ADVERTISEMENT

ADVERTISEMENT

മാർ മാത്യു വട്ടക്കുഴി മെമ്മോറിയൽ സിമ്പോസിയം ഇന്ന്

കാഞ്ഞിരപ്പള്ളി: കാഞ്ഞിരപ്പള്ളി രൂപതയുടെ രണ്ടാമത്തെ അധ്യക്ഷനായിരുന്ന മാർ മാത്യു വട്ടക്കുഴിയുടെ അനുസ്മരണാർഥമുള്ള കാറ്റക്കെറ്റിക്കൽ സിമ്പോസിയം ഇന്ന് കാഞ്ഞിരപ്പള്ളി പാസ്റ്ററൽ സെന്‍ററിൽ നടക്കും.
രൂപതാധ്യക്ഷൻ മാർ ജോസ് പുളിക്കൽ സിമ്പോസിയം ഉദ്ഘാടനം ചെയ്യും. കാഞ്ഞിരപ്പള്ളി സിഎംസി അമല പ്രൊവിൻഷ്യൽ സിസ്റ്റർ എലിസബത്ത് സാലി അനുസ്മരണ പ്രഭാഷണം നടത്തും. സീറോ മലബാർസഭ വിശ്വാസ പരിശീലന കമ്മീഷൻ സെക്രട്ടറി ഫാ. തോമസ് മേൽവട്ടം കേരളത്തിലെ വിശ്വാസ പരിശീലനരംഗത്തെ കാലിക പ്രതിസന്ധികളും പരിഹാരങ്ങളും എന്ന വിഷയത്തിൽ പേപ്പർ അവതരിപ്പിക്കും.
തുടർന്നു നടക്കുന്ന ഓപ്പൺ ഫോറത്തിൽ ഫാ. തോമസ് മേൽവട്ടം, ഫാ. ജോസഫ് വെള്ളമറ്റം, ഫാ. ബോബി അലക്സ് മണ്ണംപ്ലാക്കൽ എന്നിവർ പ്രസംഗിക്കും. കാഞ്ഞിരപ്പള്ളി രൂപത മൈനർ സെമിനാരി റെക്‌ടർ ഫാ. സെബാസ്റ്റ്യൻ കൊല്ലംകുന്നേൽ മോഡറേറ്ററായിരിക്കും. ജോർജുകുട്ടി വട്ടക്കുഴി കൃതജ്ഞ അർപ്പിക്കും.
ഉച്ചകഴിഞ്ഞ് രൂപതയിലെ എല്ലാം സൺഡേ സ്കൂളുകളിലേയും പ്രഥമാധ്യാപകർ, രൂപത ആനിമേറ്റർമാർ, ഫൊറോന സെക്രട്ടറിമാർ എന്നിവരുടെ സംയുക്ത സമ്മേളനവും നടക്കും.

ADVERTISEMENT

റീൽസ് കണ്ടിട്ടെങ്കിലും അധികൃതർ കണ്ണുതുറക്കുമോ?

തൊടുപുഴ: പന്ത്രണ്ടു വർഷമായി തകർന്നുകിടക്കുന്ന റോഡ് അറ്റകുറ്റപ്പണി നടത്തി ഗതാഗത യോഗ്യമാക്കാത്തതിനെത്തുടർന്ന് വ്യത്യസ്ത സമരമുറയുമായി നാട്ടുകാർ രംഗത്ത്. കുണ്ടും കുഴിയുമായി കിടക്കുന്ന റോഡിൽ റീൽസ് ചിത്രീകരിച്ച് ഇതു സമൂഹമാധ്യമ പേജുകളിൽ പോസ്റ്റു ചെയ്താണ് ഇവരുടെ വ്യത്യസ്തമായ പ്രതിഷേധം. നൂറുകണക്കിന് കുടുംബങ്ങൾ യാത്രചെയ്യുന്ന ചിലവ്-മാരാംപാറ റോഡിന്‍റെ ദുരവസ്ഥയ്ക്കു പരിഹാരം കാണണമെന്നാവശ്യപ്പെട്ടാണ് റീൽസ് ചിത്രീകരണം. ആലക്കോട്, കരിമണ്ണൂർ പഞ്ചായത്തുകളിലൂടെയാണ് റോഡ് കടന്നുപോകുന്നത്. വർഷങ്ങൾക്കു മുന്പ് പൊതുമരാമത്ത് വകുപ്പിനു കീഴിലായിരുന്ന റോഡ് പിന്നീട് ആലക്കോട് പഞ്ചായത്തിന്‍റെ ആസ്തി രജിസ്റ്ററിൽ ഉൾപ്പെടുത്തി. പന്ത്രണ്ടു വർഷം മുന്പ് പിഡബ്ല്യുഡി റോഡിൽ ടാറിംഗ് നടത്തിയതിനു ശേഷം ഇതുവരെ നിർമാണ ജോലികൾ ഒന്നും പൂർണമായി നടത്തിയിട്ടില്ല. ഇതിനിടെ എംഎൽഎ ഫണ്ടിൽനിന്ന് 24 ലക്ഷവും ബ്ലോക്ക് പഞ്ചായത്തിന്‍റെ 10 ലക്ഷവും വിനിയോഗിച്ച് 2023-ൽ 900 മീറ്റർ ടാറിംഗ് നടത്തി. ബാക്കിവരുന്ന ഒരു കിലോമീറ്ററോളം ദൂരമാണ് പൂർണമായും തകർന്നുകിടക്കുന്നത്. മാരാംപാറ മുതൽ ഓലിക്കാമറ്റം ജംഗ്ഷൻ വരെയുള്ള 1.55 കിലോമീറ്റർ ദൂരവും തകർന്ന നിലയിലാണ്. വെള്ളിയാമറ്റം, അറക്കുളം, ആലക്കോട് പഞ്ചായത്തുകളിൽനിന്നുള്ളവർക്ക് തൊടുപുഴയിൽ എത്താതെ കരിമണ്ണൂർ, ഉടുന്പന്നൂർ , വണ്ണപ്പുറം ഭാഗത്തേക്ക് എത്താനുള്ള എളുപ്പവഴിയാണ് ഇത്. അഞ്ഞൂറോളം കുട്ടികളും 13 സ്കൂൾ വാഹനങ്ങളും നൂറുകണക്കിന് യാത്രക്കാരും വാഹനങ്ങളും ദിനംപ്രതി ഇതുവഴി സഞ്ചരിക്കുന്നുണ്ട്. റോഡ് പൊതുമരാമത്ത് വകുപ്പ് ഏറ്റെടുത്ത് ബിഎംബിസി നിലവാരത്തിൽ നിർമിക്കണമെന്നും ഐറിഷ് ഓട നിർമിക്കണമെന്നുമാണ് നാട്ടുകാരുടെ ആവശ്യം. റോഡിന്‍റെ ശോച്യാവസ്ഥ ചൂണ്ടിക്കാട്ടി നിരവധി നിവേദനങ്ങൾ അധികൃതർക്ക് നൽകിയിട്ടും നടപടിയുണ്ടായിട്ടില്ലെന്ന് ചിലവ് ക്രിസ്തുരാജ് പള്ളി വികാരി ഫാ. ജോസഫ് താന്നിക്കൽ പറഞ്ഞു. ഇതേത്തുടർന്നാണ് ഇടവക പരിധിയിലെ റോഡിന്‍റെ അവസ്ഥ എന്ന വിഷയം ആസ്പദമാക്കി റീൽസ് മത്സരം സംഘടിപ്പിച്ചത്. ഇതു പള്ളിയുടെ ഇൻസ്റ്റഗ്രാം പേജിൽ പോസ്റ്റ് ചെയ്തു. ഇന്നലെ വരെയുള്ള വ്യൂസിന്‍റെ എണ്ണവും ആശയവും കണക്കിലെടുത്തായിരിക്കും സമ്മാനാർഹരെ തെരഞ്ഞെടുക്കുക. റോഡിലൂടെ ദുരിതയാത്ര നടത്തി പൊറുതിമുട്ടിയ നാട്ടുകാരുടെ ദുരവസ്ഥ റീൽസിലൂടെയെങ്കിലും അധികൃതരുടെ കണ്ണുതുറപ്പിക്കുമെന്നാണ് ഇവരുടെ പ്രതീക്ഷ.

പഴമയുടെ പാരന്പര്യം മുറുകെപ്പിടിച്ച് പച്ചപ്പിന്‍റെ പരവതാനി വിരിച്ച് കാരയൂർ

ജിതേഷ് ചെറുവള്ളിൽ മറയൂർ: കാന്തല്ലൂർ, മറയൂർ മേഖലകളിൽ നെൽകൃഷിയിലൂടെ നാടിന്‍റെ പച്ചപ്പ് വീണ്ടും പുനർജനിക്കുന്നു. പച്ചപ്പിന്‍റെ പരവതാനിവിരിച്ച പാടങ്ങൾ ഗ്രാമീണജനതയുടെ ജീവിതതാളമായിരുന്നു. പിന്നീട് കരിന്പുകൃഷി ഈ പ്രദേശത്ത് വ്യാപകമായതോടെ നെൽപ്പാടങ്ങൾ അപ്രത്യക്ഷമായി. ഭൂരിഭാഗം കർഷകരും കൂടുതൽ വരുമാനം പ്രതീക്ഷിച്ച് കരിന്പുകൃഷിയിലേക്കു തിരിഞ്ഞതാണ് നെൽകൃഷി അന്യമാകാൻ കാരണം. എന്നാൽ, തങ്ങളെ അന്നമൂട്ടുന്ന നെൽകൃഷി തുടരാൻ ഏതാനും കർഷകർ രംഗത്തുവന്നതോടെയാണ് വീണ്ടും ഇവിടെ പച്ചപ്പ് പ്രത്യക്ഷപ്പെട്ടുതുടങ്ങിയത്. പഴയ കൃഷിരീതികൾ കൈവിടാതെ, മണ്ണിനോടും പ്രകൃതിയോടും ചേർന്നാണ് ഇവരുടെ കൃഷി. നെൽകൃഷി ചെയ്യുന്നതിനുള്ള പാടം ഉഴുതുമറിക്കലും മറ്റും കാരയൂരിന്‍റെ ചരിത്രത്തിന്‍റെ ഭാഗമാണ്. പാടങ്ങൾ ഒരുക്കുന്നതിന്‍റെ ഭാഗമായി നിലം ഉഴുത്, വിത്ത് തയാറാക്കി, പരന്പരാഗതരീതിയിൽ കൃഷിചെയ്യുകയാണ് പതിവ്. ഇതു ഗ്രാമത്തിലെ ജനങ്ങൾ തമ്മിലുള്ള ഐക്യവും കൂട്ടായ്മയും ഊട്ടിയുറപ്പിക്കുന്നു. നെൽകൃഷി കാരയൂരിന്‍റെ ഭക്ഷ്യസുരക്ഷ ഉറപ്പാക്കുക മാത്രമല്ല, സാംസ്കാരിക പൈതൃകം കാത്തുസൂക്ഷിക്കുകയും ചെയ്യുന്നു. ഇവിടത്തെ മറ്റു ഗ്രാമങ്ങൾ കരിന്പുകൃഷിയിലേക്ക് തിരിഞ്ഞപ്പോൾ കാരയൂർ മാത്രം പഴമവിടാതെ പിടിച്ചുനിന്നു. ഇവിടം മണ്ണിന്‍റെ മണമുള്ള പഴമയുടെ ശീലുകൾ ഏറ്റുപാടുന്ന കർഷകഗ്രാമമായി ഇന്നും നിലകൊള്ളുന്നു. കർഷകർ ഒരുമിച്ച് പാടങ്ങൾ ഒരുക്കുകയും വിളവെടുപ്പ് വലിയ ആഘോഷമായി നടത്തുകയും ചെയ്യുന്ന പതിവാണ് ഇവിടെയുള്ളത്. എന്നാൽ, കരിന്പ് കൃഷിയിലേക്കുള്ള മാറ്റം ഈ കൂട്ടായ്മയെ ദുർബലപ്പെടുത്തിയിരുന്നു. മറ്റു കൃഷിയുടെ രംഗപ്രവേശത്തോടെ പരന്പരാഗത കൃഷിരീതികളും ഗ്രാമീണ സംസ്കാരവും കാലത്തിന്‍റെ കുത്തൊഴുക്കിൽ മണ്‍മറയാൻ കാരണമായി. എന്നാൽ, കാരയൂർ ഉൾപ്പെടെയുള്ള അപൂർവം ചില ഗ്രാമങ്ങൾ നെൽകൃഷിയിലേക്ക് മടങ്ങിയതോടെ കണ്ണിലെ കൃഷ്ണമണിപോലെ ഇവിടുത്തെ സാംസ്കാരിക പൈതൃകം കാത്തുസൂക്ഷിക്കാനുള്ള പരിശ്രമത്തിനാണ് തുടക്കംകുറിച്ചിരിക്കുന്നത്.

ബാംബൂനഗറിൽ കാട്ടാന ആക്രമണം രൂക്ഷം

മറയൂർ: ജനവാസ മേഖലയിൽ കാട്ടാന ആക്രമണം വീണ്ടും രൂക്ഷമായി. കഴിഞ്ഞ രാത്രി ഒരു കാട്ടാന ഈ പ്രദേശത്ത് ഇറങ്ങി വീടുകൾക്കും വിളകൾക്കും വലിയ നാശം വരുത്തി. വനം വകുപ്പ് കാട്ടന ശല്യം തടയാൻ പദ്ധതികൾ ആവിഷ്കരിച്ചിട്ടുണ്ടെങ്കിലും ഫലപ്രദമാകുന്നില്ല. കൃഷിസ്ഥലങ്ങളിൽനിന്ന് മൃഗങ്ങളെ അകറ്റാൻ ശ്രമിക്കുന്നുണ്ടെങ്കിലും അവയുടെ സഞ്ചാര പാതകൾ മാറ്റാൻ കഴിയുന്നില്ലെന്ന് വനം വകുപ്പ് ഉദ്യോഗസ്ഥർ പറയുന്നു. ദേശീയ പാതയോടു ചേർന്നുള്ള മേഖലകളിൽ പോലും കാട്ടാനകൾ ഇറങ്ങി യാത്രക്കാർക്കും പ്രദേശവാസികൾക്കും അപകടം സൃഷ്ടിക്കുകയാണ്. സമീപത്തെ വനത്തിൽനിന്ന് ഭക്ഷണത്തിനായാണ് വന്യമൃഗങ്ങൾ മനുഷ്യവാസ മേഖലയിലേക്ക് എത്തുന്നത്. വനത്തിലെ ഭക്ഷണസ്രോതസ്‌സുകൾ കുറയുന്പോൾ ദീർഘകാല പരിഹാരമായി കൂടുതൽ ഫലപ്രദമായ പദ്ധതികൾ ഒരുക്കണമെന്നാണ് നാട്ടുകാർ ആവശ്യപ്പെടുന്നത്. നാട്ടുകാർ സ്വയം സംരക്ഷണത്തിനായി രാത്രി പട്രോൾ നടത്തുന്നുണ്ട്. ഇത് അപകടകരവും അപര്യാപ്തവുമാണെന്ന് അവർ പറയുന്നു.

27 ഗ്രാം എംഡിഎംഎയുമായി യുവാവ് പിടിയിൽ

കട്ടപ്പന: 27 ഗ്രാം എംഡിഎംഎയുമായി ബംഗളൂരുവില്‍നിന്ന് കട്ടപ്പനയിലെത്തിയ യുവാവ് പിടിയിൽ. കോഴിക്കോട് കൊയിലാണ്ടി പയാറ്റുവളപ്പില്‍ ഷാലീന ഹൗസില്‍ ഫാരിസ് മുഹമ്മദി (31) നെയാണ് കട്ടപ്പന ഡിവൈഎസ്പി വി.എ. നിഷാദ്‌മോനും സംഘവും പിടികൂടിയത്. പോലീസിനു ലഭിച്ച രഹസ്യവിവരത്തെത്തുടര്‍ന്ന് കട്ടപ്പന ബൈപാസ് റോഡില്‍ നടത്തിയ പരിശോധനയിൽ സംശയാസ്പദമായ സാഹചര്യത്തില്‍ കണ്ട യുവാവിനെ പരിശോധിച്ചപ്പോഴാണ് ദേഹത്ത് ഒളിപ്പിച്ചുവച്ചിരുന്ന എംഡിഎംഎ കണ്ടെടുത്തത്. ചൊവ്വാഴ്ച രാവിലെ ബംഗളൂരുവില്‍നിന്ന് എത്തിയ യുവാവ് മറ്റാര്‍ക്കോ നല്‍കാനാണ് രാസലഹരി എത്തിച്ചത്. ലഹരിയുടെ ഉറവിടവും ആര്‍ക്കാണ് വില്‍ക്കാന്‍ കൊണ്ടുവന്നതെന്നും ഉള്‍പ്പെടെയുള്ള വിവരങ്ങള്‍ അറിയാന്‍ പോലീസ് ചോദ്യംചെയ്യല്‍ ആരംഭിച്ചു. കോഴിക്കോട് സ്വദേശിയായ ഫാരിസ് മുഹമ്മദ് അന്തര്‍ സംസ്ഥാന ലഹരിക്കടത്ത് സംഘത്തില്‍പ്പെട്ടയാളാണെന്നും പോലീസ് സംശയിക്കുന്നു. കോഴിക്കോട് പോലീസുമായി ബന്ധപ്പെട്ട് ഇയാളെക്കുറിച്ചുള്ള കൂടുതല്‍ വിവരങ്ങള്‍ അന്വേഷണസംഘം ശേഖരിച്ചുവരുന്നു. ജില്ലാ പോലീസ് മേധാവി ടി.കെ. വിഷ്ണുപ്രദീപിന്‍റെ കീഴിലുള്ള ഡാന്‍സാഫ് ടീമും കട്ടപ്പന ഡിവൈഎസ്പി വി.എ. നിഷാദ്‌മോന്‍, എസ്‌ഐമാരായ ഷാജി ഏബ്രഹാം, ബെര്‍ട്ടിന്‍ ജോസ്, പി.വി. മഹേഷ്, എസ് സിപിഒ ഷെമീര്‍, സിപിഒമാരായ ബിബിന്‍ മാത്യു, ആര്‍. ഗണേഷ്, സിനോജ് ജോസഫ് എന്നിവരും ചേര്‍ന്നാണ് പ്രതിയെ അറസ്റ്റ് ചെയ്തത്.

മറയൂർ ചന്ദനം മൗറിഷ്യസിൽ സുഗന്ധം പരത്തും; 1000 കിലോ വിത്തുകൾ കടൽകടന്നു

മറയൂർ: കേരളത്തിന്‍റെ ചന്ദനസുഗന്ധം ഇനി മൗറിഷ്യസിന്‍റെ മണ്ണിലും പരക്കും. മറയൂർ ചന്ദനത്തിന്‍റെ മഹിമയിൽ ആകൃഷ്ടരായ മൗറിഷ്യസിലെ സൗത്ത് ആഫ്രിക്കൻ കന്പനിയായ ഓഷ്യൻ അരോമാറ്റിക്സ് ആൻഡ് എസൻഷൽ ഓയിൽസ് ലിമിറ്റഡ് മറയൂരിൽനിന്ന് 1000 കിലോ ചന്ദനവിത്തുകൾ സ്വന്തമാക്കി. മറയൂരിന്‍റെ തനതായ ചന്ദനക്കാടിന്‍റെ പ്രത്യേകതകളും വളർച്ചാരീതികളും മനസിലാക്കാൻ മാസങ്ങൾക്ക് മുൻപ് കന്പനി പ്രതിനിധികൾ മറയൂർ സന്ദർശിച്ചിരുന്നു. മറയൂർ ചന്ദന ഡിവിഷൻ മുൻ ഡിഎഫ്ഒ എം.ജി. വിനോദ് കുമാറുമായി നടത്തിയ ചർച്ചയിൽ മൗറിഷ്യസിന്‍റെ കാലാവസ്ഥയും മണ്ണിന്‍റെ ഘടനയും മറയൂരിനോട് സാമ്യമുള്ളതാണെന്ന് കന്പനി അധികൃതർ വ്യക്തമാക്കി. രണ്ടു മാസം മുന്പ് വീണ്ടും മറയൂരിലെത്തിയ സംഘം ചന്ദനവിത്തുകൾ ശേഖരിച്ച് മൗറിഷ്യസിലേക്ക് കൊണ്ടുപോയി. മറയൂർ പള്ളനാട് സ്വദേശിയും വനംവകുപ്പിലെ താത്കാലിക ജീവനക്കാരനുമായ എൽ. പ്രഭാകരന്‍റെ വൈദഗ്ധ്യം തിരിച്ചറിഞ്ഞ സംഘം അദ്ദേഹത്തെ ചന്ദനവിത്തുകൾ മുളപ്പിക്കുന്നതിനായി മൗറിഷ്യസിലേക്ക് കൊണ്ടുപോയിരുന്നു. അവിടെയെത്തി കാടുപിടിച്ചു കിടന്ന സ്ഥലം ഒരുക്കിയ പ്രഭാകരൻ 1000 കിലോ ചന്ദനവിത്തുകൾ മണ്ണു നിറച്ച പാക്കറ്റുകളിൽ നട്ടു. രണ്ടു മാസത്തിനുള്ളിൽ തൈകൾ മുളച്ച് എട്ട് ഇലകൾ വരെ വളർന്നുതുടങ്ങി. ഏഴ്-എട്ട് മാസത്തിനു ശേഷം ഈ തൈകൾ പറിച്ചു നടാൻ പദ്ധതിയിട്ടിരിക്കുകയാണ്.

സഹോദയ കലോത്സവം: മാനുവൽ പ്രകാശനം ചെയ്തു

തൊടുപുഴ: സെൻട്രൽ കേരള സഹോദയ കലോത്സവ് സർഗധ്വനി 2025ന്‍റെ മാനുവൽ പ്രകാശനം ചെയ്തു. സിനിമ -സീരിയൽ ആർട്ടിസ്റ്റ് ഡെല്ല ജോർജ് പ്രകാശനം നിർവഹിച്ചു. കലോത്സവ വേദിയായ തൊടുപുഴ വിമല പബ്ലിക് സ്കൂളിൽ ഒക്ടോബർ 16, 17, 18 തീയതികളിലാണ് കലോത്സവം. സെൻട്രൽ കേരള സഹോദയ പ്രസിഡന്‍റ് ഫാ. മാത്യു കരീത്തറ സിഎംഐ അധ്യക്ഷത വഹിച്ചു. സ്കൂൾ പ്രിൻസിപ്പലും ജനറൽ കണ്‍വീനറുമായ സിസ്റ്റർ എലൈസ് സിഎംസി, സഹോദയ കോ-ഓർഡിനേറ്റർ ഗിരീഷ് ബാലൻ, പിടിഎ പ്രസിഡന്‍റ് സിജോ ജെ. തൈച്ചേരിയിൽ, വൈസ് പ്രിൻസിപ്പൽ സിസ്റ്റർ ലിസ്ബത്ത്, അക്കാദമിക് കോ-ഓർഡിനേറ്റർ മഞ്ജു ജോസ് എന്നിവർ പ്രസംഗിച്ചു. ഇടുക്കി,എറണാകുളം, തൃശൂർ ജില്ലകളിലെ നൂറോളം സിബിഎസ്ഇ സ്കൂളുകളിൽനിന്നും 5,000ത്തിലധികം കുട്ടികൾ മൽസരത്തിൽ പങ്കെടുക്കും.

എംപിയുടെ കത്തിൽ നടപടി ആവശ്യപ്പെട്ട് ദേശീയ മനുഷ്യാവകാശ കമ്മീഷൻ

തൊടുപുഴ: ഡീൻ കുര്യാക്കോസ് എംപി നൽകിയ കത്തിന്‍റെ അടിസ്ഥാനത്തിൽ, വനംവകുപ്പിന്‍റെ അനാസ്ഥയിൽ ദേശീയ മനുഷ്യാവകാശ കമ്മീഷൻ വിശദീകരണം ആവശ്യപ്പെട്ടു. 2024 ഡിസംബർ 16ന് കുട്ടന്പുഴയിൽ കാട്ടാനയുടെ ആക്രമണത്തിൽ എൽദോസ് എന്ന 40കാരൻ മരിച്ച സംഭവത്തിലാണ് എംപി കമ്മീഷനെ സമീപിച്ചത്. കാട്ടാനയെ കണ്ട വിവരം അറിയിച്ചിട്ടും വനംവകുപ്പ് ഉദ്യോഗസ്ഥർ സ്ഥലത്തെത്താൻ തയാറായില്ലെന്ന് എംപി കത്തിൽ ആരോപിച്ചു. വാഹനത്തിൽ ഇന്ധനമില്ലെന്ന് പറഞ്ഞാണ് ഉദ്യോഗസ്ഥർ എത്താതിരുന്നത്. ഈ അനാസ്ഥയാണ് എൽദോസിന്‍റെ മരണത്തിന് കാരണമായതെന്നും ഇതു ക്രിമിനൽ അനാസ്ഥയാണെന്നും എംപി കത്തിൽ ചൂണ്ടിക്കാട്ടി. കേരളത്തിൽ വന്യജീവി ആക്രമണം വർധിച്ചുവരികയാണ്. ഇതിൽ സർക്കാർ അടിയന്തരമായി ഇടപെടണമെന്നും എംപി കത്തിൽ ആവശ്യപ്പെട്ടു. ഇതേ തുടർന്നു 2025 ഏപ്രിൽ 29ന് ചീഫ് ഫോറസ്റ്റ് കണ്‍സർവേറ്ററോട് ദേശീയ മനുഷ്യാവകാശ കമ്മീഷൻ റിപ്പോർട്ട് ആവശ്യപ്പെട്ടിരുന്നു. എന്നാൽ, ഇതുവരെ റിപ്പോർട്ട് ലഭിച്ചിട്ടില്ലെന്ന് കമ്മീഷൻ അറിയിച്ചു. റിപ്പോർട്ട് സമർപ്പിക്കാൻ ആറാഴ്ചത്തെ സമയം നൽകിയിട്ടുണ്ടെന്നും ഈ കാലയളവിനുള്ളിൽ റിപ്പോർട്ട് ലഭിച്ചില്ലെങ്കിൽ മനുഷ്യാവകാശ സംരക്ഷണ നിയമം സെക്ഷൻ 13 പ്രകാരം നിർബന്ധിത നടപടി സ്വീകരിക്കുമെന്നും കമ്മീഷൻ മുന്നറിയിപ്പു നൽകി.

ദേശീയപാത വികസനം അട്ടിമറിച്ചതിനു പിന്നിൽ സംസ്ഥാന സർക്കാർ: എംപി

തൊടുപുഴ: ദേശീയ പാത-85ന്‍റെ ഭാഗമായ നേര്യമംഗലം മുതൽ വാളറവരെയുള്ള റോഡിന്‍റെ വികസനം ഹൈക്കോടതി ഇടക്കാല ഉത്തരവിലൂടെ തടഞ്ഞ സംഭവത്തിൽ തങ്ങളുടെ ഭാഗത്തുനിന്നു വീഴ്ചസംഭവിച്ചിട്ടില്ലെന്ന് വരുത്തിത്തീർക്കാനുള്ള ശ്രമമാണ് സർക്കാർ നടത്തുന്നതെന്ന് ഡീൻ കുര്യാക്കോസ് എംപി പത്രസമ്മേളനത്തിൽ ആരോപിച്ചു. വനംവകുപ്പ് പറയുന്നതുപോലെ പ്രവർത്തിക്കുന്ന സർക്കാർ പാതയുടെ നിർമാണം തടസപ്പെടുത്താൻ ഒത്താശചെയ്യുകയായിരുന്നു. സർക്കാർ വീഴ്ച മറച്ചുവച്ച് മന്ത്രിമാരായ റോഷി അഗസ്റ്റിനും എ.കെ. ശശീന്ദ്രനും തെറ്റുചെയ്ത ഉദ്യോഗസ്ഥരെ ന്യായീകരിക്കുകയാണ്. ഇവർ ജനാധിപത്യത്തിന്‍റെ വില കളയുകയാണ്. ചീഫ് സെക്രട്ടറി തലത്തിൽ സ്വീകരിച്ച തീരുമാനം അട്ടിമറിച്ചതിൽ മന്ത്രിമാർക്കോ ഉന്നത ഉദ്യോഗസ്ഥർക്കോ പങ്കില്ലെങ്കിൽ തെറ്റു ചെയ്തവർക്കെതിരേ നടപടി സ്വീകരിക്കുകയാണു വേണ്ടത്. ഇതിനു കഴിയുന്നില്ലെങ്കിൽ രാജിവച്ചൊഴിയണം. അഡീഷണൽ ചീഫ് സെക്രട്ടറി കെ.ആർ. ജ്യോതിലാൽ ഹൈക്കോടതിയിൽ ചീഫ് സെക്രട്ടറിക്കുവേണ്ടിയെന്നു പറഞ്ഞ് നൽകിയ സത്യവാങ്മൂലം സർക്കാരിന്‍റെ നിലപാടായി മാറി. ഇതിലെ പരാമർശങ്ങൾ വസ്തുതകൾക്കു നിരക്കാത്തതും 2024 ഓഗസ്റ്റ് രണ്ടിനു ചീഫ്സെക്രട്ടറി വിളിച്ചുചേർത്ത യോഗത്തിൽ സ്വീകരിച്ച തീരുമാനത്തിന് കടകവിരുധവുമായിരുന്നു. ഇതേത്തുടർന്നു പുറപ്പെടുവിച്ച ഇടക്കാല വിധിയനുസരിച്ച് പരിവേഷ് പോർട്ടലിൽ നൽകിയ അപേക്ഷയ്ക്ക് പുറമേ നടക്കുന്ന നിർമാണപ്രവർത്തനങ്ങളെല്ലാം നിയമവിരുദ്ധവും നിർത്തിവയ്ക്കപ്പെടേണ്ടതുമാണെന്നായിരുന്നു കോടതിയുടെ നിരീക്ഷണം. ഇതേത്തുടർന്നു മരംമുറിയും റോഡ് നിർമാണപ്രവർത്തനങ്ങളും നിർത്തിവയ്ക്കേണ്ടി വന്നു. ചീഫ് സെക്രട്ടറി 2024 ഓഗസ്റ്റ് രണ്ടിനു വീഡിയോ കോണ്‍ഫറൻസ് മുഖേന കൂടിയ യോഗത്തിൽ വനംവകുപ്പ് സെക്രട്ടറിയായ കെ.ആർ. ജ്യോതിലാലും പങ്കെടുത്തിരുന്നു. ഈ യോഗതീരുമാനമനുസരിച്ച് റോഡ് വികസനവുമായി ബന്ധപ്പെട്ട് വനംവകുപ്പ് യാതൊരു തരത്തിലുള്ള തടസവും സൃഷ്ടിക്കാൻ പാടില്ലെന്ന് നിർദേശിച്ചിരുന്നു. സർക്കാരും കിരണ്‍ സിജുവും തമ്മിലുള്ള കേസുമായി ബന്ധപ്പെട്ട് പുറപ്പെടുവിച്ച വിധിയിൽ 30 മീറ്റർ വീതി റോഡിനുണ്ട്. ഇതു മറികടക്കാൻ സർക്കാർ അപ്പീലോ റിവ്യൂ പെറ്റീഷനോ നൽകേണ്ടതില്ല. ദേശീയപാത അഥോറിറ്റി പരിവേഷ് പോർട്ടലിൽ നൽകിയ അപേക്ഷയനുസരിച്ച് 0.95 ഹെക്ടർ സ്ഥലം ലഭ്യമാക്കുന്നതിനുള്ള നടപടികൾ തുടരാമെന്നും തീരുമാനിച്ചിരുന്നു. എന്നാൽ അഡീഷണൽ ചീഫ് സെക്രട്ടറി കോടതിയിൽ കഴിഞ്ഞ ദിവസം നൽകിയ സത്യവാങ്മൂലത്തിൽ ഈ മേഖല ഉൾപ്പെടുന്ന പ്രദേശം റവന്യു-പിഡബ്ല്യുഡി വകുപ്പുകളുടെ റിക്കാർഡ് പ്രകാരം പുറന്പോക്കാണെന്നിരിക്കേ ഈ പ്രദേശം മലയാറ്റൂർ റിസർവാണെന്നു സ്ഥാപിക്കാനായിരുന്നു ശ്രമം. ഇതിനിടെ ദേശീയപാത അഥോറിറ്റി ആവശ്യപ്പെട്ട സ്ഥലത്തിനു പകരമായും മനുഷ്യ-വന്യജീവി സംഘർഷം പരിഹരിക്കാനെന്ന പേരിലും വനംവകുപ്പ് 5.5 കോടി കൈപ്പറ്റിയെന്നും എംപി പറഞ്ഞു. ഈ തുക ഉപയോഗിച്ച് മനുഷ്യ-വന്യജീവി സംഘർഷം പരിഹരിക്കാൻ എന്ത് നടപടിയാണ് വനംവകുപ്പ് സ്വീകരിച്ചതെന്നു വ്യക്തമാക്കണം. വനം ഉദ്യോഗസ്ഥർക്ക് വാഹനവും, ഡ്രൈവർമാരുടെ ശന്പളവുമെല്ലാം ഈ ഇനത്തിൽ ആവശ്യപ്പെട്ട് പണം വാങ്ങിയെടുത്ത സംഭവം വിചിത്രമാണെന്നും എംപി പറഞ്ഞു. ജില്ലയെ ഗുരുതരമായി ബാധിക്കുന്ന വിഷയത്തിൽ മുഖ്യമന്ത്രി അടിയന്തര ഇടപെടൽ നടത്തി റോഡ് വികസനം സാധ്യമാക്കണമെന്ന് എംപി ആവശ്യപ്പെട്ടു. പൊതുപ്രവർത്തകൻ സിജുമോൻ ഫ്രാൻസിസും പത്രസമ്മേളനത്തിൽ പങ്കെടുത്തു.

കല്ലാര്‍ ഗവ. എച്ച്എസ്എസ് സപ്തതി ആഘോഷങ്ങളുടെ ഉദ്ഘാടനം നാളെ

നെടുങ്കണ്ടം: കല്ലാര്‍ ഗവ. ഹയര്‍ സെക്കൻഡറി സ്‌കൂളിന്‍റെ സപ്തതി ആഘോഷങ്ങളുടെ ഉദ്ഘാടനം നാളെ മന്ത്രി റോഷി അഗസ്റ്റിന്‍ നിര്‍വഹിക്കുമെന്ന് സംഘാടകസമിതി ഭാരവാഹികള്‍ അറിയിച്ചു. 1956 ജൂലൈ 17ന് ഏകാധ്യാപക വിദ്യാലയമായി ആരംഭിച്ച് ഇപ്പോള്‍ ഹയര്‍ സെക്കൻഡറിയായി പ്രവര്‍ത്തിക്കുന്ന സ്‌കൂള്‍ പൊതുവിദ്യാഭ്യാസ മേഖലയില്‍ ജില്ലയിലെ ഏറ്റവും വലിയ സ്‌കൂളാണ്. സപ്തതി ആഘോഷങ്ങളുടെ ഭാഗമായി ഒരു വര്‍ഷം നീണ്ടുനില്‍ക്കുന്ന പരിപാടികളാണ് ആസൂത്രണം ചെയ്തിരിക്കുന്നത്. പൂര്‍വ അധ്യാപക - വിദ്യാര്‍ത്ഥീ സംഗമം, ലഹരിവിരുദ്ധ കാമ്പയിന്‍, കലാകായിക മത്സരങ്ങള്‍, പഠനയാത്രകള്‍, പട്ടംകോളനി ചരിത്ര ഗവേഷണം, സാംസ്‌കാരിക കേന്ദ്രം സ്ഥാപിക്കല്‍, ടാലന്‍റ് ഹണ്ട്, അഗ്രി ഫെസ്റ്റ്, സ്‌നേഹവീട് നിര്‍മാണം തുടങ്ങിയവയാണ് പ്രധാനപ്പെട്ട പരിപാടികള്‍. നാളെ രാവിലെ 10ന് ലഹരിക്കെതിരേ രക്ഷിതാക്കളും വിദ്യാര്‍ഥികളും അധ്യാപകരും പൊതുജനങ്ങളും ചേര്‍ന്ന് മനുഷ്യച്ചങ്ങല തീര്‍ക്കും. ഉച്ചകഴിഞ്ഞ് രണ്ടിന് നടക്കുന്ന പൊതുസമ്മേളനത്തില്‍ പിടിഎ പ്രസിഡന്‍റ് രമേഷ് കൃഷ്ണന്‍ അധ്യക്ഷത വഹിക്കും. എം.എം. മണി എംഎല്‍എ സപ്തതി പദ്ധതി പ്രകാശനവും ഡീന്‍ കുര്യാക്കോസ് എംപി മുഖ്യപ്രഭാഷണവും നടത്തും. ത്രിതല പഞ്ചായത്ത് അംഗങ്ങള്‍, വിവിധ രാഷ്ട്രീയകക്ഷി പ്രതിനിധികള്‍ തുടങ്ങിയവര്‍ പങ്കെടുക്കുമെന്ന് പിടിഎ പ്രസിഡന്‍റ് രമേഷ് കൃഷ്ണന്‍, സിഎംസി ചെയര്‍മാന്‍ വിജയന്‍പിള്ള, പ്രിന്‍സിപ്പൽ കെ.വി. ഹല്ലോക്ക്, ഹെഡ്മാസ്റ്റര്‍ ജോണ്‍ മാത്യു, സിറാജ് മുണ്ടിയെരുമ, ഷംസുദീന്‍, എന്‍. അജിത, എന്‍. പ്രജിത, അംബുജാക്ഷന്‍ എന്നിവര്‍ അറിയിച്ചു.

കോവിൽക്കടവിലെ ഏക എടിഎം 20 ദിവസമായി പ്രവർത്തനരഹിതം

മറയൂർ: പ്രധാന വിനോദസഞ്ചാര കേന്ദ്രമായ കാന്തല്ലൂരിന്‍റെ കവാടമായ കോവിൽക്കടവിൽ സ്ഥിതിചെയ്യുന്ന ഏക എടിഎം കേന്ദ്രം കഴിഞ്ഞ 20 ദിവസമായി അടഞ്ഞുകിടക്കുന്നത് പ്രദേശവാസികൾക്കും ഇവിടെയെത്തുന്ന വിനോദസഞ്ചാരികൾക്കും വലിയ ബുദ്ധിമുട്ട് സൃഷ്ടിക്കുന്നു. എസ്ബിഐയുടെ ഉടമസ്ഥതയിലുള്ള എടിഎം, കരാറുകാരനും കെട്ടിടഉടമയും തമ്മിലുള്ള വാടകയുമായി ബന്ധപ്പെട്ട തർക്കം മൂലമാണ് പ്രവർത്തനരഹിതമായത്. കോവിൽക്കടവ്, കാന്തല്ലൂർ എന്നിവിടങ്ങളിലേക്ക് എത്തുന്ന സഞ്ചാരികൾക്ക് പണം പിൻവലിക്കാൻ ഈ എടിഎമ്മായിരുന്നു പ്രധാന ആശ്രയം. ഏറ്റവും അടുത്ത എടിഎം അഞ്ചു കിലോമീറ്റർ അകലെയുള്ള മറയൂർ ടൗണിലാണ്. എടിഎം അടഞ്ഞുകിടക്കുന്ന സാഹചര്യം മുതലെടുത്ത് സമീപത്തുള്ള ചില വ്യക്തികൾ കമ്മീഷൻ വാങ്ങി പണം നൽകുന്ന രീതി വ്യാപകമായിട്ടുണ്ട്.

കേണൽ പ്രശാന്ത് നായർക്ക് യാത്രയയപ്പ്

തൊടുപുഴ: കേരള എൻസിസി ബറ്റാലിയൻ കമാൻഡിംഗ് ഓഫീസർ കേണൽ പ്രശാന്ത് നായർക്ക് തൊടുപുഴ ന്യൂമാൻ കോളജിൽ വർണ ശബളമായ യാത്രയയപ്പ് നൽകി. 18 കേരള ബറ്റാലിയന്‍റെ കമാൻഡിംഗ് ഓഫീസറായി രണ്ടു വർഷത്തോളമായി പ്രവർത്തിച്ചുവരികയായിരുന്നു കേണൽ പ്രശാന്ത് നായർ. മികച്ച സൈനിക സേവനത്തിന് സേനാമെഡലും വിശിഷ്ട സേനാമെഡലും നേടിയ അദ്ദേഹം കേരള എൻസിസിക്ക് ഒട്ടേറെ സംഭാവനകൾ നൽകിയിരുന്നു. കേരളത്തിൽ നിന്ന് ആദ്യമായി ഡൽഹിയിൽ റിപ്പബ്ലിക് ദിന ക്യാന്പിൽ പങ്കെടുത്ത ന്യൂമാൻ എൻസിസി ബാന്‍റിന്‍റെ പരിശീലനത്തിലും അദ്ദേഹം പങ്കുവഹിച്ചു. സമ്മേളനത്തിൽ 18 കേരള ബറ്റാലിയൻ അഡ്മിനിസ്ട്രേറ്റീവ് ഓഫീസർ കേണൽ അനിരുദ്ധ് സിംഗ്, വൈസ് പ്രിൻസിപ്പൽ ഡോ. സാജു ഏബ്രഹാം, അസോസിയേറ്റ് എൻസിസി ഓഫീസർ ക്യാപ്റ്റൻ പ്രജീഷ് സി. മാത്യു, ബർസാർ ഫാ. ബെൻസണ്‍ എൻ. ആന്‍റണി, ഫസ്റ്റ് ഓഫീസർ ഡോ.സജീവ് കെ. വാവച്ചൻ, ഫസ്റ്റ് ഓഫീ സർ അനിൽ കെ. നായർ, സർജന്‍റ് എസ്.ദേവികൃഷ്ണ എന്നിവർ പ്രസംഗിച്ചു. 18 കേരള ബറ്റാലിയൻ ഗാർഡ് ടീം കേണലിന് ഗാർഡ് ഓഫ് ഓണർ നൽകി ആദരിച്ചു. തുടർന്ന് നടന്ന പുള്ളിങ് ഒൗട്ട് സെറിമണിയിൽ എൻസിസി ഓഫീസേഴ്സ്, സൈനിക ഉദ്യോഗസ്ഥർ, കേഡറ്റുകൾ എന്നിവർ പങ്കെടുത്തു.

വെള്ളയാംകുടി യുപി സ്കൂളിൽ ലഹരിക്കെതിരേ "എന്‍റെ കൈവിരൽച്ചാർത്ത് ’

കട്ടപ്പന: വെള്ളയാംകുടി സെന്‍റ് ജെറോംസ് യുപി സ്കൂളിൽ ലഹരിവിരുദ്ധ പ്രവർത്തനങ്ങളുടെ രണ്ടാം ഘട്ട പ്രവർത്തനങ്ങൾക്ക് തുടക്കമായി. ലഹരിവിരുദ്ധ പ്രവർത്തനങ്ങളുടെ ഉദ്ഘാടനം ഇടുക്കി രൂപത വികാരി ജനറാൾ മോണ്‍. ഏബ്രഹാം പുറയാറ്റ് നിർവഹിച്ചു. ലഹരിവിരുദ്ധ പ്രവർത്തനങ്ങളുടെ ഭാഗമായി കുട്ടികളുടെ സൂംബ ഡാൻസ് അരങ്ങേറി. സ്കൂൾ ചെയർപേഴ്സൻ അമല സജേഷ് ലഹരിവിരുദ്ധ സത്യപ്രതിജ്ഞ ചൊല്ലിക്കൊടുത്തു. ലഹരിവിരുദ്ധ പ്രവർത്തനത്തിന്‍റെ ഭാഗമായി പൊതു സ്ഥാപനങ്ങളിലും കടകളിലും പൊതു വാഹനങ്ങളിലും സ്റ്റിക്കർ പതിക്കുന്ന പ്രവർത്തനങ്ങളും ആരംഭിച്ചു. ലഹരിവിരുദ്ധ സന്ദേശം എത്തിക്കുന്നതിന്‍റെ ഭാഗമായാണ് സ്റ്റിക്കർ പ്രചാരണം നടത്തുന്നത്. വെള്ളയാംകുടി സെന്‍റ് ജെറോംസ് യുപി സ്കൂളിൽ നടന്ന ചടങ്ങിൽ കട്ടപ്പന ഉപജില്ലാ വിദ്യാഭ്യാസ ഓഫീസർ സി. രാജശേഖരൻ, കട്ടപ്പന മുനിസിപ്പൽ കൗണ്‍സിലർ ബീന സിബി, സ്കൂൾ ഹെഡ്മാസ്റ്റർ ബിനോയി മഠത്തിൽ, പിടിഎ പ്രസിഡന്‍റ് ജയിംസ് വർഗീസ്, പിടിഎ വൈസ് പ്രസിഡന്‍റ് പ്രശാന്ത് രാജു തുടങ്ങിയവർ പ്രസംഗിച്ചു. ലഹരിക്കെതിരേ കൈയൊപ്പ് ചാർത്തി വിദ്യാർഥികൾ ലഹരിവിരുദ്ധ സന്ദേശത്തിന്‍റെ അംബാസഡർമാരായി മാറുമെന്ന് പ്രതിജ്ഞയെടുത്തു.

മറയൂർ സർവീസ് സഹകരണ ബാങ്കിന് സംസ്ഥാനതലത്തിൽ വീണ്ടും അംഗീകാരം

മറയൂർ: നബാർഡിന്‍റെ പ്രൈമറി അഗ്രികൾച്ചറൽ ക്രെഡിറ്റ് സൊസൈറ്റി, മൾട്ടി സർവീസ് സെന്‍റർ എന്നീ പദ്ധതിയിൽ സംസ്ഥാനത്തെ മികച്ച പ്രാഥമിക സഹകരണ ബാങ്കായി മറയൂർ സർവീസ് സഹകരണ ബാങ്ക് തെരഞ്ഞെടുക്കപ്പെട്ടു. സഹകരണ സംഘങ്ങളുടെ വൈവിധ്യവത്കരണത്തിലൂടെ വിവിധോദ്ദേശ സംഘങ്ങളാകാനുള്ള നബാർഡിന്‍റെ നയത്തിന്‍റെ ഭാഗമായാണ് അംഗീകാരം. നബാർഡിന്‍റെ 44-ാം സ്ഥാപക ദിനത്തോടനുബന്ധിച്ച് തിരുവനന്തപുരം റീജണൽ ഓഫീസ് ഓഡിറ്റോറിയത്തിൽ നടന്ന ചടങ്ങിൽ സഹകരണ വകുപ്പ് മന്ത്രി വി.എൻ. വാസവൻ അവാർഡ് സമ്മാനിച്ചു. റിസർവ് ബാങ്ക് ജനറൽ മാനേജർ മുഹമ്മദ് സജീദ്, കാനറാ ബാങ്ക് ജനറൽ മാനേജർ സുനിൽകുമാർ, നബാർഡ് ചീഫ് ജനറൽ മാനേജർ നാഗേഷ്കുമാർ അലുവാല തുടങ്ങിയയവരുടെ സാന്നിധ്യത്തിലായിരുന്നു ചടങ്ങ്.

ട്രാഫിക് പോലീസിന്‍റെ നടപടിയിൽ വലഞ്ഞ് വ്യാപാരികൾ

തൊടുപുഴ: നഗരത്തിൽ ട്രാഫിക് പോലീസിന്‍റെ നടപടിയിൽ തൊടുപുഴയിലെ വ്യാപാരികൾ പൊറുതി മുട്ടിയിരിക്കുകയാണെന്ന് മർച്ചന്‍റ്സ് അസോസിയേഷൻ എക്സിക്യൂട്ടീവ് യോഗം കുറ്റപ്പെടുത്തി. നഗരത്തിൽ കൂടി രാവിലെ മുതൽ സഞ്ചരിച്ച് കടകളിലേക്ക് വരുന്ന സാധാരണക്കാരുടെ വാഹനങ്ങളുടെ ചിത്രം ഫോണിൽ പകർത്തി പെറ്റിക്കേസ് ചാർജ് ചെയ്യുന്ന രീതിയാണ് ഇവരുടേത്. ഡ്രൈവർമാരുള്ള വാഹനങ്ങൾക്കെതിരേയും കേസെടുക്കുന്നുണ്ട്. കച്ചവടമാന്ദ്യം മൂലം വാടക കൊടുക്കാനും വായ്പകൾ തിരിച്ചടയ്ക്കാനും ബുദ്ധിമുട്ടുന്ന വ്യാപാരികളെ ഈ നടപടി പ്രതികൂലമായി ബാധിച്ചിരിക്കുകയാണ്. പോലീസും വ്യാപാരികളും നല്ല ബന്ധത്തിലാണ് ഇതു വരെ മുന്നോട്ടു പോയിരുന്നത്. എന്നാൽ ചില ഉദ്യോഗസ്ഥർ മൂലം ഈ ബന്ധം ഇല്ലാതാവുകയാണ്. ഇടുങ്ങിയ പല റോഡുകളിലും പാർക്കിംഗ് സൗകര്യങ്ങൾ പരിമിതമായതിനാൽ വ്യാപാരസ്ഥാപനങ്ങളുടെ മുന്നിൽ ഉപഭോക്താക്കൾ വാഹനം നിർത്തുന്നത് സ്വാഭാവികമാണ്. ഈ വാഹനങ്ങൾക്കാണ് ഭീമമായ തുക പിഴയായി നൽകുന്നത്. ഇത്തരം നടപടിക്കെതിരെ പോലീസ് സ്റ്റേഷൻ മാർച്ച് ഉൾപ്പെടെ സമരം സംഘടിപ്പിക്കുമെന്ന് ഭാരവാഹികൾ പറഞ്ഞു. അസോസിയേഷൻ പ്രസിഡന്‍റ് രാജു തരണിയിൽ യോഗത്തിൽ അധ്യക്ഷത വഹിച്ചു. ജില്ലാ ട്രഷറർ ആർ.രമേശ് ഉദ്ഘാടനം ചെയ്തു. ടി.എൻ. പ്രസന്നകുമാർ, സി.കെ.നവാസ്, അനിൽ പീടികപ്പറന്പിൽ, നാസർ സൈര, സാലി എസ്. മുഹമ്മദ്, ഷെരീഫ് സർഗം, കെ.പി. ശിവദാസ്, ജോസ് തോമസ് കളരിക്കൽ എന്നിവർ പ്രസംഗിച്ചു.

കാട്ടുപന്നിശല്യത്തിനെതിരേ തദ്ദേശസ്ഥാപനങ്ങള്‍ സര്‍ക്കാര്‍ ഉത്തരവ് നടപ്പാക്കണം: ഇന്‍ഫാം

പാറത്തോട് (കാഞ്ഞിരപ്പള്ളി): ജനവാസമേഖലകളിലിറങ്ങി മനുഷ്യജീവനും സ്വത്തിനും നാശനഷ്ടങ്ങളുണ്ടാക്കുന്ന കാട്ടുപന്നികളെ വെടിവച്ചോ അനുവദനീയമായ മറ്റു മാര്‍ഗങ്ങളിലൂടെയോ തടയുന്നതിന് തദ്ദേശ സ്ഥാപനങ്ങള്‍ക്ക് സര്‍ക്കാര്‍ നല്‍കിയ ഉത്തരവാദിത്വം ഫലപ്രദമായി നടപ്പിലാക്കുന്നതില്‍ പഞ്ചായത്തു ഭരണസമിതികള്‍ വീഴ്ച വരുത്താന്‍ പാടില്ലെന്ന് ഇന്‍ഫാം ദേശീയ ചെയര്‍മാന്‍ ഫാ. തോമസ് മറ്റമുണ്ടയില്‍. ഇന്‍ഫാം കാഞ്ഞിരപ്പള്ളി കാര്‍ഷികജില്ല എക്സിക്യൂട്ടീവ് യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. മനുഷ്യവാസ മേഖലയിലെ ആളുകളുടെ ജീവനും സ്വത്തിനും കൃഷിക്കും ഭീഷണിയായ കാട്ടുപന്നികളെ വെടിവച്ച് കൊല്ലുന്നതിനുവേണ്ടി ലൈസന്‍സുള്ള ഷൂട്ടര്‍മാരെ നിയോഗിക്കാന്‍ കേരള ഗവണ്‍മെന്‍റിന്‍റെ ഡിസാസ്റ്റര്‍ മാനേജ്‌മെന്‍റ് ഡിപ്പാര്‍ട്ട്‌മെന്‍റിന്‍റെ ജിഒ (ആർടി) നന്പർ 108/2025/ ഡിഎംഡി ഉത്തരവു പ്രകാരം തദ്ദേശ സ്വയംഭരണ സ്ഥാപനങ്ങളുടെ അധ്യക്ഷന്മാര്‍ക്ക് അധികാരം നല്‍കിയിട്ടുണ്ട്. മുഖ്യമന്ത്രിയും വനംമന്ത്രിയും ഇക്കാര്യത്തില്‍ കര്‍ഷക അനുകൂലമായ നിലപാടുകള്‍ സ്വീകരിച്ചിട്ടും നടപടികള്‍ കൈക്കൊള്ളാത്ത പഞ്ചായത്തുകള്‍ അക്ഷന്തവ്യമായ കൃത്യവിലോപമാണ് ഇക്കാര്യത്തില്‍ സ്വീകരിക്കുന്നത്. ഈ ഉത്തരവ് ഫലപ്രദമായി നടപ്പാക്കാന്‍ പല തദ്ദേശ സ്ഥാപനങ്ങളും വേണ്ടത്ര ജാഗ്രത കാണിക്കുന്നില്ലെന്ന് വനംമന്ത്രിപോലും പരിതപിക്കുന്നതായി മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. കാട്ടുപന്നികള്‍ മൂലമുള്ള അപകടങ്ങളും കൃഷിനാശവും തുടര്‍ച്ചയായി സംഭവിക്കുകയാണ്. കാട്ടുപന്നി ശല്യം നിയന്ത്രിക്കുന്നതില്‍ ഉത്തരവാദിത്വം ഏറ്റെടുക്കാത്ത തദ്ദേശ സ്വയംഭരണസ്ഥാപനങ്ങളിലെ ജനപ്രതിനിധികള്‍ക്കെതിരേ കക്ഷി രാഷ്‌ട്രീയ ഭേദമെന്യേ അടുത്ത തെരഞ്ഞെടുപ്പില്‍ കര്‍ഷകര്‍ നിലപാടെടുക്കണം. തദ്ദേശ സ്വയംഭരണ സ്ഥാപനങ്ങളിലെ തെരഞ്ഞെടുപ്പിന് മുമ്പുള്ള ഈ നാളുകള്‍ പഞ്ചായത്തുകളുടെ നിലപാടുകളും നടപടികളും പഠിക്കുന്നതിനും പരസ്യമാക്കുന്നതിനും അത് പൊതുജന സമൂഹ മധ്യേ എത്തിക്കുന്നതിനും ഇന്‍ഫാം പഞ്ചായത്തുകള്‍ തോറും ജാഗ്രതാ സമിതികള്‍ രൂപീകരിച്ച് നിരീക്ഷണം നടത്തും. ഇപ്രകാരം നിരീക്ഷണം നടത്തുന്നതിനുവേണ്ടി ഇന്‍ഫാം കാര്‍ഷിക താലൂക്ക് എക്‌സിക്യൂട്ടീവ് അംഗങ്ങളെയും ഗ്രാമസമിതി എക്‌സിക്യൂട്ടീവ് അംഗങ്ങളെയും ചേര്‍ത്ത് താലൂക്ക് അടിസ്ഥാനത്തില്‍ ജാഗ്രതാസമിതികള്‍ രൂപീകരിക്കും. താലൂക്ക് ഡയറക്ടര്‍മാര്‍ പ്രസ്തുത സമിതികളുടെ രക്ഷാധികാരികളുംഓരോ താലൂക്കില്‍ നിന്നുള്ള ജില്ലാ എക്‌സിക്യൂട്ടീവ് അംഗങ്ങള്‍ അധ്യക്ഷന്മാരുമായിരിക്കുമെന്നും ഫാ. തോമസ് മറ്റമുണ്ടയില്‍ കൂട്ടിച്ചേര്‍ത്തു. യോഗത്തില്‍ ഇന്‍ഫാം കാഞ്ഞിരപ്പള്ളി കാര്‍ഷികജില്ല പ്രസിഡന്‍റ് അഡ്വ. ഏബ്രഹാം മാത്യു പന്തിരുവേലില്‍, കേരള സംസ്ഥാന സെക്രട്ടറി ഡോ.പി.വി. മാത്യു, നാഷണല്‍ എക്‌സിക്യൂട്ടീവ് അംഗങ്ങളായ ജെയ്‌സണ്‍ ചെംബ്ലായില്‍, നെല്‍വിന്‍ സി. ജോയ്, സംസ്ഥാന ട്രഷറര്‍ തോമസ് തുപ്പലഞ്ഞിയില്‍, ജില്ലാ ജോയിന്‍റ് ഡയറക്ടര്‍മാരായ ഫാ. റോബിന്‍ പട്രകാലായില്‍, ഫാ. ആല്‍ബിന്‍ പുല്‍ത്തകിടിയേല്‍, ഫാ. ജിന്‍സ് കിഴക്കേല്‍, സെക്രട്ടറി തോമസുകുട്ടി വാരണത്ത്, ജോയിന്‍റ് സെക്രട്ടറി ബോബന്‍ ഈഴക്കുന്നേല്‍ തുടങ്ങിയവര്‍ പ്രസംഗിച്ചു.

ജീപ്പ് സഫാരി നിരോധനം പൂർണമായും പിൻവലിക്കണം: കത്തോലിക്ക കോൺഗ്രസ്

കുഴിത്തൊളു: ഹൈറേഞ്ചിന്‍റെ ജീവനാഡിയായ ജീപ്പ് സഫാരി നിരോധിച്ച ഇടുക്കി ജില്ലാ ഭരണകൂടത്തിന്‍റെ തീരുമാനം പൂർണമായും പിൻവലിക്കണമെന്ന് കത്തോലിക്ക കോൺഗ്രസ് കുഴിത്തൊളു യൂണിറ്റ് വാർഷിക പൊതുയോഗം ആവശ്യപ്പെട്ടു. പുതിയ ഉത്തരവു മൂലം ആയിരക്കണക്കിന് സാധാരണക്കാരുടെ ഉപജീവനം മാർഗമാണ് ഇല്ലാതായിരിക്കുന്നത്. ഇടുക്കി ജില്ലയിലെ പ്രധാന വിനോദസഞ്ചാര കേന്ദ്രങ്ങളുടെ ഉൾപ്രദേശങ്ങൾ കണ്ട് ആസ്വദിക്കുന്നതിന് ഓഫ് റോഡുകളിലൂടെയുള്ള ജീപ്പുയാത്രയും ട്രക്കിംഗും പ്രധാന ആകർഷക ഘടകമാണ്. പുതിയ ഉത്തരവോടെ ഈ അവസരമാണ് വിനോദസഞ്ചാരികൾക്ക് നഷ്ടമായിരിക്കുന്നത്. സഫാരി നിരോധനം ഏർപ്പെടുത്തിയതോടെ മേഖലയിലെ തൊഴിലാളികളും വ്യാപാരികളും പ്രതിസന്ധിയിലായിരിക്കുകയാണ്. തീരുമാനം പുനഃപരിശോധിക്കണമെന്നും യോഗത്തിൽ ആവശ്യമുയർന്നു. കുഴിത്തൊളു ദീപ ഹൈസ്കൂൾ ഓഡിറ്റോറിയത്തിൽ ചേർന്ന കത്തോലിക്ക കോൺഗ്രസ് യൂണിറ്റിന്‍റെ വാർഷിക പൊതുയോഗം വികാരി ഫാ. തോമസ് കപ്പിയാങ്കൽ ഉദ്ഘാടനം ചെയ്തു. യൂണിറ്റ് പ്രസിഡന്‍റ് സണ്ണി പൊട്ടനാനി അധ്യക്ഷത വഹിച്ചു. കാഞ്ഞിരപ്പള്ളി രൂപത ഡയറക്ടർ ഫാ. ജസ്റ്റിൻ മതിയത്ത് മുഖ്യപ്രഭാഷണം നടത്തി. സിഎ, പ്ലസ് ടു പരീക്ഷകളിൽ ഉന്നതവിജയം നേടിയ അമൽ ജോളി വെട്ടുപറമ്പിൽ, ഇസബെൽ കളപ്പുരയ്ക്കൽ എന്നിവരെ യോഗത്തിൽ ആദരിച്ചു. കത്തോലിക്ക കോൺഗ്രസ് ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, കാഞ്ഞിരപ്പള്ളി രൂപത ജനറൽ സെക്രട്ടറി ജോസഫ് പണ്ടാരക്കളം, രൂപത സമിതി അംഗം ജോസ് മടുക്കക്കുഴി, അഗസ്റ്റിൻ കുറുമണ്ണ്, മാത്യു തോട്ടുപുറത്ത്, ജോൺ കാരക്കുന്നേൽ, മിനി കൂടല്ലിൽ, ജിൻസമ്മ കണ്ണംകുളത്ത് എന്നിവർ പ്രസംഗിച്ചു.

സ്വര്‍ഗംമേട് മലനിരകളിൽ കൈയേറ്റമെന്ന് പരാതി

രാജാക്കാട്: സേനാപതി പഞ്ചായത്തിലെ സ്വർഗംമേട്ടില്‍ കൈയേറ്റമെന്ന് പരാതി. കാന്തിപ്പാറ വില്ലേജിന്‍റെ ഭാഗമായുള്ള മലമുകളില്‍ വലിയ രീതിയില്‍ കൈയേറ്റം നടക്കുന്നതായാണ് ആരോപണം. മുമ്പ് ചൊക്രമുടി മലനിരകളില്‍ വ്യാപകമായി ഉണ്ടായ കൈയേറ്റത്തിനെതിരേ റവന്യു വകുപ്പ് കര്‍ശന നടപടി സ്വീകരിച്ചിരുന്നു. ഇതിനു പിന്നാലെയാണ് സമാനമായ ഭൂപ്രകൃതി നിലനില്‍ക്കുന്ന സ്വര്‍ഗംമേട് മലനിരയില്‍ കൈയേറ്റം നടക്കുന്നത്. മലമുകളില്‍ ഭൂമി പ്ലോട്ട് തിരിച്ചാണ് കൈയേറ്റം നടക്കുന്നത്. പുല്‍മേടുകള്‍ വ്യാപകമായി നശിപ്പിച്ചിട്ടുണ്ട്. മുമ്പും ഇതേ മലമുകളില്‍ അനധികൃതമായി റോഡ് നിര്‍മാണം നടത്തിയത് റവന്യൂ വകുപ്പ് കണ്ടെത്തുകയും നടപടികള്‍ സ്വീകരിക്കുകയും ചെയ്തിരുന്നു. പ്രകൃതി മനോഹാരിത നിറഞ്ഞു നില്‍ക്കുന്ന മലമുകളിലെ ടൂറിസം സാധ്യത മുന്നില്‍ കണ്ടാണ് റിസോര്‍ട്ട് - ഭൂ മാഫിയാ ഇവിടെ കടന്നുകയറ്റം നടത്തുന്നതെന്നും ഇതു തടയണമെന്നും ആവശ്യപ്പെട്ട് പരിസ്ഥിതി സംഘടനയായ ഗ്രീന്‍കെയര്‍ കേരള ജില്ലാകളക്ടര്‍, റവന്യു മന്ത്രി, വിജിലന്‍സ് ഡയറക്ടര്‍, കേന്ദ്ര വനം പരിസ്ഥിതി മന്ത്രാലയം എന്നിവര്‍ക്ക് പരാതിയും നല്‍കി.

വിശ്വാസജീവിത അധ്യാപക പരിശീലനം

കാഞ്ഞിരപ്പള്ളി: വിശ്വാസജീവിത പരിശീലകര്‍ക്കായി കാഞ്ഞിരപ്പള്ളി രൂപത വിശ്വാസ ജീവിത പരിശീലന കേന്ദ്രം ഒരുക്കിയ അധ്യാപക പരിശീലനം രൂപതാധ്യക്ഷന്‍ മാര്‍ ജോസ് പുളിക്കല്‍ ഉദ്ഘാടനം ചെയ്തു. സെന്‍റ് ഡൊമിനിക്‌സ് കത്തീഡ്രല്‍ വികാരി റവ.ഡോ. കുര്യന്‍ താമരശേരി, രൂപത വിശ്വാസ ജീവിത പരിശീലന ഡയറക്ടര്‍ ഫാ. തോമസ് വാളന്മനാല്‍ എന്നിവര്‍ പ്രസംഗിച്ചു. സഭാത്മക ജീവിതത്തില്‍ അടിത്തറപാകി, അറിവിലൂടെ അനുഭവത്തിലേക്കു കുട്ടികളെ നയിക്കാന്‍ നൂതനശൈലിയിലുള്ള ബോധനരീതി പരിചയപ്പെടുത്തുകയാണ് പരിശീലന പരിപാടിയിലൂടെ ലക്ഷ്യമിടുന്നത്.

വനംവകുപ്പിന്‍റെ വാഹനങ്ങൾ റോഡിൽ തടയും: കത്തോലിക്ക കോണ്‍ഗ്രസ്

കോതമംഗലം: നാടിന്‍റെ സമഗ്ര വളർച്ചയ്ക്കും പൊതുഗതാഗത വികസനത്തിനും തുരങ്കം വയ്ക്കുന്ന വനംവകുപ്പിന്‍റെയും കപട പരിസ്ഥിതി വാദികളുടെയും ജനദ്രോഹനിലപാട് തുടർന്നാൽ വനം വകുപ്പിന്‍റെ വാഹനങ്ങൾ റോഡിൽ തടയേണ്ടി വരുമെന്ന് കത്തോലിക്ക കോണ്‍ഗ്രസ് കോതമംഗലം രൂപത കമ്മിറ്റി മുന്നറിയിപ്പു നൽകി. ദേശീയപാതയുടെ ഭാഗമായ നേര്യമംഗലം മുതൽ വാളറ വരെയുള്ള ഭാഗത്തെ റോഡു വികസനം തടസപ്പെടാൻ ഇടയാക്കിയ ആസൂത്രിത ഗൂഢാലോചന ഇനിയും അനുവദിക്കാനാവില്ല. നിരന്തരമായി ഗതാഗതക്കുരുക്കും അപകടങ്ങളും ഉണ്ടാകുന്ന നേര്യമംഗലം-വാളറ മേഖലയിൽ റോഡ് വികസിപ്പിക്കേണ്ടതില്ലെന്നാണ് വനംവകുപ്പിന്‍റെ നിലപാടെങ്കിൽ ആ റോഡിലൂടെ വനം വകുപ്പിന്‍റെ വാഹനങ്ങൾ ഓടിക്കേണ്ടതുണ്ടോയെന്ന് പൊതുജനം തീരുമാനിക്കും. ആഡംബര വാഹനങ്ങൾ ഉൾപ്പെടെയുള്ള വനം വകുപ്പിന്‍റെ നിരവധി വാഹനങ്ങൾ ദിനംപ്രതി ഈ റോഡിലൂടെ സഞ്ചരിക്കുന്നുണ്ട്. റോഡ് ആവശ്യമില്ലാത്തവർ കാട്ടിലൂടെ നടന്നു പോയാൽ മതിയെന്ന് നിലപാടെടുക്കേണ്ടി വരും. സമാന ചിന്താഗതിയുള്ള സംഘടനകളുടെയും വ്യക്തികളുടെയും സഹകരണത്തോടെ കർമപദ്ധതികൾ ആസൂത്രണം ചെയ്ത് വനംവകുപ്പിന്‍റെ ജനദ്രോഹ നടപടികളെ ചെറുക്കുമെന്ന് കത്തോലിക്ക കോണ്‍ഗ്രസ് അറിയിച്ചു. വനത്തിന് സമീപത്തെ റോഡുകളുടെ വികസനം, വന്യമൃഗ ശല്യം, പട്ടയ പ്രശ്നങ്ങൾ എന്നിവയിലെല്ലാം ജനവിരുദ്ധവും മനുഷ്യത്വ രഹിതവുമായ നിലപാടാണ് വനം വകുപ്പ് സ്വീകരിക്കുന്നത്. വനംവകുപ്പ് ഉദ്യോഗസ്ഥർ ജനദ്രോഹ നിലപാട് സ്വീകരിക്കുന്പോൾ ഭരണ നേതൃത്വവും ജനപ്രതിനിധികളും എന്തെടുക്കുകയാണെന്ന് അറിയാൻ ജനത്തിന് താത്പര്യമുണ്ട്. ഉത്തരവാദിത്വപ്പെട്ട ഭരണ, രാഷ്ട്രീയ നേതൃത്വങ്ങൾ അറിഞ്ഞു കൊണ്ടാണ് വനംവകുപ്പുകാർ ഇത്തരം നിലപാട് സ്വീകരിക്കുന്നതെന്നു വേണം കരുതാൻ. അങ്ങനെയല്ലെങ്കിൽ വനം വകുപ്പധികൃതരുടെ തെറ്റായ നിലപാടുകൾ തിരുത്തിക്കാനുള്ള ഇച്ഛാശക്തി ഭരണത്തിന് നേതൃത്വം നൽകുന്നവർ കാണിക്കണം. രാഷ്ട്രീയ രംഗത്തും പരിസ്ഥിതി പ്രവർത്തനരംഗത്തും പൊതുപ്രവർത്തന മേഖലയിലുമുള്ള ചിലർ ചേർന്നുള്ള ഉപജാപക സംഘത്തിന്‍റെ പ്രവർത്തനങ്ങൾ പൊതുജനം തിരിച്ചറിയണമെന്നും കത്തോലിക്ക കോണ്‍ഗ്രസ് ആവശ്യപ്പെട്ടു. രൂപത പ്രസിഡന്‍റ് സണ്ണി കടൂത്താഴെ യോഗത്തിൽ അധ്യക്ഷത വഹിച്ചു. രൂപത ഡയറക്ടർ റവ.ഡോ. മാനുവൽ പിച്ചളക്കാട്ട്, രൂപത ജനറൽ സെക്രട്ടറി മത്തച്ചൻ കളപ്പുരയ്ക്കൽ, രൂപത ട്രഷറർ തന്പി പിട്ടാപ്പിള്ളിൽ, സി.എ. തോമസ്, അഡ്വ. യു.വി. ചാക്കോ, ബിന്ദു ജോസ്, മേരി ആന്‍റണി, ഷൈജു ഇഞ്ചയ്ക്കൽ, ജിജി പുളിക്കൽ, ആന്‍റണി പുല്ലൻ, ജോർജ് മങ്ങാട്ട്, അബി കാഞ്ഞിരപ്പാറ, ജോണ്‍ മുണ്ടൻകാവിൽ, ജോയ്സ് മേരി ആന്‍റണി, ബേബിച്ചൻ നിധീരിക്കൽ, ബെന്നി തോമസ്, ജോർജ് കുര്യാക്കോസ്, ജിനു ആന്‍റണി, ജോണി ജേക്കബ്, കെ.എം. ജോസഫ്, ഇ.ആർ. പൈലി, വി.ജെ. റോജോ, സനിൽ പി. ജോസ്, അമിത ജോണി, ജോസ് കുര്യൻ, റോയി മാത്യു, അഞ്ജു ജോസ് എന്നിവർ പ്രസംഗിച്ചു.

സേവനപ്രവർത്തനങ്ങളുടെ ഉദ്ഘാടനം നടത്തി

തൊടുപുഴ: ലയണ്‍സ് ക്ലബ് ഓഫ് തൊടുപുഴ ഗോൾഡന്‍റെ സേവന പ്രവർത്തനങ്ങളുടെ ഉദ്ഘാടനവും പുതിയ ഭാരവാഹികളുടെ സ്ഥാനാരോഹണവും നടന്നു. നഗരസഭ ചെയർമാൻ കെ. ദീപക് ഉദ്ഘാടനം ചെയ്തു. പ്രസിഡന്‍റ് ഷിബു സി. നായർ അധ്യക്ഷത വഹിച്ചു. ലയണ്‍സ് ഡിസ്ട്രിക്ട് ജിഎൽടി കോ-ഓർഡിനേറ്റർ പ്രഫ. സാംസണ്‍ തോമസ് ഭാരവാഹികളുടെ സ്ഥാനരോഹണം നിർവഹിച്ചു. പ്രസിഡന്‍റായി ഷിബു സി. നായർ, സെക്രട്ടറിയായി എൻ. ആനന്ദ്, ട്രഷററായി അനിൽ എസ്. കോയിക്കൽ, വൈസ് പ്രസിഡന്‍റുമാരായി നിവേദ് കെ. ശ്യാം, കിരണ്‍ ജോസ് എന്നിവർ സ്ഥാനമേറ്റു. സൈജൻ സ്റ്റീഫൻ, സി.സി. അനിൽകുമാർ, വിനോദ് കണ്ണോളിൽ, പി.വി. ഷാജു, എം.എൻ. സുരേഷ്, പി.എസ്. രാജേഷ്, ബാബു പള്ളിപ്പാട്ട് എന്നിവർ പ്രസംഗിച്ചു.

‘ഞങ്ങളും പച്ചക്കറി കൃഷിയിലേക്ക്’

കുമാരമംഗലം: കൃഷി വകുപ്പിന്‍റെ നേതൃത്വത്തിൽ ഞങ്ങളും കൃഷിയിലേക്ക് പദ്ധതിയുടെ ഭാഗമായി ജോയിന്‍റ് കൗണ്‍സിൽ തൊടുപുഴ മേഖല കമ്മിറ്റിയുടെ നേതൃത്വത്തിൽ കുമാരമംഗലം പഞ്ചായത്തിൽ പച്ചക്കറി കൃഷി ആരംഭിച്ചു. മുപ്പത് സെന്‍റ് സ്ഥലം പാട്ടത്തിനെടുത്താണ് ഹൈബ്രിഡ് പച്ചക്കറി തൈകളായ മുളക്, വെണ്ട, പീച്ചിങ്ങ, വഴുതന, തക്കാളി തുടങ്ങിയവ കൃഷി ചെയ്തിരിക്കുന്നത്. രാവിലെയും വൈകുന്നേരവും ഒഴിവുദിവസങ്ങളിലുമാണ് പ്രവർത്തകർ തൈകളെ പരിപാലിക്കാൻ സമയം കണ്ടെത്തുന്നത്. വിളവെടുക്കുന്ന പച്ചക്കറികൾ ഓണത്തോടനുബന്ധിച്ച് അനാഥാലയങ്ങൾക്ക് നൽകും. സംസ്ഥാന കമ്മിറ്റി അംഗം എസ്.കെ.എം. ബഷീർ ഉദ്ഘാടനം ചെയ്തു. മേഖല സെക്രട്ടറി മുഹമ്മദ് നിസാർ അധ്യക്ഷത വഹിച്ചു. ജില്ലാ സെക്രട്ടറി ആർ. ബിജുമോൻ, വി.കെ. ജിൻസ്, വി.എം. ഷൗക്കത്തലി, എ.കെ. സുഭാഷ്, എൻ.എസ്. ഇബ്രാഹിം, കെ.ആർ. ലോമിമോൾ, ബിജു ചന്ദ്രൻ, ബിനു വി. ജോസ്, സുരേഷ് കുമാർ, സി.ജി. അജീഷ, എം.എസ്. ശ്രീകുമാർ എന്നിവർ പ്രസംഗിച്ചു.

വിദ്യാമൃതം പദ്ധതിയുമായി ഉടുന്പന്നൂർ പഞ്ചായത്ത്

ഉടുന്പന്നൂർ: പഞ്ചായത്തിന്‍റെ നേതൃത്വത്തിൽ വിദ്യാഭ്യാസമേഖലയിൽ നടപ്പാക്കുന്ന "വിദ്യാമൃതം' പദ്ധതിക്കു തുടക്കമായി. ജില്ലാ വിദ്യാഭ്യാസ ഓഫീസർ ഷീബ മുഹമ്മദ് ഉദ്ഘാടനം ചെയ്തു. മനഃശാസ്ത്ര വിദ്യാഭ്യാസ പഠനസഹായ പദ്ധതി, കായികക്ഷമതാ പരിശീലനം, എൽഎസ്എസ് സ്കോളർഷിപ് പരിശീലനം, പ്രവൃത്തിപരിചയ, കരകൗശല പരിശീലനം, മാലിന്യനിർമാർജന പദ്ധതികൾ, മികവ് തെളിയിക്കുന്ന കുട്ടികളെ ആദരിക്കൽ, പഠനോപകരണ, സ്കോളർഷിപ് വിതരണം, കുടിവെള്ളവിതരണം തുടങ്ങി 49 ലക്ഷം രൂപയുടെ പദ്ധതികളാണ് ഉൾപ്പെടുന്നത്. പഞ്ചായത്ത് പ്രസിഡന്‍റ് എം. ലതീഷ് അധ്യക്ഷത വഹിച്ചു. വൈസ് പ്രസിഡന്‍റ് ആതിര രാമചന്ദ്രൻ, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ സുലൈഷ സലിം, ബീന രവീന്ദ്രൻ, ശാന്തമ്മ ജോയി, അംഗങ്ങളായ രമ്യ അജീഷ്, കെ.ആർ. ഗോപി, ബിന്ദു രവീന്ദ്രൻ, ശ്രീമോൾ ഷിജു, ഉല്ലാസക്കൂട് കമ്മിറ്റി പ്രസിഡന്‍റ് വി.വി. ഫിലിപ്പ്, ഹെഡ്മാസ്റ്റർ ബിജു ഐസക്ക് എന്നിവർ പ്രസംഗിച്ചു.

വളം വിലവർധന പിൻവലിക്കണം: കേരള കോൺഗ്രസ്

ചെറുതോണി: കാർഷിക മേഖലക്ക് പ്രതിസന്ധിയായി മാറിയ രാസവളം വില വർധന പിൻവലിക്കാൻ കേന്ദ്രസർക്കാർ തയാറാകണമെന്ന് കേരള കോൺഗ്രസ് മരിയാപുരം മണ്ഡലം നേതൃയോഗം ആവശ്യപ്പെട്ടു. 50 കിലോ പൊട്ടാഷിന് ജൂലൈ ഒന്നു മുതൽ 250 രൂപയാണ് വർധിപ്പിച്ചത്. ഫാക്ടം ഫോസിന് രണ്ടു മാസം മുമ്പ് 100 രൂപയും ഈ മാസം 25 രൂപയും ഉൾപ്പെടെ 125 രൂപയുടെ വർധനവാണുണ്ടായിട്ടുള്ളത്. പൊട്ടാഷിനുണ്ടായ വില വർധന പൊട്ടാഷ് ചേരുന്ന കൂട്ട് വളങ്ങൾക്കും വില വർധനക്ക് കാരണമായിരിക്കുന്നു. വിലവർധനവിനു പിന്നാലെ വളത്തിന്‍റെ ലഭ്യതയും കുറഞ്ഞിരിക്കുകയാണ്. ഇതോടെ കർഷകർ ഏറെ ബുദ്ധിമുട്ടുകയാണെന്ന് യോഗം ചൂണ്ടിക്കാട്ടി. ചെറുതോണി ഓഫീസിൽ കൂടിയ യോഗത്തിൽ മണ്ഡലം പ്രസിഡന്‍റ് സണ്ണി പുൽക്കുന്നേൽ അധ്യക്ഷത വഹിച്ചു. കേരള കർഷക യൂണിയൻ സംസ്ഥാന പ്രസിഡന്‍റ് വർഗീസ് വെട്ടിയാങ്കൽ, കേരള കോൺഗ്രസ് നിയോജകമണ്ഡലം വൈസ് പ്രസിഡന്‍റ് ലാലു ജോൺ കുമ്മിണിയിൽ, നിയോജകമണ്ഡലം ജനറൽ സെക്രട്ടറി ടോമി ജോസഫ് തൈലംമനാൽ, പഞ്ചായത്ത് വൈസ് പ്രസിഡന്‍റ് ബിൻസി റോബി, പഞ്ചായത്തംഗം പ്രിജിനി ടോമി, വനിതാ കോൺഗ്രസ് ജില്ലാ സെക്രട്ടറി ജോളി ജോയി തുടങ്ങിയവർ പ്രസംഗിച്ചു.

റബർമരം ഒടിഞ്ഞുവീണ് ‌സ്കൂട്ടർയാത്രികന് ദാരുണാന്ത്യം

കരിമണ്ണൂർ: മരം ഒടിഞ്ഞുവീണ് സ്കൂട്ടർ യാത്രികൻ മരിച്ചു. കരിമണ്ണൂർ വാരാംപാറ ഇടവക്കണ്ടത്തിൽ ദേവസ്യ വർക്കി (ബേബി -63) യാണ് മരിച്ചത്. ഇന്നലെ രാത്രി രാത്രി ഏഴോടെ മാരാംപാറ കമ്പിപ്പാലത്തിനു സമീപമാണ് സംഭവം. പെയിന്‍റിംഗ് തൊഴിലാളിയായ ദേവസ്യ വൈകുന്നേരം കമ്പിപ്പാലത്തെ കടയിൽനിന്ന് സാധനങ്ങൾ വാങ്ങി സ്കൂട്ടറിൽ വീട്ടിലേക്കു പോകുമ്പോൾ വഴിയരുകിൽ നിന്ന റബർമരം ഒടിഞ്ഞ് സ്കൂട്ടറിൽ പതിക്കുകയായിരുന്നു. സ്കൂട്ടർ നിയന്ത്രണംവിട്ട് ദേവസ്യ റോഡിൽ തലയടിച്ചു വീണു. മൃതദേഹം റോഡിൽ കമിഴ്ന്നു കിടന്ന നിലയിലാണ് ആളുകൾ കണ്ടത്. സ്കൂട്ടർ അടുത്ത പാടത്ത് മറിഞ്ഞുകിടക്കുന്ന നിലയിലും റോഡിൽ രക്തം തളംകെട്ടിയ നിലയിലുമായിരുന്നു. കരിമണ്ണൂർ പോലീസ് തൊടുപുഴയിലെ ജില്ലാ ആശുപത്രിയിൽ മൃതദേഹം എത്തിച്ചു. ഭാര്യ: ലിസി (മേരി). മക്കൾ: ലിബി, ലിജി.

സിപിഐ ജില്ലാ സമ്മേളനം 17 മുതൽ കട്ടപ്പനയിൽ

തൊടുപുഴ: സിപിഐ ജില്ലാ സമ്മേളനം 17 മുതൽ 20 വരെ കട്ടപ്പന മുനിസിപ്പൽ ടൗണ്‍ഹാളിൽ നടക്കുമെന്ന് സിപിഐ ജില്ലാ സെക്രട്ടറി കെ. സലിംകുമാർ പത്രസമ്മേളനത്തിൽ അറിയിച്ചു. ചണ്ഡീഗഡിൽ നടക്കുന്ന 25-ാം പാർട്ടി കോണ്‍ഗ്രസിന്‍റെ മുന്നോടിയായി നടക്കുന്ന സമ്മേളനം രാജ്യത്തെ രാഷ്ട്രീയ സാഹചര്യങ്ങളും ജില്ലയിലെ ജനങ്ങൾ നേരിടുന്ന ജീവിതപ്രശ്നങ്ങളും ചർച്ച ചെയ്യും. 17നു വാഴൂർ സോമൻ എംഎൽഎ പതാകജാഥയും വി.ആർ. പ്രമോദ് ബാനർ ജാഥയും ജോസ് ഫിലിപ്പ് കൊടിമര ജാഥയും എം.വൈ.ഒൗസേപ്പ് ഛായാചിത്രജാഥയും പ്രിൻസ് മാത്യു ദീപശിഖ ജാഥയും ഉദ്ഘാടനം ചെയ്യും. വൈകുന്നേരം നാലിന് ജാഥകൾ സമ്മേളന നഗറിൽ സംഗമിക്കും. സി.കെ. കൃഷ്ണൻകുട്ടി വൈകുന്നേരം 4.30നു പതാക ഉയർത്തും. അഞ്ചിനു നടക്കുന്ന സമ്മേളനത്തിൽ ജില്ലാ സെക്രട്ടറി കെ. സലിംകുമാർ അധ്യക്ഷത വഹിക്കും. മന്ത്രി കെ. രാജൻ ഉദ്ഘാടനം ചെയ്യും. 18നു കെ.കെ. ശിവരാമൻ പതാക ഉയർത്തും. പത്തിനു പ്രതിനിധി സമ്മേളനം നടക്കും. കെ.പി. രാജേന്ദ്രൻ ഉദ്ഘാടനം ചെയ്യും. വൈകുന്നേരം മൂന്നിന് ഇന്ത്യൻ സ്വാതന്ത്ര്യസമരവും രാഷ്ട്രീയ പാർട്ടികളും എന്ന വിഷയത്തിൽ സെമിനാർ നടക്കും. പി.പി. സുനീർ എംപി ഉദ്ഘാടനം ചെയ്യും. മന്ത്രി പി. പ്രസാദ് വിഷയാവതരണം നടത്തും. കെപിസിസി വക്താവ് സേനാപതി വേണു, കെ.എസ്. അരുണ്‍കുമാർ എന്നിവർ പ്രസംഗിക്കും. 1 9നു ഉച്ചയ്ക്ക് 12ന് ആദ്യകാല പാർട്ടിപ്രവർത്തകരെ സത്യൻ മൊകേരി ആദരിക്കും. 20ന് രാവിലെ 9.30നു പ്രമേയ അവതരണം നടക്കും. 10.30നു മന്ത്രി പി. പ്രസാദ് പ്രസംഗിക്കും. 12നു സംസ്ഥാന സമ്മേളന പ്രതിനിധികളെയും ജില്ലാ കൗണ്‍സിൽ അംഗങ്ങളെയും തെരഞ്ഞെടുക്കും. പത്രസമ്മേളനത്തിൽ മുൻ ജില്ലാ സെക്രട്ടറി കെ.കെ. ശിവരാമൻ, തൊടുപുഴ മണ്ഡലം സെക്രട്ടറി വി.ആർ. പ്രമോദ്, മൂലമറ്റം മണ്ഡലം സെക്രട്ടറി സുനിൽ സെബാസ്റ്റ്യൻ തുടങ്ങിയവർ പങ്കെടുത്തു.

വാത്തിക്കുടി പഞ്ചായത്ത് ഓഫീസിലേക്ക് എൽഡിഎഫ് മാർച്ചും ധർണയും

ചെറുതോണി: വാത്തിക്കുടി പഞ്ചായത്തിൽ ഭരണസമിതിയുടെ നേതൃത്യത്തിൽ മാല്യന്യപ്പെട്ടി സ്ഥാപിച്ചതിൽ അഴിമതി നടത്തിയ പഞ്ചായത്ത് പ്രസിഡന്‍റ് ജോസ്മി ജോർജ് രാജിവച്ച് നിയമപരമായ അന്വേഷണം നേരിടണമെന്നാവശ്യപ്പെട്ട് എൽഡിഎഫ് വാത്തിക്കുടി പഞ്ചായത്ത് കമ്മിറ്റിയുടെ നേതൃത്വത്തിൽ പഞ്ചായത്താഫീസിലേക്ക് മാർച്ചും ധർണയും നടത്തി. മുരിക്കാശേരി സ്കൂൾ ജംഗ്ഷനിൽനിന്ന് ആരംഭിച്ച മാർച്ചിൽ നിരവധി പേർ പങ്കെടുത്തു. തുടർന്ന് മുരിക്കാശേരി പഞ്ചായത്ത് ഓഫീസ് പടിക്കൽ നടത്തിയ ധർണ സിപിഎം ജില്ലാ സെക്രട്ടറി സി.വി. വർഗീസ് ഉദ്ഘാടനം ചെയ്തു. കേരള കോൺഗ്രസ് (എം) മണ്ഡലം പ്രസഡിന്‍റ് ബേബി കാഞ്ഞിരത്താംകുന്നേൽ അധ്യക്ഷത വഹിച്ചു. ജില്ലാ സെക്രട്ടറി ഷിജോ തടത്തിൻ, സിപിഎം ജില്ലാ സെക്രട്ടേറിയറ്റംഗം റോമിയോ സെബാസ്റ്റ്യൻ, സിപിഐ ജില്ലാ എക്സിക്യൂട്ടീവ് അംഗം അപ്പച്ചൻ കടവിൽ, ഇ.എൻ. ചന്ദ്രൻ, കെ.യു. ബിനു, ജോമോൻ ജേക്കബ്, ജോർജ് അമ്പഴം, ഷൈൻ കല്ലേക്കുളം, റോണിയോ ഏബ്രാഹം, ബിജു മറ്റത്തിൽ തുടങ്ങിയവർ പ്രസംഗിച്ചു. മാലിന്യനിർമാർജനത്തിനായി സംസ്ഥാന സർക്കാർ അനുവദിച്ച 40 ലക്ഷം രൂപ നിയമാനുസൃതമായ മാനദണ്ഡങ്ങൾ പാലിക്കാതെ പഞ്ചായത്ത് ജനറൽ കമ്മിറ്റി, ധനകാര്യ സ്റ്റാന്റിംഗ് കമ്മിറ്റി, പർച്ചെയ്സ് കമ്മിറ്റി എന്നിവയുടെ തീരുമാനം ഇല്ലാതെയും ഗുണ- വിലനിലവാരം പരിശോധിക്കാതെയും വാങ്ങിയാണ് അഴിമതി നടത്തിയിരിക്കുന്നതെന്ന് നേതാക്കൾ ആരോപിച്ചു. പൊതുവിപണിയിൽ 1550 രൂപ മുതൽ 2850 രൂപ വരെ വിലവരുന്ന 4.100 കിലോഗ്രാം തൂക്കം വരുന്ന സ്റ്റീൽ വേസ്റ്റ് ബിന്നുകൾ 11694 രൂപ വീതം നൽകി 340 എണ്ണം വാങ്ങി. 3976086 രൂപയാണ് ഇതിനായ് പഞ്ചായത്ത് ഭരണസമിതി ചെലവഴിച്ചിരിക്കുന്നത്. നൂറിൽ താഴെ മാത്രം മാലിന്യപ്പെട്ടികൾ ആവിശ്യമുള്ളുവെന്നിരിക്കെ 340 എണ്ണം വാങ്ങിയതിലൂടെ 30 ലക്ഷം രൂപയുടെ വ്യക്തമായ അഴിമതിയാണ് നടന്നിട്ടുള്ളതെന്ന് നേതാക്കൾ ആരോപിച്ചു.

ചിന്നാർ വന്യജീവി സങ്കേതത്തിൽ പുനർജീവനം കൃഷിക്ക് തുടക്കം

മറയൂർ: മൂന്നാർ വൈൽഡ് ലൈഫ് ഡിവിഷനിലെ ചിന്നാർ വന്യജീവി സങ്കേതത്തിൽ ഉൾപ്പെട്ട തായണ്ണൻകുടി, ഇരുട്ടളക്കുടി, പുതുക്കുടി, വെള്ളക്കൽക്കുടി, മാങ്ങാപ്പാറക്കുടി എന്നീ അഞ്ച് ഉന്നതികളിൽ ആനമുടി വന വികസന ഏജൻസിയുടെ ധനസഹായത്തോടെ പുനർജീവനം കൃഷി പദ്ധതിക്കു തുടക്കമായി. ഓരോ ഉന്നതിയിലും ഒരേക്കർ വീതം ഭൂമിയിൽ റാഗി, തിന, ചാമ, വരക്, ബീൻസ് തുടങ്ങിയ 33 ഇനം വിളകളാണ് ജൈവരീതിയിൽ കൃഷി ചെയ്യുന്നത്. ജൂലൈയിൽ തുടങ്ങുന്ന കൃഷി ഒക്ടോബറിൽ വിളവെടുക്കും. ബീൻസ് കൃഷി ഡിസംബറിൽ ആരംഭിച്ച് ഫെബ്രുവരിയിൽ വിളവെടുക്കും. ആനമുടി വനവികസന ഏജൻസി, ഇഡിസി വഴി ഉന്നതി നിവാസികളുടെ ഭൂമി പാട്ടത്തിനെടുത്ത് അവർക്ക് തൊഴിൽ നൽകിയാണ് പദ്ധതി നടപ്പാക്കുന്നത്. ഉത്പാദിപ്പിക്കുന്ന ധാന്യങ്ങൾ നിവാസികൾക്കു ഭക്ഷണത്തിനും വിത്തുശേഖരണത്തിനും സൗജന്യമായി നൽകും. റാഗി, മറ്റു ധാന്യങ്ങൾ എന്നിവ പൊടിച്ച് വനം വകുപ്പിന്‍റെ ഇക്കോ ഷോപ്പുകൾ വഴി വിൽപ്പനയ്ക്ക് എത്തിക്കും. റാഗി ഉപയോഗിച്ചുണ്ടാക്കുന്ന ലഡു ഉൾപ്പെടെയുള്ള ഉത്പന്നങ്ങൾക്കു വിപണിയിൽ വൻ ഡിമാൻഡാണ്. കഴിഞ്ഞ വന്യജീവി വാരാഘോഷത്തിൽ തിരുവനന്തപുരത്ത് നടന്ന വനം വകുപ്പിന്‍റെ പ്രദർശന-വിപണന മേളയിൽ മൂന്നാർ വൈൽഡ് ലൈഫ് ഡിവിഷന്‍റെ സ്റ്റാളിലെ റാഗി ലഡുവും പൊടിയും വലിയ ശ്രദ്ധ നേടി. മറ്റു മേളകളിലും ഈ ഉത്പന്നങ്ങൾ ജനപ്രീതി ആകർഷിച്ചിട്ടുണ്ട്. ഈ പദ്ധതി ഉന്നതി നിവാസികൾക്ക് സാന്പത്തിക പുരോഗതിയും ഭക്ഷ്യലഭ്യതയും ഉറപ്പാക്കുന്നുവെന്ന് ഉൗരു മൂപ്പന്മാരായ കാന്തിരാജും സൂര്യനും പറഞ്ഞു. റാഗിത്തൈ നടീൽ ഉദ്ഘാടനം ചിന്നാർ അസി. വൈൽഡ് ലൈഫ് വാർഡൻ ജി. അജികുമാർ നിർവഹിച്ചു. കരിമുട്ടി ഡെപ്യൂട്ടി റേഞ്ച് ഫോറസ്റ്റ് ഓഫീസർ കെ.ബി. അശോകൻ, ഇഡിസി സെക്രട്ടറിമാരായ നിത്യ ധർമൻ, ഡിനോ ജോസഫ്, സോഷ്യൽ വർക്കർ മിനി കാശി, വനം വകുപ്പ് ഉദ്യോഗസ്ഥർ, ഉന്നതി നിവാസികൾ എന്നിവർ പങ്കെടുത്തു.

എസ്ടി ഫണ്ട് ദുർവിനിയോഗം അന്വേഷിക്കണമെന്ന് ഫ്രാൻസിസ് അറയ്ക്കപ്പറമ്പിൽ

കട്ടപ്പന: എസ്ടി ഫണ്ട് ദുര്‍വിനിയോഗം ചെയ്ത് ഉപ്പുതറ പഞ്ചായത്ത് പ്രസിഡന്‍റ് സ്വന്തം വീട്ടിലേക്ക് റോഡ് നിര്‍മിച്ചതായും ഇതുസംബന്ധിച്ച് അന്വേഷണം നടത്തണമെന്നും യൂത്ത് കോണ്‍ഗ്രസ് ജില്ലാ പ്രസിഡന്‍റും ഉപ്പുതറ പഞ്ചായത്തംഗവുമായ ഫ്രാന്‍സിസ് അറയ്ക്കപ്പറമ്പില്‍. ക്രമക്കേടിന് കൂട്ടുനിന്ന ഉദ്യോഗസ്ഥര്‍ക്കെതിരേ നടപടി സ്വീകരിക്കണം. കരിഞ്ഞാറ്റില്‍പ്പടി- കാരിയാടിപ്പടി റോഡിന്‍റെ പേരിലാണ് ബ്ലോക്ക് പഞ്ചായത്തില്‍നിന്ന് അനുവദിച്ച നാലു ലക്ഷം രൂപ വിനിയോഗിച്ച് റോഡ് നിര്‍മിച്ചത്. ഈ റോഡ് പഞ്ചായത്ത് കമ്മിറ്റിയുടെ തീരുമാനമില്ലാതെ ആസ്തി രജിസ്റ്ററില്‍ ഉള്‍പ്പെടുത്തി. എസ്ടി ഫണ്ട് വിനിയോഗിക്കണമെങ്കില്‍ ട്രൈബല്‍ ഡെവലപ്‌മെന്‍റ് ഓഫീസറുടെ ഫീസിബിലിറ്റി സര്‍ട്ടിഫിക്കറ്റ് അനിവാര്യമാണ്. കൂടാതെ, റോഡിന്‍റെ ഇരുവശങ്ങളിലുമായി പട്ടികവര്‍ഗ വിഭാഗത്തില്‍പ്പെട്ട അഞ്ചു കുടുംബങ്ങളെങ്കിലും താമസിക്കണം. എന്നാല്‍, പഞ്ചായത്ത് പ്രസിഡന്‍റ് മാത്രം ഗുണഭോക്താവായ റോഡിന് എങ്ങനെ ഫീസിബിലിറ്റി സര്‍ട്ടിഫിക്കറ്റ് ലഭിച്ചുവെന്ന് അന്വേഷിക്കണം. ഇക്കാര്യങ്ങള്‍ കാട്ടി വകുപ്പ് മന്ത്രിക്കു പരാതി നല്‍കും. പഞ്ചായത്തില്‍ പ്രസിഡന്‍റിന്‍റെ നേതൃത്വത്തില്‍ നിരവധി അഴിമതികളും അധികാര ദുര്‍വിനിയോഗവും നടന്നിട്ടുണ്ടെന്നും ഫ്രാന്‍സിസ് അറയ്ക്കപ്പറമ്പില്‍ ആരോപിച്ചു. ഇതു ചോദ്യം ചെയ്തതിന് തനിക്കെതിരേ അടിസ്ഥാനരഹിതമായ ആരോപണം ഉന്നയിക്കുകയാണെന്നും ഫ്രാൻസിസ് ആരോപിച്ചു.

പൊതു ഉപയോഗത്തിനുള്ള ഭൂമി ഡി-റിസർവ് ചെയ്ത് വനഭൂമിയിൽനിന്ന് ഒഴിവാക്കണം: ബിജോ മാണി

കട്ടപ്പന: പൊതു ആവശ്യങ്ങൾക്ക് ഉപയോഗിക്കുന്ന ഭൂമിയിലും വ്യക്തികൾക്ക് പതിച്ച് നൽകിയ ഭൂമിയിലും വനംവകുപ്പ് ഉന്നയിക്കുന്ന അവകാശവാദം അവസാനിപ്പിക്കാൻ ഈ ഭൂമി ഡി - റിസർവ് ചെയ്യാൻ സർക്കാർ അടിയന്തര നടപടി സ്വീകരിക്കണമെന്ന് ഡിസിസി ജനറൽ സെക്രട്ടറി ബിജോ മാണി ആവശ്യപ്പെട്ടു. വിവരാവകാശ നിയമം അനുസരിച്ച് ലഭിച്ച രേഖകൾ പ്രകാരം റവന്യു വകുപ്പ് പറയുന്നത് ഡി - റിസർവ് ചെയ്യാൻ നടപടി സ്വീകരിക്കേണ്ടത് വനം വകുപ്പാണെന്നാണ്. വനം വകുപ്പ് പറയുന്നത് ഭൂമി ഡി - റിസർവ് ചെയ്യുന്നതിന് യൂസർ ഏജൻസിയായ ജില്ലാകളക്ടർ പരിവേഷ് പോർട്ടൽ മുഖേന അപേക്ഷ സമർപ്പിക്കുന്ന മുറയ്ക്കാണ് നടപടി സ്വീകരിക്കുന്നതെന്നാണ്. എന്നാൽ,ഡി - റിസർവിന്‍റെ വിവരങ്ങൾ കളക്‌ടറേറ്റിൽ ലഭ്യമല്ലന്നും ഇത് വനം വകുപ്പുമായി ബന്ധപ്പെട്ടതാണെന്നും ജില്ലാ കളക്ടർ പറയുന്നു. നേര്യമംഗലത്ത് ദേശീയപാത വികസനത്തിനുള്ള ഭൂമി മലയാറ്റൂർ ഇടിയറ റിസർവുകളിൽ ഉൾപ്പെട്ടതാണെങ്കിൽ ഡി - നോട്ടീഫൈ ചെയ്യാൻ നടപടി സ്വീകരിക്കുമെന്ന് ചീഫ് സെക്രട്ടറി പറഞ്ഞിട്ടും ഇതിനുള്ള നടപടി സ്വീകരിച്ചിട്ടില്ല. സർക്കാർ ഈ വിഷയത്തിൽ അടിയന്തരമായി ഇടപെടണം. പഴയ സംരക്ഷിത വനങ്ങളുടെ പട്ടികയിലുള്ള ജില്ലയിലെ പട്ടയ/ കൈവശഭൂമികളും വിവിധ വികസന പദ്ധതികൾക്കായി സർക്കാർ ഏറ്റെടുത്തിട്ടുള്ള ഭൂമിയും ഡി- റിസർവ് ചെയ്ത് സംരക്ഷിത വനത്തിന്‍റെ പട്ടികയിൽനിന്ന് ഒഴിവാക്കി വനം വകുപ്പിന്‍റെ കടന്നുകയറ്റത്തിൽനിന്ന് മലയോരജനതയെ സംരക്ഷിക്കണം. ജില്ലയിലെ പട്ടയ / കൈവശ ഭൂമികളെല്ലാം സംരക്ഷിത വനത്തിന്‍റെ വിജ്ഞാപനത്തിൽ ഇപ്പോഴും ഉൾപ്പെട്ടു കിടക്കുകയാണ്. ഏതെങ്കിലും കാലത്തെ വിജ്ഞാപനങ്ങളുടെ പേരിൽ എല്ലാ ഭൂമിയിലും വനം വകുപ്പ് അവകാശം സ്ഥാപിക്കാൻ ശ്രമിക്കുന്നതാണ് ജില്ലയിലെ വികസന പദ്ധതികൾ തടസപ്പെടാനും ഭൂ പ്രശ്നങ്ങളിൽ പരിസ്ഥിതി സംഘടനകൾക്ക് അനുകൂലമായ കോടതി വിധികൾ ഉണ്ടാകാനും കാരണം. നേര്യമംഗലത്ത് ദേശീയപാത വികസനം തടസപ്പെടുത്തിയതും തൊമ്മൻകുത്തിൽ കൈവശ ഭൂമിയിലെ കുരിശ് പൊളിച്ചതും സിഎച്ച്ആറിലെ പട്ടയ വിതരണം സുപ്രീംകോടതി തടഞ്ഞതും ഏതോ കാലത്തെ സംരക്ഷിത വന വിജ്ഞാപനങ്ങളിൽ ഉൾപ്പെട്ട ഭൂമിയാണ് ഇവ എന്ന വനം വകുപ്പിന്‍റെ അവകാശവാദത്തിന്‍റെ പേരിലാണ്. കാർഡമം ഹിൽ, മലയാറ്റൂർ ഇടിയറ, തൊടുപുഴ, തെങ്കോത്തുമല, മൂളിമല, കുര്യൻകുന്ന്, അയ്യപ്പൻകോവിൽ, നഗരംപാറ എന്നീ റിസർവുകളിൽ ഉൾപ്പെട്ട ഭൂമിക്കാണ് ജില്ലയിൽ വിവിധ ഭൂപതിവ് നിയമപ്രകാരം പട്ടയം നൽകിയിട്ടുള്ളത്. ഇതിൽ സിഎച്ച്ആറിൽ ഉൾപ്പെട്ട 20363.159 ഹെക്ടർ ഭൂമിക്ക് പട്ടയം നൽകാൻ 2009ൽ സുപ്രീംകോടതി അനുമതി നൽകിയതാണ്. ഈ ഭൂമി പോലും ഇതുവരെ ഡി - റിസർവ് ചെയ്തിട്ടില്ല. സംരക്ഷിത വനത്തിന്‍റെ പട്ടികയിലുള്ളതും എന്നാൽ, റവന്യു വകുപ്പ് പട്ടയം നൽകിയിട്ടുള്ളതുമായ ഭൂമികളൊന്നും ഡി - റിസർവ് ചെയ്തിട്ടില്ല. കൂടാതെ കൊച്ചി - ധനുഷ്കോടി ദേശീയപാതയ്ക്ക് അനുവദിച്ച ഭൂമിയും റവന്യു വകുപ്പ് ജില്ലാ പഞ്ചായത്തിന് കൈമാറി ഇടുക്കി വികസന അഥോറിറ്റിക്ക് അനുവദിച്ച ഭൂമിയും ഈ സംരക്ഷിത വനങ്ങളിൽ ഉൾപ്പെട്ടതാണ്. ഈ ഭൂമിയും നാളിതുവരെ ഡി - റിസർവ് ( ഡി നോട്ടീഫൈ ) ചെയ്തിട്ടില്ല. ഡി - റിസർവ് ചെയ്യാനുള്ള നടപടി സ്വീകരിക്കാത്തത് റവന്യു- വനം വകുപ്പുകൾ പരസ്പരം പഴിചാരി ജനങ്ങളെ കുടുക്കി ഇടാനാണെന്നും ബിജോ മാണി ആരോപിച്ചു. പത്രസമ്മേളനത്തിൽ ഡിസിസി വൈസ്പ്രസിഡന്‍റ് മുകേഷ് മോഹൻ, യൂത്ത് കോണ്‍ഗ്രസ് ജില്ലാ പ്രസിഡന്‍റ് ഫ്രാൻസിസ് ദേവസ്യ, കോണ്‍ഗ്രസ് കട്ടപ്പന മണ്ഡലം പ്രസിഡന്‍റ് സിജു ചക്കുംമൂട്ടിൽ, യൂത്ത് കോണ്‍ഗ്രസ് ഉടുന്പഞ്ചോല നിയോജകമണ്ഡലം പ്രസിഡന്‍റ് ആനന്ദ് തോമസ് എന്നിവരും പങ്കെടുത്തു.

ലോറിഡ്രൈവർക്കു മർദനം: അഞ്ചുപേർ റിമാൻഡിൽ

ശാന്തൻപാറ: ലോറി ഡ്രൈവർക്കു മർദനമേറ്റ സംഭവത്തിൽ അഞ്ചു പേർ അറസ്റ്റിൽ. പെരിയകനാൽ തേയില ഫാക്ടറിയിൽ വിറകുമായി എത്തിയ ലോറി ഡ്രൈവർ അടിമാലി പ്രിയദർശനി കോളനി ചേന്നാട്ട് വീട്ടിൽ സുമേഷിനെ(25) മർദിച്ച കേസിലാണ് പെരിയകനാൽ എസ്റ്റേറ്റ് സെൻട്രൽ ഡിവിഷൻ മുരുകപാണ്ടി (40), മുകേഷ് കുമാർ (25), മണികണ്ഠൻ (കരിമണി -33), പാണ്ടീശ്വരൻ (31), ലോവർ ഡിവിഷൻ നന്ദകുമാർ (നന്ദ-25) എന്നിവരെ വിവിധ സ്ഥലങ്ങളിൽനിന്നായി ശാന്തൻപാറ പോലീസ് പിടികൂടിയത്. കഴിഞ്ഞ ശനിയാഴ്ച വൈകുന്നേരമാണ് കേസിനാസ്പദമായ സംഭവം. ലോഡ് ഇറക്കുന്നതിനായി ലോറി മാറ്റിയിടുന്നതിനെച്ചൊല്ലി ഉണ്ടായ തർക്കത്തെത്തുടർന്ന് യൂണിയൻ തൊഴിലാളികൾ ചേർന്നു ലോറി ഡ്രൈവറെ മർദിച്ച് അവശനാക്കുകയായിരുന്നു. ലോറി ഡ്രൈവറുടെ പരാതിയിൽ കേസെടുത്ത ശാന്തൻപാറ പോലീസ്, സംഭവത്തിനുശേഷം ഒളിവിൽ പോയ പ്രതികളെ അറസ്റ്റ് ചെയ്യുകയായിരുന്നു. ശാന്തൻപാറ സിഐ എസ്. ശരലാൽ, ഗ്രേഡ് എസ്ഐ റെജി ജോസഫ്, സിവിൽ പോലീസ് ഓഫീസർമാരായ ആർ. രമേഷ്, വി. ജയകൃഷ്ണൻ, വിൻസന്‍റ്, ജിനോ ജോർജ് എന്നിവരടങ്ങിയ സംഘമാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

തേക്കടി റോട്ടറി ക്ലബ് മൂന്ന് ഇലക്‌ട്രിക് ബസുകള്‍ നല്‍കും

കുമളി: റോട്ടറി ക്ലബ് ഓഫ് തേക്കടിയുടെ ഈ വര്‍ഷത്തെ സേവന പദ്ധതികളുടെ ഭാഗമായി തേക്കടിയില്‍ എത്തുന്ന സഞ്ചാരികള്‍ക്ക് യാത്രയ്ക്കായി മൂന്ന് ഇലക്‌ട്രിക് ബസുകള്‍ നല്‍കും. തേക്കടി ആനവച്ചാലിലെ വനംവകുപ്പിന്‍റെ പാര്‍ക്കിംഗ് ഗ്രൗണ്ടില്‍നിന്നു സഞ്ചാരികളെ തേക്കടി ബോട്ട് ലാൻഡിംഗില്‍ എത്തിക്കാനാണ് ബസുകള്‍ ഉപയാഗിക്കുന്നത്. റോട്ടറി ഫൗണ്ടേഷന്‍റെ സഹായത്തോടെ ഒന്നരക്കോടി രൂപ ചെലവുവരുന്ന പദ്ധതിയാണ് തയാറാക്കിയിരിക്കുന്നത്. കുമളി കാര്‍ഡ് ബി നെസ്റ്റ് ഹാളില്‍ റോട്ടറി ക്ലബ് ഓഫ് തേക്കടിയുടെ പുതിയ ഭാരവാഹികളുടെ സ്ഥാനാരോഹണം നടന്നു. നിയുക്ത റോട്ടറി ഡിസ്ട്രിക്‌ട് ഗവര്‍ണര്‍ ജോഷി ചാക്കോ നേതൃത്വം നല്‍കി. റോട്ടറി ക്ലബ്ബിന്‍റെ ഈ വര്‍ഷത്തെ ഭരവാഹികളായി ഡോ. ബോബി ഏബ്രഹാം-പ്രസിഡന്‍റ്, തോമസ് മാത്യു-ജനറല്‍ സെക്രട്ടറി, സുബാഷ്-ട്രഷറര്‍, എം.കെ. ദിലീപ്-ജോയിന്‍റ് സെക്രട്ടറി എന്നിവരും പന്ത്രണ്ട് അംഗ ഡയറക്ടര്‍ ബോര്‍ഡും ചുമതലയേറ്റു.

വൈദ്യുതിലൈനിൽനിന്ന് ഷോക്കേറ്റ് വീട്ടമ്മ മരിച്ചു

അടിമാലി: അടിമാലി കല്ലാറിൽ വൈദ്യുതി ലൈനിൽനിന്ന് ഷോക്കേറ്റ് വീട്ടമ്മ മരിച്ചു. കല്ലാർ തോട്ടുങ്കൽ സണ്ണിയുടെ ഭാര്യ ബിന്ദു (48) ആണ് മരിച്ചത്. ചക്ക ഇടുന്നതിനിടയിൽ ഇരുമ്പുതോട്ടി വൈദ്യുതിലൈനിൽ തട്ടി ഷോക്കേൽക്കുകയായിരുന്നു. ഇന്നലെ വൈകുന്നേരമായിരുന്നു സംഭവം. പോലീസ് സ്ഥലത്തെത്തി തുടർനടപടികൾ സ്വീകരിച്ചും. മൃതദേഹം ആശുപത്രിയിലേക്കു മാറ്റി.

വാന്‍ നിയന്ത്രണംവിട്ടു മറിഞ്ഞു

കുടയത്തൂര്‍: തൊടുപുഴ-പുളിയന്‍മല സംസ്ഥാന പാതയില്‍ ശരംകുത്തിക്കു സമീപം വാന്‍ നിയന്ത്രണംവിട്ടു മറിഞ്ഞ് അഞ്ചു പേര്‍ക്ക് പരിക്കേറ്റു. ഇന്നലെ വൈകുന്നേരം 5.45ഓടെയായിരുന്നു അപകടം. വാഗമണ്‍ സന്ദര്‍ശിക്കാന്‍ പോയ പെരുമ്പാവൂര്‍ സ്വദേശികളാണ് വാനില്‍ ഉണ്ടായിരുന്നത്. റോഡില്‍നിന്നു തെന്നിമാറി താഴ്ചയിലേക്ക് വാഹനത്തിന്‍റെ മുന്‍ഭാഗം പതിക്കുകയായിരുന്നു. വാന്‍ പൂര്‍ണമായും താഴ്ചയിലേക്കു മറിയാതിരുന്നതിനാല്‍ വലിയ അപകടം ഒഴിവായി. പരിക്കേറ്റവരെ തൊടുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു.

റോഡ് മുറിച്ചുകടക്കുന്നതിനിടെ കാർ ഇടിച്ച് വയോധികന് പരിക്കേറ്റു

വണ്ടിപ്പെരിയാർ: റോഡ് മുറിച്ചുകടക്കുന്നതിനിടെ കാർ ഇടിച്ച് വയോധികന് പരിക്കേറ്റു. ഏലപ്പാറ കോഴിക്കാനം സ്വദേശി വർഗീസി (71)നാണ് പരിക്കേറ്റത്. ശനിയാഴ്ച രാത്രി 12ഓടെയാണ് അപകടമുണ്ടായത്. കോഴിക്കാനം സ്വദേശികളായ ഒരു കുടുംബത്തിലെ അഞ്ചുപേർ കുമളിയിൽനിന്ന് ഓട്ടോറിക്ഷയിൽ കോഴിക്കാനത്തേക്ക് പോകുന്നതിനിടെ വണ്ടിപ്പെരിയാർ കക്കി കവലയ്ക്കു സമീപം തട്ടുകടയിൽ ഭക്ഷണം കഴിക്കുന്നതിനായി ഇറങ്ങിയപ്പോഴാണ് അപകടമുണ്ടായത്. റോഡു മുറിച്ചുകടന്ന വർഗീസിനെ വണ്ടിപ്പെരിയാറിൽനിന്നു കുമളിയിലേക്ക് പോവുകയായിരുന്ന എർട്ടിഗ കാർ ഇടിക്കുകയായിരുന്നു. തലയ്ക്കും കൈക്കും കാലിനും ഗുരുതരമായി പരിക്കേറ്റ വർഗീസിനെ നാട്ടുകാർ സഹകരണ ആശുപത്രിയിൽ പ്രവേശിപ്പിച്ചു. വിദഗ്ധ ചികിത്സയ്ക്കായി തുടർന്ന് കോട്ടയം മെഡിക്കൽ കോളജ് ആശുപത്രിയിലേക്കു മാറ്റി. വണ്ടിപ്പെരിയാർ പോലീസ് കേസെടുത്തു.

കെട്ടിട നിര്‍മാണ സാമഗ്രികള്‍ മോഷ്ടിച്ച നാലു പേര്‍ പിടിയിൽ

കട്ടപ്പന: പുതിയ ബസ് സ്റ്റാന്‍ഡിനു സമീപം നിര്‍മാണത്തിലിരുന്ന കെട്ടിടത്തില്‍നിന്ന് നിര്‍മാണ സാമഗ്രഹികള്‍ മോഷ്ടിച്ച സംഭവത്തില്‍ നാലു പേരെ കട്ടപ്പന പോലീസ് അറസ്റ്റ് ചെയ്തു. ശനിയാഴ്ച ഉച്ചയോടെയാണ് നിര്‍മാണത്തിലിരുന്ന കെട്ടിടത്തില്‍നിന്ന് ആറ് ഇരുമ്പ് ജനല്‍പാളികള്‍ മോഷ്ടിച്ചു കടത്തിയത്. കട്ടപ്പന കുന്തളംപാറ സ്വദേശി സുനില്‍ തങ്കച്ചന്‍, തങ്കമണി നീലിവയല്‍ സ്വദേശി വിപിന്‍ വിജയന്‍, വെട്ടിക്കുഴക്കവല സ്വദേശി റിനു റെജി, ആക്രിക്കട ഉടമയായ സ്‌കറിയ ജോസഫ് എന്നിവരെയാണ് അറസ്റ്റ് ചെയ്തത്.പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു. സാധനസാമഗ്രികള്‍ കാണാതായതോടെ സിസിടിവിയില്‍ കെട്ടിട ഉടമ നടത്തിയ പരിശോധനയിലാണ് മോഷണം നടന്ന വിവരമറിയുന്നത്. തുടര്‍ന്ന് കട്ടപ്പന പോലീസില്‍ പരാതി നല്‍കുകയായിരുന്നു. സിസിടിവി ദൃശ്യങ്ങളുടെ അടിസ്ഥാനത്തില്‍ കട്ടപ്പന പോലീസ് കേസെടുത്തു നടത്തിയ അന്വേഷണത്തില്‍ രാത്രി പത്തോടെ കട്ടപ്പന വെട്ടിക്കുഴക്കവലയിലെ സര്‍ക്കാര്‍ മദ്യവില്പനശാലയ്ക്കു സമീപത്തുനിന്നു മോഷ്ടാക്കളെ പിടികൂടുകയായിരുന്നു. കട്ടപ്പന സിഐ ടി.സി. മുരുകന്‍, എസ്ഐ ഡജി വര്‍ഗീസ്, എഎസ്ഐ ലെനിന്‍, എസിപിഒമാരായ അനൂപ് ബിജു എന്നിവരുടെ നേതൃത്വത്തിലാണ് പ്രതികളെ പിടികൂടിയത്.

വാഴത്തോപ്പ് സെന്‍റ് ജോർജ് യുപിഎസിൽ വിദ്യാരംഗം കലാസാഹിത്യവേദി ഉദ്ഘാടനം

ചെറുതോണി: വാഴത്തോപ്പ് സെന്‍റ് ജോർജ് യുപി സ്കൂളിൽ വിദ്യാരംഗം കലാസാഹിത്യവേദിയുടെയും വിവിധ ക്ലബ്ബുകളുടെയും ഉദ്ഘാടനം നടന്നു. മരിയാപുരം സെന്‍റ് മേരീസ് ഹയർ സെക്കൻഡറി സ്കൂൾ പ്രിൻസിപ്പൽ ജോയ് കെ. ജോസ് സമ്മേളനം ഉദ്ഘാടനം ചെയ്തു. സ്കൂൾ മാനേജർ ഫാ. ടോമി ആനിക്കുഴിക്കാട്ടിൽ അധ്യക്ഷത വഹിച്ചു. ഹെഡ്മിസ്ട്രസ് സിസ്റ്റർ അനിത എസ്എബിഎസ്, പിടിഎ പ്രസിഡന്‍റ് ബിജു കലയത്തിനാൽ, എംപിടിഎ പ്രസിഡന്‍റ് ജോസിറ്റ റോയി, ജോബിൻ ജോസഫ് തുടങ്ങിയവർ പ്രസംഗിച്ചു. വിവിധ മത്സര പരീക്ഷകളിൽ വിജയിച്ച വിദ്യാർഥികളെ സമ്മേളനത്തിൽ ആദരിച്ചു. തുടർന്ന് കുട്ടികളുടെ കലാപരിപാടികളും നടന്നു.

ലഹരിക്കെതിരേ ബോധവത്കരണ ക്ലാസും നൃത്ത-സംഗീത ശില്പവും

കട്ടപ്പന: മുരിക്കാട്ടുകുടി ഗവ. ട്രൈബല്‍ ഹയര്‍ സെക്കന്‍ഡറി സ്‌കൂളില്‍ ലഹരിക്കെതിരേ വിമുക്തി ക്ലബ്ബിന്‍റെയും സോഷ്യല്‍ സര്‍വീസ് സ്‌കീമിന്‍റെയും ലിറ്റില്‍ കൈറ്റ്സിന്‍റെയും നേതൃത്വത്തില്‍ ബോധവത്കരണ ക്ലാസും നൃത്ത-സംഗീത ശില്പവും കുട്ടികളുടെ സൂംബ ഡാന്‍സ് അവതരണവും ഹൈസ്‌കൂള്‍ വിഭാഗം കുട്ടികളും അധ്യാപകരും ചേര്‍ന്ന് നിര്‍മിച്ച ഷോര്‍ട്ട് ഫിലിം ഉദ്ഘാടനവും നടന്നു. കട്ടപ്പന എക്‌സൈസ് ഇന്‍സ്പെക്ടര്‍ അതുല്‍ ലോനന്‍ ഉദ്ഘാടനം ചെയ്തു. ഹെഡ്മാസ്റ്റര്‍ ഇന്‍ ചാര്‍ജ് ഷിനു മാനുവല്‍ കെ. രാജന്‍ അധ്യക്ഷത വഹിച്ചു. വിവിധ മത്സരങ്ങളില്‍ വിജയികളായ കുട്ടികള്‍ക്ക് സമ്മാനവിതരണവും ലഹരിക്കെതിരേ കുട്ടികള്‍ നിര്‍മിച്ച പോസ്റ്റര്‍ പ്രദര്‍ശനവും നടന്നു. സ്‌കൂള്‍ വിമുക്തി കോ-ഓര്‍ഡിനേറ്റര്‍ കെ.എസ്. ചാന്ദിനി, സോഷ്യല്‍ സര്‍വീസ് സ്‌കീം കോ-ഓര്‍ഡിനേറ്റര്‍മാരായ ജൂബി തോമസ്, ശ്രുതി തുടങ്ങിയവര്‍ നേതൃത്വം നല്‍കി.

മുന്നറിയിപ്പില്ലാതെ കെഎസ്ആര്‍ടിസി സര്‍വീസുകള്‍ നിര്‍ത്തലാക്കി

കുമളി: സിഐടിയു കുമളി യൂണിറ്റിന്‍റെ സമ്മേളനം എന്ന പേരില്‍ മുന്നറിയിപ്പില്ലാതെ കെഎസ്ആര്‍ടിസിയുടെ കുമളി ഡിപ്പോയില്‍നിന്നു പത്തിലധികം സര്‍വീസ് ബസുകള്‍ നിര്‍ത്തലാക്കിയ സംഭവത്തില്‍ കോണ്‍ഗ്രസ് മണ്ഡലം കമ്മിറ്റി പ്രതിഷേധിച്ചു. ഇന്നലെയാണ് സംഭവമുണ്ടായത്. കുമളിയില്‍നിന്നും കോട്ടയം റൂട്ടില്‍ ഓടുന്ന പത്തു ബസുകളാണ് മുന്നറിയിപ്പില്ലാതെ കെഎസ്ആര്‍ടിസിയിലെ സിഐടിയു തൊഴിലാളികള്‍ നിര്‍ത്തലാക്കിയത്. ഹോളിഡേ ക്യാന്‍സലേഷന്‍ എന്ന പേരിലാണ് തൊഴിലാളികള്‍ കൂട്ടത്തോടെ അവധിയെടുത്തത്. ഇതോടെ നൂറുകണക്കിന് ആളുകളാണ് തമിഴ്‌നാട് ഉള്‍പ്പെടെയുള്ള സംസ്ഥാനങ്ങളില്‍നിന്നു കുമളി ബസ് സ്റ്റാന്‍ഡിലെത്തി മണിക്കൂറുകള്‍ കാത്തുനില്‍ക്കേണ്ടി വന്നത്. ഇതിനെതിരേ പ്രതിഷേധം ശക്തമാക്കാന്‍ ഒരുങ്ങുകയാണ് കോണ്‍ഗ്രസ് മണ്ഡലം കമ്മിറ്റി. കോട്ടയം-കുമളി റൂട്ടിലോടുന്ന പത്തിലധികം ബസുകള്‍ റദ്ദാക്കിയതോടെ കെഎസ്ആര്‍ടിസിക്ക് വന്‍ നഷ്ടം ഉണ്ടായിട്ടുണ്ട്. കെഎസ്ആര്‍ടിസിക്ക് ഉണ്ടായ നഷ്ടം തൊഴിലാളികള്‍നിന്ന് ഈടാക്കാത്തപക്ഷം ശക്തമായ സമരപരിപാടികള്‍ക്ക് നേതൃത്വം നല്‍കുമെന്ന് കോണ്‍ഗ്രസ് മണ്ഡലം കമ്മിറ്റി പ്രസിഡന്‍റ് പി.പി. റഹീം, വൈസ് പ്രസിഡന്‍റുമാരായ സനൂപ് പുതുപ്പറമ്പില്‍, സന്തോഷ് ഉമ്മൻ എന്നിവര്‍ പറഞ്ഞു.

വന്യമൃഗശല്യം: സർക്കാർ നടപടികൾ പ്രഹസനം

മുണ്ടക്കയം: സംസ്ഥാനത്ത് മുമ്പെങ്ങുമില്ലാത്തവിധം വന്യമൃഗശല്യം അതി രൂക്ഷമായിരിക്കുകയാണ്. ഒരോ ദിവസവും നിരവധി ആളുകളാണ് വന്യജീവി ആക്രമണത്തിൽ പരിക്കേൽക്കുകയും കൊല്ലപ്പെടുകയും ചെയ്യുന്നത്. നടപടി സ്വീകരിക്കേണ്ടത് കേന്ദ്രമാണെന്ന് സംസ്ഥാന സർക്കാരും ഇക്കാര്യത്തിൽ സംസ്ഥാന സർക്കാരുകൾക്ക് കർശന നടപടി സ്വീകരിക്കാനുള്ള അവകാശം നൽകിയിട്ടുണ്ടെന്ന് കേന്ദ്ര സർക്കാരും പറഞ്ഞൊഴിയുന്പോൾ ഹോമിക്കപ്പെടുന്നത് നിരവധി മനുഷ്യ ജീവനുകളാണ്. വർധിച്ചുവരുന്ന വന്യമൃഗ ശല്യത്തിനെതിരേ കർശന നടപടി സ്വീകരിക്കുന്നുണ്ടെന്ന് സർക്കാർ പ്രഖ്യാപിക്കുമ്പോഴും പുറത്തുവരുന്നത് കൂച്ചുവിലങ്ങിട്ട നിയമങ്ങളുടെ വിവരങ്ങളാണ്. മനുഷ്യജീവന് ഏറ്റവും കൂടുതൽ ഭീഷണിയായി മാറിയിരിക്കുന്നതും കർഷകരുടെ കൃഷികൾ നശിപ്പിക്കുന്നതിൽ മുഖ്യപങ്ക് വഹിക്കുന്നതും കാട്ടാനയും കാട്ടുപന്നിയുമാണ്. ഇതിൽ കാട്ടുപന്നികളെ വെടിവച്ച് കൊല്ലുന്നതിനായുള്ള പ്രത്യേക ഉത്തരവ് സംസ്ഥാന സർക്കാർ ഇറക്കുകയും ചെയ്തു. ഓണററി വൈൽഡ് ലൈഫ് വാർഡന്മാരായി പഞ്ചായത്ത് പ്രസിഡന്‍റുമാരെയും പഞ്ചായത്ത് സെക്രട്ടറിമാരെ അധികാരപ്പെട്ട ഉദ്യോഗസ്ഥനായും നിയമിച്ച് സർക്കാർ ഉത്തരവിറക്കിയിട്ടുണ്ട്. ലൈസൻസുള്ള ഷൂട്ടർമാരെ ഉപയോഗിച്ച് കാട്ടുപന്നികളെ വെടിവച്ച് കൊന്നതിനുശേഷം വനം വകുപ്പ് ഉദ്യോഗസ്ഥരുടെ സാന്നിധ്യത്തിൽ മണ്ണെണ്ണയൊഴിച്ച് നശിപ്പിച്ചു കളയണമെന്നാണ് വ്യവസ്ഥ. തോക്ക് ലൈസൻസുള്ളയാൾക്ക് ഒരു കാട്ടുപന്നിയെ കൊല്ലുന്നതിന് 1500 രൂപയും മറവുചെയ്യുന്നതിന് 2000 രൂപയുമാണ് പഞ്ചായത്തുകൾ നൽകുന്നത്. നിയമം നിലവിൽ വന്ന് മാസങ്ങൾ കഴിഞ്ഞെങ്കിലും അപകടകാരികളായ കാട്ടുപന്നികളിൽ വളരെ കുറച്ച് എണ്ണത്തെ മാത്രമേ പിടികൂടുവാൻ കഴിഞ്ഞുള്ളൂ. ഇതിന് പ്രധാന കാരണം സംസ്ഥാന സർക്കാർ ഇക്കാര്യത്തിൽ കാണിക്കുന്ന അലംഭാവമാണെന്ന് ആക്ഷേപം ശക്തമാണ്. മുന്പ് ഓരോ പഞ്ചായത്തിലും ലൈസൻസുള്ള തോക്കുണ്ടായിരുന്ന നിരവധി കർഷകരുണ്ടായിരുന്നു. എന്നാൽ, ഇപ്പോൾ കഴിഞ്ഞ ഒരു വർഷമായി സംസ്ഥാന സർക്കാർ തോക്കിന് ലൈസൻസ് പുതുക്കി നൽകുന്നില്ലെന്ന വിവരമാണെന്ന് പുറത്തുവരുന്നത്. ഇടുക്കി ജില്ലയിൽ മാത്രം കഴിഞ്ഞ ഒരു വർഷത്തിനിടെ ആയിരത്തിലധികം പേരുടെ തോക്കിനായുള്ള ലൈസൻസിനുള്ള അപേക്ഷകളാണ് കെട്ടിക്കിടക്കുന്നത്. മുൻകാലങ്ങളിൽ പോലീസിന്‍റെയും തഹസിൽദാരുടെയും റിപ്പോർട്ടുകൾ മാത്രം മതിയായിരുന്നു ലൈസൻസ് നൽകുന്നതിന്. എന്നാൽ, ഇത്തവണ ഈ റിപ്പോർട്ടുകൾക്ക് പുറമെ കണ്ണിന്‍റെ കാഴ്ച പരിശോധനാ റിപ്പോർട്ടും ആരോഗ്യ റിപ്പോർട്ടും ഉൾപ്പെടെ ഹാജരാക്കാൻ നിർദേശം നൽകിയിരുന്നു. എന്നാൽ, ഇതൊക്കെ സമർപ്പിച്ചിട്ടും തങ്ങൾക്ക് ലൈസൻസ് ലഭിച്ചിട്ടില്ലെന്നാണ് കർഷകർ പറയുന്നത്. നിലവിൽ ലൈസൻസ് പുതുക്കാത്തവർ തങ്ങളുടെ തോക്കുകൾ ലൈസൻസിയായിട്ടുള്ള തോക്ക് വില്പന കേന്ദ്രങ്ങളിലെ ഡിപ്പോകളിൽ ഏൽപ്പിച്ചിരിക്കുകയാണ്. ഈ തോക്കുകൾ സൂക്ഷിക്കുന്നതിന് ആറുമാസം കൂടുമ്പോൾ 500 രൂപ ഫീസ് അടയ്ക്കേണ്ടതുമുണ്ട്. ഇതും കർഷകർക്ക് ഏറെ ബുദ്ധിമുട്ടാണ് ഉണ്ടാക്കുന്നത്. ഇങ്ങനെ സംസ്ഥാനത്ത് 14 ജില്ലകളിലുമായി ആയിരക്കണക്കിന് ആളുകളുടെ തോക്കിനുള്ള ലൈസൻസുകളാണ് കളക്ടറേറ്റിൽ കെട്ടിക്കിടക്കുന്നതെന്നും കർഷകർ ആരോപിക്കുന്നു. കൂടാതെ ഇത്തരത്തിൽ ലൈസൻസുള്ള വ്യക്തികളെ വനം വകുപ്പ് ഉദ്യോഗസ്ഥർ പ്രത്യേക നിരീക്ഷണം നടത്തുന്നതായും കർഷകർ പറയുന്നു. വന്യമൃഗ ശല്യത്തിന് കർശന നടപടി സ്വീകരിക്കുന്നുണ്ടെന്ന് സർക്കാർ പ്രഖ്യാപിക്കുമ്പോഴും മനുഷ്യജീവന് വിലകൽപ്പിക്കാതെ വന്യമൃഗങ്ങൾക്ക് നാട്ടിലിറങ്ങി വിഹരിക്കുന്നതിനുള്ള അവസരമാണ് അധികാരികൾ ഒരുക്കുന്നതെന്നും ആക്ഷേപമുണ്ട്.

യുവജനങ്ങളുടെ ശബ്ദത്തിനു ശക്തി പകരാൻ വിശ്വാസവും വേണം: മാർ നെല്ലിക്കുന്നേൽ

കരിമ്പൻ: പ്രവർത്തനങ്ങൾക്കൊപ്പം വിശ്വാസത്തിൽ ഉറച്ച നിലപാടോടെ സമൂഹത്തെ നേരിടാൻ യുവാക്കൾ തയാറാകണമെന്ന് ഇടുക്കി രൂപത മെത്രാൻ മാർ ജോൺ നെല്ലിക്കുന്നേൽ. കരിന്പൻ സെന്‍റ് മേരീസ് പള്ളിയിൽ കെസിവൈഎം ഇടുക്കി രൂപത പ്രവർത്തനവർഷം ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്. ക്രൈസ്തവ സമൂഹത്തിൽ യുവജനങ്ങൾക്കുള്ള പങ്ക് ഏറെ പ്രാധാന്യമർഹിക്കുന്നതാണ്. ക്രിസ്തുവിനുവേണ്ടി ശബ്ദിക്കുന്നവരാകാൻ നമുക്കു കഴിയണം. നമ്മുടേതായ വിശ്വാസവും ആത്മസമർപ്പണവും ശുഭാശംസകളും ചേർന്നാൽ മാത്രമേ സമൂഹത്തിൽ യഥാർഥ മാറ്റം വരുത്താൻ കഴിയൂ. ഈ വർഷത്തെ പ്രവർത്തനങ്ങൾ യുവജനശബ്ദത്തിന് ആഴം നൽകുന്നതായിരിക്കട്ടെയെന്നും മാർ നെല്ലിക്കുന്നേൽ ആശംസിച്ചു. കെസിവൈഎം രൂപത പ്രസിഡന്‍റ് സാം സണ്ണി അധ്യക്ഷത വഹിച്ചു. യോഗത്തിൽ രൂപത മുഖ്യ വികാരി ജനറാൾ മോൺ. ജോസ് കരിവേലിക്കൽ കർമപദ്ധതികളുടെ പ്രകാശനം നിർവഹിച്ചു. കെസിവൈഎം സംസ്ഥാന പ്രസിഡന്‍റ് എബിൻ കണിവയലിൽ, കെസിവൈഎം ഇടുക്കി രൂപത ഡയറക്ടർ ഫാ. സെബാസ്റ്റ്യൻ മനക്കലേട്ട്, അലക്സ് തോമസ്, ഫാ. ജോസഫ് നടുപ്പടവിൽ, ജെറിൻ പട്ടാംകുളം എന്നിവർ പ്രസംഗിച്ചു. സിസ്റ്റർ ലിന്‍റ് എസ്എബിഎസ്, അജിൻ ജിൻസൺ, അമൽ ജിജു, എബിൻ പൂണേലി, ഐബിൻ, ഡെല്ല മാത്യു, സൗപർണിക സന്തോഷ്‌, സോനാ, അനു, ഡെല്ല സജി, അലോണ, അലൻസിയ, ഡമിൽ, ഡോണൾഡ്, ജിതിൻ, ക്രിസ്റ്റോ, നോയൽ, കെവിൻ ജോഷി എന്നിവർ നേതൃത്വം നൽകി.

സാംസ്കാരിക കൂട്ടായ്മ സംഘടിപ്പിച്ചു

തൊടുപുഴ: സോഷ്യൽ ജസ്റ്റീസ് ഫോറത്തിന്‍റെ ആഭിമുഖ്യത്തിൽ തൊടുപുഴ സെന്‍റ് സെബാസ്റ്റ്യൻസ് യുപി സ്കൂളിൽ സാംസ്കാരിക കൂട്ടായ്മ സംഘടിപ്പിച്ചു. സംസ്ഥാന പ്രസിഡന്‍റ് കെ.എം. വർഗീസ് ഉദ്ഘാടനം ചെയ്തു. തുടർന്നു നടന്ന പ്രതിഭാസംഗമം തൊടുപുഴ നഗരസഭാ ചെയർമാൻ കെ. ദീപക് ഉദ്ഘാടനം ചെയ്തു. ജില്ലാ വൈസ് പ്രസിഡന്‍റ് സുധീന്ദ്രൻ കാപ്പിൽ അധ്യക്ഷത വഹിച്ചു. ടി.കെ. കബീർ, ജോഷിബ ജയിംസ്, ഡോ. ജോസഫ് കോലഞ്ചേരിൽ, എം. ഉണ്ണിക്കൃഷ്ണൻ, പി.യു. ഗീതു, ഹെഡ്മാസ്റ്റർ ഷിന്‍റോ ജോർജ്, ജയ്സണ്‍ ജേക്കബ്, ഐശ്വര്യ അനിൽ എന്നിവർ പ്രസംഗിച്ചു.

തുടര്‍ച്ചയായ മഴയില്‍ ഏലച്ചെടികള്‍ അഴുകുന്നു

തൊടുപുഴ: തുടര്‍ച്ചയായി മഴ പെയ്യുന്നത് ജില്ലയിലെ ഏലം മേഖലയ്ക്ക് കനത്ത തിരിച്ചടിയാകുന്നു. ഈ നില തുടര്‍ന്നാല്‍ ഉത്പാദനത്തില്‍ വലിയ തിരിച്ചടിയുണ്ടാകുമെന്നാണ് വിലയിരുത്തല്‍. കനത്ത മഴയും കാറ്റും മൂലം ഇപ്പോള്‍തന്നെ ഉത്പാദനത്തില്‍ 40 ശതമാനത്തോളം ഇടിവുണ്ടായതായി കര്‍ഷകര്‍ പറയുന്നു. പ്രധാന തോട്ടം മേഖലകളിലെല്ലാം തന്നെ അഴുകലും തട്ടമറിച്ചിലും വ്യാപകമായിട്ടുണ്ട്. കഴിഞ്ഞ വര്‍ഷം വേനലില്‍ കര്‍ഷകര്‍ക്കുണ്ടായ നഷ്ടങ്ങളില്‍നിന്നു കരകയറിവരുന്നതിനിടെയാണ് മഴയും കാറ്റും അടുത്ത പ്രതിസന്ധിസൃഷ്ടിച്ചത്. കഴിഞ്ഞ വര്‍ഷത്തെ കടുത്ത വേനലില്‍ ഇടുക്കിയിലെ നാല്പത് ശതമാനത്തിലേറെ ഏലച്ചെടിയാണ് ഉണങ്ങി നശിച്ചത്. കര്‍ഷകര്‍ക്ക് വന്‍ തോതില്‍ നഷ്ടമുണ്ടായതോടെ സര്‍ക്കാര്‍ ഏലം പുനരുദ്ധാരണത്തിനായി വരള്‍ച്ച ലഘൂകരണ ഫണ്ടില്‍നിന്നു പത്തു കോടിയുടെ പദ്ധതി പ്രഖ്യാപിച്ചിരുന്നു. പുനഃകൃഷി ചെയ്യുന്ന കര്‍ഷകര്‍ക്ക് നടീല്‍വസ്തുക്കള്‍ക്കായാണ് തുക അനുവദിച്ചത്. 1702 ഹെക്ടര്‍ സ്ഥലത്തെ ഏലം കൃഷി പുനരുദ്ധാരണത്തിനായി 10 കോടി അനുവദിച്ചു. ജില്ലയില്‍ തൊടുപുഴ ഒഴിച്ചുള്ള ഏഴ് ബ്ലോക്കുകളിലുള്ള കര്‍ഷകര്‍ക്കാണ് പദ്ധതിയുടെ ആനുകൂല്യം ലഭിച്ചത്. കഴിഞ്ഞ മാസങ്ങളിലാണ് കര്‍ഷകര്‍ക്ക് ഇതു പ്രകാരമുള്ള തുക ലഭിച്ചത്. ധനസഹായവും വായ്പയും മറ്റും ചെലവഴിച്ചാണ് കര്‍ഷകര്‍ ഈ വര്‍ഷം കൃഷി പുനഃസ്ഥാപിച്ചത്. കടുത്ത വേനലിനെ പ്രതിരോധിക്കാന്‍ ഗ്രീന്‍ നെറ്റ് ഉപയോഗിച്ച് ഏലച്ചെടികള്‍ക്ക് സംരക്ഷണവുമൊരുക്കിയിരുന്നു. അതിനാല്‍ ഈ വര്‍ഷം വേനല്‍ ശക്തമായിരുന്നെങ്കിലും കൃഷിയെ കാര്യമായി ബാധിച്ചില്ല. മെച്ചപ്പെട്ട വിളവ് കര്‍ഷകര്‍ക്ക് ലഭിക്കുകയും ചെയ്തു. എന്നാല്‍ മേയ് പകുതിയോടെ ആരംഭിച്ച മഴ ഇടവേളകളില്ലാതെ തുടര്‍ന്നു. രണ്ടു മാസത്തോളമായി മഴ കൂടിയും കുറഞ്ഞും ഇടതടവില്ലാതെ പെയ്തു നില്‍ക്കുകയാണ്. ഇതാണ് ഏലച്ചെടികള്‍ക്ക് തിരിച്ചടിയായി മാറിയത്. ഇടയ്ക്ക് ജില്ലയിലുണ്ടായ അതിതീവ്രമഴയിലും കാറ്റിലും ഏലം മേഖലയില്‍ വ്യാപക നാശമുണ്ടായി. മരങ്ങള്‍ കടപുഴകിയും ഒടിഞ്ഞുവീണും ചെടികള്‍ നശിച്ചു. കാറ്റില്‍ ഏലത്തട്ടകള്‍ മറിഞ്ഞുവീണും നാശമുണ്ടായി. വിളവെടുപ്പിനു പാകമായ തട്ടകളാണ് നശിച്ചത്. ഇതോടെ വന്‍തോതില്‍ കര്‍ഷകര്‍ക്ക് നഷ്ടം നേരിട്ടു. കൃഷിവകുപ്പിന്‍റെ കണക്കു പ്രകാരംതന്നെ ലക്ഷങ്ങളുടെ നഷ്ടമാണ് ഏലം മേഖലയിലുണ്ടായത്. കനത്ത മഴ നീണ്ടുനിന്നതോടെയാണ് അഴുകല്‍രോഗം വ്യാപകമായത്. നെടുങ്കണ്ടം, ശാന്തന്‍പാറ, രാജകുമാരി, രാജാക്കാട്, വണ്ടന്‍മേട്, കുമളി, വണ്ടിപ്പെരിയാര്‍, അയ്യപ്പന്‍കോവില്‍ പഞ്ചായത്തുകളിലാണ് ചെടികള്‍ക്ക് രോഗബാധ ഏറെയുണ്ടായിരിക്കുന്നത്. അഴുകലിനെ പ്രതിരോധിക്കാന്‍ ബോര്‍ഡോ മിശ്രിതം പ്രയോഗിക്കുന്നുണ്ടെങ്കിലും മഴ തുടരുന്നതിനാല്‍ കാര്യമായ ഫലപ്രാപ്തിയുണ്ടാകുന്നില്ലെന്ന് ഏലം കര്‍ഷകനും സൗത്ത് ഇന്ത്യന്‍ കാര്‍ഡമം പ്ലാന്‍റേഴ്‌സ് അസോസിയേഷന്‍ സെക്രട്ടറിയുമായ സജി ചാക്കോ പറഞ്ഞു. ഏലച്ചെടിയുടെ ചരവും ചിമ്പുമാണ് അഴുകി നശിക്കുന്നത്. അഴുകല്‍ ബാധിച്ച തട്ടകള്‍ ഏലച്ചെടികളില്‍നിന്നു നീക്കം ചെയ്യുന്നതു തന്നെ ഭാരിച്ച ജോലിയാണ്. ഇപ്പോള്‍ ഏലക്കായയ്ക്ക് മെച്ചപ്പെട്ട വില ലഭിക്കുന്നുണ്ട്. ശരാശരി 2500 മുതല്‍ 2700 രൂപ വരെയാണ് വില ലഭിക്കുന്നത്. ഉത്പാദനം കുറഞ്ഞുപോയതാണ് വില ഉയരാന്‍ കാരണം. എന്നാല്‍ മെച്ചപ്പെട്ട വില ലഭിച്ചാലും ഉത്പാദനം കുറഞ്ഞാല്‍ കര്‍ഷകര്‍ക്ക് കനത്ത പ്രതിസന്ധിയായി മാറും. മഴ ഇനിയും നീണ്ടുനിന്നാല്‍ കഴിഞ്ഞ വര്‍ഷത്തെ വേനലില്‍ ഉണ്ടായതിനേക്കാള്‍ വലിയ ആഘാതമായിരിക്കും ഇത്തവണയുണ്ടാകുകയെന്ന് കര്‍ഷകര്‍ പറയുന്നു. അതിനാല്‍ ഇക്കാര്യത്തില്‍ മതിയായ സഹായം ഇപ്പോള്‍ തന്നെ ലഭ്യമാക്കാനുള്ള നടപടികള്‍ വേണമെന്നാണ് ഇവരുടെ ആവശ്യം.

വായനമാസാചരണം: ജില്ലാതല മത്സരം നടത്തി

തൊടുപുഴ: ജില്ലാ ഭരണകൂടം, പൊതുവിദ്യാഭ്യാസ വകുപ്പ്, പി.എൻ. പണിക്കർ ഫൗണ്ടേഷൻ എന്നിവയുടെ ആഭിമുഖ്യത്തിൽ സെന്‍റ് സെബാസ്റ്റ്യൻസ് ഹൈസ്കുളിൽ സംഘടിപ്പിച്ച വായനമാസാചരണത്തിന്‍റെയും ജില്ലാതല മത്സരങ്ങളുടെയും ഉദ്ഘാടനം ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ നിർവഹിച്ചു. പി.എൻ. പണിക്കർ ഫൗണ്ടേഷൻ വൈസ് പ്രസിഡന്‍റ് ജോസ് വഴുതനപ്പിള്ളിൽ അധ്യക്ഷത വഹിച്ചു. തൊടുപുഴ ബ്ലോക്ക് പഞ്ചായത്ത് പ്രസിഡന്‍റ് സിനി ബാബു മുഖ്യ പ്രഭാഷണം നടത്തി. സാഹിത്യ മത്സര വിജയികൾക്കുള്ള സമ്മാന വിതരണം നഗരസഭാ ചെയർമാൻ കെ. ദീപക് നിർവഹിച്ചു. ജോയി കാട്ടുവള്ളി, നൈസി തോമസ്, റെജി കുന്നംകോട്ട് എന്നിവർ പ്രസംഗിച്ചു.

ജാതിക്കര്‍ഷകര്‍ക്ക് പ്രചോദനമായി ഷാജന്‍റെ പ്രീമിയം ജാതി

ബിജു കലയത്തിനാല്‍ ചെറുതോണി: കര്‍ഷകര്‍ക്ക് പ്രതീക്ഷയും ഉത്തേജനവുമായി പുതിയ പ്രീമിയം ജാതി വികസിപ്പിച്ചെടുത്തിരിക്കുകയാണ് ഷാജന്‍ പുന്നത്താനമെന്ന യുവ കര്‍ഷകന്‍. കൊന്നത്തടി പഞ്ചായത്തില്‍ പണിക്കന്‍കുടി സെന്‍റ് മാര്‍ട്ടിന്‍ ഹില്‍സിലെ പുന്നത്താനം ഫാം ഉടമയായ ഷാജന്‍ വര്‍ഗീസിന്‍റെ നേട്ടം ജാതികൃഷിയില്‍ വലിയ മാറ്റം സൃഷ്ടിക്കുമെന്നാണ് വിദഗ്ധരുടെ വിലയിരുത്തല്‍. പുന്നത്താനം ജാതിക്ക് രാഷ്‌ട്രപതിയുടെ അവാര്‍ഡും 2018ല്‍ സംസ്ഥാന കാര്‍ഷിക പുരസ്‌കാരവും കരസ്ഥമാക്കിയ കര്‍ഷകനായ വര്‍ക്കി തൊമ്മന്‍റെ മകനാണ് ഷാജന്‍. നാലുമുതല്‍ അഞ്ചു ഗ്രാം വരെ തൂക്കം വരുന്ന ജാതിപത്രിയും 15 മുതല്‍ 20 ഗ്രാം വരെ തൂക്കം വരുന്ന ഉണങ്ങിയ കായ്കളുമാണ് പ്രീമിയം ജാതിയുടെ പ്രധാന സവിശേഷത. ചതുരശ്ര മീറ്ററിന് 50ലധികം കായ്കള്‍ ലഭിക്കും. മറ്റു ജാതികളെക്കാള്‍ വേഗത്തില്‍ മികച്ച വിളവ് ലഭിക്കുന്നതും കര്‍ഷകര്‍ക്കിടയില്‍ പ്രീമിയം ജാതിയെ പ്രശസ്തമാക്കി. വലിപ്പമുള്ള ജാതിക്കായയെ പൊതിഞ്ഞു നില്‍ക്കുന്ന തിളങ്ങുന്ന ചുവപ്പ് പത്രിയും കര്‍ഷകരെ ആകര്‍ഷിക്കുന്നു. കാലാവസ്ഥാ വ്യതിയാനത്തെയും കീടബാധകളെയും നേരിടാന്‍ ഈ ജാതിക്ക് മികച്ച ശേഷിയുണ്ടെന്ന് ഷാജന്‍ പറയുന്നു. നൂതന ജാതികള്‍ ചെറുകിട കര്‍ഷകരുടെ വരുമാന വര്‍ധനവിനും കാര്‍ഷിക മേഖലയെ ആധുനികമാക്കുന്നതിനും വഴിയൊരുക്കും. കേരളത്തിന്‍റെ സുഗന്ധവിള കൃഷിയെ ആഗോളതലത്തില്‍ കൂടുതല്‍ ശക്തിപ്പെടുത്തുക എന്നതാണ് തന്‍റെ ലക്ഷ്യമെന്ന് ഷാജന്‍ പറഞ്ഞു. 2022ല്‍ കൊന്നത്തടി കൃഷിഭവന്‍റെ യുവകര്‍ഷക അവാര്‍ഡും 2024ല്‍ തമിഴ്‌നാട് ഐഎസ്എച്ച്എ ഫൗണ്ടേഷന്‍റെ പുരസ്‌കാരം ഉള്‍പ്പെടെ നിരവധി അംഗീകാരങ്ങള്‍ ഷാജനെ തേടിയെത്തിയിട്ടുണ്ട്. അടിമാലി തളിര്‍ നാച്വറല്‍ പ്രൊഡ്യൂസേഴ്‌സ് അഡ്വൈസറി അംഗവുമാണ്. ഷാജന് മാര്‍ഗനിര്‍ദേശങ്ങളുമായി കൊന്നത്തടി കൃഷി ഓഫീസര്‍ ബിജുവും ഒപ്പമുണ്ട്. ഐഐഎസ്ആര്‍ കോഴിക്കോട്, കെവികെ ശാന്തന്‍പാറ, പീരുമേട് ഡെവലപ്‌മെന്‍റ് സൊസൈറ്റി, കെഎയു തൃശൂര്‍ തുടങ്ങിയ സ്ഥാപനങ്ങളിലെ ശാസ്ത്രജ്ഞര്‍ ഷാജന്‍റെ തോട്ടം സന്ദര്‍ശിച്ച് നിരീക്ഷണങ്ങള്‍ നടത്തിയിട്ടുണ്ട്. ഭാര്യ ക്ലെജി ജോസും കൃഷിയില്‍ ഷാജന് പൂര്‍ണ പിന്തുണ നല്‍കുന്നു.

മൂന്നര വയസുകാരനും അച്ഛനും നാടിന്‍റെ അന്ത്യാഞ്ജലി

തൊടുപുഴ: കാഞ്ഞിരമറ്റത്തെ വാടകവീട്ടില്‍ മരിച്ച നിലയില്‍ കണ്ടെത്തിയ മൂന്നര വയസുകാരന്‍റെയും അച്ഛന്‍റെയും മൃതദേഹങ്ങള്‍ സംസ്‌കരിച്ചു. കുളമാവ് മുത്തിയുരുണ്ടയാര്‍ പുത്തന്‍പുരയ്ക്കല്‍ എം.പി.ഉന്മേഷ് (34), മകന്‍ ദേവ് എന്നിവരെയാണ് ശനിയാഴ്ച രാത്രി എട്ടോടെ മരിച്ച നിലയില്‍ കണ്ടെത്തിയത്. ഇരുവരുടെയും മൃതദേഹം ഇന്നലെ ഇടുക്കി മെഡിക്കല്‍ കോളജില്‍ പോസ്റ്റ്‌മോര്‍ട്ടത്തിനു ശേഷം ബന്ധുക്കള്‍ക്ക് വിട്ടുനല്‍കിയിരുന്നു. മുത്തിയുരുണ്ടയാറിലെ വീട്ടിലെത്തിച്ച മൃതദേഹങ്ങളില്‍ ബന്ധുക്കളും നാട്ടുകാരും സുഹൃത്തുക്കളുമടക്കം നിരവധി പേരാണ് അന്ത്യാഞ്ജലി അര്‍പ്പിക്കാനെത്തിയത്. വൈകുന്നേരത്തോടെ വീട്ടുവളപ്പില്‍ സംസ്‌കാരം നടത്തി. തൊടുപുഴ കാഞ്ഞിരമറ്റത്ത് വാടകയ്ക്ക് ഇവര്‍ താമസിച്ചിരുന്ന വീടിന്‍റെ സമീപത്തുള്ളവരും നാട്ടുകാരും സംഭവത്തിന്‍റെ ആഘാതത്തിലാണ്. അയല്‍ക്കാരുമായി വലിയ ബന്ധം പുലര്‍ത്തിയിരുന്നില്ലെങ്കിലും കുരുന്നു ജീവന്‍ നഷ്ടമായതിന്‍റെ ഞെട്ടലിലാണ് പ്രദേശവാസികള്‍. തൊടുപുഴയിലെ വസ്ത്രവ്യാപാര സ്ഥാപനത്തില്‍ ജോലികഴിഞ്ഞ് വീട്ടിലെത്തിയ ഭാര്യ ശില്പയാണ് ഉന്മേഷിനെയും മകനെയും തൂങ്ങിമരിച്ച നിലയില്‍ കണ്ടത്. ഉന്മേഷ് ഹാളിലെ ഫാനില്‍ കയറില്‍ തൂങ്ങിയ നിലയിലായിരുന്നു. കിടപ്പുമുറിയിലെ ഫാനില്‍ ഷാളില്‍ തൂങ്ങിയ നിലയിലായിരുന്നു ദേവ്. ഭിന്നശേഷിക്കാരനായ മകനെ കൊലപ്പെടുത്തിയ ശേഷം ഉന്മേഷ് ജീവനൊടുക്കുകയായിരുന്നെന്ന് പോലീസ് സ്ഥിരീകരിച്ചു. സംഭവത്തിലേക്ക് നയിച്ച കാരണം വ്യക്തമല്ല. ബന്ധുക്കളുടെയും മറ്റും മൊഴി രേഖപ്പെടുത്തും. ആത്മഹത്യാക്കുറിപ്പൊന്നും വീട്ടില്‍നിന്ന് കണ്ടെത്തിയിട്ടില്ലെന്നും പോലീസ് പറഞ്ഞു.

ഒഴുക്കില്‍പ്പെട്ടയാളുടെ മൃതദേഹം കണ്ടെത്തി

മൂലമറ്റം: ത്രിവേണി സംഗമത്തില്‍ ഒഴുക്കില്‍പ്പെട്ട് കാണാതായ ഗൃഹനാഥന്‍റെ മൃതദേഹം കണ്ടെത്തി. ത്രിവേണി സംഗമത്തിന് സമീപം നാച്ചാര്‍ പുഴയോരത്ത് താമസിക്കുന്ന തുരുത്തേല്‍ രത്‌നാകരന്‍റെ (65) മൃതദേഹമാണ് കാണാതായി മൂന്നാം ദിവസത്തെ തെരച്ചിലില്‍ കണ്ടെത്തിയത്. കുടയത്തൂര്‍ ഗവ. ഹയര്‍ സെക്കന്‍ഡറി സ്‌കൂളിന് പിന്‍വശത്തായി ജലാശയത്തിലാണ് ഇന്നലെ വൈകുന്നേരം 3.30ഓടെ മൃതദേഹം കണ്ടത്. വള്ളത്തില്‍ മീന്‍പിടിക്കാന്‍ പോയ പ്രദേശവാസികളാണ് മൃതദേഹം വെള്ളത്തില്‍ പൊങ്ങിയ നിലയില്‍ കണ്ടത്. വെള്ളിയാഴ്ച വൈകുന്നേരം 5.45ന് ത്രിവേണി സംഗമത്തിന് സമീപം ചൂണ്ടയിട്ട് മീന്‍പിടിക്കാന്‍ ശ്രമിക്കുന്നതിനിടെ രത്‌നാകരന്‍ ഒഴുക്കില്‍പ്പെടുകയായിരുന്നു. നാട്ടുകാരും ഫയര്‍ഫോഴ്‌സിന്‍റെ സ്‌കൂബാ ടീമും ചേര്‍ന്ന് തെരച്ചില്‍ നടത്തിയെങ്കിലും കണ്ടെത്താന്‍ കഴിഞ്ഞില്ല. നാട്ടുകാരുടെ സഹായത്തോടെ ഇന്നലെയും അറക്കുളം, കാഞ്ഞാര്‍ ഭാഗങ്ങളില്‍ തെരച്ചില്‍ നടത്തുന്നതിനിടെയാണ് മൃതദേഹം കണ്ടെത്തിയത്. കാഞ്ഞാര്‍ എസ്ഐ ബൈജു പി. ബാബുവിന്‍റെ നേതൃത്വത്തില്‍ ഇന്‍ക്വസ്റ്റ് നടത്തി മൃതദേഹം ജില്ലാ ആശുപത്രി മോര്‍ച്ചറിയിലേക്ക് മാറ്റി. ഇന്ന് പോസ്റ്റ്‌മോര്‍ട്ടത്തിനുശേഷം മൃതദേഹം ബന്ധുക്കള്‍ക്കു വിട്ടുനല്‍കും. ഭാര്യ: ഓമന.

എം.എന്‍. ജയചന്ദ്രന്‍റെ വീടിന്‍റെ ഗേറ്റ് പൂട്ടി യൂത്ത് കോണ്‍ഗ്രസ്

തൊടുപുഴ: ദേശീയപാതാ നിര്‍മാണത്തില്‍ അന്വേഷണം നടത്താനുള്ള ഹൈക്കോടതി ഇടക്കാല ഉത്തരവിനു പിന്നാലെ കോടതിയില്‍ ഹര്‍ജി നല്‍കിയ പരിസ്ഥിതി പ്രവര്‍ത്തകന്‍ എം.എന്‍. ജയചന്ദ്രന്‍റെ വീട് യൂത്ത് കോണ്‍ഗ്രസ് പ്രവര്‍ത്തകര്‍ ഉപരോധിച്ചു. യൂത്ത് കോണ്‍ഗ്രസ് തൊടുപുഴ, ദേവികുളം നിയോജകമണ്ഡലം കമ്മിറ്റികളുടെ നേതൃത്വത്തിലായിരുന്നു ഉപരോധ സമരം. വനംവകുപ്പുമായുള്ള എം.എന്‍. ജയചന്ദ്രന്‍റെ അവിശുദ്ധ കൂട്ടുകെട്ടാണ് ഹര്‍ജിക്ക് പിന്നിലെന്ന് യൂത്ത് കോണ്‍ഗ്രസ് പ്രവര്‍ത്തകര്‍ ആരോപിച്ചു. പ്രതിഷേധവുമായെത്തിയ യൂത്ത് കോണ്‍ഗ്രസ് പ്രവര്‍ത്തകര്‍ വീടിന്‍റെ ഗേറ്റ് താഴിട്ടു പൂട്ടി. പോലീസ് എത്തിയാണ് ഗേറ്റ് തുറന്നു കൊടുത്തത്. മുന്‍ സംസ്ഥാന സെക്രട്ടറി എം.എ.അന്‍സാരി സമരം ഉദ്ഘാടനം ചെയ്തു. തൊടുപുഴ നിയോജകമണ്ഡലം പ്രസിഡന്‍റ് ബിലാല്‍ സമദ് അധ്യക്ഷത വഹിച്ചു. ദേവികളും നിയോജകമണ്ഡലം പ്രസിഡന്‍റ് അനില്‍ കനകന്‍, ബിബിന്‍ അഗസ്റ്റിന്‍, ഷാനു ഷാഹുല്‍, ഫസല്‍ സുലൈമാന്‍ എന്നിവര്‍ പ്രസംഗിച്ചു. സംഭവത്തില്‍ കണ്ടാലറിയാവുന്ന 25ഓളം യൂത്ത് കോണ്‍ഗ്രസ് പ്രവര്‍ത്തകര്‍ക്കെതിരേ കേസെടുത്തതായി പോലീസ് അറിയിച്ചു.

ത്രിവേണി മനോഹരം: സുരക്ഷ ഇല്ലാതെ ജീവൻ പൊലിയുന്നു

മൂലമറ്റം: ത്രിവേണി സംഗമത്തിൽ കുളിക്കാനിറങ്ങുന്നവരും മീൻപിടിക്കാനിറങ്ങുന്നവരും അപകടത്തിൽപ്പെടുന്നത് പതിവാകുന്പോഴും സുരക്ഷാക്രമീകരണങ്ങൾ ഒരുക്കുന്ന കാര്യത്തിൽ അധികൃതർക്ക് നിസംഗത. ഒഴുക്കിൽ അകപ്പെട്ട് ഒട്ടേറെപ്പേരുടെ ജീവനാണ് ഇവിടെ പൊലിഞ്ഞത്. വെള്ളിയാഴ്ച ത്രിവേണി സംഗമത്തിൽ ഒഴുക്കിൽപ്പെട്ട് കാണാതായ നാച്ചാർ പുഴയോരത്ത് താമസിക്കുന്ന തുരുത്തേൽ രത്നാകരനെ ഫയർഫോഴ്സും നാട്ടുകാരും ചേർന്ന് രണ്ടു ദിവസം നടത്തിയ തെരച്ചിലിനിടയിലും കണ്ടെത്താനായിട്ടില്ല. കഴിഞ്ഞ മാസം 16ന് എകെജി സ്വദേശിയായ വിദ്യാർഥി ഇവിടെ ഒഴുക്കിൽപ്പെട്ട് മരിച്ചിരുന്നു. നടുപ്പറന്പിൽ അതുൽ ബൈജുവാണ് മരിച്ചത്. ഒപ്പമുണ്ടായിരുന്ന സുഹൃത്തിനെ നാട്ടുകാരാണ് രക്ഷപ്പെടുത്തിയത്. മൂലമറ്റം വൈദ്യുതി നിലയത്തിൽനിന്ന് ഉത്പാദനത്തിനുശേഷം പുറംതള്ളുന്ന വെള്ളമൊഴുകുന്ന കനാലും നാച്ചാറും വലിയാറും ചേരുന്നത് ത്രിവേണി സംഗമത്തിലാണ്. വൈദ്യുതി നിലയത്തിൽ പ്രവർത്തിക്കുന്ന ജനറേറ്ററുകളുടെ എണ്ണമനുസരിച്ച് കനാലിലെ ജലനിരപ്പിന്‍റെ ഒഴുക്ക് കൂടിയും കുറഞ്ഞുമിരിക്കും. അപ്രതീക്ഷിതമായുണ്ടാകുന്ന ജലപ്രവാഹവും അടിയൊഴുക്കും കനാലിലും ത്രിവേണി സംഗമത്തിനു സമീപവും ഇറങ്ങുന്നവരെ അപകടത്തിലാക്കും. പരിസരവാസികളും പുറമേ നിന്നെത്തുന്നവരും ഉൾപ്പെടെ ഇവിടെ പതിവായി അപകടത്തിൽപ്പെടുന്നുണ്ട്.ത്രിവേണിയുടെയും ഇവിടെയുള്ള തൂക്കുപാലത്തിന്‍റെയും മനോഹാരിത ആസ്വദിക്കാനായി ഒട്ടേറെപ്പേരാണ് ഇവിടെയെത്തുന്നത്. ശക്തമായ അടിയൊഴുക്കും തണുപ്പും ഏറെ ആഴവും ഇവിടെ ജലാശയത്തിന്‍റെ പ്രത്യേകതയാണ്. എന്നാൽ ഒരിടത്തും അപകട മുന്നറിയിപ്പ് ബോർഡ് സ്ഥാപിച്ചിട്ടില്ല. മൂലമറ്റം കനാലിൽ വീണുള്ള അപകടങ്ങൾ ഒഴിവാക്കാൻ പദ്ധതി തയാറാക്കുമെന്ന് കെഎസ്ഇബി നേരത്തേ പറഞ്ഞിരുന്നെങ്കിലും ഒന്നും നടപ്പായില്ല. പഞ്ചായത്ത് അധികൃതരും ഇക്കാര്യത്തിൽ ഒരു നടപടിയും സ്വീകരിച്ചിട്ടില്ല. അപകടങ്ങൾ കൂടിയതോടെ അലാറം അടക്കം സംവിധാനങ്ങൾ ഒരുക്കണമെന്നാവശ്യപ്പെട്ട് നാട്ടുകാർ കെഎസ്ഇബിയെ സമീപിച്ചിരുന്നു. എന്നാൽ സംസ്ഥാനത്തെ ആവശ്യമനുസരിച്ച് വൈദ്യുതി ഉത്പാദിപ്പിക്കുന്നതിനാൽ ജലനിരപ്പ് ഉയരുന്പോൾ മുന്നറിയിപ്പ് സംവിധാനങ്ങൾ പ്രായോഗികമല്ലെന്നായിരുന്നു കെഎസ്ഇബിയുടെ നിലപാട്. പകരം കനാലിൽ കൂടുതൽ പ്രകാശസംവിധാനം ഒരുക്കുമെന്നും ഇതോടൊപ്പം കനാലിന്‍റെ ഇരുകരകളിലും വടം സ്ഥാപിക്കാനാവശ്യമായ പൈപ്പുകൾ സ്ഥാപിക്കുമെന്നും പറഞ്ഞിരുന്നെങ്കിലും ഇതും പാഴ്‌വാക്കായി. വടം സ്ഥാപിച്ചാൽ ഒഴുക്കിൽപ്പെടുന്നവർക്ക് ഇതിൽപ്പിടിച്ച് കയറാമെന്നതായിരുന്നു കണക്കുകൂട്ടൽ. ഒഴുക്കിൽപ്പെട്ട് മരണങ്ങൾ വർധിച്ചതോടെ അടിയന്തരമായി ഇവിടെ മുന്നറിയിപ്പു സംവിധാനം ഒരുക്കണമെന്നാണ് നാട്ടുകാരുടെ ആവശ്യം. ഈ ആവശ്യമുന്നയിച്ച് പഞ്ചായത്ത് ടൂറിസം കൗണ്‍സിൽ ഭാരവാഹികളായ സണ്ണി കൂട്ടുങ്കൽ, ജോസ് ഇടക്കര, സന്തോഷ് രാജേന്ദു എന്നിവർ ജില്ലാ കളക്ടർക്ക് കഴിഞ്ഞ ദിവസം നിവേദനം നൽകിയിരുന്നു. ജലാശയത്തിൽ ജലനിരപ്പുയരുന്പോൾ മുന്നറിയിപ്പ് നൽകുന്ന സംവിധാനം സ്ഥാപിക്കണമെന്നാണ് നാട്ടുകാരുടെ പ്രധാന ആവശ്യം. കനാലിൽ കുളിക്കാനിറങ്ങുന്നവരും മറ്റും അപകടത്തിൽപ്പെടാതിരിക്കാൻ ഇതു സഹായകമാകും. ഇതിനു പുറമേ പഞ്ചായത്തിന്‍റെ നേതൃത്വത്തിൽ മുന്നറിയിപ്പു ബോർഡുകൾ, സുരക്ഷാവേലി എന്നിവ സ്ഥാപിക്കണമെന്ന ആവശ്യവും ശക്തമായിട്ടുണ്ട്.

മറയൂരിന്‍റെ കാട്ടുപാതയിൽ പൂത്തുവിരിഞ്ഞ് ഗ്ലോറി ലില്ലി

മറയൂർ: ജില്ലയിലെ മറയൂർ മേഖലയിലെ ചിന്നാറിൽനിന്ന് തായണ്ണൻകുടിയിലേക്കുള്ള കാട്ടുപാതയിൽ, സിംബാബ്‌വേയുടെ ദേശീയ പുഷ്പമായ ഗ്ലോറിയോസ സൂപ്പർബ പൂത്തുലഞ്ഞു. സാധാരണ ഗ്ലോറി ലില്ലി എന്നും തമിഴിൽ കാന്തൽപൂ എന്നും മലയാളത്തിൽ മേ ന്തോന്നി എന്നും ഈ വള്ളിച്ചെടി അറിയപ്പെടുന്നുണ്ട്. ഇതിന്‍റെ പൂക്കൾക്ക് 4.4 സെന്‍റീമീറ്റർ വലിപ്പമുണ്ട്, ചുവപ്പ്, മഞ്ഞ, ഓറഞ്ച് എന്നീ നിറങ്ങളിൽ കാണപ്പെടുന്ന പൂക്കൾ ആകർഷകമാണ്. പൂവിന്‍റെ ഇതളുകൾ നീളമേറിയതും വളഞ്ഞതുമാണ്, ഇത് ചെടിക്ക് കൂടുതൽ ഭംഗി നൽകുന്നു. ഈ ചെടി സാധാരണയായി 2900 അടി ഉയരത്തിൽ താഴെയുള്ള വനപ്രദേശങ്ങളിലും പുൽമേടുകളിലുമാണ് വളരുന്നത്. ഉയർന്ന മലനിരകളിൽ ഇവയുടെ വളർച്ച കുറവാണ്. ഔഷധഗുണമുള്ള ഇത് പരന്പരാഗത വൈദ്യത്തിനും വ്യാപകമായി ഉപയോഗിക്കപ്പെടുന്നുണ്ട്. ഇതിന്‍റെ വേര്, ഇല, വിത്ത് എന്നിവയെല്ലാം ഔഷധഗുണമുള്ളതാണ്. വാതം, വേദന, ചർമരോഗങ്ങൾ എന്നിവയ്ക്കുള്ള ചികിത്സയ്ക്കാണ് ഇത് ഉപയോഗിക്കുന്നത്. എന്നാൽ ഈ ചെടിയിൽ കോൾചിസിൻ എന്ന രാസവസ്തു അടങ്ങിയിരിക്കുന്നതിനാൽ ഔഷധനിർമാണത്തിൽ ശ്രദ്ധാപൂർവം മാത്രമേ ഉപയോഗിക്കാവൂ. മറയൂരിന്‍റെ പ്രകൃതിസൗന്ദര്യത്തിന് മാറ്റുകൂട്ടി മേഖലയിലെ പുൽമേടുകളിലും വനപാതകളിലും ഗ്ലോറി ഓഫ് ലില്ലി ഇതുവഴി സഞ്ചരിക്കുന്നവർക്ക് കാഴ്ചയുടെ വിരുന്നൊരുക്കുന്നു. ചിന്നാറിൽനിന്ന് തായണ്ണൻകുടിയിലേക്കുള്ള വഴിയിലാണ് ഇവ കൂടുതലായും പൂവിട്ടുനിൽക്കുന്നത്. ജൂലൈ, ഓഗസ്റ്റ് മാസങ്ങളിലാണ് കൂടുതലായും ഇവ പുഷ്പിക്കുന്നത്.

പാലത്തിന്‍റെ കൈവരികൾ തകർന്ന് അപകടഭീഷണി

മറയൂർ: നോർത്തേണ്‍ ഔട്ട്‌ലെറ്റ് റോഡിലെ പാലത്തിന്‍റെ കൈവരികൾ തകർന്നു വാഹനങ്ങൾക്കും കാൽനടയാത്രക്കാർക്കും ഒരുപോലെ ഭീഷണിയാകുന്നു. അന്തർസംസ്ഥാന പാതയായ നോർത്തേണ്‍ ഔട്ട്‌ലെറ്റ് റോഡിൽ മറയൂർ ടൗണ്‍ പരിസരത്താണ് അപകടസാധ്യത നിലനിൽക്കുന്നത്. അന്തർസംസ്ഥാന പാതയിൽ തിരക്കേറിയതോടെ അപകടത്തിന്‍റെ സാധ്യത വർധിച്ചിരിക്കുകയാണ്. വീതി കുറഞ്ഞ പാലത്തിലൂടെ നടക്കുന്നവർ വാഹനം വരുന്പോൾ കൈവരി ഇല്ലാത്തതിനാൽ തോട്ടിലേക്ക് വീഴാനുള്ള സാധ്യത ഏറെയാണ്. തകർന്ന കൈവരികൾമൂലം യാത്രക്കാർക്ക് പാലത്തിന്‍റെ വശങ്ങളിൽ പിടിക്കാനും കഴിയുന്നില്ല. കുട്ടികളും വയോജനങ്ങളും ഭീതിയോടെയാണ് പാലത്തിലൂടെ സഞ്ചരിക്കുന്നത്. പാലത്തിന് കൈവരി സ്ഥാപിച്ച് അപകടം ഒഴിവാക്കാൻ അടിയന്തര നടപടി സ്വീകരിക്കണമെന്നാണ് ജനങ്ങൾ ആവശ്യപ്പെടുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]