തൊടുപുഴ: താളമേള ലയങ്ങളോടെ റവന്യൂ ജില്ലാ സ്കൂൾ കലോത്സവം "ഉണർവ് 2k22'നു ഇന്ന് മുതലക്കോടം സെന്‍റ് ജോർജ് ഹയർ സെക്കൻഡറി സ്കൂളിൽ തിരിതെളിയും. നാല് ദിവസം പത്തു വേദികളിലായി നടക്കുന്ന കൗമാരോത്സവത്തിൽ ഏഴു ഉപജില്ലകളിൽനിന്നായി 3,500 ഓളം പ്രതിഭകൾ മാറ്റുരയ്ക്കുമെന്ന് അധികൃതർ പത്രസമ്മേളനത്തിൽ അറിയിച്ചു.
മുതലക്കോടം സെന്‍റ് ജോർജ് ഹയർ സെക്കൻഡറി സ്കൂൾ, സേക്രട്ട് ഹാർട്ട് ഗേൾസ് ഹൈസ്കൂൾ, സെന്‍റ് ജോർജ് ഹൈസ്കൂൾ, സെന്‍റ് ജോർജ് പാരീഷ് ഹാൾ എന്നിവിടങ്ങളിലായാണ് മത്സരങ്ങൾ നടക്കുന്നത്.
ഇന്നുരാവിലെ 9.30ന് ജില്ലാ വിദ്യാഭ്യാസ ഉപഡയറക്ടർ കെ. ബിന്ദു പതാക ഉയർത്തും. ആദ്യദിനമായ ഇന്നു വയലിൻ, ഗിത്താർ, ട്രിപ്പിൾ, ജാസ്, പദ്യംചൊല്ലൽ, പ്രസംഗം, ബാൻഡ്, തായന്പക, ചെണ്ടമേളം, ഓടക്കുഴൽ, തബല, നാദസ്വരം, മൃദംഗം, വൃന്ദവാദ്യം, ക്ലാർനെറ്റ്, ബ്യൂഗിൾ, കഥാ- കവിതാ -ചിത്രരചന, ഉപന്യാസം, കാർട്ടൂർ, കൊളാഷ് എന്നീ മൽസരങ്ങൾ നടക്കും.
കലോത്സവത്തിന്റെ ഉദ്ഘാടനം നാളെ രാവിലെ 10ന് സെന്‍റ് ജോർജ് പാരീഷ് ഹാളിൽ ഡീൻ കുര്യാക്കോസ് എംപി നിർവഹിക്കും. പി.ജെ. ജോസഫ് എംഎൽഎ അധ്യക്ഷത വഹിക്കും. വാഴൂർ സോമൻ എംഎൽഎ മുഖ്യപ്രഭാഷണം നടത്തും. സ്കൂൾ മാനേജർ റവ. ഡോ. ജോർജ് താനത്തുപറന്പിൽ അനുഗ്രഹപ്രഭാഷണം നടത്തും. ഇടുക്കി സബ് കളക്ടർ ഡോ. അരുണ്‍ എസ്. നായർ സന്ദേശം നൽകും. കലോത്സവത്തിന്റെ ലോഗോ തയാറാക്കിയ നെയ്യശേരി എസ്എൻസിഎം എൽപി സ്കൂൾ അധ്യാപകൻ സി.എം. സുബൈർ, കലോത്സവത്തിന്റെ പേരു നിർദേശിച്ച മാങ്കുളം സെന്‍റ് മേരീസ് എച്ച്എസ്എസിലെ പ്ലസ്‌വ‌‌ണ്‍ വിദ്യാർഥി എഡ്‌വിൻ ജിമ്മി എന്നിവർക്ക് ചടങ്ങിൽ നഗരസഭ ചെയർമാൻ സനീഷ് ജോർജ് പുരസ്കാരം സമ്മാനിക്കും. കലോത്സവത്തിന്റെ വിജയകരമായ നടത്തിപ്പിന് 501 അംഗ കമ്മിറ്റി പ്രവർത്തിച്ചുവരുന്നു.
മൂന്നിന് വൈകുന്നേരം 4.30നു നടക്കുന്ന സമാപന സമ്മേളനം നഗരസഭ ചെയർമാൻ സനീഷ് ജോർജ് ഉദ്ഘാടനം ചെയ്യും. വൈസ് ചെയർപേഴ്സണ്‍ ജെസി ജോണി അധ്യക്ഷത വഹിക്കും. തൊടുപുഴ ഡിവൈഎസ്പി മധുബാബു സന്ദേശം നൽകും. ജില്ലാ വിദ്യാഭ്യാസ ഉപഡയറക്ടർ കെ. ബിന്ദു സമ്മാന വിതരണം നടത്തും. ഹെഡ്മാസ്റ്റർ ഫാ. പോൾ ഇടത്തൊട്ടി, ഹെഡ്മിസ്ട്രസ് സിസ്റ്റർ ഡാന്‍റി ജോസഫ്, യുപി സ്കൂൾ ഹെഡ്മിസ്ട്രസ് മേരി ജോർജ് എന്നിവർ പ്രസംഗിക്കും. പത്രസമ്മേളനത്തിൽ ജില്ലാ വിദ്യാഭ്യാസ ഉപഡയറക്ടർ കെ. ബിന്ദു, മുതലക്കോടം എസ്ജിഎച്ച്എസ്എസ് പ്രിൻസിപ്പൽ ജിജി ജോർജ്, പബ്ലിസിറ്റി കണ്‍വീനർ സണ്ണി കൂട്ടുങ്കൽ, പ്രോഗ്രാം കമ്മിറ്റി ജോയിന്റ് കണ്‍വീനർ ജോർജ് വർഗീസ് എന്നിവർ പങ്കെടുത്തു.