പോള്‍ അമ്മ ബാത്ത്റൂമില്‍ പോയിരുന്നെന്നും ഇതുവരെ തിരിച്ചു വന്നിട്ടില്ലന്നും നവമി പറഞ്ഞു. ഇതോടെ ബിന്ദു അപകടത്തില്‍പ്പെട്ടിട്ടുണ്ടെന്ന് ഉറപ്പായെന്ന് വിശ്രുതന്‍ പറഞ്ഞു. ഭാര്യയെ കാണാനില്ലെന്ന് പോലീസുകാരെയും മറ്റും അറിയിച്ചു. ഇടിഞ്ഞുവീണ കെട്ടിടഭാഗങ്ങള്‍ ജെസിബി കൊണ്ട് നീക്കം ചെയ്തപ്പോള്‍ ഒരു സ്ത്രീയുടെ മൃതദേഹം കിട്ടിയിട്ടുണ്ടെന്നും ഇതു ഭാര്യയാണോയെന്ന് തിരിച്ചറിയാന്‍ മോര്‍ച്ചറിയിലേക്ക് വരണമെന്ന് പോലീസ് അറിയിച്ചപ്പോള്‍ വിശ്രുതന്‍റെ നെഞ്ച് പിടഞ്ഞു. അതു തന്‍റെ ബിന്ദുവാകരുതേ എന്ന് ഉള്ളുരുകി പ്രാര്‍ഥിച്ചു. എന്നാല്‍, വിധി മറ്റൊന്നായിരുന്നു. മോര്‍ച്ചറിയില്‍ ബിന്ദുവിന്‍റെ മൃതദേഹം കണ്ടു വിശ്രുതന്‍ അലമുറയിട്ട് കരഞ്ഞു. തന്‍റെ ഒപ്പം ലാബില്‍ നില്‍ക്കുകയായിരുന്നെങ്കില്‍ അവള്‍ അപകടത്തില്‍പെടില്ലായിരുന്നെന്ന് വിശ്രുതന്‍ തേങ്ങലോടെ പറഞ്ഞു.

ജുഡീഷല്‍ അന്വേഷണം വേണം: യുഡിഎഫ്

കോട്ടയം: കോട്ടയം മെഡിക്കല്‍ കോളജില്‍ കെട്ടിടം തകർന്നുവീണ് രോഗിയുടെ അമ്മ മരിച്ച സംഭവത്തില്‍ ജുഡീഷല്‍ അന്വേഷണം വേണമെന്ന് യുഡിഎഫ്. രക്ഷാപ്രവര്‍ത്തനം ഏകോപിപ്പിക്കുന്നതില്‍ ഗുരുതര വീഴ്ച സംഭവിച്ചു. രണ്ടു മന്ത്രിമാര്‍ സ്ഥലത്തെത്തി സംഭവത്തെ നിസാരവത്കരിച്ചതാണു കൂടുതല്‍ പ്രശ്‌നങ്ങള്‍ സൃഷ്ടിച്ചത്. നിലവില്‍ ആ കെട്ടിടത്തിലുള്ള രോഗികളെ എല്ലാം ഡിസ്ചാര്‍ജ് ചെയ്യാനാണ് അധികൃതര്‍ ശ്രമിക്കുന്നത്. അത് ഒരു കാരണവശാലും നമ്മതിക്കില്ല. രോഗികളെ ഡിസ്ചാര്‍ജ് ചെയ്താല്‍ മെഡിക്കല്‍ കോളജിന് മുന്നില്‍ സമരം ആരംഭിക്കുമെന്ന് യുഡിഎഫ് നേതാക്കള്‍ പറഞ്ഞു. എംഎല്‍എമാരായ തിരുവഞ്ചൂര്‍ രാധകൃഷ്ണന്‍, ചാണ്ടി ഉമ്മന്‍, മാണി സി. കാപ്പന്‍, മോന്‍സ് ജോസഫ്, ഫ്രാന്‍സിസ് ജോര്‍ജ് എംപി, ഡിസിസി പ്രസിഡന്‍റ് നാട്ടകം സുരേഷ്, യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസ്, കോട്ടയം നഗരസഭാ അധ്യക്ഷ ബിന്‍സി സെബാസ്റ്റ്യന്‍ തുടങ്ങിയവരാണ് യുഡിഎഫ് സംഘത്തിലുണ്ടായിരുന്നത്. കോൺഗ്രസ് മാർച്ച് ഇന്ന് കോട്ടയം: മെഡിക്കൽ കോളജിൽ നടന്ന ദാരുണമായ സംഭവത്തിന് ഉത്തരവാദികളെ കണ്ടെത്തി നടപടിയെടുക്കണമെന്ന് ആവശ്യപ്പെട്ട് ജില്ലാ കോൺഗ്രസ് കമ്മിറ്റിയുടെ ആഭിമുഖ്യത്തിലുള്ള ബഹുജന മാർച്ച് ഇന്ന് രാവിലെ 10ന് മെഡിക്കൽ കോളജ് കവാടത്തിൽ കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്യുമെന്ന് ഡിസിസി പ്രസിഡന്‍റ് നാട്ടകം സുരേഷ് അറിയിച്ചു. ഉത്തരവാദി സംസ്ഥാന സര്‍ക്കാര്‍: ഫ്രാന്‍സിസ് ജോര്‍ജ് എംപി കോട്ടയം: മെഡിക്കല്‍ കോളജിലെ കെട്ടിടം ഇടിഞ്ഞുവീണ് വീട്ടമ്മ മരണപ്പെട്ടത് സംസ്ഥാന സര്‍ക്കാരിന്‍റെ അനാസ്ഥയും കെടുകാര്യസ്ഥതയും മൂലമാണന്ന് ഫ്രാന്‍സിസ് ജോര്‍ജ് എംപി ആരോപിച്ചു. അപകടമുണ്ടായ ഉടൻ രക്ഷാപ്രവര്‍ത്തനം നടത്തിയിരുന്നെങ്കില്‍ വീട്ടമ്മയുടെ ജീവന്‍ രക്ഷിക്കാന്‍ കഴിയുമായിരുന്നെന്നും എംപി പറഞ്ഞു. കെടുകാര്യസ്ഥതയുടെ ഉദാഹരണം: ബിജെപി കോട്ടയം: ആരോഗ്യമേഖലയിലെ കെടുകാര്യസ്ഥതയുടെയും അഴിമതിയുടെയും ഏറ്റവും പുതിയ ഉദാഹരണമാണു കോട്ടയം മെഡിക്കല്‍ കോളജിലെ കെട്ടിടത്തിന്‍റെ തകര്‍ച്ചയിലൂടെയും രോഗിയുടെ മരണത്തിലൂടെയും പുറത്തു വന്നിരിക്കുന്നതെന്ന് ബിജെപി വെസ്റ്റ് ജില്ലാ പ്രസിഡന്‍റ് ജി. ലിജിന്‍ലാല്‍. ദുരന്ത സ്ഥലത്തെത്തിയ മന്ത്രിമാര്‍ സംഭവത്തെ അങ്ങേയറ്റം നിസാരവത്കരിക്കുകയാണു തുടക്കം മുതല്‍ ചെയ്തത്. അതാണ് ഒരുജീവനെടുത്തത്. ജി. ലിജിന്‍ലാല്‍ പറഞ്ഞു. ആരോഗ്യവകുപ്പിന് വിദഗ്ധചികിത്സ അനിവാര്യം: എൻ. ഹരി കോട്ടയം: സംസ്ഥാന സര്‍ക്കാരിനും ആരോഗ്യവകുപ്പിനും അതിവിദഗ്ധ ചികിത്സ അനിവാര്യമാണെന്ന് അരക്കിട്ടുറപ്പിക്കുന്നതാണ് കോട്ടയം മെഡിക്കല്‍ കോളജ് കെട്ടിടം തകര്‍ന്നുള്ള ദുരന്തമെന്ന് ബിജെപി നേതാവ് എന്‍. ഹരി. മന്ത്രിമാരുടെ നിസംഗ നിലപാടാണ് രക്ഷാപ്രവര്‍ത്തനം വൈകിച്ചതെന്നും എന്‍. ഹരി കുറ്റപ്പെടുത്തി. സമഗ്ര അന്വേഷണം നടത്തണം: സജി മഞ്ഞക്കടമ്പില്‍ കോട്ടയം: കോട്ടയം മെഡിക്കല്‍ കോളജ് കെട്ടിടം തകര്‍ന്നുവീണ് ബിന്ദു എന്ന സ്ത്രീ മരണമടഞ്ഞ സംഭവത്തില്‍ സമഗ്ര അന്വേഷണം നടത്തണമെന്ന് തൃണമൂല്‍ കോണ്‍ഗ്രസ് ചീഫ് കോ-ഓര്‍ഡിനേറ്റര്‍ സജി മഞ്ഞക്കടമ്പില്‍ ആവശ്യപ്പെട്ടു.

മുഖ്യമന്ത്രിയെ യൂത്ത് കോണ്‍ഗ്രസ് കരിങ്കൊടി കാട്ടി

കോട്ടയം: കോട്ടയം മെഡിക്കല്‍ കോളജിലെ കെട്ടിടം തകര്‍ന്നുവീണ സ്ഥലം സന്ദര്‍ശിച്ച മുഖ്യമന്ത്രി പിണറായി വിജയനെ യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി കാട്ടി. ഇന്നലെ വൈകുന്നേരം അപകടം നടന്ന മെഡിക്കല്‍ കോളജില്‍ സന്ദര്‍ശനം നടത്തിയപ്പോള്‍ ആശുപത്രിക്ക് മുമ്പില്‍ വച്ചായിരുന്നു കരിങ്കൊടി കാട്ടിയത്. മുഖ്യമന്ത്രിയുടെ വാഹനവ്യൂഹത്തിന് മുന്നിലേക്ക് വന്ന പ്രവര്‍ത്തകരെ പോലീസ് ഇടപെട്ട് പ്രദേശത്തുനിന്നു നീക്കാന്‍ ശ്രമം നടത്തിയെങ്കിലും പ്രതിഷേധം വകവയ്ക്കാതെ ഇവര്‍ കരിങ്കൊടി കാട്ടുകയായിരുന്നു. മന്ത്രിമാരായ വീണ ജോര്‍ജും വി.എന്‍. വാസവനും മുഖ്യമന്ത്രിയോടൊപ്പം വാഹനത്തില്‍ ഉണ്ടായിരുന്നു. ആരോഗ്യമന്ത്രി വീണാ ജോര്‍ജിന്‍റെ രാജി ആവശ്യപ്പെട്ടാണ് കരിങ്കൊടി കാണിച്ചത്.

അധികാരികള്‍ ഇരുട്ടുകൊണ്ട് ഓട്ടയടയ്ക്കുന്നു

കോട്ടയം: മെഡിക്കല്‍ കോളജില്‍ ഇടിഞ്ഞുവീണ കെട്ടിടത്തില്‍ രോഗികള്‍ ആരുമില്ലെന്നും ചെറിയ അപകടമാണെന്നും ഉപയോഗശൂന്യമായ സാമഗ്രികള്‍ തള്ളുന്ന ഭാഗമാണെന്നുമുള്ള മന്ത്രിമാരുടെയും ആശുപത്രി സൂപ്രണ്ടിന്‍റെയും വാദം തള്ളി രോഗികളും കൂട്ടിരിപ്പുകാരും ആശുപത്രി ജീവനക്കാരും. കഴിഞ്ഞ ദിവസവും രാത്രി ഇവിടെ ഭക്ഷണം വിതരണം നടന്നതായും രോഗികളും കൂട്ടിരിപ്പുകാരും വാര്‍ഡില്‍ ഉണ്ടായിരുന്നതായും ആശുപത്രി വികസന സമിതിയംഗവും നഗരസഭാ കൗണ്‍സിലറുമായ സാബു മാത്യു പറഞ്ഞു. സ്ട്രെച്ചറും ട്രോളിയും ഉള്‍പ്പെടെ ഇവിടെയാണ് സൂക്ഷിക്കുന്നത്. ശുചിമുറിയിലെ ലൈറ്റുകള്‍ തെളിഞ്ഞാണ് കിടന്നിരുന്നതെന്നും സാബു മാത്യു പറഞ്ഞു. ആശുപത്രി ജീവനക്കാര്‍ വിശ്രമിക്കാന്‍ ഇവിടെയാണ് എത്തുന്നതെന്നും രോഗികളും കൂട്ടിരുപ്പുകാരും വാര്‍ഡുകളിലുണ്ടായിരുന്നതായും വാര്‍ഡിനോടു ചേര്‍ന്നു കാപ്പിക്കട നടത്തുന്ന അനില പറഞ്ഞു. വലിയ ശബ്ദം കേട്ടാണ് ഓടിയെത്തിയതെന്നും ഈ സമയം വാര്‍ഡുകളില്‍നിന്ന് രോഗികളെ നീക്കം ചെയ്യുന്നതു കണ്ടെന്നും താനും രക്ഷാപ്രവര്‍ത്തനത്തിനു നേതൃത്വം നല്‍കിയെന്നും കുഴിമറ്റം സ്വദേശി ജോയി വാഴച്ചാല്‍ പറഞ്ഞു. ബന്ധുവിന്‍റെ മൃതദേഹം മോര്‍ച്ചറിയില്‍നിന്നു കൊണ്ടുപോകാന്‍ എത്തിയതായിരുന്നു ജോയി. പല കാര്യങ്ങളിവും അധികൃതര്‍ കള്ളം പറയുകയാണെന്നും രോഗികളും കൂട്ടിരിപ്പുകാരും പറഞ്ഞു.

ദേശീയ പാതയോരത്ത് കോൺക്രീറ്റ്, ടാറിംഗ് അവശിഷ്ടങ്ങൾ വ്യാപകമായി തള്ളുന്നു

മുണ്ടക്കയം: മാലിന്യനിർമാർജനമെന്ന ലക്ഷ്യത്തോടെ നാടൊന്നാകെ കൈകോർത്ത് വിവിധ പ്രവർത്തനങ്ങൾ നടത്തുമ്പോൾ തങ്ങൾക്കിതൊന്നും ബാധകമല്ലെന്ന് മട്ടിലാണ് ചിലരുടെ പ്രവർത്തനം. ദേശീയപാതയിൽ ചോറ്റിക്കും ചിറ്റടിക്കുമിടയിലുള്ള റോഡിന്‍റെ വശങ്ങളിൽ വ്യാപകമായാണ് കോൺക്രീറ്റിംഗ്, ടാറിംഗ് അവശിഷ്ടങ്ങൾ തള്ളുന്നത്. സ്ഥിരം അപകട മേഖലയായ ഇവിടെ കഴിഞ്ഞ വർഷം റോഡിന്‍റെ വശങ്ങളിൽ കൂടിക്കിടുന്ന മാലിന്യങ്ങളും കല്ലും മണ്ണും നീക്കം ചെയ്ത് വാഹനയാത്ര സുഗമമാക്കിയിരുന്നു. ഇതിന് പിന്നാലെയാണ് ഇപ്പോൾ യാതൊരു നിയന്ത്രണവുമില്ലാതെ രാത്രിയും പകലും നിർമാണം നടക്കുന്ന പലസ്ഥലങ്ങളിലെയും കോൺക്രീറ്റ് അവശിഷ്ടങ്ങൾ തള്ളുന്നത്. ഈ ഭാഗത്ത് കൂടാതെ 31ാം മൈലിന് സമീപവും ദേശീയപാതയുടെ വശത്ത് വ്യാപകമായി ഇത്തരത്തിലുള്ള മാലിന്യങ്ങൾ നിക്ഷേപിച്ചിരിക്കുകയാണ്. മുണ്ടക്കയം ടൗണിനോട് ചേർന്ന് നടക്കുന്ന കലുങ്ക് നിർമാണത്തിന്‍റെ ഭാഗമായുള്ള അവശിഷ്ടങ്ങളാണ് ഇത്തരത്തിൽ ദേശീയപാതയുടെ വശങ്ങളിൽ തള്ളുന്നതെന്നും ദേശീയപാത വിഭാഗം അധികാരികളുടെ അറിവോടെയാണ് പാതിയോരത്ത് മാലിന്യ നിക്ഷേപം നടക്കുന്നതെന്നും ആക്ഷേപമുയരുന്നുണ്ട്. മഴക്കാലമായതോടെ ദിവസങ്ങൾക്കുള്ളിൽ കൂടിക്കിടക്കുന്ന മാലിന്യത്തിന് മുകളിൽ കാടുപടലങ്ങൾ പടർന്നുപിടിക്കും. ഇതു വാഹന യാത്രക്കാരുടെ കാഴ്ച മറക്കുകയും അപകടങ്ങൾക്ക് ഇടയാക്കുകയും ചെയ്യും. വാഹനങ്ങളുടെ എണ്ണം ക്രമാതീതമായി വർധിച്ചതുമൂലം പരാധീനതകളുടെ നടുവിലാണ് ദേശീയപാത. വർഷങ്ങളായി നവീകരണ പ്രവർത്തനങ്ങൾ ഒന്നും നടക്കാത്ത ദേശീയപാതയുടെ വശങ്ങളിൽ ഇത്തരത്തിൽ മാലിന്യങ്ങൾ കൂടിക്കിടക്കുന്നതോടെ അപകട സാധ്യത വർധിപ്പിക്കുകയാണ്. അടിയന്തര ഘട്ടങ്ങളിൽ വാഹനങ്ങൾ വെട്ടിച്ചുമാറ്റുമ്പോൾ ഇത്തരത്തിൽ റോഡിന്‍റെ വശത്ത് കൂട്ടിയിട്ടിരിക്കുന്ന കോൺക്രീറ്റ് അവശിഷ്ടങ്ങളിൽ ഇടിച്ച് അപകടമുണ്ടാകാനുള്ള സാധ്യതയും ഏറെയാണ്. കാമറകൾ സ്ഥാപിച്ചും പരിശോധനകൾ നടത്തിയും മാലിന്യ നിക്ഷേപകരെ കണ്ടെത്തി ഇവർക്കെതിരെ കർശന നടപടിയെടുക്കുമ്പോൾ പട്ടാപ്പകൽ യാതൊരു നിയന്ത്രണവുമില്ലാതെ റോഡിന്‍റെ വശങ്ങളിൽ മാലിന്യം തള്ളുന്നവർക്കെതിരേ എന്തുകൊണ്ട് നടപടി സ്വീകരിക്കുന്നില്ലെന്നും പൊതു സമൂഹത്തിൽനിന്നും ചോദ്യങ്ങളുയരുന്നുണ്ട്.

കാഞ്ഞിരപ്പള്ളി ജനറൽ ആശുപത്രിയിൽ ഡയാലിസിസ് സെന്‍റർ നിർമാണം തുടങ്ങി

കാഞ്ഞിരപ്പള്ളി: ജനറൽ ആശുപത്രിയിൽ ഡയാലിസിസ് സെന്‍റർ നിർമാണം ആരംഭിച്ചു. ജില്ലാ - ബ്ലോക്ക് - പഞ്ചായത്തുകൾ സംയുക്തമായി ഒരു കോടി രൂപയോളം ചെലവഴിച്ചാണ് നിർമാണം. 15 ബെഡുകളോട് കൂടിയതാണ് ഡയാലിസിസ് സെന്‍റർ. ഏഴ് ബെഡുകൾ സ്ത്രീകൾക്കും ഏഴു ബെഡുകൾ പുരുഷന്മാർക്കും ഒരു ഐസൊലേഷൻ ബെഡും അടങ്ങുന്നതാണ് സെന്‍റർ. ഡയാലിസിസ് സെന്‍ററിന്‍റെ നിർമാണോദ്ഘാടനം ചീഫ് വിപ്പ് ഡോ.എൻ. ജയരാജ് നിർവഹിച്ചു. എംഎൽഎയുടെ ആസ്തി വികസന ഫണ്ടിൽനിന്ന് ഒരു കോടി രൂപ ചെലവഴിച്ച് നിർമാണം പൂർത്തിയായ പോസ്റ്റുമോർട്ടം മോർച്ചറി കോംപ്ലക്‌സിന്‍റെ ഉദ്ഘാടനവും ചീഫ് വിപ്പ് ഡോ.എൻ. ജയരാജ് നിർവഹിച്ചു. വാഴൂർ ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി അധ്യക്ഷത വഹിച്ചു. ജില്ലാ പഞ്ചായത്തംഗം ടി.എൻ. ഗിരീഷ് കുമാർ, വാഴൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, ചിറക്കടവ് പഞ്ചായത്ത് പ്രസിഡന്‍റ് സി.ആർ ശ്രീകുമാർ, ബ്ലോക്ക് പഞ്ചായത്തംഗങ്ങളായ ഷാജി പാമ്പൂരി, ലതാ ഷാജൻ, പി.എം ജോൺ, ബി. രവീന്ദ്രൻ നായർ, പഞ്ചായത്തംഗം ആന്‍റണി മാർട്ടിൻ, ആശുപത്രി സൂപ്രണ്ട് സാവൻ സാറാ മാത്യു, എക്‌സിക്യൂട്ടീവ് എൻജിനിയർ ആർ. ദീപ, ബ്ലോക്ക് പഞ്ചായത്ത് സെക്രട്ടറി എസ്. ഫൈസൽ, രാഷ്ട്രീയ പാർട്ടി പ്രതിനിധികളായ വി.ജി. ലാൽ, സി.ജി. ജ്യോതിരാജ്, എ.എം. മാത്യു, പി.എ. താഹ, പി.എ. ഷെമീർ എന്നിവർ പ്രസംഗിച്ചു.

കാഞ്ഞിരപ്പള്ളി ബ്ലോക്ക് പഞ്ചായത്ത് ഖാദി നൂല്‍ നിര്‍മാണകേന്ദ്രം ഉദ്ഘാടനം നാളെ

കാഞ്ഞിരപ്പള്ളി: സംസ്ഥാന സര്‍ക്കാരിന്‍റെ ഒരു പഞ്ചായത്തില്‍ ഒരു സംരംഭം പദ്ധതി പ്രകാരം കാഞ്ഞിരപ്പള്ളി ബ്ലോക്ക് പഞ്ചായത്തിന്‍റെ നേതൃത്വത്തില്‍ 2024-25 വാര്‍ഷിക പദ്ധതിയില്‍ നാല് ലക്ഷം രൂപ ചെലവഴിച്ച് നടപ്പിലാക്കുന്ന ഖാദി നൂല്‍ നിര്‍മാണകേന്ദ്രത്തിന്‍റെ ഉദ്ഘാടനം നാളെ രാവിലെ 10.30ന് മണിമലയിൽ ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് നിര്‍വഹിക്കും. 10 നൂല്‍നൂല്‍പ്പ് യന്ത്രങ്ങളില്‍ 11 പേര്‍ക്ക് നേരിട്ട് തൊഴില്‍ ലഭിക്കുന്ന പദ്ധതിയാണ് വിഭാവനം ചെയ്തിരിക്കുന്നത്. കോട്ടയം ജില്ലയിലെ എല്ലാ ഖാദി സെന്‍ററുകളിലേക്കും ആവശ്യമായ നൂല്‍ ഇവിടെ ഉത്പാദിപ്പിക്കും. നൂല്‍ നിര്‍മാണകേന്ദ്രത്തിന്‍റെ പൂര്‍ണനിയന്ത്രണം ഖാദി ബോര്‍ഡിന്‍റെ നേതൃത്വത്തിലാണ്. കാഞ്ഞിരപ്പള്ളി വ്യവസായ വകുപ്പ് ഓഫീസര്‍ കെ.കെ. ഫൈസല്‍ പദ്ധതി നിര്‍വഹണത്തിന് മേല്‍നോട്ടം വഹിക്കും. 2500 കിലോ നൂല്‍ എല്ലാ മാസം ഇവിടെ ഉത്പാദിപ്പിക്കും. ഇവിടെ തൊഴില്‍ ചെയ്യുന്നവര്‍ക്ക് പ്രതിമാസം 15,000 രൂപയുടെ വരുമാനം ലഭ്യമാക്കും. നൂല്‍നൂല്‍പ്പ് കേന്ദ്രം കറിക്കാട്ടൂര്‍ ഖാദി ഭവനിലാണ് പ്രവര്‍ത്തിക്കുന്നത്. മണിമല പഞ്ചായത്ത് പ്രസിഡന്‍റ് സിറിള്‍ തോമസ് അധ്യക്ഷത വഹിക്കും. ജില്ലാ പഞ്ചായത്തംഗം ജെസി ഷാജൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, ഖാദി ബോർഡ് മെംബർ കെ.എസ്. രമേശ് ബാബു, കോട്ടയം ഖാദി പ്രോജക്ട് ഓഫീസർ എം.വി. മനോജ് കുമാർ, സെക്രട്ടറി എസ്. ഫൈസല്‍, ജോയിന്‍റ് ബിഡിഒ ടി.ഇ. സിയാദ്, വ്യവസായ വികസന ഓഫീസര്‍ കെ.കെ. ഫൈസല്‍, ബ്ലോക്ക് പഞ്ചായത്തംഗങ്ങൾ, മണിമല പഞ്ചായത്തംഗങ്ങൾ തുടങ്ങിയവർ പ്രസംഗിക്കും.

വന്യജീവി ആക്രമണ പ്രതിരോധം: സെമിനാര്‍ നടത്തി

കാഞ്ഞിരപ്പള്ളി: വന്യജീവി ആക്രമണ പ്രതിരോധത്തിനും ലഘൂകരണത്തിനുമായി സംസ്ഥാന സര്‍ക്കാര്‍ രൂപീകരിച്ചിരിക്കുന്ന വിവിധ പരിപാടികളെക്കുറിച്ച് വിശദീകരിക്കുന്നതിനും ഈ വിഷയത്തില്‍ ജനപ്രതിനിധികള്‍ക്കുള്ള അഭിപ്രായങ്ങള്‍ അറിയിക്കുന്നതിനും ചര്‍ച്ചചെയ്യുന്നതിനുമായി ജനപ്രതിനിധികളും വനം വകുപ്പ് ഉദ്യോഗസ്ഥരും, തദ്ദേശസ്വയംഭണ വകുപ്പ് ഉദ്യോഗസ്ഥരും പങ്കെടുത്ത സെമിനാര്‍ കാഞ്ഞിരപ്പള്ളി ബ്ലോക്ക് പഞ്ചായത്ത് ഹാളില്‍ നടത്തി. ജനവാസമേഖലയില്‍ ജനങ്ങളുടെ ജീവനും സ്വത്തിനും കൃഷിക്കും അപകടകാരികളായ കാട്ടുപന്നികളെ നിയന്ത്രിക്കുന്നതിന് സംസ്ഥാന സര്‍ക്കാര്‍ ആവിഷ്കരിച്ചിരിക്കുന്ന മിഷന്‍ വൈല്‍ഡ് പിഗ്‌നെ കുറിച്ച് അസിസ്റ്റന്‍റ ഫോറസ്റ്റ് കണ്‍സര്‍വേറ്ററും സ്റ്റേറ്റ് നോഡല്‍ ഓഫീസറുമായ ശ്യാം മോഹന്‍ലാല്‍ ഐഎഫ്എസ്, കോട്ടയം ഡെപ്യൂട്ടി ഫോറസ്റ്റ് കണ്‍സര്‍വേറ്ററും ജില്ലാ കോ-ഓഡിനേറ്ററുമായ ജോണ്‍ മാത്യു എന്നിവര്‍ വിശദീകരിച്ചു. കാട്ടുപന്നികളെ നിയന്ത്രിക്കുന്നതിന് ഓരോ പഞ്ചായത്തിലും കൂടുതല്‍ ഷൂട്ടര്‍മാര്‍ക്ക് ലൈസന്‍സ് നല്‍കണമെന്നും നിയമ വ്യവസ്ഥകള്‍ ലഘൂകരിക്കണമെന്നും കുരങ്ങുശല്യം രൂക്ഷമായതിനാല്‍ കുരങ്ങിനെ ഒന്നാം പട്ടികയില്‍ പെടുത്തുകയും നിയന്ത്രിക്കാന്‍ പറ്റാത്ത തരത്തിലേക്കാക്കി മാറ്റുകയും ചെയ്ത കേന്ദ്ര വനം പരിസ്ഥിതി നിയമം പിന്‍വലിക്കണമെന്നും ജനപ്രതിനിധികള്‍ യോഗത്തില്‍ ആവശ്യമുന്നയിച്ചു. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് സെമിനാര്‍ ഉദ്ഘാടനം ചെയ്തു. വൈസ് പ്രസിഡന്‍റ് ജോളി മടുക്കക്കുഴി അധ്യക്ഷത വഹിച്ചു. പഞ്ചായത്ത് പ്രസിഡന്‍റുമാരായ കെ.കെ. ശശികുമാര്‍, സുബി സണ്ണി, സിറില്‍ തോമസ്, ജാന്‍സി സാബു, രേഖ ദാസ്, വൈസ് പ്രസിഡന്‍റുമാരായ സുമി ഇസ്മയില്‍, ഷീലമ്മ ഡൊമിനിക്ക്, പി.എന്‍. സുകുമാരന്‍, ബ്ലോക്ക് പഞ്ചായത്ത് ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ ടി.ജെ. മോഹനന്‍, ബിഡിഒ എസ്. ഫൈസല്‍, ജോയിന്‍റ് ബിഡിഒ ടി.ഇ. സിയാദ്, ഡപ്യൂട്ടി റേജ് ഓഫീസര്‍ വിനോദ്, പഞ്ചായത്ത് സെക്രട്ടിമാര്‍ തുടങ്ങിയവര്‍ സെമിനാറില്‍ പങ്കെടുത്തു.

ഉന്നത വിദ്യാഭ്യാസരംഗം മുൻഗണനാ മേഖല: മന്ത്രി ഡോ. ആർ. ബിന്ദു

വാഴൂർ: ഉന്നത വിദ്യാഭ്യാസ മേഖലയ്ക്ക് സർക്കാർ മുന്തിയ പരിഗണന നൽകി പദ്ധതികൾ നടപ്പിലാക്കി വരികയാണെന്ന് ഉന്നത വിദ്യാഭ്യാസ മന്ത്രി ഡോ.ആർ. ബിന്ദു. വാഴൂർ എസ്‌വിആർ എൻഎസ്എസ് കോളജിൽ റൂസാ പദ്ധതി പ്രകാരം നിർമിച്ച ഓഡിറ്റോറിയത്തിന്‍റെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. കഴിഞ്ഞ നാല് വർഷത്തിനുള്ളിൽ ഈ മേഖലയുടെ വികസനത്തിന് ആറായിരം കോടി രൂപ ചെലവഴിച്ചു. കേരളം 60 ശതമാനവും കേന്ദ്രം 40 ശതമാനവും എന്ന നിലയിലാണ് റൂസാ പദ്ധതിയുടെ ചെലവ് വിഹിതം വകയിരുത്തിയിരിക്കുന്നത്. വിദ്യാഭ്യാസ കാര്യത്തിൽ ഓരോ കുട്ടിക്കും തുക വകയിരുത്തിയിരിക്കുന്ന വിഭാഗത്തിൽ കേരളം ഒന്നാം സ്ഥാനത്താണ്. രാജ്യത്ത് മുൻ നിരയിൽ നിൽക്കുുന്ന ഉന്നത വിദ്യാഭ്യാസ സ്ഥാപനങ്ങളിൽ 21 ശതമാനവും കേരളത്തിലാണെന്നും മന്ത്രി ആർ. ബിന്ദു കൂട്ടിച്ചേർത്തു. ചീഫ് വിപ്പ് ഡോ.എൻ. ജയരാജ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് തോമസ് വെട്ടുവേലി, പ്രിൻസിപ്പൽ ഡോ.ബി. ഗോപകുമാർ, വാർഡ് മെംബർ സൗദ ഇസ്മയിൽ, വി. സിന്ധു, എസ്. ശ്രീകല, വി. ബബിൻ, ഡോ.കെ.എൻ. പ്രീതി, ടി.പി. ശ്രീനിവാസ് എന്നിവർ പ്രസംഗിച്ചു.

സഭാദിനത്തിൽ പാരമ്പര്യങ്ങളിൽ വിളങ്ങി കുറവിലങ്ങാട്ട് മെഗാ മാർഗംകളി

കുറവിലങ്ങാട്: സഭാദിനത്തിൽ പാരമ്പര്യങ്ങളുണർത്തി കലാവിരുന്ന്. മേജർ ആർക്കിഎപ്പിസ്കോപ്പൽ മർത്ത്മറിയം അർക്കദിയാക്കോൻ തീർഥാടന ദേവാലയത്തിലെ യുവജനങ്ങളാണ് പാരമ്പര്യത്തനിമ സമ്മാനിച്ച് സംഘശക്തിയിൽ തിളങ്ങിയത്. മെഗാ മാർഗംകളി സമ്മാനിച്ചായിരുന്നു യുവതയുടെ വേറിട്ട ശ്രദ്ധ നേടൽ. എസ്എംവൈഎം യൂണിറ്റിന്‍റെ സുവർണജൂബിലി ആഘോഷ സമാപനങ്ങളുടെ ആരംഭമായാണ് കലാവിരുന്നൊരുക്കിയത്. കൊച്ചുകുട്ടികൾ മുതൽ മുതിർന്നവർ വരെയുള്ള നൂറോളം പേർ മാർഗംകളിയുടെ ഭാഗമായി. ദ്രുതപദചലനങ്ങളും സംഗീത മികവും പാരമ്പര്യത്തനിമയും സമ്മേളിച്ച കലാവിരുന്ന് ആസ്വദിക്കാൻ ആയിരത്തോളം പേരാണ് എത്തിയത്. ദൈവമാതാവ് ഉയർത്തിനാട്ടിയ കൽക്കുരിശിനു സമീപമായിരുന്നു മെഗാ മാർഗംകളി. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി മാർഗംകളിയുടെ ദീപം തെളിച്ച് സന്ദേശം നൽകി. സീനിയർ അസിസ്റ്റന്‍റ് വികാരി ഫാ. ജോസഫ് മണിയഞ്ചിറ, അസിസ്റ്റന്‍റ് വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലയിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റ് ഫാ. ജോസ് കോട്ടയിൽ, എസ്എംവൈഎം യൂണിറ്റ് പ്രസിഡന്‍റുമാരായ സെബാസ്റ്റ്യൻ പൊയ്യാനി, അമല ആൻ ബെന്നി എന്നിവർ പ്രസംഗിച്ചു.

360 ഡിഗ്രി മെറ്റബോളിക് ഡിസീസ് മാനേജ്മെന്‍റ് സെന്‍റര്‍ ആരംഭിച്ചു

പാലാ: കെ.എം. മാണി സ്മാരക ഗവണ്‍മെന്‍റ് ജനറല്‍ ആശുപത്രിയില്‍ 360 ഡിഗ്രി മെറ്റബോളിക് ഡിസീസ് മാനേജ്മെന്‍റ് സെന്‍ററിന്‍റെ ഉദ്ഘാടനം ജോസ് കെ. മാണി എംപി നിര്‍വഹിച്ചു. ജീവിതശൈലീ രോഗലക്ഷണങ്ങള്‍ ഗുരുതരമാകും മുന്‍പ് സങ്കീര്‍ണതകള്‍ തിരിച്ചറിഞ്ഞ് പ്രാരംഭ ദിശയില്‍ കണ്ടെത്തി ചികിത്സിക്കാനുള്ള സംവിധാനമാണിത്. പ്രമേഹം, ഹൃദ്രോഗം, കാന്‍സര്‍ അടക്കമുള്ള ജീവിതശൈലീ രോഗങ്ങളും ഭക്ഷണക്രമം നിശ്ചയിക്കല്‍, മാനസികാരോഗ്യം എന്നിവയും ഇതുവഴി തുടക്കത്തില്‍ത്തന്നെ കണ്ടെത്തി ചികിത്സ ഒരുക്കാന്‍ സാധിക്കും. നഗരസഭയ്ക്കു ലഭിച്ച ഹെല്‍ത്ത് ഗ്രാന്‍ഡ് 43 ലക്ഷം രൂപ വിനിയോഗിച്ചാണ് ചികിത്സാവിഭാഗം പ്രവര്‍ത്തനം ആരംഭിച്ചത്. ജീവിതശൈലീ രോഗ പരിശോധനകളെ ഒരു കുടക്കീഴിലാക്കുന്നതിന്‍റെ ഭാഗമായി സര്‍ക്കാരിന്‍റെ നേതൃത്വത്തില്‍ സംസ്ഥാനത്തുടനീളം നടപ്പാക്കുന്ന പദ്ധതിയുടെ ഭാഗമായാണ് പാലാ ജനറല്‍ ആശുപത്രിയെയും ഉള്‍പ്പെടുത്തിയിരിക്കുന്നത്. പ്രമേഹം പോലുള്ള ജീവിതശൈലീ രോഗങ്ങള്‍ സാര്‍വത്രികമായി മാറുന്ന ഈ കാലഘട്ടത്തില്‍ രോഗം പ്രാരംഭ ദിശയില്‍ത്തന്നെ കണ്ടെത്തി ചികിത്സ ഉറപ്പാക്കുകയാണ് നോണ്‍ കമ്യൂണിക്കബിള്‍ ഡിസീസ് കെയര്‍ സെന്‍ററിന്‍റെ ലക്ഷ്യം. ഇവിടെ ഡയബറ്റിക് ഫ്യൂട്ട്, റെറ്റിനോപ്പതി, നെഫ്രോപ്പതി എന്നിവയില്‍ അടിസ്ഥാന രോഗനിര്‍ണയങ്ങളും ചികിത്സയും ലഭ്യമാക്കുന്നതിനോടൊപ്പം ഡയറ്റ്, പുകവലിനിര്‍ത്തല്‍ എന്നിവയ്ക്കായി കൗണ്‍സലിംഗും മെഡിക്കല്‍ കണ്‍സള്‍ട്ടേഷനും സൗകര്യം ഏര്‍പ്പെടുത്തിയിട്ടുണ്ട്. ബയോ ടെസ്റ്റിയോ മീറ്റര്‍, ഹാന്‍സ് ഹെല്‍ഡ് ഡോപ്പര്‍, ഫാറ്റ് ഇന്‍വെസസ് മെഷീന്‍, മെട്രിയാടിക് കാമറ, മിനി സൈറോ മീറ്റര്‍ എന്നീ ഉപകരണങ്ങളും സജ്ജമാക്കിയിട്ടുണ്ട്. പാലാ നഗരസഭാ അധ്യക്ഷന്‍ തോമസ് പീറ്റര്‍ അധ്യക്ഷത വഹിച്ചു. വെളിയന്നൂര്‍ പഞ്ചായത്ത് പ്രസിഡന്‍റ് സജേഷ് ശശി, നഗരസഭാ വൈസ് ചെയര്‍പേഴ്സണ്‍ ബിജി ജോജോ, നഗരസഭാംഗങ്ങളായ സാവിയോ കാവുകാട്ട്, ജോസ് ചീരാംകുഴി, പ്രഫ. സതീഷ് ചൊള്ളാനി, ജോസിന്‍ ബിനോ, ലീന സണ്ണി, സിജി പ്രസാദ്, സതി ശശികുമാര്‍ തുടങ്ങിയവര്‍ പങ്കെടുത്തു.

സീറോ മലബാര്‍ സഭാദിനം ആചരിച്ചു

ചേര്‍പ്പുങ്കല്‍: പൈതൃകം തലമുറകള്‍ക്ക് പകര്‍ന്നുനല്‍കാന്‍ നമുക്കു കടമയുണ്ടെന്നും ചരിത്രം പഠിച്ച് വിശ്വാസത്തിന് ധൈര്യപൂര്‍വം സാക്ഷ്യം നല്‍കണമെന്നും ചേര്‍പ്പുങ്കല്‍ ഫൊറോന വികാരി ഫാ. മാത്യു തെക്കേല്‍. കത്തോലിക്ക കോണ്‍ഗ്രസ്് പാലാ രൂപതാ സമിതിയുടെ ആഭിമുഖ്യത്തില്‍ സീറോ മലബാര്‍ സഭാദിനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആദ്യമായാണ് മാര്‍ത്തോമ്മാ സ്മാരകത്തില്‍ സഭാദിനം ആചരിക്കുന്നത്. രൂപതാ പ്രസിഡന്‍റ് ഇമ്മാനുവല്‍ നിധീരിയുടെ അധ്യക്ഷതയില്‍ ചേര്‍ന്ന സമേളനത്തില്‍ ഡോ. പി.സി. അനിയന്‍കുഞ്ഞ്, റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, ജോസ് വട്ടുകുളം, ജോയി കണിപ്പറമ്പില്‍, ആന്‍സമ്മ സാബു, അഡ്വ. ജോണ്‍സണ്‍ വീട്ടിയാങ്കല്‍, സി.എം. ജോര്‍ജ്, പയസ് കവളംമാക്കല്‍, സിന്ധു ജയ്ബു, ഫാ. തോമസ് പരിയാരത്ത്, ജോര്‍ജ് മണിയങ്ങാട്ട്, മാര്‍ട്ടിന്‍ കോലടി, സാബു പൂണ്ടിക്കുളം, ടോമി കണ്ണീറ്റുമാലില്‍, ബെന്നി കിണറ്റുകര, രാജേഷ് പാറയില്‍, ജോബിന്‍ പുതിയിടത്തുചാലില്‍, ബെല്ലാ സിബി, കുര്യാക്കോസ് തുടങ്ങിയവര്‍ പ്രസംഗിച്ചു.

മാലിന്യനിക്ഷേപകേന്ദ്രം ഇനി മുതല്‍ മിനിപാര്‍ക്ക്

കിടങ്ങൂര്‍: പഞ്ചായത്തിലെ കട്ടച്ചിറ ചെക്ക്ഡാം പരിസരം മാലിന്യങ്ങള്‍ വലിച്ചെറിഞ്ഞും സാമൂഹ്യവിരുദ്ധ ശല്യങ്ങളിലൂടെയും നാട്ടുകാരുടെ സ്വൈരജീവിതത്തിന് തടസമായിരുന്ന പ്രദേശം ഇപ്പോള്‍ മീനച്ചിലാറിന്‍റെ മനോഹര തീരമായി മാറി. ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബർ‍ ജോസ്മോന്‍ മുണ്ടയ്ക്കല്‍ അനുവദിച്ച 10 ലക്ഷം രൂപയില്‍നിന്ന് അഞ്ചു ലക്ഷം രൂപ ഉപയോഗിച്ചുള്ള ഒന്നാംഘട്ട പ്രവര്‍ത്തനങ്ങള്‍ പൂര്‍ത്തീകരിച്ചാണ് ചെക്ക്ഡാമിന്‍റെ കിടങ്ങൂര്‍ പതിമൂന്നാം വാര്‍ഡിന്‍റെ ഭാഗം മനോഹരമാക്കിയത്. ചെക്ക്ഡാമിലേക്ക് ഇറങ്ങുന്ന ഭാഗത്ത് സംരക്ഷണഭിത്തികളും സ്റ്റീല്‍ പൈപ്പ് ഉപയോഗിച്ചുള്ള വേലികളും ഗെയ്റ്റും സ്ഥാപിക്കുകയും ചെക്ക്ഡാമിലേക്കുള്ള നടപ്പാത കോണ്‍ക്രീറ്റിംഗ് നടത്തുകയും അപകടസൂചനാ ബോര്‍ഡുകള്‍ സ്ഥാപിക്കുകയും ചെയ്തു. കൂടാതെ ചെക്ക്ഡാമിലെ വെള്ളച്ചാട്ടം ദര്‍ശിക്കുന്നതിനായി സ്റ്റീല്‍ പൈപ്പുകൊണ്ടുള്ള ഇരിപ്പിടങ്ങള്‍ ക്രമീകരിക്കുകയും ടൈല്‍ വിരിച്ച് പരിസരം മനോഹരമാക്കുകയും ചെയ്തു. രാത്രികാലങ്ങളിലെ സാമൂഹ്യവിരുദ്ധശല്യങ്ങള്‍ പൂര്‍ണമായും ഒഴിവാക്കുന്നതിനായി ജില്ലാ പഞ്ചായത്ത് മെംബർ‍ ജോസ്മോന്‍ മുണ്ടയ്ക്കല്‍ ചെക്ക്ഡാമിന് മുമ്പില്‍ മിനിമാസ്റ്റ് ലൈറ്റ് സ്ഥാപിക്കുകയും പാമ്പാടി ബ്ലോക്ക് പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ബ്ലോക്ക് പഞ്ചായത്ത് മെംബർ പ്രഫ. ഡോ. മേഴ്സി ജോണ്‍ മുഖേന അനുവദിച്ച ഫണ്ട് ഉപയോഗിച്ച് സിസിടിവിയും സ്ഥാപിച്ചു. ഈ പ്രവര്‍ത്തനങ്ങള്‍ എല്ലാം പൂര്‍ത്തീകരിച്ചതോടെ മാലിന്യം വലിച്ചെറിയുന്ന കേന്ദ്രമായിരുന്ന ചെക്ക്ഡാം പരിസരം മനോഹരമായ മിനിപാര്‍ക്കായി മാറി. വൈകുന്നേരങ്ങളില്‍ പരിസരവാസികള്‍ക്കും മറ്റും മീനച്ചിലാറിന്‍റെ കിടങ്ങൂര്‍ ചെക്ക്ഡാം ഭാഗത്തെ മനോഹാരിത ദര്‍ശിക്കാനുള്ള സുരക്ഷിതസ്ഥാനമായി ഈ ഭാഗം മാറി. രണ്ടാം ഘട്ടമായി ചെക്ക്ഡാമിന്‍റെ മറുകരയില്‍ പന്ത്രണ്ടാം വാര്‍ഡിന്‍റെ ഭാഗത്തും ആവശ്യമായ സുരക്ഷാക്രമീകരണങ്ങള്‍ ഏര്‍പ്പെടുത്തിക്കൊണ്ട് മനോഹരമാക്കുന്നതാണ്. കിടങ്ങൂര്‍ പഞ്ചായത്ത് പതിമൂന്നാം വാര്‍ഡില്‍ പ്രവര്‍ത്തിച്ചുവരുന്ന പുഴയോരം റെസിഡന്‍റ്സ് അസോസിയേഷനാണ് ഈ പ്രവര്‍ത്തനങ്ങള്‍ ഏകോപിപ്പിക്കുന്നതിന് നേതൃത്വം വഹിച്ചത്. ഒന്നാംഘട്ട നിര്‍മാണം പൂര്‍ത്തീകരിച്ച മിനി പാര്‍ക്കിന്‍റെ ഉദ്ഘാടനം ഇന്നു വൈകുന്നേരം അഞ്ചിന് ജില്ലാ പഞ്ചായത്ത് മെമ്പര്‍ ജോസ്മോന്‍ മുണ്ടയ്ക്കല്‍ നിര്‍വഹിക്കും. പഞ്ചാത്ത് പ്രസിഡന്‍റ് അഡ്വ. ഇ.എം. ബിനു അധ്യക്ഷനാകും. പുഴയോരം റെസിഡന്‍റ്സ് അസോസിയേഷന്‍ പ്രസിഡന്‍റും ബ്രില്യന്‍റ് സ്റ്റഡി സെന്‍റര്‍ ഡയറക്ടറുമായ ബി. സന്തോഷ് കുമാര്‍, ബ്ലോക്ക് പഞ്ചായത്ത് മെമ്പര്‍ പ്രഫ. ഡോ. മേഴ്സി ജോണ്‍, പഞ്ചായത്ത് മെമ്പര്‍ രശ്മി രാജേഷ് എന്നിവര്‍ പ്രസംഗിക്കും.

അന്ത്യാളത്ത് മിനി മാസ്റ്റ് ലൈറ്റ് സ്ഥാപിച്ചു

പയപ്പാര്‍ :ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബർ രാജേഷ് വാളിപ്ലാക്കല്‍ അനുവദിച്ച ഫണ്ട് ഉപയോഗിച്ച് കരൂര്‍ പഞ്ചായത്തിലെ അന്ത്യാളം വാര്‍ഡില്‍ പുഴയോരത്ത് എലിപ്പുലിക്കാട്ട് പാലം ജംഗ്ഷനില്‍ മിനിമാസ്റ്റ് ലൈറ്റ് സ്ഥാപിച്ചു. പഞ്ചായത്ത് മെംബർ‍ ലിന്‍റണ്‍ ജോസഫിന്‍റെ അധ്യക്ഷതയില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് മെംബർ‍ രാജേഷ് വാളിപ്ലാക്കല്‍ ലൈറ്റിന്‍റെ സ്വിച്ച് ഓണ്‍ കര്‍മം നിര്‍വഹിച്ചു. ബ്ലോക്ക് പഞ്ചായത്ത് മെംബർ ലിസമ്മ ബോസ്, ഡോ. രാജു സണ്ണി, ബോസ് വരകില്‍പറമ്പില്‍, സിബി ഓടയ്ക്കല്‍ തുടങ്ങിയവര്‍ പ്രസംഗിച്ചു.

രാഷ്‌ട്രീയ ചിന്തകൾ വഴിമാറി; ജോസ് കെ. മാണിക്ക് ആശംസാപ്രവാഹം

കുറവിലങ്ങാട്: രാഷ്ട്രീയ എതിരാളികൾ പോലും ജോസ് കെ. മാണിക്ക് കലവറയില്ലാത്ത ആശംസകൾ സമ്മാനിച്ചു. സയൻസ് സെന്‍റർ ഉദ്ഘാടനവേളയിൽ സ്വാഗതപ്രസംഗം മുതൽ നന്ദി വരെ എല്ലാ പ്രസംഗകരും ജോസ് കെ. മാണിയുടെ നേതൃത്വത്തെ വാനോളം പുകഴ്ത്തി. സയൻസ് സിറ്റിയുടെ ശില്പി എന്നാണ് സ്വാഗത പ്രസംഗകയായ മന്ത്രി ഡോ.ആർ. ബിന്ദു വിശേഷിപ്പിച്ചത്. സയൻസ് സെന്‍റർ യാഥാർഥ്യമാക്കാൻ ജോസ് കെ. മാണിയുടെ ഇടപെടൽ എടുത്തുപറയുന്നു എന്നായിരുന്നു മുഖ്യമന്ത്രിയുടെ നിലപാട്. ഫ്രാൻസിസ് ജോർജ് എംപിയും ജോസ് കെ. മാണി മുൻഗാമി എന്ന നിലയിൽ നടത്തിയ പരിശ്രമങ്ങൾക്ക് ആശംസകളും നന്ദിയും നേർന്നു. മോൻസ് ജേസഫ് എംഎൽഎയും ജോസ് കെ .മാണി എംപിയുടെ ഇടപെടലുകൾ പരാമർശിച്ചു. ജോസ് കെ. മാണി എംപിയെക്കുറിച്ചുള്ള പരാമർശങ്ങൾ നിറഞ്ഞ കരഘോഷത്തോടെയാണ് സദസ് ഏറ്റുവാങ്ങിയത് ഉദ്ഘാടന സമ്മേളനത്തിന് മണിക്കൂറുകൾക്കു മുമ്പുതന്നെ സമ്മേളന വേദിയിൽ എത്തിയ ജോസ് കെ. മാണി നാട്ടുകാരുമായി സൗഹൃദം പങ്കിട്ടും തുടർപ്രവർത്തനങ്ങൾ സംബന്ധിച്ച് വിശദീകരിച്ചും സജീവമായിരുന്നു. ആമുഖപ്രഭാഷണത്തിൽ ഈ പദ്ധതി ആരുടെ എന്ന സ്വയം ചോദ്യത്തിന് ജനങ്ങളുടേതെന്ന ഉത്തരവും ജോസ് കെ. മാണി സമ്മാനിച്ചു. മുഖ്യമന്ത്രിയായിരുന്ന ഉമ്മൻചാണ്ടിയെയും മന്ത്രിയായിരുന്ന കെ. എം. മാണിയെയും പ്രത്യേകം പരാമർശിച്ചു. പൊതുപ്രവർത്തകനെന്ന നിലയിൽ അമൂല്യമായ ഒരു നിമിഷമാണ് സയൻസ് സെന്‍ററിന്‍റെ ഉദ്ഘാടനം എന്ന് ജോസ് കെ. മാണി പറഞ്ഞു.

ഐക്യം നിലനിർത്തേണ്ടത് ക്രൈസ്തവ സഭകളുടെ ദൗത്യം: ബിഷപ് മാർ ഇഗ്നാത്തിയോസ്

നിലയ്ക്കൽ: ഐക്യം നിലനിർത്തുകയെന്നത് എല്ലാ ക്രൈസ്തവ സഭകളുടെയും ദൗത്യമാണെന്ന് നിലയ്ക്കൽ എക്യുമെനിക്കൽ ട്രസ്റ്റ് വൈസ് ചെയർമാൻ ബിഷപ് ഡോ. ജോഷ്വ മാർ ഇഗ്നാത്തിയോസ് പറഞ്ഞു. മലങ്കര കത്തോലിക്കാ സഭ മാവേലിക്കര രൂപതാ ഭരണ ചുമതലയൊഴിഞ്ഞ ജോഷ്വാ മാർ ഇഗ്നാത്തിയോസിനു നിലയ്ക്കൽ സെന്‍റ് തോമസ് എക്യൂമെനിക്കൽ ചർച്ചിൽ ദുക്റാനാ തിരുനാൾ സമാപനത്തിനു ശേഷം സീതത്തോട്, ചിറ്റാർ, തുലാപ്പള്ളി പൗരാവലിയുടെ നേതൃത്വത്തിൽ നൽകിയ സ്നേഹാദരവിന് മറുപടി സന്ദേശം നൽകുകയായിരുന്നു അദ്ദേഹം. മാർത്തോമ്മ ശ്ലീഹായുടെ പാരന്പര്യമുള്ള ഭാരത ക്രൈസ്തവ സഭകൾ ഒരേ ലക്ഷ്യത്തോടെ മുന്നേറുന്നവരാണെന്നും ക്രിസ്തു സാക്ഷ്യം നിർവഹിക്കാൻ ഐക്യത്തിൽ വളരുകയാണ് വേണ്ടതെന്നും ബിഷപ് മാർ ഇഗ്നാത്തിയോസ് അഭിപ്രായപ്പെട്ടു. കെ.യു. ജനീഷ് കുമാർ എംഎൽഎ സമ്മേളനം ഉദ്ഘാടനം ചെയ്തു. കെസിസി മുൻ അധ്യക്ഷൻ ബിഷപ് ഉമ്മൻ ജോർജ് കോശി അധ്യക്ഷത വഹിച്ചു. സീതത്തോട് യുസിഎ പ്രസിഡന്‍റ് ഫാ. ഗീവർഗീസ് പാലമൂട്ടിൽ, ബഥനി ആശ്രമം സുപ്പീരിയർ ഫാ. ഗീവർഗീസ് കുറ്റിയിൽ, നിലയ്ക്കൽ ചർച്ച് അഡ്മിനിസ്ട്രേറ്റർ ഫാ. ഷൈജു മാത്യു, ക്നാനായ സമുദായ ഭദ്രാസന സെക്രട്ടറി ഫാ.നോബിൻ ഇളകുറ്റൂർ, ഫാ. ഐവാൻ ജോസഫ്, ജൂബി ചരുവിൽ, സി.ടി.തോമസ്, ജോർജ് ജേക്കബ്, ബോബി ഏബ്രഹാം, ഡോ. ഏബ്രഹാം മലമണ്ണേൽ, തോമസ് കുട്ടി തേവർമുറിയിൽ എന്നിവർ പ്രസംഗിച്ചു.

ജോസ്‌കോ ആശുപത്രിയില്‍ പാരാമെഡിക്കല്‍ കോഴ്സ്: അഡ്മിഷന്‍ ആരംഭിച്ചു

പന്തളം: ഇടപ്പോണ്‍ ജോസ്‌കോ മള്‍ട്ടി സ്പെഷാലിറ്റി ആശുപത്രിയില്‍ പാരാമെഡിക്കല്‍ തൊഴിലധിഷ്ഠിത കോഴ്സുകളിലേക്ക് അഡ്മിഷന്‍ ആരംഭിച്ചു. ഇന്ത്യയിലും വിദേശ രാജ്യങ്ങളിലും വളരെയധിയകം തൊഴിലവസരമുള്ള കോഴ്സിലേക്ക് പത്താം ക്ലാസ് പാസായവര്‍ക്കും പഠിക്കാം. ലിങ്കയാസ് യൂണിവേഴ്സിറ്റി നടത്തുന്ന ദ്വിവത്സര ഡിപ്ലോമയ്ക്കും ത്രിവത്സര ഡിഗ്രിക്കും പഠിക്കാന്‍ പ്ലസ്ടു പാസാകണം. പ്ലസ്ടു ഏത് ഗ്രൂപ്പില്‍ ഉള്ളവര്‍ക്കും പഠിക്കാം. എന്‍സിവിആര്‍ടി നടത്തുന്ന ദ്വിവത്സര മെഡിക്കല്‍ ലബോറട്ടറി ടെക്നീഷ്യൻ, റേഡിയോളജി, ഇമേജിംഗ് ടെക്നോളജി, എന്നീ കോഴ്സുകളുടെ ഡിപ്ലോമയും നടത്തും. കേരള സര്‍ക്കാരിന്‍റെയും പാരാ മെഡിക്കല്‍ കൗണ്‍സിലിന്‍റെയും അംഗീകാരമുള്ള ഹെല്‍ത്ത് ഇന്‍സ്‌പെക്ടര്‍ ഡിപ്ലോമ കോഴ്സുമുണ്ട്. സയന്‍സ് ഗ്രൂപ്പില്‍ പ്ലസ്ടു പാസായവര്‍ക്ക് അപേക്ഷിക്കാം. പഠനത്തോടൊപ്പം ജോസ്‌കോയില്‍ പ്രായോഗിക പരിശീലനവും നല്‍കും. ഹോസ്പിറ്റല്‍ അഡ്മിനിസ്‌ട്രേഷന്‍, ഹോം നഴ്‌സിംഗ് എന്നീ ഒരു വര്‍ഷ കോഴ്സുകളുമുണ്ട്. പത്താം ക്ലാസ് പാസായവര്‍ക്ക് അഡ്മിഷന്‍ ലഭിക്കും. 0479 -237 4982 / 95444 60920

മേലേക്കുളം ഉദ്ഘാടനം നാളെ

കാഞ്ഞിരപ്പള്ളി: ബ്ലോക്ക് പഞ്ചായത്തിന്‍റെയും മണിമല പഞ്ചായത്തിന്‍റെയും നേതൃത്വത്തില്‍ മണിമല പഞ്ചായത്ത് 12ാം വാര്‍ഡില്‍ അമൃത് സരോവര്‍ പദ്ധതിയില്‍ പുനരുദ്ധാരണം നടത്തി ഉപയോഗ്യമാക്കിയ മേലേക്കുളത്തിന്‍റെ ഉദ്ഘാടനം നാളെ രാവിലെ 11.30ന് ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് നിര്‍വഹിക്കും. പ്രളയത്തിലും പ്രകൃതി ക്ഷോഭത്തിലും പെട്ട് മൂടിപ്പോയി മാലിന്യ നിക്ഷേപ കേന്ദ്രമായി മാറിയിരുന്ന മേലേക്കുളം മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി വഴിയാണ് ഉപയോഗ്യമാക്കി പൊതുജനങ്ങള്‍ക്കായി സമര്‍പ്പിക്കുന്നത്. യോഗത്തിൽ മണിമല പഞ്ചായത്ത് പ്രസിഡന്‍റ് സിറിള്‍ തോമസ് അധ്യക്ഷത വഹിക്കും. ജില്ലാ പഞ്ചായത്തംഗം ജെസി ഷാജൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, ബ്ലോക്ക് പഞ്ചായത്തംഗങ്ങൾ, മണിമല പഞ്ചായത്തംഗങ്ങൾ തുടങ്ങിയവർ പ്രസംഗിക്കും.

പൊതുപണിമുടക്ക്; വാഹനജാഥ ഇന്നും നാളെയും

കാഞ്ഞിരപ്പള്ളി: ഒന്പതിന് നടക്കുന്ന പൊതുപണിമുടക്കിന്‍റെ പ്രചാരണാർഥം സംയുക്ത ട്രേഡ് യൂണിയൻ സംഘടിപ്പിച്ചിട്ടുള്ള വാഹന പ്രചാരണ ജാഥകൾ ഇന്നും നാളെയും നടക്കും. പൂഞ്ഞാർ നിയോജക മണ്ഡലം ജാഥ ഇന്നു രാവിലെ ഒന്പതിന് ഇളങ്കാട് സിഐടിയു ജില്ലാ വൈസ് പ്രസിഡന്‍റ് ലാലിച്ചൻ ജോർജ് ഉദ്ഘാടനം ചെയ്യും. കെ. രാജേഷ് ക്യാപ്റ്റനും വി.പി. സുഗതൻ, സുരേഷ് ബാബു എന്നിവർ വൈസ് ക്യാപ്റ്റൻമാരായിരിക്കും. രാവിലെ 11ന് മുണ്ടക്കയം, 12ന് മടുക്ക, ഉച്ചകഴിഞ്ഞ് രണ്ടിന് മുക്കൂട്ടുതറ, മൂന്നിന് എരുമേലി എന്നിവിടങ്ങളിൽ പര്യടനം നടത്തി വൈകുന്നേരം അഞ്ചിന് പാറത്തോട്ടിൽ പൊതുസമ്മേളനത്തോടെ സമാപിക്കും. കാഞ്ഞിരപ്പള്ളി നിയോജക മണ്ഡലം ജാഥ നാളെ രാവിലെ ഒന്പതിന് കാഞ്ഞിരപ്പള്ളി പേട്ട കവലയിൽ സിഐടിയു അഖിലേന്ത്യാ വർക്കിംഗ് കമ്മിറ്റിയംഗം കെ.ജെ. തോമസ് ഉദ്ഘാടനം ചെയ്യും. രാവിലെ 10.30ന് പൊന്തൻപുഴ, 11.30ന് മണിമല ബസ് സ്റ്റാൻഡ്, 12ന് പത്തനാട്, 12.30ന് നെടുംകുന്നം, 1.30ന് കറുകച്ചാൽ, ഉച്ചകഴിഞ്ഞ് 3.30ന് കൊടുങ്ങൂർ, വൈകുന്നേരം 4.30ന് പള്ളിക്കത്തോട് എന്നിവിടങ്ങളിൽ പര്യടനം നടത്തി വൈകുന്നേരം അഞ്ചിന് പൊതുസമ്മേളനത്തോടെ പൊൻകുന്നത്ത് സമാപിക്കും. സിജി ജോതിരാജ് ക്യാപ്റ്റനും പി.കെ. നസീർ വൈസ് ക്യാപ്റ്റനും സണ്ണിക്കുട്ടി അഴകംപ്രായിൽ മാനേജരുമായിരിക്കും.

സയൻസ് സിറ്റി ഉദ്ഘാടനം ആഘോഷമാക്കി നാട്

കുറവിലങ്ങാട് : ശാസ്ത്രവും കൗതുകവും വിനോദവും വിജ്ഞാനവും സമ്മാനിക്കുന്ന സയൻസ് സിറ്റിയുടെ ആദ്യഘട്ടമായ സയൻസ് സെന്‍ററിന്‍റെ ഉദ്ഘാടനത്തെ നാട് ആവേശത്തോടെ വരവേറ്റു. ദിവസങ്ങളായി ഉദ്ഘാടനം ആഘോഷമാക്കാനുള്ള തയാറെടുപ്പുകളിലായിരുന്നു നാടും പ്രാദേശിക ജനപ്രതിനിധികളും. പള്ളിക്കവല വരെ കൊടിതോരണങ്ങൾകൊണ്ട് എംസി റോഡ് അലങ്കരിച്ചിരുന്നു. എം സി റോഡിലെ വലിയ കുഴികൾ അടച്ച് യാത്രായോഗ്യമാക്കി എന്നത് നാടിന് ഏറെ നേട്ടമായി. സയൻസ് സിറ്റിയിലെ കെട്ടിടങ്ങൾ മുഴുവൻ വൈദ്യുതദീപങ്ങളാൽ അലങ്കരിച്ചിരുന്നു. മുഖ്യമന്ത്രി പങ്കെടുക്കുന്ന സമ്മേളനം എന്ന നിലയിൽ വലിയ സുരക്ഷാക്രമീകരണങ്ങളും ഏർപ്പെടുത്തിയിരുന്നു. രണ്ടു ദിവസമായി നാടുനീളെ വലിയ അനൗൺസ്മെന്‍റ് ഉണ്ടായിരുന്നു. വിവിധ പഞ്ചായത്തുകളുടെയും സംഘടനകളുടെയും നേതൃത്വത്തിൽ വാഹനങ്ങളിൽ ആൾക്കാരെ ഉദ്ഘാടനത്തിൽ എത്തിക്കാനുള്ള ക്രമീകരണങ്ങളും നടത്തിയിരുന്നു. പരാതികളില്ലാതെ ഗതാഗതക്രമീകരണങ്ങളും നടത്താൻ കഴിഞ്ഞു. ആദ്യദിനംതന്നെ സയൻസ് സെന്‍റർ സന്ദർശിക്കുക എന്ന ആവേശത്തോടെയായിരുന്നു നാട്ടുകാരുടെ ഒഴുക്ക് . മഴ മാറിനിന്ന് അനുകൂല കാലാവസ്ഥ സംഘാടകർക്ക് വലിയ ആശ്വാസമായി. കൂറ്റൻ പന്തൽ നിറഞ്ഞുകവിഞ്ഞതോടെ ആളുകളെ സയൻസ് സിറ്റിയുടെ കാമ്പസിൽ കസേരയിട്ട് ഇരുത്തുകയായിരുന്നു. സ്റ്റേജിന്‍റെ ക്രമീകരണങ്ങളിൽ അവസാന നിമിഷം നേരിയ മാറ്റങ്ങൾ വരുത്തേണ്ടിവന്നത് മാത്രമാണ് നേരിയ അസ്വസ്ഥതകൾ സൃഷ്ടിച്ചത്. മുഖ്യമന്ത്രിയും വിശിഷ്ടാതിഥികളും എത്തുന്നതിന് ഒരു മണിക്കൂറോളം മുമ്പാണ് സ്റ്റേജിന്‍റെ ക്രമീകരണങ്ങൾ പൂർത്തീകരിച്ചത്.

ബിഎസ്എന്‍എല്‍ ടവറിന് റെയ്ഞ്ചില്ല; ‌ഉപയോക്താക്കള്‍ വലയുന്നു

രാമപുരം: പഞ്ചായത്തിലെ വടക്കുംഭാഗം, മുല്ലമറ്റം, നെല്ലിയാനിക്കുന്ന് പ്രദേശങ്ങളില്‍ മൊബൈല്‍ ഫോണുകള്‍ക്ക് നെറ്റ് വര്‍ക്ക് കിട്ടാത്തത് മൂലം ബിഎസ്എന്‍എൽ ഉപഭോക്താക്കള്‍ ദുരിതത്തില്‍. ഫോണ്‍ വിളിച്ചാല്‍ കിട്ടാതെ വരികയും പൂര്‍ത്തിയാക്കാനാകാതെ കട്ടാകുകയും ചെയ്യുന്നത് നിത്യസംഭവമാണ്. ബാങ്കിംഗ് ആവശ്യങ്ങള്‍ക്ക് അടക്കം ഒടിപികള്‍ നിര്‍ബന്ധമാക്കിയ ഇക്കാലത്ത് ബിഎസ്എന്‍എല്ലിന്റെ ഈ പ്രശ്നം ഉപഭോക്താക്കളെ വല്ലാതെ ദുരിതത്തില്‍ ആക്കിയിരിക്കുകയാണ്. ഗൂഗിള്‍ പേ ഉപഭോക്താക്കള്‍ക്ക് ഒടിപികള്‍ ലഭിക്കാത്തത് മൂലം പലപ്പോഴും പണം അയയ്ക്കുവാന്‍ കഴിയുന്നില്ല. ടെലികോം കമ്പനി അധികൃതരെ മൊബൈലില്‍ വിളിച്ചാല്‍ ഫോണ്‍ എടുക്കാറില്ലെന്നും നാട്ടുകാര്‍ പറയുന്നു.

‘ഹൃദയപൂർവം അമ്മയ്‌ക്കൊപ്പം’ സ്നേഹക്കൂട്ടായ്മ നാളെ

മോനിപ്പള്ളി: സോഷ്യൽ ജസ്റ്റീസ് ഫോറം സംഘടിപ്പിക്കുന്ന "ഹൃദയപൂർവം അമ്മയ്‌ക്കൊപ്പം’ സ്നേഹക്കൂട്ടായ്‌മ നാളെ 10.30ന് ചീങ്കല്ലേൽ സെന്‍റ് തോമസ് എൽപി സ്കൂൾ ഹാളിൽ നടക്കും. സംസ്ഥാന പ്രസിഡന്‍റ്‌ കെ.എം വർഗീസ് ഉദ്ഘാടനം ചെയ്യും. ജില്ലാ സെക്രട്ടറി ഷീല ദിലീപ് അധ്യക്ഷത വഹിക്കും. സമ്മേളനത്തിൽ മുതിർന്ന അമ്മമാരെ ആദരിക്കും. പ്രതിഭാസംഗമം ഉഴവൂർ പഞ്ചായത്ത് പ്രസിഡന്‍റ്‌ കെ.എം. തങ്കച്ചനും കുഞ്ഞിളം കയ്യിൽ സമ്മാനം വിതരണം ഉഴവൂർ ബ്ലോക്ക്‌ പഞ്ചായത്ത്‌ വൈസ് പ്രസിഡന്‍റ്‌ ഡോ. സിന്ധുമോൾ ജേക്കബും ഉദ്ഘാടനം ചെയ്യും. സംസ്ഥാന ജോയിന്‍റ് സെക്രട്ടറി ജോഷിബ ജെയിംസ് മുഖ്യപ്രഭാഷണം നടത്തും. സ്കൂൾ മാനേജർ ഫാ. അഗസ്റ്റിൻ അരഞ്ഞാണി പുത്തൻപുര മാതാപിതാക്കന്മാരേയും സംസ്ഥാന കമ്മിറ്റി അംഗം ഡോ. പ്രവീണ അഭിജിത് അധ്യാപകരെയും ആദരിക്കും.

സയൻസ് സിറ്റി പൂർത്തീകരണം: പദ്ധതി നൽകിയാൽ പരിഗണിക്കാമെന്ന് കേന്ദ്രമന്ത്രി

കുറവിലങ്ങാട്: സയൻസ് സിറ്റിയുടെ വിവിധ പ്രവർത്തനങ്ങൾ പൂർത്തീകരിക്കുന്നതുമായി ബന്ധപ്പെട്ട് പദ്ധതി നൽകിയാൽ പോസിറ്റീവായി പരിഗണിക്കാമെന്ന് കേന്ദ്രമന്ത്രി ഗജേന്ദ്ര സിംഗ് ഷെഖാവത്ത് പറഞ്ഞു. സയൻസ് സെന്‍റർ ഉദ്ഘാടനവേളയിൽ മുഖ്യപ്രഭാഷണം നടത്തുകയായിരുന്നു കേന്ദ്രമന്ത്രി. ശാസ്ത്രത്തിന്‍റെ ഫലങ്ങൾ ജനങ്ങളിൽ എത്തണമെന്നും ഇതിനായി പരിശ്രമങ്ങൾ ഉണ്ടാകണമെന്നും കേന്ദ്രമന്ത്രി നിർദേശിച്ചു. സംസ്ഥാനം വിനോദസഞ്ചാരരംഗത്ത് പാരമ്പര്യങ്ങളിലും ചരിത്രത്തിലും ആത്മീയതയിലും ഏറെ ശ്രദ്ധ നേടുന്നതായി കേന്ദ്രമന്ത്രി വ്യക്തമാക്കി വിനോദസഞ്ചാര മേഖലയുമായി ബന്ധപ്പെട്ട് 400 കോടി രൂപയുടെ പ്രവർത്തനങ്ങൾ നടത്തിയതായി മന്ത്രി പറഞ്ഞു.

കോൺഗ്രസ് നേതാക്കൾക്ക് കരുതൽ തടങ്കലും അറസ്റ്റും

കുറവിലങ്ങാട്: സയൻസ് സെന്‍റർ ഉദ്ഘാടനവുമായി ബന്ധപ്പെട്ട് മൂന്നു യൂത്ത് കോൺഗ്രസ് പ്രവർത്തകരെ പോലീസ് കരുതൽ തടങ്കലിൽ പ്രവേശിപ്പിച്ചു. കോട്ടയം മെഡിക്കൽ കോളേജ് ആശുപത്രിയിൽ ഉണ്ടായ അപകടവുമായി ബന്ധപ്പെട്ട് പ്രതിഷേധത്തിന് ഒരുങ്ങിയ കോൺഗ്രസ് മണ്ഡലം പ്രസിഡന്‍റിനെയും വാർഡ് പ്രസിഡന്‍റിനെയും പോലീസ് അറസ്റ്റ് ചെയ്യുകയും ചെയ്തു. യൂത്ത് കോൺഗ്രസ് ഭാരവാഹികളായ ജിൻസൺ ചെറുമലയിൽ, ടോജോ പാലക്കൽ, അമൽ മത്തായി എന്നിവരെയാണ് കരുതൽ തടങ്കലിൽ പ്രവേശിപ്പിച്ചത് .

ആംബുലൻസ് അപകടം: രോഗിയും ബന്ധുക്കളും വാഹനത്തിൽ കുടുങ്ങി

പീരുമേട്: ആംബുലൻസ് റോഡിൽനിന്നു താഴ്ചയിലേക്ക് തെന്നിമാറി അപകടം. രോഗിയും ബന്ധുക്കളും അദ്ഭുതകരമായി രക്ഷപ്പെട്ടു. പാലായിലെ സ്വകാര്യ ആശുപത്രിയിൽനിന്നു തമിഴ്നാട്ടിലെ പൂശാലംപെട്ടിയിലേക്ക് രോഗിയുമായി പോകുന്നതിനിടെ റോഡിൽനിന്നും താഴ്ചയിലേക്ക് തെന്നിമാറുകയായിരുന്നു. ഇന്നലെ പുലർച്ചെ കുട്ടിക്കാനത്തിനു സമീപം വളഞ്ഞങ്ങാനത്തായിരുന്നു അപകടം. പാലാ സ്വദേശിയായ ജോബിൻസൻ ജോയിയുമായി തമിഴ്നാട്ടിലേക്ക് പോകുന്പോഴായിരുന്നു അപകടം. ജോബിൻസനൊപ്പം ബന്ധുക്കളും ആംബുലൻസിലുണ്ടായിരുന്നു. വാഹനത്തിന്‍റെ മുൻവശം താഴ്ചയിലേക്ക് കുത്തിനിന്നതോടെ രോഗിയും ബന്ധുക്കളും പുറത്തിറങ്ങാൻ സാധിക്കാതെ ആംബുലൻസിൽ കുടുങ്ങി. പിന്നീട് അര മണിക്കൂറിനുശേഷം പീരുമേട്ടിൽനിന്നു ഫയർഫോഴ്സ് സംഘം സ്ഥലത്തെത്തിയാണ് ഇവരെ പുറത്തെത്തിച്ചത്. അപകടത്തിൽ ആർക്കും പരിക്കില്ല. പീരുമേട് ഫയർഫോഴ്സിലെ എസ്ടിഒ സുനിൽകുമാറിന്‍റെ നേതൃത്വത്തിൽ ഫയർ ഓഫീസർമാരായ മധുസൂദനൻ, സുനിൽകുമാർ, എം.സി. സതീഷ്, വിപിൻ സെബാസ്റ്റ്യൻ, വിവേക്, എ. അൻഷാദ് എന്നിവരുടെ നേതൃത്വത്തിലായിരുന്നു രക്ഷാപ്രവർത്തനം.

ഭർത്താവിന് പിന്നാലെ ഭാര്യയും മരിച്ചു

അതിരമ്പുഴ: ഭർത്താവ് മരിച്ച് മണിക്കൂറുകൾക്കകം ഭാര്യയും മരിച്ചു. അതിരമ്പുഴ ഓട്ടക്കാഞ്ഞിരം പൊടിമറ്റത്തിൽ പി.ജെ. മാത്യു (മത്തച്ചൻ - 80), ഭാര്യ ചിന്നമ്മ മാത്യു (78) എന്നിവരാണ് മരിച്ചത്. മാന്നാനം കെഇ കോളജ് റിട്ട. സൂപ്രണ്ടായ പി.ജെ. മാത്യു അതിരമ്പുഴ പഞ്ചായത്ത് മുൻ മെന്പറും കേരളാ കോൺഗ്രസ് മുൻ മണ്ഡലം പ്രസിഡന്‍റുമായിരുന്നു. പി.ജെ. മാത്യു ബുധനാഴ്ച വൈകുന്നേരം 5.30നാണ് മരിച്ചത്. മൃതദേഹം മോർച്ചറിയിലേക്ക് മാറ്റിയ ശേഷം രാത്രി 11 മണിയോടെ ചിന്നമ്മയും മരിച്ചു. രണ്ടു പേരും തെള്ളകത്തെ സ്വകാര്യാശുപത്രിയിൽ ചികിത്സയിലായിരുന്നു. ചിന്നമ്മ അമലഗിരി പുതിയാപറമ്പിൽ കുടുംബാംഗം. മക്കൾ: ജിജി (ഓസ്ട്രേലിയ), ബിജു, ജിനി (അയർലണ്ട്), ജിറ്റി (ഓസ്ട്രേലിയ). മരുമക്കൾ: സാജു ഓരത്തേൽ കാഞ്ഞിരത്താനം, ആഷ മുകളേൽ അതിരമ്പുഴ, ജോസുകുട്ടി പുലിയുറുമ്പിൽ പള്ളിക്കത്തോട്, ജോജി കുറുപ്പന്തറമുകളേൽ തെള്ളകം. ഇരുവരുടെയും സംസ്കാരം ഞായറാഴ്ച മൂന്നിന് വസതിയിൽ ആരംഭിച്ച് നാല്പാത്തിമല സെന്‍റ് തോമസ് പള്ളിയിൽ.

ജർമനിയിൽ മരിച്ച വിദ്യാർഥിയുടെ സംസ്കാരം ഇന്ന്

അതിരമ്പുഴ: കാട്ടാത്തിയേൽ റോയിയുടെയും ബിന്ദുവിന്‍റെയും മകൻ ജർമനിയിൽ മരിച്ച നഴ്സിംഗ് വിദ്യാർഥി അമൽ റോയിയുടെ (ജോപ്പൻ - 22) സംസ്കാരം ഇന്ന് 11ന് ഏറ്റുമാനൂർ ക്രിസ്തുരാജ പള്ളിയിൽ. മൃതദേഹം ഇന്ന് രാവിലെ ഒമ്പതിന് ഭവനത്തിൽ എത്തിക്കും. ജർമനിയിൽ ബാഡൻ വ്യുർട്ടെംബെർഗ് സംസ്ഥാനത്തെ ഉൾമ യൂണിവേഴ്സിറ്റി ഹോസ്പിറ്റലിൽ ഒന്നാം വർഷ നഴ്സിംഗ് വിദ്യാർഥിയായിരുന്നു അമൽ. കഴിഞ്ഞ സെപ്റ്റംബറിലാണ് ഇയാൾ ജർമനിയിൽ എത്തിയത്. ജൂൺ 23 നാണ് അമലിനെ കാണാനില്ലെന്ന സന്ദേശം വീട്ടിൽ ലഭിച്ചു. രാത്രിയോടെ അമലിനെ മരിച്ച നിലയിൽ കണ്ടെത്തിയതായി കോളജ് അധികൃതർ ബന്ധുക്കളെ അറിയിക്കുകയായിരുന്നു.

നെടുംകുന്നം എസ്‌ജെബി എച്ച്എസ്എസില്‍ ‘മികവ്-2025 ' സംഘടിപ്പിച്ചു

നെടുംകുന്നം: സെന്‍റ് ജോണ്‍ ദ ബാപ്റ്റിസ്റ്റ് ഹയര്‍ സെക്കന്‍ഡന്‍ഡറി സ്‌കൂളില്‍ സംഘടിപ്പിച്ച മികവ് -2025 കോട്ടയം ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. വര്‍ഗീസ് കൈതപ്പറമ്പില്‍ അധ്യക്ഷത വഹിച്ചു. കോട്ടയം മെഡിക്കല്‍ കോളജ് അസോസിയേറ്റ് പ്രഫസറും പൂര്‍വ വിദ്യാര്‍ഥിയുമായ ഡോ. ടോം തോമസ് കാട്ടൂര്‍ പാഠ്യേതര പ്രവര്‍ത്തനങ്ങളുടെ ഉദ്ഘാടനവും നടത്തി. വാര്‍ഡ് മെംബര്‍ ബീന വര്‍ഗീസ്, പ്രിന്‍സിപ്പല്‍ ഡോ. ഡൊമിനിക് ജോസഫ്, ഹെഡ് മാസ്റ്റര്‍ സുനില്‍ പി. ജേക്കബ്, പിടിഎ പ്രസിഡന്‍റ് സാബു ഉരുപ്പക്കാട്ട്, വിദ്യാര്‍ഥി പ്രതിനിധികളായ ഡോണ്‍ മാത്യു, അല്‍ഫോന്‍സ സജു എന്നിവര്‍ പ്രസംഗിച്ചു.

ലഹരിക്കെതിരേ അണിചേരാന്‍ വിമോക്ഷ

നെടുംകുന്നം: നെടുംകുന്നം എസ്‌ജെബി എച്ച്എസ്എസിലെ സ്‌കൗട്ട് ആന്‍ഡ് ഗൈഡ്‌സ് വിദ്യാര്‍ഥികളുടെ ഒരുവര്‍ഷം നീളുന്ന ലഹരിവിരുദ്ധ പ്രവര്‍ത്തനങ്ങള്‍-വിമോക്ഷ 2025 നു തുടക്കം കുറിച്ചു. നെടുംകുന്നം പള്ളിപ്പടി ജംഗ്ഷനില്‍ നടന്ന സമ്മേളനം വാര്‍ഡംഗം ബീന വര്‍ഗീസ് ഉദ്ഘാടനം ചെയ്തു. സ്‌കൂള്‍ പ്രിന്‍സിപ്പൽ ഡോ. ഡൊമിനിക് ജോസഫ് സന്ദേശം നല്‍കി. ഓട്ടോറിക്ഷാ ഡ്രൈവര്‍മാര്‍, വ്യാപാരികള്‍, അഭ്യുദയകാംക്ഷികള്‍ എന്നിവരുടെ സഹകരണത്തോടെ നടപ്പിലാക്കുന്ന സാമൂഹികാവബോധ പ്രവര്‍ത്തനം, ‘’വിമോക്ഷ-ഉണരാം നാടിനായ് അണിചേരാം ലഹരിക്കെതിരായി’’ സ്റ്റിക്കര്‍ പ്രകാശനവും നടന്നു. ബെനഡിക്ട് സാബു, ആദിത്യ എസ്. നായര്‍, ആന്‍മരിയ സെബാസ്റ്റ്യന്‍, റിനു ജോസഫ്, ഷിജു അലക്‌സ്, അനുമോള്‍ കെ. ജോണ്‍, നീതു സൂസന്‍ ജോസഫ് എന്നിവര്‍ പ്രസംഗിച്ചു.

രഞ്ജിസാര്‍ പൊതുജന സേവകനായി മികച്ച പ്രവര്‍ത്തനം കാഴ്ചവച്ച ഉദ്യോഗസ്ഥന്‍

ചങ്ങനാശേരി: വിടവാങ്ങിയ തദ്ദേശസ്വയംഭരണ വകുപ്പ് റിട്ട. സൂപ്രണ്ടിംഗ് എന്‍ജിനിയര്‍ പെരുന്ന മാവേലില്‍ രഞ്ജി (61)പൊതുജനസേവനരംഗത്ത് മികച്ച പ്രവര്‍ത്തനം കാഴ്ചവച്ച ഉദ്യോഗസ്ഥനാണ്. കൊല്ലം കോര്‍പറേഷന്‍, ചങ്ങനാശേരി, തിരുവല്ല നഗരസഭകള്‍, പുളിക്കീഴ് ബ്ലോക്ക് പഞ്ചായത്ത് എന്നിവിടങ്ങളിലും പൊതുമരാമത്ത്, ജലസേചന വകുപ്പുകളിലും എന്‍ജിനിയറായി സേവനമനുഷ്ഠിച്ചിട്ടുണ്ട്. ജനകീയ കര്‍മപദ്ധതികള്‍ നടപ്പാക്കുന്നതില്‍ അദ്ദേഹം തത്പരനായിരുന്നു. അസോസിയേഷന്‍ ഓഫ് എന്‍ജിനിയേഴ്‌സ് കേരള സംസ്ഥാന പ്രസിഡന്‍റ്, ലിവര്‍ ഫൗണ്ടേഷന്‍ ഓഫ് കേരള കോട്ടയം ജില്ലാ ട്രഷറര്‍ എന്നീ നിലകളിലും പ്രവര്‍ത്തിച്ച അദ്ദേഹം കാലിക്കറ്റ് യൂണിവേഴ്‌സിറ്റി ബാസ്‌ക്കറ്റ്‌ബോള്‍ ടീമംഗമായിരുന്നു. 1981ല്‍ നാഗാലാന്‍ഡില്‍ വീരമൃത്യു വരിച്ച ജനറല്‍ റിസര്‍വ് എന്‍ജിനിയറിംഗ് ഫോഴ്‌സ് എന്‍ജിനിയര്‍ കെ.ആര്‍. ജയപ്രകാശിന്‍റെയും (ശൗര്യചക്ര) കെ. ഓമനക്കുട്ടിയമ്മയുടെയും മകനാണ്. പ്രവര്‍ത്തിച്ച മേഖലകളിലെല്ലാം നിരവധി സുഹൃത്തുക്കളെ സമ്പാദിച്ച വ്യക്തികൂടിയാണദ്ദേഹം. ഭാര്യ സുധ ബി. നായര്‍ (റിട്ട. ഫിഷറീസ് ഡെപ്യൂട്ടി ഡയറക്ടര്‍). മകള്‍: കീര്‍ത്തി (പാലക്കാട് എന്‍എസ്എസ് എന്‍ജിനിയറിംഗ് കോളജ് അസി. പ്രഫ), മരുമകന്‍: ഡോ. നിഖില്‍ കൃഷ്ണന്‍ (പാലക്കാട് ഐഐടി അസി. പ്രഫസര്‍). കഴിഞ്ഞ ദിവസം അന്തരിച്ച അദ്ദേഹത്തിന്‍റെ സംസ്‌കാരം ഇന്നലെ വൈകുന്നേരം വീട്ടുവളപ്പില്‍ നടത്തി.

നിരണം തീര്‍ഥാടനകേന്ദ്രത്തില്‍ ദുക്‌റാനതിരുനാള്‍ ആചരണം

നിരണം: വിശുദ്ധ തോമാസ്ലീഹായുടെ പേരിലുള്ള നിരണം തീര്‍ഥാടനകേന്ദ്രത്തില്‍ ദുക്‌റാന തിരുനാള്‍ ആചരണം ഇന്ന് നടക്കും. രാവിലെ ഏഴിന് ആര്‍ച്ച്ബിഷപ് മാര്‍ തോമസ് തറയില്‍ വിശുദ്ധകുര്‍ബാന അര്‍പ്പിക്കും. ഉച്ചക്ക് 12.45ന് എടത്വ ഫൊറോനയില്‍നിന്നുള്ള തീര്‍ഥാടകര്‍ എത്തിച്ചേരും. ഫൊറോന വികാരി ഫാ. ഫിലിപ്പ് വൈക്കത്തുകാരന്‍ വിശുദ്ധ കുര്‍ബാന അര്‍പ്പിക്കും. അതിരൂപത സന്ദേശനിലയം ഡയറക്ടര്‍ ഫാ. വര്‍ഗീസ് പുത്തന്‍പുരയ്ക്കല്‍ സന്ദേശം നല്‍കും.

തുരുത്തി-മുളയ്ക്കാംതുരുത്തി-വാലടി റോഡിന്‍റെ ദുരവസ്ഥ : കെഎസ്ആർടിസി ബസുകളും സർവീസ് നിർത്തി

ചങ്ങനാശേരി: തുരുത്തി-മുളയ് ക്കാംതുരുത്തി-വാലടി-കാവാലം റോഡിലെ കുഴികളടച്ച് ബസ് സര്‍വീസ് പുനരാരംഭിക്കണമെന്ന നാട്ടുകാരുടെ ആവശ്യം ഉയരുന്നു. റോഡ് അപകടാവസ്ഥയിലായതിനെത്തുടര്‍ന്ന് തിങ്കളാഴ്ചമുതല്‍ ഈ റൂട്ടില്‍ ചങ്ങനാശേരിയില്‍നിന്നുള്ള കെഎസ്ആര്‍ടിസി ബസുകള്‍ നിര്‍ത്തലാക്കിയിരിക്കുകയാണ്. ഇത് ഈ മേഖലയിലുള്ള വിദ്യാര്‍ഥികളടക്കം യാത്രക്കാരെ വലച്ചിരിക്കുകയാണ്. ചങ്ങനാശേരിയില്‍നിന്നുള്ള കെഎസ്ആര്‍ടിസി ബസുകള്‍ പറാല്‍, കുമരങ്കരി, വാലടി വഴി കാവാലത്തേക്ക് സര്‍വീസ് ആരംഭിച്ചിട്ടുണ്ട്. നാരകത്ര, കൃഷ്ണപുരം ഉള്‍പ്പെടെ വിവിധ ഭാഗങ്ങളില്‍ പാടശേഖരങ്ങളിലെ വെള്ളക്കെട്ട് റോഡിലേക്ക് കയറിയ നിലയിലാണ്. പാടശേഖരങ്ങളിലെ വെള്ളം പമ്പ് ചെയ്ത് ജലനിരപ്പ് ക്രമീകരിച്ചാല്‍ റോഡിലെ വെള്ളക്കെട്ടിനു പരിഹാരമാകുമെന്നാണ് നാട്ടുകാര്‍ ചൂണ്ടിക്കാട്ടുന്നത്. അതേസമയം തുരുത്തി, വാലടി, വീയപുരം റോഡിന്‍റെ പുനര്‍നിര്‍മാണവുമായി ബന്ധപ്പെട്ട് ജനങ്ങളുടെ അഭിപ്രായം അറിയുന്നതിനായി തുരുത്തി ഡെവലപ്മെന്‍റ് ആൻഡ് കള്‍ച്ചറല്‍ സൊസൈറ്റിയുടെ നേതൃത്വത്തില്‍ ജോബ് മൈക്കിള്‍ എംഎല്‍എ യുടെ അധ്യക്ഷതയില്‍ നാളെ വൈകിട്ട് 5.30 ന് മുളയ്ക്കാംതുരുത്തി സെന്‍റ് ജോര്‍ജ് ക്‌നാനായ പള്ളി ഹാളില്‍ യോഗം വിളിച്ചുചേര്‍ത്തിട്ടുണ്ട്.

റോഡ് ചെളിക്കുണ്ട്; യാത്ര ദുരിതം

തലയാഴം: തലയാഴം പഞ്ചായത്തിലെ 10ാം വാർഡിൽ മാടപ്പള്ളി- തൃപ്പക്കുടം റോഡിനെ ആലത്തൂർ റോഡുമായി ബന്ധിപ്പിക്കുന്ന റോഡ് ചെളിക്കുണ്ടായത് യാത്ര ദുരിതമാക്കുന്നു. 25 വർഷം പഴക്കമുള്ള റോഡ് ഗതാഗതയോഗ്യമാക്കണമെന്ന പ്രദേശവാസികളുടെ ആവശ്യത്തിന് വർഷങ്ങളുടെ പഴക്കമുണ്ട്. സ്കൂൾ വിദ്യാർഥികൾ അടക്കമുള്ളവർ ഉപയോഗിക്കുന്ന റോഡ് സഞ്ചാരയോഗ്യമാക്കാൻ അധികൃതർ നടപടി സ്വീകരിക്കണമെന്നാണ് പ്രദേശവാസികളുടെ ആവശ്യം.

35 വർഷമായി കുചേലനും ശ്രീകൃഷ്ണനുമായി പകർന്നാടി എസ്. ഹരിദാസൻ നായർ

വൈക്കം: കുചേലന്‍റെ ദൈന്യവും സുഹൃത്തിനായി തനിക്കുള്ളതെല്ലാം വിട്ടുനൽകാൻ മനസുകാട്ടുന്ന ശ്രീകൃഷ്‌ണന്‍റെ ഹൃദയവിശാലതയും മിഴിവോടെ അഭിനയിച്ചുകാട്ടുമ്പോൾ പൊതുപവർത്തകനായ എസ്. ഹരിദാസൻനായർ തികഞ്ഞ നടനാണ്. കഴിഞ്ഞ 20 വർഷമായി വൈക്കം നഗരസഭാ കൗൺസിലറായ എസ്. ഹരിദാസൻനായർ 35 വർഷമായി ശ്രീമദ് ഭാഗവത സപ്താഹ വേദികളിൽ ശ്രീകൃഷ്ണനായും കുചേലനായും പകർന്നാട്ടം നടത്തിയിട്ടുണ്ട്. ഇതിൽ 20 തവണ കൃഷ്ണനായും 15 വട്ടം കുചേലനായും അദ്ദേഹം ഭക്തമനസുകളെ ഭാവഗരിമയാൽ വിസ്മയിപ്പിച്ചു. വൈക്കം നഗരസഭ 10 ാം വാർഡിലെ കൗൺസിലറായ എസ്. ഹരിദാസൻ നായർ നഗരസഭയിലെ പ്രതിപക്ഷ നേതാവുമാണ്. എസ്. ഹരിദാസൻ നായർ 1985ലാണ് ശ്രീമദ് ഭാഗവത സപ്‌താഹയ ജ്ഞത്തോടനുബന്ധിച്ച് ആദ്യമായി കുചേല വേഷം കെട്ടിയത്. കുചേലനും കൃഷ്‌ണനുമായുള്ള ഹരിദാസൻനായരുടെ നടനമികവ് വൈക്കത്തിനു പുറമേ ചേർത്തലയിലും നിരവധി ഇടങ്ങളിൽ അരങ്ങേറിയിട്ടുണ്ട്.‌ 1980 മുതൽ അമച്വർ നാടകരംഗത്ത് ഹരിദാസൻ നായർ സജീവമാണ്. ഇദ്ദേഹം രചനയും സംവിധാനവും നിർവഹിച്ച ശ്രീനാരായണഗുരു അവതാരമെന്ന നാടകത്തി ൽ കേന്ദ്രകഥാപാത്രമായ ശ്രീനാരായണ ഗുരുവിന്‍റെ വേഷം അവതരിപ്പിച്ചതും ഹരിദാസൻ നായരാണ്. ഇതിനകം നിരവധി ടെലി ഫിലിമിലും ഷോർട്ട് ഫിലിമിലും ഹരിദാസൻ നായർ അഭിനയിച്ചു കഴിഞ്ഞു. പിതാവ് സദാശിവൻ നായർ നർത്തകനും വല്യച്ഛൻ പ്രമുഖ കഥകളി നടനായിരുന്ന കലാമണ്ഡലം വൈക്കം കരുണാകരൻ നായരുമായിരുന്നു. ഏതാനും വർഷങ്ങളായി ചാലപ്പറമ്പ് കാർത്ത്യാകുളങ്ങര ശ്രീധർമശാസ്‌താ ക്ഷേത്രത്തിലെ സപ്‌താഹത്തിനായി ഹരിദാസൻ നായരെ കുചേലനായി ഒരുക്കിയത് ചമയകലയിൽ സംസ്ഥാന അവാർഡ് നേടിയ കലാനിലയം ജയപ്ര കാശാണ്. ഹരിദാസൻനായരെ പലതവണ കൃഷണനായി രൂപപ്പെടുത്തിയ കലാനിലയം ജയപ്രകാശ് ഇവിടെ ശ്രീകൃഷ്ണനായിവേഷമിട്ട് ഹരിദാസൻനായരുടെ കുചേലനുമായി മത്സരിച്ച് അഭിനയിച്ചതും ഭക്തർക്ക് ആത്മഹർഷമായി. രുക്മിണിയായി വേഷമിട്ട കുറവിലങ്ങാട് ദേവമാതാ കോളജിലെ ബിരുദാനന്തര ബിരുദ വിദ്യാർഥി ദേവികയും മികച്ച പ്രകടനമാണ് കാഴ്ചവച്ചത്. അഞ്ചു തെരഞ്ഞെടുപ്പിൽ മത്സരിച്ച ഹരിദാസൻ നായർ നാലു തവണയും മികച്ച ഭൂരിപക്ഷത്തിലാണ് തെരഞ്ഞെടുക്കപ്പെട്ടത്. ജനങ്ങളുടെ പ്രിയങ്കരനായ ജനപ്രതിനിധിയായി തിരക്കിട്ട് ഓടിനടക്കുന്ന ഹരിദാസൻ നായരുടെ കലാപ്രവർത്തനങ്ങൾക്ക് ഭാര്യ സുധാകുമാരിയും മകൾ ഐശ്വര്യയും മരുമകൻ വിഷ്‌ണുവും നിർലോഭമായ പിന്തുണയാണ് നൽകുന്നത്.

സ്ട്രോക്ക് വന്നു തളര്‍ന്ന വയോധികയെ നിത്യസഹായകന്‍ ട്രസ്റ്റിന്‍റെ അമ്മവീട് ഏറ്റെടുത്തു

കടുത്തുരുത്തി: വൈക്കം ഗവണ്‍മെന്‍റ് ആശൂപത്രിയില്‍ ചികിത്സയില്‍ കഴിഞ്ഞിരുന്ന, സ്ട്രോക്ക് വന്നു തളര്‍ന്ന വയോധികയെ നിത്യസഹായകന്‍ ട്രസ്റ്റിന്‍റെ അമ്മവീട് ഏറ്റെടുത്തു. മറവന്‍തുരുത്ത് പഞ്ചായത്തിലെ 12-ാം വാര്‍ഡില്‍ താമസിച്ചിരുന്ന തങ്കമ്മ (78) യെയാണ് പഞ്ചായത്തംഗം പോള്‍ തോമസ് മണിയലയുടെ അഭ്യര്‍ഥനപ്രകാരം നിത്യസഹായകന്‍ ഏറ്റെടുത്തത്. ശരീരം തളര്‍ന്ന് സംസാരശേഷിയും നഷ്ടപ്പെട്ട നിര്‍ധനയായ തങ്കമ്മയെ നോക്കാനും സംരക്ഷിക്കാനും ആളില്ലാത്ത അവസ്ഥയില്‍ ബന്ധുവായ വിനീഷും മെമ്പറും കൂടിയാണ് നിത്യസഹായകന്‍റെ അമ്മവീട്ടിലെത്തിക്കാന്‍ മുന്‍കൈയെടുത്തത്. തങ്കമ്മയ്ക്കു മക്കളില്ല. ഭര്‍ത്താവ് ചന്ദ്രന് പരസഹായം കൂടാതെ ഒന്നും ചെയ്യാന്‍ പറ്റാത്ത അവസ്ഥയാണ്. നിത്യസഹായകന്‍ ട്രസ്റ്റിനെ ഇക്കാര്യങ്ങള്‍ അറിയിച്ചതിനെത്തുടര്‍ന്ന് വൈക്കം ഗവ. ആശുപത്രിയിലെത്തി ട്രസ്റ്റ് പ്രസിഡന്‍റ് അനില്‍ ജോസഫും അമ്മവീട് സെക്രട്ടറി വി.കെ. സിന്ധുവും സാഹചര്യങ്ങള്‍ മനസിലാക്കി. തുടര്‍ന്ന് നടപടിക്രമങ്ങള്‍ പൂര്‍ത്തിയാക്കി തങ്കമ്മയെ ഏറ്റെടുത്തു. വൈസ് പ്രസിഡന്‍റ് കെ.കെ. സുരേന്ദ്രന്‍, തോമസ് അഞ്ചമ്പില്‍, ജയശ്രീ, എല്‍സി ജിജോ, ജയ്‌സണ്‍ പാലയില്‍, ആല്‍ഫില്‍, ക്ലാരമ്മ ബാബു, റൂബി കുര്യന്തടം, സുര പെരുമാലി, നഴ്സുമാരായ റീത്ത ജയ്സണ്‍, സൗമ്യ എന്നിവര്‍ നേതൃത്വം നല്‍കി.

അഖിലകേരള പ്രസംഗമത്സര വിജയികള്‍ക്കുള്ള സമ്മാനവിതരണം ഇന്ന്

കടുത്തുരുത്തി: അധ്യാപകനും പ്രഭാഷകനും കടുത്തുരുത്തി സെന്‍റ് മേരീസ് ഫൊറോന താഴത്തുപള്ളി ഇടവകാംഗവുമായിരുന്ന ഫാ. ജി.ടി. വടക്കേലിന്‍റെ സ്മരണാര്‍ഥം നടത്തിയ അഖിലകേരള പ്രസംഗമത്സര വിജിയകള്‍ക്കുള്ള സമ്മാനവിതരണം ഇന്ന് നടക്കും. ജുനിയര്‍, സീനിയര്‍ വിഭാഗങ്ങളിലായി നടന്ന പ്രസംഗമത്സരത്തില്‍ ജൂനിയര്‍ വിഭാഗത്തില്‍ ജോഹന്‍ ജോ ജോസഫ് കാളികാവ്, അമലു സോബി മാവടി, അലീഷാ മരിയ സ്റ്റീഫന്‍ മാന്നാര്‍ എന്നിവരും സീനിയര്‍ വിഭാഗത്തില്‍ ജസ്‌ന മരിയ സിനോജ് കടുത്തുരുത്തി, അഷര്‍ ജോസഫ് കുര്യനാട്, എഡിസണ്‍ ജോര്‍ജ് മുട്ടുചിറ എന്നിവരും ഒന്നും രണ്ടും മൂന്നും സ്ഥാനങ്ങള്‍ നേടി വിജയികളായി. ജേതാക്കള്‍ക്ക് 5,001, 3,001, 2,001 രൂപ കാഷ് അവാര്‍ഡും ഫലകവും സര്‍ട്ടിഫിക്കറ്റും സമ്മാനിക്കും. ഇന്ന് രാവിലെ 11ന് നടക്കുന്ന സണ്‍ഡേ സ്‌കൂള്‍ വാര്‍ഷിക സമ്മേളനത്തില്‍ സമ്മാനങ്ങള്‍ വിതരണം ചെയ്യും. ഫൊറോന വികാരി ഫാ. മാത്യു ചന്ദ്രന്‍കുന്നേല്‍ അധ്യക്ഷത വഹിക്കുന്ന സമ്മേളനത്തില്‍ പ്രഫ. കുര്യാസ് കുമ്പളകുഴി മുഖ്യപ്രഭാഷണം നടത്തും. ഡയറക്ടര്‍ ഫാ. ജോണ്‍ നടുത്തടം, സഹവികാരി ഫാ. ഏബ്രഹാം പെരിയപ്പുറം, സണ്‍ഡേ സ്‌കൂള്‍ ഹെഡ്മാസ്റ്റര്‍ ടോമി അഗസ്റ്റിന്‍ കരിക്കാട്ടില്‍ എന്നിവര്‍ പ്രസംഗിക്കും.

പാലാ രൂപത ആഗോള പ്രവാസിസംഗമം: ഒരുക്കങ്ങള്‍ സജീവമായി

പാലാ: രൂപത പ്രവാസി അപ്പൊസ്തലേറ്റിന്‍റെ നേതൃത്വത്തിലുള്ള ആഗോള പ്രവാസി സംഗമത്തിനുള്ള ഒരുക്കങ്ങള്‍ സജീവമായി. 19ന് ചൂണ്ടച്ചേരി സെന്‍റ് ജോസഫ് എന്‍ജിനിയറിംഗ് കോളജിലാണ് ഗ്ലോബല്‍ സംഗമം ഒരുക്കിയിട്ടുള്ളത്. സമ്മേളനം, മത്സരവിജയികള്‍ക്കുള്ള സമ്മാനദാനം, വിവിധ മേഖലകളില്‍ പ്രാഗത്ഭ്യം തെളിയിച്ച പ്രതിഭകള്‍ക്കുള്ള ആദരവ് തുടങ്ങിയവയാണ് ഈ വര്‍ഷത്തെ പ്രധാന ഇനങ്ങള്‍. പാലാ രൂപതയുടെ പ്ലാറ്റിനം ജൂബിലി വര്‍ഷത്തില്‍ രൂപതാംഗങ്ങളായ പ്രവാസികള്‍ക്കും കുടുംബങ്ങള്‍ക്കും ഒരുമിക്കാനുള്ള വേദിയൊരുക്കുന്ന സംഗമം വിജയിപ്പിക്കുന്നതിനായി വിവിധ രാജ്യങ്ങളില്‍ ഇതിനോടകം ചെറിയ സംഗമങ്ങള്‍ പൂര്‍ത്തീകരിച്ചുകഴിഞ്ഞു. കഴിഞ്ഞ വര്‍ഷം ഒട്ടേറെ വേറിട്ട കര്‍മപരിപാടികള്‍ പൂര്‍ത്തീകരിച്ചാണ് ഈ വര്‍ഷത്തെ സമ്മേളനത്തിലേക്ക് പ്രവേശിക്കുന്നത്. പ്രവാസികളുടെ മക്കള്‍ക്കായി നടത്തിയ ഓറിയന്‍റേഷന്‍ പ്രോഗ്രാം മികച്ച പങ്കാളിത്തത്താല്‍ ഏറെ ശ്രദ്ധ നേടിയിരുന്നു. ചേര്‍പ്പുങ്കല്‍ മെഡിസിറ്റിയുമായി ചേര്‍ന്ന് പ്രവാസികള്‍ക്കായി പ്രിവിലേജ് കാര്‍ഡ്, പാലാ സിവില്‍ സര്‍വീസ് ഇന്‍സ്റ്റിറ്റ്യൂട്ടുമായി ചേര്‍ന്ന് വിവിധ ഓറിയന്‍റേഷന്‍ പ്രോഗ്രാമുകള്‍, പ്രവാസികള്‍ക്കും നാട്ടിലുള്ള മാതാപിതാക്കള്‍ക്കും വിദേശങ്ങളില്‍ പഠനത്തിന് തയാറെടുക്കുന്ന വിദ്യാര്‍ഥികള്‍ക്കുമായി പ്രത്യേക സേവന സംവിധാനം, പാലിയേറ്റീവ് പരിചരണം, വിദേശത്തുനിന്ന് മടങ്ങിയെത്തുന്നവര്‍ക്ക് തൊഴില്‍ സംരംഭങ്ങള്‍ ആരംഭിക്കുന്നതിനുള്ള മാര്‍ഗനിര്‍ദേശങ്ങള്‍ തുടങ്ങിയ പ്രവര്‍ത്തനങ്ങള്‍ കഴിഞ്ഞ വര്‍ഷം‍ നടത്താന്‍ കഴിഞ്ഞതായി രൂപത പ്രവാസി അപ്പൊസ്തലേറ്റ് ഡയറക്ടര്‍ ഫാ. കുര്യാക്കോസ് വെള്ളച്ചാലില്‍ അറിയിച്ചു. സംഗമം ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. രൂപത മുഖ്യ വികാരി ജനറാള്‍ മോണ്‍. ജോസഫ് തടത്തില്‍ അധ്യക്ഷത വഹിക്കും.

സയന്‍സ് സിറ്റി ഉദ്ഘാടനം ഇന്ന്; ഗതാഗതനിയന്ത്രണം ഏര്‍പ്പെടുത്തി

കുറവിലങ്ങാട്: കുറവിലങ്ങാട് സയന്‍സ് സിറ്റിയുടെ ഉദ്ഘാടനച്ചടങ്ങിന് എത്തുന്ന വാഹനങ്ങള്‍ക്കായി പോലീസ് ഗതാഗത നിയന്ത്രണം ഏര്‍പ്പെടുത്തി. കൂത്താട്ടുകുളം ഭാഗത്തുനിന്നു വരുന്ന വലിയ വാഹനങ്ങള്‍ കോഴാ സയന്‍സ് സിറ്റിക്കു മുന്‍വശം ആളെയിറക്കി കുറവിലങ്ങാട് ദേവമാതാ കോളജ് ഗ്രൗണ്ടില്‍ പാര്‍ക്ക് ചെയ്യണം. സയന്‍സ് സിറ്റി ഉദ്ഘാടനച്ചടങ്ങില്‍ പങ്കെടുക്കാനായി കടപ്ലാമറ്റം, ഉഴവൂര്‍ എന്നീ പഞ്ചായത്തുകളില്‍നിന്നു വരുന്ന വാഹനങ്ങള്‍ കോഴാ സയന്‍സ് സിറ്റിക്കു മുന്‍വശം ആളെ ഇറക്കി കുര്യനാട് സെന്‍റ് ആന്‍സ് സ്‌കൂള്‍ ഗ്രൗണ്ടില്‍ പാര്‍ക്ക് ചെയ്യണം. വെളിയന്നൂര്‍, മരങ്ങാട്ടുപള്ളി പഞ്ചായത്തില്‍നിന്നു വരുന്ന വാഹനങ്ങള്‍ കുര്യനാട് സെന്‍റ് ആന്‍സ് സ്‌കൂള്‍ ഗ്രൗണ്ടില്‍ പാര്‍ക്ക് ചെയ്യണം. മാഞ്ഞൂര്‍ പഞ്ചായത്തില്‍നിന്നു വരുന്ന വലിയ വാഹനങ്ങള്‍ കോഴാ സയന്‍സ് സിറ്റിക്കു മുന്‍വശം ആളെയിറക്കി കുര്യനാട് സെന്‍റ് ആന്‍സ് സ്‌കൂള്‍ ഗ്രൗണ്ടില്‍ പാര്‍ക്ക് ചെയ്യണം. മാഞ്ഞൂര്‍ പഞ്ചായത്തില്‍നിന്നു വരുന്ന ചെറിയ വാഹനങ്ങള്‍ കോഴാ സയന്‍സ് സിറ്റിക്കു മുന്‍വശത്ത് ആളെയിറക്കി കുറവിലങ്ങാട് കോഴാ ജംഗ്ഷനുസമീപം നാഗാര്‍ജുന ആയൂര്‍വേദ ഷോപ്പിനു എതിര്‍ വശത്തെ ഗ്രൗണ്ടില്‍ പാര്‍ക്ക് ചെയ്യണം. കിടങ്ങൂര്‍ കാണക്കാരി പഞ്ചായത്തുകളില്‍നിന്നും വരുന്ന വലിയ വാഹനങ്ങള്‍ കുര്യനാട് സെന്‍റ് ആന്‍സ് സ്‌കൂള്‍ ഗ്രൗണ്ടില്‍ പാര്‍ക്ക് ചെയ്യണം. ചെറിയ വാഹനങ്ങള്‍ പകലോമറ്റം കൊച്ചില്‍ സാനിവെയേഴ്‌സ് ബില്‍ഡിംഗിനുള്ളിലുള്ള ഗ്രൗണ്ടില്‍ പാര്‍ക്ക് ചെയ്യണം. മുളക്കുളം, ഞീഴൂര്‍ എന്നീ പഞ്ചായത്തുകളില്‍നിന്നു വരുന്ന വലിയ വാഹനങ്ങള്‍ സയന്‍സ് സിറ്റിക്കു സമീപം ആളെയിറക്കി ദേവമാതാ കോളജ് ഗ്രൗണ്ടില്‍ പാര്‍ക്ക് ചെയ്യണം. എല്ലാ വാഹനങ്ങളും അവരവര്‍ക്കായി നിര്‍ദേശിച്ചിട്ടുള്ള പാര്‍ക്കിംഗ് ഗ്രണ്ടില്‍നിന്നുതന്നെ ആളെ കയറ്റി തിരികെ പോകണം. ഉദ്യോഗസ്ഥരുടെ വാഹനങ്ങള്‍ ബ്ലോക്ക് പഞ്ചായത്ത് ഓഫീസിനു മുന്‍വശവും സഖി സെന്‍ററിനു മുന്‍വശവും ഗ്രൗണ്ടില്‍ പാര്‍ക്ക് ചെയ്യാം. സയന്‍സിറ്റിക്കു സമീപവും എംസി റോഡിന്‍റെ വശങ്ങളിലും വാഹന പാര്‍ക്കിംഗ് അനുവദിക്കില്ല.

കുറുപ്പന്തറ റെയില്‍വേ മേല്‍പ്പാലം നിർമാണം :നടപടികളുമായി മുന്നോട്ടു പോകാമെന്ന് ഹൈക്കോടതി

കടുത്തുരുത്തി: റെയില്‍വേയ്ക്കും സര്‍ക്കാരിനും കുറുപ്പന്തറ റെയില്‍വേ മേല്‍പ്പാലം നിര്‍മാണത്തിനുള്ള നടപടികളുമായി മുന്നോട്ടുപോകാമെന്ന് ഹൈക്കോടതി. കുറുപ്പന്തറ റെയില്‍വേ മേല്‍പ്പാലം നിര്‍മാണവുമായി ബന്ധപ്പെട്ട് തടസവാദം ഉന്നയിച്ച് നാട്ടുകാരായ രണ്ടുപേര്‍ നല്‍കിയിരുന്ന ഹര്‍ജി ഹൈക്കോടതി ഡിവിഷന്‍ ബെഞ്ച് തള്ളിയതോടെയാണ് മേല്‍പ്പാലത്തിനുള്ള വഴിതുറന്നത്. പരാതിക്കാര്‍ ഉന്നയിച്ച വാദങ്ങള്‍ നിലനില്‍ക്കുന്നതല്ലെന്നു കണ്ടാണ് ജസ്റ്റീസുമാരായ എ.കെ. ജയശങ്കരന്‍ നമ്പ്യാര്‍, പി.എം. മനോജ് എന്നിവുള്‍പ്പെട്ട ഡിവിഷന്‍ ബെഞ്ച് വാദം കേട്ട് കേസ് തള്ളിയത്. മുമ്പ് സിംഗിള്‍ ബെഞ്ചും ഹര്‍ജി തള്ളിയിരുന്നു. തുടര്‍ന്നാണ് ഹര്‍ജിക്കാര്‍ ഡിവിഷന്‍ ബെഞ്ചിനെ സമീപിച്ചത്. പൊതുജനത്തെ ബാധിക്കുന്ന പ്രശ്‌നമാണ് റെയില്‍വേ മേല്‍പ്പാലമെന്നും ഏതാനും വ്യക്തികള്‍ക്കുവേണ്ടി മേല്‍പ്പാലം നിര്‍മാണം ഉപേക്ഷിക്കാനാവില്ലെന്നും കോടതി നിരീഷിച്ചു. തുടര്‍ന്നാണ് പരാതിക്കാരായ കെ.ജെ. ജയിംസ്, അലക്‌സ് തയ്യില്‍ എന്നിവര്‍ ഡിവിഷന്‍ ബെഞ്ചിനെ സമീപിച്ചത്. റെയില്‍വേയുടെ നയം അനുസരിച്ച് എല്ലാ ലെവല്‍ ക്രോസുകളും ഒഴിവാക്കി മേല്‍പ്പാലമോ, അടിപ്പാതയോ നിര്‍മിക്കാനാണ് ലക്ഷ്യമിടുന്നത്. ആലപ്പുഴ-മധുര മിനി ഹൈവേയില്‍ വരുന്ന റോഡിലാണ് കുറുപ്പന്തറ റെയില്‍വേ ഗേറ്റുള്ളത്. ഇവിടത്തെ വാഹനത്തിരക്ക് നിയന്ത്രിക്കുന്നതിനും ഗതാഗതക്കുരുക്കിന് പരിഹാരം കാണുന്നതിനും റെയില്‍വേ ഗേറ്റില്‍ മേല്‍പ്പാലം നിര്‍മിക്കുക മാത്രമാണ് ഏകപരിഹാരമെന്നു കണ്ടെത്തിയിരുന്നു. ആലപ്പുഴ-മധുര മിനി ഹൈവേയില്‍ കുറുപ്പന്തറയിലുള്ള റെയിവേയുടെ ലവല്‍ക്രോസില്‍ 2012-13ൽ ജോസ് കെ. മാണി എംപിയായിരി‌ക്കെയാണ് മേല്‍പ്പാലം നിര്‍മാണം ബജറ്റില്‍ ഉള്‍പ്പെടുത്തുന്നത്. 2018ല്‍ കിഫ്ബിയില്‍നിന്നു സ്ഥലം ഏറ്റെടുക്കുന്നതിനും നിര്‍മാണത്തിനുവേണ്ടി മോന്‍സ് ജോസഫ് എംഎല്‍എ ഇടപെട്ട് 30.56 കോടി രൂപ അനുവദിച്ചു. തുടര്‍ന്ന് റെയില്‍വേ ആവശ്യപ്പെട്ട പ്രകാരം ജിഎഡി സമര്‍പ്പിക്കുകയും (ജനറല്‍ അറേഞ്ച്മെന്‍റ് ഡ്രോയിംഗ് ഇന്‍ കണ്‍സ്ട്രക്‌ഷന്‍ ഏരിയ) റെയില്‍വേ പദ്ധതി അംഗീകരിക്കുകയും ചെയ്തു. പൊന്നുംവില നടപടി അനുസരിച്ചു നോട്ടിഫിക്കേഷന്‍ പുറപ്പെടുവിച്ചു സര്‍വേ നടപടികള്‍ പൂര്‍ത്തിയാക്കി സ്ഥലവില, കെട്ടിടവില നിര്‍ണയവും നടത്തി. തുടര്‍ന്നാണ് രണ്ടു പേര്‍ കോടതിയില്‍ കേസുമായെത്തുന്നത്. ഇതോടെ ഇനി ഒരു ഉത്തരവ് ഉണ്ടാകുന്നത് വരെ റെയില്‍വേയോട് തുടര്‍നടപടികള്‍ സ്വീകരിക്കരുതെന്ന് കോടതി നിര്‍ദേശിച്ചു. ഇതോടെ മേല്‍പ്പാലം നിര്‍മാണത്തിന്‍റെ നടപടികള്‍ തടസപ്പെടുകയായിരുന്നു. സര്‍ക്കാരിനും റെയില്‍വേയ്ക്കുമൊപ്പം മാഞ്ഞൂര്‍ വികസനസമിതിയും മേല്‍പ്പാലം നിര്‍മാണം വേണമെന്ന ആവശ്യവുമായി കേസില്‍ കക്ഷിചേരുകയായിരുന്നുവെന്ന് സമിതി സെക്രട്ടറി വിന്‍സന്‍റ് ചിറയിലും വൈസ് ചെയര്‍മാന്‍ ജോമോന്‍ കുരുപ്പത്തടവും പറഞ്ഞു. 2024 ഫെബ്രൂവരി 26ന് പ്രധാനമന്ത്രി നരേന്ദ്രമോദി ഉദ്ഘാടനം നിര്‍വഹിച്ച മേല്‍പ്പാലങ്ങളുടെ കൂട്ടത്തില്‍ കുറുപ്പന്തറ റെയില്‍വേ മേല്‍പ്പാലവും ഉള്‍പ്പെട്ടിരുന്നു.

ലഹരിവിരുദ്ധ സന്ദേശ പ്രചാരണ യാത്ര

കോട്ടയം: ലഹരി ഉപയോഗത്തിനെതിരേ ഓര്‍ത്തഡോക്‌സ് ക്രൈസ്തവ യുവജന പ്രസ്ഥാനം ലഹരി വിരുദ്ധ സന്ദേശ പ്രചാരണ യാത്ര നടത്തും. നാലിന് കാസര്‍ഗോഡ്നിന്നാരംഭിക്കുന്ന യാത്ര 12ന് തിരുവനന്തപുരത്ത് സമാപിക്കും. 14 ജില്ലകളിലെ 21 ഭദ്രാസനങ്ങളിലൂടെ യാത്ര കടന്നുപോകും. യാത്ര കടന്നുചെല്ലുന്ന ജില്ലാ കേന്ദ്രങ്ങളില്‍ ലഹരി വിരുദ്ധ സന്ദേശ സംഗമങ്ങള്‍ സംഘടിപ്പിക്കും. യാത്രയുടെ സംസ്ഥാനതല ഉദ്ഘാടനം നാലിന് ഉച്ചകഴിഞ്ഞ് രണ്ടിന് കാസര്‍ഗോഡ് നര്‍ക്കിലക്കാട് എംജിഎം സ്‌കൂള്‍ ഓഡിറ്റോറിയത്തില്‍ നടക്കുന്ന സമ്മേളനത്തില്‍ രമേശ് ചെന്നിത്തല എംഎല്‍എ നിര്‍വഹിക്കും. സംസ്ഥാന യുവജന കമ്മീഷന്‍ ചെയര്‍മാന്‍ എം. ഷാജിര്‍ ഫ്ലാഗ് ഓഫ് ചെയ്യും. യുവജനപ്രസ്ഥാനം പ്രസിഡന്‍റ് ഡോ. ഗീവര്‍ഗീസ് മാര്‍ യൂലിയോസ് മെത്രാപ്പോലീത്താ അധ്യക്ഷത വഹിക്കും. 12ന് വൈകുന്നേരം 3.30ന് യാത്രയുടെ സമാപനസമ്മേളനം തിരുവനന്തപുരം പേരൂര്‍ക്കട സെന്‍റ് ഗ്രിഗോറിയോസ് ഓര്‍ത്തഡോക്‌സ് വലിയപള്ളിയില്‍ നടക്കും. ബസേലിയോസ് മാര്‍ത്തോമാ മാത്യൂസ് തൃതീയന്‍ കാതോലിക്കാ ബാവാ സമാപന സമ്മേളനം ഉദ്ഘാടനം ചെയ്യും. മന്ത്രി വി. ശിവന്‍കുട്ടി, ഡോ. ഗബ്രിയേല്‍ മാര്‍ ഗ്രീഗോറിയോസ് മെത്രാപ്പോലീത്താ, പി.സി. വിഷ്ണുനാഥ് എംഎല്‍എ, വി.കെ. പ്രശാന്ത് എംഎല്‍എ തുടങ്ങിയവര്‍ പങ്കെടുക്കും. പത്രസമ്മേളനത്തില്‍ ഫാ. ജെയിന്‍ സി. മാത്യു, ഫാ. വിജു ഏലിയാസ്, രഞ്‌ജു എം. ജോയ്, ജിജോ ജോര്‍ജ്, അബി ഏബ്രഹാം കോശി, നിബിന്‍ നല്ലവീട്ടില്‍ എന്നിവര്‍ പങ്കെടുത്തു.

ശമ്പളപരിഷ്‌കരണം അട്ടിമറിക്കാന്‍ അനുവദിക്കില്ല: കെപിഎസ്ടിഎ

കോട്ടയം: അഞ്ചുവര്‍ഷത്തില്‍ ഒരിക്കല്‍ സര്‍ക്കാര്‍ ജീവനക്കാരുടെയും അധ്യാപകരുടെയും ശമ്പള പരിഷ്‌കരണ നടപടികള്‍ നടത്തുന്നത് അട്ടിമറിക്കാനുള്ള സര്‍ക്കാരിന്‍റെ ശ്രമങ്ങളെ ചെറുത്തുതോല്‍പ്പിക്കുമെന്ന് കേരള പ്രദേശ് സ്‌കൂള്‍ ടീച്ചേഴ്‌സ് അസോസിയേഷന്‍ (കെപിഎസ്ടിഎ). കമ്മീഷനെ നിയമിച്ചു ശമ്പള പരിഷ്‌കരണ നടപടികള്‍ ദ്രുതഗതിയിലാക്കണമെന്നാവശ്യപ്പെട്ടു കേരള പ്രദേശ് സ്‌കൂള്‍ ടീച്ചേഴ്‌സ് അസോസിയേഷന്‍ ജില്ലാ കമ്മിറ്റിയുടെ നേതൃത്വത്തില്‍ തിരുനക്കര ഗാന്ധി സ്‌ക്വയറിന് സമീപം സായാഹ്ന ധര്‍ണ നടത്തി. കെപിസിസി നിര്‍വാഹക സമിതി അംഗം ജോഷി ഫിലിപ്പ് ധര്‍ണ ഉദ്ഘാടനം ചെയ്തു. ജില്ലാപ്രസിഡന്‍റ് ആര്‍. രാജേഷ് അധ്യക്ഷത വഹിച്ചു. സെക്രട്ടറി മനോജ് വി. പോള്‍, ട്രഷറര്‍ ടോമി ജേക്കബ്, സംസ്ഥാന നിര്‍വാഹക സമിതി അംഗങ്ങളായ ജേക്കബ് ചെറിയാന്‍, പി. പ്രദീപ്, ബിനു ജോയ് എന്നിവര്‍ പ്രസംഗിച്ചു.

അതിരമ്പുഴ പള്ളിയിൽ ദുക്റാന തിരുനാൾ

അതിരമ്പുഴ: സെന്‍റ് മേരീസ് ഫൊറോനാ പള്ളിയിൽ മാർത്തോമാ ശ്ലീഹായുടെ ദുക്റാന തിരുനാൾ ആചരണം ഇന്നു നടക്കും. രാവിലെ ആറിനും 7.30 നും വിശുദ്ധ കുർബാന അർപ്പിക്കും. 10ന് പരിശുദ്ധ റാസ. തുടർന്ന് തോമാ നാമധാരികളുടെ സംഗമം നടത്തും. വൈകുന്നേരം അഞ്ചിന് വിശുദ്ധ കുർബാന. രാവിലെ 6.15ന് പാറോലിക്കൽ ചാപ്പലിലും റീത്താ ചാപ്പലിലും വിശുദ്ധ കുർബാന അർപ്പിക്കും. വികാരി ഫാ. മാത്യു പടിഞ്ഞാറേക്കുറ്റ്, അസി. വികാരിമാരായ ഫാ. ഏബ്രഹാം കാടാത്തുകളം, ഫാ. ടോണി മണക്കുന്നേൽ, ഫാ. അലൻ മാലിത്തറ, ഫാ. അനീഷ് കാമിച്ചേരി എന്നിവർ തിരുക്കർമങ്ങളിൽ കാർമികത്വം വഹിക്കും.

സര്‍ക്കാര്‍ ആരോഗ്യമേഖലയോടുള്ള അവഗണന അവസാനിപ്പിക്കണം: മോന്‍സ്

കോട്ടയം: ഇടതു സര്‍ക്കാര്‍ ആരോഗ്യമേഖലയോട് കാണിക്കുന്ന അവഗണനയും അനാസ്ഥയും അവസാനിപ്പിക്കണമെന്ന് മോന്‍സ് ജോസഫ് എംഎല്‍എ. കോട്ടയം മെഡിക്കല്‍ കോളജിനോടുള്ള സര്‍ക്കാരിന്‍റെ അവഗണനയ്ക്കും കെടുകാര്യസ്ഥതയ്ക്കുമെതിരേ കേരള കോണ്‍ഗ്രസ് ജില്ലാ കമ്മിറ്റി നടത്തിയ ധര്‍ണാ സമരം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലാ പ്രസിഡന്‍റ് ജയ്‌സണ്‍ ജോസഫ് അധ്യക്ഷത വഹിച്ചു. ജോയി ഏബ്രഹാം, കെ. ഫ്രാന്‍സിസ് ജോര്‍ജ് എംപി, കെ.എഫ്. വര്‍ഗീസ്, മാഞ്ഞൂര്‍ മോഹന്‍കുമാര്‍, തോമസ് കണ്ണന്തറ, പ്രിന്‍സ് ലൂക്കോസ്, വി.ജെ. ലാലി, സന്തോഷ് അഗസ്റ്റിന്‍, ബിനു ചെങ്ങളം, ജോര്‍ജ് പുളിങ്കാട് തുടങ്ങിയവര്‍ പ്രസംഗിച്ചു. ധര്‍ണയ്ക്കുശേഷം ഇടതു ഭരണത്തില്‍ ആരോഗ്യ കേരളം മോര്‍ച്ചറിയില്‍ എന്ന് എഴുതിയ ശവമഞ്ചം മെഡിക്കല്‍ കോളജ് ആശുപത്രി കവാടത്തില്‍ സ്ഥാപിച്ചു.

പൗലോസ് ദ്വിതീയന്‍ ബാവ അനുസ്മരണം

കോട്ടയം: ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവായുടെ നാലാം ഓര്‍മപ്പെരുന്നാളിനോടനുബന്ധിച്ച് ആറിന് ഉച്ചകഴിഞ്ഞ് രണ്ടിന് ഓര്‍ത്തഡോക്‌സ് വിശ്വാസ സംരക്ഷകന്‍റെ ആഭിമുഖ്യത്തില്‍ കോട്ടയം പഴയസെമിനാരിയിലെ സോഫിയാ സെന്‍ററില്‍ അനുസ്മരണ സമ്മേളനം നടത്തും. മന്ത്രി വീണാ ജോര്‍ജ് സമ്മേളനം ഉദ്ഘാടനം ചെയ്യും. ഡോ. യൂഹാനോന്‍ മാര്‍ ദീയസ്‌കോറോസ് മെത്രാപ്പോലീത്ത, തോമസ് പോള്‍ റമ്പാന്‍, പഴയ സെമിനാരി മാനേജര്‍ ഫാ. ജോബിന്‍ വര്‍ഗീസ് എന്നിവര്‍ പ്രസംഗിക്കും.

ഒരു പഞ്ചായത്ത് കളിക്കളം : നീണ്ടൂരില്‍ കളിക്കളം ഒരുങ്ങുന്നു

നീണ്ടൂര്‍: സംസ്ഥാന സര്‍ക്കാരിന്‍റെ ‘ഒരു പഞ്ചായത്ത് ഒരു കളിക്കളം’ പദ്ധതിയുടെ ഭാഗമായി നീണ്ടൂരില്‍ കളിക്കളം ഒരുങ്ങുന്നു. നീണ്ടൂര്‍ പഞ്ചായത്തിലെ ഒന്നാം വാര്‍ഡിലെ തൃക്കേല്‍ ഇന്‍ഡോര്‍ സ്റ്റേഡിയം നവീകരിച്ചാണ് കളിക്കളം നിര്‍മിക്കുന്നത്. മന്ത്രി വി.എന്‍. വാസവന്‍റെ ആസ്തി വികസന ഫണ്ടില്‍നിന്നുള്ള 50 ലക്ഷം രൂപയും സംസ്ഥാന കായിക വകുപ്പിന്‍റെ 50 ലക്ഷം രൂപയും ചെലവിട്ടാണ് നിര്‍മാണം. ഒരേക്കറോളം വരുന്ന ഗ്രൗണ്ടില്‍ ഫെന്‍സിംഗ്, സ്ട്രീറ്റ് ലൈറ്റ്, ഡ്രെയ്‌നേജ് സംവിധാനം, ഓപ്പണ്‍ ജിം എന്നിവയും ഇന്‍ഡോറില്‍ സ്‌പോര്‍ട്‌സ് ഫ്ലോറിംഗ്, വൈദ്യുതി സംവിധാനം തുടങ്ങിയവയും സജ്ജീകരിക്കും. ഫുട്‌ബോള്‍, ക്രിക്കറ്റ് എന്നിവ കളിക്കുന്നതിനായി 90 മീറ്റര്‍ നീളത്തിലും 35 മീറ്റര്‍ വീതിയിലുമാണ് ഗ്രൗണ്ട് നിര്‍മിക്കുന്നത്. സംസ്ഥാനത്തെ മുഴുവന്‍ പഞ്ചായത്തുകളിലും നിലവാരമുള്ള കളിക്കളം ഒരുക്കാന്‍ ലക്ഷ്യമിട്ട് സംസ്ഥാന കായിക യുവജനകാര്യ വകുപ്പ് നടപ്പിലാക്കുന്ന പദ്ധതിയാണ് ‘’ഒരു പഞ്ചായത്ത് ഒരു കളിക്കളം’’. സ്‌കൂള്‍ ഗ്രൗണ്ട്, പഞ്ചായത്ത് മൈതാനം, പൊതുഉടമസ്ഥതയിലുള്ള സ്ഥലങ്ങള്‍ എന്നിവിടങ്ങളിലാണ് പ്രധാനമായും പദ്ധതി നടപ്പാക്കുന്നത്. കായിക സൗകര്യങ്ങള്‍ ലഭ്യമാക്കുക വഴി കുട്ടികളെ കളിക്കളങ്ങളിലേക്കെത്തിച്ച് കായിക മേഖലയിലെ വളര്‍ച്ചയാണ് ലക്ഷ്യംവയ്ക്കുന്നതെന്ന് നീണ്ടൂര്‍ പഞ്ചായത്ത് പ്രസിഡന്‍റ് വി.കെ. പ്രദീപ് പറഞ്ഞു.

സീനിയര്‍ ജേർണലിസ്റ്റ്‌സ് ഫോറം സമ്മേളനം: വിളംബരം നടത്തും

കോട്ടയം: സീനിയര്‍ ജേർണലിസ്റ്റ്‌സ് ഫോറം കേരളയുടെ നേതൃത്വത്തില്‍ ഓഗസ്റ്റ് 20, 21 തീയതികളില്‍ തിരുവനന്തപുരത്ത് നടക്കുന്ന ദേശീയ സമ്മേളനത്തിന്‍റെ ഭാഗമായി സംസ്ഥാന കമ്മിറ്റിയുടെ നിര്‍ദേശ പ്രകാരം എല്ലാ ജില്ലകളിലും വിളംബരം നടത്തും. ഇന്നു വൈകുന്നേരം 4.30നു കോട്ടയം പ്രസ് ക്ലബ്ബിനുമുന്നില്‍ വിളംബര സന്ദേശം തിരുവഞ്ചൂര്‍ രാധാകൃഷ്ണന്‍ എംഎല്‍എ ഫ്ലാഗ് ഓഫ് ചെയ്യും. ദീപിക ചീഫ് ന്യൂസ് എഡിറ്റര്‍ സി.കെ. കുര്യാച്ചന്‍, മനോരമ എഡിറ്റോറിയല്‍ ഡയറക്ടര്‍ ജോസ് പനച്ചിപ്പുറം, മംഗളം ന്യൂസ് എഡിറ്റര്‍ ഇ.പി. ഷാജുദിന്‍, മാതൃഭൂമി ന്യൂസ് എഡിറ്റര്‍ പി.കെ. ജയചന്ദ്രന്‍, ദേശാഭിമാനി ന്യൂസ് എഡിറ്റര്‍ എസ്. മനോജ്, കേരള കൗമുദി പ്രത്യേക ലേഖകന്‍ വി. ജയകുമാര്‍, എസിവി ന്യൂസ് കോ-ഓര്‍ഡിനേറ്റര്‍ റോബിന്‍ തോമസ്, പ്രസ് ക്ലബ് പ്രസിഡന്‍റ് അനീഷ് കുര്യന്‍, സെക്രട്ടറി ജോബിന്‍ സെബാസ്റ്റ്യന്‍, സിപിഐ ജില്ലാ സെക്രട്ടറി വി.ബി. ബിനു തുടങ്ങിയവര്‍ പ്രസംഗിക്കും.

സയന്‍സ് സിറ്റി ഉദ്ഘാടനം ഇന്ന്; ഗതാഗതനിയന്ത്രണം ഏര്‍പ്പെടുത്തി

കുറവിലങ്ങാട്: കുറവിലങ്ങാട് സയന്‍സ് സിറ്റിയുടെ ഉദ്ഘാടനച്ചടങ്ങിന് എത്തുന്ന വാഹനങ്ങള്‍ക്കായി പോലീസ് ഗതാഗത നിയന്ത്രണം ഏര്‍പ്പെടുത്തി. കൂത്താട്ടുകുളം ഭാഗത്തുനിന്നു വരുന്ന വലിയവാഹനങ്ങള്‍ കോഴാ സയന്‍സ് സിറ്റിക്കു മുന്‍വശം ആളെയിറക്കി കുറവിലങ്ങാട് ദേവമാതാ കോളജ് ഗ്രൗണ്ടില്‍ പാര്‍ക്ക് ചെയ്യണം. സയന്‍സ് സിറ്റി ഉദ്ഘാടനച്ചടങ്ങില്‍ പങ്കെടുക്കാനായി കടപ്ലാമറ്റം, ഉഴവൂര്‍ എന്നീ പഞ്ചായത്തുകളില്‍നിന്നു വരുന്ന വാഹനങ്ങള്‍ കോഴാ സയന്‍സ് സിറ്റിക്കു മുന്‍വശം ആളെ ഇറക്കി കുര്യനാട് സെന്‍റ് ആന്‍സ് സ്‌കൂള്‍ ഗ്രൗണ്ടില്‍ പാര്‍ക്ക് ചെയ്യണം. വെളിയന്നൂര്‍, മരങ്ങാട്ടുപള്ളി പഞ്ചായത്തില്‍നിന്നു വരുന്ന വാഹനങ്ങള്‍ കുര്യനാട് സെന്‍റ് ആന്‍സ് സ്‌കൂള്‍ ഗ്രൗണ്ടില്‍ പാര്‍ക്ക് ചെയ്യണം. മാഞ്ഞൂര്‍ പഞ്ചായത്തില്‍നിന്നു വരുന്ന വലിയ വാഹനങ്ങള്‍ കോഴാ സയന്‍സ് സിറ്റിക്കു മുന്‍വശം ആളെയിറക്കി കുര്യനാട് സെന്‍റ് ആന്‍സ് സ്‌കൂള്‍ ഗ്രൗണ്ടില്‍ പാര്‍ക്ക് ചെയ്യണം. മാഞ്ഞൂര്‍ പഞ്ചായത്തില്‍നിന്നു വരുന്ന ചെറിയ വാഹനങ്ങള്‍ കോഴാ സയന്‍സ് സിറ്റിക്കു മുന്‍വശത്ത് ആളെയിറക്കി കുറവിലങ്ങാട് കോഴാ ജംഗ്ഷനുസമീപം നാഗാര്‍ജുന ആയൂര്‍വേദ ഷോപ്പിനു എതിര്‍ വശത്തെ ഗ്രൗണ്ടില്‍ പാര്‍ക്ക് ചെയ്യണം. കിടങ്ങൂര്‍, കാണക്കാരി പഞ്ചായത്തുകളില്‍നിന്നു വരുന്ന വലിയവാഹനങ്ങള്‍ കുര്യനാട് സെന്‍റ് ആന്‍സ് സ്‌ക്കൂള്‍ ഗ്രൗണ്ടില്‍ പാര്‍ക്ക് ചെയ്യണം. ചെറിയ വാഹനങ്ങള്‍ പകലോമറ്റം കൊച്ചിൻ സാനിവെയേഴ്‌സ് ബില്‍ഡിംഗിനുള്ളിലുള്ള ഗ്രൗണ്ടില്‍ പാര്‍ക്ക് ചെയ്യണം. മുളക്കുളം, ഞീഴൂര്‍ എന്നീ പഞ്ചായത്തുകളില്‍നിന്നു വരുന്ന വലിയവാഹനങ്ങള്‍ സയന്‍സ് സിറ്റിക്കു സമീപം ആളെയിറക്കി ദേവമാതാ കോളജ് ഗ്രൗണ്ടില്‍ പാര്‍ക്ക് ചെയ്യണം. എല്ലാ വാഹനങ്ങളും അവരവര്‍ക്കായി നിര്‍ദേശിച്ചിട്ടുള്ള പാര്‍ക്കിംഗ് ഗ്രണ്ടില്‍നിന്നുതന്നെ ആളെ കയറ്റി തിരികെ പോകണം. ഉദ്യോഗസ്ഥരുടെ വാഹനങ്ങള്‍ ബ്ലോക്ക് പഞ്ചായത്ത് ഓഫീസിനു മുന്‍വശവും സഖി സെന്‍ററിനു മുന്‍വശവും ഗ്രൗണ്ടില്‍ പാര്‍ക്ക് ചെയ്യാം. സയന്‍സിറ്റിക്കു സമീപവും എംസി റോഡിന്‍റെ വശങ്ങളിലും വാഹന പാര്‍ക്കിംഗ് അനുവദിക്കില്ല.

സംക്രാന്തിയിലും ചവിട്ടുവരിയിലും കുരുക്കോടു കുരുക്ക്

കോട്ടയം: എംസി റോഡില്‍ ഏറ്റുമാനൂരിനും കോട്ടയത്തിനുമിടയിലെ ഗതാഗതക്കൂരുക്ക് യാത്രക്കാരെ വലയ്ക്കുന്നു. തെള്ളകം, സംക്രാന്തി, ചവിട്ടുവരി, എസ്എച്ച് മൗണ്ട് എന്നിവിടങ്ങളിലാണ് ഗതാഗതക്കുരുക്ക് രൂക്ഷമായിരിക്കുന്നത്. സംക്രാന്തിയില്‍ പഴയ എംസി റോഡില്‍നിന്നു വണ്‍വേയായി വാഹനങ്ങള്‍ തിരിഞ്ഞുവരുന്നതും ജംഗ്ഷനില്‍ തന്നെയുള്ള ബസ്‌ സ്റ്റോപ്പുകളില്‍ ബസുകള്‍ നിര്‍ത്തുന്നതുമാണ് കുരുക്കിനു കാരണം. ബസ്റ്റോപ്പിനോടു ചേര്‍ന്നു തന്നെയാണ് ഇവിടെ ഓട്ടോറിക്ഷ-ടാക്സി സ്റ്റാന്‍ഡും. ബസ്‌സ്റ്റോപ്പുകള്‍ ജംഗ്ഷനില്‍നിന്ന് അല്‍പം മാറ്റിയാലും ടാക്സി സ്റ്റാന്‍ഡിനു പുനഃക്രമീകരണം നടത്തിയാലും ഇവിടത്തെ കുരുക്ക് ഒഴിവാക്കാനാകുന്നതാണ്. ചവിട്ടുവരിയിലും ഇതേ സ്ഥിതിയാണ്. ഇവിടത്തെ മുക്കവലയിലാണ് ഇരുവശങ്ങളിലേക്കുമുള്ള സ്വകാര്യ, കെഎസ്ആര്‍ടിസി ബസുകള്‍ നിര്‍ത്തി ആളെ കയറ്റുന്നതും ഇറക്കുന്നതും. ബസുകള്‍ സ്റ്റോപ്പുകളില്‍ നിര്‍ത്തുമ്പോള്‍ കുരുക്കാകും. ഇതിനിടയിലേക്കാണ് പാറമ്പുഴ റോഡില്‍നിന്നു വരുന്ന വാഹനങ്ങള്‍ എത്തുന്നതും. ഈ സമയം ഒരു വശത്തേക്കും വാഹനങ്ങള്‍ക്ക് കടന്നുപോകാന്‍ പറ്റാത്ത അവസ്ഥയാണ്. ഇവിടെയും രണ്ടു വശങ്ങളിലേക്കും ബസ് സ്റ്റോപ്പുകള്‍ മാറ്റി ക്രമീകരിച്ചാല്‍ കുരുക്കിനു പരിഹാരമുണ്ടാകും. രണ്ടിടങ്ങളിലും നേരത്തേ ട്രാഫിക് പോലീസിന്‍റെ സേവനമുണ്ടായിരുന്നു സ്‌കൂള്‍ തുറന്ന് തിരക്ക് വര്‍ധിച്ച ഈ സമയത്ത് ട്രാഫിക് പോലീസിന്‍റെ സേവനം പലപ്പോഴും ലഭ്യമല്ലാത്ത സ്ഥിതിയുമാണ്. തെള്ളകം കാരിത്താസ് ജംഗ്ഷനിലും എസ്എച്ച് മൗണ്ടിലും സമാനമായ കുരുക്കാണ്. ജംഗ്ഷനുകളിലെ അനധികൃത പാര്‍ക്കിംഗും കൈയേറ്റവും ഒഴിപ്പിച്ച് ജംഗ്ഷന്‍ വീതികൂട്ടിയാലും കുരുക്ക് ഒഴിവാക്കാം.

ശബരി എയര്‍പോര്‍ട്ട്: സ്ഥലം സര്‍വേ തുടങ്ങി

കോട്ടയം: നിര്‍ദിഷ്ട ശബരിമല വിമാനത്താവളത്തിനുള്ള ഭൂമി ഏറ്റെടുക്കുന്നതിനു മുന്നോടിയായി എരുമേലി തെക്ക്, മണിമല വില്ലേജുകളിലായി 2570 ഏക്കര്‍ ഭൂമിയുടെ ഫീല്‍ഡ് സര്‍വേ തുടങ്ങി. മണിമല വില്ലേജില്‍ മുക്കടയ്ക്കു സമീപമാണ് ഇന്നലെ സര്‍വേ തുടങ്ങിയത്. കാലാവസ്ഥ അനുകൂലമായാല്‍ ഒക്ടോബറിനു മുന്‍പ് സര്‍വേ പൂര്‍ത്തിയാകും. ഒരു റവന്യൂ സര്‍വേയറും അഞ്ച് താത്കാലിക സര്‍വേയര്‍മാരുമാണ് നേതൃത്വം നല്‍കുന്നത്. സര്‍വേക്കു ശേഷം സ്ഥലം വിട്ടുകൊടുക്കുന്നവര്‍ക്ക് പൊന്നുംവില നല്‍കുന്നതിനുള്ള നടപടികള്‍ തുടങ്ങും. സ്ഥലം, കെട്ടിടം, മരങ്ങള്‍ എന്നിവയ്ക്ക് പ്രത്യേകമായി തുക നിശ്ചയിച്ചാണ് നഷ്ടം നല്‍കുക. ബിലീവേഴ്‌സ് ചര്‍ച്ചിനു കീഴിലുള്ള ചെറുവള്ളി എസ്റ്റേറ്റില്‍ സര്‍വേ നടത്തുന്നതിന് കോടതി തടസമില്ലെന്നും അടുത്ത മാസം എസ്‌റ്റേറ്റിലെ സര്‍വേ തുടങ്ങുമെന്നും റവന്യൂ വകുപ്പ് വ്യക്തമാക്കി.

കുരങ്ങുകളെ വന്ധ്യംകരിച്ച് പെരുകല്‍ തടയാന്‍ പദ്ധതി

കോട്ടയം: അനിയന്ത്രിതമായി പെരുകിയ നാടന്‍ കുരങ്ങുകളെക്കൊണ്ട് പൊറുതി മുട്ടിയതോടെ ഇവയെ പിടികൂടി വന്ധ്യംകരിച്ച് എണ്ണം കുറയ്ക്കാന്‍ സംസ്ഥാന വനംവകുപ്പ് ആലോചിക്കുന്നു. കാട്ടില്‍നിന്ന് വനാതിര്‍ത്തിയിലേക്കും അടുത്തയിടെ നാട്ടിലേക്കും നഗരത്തിലേക്കും വന്നുകൂടിയ കുരങ്ങുകള്‍ കര്‍ഷകര്‍ക്കും കച്ചവടക്കാര്‍ക്കും, യാത്രക്കാര്‍ക്കും ഭീഷണിയാണ്. നായകള്‍ക്കെന്നപോലെ കുരങ്ങിനും പേവിഷബാധയ്ക്കുള്ള സാഹചര്യമേറെയുണ്ട്. കേരളത്തില്‍ വ്യാപകമായി കാണുന്ന നാടന്‍ കുരങ്ങ് അഥവാ തൊപ്പിക്കുരങ്ങുകളെയാണ് വന്ധ്യംകരിക്കാന്‍ പദ്ധതിയിടുന്നത്. ഇതിന് കേന്ദ്ര വനം, പരിസ്ഥിതി, കാലാവസ്ഥാവ്യതിയാന മന്ത്രാലയങ്ങളുടെ അനുമതി വേണ്ടതുണ്ട്. മലയോര മേഖലയിലെ കൃഷിയിടങ്ങളില്‍ നിലത്തു വളരുന്നതെല്ലാം കാട്ടുപന്നിയും മരത്തിനു മുകളിലുള്ളതെല്ലാം കുരങ്ങും നശിപ്പിക്കുന്ന സാഹചര്യമാണ്. തെങ്ങ്, കവുങ്ങ്, ജാതി എന്നിവയിലെ ഫലം അപ്പാടെ കുരങ്ങ് നശിപ്പിക്കും. പാശ്ചാത്യ രാജ്യങ്ങള്‍ വന്ധ്യകരണം, ഇഞ്ചക്‌ഷന്‍, ഗുളിക എന്നിവ മുഖേനയാണ് ഇവയുടെ എണ്ണം കുറയ്ക്കുന്നത്. ഹിമാചല്‍ പ്രദേശില്‍ കുരങ്ങുകളുടെ എണ്ണം കുറയ്ക്കാന്‍ ഇത്തരത്തില്‍ സാധിച്ചിട്ടുണ്ട്. ജില്ലയിലെ 24 പഞ്ചായത്തുകളില്‍ കുരങ്ങുകളുടെ ശല്യമുള്ളതായി വനം വകുപ്പ് വ്യക്തമാക്കി. കൂടാതെ ജില്ലാതിര്‍ത്തിയായ മുണ്ടക്കയം മുതല്‍ പീരുമേട് വരെ കുരങ്ങുകള്‍ എണ്ണമില്ലാതെ പെരുകിയിട്ടുണ്ട്. തീര്‍ഥാടകരും വിനോദസഞ്ചാരികളും കൂടുതലായി എത്തുന്ന വളഞ്ഞാങ്ങാനം, പരുന്തുംപാറ, കുട്ടിക്കാനം എന്നിവിടങ്ങളില്‍ നിറുത്തിയിട്ട വാഹനങ്ങളില്‍ നിന്ന് കിട്ടാവുന്നതൊക്കെ കുരങ്ങന്‍മാര്‍ അപഹരിക്കുക പതിവാണ്. യാത്രക്കാര്‍ ഭക്ഷണാവശിഷ്ടങ്ങള്‍ വഴിയില്‍ ഉപേക്ഷിക്കുന്നതാണ് ഇവ തമ്പടിക്കാന്‍ കാരണം. അതിനാല്‍ ഇത്തരം ഇടങ്ങളില്‍ ഭക്ഷണാവശിഷ്ടങ്ങള്‍ കളയാന്‍ സംവിധാനം ഒരുക്കുന്നതും ആലോചനയിലാണ്. കുരങ്ങുകളെ കൂടുകൾ സ്ഥാപിച്ച് പിടികൂടി മൃഗാശുപത്രികളിലെത്തിച്ച് വന്ധ്യംകരിച്ച് ഒരാഴ്ച നിരീക്ഷണത്തിനുശേഷം അതേ സ്ഥലത്ത് തുറന്നുവിടാനുള്ള പദ്ധതിയാണ് കേന്ദ്രത്തിന് സമര്‍പ്പിക്കുന്നത്. കാട്ടുപന്നികളെ വെടിവച്ചുകൊല്ലാന്‍ അനുമതിയുള്ളതുപോലെ കുരങ്ങുകളെ കൊന്നൊടുക്കാന്‍ അനുമതി ലഭിക്കില്ല. അതിനാല്‍ വന്ധ്യംകരണം മാത്രമാണ് പോംവഴി.

പുതിയ ബസ് വന്നാലും പഴയ ഓര്‍ഡിനറിക്ക് മാറ്റമില്ല

കോട്ടയം: കെഎസ്ആര്‍ടിസി നിലവില്‍ ഓടിക്കുന്ന 1200 ബസുകള്‍ക്ക് പുതിയ മാനദണ്ഡമനുസരിച്ച് കേന്ദ്ര സര്‍ക്കാര്‍ രജിസ്‌ട്രേഷനില്ല. ഇരുപത് വര്‍ഷത്തിലേറെ പഴക്കമുള്ള ബസുകള്‍ ഇപ്പോഴും നിരത്തിലുണ്ട്. ഇക്കൊല്ലം പുതുതായി നാനൂറിലേറെ പുതിയ ബസുകള്‍ എത്തിയശേഷം കാലപ്പഴക്കം ചെന്നത് ഓട്ടം നിറുത്തുമോ എന്നതില്‍ വ്യക്തതയില്ല. പഴയ ബസുകള്‍ പിന്‍വലിച്ചാല്‍ നിലവില്‍ പത്തു വര്‍ഷത്തിലേറെ പഴക്കമുള്ള ഫാസ്റ്റ് പാസഞ്ചറുകള്‍ ഓര്‍ഡിനറികളായി മാറ്റേണ്ടിവരും. 12 വര്‍ഷത്തിലേറെ പഴക്കമുള്ളവ ലിമിറ്റഡ് സ്റ്റോപ്പ് ഓര്‍ഡിനറികളായി കോട്ടയം-കുമളി, കോട്ടയം-കട്ടപ്പന റൂട്ടുകളില്‍ ഓടിക്കുന്നുണ്ട്. ആറു വര്‍ഷത്തെ ഇടവേളയ്ക്കുശേഷം 80 പുതിയ മോഡല്‍ ബസുകള്‍ നിരത്തിലെത്തും. ഇവയില്‍ 60 എണ്ണം സൂപ്പര്‍ ഫാസ്റ്റ്, 20 എണ്ണം ഫാസ്റ്റ് പാസഞ്ചര്‍ സര്‍വീസുകളായിരിക്കും. സ്വിഫ്റ്റ് കമ്പനിയായിരിക്കും ഇവയുടെ നടത്തിപ്പ്. ടാറ്റയുടെ ഷാസിയില്‍ എസിജിഎല്‍ കമ്പനിയാണ് പുതിയ കെഎസ്ആര്‍ടിസി ബസുകള്‍ക്ക് ബോഡി നിര്‍മിക്കുന്നത്. വരുന്ന മൂന്ന് മാസത്തിനുള്ളില്‍ ഇതേ മാതൃകയിലുള്ള കൂടുതല്‍ ബസുകള്‍ കേരളത്തിലേക്ക് എത്തും.

കിടാരികള്‍ക്കു മാത്രം ജന്മം നല്‍കാന്‍ ലിംഗനിര്‍ണയം

കോട്ടയം: കിടാരികള്‍ക്കു മാത്രം ജന്മം നല്‍കാന്‍ ലിംഗനിര്‍ണയം നടത്തിയ ബീജം (സെക്‌സ് സോള്‍ട്ടഡ് സെമന്‍) ജില്ലയിലെ 29 മൃഗാശുപത്രികളില്‍ ലഭ്യമാക്കുന്നു. പശുക്കിടാരികളെ കൂടുതലായി ഉത്പാദിപ്പിക്കാനും പാലുത്പാദനം കൂട്ടാനും ലക്ഷ്യമിട്ട് രാഷ്‌ട്രീയ ഗോകുല്‍ മിഷന്‍ പദ്ധതിയുടെ ഭാഗമായി കേന്ദ്ര, സംസ്ഥാന സര്‍ക്കാരുകള്‍ ചേര്‍ന്നു നടപ്പാക്കുന്ന പദ്ധതിയില്‍ അത്യുത്പാദന ശേഷിയുള്ള ബീജമാണ് കുത്തിവയ്ക്കുന്നത്. വിദേശത്തുനിന്നും ഇറക്കുമതി ചെയ്ത ബീജത്തില്‍ 99 ശതമാനവും കിടാരികള്‍ ജനിക്കുമെന്നതാണ് പ്രത്യേകത. അത്യുത്പാദന ശേഷിയുള്ള കാളകളുടെ ബീജത്തില്‍നിന്നും മൂരിക്കിടാവ് ജനിക്കാന്‍ സാധ്യതയുള്ള ക്രോമസോമിനെ നീക്കം ചെയ്യും. ലാബിലെ ശസ്ത്രക്രിയാ പ്രക്രിയയിലൂടെ മൂരിക്കിടാവിനു സാധ്യതയുള്ള വൈ -ക്രോമസോമിനെ നീക്കിയാണ് ഇതിന്‍റെ ഉത്പാദനം. 10 ലിറ്റര്‍ പാല്‍ തരുന്ന പശുക്കളിലാണ് ഈ ബീജം കുത്തിവയ്ക്കുക. ഈ രീതിയില്‍ പ്രത്യുത്പാദനം നടത്തി ജനിക്കുന്ന പശുക്കളില്‍ നിന്നും ഒരു ദിവസം 40 ലിറ്റര്‍ പാല്‍വരെ കിട്ടുമെന്ന് ജില്ലാ മൃഗസംരക്ഷണ ഓഫീസര്‍ ഡോ.പി. കെ. മനോജ് പറഞ്ഞു. ഭാരതീയ അഗ്രോ ഇന്‍ഡസ്ട്രിയല്‍ ഫൗണ്ടേഷന്‍ എന്ന ഏജന്‍സി മുഖേന കേരള ലൈവ് സ്റ്റോക്ക് ഡെവലപ്പ്‌മെന്‍റ് ബോര്‍ഡാണ് ബീജം എത്തിക്കുന്നത്. ലിംഗ നിര്‍ണയം നടത്തിയ ബീജം കുത്തിവയ്ക്കുന്നതിലൂടെ ഉത്പാദന ശേഷിയുള്ള പശുക്കളുടെ ഒരു തലമുറയുണ്ടാകുമെന്നും ക്ഷീര കര്‍ഷകരുടെ വരുമാനം വര്‍ധിക്കുമെന്നും മൃഗസംരക്ഷണ ഓഫീസര്‍ പറഞ്ഞു. രാമപുരം പഞ്ചായത്തില്‍ ലിംഗനിര്‍ണയം നടത്തിയ ബീജം കുത്തിവച്ചതിലൂടെ ഇരട്ടകള്‍ ഉള്‍പ്പെടെ എട്ടു പശുക്കുട്ടികള്‍വരെ ഇതുവരെയുണ്ടായി. കഴിഞ്ഞ മേയില്‍ ഇവിടെ പദ്ധതി ആരംഭിച്ചിരുന്നു. ഇതുവരെ 40 പശുക്കളില്‍ കുത്തിവയ്പ് നടത്തിയിട്ടുണ്ട്. ആര്‍പ്പൂക്കര, ചമ്പക്കര, കടനാട്, കൂരാലി, കൊഴുവനാല്‍, മരങ്ങോലി, മീനടം, മേലുകാവ്, മൂന്നിലവ്, മുത്തോലി, പൈക, പുതുവേലി, അയര്‍ക്കുന്നം, രാമപുരം മേതിരി, പരിയാരം, ചെങ്ങളം സൗത്ത്, ചേന്നാട്, മേലമ്പാറ, പനച്ചിക്കാട്, ടിവിപുരം, തുരുത്തി, ഉദയനാപുരം, വെച്ചൂര്‍, തലയാഴം, കൂരോപ്പട, കടുത്തുരുത്തി, കുറിച്ചി, പാറത്തോട് മൃഗാശുപത്രികളിലാണ് ലിംഗനിര്‍ണയം നടത്തിയ ബീജം വിതരണത്തിന് എത്തിക്കുന്നത്. ഒരു സ്‌ട്രോയ്ക്ക് 500 രൂപയാണ് വില. രജിസ്റ്റര്‍ ചെയ്യുന്ന പശുക്കള്‍ക്ക് രണ്ട് ബീജമാത്രകളാണ് സബ്‌സിഡിയായി ലഭിക്കുക. ബീജസങ്കലനം പരാജയപ്പെട്ടാല്‍ തുക തിരികെ ലഭിക്കും.

നായപിടിത്തം മന്ദഗതിയില്‍; ഭീഷണിയായി തെരുവുനായകൾ

കോട്ടയം: നായപിടിത്തവും വന്ധ്യംകരണവുമൊക്കെ വീണ്ടും പ്രഹസനമായി. മൂന്നു ദിവസം അങ്ങിങ്ങ് തുടങ്ങിയ നായപിടിത്തം ഏറെക്കുറെ അവസാനിച്ചുകഴിഞ്ഞു. നായപിടിത്തക്കാര്‍ ഇറങ്ങിയതോടെ തെരുവുനായകള്‍ കൂട്ടത്തോടെ സ്ഥലം വിട്ടതിനാല്‍ പിടിക്കാന്‍ കിട്ടുന്നില്ലെന്നാണ് പരാതി. ഒരു നായയെ നെറ്റില്‍ കുരുക്കി പിടികൂടി വാഹനത്തിലെത്തിച്ച് വന്ധ്യംകരണത്തിനുശേഷം അതേ സ്ഥലത്ത് തിരികെ വിടുന്നതിന് 500 രൂപയാണ് പ്രതിഫലം. തുടക്കത്തില്‍ അഞ്ചു നായകളെ വരെ പിടികൂടിയവരുണ്ട്. നിലവില്‍ നായപിടിത്തക്കാരുടെ സാന്നിധ്യം അറിയുമ്പോള്‍തന്നെ നായകള്‍ ഓടിപ്പോകും. പിന്നീട് ആഴ്ചകള്‍ക്കു ശേഷമേ ഇവ തിരികെ വരൂ. ഗ്രാമങ്ങള്‍, ആശുപത്രി, വിദ്യാഭ്യാസസ്ഥാപനങ്ങള്‍, മാര്‍ക്കറ്റ് എന്നിവിടങ്ങളില്‍ തമ്പടിച്ചിരിക്കുന്നതും ഒറ്റ തിരിഞ്ഞുനടക്കുന്നതുമായ നായകളെ പിടികൂടാന്‍ തുടങ്ങിയിട്ടില്ല. പേ വിഷബാധയ്ക്കുള്ള സാധ്യത ഏറിവരുന്ന സാഹചര്യത്തില്‍ തദ്ദേശസ്ഥാപനങ്ങള്‍ കടുത്ത അനാസ്ഥയാണ് ഈ മേഖലയില്‍ പുലര്‍ത്തുന്നത്. നായശല്യം രൂക്ഷമായതോടെ ഇരുചക്രവാഹനങ്ങളില്‍ സഞ്ചരിക്കുന്നവരും പ്രഭാതസായാഹ്ന നടപ്പുകാരുമാണ് ആശങ്കയിലായത്. വടിയോ ആയുധമോ കൈവശമില്ലാതെ പുറത്തിറങ്ങാന്‍ പറ്റാത്ത സ്ഥിതിയാണ്. സ്‌കൂള്‍ കുട്ടികളെ നായകള്‍ കൂട്ടത്തോടെ ആക്രമിക്കുന്നത് പതിവായതോടെ രക്ഷിതാക്കളും ആശങ്കയിലാണ്. പാമ്പാടിയില്‍ കഴിഞ്ഞ ദിവസം നിരവധി പേരെ ആക്രമിച്ച നായയ്ക്ക് പേ വിഷബാധയുള്ളതായാണ് സൂചന. കടിയേറ്റവരെല്ലാം പ്രതിരോധ കുത്തിവയ്‌പെടുത്തു.

ഓണത്തിന് ഇത്തവണയും കുടുംബശ്രീയുടെ പച്ചക്കറിയും പൂവും

കോട്ടയം: ഇത്തവണയും ഓണത്തിനു കുടുംബശ്രീയുടെ ജൈവപച്ചക്കറികളും പൂക്കളും ജില്ലയില്‍ വിപണിയിലെത്തും. ഓണക്കനി, നിറപൊലിമ എന്ന പേരില്‍ ജില്ലയില്‍ രണ്ടു കൃഷികളും ആരംഭിക്കുന്നതിനുള്ള മുന്നൊരുക്കങ്ങള്‍ ആരംഭിച്ചു. പച്ചക്കറികളുടെയും പൂക്കളുടെയും തൈകളുടെ ഉത്പാദനം തുടങ്ങി. വിത്തിട്ടു മുളപ്പിച്ച ഹൈബ്രിഡ് തൈകളാണ് ജൈവകൃഷി രീതിയില്‍ നട്ട് ഓണക്കാലത്ത് വിളവെടുക്കുന്നത്. ജില്ലയുടെ വിവിധ കേന്ദ്രങ്ങളിലുളള ജൈവ പ്ലാന്‍റുകളിലാണ് വിത്തുവിതച്ചിരിക്കുന്നത്.1872 ഏക്കറില്‍ പച്ചക്കറിയും 195 ഏക്കറില്‍ പൂവും കൃഷി ചെയ്യുന്നതിനാണ് കുടുംബശ്രീയുടെ തീരുമാനം. പച്ചക്കറിയില്‍ പയര്‍, വെണ്ട, തക്കാളി, പാവല്‍, പടവലം, മത്തന്‍, വഴുതന, കുമ്പളം, ചുരയ്ക്ക, പച്ചമുളക് എന്നിവയാണ് പ്രധാനമായും കൃഷിയിറക്കുന്നത്. ചെണ്ടുമല്ലിയും ബന്ദിയുമാണ് പൂക്കള്‍. ഇവയുടെ തൈകള്‍ കുടുംബശ്രീ വഴി കാര്‍ഷിക ഗ്രൂപ്പുകള്‍ക്ക് നല്‍കും. കൃഷിയിറക്കുന്നതിനായി ഓരോ സിഡിഎസിനും പരമാവാധി 25,000 രൂപ വരെ റിവോള്‍വിംഗ് ഫണ്ട് അനുവദിച്ചിട്ടുണ്ട്. വിളവെടുപ്പ് കഴിഞ്ഞ് രണ്ടു മാസത്തിനകം തുക തിരിച്ചടയ്ക്കണം. ഉത്പാദിപ്പിക്കുന്ന പച്ചക്കറികളുടെയും പൂക്കളുടെയും വിപണി കുടുംബശ്രീ തന്നെയാണ് കണ്ടെത്തുന്നത്. പച്ചക്കറികള്‍ക്ക് വിപണി കണ്ടെത്താമെങ്കിലും പൂവ് വില്‍പന ശ്രമകരമാണ്. തമിഴ്‌നാട്ടില്‍ നിന്നുള്ള പൂക്കളുടെ വരവ് വലിയ പ്രതിസന്ധിയാണ് സൃഷ്ടിക്കുന്നത്. കഴിഞ്ഞ വര്‍ഷം കുടുംബശ്രീയുടെ വിവിധ സിഡിഎസുകള്‍ വ്യാപകമായി പൂ കൃഷി ചെയ്‌തെങ്കിലും വിപണിയിലെ പരാജയം മൂലം നഷ്ടം വന്നു. ഇത്തവണ പൂവില്‍നിന്നും മൂല്യവര്‍ധിത ഉത്പന്നങ്ങള്‍ ഉണ്ടാക്കാനുള്ള ശ്രമവും കുടുംബശ്രീ നടത്തുന്നുണ്ട്. പൂവില്‍ നിന്നും തുണിത്തരങ്ങള്‍ക്ക് നിറം നല്‍കുന്നതിനുള്ള കളര്‍ വേര്‍തിരിച്ചെടുക്കുന്നതിനും സാമ്പ്രാണിത്തിരി ഉണ്ടാക്കുന്നതിനുമാണ് ശ്രമം നടത്തുന്നത്.

സയന്‍സ് സിറ്റി ഒന്നാംഘട്ട ഉദ്ഘാടനം മുഖ്യമന്ത്രി ഇന്ന് നിര്‍വഹിക്കും

കോട്ടയം: സംസ്ഥാന ശാസ്ത്രസാങ്കേതിക മ്യൂസിയത്തിന്‍റെ ആഭിമുഖ്യത്തില്‍ സ്ഥാപിച്ച സയന്‍സ് സിറ്റിയുടെ ഒന്നാംഘട്ട ഉദ്ഘാടനം ഇന്നു വൈകുന്നേരം അഞ്ചിന് മുഖ്യമന്ത്രി പിണറായി വിജയന്‍ നിര്‍വഹിക്കും. മന്ത്രി ഡോ. ആര്‍. ബിന്ദു അധ്യക്ഷത വഹിക്കും. കേന്ദ്ര സാംസ്‌കാരിക മന്ത്രി ഗജേന്ദ്രസിംഗ് ശെഖാവത്ത്, മന്ത്രി വി.എന്‍. വാസവന്‍ എന്നിവര്‍ മുഖ്യാതിഥികളാകും. കുറവിലങ്ങാട് പഞ്ചായത്തിലെ കോഴായില്‍ 30 ഏക്കര്‍ ഭൂമിയിലാണ് സയന്‍സ് സിറ്റിയുടെ നിര്‍മാണം. കുറവിലങ്ങാട് പഞ്ചായത്തിന്‍റെയും ഉഴവൂര്‍ ബ്ലോക്ക് പഞ്ചായത്തിന്‍റെയും സഹകരണത്തോടെ അപൂര്‍വയിനം വന, സുഗന്ധവ്യഞ്ജന, ഫല, ഔഷധ, ഉദ്യാനസസ്യങ്ങള്‍ എന്നിവ ഉള്‍ക്കൊള്ളിച്ചുള്ള വിപുലമായ ജൈവ വൈവിധ്യ പാര്‍ക്ക് സയന്‍സ് സിറ്റിയില്‍ സ്ഥാപിക്കാനുള്ള നടപടികളും പുരോഗമിക്കുകയാണ്. ഉദ്യാനത്തിന്‍റെ നിര്‍മാണ ഉദ്ഘാടനവും മുഖ്യമന്ത്രി നിര്‍വഹിക്കും. എംപിമാരായ ജോസ് കെ. മാണി, ഫ്രാന്‍സിസ് ജോര്‍ജ്, എംഎല്‍എമാരായ മോന്‍സ് ജോസഫ്, സി. കെ. ആശ, നാഷണല്‍ കൗണ്‍സില്‍ ഓഫ് സയന്‍സ് മ്യൂസിയം ഡയറക്ടര്‍ ജനറല്‍ എ.ഡി. ചൗധരി, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ കളക്ടര്‍ ജോണ്‍ വി. സാമുവല്‍, ഉഴവൂര്‍ ബ്ലോക്ക് പഞ്ചായത്ത് പ്രസിഡന്‍റ് രാജു ജോണ്‍ ചിറ്റേത്ത്, കുറവിലങ്ങാട് പഞ്ചായത്ത് പ്രസിഡന്‍റ് മിനി മത്തായി, സംസ്ഥാന ശാസ്ത്ര സാങ്കേതിക മ്യൂസിയം ഡയറക്ടര്‍ ഇന്‍ ചാര്‍ജ് പി.എസ്. സുന്ദര്‍ലാല്‍ എന്നിവര്‍ പങ്കെടുക്കും.

കാര്‍ഷിക സ്ഥിതിവിവരക്കണക്ക് സര്‍വേ ആരംഭിച്ചു

കോട്ടയം: ജില്ലയില്‍ കാര്‍ഷിക സ്ഥിതിവിവരക്കണക്കുകള്‍ ശേഖരിക്കുന്ന കാര്‍ഷിക സ്ഥിതിവിവരക്കണക്ക് സര്‍വേയുടെ 2025- 26 വര്‍ഷത്തെ ഫീല്‍ഡുതല ജോലികള്‍ ആരംഭിച്ചു. കേന്ദ്ര-സംസ്ഥാന സര്‍ക്കാരുകളുടെ ആസൂത്രണ പ്രവര്‍ത്തനങ്ങള്‍ക്കാവശ്യമായ സ്ഥിതിവിവര കണക്കുകളാണ് ശേഖരിക്കുന്നത്. കാര്‍ഷിക- കാര്‍ഷികേതര ആവശ്യങ്ങള്‍ക്കായി വിനിയോഗിക്കുന്ന ഭൂമിയുടെ വിസ്തൃതി, വിളകളുടെ ഉത്പാദനം, ഉത്പാദനക്ഷമത, ജലസേചനം സംബന്ധിച്ച വിവരങ്ങള്‍, ജലസേചന സ്രോതസ് തുടങ്ങിയ വിവരങ്ങളാണ് പ്രധാനമായും ശേഖരിക്കുന്നത്. വിവരങ്ങള്‍ ശേഖരിക്കുന്നതിനായി സ്റ്റാറ്റിസ്റ്റിക്കല്‍ ഇന്‍വെസ്റ്റിഗേറ്റര്‍മാര്‍ വീടുകളിലെത്തുമ്പോള്‍ പൊതുജനങ്ങള്‍ കൃത്യമായ വിവരങ്ങള്‍ നല്‍കണമെന്ന് സാമ്പത്തിക സ്ഥിതിവിവരക്കണക്ക് വകുപ്പ് ജില്ലാ ഡെപ്യൂട്ടി ഡയറക്ടര്‍ പി.ആര്‍. ശ്രീലേഖ അറിയിച്ചു.

പരിമിതികളില്‍ വീര്‍പ്പുമുട്ടി ജില്ലാ ജയിൽ

കോട്ടയം: പരിമിതികളില്‍ വീര്‍പ്പുമുട്ടുന്ന ജില്ലാ ജയിലില്‍ സൗകര്യം വര്‍ധിപ്പിക്കുക അസാധ്യമാണ്. മണിമല മുക്കടയില്‍ റബര്‍ ബോര്‍ഡ് വക അന്‍പത് ഏക്കര്‍ സ്ഥലത്തുനിന്ന് അഞ്ചേക്കര്‍ വിട്ടുകൊടുക്കണമെന്ന് ഏറെക്കാലമായുള്ള ആവശ്യമാണ്. നിലവില്‍ കോട്ടയം കളക്ടറേറ്റിനു സമീപമുള്ള ജയില്‍ കാലപ്പഴക്കം ചെന്ന കെട്ടിടമാണ്. മതില്‍ ദുര്‍ബലവും ഉയരം കുറഞ്ഞതുമാണ്. മൂന്നു വര്‍ഷം മുമ്പ് കൊലക്കേസ് പ്രതി രക്ഷപ്പെട്ടതിനു പിന്നാലെ ശനിയാഴ്ച മൊബൈല്‍ മോഷണക്കേസില്‍ റിമാന്‍ഡിലായിരുന്ന ആസാം സ്വദേശി അമിനുള്‍ ഇസ്ലാം (20) ജയില്‍ ചാടിയിരുന്നു. രക്ഷപ്പെട്ട പ്രതി ട്രെയിനില്‍ നാടുവിട്ടതായാണ് സിസിടിവി ദൃശ്യങ്ങളില്‍ വ്യക്തമാകുന്നത്. നിലവിലുള്ള ജയിലിന്‍റെ ഭിത്തിക്കു മുകളില്‍ അടുത്തയിടെ മുള്ളു കമ്പിവേലി പിടിപ്പിച്ചിരുന്നെങ്കിലും പ്രതി സാഹസികമായി തടവുചാടുകയായിരുന്നു. 1959ല്‍ സബ് ജയിലായി തുടങ്ങി രണ്ടായിരത്തില്‍ ജില്ലാ ജയിലായി ഉയര്‍ത്തിയ ജയില്‍ സംവിധാനത്തിന് അരയേക്കറാണ് വിസ്തൃതി. 15 സെല്ലുകളിലായി 67 പേരെ പാര്‍പ്പിക്കാവുന്ന ജയിലില്‍ 108 പേരാണ് കഴിയുന്നത്. മുക്കടയിലെ റബര്‍ബോര്‍ഡ് ഭൂമിക്കു തടസമുണ്ടെങ്കില്‍ നാട്ടകം സിമന്‍റ്സ്, ചിങ്ങവനം ടെസില്‍ എന്നിവയുടെ അധികമുള്ള ഭൂമി വിട്ടുകിട്ടിയാലും ജയില്‍ പണിയാനാകും. പരിമിതമായ സൗകര്യങ്ങള്‍ മാത്രമാണ് ഇവിടെയുള്ള 27 ജീവനക്കാര്‍ക്കുമുള്ളത്. പുറത്ത് സ്ഥലസൗകര്യമില്ലാത്തതിനാല്‍ പ്രതികളെ സെല്ലില്‍നിന്ന് ഭക്ഷണത്തിന് മാത്രമാണ് പുറത്തിറക്കുന്നത്. മറ്റിടങ്ങളിലേതുപോലെ വിശ്രമത്തിനോ കൃഷിക്കോ ഇവിടെ സൗകര്യങ്ങളില്ല.

കാട്ടുപന്നി കുറുകെ ചാടി ഓട്ടോറിക്ഷ മറിഞ്ഞ് രണ്ടു പേർക്ക്

കാഞ്ഞിരപ്പള്ളി: പാറത്തോട് ചോറ്റിയിൽ കാട്ടുപന്നി കുറുകെ ചാടി ഓട്ടോറിക്ഷ മറിഞ്ഞുണ്ടായ അപകടത്തിൽ ഡ്രൈവർക്കും യാത്രക്കാരനും പരിക്കേറ്റു. ഓട്ടോറിക്ഷ ഡ്രൈവർ ചോറ്റി ത്രിവേണി സ്വദേശി പന്തമാവിൽ ശ്യാം പി. രാജു (30), യാത്രക്കാരനായിരുന്ന ഈരാറ്റുപേട്ട സ്വദേശി പുളിമൂട്ടിൽ സുനിൽ (42) എന്നിവർക്കാണ് പരിക്കേറ്റത്. ചൊവ്വാഴ്ച രാത്രി ഏഴോടെയായിരുന്നു സംഭവം. എസ്റ്റേറ്റ് ജീവനക്കാരനും ഓട്ടോറിക്ഷ തൊഴിലാളിയുമായ ശ്യാം ഈരാറ്റുപേട്ടയ്ക്ക് ഓട്ടം പോവുകയായിരുന്നു. വാഹനത്തിൽ സുനിലടക്കം രണ്ട് യാത്രക്കാരാണ് ഉണ്ടായിരുന്നത്. ഊരയ്ക്കനാട് മാളിക റോഡിൽ ഓട്ടോയുടെ അടിയിലേക്കു കാട്ടുപന്നി ഓടിക്കയറുകയായിരുന്നു. ഒരു വശം പൊങ്ങിയ ഓട്ടോറിക്ഷ വെട്ടിച്ച് മാറ്റുന്നതിനിടെ സമീപത്തെ കാനയിലേക്കു മറിഞ്ഞു. അപകടത്തിൽ ശ്യാമിന്‍റെ മുഖത്തിന്‍റെ ഒരു ഭാഗത്തെ തൊലി അടർന്നുമാറി. സുനിലിന് തലയ്ക്കാണ് പരിക്കേറ്റത്. ഇരുവരും കാഞ്ഞിരപ്പള്ളി ജനറൽ ആശുപത്രിയിലും ശ്യാം പിന്നീട് കോട്ടയം മെഡിക്കൽ കോളജിലും ചികിത്സ തേടി. ശ്യാമിന്‍റെ മുഖത്ത് ഇരുപതിലധികം കുത്തിക്കെട്ടുകൾ വേണ്ടിവന്നു. ഓട്ടോറിക്ഷയ്ക്കും കാര്യമായ നാശനഷ്ടമുണ്ടായി. പ്രദേശത്ത് ഇതിന് മുന്പും കാട്ടുപന്നിയുടെ ആക്രമണം ഉണ്ടായിട്ടുണ്ട്. ബൈക്ക് യാത്രികരടക്കം ഇവിടെ നേരത്തെ അപകടത്തിൽപ്പെട്ടിരുന്നു. എസ്റ്റേറ്റ് മേഖലകൂടിയായ ഇവിടെ തോട്ടങ്ങളിൽനിന്നാണ് കാട്ടുപന്നികൾ ജനവാസ മേഖലകളിലേക്കെത്തുന്നതെന്ന് പ്രദേശവാസികൾ പറയുന്നു.

ആഫ്രിക്കൻ ഒച്ചുശല്യം അവസാനിപ്പിക്കണം: ഏദൻ പബ്ലിക് സ്കൂൾ

വാഴൂർ: കേരളത്തിലാകമാനം വളരെ വേഗം വ്യാപിച്ചുകൊണ്ടിരിക്കുന്ന ആഫ്രിക്കൻ ഒച്ചുശല്യം അവസാനിപ്പിക്കാൻ സർക്കാർ അടിയന്തര ഇടപെടൽ നടത്തണമെന്ന് വാഴൂർ ഏദൻ പബ്ലിക് സ്കൂൾ എക്കോ ക്ലബ്, ഫാർമേഴ്സ് ക്ലബ് എന്നിവയുടെ സംയുക്ത യോഗം ആവശ്യപ്പെട്ടു. കൃഷി മൊത്തം നശിപ്പിക്കുക മാത്രമല്ല മെനഞ്ചൈറ്റിസ് പോലെയുള്ള മാരകരോഗങ്ങൾക്കും കാരണമാകുന്ന ഒച്ചുകളെ യുദ്ധകാലാടിസ്ഥാനത്തിൽ നശിപ്പിക്കേണ്ടതാണെന്ന് യോഗം പ്രമേയത്തിലൂടെ ആവശ്യപ്പെട്ടു. എക്കോ ക്ലബ് പ്രസിഡന്‍റ് ബി. നിരഞ്ജന്‍ അധ്യക്ഷത വഹിച്ചു. സ്കൂൾ മാനേജർ ടോം തോമസ്, പ്രിൻസിപ്പൽ മഞ്ജുള മാത്യു, അധ്യാപകരായ ബി. സൗമ്യ, പ്രിയ കെ. ജോസഫ്, എസ്. ആര്യലക്ഷ്മി, ക്ലബ്ബുകളുടെ ഭാരവാഹികളായ ബി. നിരഞ്ജൻ, കെ.എസ്. ആരോൺ, നൈമ ഫാത്തിമ എന്നിവർ പ്രസംഗിച്ചു.

ലഹരിക്കെതിരേ പ്രതിഷേധജ്വാലയും ധർണയും

പൊൻകുന്നം: സർക്കാർ ഉരുക്കുമുഷ്ടി ഉപയോഗിച്ച് രാസലഹരി മാഫിയയെ അടിച്ചമർത്തണമെന്ന് മഹിളാ കോൺഗ്രസ് കാഞ്ഞിരപ്പള്ളി ബ്ലോക്ക് കമ്മിറ്റി. ലഹരിക്കെതിരേ പൊൻകുന്നത്ത് നടത്തിയ പ്രതിഷേധജ്വാലയും സായാഹ്ന ധർണയും ഡിസിസി ജനറൽ സെക്രട്ടറി പി.എ. ഷെമീർ ഉദ്ഘാടനം ചെയ്തു. മഹിളാ കോൺഗ്രസ് ബ്ലോക്ക് പ്രസിഡന്‍റ് ലൂസി ജോർജ് അധ്യക്ഷത വഹിച്ചു. പ്രഫ. റോണി കെ. ബേബി മുഖ്യപ്രഭാഷണം നടത്തി. കോൺഗ്രസ് മണ്ഡലം പ്രസിഡന്‍റ് സേവ്യർ മൂലകുന്ന്, ഡാനി ജോസ്, ഉഷാകുമാരി, സനോജ് പനക്കൽ, ടി.കെ. ബാബുരാജ്, ഇന്ദുകല എസ്. നായർ, പ്രീത ബിജു, പി.സി. ത്രേസ്യാമ്മ, ലൈസാമ്മ സണ്ണി, ശ്യാം ബാബു, സൂരജ്ദാസ്, ബിജു മുണ്ടുവേലി, ഇ.ജെ. ഫിലിപ്പ് എന്നിവർ പ്രസംഗിച്ചു.

എൻ‌സിസി ദശദിനക്യാമ്പിന് തുടക്കം

എരുമേലി: എൻസിസി കേരള ലക്ഷദ്വീപ് ഡയറക്‌ടറേറ്റ് ഇന്‍റർ ഗ്രൂപ്പ് സ്പോർട്സ് ഷൂട്ടിംഗ് കോമ്പറ്റീഷൻ ക്യാമ്പിനും കംമ്പയിൻഡ് ആനുവൽ ട്രെയിനിംഗ് ക്യാമ്പിനും എരുമേലി എംഇഎസ് കോളജിൽ തുടക്കമായി. എൻസിസി കേരള ലക്ഷദ്വീപ് ഡയറക്‌ടറേറ്റിന്‍റെയും കോട്ടയം ഗ്രൂപ്പിന്‍റെയും 16 കേരള ബറ്റാലിയൻ കോട്ടയത്തിന്‍റെയും സംയുക്താഭിമുഖ്യത്തിൽ പത്ത് ദിവസമാണ് ക്യാമ്പ്. ഉദ്ഘാടനം 16 കേരള ബറ്റാലിയൻ കമാൻഡിംഗ് ഓഫീസറും ക്യാമ്പ് കമാൻഡന്‍റുമായ കേണൽ പി. ശ്രീനിവാസൻ നിർവഹിച്ചു. കേരള ലക്ഷദ്വീപ് ഡയറക്‌ടറിന്‍റെ കീഴിലുള്ള തിരുവനന്തപുരം, കൊല്ലം, കോട്ടയം, എറണാകുളം കോഴിക്കോട് എന്നീ അഞ്ചു ഗ്രൂപ്പുകളിൽ നിന്നുള്ള നൂറോളം കേഡറ്റുകളാണ് ഗ്രൂപ്പടിസ്ഥാനത്തിലുള്ള ഫയറിംഗ് കോമ്പറ്റീഷനിൽ മത്സരിക്കുന്നത്. ഇതോടൊപ്പം 16 കേരള ബറ്റാലിയനിലെ 35 വിവിധ സ്ഥാപനങ്ങളിലെ 300ഓളം കേഡറ്റുകളും ക്യാമ്പിൽ പങ്കെടുക്കുന്നുണ്ട്. ഫയറിംഗ് കോമ്പറ്റീഷനിൽനിന്നു തെരഞ്ഞെടുക്കപ്പെടുന്ന 16 കേഡറ്റുകൾ അഖിലേന്ത്യാ തലത്തിൽ നടക്കുന്ന ഇന്‍റർ ഡയറക്‌ടറേറ്റ് ഷൂട്ടിംഗ് മത്സരത്തിൽ കേരളത്തെ പ്രതിനിധീകരിക്കും. മികച്ച യുവ പൗരന്മാരെ വാർത്തെടുക്കുന്നതിനും രാജ്യസേവനത്തിന് അവരെ പ്രാപ്തരാക്കുന്നതിനുമാണ് ക്യാമ്പ്. കേഡറ്റുകൾക്ക് സൈനിക ചരിത്രം, റൈഫിൾ ഉപയോഗിച്ചുള്ള ആയുധ പരിശീലനം, ട്രാഫിക് നിയമങ്ങൾ, പൗരന്‍റെ ഉത്തരവാദിത്വങ്ങൾ, മാപ്പ് റീഡിംഗ്, ഡിസാസ്റ്റർ മാനേജ്മെന്‍റ്, വ്യക്തിത്വ വികസനം, ആരോഗ്യം, സ്വയം പ്രതിരോധം തുടങ്ങിയ വിഷയങ്ങളിൽ വിപുലമായ പരിശീലനം നൽകും. ശാരീരികക്ഷമത, അച്ചടക്കം, നേതൃത്വഗുണങ്ങൾ, ടീം വർക്ക്, രാജ്യസ്നേഹം എന്നിവ വളർത്തുന്നതിന് ഈ പരിശീലനം സഹായകമാകും. ക്യാമ്പ് 10ന് സമാപിക്കും.

വാഴൂർ എൻഎസ്എസ് കോളജിൽ റൂസ പ്രോജക്‌ട് മന്ദിരോദ്ഘാടനം ഇന്ന്

വാഴൂർ: എസ്‌വിആർ എൻഎസ്എസ് കോളജിൽ റൂസ പ്രോജക്‌ട് മന്ദിരോദ്ഘാടനം ഇന്ന് ഉച്ചയ്ക്ക് 1.30ന് ഉന്നത വിദ്യാഭ്യാസമന്ത്രി ഡോ. ആർ. ബിന്ദു നിർവഹിക്കും. ചീഫ് വിപ്പ് ഡോ. എൻ. ജയരാജ് അധ്യക്ഷത വഹിക്കും. ആന്‍റോ ആന്‍റണി എംപി മുഖ്യപ്രഭാഷണം നടത്തും. റൂസ പ്രോജക്‌ട് കോ-ഓർഡിനേറ്റർ കെ. സുധീർ, വാഴൂർ പഞ്ചായത്ത് പ്രസിഡന്‍റ് തോമസ് വെട്ടുവേലി, പഞ്ചായത്തംഗം സൗദ ഇസ്മയിൽ, പ്രിൻസിപ്പൽ ഡോ. ബി. ഗോപകുമാർ, എസ്. ശ്രീകല, ബി. ബബിൻ, ഡോ. കെ.എൻ. പ്രീതി, ടി.പി. ശ്രീനിവാസ്, വി. സിന്ധു തുടങ്ങിയവർ പ്രസംഗിക്കും. രണ്ടു കോടി രൂപയുടെ പദ്ധതിയാണ് റൂസയിൽ വാഴൂർ കോളജിൽ നടപ്പാക്കുന്നത്. നിലവിൽ പൂർത്തീകരിച്ച കെട്ടിടത്തിൽ കംപ്യൂട്ടർ ലാബും ക്ലാസ് മുറികളും സജ്ജീകരിച്ചു. കോളജിൽ മറ്റ് അടിസ്ഥാനസൗകര്യ വികസനവും റൂസ പദ്ധതിയുടെ ഭാഗമായുണ്ട്. രാഷ്‌ട്രീയ ഉച്ചതാർ ശിക്ഷാ അഭിയാൻ (റൂസ) പദ്ധതിയിൽ കേന്ദ്രസർക്കാരിന്‍റെ 60 ശതമാനം ഫണ്ടും സംസ്ഥാന സർക്കാരിന്‍റെ 40 ശതമാനം ഫണ്ടുമാണ് വിനിയോഗിക്കുന്നത്.

സൗജന്യ മെഗാ മെഡിക്കൽ ക്യാമ്പ്

കോരുത്തോട്: കരുണാ ഭവൻ മെഡിക്കൽ സെന്‍ററിന്‍റെ ആഭിമുഖ്യത്തിൽ മുണ്ടക്കയം മെഡിക്കൽ ട്രസ്റ്റ് ആശുപത്രിയുടെ സഹകരണത്തോടെ ആറിനു രാവിലെ ഒന്പതുമുതൽ ഒന്നുവരെ സൗജന്യ മെഗാ മെഡിക്കൽ ക്യാമ്പ് നടക്കും. കോരുത്തോട് കരുണാഭവൻ മെഡിക്കൽ സെന്‍ററിൽ നടക്കുന്ന ക്യാന്പിൽ ജനറൽ മെഡിസിൻ, ഗൈനക്കോളജി, ശിശുരോഗം, അസ്ഥിരോഗം, ഇഎൻടി, ശ്വാസകോശ രോഗം തുടങ്ങിയ വിഭാഗങ്ങളിലെ വിദഗ്ധരായ ഡോക്ടർമാരുടെ സേവനം ലഭ്യമാകും. ഫിസിയോതെറാപ്പി വിഭാഗത്തിന്‍റെ വിവിധ സേവനങ്ങളും രക്തഗ്രൂപ്പ് നിർണയം, പ്രമേഹ പരിശോധന, കൊളസ്ട്രോൾ പരിശോധന തുടങ്ങിയ സേവനങ്ങളും ക്യാമ്പിനോടനുബന്ധിച്ച് സൗജന്യമായി ലഭ്യമാകും. മെഡിക്കൽ ക്യാമ്പിന് മുണ്ടക്കയം മെഡിക്കൽ ട്രസ്റ്റ് ആശുപത്രി അസിസ്റ്റന്‍റ് ഡയറക്ടർ ഫാ. ആൻഡ്രൂസ് പേഴുംകാട്ടിൽ, കരുണാഭവൻ മെഡിക്കൽ സെന്‍റർ അഡ്മിനിസ്ട്രേറ്റർ സിസ്റ്റർ ക്ലെറിൻ എസ്എബിഎസ് എന്നിവർ നേതൃത്വം നൽകും.

സമയപരിധി കഴിഞ്ഞിട്ടും നിർമാണം പൂർത്തിയാക്കിയില്ല; കരാറുകാരനെ പുറത്താക്കി

കാഞ്ഞിരപ്പള്ളി: കാഞ്ഞിരപ്പള്ളി ബൈപാസിന്‍റെ നിർമാണം നിലച്ചു. നിർമാണം പൂർത്തിയാക്കാനുള്ള സമയപരിധി കഴിഞ്ഞിട്ടും നിർമാണം എങ്ങുമെത്താത്തതിനെത്തുടർന്നാണ് കരാറുകാരനെ ഒഴിവാക്കാൻ കിഫ്ബി അധികൃതർ തീരുമാനിച്ചത്. ഇതു സംബന്ധിച്ച നോട്ടീസ് കിഫ്ബി അധികാരികൾ ഗുജറാത്ത് കേന്ദ്രമായുള്ള ബാക്ക്ബോൺ കൺസ്ട്രക്‌ഷൻ പ്രൈവറ്റ് ലിമിറ്റഡ് കമ്പനിക്ക് കൈമാറി. 2024 ഫെബ്രുവരിയിലാണ് ബൈപാസ് നിർമാണം ആരംഭിച്ചത്. 2025 മാർച്ചിൽ പൂർത്തിയാക്കുമെന്നാണ് പറഞ്ഞതെങ്കിലും റോഡിലെ പാറപൊട്ടിക്കലും മറ്റുമായി നിർമാണം വൈകിയതോടെ നാലു മാസത്തേക്ക് കരാർ നീട്ടിക്കൊടുത്തിരുന്നു. ഓരോ മാസത്തെയും നിർമാണപ്രവർത്തനങ്ങൾ വിലയിരുത്താൻ കിഫ്ബി അധികൃതർ തീരുമാനിച്ചിരുന്നു. എന്നാൽ, നിർമാണപ്രവർത്തനങ്ങൾ എങ്ങുമെത്തിയില്ല. തുടർന്നാണ് കിഫ്ബിയുടെ നിർദേശപ്രകാരം കരാറുകാർക്കെതിരേ നടപടി സ്വീകരിച്ചിരിക്കുന്നത്. ദേശീയപാത 183ല്‍ പഞ്ചായത്ത് പടിക്കല്‍നിന്ന് ആരംഭിച്ച് ചിറ്റാര്‍ പുഴയ്ക്കും മണിമല റോഡിനും കുറുകേ നിര്‍മിക്കുന്ന പാലത്തിന്‍റെ, ദേശീയപാതയ്ക്ക് സമീപമുള്ള ആദ്യത്തെ തൂണിന്‍റെ കോണ്‍ക്രീറ്റിംഗ് ആരംഭിച്ചിരുന്നു. നാല് പില്ലറുകളിലായാണ് മേല്‍പ്പാലം നിര്‍മിക്കുന്നത്. ഇതില്‍ രണ്ടെണ്ണത്തിന്‍റെ നിര്‍മാണ പ്രവര്‍ത്തനങ്ങളാണ് നടന്നുകൊണ്ടിരുന്നത്. നിര്‍ദിഷ്‌ട പദ്ധതി പ്രദേശത്തെ ഉയര്‍ന്ന ഭാഗം ഇടിച്ചുനിരത്തിയും താഴ്ന്ന ഭാഗങ്ങളില്‍ മണ്ണിട്ടു നികത്തിയും റോഡ് വെട്ടിയിരുന്നു. ദേശീയപാതയിൽനിന്നു ബൈപാസിലേക്കു തിരിയുന്ന പഞ്ചായത്ത് ഓഫീസിനു മുന്പിൽ റൗണ്ടാന നിർമിക്കാനായി മണ്ണും മാറ്റിയിരുന്നു. ഇവിടെനിന്നാണ് മണിമല റോഡിനും ചിറ്റാർപുഴയ്ക്കും മീതയുള്ള മേൽപ്പാലം നിർമിക്കുന്നത്. ബൈപാസ് അവസാനിക്കുന്ന ഫാബീസ് ഓഡിറ്റോറിയത്തിനു സമീപം ടാറിംഗ് ജോലികളുടെ ഭാഗമായി മെറ്റൽ നിരത്തുന്ന പ്രവർത്തനങ്ങളും തുടങ്ങിയിരുന്നു. റോഡ്‌സ് ആന്‍ഡ് ബ്രിഡ്ജസ് ഡെവലപ്‌മെന്‍റ് കോര്‍പറേഷനാണു പദ്ധതിയുടെ നിര്‍മാണച്ചുമതല. ദേശീയപാത 183ല്‍ കാഞ്ഞിരപ്പള്ളി പഞ്ചായത്ത് ഓഫീസിനു മുന്പിലെ വളവില്‍നിന്നാരംഭിച്ച് പൂതക്കുഴിയില്‍ ഫാബീസ് ഓഡിറ്റോറിയത്തിനു സമീപം ദേശീയപാതയില്‍ പ്രവേശിക്കുന്ന ബൈപാസിന്‍റെ ദൂരം 1.80 കിലോമീറ്ററാണ്. റീടെൻഡർ ചെയ്യും: ഡോ. എന്‍. ജയരാജ് കരാര്‍ ലംഘനം നടത്തിയ ബാക്ബോണ്‍ കമ്പനിയെ ബൈപാസ് നിര്‍മാണത്തില്‍നിന്ന് ഒഴിവാക്കാനും റീടെൻഡര്‍ ചെയ്ത് മറ്റ് ഏതെങ്കിലും കമ്പനിയെ കരാര്‍ ഏല്‍പ്പിക്കാനും തീരുമാനിച്ചതായി ചീഫ് വിപ്പ് ഡോ. എൻ. ജയരാജ് അറിയിച്ചു. കിഫ്ബി ധനസഹായത്തോടെ നടപ്പാക്കാന്‍ ഭരണാനുമതി ലഭിച്ച കാഞ്ഞിരപ്പള്ളി ബൈപാസിന് 78.69 കോടി രൂപയാണ് ആകെ അനുവദിച്ചിരുന്നത്. അതില്‍ സ്ഥലമേറ്റെടുക്കുന്നതിനായി ചെലവായത് 24.76 കോടി രൂപയാണ്. ബാക്കി തുക മുഴുവന്‍ ഈ പദ്ധതിക്കായി അനുവദിക്കുന്നതിന് കിഫ്ബിയില്‍ യാതൊരു തടസവുമില്ല. എന്നാൽ, ഫണ്ടില്ല എന്ന കാരണത്താലാണ് പ്രവൃത്തി നിര്‍ത്തിവയ്ക്കുന്നത് എന്നുള്ള കരാറുകാരന്‍റെ വ്യാഖ്യാനം പൂര്‍ണമായും തെറ്റാണ്. നിലവില്‍ നിര്‍മാണപ്രവൃത്തികള്‍ക്കായി എസ്റ്റിമേറ്റ് തയാറാക്കിയത് പ്രകാരം 30 കോടി രൂപയാണ് ചെലവ് കണക്കാക്കിയിരിക്കുന്നതും ടെൻഡര്‍ ചെയ്തതും. പ്രസ്തുത തുക അംഗീകരിച്ച് ടെൻഡര്‍ സ്വീകരിച്ച ഗുജറാത്ത് സ്വദേശിയായ കമ്പനി ആരംഭം മുതല്‍ വളരെ മന്ദഗതിയിലായിരുന്നു നിര്‍മാണം നടത്തിവന്നത്. കിഫ്ബി മാനദണ്ഡപ്രകാരമുള്ള നിർമാണങ്ങൾ സമയബന്ധിതമായി നടക്കുന്നത് സംബന്ധിച്ച് കിഫ്ബിയുടെ പരിശോധനയില്‍ ഓരോ ഘട്ടത്തിലും ടാര്‍ഗറ്റ് നേടാനാവാത്തതിനാല്‍ കമ്പനിക്ക് പലതവണ മുന്നറിയിപ്പ് നല്‍കിയതുമാണ്. കരാറെടുത്ത കമ്പനി അവര്‍ അംഗീകരിച്ച് ഒപ്പിട്ട കരാര്‍ പ്രകാരമുള്ള തുകയ്ക്ക് പുറമേ ആവശ്യപ്പെടുന്നതിന് യാതൊരു നിയമസാധുതയുമില്ല. നാളിതുവരെയുള്ള ബില്ലുകളെല്ലാം തന്നെ കിഫ്ബിയില്‍നിന്നു നല്‍കിക്കഴിഞ്ഞു. എത്രയും വേഗം നടപടികള്‍ പൂര്‍ത്തിയാക്കി നിര്‍മാണം പുനരാരംഭിക്കാനുള്ള എല്ലാ ശ്രമങ്ങളും നടത്തിവരുന്നതായും ഡോ. എന്‍. ജയരാജ് പറഞ്ഞു.

അരുവിത്തുറ കോളജിൽ വിജ്ഞാനോത്സവത്തിന് തിരിതെളിഞ്ഞു

അരുവിത്തുറ: സെന്‍റ് ജോർജ് കോളജിലെ പുതിയ ബിരുദ ബാച്ചുകളുടെ അധ്യയന വർഷത്തിന് തുടക്കമായി സംസ്ഥാന സർക്കാരിന്‍റെ വിജ്ഞാനോത്സവം പരിപാടിയുടെ ഭാഗമായി കോളജിൽ ദീക്ഷാരംഭ് വിജ്ഞാനോത്സവം സംഘടിപ്പിച്ചു. സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്തു. കോളജ് മാനേജർ ഫാ. സെബാസ്റ്റ്യൻവെട്ടുകല്ലേൽ അധ്യക്ഷത വഹിച്ചു. ചടങ്ങിന്‍റെ ഭാഗമായി വിദ്യാർഥികൾ ദീപം തെളിച്ചു. ബർസാർ ഫാ. ബിജു കുന്നക്കാട്ട് വിദ്യാർഥികൾക്ക് പ്രതിജ്ഞാവാചകം ചൊല്ലിക്കൊടുത്തു. വൈസ് പ്രിൻസിപ്പൽ ഡോ. ജിലു ആനി ജോൺ, ഐക്യുഎസി കോ-ഓർഡിനേറ്റർ ഡോ. സുമേഷ് ജോർജ്, അഡ്മിഷൻ സെൽ കൺവീനർ ജോബി ജോസഫ് തുടങ്ങിയവർ പ്രസംഗിച്ചു.

ലഹരിവിരുദ്ധ ബോധവത്കരണം

പാളയം: സെന്‍റ് സേവ്യേഴ്സ് യുപി സ്കൂളിൽ അഡാർട്ട്, വിമുക്തി ക്ലബ്ബുകളുടെ നേതൃത്വത്തിൽ ലഹരിവിരുദ്ധ ബോധവത്കരണ ക്ലാസ് സംഘടിപ്പിച്ചു. സ്കൂൾ മാനേജർ ഫാ. മാത്യു അറയ്ക്കപ്പറമ്പിൽ അധ്യക്ഷത വഹിച്ച സമ്മേളനം പാലാ അസിസ്റ്റന്‍റ് എക്സൈസ് ഓഫീസർ ജോസഫ് ഉദ്ഘാടനം ചെയ്ത് ബോധവത്കരണം നടത്തി. ഹെഡ്മിസ്ട്രസ് സീമ മാത്യു, വിദ്യാർഥി പ്രതിനിധി കൃഷ്ണവേണി അനീഷ് തുടങ്ങിയവർ പ്രസംഗിച്ചു. ചേന്നാട്: ലഹരിവിരുദ്ധ ദിനത്തോടനുബന്ധിച്ച് ചേന്നാട് സെന്‍റ് മരിയ ഗൊരേത്തി ഹൈസ്കൂളിലെ വിദ്യാർഥികളും ചേന്നാട് നിവാസികളും ചേർന്ന് നടത്തിയ സൈക്കിൾ റാലി വാർഡ് മെംബർ ഷാന്‍റി തോമസ് ഫ്ലാഗ് ഓഫ് ചെയ്തു. തുടർന്ന് കുട്ടികൾ ലഹരിക്കെതിരേ മനുഷ്യച്ചങ്ങലയും തീർത്തു. തെരുവുനാടകം, ഫ്ലാഷ് മോബ്, ടാബ്ലോ തുടങ്ങിയ പരിപാടികളും അവതരിപ്പിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]