ADVERTISEMENT

ADVERTISEMENT

ചലച്ചിത്ര പ്രദർശനം

തൊടുപുഴ: ഫിലിം സൊസൈറ്റിയുടെ പ്രതിമാസ ചലച്ചിത്ര പ്രദർശനം ഇന്നു വൈകുന്നേരം അഞ്ചിന് തൊടുപുഴ സിൽവർ ഹിൽസ് സിനിമാസിൽ നടക്കും. ഫോണ്‍: 9447776524.

ADVERTISEMENT

മൂലമറ്റത്ത് മരം അപകട ഭീഷണിയുയർത്തുന്നു

മൂലമറ്റം: ടൗണിനു സമീപം പ്രധാന റോഡിനോടുചേർന്നു നിൽക്കുന്ന മരം അപകടഭീഷണിയുയർത്തുന്നതായി പരാതി. മരം ഒടിഞ്ഞുവീണാൽ വൈദ്യുതി ലൈനും കെട്ടിടങ്ങൾക്കും തകരാർ സംഭവിക്കും. അപകടഭീഷണിയിൽ നിൽക്കുന്ന ഈ മരത്തിനു സമീപംനിന്ന മരം വീണ് കുറച്ചു വർഷങ്ങൾക്ക് മുന്പ് ചേറാടി സ്വദേശിയായ തൊഴിലാളി മരിച്ചിരുന്നു. എന്നിട്ടും നിലവിൽ അപകടഭീഷണി ഉയർത്തിനിൽക്കുന്ന മരം വെട്ടിമാറ്റുന്ന കാര്യത്തിൽ അധികൃതർ നടപടി സ്വീകരിക്കുന്നില്ലെന്ന് നാട്ടുകാർ പറയുന്നു. മരം വെട്ടി നീക്കണമെന്നാവശ്യപ്പെട്ട് വ്യാപാരികളുടെ നേതൃത്വത്തിൽ അറക്കുളം പഞ്ചായത്തിൽ പരാതി നൽകിയെങ്കിലും തീരുമാനമുണ്ടായില്ല. മരം കെഎസ്ഇബിയുടെ ഉടമസ്ഥതയിലുള്ള സ്ഥലത്താണെന്നും ഇതു വെട്ടിമാറ്റേണ്ട ചുമതല അവർക്കാണെന്നും പറഞ്ഞ് കെഎസ്ഇബിക്ക് കത്ത് നൽകി അവർ ഉത്തരവാദിത്വത്തിൽനിന്ന് ഒഴിഞ്ഞുമാറി. മരം വെട്ടി മാറ്റിയില്ലെങ്കിൽ പ്രതിഷേധ സമരം സംഘടിപ്പിക്കുമെന്ന് മർച്ചന്‍റ് അസോസിയേഷൻ ഭാരവാഹികൾ പറഞ്ഞു.

ജില്ലയിലെ മാധ്യമ പ്രവർത്തകർക്കായി കുടുംബശ്രീ ശില്പശാല നടത്തി

തൊടുപുഴ: കുടുംബശ്രീ ജില്ലാ മിഷന്‍റെ നേതൃത്വത്തിൽ മാധ്യമ പ്രവർത്തകർക്കായി ശില്പശാല നടത്തി. ഇടുക്കി പ്രസ് ക്ലബിൽ നടത്തിയ ശില്പശാല നഗരസഭ വൈസ് ചെയർപേഴ്സണ്‍ പ്രഫ. ജെസി ആന്‍റണി ഉദ്ഘാടനം ചെയ്തു. കുടുംബശ്രീയുടെ പ്രവർത്തനം മാതൃകാപരമാണെന്നും ആയിരക്കണക്കിനു വീട്ടമമ്മാർക്ക് ആശ്രയവും തൊഴിലവസരവും വരുമാനവും സൃഷ്ടിക്കാൻ കുടുംബശ്രീക്ക് കഴിഞ്ഞിട്ടുണ്ടെന്ന് അവർ പറഞ്ഞു. പ്രസ് ക്ലബ് പ്രസിഡന്‍റ് വിനോദ് കണ്ണോളി അധ്യക്ഷത വഹിച്ചു. കുടുംബശ്രീ ജില്ലാ മിഷൻ കോ-ഓർഡിനേറ്റർ ജി. ഷിബു മുഖ്യപ്രഭാഷണം നടത്തി. തൊടുപുഴ നഗരസഭ കുടുംബശ്രീ അംഗം ആൻസ് മേരി അനുഭവം പങ്കുവച്ചു. പ്രസ് ക്ലബ് സെക്രട്ടറി ജെയിസ് വാട്ടപ്പിള്ളിൽ സ്വാഗതവും തൊടുപുഴ നഗരസഭ സിഡിഎസ് ചെയർപേഴ്സണ്‍ സുഷമ ജോയി നന്ദിയും പറഞ്ഞു. ജില്ലാ പ്രോഗ്രാം മാനേജർമാരായ കെ.വി. ബിപിൻ, അസർ ബിൻ ഇസ്മയിൽ, വി.എ. അരുണ്‍, ആര്യ മുരളി, എസ്. ലക്ഷ്മി, ബിജു ജോസഫ്, എസ്. സൗമ്യ എന്നിവർ കുടുംബശ്രീ ജില്ലാ മിഷന്‍റെയും സിഡിഎസിന്‍റെയും നേതൃത്വത്തിൽ ജില്ലയിൽ നടപ്പാക്കുന്ന വിവിധ പദ്ധതികൾ, പ്രവർത്തനങ്ങൾ എന്നിവ സംബന്ധിച്ച് ക്ലാസ് നയിച്ചു. പ്രസ് ക്ലബ് ട്രഷറർ ആൽവിൻ തോമസ്, വൈസ് പ്രസിഡന്‍റ് പി.കെ. ലത്തീഫ്, ജോയിന്‍റ് സെക്രട്ടറി അഖിൽ സഹായി, കമ്മിറ്റിയംഗങ്ങളായ വി.വി. നന്ദു, ഷിയാസ് ബഷീർ, സംസ്ഥാന കമ്മിറ്റിയംഗം വിൽസണ്‍ കളരിക്കൽ തുടങ്ങിയവർ നേതൃത്വം നൽകി.

ജന്തുജന്യരോഗം: കരുതൽ വേണമെന്ന് ആരോഗ്യവകുപ്പ്

തൊടുപുഴ: ജന്തുജന്യ രോഗങ്ങൾ ജീവന് ഭീഷണിയായി മാറുന്ന സാഹചര്യത്തിൽ ജനങ്ങൾ ഇതിനെതിരേ ജാഗ്രത പാലിക്കണമെന്ന് ആരോഗ്യ വകുപ്പ്. റിപ്പോർട്ട് ചെയ്യപ്പെടുന്നതിൽ 60 ശതമാനം പകർച്ചവ്യാധികളും ജന്തു ജന്യമായതിനാൽ ഏകാരോഗ്യം എന്ന പദ്ധതിയിലൂടെ രോഗവ്യാപനം തടയുന്നതിനായി രോഗ നിരീക്ഷണപ്രതിരോധ പ്രവർത്തനങ്ങളും ശക്തമാക്കണമെന്ന് നിർദേശമുണ്ട്. എലിപ്പനി, സ്ക്രബ് ടൈഫസ്, കുരങ്ങ് പനി, നിപ, പേ വിഷബാധ, ജപ്പാൻ ജ്വരം, വെസ്റ്റ് നൈൽ ഫീവർ, പക്ഷിപ്പനി എന്നിവയാണ് സാധാരണയായി റിപ്പോർട്ട് ചെയ്യുന്ന ജന്തുജന്യ രോഗങ്ങൾ. ജീവികളിൽനിന്ന് വൈറസ്, ബാക്ടീരിയ, പരാദങ്ങൾ തുടങ്ങിയ രോഗാണുക്കൾ മനുഷ്യരിലെത്തിയാണ് ഇത്തരം രോഗങ്ങൾ പിടിപെടുന്നത്. മൃഗങ്ങളുമായി നേരിട്ടും അല്ലാതെയുമുള്ള സന്പർക്കം, അവയുടെ ശരീര സ്രവങ്ങളുമായുള്ള സന്പർക്കം എന്നിവയിലൂടെ രോഗം പിടിപെടാനുള്ള സാധ്യതയേറെയാണ്. മൃഗങ്ങളുടെ വാസസ്ഥലം, തൊഴുത്ത്, ഫാമുകൾ എന്നിവിടങ്ങളിലുള്ള ഇടപെടലുകൾ, വളർത്തുമൃഗങ്ങളുടെ പരിപാലനം ഇവയിലെല്ലാം ആവശ്യമായ മുൻ കരുതലുകൾ സ്വീകരിക്കണം. മൃഗങ്ങളുമായി ഇടപെട്ടുകഴിഞ്ഞാൽ ഉടൻതന്നെ കൈകൾ സോപ്പും വെള്ളവും ഉപയോഗിച്ച് വൃത്തിയാക്കണം. മൃഗങ്ങളെ മുഖത്തോട് ചേർത്ത് ഓമനിക്കരുത്. അഞ്ച് വയസിൽ താഴെയും 65 വയസിന് മുകളിലും പ്രായമുള്ളവർ, രോഗപ്രതിരോധ ശേഷി കുറഞ്ഞവർ, ഗർഭിണികൾ എന്നിവർ മൃഗങ്ങളുമായി അടുത്ത് പെരുമാറുന്പോൾ കൂടുതൽ ശ്രദ്ധിക്കണം. മൃഗങ്ങളിൽനിന്ന് മുറിവോ പോറലുകളോ ഉണ്ടായാൽ ഉടൻതന്നെ സോപ്പും വെള്ളവും ഉപയോഗിച്ച് വൃത്തിയായി കഴുകുകയും വൈദ്യസഹായം തേടുകയും വേണം. വളർത്തു മൃഗങ്ങൾക്കുള്ള പ്രതിരോധ കുത്തിവയ്പുകൾ കൃത്യമായി എടുക്കണം. വനമേഖലയിൽ തൊഴിലിനും വിനോദത്തിനുമായി പോകുന്പോൾ ആവശ്യമായ വ്യക്തിഗത സുരക്ഷാ മാർഗങ്ങൾ സ്വീകരിക്കണമെന്നും നിർദേശമുണ്ട്. ജന്തുജന്യരോഗ ദിനാചരണം നടത്തി ഇടുക്കി: ജില്ലാ മെഡിക്കൽ ഓഫീസ്, ദേശീയ ആരോഗ്യ ദൗത്യം, രാജാക്കാട് സാമൂഹികാരോഗ്യകേന്ദ്രം എന്നിവയുടെ ആഭിമുഖ്യത്തിൽ ലോക ജന്തുജന്യരോഗ ദിനാചരണത്തിന്‍റെ ജില്ലാതല ഉദ്ഘാടനവും ബോധവത്കരണ സെമിനാറും സംഘടിപ്പിച്ചു. നെടുങ്കണ്ടം പഞ്ചായത്ത് പ്രസിഡന്‍റ് കെ.ടി. കുഞ്ഞ് ഉദ്ഘാടനം ചെയ്തു. രാജാക്കാട് പഞ്ചായത്ത് പ്രസിഡന്‍റ് നിഷാ രതീഷ് അധ്യക്ഷത വഹിച്ചു. ജില്ലാ സർവെയ്‌ൻസ് ഓഫീസർ ഡോ. ജോബിൻ ജി. ജോസഫ് മുഖ്യപ്രഭാഷണം നടത്തി. രാജാക്കാട് മെഡിക്കൽ ഓഫീസർ ഡോ. ദീപു കൃഷ്ണ ക്ലാസ് നയിച്ചു.

മൂവാറ്റുപുഴ-തേനി സംസ്ഥാന പാത : അധികൃതരുടെ മെല്ലെപ്പോക്ക് പ്രതിസന്ധി സൃഷ്ടിക്കുന്നു

തൊടുപുഴ: മൂവാറ്റുപുഴ-തേനി സംസ്ഥാന പാതയിലെ കൈയേറ്റമുള്ള ഭാഗം സർവേ നടത്തി ഏറ്റെടുത്ത് പൊതുമരാമത്ത് വകുപ്പിനു കൈമാറണമെന്ന ഹൈക്കോടതി നിർദേശം പാലിക്കാൻ അധികൃതർ തയാറാകുന്നില്ലെന്ന് ആക്ഷേപം ഉയരുന്നു. മൂവാറ്റുപുഴ ചാലിക്കടവ് പാലം മുതൽ പെരുമാങ്കണ്ടം വരെ ജർമൻ സാന്പത്തിക സഹായത്തോടെ റോഡ് നിർമാണം പൂർത്തീകരിച്ചിട്ട് അഞ്ചുവർഷത്തോളമായി. കുമാരമംഗലം വില്ലേജിലെ പെരുമാങ്കണ്ടം മുതൽ കോടിക്കുളം വില്ലേജിലെ മുസ്‌ലിംപള്ളി കോട്ടക്കവല വരെയുള്ള മൂന്നു കിലോമീറ്റർ ദൂരമാണ് സ്വകാര്യ വ്യക്തികളുടെ കൈവശത്തിലുള്ളത്. ഈ ഭാഗം അളന്നുതിരിച്ച് കല്ലിട്ട് തിരിക്കണമെന്ന നിർദേശമാണ് ഇനിയും പൂർത്തിയാകാനുള്ളത്. ഹൈവേ പുനർനിർമാണ സെൻട്രൽ ആക്‌ഷൻ കമ്മിറ്റി ചെയർമാൻ ഫാ. ജോസ് കിഴക്കേൽ, വൈസ് ചെയർമാൻ എം.ജെ. ജോണ്‍ മാറാടികുന്നേൽ എന്നിവരുടെ നേതൃത്വത്തിൽ ഹൈക്കോടതിയിൽനിന്ന് അനുകൂല വിധി സന്പാദിച്ചിരുന്നു. ഇതേത്തുടർന്നു സ്വകാര്യവ്യക്തികളും കൈവശമുള്ള ഭൂമി ആളന്നുതിരിച്ച് കല്ലിടാൻ ഇടുക്കി ജില്ലാകളക്ടർ വി. വിഗ്നേശ്വരി തൊടുപു ഭൂരേഖാ തഹസിൽദാർക്ക് നിർദേശം നൽകുകുയും ചെയ്തിരുന്നു. ഇതിന്‍റെ ഭാഗമായി സർവേ ജീവനക്കാർ സ്ഥലം അളന്നുതിരിക്കാനുള്ള ജോലി ആരംഭിച്ചെങ്കിലും നടപടികൾ ഇനിയും പൂർത്തിയായിട്ടില്ല. സ്ഥലം അളന്നുതിരിച്ച് കല്ലിട്ട് ഏറ്റെടുത്തുനൽകിയാൽ മാത്രമേ പൊതുമരാമത്തു വിഭാഗത്തിനു തുടർനടപടികളുമായി മുന്നോട്ടുപോകാനാകൂ. നിലവിൽ മൂന്നുകിലോമീറ്റർ ദൂരം ഏറ്റെടുത്ത് നിർമാണം നടത്തുന്നതിനായി പി.ജെ. ജോസഫ് എംഎൽ എ ഇടപെട്ട് ആറരക്കോടി രൂപയോളം അനുവദിച്ചിട്ടുണ്ട്. എന്നാൽ സ്ഥലം ഏറ്റെടുക്കാത്തതിനാൽ ഈ ഫണ്ട് പാഴാകുന്ന സ്ഥിതിയാണ് നിലവിൽ. അടിയന്തരമായി സ്ഥലം ഏറ്റെടുത്ത് നിർമാണ ജോലി ആരംഭിക്കണമെന്ന ആവശ്യം ശക്തമായിരിക്കുകയാണ്. ഇതിനിടെ പാതയുമായി ബന്ധപ്പെട്ടുള്ള കേസ് ഹൈക്കോടതി അടുത്ത ദിവസം വീണ്ടും പരിഗണിച്ചേക്കും.

ജില്ലാ ആശുപത്രിയിലേക്ക് കോണ്‍ഗ്രസ് മാർച്ച് നടത്തി

തൊടുപുഴ: സംസ്ഥാനത്ത് ആരോഗ്യരംഗം തകർന്നടിഞ്ഞതിന്‍റെ ഉത്തരവാദിത്വം ഏറ്റെടുത്ത് മന്ത്രി വീണാ ജോർജ് രാജി വയ്ക്കണമെന്ന് ഡിസിസി പ്രസിഡന്‍റ് സി.പി. മാത്യു ആവശ്യപ്പെട്ടു. തൊടുപുഴ, കരിമണ്ണൂർ ബ്ലോക്ക് കോണ്‍ഗ്രസ് കമ്മിറ്റികളുടെ ആഭിമുഖ്യത്തിൽ ജില്ലാ ആശുപത്രിയിലേക്കു നടത്തിയ മാർച്ചും ധർണയും ഉദ്ഘാടനം ചെയ്യുകയായിരുന്നു അദ്ദേഹം. ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് ഷിബിലി സാഹിബ് അധ്യക്ഷത വഹിച്ചു. മുൻ ഡിസിസി പ്രസിഡന്‍റ് റോയ് കെ. പൗലോസ് മുഖ്യപ്രഭാഷണം നടത്തി. നിഷ സോമൻ, രാജു ഓടയ്ക്കൽ, ഇന്ദുസുധാകരൻ, എൻ.ഐ. ബെന്നി, എം.ഡി. അർജുനൻ, ലീലാമ്മ ജോസ്, ചാർളി ആന്‍റണി, തുടങ്ങിയവർ പ്രസംഗിച്ചു.

നെടുങ്കണ്ടത്ത് കോണ്‍ഗ്രസ് മാര്‍ച്ചില്‍ സംഘര്‍ഷം; മൂന്ന് പ്രവര്‍ത്തകര്‍ക്ക് പരിക്ക്

നെടുങ്കണ്ടം: ആരോഗ്യവകുപ്പ് മന്ത്രി വീണാ ജോര്‍ജിന്‍റെ രാജി ആവശ്യപ്പെട്ട് കോണ്‍ഗ്രസ് നടത്തിയ താലൂക്ക് ആശുപത്രി മാര്‍ച്ചില്‍ സംഘര്‍ഷം. പ്രവര്‍ത്തകരും പോലീസും ഏറ്റുമുട്ടി. മൂന്ന് പ്രവര്‍ത്തകര്‍ക്ക് പരിക്കേറ്റു. കോണ്‍ഗ്രസ് നെടുങ്കണ്ടം, ഉടുമ്പന്‍ചോല ബ്ലോക്ക് കമ്മിറ്റികളുടെ നേതൃത്വത്തിലാണ് താലൂക്ക് ആശുപത്രിയിലേക്ക് മാര്‍ച്ചും ധര്‍ണയും നടത്തിയത്. പടിഞ്ഞാറേക്കവലയില്‍നിന്ന് ആരംഭിച്ച മാര്‍ച്ച് കിഴക്കേക്കവലയിലെ താലൂക്ക് ആശുപത്രി റോഡില്‍ പോലീസ് വടം കെട്ടി തടഞ്ഞു. ഇത് മറികടക്കാനുള്ള ശ്രമത്തിനിടെയാണ് സംഘര്‍ഷം ഉണ്ടായത്. പ്രവര്‍ത്തകരും പോലീസും ഏറെനേരം പരസ്പരം ഏറ്റുമുട്ടി. പോലീസിന്‍റെ ലാത്തികൊണ്ടുള്ള അടിയേറ്റാണ് പ്രവര്‍ത്തകര്‍ക്ക് പരിക്കേറ്റത്. മുതിര്‍ന്ന നേതാക്കള്‍ ഏറെ പണിപ്പെട്ടാണ് പ്രവര്‍ത്തകരെ ശാന്തരാക്കിയത്. തുടര്‍ന്ന് നടന്ന ധര്‍ണ മുന്‍ ഡിസിസി പ്രസിഡന്‍റെ ജോയി തോമസ് ഉദ്ഘാടനം ചെയ്തു. നെടുങ്കണ്ടം ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് സി.എസ്. യശോധരന്‍ യോഗത്തില്‍ അധ്യക്ഷത വഹിച്ചു. ഉടുമ്പന്‍ചോല ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് എന്‍.പി. ജോസ്, അഡ്വ. എം.എന്‍. ഗോപി തുടങ്ങിയവര്‍ പ്രസംഗിച്ചു.

നെടുങ്കണ്ടം ബി എഡ് കോളജിന്‍റെ ഇന്‍റഗ്രേറ്റഡ് ബ്ലോക്കിന്‍റെ ശിലാസ്ഥാപനം നടന്നു

നെടുങ്കണ്ടം: നെടുങ്കണ്ടം ബിഎഡ് കോളജിന്‍റെ പുതിയ ഇന്‍റഗ്രേറ്റഡ് ബ്ലോക്ക് കെട്ടിടസമുച്ചയത്തിന്‍റെ തറക്കല്ലിട്ടു. മഹാത്മാഗാന്ധി യൂണിവേഴ്‌സിറ്റിയുടെ കീഴില്‍ ജില്ലയില്‍ ആരംഭിച്ച ആദ്യ ബിഎഡ് കോളജാണ് നെടുങ്കണ്ടത്തേത്. 1992 മുതല്‍ യൂണിവേഴ്‌സിറ്റി നേരിട്ട് നടത്തുന്ന സ്ഥാപനം റീജണല്‍ കോളജ് എന്ന പദവിയിലേക്ക് ഉയര്‍ത്തി. ഇപ്പോള്‍ ഉന്നത വിദ്യാഭ്യാസ വകുപ്പിന് കീഴിലെ സി പാസിലാണ് സ്ഥാപനം പ്രവര്‍ത്തിക്കുന്നത്. സര്‍ക്കാര്‍ നിര്‍ദേശപ്രകാരം ബിഎഡ് കോളജുകള്‍ നാക് അക്രഡിറ്റേഷന്‍ നേടി ഇന്‍റഗ്രേറ്റഡ് പദവിയിലേക്ക് മാറണം. ഇതിനായി പുതിയ കെട്ടിട സമുച്ചയം ആവശ്യമാണ്. ഈ സാഹചര്യത്തിലാണ് എം.എം. മണി എംഎല്‍എയുടെ ആസ്തി വികസന ഫണ്ടില്‍നിന്ന് കെട്ടിട നിര്‍മാണത്തിനായി മൂന്ന് കോടി രൂപ അനുവദിച്ചത്. കോളജ് ഓഡിറ്റോറിയത്തില്‍ നടന്ന യോഗത്തില്‍ എം.എം. മണി എംഎല്‍എ ശിലാസ്ഥാപനം നിര്‍വഹിച്ചു. കോളജ് ഡെവലപ്‌മെന്‍റ് കമ്മിറ്റി ചെയര്‍മാന്‍ പി.എന്‍. വിജയന്‍ അധ്യക്ഷത വഹിച്ചു. സി പാസ് ഡയറക്ടര്‍ പി. ഹരികൃഷ്ണന്‍ മുഖ്യപ്രഭാഷണം നടത്തി. കോളജ് മുന്‍ പ്രിന്‍സിപ്പൽ ഡോ. രാജീവ് പുലിയൂര്‍, ജില്ലാ പഞ്ചായത്ത് അംഗം ജിജി കെ. ഫിലിപ്, ഗ്രാമപഞ്ചായത്ത് പ്രസിഡന്‍റ് പ്രിമി ലാലിച്ചന്‍, കോളജ് ഡെവലപ്‌മെന്‍റ് കമ്മിറ്റി അംഗങ്ങൾ തുടങ്ങിയവർ പ്രസംഗിച്ചു.

ജീവൻ രക്ഷാ - മത്സ്യബന്ധനോപകരണങ്ങൾ വിതരണം ചെയ്തു

ചെറുതോണി: പത്മശ്രീ മമ്മൂട്ടി നേതൃത്വം നൽകുന്ന കെയർ ആൻഡ് ഷെയർ ഇന്‍റർനാഷണൽ ഫൗണ്ടേഷനും കേരള വനം - വന്യജീവി വകുപ്പും ഇടുക്കി വൈൽഡ് ലൈഫ് ഡിവിഷനും സംയുക്തമായി കൊലുമ്പൻ കോളനി നിവാസികൾക്ക് ജീവൻ രക്ഷാ - മത്സ്യബന്ധനോപകരണങ്ങൾ വിതരണം ചെയ്തു. വെള്ളാപ്പാറ നിശാഗന്ധി ഫോറസ്റ്റ് മിനി ഡോർമെറ്ററിയിൽ നടന്ന പരിപാടി ഇടുക്കി രൂപത മെത്രാൻ മാർ ജോൺ നെല്ലിക്കുന്നേൽ ഉദ്ഘാടനം ചെയ്തു. ആദിവാസി സമൂഹത്തിന്‍റെ ഉന്നമനത്തിനും സുരക്ഷിത തൊഴിലിനുംവേണ്ടിയാണ് സുരക്ഷ മത്സ്യബന്ധന ഉപകരണങ്ങൾ വിതരണം ചെയ്തത്. ഇടുക്കി ഫ്ലയിംസ്ക്വാഡ് ഡിവിഷൻ ഫോറസ്റ്റ് ഓഫീസർ എം.ജി. വിനോദ്കുമാർ അധ്യക്ഷത വഹിച്ചു. കെയർ ആൻഡ് ഷെയർ മാനേജിംഗ് ഡയറക്ടർ ഫാ. തോമസ് കുര്യൻ മരോട്ടിപ്പുഴ, വൈൽഡ് ലൈഫ് വാർഡൻ ജി. ജയചന്ദ്രൻ, പി.കെ. വിപിൻദാസ്, സി.ടി. ഔസേപ്പ്, ബി. പ്രസാദ്കുമാർ, കെ.എം. ജലാലുദീൻ, സി. രഘു എന്നിവർ പ്രസംഗിച്ചു.

ഇടുക്കി മെഡിക്കൽ കോളജാശുപത്രിയുടെ ശുചിമുറി മാലിന്യം റോഡിലൂടെ ഒഴുകുന്നു

ചെറുതോണി: ഇടുക്കി മെഡിക്കൽ കോളജാശുപത്രിയുടെ ശുചിമുറി മാലിന്യം റോഡിലൂടെ പുഴയിലേക്ക് ഒഴുകുന്നതായി പരാതി. ആശുപത്രിയുടെ പുതിയ മന്ദിരത്തിൽ രോഗികളെ കിടത്തി ചികിത്സ തുടങ്ങിയതു മുതൽ മലിന ജലം ആശുപത്രിയിലേക്കുള്ള റോഡിലൂടെ ഒഴുകുകയാണ്. ഇത് സമീപത്തുകൂടി ഒഴുകുന്ന ചെറുതോണി തോട്ടിലൂടെ പെരിയാറിലാണ് ചേരുന്നത്. ശുചി മുറിയിലെ മലിന ജലം സംഭരിക്കാൻ ആശുപത്രിയുടെ സംരക്ഷണഭിത്തിയോട് ചേർന്നാണ് ടാങ്ക് നിർമിച്ചിരിക്കുന്നത്. ഇതിൽനിന്ന് അധിക ജലം നീക്കം ചെയ്യാൻ നാലിഞ്ച് വ്യാസമുളള പിവിസി പൈപ്പും ഘടിപ്പിച്ചിട്ടുണ്ട്. പൈപ്പിന്‍റെ മറ്റേയറ്റം കരിങ്കൽ ഭിത്തിയോട് ചേർന്ന് ആശുപത്രി റോഡിലേക്കാണ് തുറന്നു വച്ചിരിക്കുന്നത്. മലിന ജലം ശേഖരിക്കുന്ന ടാങ്ക് നിറഞ്ഞ് സദാനേരവും ഈ പിവിസി പൈപ്പിലൂടെ ജലം റോഡിലേക്ക് ഒഴുകുകയാണ്. കുറച്ച് നാളുകളായി ആശുപത്രിയുടെ സംരക്ഷണഭിത്തിയിലൂടെ ടാങ്കിൽനിന്നുള്ള മലിന ജലം ചോർന്നൊലിക്കുകയാണ്. ആശുപത്രിയിലേക്കുള്ള റോഡിലൂടെ നിരന്നൊഴുകുന്ന മലിന ജലം ആശുപത്രിയിലേക്ക് കാൽനടയായി വരുന്നവരെയാണ് ഏറെ ബുദ്ധിമുട്ടിക്കുന്നത്. വാഹനങ്ങൾ കടന്നുപോകുമ്പോൾ ദുർഗന്ധം വമിക്കുന്ന മലിന ജലം ജനങ്ങളുടെ ദേഹത്തേക്ക് തെറിക്കും. കിറ്റ്കോയ്ക്കായിരുന്നു ആശുപത്രികെട്ടിടത്തിന്‍റെ നിർമാണച്ചുമതല. ആശുപത്രികെട്ടിട നിർമാണത്തിൽ വ്യാപകമായ ന്യൂനതകളും പോരായ്മകളുമുള്ളതായി പരാതികളുണ്ട്. മലിനജല സംഭരണിയിൽനിന്ന് പുറത്തേക്ക് ഒഴുകുന്ന ജലം മറ്റൊരു ടാങ്കിലാക്കുകയും ശുദ്ധീകരിച്ച് പുറന്തള്ളുകയും വേണമെന്നാണ് ജനങ്ങൾ ആവശ്യപ്പെടുന്നത്.

സ്വകാര്യ ബസ് പണിമുടക്ക്: ജനം വലഞ്ഞു

തൊടുപുഴ: വിവിധ ആവശ്യങ്ങൾ ഉന്നയിച്ച് ബസുടമാ സംയുക്ത സമിതിയുടെ നേതൃത്വത്തിൽ ഇന്നലെ ജില്ലയിൽ നടത്തിയ പണിമുടക്ക് ജനത്തെ വലച്ചു. പണിമുടക്കിനെത്തുടർന്ന് ജില്ലയിൽ സ്വകാര്യ ബസ് സർവീസ് പൂർണമായും നിലച്ചതോടെ വിദ്യാർഥികളും ജോലിക്കാരുമടക്കം നിരവധി യാത്രക്കാർ വലഞ്ഞു. സ്വകാര്യ ബസുകൾ ഏറെയുള്ള ഹൈറേഞ്ചിലെ ഉൾനാടൻ മേഖലകളിൽനിന്നുള്ള യാത്രക്കാരാണ് ഏറെ ബുദ്ധിമുട്ടിയത്. കെഎസ്ആർടിസി ബസുകൾ മാത്രമായിരുന്നു യാത്രക്കാരുടെ ആശ്രയം. ഇന്നലെ ബസ് പണിമുടക്കും ഇന്ന് പൊതു പണിമുടക്കുംകൂടി വന്നതോടെ ജനങ്ങളുടെ ദുരിതം ഇരട്ടിച്ചു. ജില്ലയിലെ ആറ് കെഎസ്ആർടിസി ഡിപ്പോകളിലും ഇന്നലെ രാവിലെ മുതൽ വലിയ തിരക്കാണ് അനുഭവപ്പെട്ടത്. എല്ലാ ട്രിപ്പുകളിലും നിറയെ യാത്രക്കാരുണ്ടായിരുന്നു. തൊടുപുഴ ഡിപ്പോയിൽനിന്ന് സാധാരണയുള്ള 47 ട്രിപ്പുകൾക്ക് പുറമേ എട്ട് അധിക സർവീസുകൾ കെഎസ്ആർടിസി നടത്തിയാണ് യാത്രാ ക്ലേശം പരിഹരിച്ചത്. പെരിങ്ങാശേരി - ചീനിക്കുഴി, തൊടുപുഴ - അടിമാലി, തൊടുപുഴ - വണ്ണപ്പുറം റൂട്ടുകളിലാണ് കൂടുതൽ സർവീസുകൾ നടത്തിയത്. എന്നാൽ പല ഉൾനാടൻ മേഖലകളിൽനിന്നും കെഎസ്ആർടിസി സർവീസ് ഇല്ലാത്തതിനാൽ ജനങ്ങൾ ദുരിതത്തിലായി. പതിവ് ബസ് യാത്രികരായ പലരും ഇന്നലെ സ്വന്തം വാഹനങ്ങളിൽ യാത്ര ചെയ്തു. വിദ്യാർഥികൾ പലരും വഴിയരികിൽനിന്ന് ഇരുചക്ര വാഹനങ്ങളിൽ ലിഫ്റ്റ് ചോദിച്ച് പോകുന്നതും കാണാമായിരുന്നു. മറ്റ് ചിലർ സൈക്കിളിലും മറ്റുമാണ് സ്കൂളിലെത്തിയത്. വിവിധ ഓഫീസുകളിലും സ്ഥാപനങ്ങളിലും ജോലി ചെയ്യുന്നവർ ഓട്ടോകളെയാണ് കൂടുതൽ ആശ്രയിച്ചത്. സ്വകാര്യ ബസുടമകളുമായി കഴിഞ്ഞ ദിവസം ട്രാൻസ്പോർട്ട് കമ്മീഷണർ നടത്തിയ ചർച്ച പരാജയപ്പെട്ടതോടെയാണ് സംയുക്ത സമരസമിതി ഇന്നലെ സൂചനാ പണിമുടക്ക് നടത്തിയത്. ദീർഘകാലമായി സർവീസ് നടത്തുന്ന ലിമിറ്റഡ് സ്റ്റോപ്പിന്‍റെയും ദീർഘദൂര ബസുകളുടെയും പെർമിറ്റുകൾ പുതുക്കി നൽകുക, വിദ്യാർഥികളുടെ ടിക്കറ്റ് നിരക്ക് കാലോചിതമായി വർധിപ്പിക്കുക, ബസ് ജീവനക്കാർക്ക് പോലീസ് ക്ലിയറൻസ് സർട്ടിഫിക്കറ്റ് നിർബന്ധമാക്കിയ നടപടി പിൻവലിക്കുക, ഇ-ചെല്ലാൻ വഴിയുള്ള അന്യായമായ പിഴ ചുമത്തൽ അവസാനിപ്പിക്കുക, ബസുകളിൽ മാത്രം ജിപിഎസ്, സ്പീഡ് ഗവർണർ, കാമറകൾ തുടങ്ങിയ വിലകൂടിയ ഇലക്‌ട്രോണിക്സ് ഉപകരണങ്ങൾ അടിച്ചേൽപ്പിക്കുന്ന ഗതാഗത വകുപ്പിന്‍റെ നടപടി അവസാനിപ്പിക്കുക എന്നീ ആവശ്യങ്ങൾ ഉന്നയിച്ചാണ് സമരം. 22 മുതൽ അനിശ്ചിതകാല സമരവും സംഘടിപ്പിക്കാനാണ് സമരസമിതിയുടെ തീരുമാനം.

ടാങ്കറിൽ എത്തിച്ച മാലിന്യം തള്ളി: ഒന്നര ലക്ഷം പിഴ

മുട്ടം: തൊടുപുഴ - പുളിയൻമല സംസ്ഥാന പാതയോരത്ത് പെരുമറ്റത്തിനു സമീപം ശുചിമുറി മാലിന്യം തള്ളിയ ടാങ്കർ ലോറിക്ക് പുറമേ ജീവനക്കാരേയും പോലീസ് പിടികൂടി. ഡ്രൈവർ കോട്ടയം ആർപ്പൂക്കര സ്വദേശി കന്പിച്ചിറ ശ്രീക്കുട്ടൻ (28 ), സഹായി കോട്ടയം വെച്ചൂർ നീതു ഭവനിൽ നിധീഷ് മോൻ(32 ) എന്നിവരാണ് പിടിയിലായത്. ആലപ്പുഴ ചേർത്തല സ്വദേശിയുടെ ഉടമസ്ഥതയിലുള്ളതാണ് ലോറി. മാലിന്യംകൊണ്ടുവന്ന് തള്ളിയ ടാങ്കറുകളിൽ ഒന്നാണ് പിടികൂടിയത്. മറ്റൊന്നിന്‍റെ ഉടമയോട് ടാങ്കർ മുട്ടം സ്റ്റേഷനിൽ എത്തിക്കാൻ നിർദേശിച്ചിട്ടുണ്ട്. പോലീസ് പിടികൂടിയ ടാങ്കർ കോടതിക്ക് കൈമാറും. സംഭവത്തിൽ മുട്ടം പഞ്ചായത്ത് വാഹന ഉടമകളിൽനിന്ന് 75000 രൂപ വീതം പിഴ ഈടാക്കും. രണ്ട് ടാങ്കറിനുമായി 1,50,000 രൂപ പിഴ ഒടുക്കണം. ഇതിനിടെ ടാങ്കറിലെ ജീവനക്കാരെ ഇന്നലെ മുട്ടം പഞ്ചായത്ത് ഓഫീസിൽ യൂത്ത് കോണ്‍ഗ്രസിന്‍റെ നേതൃത്വത്തിൽ തടഞ്ഞുവച്ചു. ഞായറാഴ്ച പുലർച്ചെയാണ് രണ്ട് ടാങ്കർ ലോറികളിലായി എത്തിച്ച മാലിന്യം മലങ്കര എസ്റ്റേറ്റിന്‍റെ ഉടമസ്ഥതയിലുള്ള റബർ തോട്ടത്തിൽ തള്ളിയത്. ഇതു ചെന്നുപതിക്കുന്നത് 100 മീറ്റർ അപ്പുറത്തുള്ള മലങ്കര ജലാശയത്തിലാണ്. ഇതു കണക്കിലെടുത്താണ് ഉയർന്ന പിഴ ഈടാക്കാൻ പഞ്ചായത്ത് തീരുമാനിച്ചത്. ആയിരക്കണക്കിന് ആളുകൾ കുടിവെള്ളമായി ഉപയോഗിക്കുന്നത് ഈ ജലാശയത്തിലെ വെള്ളമാണ്. മുട്ടം പഞ്ചായത്ത് പെരുമറ്റത്ത് സ്ഥാപിച്ചിരിക്കുന്ന നിരീക്ഷണ കാമറയിൽ ടാങ്കറുകളുടെ ദൃശ്യം പതിഞ്ഞതാണ് പ്രതികളെ അതിവേഗം പിടികൂടാൻ ഇടയാക്കിയത്. ഞായറാഴ്ച പുലർച്ചെ രണ്ട് ടാങ്കറുകൾ പലവട്ടം ഇതു വഴി കടന്നുപോകുന്നതായി കാമറയിൽ പതിഞ്ഞിരുന്നു. രണ്ട് ടാങ്കറുകളുടേയും ദൃശ്യവും നന്പർ പ്ലേറ്റും വ്യക്തമായി ലഭിച്ചു. പ്രതികളെ അറസ്റ്റു ചെയ്ത് ജാമ്യത്തിൽ വിട്ടയച്ചു. വഴിയോരത്തും പുഴയോരത്തും നിർത്തി അതിവേഗത്തിൽ മാലിന്യം ഒഴുക്കിക്കളയാനായി വലിയ കുഴലും പിടിച്ചെടുത്ത ടാങ്കറിൽ സ്ഥാപിച്ചിട്ടുണ്ട്. ഒരടിയലധികം വലിപ്പമുള്ള കുഴലാണ് ടാങ്കറിന്‍റെ മുൻവശത്ത് സ്ഥാപിച്ചിട്ടുള്ളത്. നിയമപ്രകാരം ഇത് അനുവദനീയമല്ല. വാഹനത്തിന്‍റെ ടെസ്റ്റ് ജോലികളും മറ്റും കഴിഞ്ഞശേഷം അനധികൃതമായാണ് ഇത് സ്ഥാപിക്കുന്നത്. ഇത്തരം കുഴലുകൾ ഉള്ളതിനാൽ വഴിയോരത്ത് നിർത്തി രണ്ട് മിനിറ്റിനകം മുഴുവൻ മാലിന്യവും ഒഴുക്കിക്കളയാൻ കഴിയും. ഇത്തരം നിയമവിരുദ്ധ വാഹനങ്ങളുടെ ഫിറ്റ്നസ് റദ്ദ് ചെയ്യണമെന്ന് നാട്ടുകാർ ആവശ്യപ്പെട്ടു. പഞ്ചായത്ത് ഓഫീസിൽ തടഞ്ഞുവച്ചു ജനവാസ മേഖലയിൽ മാലിന്യം തള്ളിയ വാഹന ഡ്രൈവറെയും സഹായിയെയും ഒപ്പം എത്തിയവരെയും ഇന്നലെ യൂത്ത് കോണ്‍ഗ്രസിന്‍റെ നേതൃത്വത്തിൽ പഞ്ചായത്തിൽ തടഞ്ഞുവച്ചു. ഇന്നലെ ഉച്ചയ്ക്ക് 12നാണ് സംഭവം. പഞ്ചായത്ത് നിശ്ചയിച്ച പിഴ അടയ്ക്കാൻ പണം കൈവശം ഇല്ലെന്ന് പറഞ്ഞതോടെ യൂത്ത് കോണ്‍ഗ്രസ് പ്രവർത്തകർ പഞ്ചായത്തിന്‍റെ ഷട്ടറുകൾ അടച്ചിടുകയായിരുന്നു. പിഴത്തുക അടയ്ക്കാതെ പുറത്ത് വിടാനാകില്ലെന്ന് പറഞ്ഞതോടെ സംഘർഷാവസ്ഥയായി. പിന്നീട് കൂടുതൽ യൂത്ത് കോണ്‍ഗ്രസ് പ്രവർത്തകരും പോലീസും സ്ഥലത്തെത്തി. തുടർന്ന് നടത്തിയ ചർച്ചകൾക്ക് ഒടുവിൽ 50,000 രൂപ അടപ്പിക്കുകയും ബാക്കി ഒരു ലക്ഷം രൂപ ഇന്ന് അടയ്ക്കാമെന്നുമുള്ള ഉറപ്പിൽ പ്രശ്നം പരിഹരിക്കുകയായിരുന്നു. ഇതിനിടെ വാക്കുതർക്കം കൈയേറ്റമായതോടെ പോലീസ് ഇടപെട്ടാണ് ശാന്തമാക്കിയത്.

കെഎസ്എസ്പിയു മാർച്ച് നടത്തി

തൊടുപുഴ: കേരള സ്റ്റേറ്റ് സർവീസ് പെൻഷനേഴ്സ് യൂണിയൻ ജില്ലാ കമ്മിറ്റിയുടെ നേതൃത്വത്തിൽ തൊടുപുഴ ജില്ലാ പോസ്റ്റൽ സൂപ്രണ്ട് ഓഫീസിലേക്ക് മാർച്ചും ധർണയും നടത്തി. നൂറുകണക്കിന് പെൻഷൻകാർ മാർച്ചിൽ പങ്കെടുത്തു. പങ്കാളിത്ത പെൻഷൻ പദ്ധതി ഉപേക്ഷിക്കുക, പിഎഫ്ആർഡിഎ നിയമം പിൻവലിക്കുക, കേന്ദ്ര ധനകാര്യ ഭേദഗതി ബിൽ പിൻവലിക്കുക, കേരളത്തോടുള്ള കേന്ദ്ര സർക്കാരിന്‍റെ പ്രതികാര നടപടികൾ അവസാനിപ്പിക്കുക തുടങ്ങിയ ആവശ്യങ്ങളുന്നയിച്ചായിരുന്നു സമരം. എൻജിഒ യൂണിയൻ സംസ്ഥാന സെക്രട്ടേറിയറ്റംഗം എസ്. സുനിൽകുമാർ ഉദ്ഘാടനം ചെയ്തു. ജില്ലാ പ്രസിഡന്‍റ് കെ.കെ. സുകുമാരൻ അധ്യക്ഷത വഹിച്ചു. സംസ്ഥാന കമ്മിറ്റിയംഗം വി.കെ. മാണി ,ജില്ലാ സെക്രട്ടറി എ.എൻ. ചന്ദ്രബാബു, ട്രഷറർ ടി. ചെല്ലപ്പൻ, വൈസ് പ്രസിഡന്‍റുമാരായ ലീലാമ്മ ഗോപിനാഥ് , പി.എം. അബ്ദുൾ അസീസ്, പി.ഡി. ദാനിയേൽ, വി.വി. ഫിലിപ്പ്, പി.കെ. സുകുമാരൻ എന്നിവർ പ്രസംഗിച്ചു.

മന്ത്രി വീണയുടെ രാജി: യൂത്ത് കോണ്‍ഗ്രസ് മാർച്ചും റോഡ് ഉപരോധവും സംഘർഷഭരിതം

തൊടുപുഴ: കോട്ടയം മെഡിക്കൽ കോളജിൽ കാലപ്പഴക്കംചെന്ന കെട്ടിടം തകർന്നുവീണ് വീട്ടമ്മ മരിച്ച സംഭവത്തിൽ മന്ത്രി വീണാ ജോർജിന്‍റെ രാജി ആവശ്യപ്പെട്ട് യൂത്ത് കോണ്‍ഗ്രസ് ജില്ലാ ആശുപത്രിയിലേക്ക് നടത്തിയ മാർച്ചും റോഡ് ഉപരോധവും സംഘർഷത്തിൽ കലാശിച്ചു. മങ്ങാട്ടുകവല-കാഞ്ഞിരമറ്റം ബൈപാസ് റോഡ് ഉപരോധിച്ച ചാണ്ടി ഉമ്മൻ എംഎൽഎ അടക്കമുള്ള പ്രവർത്തകരെ പോലീസ് ബലംപ്രയോഗിച്ച് അറസ്റ്റ് ചെയ്തു നീക്കാൻ ശ്രമിച്ചതാണ് സംഘർഷത്തിനിടയാക്കിയത്. ഇന്നലെ ഉച്ചയ്ക്ക് 12-ഓടെയാണ് മങ്ങാട്ടുകവല ബസ് സ്റ്റാൻഡ് പരിസരത്തുനിന്നു നൂറുകണക്കിനു പ്രവർത്തകർ താലൂക്ക് ആശുപത്രിയിലേക്ക് പ്രകടനമായി എത്തിയത്. ന്യൂമാൻ കോളജ് പഴയ കവാടത്തിനു സമീപം ബാരിക്കേഡ് തീർത്ത് പ്രവർത്തകരെ പോലീസ് തടഞ്ഞെങ്കിലും ഇവ നീക്കി വലയം ഭേദിക്കാനുള്ള പ്രവർത്തകരുടെ ശ്രമം ഏറെ ശ്രമകരമായാണ് പോലീസ് തടഞ്ഞത്. തുടർന്നു പ്രവർത്തകർ പോലീസിനു നേർക്ക് വടിയും മറ്റും എറിയുകയും ബാരിക്കേഡിനു മുകളിൽക്കയറി മറുവശത്തേക്ക് കടക്കാൻ നടത്തിയ ശ്രമവും പോലീസ് തടഞ്ഞു. ഇതോടെയാണ് ചാണ്ടി ഉമ്മന്‍റെ നേതൃത്വത്തിൽ റോഡ് ഉപരോധിച്ചത്. ഉപരോധത്തിൽനിന്നു പിന്മാറണമെന്ന് പോലീസ് ആവശ്യപ്പെട്ടെങ്കിലും ഇതിനു തയാറാകാത്തതിനെത്തുടർന്നു ബലം പ്രയോഗിച്ച് അറസ്റ്റ് ചെയ്ത് നീക്കുകയായിരുന്നു. ഒടുവിൽ ചാണ്ടി ഉമ്മനെ അറസ്റ്റ് ചെയ്തുനീക്കാൻ നടത്തിയ ശ്രമം ഒപ്പമുണ്ടായിരുന്ന പ്രവർത്തകർതടഞ്ഞത് വീണ്ടും സംഘർഷത്തിനു കാരണമായി. ഒടുവിൽ കൂടുതൽ പോലീസ് എത്തി മുഴുവൻ പ്രവർത്തകരെയും അറസ്റ്റ് ചെയ്തു നീക്കുകയായിരുന്നു. ഇതോടെയാണ് ഒരുമണിക്കൂറായി നിലനിന്ന സംഘർഷത്തിന് അയവുവന്നത്. ഗതാഗതം തടസപ്പെടുത്തിയതിന് 12-ഓളം പ്രവർത്തകർക്കെതിരേ പോലീസ് കേസെടുത്തിട്ടുണ്ട്. പ്രതിഷേധയോഗം നേരത്തേ ചാണ്ടി ഉമ്മൻ എംഎൽഎ ഉദ്ഘാടനം ചെയ്തു. ഡിസിസി പ്രസിഡന്‍റ് സി.പി. മാത്യു അധ്യക്ഷത വഹിച്ചു. യൂത്ത് കോണ്‍ഗ്രസ് ജില്ലാ പ്രസിഡന്‍റ് ഫ്രാൻസിസ് അറയ്ക്കപ്പറന്പിൽ, മുൻ ഡിസിസി പ്രസിഡന്‍റ് റോയി കെ. പൗലോസ്, നേതാക്കളായ മാത്യു കെ. ജോണ്‍, ടോണി തോമസ്, ജോബിൻ മാത്യു, നിഷ സോമൻ, ജോബി സി. ജോയി, മോബിൻ മാത്യു, സോയിമോൻ സണ്ണി, എൻ.ഐ. ബെന്നി, ജോണ്‍ നെടിയപാല, ടോണി തോമസ്, അനുഷൽ ആന്‍റണി, നിതിൻ ലൂക്കോസ്, ജോസുകുട്ടി ജോസ്, മനോജ് രാജൻ, ഷാനു ഷാഹുൽ, മുകേഷ് മോഹനൻ തുടങ്ങിയവർ പ്രസംഗിച്ചു. തൊടുപുഴ ഡിവൈഎസ്പി പി.കെ. സാബുവിന്‍റെ നേതൃത്വത്തിൽ സമീപ സ്റ്റേഷനുകളിൽ നിന്നുൾപ്പെടെ വൻ പോലീസ് സംഘം സ്ഥലത്ത് ക്യാന്പ് ചെയ്തിരുന്നു.

കോട്ടയം സംഭവം: ഒരുനടപടിയുമില്ല- ചാണ്ടി ഉമ്മൻ എംഎൽഎ

തൊടുപുഴ: കോട്ടയത്ത് മെഡിക്കൽ കോളജ് കെട്ടിടം തകർന്നുവീണ് വീട്ടമ്മ മരിച്ച സംഭവത്തിൽ ഇതുവരെ ഒരു നടപടിയും സ്വീകരിക്കാൻ സർക്കാർ തയാറായിട്ടില്ലെന്ന് ചാണ്ടി ഉമ്മൻ എംഎൽഎ. യൂത്ത് കോണ്‍ഗ്രസിന്‍റെ നേതൃത്വത്തിൽ തൊടുപുഴ ജില്ലാ ആശുപത്രിയിലേക്ക് നടത്തിയ മാർച്ച് ഉദ്ഘാടനം ചെയ്യുകയായിരുന്നു അദ്ദേഹം. സ്വകാര്യ ആശുപത്രിയിലാണ് ഈ സംഭവം നടന്നതെങ്കിൽ എന്തെല്ലാം നടപടിയെടുക്കുമായിരുന്നു. ആശുപത്രിയിലെ പ്രശ്നങ്ങളുടെ കുറ്റം ഉമ്മൻ ചാണ്ടി സർക്കാരിന്‍റെ തലയിൽ കെട്ടിവയ്ക്കാനാണ് സർക്കാർ ശ്രമിക്കുന്നത്. സംസ്ഥാനത്ത് ഒന്പതു വർഷത്തെ ഇടതു ഭരണംകൊണ്ട് ആരോഗ്യമേഖലയുടെ പ്രവർത്തനം താറുമാറായി. ആരോഗ്യമന്ത്രി മാത്രമല്ല, സർക്കാർ രാജിവച്ചൊഴിയുകയാണ് വേണ്ടത്. സർക്കാർ ആശുപത്രികൾ അന്താരാഷ്‌ട്ര നിലവാരത്തിലാണെന്നാണ് സർക്കാർ പറയുന്നത്. അങ്ങനെയെങ്കിൽ നഷ്ടപരിഹാരവും നടപടികളുമെല്ലാം അന്താരാഷ്‌ട്ര നിലവാരത്തിൽ തന്നെയാകണം. ബിന്ദുവിന്‍റെ കുടുംബത്തിന് ഒരു കോടിയെങ്കിലും സഹായധനം നൽകണം. സംസ്ഥാനത്തെ മെഡിക്കൽ കോളജുകളിൽ മരുന്നിന്‍റെ ലഭ്യതയിൽ കുറവുണ്ട്. സൗജന്യ ചികിത്സ ഇല്ലാതാകുന്ന സ്ഥിതിവിശേഷമാണുള്ളത്. ഇടുക്കി മെഡിക്കൽ കോളജും ജില്ലാ ആശുപത്രിയും തകർച്ചയുടെ വക്കിലാണ്. 2014-ൽ ഉമ്മൻ ചാണ്ടി സർക്കാർ അനുവദിച്ച മെഡിക്കൽ കോളജിന് ഫയർ സേഫ്റ്റി ക്ലിയറൻസ് ലഭിക്കാതെയാണ് ഇപ്പോഴും പ്രവർത്തിക്കുന്നുവെന്നത് ഖേദകരമാണെന്നും അദ്ദേഹം പറഞ്ഞു.

ബിജെപി മാർച്ചിലും ഉന്തും തള്ളും

തൊടുപുഴ: ആരോഗ്യ മേഖലയെ തകർത്ത മന്ത്രി വീണാ ജോർജിന്‍റെ രാജി ആവശ്യപ്പെട്ട് ബിജെപി ഇടുക്കി നോർത്ത് കമ്മിറ്റിയുടെ നേതൃത്വത്തിൽ ജില്ലാ ആശുപത്രിയിലേക്ക് മാർച്ച് നടത്തി. മങ്ങാട്ടുകവല ബസ് സ്റ്റാൻഡിനു സമീപത്തുനിന്നാരംഭിച്ച മാർച്ച് ആശുപത്രിക്കു സമീപം ബാരിക്കേഡ് തീർത്ത് പോലീസ് തടഞ്ഞു. ബാരിക്കേഡ് ഭേദിക്കാനുള്ള പ്രവർത്തകരുടെ ശ്രമത്തിനിടെ വനിതാ സിവിൽ പോലീസ് ഓഫീസറുടെ കൈയ്ക്ക് പരിക്കേറ്റു. ജില്ലാ അധ്യക്ഷൻ പി.പി. സാനു യോഗം ഉദ്ഘാടനം ചെയ്തു. മേഖലാ ജനറൽ സെക്രട്ടറി ബിനു ജെ. കൈമൾ, ജില്ലാ ജനറൽ സെക്രട്ടറി അഡ്വ. ശ്രീവിദ്യ രാജേഷ്, പരിസ്ഥിതി സെൽ സംസ്ഥാന കോ-ഓർഡിനേറ്റർ എം.എൻ. ജയചന്ദ്രൻ, നേതാക്കളായ ബെന്നി ജോസഫ്, എൻ.കെ. അബു, പി.ജി. രാജശേഖരൻ, മുന്നി കൈറ്റിയാനി, ശ്രീലക്ഷ്മി സുദീപ്, ഷിൻസ് മോൻ, പി.വി. ഷിംമോൻ, കെ.പി. രാജേന്ദ്രൻ, ജോർജ് പൗലോസ്, ജയലക്ഷ്മി ഗോപൻ, ശ്രീകാന്ത് കാഞ്ഞിരമറ്റം, എം.പി. പ്രമോദ് തുടങ്ങിയവർ പ്രസംഗിച്ചു. ചെറുതോണി: ബിജെപി ഇടുക്കി സൗത്ത് ജില്ലാ കമ്മിറ്റിയുടെ നേതൃത്വത്തിൽ ഇടുക്കി മെഡിക്കൽ കോളജിലേക്ക് മാർച്ചും ധർണയും നടത്തി. ആതുരസേവനരംഗത്ത് ഏറെ പിന്നാക്കം നിൽക്കുന്ന ഇടുക്കിയിൽ സർക്കാർ മെഡിക്കൽ കോളജിന് അടിസ്ഥാന സൗകര്യമൊരുക്കുന്നതിൽ ആരോഗ്യവകുപ്പും സംസ്ഥാന സർക്കാരും തികഞ്ഞ പരാജയമെന്നാരോപിച്ചായിരുന്നു പ്രതിഷേധ മാർച്ച്. അഗ്നിരക്ഷാ സർട്ടിഫിക്കറ്റുപോലും ഇല്ലാതെയാണ് പുതിയ ബ്ലോക്ക് നിർമിച്ചിരിക്കുന്നത്. ഇത് ഭാവിയിൽ വൻ അപകടങ്ങൾക്കു കാരണമായേക്കാം. ഓക്സിജൻ പ്ലാന്‍റിലേക്ക് റോഡ് നിർമിക്കുവാൻപോലും തയാറാകാതെ ഇടുക്കി മെഡിക്കൽ കോളജിനോട് തികഞ്ഞ അനാസ്ഥയാണ് സർക്കാർ കാണിക്കുന്നതെന്നും നേതാക്കൾ ആരോപിച്ചു. ചെറുതോണി ടൗണിൽനിന്ന് ആരംഭിച്ച മാർച്ച് ബിജെപി സംസ്ഥാന ജനറൽ സെക്രട്ടറി അഡ്വ. പന്തളം പ്രതാപൻ ഉദ്ഘാടനം ചെയ്തു. ജില്ലാ പ്രസിഡന്‍റ് വി.സി. വർഗീസ് അധ്യക്ഷത വഹിച്ചു. ജില്ലാ ജനറൽ സെക്രട്ടറിമാരായ സി. സന്തോഷ്കുമാർ, കെ. കുമാർ, ഷാജി നെല്ലിപ്പറമ്പിൽ, രതീഷ് വരകുമല തുടങ്ങിയവർ പ്രസംഗിച്ചു. മാർച്ച് മെഡിക്കൽ കോളജ് കവാടത്തിൽ പോലീസ് തടഞ്ഞത് നേരിയ സംഘർഷത്തിനു കാരണമായി.

ഗൂഗിൾ മാപ്പ് നോക്കി സഞ്ചരിച്ച ലോറി മറിഞ്ഞു

വണ്ണപ്പുറം: ഗൂഗിൾ മാപ്പിനെ ആശ്രയിച്ച് സഞ്ചരിച്ച ലോറി റോഡിലെ കൊടുംവളവുകളും കുത്തനെയുള്ള കയറ്റിറക്കങ്ങളും അറിയാതെ തോട്ടിലേക്കു മറിഞ്ഞു. വണ്ണപ്പുറം-ചേലച്ചുവട് റോഡിലെ നാൽപതേക്കറിലായിരുന്നു അപകടം. എറണാകുളത്തുനിന്ന് ഗൂഗിൾ മാപ്പ് നോക്കി ഹൈറേഞ്ചിലേക്ക് ഇരുന്പുകന്പിയുമായി പോയ ലോറിയാണ് അപകടത്തിൽപ്പെട്ടത്. വണ്ണപ്പുറത്തുനിന്ന് ആരംഭിക്കുന്ന മലയോര പാതയിൽ ഏതാനും കിലോമീറ്റർ ലോറി മുന്നോട്ട് ഓടിച്ചുപോയി. എന്നാൽ മുണ്ടുടിയിൽ എത്തിയപ്പോൾ കൊടുംവളവിലുള്ള കയറ്റം കയറാൻ സാധിച്ചില്ല. ഇതേത്തുടർന്ന് തിരികെ വണ്ണപ്പുറത്തിന് വരുന്പോൾ നാൽപതേക്കറിൽ അപകടത്തിൽപ്പെടുകയായിരുന്നു. ഇവിടെ കലുങ്ക് നിർമാണം നടക്കുന്നിടത്ത് നിയന്ത്രണം നഷ്ടപ്പെട്ട ലോറി തോട്ടിലേക്കു മറിയുകയായിരുന്നു. ഡ്രൈവർ നിസാര പരിക്കുകളോടെ രക്ഷപ്പെട്ടു. നിർമാണവുമായി ബന്ധപ്പെട്ട് മുന്നറിയിപ്പു ബോർഡുകളും സിഗ്നലും ഇല്ലാതിരുന്നതാണ് അപകടത്തിനു കാരണമെന്ന് ഡ്രൈവർ പറഞ്ഞു. ഈ മേഖലകളിൽ സിഗ്നൽ ബോർഡ് സ്ഥാപിക്കണമെന്നാണ് ജനങ്ങളുടെയും ഡ്രൈവർമാരുടെയും ആവശ്യം. നേരത്തേയും ഈ റൂട്ടിൽ ഗൂഗിൾ മാപ്പ് നോക്കി സഞ്ചരിച്ച വാഹനം അപകടത്തിൽപ്പെട്ടിരുന്നു.

സ്കൂളുകളിലെ പ്രാർഥന: മന്ത്രിയുടെ അഭിപ്രായം വിവരക്കേ‌ടെന്ന് ഇടുക്കി രൂപതാ ജാഗ്രതാ സമിതി

കരിമ്പൻ: സംസ്ഥാനത്തെ സ്കൂളുകളിൽ നടത്തുന്ന ഈശ്വരപ്രാർഥനകളെ സംബന്ധിച്ച, വിദ്യാഭ്യാസ മന്ത്രിയുടെ അഭിപ്രായം ശുദ്ധ വിവരക്കേടെന്ന് ഇടുക്കി രൂപതാ ജാഗ്രതാ സമിതി. സ്കൂളുകളിലെ ഈശ്വര പ്രാർഥനയെ സംബന്ധിച്ചു മന്ത്രി നടത്തുന്ന പ്രസ്താവനകൾ നിഴൽയുദ്ധങ്ങൾ മാത്രമാണ്. ദേശീയഗാനം പാടുന്നത് കുഴപ്പമില്ലെന്നും ഈശ്വരപ്രാർഥന പാടുന്നതാണ് സ്കൂളുകളിലെ പ്രശ്നമെന്നുമാണ് മന്ത്രി പറയുന്നത്. കേരളത്തിലെ സ്കൂളുകളിൽ പതിറ്റാണ്ടുകളായി ഈശ്വരപ്രാർഥനയോടുകൂടിയാണ് ക്ലാസുകൾ ആരംഭിക്കുന്നത്. ഇത് ഗവൺമെന്‍റ്, എയ്ഡഡ് വ്യത്യാസമില്ലാതെ എല്ലാ സ്കൂളുകളിലും തുടരുന്ന പതിവുമാണ്. സ്കൂളുകളിൽ മാത്രമല്ല സർക്കാർ മീറ്റിംഗുകളിൽപോലും ഈ പതിവുണ്ട്. ഇതു ചിലപ്പോൾ ഉച്ചത്തിലുള്ള പാട്ടുകളോ, മൗനപ്രാർഥനയോ ആകാമെന്നു മാത്രം. ഒന്നാം ക്ലാസുമുതൽ പത്താം ക്ലാസുവരെ ഈശ്വരപ്രാർഥന കേട്ടു വളർന്നാൽ കുട്ടികളുടെ സ്വതന്ത്ര ചിന്ത നഷ്ടമാകുമെന്നാണ് മന്ത്രി പറയുന്നത്. ഇതിന് എന്തെങ്കിലും അടിസ്ഥാനമുണ്ടോയെന്ന് മന്ത്രി തന്നെ വ്യക്തമാക്കേണ്ടതാണ്. ഈശ്വരപ്രാർഥന കേട്ടാലും ചൊല്ലിയാലും കുട്ടികൾക്ക് സ്വതന്ത്രമായി ചിന്തിക്കാനും പ്രവർത്തിക്കാനും കഴിയില്ലാതാകുമെന്ന വിചിത്രവാദമാണ് മന്ത്രി തന്‍റെ പ്രസ്താവനയിലൂടെ നടത്തുന്നത്. മതനിരാസം പ്രചരിപ്പിക്കുന്നതിനുള്ള രഹസ്യ അജണ്ടയുടെ ഭാഗമാണോ മന്ത്രിയുടെ പ്രസ്താവനയെന്നു സംശയിക്കുന്നു. ക്രിസ്ത്യൻ മാനേജ്മെന്‍റ് സ്കൂളുകളിൽ ഇന്ത്യൻ ഭരണഘടന അനുവദിച്ചു നൽകിയിട്ടുള്ളതും ഇപ്പോൾ തുടരുന്നതുമായ ഈശ്വരപ്രാർഥനകൾ തുടരുകതന്നെ ചെയ്യും. ഇവിടെ മതം അടിച്ചേല്പിക്കുന്ന പ്രവർത്തനങ്ങളോ പ്രാർഥനാരീതികളോ ഇല്ലാത്തതാണ്. ഇതു വർഷങ്ങളായി തുടരുന്നതും എല്ലാ വിഭാഗം ജനവിഭാഗങ്ങളും അംഗീകരിച്ചതുമാണ്. മന്ത്രിയുടെ അനവസരത്തിലെ പ്രസ്താവനകൾ വർഗീയ, സാമൂഹിക, സാമുദായിക ചേരിതിരിവിനു മാത്രമേ ഉപകരിക്കുകയുള്ളൂ. ഇടുക്കി രൂപതാ കാര്യാലയത്തിൽ കൂടിയ ജാഗ്രതാസമിതി യോഗത്തിൽ വികാരി ജനറാൾ മോൺ. ജോസ് കരിവേലിക്കൽ അധ്യക്ഷത വഹിച്ചു. ജാഗ്രതാസമിതി സെക്രട്ടറി ബിനോയി മഠത്തിൽ, ഇടുക്കി രൂപതാ മീഡിയാ കമ്മീഷൻ ഡയറക്ടർ, ഫാ. ജിൻസ് കാരക്കാട്ട്, ജോർജുകുട്ടി എം.വി., ജിജി ഏബ്രഹാം, ജോർജ് കോയിക്കൽ, സിജോ ഇലന്തൂർ തുടങ്ങിയവർ പ്രസംഗിച്ചു.

മദ്യം മോഷ്ടിച്ച യുവാക്കളെ പിടികൂടി

കുമളി: കുമളി ചെളിമടയിലുള്ള ബിവറേജ് കോർപറേഷന്‍റെ മദ്യവിൽപ്പനശാലയിലെ പ്രീമിയം കൗണ്ടറിൽനിന്നു മദ്യം മോഷ്ടിച്ചവരെ ജീവനക്കാർ പിടികൂടി പോലീസിൽ ഏൽപ്പിച്ചു. തിരക്കുള്ള സമയത്തെത്തിയ പ്രതികൾ സിസിടിവി കാമറകളിൽപ്പെടാതിരിക്കാൻ വിദഗ്ധമായി മോഷണം നടത്തിയെങ്കിലും ജീവനക്കാരിയുടെ കണ്ണ് വെട്ടിക്കാനായില്ല. ബിൽ കൗണ്ടറിൽ ബീയറുമായി എത്തിയ രണ്ട് യുവാക്കളിൽ ഒരാളുടെ അരയിൽ ഒളിപ്പിച്ചിരുന്ന മദ്യം ജീവനക്കാരിയും ജീവനക്കാരനും ചേർന്ന് പിടിച്ചെടുക്കുകയായിരുന്നു. സിസിടിവിയിലും മോഷണം പതിഞ്ഞിട്ടുണ്ട്. വിലകൂടിയ മദ്യമാണ് മോഷ്ടാക്കൾ അരയിൽ തിരുകിയത്. മോഷണം കാമറയിൽ പതിയാതിരിക്കാൻ മുന്നിലും പിന്നിലുമായി മോഷ്ടാക്കൾ നിന്നശേഷം മുന്നിൽ നിന്നയാൾ പിന്നിൽ ചേർന്നുനിന്ന ആൾക്ക് മദ്യക്കുപ്പി നൽകുകയായിരുന്നു. ജീവനക്കാർക്ക് സംശയം തോന്നാതിരിക്കാൻ ഒരു ബിയർ എടുത്ത് ബില്ലടിച്ച് ഇറങ്ങാനാണ് ഇവർ ശ്രമിച്ചത്. ഈ സമയം ഔട്ട്‌ലെറ്റിലെ വനിതാ ജീവനക്കാരിക്ക് ഇവരുടെ പെരുമാറ്റത്തിൽ സംശയം തോന്നി മറ്റു ജീവനക്കാരെ വിവരം അറിയിക്കുകയായിരുന്നു.

സൂചനാ ബസ് പണിമുടക്ക് ഇന്ന്

തൊടുപുഴ: വിവിധ ആവശ്യങ്ങൾ ഉന്നയിച്ച് ബസുടമാ സംയുക്തസമിതിയുടെ നേതൃത്വത്തിൽ ഇന്നു സൂചനാ ബസ് പണിമുടക്ക് നടത്തുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. സർക്കാരിന്‍റെ ഭാഗത്തുനിന്നും അനുകൂല തീരുമാനമുണ്ടായില്ലെങ്കിൽ 22 മുതൽ അനിശ്ചിതകാല സമരവും സംഘടിപ്പിക്കും. സ്വകാര്യ ബസുടമകളുമായി ട്രാൻസ്പോർട്ട് കമ്മീഷണർ നടത്തിയ ചർച്ച പരാജയപ്പെട്ടതോടെയാണ് സംയുക്ത സമരസമിതി പണിമുടക്കുമായി മുന്നോട്ട് പോകുന്നത്. ദീർഘകാലമായി സർവീസ് നടത്തുന്ന ലിമിറ്റഡ് സ്റ്റോപ്പിന്‍റെയും ദീർഘദൂര ബസുകളുടെയും പെർമിറ്റുകൾ അതേപടി പുതുക്കി നൽകുക, വിദ്യാർഥികളുടെ ടിക്കറ്റ് നിരക്ക് കാലോചിതമായി വർധിപ്പിക്കുക, ബസ് ജീവനക്കാർക്ക് പോലീസ് ക്ലിയറൻസ് സർട്ടിഫിക്കറ്റ് നിർബന്ധമാക്കിയ നടപടി പിൻവലിക്കുക, ഇ-ചെല്ലാൻ വഴിയുള്ള അന്യായമായ പിഴ ചുമത്തൽ അവസാനിപ്പിക്കുക, ബസുകളിൽ മാത്രം ജിപിഎസ്, സ്പീഡ് ഗവർണർ, കാമറകൾ തുടങ്ങിയ വിലകൂടിയ ഇലക്‌ട്രോണിക്സ് ഉപകരണങ്ങൾ അടിച്ചേൽപ്പിക്കുന്ന ഗതാഗതവകുപ്പിന്‍റെ നടപടി അവസാനിപ്പിക്കുക എന്നീ ആവശ്യങ്ങൾ ഉന്നയിച്ചാണ് സമരം. പത്രസമ്മേളനത്തിൽ പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ സംസ്ഥാന പ്രസിഡന്‍റ് കെ.കെ. തോമസ്, ജില്ലാ ജനറൽ സെക്രട്ടറി അജിത് കുമാർ, ജില്ലാ വൈസ് പ്രസിഡന്‍റ് കെ.എം. സലിം എന്നിവർ പങ്കെടുത്തു.

ഓഫ് റോഡ് ജീപ്പ് സഫാരിക്ക് നിരോധനം

തൊടുപുഴ: ജില്ലയിലെ ഓഫ് റോഡ് സഫാരി ജില്ലാ കളക്‌ടർ നിരോധിച്ചു. വ്യക്തികൾ, സ്ഥാപനങ്ങൾ എന്നിവയ്ക്കും നിരോധനം ബാധകമാണെന്ന് ഉത്തരവിൽ പറയുന്നു. എന്നാൽ, ജില്ലാ ഭരണകൂടത്തിന്‍റെ മേൽനോട്ടത്തിൽ ഔദ്യോഗിക അനുമതി ലഭിച്ചിട്ടുള്ള ഓഫ് റോഡ് സർവീസുകൾക്കും മറ്റു സാധാരണ ജീപ്പ് സർവീസുകൾക്കും ഉത്തരവ് ബാധകമായിരിക്കില്ല. വിനോദസഞ്ചാര കേന്ദ്രമായ കൊളുക്കുമലയിൽ സഞ്ചാരികളെ കൊണ്ടുപോകുന്ന മോട്ടോർ വാഹനവകുപ്പിന്‍റെ പരിശോധന പൂർത്തിയാക്കിയ ജീപ്പുകളെയും വിലക്ക് ബാധിക്കില്ല. സുരക്ഷിതമല്ലാത്ത ജീപ്പ് സഫാരി അപകടങ്ങൾക്കിടയാകുന്ന സാഹചര്യത്തിലാണ് നിരോധനം. വിഷയം പരിശോധിക്കാനും നിർദേശങ്ങൾ സമർപ്പിക്കാനും വിവിധ വകുപ്പുതല ഏകോപനസമിതിയെ നിയോഗിക്കുകയും പത്തിനകം റിപ്പോർട്ട് സമർപ്പിക്കാനും നിർദേശിച്ചിട്ടുണ്ട്. ഇതിന്‍റെ അടിസ്ഥാനത്തിലായിരിക്കും തുടർനടപടികൾ. കഴിഞ്ഞ ദിവസം മൂന്നാറിൽ വിനോദസഞ്ചാരികളുമായി പോയ ജീപ്പ് മറിഞ്ഞ് തമിഴ്നാട് സ്വദേശി മരിച്ച സാഹചര്യത്തിലാണ് ജില്ലയിലെ വിനോദസഞ്ചാര കേന്ദ്രങ്ങളിൽ ഓഫ്റോഡ് ജീപ്പ് സവാരിക്ക് നിരോധനം ഏർപ്പെടുത്തിയത്. എട്ടുപേർ സഞ്ചരിച്ച ജീപ്പ് 50 അടി താഴ്ചയിലേയ്ക്കാണ് മറിഞ്ഞത്. ജീപ്പ് സവാരി അനുവദിക്കണമെങ്കിൽ മതിയായ രേഖകളും സുരക്ഷാസംവിധാനങ്ങളും ഉടൻ ഒരുക്കണമെന്നാണ് ജില്ലാ കളക്ടറുടെ ഉത്തരവ്. പോലീസും പഞ്ചായത്തുകളും മോട്ടോർ വാഹന വകുപ്പും വനംവകുപ്പും ഉൾപ്പെടെ ഉത്തരവ് നടപ്പാക്കുന്നത് ഉറപ്പു വരുത്തണം. ജില്ലയിലെ പ്രധാന വിനോദസഞ്ചാര കേന്ദ്രങ്ങളിലെ ആകർഷണ ഘടകങ്ങളാണ് ഓഫ് റോഡ് ജീപ്പ് സവാരി. വാഗമണ്‍, മൂന്നാർ, തേക്കടി, ചതുരംഗപ്പാറ, പാഞ്ചാലിമേട്, കാൽവരിമൗണ്ട് തുടങ്ങി വിവിധ ടൂറിസം കേന്ദ്രങ്ങളിൽ ജീപ്പ് സവാരിയും ഓഫ് റോഡ് സവാരിയുമുണ്ട്. ഓഫ് റോഡ് ജീപ്പ് സവാരി ആസ്വദിക്കാൻ സ്വദേശികളും വിദേശികളുമായ ഒട്ടേറെപ്പേർ എത്തുന്നുണ്ട്. വിദ്യാർഥികളാണ് കൂടുതലായി ഓഫ് റൈഡ് സവാരിയുടെ ആരാധകർ. ഉയർന്ന മലമുകളിലും പുൽമേടുകളിലും സാഹസികമായാണ് ജീപ്പ് സവാരി നടത്തുന്നത്. നൂറുകണക്കിനു വാഹനങ്ങളാണ് വിനോദസഞ്ചാര കേന്ദ്രങ്ങളിൽ ഓഫ് റോഡ് സവാരി നടത്തുന്നത്. ഇതിനിടെ നിരോധനം പിൻവലിക്കണമെന്നാവശ്യപ്പെട്ട് ജീപ്പ് ഡ്രൈവർമാർ രംഗത്തെത്തി. നിരവധിപ്പേരുടെ ഉപജീവനമാർഗമാണ് ഇടുക്കിയിൽ ജീപ്പ് സഫാരി. ടൂറിസം മേഖലയിൽ ട്രക്കിംഗ് ഉൾപ്പടെയുള്ളവയ്ക്ക് വലിയ പ്രാധാന്യമുണ്ട്. നിരോധന നടപടി ടൂറിസം മേഖലയെ പ്രതിസന്ധിയിലാക്കും എന്നാണ് ചൂണ്ടിക്കാണിക്കപ്പെടുന്നത്. വലിയ പ്രതിഷേധമാണ് നിരോധന ഉത്തരവിനെതിരേ ഉയരുന്നത്. അപകടങ്ങളുടെ പേരിൽ ട്രക്കിംഗ് ഉൾപ്പെടെ പൂർണമായും നിർത്തിവയ്ക്കുന്നത് അശാസ്ത്രീയമാണ്. ഉത്തരവിൽ ഇപ്പോഴും അവ്യക്തത നിലനിൽക്കുകയാണ്. ജില്ലയിലെ മിക്കയിടങ്ങളിലും സഞ്ചാരികൾ എത്തുന്നത് ട്രക്കിംഗ് ഉൾപ്പെടെയുള്ള വിനോദങ്ങൾക്കു വേണ്ടിയാണ്. മാത്രമല്ല മറ്റു വാഹനങ്ങൾക്ക് എത്തിച്ചേരാൻ കഴിയാത്ത ജില്ലയിലെ മനോഹര പ്രദേശങ്ങൾ കണ്ടെത്തി സഞ്ചാരികളെ ഇവിടേക്ക് ആകർഷിക്കുന്നതും ഇത്തരത്തിലുള്ള സഫാരി ഡ്രൈവർമാരാണ്. ഒരു മുന്നറിയിപ്പുപോലും ഇല്ലാതെയാണ് ഉത്തരവ്. നിർദേശം ജില്ലയിലെ ടൂറിസംമേഖലയെ ആകെ പ്രതിസന്ധിയിലാക്കുമെന്ന് കുമളിയിലെ ഓഫ് റോഡ് ജീപ്പ് ഉടമയായ സജീഷ് കുമാർ പറഞ്ഞു.

ഓഫ് റോഡ് ജീപ്പ് സഫാരി നിരോധനം: കുമളിയിൽ പ്രതിഷേധം

കുമളി: ജില്ലയിൽ ഓഫ് റോഡ് ജീപ്പ് സഫാരി നിരോധിച്ച ജില്ലാ കളക്ടറുടെ നടപടിക്കെതിരേ കുമളിയിൽ പ്രതിഷേധം . കളക്ടറുടെ ഉത്തരവ് പിൻവലിക്കണമെന്നാവശ്യപ്പെട്ട് കുമളിയിൽ വിവിധ ട്രേഡ് യൂണിയനുകളുടെ നേതൃത്വത്തിൽ പ്രകടനങ്ങൾ നടന്നു. സിഐടിയു പ്രവർത്തകർ വില്ലേജ് ഓഫീസിലേക്കും ഐഎൻടിയുസി ഡിടിപിസി ഓഫീസിലേക്കും പ്രകടനവും ധർണയും നടത്തി. ഐഎൻടിയുസി കുമളി മണ്ഡലം കമ്മിറ്റിയുടെ നേതൃത്വത്തിൽ ഡിടിപിസി ഓഫിസിനു മുന്നിൽ നടത്തിയ ധർണ ഐഎൻടിയുസി ജില്ലാ സെക്രട്ടറി ബിജു ദാനിയേൽ ഉദ്ഘാടനം ചെയ്തു. ഐഎൻടിയുസി നേതാക്കളായ സിറിൽ യോഹന്നാൻ, സന്തോഷ് ഉമ്മൻ, കോണ്‍ഗ്രസ് ബ്ലോക്ക് പ്രസിഡന്‍റ് റോബിൻ കാരയ്ക്കാട്, പി.പി. റഹിം, ടി.എൻ. ബോസ്, ഷിബു എം. തോമസ്, മനോജ് കാരിമുട്ടം, പി.ഡി. സജി, റോഷൻ കണ്ണന്താനം, ജസ്റ്റിൻ ജോണ്‍ എന്നിവർ പ്രസംഗിച്ചു. സിഐടിയു വില്ലേജ് ഓഫീസിന് മുന്നിൽ നടത്തിയ ധർണ ഇടുക്കി ജില്ലാ ഹെവി മോട്ടോർ തൊഴിലാളി യൂണിയൻ (സിഐടിയു) ജില്ലാ സെക്രട്ടറി കെ.ജെ. ദേവസ്യ ഉദ്ഘാടനം ചെയ്തു. പി.എ. നസീർ അധ്യക്ഷത വഹിച്ചു. കെ.എസ്. ഷാജി, കെ.എസ്. രാജീവ് എന്നിവർ പ്രസംഗിച്ചു.

ബസ് യാത്രയ്ക്കിടെ അഞ്ചേമുക്കാൽ പവൻ സ്വർണം കവർന്നതായി പരാതി

തൊടുപുഴ: ബസ് യാത്രയ്ക്കിടയിൽ മൃഗസംരക്ഷണ വകുപ്പ് ഉദ്യോഗസ്ഥയുടെ അഞ്ചേമുക്കാൽ പവൻ സ്വർണം മോഷണം പോയതായി പരാതി. ജില്ലാ മൃഗസംരക്ഷണ വകുപ്പ് ഓഫീസിലെ അഡ്മിനിസ്ട്രേറ്റീവ് അസിസ്റ്റന്‍റ് കിടങ്ങൂർ അറുമാനൂർ കോയിത്തുരുത്ത് കെ.സി. ഉമാദേവിയുടെ സ്വർണമാണ് നഷ്ടപ്പെട്ടത്. ബാഗിനകത്ത് ഡപ്പിയിൽ സൂക്ഷിച്ചിരുന്ന വള, മാല, കമ്മൽ, മോതിരം എന്നിവയാണ് നഷ്ടപ്പെട്ടത്. ഇന്നലെ രാവിലെ 9.15ന് കിടങ്ങൂരിൽനിന്നാണ് ഉമാദേവി തൊടുപുഴയ്ക്കുള്ള ‌കെഎസ്ആർടിസി ബസിൽ കയറിയത്. ബസിൽ ഏറെ തിരക്കായതിനാൽ സമീപത്ത് ഇരുന്ന സ്ത്രീയുടെ കൈയിൽ ബാഗ് പിടിക്കാൻ ഏൽപ്പിച്ചു. രണ്ടു സ്റ്റോപ്പുകൾ പിന്നിട്ടപ്പോൾ സീറ്റ് ലഭിച്ചതിനെത്തുടർന്ന് ബാഗ് തിരികെ വാങ്ങി. പിന്നീട് മങ്ങാട്ടുകവലയിലെ ഓഫീസിൽ എത്തി രാവിലത്തെ ജോലിക്കുശേഷം 12ന് ബാഗ് പരിശോധിച്ചപ്പോഴാണ് സ്വർണാഭരണങ്ങൾ നഷ്ടമായതായി മനസിലാകുന്നത്. സ്വർണം സൂക്ഷിച്ചിരുന്ന ബാഗിന്‍റെ കള്ളി തുറന്നുകിടക്കുകയായിരുന്നു. ഉടൻതന്നെ തൊടുപുഴ പോലീസിൽ എത്തി പരാതി നൽകി. ഇവരുടെ നിർദേശമനുസരിച്ച് കെഎസ്ആർടിസി ഡിപ്പോയിലും പാലാ പോലീസിനെയും വിവരമറിയിച്ചു. പാലായിലെ സിസിടിവി ദൃശ്യങ്ങളും മറ്റും പരിശോധിച്ചെങ്കിലും സൂചനകളൊന്നും ലഭിച്ചില്ല. സംഭവത്തിൽ പോലീസ് അന്വേഷണം ആരംഭിച്ചു.

കൊടുംവളവിൽ അപകടങ്ങൾ തുടർക്കഥയാകുന്നു

കട്ടപ്പന: മലയോര ഹൈവേയിൽ കാഞ്ചിയാർ പാലാക്കടയ്ക്ക് സമീപം റോഡിലെ കൊടുംവളവിൽ അപകടങ്ങൾ തുടർക്കഥയാകുന്നു. കഴിഞ്ഞ രണ്ടാഴ്ചക്കുള്ളിൽ രണ്ട് അപകടങ്ങളാണ് ഇവിടെയുണ്ടായത്. ഇരുചക്രവാഹന യാത്രികർ അപകടത്തിൽപ്പെടുന്നതും പരിക്കേൽക്കുന്നതും സ്ഥിരം സംഭവമാണ്. റോഡ് നിർമാണത്തിലുണ്ടായ അശാസ്ത്രീയതയാണ് അപകടങ്ങൾക്കു കാരണമെന്ന് നാട്ടുകാർ പറയുന്നു. റോഡ് മലയോര ഹൈവേയാക്കി നവീകരിക്കുന്നതിന് മുമ്പുതന്നെ ഈ ഭാഗം അപകടമേഖലയായിരുന്നു. വളവിന്‍റെ മധ്യഭാഗത്തുനിന്നാണ് പാലാക്കട പുതിയ പാലം റോഡിലേക്ക് തിരിയുന്നത്. ഇതുവഴിയും വാഹനങ്ങൾ പ്രധാന റോഡിലേക്ക് എത്തുന്നുണ്ട്. വളവിന് ദൈർഘ്യം കൂടുതലുള്ളതിനാൽ ഇരുവശത്തുനിന്നു വരുന്ന വാഹനങ്ങൾ അടുത്തെത്തുമ്പോൾ മാത്രമേ ഡ്രൈവർമാർക്ക് ദൃശ്യമാകുകയുള്ളൂ. ഇതാണ് അപകടങ്ങൾക്ക് പ്രധാന കാരണം. റോഡ് നവീകരണം നടന്ന വേളയിൽ ഈ വളവ് നേരേയാക്കണമെന്ന ആവശ്യം ഉയർന്നിരുന്നു. എന്നാൽ സ്ഥലം ഏറ്റെടുക്കുന്നതുൾപ്പെടെയുള്ള വിഷയങ്ങളിലുണ്ടായ തടസങ്ങളാണ് വളവ് നിവർത്താൻ സാധിക്കാതെ പോയതെന്ന് നാട്ടുകാർ പറഞ്ഞു.

കൊളുക്കുമലയിലേയ്ക്ക് സ‍ഞ്ചാരികള്‍ക്ക് സുരക്ഷിതയാത്ര ഉറപ്പാക്കി വാഹന വകുപ്പ്

രാജാക്കാട്: വിനോദസഞ്ചാരികളുടെ സുരക്ഷ ഉറപ്പുവരുത്താന്‍ കര്‍ശന നപടികള്‍ സ്വീകരിച്ച് മോട്ടോര്‍ വാഹന വകുപ്പിന്‍റെ ഇടപെടല്‍ മാതൃകയാകുന്നു. ചിന്നക്കനാല്‍ സൂര്യനെല്ലിയില്‍നിന്നും കൊളുക്കുമലയിലേക്കുള്ള ജീപ്പ് സവാരിയിലാണ് കൃത്യമായ പരിശോധനയും നടപടിയും സ്വീകരിച്ച് മോട്ടോര്‍ വാഹന വകുപ്പ് മാതൃകയാകുന്നത്. കേരള-തമിഴ്നാട് അതിര്‍ത്തി മലനിരകളില്‍ ആരെയും ആകര്‍ഷിക്കുന്ന വിസ്മയക്കാഴ്ച ഒളിഞ്ഞിരിക്കുന്ന കൊളുക്കുമലതേടി ദിവസേന നൂറുകണക്കിന് വിനോദസഞ്ചാരികളാണെത്തുന്നത്. ഇവരെ ദുര്‍ഘടമായ പാതയിലൂടെ സുരക്ഷിതമായി മലമുകളിലെത്തിക്കാന്‍ ഇരുനൂറിലധികം വാഹനങ്ങളാണ് സര്‍വീസ് നടത്തുന്നത്. ഇവിടെ ഓരോ മൂന്നു മാസം കൂടുമ്പോഴും വാഹനങ്ങളുടെ പരിശോധന നടത്തും. തുടര്‍ന്ന് പോലീസ് ക്ലിയറന്‍സ് സര്‍ട്ടിഫിക്കറ്റും പ്രായോഗിക പരിജ്ഞാനവുമുള്ള ഡ്രൈവര്‍മാര്‍ക്ക് മോട്ടോര്‍ വാഹനവകുപ്പ് അംഗീകൃത സ്റ്റിക്കറുകളും നല്‍കും. ഇപ്രകാരം സുരക്ഷാബാഡ്ജുള്ള വാഹനങ്ങള്‍ക്കു മാത്രമാണ് കൊളുക്കുമലയിലേക്ക് സഞ്ചാരികളുമായി പോകാന്‍ അനുമതി നൽകുന്നത്. ഇത്തവണയും പരിശോധന പൂര്‍ത്തിയാക്കിയതിനുശേഷം ഡ്രൈവര്‍മാര്‍ സുരക്ഷിതയാത്ര സുന്ദരമായ കാഴ്ച എന്ന മുദ്രാവാക്യമുയര്‍ത്തി ഗ്യാപ് റോഡിലൂടെ റോഡ് ഷോയും നടത്തി. ഉടുമ്പന്‍ചോല സബ് ആര്‍ടിഒയുടെ നേതൃത്വത്തിലാണ് എല്ലാ മൂന്നു മാസം കൂടുമ്പോഴും പരിശോധന നടത്തി സ്റ്റിക്കറുകള്‍ നല്‍കുന്നത്. സവാരി നടത്തുന്നതിന് അനുമതിയുളള്ള ജീപ്പുകളില്‍ ആറുപേര്‍ക്കു മാത്രമാണ് യാത്രാനുമതി. നിലവില്‍ സൂര്യനെല്ലിയില്‍നിന്നു കൊളുക്കുമലയിലേക്കു സര്‍വീസ് നടത്തുന്നതിന് മൂവായിരം രൂപയാണ് ചാർജ് നിശ്ചയിച്ചിരിക്കുന്നത്.

ഉപ്പുതറ പഞ്ചായത്തിൽ ആദിവാസികളുടെ വീടുപണി പൂർത്തിയാക്കാതെ കരാറുകാർ പണം തട്ടിയതായി പരാതി

ഉപ്പുതറ: കണ്ണംപടി ആദിവാസി ഊരിലെ ലൈഫ് ഭവനപദ്ധതിയിൽ വ്യാപക ക്രമക്കേട്. അനുവദിച്ച 96 വീടുകളിൽ 27 എണ്ണവും പണി പൂർത്തീകരിക്കാതെ മുഴുവൻ തുകയും കരാറുകാർ മാറിയെടുത്തതായി പരാതി. വീടുകളുടെയെല്ലാം മേൽക്കൂര ചോർന്നൊലിക്കുകയാണ്. ചില വീടുകളുടെ കക്കൂസിനു ക്ലോസറ്റ് വച്ചിട്ടില്ല. പ്ലംബിംഗ്, വയറിംഗ് ജോലികൾ ചെയ്യാത്തതും പുറംഭിത്തി തേയ്ക്കാത്തതുമായ വീടുകളുമുണ്ട്. ഒന്നര ലക്ഷത്തോളം രൂപയുടെ ജോലികൾ അവശേഷിപ്പിച്ച് മുഴുവൻ തുകയും കരാറുകാർ വാങ്ങിയെടുത്തതായാണ് പരാതി. ഗുണഭോക്താക്കൾ നേരിട്ടാണ് കരാറുകാരെ പണി ഏൽപ്പിച്ചത്. കരാറുകാർ റോഡിൽ എത്തിച്ച നിർമാണസാമഗ്രികൾ ഗുണഭോക്താക്കളാണ് സൈറ്റിൽ എത്തിച്ചു നൽകിയത്. എന്നാൽ, ഇതിന്‍റെ പണിക്കൂലി നൽകാൻപോലും കരാറുകാരൻ തയാറായിട്ടില്ല. പഞ്ചായത്തിലെ താത്കാലിക ജീവനക്കാരനടക്കം മൂന്നു കരാറുകാരാണ് ഉടമ്പടി ഏറ്റെടുത്തിരുന്നത്. അടുത്ത ബന്ധുവിന്‍റെ പേരിലാണ് ജീവനക്കാൻ കരാറെടുത്തത്. എന്നാൽ, ജീവനക്കാരൻ തന്നെയാണ് പണി ചെയ്യിപ്പിച്ച് പണം വാങ്ങിയതെന്നും ഗുണഭോക്താക്കൾ പറഞ്ഞു. പണി ഉടൻ പൂർത്തിയാക്കി നൽകാമെന്ന് ഉറപ്പു നൽകിയാണ് ആദിവാസികളായ ഗുണഭോക്താക്കളിൽനിന്ന് അവസാന ഗഡു തുകയും കരാറുകാർ വാങ്ങിയെടുത്തത്. ഇതേ ഉറപ്പ് വിശ്വസിച്ചാണ് വാർഡ് മെംബർമാർ സ്റ്റേജ് സർട്ടിഫിക്കറ്റ് നൽകിയതും. പൂർത്തിയായ വീടിന്‍റെ വാലുവേഷൻ എടുത്ത് അവസാന ബില്ല് നൽകേണ്ടത് അസി. എൻജിനിയറും വില്ലേജ് എക്സ്റ്റൻഷൻ ഓഫീസറു(വിഇഒ)മാണ്. ഇവർ കരാറുകാരനെ വഴിവിട്ട് സഹായിച്ചതാണ് പണിതീരാതെ മുഴുവൻ തുകയും മാറിയെടുക്കാൻ ഇടയാക്കിയത്. ബന്ധുവിന്‍റെ പേരിൽ കരാറെടുത്ത പഞ്ചായത്തിലെ താത്കാലിക ജീവനക്കാരൻ ഉദ്യോഗസ്ഥരെ സ്വാധീനിച്ച് തുക മാറിയെന്നാണ് ആരോപണം. പട്ടികവർഗ വിഭാഗത്തിൽപ്പെട്ട ഗുണഭോക്താവിനു വീടുവയ്ക്കാൻ ആറ് ലക്ഷം രൂപയാണ് നൽകുന്നത്. ലക്ഷക്കണക്കിന് രൂപയുടെ ക്രമക്കേടാണ് കരാറുകാർ നടത്തിയിരിക്കുന്നത്.

വിശ്വാസ പരിശീലന വാർഷികം

കരിങ്കുന്നം: സെന്‍റ് അഗസ്റ്റിൻസ് സണ്‍ഡേ സ്കൂൾ വിശ്വാസ പരിശീലന വാർഷികം കോട്ടയം അതിരൂപത വികാരി ജനറാൾ ഫാ. മൈക്കിൾ വെട്ടിക്കാട്ട് ഉദ്ഘാടനം ചെയ്തു. വികാരി ഫാ. ജയിംസ് വടക്കേകണ്ടങ്കരി അധ്യക്ഷത വഹിച്ചു. ലിജോ ജോർജ്, ദിലീപ് ജോസഫ്, ഷിനിമോൾ ജോഷി, സിസ്റ്റർ ഉദയ എസ്‌വിഎം എന്നിവർ പ്രസംഗിച്ചു.

പച്ചക്കറി ഉത്പാദനം: ജില്ല സ്വയംപര്യാപ്തമാകാനൊരുങ്ങുന്നു

തൊടുപുഴ: പോഷകസമൃദ്ധവും സുരക്ഷിതവുമായ പച്ചക്കറികൾ ജില്ലയിലെ വിപണികളിൽ സുലഭമായി ലഭ്യമാക്കാൻ കൃഷിവകുപ്പ് പദ്ധതി. സമഗ്ര പച്ചക്കറി ഉത്പാദന യജ്ഞത്തിന്‍റെ ഭാഗമായി നടപ്പാക്കുന്ന തൈകളുടെയും വിത്തുകളുടെയും വിതരണം പൂർത്തിയാക്കി. ഒന്നേമുക്കാൽ ലക്ഷത്തോളം തൈകളും അരലക്ഷത്തോളം വിത്തുകളുമാണ് കർഷകർക്ക് വിതരണം ചെയ്തത്. വണ്ടിപ്പെരിയാർ സ്റ്റേറ്റ് വെജിറ്റബിൾ ഫാം, അരിക്കുഴ ജില്ലാ കൃഷി ഫാം, സ്റ്റേറ്റ് സീഡ് ഫാം കരിമണ്ണൂർ, വിഎഫ്സികെ എന്നിവ വഴിയാണ് തൈകളും വിത്തുകളും കർഷകർക്ക് ലഭ്യമാക്കിയത്. വിവിധ വകുപ്പുകളുടെ സഹകരണത്തോടെയാണ് പരിപാടി നടപ്പാക്കുക. പച്ചക്കറി ഉത്പാദനം വർധിപ്പിച്ച് അഞ്ച് വർഷത്തിനുള്ളിൽ സ്വയംപര്യാപ്തത കൈവരിക്കുകയാണ് ലക്ഷ്യം. സർക്കാരിന്‍റെ നൂറുദിന കർമപരിപാടിയുടെ ഭാഗമായാണ് പദ്ധതി ആവിഷ്കരിച്ചിരിക്കുന്നത്. കൃഷിക്കൂട്ടങ്ങൾ ഉൾപ്പെടെയുള്ള കാർഷിക കൂട്ടായ്മകളെ പച്ചക്കറി ഉത്പാദനം, വിപണനം എന്നിവയിൽ പങ്കാളിയാക്കും. കർഷകരുടെ വരുമാനം വർധിക്കുന്നതിനൊപ്പം കൂടുതൽ തൊഴിലവസരങ്ങളും സൃഷ്ടിക്കപ്പെടും. പരിസ്ഥിതി സൗഹൃദ കൃഷി രീതികളും ആരോഗ്യകരമായ ഭക്ഷണ ശീലവും പദ്ധതിയിലൂടെ ലക്ഷ്യമിടുന്നു. പച്ചക്കറി സ്വയംപര്യാപ്തതയ്ക്കൊപ്പം കുട്ടികളിലും യുവാക്കളിലും കാർഷികാവബോധം വളർത്തുക എന്നതും പ്രധാന ഉദ്ദേശ്യമാണ്. തദ്ദേശ സ്വയംഭരണം, സഹകരണം, റവന്യു, വനം, ആരോഗ്യം, ജലസേചനം തുടങ്ങിയ 15 ഓളം വകുപ്പുകളുടെ സഹകരണത്തോടെയാണ് പദ്ധതി നടപ്പാക്കുന്നത്. ആദ്യഘട്ടമായി ഓണവിപണി ലക്ഷ്യമാക്കി ഓരോ പഞ്ചായത്തിലും നിലവിലുള്ളതിനേക്കാൾ 300 ടണ്‍ പച്ചക്കറി ഉത്പാദനം വർധിപ്പിക്കുകയാണ് ലക്ഷ്യം. വ്യാവസായികാടിസ്ഥാനത്തിലും അല്ലാതെയും പച്ചക്കറി ഉത്പാദനം നടത്തുന്നവർക്ക് പദ്ധതിയുടെ ഭാഗമാകാൻ കഴിയും. പഞ്ചായത്ത്, നഗരസഭാതലങ്ങൾ കേന്ദ്രീകരിച്ചാകും ഉത്പാദന വിപണനപദ്ധതികൾ തയാറാക്കിയുള്ള പ്രവർത്തനം. പച്ചക്കറി കർഷകർ, ക്ലസ്റ്റർ അംഗങ്ങൾ, കൃഷിക്കൂട്ടങ്ങൾ, കുടുംബശ്രീ പ്രവർത്തകർ, കാർഷിക ക്ലബുകൾ തുടങ്ങിയവരുടെ പങ്കാളിത്തം ഉറപ്പുവരുത്തും. വാർഡുതല വിവരശേഖരണത്തിലൂടെയാണ് ഉത്പാദന, വിപണന പദ്ധതികൾ തയാറാക്കുന്നത്. ഇതിന്‍റെ അടിസ്ഥാനത്തിൽ പഞ്ചായത്ത് തയാറാക്കുന്ന പദ്ധതി ക്രോഡീകരിച്ച് ബ്ലോക്കുതല അംഗീകാരം വാങ്ങണം. കതിർ ആപ്പിൽ രജിസ്റ്റർ ചെയ്ത കർഷകർക്കു മാത്രമേ പദ്ധതിയുടെ ഭാഗമാകാൻ സാധിക്കൂ. പച്ചക്കറി വിത്തുകൾ 10 രൂപ നിരക്കിലാണ് വിതരണം ചെയ്യുന്നത്. ഇതിന്‍റെ പ്രവർത്തനങ്ങൾ പൂർത്തീകരിച്ച് നടീൽ നടത്തിയശേഷം തുടർനടപടികൾ സ്വീകരിക്കാനാണ്.

കാലാവധി കഴിഞ്ഞ സർക്കാർ വാഹനങ്ങൾ ദ്രവിച്ചു നശിക്കുന്നു

ചെറുതോണി: കട്ടപ്പുറത്തായ സർക്കാർ വാഹനങ്ങൾ നീക്കംചെയ്യാതെ സ്ഥലം പാഴാക്കുന്നു. ഇടുക്കി കളക്‌ടറേറ്റിന്‍റെ ഷെഡിൽ മൂന്നു വാഹനങ്ങളും ഡിഎംഒ ഓഫീസിന് മുന്നിൽ മുറ്റത്ത് അര ഡസനോളം വാഹനങ്ങളുമാണ് ഉപയോഗശൂന്യമായി കിടക്കുന്നത്. സർക്കാർ വാഹനങ്ങൾ കാലാവധി കഴിഞ്ഞ് കട്ടപ്പുറത്തായാൽ നീക്കം ചെയ്യുന്നതിലെ നൂലാമാലകളാണ് വാഹനങ്ങൾ ഒഴിവാക്കുന്നതിന് തടസമെന്ന് ഉദ്യോഗസ്ഥർ പറയുന്നു. തുരുമ്പെടുത്ത് നശിക്കുന്ന വാഹനങ്ങൾ ഇവിടെനിന്നും നീക്കം ചെയ്താൽ ജീവനക്കാരുടെയും വിവിധ ആവശ്യങ്ങൾക്കായി എത്തുന്ന പൊതുജനങ്ങളുടെയും വാഹനങ്ങൾ പാർക്ക് ചെയ്യാനാകും. കളക്‌ടറേറ്റിന്‍റെ കാർ ഷെഡിൽ സർക്കാർ വാഹനമല്ലാതെ ജീവനക്കാരുടെ പോലും സ്വകാര്യ വാഹനങ്ങൾക്ക് പാർക്ക് ചെയ്യാൻ അനുവാദമില്ല. അങ്ങനെയുള്ളിടത്താണ് കണ്ടംചെയ്ത വാഹനങ്ങൾ കിടക്കുന്നത്. പാർക്കിംഗിന് സ്ഥലസൗകര്യക്കുറവുള്ള ഇവിടെനിന്ന് ഉപയോഗ ശൂന്യമായ വാഹനങ്ങൾ നീക്കം ചെയ്യണമെന്ന ആവശ്യം ശക്തമായിരിരിക്കയാണ്. ഡിഎംഒ ഓഫീസ് പ്രവർത്തിക്കുന്ന കെട്ടിടത്തിൽ ഭൂപതിവ് ഓഫീസ്, നാഷണൽ ഹെൽത്ത് മിഷൻ ഓഫീസ്, കുടുംബശ്രീ ഓഫീസ് തുടങ്ങിയവയും പ്രവർത്തിക്കുണ്ട്. ഇവിടെ ജോലി ചെയ്യുന്ന നൂറിലധികം ജീവനക്കാരുണ്ട്. ഇതിനുപുറമേ നിരവധി പൊതുജനങ്ങളും ഇവിടെ എത്തുന്നു. ഇവർക്കെല്ലാം തടസമായി കാലഹരണപ്പെട്ട വാഹനങ്ങൾ കിടക്കുകയാണ്. എത്രയും വേഗം ഉപയോഗശൂന്യമായ വാഹനങ്ങൾ നീക്കം ചെയ്യുന്നതിനുള്ള നടപടിയുണ്ടാകണമെന്നാണ് ജീവനക്കാരും പൊതുജനങ്ങളും ആവശ്യപ്പെടുന്നത്.

ആദിവാസി യുവാവിനെ കാണാതായ സംഭവം: കോണ്‍ഗ്രസ് പോലീസ് സ്റ്റേഷൻ മാർച്ച് നടത്തി

കുമളി: കുമളി ആദിവാസി കോളനിയിലെ യുവാവിനെ കാണാതായതായി പരാതി. മന്നാക്കുടിയിലെ അയ്യപ്പൻ - 51നെയാണ് കാണാതായത്. കഴിഞ്ഞ മേയ് 12ന് സഹോദരിയുടെ വീട്ടിൽ വിവാഹാഘോഷത്തിൽ പങ്കെടുക്കാൻ പോയ അയ്യപ്പൻ സ്വന്തം വീട്ടിൽ മടങ്ങിവന്നശേഷം സഹോദരിയുടെ വീട്ടിൽ മറന്നുവച്ച മൊബൈൽ ഫോണ്‍ എടുക്കാൻ പോയതിനുശേഷം കാണാതാവുകയായിരുന്നു. തിരോധാനം സംബന്ധിച്ച് ബന്ധുക്കൾ പോലീസിൽ പരാതി നൽകിയിരുന്നു. അന്വേഷണം ഊർജിതപ്പെടുത്തണമെന്നാവശ്യപ്പെട്ടാണ് കോണ്‍ഗ്രസ് സമരം നടത്തിയത്. ബ്ലോക്ക് പ്രസിഡന്‍റ് റോബിൻ കാരക്കാട്ട് സമരം ഉദ്ഘാടനം ചെയ്തു. പി.പി. റഹിം, സനൂപ് സ്കറിയ, ടി.എൻ. ബോസ്, പ്രസാദ് മാണി എന്നിവർ പ്രസംഗിച്ചു.

ലോഡ്ജ് കേന്ദ്രീകരിച്ച് കഞ്ചാവ് വിൽപ്പന: ആറംഗ സംഘം പിടിയിൽ

കട്ടപ്പന: വെള്ളയാംകുടിയിൽ ലോഡ്ജ് കേന്ദ്രീകരിച്ച് കഞ്ചാവ് വിൽപ്പന നടത്തിയ പ്രതികൾ അറസ്റ്റിൽ. വെള്ളയാംകുടി കാരിയിൽ ലോഡ്ജിൽനിന്നും നാലു പേരെയും നഗരത്തിൽ ബൈക്കിൽ സഞ്ചരിച്ച രണ്ടു പേരെയുമാണ് കട്ടപ്പന പോലീസ് അറസ്റ്റ് ചെയ്തത്. എറണാകുളം മാമലശേരി തെങ്ങുംതോട്ടത്തിൽ ആൽബി (22), ഇടുക്കി ഉപ്പുകണ്ടം നിബിൻ സുബീഷ് (20), പിറവം മാമലശേരി പുത്തൻപുരയിൽ വിഷ്ണു മോഹനൻ (27), കാഞ്ഞാർ പാറശേരിൽ ജഗൻ സുരേഷ് (23), കാൽവരിമൗണ്ട് ചീരാംകുന്നേൽ മാത്യു സ്കറിയ (21), മ്രാല കല്ലുവേലിപ്പറമ്പിൽ ആകാശ് അനിൽ (23) എന്നിവരാണ് അറസ്റ്റിലായത്. ഇവരിൽനിന്നും 500 ഗ്രാം കഞ്ചാവ് പിടിച്ചെടുത്തു. ഇവർ സഞ്ചരിച്ച ബൈക്കും കസ്റ്റഡിയിൽ എടുത്തു. ഏറെ നാളായി നഗരത്തിൻ കഞ്ചാവ് മൊത്തക്കച്ചവടം നടത്തുകയായിരുന്നു പ്രതികൾ. ഇവർ പോലീസ് നിരീക്ഷണത്തിലായിരുന്നു. തുടർന്ന് ലഭിച്ച രഹസ്യവിവരത്തിന്‍റെ അടിസ്ഥാനത്തിലാണ് പോലീസ് ഇവരെ പിടികൂടിയത്.

ജനവാസ മേഖലയ്ക്കു സമീപം മാലിന്യം തളളി

മലങ്കര: പെരുമറ്റത്ത് മലങ്കര എസ്റ്റേറ്റിലെ റബർത്തോട്ടത്തിൽ മുസ്‌ലിം പള്ളിക്കു സമീപം ശുചിമുറിമാലിന്യം തളളി. ഇന്നലെ പുലർച്ചെ പ്രദേശവാസികളാണ് മാലിന്യം തള്ളിയനിലയിൽ കണ്ടെത്തിയത്. റോഡരികിലെ കയ്യാലയ്ക്കു സമീപത്തുനിന്ന് റബർത്തോട്ടത്തിലേക്ക് തള്ളിയനിലയിലാണ് കണ്ടെത്തിയത്. മാലിന്യം ഇപ്പോൾ നൂറു മീറ്ററോളം ചുറ്റളവിൽ വ്യാപിച്ച നിലയിലാണ്. മാലിന്യം തള്ളിയതിന്‍റെ ഏകദേശം 50 മീറ്റർ ദൂരത്തിലാണ് ഒട്ടേറെ ജനങ്ങൾ വെള്ളം ഉപയോഗിക്കുന്ന തൊടുപുഴയാർ ഒഴുകുന്നത്. മഴ പെയ്താൽ മാലിന്യം പുഴയിലെ വെള്ളത്തിലേയ്ക്കാണ് ഒഴുകിയെത്തുന്നത്. പ്രദേശവാസികൾ അറിയിച്ചതിനെത്തുടർന്ന് സ്ഥലത്തെത്തിയ മുട്ടം പഞ്ചായത്ത്, ആരോഗ്യ വകുപ്പ് അധികൃതരുടെ നേതൃത്ത്വത്തിൽ മാലിന്യം മണ്ണിട്ട് നികത്തി ക്ലോറിനേഷൻ നടത്തി. പഞ്ചായത്തിന്‍റെ നേതൃത്വത്തിൽ പ്രദേശത്ത് സ്ഥാപിച്ച സിസിടിവി കാമറ ദൃശ്യങ്ങൾ പരിശോധിച്ചതിനെത്തുടർന്ന് ചേർത്തല രജിസ്ട്രേഷനിലുളള ടാങ്കർ ലോറിയിൽ എത്തിച്ച മാലിന്യമാണ് തള്ളിയതെന്ന് കണ്ടെത്തിയിട്ടുണ്ട്. സംഭവം സംബന്ധിച്ച് ആരോഗ്യ വകുപ്പ് അധികൃതർ മുട്ടം പോലീസിൽ പരാതി നൽകി. വാഹനം കണ്ടെത്താൻ പോലീസ് അന്വേഷണം തുടങ്ങി.

മെഡിക്കൽ ക്യാന്പ് സംഘടിപ്പിച്ചു

തൊടുപുഴ: മർച്ചന്‍റ്സ് അസോസിയേഷന്‍റെയും ജില്ലാ ഹോമിയോ ആശുപത്രിയുടെയും നേതൃത്വത്തിൽ ആസ്റ്റർ മെഡിസിറ്റി ലാബിന്‍റെ സഹകരണത്തോടെ സൗജന്യ മെഡിക്കൽ ക്യാന്പ് നടത്തി. രക്ഷാധികാരി ടി.എൻ. പ്രസന്നകുമാർ ഉദ്ഘാടനം ചെയ്തു. അസോസിയേഷൻ പ്രസിഡന്‍റ് രാജു തരണിയിൽ അധ്യക്ഷത വഹിച്ചു. വനിതാ വിംഗ് സംസ്ഥാന വൈസ് പ്രസിഡന്‍റ് ഗിരിജ കുമാരി, ഹോമിയോ ആയുഷ്മാൻ ഭവ ട്രെയിനർ ഡോ. ജെറോം, ഡോ. മാനസി രാജു, ഡോ. രഞ്ജു, അസോസിയേഷൻ വർക്കിംഗ് പ്രസിഡന്‍റ് സാലി എസ്. മുഹമ്മദ്, ജില്ലാ സെക്രട്ടറി നാസർ സൈര, വൈസ് പ്രസിഡന്‍റുമാരായ ഷെരീഫ് സർഗം, കെ.പി. ശിവദാസ്, ജോസ് തോമസ്, അനിൽ പീടികപ്പറന്പിൽ എന്നിവർ പ്രസംഗിച്ചു.

ദേശീയപാതയിൽ ടാറിംഗ് പൊളിച്ച് അപകടം വിളിച്ചു വരുത്തുന്നു

പൂപ്പാറ: കൊച്ചി-ധനുഷ്കോടി ദേശീയപാതയില്‍ അറ്റകുറ്റപ്പണികള്‍ക്കായി ടാറിംഗ് വെട്ടിപ്പൊളിച്ചിട്ടിരിക്കുന്നത് അപകടക്കെണിയായി മാറുന്നു. ബോഡിമെട്ട് മുതല്‍ പൂപ്പാറവരെ ഇരുപതോളം ഭാഗങ്ങളിലാണ് ഇരുചക്രവാഹനങ്ങളടക്കം അപകടത്തില്‍പ്പെടുന്ന തരത്തിൽ ടാറിംഗ് കുഴിച്ച് മാറ്റിയിരിക്കുന്നത്. നാലു മീറ്റര്‍ മുതല്‍ ഇരുപത് മീറ്റര്‍വരെ നീളത്തിലാണ് ടാറിംഗ് നീക്കിയിരിക്കുന്നത്. മൂന്നാര്‍ മുതല്‍ ബോഡിമെട്ട് വരെയാണ് നവീകരണം നടത്തി നിര്‍മാണം പൂര്‍ത്തീകരിച്ചത്. എന്നാല്‍, നിര്‍മാണം പൂര്‍ത്തിയാക്കിയ പല ഭാഗത്തും ടാറിംഗ് വിണ്ടുകീറിയതോടെയാണ് ഈ ഭാഗങ്ങളിലെ ടാറിംഗ് ഇളക്കി മാറ്റിയത്. മൂന്ന് ഇഞ്ച് കനത്തിലുള്ള ടാറിംഗ് ഇളക്കിനീക്കിയതോടെ ഈ ഭാഗങ്ങള്‍ വലിയ കുഴികളായി മാറി. ഇതോടെ രാത്രിയിലടക്കം ഇവിടെ ഇരുചക്ര വാഹനങ്ങള്‍ അപകടത്തില്‍പ്പെടുകയാണ്. അറ്റകുറ്റപ്പണികള്‍ക്കായി ടാറിംഗ് ഇളക്കി കുഴികളെടുത്തിട്ട് ഒരു വര്‍ഷം പിന്നിടുമ്പോഴും ഇവ ഗതാഗത യോഗ്യമാക്കുന്നതിന് ദേശീയപാത വിഭാഗം ഒരു നടപടിയും സ്വീകരിക്കുന്നില്ല. വളവുകളിലടക്കം കുഴിയൊഴിവാക്കി റോംഗ് സൈഡ് കയറുന്നതോടെ എതിരേ വരുന്ന വാഹനങ്ങളുമായി കൂട്ടിയിടിക്കാന്‍ സാധ്യതയേറെയാണ്. മുമ്പ് ഇത്തരത്തില്‍ ഓട്ടോറിക്ഷ ഇടിച്ചുതെറിപ്പിച്ച സംഭവവുമുണ്ടായി. അടിയന്തരമായി ദേശീയപാതയിലെ ഈ അപകടക്കെണി ഒഴിവാക്കി ടാറിംഗ് നടത്തണമെന്ന ആവശ്യമാണ് ഉയരുന്നത്.

കനത്ത കാറ്റിൽ വൈദ്യുതി പോസ്റ്റുകൾ തകർന്നു

മുട്ടം: കനത്ത കാറ്റിലും മഴയിലും മരംവീണ് വൈദ്യുതി പോസ്റ്റുകൾ ഒടിഞ്ഞുവീണു. മുട്ടം തോട്ടുങ്കര കോളനിക്കു സമീപം ഇന്നലെ ഉച്ചയ്ക്ക് ഒന്നോടെയാണ് സംഭവം. മരത്തിന്‍റെ ശിഖരം വൈദ്യുതി ലൈനിലേക്ക് വീണതോടെ സമീപത്തെ രണ്ടു പോസ്റ്റുകളും റോഡിലേയ്ക്ക് ഒടിഞ്ഞുവീഴുകയായിരുന്നു. റോഡിൽ ഈ സമയം ആരുമില്ലാതിരുന്നതിനാൽ വലിയ അപകടം ഒഴിവായി. വൈദ്യുതി വകുപ്പ് ജീവനക്കാരെത്തി ഭാഗികമായി വൈദ്യുതി പുനഃസ്ഥാപിച്ചു. ഇന്ന് രണ്ടു പോസ്റ്റുകളും മാറ്റി വൈദ്യുതി പൂർണമായും പുനഃസ്ഥാപിക്കുമെന്ന് അധികൃതർ പറഞ്ഞു.

സ്വപ്നഭവനത്തിന്‍റെ താക്കോൽ കൈമാറി

രാജാക്കാട്: രാജാക്കാട് ലയൺസ് ക്ലബ് ഏറ്റെടുത്ത് നടത്തുന്ന ജീവകാരുണ്യ പ്രവർത്തനങ്ങളുടെ ഭാഗമായി നിർമിച്ചുനൽകുന്ന 14 -ാമത് സ്വപ്നഭവനത്തിന്‍റെ താക്കോൽ കൈമാറി. സർക്കാരിന്‍റെയും പഞ്ചായത്തിന്‍റെയും ഒരു ഭവനപദ്ധതിയിലും ഉൾപ്പെടാത്ത വിധവയും രണ്ടു പെൺകുട്ടികളുടെ മാതാവുമായ ശംഖുപുരത്തിൽ രമ രാജേന്ദ്രന് ചെരുപുറത്ത് നിർമിച്ചു നൽകിയ ഭവനത്തിന്‍റെ താക്കോൽ ദാനം ലയൺസ് ക്ലബ് ഡിസ്ട്രിക്‌ട് ഗവർണർ രാജൻ എൻ. നമ്പൂതിരി നിർവഹിച്ചു. ചെരുപുറത്ത് കുടുംബാംഗങ്ങൾ വാങ്ങിയ നാലു സെന്‍റ് ഭൂമിയിലാണ് 550 ചതുരശ്ര അടി വിസ്തീർണത്തിൽ വീടു നിർമിച്ചത്. ഭവനാങ്കണത്തിൽ നടന്ന ചടങ്ങിൽ രാജാക്കാട് ലയൺസ് ക്ലബ് പ്രസിഡന്‍റ് ടി.എസ്. സുർജിത് അധ്യക്ഷത വഹിച്ചു. രാജാക്കാട് ഗ്രാമപഞ്ചായത്ത് പ്രസിഡന്‍റ് നിഷ രതീഷ്, ബ്ലോക്ക് പഞ്ചായത്ത് മെംബർ കിങ്ങിണി രാജേന്ദ്രൻ, വാർഡ് മെംബർ വീണ അനൂപ്, രാജാക്കാട് സ്റ്റേഷൻ എസ്എച്ച്ഒ വി. വിനോദ്കുമാർ, മർച്ചന്‍റ്സ് അസോസിയേഷൻ പ്രസിഡന്‍റ് വി.എസ്. ബിജു, ലയൺസ് ഭാരവാഹികളായ ഷൈനു സുകേഷ്, ബേസിൽ ടി. ജേക്കബ്, സെക്രട്ടറി പി.എം. രൺദീപ്, ട്രഷറർ ഫ്രാൻസിസ് അറയ്ക്കൽ തുടങ്ങിയവർ പങ്കെടുത്തു.

ജില്ലയിൽ മാ-കെയർ കിയോസ്കുകൾക്ക് തുടക്കം

ഇടുക്കി: സ്കൂളുകളിൽ വിദ്യാർഥികൾക്ക് ആവശ്യമായതെല്ലാം ലഭ്യമാക്കുന്ന കുടുംബശ്രീയുടെ മാ-കെയർ പദ്ധതിക്കു തുടക്കമായി. ആരോഗ്യകരവും പോഷകസന്പുഷ്ടവുമായ ലഘുഭക്ഷണങ്ങൾ, പാനീയങ്ങൾ, സ്റ്റേഷനറി ഇനങ്ങൾ, സാനിറ്ററി നാപ്കിനുകൾ തുടങ്ങി കുട്ടികൾക്ക് ആവശ്യമായതെല്ലാം കിയോസ്കുകളിൽ ലഭിക്കും. കിയോസ്കുകൾ സ്ഥാപിക്കാൻ സ്ഥലം ലഭ്യമല്ലെങ്കിൽ ഉപയോഗിക്കാത്ത ക്ലാസ് മുറികൾ ഇതിനായി ഉപയോഗിക്കാമെന്ന് അധികൃതർ അറിയിച്ചു. പ്രാദേശിക കൂട്ടായ്മകളിലൂടെ പോഷകസമൃദ്ധമായ ഉത്പന്നങ്ങൾ ലഭ്യമാക്കുക എന്നതാണ് മാ-കെയർ കിയോസ്കുകളുടെ പ്രധാന ലക്ഷ്യം. പദ്ധതിയുടെ ജില്ലാതല ഉദ്ഘാടനം കല്ലാർ ഗവ. ഹയർ സെക്കൻഡറി സ്കൂളിൽ പാന്പാടുംപാറ പഞ്ചായത്ത് പ്രസിഡന്‍റ് ജോസ് ജോസഫ് തെക്കേക്കുറ്റ് നിർവഹിച്ചു. സിഡിഎസ് ചെയർപേഴ്സണ്‍ മോളി സുരേന്ദ്രൻ അധ്യക്ഷത വഹിച്ചു. വൈസ് പ്രസിഡന്‍റ് സരിത രാജേഷ്, മെംബർ സെക്രട്ടറി സുരേഷ്കുമാർ, പ്രിൻസിപ്പൽ കെ.വി. ഹെല്ലോക്, ഹെഡ്മാസ്റ്റർ ജോണ്‍ മാത്യു, പിടിഎ പ്രസിഡന്‍റ് രമേശ് കൃഷ്ണൻ എന്നിവർ പ്രസംഗിച്ചു. കൊന്നത്തടി പഞ്ചായത്തിലെ പാറത്തോട് സെന്‍റ് ജോർജ് ഹയർ സെക്കൻഡറി സ്കൂളിൽ നടന്ന പദ്ധതിയുടെ ഉദ്ഘാടനം പഞ്ചായത്ത് വൈസ് പ്രസിഡന്‍റ് സാലി കുര്യാച്ചൻ നിർവഹിച്ചു. സ്കൂൾ മാനേജർ ഫാ. മാത്യു തറമുട്ടം ആദ്യവിൽപ്പന നടത്തി. കൊന്നത്തടി സിഡിഎസ് ചെയർപേഴ്സണ്‍ കെ.കെ.രജനി, വാർഡ് മെംബർമാരായ ടി.പി. മൽക്ക, സുമംഗല വിജയൻ, ഹെഡ്മാസ്റ്റർ ബിനോയ് ചെമ്മരപ്പള്ളി, ബ്ലോക്ക് കോ-ഓർഡിനേറ്റർ അഞ്ജന പ്രസന്നൻ എന്നിവർ പ്രസംഗിച്ചു.

ഇടുക്കി മെഡി. കോളജിന്‍റെ സംരക്ഷണഭിത്തി ഇടിഞ്ഞു വീഴാറായ നിലയിൽ

ചെറുതോണി: സംരക്ഷണഭിത്തി ബലപ്പെടുത്താൻ കോട്ടയം മെഡിക്കൽ കോളജ് ദുരന്തം ഇടുക്കിയിലും ആവർത്തിക്കണമോയെന്ന് നാട്ടുകാർ. കോട്ടയം മെഡിക്കൽ കോളജ് ആശുപത്രിയുടെ കെട്ടിടം തകർന്ന് ഒരു ജീവൻ നഷ്ടമായിട്ടും അധികൃതർ പാഠം പഠിക്കുന്നില്ലെന്നാണ് ആരോപണം. ഇടുക്കി ഗവ. മെഡിക്കൽ കോളജ് ആശുപത്രിയുടെ സംരക്ഷണഭിത്തി തകർന്നു വീഴാറായ നിലയിലാണ്. മെഡിക്കൽ കോളജ് ആശുപത്രിയായി മാറ്റിയ ജില്ലാ ആശുപത്രിയുടെ കെട്ടിടത്തിന്‍റെ സംരക്ഷണഭിത്തിയാണ് ഭീഷണിയായിരിക്കുന്നത്. കുട്ടികളുടെ വാർഡ്, പ്രസവ വാർഡ്, സർജിക്കൽ വാർഡ്, ഐസിയു , ഓപ്പറേഷൻ തിയേറ്റർ, സൈക്യാട്രിക് വാർഡ്, ബ്ലഡ് ബാങ്ക് തുടങ്ങിയവ ഈ കെട്ടിടത്തിലാണ് ഇപ്പോൾ പ്രവർത്തിക്കുന്നത്. ഈ കെട്ടിടത്തിന്‍റെ മുറ്റത്തിന്‍റെ കരിങ്കൽകെട്ടാണ് ഇടിഞ്ഞു വീഴാറായിരിക്കുന്നത്. മെഡിക്കൽ കോളജ് ആശുപത്രിയിലേക്കുള്ള റോഡിലേക്കാണ് കരിങ്കൽഭിത്തി തകർന്നാൽ വീഴുക. 20 അടിയിലേറെ ഉയരമുള്ള സംരക്ഷണഭിത്തി തകർന്നാൽ ആശുപത്രി കെട്ടിടവും അപകടത്തിലാവും. സദാ നേരവും വാഹനവും ജനങ്ങളും സഞ്ചരിക്കുന്ന റോഡിലേക്ക് കരിങ്കൽകെട്ട് തകർന്നുവീണാൽ വൻ ദുരന്തം സംഭവിക്കാം. പത്തടിയിലേറെ നീളത്തിൽ കരിങ്കൽ കെട്ട് പുറത്തേക്ക് തള്ളിയിട്ടുണ്ട്. കല്ലുകൾ ഇളകി ഏതു നിമിഷവും താഴവീഴാവുന്ന നിലയിലുമാണ്.

മാംസവിൽപന സ്റ്റാളുകളിൽ ശുചിത്വമില്ല; വില തോന്നുംപടി

തൊടുപുഴ: നഗരസഭയിൽ മാംസ വിൽപ്പന സ്റ്റാളുകൾ പ്രവർത്തിക്കുന്നത് യാതൊരു നിയന്ത്രണവുമില്ലാതെ. കന്നുകാലികളെ കൊല്ലുന്നതിനുള്ള ആധുനിക അറവുശാല നഗരസഭയിൽ ഇല്ലാത്തതിനാൽ മാംസവിൽപ്പന സ്റ്റാളുകൾക്ക് നഗരസഭ ലൈസൻസ് നൽകുന്നില്ല. അതിനാൽ സ്റ്റാളുകളുടെ നടത്തിപ്പുകാർ അവരുടെ ഇഷ്ടമനുസരിച്ചാണ് ഉരുക്കളെ കൊല്ലുന്നതും വിൽപ്പന നടത്തുന്നതും. ആധുനിക അറവുശാലയിൽ കൊല്ലുന്ന കന്നുകാലികളുടെ ഇറച്ചി മാത്രമേ വിൽപ്പന നടത്താവു എന്ന നിബന്ധന നിലനിൽക്കേയാണ് യാതൊരു നിയന്ത്രണവും ഇല്ലാതെ മാംസ വിൽപ്പന നടത്തുന്നത്. ഒട്ടേറെ മാംസ സ്റ്റാളുകളാണ് നഗരസഭ പരിധിയിൽ പ്രവർത്തിക്കുന്നത്. എന്നാൽ ഇവിടേക്ക് മാംസം എത്തുന്നത് എവിടെ നിന്നാണെന്ന കാര്യത്തിൽ അധികൃതർക്ക് വ്യക്തതയില്ല. വെറ്ററിനറി ഡോക്ടറുടെ സാന്നിധ്യത്തിൽ പരിശോധിച്ച് ആധുനിക അറവുശാലയിൽ കശാപ്പ് ചെയ്യുന്ന ഉരുക്കളുടെ മാംസമേ വിൽപ്പന നടത്താവൂ എന്നാണ് നിബന്ധന. അറവുശാലയില്ലാത്തതിനാൽ ഇതൊന്നും ഇവിടെ പാലിക്കപ്പെടുന്നില്ലെന്നാണ് ആക്ഷേപം. നഗരസഭയിൽ ആധുനിക അറവു ശാല നിർമിക്കുമെന്ന പ്രഖ്യാപനം നഗരസഭ അധികൃതർ പതിവായി ആവർത്തിക്കാറുണ്ട്. മുൻ വർഷങ്ങളിലെ ബജറ്റിൽ ഇതിനായി തുക വകയിരുത്തുകയും ചെയ്തിരുന്നു. മാർക്കറ്റ് പരിസരത്ത് ആധുനിക അറവുശാല നിർമിക്കാനായിരുന്നു തീരുമാനം. നാലു കോടിയുടെ പദ്ധതി തയാറാക്കുന്നതിനാണ് നഗരസഭ തീരുമാനിച്ചത്. മാടുകളെ പരിശോധിയ്ക്കാനുള്ള ലാബ്, കൊല്ലാനുള്ള ആധുനിക സംവിധാനങ്ങൾ, മാലിന്യസംസ്കരണ സംവിധാനം, ജലസംഭരണ സംവിധാനം ഉൾപ്പെടെ സജ്ജമാക്കാനായിരുന്നു തീരുമാനം. എന്നാൽ, നടപടികൾ പദ്ധതിക്കായുള്ള പ്രോജക്ട് റിപ്പോർട്ട് തയാറാക്കാനുള്ള നിർദേശത്തിൽ മാത്രം ഒതുങ്ങി. ജില്ലയിലെ മറ്റൊരു നഗരസഭയായ കട്ടപ്പനയിൽ ആധുനിക അറവുശാല പ്രവർത്തിക്കുന്പോഴാണ് തിരക്കേറിയ തൊടുപുഴയിൽ ആധുനിക അറവു ശാല ഇല്ലാത്തത്. അറവുശാല ഇല്ലാത്തതിനാൽ നഗരസഭയ്ക്ക് മാംസസ്റ്റാളുകൾക്ക് ലൈസൻസ് നൽകാനുമാകില്ല. അതിനാൽ ഇവരുടെ പ്രവർത്തനങ്ങൾ നിയന്ത്രിക്കാനും കഴിയുന്നില്ല. മാംസത്തിന്‍റെ വില സ്റ്റാൾ നടത്തിപ്പുകാർ തോന്നുംപടിയാണ് ഉയർത്തുന്നത്. നഗരസഭയുടെ മത്സ്യമാർക്കറ്റിലായിരുന്നു ആധുനിക അറവുശാല നിർമിക്കാൻ പദ്ധതിയിട്ടിരുന്നതെന്ന് ചെയർമാൻ കെ. ദീപക് പറഞ്ഞു. എന്നാൽ, ആധുനിക അറവുശാല നിർമിക്കാനുള്ള വിസ്തൃതി നഗരസഭയുടെ ഈ സ്ഥലത്തുണ്ടായിരുന്നില്ല. എല്ലാ ബജറ്റിലും പദ്ധതിക്കായി തുക വകയിരുത്താറുണ്ടെങ്കിലും ഇപ്പോൾ ഇതിനായുള്ള നടപടികൾ നിലച്ചിരിക്കുകയാണന്നും അദ്ദേഹം പറഞ്ഞു. ആരോഗ്യ വിഭാഗം പരിശോധന നടത്തി നഗരസഭ പരിധിയിലെ മാംസ സ്റ്റാളുകളിൽ ആരോഗ്യ വിഭാഗം സ്ക്വാഡ് പരിശോധന നടത്തി. നഗരസഭയിൽ പ്രവർത്തിക്കുന്ന മാംസസ്റ്റാളുകളെ സംബന്ധിച്ച് താലൂക്ക് വികസനസമിതിയിൽ പരാതികൾ വന്നതിന്‍റെ അടിസ്ഥാനത്തിലാണ് പട്ടയം കവല, മുതലക്കോടം, മങ്ങാട്ടുകവല, കുന്പംകല്ല് മേഖലകളിലെ മാംസവില്പന സ്ഥാപനങ്ങളിൽ പരിശോധന നടത്തിയത്. പല സ്ഥാപനങ്ങളും പ്രവർത്തിച്ചിരുന്നത് വൃത്തിഹീനമായ അന്തരീക്ഷത്തിലാണെന്ന് പരിശോധനയിൽ വ്യക്തമായി. ഹെൽത്ത് കാർഡ് ഇല്ലാത്ത ജീവനക്കാരാണ് സ്റ്റാളുകളിൽ പണിയെടുക്കുന്നത്. ഗ്ലാസ് സ്ഥാപിച്ച് മാംസം തൂക്കിയിട്ടിരിക്കുന്നത് മറയ്ക്കണമെന്ന നിർദേശം പാലിച്ചിട്ടില്ല. ശരിയായ രീതിയിൽ മാലിന്യ സംസ്കരണ സംവിധാനം ഒരുക്കിയിട്ടില്ലന്നും പരിശോധനയിൽ കണ്ടെത്തി. നിയമലംഘനം കണ്ടെത്തിയ സ്ഥാപനങ്ങൾക്ക് നോട്ടീസ് നൽകി. ഏഴു ദിവസത്തിനകം ഇവ പരിഹരിച്ചില്ലെങ്കിൽ പിഴയുൾപ്പെടെയുള്ള നടപടികളിലേക്ക് നീങ്ങുമെന്ന് ആരോഗ്യവകുപ്പധികൃതർ അറിയിച്ചു. സീനിയർ പബ്ലിക് ഹെൽത്ത് ഇൻസ്പെക്ടർ ബിജോ മാത്യു, പബ്ലിക് ഹെൽത്ത് ഇൻസ്പെക്ടർമാരായ സതീശൻ, ദീപ എന്നിവർ പരിശോധനക്ക് നേതൃത്വം നൽകി.

മെഡി. കോളജിൽ ആശുപത്രിസേവനം പേരിൽ മാത്രം

ചെറുതോണി: ഇടുക്കി ഗവ. മെഡിക്കൽ കോളജ് വികസനത്തിന്‍റെ പാതയിലാണെന്ന് അധികൃതർ ആവർത്തിക്കുന്പോഴും ജനങ്ങൾക്ക് ചികിത്സാസംവിധാനം ഒരുക്കാൻ നടപടി ഉണ്ടാകുന്നില്ല. ഇവിടെ ഉണ്ടായിരുന്ന ജില്ലാ ആശുപത്രി നഷ്ടപ്പെടുത്തി മെഡിക്കൽ കോളജ് ആരംഭിച്ചപ്പോൾ മെഡിക്കൽ കോളജിനോടൊപ്പം ആശുപത്രിയും സജ്ജമാകുമെന്ന പ്രതീക്ഷയിലായിരുന്ന ഹൈറേഞ്ച് മേഖല. അടിയന്തര ചികിത്സാ സൗകര്യങ്ങൾ പോലും പരിമിതമാണിവിടെ. അപകടത്തിൽപ്പെടുന്നവർക്കുപോലും വിദഗ്ധചികിത്സ നൽകാനുള്ള സംവിധാനം പോലുമില്ല. സൂപ്പർ സ്പെഷാലിറ്റി വിഭാഗം ഒന്നുപോലും ഇടുക്കി മെഡിക്കൽ കോളജാശുപത്രിയിലില്ല. ഹൃദ്രോഹം, വൃക്കരോഗം, കാർഡിയോ തെറാപ്പിക് സർജറി, നൂറോ സർജറി, ഓർത്തോ പീഡിയാട്രിക്ക് സർജറി, ഉദരരോഗ വിഭാഗം, ഓങ്കോളജി എന്നിവയിലൊന്നും ഡോക്ടർമാരില്ല. വിദഗ്ധരോഗത്തിന്‍റെ ചികിത്സയ്ക്കുള്ള ഉപകരണങ്ങളും ഇല്ല. മലയോരമേഖലകളിൽ വിദഗ്ധചികിത്സ ലഭിക്കാതെ രോഗികളുടെ ജീവൻ നഷ്ടമാകുന്നത് നിത്യസംഭവമാണ്. ജനറൽ മെഡിസിൻ, ജനറൽ സർജറി, ഗൈനക്കോളജി, ശിശുരോഗ വിഭാഗം, സ്കിൻ, റസ്പിറേറ്ററി മെഡിസിൻ, അസ്ഥിരോഗ വിഭാഗം, മാനസികാരോഗ്യ വിഭാഗം എന്നീ സ്പെഷാലിറ്റി വിഭാഗങ്ങളാണ് ഇടുക്കി മെഡിക്കൽ കോളജ് ആശുപത്രിയിൽ ഇപ്പോൾ പ്രവർത്തിക്കുന്നത്. എന്നാൽ, ഓരോ വിഭാഗത്തിനും ഡോക്ടർമാരുടെ എണ്ണം നാമമാത്രമാണ്. അതിനാൽ ഒരു ഡോക്ടർ അവധിയെടുത്താൽ രോഗികൾക്ക് ഈ വിഭാഗത്തിലും തക്കസമയത്തു ചികിത്സ ലഭിക്കില്ല. ഇടുക്കിയിൽ കാത്ത് ലാബ് ഉടൻ ആരംഭിക്കുമെന്ന പ്രഖ്യാപനം വർഷങ്ങളായി കേൾക്കുന്നതാണ്. ജില്ലാ ആശുപത്രിയായിരുന്ന കാലം മുതൽ മാറി മാറി വരുന്ന മന്ത്രിമാരും ജനപ്രതിനിധികളും നിരവധി തവണ വാഗ്ദാനം നടത്തിയിരുന്നു. ജനങ്ങൾ കന്പളിപ്പിക്കപ്പെടുന്നതല്ലാതെ ലാബ് വന്നില്ല. ഇടുക്കി മെഡിക്കൽ കോളജിന്‍റെ ഉദ്ഘാടനത്തിലും ഇതാവർത്തിച്ചിരുന്നു. ഡൈ ഇൻജക്ടർ, വെന്‍റിലേറ്റർ സിം ആം മെഷീൻ ഉൾപ്പെടെയുള്ള സൗകര്യങ്ങളാണ് ആധുനിക നിലവാരത്തിലുള്ള കാത്ത് ലാബിൽ വേണ്ടത്. ഇതോടൊപ്പം ഫ്രീകാത്ത് വാർഡും തയാറാകണം. എട്ടുകോടിയോളം രൂപയുണ്ടെങ്കിൽ എല്ലാ സൗകര്യങ്ങളുമുള്ള കാത്ത് ലാബ് സജ്ജീകരിക്കാമെന്ന് വിദഗ്ധ ഡോക്ടർമാർ പറയുന്നു. ഇടുക്കി മെഡിക്കൽ കോളജിന്‍റെ പുതിയ ബ്ലോക്കു പണി പൂർത്തിയായാൽ സൂപ്പർ സ്പഷാലിറ്റി സേവനങ്ങൾ ആരംഭിക്കുമെന്നാണ് അധികൃതർ പറയുന്നത്. അടിമാലി താലൂക്കാശുപത്രിയിൽ കെട്ടിടമുണ്ടാക്കിക്കഴിഞ്ഞപ്പോഴാണ് ഒരു ജില്ലയിൽ ഒരു കാത്ത് ലാബ് മതിയെന്ന സർക്കാർ നിർദേശം ഉണ്ടായത്. ഇതോടെ കാത്ത് ലാബ് ഇടുക്കിയിൽ മതിയെന്ന തീരുമാനമായി. കാത്ത് ലാബിന്‍റെ ഉപകരണങ്ങൾ വാങ്ങാൻ ഒരു കോടി അനുവദിച്ചെങ്കിലും ഇത് ഉപയോഗപ്പെടുത്താൻ കഴിഞ്ഞിട്ടില്ല. ഇതിനിടെ മെഡിക്കൽ കോളജിൽ കൂടുതൽ ഡോക്ടർമാരെ നിയോഗിച്ചെങ്കിലും രോഗികൾക്ക് മെച്ചപ്പെട്ട സേവനം നൽകാൻ വിവിധ ഡിപ്പാർട്ടുമെന്‍റുകൾ കൂടി അനുവദിക്കണം.

അമ്മമാർക്കു വേണ്ടത് ഭാവാത്മക സമീപനം: മാർ മഠത്തിക്കണ്ടത്തിൽ

മൂവാറ്റുപുഴ: നിഷേധാത്മക സമീപനമല്ല, മറിച്ച് ഭാവാത്മക സമീപനമാണ് അമ്മമാർക്ക് ഉണ്ടാകേണ്ടതെന്ന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ. മൂവാറ്റുപുഴ നിർമല എച്ച്എസ്എസിൽ നടന്ന മാതൃവേദി രൂപത പ്രവർത്തനവർഷത്തിന്‍റെ ഉദ്ഘാടനം നിർവഹിക്കുകയായിരുന്നു അദ്ദേഹം. ഉപദേശമല്ല, മാതൃകയാണ് ഈ കാലഘട്ടത്തിന്‍റെ ആവശ്യം. കുറ്റങ്ങൾ കണ്ടെത്തുന്ന സമീപനം ഉപേക്ഷിച്ച് നമ്മിലും മറ്റുള്ളവരിലും നന്മ കണ്ടെത്തുന്ന ജീവിതശൈലിയിലേക്ക് കടന്നുവരണമെന്നും ബിഷപ് പറഞ്ഞു. ചടങ്ങിൽ രൂപത പ്രസിഡന്‍റ് ജാൻസി മാത്യു അധ്യക്ഷത വഹിച്ചു. രൂപത ഡയറക്ടർ റവ.ഡോ.ആന്‍റണി പുത്തൻകുളം ആമുഖപ്രഭാഷണം നടത്തി. മൂവാറ്റുപുഴ ഹോളി മാഗി ഫൊറോന പള്ളി വികാരി റവ.ഡോ. മാനുവൽ പിച്ചളക്കാട്ട് അനുഗ്രഹ പ്രഭാഷണം നടത്തി. പ്രവർത്തനവർഷ മാർഗരേഖ മാർ ജോർജ് മഠത്തിക്കണ്ടത്തിൽ പ്രകാശനം ചെയ്തു. വൈസ് പ്രസിഡന്‍റ് സെലിൻ ലൂയിസ്, ആനിമേറ്റർ സിസ്റ്റർ ആനി തെരേസ, സെക്രട്ടറി ജൂഡി ഡാലു, പ്രീത ജോണി, സിജി ജോമി, സിൽജ ജോളി, മിനി ജോസ് എന്നിവർ പ്രസംഗിച്ചു. വിവിധ കലാപരിപാടികൾ ചടങ്ങിന് മാറ്റുകൂട്ടി.

കഞ്ഞിക്കുഴി സാമൂഹികാരോഗ്യകേന്ദ്രത്തിലെ ആംബുലൻസ് കട്ടപ്പുറത്ത്

ചെറുതോണി: കഞ്ഞിക്കുഴി-തള്ളക്കാനം സാമൂഹികാരോഗ്യകേന്ദ്രത്തിന്‍റെ ആംബുലൻസ് കട്ടപ്പുറത്ത്. റോഷി അഗസ്റ്റിൽ എംഎൽഎ ഫണ്ടിൽനിന്ന് ലക്ഷങ്ങൾ മുടക്കി അനുവധിച്ച ആംബുലൻസാണ് കട്ടപ്പുറത്തായിരിക്കുന്നത് . എസ്‌സി, എസ്ടി വിഭാഗക്കാർക്ക് സൗജന്യസേവനം നൽകിവന്നിരുന്ന ആംബുലൻസ് കട്ടപ്പുറത്തായതോടെ വൻതുക നൽകി സ്വകാര്യ ആംബുലൻസുകളെ ആശ്രയിക്കേണ്ട ഗതികേടിലാണ് ആദിവാസികൾ. ഇതോടെ പിന്നാക്ക-ആദിവാസിമേഖലയായ കഞ്ഞിക്കുഴി പഞ്ചായത്തിലെ സാമൂഹികാരോഗ്യ കേന്ദ്രത്തിൽ ആംബുലൻസ് വേണം എന്ന ആവശ്യം ശക്തമാകുകയാണ്. അടിയന്തരമായി കഞ്ഞിക്കുഴി സിഎച്ച്സിക്ക് ആംബുലൻസ് അനുവദിക്കാൻ ത്രിതല പഞ്ചായത്തും മന്ത്രിയും ഇടപെടണമെന്നാണ് ആവശ്യം.

അടിമാലി താലൂക്കാശുപത്രിയുടെ കെട്ടിടവും അപകടഭീഷണിയിൽ

അടിമാലി: അടിമാലി താലൂക്ക് ആശുപത്രിയുടെ പഴയ കെട്ടിടവും അപകട ഭീഷണിയിൽ. നാലുപതിറ്റാണ്ടു പഴക്കമുള്ള കെട്ടിടമാണ് ബലക്ഷയം സംഭവിച്ച് അപകടാവസ്ഥയിലുള്ളത്. ആശുപത്രിയുടെ ലേബര്‍റൂം, നവജാതശിശുക്കളുടെ പരിശോധനാ മുറി, പ്രസവവാര്‍ഡ്, ഫാര്‍മസി സ്റ്റോര്‍ എന്നിവ പ്രവർത്തിക്കുന്നത് ഈ പഴയ കെട്ടിടത്തിലാണ്. 2019ൽ കെട്ടിടം പ്രവര്‍ത്തനയോഗ്യമല്ലെന്ന് ബന്ധപ്പെട്ടവർ റിപ്പോർട്ടു നൽകിയിട്ടുള്ളതാണ്. കെട്ടിടത്തിന്‍റെ പകുതി ഭാഗം കാത്ത്‌ലാബിന്‍റെ നിര്‍മാണത്തിനായി പൊളിച്ചുനീക്കിയിരുന്നു. ഇതു കെട്ടിടത്തിന് വിള്ളലുകൾക്ക് ഇടയാക്കിയിട്ടുണ്ട്. ഈ ഭാഗമാണ് അപകടഭീഷിണി ഉയർത്തുന്നത്. കെട്ടിടത്തിന് എന്തെങ്കിലും തരത്തില്‍ അപകടം ഉണ്ടായാല്‍പോലും ഇന്‍ഷ്വറന്‍സ് അടക്കമുള്ള ആനുകൂല്യങ്ങൾ വരെ നഷ്ടമാകും. നിർമാണം പൂർത്തീകരിച്ച ആശുപത്രിയുടെ പുതിയ കെട്ടിടം ഉദ്ഘാടനം കാത്തുകിടക്കുകയാണ്.

പവർ ലിഫ്റ്റിംഗിൽ സ്വപ്നനേട്ടം, നാടിന് അഭിമാനമായി അഞ്ജലി

മറയൂർ: പവർ ലിഫ്റ്റിംഗിൽ ഉയരങ്ങൾ കീഴടക്കി കാന്തല്ലൂർ ദിണ്ഡുകൊന്പ് സ്വദേശിനിയായ പനച്ചിപ്പറന്പിൽ പി.ആർ. അഞ്ജലി രാജ്യത്തിന്‍റെ അഭിമാനമായി മാറുന്നു. 2022-ൽ കോയന്പത്തൂരിൽ നടന്ന ഏഷ്യൻ എക്വിപ്ഡ് പവർലിഫ്റ്റിംഗ് ചാന്പ്യൻഷിപ്പിൽ സ്വർണമെഡൽ നേടിയായിരുന്നു വിജയകുതിപ്പ്. ഇതേവർഷം ഹൈദരാബാദിൽ നടന്ന എക്വിപ്ഡ് പവർലിഫ്റ്റിംഗ് ചാന്പ്യൻഷിപ്പിൽ ദേശീയ ജൂണിയർ വിഭാഗത്തിൽ വെള്ളി മെഡൽ നേടി. 2024ൽ ചെന്നൈയിൽ നടന്ന അഖിലേന്ത്യാ ഇന്‍റർ യൂണിവേഴ്സിറ്റി പവർലിഫ്റ്റിംഗ് ചാന്പ്യൻഷിപ്പിൽ രാജ്യത്തെ ഉന്നത വിദ്യാഭ്യാസ സ്ഥാപനങ്ങളിൽനിന്നുള്ള മത്സരാർഥികൾക്കിടയിൽ അഞ്ജലി ഒന്നാമതെത്തി സുവർണനേട്ടം സ്വന്തമാക്കി. രാജസ്ഥാനിൽ നടന്ന ദേശീയ പവർലിഫ്റ്റിംഗ് ചാന്പ്യൻഷിപ്പിൽ ക്ലാസിക് വിഭാഗത്തിൽ ജൂണിയർ തലത്തിൽ സ്വർണവും നേടി. പട്യാല, ശ്രീനഗർ, കർണാടക എന്നിവിടങ്ങളിൽ നടന്ന മത്സരങ്ങളിലും അഞ്ജലി തന്‍റെ അജയ്യത തെളിയിച്ചു. കേരള സ്റ്റേറ്റ് എക്വിപ്ഡ് പവർലിഫ്റ്റിംഗ് ചാന്പ്യൻഷിപ്പിൽ 2021, 2022, 2023, 2025 വർഷങ്ങളിൽ സംസ്ഥാന തലത്തിൽ തുടർച്ചയായി സ്വർണമെഡൽ നേടി കേരളത്തിന്‍റെ അഭിമാനമായി. 2019, 2022, 2024ൽ കേരള സ്റ്റേറ്റ് ക്ലാസിക് പവർലിഫ്റ്റിംഗ് ചാന്പ്യൻഷിപ്പിൽ ക്ലാസിക് വിഭാഗത്തിൽ മൂന്നുതവണ സ്വർണം നേടി. കോതമംഗലം മാർ അത്തനേഷ്യസ് കോളജ് ഓഫ് ആർട്സ് ആൻഡ് സയൻസിൽ ബിരുദം പൂർത്തിയാക്കിയ അഞ്ജലി പഠനത്തിലും കായികമേഖലയിലും തന്‍റെ പ്രാഗൽഭ്യം തെളിയിച്ച് വ്യക്തിമുദ്ര പതിപ്പിച്ചു. കഠിനാധ്വാനത്തിലൂടെയും അർപ്പണമനോഭാവത്തിലൂടെയുമാണ് സംസ്ഥാന, ദേശീയ, അന്തർദേശീയ തലങ്ങളിൽ ഈ യുവതാരം നേട്ടങ്ങൾ കൊയ്തത്. കാർഗിൽ യുദ്ധത്തിൽ പങ്കെടുത്ത വിമുക്തഭടൻ എം. പ്രതീഷ്-രേഷ്മ ദന്പതികളുടെ മകളാണ്. സഹോദരി പി.ആർ. ഐശ്വര്യ ട്രിപ്പിൾ ജംപിൽ ദേശീയ ചാന്പ്യനായിരുന്നു. നിലവിൽ ദുബായിൽ ഫിറ്റ്നസ് ട്രെയിനറാണ്. ജിതേഷ് ചെറുവള്ളി

മുക്കുപണ്ടം പണയംവച്ചു പണംതട്ടി മുങ്ങിയ യുവതി 19 വർഷത്തിനു ശേഷം പിടിയിൽ

കട്ടപ്പന: മുക്കുപണ്ടം പണയംവച്ചു പണംതട്ടി മുങ്ങിയ യുവതിയെ 19 വർഷത്തിനു ശേഷം പോലീസ് പിടികൂടി. 2006ൽ ഫെഡറൽ ബാങ്ക് കട്ടപ്പന ശാഖയിൽ 50 ഗ്രം മുക്കുപണ്ടം പണയംവച്ചു 25,000 രൂപ തട്ടിയെടുത്ത ശേഷം മുങ്ങിയ തങ്കമണി പാലോളിൽ ബിനീത തങ്കപ്പൻ (49) ആണ് പിടിയിലായത്. 2006ൽ അറസ്റ്റിലായ യുവതി ജ്യാമ്യത്തിലിറങ്ങി ഒളിവിൽപ്പോയതിനെത്തുടർന്ന് കട്ടപ്പന കോടതി പിടികിട്ടാപ്പുള്ളിയായി പ്രഖ്യാപിച്ചിരുന്നു. 19 വർഷമായി പോലീസിനെ കബളിപ്പിച്ചു വിവിധ സ്‌ഥലങ്ങളിൽ ഒളിവിൽ കഴിഞ്ഞുവരുകയായിരുന്നു ഇവർ. ഇടുക്കി ഡിസിആർബി ഡിവൈഎസ്പി കെ.ആർ. ബിജുവിന്‍റെയും കട്ടപ്പന ഡിവൈഎസ്പി വി.എ. നിഷാദ്മോന്‍റെയും നേതൃത്വത്തിലുള്ള സംഘം എറണാകുളം നെടുമ്പാശേരിക്കടുത്തുള്ള കാരക്കുന്നത്തുനിന്നാണ് യുവതിയെ അറസ്റ്റ് ചെയ്തത്. ഇടുക്കി ജില്ലാ പോലീസ് മേധാവി ടി.കെ. വിഷ്ണു പ്രദീപിന്‍റെ നിർദേശാനുസരണമായിരുന്നു അന്വേഷണം. എസ്‌സിപിഒ ജയേഷ്മോൻ, ജോബിൻ ജോസ്, വനിതാ എസ്‌സിപിഒ വി.വി. സബീന ബീവി എന്നിവരും അന്വേഷണ സംഘത്തിലുണ്ടായിരുന്നു. പ്രതിയെ കട്ടപ്പന കോടതിൽ ഹാജരാക്കി.

താലൂക്കാശുപത്രിയില്‍ സൂപ്രണ്ടിനെ തടഞ്ഞ് യൂത്ത് കോണ്‍ഗ്രസ് സമരം

അടിമാലി: നവജാത ശിശു മരിച്ച സംഭവത്തിൽ പ്രതിഷേധിച്ച് യൂത്ത് കോൺഗ്രസ് നടത്തിയ സമരത്തിൽ സംഘർഷം. അടിമാലി താലൂക്കാശുപത്രി സൂപ്രണ്ടിനെ മുറിയ്ക്കുള്ളില്‍ തടഞ്ഞ് യൂത്ത് കോണ്‍ഗ്രസ് പ്രവര്‍ത്തകര്‍ നടത്തിയ കുത്തിയിരിപ്പു സമരമാണ് സംഘർഷത്തിൽ കലാശിച്ചത്. സമരം നീണ്ടതോടെ പ്രതിഷേധക്കാരെ നീക്കി. സൂപ്രണ്ടിനെ മോചിപ്പിക്കണമെന്ന ആവശ്യവുമായി ആശുപത്രി ജീവനക്കാര്‍ രംഗത്തെത്തിയതിനു പിന്നാലെ ഒരു വിഭാഗം പൊതുപ്രവര്‍ത്തകരും ആശുപത്രി സൂപ്രണ്ടിന്‍റെ മുറിക്കു പുറത്തെത്തി. കൂടുതൽ പോലീസെത്തി പ്രതിഷേധവുമായി മുറിക്കു പുറത്തുനിന്നവരെ അനുനയപ്പിച്ചു മാറ്റി. ആശുപത്രി സൂപ്രണ്ടിനെ ബന്ദിയാക്കിയതിൽ പ്രതിഷേധിച്ച സ്റ്റാഫ് കൗണ്‍സലിന്‍റെ നേതൃത്വത്തില്‍ ജീവനക്കാര്‍ ഏതാനും സമയം ഡ്യൂട്ടി ബഹിഷ്കരിച്ചു. യൂത്ത് കോണ്‍ഗ്രസ് സമരം ആശുപത്രിയില്‍ എത്തിയ രോഗികള്‍ക്ക് അസൗകര്യം സൃഷ്ടിച്ചെന്നാരോപിച്ച് മറ്റൊരു വിഭാഗം പൊതുപ്രവർത്തകരും രംഗത്തെത്തി. ആശുപത്രി പരിസരത്ത് സംഘര്‍ഷാവസ്ഥ ആയതോടെ രാവിലെ ആശുപത്രിയിലെ കാഷ്വാലിറ്റി വിഭാഗത്തില്‍ ചികിത്സതേടിയെത്തിയ രോഗികളും ബുദ്ധിമുട്ടിലായി.

നവജാതശിശു മരിച്ച സംഭവത്തില്‍ ആരോഗ്യവകുപ്പ് അന്വേഷണം തുടങ്ങി

അടിമാലി: നവജാതശിശു മരിച്ച സംഭവത്തില്‍ ആരോഗ്യവകുപ്പ് അന്വേഷണം തുടങ്ങി. കഴിഞ്ഞ മാസം 15നായിരുന്നു കുറത്തിക്കുടി സ്വദേശികളായ ദമ്പതികളുടെ കുഞ്ഞ് ജനിച്ച ഉടന്‍ അടിമാലിയിലെ സ്വകാര്യ ആശുപത്രിയില്‍ മരണപ്പെട്ടത്. ദമ്പതികള്‍ 14ന് അടിമാലി താലൂക്കാശുപത്രിയില്‍ ചികിത്സ തേടിയിരുന്നെന്നും യുവതിയുടെ ആരോഗ്യനില കൃത്യമായി വിലയിരുത്താതെ യുവതിയെ തിരിച്ചയച്ചെന്നുമാണ് വിഷയത്തില്‍ അടിമാലി താലൂക്കാശുപത്രിക്കെതിരേയുള്ള ആക്ഷേപം. ഈ സംഭവത്തിലാണ് ഇപ്പോള്‍ ആരോഗ്യവകുപ്പ് അന്വേഷണം ആരംഭിച്ചത്. ജില്ലാ മെഡിക്കല്‍ ഓഫീസറുടെ നിര്‍ദേശപ്രകാരം നിയോഗിക്കപ്പെട്ട മെഡിക്കല്‍ സംഘം ആശുപത്രിയില്‍നിന്നു വിവരങ്ങള്‍ ശേഖരിച്ചു.യുവതിയില്‍നിന്നും ബന്ധുക്കളില്‍നിന്നുമടക്കം ജില്ലാ മെഡിക്കല്‍ ഓഫീസറുടെ നിര്‍ദേശപ്രകാരം മെഡിക്കല്‍ സംഘം വിവരങ്ങള്‍ ശേഖരിച്ചിട്ടുണ്ട്.

ഹോട്ടൽ ഉടമകളെ വിളിച്ച് പണം ആവശ്യപ്പെടുന്നതായി പരാതി

തൊടുപുഴ: ഹോട്ടലുകളിലും റസ്റ്ററന്‍റുകളിലും ഫോണിൽ വിളിച്ച് ഫുഡ് സേഫ്റ്റി കമ്മീഷണറാണെന്നു തെറ്റിധരിപ്പിച്ച് പണം ആവശ്യപ്പെടുന്ന സംഭവം പതിവാകുന്നു. ഇതേത്തുടർന്നു കേരള ഹോട്ടൽ ആന്‍ഡ് റസ്റ്ററന്‍റ് അസോസിയേഷൻ ഭാരവാഹികൾ തൊടുപുഴ ഡിവൈഎസ്പിക്ക് പരാതി നൽകി. താങ്കളുടെ ഹോട്ടലിൽനിന്നു ഭക്ഷണം കഴിച്ച ശേഷം ആരോഗ്യപ്രശ്നങ്ങൾ ഉണ്ടായെന്നും പഴകിയ ഭക്ഷണമാണ് നൽകിയതെന്നും പാഴ്സൽ വാങ്ങിയതിൽ കന്പിക്കഷണം ലഭിച്ചിരുന്നുവെന്നും ഇതിന് കുറഞ്ഞത് 50,000 രൂപ പിഴ അടയ്ക്കണമെന്നും ഒത്തുതീർപ്പ് വ്യവസ്ഥയിൽ 10,000 ഗൂഗിൾ പേ ചെയ്താൽ നടപടികൾ ഒഴിവാക്കാമെന്നുമാണ് വാഗ്ദാനം. ഇതിനു പുറമേ ചികിൽസയ്ക്കു പണം ആവശ്യപ്പെടുന്നതായും പരാതിയിൽ പറയുന്നു. കെഎച്ച്ആർഎ ജില്ലാ സെക്രട്ടറി പി.കെ. മോഹനൻ, തൊടുപുഴ യൂണിറ്റ് പ്രസിഡന്‍റ് ജയൻ ജോസഫ്, സെക്രട്ടറി പ്രതീഷ് കുര്യാസ്, വി. പ്രവീണ്‍, എ.ആർ. ഗിരീഷ എന്നിവർ ചേർന്നാണ് പരാതി നൽകിയത്.

ആരോഗ്യമന്ത്രിയുടെ രാജി ആവശ്യപ്പെട്ട് യൂത്ത് ലീഗ് വഴിതടഞ്ഞു

തൊടുപുഴ: മന്ത്രി വീണാ ജോർജ് രാജിവയ്ക്കണമെന്നാവശ്യപ്പെട്ട് യൂത്ത് ലീഗ് തൊടുപുഴ മുനിസിപ്പൽ കമ്മിറ്റിയുടെ നേതൃത്വത്തിൽ റോഡ് ഉപരോധിച്ചു. പ്രവർത്തകരെ പോലീസ് പിന്നീട് അറസ്റ്റ് ചെയ്തു നീക്കി. എം.എ. സബീർ അധ്യക്ഷത വഹിച്ചു. യൂത്ത് ലീഗ് ജില്ലാ പ്രസിഡന്‍റ് പി.എച്ച്. സുധീർ മുഖ്യ പ്രഭാഷണം നടത്തി. ഷാഹുൽ കപ്രാട്ടിൽ, പി.എം. നിസാമുദ്ദീൻ, ഇ.എ.എം. അമീൻ, ടി.എസ്. ഷംസുദ്ദീൻ, ഇബ്രാഹിം കപ്രാട്ടിൽ, എം.എം. ഷുക്കൂർ, പി.കെ. മൂസ, പി.എൻ. സിയാദ്, എ.എം. നജീബ് എന്നിവർ പ്രസംഗിച്ചു.

പ്രതിഷേധ പ്രകടനം നടത്തി

ചെറുതോണി: കോട്ടയം മെഡിക്കൽ കോളജ് ആശുപത്രിയിൽ കെട്ടിടം തകർന്ന് വീട്ടമ്മ മരിച്ച സംഭവത്തിൽ ആരോഗ്യമന്ത്രി വീണാ ജോർജ് രാജിവക്കണമെന്ന് ആവശ്യപ്പെട്ട് കോണ്‍ഗ്രസ് കഞ്ഞിക്കുഴി മണ്ഡലം കമ്മിറ്റിയുടെ നേതൃത്വത്തിൽ ചേലച്ചുവട്ടിൽ പ്രതിഷേധ പ്രകടനം നടത്തി. പ്രതിഷേധ യോഗം ഡിസിസി സെക്രട്ടറി പി.കെ. മോഹൻദാസ് ഉദ്ഘാടനം ചെയ്തു. മണ്ഡലം പ്രസിഡന്‍റ് ജോബി ചാലിൽ അധ്യക്ഷത വഹിച്ചു. ഐഎൻടിയുസി മണ്ഡലം പ്രസിഡന്‍റ് അപ്പുക്കുട്ടൻ മാടവന, കർഷക കോണ്‍ഗ്രസ് നിയോജക മണ്ഡലം ജനറൽ സെക്രട്ടറി ഷിജു നരിതൂക്കിൽ, ബ്ലോക്ക് കോണ്‍ഗ്രസ് സെക്രട്ടറി മൈക്കിൾ പൊരിമറ്റം, നാരായണൻ കുന്നിനി, യൂത്ത് കോണ്‍ഗ്രസ് നിയോജക മണ്ഡലം സെക്രട്ടറി ഐസൻ ജിത്ത്, ടോമി നെല്ലിപ്പിള്ളി, ബിനു ഗോപി, ജിന്നി വടക്കേതലക്കൽ, ഫിലിപ്പ് കൊച്ചികുഴി, ശിവൻ കോഴിക്കമാലി തുടങ്ങിയവർ പ്രസംഗിച്ചു.

മന്ത്രി വീണാ ജോർജിന്‍റെ കോലം കത്തിച്ചു

കരിങ്കുന്നം: കോട്ടയം മെഡിക്കൽ കോളജിൽ കെട്ടിടം ഇടിഞ്ഞു വീണ് വീട്ടമ്മ മരിച്ച സംഭവത്തിൽ പ്രതിഷേധിച്ച് കേരള കോണ്‍ഗ്രസ് കരിങ്കുന്നം മണ്ഡലം കമ്മിറ്റിയുടെ നേതൃത്വത്തിൽ മന്ത്രി വീണ ജോർജിന്‍റെ കോലം കത്തിച്ചു. കരിങ്കുന്നം ടൗണിൽ പ്രതിഷേധ പ്രകടനം നടത്തിയ ശേഷമാണ് കോലം കത്തിച്ചത്. സംസ്ഥാന ജനറൽ സെക്രട്ടറി എം.മോനിച്ചൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ഇൻചാർജ് ജോസ് കാവാലം അധ്യക്ഷത വഹിച്ചു. കർഷക യൂണിയൻ സംസ്ഥാന ജനറൽ സെക്രട്ടറി ബേബിച്ചൻ കൊച്ചു കരൂർ, മണ്ഡലം ജനറൽ സെക്രട്ടറി സുനിൽ തോമസ്, ബേബി പൊടിമറ്റം, ബേബി വരാപ്പുഴ , ട്രീസ കാവാലം, ഷാന്‍റി പട്ടേരു പറന്പിൽ എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]