ADVERTISEMENT

ADVERTISEMENT

കേരള ഗസറ്റഡ് ഓഫീസേഴ്സ് യൂണിയൻ ജില്ലാ സമ്മേളനം

ചെറുതോണി: കേരള ഗസറ്റഡ് ഓഫീസേഴ്സ് യൂണിയൻ ജില്ലാ സമ്മേളനം ചെറുതോണിയിൽ നടന്നു. ഇഗ്ലു ഓഡിറ്റോറിയത്തിൽ നടന്ന സമ്മേളനം കെജിഒയു സംസ്ഥാന പ്രസിഡന്‍റ് എ. അബ്ദുൽ ഖാരിസ് ഉദ്ഘാടനം ചെയ്തു.
ജില്ലാ പ്രസിഡന്‍റ് കെ.എൻ. മോഹൻദാസ് അധ്യക്ഷത വഹിച്ചു. ഡിസിസി സെക്രട്ടറി എം.ഡി. അർജുനൻ മുഖ്യപ്രഭാഷണം നടത്തി. സംഘടനാചർച്ച സംസ്ഥാന ജനറൽ സെക്രട്ടറി കെ.സി. സുബ്രഹ്മണ്യനും സമാപന സമ്മേളനം കെപിസിസി എക്സിക്യൂട്ടീവ് അംഗം എ.പി. ഉസ്മാനും ഉദ്ഘാടനം ചെയ്തു.
കോൺഗ്രസ് വാഴത്തോപ്പ് മണ്ഡലം പ്രസിഡന്‍റ് പി.ഡി. ജോസഫ് , സാബു ജോൺ, വി.എം. ഷൈൻ, പി. ഉണ്ണികൃഷ്ണൻ, കെ.എസ്. ജോസഫ് , സണ്ണി മാത്യു, രാജേഷ് ബേബി, എസ്. സിയാദ്, കെ.കെ. അനിൽ, എസ്.എ. നജീം തുടങ്ങിയവർ പ്രസംഗിച്ചു.

ADVERTISEMENT

റോഡ് നിർമാണം വൈകുന്നതിൽ പ്രതിഷേധിച്ച് ബഹുജന സമരം

രാജാക്കാട്: എല്ലയ്ക്കൽ വലിയ മുല്ലക്കാനം റോഡ്, എല്ലയ്ക്കൽ പൊട്ടൻകാട് റോഡ് എന്നിവയുടെ നിർമാണം വൈകുന്നതിൽ പ്രതിഷേധിച്ച് കോൺഗ്രസ് ബൈസൺവാലി പഞ്ചായത്ത് കമ്മിറ്റിയുടെ നേതൃത്വത്തിൽ എല്ലയ്ക്കൽ പാലം ജംഗ്ഷനിൽ പ്രതിഷേധ സമരം സംഘടിപ്പിച്ചു. അഞ്ച് കിലോമീറ്റർ ദൂരമുള്ള റോഡും മുതിരപ്പുഴയാറിന് കുറുകെ എല്ലയ്ക്കല്ലിൽ പാലവും നിർമിക്കുന്നതിനുമായി 39 കോടി രൂപ അനുവദിച്ചതാണ്. ബിആർകെ കമ്പനിയാണ് കരാർ ഏറ്റെടുത്തത്. കരാർ കാലാവധി കഴിഞ്ഞ് ഒരു ടേംകൂടി നീട്ടിനൽകിയ മേയിൽ പ്രവർത്തിയുടെ മൂന്നിലൊന്നുപോലും പൂർത്തിയാക്കാൻ കഴിഞ്ഞിട്ടില്ല. പാലത്തിന്‍റെ തൂണുപോലും നിർമിച്ചിട്ടില്ല. കാലവർഷത്തിൽ പുഴയിൽ വെളളമൊഴുക്ക് കൂടുന്നതിനാൽ ഇനിയും കാലതാമസമുണ്ടാകും. നിലവിൽ ഒരു കിലോമീറ്റർ മാത്രമാണ് ഭാഗികമായി ടാർ ചെയ്തത്. കൊച്ചുമുല്ലക്കാനം മുതൽ തേക്കുംകാനം വരെ ചെളിക്കുണ്ടായി കിടക്കുന്നതുമൂലം വാഹനങ്ങൾ അതുവഴി വരാൻ തയാറാകുന്നില്ല. റോഡ് നിർമാണത്തിന്‍റെ പേരിൽ അനധികൃതമായി കോടിക്കണക്കിന് രൂപയുടെ പാറ ഖനനം നടത്തിയിട്ടുണ്ടെന്നും വീടുകൾക്ക് ഭീഷണിയുള്ള പല സ്ഥലങ്ങളിലും സംരക്ഷണഭിത്തി നിർമിച്ചിട്ടില്ലെന്നും കോൺഗ്രസ് നേതാക്കൾ ആരോപിച്ചു. പിഎംജിഎസ്‌വൈ പദ്ധതി പ്രകാരം നിർമിക്കുന്ന എല്ലയ്ക്കൽ - പൊട്ടൻകാട് റോഡിന്‍റെ നിർമാണവും ഇഴയുകയാണ്. റോഡ് ചെളിനിറഞ്ഞ് കുണ്ടുംകുഴിയുമായി കിടക്കുകയാണ്. പ്രതിഷേധ സമരത്തിൽ കോൺഗ്രസ് വാർഡ് പ്രസിഡന്‍റ് ഓമന തങ്കച്ചൻ അധ്യക്ഷത വഹിച്ചു.അടിമാലി ബ്ലോക്ക് പഞ്ചായത്ത് മെംബർ ജോർജ് തോമസ് ഉദ്ഘാടനം നിർവഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് ഷാന്‍റി ബേബി, വി.ജെ. ജോസഫ്, ഷാബു കൊറ്റംചിറക്കുന്നേൽ തുടങ്ങിയവർ പ്രസംഗിച്ചു.

രാജ്യാന്തര മത്സരത്തിൽ തുടര്‍ച്ചയായി ഇരട്ട സ്വര്‍ണമെഡല്‍

നെടുങ്കണ്ടം: മലമടക്കുകളില്‍ പരിശീലനം നടത്തി ലോകരാജ്യങ്ങള്‍ക്ക് മുമ്പില്‍ ഇന്ത്യന്‍ പതാക ഉയര്‍ത്തി മരീന ജോര്‍ജ്. അമേരിക്കയില്‍ നടന്ന വേള്‍ഡ് പോലീസ് അത്‌ലറ്റിക് ചാമ്പ്യന്‍ഷിപ്പില്‍ ഇന്ത്യക്കുവേണ്ടി ലോംഗ് ജംപിലും ഹെപ്റ്റാത്തലണിലും ഇരട്ട സ്വര്‍ണം നേടിയാണ് മരീന രാജ്യത്തിനഭിമാനമായത്. എഴുപതോളം രാജ്യങ്ങളാണ് ഒന്നിന് യുഎസിലെ അലബാമയില്‍ ആരംഭിച്ച വേള്‍ഡ് പോലീസ് അത്‌ലറ്റിക് ചാമ്പ്യന്‍ഷിപ്പില്‍ പങ്കെടുക്കുന്നത്. ചാമ്പ്യന്‍ഷിപ്പില്‍ രണ്ടിനങ്ങളിലും തുടര്‍ച്ചയായി രണ്ടാം വര്‍ഷം സ്വര്‍ണം കരസ്ഥമാക്കുന്ന ആദ്യ വനിതകൂടിയാണ് മരീന. കഴിഞ്ഞതവണ കാനഡയില്‍ നടന്ന പോലീസ് ചാമ്പ്യന്‍ഷിപ്പിലും ഇതേ ഇനങ്ങളില്‍ മരീന രണ്ട് സ്വര്‍ണം നേടിയിരുന്നു. കോമ്പയാര്‍ കൊച്ചുകുന്നുംപുറത്ത് ടിജോ തോമസിന്‍റെ ഭാര്യയാണ് കുട്ടിക്കാനം കെഎപി - 5 ബറ്റാലിയനിലെ ഉദ്യോഗസ്ഥയായ മരീന. ഭര്‍ത്താവ് ടിജോ ഇടുക്കി എആര്‍ ക്യാമ്പിലെ ഉദ്യോഗസ്ഥനാണ്. കഴിഞ്ഞ ആറ് മാസമായി മത്സരത്തിനുവേണ്ടി മരീന പരിശീലനം നടത്തിയത് നെടുങ്കണ്ടത്തെ ഹൈ ആള്‍ട്ടിട്യൂഡ് സ്റ്റേഡിയത്തിലാണ്. വാഴത്തോപ്പ്, കാല്‍വരിമൗണ്ട് കാല്‍വരി സ്‌കൂളുകളിലും പാലാ സെന്‍റ് തോമസ് കോളജിലുമായാണ് പഠനം പൂര്‍ത്തിയാക്കിയത്. പഠനസമയത്തും ജില്ലാ, സംസ്ഥാന, ദേശീയ മത്സരങ്ങളില്‍ മെഡല്‍വേട്ട നടത്തിയ താരമാണ് മരീന. വിവേക്, സിനു ജോണി എന്നിവരാണ് പരിശീലകര്‍.

യുവതിയുടെ മരണം കൊലപാതകം: ഭർത്താവിനെതിരെ കൊലക്കുറ്റം

തൊടുപുഴ: വിഷം ഉള്ളിൽച്ചെന്ന് യുവതിയായ വീട്ടമ്മ മരിച്ച സംഭവം കൊലപാതകമെന്ന് പോലീസ്. സംഭവത്തിൽ റിമാൻഡിൽ കഴിയുന്ന ഭർത്താവിനെതിരേ കൊലക്കുറ്റം ചുമത്തി. യുവതി ചികിത്സയിൽ കഴിയുന്നതിനിടെ നൽകിയ മരണമൊഴിയിലാണ് ഭർത്താവിന്‍റെ ക്രൂരകൃത്യം വെളിപ്പെടുത്തിയത്. പുറപ്പുഴ ആനിമൂട്ടിൽ ജോർലി (34) വിഷം ഉള്ളിൽച്ചെന്ന് മരിച്ച സംഭവത്തിലാണ് ഭർത്താവ് ടോണി മാത്യു (43) വിനെതിരെ കരിങ്കുന്നം പോലീസ് കൊലക്കുറ്റം ചുമത്തിയത്. നേരത്തെ വധശ്രമത്തിനാണ് ഇയാൾക്കെതിരേ കേസെടുത്തിരുന്നത്. കഴിഞ്ഞ 26നാണ് ജോർലിയെ വിഷം ഉള്ളിൽച്ചെന്ന് ഗുരുതരാവസ്ഥയിൽ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചത്. വീട്ടിൽനടന്ന വഴക്കിനിടെ ബലം പ്രയോഗിച്ച് കവിളിൽ കുത്തിപ്പിടിച്ചശേഷം ഭർത്താവ് ടോണി കുപ്പിയിലെ വിഷം വായിൽ ഒഴിച്ചു നൽകുകയായിരുവെന്ന് ജോർലി ആശുപത്രിയിൽ വച്ച് മജിസ്ട്രേറ്റിനും പോലീസിനും മൊഴി നൽകിയിരുന്നു. തീവ്രപരിചരണ വിഭാഗത്തിൽ കഴിഞ്ഞിരുന്ന ജോർലി വ്യാഴാഴ്ച വൈകുന്നേരം നാലരയോടെയാണ് മരിച്ചത്. വിഷം ഉള്ളിൽച്ചെന്നനിലയിൽ ജോർലിയെ ആശുപത്രിയിൽ പ്രവേശിപ്പിച്ചതുമായി ബന്ധപ്പെട്ട് ജോർലിയുടെ പിതാവ് പല്ലാരിമംഗലം അടിവാട് കുന്നക്കാട് ജോണ്‍ കരിങ്കുന്നം പോലീസിൽ പരാതി നൽകിയിരുന്നു. ഭർത്താവിന്‍റെയും ബന്ധുക്കളുടെയും ഭാഗത്തുനിന്ന് ജോർലിക്ക് നിരന്തരമായി കടുത്ത മാനസിക, ശാരീരിക പീഡനങ്ങൾ ഏറ്റിരുന്നതായി പരാതിയിൽ വ്യക്തമാക്കിയിരുന്നു. ഇതിന്‍റെ തുടർച്ചയായി പോലീസ് നടത്തിയ അന്വേഷണത്തിൽ ഭർതൃവീട്ടിൽ ജോർലി കടുത്ത പീഡനമേറ്റിരുന്നെന്നും വിഷം ഇയാൾ കടയിൽനിന്നു വാങ്ങിയതാണെന്നും വ്യക്തമായി. ഇതിനു പുറമേയാണ് ടോണി ബലമായി വിഷം വായിൽ ഒഴിച്ചുകൊടുക്കുകയായിരുന്നെന്ന് ജോർലി മജിസ്ട്രേറ്റിനും പോലീസിനും മൊഴി നൽകിയത്. ഇതിന്‍റെ അടിസ്ഥാനത്തിലാണ് ടോണിക്കെതിരേ വധശ്രമം അടക്കമുള്ള വകുപ്പുകൾ ചുമത്തി കഴിഞ്ഞ ദിവസം അറസ്റ്റ് ചെയ്തത്. തുടർന്ന് ഇയാളെ പുറപ്പുഴയിലെ വീട്ടിലും വിഷം വാങ്ങിയ പുറപ്പുഴയിലെ വ്യാപാര സ്ഥാപനത്തിലും എത്തിച്ച് തെളിവെടുക്കുകയും ചെയ്തു. ഇതിനു ശേഷം കോടതിയിൽ ഹാജരാക്കി റിമാൻഡ് ചെയ്തിരുന്നു. ആവശ്യമെങ്കിൽ ടോണിയെ വീണ്ടും കസ്റ്റഡിയിൽ വാങ്ങുമെന്നും ഇയാളുടെ ബന്ധുക്കൾക്ക് സംഭവത്തിൽ പങ്കുണ്ടോയെന്ന് അന്വേഷിച്ചുവരികയാണെന്നും അന്വേഷണ ഉദ്യോഗസ്ഥനായ സിഐ ഇ.കെ. സോൾജിമോൻ പറഞ്ഞു. പോസ്റ്റുമോർട്ടത്തിനു ശേഷം ബന്ധുക്കൾക്ക് വിട്ടു നൽകിയ മൃതദേഹം സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. സംസ്കാരം നാളെ 2.30ന് പൈങ്ങോട്ടൂർ സെന്‍റ് ആന്‍റണീസ് ഫൊറോന പള്ളിയിൽ നടക്കും.

കരിദിനം ആചരിച്ചു

നെടുങ്കണ്ടം: കേരള സ്റ്റേറ്റ് സര്‍വീസ് പെന്‍ഷനേഴ്‌സ് അസോസിയേഷന്‍ ഉടുമ്പന്‍ചോല നിയോജക മണ്ഡലം കമ്മിറ്റിയുടെ ആഭിമുഖ്യത്തില്‍ കരിദിനം ആചരിച്ചു. സംസ്ഥാന സര്‍ക്കാര്‍ ജീവനക്കാരുടെയും പെന്‍ഷന്‍കാരുടെയും ശമ്പളവും പെന്‍ഷനും പരിഷ്‌കരിക്കേണ്ട കാലാവധി കഴിഞ്ഞിട്ട് ഒരു വര്‍ഷം പിന്നിട്ടും ശമ്പള പരിഷ്‌കരണ കമ്മീഷനെ നിയമിക്കാന്‍ സര്‍ക്കാര്‍ തയാറായിട്ടില്ല. പരിഷ്‌കരണം അനന്തമായി നീട്ടിക്കൊണ്ടുപോയി അഞ്ചുവര്‍ഷം കൂടുമ്പോൾ ശമ്പളപരിഷ്‌കരണം എന്ന കീഴ്വഴക്കം അട്ടിമറിക്കാനുള്ള നീക്കമാണ് സര്‍ക്കാര്‍ നടത്തുന്നതെന്ന് അസോസിയേഷന്‍ ആരോപിച്ചു. അസോസിയേഷന്‍റെ നേതൃത്വത്തില്‍ സംസ്ഥാന വ്യാപകമായി നടത്തുന്ന കരിദിനാചരണത്തിന്‍റെ ഭാഗമായാണ് നെടുങ്കണ്ടം സബ് ട്രഷറിക്ക് മുമ്പില്‍ പ്രതിഷേധ പരിപാടി സംഘടിപ്പിച്ചത്. യോഗത്തില്‍ അസോസിയേഷന്‍ നിയോജക മണ്ഡലം പ്രസിഡന്‍റ് പി.ജെ. ജോസഫ് അധ്യക്ഷത വഹിച്ചു. സംസ്ഥാന സെക്രട്ടറിയേറ്റംഗം പി.കെ. ഷാജി ഉദ്ഘാടനം ചെയ്തു. ജില്ലാ ട്രഷറാര്‍ വി.എ. ജോസഫ്, കെ.എ. രാജന്‍, എബ്രഹാം മാത്യു തുടങ്ങിയവര്‍ പ്രസംഗിച്ചു.

കല്ലാര്‍ സ്‌കൂളില്‍ ലഹരിക്കെതിരേ മനുഷ്യച്ചങ്ങല തീർക്കും

നെടുങ്കണ്ടം: കല്ലാര്‍ ഗവ. ഹയര്‍ സെക്കൻഡറി സ്‌കൂളിന്‍റെ സപ്തതി ആഘോഷങ്ങളുടെ ഭാഗമായി ലഹരിക്കെതിരേ മനുഷ്യച്ചങ്ങല തീര്‍ക്കും. ഒരു വര്‍ഷം നീണ്ടുനില്‍ക്കുന്ന സപ്തതി ആഘോഷങ്ങളുടെ ഉദ്ഘാടനം നടക്കുന്ന 17ന് രാവിലെ 10ന് മുണ്ടിയെരുമയിലാണ് വിദ്യാര്‍ഥികളുടെയും അധ്യാപകരുടെയും രക്ഷിതാക്കളുടെയും നേതൃത്വത്തില്‍ മനുഷ്യച്ചങ്ങല തീര്‍ക്കുന്നത്. ലഹരിവിമുക്ത പട്ടംകോളനി എന്ന ലക്ഷ്യത്തോടെ സ്‌കൂളിനെ പൂര്‍ണമായി ചുറ്റി അണിനിരക്കുന്ന മനുഷ്യച്ചങ്ങലയില്‍ നൂറുകണക്കിന് വിദ്യാര്‍ഥികളും രക്ഷിതാക്കളും അധ്യാപകരും കണ്ണികളാവും. പരിപാടിയുടെ ഭാഗമായി പൊതുജനങ്ങള്‍ക്കായി ലഹരിവിരുദ്ധ സന്ദേശ മത്സരവും സംഘടിപ്പിക്കും. ലഹരിവിരുദ്ധ ബോധവത്കരണം പ്രമേയമാക്കിയ മൂന്നുവാക്യത്തില്‍ കൂടാത്ത ആപ്തവാക്യമാണ് ക്ഷണിക്കുന്നത്. ഏറ്റവും മികച്ച ആശയം ഒരു വര്‍ഷം നീണ്ടുനില്‍ക്കുന്ന പരിപാടിയുടെ തലക്കെട്ടാകും. വിജയിക്ക് 2,500 രൂപ അവാര്‍ഡ് നല്‍കും. ആശയങ്ങള്‍ 9446928345 എന്ന വാട്‌സ്ആപ് നമ്പറില്‍ അയയ്ക്കണമെന്ന് സപ്തതി ആഘോഷ കമ്മിറ്റി ചെയര്‍മാന്‍ രമേശ് കൃഷ്ണന്‍, വര്‍ക്കിംഗ് ചെയര്‍മാന്‍ വിജയന്‍ പിള്ള, ജനറല്‍ കണ്‍വീനര്‍ കെ.വി. ഹെല്ലോക്ക്, ഭാരവാഹികളായ ജോമോന്‍ താന്നിക്കല്‍, റസാഖ് മൗലവി, എം.സി. വിനയരാജ്, അംബുജാക്ഷന്‍ എന്നിവര്‍ അറിയിച്ചു.

വിഷരഹിത പച്ചക്കറി കൃഷിയുമായി കുട്ടിക്കർഷകർ

വെള്ളിയാമറ്റം: പഞ്ചായത്തിന്‍റെ നേതൃത്വത്തിൽ കൃഷിയുടെ പുത്തൻ പാഠങ്ങളുമായി ഒന്പതു സ്കൂളുകളിലെ കുട്ടിക്കർഷകർ. സ്കൂൾ വിദ്യാർഥികളെ കൃഷിയിലേക്ക് ആകർഷിക്കുന്ന പദ്ധതിയായ കൃഷി അങ്കണത്തിലാണ് പഞ്ചായത്തിലെ സർക്കാർ, എയ്ഡഡ് സ്കൂളുകളെ ഉൾപ്പെടുത്തി വിഷരഹിത പച്ചക്കറി ഉത്പാദിപ്പിക്കുന്ന പദ്ധതിക്ക് തുടക്കമിടുന്നത്. കുട്ടികൾക്ക് ഉപയോഗിക്കാവുന്ന തരത്തിലുള്ള ചട്ടികളിൽ പച്ചക്കറി കൃഷിക്കുള്ള തൈകളും വളവും പഞ്ചായത്ത് സൗജന്യമായി നൽകും. ഇതിനാവശ്യമായ തൈകൾ കൃഷിഭവൻ വഴിയാണ് വിതരണം ചെയ്യുന്നത്. ചീര, വെണ്ട, വഴുതന, പയർ, വെള്ളരി, ചീനി, തക്കാളി തുടങ്ങിയവയാണ് കൃഷി ചെയ്യുന്നത്. ഓരോ സ്കൂളിലും കുട്ടികളുടെ നേതൃത്വത്തിൽ അധ്യാപകരും, പിടിഎ ഭാരവാഹികളും ചേർന്ന് പച്ചക്കറി തൈകൾ നടും. തൈകളുടെ പരിപാലനം കുട്ടികളാണ് ചെയ്യുന്നത്. 450 പച്ചക്കറി ചട്ടികളാണ് സ്കൂളുകൾക്ക് വിതരണം ചെയ്തത്. വെള്ളിയാമറ്റം സഹകരണ ബാങ്കിന്‍റെ സഹകരണത്തോടെയാണ് പദ്ധതി നടപ്പാക്കുന്നത്. കരിപ്പലങ്ങാട് ഗവ. യുപിഎസ് , പൂച്ചപ്ര ഗവ. എച്ച്എസ്, വെള്ളിയാമറ്റം സികെവിഎച്ച്എസ്എസ്, വെള്ളിയാമറ്റം സെന്‍റ് ജോസഫ് യുപിഎസ്, വെട്ടിമറ്റം ഗവ. എൽപിഎസ്, ഇളംദേശം സെന്‍റ് ജോസഫ് എൽപിഎസ്, പന്നിമറ്റം സെന്‍റ് ജോസഫ് എൽപിഎസ്, പൂമാല ട്രൈബൽ എച്ച്എസ്എസ്, നാളിയാനി ഗവ. എൽപിഎസ് എന്നീ സ്കൂളുകളിലെ കുട്ടികളാണ് പദ്ധതിയിൽ പങ്കാളികളാകുന്നത്.

വെള്ളത്തൂവലില്‍ കോണ്‍ഗ്രസ് പ്രതിഷേധ മാര്‍ച്ചും ധര്‍ണ്ണയും നടത്തി

അടിമാലി: വെള്ളത്തൂവല്‍ പഞ്ചായത്ത് ഭരണസമിതിക്കെതിരേ ഗ്രാമപഞ്ചായത്തോഫീസിനു മുമ്പില്‍ കോണ്‍ഗ്രസ് പ്രതിഷേധ മാര്‍ച്ചും ധര്‍ണയും നടത്തി. മുതുവാന്‍കുടിയില്‍ പ്രവര്‍ത്തിക്കുന്ന വെള്ളത്തൂവല്‍ പഞ്ചായത്തിന്‍റെ മാലിന്യ സംഭരണ കേന്ദ്രവുമായി ബന്ധപ്പെട്ട് കോണ്‍ഗ്രസ് അഴിമതിയാരോപണം ഉന്നയിച്ചു. മാലിന്യം തരംതിരിച്ച് വിറ്റതിലടക്കം ക്രമക്കേട് നടന്നുവെന്നാണ് കോൺഗ്രസ് ആരോപണം. കോണ്‍ഗ്രസ് വെള്ളത്തൂവല്‍ മണ്ഡലം കമ്മിറ്റിയുടെ നേതൃത്വത്തില്‍ നടന്ന പ്രതിഷേധ സമരം ഡിസിസി പ്രസിഡന്‍റ് സി.പി. മാത്യു ഉദ്ഘാടനം ചെയ്തു.

ക്ഷീരവികസന വകുപ്പിന്‍റെ പദ്ധതികൾക്ക് അപേക്ഷിക്കാം

ഇടുക്കി: ക്ഷീര വികസനവകുപ്പിന്‍റെ വിവിധ പദ്ധതികൾക്ക് ഓണ്‍ലൈനായി 20 വരെ അപേക്ഷിക്കാം. എന്ന പോർട്ടൽ മുഖേന രജിസ്റ്റർ ചെയ്താണ് അപേക്ഷ സമർപ്പിക്കേണ്ടത്. പുൽക്കൃഷി വികസനം, മിൽക്ക് ഷെഡ് വികസനം, ഡയറി ഫാം ഹൈജീൻ മെച്ചപ്പെടുത്തുന്നതിനുള്ള പദ്ധതി തുടങ്ങിയവയ്ക്ക് അപേക്ഷിക്കാം. 20 സെന്‍റിന് മുകളിലുള്ള പുൽക്കൃഷി, തരിശുഭൂമിയിലെ പുൽക്കൃഷി, ചോളക്കൃഷി, പുൽക്കൃഷിക്ക് വേണ്ടിയുള്ള യന്ത്രവത്കരണ ധനസഹായം, ജലസേചന ധനസഹായം എന്നിവയും ഉൾപ്പെടുന്നതാണ് പുൽക്കൃഷി വികസന പദ്ധതി. ഡയറി ഫാമുകളുടെ ആധുനികവത്കരണവും യന്ത്രവത്കരണവും, കയർ മത്സ്യബന്ധന മേഖലകൾക്കായി പ്രത്യേക പുനരധിവാസ പദ്ധതി, 20 പശു യൂണിറ്റ്, 10 പശു യൂണിറ്റ്, അഞ്ച് പശു യൂണിറ്റ്, രണ്ട് പശു യൂണിറ്റ്, ഒരു പശു യൂണിറ്റ് എന്നീ പദ്ധതികൾ, യുവജനങ്ങൾക്കായി പത്തു പശുക്കൾ അടങ്ങുന്ന സ്മാർട്ട് ഡയറി ഫാം പദ്ധതി, മിൽക്കിംഗ് മെഷീൻ വാങ്ങുന്നതിനുള്ള ധനസഹായം, തൊഴുത്ത് നിർമാണ ധനസഹായം എന്നിവ ഉൾപ്പെടുന്ന മിൽക്ക് ഷെഡ് വികസന പദ്ധതികൾക്കും ഡയറി ഫാമിന്‍റെ ഹൈജീൻ മെച്ചപ്പെടുത്തുന്നതിനായുള്ള പദ്ധതികൾക്കും അപേക്ഷകൾ സമർപ്പിക്കാം. കൂടുതൽ വിവരങ്ങൾക്ക് ബ്ലോക്കുതലത്തിലെ ക്ഷീരവികസന യൂണിറ്റുമായി ബന്ധപ്പെടണം. ഫോണ്‍. 04862 222099.

ദേശീയപാതയില്‍ വാളറ പത്താംമൈലിന് സമീപം വാഹനാപകടം

അടിമാലി: കൊച്ചി - ധനുഷ്‌ക്കോടി ദേശീയപാതയില്‍ വാളറ പത്താംമൈലിന് സമീപം ലോറിയും കാറും കൂട്ടിയിടിച്ചു. എറണാകുളം ഭാഗത്തേക്ക് പോകുകയായിരുന്ന കാറും പെരുമ്പാവൂര്‍ ഭാഗത്തുനിന്ന് അടിമാലിക്ക് വരികയായിരുന്ന ലോറിയുമാണ് അപകടത്തിൽപ്പെട്ടത്. ആശുപത്രിയിലേക്ക് പോകുകയായിരുന്ന രാജാക്കാട് സ്വദേശികളാണ് കാറില്‍ ഉണ്ടായിരുന്നത്. അപകടത്തില്‍ കാര്‍ യാത്രക്കാര്‍ പരിക്കുകള്‍ ഇല്ലാതെ രക്ഷപ്പെട്ടു.

ബസ് കാത്തിരിപ്പ് കേന്ദ്രം ചെളിവെള്ളം കയറി ഉപയോഗ ശൂന്യമായി

ചെറുതോണി: വെള്ളവും ചെളിയുംനിറഞ്ഞ ബസ് കാത്തിരിപ്പ് കേന്ദ്രത്തിൽ പ്രവേശിക്കാനാവാതെ യാത്രക്കാർ. അടിമാലി - കുമളി ദേശീയ പാതയിൽ വാഴത്തോപ്പ് പള്ളിക്കവലയിൽ പഞ്ചായത്ത് വക ബസ് കാത്തിരിപ്പ് കേന്ദ്രമാണ് ഉപയോഗശൂന്യമായിരിക്കുന്നത്. നല്ലൊരു മഴ പെയ്താൽ റോഡരുകിലൂടെ ഒഴുകുന്ന മഴവെള്ളം ബസ് കാത്തിരിപ്പ് കേന്ദ്രത്തിനകത്ത് കയറും. ചെളിയും വെള്ളവും കെട്ടിക്കിടന്ന് ബസ് കാത്തുനിൽക്കുന്നവർ മഴയത്തുപോലും പുറത്തുനിൽക്കേണ്ട ഗതികേടിലാണ്. റോഡ് ഉയർത്തി പണിതതോടെയാണ് ചെളിയും വെള്ളവും കെട്ടിടത്തിനകത്ത് കയറാൻ തുടങ്ങിയത്. ബസ് കാത്തിരിപ്പ് കേന്ദ്രത്തിന്‍റെ തറ അര അടി ഉയർത്തിയാൽ തീരാവുന്ന പ്രശ്നമേയുള്ളെങ്കിലും അധികൃതർ തയാറാകുന്നില്ലെന്നാണ് നാട്ടുകാരുടെ ആക്ഷേപം. വാഴത്തോപ്പ് സെന്‍റ് ജോർജ് സ്കൂളിലെ വിദ്യാർഥികൾ ഉൾപ്പെടെയുള്ളവർ ഇവിടെയാണ് ബസ് കാത്തുനിൽക്കേണ്ടത്. എത്രയും വേഗം ബസ് കാത്തിരിപ്പ് കേന്ദ്രം ജനങ്ങൾക്ക് പ്രയോജനപ്പെടുന്നവിധമാക്കണമെന്ന് യാത്രക്കാരും വിദ്യാർഥികളും ആവശ്യപ്പെട്ടു.

ഉത്തരവാദിത്വ ടൂറിസം ഡെസ്റ്റിനേഷനാകാൻ മൂന്നാർ

ഇടുക്കി: അന്താരാഷ്‌ട്ര വിനോദ സഞ്ചാര കേന്ദ്രമായ മൂന്നാർ ഉത്തരവാദിത്വ ടൂറിസം ഡെസ്റ്റിനേഷനാകാൻ ഒരുങ്ങുന്നു. മൂന്നാറിലെ ആവാസവ്യവസ്ഥയെ സംരക്ഷിച്ച് ടൂറിസം പ്രവർത്തനങ്ങൾ സുസ്ഥിരവും ഉത്തരവാദിത്വ പൂർണവുമാക്കാൻ മൂന്നാറിനെ നെറ്റ് സീറോ ടൂറിസം ഡെസ്റ്റിനേഷനായി വികസിപ്പിക്കാനാണ് പദ്ധതി. ഇതിനായി വിവിധ റെസ്പോണ്‍സിബിൾ ടൂറിസം പദ്ധതികളും പ്രവർത്തനങ്ങളും ഉൾപ്പെടുത്തി ഡിസംബറോടെ മൂന്നാറിനെ അന്താരാഷ്‌ട്ര ഉത്തരവാദിത്വ ടൂറിസം ഡെസ്റ്റിനേഷനായി പ്രഖ്യാപിക്കുന്നതിനുള്ള കർമപരിപാടി നടപ്പാക്കും. ഇതിനായി പ്രാരംഭപ്രവർത്തനങ്ങൾ ആരംഭിച്ചെന്ന് വിനോദസഞ്ചാര വകുപ്പ് അറിയിച്ചു. ഉത്തരവാദിത്വ ടൂറിസം മിഷൻ സൊസൈറ്റിയുടെ നേതൃത്വത്തിലാണ് പദ്ധതി നടപ്പാക്കുന്നത്. ഇതിന്‍റെ ഭാഗമായി സുസ്ഥിര അതിജീവന വിനോദസഞ്ചാരകേന്ദ്രങ്ങൾ എന്ന പദ്ധതിയിൽപ്പെടുത്തി പ്രാരംഭപ്രവർത്തനങ്ങൾക്കായി ടൂറിസം വകുപ്പ് 50 ലക്ഷം രൂപ അനുവദിച്ചു. ഏതൊരു പ്രദേശത്തെയും പാരിസ്ഥിതികവും സാമൂഹികവും സാംസ്കാരികവുമായ പ്രത്യേകതകളെ പരിപോഷിപ്പിക്കുകയും പ്രോത്സാഹിപ്പിക്കുകയും ചെയ്ത് പ്രാദേശിക സമൂഹത്തിന്‍റെ ക്ഷേമത്തിനുള്ള ഉപാധിയായി ടൂറിസത്തെ മാറ്റുന്നതാണ് പദ്ധതി. സംസ്ഥാനത്തെ ഉത്തരവാദിത്വ ടൂറിസം പ്രവർത്തനങ്ങളുടെ ഭാഗമായി യുഎൻഡിപിയുടെ ഐഎച്ച്ആർഎംഎൽ പദ്ധതിയിൽ മൂന്നാറിനും പരിസര പ്രദേശങ്ങൾക്കുമായി മുൻ ഉത്തരവാദിത്വ ടൂറിസം മിഷനായ കേരള റെസ്പോണ്‍സിബിൾ ടൂറിസം മിഷൻ സൊസൈറ്റി ഹിൽ ടൂറിസം കേന്ദ്രങ്ങൾക്കുള്ള ഉത്തരവാദിത്വ ടൂറിസം പ്രോട്ടോകോൾ തയാറാക്കിയിട്ടുണ്ട്. തദ്ദേശസ്വയംഭരണ സ്ഥാപനങ്ങളുടെയും മറ്റു ടൂറിസം സ്റ്റേക്ക് ഹോൾഡർമാരുടെയും സഹകരണത്തോടെ ടൂറിസം മിഷന്‍റെ നേതൃത്വത്തിൽ ഈ പ്രോട്ടോക്കോൾ കർശനമായി നടപ്പാക്കുക വഴി പ്രദേശത്തെ സുസ്ഥിരവും ഉത്തരവാദിത്വ പൂർണവുമായ ടൂറിസം പ്രവർത്തനങ്ങൾ പ്രാവർത്തികമാക്കാനാകും. പദ്ധതിയിലൂടെ മൂന്നാർ ആർടി സ്റ്റേക്ക് ഹോൾഡേഴ്സ് മീറ്റ്, ട്രെയിനിംഗ് സ്റ്റേക്ക് ഹോൾഡേഴ്സ്, ഓട്ടോ ടാക്സി ഡ്രൈവർക്കും ഗൈഡുകൾക്കും പരിശീലനം, ബോർഡുകൾ, ഹോട്ടലുകൾക്കും റിസോർട്ടുകൾക്കും ആർടി സർട്ടിഫിക്കറ്റ്, ആർടി ബ്രോഷർ, പ്ലാസ്റ്റിക് ഫ്രീ ഡെസ്റ്റിനേഷൻ, യൂണിറ്റ് രജിസ്ട്രേഷൻ ഡ്രൈവ്, വില്ലേജ് ലൈഫ് എക്സ്പീരിയൻസ് പാക്കേജ് രൂപീകരണം, ഡെസ്റ്റിനേഷൻ ഡിക്ലറേഷൻ പ്രോഗ്രാം, വീഡിയോ ഡോക്കുമെന്‍റേ‍ഷൻ ആൻഡ് മാർക്കറ്റിംഗ് തുടങ്ങി വിവിധ പരിപാടികൾ നടത്തും. ഒറ്റത്തവണ ഉപയോഗിക്കാവുന്ന പ്ലാസ്റ്റിക് നിരോധിച്ച് മൂന്നാറിനെ പ്ലാസ്റ്റിക് മാലിന്യമുക്തമാക്കുക, കാർബണ്‍ രഹിത, സ്ത്രീ സൗഹൃദ ടൂറിസം, ഗ്രാമാധിഷ്ഠിത വിനോദസഞ്ചാരപദ്ധതികൾ എന്നിവ നടപ്പാക്കുകയാണ് പ്രധാന ലക്ഷ്യം. ഇതോടൊപ്പം മൂന്നാറിന്‍റെ ആവാസവ്യവസ്ഥയെ സംരക്ഷിച്ച് ടൂറിസം പ്രവർത്തനങ്ങൾ വിപുലീകരിക്കാനും കൂടുതൽ തൊഴിൽ സൃഷ്ടിക്കാനുമാണ് പദ്ധതി ലക്ഷ്യമിടുന്നത്. കൈത്തൊഴിലുകൾ, കലകൾ, കരകൗശല വിദ്യ, നാടൻ ഭക്ഷണം തുടങ്ങിയവയുമായി കോർത്തിണക്കി പ്രാദേശിക ജനവിഭാഗത്തെ ടൂറിസം പ്രവർത്തനങ്ങളുടെ ഭാഗമാക്കും.

വെള്ളയാംകുടി യുപി സ്കൂളിൽ ചക്ക മഹോത്സവം

വെള്ളയാംകുടി: സെന്‍റ് ജെറോംസ് യുപി സ്കൂളിൽ ചക്ക മഹോത്സവം നടത്തി. അന്താരാഷ്‌ട്ര ചക്ക ദിനത്തിന്‍റെ ഭാഗമായാണ് പിടിഎയുടെ നേതൃത്വത്തിൽ പരിപാടി സംഘടിപ്പിച്ചത്. ഇരുന്നൂറോളം കുട്ടികൾ ചക്ക മഹോത്സവത്തിന്‍റെ ഭാഗമായി നടത്തിയ ഉത്പന്ന നിർമാണ - പ്രദർശനത്തിൽ പങ്കെടുത്തു. അറുപതിലധികം ചക്ക ഉത്പന്നങ്ങൾ കുട്ടികൾക്ക് പരിചയപ്പെടുത്തി. ചക്ക മഹോത്സവത്തിന്‍റെ ഉദ്ഘാടനം സ്കൂൾ മാനേജർ മോണ്‍. ഏബ്രഹാം പുറയാറ്റ് നിർവഹിച്ചു. അസി. മാനേജർ ഫാ. ഡെയൻ വടക്കേമുറിയിൽ, ജീവൻ ടീ അസി. ഡയറക്ടർ ഫാ. ജോസഫ് കൊല്ലംപറന്പിൽ, ഫാ. കുര്യൻ പൊടിപാറയിൽ, മുനിസിപ്പൽ കൗണ്‍സിലർ ബീന സിബി, വെള്ളയാംകുടി മർച്ചന്‍റ് അസോസിയേഷൻ പ്രസിഡന്‍റ് ബിജോ ജോസഫ്, പിടിഎ പ്രസിഡന്‍റ് ജയിംസ് വർഗീസ്, എംപിടിഎ പ്രസിഡന്‍റ് ടി.എച്ച്. ജിൻസിമോൾ, ഹെഡ്മാസ്റ്റർ ബിനോയി മഠത്തിൽ തുടങ്ങിയവർ പ്രസംഗിച്ചു.

കാറ്റിലും മഴയിലും വ്യാപക നാശം

തൊടുപുഴ: കാറ്റിലും മഴയിലും മരം വീണ് വ്യാപക നാശം. ആലക്കോട് - കരിമണ്ണൂർ റൂട്ടിലും കാളിയാറിലും ഇതേത്തുടർന്ന് ഗതാഗതം തടസപ്പെട്ടു. ഇന്നലെ പുലർച്ചെ നാലോടെയാണ് ആലക്കോട് - കരിമണ്ണൂർ റൂട്ടിൽ വൻമരം റോഡിലേക്ക് വീണത്. മരത്തിനൊപ്പം വൈദ്യുതി പോസ്റ്റുകളും തകർന്ന് റോഡിലേക്ക് വീഴുകയായിരുന്നു. നാട്ടുകാർ കെഎസ്ഇബി അധികൃതരെ അറിയിച്ചതിനെത്തുടർന്ന് അവർ വിവരം അഗ്നി രക്ഷാ സേനയെ അറിക്കുകയായിരുന്നു. തൊടുപുഴയിൽനിന്ന് സീനിയർ ഫയർ ആന്‍ഡ് റെസ്ക്യു ഓഫീസർ പി.ടി. അലക്സാണ്ടറിന്‍റെ നേതൃത്വത്തിൽ സേനാംഗങ്ങൾ സ്ഥലത്തെത്തി. വൈദ്യുതി ബന്ധം വിച്ഛേദിച്ച ശേഷം മരം മുറിച്ചുമാറ്റുകയായിരുന്നു. തുടർന്ന് സേനാംഗങ്ങളുടെ സഹായത്തോടെ വൈദ്യുതി പോസ്റ്റുകൾ റോഡിൽനിന്ന് നീക്കം ചെയ്തു. കാളിയാർ ഫാക്ടറി ജംഗ്ഷനു സമീപം പുലർച്ചെ രണ്ടരയോടെയാണ് മരം വീണ് ഗതാഗതം പൂർണമായും തടസപ്പെട്ടത്. അഗ്നിരക്ഷാ സേനാംഗങ്ങൾ അരമണിക്കൂറോളം ശ്രമിച്ച് മരം മുറിച്ചുമാറ്റി ഗതാഗതം പുനഃസ്ഥാപിക്കുകയായിരുന്നു. സേനാംഗങ്ങളായ ബിബിൻ എ. തങ്കപ്പൻ, ജയിസ് സാം. ജോസ്, എസ്. ശരത്, ജയിംസ് നോബിൾ, ടി.കെ. വിവേക്, എസ്. സന്ദീപ് എന്നിവരായിരുന്നു അഗ്നിരക്ഷാ സേനാ സംഘത്തിൽ ഉണ്ടായിരുന്നത്. വെള്ളിയാമറ്റം പഞ്ചായത്തിലെ മേത്തൊട്ടിയിൽ ഇന്നലെ ഉച്ചയ്ക്കുണ്ടായ ശക്തമായ കാറ്റിൽ പനച്ചിമൂട്ടിൽ പി.വി. സലിയുടെ വീടിനു മുകളിലേക്ക് മരം വീണ് വീട് പൂർണമായും തകർന്നു. വീടിനു മുന്നിൽനിന്നിരുന്ന മരമാണ് ശക്തമായ കാറ്റിൽ നിലം പതിച്ചത്. ഈ സമയം വീടിനുള്ളിലുണ്ടായിരുന്ന സലിയുടെ ഭാര്യ ഉഷ വീടിനുള്ളിൽനിന്ന് ഇറങ്ങി ഓടിയതിനാൽ പരിക്കേൽക്കാതെ രക്ഷപ്പെട്ടു. വീടിന്‍റെ മേൽക്കൂര പൂർണമായും തകർന്ന നിലയിലാണ്. പഞ്ചായത്ത് പ്രസിഡന്‍റ് മോഹൻദാസ് പുതുശേരി, വില്ലേജ് ഓഫീസർ സി.കെ. അജിമോൻ എന്നിവർ സ്ഥലം സന്ദർശിച്ചു. കൊന്താലപ്പള്ളിയിൽ കൊട്ടാരത്തിൽ ജോസഫിന്‍റെ വീടിനു മുകളിലേക്കും മരം വീണ് നാശനഷ്ടം ഉണ്ടായി.

പ്രസ് ക്ലബ് ബ്രേക്കിംഗ് ഡി കാന്പയിന് തുടക്കമായി

തൊടുപുഴ: രാസലഹരിയുടെ വിപണനവും ഉപയോഗവും തടയുകയെന്ന ലക്ഷ്യത്തോടെ കേരള പത്രപ്രവർത്തക യൂണിയൻ സംസ്ഥാന സമിതിയുടെ നേതൃത്വത്തിൽ നടത്തിവരുന്ന ബ്രേക്കിംഗ് ഡി കാന്പയിന് ഇടുക്കിയിലും തുടക്കമായി. പ്രസ് ക്ലബിൽ നടന്ന ചടങ്ങിൽ എക്സൈസ് ഇടുക്കി അസിസ്റ്റന്‍റ് കമ്മീഷണർ എം.കെ. പ്രസാദ് ക്യൂ ആർ കോഡ് പ്രസ് ക്ലബിന്‍റെ ഭിത്തിയിൽ പതിപ്പിച്ച് പദ്ധതി ഉദ്ഘാടനം ചെയ്തു. രാസലഹരിക്കെതിരേയുള്ള പോരാട്ടത്തിൽ പത്രപ്രവർത്തക യൂണിയന്‍റെ പ്രവർത്തനം മാതൃകാപരമാണെന്ന് അദ്ദേഹം പറഞ്ഞു. യോഗത്തിൽ പ്രസിഡന്‍റ് വിനോദ കണ്ണോളി അധ്യക്ഷത വഹിച്ചു. സെക്രട്ടറി ജെയിസ് വാട്ടപ്പിള്ളിൽ, സംസ്ഥാന കമ്മിറ്റിയംഗം വിൽസണ്‍ കളരിക്കൽ, ജില്ലാ വൈസ് പ്രസിഡന്‍റ് പി.കെ.എ. ലത്തീഫ്, കമ്മിറ്റിയംഗം ഷിയാസ് ബഷീർ തുടങ്ങിയവർ പ്രസംഗിച്ചു. ലഹരി ഉത്പന്നങ്ങളുടെ വിപണനം, ഉപയോഗം എന്നിവ സംബന്ധിച്ച രഹസ്യവിവരങ്ങളും ആശങ്കകളും പ്രസ് ക്ലബിൽ സ്ഥാപിച്ച ക്യൂആർകോഡ് സ്കാൻ ചെയ്ത് ഇതിലൂടെ ടൈപ്പ് ചെയ്ത് നൽകാനാകും. ഈ വിവരങ്ങൾ രഹസ്യസ്വഭാവമുള്ളതാണ്. വിവരങ്ങൾ നൽകുന്നവരെ തിരിച്ചറിയാനും കഴിയില്ല. തുടർന്നു വിവരങ്ങൾ എക്സൈസിനു കൈമാറി നടപടി സ്വീകരിക്കുകയും ചെയ്യും. കൊച്ചുകുട്ടികൾ ഉൾപ്പെടെയുള്ളവർക്ക് ഈ അവസരം പ്രയോജനപ്പെടുത്താനും കഴിയും. പ്രസ് ക്ലബിനു പുറമെ പൊതു ഇടങ്ങളിലും ക്യൂ ആർ കോഡ് പതിപ്പിക്കും. ജനങ്ങൾ ഈ സേവനം പരമാവധി പ്രയോജനപ്പെടുത്തുകയാണ് ലക്ഷ്യമെന്നും ഭാരവാഹികൾ പറഞ്ഞു.

പൊതു പണിമുടക്ക് വിജയിപ്പിക്കണം: സംയുക്ത ട്രേഡ് യൂണിയൻ

തൊടുപുഴ: വിവിധ ആവശ്യങ്ങൾ ഉന്നയിച്ച് ഒന്പതിന് രാജ്യവ്യാപകമായി നടത്തുന്ന പൊതുപണിമുടക്ക് വിജയിപ്പിക്കണമെന്ന് യുണൈറ്റഡ് ഡെമോക്രാറ്റിക് ഫെഡറേഷൻ ഓഫ് ട്രേഡ് യൂണിയൻ നേതാക്കൾ പത്രസമ്മേളനത്തിൽ ആവശ്യപ്പെട്ടു. കേന്ദ്ര- സംസ്ഥാന സർക്കാരുകളുടെ തൊഴിലാളി വിരുദ്ധ നയങ്ങൾക്കെതിരായാണ് രാജ്യവ്യാപക സമരമെന്നും നേതാക്കൾ അറിയിച്ചു. നിലവിലുള്ള 29 തൊഴിൽ നിയമങ്ങൾക്ക് പകരം ബദലായി രൂപീകരിച്ചിരിക്കുന്ന നാല് ലേബർ കോഡുകൾ റദ്ദു ചെയ്യണം. കേന്ദ്ര സർക്കാർ ജീവനക്കാരുടെ അടിസ്ഥാന ശന്പളമായ 27,900 രൂപ ദേശീയ മിനിമം വേതനമായി പ്രഖ്യാപിക്കുക, പ്രാകൃത വേതന സന്പ്രദായങ്ങൾ ഒഴിവാക്കി കൃത്യമായ വേതനം ഉറപ്പ് വരുത്തുക തുടങ്ങിയ വിവിധ ആവശ്യങ്ങൾ ഉന്നയിച്ചാണ് ദേശീയ പണിമുടക്ക്. സംസ്ഥാന ജീവനക്കാർ, സ്വകാര്യ സ്ഥാപനങ്ങളിലെ തൊഴിലാളികൾ അടക്കം വിവിധ മേഖലകളിലുള്ളവർ പണിമുടക്കിൽ പങ്കെടുക്കും. ഇതിന് മുന്നോടിയായി ഏഴിന് വിളംബര ജാഥ, എട്ടിന് യൂണിറ്റ് തലത്തിൽ പന്തം കൊളുത്തി പ്രകടനം എന്നിവയും നടത്തും. പണിമുടക്ക് ദിവസം തൊടുപുഴയിൽ പ്രകടനവും ഗാന്ധി സ്ക്വയറിൽ പൊതുയോഗവും നടത്തും. ഐഎൻടിയുസി ജില്ലാ പ്രസിഡന്‍റ് രാജ മാട്ടുക്കാരൻ അധ്യക്ഷത വഹിക്കും. ഡിസിസി പ്രസിഡന്‍റ് സി.പി. മാത്യു ഉദ്ഘാടനം ചെയ്യും. ഐഎൻടിയുസി ജില്ലാ ജനറൽ സെക്രട്ടറി രാജു ബേബി, വി.ബി. ബിസമോൻ, വി.എച്ച്. നൗഷാദ്, എ.എസ്. ജയൻ, ടോമി ജോർജ് എന്നിവർ പത്രസമ്മേളനത്തിൽ പങ്കെടുത്തു.

മഴയിൽ നിരവധി സ്ഥലങ്ങളിൽ മരം വീണ് ഗതാഗതം തടസപ്പെട്ടു

തൊടുപുഴ: ഇന്നലെയുണ്ടായ ശക്തമായ കാറ്റിലും മഴയിലും തൊടുപുഴയിലും സമീപ പ്രദേശങ്ങളിലും നിരവധി സ്ഥലങ്ങളിൽ മരം വീണ് ഗതാഗതം തടസപ്പെട്ടു. ഉച്ചയ്ക്ക് 12.15ന് നഗരസഭാ മേഖലയിൽ പറന്പിപ്പീടികയിൽ മരം വീണ് ഗതാഗത തടസം ഉണ്ടായി. തേക്കുമരമാണ് റോഡിലും വൈദ്യുതി ലൈനിലുമായി വീണത്. തൊടുപുഴയിൽനിന്ന് അഗ്നിരക്ഷാ സേനയെത്തി മരം മുറിച്ചുമാറ്റി. ഉച്ചയ്ക്ക് 12.45ന് മഞ്ഞള്ളൂർ പഞ്ചായത്തിലെ വടവുകോട് രണ്ട് സ്ഥലങ്ങളിൽ മരം വീണു. പിന്നീട് ശാസ്താംപാറയിൽ മരം വീണ് ഗതാഗത തടസമുണ്ടായി. തൊടുപുഴയിൽനിന്ന് അഗ്നിരക്ഷാ സേന എത്തിയാണ് മരം മുറിച്ചു മാറ്റിയത്. മൂന്നരയോടെ വിമല പബ്ലിക് സ്കൂളിനു സമീപം വൈദ്യുതി പോസ്റ്റിൽ തീപിടിത്തം ഉണ്ടായി. നാട്ടുകാർ വിവരം അഗ്നിരക്ഷാ സേനയെ അറിയിച്ചതിനെത്തുടർന്ന് സ്ഥലത്തെത്തിയ സേനാംഗങ്ങൾ കെഎസ്ഇബി അധികൃതരെ വിളിച്ചുവരുത്തി വൈദ്യുതി വിച്ഛേദിച്ച് തീ നിയന്ത്രണവിധേയമാക്കുകയായിരുന്നു. വൈകുന്നേരം കുമ്മംകല്ലിൽ വീണ മരവും സേനയെത്തി മുറിച്ചുമാറ്റി.

റോഡ് കൈയേറി കോണ്‍ക്രീറ്റ് ചെയ്തതായി ആക്ഷേപം

തൊടുപുഴ: കോടതിയുടെ പരിഗണനയിലിരിക്കുന്ന കേസിൽപ്പെട്ട വസ്തുവിൽ നടപ്പവകാശം മാത്രമുള്ള വഴി കൈയേറി അയൽവാസികൾ കോണ്‍ക്രീറ്റ് ചെയ്തതായി ഭിന്നശേഷി സംഘടനാ നേതാവ് പത്രസമ്മേളനത്തിൽ ആരോപിച്ചു. മുള്ളരിങ്ങാട് മേഖല ഭിന്നശേഷി പ്രസിഡന്‍റ് താണിക്കുഴിയിൽ ടി.കെ. അശോകനാണ് പരാതിയുമായി എത്തിയത്. പന്നിമറ്റംചാൽ സിറ്റിയിലുള്ള 31 സെന്‍റ് കുടുംബ സ്വത്തിലുള്ള നടപ്പ് വഴിയാണ് വാഹന സൗകര്യത്തിനായി അയൽവാസികൾ കൈയേറിയത്. തന്‍റെ പിതാവ് നീലകണ്ഠൻ കുഞ്ഞന്‍റെ പേരിലുള്ളതാണ് സ്ഥലം. 14 വർഷം മുന്പ് പിതാവ് മരണമടഞ്ഞിരുന്നു. ഇദ്ദേഹം ജീവിച്ചിരുന്ന കാലയളവിൽ വസ്തു ഈട് നൽകി വാഹനം വാങ്ങിയിരുന്നു. പിതാവിന്‍റെ കാലശേഷം മക്കൾ പണം നൽകിയെങ്കിലും സ്ഥലം തിരിച്ചുതരാൻ അവർ തയാറായില്ല. ഇതിനു പുറമെ സ്ഥലം തങ്ങൾക്ക് തീറ് നൽകിയതായി ഇവർ അവകാശപ്പെടുകയും ചെയ്തു. ഇതേത്തുടർന്ന് രണ്ടര വർഷം മുന്പ് മക്കൾ കോടതിയെ സമീപിച്ചു. ഈ കേസ് കോടതിയുടെ പരിഗണനയിലാണ്. കുടുംബ സ്വത്തായ വസ്തുവിൽ ആരും അതിക്രമിച്ച് കടക്കരുതെന്ന കോടതി ഉത്തരവ് നിലനിൽക്കെയാണ് വഴിയിലെ അനധികൃത നിർമാണം. നടപ്പ് വഴിക്ക് മാത്രം അവകാശമുള്ള അയൽവാസികൾ അഞ്ചു മീറ്റർ വീതിയിൽ 30 മീറ്റർ ദൂരം കോണ്‍ക്രീറ്റ് ചെയ്തു കഴിഞ്ഞു. നേരത്തെ പരാതി നൽകിയപ്പോൾ ഇവിടെ അനധികൃതമായി ഒന്നും ചെയ്യരുതെന്ന് പോലീസ് നിർദേശം നൽകിയിരുന്നു. സംഭവത്തിൽ മുഖ്യമന്ത്രിക്ക് പരാതി നൽകിയതായും ടി.കെ. അശോകൻ പറഞ്ഞു. ഭിന്നശേഷി സംഘടാ കരിമണ്ണൂർ ഏരിയ സെക്രട്ടറി എ.കെ. സുരേന്ദ്രൻ, അശോകന്‍റെ ഭാര്യ രാധാശിവൻ എന്നിവരും പത്ര സമ്മേളനത്തിൽ പങ്കെടുത്തു.

ആംബുലൻസ് അപകടം: രോഗിയും ബന്ധുക്കളും വാഹനത്തിൽ കുടുങ്ങി

പീരുമേട്: ആംബുലൻസ് റോഡിൽനിന്നു താഴ്ചയിലേക്ക് തെന്നിമാറി അപകടം. രോഗിയും ബന്ധുക്കളും അദ്ഭുതകരമായി രക്ഷപ്പെട്ടു. പാലായിലെ സ്വകാര്യ ആശുപത്രിയിൽനിന്നു തമിഴ്നാട്ടിലെ പൂശാലംപെട്ടിയിലേക്ക് രോഗിയുമായി പോകുന്നതിനിടെ റോഡിൽനിന്നും താഴ്ചയിലേക്ക് തെന്നിമാറുകയായിരുന്നു. ഇന്നലെ പുലർച്ചെ കുട്ടിക്കാനത്തിനു സമീപം വളഞ്ഞങ്ങാനത്തായിരുന്നു അപകടം. പാലാ സ്വദേശിയായ ജോബിൻസൺ ജോയിയുമായി തമിഴ്നാട്ടിലേക്ക് പോകുന്പോഴായിരുന്നു അപകടം. ജോബിൻസനൊപ്പം ബന്ധുക്കളും ആംബുലൻസിലുണ്ടായിരുന്നു. വാഹനത്തിന്‍റെ മുൻവശം താഴ്ചയിലേക്ക് കുത്തിനിന്നതോടെ രോഗിയും ബന്ധുക്കളും പുറത്തിറങ്ങാൻ സാധിക്കാതെ ആംബുലൻസിൽ കുടുങ്ങി. പിന്നീട് അര മണിക്കൂറിനുശേഷം പീരുമേട്ടിൽനിന്നു ഫയർഫോഴ്സ് സംഘം സ്ഥലത്തെത്തിയാണ് ഇവരെ പുറത്തെത്തിച്ചത്. അപകടത്തിൽ ആർക്കും പരിക്കില്ല. പീരുമേട് ഫയർഫോഴ്സിലെ എസ്ടിഒ സുനിൽകുമാറിന്‍റെ നേതൃത്വത്തിൽ ഫയർ ഓഫീസർമാരായ മധുസൂദനൻ, സുനിൽകുമാർ, എം.സി. സതീഷ്, വിപിൻ സെബാസ്റ്റ്യൻ, വിവേക്, എ. അൻഷാദ് എന്നിവരുടെ നേതൃത്വത്തിലായിരുന്നു രക്ഷാപ്രവർത്തനം.

ജീവനൊടുക്കാൻ ശ്രമിച്ച യുവതി മരിച്ചു; ഭർത്താവ് അറസ്റ്റിൽ

തൊടുപുഴ: ഗാർഹിക പീഡനത്തെത്തുടർന്ന് ജീവനൊടുക്കാൻ ശ്രമിച്ച യുവതി മരിച്ചു. പുറപ്പുഴ ആനിമൂട്ടിൽ ടോണി മാത്യുവിന്‍റെ ഭാര്യ ജോർലി (36) ആണ് മരിച്ചത്. സംഭവത്തിൽ ടോണി മാത്യുവിനെ (43) കരിങ്കുന്നം പോലീസ് അറസ്റ്റ് ചെയ്തു. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു. മകൾ ജീവനൊടുക്കാൻ ശ്രമിച്ചത് ഭർത്താവിന്‍റെയും ബന്ധുക്കളുടെയും ഭാഗത്തുനിന്നുണ്ടായ മാനസിക, ശാരീരിക പീഡനങ്ങളെത്തുടർന്നാണെന്ന് ജോർലിയുടെ പിതാവ് പല്ലാരിമംഗലം അടിവാട് കുന്നക്കാട് ജോണ്‍ കരിങ്കുന്നം പോലീസിൽ പരാതി നൽകിയിരുന്നു. തുടർന്ന് പോലീസ് നടത്തിയ അന്വേഷണത്തിൽ ഭർതൃവീട്ടിൽ ജോർലി കടുത്ത പീഡനമേറ്റിരുന്നെന്നു വ്യക്തമായി. ഇതോടെയാണ് ടോണി മാത്യുവിനെ വധശ്രമക്കേസിൽ അറസ്റ്റ് ചെയ്തത്. കഴിഞ്ഞ 26നാണ് ജോർലിയെ വിഷംകഴിച്ച് ജീവനൊടുക്കാൻ ശ്രമിച്ചതിനെത്തുടർന്ന് തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചത്. ഇന്നലെ വൈകുന്നേരം നാലരയോടെ മരിച്ചു. സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം ഇന്നു ജില്ലാ ആശുപത്രിയിൽ പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുനൽകും. ജോർലിയുടെ ഏക മകൾ അലീന ഒൻപതാം ക്ലാസ് വിദ്യാർഥിനിയാണ്. അമ്മ പരേതയായ ആനീസ്. സഹോദരങ്ങൾ: തോമസ്, റോമോൻ, ഷേർളി.

രാജമുദ്രയുള്ള കെട്ടിടം സംരക്ഷണമില്ലാതെ നശിക്കുന്നു

രാജാക്കാട്: തിരുവിതാംകൂര്‍ രാജഭരണ കാലത്തിന്‍റെ ചരിത്രം നിറഞ്ഞുനില്‍ക്കുന്ന രാജമുദ്രയുള്ള കെട്ടിടം അധികൃതരുടെ അനാസ്ഥയില്‍ തകര്‍ന്നുവീണ് നശിക്കുന്നു. കേരള തമിഴ്നാട് അതിര്‍ത്തിയായ ബോഡിമെട്ടിലുള്ള കസ്റ്റംസ് ഹൗസാണ് സംരക്ഷണമില്ലാത്തതിനെത്തുടര്‍ന്ന് പിന്‍ഭാഗം തകര്‍ന്നു വീണത്. ജിഎസ്ടി വകുപ്പിന്‍റെ കൈവശമുള്ള കെട്ടിടം തകര്‍ന്നുവീണ് വര്‍ഷങ്ങള്‍ പിന്നിടുമ്പോഴും കെട്ടിടം പുനര്‍നിര്‍മിക്കുന്നതിനോ സംരക്ഷിക്കാനോ നടപടിയില്ല. തിരുവിതാംകൂര്‍ രാജഭരണകാലത്ത് ചുങ്കം പിരിക്കുന്നതിനായാണ് കെട്ടിടം പണി കഴിപ്പിച്ചത്. പിന്നീട് ഐക്യകേരളം രൂപംകൊണ്ടതോടെ കെട്ടിടത്തിന്‍റെ അവകാശി വാണിജ്യനികുതി വകുപ്പായി. ഇവിടെ ചെക്കുപോസ്റ്റും പ്രവര്‍ത്തിച്ചിരുന്നു. നൂറ്റാണ്ടുകളുടെ ചരിത്രം പറയുന്ന കെട്ടിടത്തില്‍ ആകെ ചെയ്തത് മേല്‍ക്കൂര ഷീറ്റുകള്‍ മാറ്റിസ്ഥാപിച്ചതു മാത്രമാണ്. ചെക്ക്പോസ്റ്റായി പ്രവര്‍ത്തിക്കുന്ന ഘട്ടത്തിലും കെട്ടിടം ചോര്‍ന്നൊലിക്കുന്ന അവസ്ഥയായിരുന്നു. പ്രതിദിനം നല്ല വരുമാനം ലഭിക്കുന്ന ഡിപ്പാര്‍ട്ട്മെന്‍റിന്‍റെ കൈവശത്തിലുള്ള കെട്ടിടമായിട്ടും സംരക്ഷിക്കാന്‍ നടപടി സ്വീകരിച്ചില്ല. പിന്നീട് ജിഎസ്ടി നടപ്പിലായതോടെ കെട്ടിടത്തിന്‍റെ ഉടയോര്‍ ജിഎസ്ടി വകുപ്പായി മാറി. ഇവരാകട്ടെ ഇവിടേക്കു തിരിഞ്ഞുനോക്കിയിട്ടില്ല. ഇതോടെ ഏതാനും വര്‍ഷം മുമ്പ് കെട്ടിടത്തിന്‍റെ പിന്‍ഭാഗം തകര്‍ന്നുവീണു. ബാക്കി നില്‍ക്കുന്ന കെട്ടിടം ഈ മഴക്കാലം അതിജീവിക്കുമോയെന്നും അറിയില്ല. രാജഭരണകാലത്തിന്‍റെ ചരിത്രം നിറഞ്ഞുനില്‍ക്കുന്ന കെട്ടിടം സംരക്ഷിക്കണമെന്ന ആവശ്യവുമായി പൊതുപ്രവര്‍ത്തകരും നാട്ടുകാരും രംഗത്തെത്തിയെങ്കിലും ഫലമുണ്ടായിട്ടില്ല. നിലവില്‍ കെട്ടിടം പഞ്ചായത്തിന് വിട്ടുകിട്ടിയാല്‍ ചരിത്രസ്മാരകമായി സംരക്ഷിക്കാന്‍ തയാറാണെന്ന് ശാന്തമ്പാറ ഗ്രാമപഞ്ചായത്ത് പ്രസിഡന്‍റ് ലിജു വര്‍ഗീസ് പറഞ്ഞു. മുമ്പ് കെട്ടിടത്തില്‍ മറ്റു വകുപ്പുകളുടെ ചെക്ക്പോസ്റ്റുകള്‍ പ്രവര്‍ത്തിക്കുന്നതിനും പോലീസ് എയിഡ്പോസ്റ്റ് സ്ഥാപിക്കുന്നതിനുമടക്കം കെട്ടിടം വിട്ടുകിട്ടുന്നതിന് ആവശ്യപ്പെട്ടെങ്കിലും കെട്ടിടം സംരക്ഷിക്കുന്നതിനോ താത്കാലികമായി വിട്ടുനല്‍കുന്നതിനോപോലും അധികൃതര്‍ തയാറായിട്ടില്ല.

മരുന്ന് മാറിനൽകി; ഏത്തവാഴ കരിഞ്ഞുണങ്ങി

ചെറുതോണി: വളക്കടയിൽനിന്നു മരുന്ന് മാറിനൽകിയതിനെത്തുടർന്നു കർഷകന്‍റെ 300 ഏത്തവാഴകൾ നശിച്ചതായി പരാതി. കഞ്ഞിക്കുഴി പഞ്ചായത്തിൽ ചുള്ളിക്കൽ ഫ്രാൻസിസിന്‍റെ അഞ്ചു മാസം പ്രായമായ ഏത്തവാഴകളാണ് നശിച്ചത്. വാഴയ്ക്ക് കുമിൾരോഗം പിടിപെട്ടതിനെത്തുടർന്ന് കർഷകൻ കഞ്ഞിക്കുഴി കൃഷിഓഫിസിൽ വിവരം അറിയിച്ചു. കൃഷി ഓഫീസർ നിർദേശിച്ച മരുന്ന് കഞ്ഞിക്കുഴിലെ സ്വകാര്യ വളക്കടയിൽനിന്നു വാങ്ങി തളിക്കുകയായിരുന്നു. ഇതോടെ വാഴകൾ പഴുത്ത് ഉണങ്ങുകയായിരുന്നു. പിന്നീട് നടത്തിയ പരിശോധനയിൽ കടയിൽനിന്ന് മരുന്ന് മാറിയാണ് നൽകിയതെന്നു കണ്ടെത്തി. ഫ്രാൻസിസ് കഞ്ഞിക്കുഴി കൃഷിഭവനിലും കഞ്ഞിക്കുഴി പോലീസിലും പരാതി നൽകി. പലരിൽനിന്നും കടംവാങ്ങിയാണ് ഫ്രാൻസിസ് കൃഷി ചെയ്തിരുന്നത്. മൂന്നു ലക്ഷത്തോളം രൂപയുടെ നഷ്ടമുണ്ടായതായി കർഷകൻ പറഞ്ഞു.

പെണ്‍കുട്ടിക്കു നേരേ അതിക്രമം; യുവാവ് അറസ്റ്റില്‍

അടിമാലി: പ്രായപൂര്‍ത്തിയാകാത്ത പെണ്‍കുട്ടിക്കു നേരേ അതിക്രമം നടത്തിയ സംഭവത്തില്‍ ഒരാളെ അടിമാലി പോലീസ് അറസ്റ്റ് ചെയ്തു. അടിമാലി തട്ടേക്കണ്ണന്‍കുടി സ്വദേശിയായ രമേശാണ് പിടിയിലായത്. കഴിഞ്ഞ മാസമാണ് കേസിനാസ്പദമായ സംഭവം. വീട്ടില്‍ ആളില്ലാതിരുന്ന സമയത്ത് പ്രതി പെണ്‍കുട്ടിക്കുനേരേ അതിക്രമം നടത്തിയതായി രക്ഷിതാക്കൾ നൽകിയ പരാതിയെത്തുടർന്നാണ് പോലീസ് കേസ് രജിസ്റ്റര്‍ ചെയ്ത് പ്രതിയെ കസ്റ്റഡിയില്‍ എടുത്തത്. പോക്‌സോ വകുപ്പ് പ്രകാരമാണ് കേസ് രജിസ്റ്റര്‍ ചെയ്തിട്ടുള്ളത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

മേൽക്കൂരയും ഭിത്തിയും തകർന്ന് ജില്ലാ ആശുപത്രിയിലെ പഴയ കെട്ടിടം

തൊടുപുഴ: നൂറുകണക്കിനാളുകൾ ചികിത്സ തേടിയെത്തുന്ന തൊടുപുഴ ജില്ലാ ആശുപത്രിയിലെ പഴയ കെട്ടിടങ്ങൾ ഇടിഞ്ഞു പൊളിഞ്ഞുവീഴാവുന്ന നിലയിൽ. മേൽക്കൂര തകർന്ന് അപകടാവസ്ഥയിലായ കെട്ടിടങ്ങൾ കാലങ്ങളായി ഇതേ നിലയിൽ നിൽക്കുകയാണെങ്കിലും അറ്റകുറ്റപ്പണി നടത്താനോ പൊളിച്ചുനീക്കാനോ അധികൃതർ നടപടിയെടുത്തിട്ടില്ല. കോട്ടയം മെഡിക്കൽ കോളജിൽ പഴയ കെട്ടിടം ഇടിഞ്ഞുവീണുണ്ടായ അപകടംപോലെ ഇവിടെയും ഉണ്ടാകുമോയെന്നാണ് ജനങ്ങളുടെ ആശങ്ക. ഇതിനു പുറമേ പുതിയ ആശുപത്രിക്കെട്ടിടം പ്രവർത്തനം ആരംഭിച്ച് വർഷങ്ങളായെങ്കിലും ഇതുവരെ ഫയർ എൻഒസി ലഭിച്ചിട്ടില്ല. ജില്ലാ ആശുപത്രിയുടെ ഒപി വിഭാഗം പ്രവർത്തിച്ചിരുന്ന പഴയ കെട്ടിടം ഏതു സമയവും തകർന്നുവീഴാവുന്ന നിലയിലാണ്. കെട്ടിടം താഴേക്ക് പതിച്ചാൽ വലിയ അപകടമാകുമുണ്ടാകുക. മേൽക്കൂരയുടെ ഓടുകളും തകർന്ന നിലയിലാണ്. കെട്ടിടത്തിന്‍റെ അപകടാവസ്ഥയറിയാതെ കെട്ടിടത്തിൽ ആളുകൾ വിശ്രമിക്കാനും മറ്റും കയറുന്നുണ്ട്. കൂടാതെ ഇതിനു മുന്നിലാണ് ഇരുചക്രവാഹനങ്ങൾ പാർക്ക് ചെയ്യുന്നത്. ഓക്സിജൻ പ്ലാന്‍റിനു മുന്നിലൂടെ ആളുകൾ കയറിയിറങ്ങുന്ന ഇടനാഴിയുടെ മുകൾഭാഗവും ദ്രവിച്ച നിലയിലാണ്. ഫാർമസി പുതിയ കെട്ടിടത്തിലേക്ക് മാറ്റിയെങ്കിലും തകർച്ചയിലായ കെട്ടിടത്തിന്‍റെ ഒരു ഭാഗത്താണ് ഇവിടേക്കാവശ്യമായ പല സാധനങ്ങളും ഇപ്പോഴും സൂക്ഷിച്ചിരിക്കുന്നത്. ഇവിടേക്കു ജീവനക്കാർ ഇടയ്ക്കിടെ എത്തുന്നുണ്ട്. ഇതിനു പുറമേ കൗമാര സൗഹൃദ ആരോഗ്യ കേന്ദ്രം പ്രവർത്തിക്കുന്ന കെട്ടിടവും തകർച്ചയുടെ വക്കിലാണ്. മഴ നനഞ്ഞ് കെട്ടിടത്തിന്‍റെ ഭിത്തി പല ഭാഗത്തും അടർന്നനിലയിലാണ്. മുഖവാരവും തകർന്ന് കന്പികൾ പുറത്തുവന്ന സ്ഥിതിയിലാണ്. ആശുപത്രിയുടെ പുതിയ കെട്ടിടത്തിന് ഫയർ എൻഒസിയും ഇതുവരെ ലഭിച്ചിട്ടില്ല. കോവിഡ് കാലത്ത് താത്കാലികമായി പ്രവർത്തിക്കാൻ തുറന്നു നൽകിയ കെട്ടിടമാണ് പ്രധാന ചികിത്സാ കേന്ദ്രമായി പ്രവർത്തിക്കുന്നത്. ഫയർ എൻഒസി ലഭിക്കാത്തതിനാൽ ഏതെങ്കിലും തരത്തിലുള്ള അപകടം സംഭവിച്ചാൽ ഇൻഷ്വറൻസ് പരിരക്ഷപോലും ലഭിക്കില്ല. ഫയർഫോഴ്സ് വാഹനങ്ങൾക്ക് കെട്ടിടത്തിനു ചുറ്റും സുഗമമായി സഞ്ചരിക്കാൻ മതിയായ സൗകര്യമില്ലാത്തതായിരുന്നു ഫയർ എൻഒസി ലഭിക്കുന്നതിന് തടസമായി നിന്നത്. ആശുപത്രിയിലെ ലിഫ്റ്റും അടിക്കടി തകരാറിലാണ്. കഴിഞ്ഞ ദിവസം രോഗികളെ മുകൾ നിലകളിലേയ്ക്ക് എടുത്തു കയറ്റുകയായിരുന്നു. നവീകരണത്തിന് 30 ലക്ഷം തൊടുപുഴ ജില്ലാ ആശുപത്രിയുടെ നവീകരണത്തിനുൾപ്പെടെ 30 ലക്ഷം രൂപ വകയിരുത്തിയിട്ടുണ്ടെന്ന് ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ പറഞ്ഞു. പഴക്കംചെന്ന കെട്ടിടങ്ങളുടെ അറ്റകുറ്റപ്പണി വേഗത്തിൽ പൂർത്തിയാക്കാൻ ആശുപത്രി അധികൃതരാണ് മുൻകൈയെടുക്കേണ്ടത്. പുതിയ കെട്ടിടത്തിന് ഫയർ എൻഒസി ലഭിക്കാൻ അപേക്ഷ നൽകിയിട്ടുണ്ടെന്നും അദ്ദേഹം പറഞ്ഞു.

മന്ത്രി വീണാ ജോർജ് രാജിവയ്ക്കണം: ഷാനിമോൾ ഉസ്മാൻ

ചെറുതോണി: സംസ്ഥാനത്തെ ആരോഗ്യമേഖല തകർത്തു തരിപ്പണമാക്കിയതിന്‍റെ ഉത്തരവാദിത്വം ഏറ്റെടുത്ത് മന്ത്രി വീണാ ജോർജ് രാജിവയ്ക്കണമെന്ന് കോണ്‍ഗ്രസ് രാഷ്‌ട്രീയകാര്യ സമിതിയംഗം ഷാനിമോൾ ഉസ്മാൻ. ഡിസിസിയുടെ നേതൃത്വത്തിൽ ഇടുക്കി മെഡിക്കൽ കോളജിനു മുന്നിൽ നടത്തിയ പ്രതിഷേധ ധർണ ഉദ്ഘാടനം ചെയ്യുകയായിരുന്നു അവർ. തിരുവനന്തപുരം മെഡിക്കൽ കോളജിലെ യൂറോളജി വിഭാഗം തലവൻ ഡോ. സി.എച്ച്. ഹാരിസിന്‍റെ വെളിപ്പെടുത്തൽ മനുഷ്യ മനഃസാക്ഷിയെ ഞെട്ടിക്കുന്നതാണ്. തിരുവനന്തപുരം മെഡിക്കൽ കോളജ് ഇതിന്‍റെ നേർക്കാഴ്ച മാത്രമാണ്. ആരോഗ്യമേഖലയിൽ നടക്കുന്ന തട്ടിപ്പുകൾ കോവിഡ് കാലത്ത് ആരംഭിച്ചതാണ്. ഉമ്മൻ ചാണ്ടി സർക്കാർ ആരംഭിച്ച ഇടുക്കി മെഡിക്കൽ കോളജ് രണ്ടാമതും ഉദ്ഘാടനം ചെയ്തു ചരിത്രപുരുഷനായി മേനി നടിക്കുകയാണ് പിണറായി വിജയൻ. ഇതിനു കുടപിടിച്ച മന്ത്രി റോഷി അഗസ്റ്റിൻ ജനങ്ങളുടെ മുന്നിൽ അപഹാസ്യനായിരിക്കുകയാണെന്നും ഷാനിമോൾ പറഞ്ഞു. യോഗത്തിൽ ഡിസിസി പ്രസിഡന്‍റ് സി.പി. മാത്യു അധ്യക്ഷത വഹിച്ചു. ജോയി തോമസ്, റോയി കെ. പൗലോസ്, ഇബ്രാഹിംകുട്ടി കല്ലാർ, തോമസ് രാജൻ, എ.പി. ഉസ്മാൻ തുടങ്ങിയവർ പ്രസംഗിച്ചു.

യൂത്ത് ലീഗ് പ്രതിഷേധ മാർച്ച് നടത്തി

തൊടുപുഴ: പാവങ്ങളുടെ ആരോഗ്യ സംരക്ഷണത്തിന്‍റെ കാര്യത്തിൽ സർക്കാർ സന്പൂർണ പരാജയമാണെന്ന് മുസ്‌ലിം യൂത്ത് ലീഗ് ദേശീയ വൈസ് പ്രസിഡന്‍റ് ഷിബു മീരാൻ. ആരോഗ്യമേഖല ഐസിയുവിൽ എന്ന മുദ്രാവാക്യവുമായി സർക്കാർ അനാസ്ഥയ്ക്കെതിരേ മുസ്‌ലിം യൂത്ത് ലീഗ് ജില്ലാ കമ്മിറ്റിയുടെ നേതൃത്വത്തിൽ ജില്ലാ ആശുപത്രി സൂപ്രണ്ട് ഓഫീസിലേക്ക് നടത്തിയ മാർച്ച് ഉദ്ഘാടനം ചെയ്യുകയായിരുന്നു അദ്ദേഹം. മങ്ങാട്ടുകവലയിൽനിന്നും ആരംഭിച്ച മാർച്ച് ജില്ലാ ആശുപത്രിയുടെ മുന്പിൽ പോലീസ് തടഞ്ഞത് നേരിയ സംഘർഷത്തിനിടയാക്കി. തുടർന്നു നടന്ന യോഗത്തിൽ യൂത്ത് ലീഗ് ജില്ലാ പ്രസിഡന്‍റ് പി.എച്ച്. സുധീർ അധ്യക്ഷത വഹിച്ചു.

ധനമന്ത്രിയെ യൂത്ത് കോണ്‍. കരിങ്കൊടി കാട്ടി

തൊടുപുഴ: കോട്ടയം മെഡിക്കൽ കോളജിൽ പഴക്കംമൂലം കെട്ടിടം തകർന്ന് വീട്ടമ്മ മരിച്ച സംഭവത്തിൽ പ്രതിഷേധിച്ച് മന്ത്രി കെ.എൻ. ബാലഗോപാലിനെ കരിമണ്ണൂരിൽ യൂത്ത് കോണ്‍ഗ്രസ് കരിങ്കൊടി കാട്ടി. ട്രഷറി നിർമാണോദ്ഘാടനത്തിന് എത്തിയപ്പോഴായിരുന്നു കരിങ്കൊടി പ്രതിഷേധം. യൂത്ത് കോണ്‍ഗ്രസ് സംസ്ഥാന ജനറൽ സെക്രട്ടറി മാത്യു കെ. ജോണ്‍, നിയോജക മണ്ഡലം പ്രസിഡന്‍റ് ബിലാൽ സമദ്, ജില്ലാ ജനറൽ സെക്രട്ടറി ബിബിൻ അഗസ്റ്റിൻ എന്നിവരുടെ നേതൃത്വത്തിലായിരുന്നു പ്രതിഷേധം.

ഭാര്യയുടെ സംസ്കാര ദിവസം ഭർത്താവും മരിച്ചു; അന്ത്യവിശ്രമം ഒരു കല്ലറയിൽ

മുരിക്കുംതൊട്ടി: ഭാര്യയുടെ സംസ്കാരദിവസം ഭർത്താവും മരിച്ചു. മുരിക്കുംതൊട്ടി മണിയാട്ട് ജോയി (74), ഭാര്യ എൽസി (72) എന്നിവർക്കാണ് നാട് ഒരുമിച്ച് അന്ത്യയാത്ര നൽകിയത്. ചികിത്സയിലായിരുന്ന എൽസി ചൊവ്വാഴ്ചയാണ് മരിച്ചത്. വിദേശത്ത് ജോലി ചെയ്യുന്ന മകൻ എത്തുന്നതിനായി വ്യാഴാഴ്ചയാണ് സംസ്കാരം നിശ്ചയിച്ചിരുന്നത്. ബുധനാഴ്ച വൈകുന്നേരം ഭാര്യയുടെ മൃതദേഹം വീട്ടിലെത്തിച്ചപ്പോൾ മുതൽ അതീവ ദുഃഖിതനായി കാണപ്പെട്ട ജോയി വ്യാഴാഴ്ച പുലർച്ചെ നാലോടെ നെഞ്ചുവേദനയെത്തുടർന്നു മരണപ്പെടുകയായിരുന്നു. അന്ത്യയാത്രയിലും ഒന്നിച്ച ഇരുവരുടെയും സംസ്കാരം ഇന്നലെ വൻജനാവലിയുടെ സാന്നിധ്യത്തിൽ മുരിക്കുംതൊട്ടി സെന്‍റ് മരിയഗൊരേത്തി പള്ളിയിൽ കുടുംബക്കല്ലറയിൽ ഇടുക്കി രൂപത മെത്രാൻ മാർ ജോൺ നെല്ലിക്കുന്നേലിന്‍റെ മുഖ്യകാർമികത്വത്തിൽ നടത്തി. ചെമ്മണ്ണാർ മാവറയിൽ കുടുംബാംഗമാണ് എൽസി. മക്കൾ: ഷിബി, സനീഷ്, ജ്യോതിഷ് (യു.കെ), പരേതനായ ഫാ. സജി (ഒസിഡി). മരുമക്കൾ: ജിസ് മാട്ടേൽ (രാജാക്കാട്), ജെസി ചൂടംമാനായിൽ (രാജകുമാരി), എലിസബത്ത് നെടുങ്കല്ലേൽ (തൊടുപുഴ). കോട്ടയം വാടവാതൂർ പൊന്തിഫിക്കൽ ഇൻസ്റ്റിട്യൂട്ട് പ്രസിഡന്‍റ് റവ. ഡോ. പോളി മണിയാട്ട്, രാജാക്കാട് തിരുഹൃദയ മഠം മദർ സുപ്പീരിയർ സിസ്റ്റർ വിനീത എന്നിവർ ജോയിയുടെ സഹോദരങ്ങളാണ്.

കർഷകർക്ക് 3,000 രൂപ പെൻഷൻ നൽകണം: പി.ജെ. ജോസഫ്

തൊടുപുഴ: കർഷകക്ഷേമനിധി ബോർഡിന്‍റെ നിർദേശങ്ങൾക്ക് ധനകാര്യവകുപ്പിന്‍റെ അംഗീകാരം നൽകണമെന്നും കർഷക പെൻഷൻ 3,000 രൂപയാക്കി ഉയർത്തണമെന്നും കേരള കോണ്‍ഗ്രസ് ചെയർമാൻ പി.ജെ. ജോസഫ് എംഎൽഎ ആവശ്യപ്പെട്ടു. പുറപ്പുഴയിലെ വസതിയിൽ ചേർന്ന കേരള കർഷക യൂണിയൻ സംസ്ഥാനനേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. റബർ, നെൽകർഷകപ്രശ്നങ്ങൾ, വന്യമൃഗശല്യം എന്നിവ പരിഹരിക്കുന്നതിൽ സർക്കാരിനു വീഴ്ചയുണ്ടായതായും അദ്ദേഹം പറഞ്ഞു. സംഭരിച്ചനെല്ലിന്‍റെ വില എത്രയുംവേഗം കർഷകർക്ക് നൽകണം. റബർ വിലസ്ഥിരതാ ഫണ്ട് 250 രൂപയാക്കി ഉയർത്തണം. കുരുമുളക് കൃഷി വ്യാപനത്തിനു പ്രത്യേക പദ്ധതി തയാറാക്കണം. ക്ഷീരമേഖലയെ സഹായിക്കണം. ജനങ്ങളുടെ ജീവനും സ്വത്തിനും വളർത്തുമൃഗങ്ങൾക്കും സംരക്ഷണം നൽകുമെന്ന പ്രഖ്യാപനങ്ങൾ യാഥാർഥ്യമാക്കണമെന്നും അദ്ദേഹം ആവശ്യപ്പെട്ടു. സംസ്ഥാന പ്രസിഡന്‍റ് വർഗീസ് വെട്ടിയാങ്കൽ അധ്യക്ഷത വഹിച്ചു. കേരള കോണ്‍ഗ്രസ് സംസ്ഥാന ഡെപ്യൂട്ടി ചെയർമാന്മാരായ ഫ്രാൻസിസ് ജോർജ് എംപി, മുൻ എംഎൽഎ തോമസ് ഉണ്ണിയാടൻ, പാർട്ടി സംസ്ഥാന കോ-ഓർഡിനേറ്റർ അപു ജോണ്‍ ജോസഫ്, കേരള കർഷക യൂണിയൻ സംസ്ഥാന ജനറൽ സെക്രട്ടറി ജോസ് ജയിംസ് നിലപ്പന, ഭാരവാഹികളായ ജോയി തെക്കേടത്ത്, സി.ടി. തോമസ്, ബേബിച്ചൻ കൊച്ചു കരൂർ, ടോമി കാവാലം, ബിനു ജോണ്‍, സണ്ണി തെങ്ങുംപള്ളി, വിനോദ് ജോണ്‍ തുടങ്ങിയവർ പ്രസംഗിച്ചു.

മാനദണ്ഡം കാറ്റിൽപറത്തി വനംവകുപ്പിൽ സ്ഥലംമാറ്റം

തൊടുപുഴ: സംസ്ഥാനത്തെ വനപാലകരുടെ പൊതുസ്ഥലംമാറ്റം അട്ടിമറിച്ച് മാനദണ്ഡങ്ങൾക്കു വിരുദ്ധമായി ഓണ്‍ലൈൻ സ്ഥലം മാറ്റം നടത്താൻ നീക്കമെന്ന് ആക്ഷേപം. സ്ഥലംമാറ്റ മാനദണ്ഡമനുസരിച്ച് ഫെബ്രുവരി, മാർച്ച് മാസങ്ങളിൽ അപേക്ഷ ക്ഷണിച്ച് ഏപ്രിലിൽ സ്ഥലംമാറ്റ ഉത്തരവിറക്കുകയാണ് പതിവായി ചെയ്തിരുന്നത്. ഇതിനു വിരുദ്ധമായി വനംവകുപ്പിൽ ഏപ്രിലിൽ മൂന്നു വർഷം തികയുന്നവരെ ഉൾപ്പെടുത്തിയും ഏപ്രിൽ വരെയുള്ള ഒഴിവുകൾ കണക്കാക്കിയും പൊതുസ്ഥലംമാറ്റത്തിന് ആദ്യം അപേക്ഷ ക്ഷണിച്ചു. എന്നാൽ, സോഫ്റ്റ്‌വെയർ തകരാർ എന്ന പേരിൽ മേയ് മാസത്തിലെ ഒഴിവുകൾകൂടെ കണക്കാക്കി ജൂണിൽ മൂന്നു വർഷം തികയുന്നവരെക്കൂടി ഉൾപ്പെടുത്തി പുതിയ സർക്കുലർ ഇറക്കി ജീവനക്കാരെ കബളിപ്പിക്കുകയാണ് വനംവകുപ്പ് ചെയ്തതെന്ന് ജീവനക്കാർ ആരോപിക്കുന്നു. സ്പാർക്കിൽനിന്നും മാറ്റി ഈ വർഷം മുതൽ വനംവകുപ്പിൽ ഭരണവിഭാഗം മേധാവി തയാറാക്കിയ പുതിയ സോഫ്റ്റ്‌വെയർ വഴിയാണ് ഓണ്‍ലൈൻ സ്ഥലംമാറ്റ നടപടികൾ നടത്തുന്നത്. പുതിയ അധ്യയന വർഷം ആരംഭിച്ചതോടെ മിക്ക ജീവനക്കാരുടെയും കുട്ടികളെ സ്കൂളിൽ ചേർത്ത സാഹചര്യത്തിൽ ജൂണ്‍, ജൂലൈ മാസങ്ങളിൽ മൂന്നുവർഷം തികയുന്നവരെ ഉൾപ്പെടുത്തിയത് മാനദണ്ഡങ്ങൾക്കു വിരുദ്ധമായ നടപടിയെന്നാണ് ജീവനക്കാർ ആക്ഷേപിക്കുന്നത്. സർക്കാരിന്‍റെ പൊതുസ്ഥലംമാറ്റം ഓണ്‍ലൈനാക്കിയത് അഴിമതിരഹിതമായ സിവിൽ സർവീസ് എന്ന ലക്ഷ്യത്തോടെയാണ്. ഇത് അട്ടിമറിക്കുന്ന രീതിയിലാണ് വനംവകുപ്പ് മാനദണ്ഡങ്ങൾ കാറ്റിൽ പറത്തി ഉത്തരവിറക്കാൻ ശ്രമിക്കുന്നത്. സർക്കാരിന്‍റെ പത്തിന കർമപദ്ധതികൾ തുടരുന്പോഴും സംസ്ഥാനത്ത് മനുഷ്യ- വന്യജീവി സംഘർഷം കൂടിവരികയാണ്. ഈ സാഹചര്യത്തിൽ കേരളത്തിലെ അഞ്ച് സർക്കിളുകളിൽ നൂറോളം സെക്‌ഷൻ ഫോറസ്റ്റ് ഓഫീസർമാരുടെ ഒഴിവുകൾ നികത്താതെ കിടന്നിട്ടും ആ ഒഴിവുകൾ നികത്തുന്നതിനുള്ള തീരുമാനമെടുക്കാതെയാണ് വനംവകുപ്പിന്‍റെ ഒളിച്ചുകളി. റൂൾ ഭേദഗതിയുടെയും കോടതി ഉത്തരവിന്‍റെയും പേരുപറഞ്ഞ് ഒഴിവുകൾ നികത്താത്തതുമൂലം വിവിധ ഫീൽഡ് ജോലികൾ ഉൾപ്പെടെ അവതാളത്തിലാണ്. കൃത്യസമയത്ത് സ്ഥാനക്കയറ്റം നൽകാത്തത് ജീവനക്കാരുടെ വലിയ പ്രതിഷേധത്തിനും മനോവീര്യം കെടുത്തുന്നതിനും കാരണമായിട്ടുണ്ട്. വന്യജീവി ആക്രമണംപോലുള്ള സംഭവങ്ങൾ ഇടുക്കിയിൽ ഉൾപ്പെടെ വ്യാപകമാകുന്പോൾ ഇതിനു തടയിടുന്നതിനും സർക്കാരിന്‍റെ കർമപദ്ധതികൾ നടപ്പാക്കുന്നതിനും തടസം ജീവനക്കാരുടെ കുറവാണെന്നും ഇവർ പറയുന്നു .അർഹതപ്പെട്ട സ്ഥാനക്കയറ്റം നൽകാത്തതുമൂലം പുതിയ നിയമനങ്ങൾ നടക്കുന്നില്ലെന്നും ഇവർ ചൂണ്ടിക്കാണിക്കുന്നു. സ്പെഷൽ റൂളിൽ ഉചിതമായ തീരുമാനമെടുക്കാൻ ഹൈക്കോടതി നിർദേശിച്ചെങ്കിലും ഇക്കാര്യത്തിലും ഒരു നടപടിയും ഉണ്ടായിട്ടില്ല. ഇതിനിടെ വകുപ്പുതല പരീക്ഷ പാസായവർക്ക് സ്ഥാനക്കയറ്റം നൽകാതെ അർഹതയില്ലാത്തവർക്ക് സ്ഥാനക്കയറ്റം നൽകിയെന്ന് ആക്ഷേപവും വകുപ്പിൽ ഉയർന്നിരുന്നു. വകുപ്പിൽ കാര്യക്ഷമമായി ജോലിചെയ്യുന്ന ജീവനക്കാർക്ക് കൃത്യസമയത്ത് സ്ഥാനക്കയറ്റം നൽകണമെന്നും സർക്കാരിന്‍റെ പൊതുസ്ഥലമാറ്റം അട്ടിമറിക്കപ്പെടാതെ മാനദണ്ഡങ്ങൾക്കനുസരിച്ച് സ്ഥലംമാറ്റം നടത്തണമെന്നുമാണ് ജീവനക്കാരുടെ ആവശ്യം. ജൂണ്‍, ജൂലൈ മാസങ്ങളിൽ പൊതുസ്ഥലംമാറ്റം നടത്തുന്നതും അർഹമായ പ്രമോഷൻ നിഷേധിക്കുന്നതും ജീവനക്കാരോട് കാണിക്കുന്ന കടുത്ത അനീതിയാണെന്നാണ് സംഘടനകൾ ചൂണ്ടിക്കാട്ടുന്നത്.

വനമഹോത്സവത്തിൽ പങ്കാളികളായി വിദ്യാർഥികളും

ഇടുക്കി: വനംവകുപ്പിന്‍റെ നേതൃത്വത്തിൽ ഇടുക്കി വന്യജീവി സങ്കേതത്തിൽ സംഘടിപ്പിച്ച വനമഹോത്സവത്തിന്‍റെ ഭാഗമായി വിദ്യാർഥികളും. ഇടുക്കി ഗവ. നഴ്സിംഗ് കോളജിലെ നവാഗതരായ വിദ്യാർഥികളെ പങ്കെടുപ്പിച്ച് തോട്ടാപുരയിൽ പരിസ്ഥിതി ബോധവത്കരണവും ഔഷധസസ്യത്തോട്ടം, നക്ഷത്രവനം സന്ദർശനവും നടത്തി. പരിപാടിയുടെ ഭാഗമായി വിദ്യാർഥികൾ വനപാലകർക്കൊപ്പം 1,000 വിത്തുണ്ടകൾ നിർമിക്കുന്നതിലും പങ്കാളികളായി. മനുഷ്യ-വന്യജീവി സംഘർഷം ലഘൂകരിക്കുന്നതിനായി വനംവകുപ്പ് നടപ്പാക്കിവരുന്ന മിഷൻ ഫുഡ് ഫോഡർ ആൻഡ് വാട്ടർ പദ്ധതിയുടെ ഭാഗമായ വിത്തൂട്ട് പരിപാടിക്കായാണ് വിത്തുണ്ട നിർമാണവും നിക്ഷേപിക്കലും നടത്തുന്നത്. കാട്ടാനകൾക്കും മറ്റു വന്യമൃഗങ്ങൾക്കും കാടിനുള്ളിൽ ഭക്ഷ്യവസ്തുക്കൾ ലഭ്യമാകുന്ന പന, കാട്ടുമാവ്, കാട്ടുപ്ലാവ്, ഞാവൽ തുടങ്ങിയ വൃക്ഷങ്ങളുടെ വിത്തുകളാണ് വിത്തുണ്ട നിർമാണത്തിന് ഉപയോഗിക്കുന്നത്. ഇടുക്കി വൈൽഡ് ലൈഫ് വാർഡൻ ജി. ജയചന്ദ്രൻ ഉദ്ഘാടനം ചെയ്തു. അസിസ്റ്റന്‍റ് വൈൽഡ് ലൈഫ് വാർഡൻ ബി. പ്രസാദ്കുമാർ, സെക്‌ഷൻ ഫോറസ്റ്റ് ഓഫീസർ കെ.സി. ആനന്ദൻ, ബീറ്റ് ഫോറസ്റ്റ് ഓഫീസറായ അബ്ദുൾ ഷുക്കൂർ, സെക്‌ഷൻ ഫോറസ്റ്റ് ഓഫീസർ ടോം ജോസ് എന്നിവർ നേതൃത്വം നൽകി.

ബൈക്കും കാറും കൂട്ടിയിടിച്ച് ഒരാള്‍ക്കു പരിക്ക്

കട്ടപ്പന: മലയോര ഹൈവേയില്‍ കാഞ്ചിയാര്‍ പള്ളിക്കവലയ്ക്കും പാലാക്കടയ്ക്കുമിടയില്‍ ബൈക്കും കാറും കൂട്ടിയിടിച്ച് ഒരാള്‍ക്ക് പരിക്കേറ്റു. ബൈക്ക് യാത്രികന്‍ ചോറ്റുപാറ സ്വദേശി ജി. അജേഷിനാണ് ഗുരുതരമായി പരിക്കേറ്റത്. വ്യാഴാഴ്ച വൈകുന്നേരമാണ് അപകടം. റോഡരികില്‍ നിര്‍ത്തിയിട്ട കാര്‍ സ്റ്റാര്‍ട്ട് ചെയ്ത് മുമ്പോട്ടെടുക്കുന്നതിനിടെ ലബ്ബക്കട ഭാഗത്തുനിന്നെത്തിയ ബൈക്കുമായി കൂട്ടിയിടിക്കുകയായിരുന്നു. കാലിന് ഒടിവ് സംഭവിച്ച അജേഷിനെ നാട്ടുകാര്‍ കട്ടപ്പനയിലെ സ്വകാര്യ ആശുപത്രിയില്‍ പ്രവേശിപ്പിച്ചു. അടിമാലി: ദേശീയപാതയിൽ അടിമാലി ഇരുമ്പുപാലത്ത് വാഹനാപകടം. രാവിലെ കാറും ഇരുചക്രവാഹനവും കൂട്ടിയിടിച്ചാണ് അപകടമുണ്ടായത്. പത്താംമൈല്‍ ഭാഗത്തുനിന്ന് ഇരുമ്പുപാലത്തേക്ക് വരികയായിരുന്ന കാറും ചില്ലിത്തോട് ഭാഗത്തുനിന്നും ഇരുമ്പുപാലത്തേക്ക് വന്ന ബൈക്കുമാണ് കൂട്ടിയിടിച്ചത്. ഇടിയുടെ ആഘാതത്തില്‍ ബൈക്ക് യാത്രികന്‍ വാഹനത്തില്‍നിന്നു തെറിച്ചുവീണു. ഇയാളുടെ കാലിനു പരിക്ക് സംഭവിച്ചു. പരിക്കേറ്റ ബൈക്ക് യാത്രികനെ എറണാകുളത്തെ ആശുപത്രിയില്‍ പ്രവേശിപ്പിച്ചു.

നവജാതശിശു മരിച്ചു; പ്രതിഷേധം ശക്തം

അടിമാലി: അടിമാലിയിൽ നവജാതശിശു മരിച്ച സംഭവത്തിൽ പ്രതിഷേധം കനക്കുന്നു. കൃത്യമായ ചികിത്സ ലഭ്യമാകാത്തതിനെത്തുടർന്നാണ് ശിശു മരിച്ചതെന്നാണ് കുടുംബം ആരോപിക്കുന്നത്. കുറത്തിക്കുടി സ്വദേശികളായ ആശ-ഷിബു ദമ്പതികളുടെ മൂന്നാമത്തെ കുഞ്ഞാണ് മരിച്ചത്. അടിമാലിയിലെ ആശുപത്രിയില്‍ കുഞ്ഞ് ജനിച്ച് ഏതാനും സമയത്തിനുശേഷം മരിക്കുകയായിരുന്നു. കഴിഞ്ഞ 15-നായിരുന്നു സംഭവം. 14ന് അടിമാലി താലൂക്കാശുപത്രിയില്‍ വയറുവേദനയെത്തുടര്‍ന്ന് യുവതി ചികിത്സ തേടിയെങ്കിലും യുവതിയുടെയും കുഞ്ഞിന്‍റെയും ആരോഗ്യനില കൃത്യമായി മനസിലാക്കാതെ ഇവരെ തിരികെ കിലോമീറ്ററുകളോളം ദൂരെയുള്ള വീട്ടിലേക്ക് ആശുപത്രി അധികൃതര്‍ തിരികെ അയച്ചതിനെതിരേയാണ് വിമര്‍ശനമുയര്‍ന്നിരിക്കുന്നത്. പ്രസവാവശ്യത്തിനായി ആശുപത്രിയില്‍ അഡ്മിറ്റാകണോയെന്ന് ആരാഞ്ഞ തങ്ങളോട് ഏതാനും ദിവസങ്ങള്‍ക്കുശേഷം അഡ്മിറ്റായാല്‍ മതിയെന്ന് ആശുപത്രി അധികൃതര്‍ നിര്‍ദേശിച്ചിക്കുകയായിരുന്നെന്ന് മരണപ്പെട്ട കുഞ്ഞിന്‍റെ പിതാവ് പറയുന്നു. ഇതനുസരിച്ച് തിരികെ ഇവര്‍ കുറത്തിക്കുടിയില്‍ എത്തിയെങ്കിലും രാത്രിയോടെ യുവതിയുടെ വയറുവേദന കലശലായി. തുടർന്നു വാഹനത്തില്‍ ഇവര്‍ വീണ്ടും ആശുപത്രിയിലേക്ക് പുറപ്പെട്ടു. ഏറെദൂരം യാത്ര ചെയ്ത ഇവര്‍ അടിമാലി താലൂക്കാശുപത്രിയില്‍ എത്തിയപ്പോഴേക്കും യുവതിയുടെ നില കൂടുതല്‍ വഷളായിരുന്നു. ആശുപത്രിയില്‍ എത്തിയപ്പോൾ അവിടെ ഗൈനക്കോളജി ഡോക്ടർ ഉണ്ടായിരുന്നില്ല. തുടര്‍ന്ന് ഡ്യൂട്ടിയിലുണ്ടായിരുന്ന നഴ്‌സ് ഫോണ്‍വഴി ഡോക്ടറെ ബന്ധപ്പെട്ടശേഷം യുവതിയെ മറ്റൊരാശുപത്രിയിലേക്ക് മാറ്റുവാന്‍ നിര്‍ദേശം നല്‍കിയതായും ഷിബു പറഞ്ഞു. എന്നാൽ, മറ്റ് ആശുപത്രിയിലേക്ക് മാറ്റുന്നകാര്യം ആശുപത്രിയിലെ എസ്ടി പ്രമോട്ടറെ അറിയിച്ചിരുന്നില്ലെന്നും ആരോപണമുണ്ട്. പിന്നീട് ഇവർ അടിമാലിയിലെ സ്വകാര്യ ആശുപത്രിയില്‍ ചികിത്സ തേടി. യുവതിയുടെ നില കൂടുതല്‍ വഷളായതോടെ ശസ്ത്രക്രിയയ്ക്ക് വിധേയമാക്കി. പ്രസവം നടന്നെങ്കിലും കുഞ്ഞിന്‍റെ ആരോഗ്യ സ്ഥിതി മോശമായിരുന്നു. താമസിയാതെ കുഞ്ഞ് മരണപ്പെട്ടു. കുഞ്ഞിന്‍റെ മരണം സ്ഥിരീകരിച്ചതോടെ മരിച്ച കുഞ്ഞിനെ യുവതിയുടെ ഭര്‍ത്താവ് ബന്ധുവിന്‍റെ പക്കല്‍ ഏല്‍പ്പിച്ച ശേഷം യുവതിയുമായി കോട്ടയം മെഡിക്കല്‍ കോളജിലേക്ക് പോയി. അടിമാലി താലൂക്കാശുപത്രിയിലെ എസ്ടി പ്രമോട്ടറുമായി ബന്ധപ്പെട്ട് ഐസിയു ആംബുലന്‍സിലാണ് യുവതിയെ കോട്ടയത്തേക്ക് കൊണ്ടുപോയത്. ഈ സംഭവത്തിലാണ് ഇപ്പോള്‍ പ്രതിഷേധം ഉയര്‍ന്നിട്ടുള്ളത്. യുവതിയെ 14ന് ആശുപത്രിയിൽ എത്തിച്ചെങ്കിലും ഇവരുടെ ആരോഗ്യനിലയിൽ കുഴപ്പമില്ലാത്തതിനെതുടർന്നാണ് തിരികെ അയച്ചതെന്ന് ആശുപത്രി സൂപ്രണ്ട് ഡോ. അരുൺ പറഞ്ഞു. യുവതിയെ സ്കാനിംഗിനു വിധേയമാക്കുകയും തുടർന്നുള്ള പരിശോധനയിൽ കുഴപ്പങ്ങൾ ഒന്നും കണ്ടിരുന്നില്ല. ഇതേത്തുടർന്നാണ് ഇവരെ വീട്ടിലേക്ക് പറഞ്ഞുവിട്ടതെന്നും ഡോക്ടർ പറയുന്നു. കുറ്റക്കാര്‍ക്കെതിരേ നടപടി സ്വീകരിക്കണമെന്ന് അടിമാലി: കൊറത്തികുടി ആദിവാസി ഉന്നതിയിലെ നവജാത ശിശു മരിക്കാനിടയായ സംഭവത്തെക്കുറിച്ച് സമഗ്രമായ അന്വേഷണം നടത്തണമെന്ന് ആദിവാസി ക്ഷേമസമിതി ഏരിയാ കമ്മിറ്റി സെക്രട്ടറി എം. ആര്‍. ദീപു, പ്രസിഡന്‍റ് ഗോപി രാമന്‍ എന്നിവര്‍ ആവശ്യപ്പെട്ടു. പ്രസവത്തിനായി 19 ന് ആശുപത്രിയില്‍ എത്തുവാനാണ് ഡോക്ടർ നിര്‍ദേശിച്ചത്. എന്നാല്‍, അസഹ്യമായ വേദനയാണെന്നും വിദഗ്ധ ചികിത്സയ്ക്കായി മെഡിക്കല്‍ കോളജ് ആശുപത്രിയിലേക്കോ മറ്റോ പോകണമെന്ന് ഇവര്‍ ആവശ്യപ്പെട്ടെങ്കിലും ഡോക്ടര്‍ മറ്റു കുഴപ്പങ്ങളൊന്നുമില്ലെന്ന് പറയുകയായിരുന്നു. പിന്നീട് ഇവരെ ഉച്ചകഴിഞ്ഞ് മൂന്നിനുശേഷം വീട്ടിലേക്ക് പറഞ്ഞുവിട്ടു. ആശുപത്രി ജീവനക്കാരുടെ അനാസ്ഥയാണ് നവജാത ശിശു മരിക്കാനിടയാക്കിയതെന്ന് എ കെ എസ് നേതാക്കള്‍ ആരോപിച്ചു.

ഇടുക്കിയുടെ വികസനപദ്ധതി: മുഖ്യമന്ത്രി അവലോകനം ചെയ്തു

ഇടുക്കി: ജില്ലയിലെ വിവിധ വികസന പദ്ധതികളുടെ പ്രശ്നങ്ങൾ മുഖ്യമന്ത്രി പിണറായി വിജയന്‍റെ അധ്യക്ഷതയിൽ കോട്ടയത്ത് ചേർന്ന മേഖലാ യോഗത്തിൽ അവലോകനം ചെയ്തു. ജില്ലയിലെ 11 പദ്ധതികളാണ് ജില്ലാ കളക്ടർ വി. വിഗ്‌നേശ്വരി അവതരിപ്പിച്ചത്. കട്ടപ്പന ടൗണ്‍ഷിപ്പിലെ പട്ടയവിതരണത്തിന് നടപടിയെടുക്കുമെന്ന് മന്ത്രി കെ. രാജൻ പറഞ്ഞു. ആദ്യഘട്ടമായി കൈവശങ്ങൾ തിട്ടപ്പെടുത്തുന്നതിന് നടപടികൾ പൂർത്തീകരിച്ചു. കൈവശങ്ങൾക്ക് പട്ടയം അനുവദിക്കുന്നതിനു വിശദമായ റിപ്പോർട്ട് ലാൻഡ് റവന്യു കമ്മീഷണർ സമർപ്പിച്ചിരുന്നുവെന്ന് റവന്യു സെക്രട്ടറി അറിയിച്ചു. ചെറിയ കടകൾക്ക് പട്ടയം അനവദിക്കുന്ന കാര്യം ഈ മാസംതന്നെ പരിഹരിക്കും. ജില്ലയിലെ വിവിധ ടൗണുകൾ ഉൾപ്പെട്ടുവരുന്ന പ്രദേശങ്ങളിൽനിന്നും 1,500ൽ പരം അപേക്ഷകൾ ലഭിച്ചിട്ടുണ്ട്. മൂന്നാർ മേഖലയിൽ നിർമാണപ്രവർത്തനങ്ങൾക്ക് എൻഒസി വേണമെന്ന നിബന്ധനയിൽ നിയമം ഭേദഗതി ചെയ്തിട്ടുണ്ടെന്നും വിഷയം സർക്കാരിന്‍റെ സജീവ പരിഗണനയിലാണെന്നും മന്ത്രി പറഞ്ഞു. പ്രളയം, മണ്ണിടിച്ചിൽ, ഉരുൾപൊട്ടൽ തുടങ്ങിയ ദുരന്തങ്ങളിൽ ഭൂമി നഷ്ടപ്പെട്ട ഗുണഭോക്താക്കളെ ഭൂരഹിതരായി ഉൾപ്പെടുത്തി ഭൂമി ലഭ്യമാക്കുന്നതിനുള്ള നടപടികൾ സ്വീകരിക്കുന്ന കാര്യത്തിലെ പ്രതിസന്ധി പരിഹരിക്കാൻ ശ്രമം നടത്തും. സുപ്രീംകോടതിയുടെ ഉത്തരവ് പ്രകാരം സിഎച്ച്ആർ മേഖലയിൽ പട്ടയം വിതരണം ചെയ്യുന്നതിന് നിയമപരമായ തടസമുണ്ട്. സിഎച്ച്ആർ പ്രൊവിഷനും ഏലപ്പട്ടയവുമാണ് പ്രശ്നങ്ങളെന്ന് മന്ത്രി റോഷി അഗസ്റ്റിൻ ചൂണ്ടിക്കാട്ടി. അഡ്വക്കറ്റ് ജനറലിനോട് വിഷയത്തിൽ റിപ്പോർട്ട് തേടിയിട്ടുണ്ടെന്ന് റവന്യു സെക്രട്ടറി അറിയിച്ചു. മൂന്നാർ സ്പെഷാലിറ്റി ആശുപത്രി നിർമാണത്തിനായി നിലവിലുള്ള എസ്പിവിയെ മാറ്റി പുതിയ എസ്പിവിയെ നിശ്ചയിക്കുന്നതിനുള്ള നിർദേശം പരിശോധിച്ചുവരികയാണ്. വണ്ടിപ്പെരിയാർ സാമൂഹികാരോഗ്യ കേന്ദ്രത്തിന് പുതിയ കെട്ടിടം നിർമ്മിക്കുന്നതിനും തുടർപ്രവർത്തനങ്ങൾക്കും പിഡബ്ല്യുഡി ആർക്കിടെക്റ്റ് വിംഗിന്‍റെ സഹായം തേടിയിട്ടുണ്ട്. മൂന്നാർ ആർട്സ് കോളജ് നിർമാണത്തിന് 2.8862 ഹെക്ടർ ഭൂമി കണ്ടെത്തി തുടർനടപടികൾ സ്വീകരിച്ചുവരികയുമാണ്. പീരുമേട് മഞ്ചുമല സത്രം എയർ സ്ട്രിപ്പ് പൂർണമായി പ്രവർത്തിപ്പിക്കുന്ന വിഷയം സർക്കാരിന്‍റെ പരിഗണനയിലാണ്. തോട്ടം മേഖലയിലെ ഗ്രാമീണ റോഡുകളുടെ നിർമാണം നടത്തുന്നതിന് വസ്തു പഞ്ചായത്തിന്‍റെ ആസ്തി രജിസ്റ്ററിൽ ഉൾപ്പെടുത്താൻ കഴിയാത്ത വിഷയത്തിൽ റവന്യു വകുപ്പിന്‍റെ അഭിപ്രായം ആരാഞ്ഞിട്ടുണ്ട്. കുട്ടിക്കാനം എംആർഎസ് പുതിയ കെട്ടിടനിർമാണത്തിന്‍റെ വിഷയത്തിൽ ഒരു ബ്ലോക്കിന്‍റെ നിർമാണം എണ്‍പത് ശതമാനം പൂർത്തീകരിച്ചു. കിഫ്ബി പദ്ധതിയിൽ ഉൾപ്പെട്ട കട്ടപ്പന റോഡിന് തൂക്കുപാലം - അച്ചക്കട -കടശിക്കടവ്-കട്ടപ്പന റോഡ് എന്ന് പുനർനാമകരണം ചെയ്ത് ഭരണാനുമതിക്കായി സമർപ്പിച്ച വിഷയത്തിൽ ധനവകുപ്പ് നടപടി സ്വീകരിക്കും.

മരിയാപുരം സ്കൂളിൽ ലഹരിവിരുദ്ധ ദിനാചരണം

ചെറുതോണി: വർധിച്ചുവരുന്ന ലഹരിവസ്തുക്കളുടെ ഉപയോഗം യുവതലമുറയെ നാശത്തിന്‍റെ പടുകുഴിയിലേക്കാണ് നയിക്കുന്നതെന്നു കെസിഎസ്എൽ ഇടുക്കി രൂപത ഡയറക്ടർ ഫാ. അമൽ മണിമലക്കുന്നേൽ. മരിയാപുരം സെന്‍റ് മേരീസ് ഹയർ സെക്കൻഡറി സ്കൂളിൽ കെസിഎസ്എലിന്‍റെയും ഇടുക്കി രൂപത മദ്യവിരുദ്ധ സമിതിയുടെയും നേതൃത്വത്തിൽ നടന്ന ലഹരിവിരുദ്ധ ദിനാചരണം ഉദ്ഘാടനം ചെയ്യുകയായിരുന്നു അദ്ദേഹം. ലഹരിയുടെ ഉപയോഗം തടയുന്നതിനു ജാതി, രാഷ്‌ട്രീയ ഭേദമെന്യേ എല്ലാവരും ഒറ്റക്കെട്ടായി മുന്നിട്ടിറങ്ങണമെന്നും ഫാ. അമൽ മണിമലക്കുന്നേൽ ആഹ്വാനം ചെയ്തു. ദിനാചരണത്തിന്‍റെ ഭാഗമായി ലഹരിവസ്തുക്കളുടെ ഉപയോഗത്താൽ സമൂഹത്തിൽ ഉണ്ടാകാവുന്ന വിപത്തുക്കൾ സൂചിപ്പിക്കുന്ന വിവിധ തരത്തിലുള്ള പോസ്റ്ററുകൾ കുട്ടികൾ തയാറാക്കി സ്കൂൾ പരിസരങ്ങളിൽ പ്രദർശിപ്പിച്ചു. ലഹരിവിരുദ്ധ പ്രതിജ്ഞ ചൊല്ലി ലഹരിക്കെതിരേ ഐക്യദാർഢ്യം പ്രഖ്യാപിക്കുകയും ചെയ്തു. മദ്യവിരുദ്ധ സമിതി സംസ്ഥാന കൗൺസിൽ അംഗം സി.എസ്. റെജികുമാർ ലഹരിവിരുദ്ധ ബോധവത്കരണക്ലാസ് നടത്തി. സ്കൂൾ മാനേജർ ഫാ. തോമസ് ആനിക്കുഴിക്കാട്ടിൽ അധ്യക്ഷത വഹിച്ചു. പ്രിൻസിപ്പൽ ജോയി കെ. ജോസ്, മദ്യവിരുദ്ധസമിതി രൂപതാ പ്രസിഡന്‍റ് സിൽവി ചുനയമ്മാക്കൽ,ഹെഡ്മാസ്റ്റർ സജി മാത്യു, പിടിഎ പ്രസിഡന്‍റ് സണ്ണി കല്ലക്കാവുങ്കൽ, കെസിഎസ്എൽ അനിമേറ്റർമാരായ സജോ സാബു ജോസഫ്, ഹിൽഡ ജോൺ, എൻഎസ്എസ് കോ-ഓർഡിനേറ്റർ എബി ഏബ്രഹാം, എൻസിസി ഓഫീസർ ഷെറിൻ മാത്യു തുടങ്ങിയവർ പ്രസംഗിച്ചു.

തകർന്ന റോഡിലെ കുഴിയിലിരുന്ന് ഒറ്റയാൾ പ്രതിഷേധം

കരിമണ്ണൂർ: തകർന്ന റോഡിലെ കുഴിയിൽ കുത്തിയിരുന്ന് പ്രതിഷേധം. വർഷങ്ങളായി തകർന്നുകിടക്കുന്ന കരിമണ്ണൂർ പഞ്ചായത്തിലെ ഏഴാംവാർഡിൽ ഉൾപ്പെട്ട നെയ്യശേരി-പാഴൂക്കര റോഡിലാണ് കുത്തിയിരുന്ന് നാട്ടുകാരനായ ഷാനവാസ് ലത്തീഫ് പ്രതിഷേധിച്ചത്. റോഡിന്‍റെ പുനരുദ്ധാരണത്തിനായി തുക അനുവദിച്ചെങ്കിലും ഇതുവരെ നടപടിയുണ്ടായിട്ടില്ലെന്നാണ് ആക്ഷേപം. നെയ്യശേരി ഭാഗത്തുള്ളവർക്ക് കരിമണ്ണൂർ സെന്‍റ് ജോസഫ്സ് ഹയർ സെക്കൻഡറി സ്കൂൾ, പ്രാഥമികാരോഗ്യ കേന്ദ്രം, പോലീസ് സ്റ്റേഷൻ എന്നിവിടങ്ങളിലേക്ക് കുറഞ്ഞ ദൂരത്തിൽ എത്താൻ സഹായിക്കുന്ന റോഡാണിത്. നിരവധി സ്കൂൾ വാഹനങ്ങളും ഇതുവഴി സഞ്ചരിക്കുന്നുണ്ട്. റോഡ് തകർന്നിട്ടു പത്തു വർഷത്തോളമായി. പ്രശ്നപരിഹാരത്തിന് പഞ്ചായത്തോ ജനപ്രതിനിധികളോ തയാറാകാത്തതാണു സമരത്തിന് പ്രേരിപ്പിച്ചതെന്ന് ഷാനവാസ് പറഞ്ഞു.

ചിന്നക്കനാൽ ജനവാസമേഖലയിൽ പുലിയിറങ്ങി

രാജാക്കാട്: ചിന്നക്കനാലിൽ ജനവാസ മേഖലയിൽ പുലിയിറങ്ങി. പ്രദേശവാസിയായ രാജപാണ്ടിയുടെ വളർത്തുനായയെ പുലി പിടിച്ചു. ഒരാഴ്ചയായി തോട്ടംമേഖലയിൽ പുലിയുടെ സാന്നിധ്യമുണ്ടെന്നു നാട്ടുകാർ പറയുന്നു. കഴിഞ്ഞ ബുധനാഴ്ച രാത്രിയിലാണ് ചിന്നക്കനാൽ പവർഹൗസ് സ്വദേശി രാജപാണ്ടിയുടെ വളർത്തു നായയെ പുലിയാക്രമിച്ചത്. വീടിന്‍റെ പരിസരത്ത് പുലിയുടെ കാൽപ്പാടുകളും കണ്ടെത്തി. ഒരാഴ്ച മുൻപ് തോട്ടം മേഖലയിൽ പുലിയെ നാട്ടുകാർ കാണുകയും ദൃശ്യങ്ങൾ പകർത്തുകയും ചെയ്തിരുന്നു. തോട്ടംമേഖലയിൽ പുലിയിറങ്ങിയതായി ചൂണ്ടിക്കാട്ടി വനംവകുപ്പിൽ പരാതി സമർപ്പിച്ചിട്ടും പുലിയെ തുരത്താൻ നടപടി സ്വീകരിച്ചിട്ടില്ലെന്നാണു നാട്ടുകാരുടെ ആരോപണം. ചക്കക്കൊമ്പൻ അടക്കമുള്ള കാട്ടാനകളുടെ സാന്നിധ്യം പതിവായുണ്ടാകുന്ന മേഖലയാണ് ചിന്നക്കനാൽ. ആനകൾ ഉയർത്തുന്ന ഭീഷണിക്കു പിന്നാലെയാണ് ഇപ്പോൾ പുലിയും ജനവാസമേഖലയിൽ ഭീതിപരത്തുന്നത്.

സ്വകാര്യ ബസ് പാതയോരത്തേക്ക് നിരങ്ങിനീങ്ങി

അടിമാലി: കല്ലാര്‍-മാങ്കുളം റോഡില്‍ കൈനകരിക്കു സമീപം സ്വകാര്യ ബസ് റോഡില്‍നിന്നു പാതയോരത്തേക്ക് നിരങ്ങിനീങ്ങി. വ്യാഴാഴ്ച ഉച്ചയോടെയായിരുന്നു സംഭവം. ബസ് മാങ്കുളത്തുനിന്ന് അടിമാലിക്ക് വരുന്നതിനിടെ വളവോടുകൂടിയ ഇറക്കത്തിൽ അപകടത്തില്‍പ്പെടുകയായിരുന്നു. റോഡില്‍ നിന്നു ബസ് പാതയോരത്തേക്കു നിരങ്ങിനീങ്ങിയെങ്കിലും വാഹനം താഴ്ചയിലേക്ക് പതിക്കാതിരുന്നതിനാൽ വലിയ അപകടം ഒഴിവായി. സംഭവസമയത്ത് വാഹനത്തില്‍ യാത്രക്കാരുണ്ടായിരുന്നെങ്കിലും ആര്‍ക്കും പരിക്കില്ല. വാഹനം തട്ടിയതിനെത്തുടര്‍ന്ന് ഇവിടെ സ്ഥാപിച്ചിരുന്ന വൈദ്യുത തൂണുകള്‍ തകര്‍ന്നു. വാഹനത്തിന്‍റെ മുന്‍ഭാഗത്തിനു കേടുപാടുകളും സംഭവിച്ചു.

തേനിയിൽ ബൈക്ക് ബസിലിടിച്ച് തീപിടിച്ചു

കുമളി: തമിഴ്നാട്ടിലെ തേനിക്കു സമീപം വീരപാണ്ടിയിൽ ബസിലേക്ക് ബൈക്ക് ഇടിച്ചുകയറി ഇരുവാഹനങ്ങൾക്കും തീപിടിച്ചു. ബസിലെ യാത്രക്കാർ തീ കണ്ട് ഭയന്ന് പുറത്തിറങ്ങിയതിനാൽ രക്ഷപ്പെട്ടു. ബൈക്ക് യാത്രികനെ പരിക്കുകളോടെ തേനി മെഡിക്കൽ കേളജ് ആശുപത്രിയിൽ പ്രവേശിപ്പിച്ചു. ഇന്നലെ ഉച്ചയോടെയാണ് അപകടം ഉണ്ടായത്. മധുരയിൽ നിന്ന് കന്പത്തേക്ക് പോവുകയായിരുന്ന ബസിൽ എതിർദിശയിൽനിന്നു വന്ന ബൈക്ക് നിയന്ത്രണം വിട്ട് ഇടിക്കുകയായിരുന്നു. ബസ് ജീവനക്കാരും നാട്ടുകാരും ചേർന്ന് വെള്ളം ഒഴിച്ച് തീ നിയന്ത്രണ വിധേയമാക്കിയെങ്കിലും അഗ്നിശമന സേന എത്തിയാണ് തീ പൂർണമായും അണച്ചത്. ബൈക്ക് പൂർണമായും കത്തിനശിച്ചു. നിരപ്പായ റോഡിൽ അപകടം പതിവാണ്. നാലുമാസം മുൻപ് ബസും ഇരുചക്ര വാഹനവും കൂട്ടിയിടിച്ച് വാഹനങ്ങൾക്ക് തീപിടിച്ച് ബൈക്ക് യാത്രക്കാരൻ മരിച്ചിരുന്നു. വാഹനങ്ങളുടെ അമിതവേഗമാണ് അപകടങ്ങൾക്ക് കാരണം.

മാലിന്യസംസ്കരണ നിയമം ലംഘിച്ചാൽ നടപടി

തൊടുപുഴ: ശുചിത്വ, മാലിന്യ, സംസ്കരണ മേഖലയിലെ നിയമലംഘനങ്ങൾക്കെതിരേ ശുചിത്വമിഷൻ എൻഫോഴ്സ്മെന്‍റ് സ്ക്വാഡുകളുടെ കർശന നടപടികൾ തുടരുന്പോഴും ഇത്തരം ലംഘനങ്ങൾ തുടരുന്നു. ഒറ്റത്തവണ ഉപയോഗമുള്ള പ്ലാസ്റ്റിക്ക്, ഡിസ്പോസബിൾ വസ്തുക്കളുടെ നിരോധനത്തിന് അടുത്തിടെ ഇറങ്ങിയ ഹൈക്കോടതി ഉത്തരവ് ഉൾപ്പെടെ നിരവധി ഉത്തരവുകളും സർക്കുലറുകളും പ്രാബല്യത്തിൽ ഉണ്ടായിട്ടും തുടരുന്ന നിയമലംഘനങ്ങൾക്കെതിരേയാണ് കർശന നടപടിയുമായി എൻഫോഴ്സ്മെന്‍റ് സ്ക്വാഡുകൾ രംഗത്തുള്ളത്. എന്നാൽ അന്യ ജില്ലകളിൽനിന്നുപോലും ഇവിടെയെത്തി മാലിന്യം തള്ളുന്ന പതിവ് തുടരുകയാണ്. കഴിഞ്ഞ മാസം ജില്ലാതലത്തിലെ രണ്ടു സ്ക്വാഡുകൾ ചേർന്ന് 152 പരിശോധനകളാണ് നടത്തിയത്. കണ്ടെത്തിയ 59 നിയമ ലംഘനങ്ങൾക്ക് 1,87,000 രൂപ പിഴ ചുമത്തി. വാട്സാപ്പ് നന്പർവഴി 13 തദ്ദേശ സ്ഥാപനങ്ങളിലായി 14 പരാതികൾ റിപ്പോർട്ട് ചെയ്തു. ഇവയിൽ നാലെണ്ണം പരിഹരിക്കുകയും ശേഷിക്കുന്നവ തുടർ നടപടികളിലുമാണ്. ഈമാസം ഒന്നിനു മാത്രം ഏഴു തദ്ദേശ സ്ഥാപനങ്ങളിലായി ഏഴു പരാതികളാണ് റിപ്പോർട്ട് ചെയ്തത്. ഇവ പരിശോധിച്ചുവരികയാണ്. മാലിന്യം തള്ളൽ ഉൾപ്പെടെയുള്ള നിയമലംഘനങ്ങൾക്ക് പിഴ ഈടാക്കുന്നത് അതത് തദ്ദേശ സ്ഥാപനങ്ങളാണ്. സ്ക്വാഡ് സംവിധാനത്തിനു പുറമേ സിംഗിൾ വാട്സ്ആപ്പ് നന്പർവഴി റിപ്പോർട്ട് ചെയ്യപ്പെടുന്ന നിയമലംഘനങ്ങൾക്കെതിരേയും കർശന നടപടികൾ സ്വീകരിക്കുന്നുണ്ട്. 9446 700 800 എന്ന വാട്സ്ആപ്പ് നന്പർവഴി മാലിന്യസംസ്കരണവുമായി ബന്ധപ്പെട്ട നിയമലംഘനങ്ങൾ റിപ്പോർട്ട് ചെയ്യുന്ന വ്യക്തികൾക്ക് നിയമലംഘകരിൽനിന്ന് ഈടാക്കുന്ന പിഴയുടെ 25 ശതമാനം തുക പാരിതോഷികമായി നൽകും. നിരോധിത വസ്തുക്കളുടെ സംഭരണം, വിൽപ്പന, ഉപയോഗം എന്നിവ കൂടാതെ പൊതുസ്ഥലങ്ങളുടെയും ജലാശയങ്ങളുടെയും മലിനീകരണം, മാലിന്യങ്ങൾ വലിച്ചെറിയൽ, കത്തിക്കൽ, മലിനജലം ഒഴുക്കൽ തുടങ്ങി എല്ലാത്തരം നിയമലംഘനങ്ങൾക്കെതിരേയും നടപടി സ്വീകരിക്കുന്നുണ്ട്. രണ്ടു ജില്ലാതല സ്ക്വാഡുകൾക്കു പുറമേ, ഇന്‍റേണൽ വിജിലൻസ് ഓഫീസർമാരുടെ നേതൃത്വത്തിൽ മൂന്ന് സ്ക്വാഡുകളും തദ്ദേശസ്ഥാപനതല വിജിലൻസ് സ്ക്വാഡുകളും പ്രവർത്തിക്കുന്നുണ്ട് . ജില്ലാതല സ്ക്വാഡുകളിൽ സ്ക്വാഡ് ഒന്നിന് തൊടുപുഴ, ഇളംദേശം, കട്ടപ്പന, അഴുത ബ്ലോക്ക് പഞ്ചായത്ത് പരിധിയിലും കട്ടപ്പന, തൊടുപുഴ നഗരസഭകളിലുമാണ് പരിശോധനാച്ചുമതല നൽകിയിരിക്കുന്നത്. സ്ക്വാഡ് രണ്ടിന് ഇടുക്കി, ദേവികുളം, നെടുങ്കണ്ടം ബ്ലോക്ക് പഞ്ചായത്ത് പരിധിയിലാണ് പരിശോധനാച്ചുമതല. മൂന്ന് ഐവിഒമാരുടെ നേതൃത്വത്തിൽ ഐവിഒ സ്ക്വാഡ് ഒന്നിനു തൊടുപുഴ നഗരസഭയുടെയും തൊടുപുഴ, ഇളംദേശം ബ്ലോക്കുകളുടെയും ഐവിഒ സ്ക്വാഡ് രണ്ടിന് അടിമാലി, ദേവികുളം, ബ്ലോക്കുകളുടെയും, സ്ക്വാഡ് മൂന്നിന് കട്ടപ്പന, ഇടുക്കി ബ്ലോക്കുകളുടെയും പരിശോധന ചുമതലയാണ് നൽകിയിരിക്കുന്നത്. പരിശോധനകളും നിരീക്ഷണവും ശക്തമാണെങ്കിലും നിയമലംഘനങ്ങൾ തുടരുന്നതാണ് ആശങ്ക സൃഷ്ടിക്കുന്നത്. വനമേഖലയും വിനോദസഞ്ചാര കേന്ദ്രങ്ങളും ഏറെയുള്ള ജില്ലയിൽ മാലിന്യനീക്കം ഏറെ ശ്രമകരമാണ്. എല്ലാവരും ഇക്കാര്യത്തിൽ ബോധവാൻമാരാകുകയും പ്രവർത്തിക്കുകയും ചെയ്യണമെന്ന് ശുചിത്വമിഷൻ അധികൃതർ പറഞ്ഞു. മാലിന്യങ്ങൾ കത്തിക്കുകയോ പൊതു ഇടങ്ങളിൽ നിക്ഷേപിക്കുകയോ ചെയ്യില്ലെന്ന് പ്രതിജ്ഞ എടുക്കുന്നതിനൊപ്പം ഒരാളെയും ഇത്തരത്തിലുള്ള നിയമവിരുദ്ധ പ്രവർത്തനങ്ങളിൽ ഏർപ്പെട്ട് പരിസ്ഥിതിയെ നശിപ്പിക്കാൻ അനുവദിക്കില്ലെന്ന തീരുമാനവുമെടുത്താൽ ശാശ്വത പരിഹാരം സാധ്യമാകുമെന്നാണ് ഇവരുടെ വിലയിരുത്തൽ.

ഗാർഹിക പീഡനം: യുവതി ജീവനൊടുക്കാൻ ശ്രമിച്ചു

ഭർത്താവിനെതിരേ വധശ്രമക്കേസ് തൊടുപുഴ: ഗാർഹിക പീഡനത്തത്തുടർന്ന് യുവതി വിഷം കഴിച്ച് ജീവനൊടുക്കാൻ ശ്രമിച്ചു. ഭർത്താവിനെതിരേ പോലീസ് വധശ്രമത്തിനു കേസെടുത്തു. പല്ലാരിമംഗലം അടിവാട് സ്വദേശിനിയായ യുവതിയുടെ പിതാവിന്‍റെ പരാതിയെത്തുടർന്നാണ് ഭർത്താവ് പുറപ്പുഴ ആനിമൂട്ടിൽ ടോണി മാത്യുവിനെതിരേ കരിങ്കുന്നം പോലീസ് കേസെടുത്തത്, ഭർതൃവീട്ടിലെ കടുത്ത മാനസിക, ശാരീരിക പീഡനങ്ങളെത്തുടർന്നാണ് യുവതി ജീവനൊടുക്കാൻ ശ്രമിച്ചതെന്ന് പിതാവിന്‍റെ പരാതിയിൽ പറയുന്നു. പതിമൂന്നുകാരിയുടെ അമ്മയായ യുവതി ഗുരുതര നിലയിൽ തൊടുപുഴയിലെ സ്വകാര്യ ആശുപത്രിയിൽ ചികിത്സയിലാണ്. ടോണി മാത്യുവിന്‍റെ മാതാപിതാക്കൾ, സഹോദരി എന്നിവർക്കെതിരേ യും പരാതിയിൽ ആരോപണമുണ്ട്. ഇരുപതു പവന്‍റെ സ്വർണാഭരണങ്ങളും രണ്ടു ലക്ഷം രൂപയും നൽകിയാണ് മകളെ ടോണിക്ക് വിവാഹം ചെയ്തു നൽകിയതെന്ന് പിതാവ് പറയുന്നു. ഭർതൃവീട്ടുകാരുടെ നിർബന്ധത്തിനു വഴങ്ങി പിന്നീട് നാലു ലക്ഷം രൂപ പലപ്പോഴായി വാങ്ങി. വീട്ടുകാരുടെ പ്രേരണയാൽ ടോണി മകളെ നിരന്തരം മർദിച്ചിരുന്നു. നൽകിയ പണവും സ്വർണവും നശിപ്പിക്കുകയും ചെയ്തു. ഇതിനിടെ വീട്ടിൽ വഴക്കുണ്ടായതിനെത്തുടർന്ന് മകളും ഭർത്താവും കുട്ടിയും വാടക വീട്ടിലേക്ക് താമസം മാറി. ഇവിടെ വച്ചും മകളെയും പേരക്കുട്ടിയെയും നിരന്തരം ഉപദ്രവിച്ചു. ഇക്കാര്യം ഒൻപതാം ക്ലാസ് വിദ്യാർഥിനിയായ പേരക്കുട്ടി പോലീസിനെ അറിയിച്ചിരുന്നു. ഇതിനിടെ മകളോട് പോയി മരിക്കാൻ പറയുകയും ചെയ്യുമായിരുന്നു. ഭർത്താവിൽ നിന്നു നേരിട്ട കടുത്ത പീഡനം സഹിക്കവയ്യാതെയാണ് മകൾ ജീവനൊടുക്കാൻ ശ്രമിച്ചതെന്നും അതിനാൽ പ്രതികൾക്കെതിരേ നിയമപരമായ നടപടി സ്വീകരിക്കണമെന്നുമാണ് പരാതി. സിഐ ഇ.കെ. സോൾജിമോന്‍റെ നേതൃത്വത്തിലാണ് കേസ് അന്വേഷണം.

മിഷലും പൗലോസും രക്ഷകരായി; നാരായണന് പുതുജീവൻ

തൊടുപുഴ: നടക്കാനാവാതെ അവശ നിലയിൽ പാതയോരത്തു കണ്ടെത്തിയയാളെ ആശുപത്രിയിലെത്തിച്ച് നഴ്സുമാർ മാതൃകയായി. ഉപ്പുകുന്ന് സ്വദേശി നാരായണനാണ് മുതലക്കോടം ഹോളി ഫാമിലി ആശുപത്രിയിലെ അത്യാഹിത വിഭാഗം മെയിൽ നഴ്സുമാരായ മിഷൽ ടോം ജോർജ്, പൗലോസ് ജോണ്‍ എന്നിവർ രക്ഷകരായത്. ചൊവ്വാഴ്ച രാത്രി പത്തോടെ ഡ്യൂട്ടി കഴിഞ്ഞ് ഇരുവരും വീട്ടിലേക്ക് മടങ്ങുന്നതിനിടെയാണ് തൊടുപുഴ-ഉടുന്പന്നൂർ റൂട്ടിൽ ഏഴുമുട്ടം ഭാഗത്ത് റോഡരികിൽ അവശനായി നാരായണനെ കാണുന്നത്. മഴ നനഞ്ഞ് നടക്കാനാവാതെ നിരങ്ങി നീങ്ങുന്ന അവസ്ഥയിലായിരുന്നു ഇയാൾ. സ്കൂട്ടറിൽ മുന്നിൽ പോയ മിഷലാണ് ആദ്യം ഇയാൾക്കരികിലെത്തിയത്. പിന്നാലെ പൗലോസ് എത്തിയപ്പോൾ സഹായത്തിനായി വിളിച്ചു. തുടർന്ന് ഇരുവരും ചേർന്ന് വാഹനത്തിൽ കയറ്റി സമീപത്തുള്ള കടയുടെ വരാന്തയിലെത്തിച്ചു. പ്രാഥമിക ശുശ്രൂഷകൾ നല്കിയ ശേഷം കരിമണ്ണൂർ പോലീസിനെ വിവരമറിയിച്ചു. ഇവർ സ്ഥലത്തെത്തി നാരായണനെ തൊടുപുഴ ജില്ലാ ആശുപത്രിയിൽ എത്തിച്ചു. മിഷലും പൗലോസും ആശുപത്രിയിൽ എത്തി ഇയാൾക്ക് മതിയായ ചികിൽസ ഉറപ്പു വരുത്തിയ ശേഷമാണ് മടങ്ങിയത്. ഇരുവരുടെയും സമയബന്ധിതമായ ഇടപെടൽ അപരിചിതനും നിരാലംബനുമായ നാരായണന് ചികിത്സ ലഭ്യമാകുന്നതിന് സഹായകരമായതായി കരിമണ്ണൂർ പോലീസ് പറഞ്ഞു. മിഷലിനെയും പൗലോസിനെയും ആശുപത്രി അഡ്മിനിസ്ട്രേറ്റർ സിസ്റ്റർ മേരി ആലപ്പാട്ട് അഭിനന്ദിച്ചു.

‘സുന്ദരി യാത്രയായി’

കട്ടപ്പന: കട്ടപ്പന വെള്ളയാംകുടിയിലും കെഎസ്ആർടിസി ഡിപ്പോ ജംഗ്ഷനിലുമെല്ലാം ആളുകൾ വിചിത്രമായ ഒരു ഫ്ലക്സ് ബോർഡ് കണ്ടു. ഒരു നായയുടെ ചരമം അറിയിക്കുന്നതായിരുന്നു അത്. ആളുകൾക്ക് ഫ്ലക്സ് ബോർഡ് വിചിത്രമായിരുന്നുവെങ്കിലും വെള്ളയാംകുടികാർക്കും കെഎസ്ആർടിസി ഡിപ്പോയിലെ ജീവനക്കാർക്കും ആ ഫ്ലക്സ് ബോർഡിന് പിന്നിൽ സ്നേഹത്തിന്‍റെയും വാത്സല്യത്തിന്‍റെയും വലിയൊരു കഥ പറയാനുണ്ടായിരുന്നു. 2018ലെ പ്രളയകാലത്ത് ഒരു രാത്രി ഒരു നായ്ക്കുട്ടിയുടെ നിര്‍ത്താതെയുള്ള കുരകേട്ട് പുറത്തിറങ്ങിയ കെഎസ്ആര്‍ടിസി ജീവനക്കാര്‍ക്ക് തിരിച്ചുകിട്ടിയത് അവരുടെ ജീവനായിരുന്നു. ഈ സമയം മണ്ണിടിച്ചിലുണ്ടാകുമെന്ന് മനസിലാക്കിയ ജീവനക്കാര്‍ ഡിപ്പോയ്ക്കുള്ളിലുണ്ടായിരുന്ന വാഹനങ്ങള്‍ പെട്ടെന്നുതന്നെ റോഡിലേക്ക് മാറ്റി. കുറച്ചുസമയത്തിനുശേഷം ഡിപ്പോയ്ക്കു സമീപം വന്‍ മണ്ണിടിച്ചിലുണ്ടായി. ഡിപ്പോയുടെ വർക്‌ഷോപ്പ് അടക്കം മണ്ണിനടിയിലായി. അതിന്‍റെ അവിശേഷിപ്പുകൾ ഇന്നും ഡിപ്പോയുടെ പരിസരങ്ങളിൽ ഉണ്ട്. അതിനുശേഷം കെഎസ്ആര്‍ടിസി ജീവനക്കാരുടെയും വെള്ളയാംകുടിയിലെ ഓട്ടോറിക്ഷാ തൊഴിലാളികളുടെയും വ്യാപാരികളുടെയും കണ്ണിലുണ്ണിയായി മാറി സുന്ദരി എന്ന വിളിപ്പേര് കിട്ടി വളര്‍ന്ന നായക്കുട്ടി. പ്രദേശവാസികള്‍ തെരുവുനായകള്‍ക്കെതിരേ പ്രതികരിക്കുമ്പോഴും സുന്ദരിയെ ഇവര്‍ ഒഴിവാക്കി. എന്നാല്‍, കഴിഞ്ഞ ദിവസം കെഎസ്ആര്‍ടിസിയുടെ അടിയില്‍ത്തന്നെ പെട്ട് സുന്ദരിയുടെ ജീവന്‍ നഷ്ടമായി. മറ്റൊരു നായും വെള്ളയാംകുടി ടൗണിലെത്താന്‍ സുന്ദരി സമ്മതിക്കുമായിരുന്നില്ല. പരിസരവാസികളല്ലാത്ത ആരെ കണ്ടാലും ഒന്നു വിരട്ടിവിടും. ഇതൊക്കെ കടയടച്ച് വീട്ടില്‍ പോകുന്ന വ്യാപാരികള്‍ക്ക് ആശ്വാസമായിരുന്നു.

ആംബുലൻസ് ചീറിപ്പാഞ്ഞിട്ടും സിനിയുടെ ജീവൻ രക്ഷിക്കാനായില്ല

രാജകുമാരി: ചികിത്സാസൗകര്യങ്ങൾ കുറവുള്ള രാജാക്കാട്ടുനിന്ന് ഒരു വീട്ടമ്മയുടെ ജീവൻ രക്ഷിക്കാൻ ആംബുലൻസ് പാഞ്ഞെങ്കിലും ജീവൻ രക്ഷിക്കാനായില്ല. രാജകുമാരി കളരിക്കുന്നേൽ ജോണിയുടെ ഭാര്യ സിനി എന്ന നാല്പത്തഞ്ചുകാരിയായ വീട്ടമ്മയ്ക്ക് നെഞ്ചുവേദന അനുഭവപ്പെട്ടതിനെത്തുടർന്ന് രാജാക്കാട്ടെ സ്വകാര്യാശുപത്രിയിൽ എത്തിച്ചു. പരിശോധനയിൽ എത്രയും വേഗം വിദഗ്ധ ചികിത്സ തേടണമെന്ന നിർദേശമാണ് ഡോക്ടർ നൽകിയത്. തുടർന്ന് ആംബുലൻസും വാട്സ്ആപ് കൂട്ടായ്മയും ഒന്നിച്ചുള്ള നടപടിയായിരുന്നു.100 കിലോമീറ്റർ അകലെയുള്ള രാജഗിരി ആശുപത്രിയിൽ ഒന്നേമുക്കാൽ മണിക്കൂർകൊണ്ട് സിനിയുമായി ആംബുലൻസെത്തി. ട്രാഫിക് തടസം ഒഴിവാക്കാൻ അടിമാലി, കോതമംഗലം തുടങ്ങിയ സ്ഥലങ്ങളിൽ വാട്സാപ്പ് കൂട്ടായ്മ സംവിധാനമൊരുക്കുകയും ചെയ്തു. എന്നാൽ, ആശുപത്രിയിലെത്തി അധികം വൈകാതെ സിനി മരിച്ചു. പോസ്റ്റ്മോർട്ടം നടപടികൾക്കു ശേഷം ബന്ധുക്കൾ ഏറ്റുവാങ്ങിയ മൃതദേഹം രാജകുമാരി പള്ളിയിൽ സംസ്കരിച്ചു.മക്കൾ: ജോയൽ ജോണി, ഹന്ന ജോണി.

തൊഴിലാളികളുമായി അമിതവേഗത്തിൽ എത്തിയ ജീപ്പ് കാറുമായി കൂട്ടിയിടിച്ചു

നെടുങ്കണ്ടം: ബാലഗ്രാമില്‍ തൊഴിലാളിജീപ്പ് കാറുമായി കൂട്ടിയിടിച്ചു. തൊഴിലാളികള്‍ നിസാര പരിക്കുകളോടെ രക്ഷപ്പെട്ടു. തൂക്കുപാലം - കമ്പംമെട്ട് റോഡില്‍ ബാലഗ്രാമില്‍ ഇന്നലെ രാവിലെ ഏഴോടെയാണ് അപകടം. കമ്പത്തുനിന്ന് ഉടുമ്പന്‍ചോല മേഖലയിലെ ഏലത്തോട്ടങ്ങളില്‍ ജോലിചെയ്യുന്ന തൊഴിലാളികളുമായി വന്നതായിരുന്നു ജീപ്പ്. കൂട്ടാര്‍ ഭാഗത്തുനിന്നു വന്ന ജീപ്പ് അന്യാര്‍തൊളു റൂട്ടിലേക്ക് തിരിഞ്ഞ കാറിൽ ഇടിക്കുകയായിരുന്നു. യുവതി ഓടിച്ചിരുന്ന കാറിലാണ് ജീപ്പ് ഇടിച്ചത്. അപകടത്തില്‍ ജീപ്പിന്‍റെ ഗ്ലാസ് പൂര്‍ണമായും തകര്‍ന്നു. കാറിനും കേടുപാടുകള്‍ സംഭവിച്ചു. സംഭവത്തെത്തുടര്‍ന്ന് ഈ റൂട്ടില്‍ ഓടുന്ന തൊഴിലാളി വാഹനങ്ങള്‍ക്ക് അമിത വേഗതയാണെന്ന് ആരോപിച്ച് പിന്നാലെ എത്തിയ മറ്റ് തൊഴിലാളി വാഹനങ്ങള്‍ നാട്ടുകാര്‍ തടഞ്ഞിട്ടു. കഴിഞ്ഞയാഴ്ച അണക്കരയില്‍ തൊഴിലാളി ജീപ്പിടിച്ച് രണ്ട് യുവാക്കള്‍ മരിക്കാനിടയായതാണ് നാട്ടുകാര്‍ പ്രതിഷേധിക്കാന്‍ കാരണം. പിന്നീട് പോലീസ് ഇടപെട്ടാണ് തൊഴിലാളി ജീപ്പുകള്‍ കടത്തിവിട്ടത്.

പാലാ രൂപത ആഗോള പ്രവാസി സംഗമം: ഒരുക്കങ്ങള്‍ സജീവമായി

പാലാ: രൂപത പ്രവാസി അപ്പൊസ്തലേറ്റിന്‍റെ നേതൃത്വത്തിലുള്ള ആഗോള പ്രവാസി സംഗമത്തിനുള്ള ഒരുക്കങ്ങള്‍ സജീവമായി. 19ന് ചൂണ്ടച്ചേരി സെന്‍റ് ജോസഫ് എന്‍ജിനിയറിംഗ് കോളജിലാണ് ഗ്ലോബല്‍ സംഗമം ഒരുക്കിയിട്ടുള്ളത്. സമ്മേളനം, മത്സര വിജയികള്‍ക്കുള്ള സമ്മാനദാനം, വിവിധ മേഖലകളില്‍ പ്രാഗത്ഭ്യം തെളിയിച്ച പ്രതിഭകള്‍ക്കുള്ള ആദരവ് തുടങ്ങിയവയാണ് ഈ വര്‍ഷത്തെ പ്രധാന ഇനങ്ങള്‍. പാലാ രൂപതയുടെ പ്ലാറ്റിനം ജൂബിലി വര്‍ഷത്തില്‍ രൂപതാംഗങ്ങളായ പ്രവാസികള്‍ക്കും കുടുംബങ്ങള്‍ക്കും ഒരുമിക്കാനുള്ള വേദിയൊരുക്കുന്ന സംഗമം വിജയിപ്പിക്കുന്നതിനായി വിവിധ രാജ്യങ്ങളില്‍ ഇതിനോടകം ചെറിയ സംഗമങ്ങള്‍ പൂര്‍ത്തീകരിച്ചുകഴിഞ്ഞു. കഴിഞ്ഞ വര്‍ഷം ഒട്ടേറെ വേറിട്ട കര്‍മപരിപാടികള്‍ പൂര്‍ത്തീകരിച്ചാണ് ഈ വര്‍ഷത്തെ സമ്മേളനത്തിലേക്ക് പ്രവേശിക്കുന്നത്. പ്രവാസികളുടെ മക്കള്‍ക്കായി നടത്തിയ ഓറിയന്‍റേഷന്‍ പ്രോഗ്രാം മികച്ച പങ്കാളിത്തത്താല്‍ ഏറെ ശ്രദ്ധ നേടിയിരുന്നു. ചേര്‍പ്പുങ്കല്‍ മെഡിസിറ്റിയുമായി ചേര്‍ന്ന് പ്രവാസികള്‍ക്കായി പ്രിവിലേജ് കാര്‍ഡ്, പാലാ സിവില്‍ സര്‍വീസ് ഇന്‍സ്റ്റിറ്റ്യൂട്ടുമായി ചേര്‍ന്ന് വിവിധ ഓറിയന്‍റേഷന്‍ പ്രോഗ്രാമുകള്‍, പ്രവാസികള്‍ക്കും നാട്ടിലുള്ള മാതാപിതാക്കള്‍ക്കും വിദേശങ്ങളില്‍ പഠനത്തിന് തയാറെടുക്കുന്ന വിദ്യാര്‍ഥികള്‍ക്കുമായി പ്രത്യേക സേവന സംവിധാനം, പാലിയേറ്റീവ് പരിചരണം, വിദേശത്തുനിന്ന് മടങ്ങിയെത്തുന്നവര്‍ക്ക് തൊഴില്‍ സംരംഭങ്ങള്‍ ആരംഭിക്കുന്നതിനുള്ള മാര്‍ഗനിര്‍ദേശങ്ങള്‍ തുടങ്ങിയ പ്രവര്‍ത്തനങ്ങള്‍ കഴിഞ്ഞ വര്‍ഷം‍ നടത്താന്‍ കഴിഞ്ഞതായി രൂപത പ്രവാസി അപ്പൊസ്തലേറ്റ് ഡയറക്ടര്‍ ഫാ. കുര്യാക്കോസ് വെള്ളച്ചാലില്‍ അറിയിച്ചു. സംഗമം ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. രൂപത മുഖ്യ വികാരി ജനറാള്‍ മോണ്‍. ജോസഫ് തടത്തില്‍ അധ്യക്ഷത വഹിക്കും.

കാടുകയറാതെ ചക്കക്കൊമ്പന്‍, ഭീതിയോടെ ജനം

ചിന്നക്കനാൽ: നാളുകളായി നാട്ടില്‍ നാശം വിതച്ച് ചക്കക്കൊമ്പന്‍ ജനവാസ മേഖലയില്‍ തുടരുന്നു. ചിന്നക്കനാൽ വിലക്ക് ഭാഗത്താണ് ഇന്നലെ പുലർച്ചെ ചക്കക്കൊമ്പൻ എത്തിയത്.ചിന്നക്കനാൽ ധന്യ ബേക്കറിക്കു സമീപം നിലയുറപ്പിച്ച ചക്കക്കൊമ്പൻ ഒന്നര മണിക്കൂറിനു ശേഷമാണ് ഇവിടെനിന്നു മടങ്ങിയത്. ബേക്കറിക്ക് മുന്നിലെ സിസിടിവിയിലാണ് ചക്കക്കൊമ്പന്‍റെ ദൃശ്യങ്ങൾ പതിഞ്ഞത്.കഴിഞ്ഞ ദിവസങ്ങളിൽ ചക്കക്കൊമ്പൻ 301 കോളനിയിൽ വീടിനു നേരേ ആക്രമണം നടത്തിയിരുന്നു. ചിന്നക്കനാല്‍ പഞ്ചായത്തിലെ വിവിധ മേഖലകളിലായി വ്യാപകമായി കൃഷിനശിപ്പിക്കുകയും നിരവധി കെട്ടിടങ്ങൾക്ക് നാശം വരുത്തുകയും ചെയ്തിട്ടുണ്ട്. .ആക്രമണകാരിയായ ചക്കക്കൊമ്പന്‍ ജനവാസ മേഖലയിൽ ഇറങ്ങുന്നത് തടയണമെന്ന ആവശ്യം ശക്തമായിരി ക്കുകയാണ്.

ലോട്ടറി മോഷ്‌ടാവ് മണിക്കൂറുകൾക്കുള്ളിൽ പോലീസ് പിടിയിൽ

കട്ടപ്പന: പുതിയ ബസ്‌സ്റ്റാൻഡി ലെ ലോട്ടറിക്കടയിൽനിന്ന് പണവും ലോട്ടറി ടിക്കറ്റുകളും അപഹരിച്ച മോഷ്ടാവിനെ മണിക്കൂറു കൾക്കുള്ളിൽ പിടികൂടി കട്ടപ്പന പോലീസ്. ഡിവൈഎസ്പി വി. എ. നിഷാദ്മോന്‍റെ നേതൃത്വത്തിലാണ് പ്രതിയെ പിടികൂടിയത്. നിരവധി മോഷണക്കേസിലെ പ്രതി കൂട്ടാർ ചേലമൂട് ചരുവിളപുത്തന്‍വീട്ടിൽ ആക്രി ഷാജി എന്നറിയപ്പെടുന്ന ഷാജി (52) ആണ് പിടിയിലായത്. സംസ്ഥാനത്തെ നിരവധി മോഷണക്കേസുകളിലെ പ്രതിയായ ഇയാൾ മോഷണത്തിനു ശേഷം ഒളിവിൽ പോകാനുള്ള ശ്രമം നടത്തുന്നതിനിടെയാണ് പിടിയിലായത്. പീച്ചി, തൊടുപുഴ, കമ്പംമെട്ട്, നെടുങ്കണ്ടം, കട്ടപ്പന തുടങ്ങിയ പോലീസ് സ്റ്റേഷനുകളിൽ ഇയാൾക്കെതിരേ മോഷണക്കേസ് നിലവിലുണ്ട്. കമ്പംമെട്ട് പോലീസ് സ്റ്റേഷനിൽ പ്രായപൂർത്തിയാകാത്ത പെൺകുട്ടിയെ പീഡിപ്പിക്കാൻ ശ്രമിച്ചതിന് ഇയാൾക്കെതിരേ പോക്സോ കേസും നിലവിലുണ്ട്. കട്ടപ്പന പുതിയ ബസ് സ്റ്റാന്‍ഡില്‍ പ്രവര്‍ത്തിക്കുന്ന അശോക ലോട്ടറി ഏജന്‍സിയിലാണ് തിങ്കളാഴ്ച അര്‍ധരാത്രി മോഷണം നടന്നത്. ഷട്ടറിന്‍റെ താഴ് തകര്‍ത്ത് ഉള്ളില്‍കടന്ന മോഷ്ടാവ് ലോട്ടറി ടിക്കറ്റുകളും മേശക്കുള്ളില്‍ സൂക്ഷിച്ചിരുന്ന പണവും അപഹരിക്കുകയായിരുന്നു. ചൊവ്വാഴ്ച രാവിലെ ജീവനക്കാരി കട തുറക്കാന്‍ എത്തിയപ്പോഴാണ് മോഷണം നടന്നതായി വ്യക്തമായത്. മോഷണത്തിനുശേഷം ഓട്ടോറിക്ഷയില്‍ നെടുങ്കണ്ടത്തെത്തിയ ഷാജി, മറ്റൊരു ഓട്ടോറിക്ഷയില്‍ കൂട്ടാറിലെ വീട്ടിലെത്തി. സിസി ടിവി ദൃശ്യങ്ങള്‍ കേന്ദ്രീകരിച്ച് നടത്തിയ അന്വേഷണത്തില്‍ ഓട്ടോറിക്ഷാ ഡ്രൈവര്‍മാരെ തിരിച്ചറിഞ്ഞു. നെടുങ്കണ്ടത്തുനിന്ന് പ്രതി വീട്ടിലെത്താന്‍ ഓട്ടം വിളിച്ച ഓട്ടോറിക്ഷയും കണ്ടെത്തി. തുടര്‍ന്ന് ഡ്രൈവറുടെ സഹായത്തോടെ കൂട്ടാറിലെ വീട്ടില്‍നിന്ന് ഷാജിയെ അറസ്റ്റ് ചെയ്യുകയായിരുന്നു. കട്ടപ്പന കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കട്ടപ്പന ഡി വൈഎസ്പി വി.എ.നിഷാദ് മോൻ, കട്ടപ്പന സിഐ ടി.സി. മുരുകൻ, എസ്ഐ എബി ജോർജ്, ജൂണിയർ എസ്ഐ എസ്.എസ്. ശ്യാം, എസ്‌സിപിഒമാരായ കെ.എം. ബിജു, മനോജ് എന്നിവരുടെ നേതൃത്വത്തിലുള്ള പോലീസാണ് പ്രതിയെ പിടികൂടിയത്.

റവന്യുവകുപ്പ് ഒഴിപ്പിച്ച ഭൂമിയില്‍ വീണ്ടും കൈയേറ്റം

രാജാക്കാട്:ശാന്തമ്പാറ തോണ്ടിമലയില്‍ റവന്യു ഭൂമിയിൽ വീണ്ടും കൈയേറ്റം.മുമ്പ് റവന്യു വകുപ്പ് ഒഴിപ്പിച്ച് ഏറ്റെടുത്ത ഭൂമിയിലാണ് കൈയേറി വീണ്ടും ഏലം കൃഷി ചെയ്തിരിക്കുന്നത്. 2021 ഓഗസ്റ്റ് അഞ്ചിനാണ് റവന്യു ഉദ്യോഗസ്ഥര്‍ നേരിട്ടെത്തി ബ്ലോക്ക് നമ്പര്‍ 13 ല്‍ റീ സര്‍വേ നമ്പര്‍ 212/1ല്‍ ഉള്‍പ്പെട്ട ഭൂമിയിലെ കൈയേറ്റം ഒഴിപ്പിച്ച് സ്ഥലം ഏറ്റെടുത്തത്. ഉദ്യോഗസ്ഥര്‍ മടങ്ങിയതിന് പിന്നാലെ കൈയേറ്റക്കാര്‍ ഭൂമിയിൽ വീണ്ടും കൈയേറ്റം നടത്തുകയായിരുന്നു. ഭൂമി കൈയേറി നട്ടുപിടിപ്പിച്ച ഫലവൃക്ഷ ത്തൈകളും മരതൈകളും റവന്യു വകുപ്പ് പിഴുതെറിഞ്ഞിരുന്നു. സമീപത്തുള്ള പട്ടയ സ്ഥലത്തിന്‍റെ മറവിലാണ് റവന്യൂ ഭൂമിയിലെ കൈയേറ്റം.

മറയൂരിലെ ചന്ദനമോഷണം: രണ്ടു പ്രതികൾകൂടി പിടിയിൽ

മറയൂർ: കഴിഞ്ഞ 25 ന് മറയൂർ സർക്കാർ ആശുപത്രി വളപ്പിൽ ജീവനക്കാർ താമസിക്കുന്ന ക്വാർട്ടേഴ്സിന്‍റെ പിന്നിൽനിന്നു ചന്ദനമരം മുറിച്ച് കടത്തിയതുമായി ബന്ധപ്പെട്ട് രണ്ടു പ്രതികൾകൂടി പിടിയിലായി. തിരുവനന്തപുരം പേരൂർക്കാവ് കാട്ടാക്കട സ്വദേശി രഞ്ജിത്ത്, വയനാട് മേപ്പാടി സ്വദേശി അക്ഷയ് എന്നിവരെയാണ് മറയൂർ പോലീസ് പിടികൂടിയത്. കഴിഞ്ഞദിവസം ഒന്നും രണ്ടും പ്രതികളായ തിരുവനന്തപുരം സ്വദേശിയായ അജിത്കുമാർ, മറയൂർ പട്ടിക്കാട് സ്വദേശിയായ മകേഷ് എന്നിവരെ പിടികൂടിയിരുന്നു. കഴിഞ്ഞയാഴ്ച മറയൂരിൽ എത്തിയ മഹേഷ് മറ്റു മൂന്നു പേരെയും വിളിച്ചുവരുത്തി ക്വാർട്ടേഴ്സ് വളപ്പിലെ ചന്ദനം മുറിച്ചു കടത്തുകയായിരുന്നു. മഹേഷിന്‍റെ മാശിവയലിലുള്ള വീട്ടിൽ ചന്ദനം സൂക്ഷിച്ചു . 27ന് ചെത്തിയ ഒരുക്കിയ ചന്ദനം കിറ്റിലാക്കി മറയൂരിൽ നിന്നുള്ള ഒരു ഓട്ടോറിക്ഷ വിളിച്ച് മൂന്നാറിൽ എത്തിച്ചു. മൂന്നാറിൽ എത്തിയതിനുശേഷം രഞ്ജിത്തും അക്ഷയും ചന്ദനവുമായി തിരുവനന്തപുരത്തേക്ക് പോയി. മഹേഷും അജിത്തും മറയൂർ പട്ടിക്കാട്ടിലെ വീട്ടിലേക്കും പോയി. ഇതിനിടെ ചന്ദന മോഷണവുമായി ബന്ധപ്പെട്ട് പരാതി ലഭിച്ചതിനെത്തുടർന്ന് മറയൂർ പോലീസ് നടത്തിവന്ന അന്വേഷണത്തിന് ഒടുവിലാണ് സമാന കേസിൽ മുൻപും അറസ്റ്റിലായിട്ടുള്ള മഹേഷിനെ സംബന്ധിച്ചും അജിത്തിനെ സംബന്ധിച്ചും വിവരം ലഭിച്ചത്. പ്രാദേശികമായി നടത്തിയ അന്വേഷണത്തിൽ അപരിചിതരായ ചിലർ മഹേഷിന്‍റെ വീട്ടിൽ എത്തിയിട്ടുണ്ട് എന്ന് വിവരം ലഭിച്ചു. തുടർന്നാണ് കഴിഞ്ഞ രാത്രി സിഐ ടി.ആർ. ജിജുവിന്‍റെ നേതൃത്വത്തിലുള്ള പോലീസ് വീട് വളഞ്ഞ് അജിത് കുമാറിനെയും മഹേഷിനെയും പിടികൂടിയത്. ഇവരെ ചോദ്യം ചെയ്തപ്പോൾ മറ്റു രണ്ടു പ്രതികളെ കുറിച്ചും സൂചന ലഭിച്ചു. തുടർന്ന് ചൊവ്വാഴ്ച രാത്രിയോടെ അക്ഷയ്, രഞ്ജിത്ത് എന്നിവരെ ഉദുമൽപേട്ടയിൽവച്ച് പിടികൂടുകയായിരുന്നു. നാലു പേരെയും റിമാൻഡ് ചെയ്തു.

ജലവിതരണ പദ്ധതിക്കായി വെട്ടിപ്പൊളിച്ച റോഡ് തകർന്നു

കുടയത്തൂർ: ജലവിതരണപൈപ്പ് സ്ഥാപിക്കാൻ വെട്ടിപ്പൊളിച്ചതിനെത്തുടർന്നു റോഡ് തകർന്നു. കുടയത്തൂർ പഞ്ചായത്തിലെ 11, 7 വാർഡുകളിൽപ്പെടുന്ന കോളപ്ര- അടൂർമല റോഡാണ് തകർന്നത്. മഴക്കാലം ആരംഭിച്ചതോടെ വാഹന ഗതാഗതം സാധ്യമാകാത്തവിധം പൂർണമായി റോഡ് തകർന്ന നിലയിലാണ്. ജലവിതരണപൈപ്പ് സ്ഥാപിക്കാനെടുത്ത കുഴി വേണ്ടവിധം മൂടാത്തതാണ് പ്രശ്നം സങ്കീർണമാക്കിയതെന്നു നാട്ടുകാർ പറയുന്നു. നൂറുകണക്കിനു ജനങ്ങൾ താമസിക്കുന്ന പ്രദേശത്തേക്കുള്ള യാത്രാമാർഗമാണ് അവഗണിക്കപ്പെട്ടു കിടക്കുന്നത്. ജലവിതരണപൈപ്പ് സ്ഥാപിക്കാനെടുത്ത കുഴി മൂടാത്തതിനാൽ മറ്റ് കരാറുകാർ നിർമാണം ഏറ്റെടുക്കുന്നില്ല. കരാറുകാർക്ക് ചെയ്ത ജോലിയുടെ ബിൽ മാറിക്കിട്ടാത്തതിനാൽ അവർ പുതിയ ജോലി ഏറ്റെടുക്കാനും തയാറാകുന്നില്ല. ജലവിതരണപൈപ്പ് സ്ഥാപിക്കുന്നതിനുള്ള മുഴുവൻ തുകയും അനുവദിച്ചിട്ടുണ്ടെന്ന് അധികൃതർ പറഞ്ഞിരുന്നു. എന്നാൽ കോടികൾ ലഭിക്കാനുണ്ടെന്നാണ് കരാറുകാരൻ പറയുന്നത്. സ്ഥലം എംഎൽഎ മന്ത്രിയായിട്ടും റോഡിന്‍റെ കാര്യത്തിൽ അവഗണന തുടരുകയാണെന്ന് നാട്ടുകാർ ആരോപിക്കുന്നു. കുടയത്തൂർ പഞ്ചായത്തിലെ ഒന്നാം വാർഡിലെയും രണ്ടാം വാർഡിലെയും റോഡുകളുടെ അവസ്ഥയും ഇതുതന്നെയാണ്. രണ്ടു വർഷം മുൻപ് പൊളിച്ച കുടയത്തൂർ പഞ്ചായത്തിലെ റോഡുകൾ പലതും ഇനിയും പൂർവ സ്ഥിതിയിലാക്കിയിട്ടില്ല. പഞ്ചായത്തിലൂടെ കടന്നുപോകുന്ന തൊടുപുഴ - പുളിയൻമല സംസ്ഥാന പാതയുടെ ശങ്കരപ്പള്ളി മുതൽ കാഞ്ഞാർ വരെയുള്ള ഭാഗം, പ്രധാന ടൂറിസ്റ്റ്കേന്ദ്രമായ ഇലവീഴാപൂഞ്ചിറയിലേക്കുള്ള കാഞ്ഞാർവഴിയുള്ള റോഡ്, കാഞ്ഞാർ - ആനക്കയം റോഡ്, പഞ്ചായത്തിലൂടെ കടന്നുപോകുന്ന പൊതുമരാമത്ത് വകുപ്പിന്‍റെ മറ്റ് റോഡുകൾ എന്നിവയുടെ സ്ഥിതിയും വ്യത്യസ്തമല്ല. ജലവിതരണപൈപ്പ് സ്ഥാപിക്കാനെടുത്ത കുഴി വേണ്ടവിധം മൂടാതിരുന്നതാണ് റോഡ് തകരാൻ കാരണമെന്ന് വാർഡ് മെംബർ ഷീബ ചന്ദ്രശേഖരപിള്ള പറഞ്ഞു. പ്രശ്നപരിഹാരത്തിനായി അധികൃതരെ നിരന്തരം ബന്ധപ്പെട്ടെങ്കിലും നടപടിയായിട്ടില്ല. റോഡിന്‍റെ അറ്റകുറ്റപ്പണികൾക്കായി നീക്കിവച്ചിരിക്കുന്ന ഫണ്ട് അപര്യാപ്തമായതിനാൽ കരാറുകാർ നിർമാണം ഏറ്റെടുക്കാൻ തയാറാകുന്നില്ലെന്നും മെംബർ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]