കാഞ്ഞിരപ്പള്ളി: കാഞ്ഞിരപ്പള്ളി രൂപത പ്രളയ ദുരിതാശ്വാസ പദ്ധതിയായ റെയിൻബോ പദ്ധതിയിൽ ചാമംപതാലിൽ രണ്ടു ഭവനങ്ങളുടെയും ചെറുവള്ളിയിൽ ഒരു ഭവനത്തിന്‍റെയും ശിലാസ്ഥാപനം കാഞ്ഞിരപ്പള്ളി രൂപത വികാരി ജനറാളും റെയിൻബോ പദ്ധതി ജനറൽ കണ്‍വീനറുമായ ഫാ. ബോബി അലക്സ് മണ്ണംപ്ലാക്കൽ നടത്തി.
ചെത്തിപ്പുഴ സർഗക്ഷേത്ര കൾച്ചറൽ ചാരിറ്റി സെന്‍ററാണ് ചെറുവള്ളിയിലെ ഭവന നിർമാണത്തിന് സാന്പത്തിക സഹകരണം നൽകുന്നത്.
രൂപത ആരംഭിച്ച ഭൂനിധിപദ്ധതിയിൽ ജോണച്ചൻ ഞള്ളിയിൽ ചെറുവള്ളിയിലും സൈമണ്‍ കൊച്ചുപുരയ്ക്കൽ ചാമംപതാലിലും സൗജന്യമായാണ് ഭവന നിർമാണത്തിനായി സ്ഥലങ്ങൾ വിട്ടുനൽകിയത്. കണ്ണിമല, പുത്തൻ കൊരട്ടി, കണമല, കൊല്ലമുള, അറയാഞ്ഞിലിമണ്ണ്, കൂവപ്പള്ളി, പഴയ കൊരട്ടി, അഴങ്ങാട്, പെരുവന്താനം, അമലഗിരി, പീരുമേട്, അഞ്ചിലിപ്പ, ചേനപ്പാടി, ഇഞ്ചിയാനി, പാലപ്ര എന്നിവിടങ്ങളിലായി 45 ഭവനങ്ങളുടെ നിർമാണമാണ് റെയിൻബോ പദ്ധതിയിൽ പുരോഗമിക്കുന്നത്. ഭൂനിധി പദ്ധതിയിൽ സൗജന്യമായി സ്ഥലങ്ങൾ നൽകുന്നതിന് തയാറായ നിരവധി വ്യക്തികളുടെയും രൂപതയിലെ ഇടവകകൾ, സന്യാസ സമൂഹങ്ങൾ, സംഘടനകൾ, സ്ഥാപനങ്ങൾ, വ്യക്തികൾ എന്നിവരുടെ സഹകരണത്തോടെയാണ് പദ്ധതി നടപ്പാക്കുന്നത്.
ചെറുവള്ളിയിലും ചാമംപതാലിലും നടത്തപ്പെട്ട ശിലാസ്ഥാപന കർമങ്ങളിൽ സർഗക്ഷേത്ര ഡയറക്ടർ ഫാ. അലക്സ് പ്രായിക്കളം, റെയിൻബോ പദ്ധതി കോ-ഓർഡിനേറ്റർ ഫാ. ജോർജ് തെരുവുംകുന്നേൽ, ഫാ. ആന്‍റണി ചെന്നക്കാട്ടുക്കുന്നേൽ, ഫാ. വർഗീസ് കൊച്ചുപുരയ്ക്കൽ, ജോണച്ചൻ ഞള്ളിയിൽ, സൈമണ്‍ കൊച്ചുപുര എന്നിവർ പങ്കെടുത്തു.