ADVERTISEMENT

ADVERTISEMENT

ലൈൻമാൻ ഷോക്കേറ്റു മരിച്ചു

ഏലപ്പാറ: വൈദ്യുതി ലൈനിൽ വീണ മരങ്ങൾ മുറിച്ചു മാറ്റുന്നതിനിടെ കെഎസ്ഇബി ലൈൻമാൻ ഷോക്കേറ്റു മരിച്ചു. കുടയത്തൂർ സംഗമം സ്വദേശി കോണിക്കൽ അനസ് (അന്തുക്കാ അനസ് -45) ആണ് മരിച്ചത്.

ഏലപ്പാറ കോഴിക്കാനത്ത് ഇന്നലെ രാത്രി ഏഴരയോടെയാണ് സംഭവം. പോത്തുപാറ കെസ്ഇബിയിലെ ലൈൻമാനായ അനസ് കോഴിക്കാനം കിഴക്കേ പുതുവൽ ഭാഗത്ത് വൈദ്യുതി ലൈനിലേക്ക് മറിഞ്ഞുവീണ മരത്തിന്‍റെ ശിഖരങ്ങൾ മുറിച്ചു മാറ്റുന്നതിനിടെ തോട്ടി വൈദ്യുതി ലൈനിൽ മുട്ടി ഷോക്കേൽക്കുകയായിരുന്നു. മൃതദേഹം പീരുമേട് താലൂക്ക് ആശുപത്രി മോർച്ചറിയിൽ. ഭാര്യ:ആമിന (മഞ്ജുഷ). മക്കൾ:ആദില ,അഫ്സൽ.

ADVERTISEMENT

ത്രിവേണി മനോഹരം: സുരക്ഷ ഇല്ലാതെ ജീവൻ പൊലിയുന്നു

മൂലമറ്റം: ത്രിവേണി സംഗമത്തിൽ കുളിക്കാനിറങ്ങുന്നവരും മീൻപിടിക്കാനിറങ്ങുന്നവരും അപകടത്തിൽപ്പെടുന്നത് പതിവാകുന്പോഴും സുരക്ഷാക്രമീകരണങ്ങൾ ഒരുക്കുന്ന കാര്യത്തിൽ അധികൃതർക്ക് നിസംഗത. ഒഴുക്കിൽ അകപ്പെട്ട് ഒട്ടേറെപ്പേരുടെ ജീവനാണ് ഇവിടെ പൊലിഞ്ഞത്. വെള്ളിയാഴ്ച ത്രിവേണി സംഗമത്തിൽ ഒഴുക്കിൽപ്പെട്ട് കാണാതായ നാച്ചാർ പുഴയോരത്ത് താമസിക്കുന്ന തുരുത്തേൽ രത്നാകരനെ ഫയർഫോഴ്സും നാട്ടുകാരും ചേർന്ന് രണ്ടു ദിവസം നടത്തിയ തെരച്ചിലിനിടയിലും കണ്ടെത്താനായിട്ടില്ല. കഴിഞ്ഞ മാസം 16ന് എകെജി സ്വദേശിയായ വിദ്യാർഥി ഇവിടെ ഒഴുക്കിൽപ്പെട്ട് മരിച്ചിരുന്നു. നടുപ്പറന്പിൽ അതുൽ ബൈജുവാണ് മരിച്ചത്. ഒപ്പമുണ്ടായിരുന്ന സുഹൃത്തിനെ നാട്ടുകാരാണ് രക്ഷപ്പെടുത്തിയത്. മൂലമറ്റം വൈദ്യുതി നിലയത്തിൽനിന്ന് ഉത്പാദനത്തിനുശേഷം പുറംതള്ളുന്ന വെള്ളമൊഴുകുന്ന കനാലും നാച്ചാറും വലിയാറും ചേരുന്നത് ത്രിവേണി സംഗമത്തിലാണ്. വൈദ്യുതി നിലയത്തിൽ പ്രവർത്തിക്കുന്ന ജനറേറ്ററുകളുടെ എണ്ണമനുസരിച്ച് കനാലിലെ ജലനിരപ്പിന്‍റെ ഒഴുക്ക് കൂടിയും കുറഞ്ഞുമിരിക്കും. അപ്രതീക്ഷിതമായുണ്ടാകുന്ന ജലപ്രവാഹവും അടിയൊഴുക്കും കനാലിലും ത്രിവേണി സംഗമത്തിനു സമീപവും ഇറങ്ങുന്നവരെ അപകടത്തിലാക്കും. പരിസരവാസികളും പുറമേ നിന്നെത്തുന്നവരും ഉൾപ്പെടെ ഇവിടെ പതിവായി അപകടത്തിൽപ്പെടുന്നുണ്ട്.ത്രിവേണിയുടെയും ഇവിടെയുള്ള തൂക്കുപാലത്തിന്‍റെയും മനോഹാരിത ആസ്വദിക്കാനായി ഒട്ടേറെപ്പേരാണ് ഇവിടെയെത്തുന്നത്. ശക്തമായ അടിയൊഴുക്കും തണുപ്പും ഏറെ ആഴവും ഇവിടെ ജലാശയത്തിന്‍റെ പ്രത്യേകതയാണ്. എന്നാൽ ഒരിടത്തും അപകട മുന്നറിയിപ്പ് ബോർഡ് സ്ഥാപിച്ചിട്ടില്ല. മൂലമറ്റം കനാലിൽ വീണുള്ള അപകടങ്ങൾ ഒഴിവാക്കാൻ പദ്ധതി തയാറാക്കുമെന്ന് കെഎസ്ഇബി നേരത്തേ പറഞ്ഞിരുന്നെങ്കിലും ഒന്നും നടപ്പായില്ല. പഞ്ചായത്ത് അധികൃതരും ഇക്കാര്യത്തിൽ ഒരു നടപടിയും സ്വീകരിച്ചിട്ടില്ല. അപകടങ്ങൾ കൂടിയതോടെ അലാറം അടക്കം സംവിധാനങ്ങൾ ഒരുക്കണമെന്നാവശ്യപ്പെട്ട് നാട്ടുകാർ കെഎസ്ഇബിയെ സമീപിച്ചിരുന്നു. എന്നാൽ സംസ്ഥാനത്തെ ആവശ്യമനുസരിച്ച് വൈദ്യുതി ഉത്പാദിപ്പിക്കുന്നതിനാൽ ജലനിരപ്പ് ഉയരുന്പോൾ മുന്നറിയിപ്പ് സംവിധാനങ്ങൾ പ്രായോഗികമല്ലെന്നായിരുന്നു കെഎസ്ഇബിയുടെ നിലപാട്. പകരം കനാലിൽ കൂടുതൽ പ്രകാശസംവിധാനം ഒരുക്കുമെന്നും ഇതോടൊപ്പം കനാലിന്‍റെ ഇരുകരകളിലും വടം സ്ഥാപിക്കാനാവശ്യമായ പൈപ്പുകൾ സ്ഥാപിക്കുമെന്നും പറഞ്ഞിരുന്നെങ്കിലും ഇതും പാഴ്‌വാക്കായി. വടം സ്ഥാപിച്ചാൽ ഒഴുക്കിൽപ്പെടുന്നവർക്ക് ഇതിൽപ്പിടിച്ച് കയറാമെന്നതായിരുന്നു കണക്കുകൂട്ടൽ. ഒഴുക്കിൽപ്പെട്ട് മരണങ്ങൾ വർധിച്ചതോടെ അടിയന്തരമായി ഇവിടെ മുന്നറിയിപ്പു സംവിധാനം ഒരുക്കണമെന്നാണ് നാട്ടുകാരുടെ ആവശ്യം. ഈ ആവശ്യമുന്നയിച്ച് പഞ്ചായത്ത് ടൂറിസം കൗണ്‍സിൽ ഭാരവാഹികളായ സണ്ണി കൂട്ടുങ്കൽ, ജോസ് ഇടക്കര, സന്തോഷ് രാജേന്ദു എന്നിവർ ജില്ലാ കളക്ടർക്ക് കഴിഞ്ഞ ദിവസം നിവേദനം നൽകിയിരുന്നു. ജലാശയത്തിൽ ജലനിരപ്പുയരുന്പോൾ മുന്നറിയിപ്പ് നൽകുന്ന സംവിധാനം സ്ഥാപിക്കണമെന്നാണ് നാട്ടുകാരുടെ പ്രധാന ആവശ്യം. കനാലിൽ കുളിക്കാനിറങ്ങുന്നവരും മറ്റും അപകടത്തിൽപ്പെടാതിരിക്കാൻ ഇതു സഹായകമാകും. ഇതിനു പുറമേ പഞ്ചായത്തിന്‍റെ നേതൃത്വത്തിൽ മുന്നറിയിപ്പു ബോർഡുകൾ, സുരക്ഷാവേലി എന്നിവ സ്ഥാപിക്കണമെന്ന ആവശ്യവും ശക്തമായിട്ടുണ്ട്.

മറയൂരിന്‍റെ കാട്ടുപാതയിൽ പൂത്തുവിരിഞ്ഞ് ഗ്ലോറി ലില്ലി

മറയൂർ: ജില്ലയിലെ മറയൂർ മേഖലയിലെ ചിന്നാറിൽനിന്ന് തായണ്ണൻകുടിയിലേക്കുള്ള കാട്ടുപാതയിൽ, സിംബാബ്‌വേയുടെ ദേശീയ പുഷ്പമായ ഗ്ലോറിയോസ സൂപ്പർബ പൂത്തുലഞ്ഞു. സാധാരണ ഗ്ലോറി ലില്ലി എന്നും തമിഴിൽ കാന്തൽപൂ എന്നും മലയാളത്തിൽ മേ ന്തോന്നി എന്നും ഈ വള്ളിച്ചെടി അറിയപ്പെടുന്നുണ്ട്. ഇതിന്‍റെ പൂക്കൾക്ക് 4.4 സെന്‍റീമീറ്റർ വലിപ്പമുണ്ട്, ചുവപ്പ്, മഞ്ഞ, ഓറഞ്ച് എന്നീ നിറങ്ങളിൽ കാണപ്പെടുന്ന പൂക്കൾ ആകർഷകമാണ്. പൂവിന്‍റെ ഇതളുകൾ നീളമേറിയതും വളഞ്ഞതുമാണ്, ഇത് ചെടിക്ക് കൂടുതൽ ഭംഗി നൽകുന്നു. ഈ ചെടി സാധാരണയായി 2900 അടി ഉയരത്തിൽ താഴെയുള്ള വനപ്രദേശങ്ങളിലും പുൽമേടുകളിലുമാണ് വളരുന്നത്. ഉയർന്ന മലനിരകളിൽ ഇവയുടെ വളർച്ച കുറവാണ്. ഔഷധഗുണമുള്ള ഇത് പരന്പരാഗത വൈദ്യത്തിനും വ്യാപകമായി ഉപയോഗിക്കപ്പെടുന്നുണ്ട്. ഇതിന്‍റെ വേര്, ഇല, വിത്ത് എന്നിവയെല്ലാം ഔഷധഗുണമുള്ളതാണ്. വാതം, വേദന, ചർമരോഗങ്ങൾ എന്നിവയ്ക്കുള്ള ചികിത്സയ്ക്കാണ് ഇത് ഉപയോഗിക്കുന്നത്. എന്നാൽ ഈ ചെടിയിൽ കോൾചിസിൻ എന്ന രാസവസ്തു അടങ്ങിയിരിക്കുന്നതിനാൽ ഔഷധനിർമാണത്തിൽ ശ്രദ്ധാപൂർവം മാത്രമേ ഉപയോഗിക്കാവൂ. മറയൂരിന്‍റെ പ്രകൃതിസൗന്ദര്യത്തിന് മാറ്റുകൂട്ടി മേഖലയിലെ പുൽമേടുകളിലും വനപാതകളിലും ഗ്ലോറി ഓഫ് ലില്ലി ഇതുവഴി സഞ്ചരിക്കുന്നവർക്ക് കാഴ്ചയുടെ വിരുന്നൊരുക്കുന്നു. ചിന്നാറിൽനിന്ന് തായണ്ണൻകുടിയിലേക്കുള്ള വഴിയിലാണ് ഇവ കൂടുതലായും പൂവിട്ടുനിൽക്കുന്നത്. ജൂലൈ, ഓഗസ്റ്റ് മാസങ്ങളിലാണ് കൂടുതലായും ഇവ പുഷ്പിക്കുന്നത്.

പാലത്തിന്‍റെ കൈവരികൾ തകർന്ന് അപകടഭീഷണി

മറയൂർ: നോർത്തേണ്‍ ഔട്ട്‌ലെറ്റ് റോഡിലെ പാലത്തിന്‍റെ കൈവരികൾ തകർന്നു വാഹനങ്ങൾക്കും കാൽനടയാത്രക്കാർക്കും ഒരുപോലെ ഭീഷണിയാകുന്നു. അന്തർസംസ്ഥാന പാതയായ നോർത്തേണ്‍ ഔട്ട്‌ലെറ്റ് റോഡിൽ മറയൂർ ടൗണ്‍ പരിസരത്താണ് അപകടസാധ്യത നിലനിൽക്കുന്നത്. അന്തർസംസ്ഥാന പാതയിൽ തിരക്കേറിയതോടെ അപകടത്തിന്‍റെ സാധ്യത വർധിച്ചിരിക്കുകയാണ്. വീതി കുറഞ്ഞ പാലത്തിലൂടെ നടക്കുന്നവർ വാഹനം വരുന്പോൾ കൈവരി ഇല്ലാത്തതിനാൽ തോട്ടിലേക്ക് വീഴാനുള്ള സാധ്യത ഏറെയാണ്. തകർന്ന കൈവരികൾമൂലം യാത്രക്കാർക്ക് പാലത്തിന്‍റെ വശങ്ങളിൽ പിടിക്കാനും കഴിയുന്നില്ല. കുട്ടികളും വയോജനങ്ങളും ഭീതിയോടെയാണ് പാലത്തിലൂടെ സഞ്ചരിക്കുന്നത്. പാലത്തിന് കൈവരി സ്ഥാപിച്ച് അപകടം ഒഴിവാക്കാൻ അടിയന്തര നടപടി സ്വീകരിക്കണമെന്നാണ് ജനങ്ങൾ ആവശ്യപ്പെടുന്നത്.

ദേശീയപാത: മുഖ്യമന്ത്രി ഇടപെടണമെന്ന് വ്യാപാരികൾ

ചെറുതോണി: കൊച്ചി- ധനുഷ്കോടി ദേശീയപാതയുടെ നവീകരണ പ്രവർത്തനങ്ങൾ തടസപ്പെടാതെ മുന്നോട്ടുപോകാൻ മുഖ്യമന്ത്രി ഇടപെടണമെന്ന് കേരള വ്യാപാരി വ്യവസായി ഏകോപന സമിതി ജില്ലാ പ്രസിഡന്‍റ് സണ്ണി പൈന്പിള്ളിൽ ആവശ്യപ്പെട്ടു. ബിജെപി സംസ്ഥാന പരിസ്ഥിതി സെൽ സെക്രട്ടറിഎം.എൻ. ജയചന്ദ്രൻ ഹൈക്കോടതിയിൽ സമർപ്പിച്ച ഹർജിയെത്തുടർന്നാണ് ഹൈക്കോടതി നിർമാണം നിർത്തിവയ്പിച്ചത്. 1932-ലെ രാജഭരണകാലത്തെ ഉത്തരവിന്‍റെയും 1996-ലെ സംസ്ഥാന സർക്കാരിന്‍റെ ഉത്തരവിന്‍റെയും അടിസ്ഥാനത്തിൽ കിരണ്‍ സിജു നൽകിയ ഹർജി പ്രകാരം റോഡിന്‍റെ മധ്യഭാഗത്തുനിന്ന് 50 അടി വീതം ഇരുവശത്തേക്കും റോഡ് പുറന്പോക്കാണെന്നും അത് പൊതുമരാമത്ത് വകുപ്പിന് അവകാശപ്പെട്ടതാണെന്നും റോഡിലെ യാതൊരുവിധ നിർമാണ പ്രവർത്തനങ്ങളും വനംവകുപ്പ് തടസപ്പെടുത്തരുതെന്നും ഹൈക്കോടതി ഡിവിഷൻ ബഞ്ച് കഴിഞ്ഞ വർഷം ഉത്തരവിട്ടിരുന്നു. ഡിവിഷൻ ബഞ്ചിന്‍റെ ഉത്തരവിനെതിരേ എം.എൻ. ജയചന്ദ്രൻ റിവ്യൂ പെറ്റീഷൻ നൽകിയെങ്കിലും അതും തള്ളിയിരുന്നു. റോഡ് നിർമാണത്തിനെതിരേ വനംവകുപ്പ് അപ്പീൽ പോകാതിരിക്കാൻ ജില്ലയിലെ എൽഡിഎഫ് നേതൃത്വവും വ്യാപാരി വ്യവസായി ഏകോപനസമിതിയും മുഖ്യമന്ത്രിയെയും വനം വകുപ്പ് മന്ത്രിയെയും റവന്യു വകുപ്പ് മന്ത്രിയെയും കണ്ടിരുന്നു. ഇതിന്‍റെ അടിസ്ഥാനത്തിൽ ചീഫ് സെക്രട്ടറിയുമായി ചർച്ച നടത്തുകയും സർക്കാർ നിലവിലുള്ള ഹൈക്കോടതി വിധിക്കെതിരേ അപ്പീൽ പോകേണ്ടതില്ലെന്നായിരുന്നു തീരുമാനം. എന്നാൽ എം.എൻ. ജയചന്ദ്രൻ വീണ്ടും ഹർജി നൽകുകയും ഹൈക്കോടതിയിൽ നേര്യമംഗലം മുതൽ വാളറവരെ വനമേഖലയാണെന്നു വനംവകുപ്പ് അഡീഷണൽ സെക്രട്ടറി സത്യവാങ്മൂലം സമർപ്പിക്കുകയുമായിരുന്നു. സർക്കാരിന്‍റെ താത്പര്യത്തിന് വിരുദ്ധമായി തെറ്റായ സത്യവാങ്മൂലം വനംവകുപ്പ് സെക്രട്ടറി കൊടുത്തിട്ടുണ്ടെങ്കിൽ അത് തിരുത്തി നൽകുന്നതിന് അടിയന്തരമായി മുഖ്യമന്ത്രി ഇടപെടണമെന്നും ജില്ലാ പ്രസിഡന്‍റ് ആവശ്യപ്പെട്ടു.

യൂത്ത് കോണ്‍ഗ്രസ് ശയനപ്രദക്ഷിണം നടത്തി

അടിമാലി: ദേശീയപാത നിർമാണം നിർത്തിവച്ച ഹൈക്കോടതി വിധിയിൽ പ്രതിഷേധിച്ച് യൂത്ത് കോണ്‍ഗ്രസ് പ്രവർത്തകർ ദേശീയപാതയിൽ ശയനപ്രദക്ഷിണം നടത്തി. യൂത്ത് കോണ്‍ഗ്രസ് ദേവികുളം നിയോജക മണ്ഡലം കമ്മിറ്റിയുടെ നേതൃത്വത്തിൽ വാളറയിലായിരുന്നു പ്രതിഷേധം. ദേശീയപാതയുടെ വികസന പ്രവർത്തനങ്ങൾക്ക് സർക്കാർ നിലപാടുകൾ തടസമാകുന്നുവെന്നും ജില്ലയിലെ ജനങ്ങളെ വനംവകുപ്പ് ദ്രോഹിക്കുകയാണന്നും യൂത്ത്കോണ്‍ഗ്രസ് ആരോപിച്ചു. മുൻ ഡിസിസി പ്രസിഡന്‍റ് റോയി കെ. പൗലോസ് പ്രതിഷേധ സമരം ഉദ്ഘാടനം ചെയ്തു. യൂത്ത് കോണ്‍ഗ്രസ് ദേവികുളം നിയോജക മണ്ഡലം പ്രസിഡന്‍റ് അനിൽ കനകൻ അധ്യക്ഷത വഹിച്ചു. മുൻ എംഎൽഎ എ.കെ. മണി, ഡി. കുമാർ, ജോർജ് തോമസ് തുടങ്ങിയവർ പ്രസംഗിച്ചു.

ലഹരിയെ ചെറുക്കാൻ പുതുതലമുറ മുന്നോട്ടുവരണം: മാർ നെല്ലിക്കുന്നേൽ

മുരിക്കാശേരി: ലഹരിവസ്തുക്കളുടെ വ്യാപനം നടക്കുന്ന കാലഘട്ടത്തിൽ അതിനെ അതിജീവിക്കാൻ പുതുതലമുറ മുന്നോട്ടുവരണമെന്ന് ഇടുക്കി രൂപതാധ്യക്ഷൻ മാർ ജോണ്‍ നെല്ലിക്കുന്നേൽ. ദൈവവിശ്വാസത്തിന്‍റെയും സദ്പ്രവർത്തികളുടെയും ലഹരി ജീവിതത്തോടു ചേർത്തുപിടിക്കുന്നവരെയാണ് നാം മാതൃകയാക്കേണ്ടത്. രൂപത വിശ്വാസ പരിശീലനത്തിന്‍റെയും ചെറുപുഷ്പ മിഷൻ ലീഗ്, തിരുബാലസഖ്യം എന്നീ സംഘടനകളുടെയും സംയുക്ത വാർഷികം മുരിക്കാശേരി പാവനാത്മ കോളജിൽ ഉദ്ഘാടനം ചെയ്യുകയായിരുന്നു ബിഷപ്. ക്രൈസ്തവരെന്ന നിലയിൽ ക്രിസ്തീയ വിശ്വാസവും ധാർമികതയും ശീലിക്കുന്നവരും അതിനു സാക്ഷ്യം വഹിക്കുന്നവരുമായി നാം മാറണമെന്നും അദ്ദേഹം പറഞ്ഞു. രൂപതാ വികാരി ജനറാൾ മോണ്‍. ജോസ് കരിവേലിക്കൽ അധ്യക്ഷത വഹിച്ചു. ചെറുപുഷ്പ മിഷൻലീഗിന്‍റെ മാഗസിൻ പ്രകാശനം മോണ്‍. ഏബ്രഹാം പുറയാറ്റ് നിർവഹിച്ചു. പ്രവർത്തന മാർഗരേഖ മോണ്‍. ജോസ് നരിതൂക്കിൽ പ്രകാശനം ചെയ്തു. വിശ്വാസ പരിശീലനത്തിൽ 25 വർഷം പൂർത്തീകരിച്ച മതാധ്യാപകരെ സമ്മേളനത്തിൽ ആദരിച്ചു. കഴിഞ്ഞ പ്രവർത്തനവർഷത്തിൽ മികവു പുലർത്തിയ സണ്‍ഡേ സ്കൂളുകൾക്കും സംഘടനാ യൂണിറ്റുകൾക്കും സമ്മാനങ്ങൾ വിതരണം ചെയ്തു. ഇടുക്കി രൂപത ക്രിസ്തുജ്യോതി വിശ്വാസ പരിശീലനകേന്ദ്രം ഡയറക്ടർ ഫാ. ഫിലിപ്പ് ഐക്കര, ഫാ. ജിതിൻ പാറയ്ക്കൽ, ഫാ. ജൂബിൻ കായംകാട്ടിൽ, ഫാ. സെബാസ്റ്റ്യൻ വടക്കേൽ, ചെറുപുഷ്പ മിഷൻ ലീഗ് രൂപതാ പ്രസിഡന്‍റ് സെസിൽ ജോസ്, മാർട്ടിൻ മാത്യു, ജയിംസ് തോമസ്, സിസ്റ്റർ സ്റ്റാർലറ്റ് സിഎംസി തുടങ്ങിയവർ പ്രസംഗിച്ചു.

ഗ്രീൻവാലി യംഗ് മൈൻഡ്സ് ഭാരവാഹികളുടെ സ്ഥാനാരോഹണം

തൊടുപുഴ: മുട്ടം ഗ്രീൻവാലി യംഗ് മൈൻഡ്സ് ക്ലബ്ബ് ഭാരവാഹികളുടെ സ്ഥാനാരോഹണവും സർവീസ് പ്രോജക്ടുകളുടെ ഉദ്ഘാടനവും നാളെ വൈകുന്നേരം ആറിന് മുട്ടം റൈഫിൾ ക്ലബ്ബിൽ നടക്കുമെന്നു ഭാരവാഹികൾ പത്രസമ്മേളനത്തിൽ അറിയിച്ചു. ജെവിൻ ജോസ്-പ്രസിഡന്‍റ്, റെജി വർഗീസ്- സെക്രട്ടറി, ബിജു ജോസഫ്-ട്രഷറർ എന്നിവരാണ് ഭാരവാഹികൾ. മന്ത്രി റോഷി അഗസ്റ്റിൻ സമ്മേളനം ഉദ്ഘാടനം ചെയ്യും. യംഗ് മൈൻഡ്സ് ഇന്‍റർനാഷണൽ ഡിസ്ട്രിക്ട് ഗവർണർ കെ.പി. പോൾ സ്ഥാനാരോഹണം നിർവഹിക്കും. റീജണൽ ചെയർമാൻ ജോസ് അൽഫോൻസ് മുഖ്യപ്രഭാഷണം നടത്തും. ഐ.സി. രാജു പ്രോജക്ടിന്‍റെയും പഞ്ചായത്ത് പ്രസിഡന്‍റ് മേഴ്സി ദേവസ്യ ചാരിറ്റിപ്രവർത്തനങ്ങളുടെയും ഉദ്ഘാടനം നിർവഹിക്കും. പ്രകൃതിസംരക്ഷണത്തെക്കുറിച്ചുള്ള ബോധവത്കരണത്തിന്‍റെ ഭാഗമായി തൈ നടീൽ, കാർഷിക പ്രവർത്തനങ്ങൾ, പ്ലാസ്റ്റിക് വേസ്റ്റ് കളക്‌ഷൻ, പുനരുപയോഗ പരിശീലനം എന്നിവ നടത്തും. പത്രസമ്മേളനത്തിൽ മുഖ്യരക്ഷാധികാരി അഡ്വ. ജോണ്‍ വിച്ചാട്ട്, ഷിബു വെള്ളിമൂഴയിൽ, ജെബിൻ കോലത്ത്, റെജി കൂനംമാക്കൽ, ജെറി കൊട്ടാരച്ചിറ, സാജൻ പുന്നത്തറ എന്നിവർ പങ്കെടുത്തു.

വിളംബര സന്ദേശം ഉദ്ഘാടനം ചെയ്തു

തൊടുപുഴ: വിളംബര സന്ദേശം ഉദ്ഘാടനം ചെയ്തുസ്റ്റ് 19, 20, 21 തീയതികളിൽ തിരുവനന്തപുരത്ത് നടക്കുന്ന സീനിയർ ജേർണലിസ്റ്റ് ഫോറം ദേശീയ സമ്മേളനത്തിന്‍റെ പ്രചാരണാർഥം ഇടുക്കി പ്രസ് ക്ലബ്ബിനു മുന്നിൽ നടത്തിയ വിളംബര സന്ദേശം തൊടുപുഴ നഗരസഭാ ചെയർമാൻ കെ. ദീപക് ഉദ്ഘാടനം ചെയ്തു. മുതിർന്ന മാധ്യമപ്രവർത്തകർ തങ്ങളുടെ പ്രവർത്തനകാലത്ത് സമൂഹത്തിൽ നടത്തിയ ഇടപെടലുകൾ എന്നും ഓർമിക്കപ്പെടുമെന്നും സമുഹത്തിൽ വേദനിക്കുന്നവന്‍റെ നാവായി മാധ്യമങ്ങൾ നിലനിൽക്കണമെന്നും അദ്ദേഹം പറഞ്ഞു. സീനിയർ ജേർണലിസ്റ്റ് ഫോറം ജില്ലാ കമ്മിറ്റിയുടെ ആഭിമുഖ്യത്തിലായിരുന്നു വിളംബര സമ്മേളനം. ജോയിന്‍റ് സെക്രട്ടറി എം.എൻ. സുരേഷിന്‍റെ അധ്യക്ഷതയിൽ ചേർന്ന യോഗത്തിൽ മുതിർന്ന മാധ്യമ പ്രവർത്തകരായ ജയിംസ് പന്തയ്ക്കൽ, സംസ്ഥാനകമ്മിറ്റിയംഗം എം.കെ. പുരുഷോത്തമൻ, പ്രസ് ക്ലബ്ബ് പ്രസിഡന്‍റ് വിനോദ് കണ്ണോളി, വിൽസണ്‍ കളരിക്കൽ, അഫ്സൽ ഇബ്രാഹിം, അഖിൽ സഹായി, കെ.ജി. പ്രദീപ് കുമാർ, ഒ.എൻ. രാജഗോപാൽ തുടങ്ങിയവർ പ്രസംഗിച്ചു.

സാഹസിക ടൂറിസം: പരിശീലനം സംഘടിപ്പിക്കും

ഇടുക്കി: ജില്ലയിലെ ടൂറിസം വികസനത്തിന്‍റെ ഭാഗമായി ജില്ലാ ഭരണകൂടവും ഡിടിപിസിയും ചേർന്ന് ജില്ലയിലെ വിനോദസഞ്ചാര മേഖലയുമായി ബന്ധപ്പെട്ട് അസംഘടിത മേഖലയിൽ പ്രവർത്തിക്കുന്നവർക്കായി പരിശീലനം സംഘടിപ്പിക്കും. ഇതിന്‍റെ ഭാഗമായി സാഹസിക വിനോദമേഖലയിൽ പ്രവർത്തിക്കുന്നവർക്കും ഈ മേഖലയിലേക്ക് കടന്നു വരാൻ ആഗ്രഹിക്കുന്നവർക്കുമായി 16ന് കളക്ടറേറ്റ് കോണ്‍ഫറൻസ് ഹാളിൽ പരിശീലന പരിപാടി നടത്തും. രാവിലെ 10 മുതൽ ഒന്നുവരെ നടക്കുന്ന പരിശീലനം കേരള അഡ്വഞ്ചർ ടൂറിസം പ്രൊമോഷൻ സൊസൈറ്റി മുഖേനയാണ് സംഘടിപ്പിക്കുന്നത്. പങ്കെടുക്കുന്നവർ മുൻകൂട്ടി രജിസ്റ്റർ ചെയ്യണമെന്ന് ഡിടിപിസി സെക്രട്ടറി അറിയിച്ചു. ഫോണ്‍: 0486-2232248.

ഉദ്യോഗസ്ഥരെ നിലയ്ക്കു നിർത്തണം: കത്തോലിക്ക കോണ്‍ഗ്രസ്

കോതമംഗലം: മലയോര കർഷകരുടെയും സാധാരണക്കാരുടെയും ജീവിതം ദുസഹമാക്കുന്ന രീതിയിൽ മനുഷ്യത്വരഹിതമായി പെരുമാറുന്ന സർക്കാർ ഉദ്യോഗസ്ഥരെ നിലയ്ക്ക് നിർത്താനുള്ള ആർജവം സർക്കാർ കാണിക്കണമെന്ന് കത്തോലിക്ക കോണ്‍ഗ്രസ് കോതമംഗലം രൂപതാ കമ്മിറ്റി ആവശ്യപ്പെട്ടു. കർഷകരെയും പാർശ്വവത്കരിക്കപ്പെട്ടവരെയും സാധാരണക്കാരെയും ദ്രോഹിക്കുന്ന നിലപാടുകൾ സ്വീകരിക്കുന്നത് പല ഉദ്യോഗസ്ഥരും ഹരമായി കാണുകയാണ്. ദേശീയപാതയുടെ നിർമാണവുമായി ബന്ധപ്പെട്ട് നേര്യമംഗലം മുതൽ വാളറവരെയുള്ള നിർമാണ പ്രവർത്തനങ്ങൾ നിർത്തിവയ്ക്കാൻ ഹൈക്കോടതി ഉത്തരവിട്ട സാഹചര്യത്തെക്കുറിച്ച് വിശദമായ അന്വേഷണം വേണം. ഭരണനേതൃത്വവും സർക്കാരും ബന്ധപ്പെട്ടവരും അറിയാതെയാണോ സർക്കാർ ഉദ്യോഗസ്ഥരും അഡീഷണൽ ചീഫ് സെക്രട്ടറിയും നിലപാട് എടുക്കുന്നതും സത്യവാങ്മൂലം നൽകുന്നതും എന്നറിയാൻ ജനങ്ങൾക്ക് താത് പര്യമുണ്ട്. ജനപ്രതിനിധികളും സർക്കാരും ജനദ്രോഹപരമായ സമീപനങ്ങൾ ഉദ്യോഗസ്ഥർ സ്വീകരിക്കുന്പോൾ നിസംഗരായി നിൽക്കുന്നത് അംഗീകരിക്കാനാവില്ല. സർക്കാരിന്‍റെ മൗനാനുവാദത്തോടെയാണോ ഉദ്യോഗസ്ഥർ ഇത്തരം നെറികേടുകൾ കാണിക്കുന്നതെന്ന് സംശയിക്കേണ്ടിയിരിക്കുന്നു. വനംവകുപ്പ് അധികൃതരുടെയും കപട പരിസ്ഥിതിവാദികളുടെയും ഗൂഢ നീക്കവും രാഷ്‌ട്രീയ നേതൃത്വങ്ങളുടെ നിസംഗതയുമാണ് ഉദ്യോഗസ്ഥർ തന്നിഷ്ടപ്രകാരം പ്രവർത്തിക്കാൻ സാഹചര്യം ഒരുക്കുന്നത്. ദേശീയപാതയുടെ ഇരുവശവും നൂറടി വീതിയിൽ വനംവകുപ്പിന് അധികാരമില്ലെന്നും ഇത് റവന്യു ഭൂമിയാണെന്നുമുള്ള മുൻ കോടതി ഉത്തരവ് മറച്ചുവച്ചുകൊണ്ടാണ് അപൂർണമായ സത്യവാങ്മൂലം ഉദ്യോഗസ്ഥർ സമർപ്പിച്ചിരിക്കുന്നത്. ഇതേത്തുടർന്നാണ് കോടതിവിധി എതിരായത്. ജനപക്ഷത്തുനിന്നുള്ള മനുഷ്യത്വപരമായ സമീപനം ഉദ്യോഗസ്ഥർ സ്വീകരിക്കാതെ വരുന്പോൾ അവരെ തിരുത്താനും നിലയ്ക്കുനിർത്താനും ഭരണനേതൃത്വം തയാറാകണം. കക്ഷിരാഷ്‌ട്രീയ വ്യത്യാസമില്ലാതെ എല്ലാവരും നാടിന്‍റെ പൊതുവികസനത്തിനുതകുന്ന ദേശീയപാതയുടെ നിർമാണം ഉടൻ പുനരാരംഭിക്കാനുള്ള നടപടികൾ സ്വീകരിക്കണമെന്നും കത്തോലിക്ക കോണ്‍ഗ്രസ് ആവശ്യപ്പെട്ടു. യോഗത്തിൽ രൂപതാ പ്രസിഡന്‍റ് സണ്ണി കടൂത്താഴെ അധ്യക്ഷത വഹിച്ചു. ഡയറക്ടർ റവ. ഡോ. മാനുവൽ പിച്ചളക്കാട്ട് ഉദ്ഘാടനം ചെയ്തു.

പീച്ചാട് അവശനിലയിൽ കണ്ടെത്തിയ കാട്ടാന ചെരിഞ്ഞു

അടിമാലി: പീച്ചാട് പ്ലാമല ജനവാസമേഖലയോടു ചേര്‍ന്ന് അവശനിലയില്‍ കണ്ടെത്തിയ കാട്ടാന ചെരിഞ്ഞു. പ്ലാമല റെസ്റ്റ്പാറയ്ക്കു സമീപമാണ് 40 വയസിലധികം പ്രായമുള്ള പിടിയാനയെ വ്യാഴാഴ്ച അവശനിലയില്‍ കണ്ടെത്തിയത്. തുടർന്ന് വനംവകുപ്പ് ഉദ്യോഗസ്ഥർ എത്തി പ്രാഥമിക ചികിത്സ നൽകിയെങ്കിലും ഇന്നലെ വൈകുന്നേരത്തോടെ ആന ചെരിഞ്ഞു. ആനയ്ക്ക് കാഴ്ചക്കുറവും ചെവി കേള്‍ക്കുവാനും കഴിയില്ലായിരുന്നു. കാട്ടാനയ്ക്ക് ഭക്ഷണം കഴിക്കാത്തതിനാൽ എഴുന്നേൽക്കാൻ സാധിക്കാതെ അവശനിലയിലായിരുന്നു. വനംവകുപ്പ് ഉദ്യോഗസ്ഥർ തുടർനടപടികൾ സ്വീകരിച്ചു.

രത്നാകരനായുള്ള തെരച്ചിൽ വിഫലം

മൂലമറ്റം: ത്രിവേണി സംഗമത്തിൽ ഒഴുക്കിൽപ്പെട്ട് കാണാതായ തുരുത്തേൽ രത്നാകരനു (65) വേണ്ടിയുള്ള രണ്ടാം ദിവസത്തെ തെരച്ചിലും വിഫലം. ഇന്നലെ തൊടുപുഴയിൽനിന്നുള്ള സ്കുബ ടീമും മൂലമറ്റം ഫയർഫോഴ്സും നാട്ടുകാരും പോലീസും രാവിലെ മുതൽ വ്യാപക തെരച്ചിൽ നടത്തിയെങ്കിലും കണ്ടെത്താനായില്ല. പവർ ഹൗസിൽനിന്ന് വരുന്ന വെള്ളത്തിന്‍റെ അളവിൽ കുറവുണ്ടായിരുന്നെങ്കിലും രാവിലെ ശക്തമായ മഴ പെയ്തതിനാൽ നാച്ചാറിലും വലിയാറിലും ജലനിരപ്പുയർന്നത് തെരച്ചിലിനു തടസമായി. കൽപ്പണിക്കാരനായ രത്നാകരൻ വെള്ളിയാഴ്ച വൈകുന്നേരം ചൂണ്ടയിട്ട് മീൻപിടിക്കാൻ പോയപ്പോഴാണ് അപകടത്തിൽപ്പെട്ടത്. പവർഹൗസിലെ ആറു ജനറേറ്ററുകളും പ്രവർത്തിപ്പിച്ചതോടെ ത്രിവേണി സംഗമത്തിൽ ശക്തമായ ജലപ്രവാഹമായിരുന്നു ഉണ്ടായിരുന്നത്. വൈകുന്നേരം ആറോടെ നിർത്തിവച്ച തെരച്ചിൽ ഇന്നു രാവിലെ പുനരാരംഭിക്കും. ഓമനയാണ് രത്നാകരന്‍റെ ഭാര്യ.

കാറും ലോറിയും കൂട്ടിയിടിച്ച് 4 പേർക്കു പരിക്ക്

കുമളി: കാറും ലോറിയും കൂട്ടിയിടിച്ച് നാലുപേർക്കു പരിക്ക്. വെള്ളിയാഴ്ച ഉച്ചയോടെയാണ് സംഭവം. തൃശൂരിൽനിന്നു കുമളിയിലേക്ക് കല്യാണത്തിനു വരികയായിരുന്ന ഒരു കുടുംബത്തിലെ നാലംഗസംഘം സഞ്ചരിച്ച കാറും കുമളിയിൽനിന്നു വണ്ടിപ്പെരിയാറിലേക്ക് പോകുകയായിരുന്ന ടിപ്പർ ലോറിയും തമ്മിലാണ് കൂട്ടിയിടിച്ചത്. കുമളി 66-ാം മൈൽ ആശുപത്രിക്കു സമീപമായിരുന്നു അപകടം. അപകടത്തിൽ കാർ യാത്രക്കാരായ തൃശൂർ സ്വദേശികളായ മുഹമ്മദ് അജ്മൽ, മുഹമ്മദ നിസാം, മുഹമ്മദ് ഹാരിസ്, അൻവർ ഷാഹിദ് എന്നിവർക്കാണ് പരിക്കേറ്റത്. ഇതിൽ സാരമായി പരിക്കേറ്റ മുഹമ്മദ് അജ്മലിനെ കുമളിയിലെ സ്വകാര്യ ആശുപത്രിയിൽ പ്രഥമ ചികിത്സ നൽകിയശേഷം വിദഗ്ധ ചികിത്സയ്ക്കായി കട്ടപ്പനയിലെ സ്വകാര്യ ആശുപത്രിയിലേക്ക് മാറ്റി. അപകടത്തെത്തുടർന്ന് കാറിന്‍റെ മുൻവശം പൂർണമായും തകർന്നു. അരമണിക്കൂറോളം ഗതാഗതവും തടസപ്പെട്ടു. കുമളി പോലീസ് സ്ഥലത്തെത്തി മേൽനടപടികൾ സ്വീകരിച്ചു.

ലഹരിവിരുദ്ധ സെമിനാറും പോസ്റ്റർ രചനാമത്സരവും നടത്തി

രാജാക്കാട്: രാജാക്കാട് വൈഎംസിഎയുടെ നേതൃത്വത്തിൽ അന്താരാഷ്‌ട്ര ലഹരിവിരുദ്ധ ദിനത്തിന്‍റെ ഭാഗമായി ലഹരിവിരുദ്ധ സെമിനാറും പോസ്റ്റർ രചനാമത്സരവും നടത്തി. പഴയവിടുതി ഗവ. യുപി സ്കൂളിലും പന്നിയാർകുട്ടി കൊള്ളിമല സെന്‍റ് മേരീസ് യുപി സ്കൂളിലുമാണ് കുട്ടികൾക്കായി സെമിനാറും പോസ്റ്റർ രചനാമത്സരവും നടത്തിയത്. പഴയവിടുതി സ്കൂളിൽ ഹെഡ്മാസ്റ്റർ എ.എസ്. ആസാദ് അധ്യക്ഷത വഹിച്ചു. വൈഎംസിഎ പ്രസിഡന്‍റും പഞ്ചായത്ത് സ്ഥിരംസമിതിയംഗവുമായ ബെന്നി പാലക്കാട്ട് ഉദ്ഘാടനം ചെയ്തു. സിവിൽ പോലീസ് ഓഫീസർ ആർ. ഷിബു ലഹരിവിരുദ്ധ സെമിനാർ നയിച്ചു. വൈഎംസിഎ സെക്രട്ടറി ബാബു കൊച്ചുപുര, എക്സിക്യൂട്ടിവ് കമ്മിറ്റിയംഗങ്ങളായ ജോഷി തോമസ്, സോഫി സാന്‍റി, അർച്ചന സുകുമാർ എന്നിവർ പ്രസംഗിച്ചു. പോസ്റ്റർ രചനാമത്സര വിജയികൾക്ക് സമ്മാനങ്ങളും മത്സരത്തിൽ പങ്കെടുത്തവർക്ക് പ്രോത്സാഹന സമ്മാനങ്ങളും നൽകി. പന്നിയാർകൂട്ടി സ്കൂളിൽ നടന്ന ചടങ്ങിൽ വൈഎംസിഎ സെക്രട്ടറി ബാബു ജോസഫ് അധ്യക്ഷത വഹിച്ചു. ഹെഡ്മിസ്ട്രസ് പി.ജെ. ലിജിമോൾ, സിസ്റ്റർ ആൽഫി ജോർജ്, ഡെയ്സണ്‍ മാത്യു, സോഫി സാന്‍റി എന്നിവർ പ്രസംഗിച്ചു.

മന്ത്രി ശശീന്ദ്രൻ രാജിവയ്ക്കണം: ആദിവാസി ഏകോപന സമിതി

തൊടുപുഴ: പീരുമേട് പ്ലാക്കത്തടം ഊരിലെ സീതയുടെ മരണത്തിലെ ദുരൂഹത നീക്കാത്തതിൽ വനംവകുപ്പിന്‍റെ രഹസ്യ അജണ്ടയുണ്ടോയെന്നുള്ള സംശയം ബലപ്പെടുന്നതായി ആദിവാസി ഏകോപന സമിതി സംസ്ഥാന ഭാരവാഹികൾ പത്രസമ്മേളനത്തിൽ ആരോപിച്ചു. സംഭവത്തിന്‍റെ നിജസ്ഥിതി മനസിലാക്കാതെ അഭിപ്രായം പറഞ്ഞ മന്ത്രി എ.കെ. ശശീന്ദ്രൻ രാജിവയ്ക്കണം. കോട്ടയം ഡിഎഫ്ഒയെ അന്വേഷണവിധേയമായി സസ്പെൻഡ് ചെയ്യണം. സംഭവം നടന്ന് ഒരു മാസം പിന്നിടുന്പോഴും സീതയുടെ മരണത്തിലെ ദുരൂഹത നീക്കാൻ പോലീസിനു കഴിഞ്ഞിട്ടില്ല. സംഭവം കൊലപാതകമാണോയെന്ന് അഭിപ്രായ പ്രകടനം നടത്തിയ, പോസ്റ്റ്മോർട്ടം ചെയ്ത ഡോക്ടർക്കെതിരേയും നടപടി വേണം. സംഭവത്തിനു ദൃക്സാക്ഷികളായിരുന്ന മക്കൾക്ക് തെറ്റായ വാർത്ത പ്രചരിച്ചതിനെത്തുടർന്നു സ്കൂളിൽപോലും പോകാനാകാത്ത സാഹചര്യമാണ്. കുട്ടികൾക്ക് കൗണ്‍സലിംഗ് നൽകാനും അധികൃതർ തയാറായിട്ടില്ല. ആനയുടെ ആക്രമണമാണോ കൊലപാതകമാണോ എന്ന് ഇതുവരെ വ്യക്തത വരുത്താൻ കഴിയാത്തതിനു പിന്നിൽ വനംവകുപ്പിന്‍റെ രഹസ്യ അജണ്ടയുണ്ട്. നിലന്പൂർ തെരഞ്ഞെടുപ്പ് കാലയളവിലാണ് സംഭവമുണ്ടാകുന്നത്. ഇതേത്തുടർന്നു കാട്ടാനയാക്രമണം പ്രചാരണത്തിൽ ഉയർത്താനുള്ള സാധ്യത മുന്നിൽക്കണ്ട് ഗൂഢാലോചന നടത്തിയെന്നാണ് സംശയം. ഫോറസ്റ്റ് ഡിവിഷൻ ഓഫീസർ സംഭവസ്ഥലം സന്ദർശിക്കാൻ തയാറാകാതെ പ്രദേശത്ത് കാട്ടാനയുടെ സാന്നിധ്യമില്ലെന്നും പോസ്റ്റ്മോർട്ടം റിപ്പോർട്ടും ഫോറൻസിക് റിപ്പോർട്ടും വരുന്നതിനു മുന്പേ ഇതൊരു കൊലപാതകമാണെന്നു പ്രഖ്യാപിച്ചതും ന്യായീകരിക്കാനാവില്ല. വന്യമൃഗ ആക്രമണം നേരിടുന്നതിനു ഗോത്രവർഗക്കാരെ ഉൾപ്പെടുത്തി ഗോത്രവർഗ പാരന്പര്യരീതികൾ അടിയന്തരമായി സ്വീകരിക്കണം. ഗോത്രവർഗ ആചാരത്തിന്‍റെ ഭാഗമായുള്ള കാട്ടുമൃഗ നായാട്ട് നടപ്പാക്കണമെന്നും നേതാക്കൾ ആവശ്യപ്പെട്ടു. സംസ്ഥാന ജനറൽ സെക്രട്ടറി പി.എ. മോഹനൻ, ട്രഷറർ എം.ഐ. ശശീന്ദ്രൻ, ഒ.എസ്. ശ്രീജിത്ത് എന്നിവർ പത്രസമ്മേളനത്തിൽ പങ്കെടുത്തു.

അലഞ്ഞുതിരിഞ്ഞു നടക്കുന്ന കാലികൾ അപകടം സൃഷ്ടിക്കുന്നു

വണ്ടിപ്പെരിയാർ: അലഞ്ഞുതിരിഞ്ഞു നടന്ന പശുവിനെ ഇടിച്ച ലോറി നിയന്ത്രണംവിട്ട് റോഡരികിൽ പാർക്ക് ചെയ്തിരുന്ന വാഹനത്തിലും സമീപത്തെ കടയിലേക്കും ഇടിച്ചുകയറി. വൻ അപകടം ഒഴിവായി. ഇന്നലെ പുലർച്ചെ ഒന്നോടെയാണ് അപകടം. പച്ചക്കറി ഇറക്കിയശേഷം തിരികെ തമിഴ്നാട്ടിലേക്ക് മടങ്ങുന്നതിനിടെയാണ് വണ്ടിപ്പെരിയാർ 62-ാം മൈലിനുസമീപം അപകടത്തിൽപ്പെട്ടത്. ശബ്ദംകേട്ട് ഉണർന്ന നാട്ടുകാർ പോലീസിൽ വിവരമറിയിക്കുകയായിരുന്നു. അപകടത്തിനിടെ പശു ലോറിയുടെ അടിയിൽപ്പെട്ടു. പോലീസ് എത്തിയാണ് പുറത്തെടുത്തത്. രാത്രിയെന്നോ പകലെന്നോ വ്യത്യാസമില്ലാതെ റോഡിൽ അലഞ്ഞുതിരിഞ്ഞു നടക്കുന്ന കന്നുകാലികൾ പലപ്പോഴും അപകടത്തിനു കാരണമാകുന്നതായും ഇക്കാര്യത്തിൽ അധികൃതർ അടിയന്തര നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.

സപ്തദിന ശില്പശാല ആരംഭിച്ചു

നെടുങ്കണ്ടം: ഗവ. വൊക്കേഷണൽ ഹയർ സെക്കൻഡറി സ്കൂളിൽ സ്റ്റെം ഫോർ ഗേൾസ് സപ്തദിന ശില്പശാല ആരംഭിച്ചു. സാമൂഹിക സാന്പത്തിക മേഖലകളിൽ പിന്നാക്കം നിൽക്കുന്ന പെണ്‍കുട്ടികളിൽ ശാസ്ത്രാഭിരുചി വളർത്തി ഇവരെ ശാസ്ത്രമേഖലയിൽ ഗവേഷണ പ്രതിബദ്ധതയോടെ ഉയർത്തുകയാണ് പദ്ധതിയുടെ ലക്ഷ്യം. കേരള യൂണിവേഴ്സിറ്റി, വിദ്യാഭ്യാസ വകുപ്പ്, ഐസിഎസ്എസ്ആർ എന്നിവയുടെ സംയുക്ത സംരംഭമാണ് സ്റ്റെം ഫോർ ഗേൾസ്. 40 പെണ്‍കുട്ടികൾ പങ്കെടുക്കുന്ന പദ്ധതിയിൽ ഇലക്‌ട്രോണിക്സ്, ആർട്ടിഫിഷൽ ഇന്‍റലിജൻസ്, റോബോട്ടിക് മേഖലകളിൽ ഏഴു ശനിയാഴ്ചകളിലായാണ് പരിശീലനം നൽകുന്നത്. ഇവരുടെ മെച്ചപ്പെട്ട പ്രവർത്തനങ്ങൾ കേരള യൂണിവേഴ്സിറ്റി സംഘടിപ്പിക്കുന്ന എക്സിബിഷനിൽ പ്രദർശിപ്പിക്കും. പങ്കെടുക്കുന്ന കുട്ടികൾക്ക് യൂണിവേഴ്സിറ്റി പങ്കാളിത്ത സർട്ടിഫിക്കറ്റുകളും വിതരണം ചെയ്യും. സ്കൂൾ ഓഡിറ്റോറിയത്തിൽ നടന്ന യോഗത്തിൽ ശില്പശാലയുടെ ഉദ്ഘാടനം നെടുങ്കണ്ടം പഞ്ചായത്ത് പ്രസിഡന്‍റ് പ്രിമി ലാലിച്ചൻ നിർവഹിച്ചു. പിടിഎ പ്രസിഡന്‍റ് കെ.കെ. സജു അധ്യക്ഷത വഹിച്ചു. കേരള യൂണിവേഴ്സിറ്റി അസോസിയേറ്റ് പ്രഫ. ഡോ. ദിവ്യ സി. സേനൻ പദ്ധതി വിശദീകരിച്ചു എഇഒ ജെൻസിമോൾ, ഹെഡ്മിസ്ട്രസ് ടി.ആർ. ശ്രീരേഖ, സീനിയർ അസിസ്റ്റന്‍റ് ബെന്നി തോമസ്, എ.കെ. സുധിമോൻ തുടങ്ങിയവർ പ്രസംഗിച്ചു.

കുമാരമംഗലം സ്കൂളിൽ മെറിറ്റ് ഡേ നടത്തി

കുമാരമംഗലം: എംകെഎൻഎം എച്ച്എസ്എസിൽ മെറിറ്റ് ഡേ നടത്തി. സ്കൂൾ മാനേജർ ആർ.കെ. ദാസ് അധ്യക്ഷത വഹിച്ചു. നടനും സംവിധായകനുമായ നാദിർഷ ഉദ്ഘാടനം ചെയ്തു. ഡയാലിസിസ് രോഗികൾക്ക് സൗജന്യ ഡയാലിസിസ് ഒരുക്കുകയെന്ന ലക്ഷ്യത്തോടെ വാഴക്കുളത്ത് നിർമാണം പൂർത്തിയായി വരുന്ന ഡയാലിസിസ് സെന്‍ററിനു നൽകുന്ന സ്കൂളിന്‍റെ സംഭാവന ചടങ്ങിൽ സിനിമാതാരം വിഷ്ണു ഉണ്ണിക്കൃഷ്ണൻ ഭാരവാഹികൾക്ക് കൈമാറി. പ്രഫ. ജോസ് അഗസ്റ്റിൻ ആമുഖപ്രഭാഷണം നടത്തി. ചടങ്ങിൽ കഴിഞ്ഞ എസ്എസ്എൽസി പരീക്ഷയിൽ മുഴുവൻ വിഷയങ്ങളിലും എ പ്ലസ് നേടിയ 50 കുട്ടികളെ ആദരിച്ചു. ഹെഡ്മാസ്റ്റർ എസ്. സാവിൻ സ്വാഗതവും പ്രിൻസിപ്പൽ ടോംസി തോമസ് നന്ദിയും പറഞ്ഞു. ചടങ്ങിൽ നവാഗതരായ കുട്ടികളുടെ കലാപരിപാടികളും അരങ്ങേറി.

കുടുംബശ്രീ ‘ഞാനും പൂവും’പദ്ധതിക്ക് ജില്ലയിൽ തുടക്കം

ഇടുക്കി: ഓണത്തോടനുബന്ധിച്ച് കുടുംബശ്രീയുടെ ആഭിമുഖ്യത്തിൽ നടപ്പാക്കുന്ന നിറപ്പൊലിമ പരിപാടിയുടെ ഭാഗമായി ഞാനും പൂവും പദ്ധതിക്ക് ജില്ലയിലെ വാത്തിക്കുടി നവജ്യോതി ബഡ്സ് സ്കൂളിൽ തുടക്കമായി. കുട്ടികളിൽ മാനസികോല്ലാസത്തിനു ഹോർട്ടികൾച്ചർ തെറാപ്പി ലക്ഷ്യമിട്ട് നടത്തുന്ന പദ്ധതി നവജ്യോതി ബഡ്സ് സ്കൂളും കുടുംബശ്രീ ജില്ലാ മിഷനും സംയുക്തമായാണ് സംഘടിപ്പിക്കുന്നത്. ബഡ്സ് സ്കൂൾ അങ്കണത്തിൽ നടന്ന ചടങ്ങിൽ വാത്തിക്കുടി പഞ്ചായത്ത് പ്രസിഡന്‍റ് ജോസ്മി ജോർജ് പദ്ധതിയുടെ ഉദ്ഘാടനം നിർവഹിച്ചു. ജെഎൽജി അംഗങ്ങളുടെ നേതൃത്വത്തിൽ നവജ്യോതി ബഡ്സ് സ്കൂളിലെ അഞ്ചു സെന്‍റ് പുരയിടത്തിൽ നാലുതരം പൂക്കൾ കൃഷി ചെയ്താണ് പദ്ധതിക്ക് തുടക്കം കുറിച്ചത്. പൂക്കൾ നടുന്നതിലും പരിപാലിക്കുന്നതിലും വിളവെടുക്കുന്നതിലും കുട്ടികൾ സജീവമായി പങ്കാളികളാകും. ഇത് അവർക്ക് മാനസികോല്ലാസം നൽകുന്നതിനൊപ്പം ഒരുതരം തെറാപ്പിയായും പ്രവർത്തിക്കും. പൂക്കൾ വളരുന്നതും പൂവിടുന്നതും വിളവെടുക്കുന്നതും നേരിട്ടറിയാൻ കുട്ടികൾക്ക് ഇതിലൂടെ അവസരം ലഭിക്കും. ഓണത്തിന് പൂക്കളമിടാൻ ഈ പൂക്കൾതന്നെ ഉപയോഗിക്കാനും ഇവർക്ക് സാധിക്കും. ഓണത്തിന് പൂക്കളുടെ വിളവെടുപ്പ് നടത്തുകയാണ് ലക്ഷ്യം. പുതുസംരംഭം കുട്ടികൾക്ക് പ്രകൃതിയോട് കൂടുതൽ അടുക്കാനും പ്രായോഗികമായ അറിവ് നേടാനും സഹായിക്കുമെന്ന് അധികൃതർ അറിയിച്ചു.

അധികൃതർ കാണണം: പ്ലാസ്റ്റിക് ഷെഡിൽ ഭീതിയോടെ ഒരു കുടുംബം

ചെറുതോണി: പ്ലാസ്റ്റിക് പടുതയ്ക്ക് മറച്ച ഷെഡിൽ ഭീതിയോടെ ഉറക്കമിളച്ച് കഴിഞ്ഞുകൂടുകയാണ് ഒരു കുടുംബം. കഞ്ഞിക്കുഴി പഞ്ചായത്തിലെ പതിനഞ്ചാം വാർഡായ മൈലപ്പുഴയിൽ തറപ്പേൽ ബ്രിജീത്ത എന്ന 87 വയസുകാരിയും ഹൃദ്രോഗിയായ മകനും ഭാര്യയും ഉൾപ്പെടുന്ന കുടുംബമാണ് അന്തിയുറങ്ങാൻ വീടില്ലാതെ ദുരിതത്തിൽ കഴിയുന്നത്. സുരക്ഷിതമായ വീടിനായി ഇവർ കയറിയിറങ്ങാത്ത ഓഫീസുകളില്ല. ജില്ലാ കളക്ടറും വില്ലേജും പഞ്ചായത്തുമെല്ലാം ഈ നിർധനകുടുംബത്തെ കൈവിട്ടിരിക്കുകയാണ്. രോഗിയായ മകന് ജോലിക്കുപോകാൻ കഴിയാത്തതിനാൽ ഭാര്യ തൊഴിലുറപ്പ് ജോലിക്കു പോകുന്നതാണ് ഇവരുടെ ഏക വരുമാനമാർഗം. കാറ്റും മഴയും ശക്തമാകുന്നതോടെ കടുത്ത ആശങ്കയോടെയാണ് ഈ കുടുംബം പ്ലാസ്റ്റിക് ഷെഡിൽ കഴിയുന്നത്. ജനപ്രതിനിധികൾ ഇടപെട്ട് നരകയാതന അനുഭവിക്കുന്ന ഈ കുടുംബത്തിന് സുരക്ഷിതമായ വീട് അനുവദിക്കണമെന്നാണ് ഇവരുടെ ആവശ്യം.

പച്ചത്തുരുത്തുകൾക്ക് അംഗീകാരം

ഇടുക്കി: മികച്ച പച്ചത്തുരുത്തുകൾക്ക് ഹരിതകേരളം മിഷൻ അംഗീകാരം നൽകുന്നു. ഹരിതകേരളം മിഷന്‍റെ ആഭിമുഖ്യത്തിൽ നട്ടുപിടിപ്പിച്ച പച്ചത്തുരുത്തുകളിൽ ഏറ്റവും മികച്ച അഞ്ചെണ്ണത്തിനാണ് സംസ്ഥാന തലത്തിൽ പുരസ്കാരം നൽകുന്നത്. ജില്ലാതലത്തിൽ മികച്ച മൂന്ന് പച്ചത്തുരുത്തുകൾക്കും അംഗീകാരം നൽകും. തദ്ദേശ സ്വയം ഭരണ സ്ഥാപനങ്ങൾ, സ്കൂളുകൾ, കോളജുകൾ, മറ്റ് സ്ഥാപനങ്ങൾ എന്നിങ്ങനെ വിവിധ വിഭാഗങ്ങളിലാണ് പച്ചത്തുരുത്ത് പുരസ്കാരങ്ങൾ നൽകുന്നത്. ഹരിതകേരളം മിഷന്‍റെ നേതൃത്വത്തിൽ പരിസ്ഥിതി, സസ്യശാസ്ത്ര മേഖലകളിലെ വിദഗ്ധരെ ഉൾപ്പെടുത്തി രൂപീകരിച്ച വിദഗ്ധ സംഘം നേരിട്ട് സന്ദർശനം നടത്തി വിലയിരുത്തിയാണ് മികച്ചവയെ കണ്ടെത്തുന്നത്. അഞ്ച് സെന്‍റ് മുതൽ വിസ്തൃതിയുള്ളതും രണ്ടു വർഷത്തിനു മുകളിൽ പ്രായമുള്ളതും മതിയായ വളർച്ചയുള്ളതുമായ പച്ചത്തുരുത്തുകളെയാണ് അംഗീകാരത്തിനായി പരിഗണിക്കുന്നത്. പ്രാദേശിക ജൈവവൈവിധ്യം, വൃക്ഷ സസ്യ വൈവിധ്യം, വിസ്തീർണത്തിന് ആനുപാതികമായി തൈകൾ, ജൈവവേലി, നിശ്ചിത മാതൃകയിലുള്ള നാമകരണ ബോർഡ്, പച്ചത്തുരുത്ത് സംഘാടക സംരക്ഷണസമിതിയുടെ പങ്കാളിത്തം, ചെടികളുടെ ലേബലിംഗ് തുടങ്ങിയ ഘടകങ്ങളും മാനദണ്ഡമാണ്. ജില്ലാതല പുരസ്കാരങ്ങൾ സെപ്റ്റംബർ ആദ്യവാരവും സംസ്ഥാനതല പുരസ്കാരം സെപ്റ്റംബർ 16ന് തിരുവനന്തപുരത്തും സമ്മാനിക്കും.

എക്സലൻസ് അവാർഡ് വിതരണം ചെയ്തു

മൂലമറ്റം: പഠന, പഠനാനുബന്ധ പ്രവർത്തനങ്ങളിലെ മികവിന് അറക്കുളം വൈഎംസിഎ ഏർപ്പെടുത്തിയ എക്സലന്‍റ് അവാർഡ് സെന്‍റ് മേരീസ് ഹയർ സെക്കൻഡറി സ്കൂളിന് സമ്മാനിച്ചു. മൂലമറ്റം ഗവ. വൊക്കേഷണൽ ഹയർ സെക്കൻഡറി സ്കൂളിൽ സംഘടിപ്പിച്ച അനുമോദന സമ്മേളനം പഞ്ചായത്ത് പ്രസിഡന്‍റ് കെ.എസ്. വിനോദ് ഉദ്ഘാടനം ചെയ്തു. വൈഎംസിഎ പ്രസിഡന്‍റ് സണ്ണി കൂട്ടുങ്കൽ അധ്യക്ഷത വഹിച്ചു. വാർഡ് മെംബർ സിനി തോമസ് സമ്മാനവിതരണം നടത്തി. സെന്‍റ് മേരീസ് സ്കൂൾ പ്രിൻസിപ്പൽ അവിര ജോസഫ്, സിസ്റ്റർ ഡോ. മേരി കളപ്പുര, ഹെഡ്മിസ്ട്രസ് പി. ജയശ്രീ, പിടിഎ പ്രസിഡന്‍റ് പ്രകാശ് ജോർജ്, വിക്ടർ ആലനോലിക്കൽ, കുരുവിള ജേക്കബ്, ജോസ് ഇടക്കര, വി.എ. അനഘ എന്നിവർ പ്രസംഗിച്ചു. എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് നേടിയ കുട്ടികളെയും നൂറു ശതമാനം വിജയം നേടിയ സ്കൂളുകളെയും ആതുരശുശ്രൂഷാ രംഗത്ത് മികച്ച പ്രവർത്തനം നടത്തിയ സിസ്റ്റർ ഡോ. മേരി കളപ്പുരയെയും ആദരിച്ചു.

അവിശ്വാസ ചർച്ചയ്ക്കു മുന്പ് കരിമണ്ണൂരിൽ വൈസ് പ്രസിഡന്‍റ് രാജിവച്ചു

കരിമണ്ണൂർ: പഞ്ചായത്ത് വൈസ് പ്രസിഡന്‍റ് ലിയോ കുന്നപ്പിള്ളിക്കെതിരേ യുഡിഎഫ് കൊണ്ടുവന്ന അവിശ്വാസപ്രമേയം ചർച്ചയ്ക്കെടുക്കുന്നതിനു മുന്പ് അദ്ദേഹം രാജിവച്ചു. ഇന്നലെ രാവിലെ 11ന് അവിശ്വാസം ചർച്ചയ്ക്കെടുക്കാനിരിക്കേ 10.52ന് പഞ്ചായത്ത് സെക്രട്ടറിക്ക് മുന്പാകെ നേരിട്ടെത്തി അദ്ദേഹം രാജിക്കത്ത് നൽകുകയായിരുന്നു. പഞ്ചായത്ത് പ്രസിഡന്‍റിനെതിരേ ദിവസങ്ങൾക്കു മുന്പ് യുഡിഎഫ് കൊണ്ടുവന്ന അവിശ്വാസപ്രമേയത്തെ പിന്തുണയ്ക്കാൻ അദ്ദേഹം തയാറായിരുന്നില്ല. യുഡിഎഫ് പിന്തുണയോടെ വൈസ് പ്രസിഡന്‍റായി പ്രവർത്തിക്കുകയും യുഡിഎഫ് നിലപാടുകൾക്കു വിരുദ്ധമായി പ്രവർത്തിക്കുകയും ചെയ്ത ലിയോ കുന്നപ്പിള്ളിയോടുള്ള അതൃപ്തിയാണ് അദ്ദേഹത്തിനെതിരേ അവിശ്വാസം കൊണ്ടുവരാൻ കാരണം. 14 അംഗ ഭരണസമിതിയിൽ യുഡിഎഫ് മെംബർമാരായ ബൈജു വറവുങ്കൽ, എ.എൻ. ദിലീപ്കുമാർ, ജീസ് ആയത്തുപാടം, ബിബിൻ അഗസ്റ്റിൻ, ടെസി വിൽസണ്‍, ആൻസി സിറിയക്, ഷേർലി സെബാസ്റ്റ്യൻ, സിപിഐ അംഗമായ എം.എം. സന്തോഷ് കുമാർ ഉൾപ്പെടെയുള്ള എട്ടംഗങ്ങൾ അവിശ്വാസ പ്രമേയത്തെ പിന്തുണയ്ക്കുന്നതിനായി ഹാളിൽ പ്രവേശിച്ച് ഹാജർ രേഖപ്പെടുത്തിയിരുന്നു. അവിശ്വാസപ്രമേയം ചർച്ചയ്ക്കെടുക്കുന്നതിനു മുന്പ് ലിയോ കുന്നപ്പിള്ളി രാജി സമർപ്പിച്ചതിനാൽ അദ്ദേഹത്തിന്‍റെ വൈസ് പ്രസിഡന്‍റ് സ്ഥാനം നഷ്ടമായതായും അതിനാൽ അവിശ്വാസ പ്രമേയം ചർച്ചയ്ക്കെടുക്കേണ്ടതില്ലെന്നും വരണാധികാരി അംഗങ്ങളെ അറിയിക്കുകയായിരുന്നു. അവിശ്വാസത്തിലൂടെ പുറത്താകുമെന്നു തിരിച്ചറിഞ്ഞതോടെ നാണക്കേട് ഒഴിവാക്കാനാണ് അദ്ദേഹം രാജി സമർപ്പിച്ചതെന്ന് യുഡിഎഫ് നേതാക്കൾ പറഞ്ഞു. പ്രസിഡന്‍റിനെതിരേ യുഡിഎഫ് കൊണ്ടുവന്ന അവിശ്വാസത്തെ പിന്തുണയ്ക്കാൻ തയാറാകാതിരുന്ന വേളയിൽത്തന്നെ അദ്ദേഹം രാജിവയ്ക്കുകയാണ് വേണ്ടിയിരുന്നതെന്നും നേതാക്കൾ പറഞ്ഞു. രണ്ടു വർഷം മുന്പുനടന്ന വൈസ് പ്രസിഡന്‍റ് തെരഞ്ഞെടുപ്പിൽ എൽഡിഎഫിന്‍റെ ഔദ്യോഗിക സ്ഥാനാർഥിയായി മത്സരിച്ച എം.എം. സന്തോഷ്കുമാറിനെ പരാജയപ്പെടുത്തിയാണ് ലിയോ കുന്നപ്പിള്ളി യുഡിഎഫ് പിന്തുണയോടെ വൈസ് പ്രസിഡന്‍റായി തെരഞ്ഞെടുക്കപ്പെട്ടത്. പഞ്ചായത്ത് മെംബർ സ്ഥാനംകൂടി രാജിവയ്ക്കാൻ അദ്ദേഹം തയാറാകണമെന്നും യുഡിഎഫ് നേതാക്കൾ ആവശ്യപ്പെട്ടു. മണ്ഡലം ചെയർമാൻ പോൾ കുഴിപ്പിള്ളിൽ, കണ്‍വീനർ ടി.കെ. നാസർ, സെക്രട്ടറി വി.എ. സക്കീർ എന്നിവർ പ്രസംഗിച്ചു.

നെടുങ്കണ്ടം ടൗണില്‍ ഫര്‍ണിച്ചര്‍ വ്യാപാര സ്ഥാപനത്തില്‍ വന്‍ തീപിടിത്തം

നെടുങ്കണ്ടം: ടൗണില്‍ ഫര്‍ണിച്ചര്‍ വ്യാപാരസ്ഥാപനത്തില്‍ വന്‍ തീപിടിത്തം. വ്യാഴാഴ്ച രാത്രി പത്തോടെയാണ് നെടുങ്കണ്ടം അര്‍ബന്‍ ബാങ്കിന് എതിര്‍വശത്തായി പ്രവര്‍ത്തിക്കുന്ന ജെപിഎസ് ഫര്‍ണിച്ചറിൽ തീപിടിത്തമുണ്ടായത്. സ്ഥാപനം അടച്ച് ജീവനക്കാര്‍ പോയതിനു ശേഷമാണ് തീപിടിത്തമുണ്ടായത്. അടഞ്ഞുകിടന്ന സ്ഥാപനത്തില്‍നിന്നും പുക ഉയരുന്നത് കണ്ട സമീപത്തെ കടകളിലെ ജീവനക്കാര്‍ ഫയര്‍ഫോഴ്സില്‍ വിവരം അറിയിക്കുകയായിരുന്നു. വലിയ പൊട്ടിത്തെറിയോടെ സ്ഥാപനത്തിന്‍റെ മുന്‍വശത്ത് തീ പടരുകയായിരുന്നു. തീപിടിത്തത്തില്‍ മുന്‍വശത്ത് ഇരുന്ന ഫര്‍ണിച്ചറുകള്‍, നെയിം ബോര്‍ഡ്, സീലിംഗ്, ഷട്ടറുകള്‍, കൗണ്ടര്‍, കംപ്യൂട്ടറുകള്‍, സിസിടിവി സിസ്റ്റം, പാനലിംഗ്, ലൈറ്റുകള്‍ ഉള്‍പ്പടെയുള്ളവ പൂര്‍ണമായും കത്തിനശിച്ചു. 10 ലക്ഷത്തോളം രൂപയുടെ നാശനഷ്ടമാണ് കണക്കാക്കുന്നത്. ഫര്‍ണിച്ചറുകള്‍ക്ക് തീപിടിച്ചതോടെ ടൗണില്‍ കനത്ത പുക മൂടുകയും ചെയ്തിരുന്നു. ഫയര്‍ഫോഴ്സും പോലീസും സ്ഥലത്തെത്തി പ്രദേശവാസികളുടെ സഹായത്തോടെ ഏറെനേരം പണിപ്പെട്ടാണ് തീ നിയന്ത്രണ വിധേയമാക്കിയത്. വൈദ്യുതി ഷോര്‍ട്ട് സര്‍ക്യൂട്ടാണ് തീപിടിക്കാന്‍ കാരണമെന്നാണ് പ്രാഥമിക നിഗമനമെങ്കിലും വൈദ്യുതി വകുപ്പ് ഇത് സ്ഥിരീകരിച്ചിട്ടില്ല. സംഭവത്തില്‍ കൂടുതല്‍ പരിശോധനകള്‍ നടത്തുമെന്ന് വൈദ്യുതി വകുപ്പ് അധികൃതര്‍ അറിയിച്ചു. രണ്ടു മാസങ്ങള്‍ക്ക് മുമ്പാണ് ജെപിഎസ് ഫര്‍ണിച്ചര്‍ എന്ന സ്ഥാപനം പ്രവര്‍ത്തനം ആരംഭിച്ചത്.

ലയണ്‍സ് ക്ലബ് വീടിന്‍റെ താക്കോൽ കൈമാറി

ഉപ്പുതറ: ലയണ്‍സ് ക്ലബ്ബിന്‍റെ നേതൃത്വത്തിൽ ഈ വർഷം നിർമാണം പൂർത്തിയാക്കിയ രണ്ടാമത്തെ സ്വപ്നഭവനത്തിന്‍റെ താക്കോൽ കൈമാറി. ഉപ്പുതറ പഞ്ചായത്തിലെ പൊരികണ്ണിയിൽ നിർമിച്ച വീടിന്‍റെ താക്കോൽദാനം ലയണ്‍സ് മൾട്ടിപ്പിൾ കൗണ്‍സിൽ ചെയർപേഴ്സണ്‍ രാജൻ എൻ. നന്പൂതിരി നിർവഹിച്ചു. ലയണ്‍സ് ക്ലബ്ബ് പ്രസിഡന്‍റ് സജിൻ സ്കറിയ അധ്യക്ഷത വഹിച്ചു. ആനപ്പള്ളത്ത് നിർമിച്ച ആദ്യഭവനത്തിന്‍റെ നിർമാണം പൂർത്തിയാക്കി താക്കോൽ കൈമാറിയിരുന്നു. പഞ്ചായത്തിലെ ആനപ്പള്ളത്താണ് ആദ്യഭവനം നിർമിച്ചത്. രണ്ടു വീടുകളുടെ നിർമാണം അന്തിമഘട്ടത്തിലാണ്. ലയണ്‍സ് ക്ലബ്ബ് റീജണൽ ചെയർമാൻ റെജി വരകുകാല, ഉപ്പുതറ ലയണ്‍സ് ക്ലബ്ബ് സെക്രട്ടറി ലാൽ ഏബ്രഹാം, പ്രവീണ്‍ കെ. മോഹൻ, വി.ജെ. തോമസ്, രാജേഷ് കെ. വിൻസെന്‍റ് എന്നിവർ പ്രസംഗിച്ചു.

ദേശീയപാതാ നിർമാണം തടഞ്ഞു ; ജില്ലയിൽ പ്രതിഷേധം കനക്കുന്നു; മൂന്നു പഞ്ചായത്തുകളിൽ ഹർത്താൽ

തൊടുപുഴ: ദേശീയപാത 85-ൽ നേര്യമംഗലം മുതൽ വാളറ വരെയുള്ള ഭാഗത്ത് നടന്നുവരുന്ന നിർമാണ പ്രവർത്തനങ്ങൾ തടഞ്ഞ ഹൈക്കോടതി വിധി പുനഃപരിശോധിക്കണമെന്നാവശ്യപ്പെട്ട് ജില്ലയിലെ മൂന്നു പഞ്ചായത്തുകളിൽ ഇന്നു ഹർത്താൽ നടത്തും. അടിമാലി, വെള്ളത്തൂവൽ, പള്ളിവാസൽ പഞ്ചായത്തുകളിൽ യുഡിഎഫും അടിമാലി പഞ്ചായത്തിൽ എൽഡിഎഫുമാണ് ഹർത്താൽ പ്രഖ്യാപിച്ചത്. പരിസ്ഥിതി പ്രവർത്തകൻ ഹൈക്കോടതിയിൽ നൽകിയ ഹർജിയെത്തുടർന്നാണ് ചീഫ് ജസ്റ്റീസ് ദേശീയപാതയിലെ നിർമാണ പ്രവർത്തനങ്ങൾ അടിയന്തരമായി നിർത്തിവയ്ക്കാൻ ഉത്തരവു പുറപ്പെടുവിച്ചത്. മലയാറ്റൂർ റിസർവ് വനത്തിന്‍റെ ഭാഗമാണ് ഇവിടമെന്നാണ് ഹർജിയിൽ ചൂണ്ടിക്കാട്ടിയിരുന്നത്. ഇതു സംബന്ധിച്ച് അഡീഷണൽ ചീഫ് സെക്രട്ടറി കെ.ആർ. ജ്യോതിലാൽ നൽകിയ സത്യവാങ്മൂലത്തിൽ വനംവകുപ്പിന്‍റെ വാദങ്ങൾ ഖണ്ഡിക്കാതിരുന്നതും ദേശീയപാത നിർമാണം നിർത്തിവയ്ക്കാനുള്ള ഉത്തരവിനു കാരണമായതായി ചൂണ്ടിക്കാണിക്കപ്പെടുന്നു. ജില്ലയുടെ ടൂറിസം, ഗതാഗതവികസനം സ്തംഭിപ്പിക്കുന്നതിന് ഉത്തരവു കാരണമാകുമെന്ന വിലയിരുത്തലിലാണ് ജില്ലയിലെ രാഷ്ട്രീയ കക്ഷികളും സാമൂഹിക, സാംസ്കാരിക, വ്യാപാരി സംഘടനകളും. ഉത്തരവിനെതിരേ ശക്തമായ ജനകീയ പ്രതിഷേധമാണ് ജില്ലയിൽ അലയടിക്കുന്നത്. മന്ത്രി റോഷി അഗസ്റ്റിൻ ഇടുക്കിയിലെ ഗതാഗതം, ടൂറിസം എന്നിവയുമായി ബന്ധപ്പെട്ട് ഏറെ പ്രാധാന്യമുള്ളതും ഗൗരവതരവുമായ വിഷയം എന്ന നിലയിൽ ദേശീയപാതയുടെ ഭാഗമായ നേര്യമംഗലം - വാളറ റോഡ് വികസനം നിർത്തിവയ്ക്കാൻ ഹൈക്കോടതി ഉത്തരവ് പുറപ്പെടുവിച്ചതിനെതിരേ മുഖ്യമന്ത്രിയുമായി ആലോചിച്ച് സർക്കാർ ഉചിതമായ നടപടി സ്വീകരിക്കും. ഇക്കാര്യം സംബന്ധിച്ച് വനം മന്ത്രിയോടും ചീഫ് സെക്രട്ടറിയോടും ഫോണിൽ സംസാരിച്ചു. സർക്കാരിന്‍റെ തീരുമാനം കോടതിയെ അറിയിച്ച് പ്രശ്നപരിഹാരത്തിന് അടിയന്തര നടപടി സ്വീകരിക്കും. കെ. സലിംകുമാർ (സിപിഐ ജില്ലാ സെക്രട്ടറി) ഹൈവേ നിർമാണം തടഞ്ഞ നടപടി ദൗർഭാഗ്യകരമാണ്. ഹൈക്കോടതി വിധി മറികടക്കാൻ സർക്കാർ അപ്പീൽ നൽകുന്നതടക്കമുള്ള അടിയന്തര നടപടി സ്വീകരിക്കണം. നാടിന്‍റെ വികസനം തടയുന്ന ഒരുനടപടിയും അംഗീകരിക്കാനാവില്ല. പാതയുടെ നിർമാണം മുന്നോട്ടു കൊണ്ടുപോകണം. ജോസ് പാലത്തിനാൽ (കേരള കോണ്‍ഗ്രസ് -എം ജില്ലാ പ്രസിഡന്‍റ്) സർക്കാർ നിലപാടിനു വിരുദ്ധമായ സമീപനമാണ് അഡീഷണൽ ചീഫ് സെക്രട്ടറിയുടെ ഭാഗത്തുനിന്നും ഉണ്ടായത്. ജില്ലയുടെ വികസനം തടസപ്പെടുത്തുന്ന പ്രശ്നത്തിൽ സർക്കാർ ഹൈക്കോടതിയിൽ എത്രയും വേഗം അപ്പീൽ നൽകി പ്രശ്നപരിഹാരത്തിനു ശ്രമിക്കണമെന്നാണ് കേരള കോണ്‍ഗ്രസ് എമ്മിന്‍റെ നിലപാട്. സർക്കാർ ഒളിച്ചുകളി നടത്തുന്നു: എംപി ദേശീയപാത നിർമാണത്തിൽ ഹൈക്കോടതിവിധി സർക്കാരിന്‍റെ ഒളിച്ചുകളിയുടെ ഭാഗമായി ഉണ്ടായതാണെന്ന് ഡീൻ കുര്യാക്കോസ് എംപി പത്രസമ്മേളനത്തിൽ ആരോപിച്ചു. ദേശീയപാതയിൽ 10 മീറ്റർ വീതിയിലാണ് നിർമാണം നടത്തിവന്നിരുന്നത്. ഇതിനെതിരേ വനംവകുപ്പ് തർക്കവുമായെത്തിയിരുന്നു. എന്നാൽ 2024 മേയ് 28-ന് കിരണ്‍ സിജു എന്ന വിദ്യാർഥി സമർപ്പിച്ച ഹർജിയിൽ നിർമാണം തുടരാൻ വിധി പുറപ്പെടുവിച്ചിരുന്നു . ഇതനുസരിച്ച് 1996-ലെ പൊതുമരാമത്ത് ഉത്തരവ് പ്രകാരം 30 മീറ്റർ വീതി യാഥാർഥ്യമാക്കണമെന്നും വനംവകുപ്പിന് യാതൊരു അവകാശവുമില്ലെന്നുമായിരുന്നു വിധിയിൽ വ്യക്തമാക്കിയിരുന്നത്. 2024 ഓഗസ്റ്റ് രണ്ടിന് ചീഫ് സെക്രട്ടറിയുടെ നേതൃത്വത്തിൽ മന്ത്രിമാർ ഉൾപ്പെടെ പങ്കെടുത്ത യോഗത്തിൽ 10 മീറ്റർ വീതിയിൽ വികസനപ്രവർത്തനം നടത്താമെന്നും ഇതിനു വനംവകുപ്പ് തടസം സൃഷ്ടിക്കരുതെന്നും തീരുമാനിച്ചിരുന്നു. ഇതിനെതിരേ പരിസ്ഥിതി പ്രവർത്തകനായ എം.എൻ. ജയചന്ദ്രൻ ഹൈക്കോടതിയിൽ നൽകിയ റിവ്യൂ പെറ്റീഷൻ തള്ളിയിരിയുന്നു. ഇതേത്തുടർന്നാണ് ചീഫ് ജസ്റ്റീസിന്‍റെ ബെഞ്ചിൽ ഇദ്ദേഹം റിട്ട് ഫയൽ ചെയ്തത്. ഇതു സംബന്ധിച്ച് കഴിഞ്ഞ ഏഴിന് അഡീഷണൽ ചീഫ് സെക്രട്ടറി നൽകിയ സത്യവാങ്മൂലം ഹർജിക്കാരന് അനുകൂലമായിരുന്നു. ഇതിനെതിരേ എംപി എന്ന നിലയിൽ താനും സിജുമോൻ ഫ്രാൻസിസും കക്ഷിചേരാൻ അപേക്ഷ നൽകിയെങ്കിലും കോടതി തങ്ങളുടെ ഭാഗം കേൾക്കാൻ തയാറായില്ല. ഇതേത്തുടർന്നാണ് ഹൈക്കോടതി ദേശീയ നിർമാണം നിർത്തി വയ്ക്കാൻ ഉത്തരവ് പുറപ്പെടുവിച്ചതെന്ന് എംപി പറഞ്ഞു. കഴിഞ്ഞ ദിവസം തിരുവനന്തപുരത്ത് വനംവകുപ്പ് ആസ്ഥാനത്ത് നടത്തിയ ഗോത്രഭേരി പരിപാടിയിൽ മുഖ്യാതിഥിയായി എം.എൻ. ജയചന്ദ്രൻ പങ്കെടുത്തതായും എംപി പറഞ്ഞു. നിർമാണം നിർത്തിവയ്ക്കുന്നതിന് ഇടയാക്കിയതിനു പിന്നിൽ ഗൂഢാലോചന നടന്നിട്ടുണ്ടോയെന്ന് അന്വേഷിക്കണമെന്നും അക്കാര്യം പുറത്തു കൊണ്ടുവരണമെന്നും എംപി ആവശ്യപ്പെട്ടു. പത്രസമ്മേളനത്തിൽ ഫാർമേർസ് അവയർനസ് ആൻഡ് റിവൈവൽ മൂവ്മെന്‍റ് ജനറൽ സെക്രട്ടറി സിജുമോൻ ഫ്രാൻസിസും പങ്കെടുത്തു.

വിലയുമില്ല, നഷ്ടപരിഹാരവുമില്ല നെൽകൃഷി ഉപേക്ഷിച്ച് കർഷകർ

തൊടുപുഴ: താലൂക്കിലെ പ്രധാന നെല്ലറയായ അഞ്ചിരി പാടശേഖരത്തിലെ കർഷകർ നെല്ലിന്‍റെ വിലയും കൃഷി നശിച്ചതുമൂലമുള്ള നഷ്ടപരിഹാരവും ലഭിക്കാതായതോടെ കൃഷി ഉപേക്ഷിക്കാനുള്ള നീക്കത്തിൽ. സപ്ലൈക്കോക്കു നൽകിയ നെല്ലിന്‍റെ പണം ലഭിക്കാത്തതിനാൽ തുടർകൃഷിക്ക് നിവൃത്തിയില്ലാത്ത സ്ഥിതിയാണ്. ഇതുമൂലം ആലക്കോട് പഞ്ചായത്ത് പരിധിയിൽ വരുന്ന അഞ്ചിരി, കുറിച്ചി പാടശേഖരങ്ങളിലെ 150 കർഷകരാണ് ഇത്തവണ കൃഷിയിറക്കാനാകാതെ ദുരിതക്കയത്തിലായത്. 60 ഏക്കറോളം വിസ്തൃതിയുള്ളതാണ് അഞ്ചിരി പാടശേഖരം. ഇവിടെ 75-ഓളം കർഷകരുണ്ട്. 40 ഏക്കറോളം വിസ്തൃതിയുള്ള കുറിച്ചി പാടശേഖരത്തിൽ 60-ഓളം കർഷകരുമുണ്ട്. വെള്ളം സുലഭമായി ലഭിച്ചിരുന്നതിനാൽ പതിറ്റാണ്ടുകളായി ഇരിപ്പൂകൃഷിയാണ് ഇവിടെ നടത്തിവന്നിരുന്നത്. കഴിഞ്ഞ സീസണിൽ രണ്ടു തവണയായി വിളവെടുത്ത 80 ടൺ നെല്ലാണ് സപ്ലൈക്കോയ്ക്ക് നൽകിയത്. ഇതിന്‍റെ വിലയായി നയാപൈസപോലും ഇതുവരെ ലഭിച്ചിട്ടില്ല. കൃഷി ഇൻഷ്വർ ചെയ്തിട്ടുള്ളതിനാൽ കൃഷിനാശം സംഭവിച്ച കർഷകർക്കു ലഭിക്കേണ്ട നഷ്ടപരിഹാരവും ലഭിക്കാത്ത സാഹചര്യമാണ്. സാധാരണ ആദ്യകൃഷി വിളവെടുപ്പ് പൂർത്തിയാക്കി രണ്ടാം കൃഷി ഇറക്കേണ്ടത് ഓഗസ്റ്റിലാണ്. ഇതിനായി നിലം ഒരുക്കേണ്ട സമയമാണിത്. എന്നാൽ കർഷകർ ഇതുവരെ കൃഷിക്കുള്ള പ്രാരംഭ നടപടികൾ ആരംഭിച്ചിട്ടില്ല. നിലവിലെ സാഹചര്യത്തിൽ രണ്ടാംകൃഷിയും ഇത്തവണ നടക്കാൻ സാധ്യത കുറവാണ്. സർക്കാരിന്‍റെ അലംഭാവവും കെടുകാര്യസ്ഥതയുമാണ് കർഷകർക്കു പണം ലഭിക്കാത്തതിനു പിന്നിലെന്നും കർഷകദ്രോഹ നടപടി അവസാനിപ്പിച്ച് അടിയന്തരമായി നെല്ലിന്‍റെ വില അനുവദിക്കണമെന്നുമാണ് കർഷകരുടെ ആവശ്യം.

കഞ്ഞിക്കുഴി സിഎച്ച്സിയിൽ കിടത്തിച്ചികിത്സ നിർത്തലാക്കാൻ നീക്കമെന്ന്

ചെറുതോണി: കഞ്ഞിക്കുഴി സാമൂഹികാരോഗ്യകേന്ദ്രത്തിന്‍റെ പ്രവർത്തനം അവതാളത്തിൽ. 30 രോഗികളെ കിടത്തിച്ചികിത്സിക്കുന്ന ആശുപത്രിയിൽ കിടത്തിച്ചികിത്സ നിർത്തണമെന്നാവശ്യപ്പെട്ട് മെഡിക്കൽ ഓഫീസർ ഡിഎംഒയ്ക്ക് കത്ത് നൽകിയതായി പരാതി ഉയർന്നിരിക്കുകയാണ്. സാമ്പത്തികമായി പിന്നാക്കം നിൽക്കുന്നവരും ആദിവാസികളും അധിവസിക്കുന്ന കഞ്ഞിക്കുഴി പഞ്ചായത്തിലെ കിടപ്പുരോഗികളാണ് ദുരിതത്തിലായിരിക്കുന്നത്. ഇതോടെ കിലോമീറ്റർ സഞ്ചരിച്ച് ഇടുക്കി മെഡിക്കൽ കോളജ് ആശുപത്രിയിലോ തൊടുപുഴയിലെ സ്വകാര്യ ആശുപത്രികളെയോ ആശ്രയിക്കേണ്ട ഗതികേടിലാണ് കഞ്ഞിക്കുഴി നിവാസികൾ. ദിനംപ്രതി ഇരുനൂറോളം രോഗികൾക്ക് ചികിത്സ നൽകിയിരുന്ന കഞ്ഞിക്കുഴി സിഎച്ച്സിയിൽ ഡോക്ടറും സ്റ്റാഫ് നഴ്സും ഇല്ലെന്ന കാരണത്താൽ പുതുതായെത്തിയ മെഡിക്കൽ ഓഫീസറാണ് കിടത്തിച്ചികിത്സ നിർത്തണമെന്നു കാണിച്ച് ഡിഎംഒയ്ക്ക് കത്ത് നൽകിയത്.

ജീര്‍ണാവസ്ഥയിലായ പിഎച്ച്സി കെട്ടിടം പൊളിച്ചുതുടങ്ങി

നെടുങ്കണ്ടം: കോട്ടയം മെഡിക്കല്‍ കോളജ് ദുരന്തം അധികൃതരുടെ കണ്ണ് തുറപ്പിച്ചു. ഒമ്പത് വര്‍ഷം മുമ്പ് ജീര്‍ണാവസ്ഥയിലാണെന്നു കണ്ടെത്തിയ പാമ്പാടുംപാറയിലെ നെടുങ്കണ്ടം ബ്ലോക്ക് പിഎച്ച്സി കെട്ടിടം പൊളിച്ചുതുടങ്ങി. 1982-ല്‍ പണിത ആദ്യ ഔട്ട് പേഷ്യന്‍റ്സ്, ഓഫീസ് കെട്ടിടവും, 1989-ല്‍ പണിത കോണ്‍ഫറന്‍സ് ഹാളുമാണ് അണ്‍ഫിറ്റ് റിപ്പോര്‍ട്ടിന്‍റെ അടിസ്ഥാനത്തിൽ പൊളിക്കുന്നത്. നിര്‍മാണസമയത്ത് അഴിമതിയാരോപണം നേരിട്ട കെട്ടിടവും ഇതോടൊപ്പം പൊളിക്കും. 800 ചതുരശ്ര അടിയുള്ള ഓഫീസ് കെട്ടിടം ജീര്‍ണാവസ്ഥയിലാണെന്ന് 2016-ല്‍ പൊതുമരാമത്ത് വകുപ്പ് എൻജിനിയർ റിപ്പോര്‍ട്ട് നല്‍കിയിരുന്നു. അന്നത്തെ ബ്ലോക്ക് പഞ്ചായത്ത് ഭരണസമിതി ലക്ഷങ്ങള്‍ ചെലവഴിച്ച് അറ്റകുറ്റപ്പണികള്‍ നടത്തി സംരക്ഷിക്കുകയായിരുന്നു. 1984-ല്‍ പണിത 2500 ചതുരശ്ര അടി വിസ്തീർണമുള്ള കെട്ടിടത്തിന് കേടുപാടുകള്‍ ഇല്ലാത്തതിനാല്‍ ഇവിടെ ഓഫീസ് പ്രവര്‍ത്തനങ്ങള്‍ നടക്കുന്നുണ്ട്.

ഇടിഞ്ഞുവീഴാവുന്ന സ്ഥിതിയില്‍ കലുങ്ക്; കണ്ണടച്ച് അധികൃതര്‍

നെടുങ്കണ്ടം: കലുങ്ക് അപകടാവസ്ഥയിലായിട്ട് മാസങ്ങള്‍ പിന്നിട്ടിട്ടും കണ്ണ് തുറക്കാതെ അധികൃതര്‍. വിദ്യാര്‍ഥികളടക്കം നൂറുകണക്കിനാളുകളും നിരവധി വാഹനങ്ങളും കടന്നുപോകുന്ന നെടുങ്കണ്ടം പഞ്ചായത്ത് ഗുരുനഗറിലെ കലുങ്കാണ് ഏതുനിമിഷവും നിലംപൊത്താവുന്ന സ്ഥിതിയിലായത്. ആലപ്പുഴ - മധുര സംസ്ഥാന പാതയില്‍നിന്ന് മഹാത്മാഗാന്ധി യൂണിവേഴ്‌സിറ്റി നഴ്‌സിംഗ് കോളജിലേക്കും സമീപപ്രദേശങ്ങളിലേക്കും പോകുന്ന റോഡിലെ കലുങ്കാണ് അപകടാവസ്ഥയിലുള്ളത്. കലുങ്കിന്‍റെ തൂണുകളിലെ കല്ലുകള്‍ ഇളകിയ നിലയിലാണ്. കൂടാതെ പൊട്ടിപ്പൊളിഞ്ഞ റോഡിലൂടെ ഒഴുകിയെത്തുന്ന വെള്ളം കലുങ്കിന്‍റെ അടിഭാഗത്തെ കെട്ടുകള്‍ക്കുള്ളിലൂടെയാണ് ഒഴുകുന്നത്. ഇതുമൂലം ഈ കെട്ടുകള്‍ ഇടിഞ്ഞ നിലയിലാണ്. കേരളത്തില്‍നിന്നും ഇതര സംസ്ഥാനങ്ങളില്‍നിന്നുമായി നൂറുകണക്കിന് വിദ്യാര്‍ഥികളാണ് ഇവിടെ നഴ്‌സിംഗ് പഠനം നടത്തുന്നത്. ഇവര്‍ക്ക് കോളജിലേക്ക് എത്താനുള്ള ഏകവഴിയാണിത്. ഏതു നിമിഷവും തകരാവുന്ന കലുങ്കിലൂടെ കോളജ് ബസ് ദിവസം ആറു തവണയാണ് കടന്നുപോകുന്നത്. കൂടാതെ നിരവധി വിദ്യാഭ്യാസ സ്ഥാപനങ്ങളുടെയും പ്രദേശവാസികളുടെയും വാഹനങ്ങളും കടന്നുപോകുന്നുണ്ട്. ഡ്രൈവര്‍മാരും വിദ്യാര്‍ഥികളും നാട്ടുകാരും ഈ കലുങ്കിലൂടെ ഭീതിയോടെയാണ് കടന്നുപോകുന്നത്. കലുങ്കിന്‍റെ അപകടാവസ്ഥ സംബന്ധിച്ച് നിരവധി തവണ അധികൃതരെ അറിയിച്ചെങ്കിലും അനങ്ങാപ്പാറ നയമാണ് ഇവര്‍ സ്വീകരിക്കുന്നതെന്നു നാട്ടുകാര്‍ കുറ്റപ്പെടുത്തി.

കാട്ടാനയെ അവശനിലയിൽ കണ്ടെത്തി

അടിമാലി: പീച്ചാട് പ്ലാമല ജനവാസമേഖലയോടു ചേര്‍ന്ന് കാട്ടാനയെ അവശനിലയില്‍ കണ്ടെത്തി. പ്ലാമല റെസ്റ്റ്പാറയ്ക്ക് സമീപമാണ് 40 വയസിലധികം പ്രായമുള്ള പിടിയാനയെ അവശനിലയില്‍ കണ്ടെത്തിയത്. കാഴ്ചക്കുറവും കേള്‍വിക്കുറവുമുള്ള കാട്ടാന വനംവകുപ്പിന്‍റെ നിരീക്ഷണത്തിലാണ്. അവശതയുള്ളതിനാൽ വെറ്ററിനറി ഡോക്ടർമാരുടെ നേതൃത്വത്തിൽ ചികിത്സ നൽകിവരുന്നു. ആന കഴിഞ്ഞദിവസം ജനവാസ മേഖലയിലിറങ്ങി കൃഷിയിടങ്ങള്‍ നശിപ്പിക്കുകയും ആളുകളെ ഓടിച്ചു പരിഭ്രാന്തി സൃഷ്ടിക്കുകയും ചെയ്തിരുന്നു. തുടർന്നാണ് വ്യാഴാഴ്ച വൈകുന്നേരത്തോടെ പ്ലാമല ഭാഗത്ത് അവശനിലയിൽ കണ്ടെത്തിയത്. മൂന്നു ദിവസമായി ആന ഭക്ഷണം കഴിച്ചിട്ടില്ലെന്നും വനം വകുദ്യോഗസ്ഥർ അറിയിച്ചു.

ചെമ്മണ്ണാര്‍ സെന്‍റ് സേവ്യേഴ്‌സ് സ്‌കൂളില്‍ ലഹരിവിരുദ്ധ സിഗ്‌നേച്ചര്‍ കാമ്പയിന്‍

നെടുങ്കണ്ടം: ചെമ്മണ്ണാര്‍ സെന്‍റ് സേവ്യേഴ്‌സ് ഹയര്‍ സെക്കൻഡറി സ്‌കൂളില്‍ വിവിധ സംഘടനകളുടെ നേതൃത്വത്തില്‍ ലഹരിവിരുദ്ധ സിഗ്‌നേച്ചര്‍ കാമ്പയിന്‍ നടത്തി. സ്‌കൂളിലെ എന്‍എസ്എസ്, എന്‍സിസി, റോവര്‍ ആൻഡ് റെയ്ഞ്ചര്‍, ലഹരിവിരുദ്ധ ക്ലബ് എന്നീ യൂണിറ്റുകളുടെ നേതൃത്വത്തില്‍ 20 മീറ്ററോളം നീളമുള്ള കാന്‍വാസില്‍ കൈയൊപ്പ് ചാര്‍ത്തിയാണ് കാമ്പയിന്‍ സംഘടിപ്പിച്ചത്. പ്രിന്‍സിപ്പൽ എം.എ. അഗസ്റ്റിന്‍ കാമ്പയിന്‍ ഉദ്ഘാടനം ചെയ്തു. സൗമി ജോസ്, പി.സി. ജയന്‍, സ്മിത തോമസ്, ബോബിന്‍ സണ്ണി, ബിബിന്‍ തോമസ് തുടങ്ങിയവര്‍ നേതൃത്വം നല്‍കി.

ജലസ്രോതസിൽ സാമൂഹ്യവിരുദ്ധർ മാലിന്യം തള്ളി

നെടുങ്കണ്ടം: ജലസ്രോതസിൽ സാമൂഹ്യവിരുദ്ധർ മാലിന്യം തള്ളി. നെടുങ്കണ്ടം പഞ്ചായത്തിലെ പരിവർത്തനമേട് റോഡിൽ മണിയാക്കുപാറയിലെ തോട്ടിലാണ് പലതരം മാലിന്യങ്ങൾ പ്ലാസ്റ്റിക് കവറിൽ കെട്ടി തള്ളിയിരിക്കുന്നത്. ഡയപ്പർ, വിസർജ്യങ്ങൾ, ആഹാരപദാർഥങ്ങളുടെ അവശിഷ്ടങ്ങൾ തുടങ്ങിയവയാണ് തോട്ടിൽ തള്ളിയത്. ഇവ തോട്ടിലൂടെ ഒഴുകി പല സ്ഥലങ്ങളിൽ അടിഞ്ഞുകൂടിയ നിലയിലാണ്. പ്രദേശത്ത് ദുർഗന്ധവുമുണ്ട്. മാലിന്യങ്ങൾ നായ്ക്കളും പക്ഷികളും എടുത്ത് പല സ്ഥലങ്ങളിലും ഇട്ടിരിക്കുകയുമാണ്. പഞ്ചായത്തിന്‍റെ ഗ്രാമീണമേഖലകളിൽ പ്ലാസ്റ്റിക് ശേഖരണം നടക്കുന്നില്ലെന്നും ആക്ഷേപമുണ്ട്. ഹരിതകർമസേനാംഗങ്ങൾ എല്ലാ മാസവും യൂസർ ഫീ വാങ്ങുന്നുണ്ടെങ്കിലും യഥാസമയം പ്ലാസ്റ്റിക്കുകൾ കൊണ്ടുപോകാറില്ലെന്നും നാട്ടുകാർ പറയുന്നു. ജലസ്രോതസിൽ മാലിന്യം തള്ളിയവരെ കണ്ടെത്തി നടപടി സ്വീകരിക്കണമെന്നു പ്രദേശവാസികൾ ആവശ്യപ്പെട്ടു.

ഉളുപ്പൂണി വനം ഓഫീസിലേക്ക് മാർച്ച് നടത്തി

ഉപ്പുതറ: ഉളുപ്പൂണി പ്രദേശത്തെ കർഷകരോട് വനം ഉദ്യോഗസ്ഥർ തുടരുന്ന ദ്രോഹനടപടികളിൽ പ്രതിഷേധിച്ച് കർഷകസംഘം പുള്ളിക്കാനം വില്ലേജ് കമ്മിറ്റിയുടെ അഭിമുഖ്യത്തിൽ ഉളുപ്പൂണി വനം ഓഫീസിലേക്ക് മാർച്ച് നടത്തി. കേരള കർഷകസംഘം ജില്ലാ കമ്മിറ്റിയംഗം എം.ജെ. വാവച്ചൻ സമരം ഉദ്ഘാടനം ചെയ്തു. പതിറ്റാണ്ടുകളായി കൈവശമുള്ള കർഷകരുടെ ഭൂമിക്ക് പട്ടയം ലഭിക്കുന്നതിനു തടസംനിൽക്കുന്ന വനം ഉദ്യോഗസ്ഥരുടെ നടപടി അവസാനിപ്പിക്കുക, കർഷകരുടെ ഭുമിയിലെ കടന്നുകയറ്റം അവസാനിപ്പിക്കുക, ജനങ്ങളുടെ സഞ്ചാരസ്വാതന്ത്ര്യം നിഷേധിക്കുന്ന നടപടികൾ അവസാനിപ്പിക്കുക തുടങ്ങിയ ആവശ്യങ്ങൾ സമരത്തിൽ ഉന്നയിച്ചു. കർഷകസംഘം ഏരിയാ പ്രസിഡന്‍റ് എം. ടി. സജി, സിപിഎം പുള്ളിക്കാനം ലോക്കൽ സെക്രട്ടറി എൻ.എം. കുശൻ, ജോമോൻ ദാസ്, കെ. ഗോപി എന്നിവർ പ്രസംഗിച്ചു.

സഫലമീ യാത്ര 37 സ്കൂട്ടറുകളുടെ വിതരണോദ്ഘാടനം ഇന്ന്

ഇടുക്കി: ജില്ലാ പഞ്ചായത്ത് നടപ്പാക്കുന്ന സഫലമീ യാത്ര പദ്ധതിയുടെ ഉദ്ഘാടനം ഇന്നു രണ്ടിന് മന്ത്രി റോഷി അഗസ്റ്റിൻ നിർവഹിക്കും. ജില്ലാ പഞ്ചായത്തിൽ സംഘടിപ്പിക്കുന്ന ചടങ്ങിൽ ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ അധ്യക്ഷത വഹിക്കും. 2024-25 വാർഷിക പദ്ധതിയിൽ ഉൾപ്പെടുത്തിയാണ് ജില്ലാ പഞ്ചായത്ത് സഫലമീ യാത്ര പദ്ധതി നടപ്പാക്കുന്നത്. ഭിന്നശേഷിക്കാർക്ക് സൈഡ് വീലോടു കൂടിയ സ്കൂട്ടർ പദ്ധതിയിലൂടെ ലഭ്യമാക്കും.പഞ്ചായത്തുകളിൽനിന്ന് ലഭിച്ച ഗുണഭോക്തൃ പട്ടികയുടെ അടിസ്ഥാനത്തിൽ 37 പേർക്കാണ് സ്കൂട്ടർ വിതരണം ചെയ്യുന്നത്. ഗ്രാമസഭവഴി ലഭിച്ച അപേക്ഷകൾ പരിശോധിച്ച് അതിൽനിന്നും തെരഞ്ഞെടുത്തവർക്കാണ് സ്കൂട്ടർ നൽകുന്നത്. വാഹനത്തിന്‍റെ രജിസ്ട്രേഷൻ പൂർത്തീകരിച്ച് എല്ലാ രേഖകളും ഉൾപ്പെടെയാണ് ഗുണഭോക്താക്കൾക്ക് കൈമാറുന്നത്. ഇവർക്ക് ടാക്സിലും കുറവ് വരുത്തിയിട്ടുണ്ട്. 42 ലക്ഷം രൂപ ചെലവഴിച്ചാണ് പദ്ധതി നടപ്പാക്കുന്നത്. ഒരു വാഹനത്തിന് 1,13,500 രൂപയാണ് വിനിയോഗിക്കുന്നത്. ജില്ലാ പഞ്ചായത്ത് വൈസ് പ്രസിഡന്‍റ് ഉഷാകുമാരി മോഹൻകുമാർ, സ്ഥിരംസമിതി ചെയർപേഴ്സണ്‍മാരായ കെ.ജി. സത്യൻ, എം. ഭവ്യ, ആശ ആന്‍റണി, കെ.ടി. ബിനു, ത്രിതല പഞ്ചായത്തംഗങ്ങൾ തുടങ്ങിയവർ പങ്കെടുക്കും.

ജൂണിയർ റെഡ്ക്രോസ് കൗണ്‍സിലേഴ്സ് മീറ്റ് നടത്തി

തൊടുപുഴ: തൊടുപുഴ വിദ്യാഭ്യാസ ജില്ലയിലെ ജൂണിയർ റെഡ്ക്രോസ് കൗണ്‍സിലേഴ്സ് മീറ്റ് എ.പി.ജെ. അബ്ദുൾ കലാം ഹയർ സെക്കൻഡറി സ്കൂളിൽ നടന്നു. ജില്ലാ റെഡ്ക്രോസ് ചെയർമാൻ പി.എസ്. സെബാസ്റ്റ്യൻ അധ്യക്ഷത വഹിച്ചു. ഡയറ്റ് മുൻ പ്രിൻസിപ്പൽ ഡോ. പി.എൻ. ഷാജി ലഹരിവിരുദ്ധ സന്ദേശം നൽകി. തൊടുപുഴ വിദ്യാഭ്യാസ ഓഫീസർ ഷീബ മുഹമ്മദ് ഉദ്ഘാടനം ചെയ്തു. ജൂണിയർ റെഡ്ക്രോസ് ഇടുക്കി ജില്ലാ കോ-ഓർഡിനേറ്റർ ജോർജ് ജേക്കബ് മുഖ്യപ്രഭാഷണം നടത്തി. ജെആർസി ജില്ലാ പ്രസിഡന്‍റ് ജയിംസ് ടി. മാളിയേക്കൽ, റെഡ്ക്രോസ് പ്രതിനിധി പി.എസ്. ഭോഗീന്ദ്രൻ, സ്കൂൾ ഹെഡ്മിസ്ട്രസ് ജെനി വി. രാഘവൻ, അടിമാലി ഉപജില്ലാ കോ-ഓർഡിനേറ്റർ ഇ.കെ. ജിജിമോൻ, ഐആർഡിഎസ് തൊടുപുഴ താലൂക്ക് ചെയർമാൻ മനോജ് കോക്കാട്ട്, റെഡ്ക്രോസ് ജില്ലാ പ്രതിനിധി കെ.എം. ജലാലുദീൻ, ജെആർസി ജില്ലാ ജോയിന്‍റ് കോ-ഓർഡിനേറ്റർ ജ്യോതി പി. നായർ, തൊടുപുഴ സബ് ജില്ല കോ-ഓർഡിനേറ്റർ സുനിത മോഹൻ എന്നിവർ പ്രസംഗിച്ചു. ഇന്നു 11ന് കട്ടപ്പന വിദ്യാഭ്യാസ ജില്ലയിലെ കൗണ്‍സിലേഴ്സ് യോഗം സെന്‍റ് ജോർജ് ഹയർ സെക്കൻഡറി സ്കൂളിൽ നടക്കും. റെഡ്ക്രോസ് ജില്ലാ സെക്രട്ടറി എം.ഡി. അർജുനൻ അധ്യക്ഷത വഹിക്കും. കട്ടപ്പന വിദ്യാഭ്യാസ ജില്ല വിദ്യാഭ്യാസ ഓഫീസർ ആൻസണ്‍ ജോസഫ് ഉദ്ഘാടനം ചെയ്യും. റെഡ്ക്രോസ് സംസ്ഥാന എക്സിക്യൂട്ടീവംഗം പി.എം. ഫ്രാൻസിസ് ലഹരിവിരുദ്ധജ്വാല തെളിക്കും. മുനിസിപ്പൽ കൗണ്‍സിലർ ജോയി ആനിത്തോട്ടം, ഉപജില്ലാ കോ-ഓർഡിനേറ്റർമാരായ ടി. ശിവകുമാർ, എൻ. പ്രജിത, സിനി കെ.വർഗീസ് എന്നിവർ പ്രസംഗിക്കും.

ഓക്സിജൻ പ്ലാന്‍റ് പ്രവർത്തന സജ്ജമായില്ല

ചെറുതോണി: ഇടുക്കി മെഡിക്കൽ കോളജാശുപത്രിക്കായി നിർമാണം പൂർത്തീകരിച്ച ഓക്സിജൻ പ്ലാന്‍റ് പ്രവർത്തനക്ഷമമായില്ല. പ്ലാന്‍റിലേക്ക് ഓക്സിജനുമായി വാഹനമെത്താൻ ആവശ്യമായ റോഡ് നിർമിക്കാത്തതാണ് പ്ലാന്‍റിന്‍റെ പ്രവർത്തനം ആരംഭിക്കാൻ തടസമായിരിക്കുന്നത്. 10,000 ലിറ്റർ ഓക്സിജനുമായി വന്ന വാഹനം പ്ലാന്‍റിലേക്ക് പ്രവേശിക്കാനാവാതെ തിരികെപ്പോകേണ്ടിവന്നത് വലിയ വിവാദമായിരുന്നു. രണ്ടു കോടി രൂപ മുടക്കി നിർമിച്ച പ്ലാന്‍റിന്‍റെ നിർമാണക്കമ്പനിയുടെ കരാർ വ്യവസ്ഥകളും ഉടൻ അവസാനിക്കും. നിരവധി തവണ മെഡിക്കൽ കോളജ് അധികൃതരെ നിർമാണക്കമ്പനി നോട്ടീസ് നൽകി കാര്യങ്ങൾ ധരിപ്പിച്ചെങ്കിലും അധികൃതർ നടപടി സ്വീകരിക്കാൻ തയാറായില്ല. സെപ്റ്റംബറിൽ നിർമാണക്കമ്പനിയുമായുള്ള കരാർ അവസാനിക്കും. ഇതോടെ രണ്ടു കോടി രൂപ മുടക്കി നിർമിച്ച പ്ലാന്‍റ് ഉപയോഗശൂന്യമാകും. കോവിഡ് പടർന്നു പിടിച്ചിരുന്ന കാലത്ത് യുദ്ധകാലാടിസ്ഥാനത്തിൽ നിർമിച്ച ഓക്സിജൻ പ്ലാന്‍റാണ് നിർമാണം പൂർത്തിയാക്കി മാസങ്ങൾ കഴിഞ്ഞിട്ടും പ്രവർത്തനമാരംഭിക്കാൻ സാധിക്കാതിരിക്കുന്നത്. നിർമാണജോലികൾ പൂർത്തീകരിച്ച് മാസങ്ങൾ പിന്നിട്ടിട്ടും റോഡ് ഇല്ലാത്തതിനാൽ പ്ലാന്‍റ് നഷ്ടപ്പെടുന്ന സാഹചര്യമാണ്. നിലവിലെ കരാർ കമ്പനി ഒഴിവായാൽ പുതുതായി ടെൻഡർ ചെയ്യേണ്ടിവരും. അങ്ങനെ വന്നാൽ രണ്ട് കോടി രൂപ മുടക്കി പണിത പ്ലാന്‍റും അനുബന്ധ സംവിധാനങ്ങളും പ്രയോജനമില്ലാതാവും. ജില്ലാ ഭരണകൂടം ഇടപെട്ട് പ്ലാന്‍റിലേക്കുള്ള റോഡ് നിർമിക്കാനാവശ്യമായ അടിയന്തര നടപടി സ്വീകരിക്കണമെന്ന ആവശ്യം ശക്തമായിരിക്കയാണ്.

സോനു ബിജുവിനെ മന്ത്രി ആദരിച്ചു

തൊടുപുഴ: ശ്രീലങ്കയിൽ നടന്ന അന്തർദേശീയ റോൾബോൾ ചാന്പ്യൻഷിപ്പിൽ സ്വർണം നേടിയ മുട്ടം ടെക്നിക്കൽ ഹയർ സെക്കൻഡറി സ്കൂളിലെ ഒൻപതാം ക്ലാസ് വിദ്യാർഥി സോനു ബിജുവിനെ ആദരിച്ചു. മന്ത്രി റോഷി അഗസ്റ്റിൻ ഉദ്ഘാടനം ചെയ്തു. പ്രിൻസിപ്പൽ ഹണി ജോസ് അധ്യക്ഷത വഹിച്ചു. എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ കുട്ടികളെയും ചടങ്ങിൽ അനുമോദിച്ചു. മുട്ടം പഞ്ചായത്ത് പ്രസിഡന്‍റ് മേഴ്സി ദേവസ്യ, പിടിഎ പ്രസിഡന്‍റ് സി.പി. സാജൻ, സ്റ്റാഫ് പ്രതിനിധി ബിനോയി പോൾ, അധ്യാപകൻ പി.കെ. സുരേഷ്, സ്റ്റാഫ് സെക്രട്ടറി ജി. ബിനോളിൻ എന്നിവർ പ്രസംഗിച്ചു.

ലൈഫ് ഭവന താക്കോൽദാനവും വിവിധ പദ്ധതികളുടെ ഉദ്ഘാടനവും ഇന്ന്

ഇടുക്കി: അതിദരിദ്യ്ര കുടുംബങ്ങൾക്ക് മരിയാപുരം പഞ്ചായത്ത് വാങ്ങിനൽകുന്ന സ്ഥലത്തിന്‍റെ ആധാരം കൈമാറലും നിർമാണം പൂർത്തീകരിച്ച നാല് ലൈഫ് ഭവനങ്ങളുടെ താക്കോൽദാനവും കൊച്ചുകരിന്പൻ സിഎസ്ഐ കുന്ന് സ്കൂൾപ്പടി റോഡ് നിർമാണോദ്ഘാടനവും ഇന്ന് 11നു കൊച്ചുകരിന്പനിൽ മന്ത്രി റോഷി അഗസ്റ്റിൻ നിർവഹിക്കും. പഞ്ചായത്ത് പ്രസിഡന്‍റ് ജിൻസി ജോയി അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യപ്രഭാഷണം നടത്തും. ജില്ലാ കളക്ടർ വി. വിഗ്നേശ്വരി ആധാരം കൈമാറും. ഇടുക്കി ബ്ലോക്ക് പഞ്ചായത്ത് പ്രസിഡന്‍റ് ആൻസി തോമസ് സ്ഥലംനൽകിയ വ്യക്തിയെ ആദരിക്കും. അതിദാരിദ്യ്ര നിർമാർജന പദ്ധതിയിൽ ഉൾപ്പെടുത്തിയാണ് രണ്ടു കുടുംബങ്ങൾക്ക് മരിയാപുരം പഞ്ചായത്തും ചിറ്റിലപ്പള്ളി ഫൗണ്ടേഷനും ചേർന്ന് ഭൂമി വാങ്ങിനൽകിയത്. മുഖ്യമന്ത്രിയുടെ ഗ്രാമീണ റോഡ് നിർമാണത്തിൽനിന്ന് 45 ലക്ഷവും എംഎൽഎയുടെ ആസ്തിവികസന ഫണ്ടിൽനിന്നു 20 ലക്ഷവും ചെലവഴിച്ചാണ് സിഎസ്ഐ കുന്ന് -സ്കൂൾപ്പടി റോഡ് നിർമിക്കുന്നത്. ഇതിനു പുറമേ നവീകരിച്ച കട്ടപ്പന-നടുത്തൊഴുകപ്പടി ടാങ്കുപടി റോഡിന്‍റെയും കരിന്പാനിപ്പടി ചപ്പാത്ത് ബൈപാസ് റോഡിന്‍റെയും ഉദ്ഘാടനവും വള്ളക്കടവ് പള്ളി ജംഗ്ഷനിൽ സ്ഥാപിച്ച ഹൈമാസ്റ്റ് ലൈറ്റിന്‍റെ സ്വിച്ച് ഓണ്‍ കർമവും ഇന്നു വൈകുന്നേരം 5.30ന് മന്ത്രി നിർവഹിക്കും. കട്ടപ്പന നഗരസഭ 21-ാം വാർഡിൽ നടുത്തൊഴുകപ്പടി ടാങ്കുപടി റോഡ് എംഎൽഎയുടെ പ്രാദേശിക വികസന ഫണ്ടിൽനിന്നും 10 ലക്ഷം രൂപ ചെലവഴിച്ചാണ് ഗതാഗത യോഗ്യമാക്കിയത്. കടമാക്കുഴി വാർഡിൽ കരിന്പാനിപ്പടി ചപ്പാത്ത് ബൈപാസ് റോഡിന് 25 ലക്ഷം അനുവദിച്ചാണ് നവീകരിച്ചത്. വള്ളക്കടവ് പള്ളി ജംഗ്ഷനിൽ 5,10,000 രൂപ മുടക്കിയാണ് ഹൈമാസ്റ്റ് ലൈറ്റ് സ്ഥാപിച്ചത്.

കാട്ടാനക്കലിപ്പിൽ ഗ്രാമങ്ങൾ, സഹികെട്ട് ജനങ്ങൾ

തൊടുപുഴ: വനാതിർത്തി മേഖലകളിലെ ജനാവാസ പ്രദേശങ്ങളിൽ കാട്ടാനകൾ എത്താറുണ്ടെങ്കിലും ഉൾനാടൻ പ്രദേശങ്ങളിൽ ഇവ ഇറങ്ങിത്തുടങ്ങിയതോടെ ജനങ്ങൾ ആശങ്കയുടെ മുൾമുനയിൽ. കഴിഞ്ഞ ദിവസം കടവൂർ, പയ്യാവ് പ്രദേശങ്ങളിൽ കാട്ടാനയിറങ്ങി കൃഷിദേഹണ്ഡങ്ങൾ നശിപ്പിച്ചതോടെ പ്രദേശവാസികൾക്ക് ഉറക്കംപോലും നഷ്ടമായിരിക്കുകയാണ്. നേരം ഇരുട്ടിയാൽ വീടിനു പുറത്തിറങ്ങാൻപോലും ഇവിടെയുള്ളവർക്ക് ഭയമാണ്. എപ്പോഴാണ് കാട്ടാനകൾ കണ്‍മുന്നിൽ പ്രത്യക്ഷപ്പെടുകയെന്നാണ് ഇവരുടെ ആശങ്ക. മുള്ളരിങ്ങാട് മേഖലയിൽ കാട്ടാനശല്യം തുടങ്ങിയിട്ട് നാളുകളേറെയായി. ഇവിടെ കാട്ടാനയാക്രമണത്തിൽ നേരത്തേ യുവാവ് കൊല്ലപ്പെടുകയും ചെയ്തിരുന്നു. ഇതേത്തുടർന്നു നാട്ടുകാർ കടുത്ത പ്രതിഷേധവുമായി രംഗത്തിറങ്ങിയതോടെ വനാതിർത്തി മേഖലകളിൽ ഫെൻസിംഗ് സ്ഥാപിക്കുന്നതിനുള്ള നടപടികളുമായി വനംവകുപ്പ് രംഗത്തെത്തുകയും ചെയ്തു. പി.ജെ. ജോസഫ് എംഎൽഎ അനുവദിച്ച ഫണ്ടുപയോഗിച്ച് ഒന്നരക്കിലോമീറ്റർ ദൂരവും ഡീൻ കുര്യാക്കോസ് എംപി അനുവദിച്ച ഫണ്ടുപയോഗിച്ച് ഒരു കിലോമീറ്റർ ദൂരവും ഫെൻസിംഗ് സ്ഥാപിക്കുന്നതിനുള്ള നടപടികൾ നടന്നുവരികയാണെന്ന് കോതമംഗലം ഡിഎഫ്ഒ സന്തോഷ്കുമാർ പറഞ്ഞു. എന്നാൽ, കൂടുതൽ ഭാഗത്ത് ഫെൻസിംഗ് സ്ഥാപിക്കേണ്ടതുണ്ടെന്നും ഇതിനായി സിഎസ്ആർ ഫണ്ട് ഉപയോഗപ്പെടുത്താനുള്ള ശ്രമം നടന്നുവരികയാണെന്നും അദ്ദേഹം വ്യക്തമാക്കി. കാട്ടാനകൾ വനാതിർത്തിയിൽനിന്നു ജനവാസ മേഖലയിൽ എത്തുന്നത് തടയാനായി ആർആർടി സംഘത്തിലെ രണ്ടുപേരെ നിയോഗിച്ചിട്ടുണ്ട്. ഇവർ ആനയുടെ സഞ്ചാരം സദാസമയവും നിരീക്ഷിക്കുന്നുണ്ടെങ്കിലും കടവൂരിലും പയ്യാവിലും നിരീക്ഷണം പാളി. മുള്ളരിങ്ങാട് വനമേഖലയിൽ 15-ഓളം കാട്ടാനകളുണ്ടെന്നാണ് കണക്ക്. ഇതിൽ രണ്ടു കൊന്പന്മാരാണ് കഴിഞ്ഞ ദിവസം കടവൂർ, പയ്യാവ് മേഖലകളിലെ ജനവാസ പ്രദേശങ്ങളിൽ എത്തിയത്. പിന്നീട് നാട്ടുകാരും വനംവകുപ്പധികൃതരും ചേർന്ന് വിരട്ടിയോടിച്ച് പുഴ കടത്തി കാടുകയറ്റുകയായിരുന്നു. ആഹാരം തേടിയാണ് ഇവ പുഴ കടന്ന് പൈനാപ്പിൾ തോട്ടത്തിൽ എത്തിയതെന്നാണ് കരുതുന്നത്. ഒരു ഗ്രാമത്തെ മുഴുവൻ മുൾമുനയിലാക്കിയ കാട്ടാനശല്യത്തിൽനിന്ന് ഇവിടത്തുകാരെ രക്ഷിക്കാൻ ഫലപ്രദമായ പ്രതിരോധ നടപടികൾ സ്വീകരിക്കണമെന്നാണ് ജനങ്ങളുടെ ആവശ്യം.

ചിന്നാർ വന്യജീവി സങ്കേതത്തിൽ വനമഹോത്സവം ആഘോഷിച്ചു

മറയൂർ: ചിന്നാർ വന്യജീവി സങ്കേതത്തിൽ മൂന്നാർ വൈൽഡ് ലൈഫ് വാർഡന്‍റെ നേതൃത്വത്തിൽ വനമഹോത്സവത്തിന്‍റെ ഭാഗമായി വിവിധ പരിപാടികൾ സംഘടിപ്പിച്ചു. കരിമുട്ടി മുതൽ ചിന്നാർവരെയുള്ള എസ്എച്ച് 17-ന്‍റെ ഇരുവശങ്ങളിലുമുള്ള പ്ലാസ്റ്റിക് മാലിന്യങ്ങൾ നീക്കംചെയ്യുകയും വനസന്പുഷ്ടീകരണത്തിന്‍റെ ഭാഗമായി വിത്തുകൾ വിതറുകയും ചെയ്തു. ചിന്നാർ, കരിമുട്ടി, ആലാംപെട്ടി ചെക്ക്പോസ്റ്റുകളിൽ യാത്രക്കാർക്ക് പ്രകൃതിസംരക്ഷണത്തെക്കുറിച്ച് ബോധവത്കരണം നൽകി. പാളപ്പെട്ടിയിലെ പ്രകൃതി നിവാസികൾക്ക് പ്ലാസ്റ്റിക് നിർമാർജനത്തിന്‍റെയും പ്രകൃതി സംരക്ഷണത്തിന്‍റെയും പ്രാധാന്യം വിശദീകരിക്കുന്ന ക്ലാസുകളും നടത്തി. പാന്പാർ നദീതീരത്തെ പ്ലാസ്റ്റിക് മാലിന്യങ്ങൾ നീക്കംചെയ്യുകയും ഇല്ലിത്തൈകൾ നടുകയും ചെയ്തു. മറയൂർ മഹിളാസമഖ്യ, മറയൂർ സെന്‍റ് മേരീസ് സ്കൂൾ എന്നിവിടങ്ങളിലെ വിദ്യാർഥികൾക്കായി ബോധവത്കരണ ക്ലാസുകളും സംഘടിപ്പിച്ചു. മൂന്നാർ വൈൽഡ് ലൈഫ് വാർഡൻ കെ.വി. ഹരികൃഷ്ണൻ, ചിന്നാർ അസി. വൈൽഡ് ലൈഫ് വാർഡൻ ജി. അജികുമാർ, കരിമുട്ടി ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഓഫിസർ അശോകൻ, വനംവകുപ്പ് ജീവനക്കാർ, ഇഡിസി അംഗങ്ങൾ, ഉന്നതിനിവാസികൾ, സ്കൂൾ വിദ്യാർഥികൾ എന്നിവർ പങ്കെടുത്തു. ഇത്തരം പ്രവർത്തനങ്ങൾ തുടർന്നും ആസൂത്രണം ചെയ്ത് നടപ്പാക്കുമെന്ന് മൂന്നാർ വൈൽഡ് ലൈഫ് വാർഡൻ കെ.വി. ഹരികൃഷ്ണൻ അറിയിച്ചു.

വളംവില കുതിച്ചുയർന്നു; കർഷകർക്ക് കനത്ത പ്രഹരം

തൊടുപുഴ: കാർഷിക മേഖലയ്ക്കു കനത്ത തിരിച്ചടിയായി വളംവിലയിൽ വൻവർധന. പൊട്ടാഷ് ഉൾപ്പെടെയുള്ള വളത്തിനാണ് വില വർധിപ്പിച്ചത്. കാർഷികോത്പന്നങ്ങളുടെ വിലയിടിവും തൊഴിലാളിക്ഷാമവും ഉത്പാദന മേഖലയിലെ പ്രതിസന്ധിയും കനത്ത പ്രഹരം സൃഷ്ടിക്കുന്നതിനിടെയാണ് വളത്തിന്‍റെ വിലയും വർധിപ്പിച്ചിരിക്കുന്നത്. 50 കിലോ പൊട്ടാഷിന് ജൂലൈ ഒന്നു മുതൽ 250 രൂപയാണ് വർധിപ്പിച്ചത്. ഫാക്ടംഫോസിന് രണ്ടുമാസം മുന്പ് 100 രൂപയും ഈ മാസം 25 രൂപയും ഉൾപ്പെടെ 125 രൂപയുടെ വർധനവുമുണ്ടായി. മിക്കവാറും എല്ലാ കൂട്ടുവളങ്ങളിലും ഉപയോഗിക്കുന്ന പൊട്ടാഷിനുണ്ടായ വിലവർധന മറ്റു കൂട്ടുവളങ്ങൾക്കും വില വർധിക്കുന്നതിനു കാരണമാകും. പൈനാപ്പിൾ, റബർ, തെങ്ങ്, വാഴ ഉൾപ്പെടെയുള്ള കൃഷികൾക്ക് പൊട്ടാഷ് അനിവാര്യമാണ്. മഴക്കാലമായതിനാൽ ഇതിന് ഡിമാൻഡും കൂടുതലാണ്. ഇതിനിടെയാണ് കർഷകരെ ദുരിതത്തിലാക്കി വളത്തിന് വില വർധിപ്പിച്ചിരിക്കുന്നത്. വിലവർധനവിനു പിന്നാലെ വളത്തിന്‍റെ ലഭ്യതയും കുറഞ്ഞിരിക്കുകയാണ്. പൊട്ടാഷിനും ഫാക്ടംഫോസിനും ക്ഷാമവും നേരിടുന്നുണ്ട്. വളംവിൽപ്പനശാലകളിൽ യഥാസമയം ഇവ ലഭിക്കാത്തതിനാൽ കൃത്യമായ ഇടവേളകളിൽ വളപ്രയോഗം നടത്താനാകാത്ത സാഹചര്യമാണ്. ഇത്തവണ കാലവർഷം ശക്തമായിരുന്നതിനാൽ കാർഷികമേഖലയ്ക്ക് കനത്ത തിരിച്ചടിയാണ് സൃഷ്ടിച്ചിട്ടുള്ളത്. ഭൂരിഭാഗം കൃഷികളെയും മഴക്കൂടുതൽ കാര്യമായി ബാധിച്ചിട്ടുണ്ട്. റബർ ടാപ്പിംഗ് വിരലിൽ എണ്ണാവുന്ന ദിവസം മാത്രമാണ് നടത്താനായത്. കാറ്റിൽ നിരവധിപ്പേരുടെ തന്നാണ്ടുവിളകളായ വാഴ, മരച്ചീനി, ചേന ഉൾപ്പെടെ ഒടിഞ്ഞു നശിക്കുകയും ചെയ്തു. ഇതിനിടെയാണ് വളംവില വർധിപ്പിച്ച് കർഷകന് മറ്റൊരു പ്രഹരംകൂടി നൽകിയിരിക്കുന്നത്. കാർഷികോത്പന്നങ്ങൾക്ക് മിനിമം വില നൽകി സംഭരിക്കാൻ നടപടി സ്വീകരിക്കുന്നതോടൊപ്പം കൂടുതൽ സബ്സിഡി അനുവദിച്ച് കടക്കെണിയിൽനിന്നു കർഷകരെ രക്ഷിക്കാൻ നടപടി സ്വീകരിക്കണമെന്ന ആവശ്യം ശക്തമായിരിക്കുകയാണ്.

ടൈഗർ ഒൗട്ട്സൈഡ് ടൈഗർ റിസർവ് പദ്ധതി അംഗീകരിക്കില്ല: ഡീൻ കുര്യാക്കോസ് എംപി

തൊടുപുഴ: പുതിയ കടുവാ സങ്കേതം ഇടുക്കിയിൽ ആരംഭിക്കുന്നതിനുളള ശിപാർശ അംഗീകരിക്കില്ലെന്ന് ഡീൻ കുര്യാക്കോസ് എംപി. ടൈഗർ ഒൗട്ട്സൈഡ് ടൈഗർ റിസർവ് എന്ന പേരിൽ ശിപാർശ ചെയ്തിട്ടുള്ള പദ്ധതി സദുദ്ദേശ്യത്തോടെയല്ലെന്ന് വ്യക്തമാണ്. നാട്ടിലിറങ്ങുന്ന കടുവയെയും പുലിയെയും വെടിവച്ചു കൊല്ലുകയാണ് വേണ്ടത്. ഇതിനുള്ള നിയമം നിലവിലുണ്ട്. ഈ നിയമം ഉപയോഗിച്ചാണ് പീരുമേട്ടിൽ ഉദ്യോഗസ്ഥർ കടുവയെ കൊന്നത്. കടുവയെ പിടിച്ചുകെട്ടി ഉൾക്കാട്ടിൽ തള്ളാനോ അല്ലെങ്കിൽ കൊല്ലാനോ നിയമമുള്ളപ്പോൾ, കടുവയെ സംരക്ഷിക്കാനെന്ന പേരിൽ പുതിയ കേന്ദ്രം തുടങ്ങുന്നത് ആസൂത്രിതമായ ഗൂഢാലോചനയാണ്. നിലവിലുള്ള പെരിയാർ ടൈഗർ റിസർവിന്‍റെ അതിർത്തിയും ബഫർ സോണ്‍ പ്രഖ്യാപനവും ജനദ്രോഹ നടപടിതന്നെയാണ്. ഈ സാഹചര്യത്തിൽ കൂടുതൽ ഉദ്യോഗസ്ഥർക്ക് സൗകര്യങ്ങൾ ഉണ്ടാക്കുന്നതിനും ജനവാസ കേന്ദ്രങ്ങൾ വനമായി പ്രഖ്യാപിച്ച് ജനങ്ങളെ കുടിയൊഴിപ്പിക്കാനുമുള്ള ആസൂത്രിത ശ്രമമാണ് ഇതിനു പിന്നിലെന്നു സംശയിക്കേണ്ടിയിരിക്കുന്നു. അതിനാൽ പുതിയ ടൈഗർ റിസർവ് പദ്ധതി അംഗീകരിക്കരുതെന്ന് വനം- പരിസ്ഥിതി മന്ത്രിയെ നേരിൽക്കണ്ട് ആവശ്യപ്പെടുമെന്നും വരുന്ന പാർലമെന്‍റ് സമ്മേളനത്തിൽ വിഷയം ഉന്നയിക്കുമെന്നും എംപി പറഞ്ഞു.

കുമളിയിൽ സർക്കാർ ജീവനക്കാരനു മർദനം

കുമളി: സംയുക്ത ട്രേഡ് യൂണിയന്‍റെ പണിമുടക്കിനിടെ സർക്കാർ ജീവനക്കാരനു മർദനമേറ്റു. കുമളി മൈനർ ഇറിഗേഷൻ ഓഫീസിലെ ജീവനക്കാരൻ വിഷ്ണുവിനെയാണ് സമരാനുകൂലികളായ ചിലർ ചേർന്ന് ആക്രമിച്ചത്. സമരാനുകൂലികളുടെ ആവശ്യപ്രകാരം ഓഫീസ് അടച്ച് പുറത്തു നിൽക്കുന്പോൾ സമരാനുകൂലികൾ എത്തി വിഷ്ണുവുമായി വാക്കേറ്റമുണ്ടാകുകയായിരുന്നു. ഇതിനിടയിലായിരുന്നു മർദനം. കഴിഞ്ഞ ഡിസംബറിൽ ജോലിയിൽ പ്രവേശിച്ച ഇദ്ദേഹം പരിശീലന കാലയളവിലായതിനാലാണ് ജോലിക്കെത്തിയത്. ചികിത്സ തേടിയ ജീവനക്കാരൻ പോലീസിൽ പരാതി നൽകി.

ആനയാടികുത്ത് പാറയിൽനിന്നു വീണ് യുവാവിനു പരിക്ക്

തൊമ്മൻകുത്ത്: ആനയാടികുത്ത് വെള്ളച്ചാട്ടം സന്ദർശിക്കാനെത്തിയ വിനോദ സഞ്ചാരി പാറയുടെ മുകളിൽനിന്നു കാൽ വഴുതി താഴേക്കു വീണു പരിക്കേറ്റു. ആലപ്പുഴ സ്വദേശി സനു (29) ആണ് അപകടത്തിൽപ്പെട്ടത്. ഇയാളെ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു. കോലഞ്ചേരിയിൽ നിന്നാണ് ഇയാളുൾപ്പെടുന്ന നാലംഗ സംഘം ആനയാടികുത്ത് സന്ദർശനത്തിനെത്തിയത്. എറണാകുളത്ത് ഡിസൈനിംഗ് കന്പനി ജോലിക്കാരനാണ് സനു. പാറയുടെ മുകളിൽ നിന്നു ചിത്രമെടുക്കുന്നതിനിടെ കാൽ വഴുതി വീഴുകയായിരുന്നു. നാട്ടുകാരും കാളിയാർ പോലീസും ചേർന്നാണ് ഇയാളെ രക്ഷപ്പെടുത്തിയത്. കാളിയാർ എസ്എച്ച്ഒ ബിജു ലൂക്കോസിന്‍റെ നേതൃത്വത്തിലായിരുന്നു രക്ഷാപ്രവർത്തനം.

തൊഴിലാളികൾക്കെതിരേയുള്ള കേന്ദ്രസർക്കാർ നീക്കത്തെ ചെറുക്കും: ഡിസിസി പ്രസിഡന്‍റ്

തൊടുപുഴ: തൊഴിൽനിയമങ്ങൾ പരിഷ്കരിക്കുമെന്ന് പറഞ്ഞ് തൊഴിലാളികളുടെ അവകാശങ്ങൾ കവർന്നെടുക്കാനുള്ള കേന്ദ്ര സർക്കാരിന്‍റെ നീക്കത്തെ തൊഴിലാളി സംഘടനകൾ ചെറുത്തു തോൽപിക്കുമെന്ന് ഡിസിസി പ്രസിഡന്‍റ് സി.പി. മാത്യു. ആശ, അങ്കണവാടി വർക്കർമാരുടെ ശന്പളവർധന കാര്യത്തിൽ കേന്ദ്ര സർക്കാർ സ്വീകരിക്കുന്ന നടപടി അപലപനീയമാണെന്നും തൊഴിലെടുക്കുന്നവരോടുള്ള അവഗണനയുടെ കാര്യത്തിൽ മോദിയും പിണറായിയും ഇരട്ട സഹോദരൻമാരാണെന്നും അദ്ദേഹം കുറ്റപ്പെടുത്തി. പൊതു പണിമുടക്കിന്‍റെ ഭാഗമായി വിവിധ ട്രേഡ് യൂണിയനുകളുടെ കൂട്ടായ്മയായ യുഡിടിഎഫ് മുന്നണി സംഘടിപ്പിച്ച സമര സംഗമം ഉദ്ഘാടനം ചെയ്യുകയായിരുന്നു അദ്ദേഹം. ഐഎൻടിയുസി ജില്ലാ പ്രസിഡന്‍റ് രാജാമാട്ടുക്കാരൻ അധ്യക്ഷത വഹിച്ചു. മുസ്‌ലിംലീഗ് ജില്ലാ പ്രസിഡന്‍റ് കെ.എം.എ. ഷുക്കൂർ, കെപിസിസി ജനറൽ സെക്രട്ടറി എസ്.അശോകൻ, ഐഎൻടിയുസി അഖിലേന്ത്യാ സെക്രട്ടറി എ.കെ. മണി, കേരളാ കോണ്‍ഗ്രസ് ചീഫ് കോ-ഓർഡിനേറ്റർ അപു ജോണ്‍ ജോസഫ് തുടങ്ങിയവർ പ്രസംഗിച്ചു. സംഗമത്തിനു മുന്നോടിയായി പ്രകടനവും നടത്തി.

പയ്യാവ്, വാഴക്കാല മേഖലകൾ വിറപ്പിച്ച് കാട്ടാനകൾ

തൊടുപുഴ: ജനവാസ മേഖലയിൽ ഭീതിപരത്തി കാട്ടാനകൾ. കലൂരിനു സമീപം പയ്യാവ്, വാഴക്കാല മേഖലകളിലാണ് ഇന്നലെ പുലർച്ചെ രണ്ടു കാട്ടാനകൾ എത്തിയത്. ഒട്ടേറെ വീടുകളുള്ള ഭാഗത്താണ് കൊന്പന്മാർ പുഴ കടന്നെത്തിയത്. വീടുകൾക്ക് സമീപം വരെയെത്തിയ ആനകളെ തുരത്താൻ ശ്രമിക്കുന്നതിനിടെ നാട്ടുകാർക്കു നേരേ ആനകൾ പാഞ്ഞടുത്തു. നാട്ടുകാർ ബഹളംവച്ചതോടെ ആനകൾ പുഴ കടന്നെങ്കിലും പൈ ങ്ങോട്ടൂർ പഞ്ചായത്തിലെ കടവൂർ, പനങ്കര ഭാഗത്തെത്തിയ ആനകൾ ഇവിടെയും ജനവാസ മേഖലയിൽ തന്പടിച്ചു. പിന്തിരിഞ്ഞു പോകുന്നതിനിടെ ആളുകൾക്കു നേരേ കാട്ടാനകൾ തിരിയുകയും ചെയ്തു. പിന്നീട് വനവംകുപ്പ് ആർആർടി സംഘവും നാട്ടുകാരും ചേർന്ന് പടക്കം പൊട്ടിച്ചും മറ്റും ഇവയെ തുരത്തുകയായിരുന്നു. കാർഷികവിളകൾക്ക് നാശം വരുത്തിയാണ് ആനകൾ പിൻവാങ്ങിയത്. ഇന്നലെ രാവിലെ വീടിനു പുറത്തിറങ്ങിയ കാക്കൂർ ഫ്രാൻസിസാണ് പുരയിടത്തിൽ ആനകൾ നിൽക്കുന്നത് കണ്ടത്. തുടർന്ന് പരിസരവാസികളെ വിവരമറിയിച്ചതിനെത്തുടർന്ന് നാട്ടുകാർ ഒത്തുകൂടി പൈനാപ്പിൾ തോട്ടത്തിൽ തന്പടിച്ചിരുന്ന ആനകളെ തുരത്താൻ ശ്രമമാരംഭിച്ചു. പഞ്ചായത്തംഗം ശരത് ബാബുവിന്‍റെ നേതൃത്വത്തിൽ ബഹളംവച്ചും പടക്കം പൊട്ടിച്ചും ആനകളെ തുരത്തുന്നതിനിടെയാണ് ഇവ ജനങ്ങൾക്കു നേരേ തിരിഞ്ഞത്. ആനകൾ പാഞ്ഞടുത്തപ്പോൾ രക്ഷപ്പെടാനുള്ള ഓട്ടത്തിനിടെ ചിലർ താഴെ വീണെങ്കിലും തലനാരിഴയ്ക്ക് രക്ഷപ്പെടുകയായിരുന്നു. ആനകൾ പിന്നീട് കാളിയാർ പുഴ കടന്നാണ് കടവൂർ ഭാഗത്തേക്കു പോയത്. മുള്ളരിങ്ങാട് വനമേഖലയിൽനിന്നാണ് ആനകൾ എത്തിയതെന്നാണ് നിഗമനം. ഇവിടെനിന്നു നാല് കാട്ടാനകൾ ഫെൻസിംഗ് തകർത്ത് ജനവാസ മേഖലയിലേക്ക് കടന്നിട്ടുണ്ടെന്നാണ് നാട്ടുകാർ നൽകുന്ന വിവരം. ഇതിൽ രണ്ടാനകളാണ് പയ്യാവ് ഭാഗത്തെത്തിയത്. ആദ്യമായാണ് കാട്ടാനകൾ ഇവിടെയെത്തുന്നതെന്ന് നാട്ടുകാർ പറഞ്ഞു. ജനവാസമുള്ള പ്രദേശത്തൂടെയാണ് കിലോമീറ്ററുകൾ താണ്ടി ആനകൾ രാത്രി എത്തിയതെന്നാണ് സൂചന. ആയിരക്കണക്കിന് ആളുകൾ താമസിക്കുന്ന മേഖലയിൽ കാട്ടാനകൾ എ ത്തിയതിനെത്തുടർന്ന് പ്രദേശവാസികൾ ഭീതിയിലാണ്. മുള്ളരിങ്ങാട്ടെ പ്രതിരോധം പാതിവഴിയിൽ കാട്ടാനശല്യം അതിരൂക്ഷമായ മുളളരിങ്ങാട് മേഖലയിൽ കാട്ടാനകളെ പ്രതിരോധിക്കാനുള്ള നടപടികൾ പാതിവഴിയിലാണ്. അതീവ ഭീതിയോടെയാണ് ജനങ്ങൾ ഇവിടെ കഴിയുന്നത്. എല്ലാ ദിവസം ജനവാസ മേഖലയ്ക്കു സമീപമാണ് കാട്ടാനകൾ തന്പടിക്കുന്നത്. പുലർച്ചെ പുറത്തിറങ്ങുവരിൽ പലരും കാട്ടാനകളുടെ മുന്നിൽ അകപ്പെടാറുണ്ട്. ഭാഗ്യംകൊണ്ടാണ് ഇവർ ആനകളുടെ ആക്രമണത്തിൽനിന്നു രക്ഷപ്പെടുന്നത്. ഏതാനും ദിവസം മുൻപ് കാട്ടാനയുടെ മുന്നിൽ അകപ്പെട്ട വ്യാപാരി തലനാരിഴയ്ക്കാണ് രക്ഷപ്പെട്ടത്. മുങ്ങരിങ്ങാട് കൂറ്റപ്പിള്ളിൽ ജോയിയാണ് ആനയുടെ മുന്നിൽനിന്നു രക്ഷപ്പെട്ടത്. വലിയകണ്ടംചാലിൽ ബേക്കറിയും ചായക്കടയും നടത്തുന്ന ജോയി രാവിലെ കടയിലേക്കു പോകാൻ ബൈക്കിൽ വരുന്നതിനിടെ യാണു കാട്ടാനയുടെ മുന്നിൽപ്പെട്ടത്. ബൈക്ക് ഉപേക്ഷിച്ച് ഓടി രക്ഷപ്പെടുകയായിരു ന്നു. മുള്ളരിങ്ങാട് അമയൽതൊട്ടിയിൽ കാട്ടാനയുടെ ആക്രമണത്തിൽ യുവാവ് മരിച്ചതിനെത്തുടർന്ന് ഇവിടെ പ്രതിരോധ സംവിധാനം ഒരുക്കുമെന്നായിരുന്നു അധികൃതരുടെ പ്രഖ്യാപനം. ഇതിന്‍റെ ഭാഗമായി വനാതിർത്തിയിൽ ഫെൻസിംഗ് സ്ഥാപിക്കുന്നതിന് പി.ജെ. ജോസഫ് എംഎൽഎയുടെ ഫണ്ടിൽനിന്ന് 10 ലക്ഷം രൂപയും ഡീൻ കുര്യാക്കോസ് എംപി എട്ടു ലക്ഷം രൂപയും അനുവദിച്ചിരുന്നു. ഇതിൽ എംഎൽഎ ഫണ്ടിൽനിന്ന് അനുവദിച്ച തുക ഉപയോഗിച്ച് 1.3 കിലോമീറ്റർ ദൂരം ഫെൻസിംഗ് പൂർത്തിയാക്കി. എംപി ഫണ്ട് ഉപയോഗിച്ച് ഒരു കിലോമീറ്റർ ദൂരം ഫെൻസിംഗ് സ്ഥാപിക്കാനുള്ള പ്രവർത്തനങ്ങൾ നടന്നുവരികയാണ്. എന്നാൽ നാലു കിലോമീറ്റർ ദൂരമെങ്കിലും അടിയന്തരമായി ഫെൻസിംഗ് സ്ഥാപിച്ചെങ്കിൽ മാത്രമേ ആനകളെ വനമേഖലയിൽത്തന്നെ നിർത്താൻ കഴിയൂ. അമയൽതൊട്ടിയിലെ കാട്ടാന ആക്രമണത്തിനു പിന്നാലെ ഫെൻസിംഗ് സ്ഥാപിക്കാൻ ഏഴു ലക്ഷം രൂപ അനുവദിക്കുമെന്ന് ജില്ലാ ഭരണകൂടം അറിയിച്ചെങ്കിലും ഇതുവരെ ലഭിച്ചിട്ടില്ല. പൂർണമായും ഫെൻസിംഗ് സ്ഥാപിച്ചില്ലെങ്കിൽ ആനകൾ കൂട്ടത്തോടെ ജനവാസ മേഖലയിലേക്ക് കടക്കാനുള്ള സാധ്യതയേറെയാണെന്ന് നാട്ടുകാർ പറയുന്നു.

പണിമുടക്കിന് ഐക്യദാർഢ്യവുമായി പത്രപ്രവർത്തക യൂണിയൻ

തൊടുപുഴ: ദേശീയ പണിമുടക്കിന് ഐക്യദാർഢ്യം പ്രകടിപ്പിച്ച് പത്രപ്രവർത്തക യൂണിയൻ ഇടുക്കി ജില്ലാ കമ്മിറ്റിയുടെ നേതൃത്വത്തിൽ മാധ്യമ പ്രവർത്തകർ ടൗണിൽ പ്രകടനം നടത്തി. പ്രസ് ക്ലബ്ബിനു സമീപത്തുനിന്നും ആരംഭിച്ച പ്രകടനം ഗാന്ധിസ്ക്വയർ ചുറ്റി പ്രസ് ക്ലബ്ബിനു മുന്നിൽ സമാപിച്ചു. ലേബർ കോഡ് പിൻവലിക്കുക, വേജ് ബോർഡ് പുനസ്ഥാപിക്കുക തുടങ്ങിയ മുദ്രാവാക്യങ്ങളുമായി നടത്തിയ പ്രകടനത്തിൽ നിരവധി മാധ്യമപ്രവർത്തകർ പങ്കെടുത്തു. തുടർന്നു നടന്ന ഐക്യദാർഢ്യ സമ്മേളനം മുതിർന്ന മാധ്യമ പ്രവർത്തകനും സിപിഐ മുൻ ജില്ലാ സെക്രട്ടറിയുമായ കെ.കെ.ശിവരാമൻ ഉദ്ഘാടനം ചെയ്തു. പ്രസിഡന്‍റ് വിനോദ് കണ്ണോളിൽ അധ്യക്ഷത വഹിച്ചു. സെക്രട്ടറി ജെയിസ് വാട്ടപ്പിള്ളിൽ, മുൻ പ്രസിഡന്‍റുമാരായ ഹാരിസ് മുഹമ്മദ്, സോജൻ സ്വരാജ്, ജോയിന്‍റ് സെക്രട്ടറി അഖിൽ സഹായി, ട്രഷറർ ആൽവിൻ തോമസ്, കമ്മിറ്റിയംഗങ്ങളായ വി.വി.നന്ദു, ഷിയാസ് ബഷീർ തുടങ്ങിയവർ പ്രസംഗിച്ചു.

ഓൺലൈനിലൂടെ ലക്ഷങ്ങൾ തട്ടിയെടുത്ത യുവാവ് കർണാടക പോലീസിന്‍റെ പിടിയിൽ

രാജാക്കാട്: ഓൺലൈനിലൂടെ ലക്ഷങ്ങൾ തട്ടിയെടുത്ത ഇടുക്കി സ്വദേശിയായ 22 കാരൻ കർണാടക പോലീസിന്‍റെ പിടിയിൽ. സേനാപതി പഞ്ചായത്തിലെ മുക്കുടിൽ സ്വദേശിയായ തൈപ്പറമ്പിൽ അദ്വൈതിനെയാണ് കർണാടക സൈബർ പോലീസ് അറസ്റ്റ് ചെയ്തത്. വിവിധ ഓൺലൈൻ സേവനങ്ങളും വിദേശത്ത് ജോലിയും വാഗ്ദാനം ചെയ്ത് ഇയാൾ ലക്ഷങ്ങൾ തട്ടിയെടുത്തതായാണ് സൂചന. കർണാടക ഗാഥായി സൈബർ പോലീസാണ് ഇടുക്കിയിലെത്തി അദ്വൈതിനെ അറസ്റ്റ് ചെയ്തത്. ഈ സ്റ്റേഷൻ പരിധിയിൽ മാത്രം 20 ലക്ഷത്തിന്‍റെ തട്ടിപ്പ് നടത്തിയിട്ടുണ്ട്. കർണാടകയിലെ വിവിധ സ്റ്റേഷനുകളിൽ സമാനമായ പരാതികൾ ഉണ്ട്. അദ്വൈതിന്‍റെ നേതൃത്വത്തിലുള്ള സംഘം കർണാടകയിലെ വിവിധ മേഖലയിലുള്ള ആളുകളെ കേന്ദ്രീകരിച്ചു തട്ടിപ്പ് നടത്തുകയായിരുന്നു. പണം ഇരട്ടിയാക്കൽ, വിദേശത്ത് ജോലി,സോഷ്യൽ മീഡിയിലൂടെ ബിസിനസ് പ്രൊമോഷൻ, വെബ്സൈറ്റ് നിർമാണം തുടങ്ങി നിരവധി വാഗ്ദാനങ്ങൾ നടത്തിയാണ് ഇയാളും കൂട്ടാളികളും തട്ടിപ്പ് നടത്തിയത്. കർണാടകയിൽ പഠിക്കുന്ന വിദ്യാർഥികളുടെ പേരിൽ ബാങ്ക് അക്കൗണ്ടുകൾ തുടങ്ങി ഇതിലൂടെയായിരുന്നു പണം സ്വീകരിച്ചിരുന്നത്. അദ്വൈതിന്‍റെ നേതൃത്വത്തിൽ വൻ സംഘം പ്രവർത്തിച്ചുവരുന്നതയാണ് സൂചന.നാട്ടിൽ വാഹന കച്ചവടം ആണെന്നാണ് ഇയാൾ പറഞ്ഞിരുന്നത്.

ഷോപ്പിംഗ് കോംപ്ലക്സ് കെട്ടിടം അപകടാവസ്ഥയിൽ

മൂലമറ്റം: അറക്കുളം പഞ്ചായത്തിന്‍റെ മൂലമറ്റം ടൗണിലെ ഷോപ്പിംഗ് കോംപ്ലക്സ് കെട്ടിടം അപകടാവസ്ഥയിൽ. വൻ ദുരന്തസാധ്യതയുണ്ടായിട്ടും ബന്ധപ്പെട്ടവർ മൗനം പാലിക്കുന്നതായി നാട്ടുകാർ പറയുന്നു. 1982ൽ നിർമ്മാണം ആരംഭിച്ച് 84ലാണ് ഇത് ഉദ്ഘാടനം ചെയ്തത്. കെട്ടിടത്തിന്‍റെ ഗ്രൗണ്ട് ഫ്ളോറിൽ വ്യാപാരസ്ഥാപനങ്ങളും ഒന്നാം നിലയിൽ ജില്ലാ മണ്ണ് സംരക്ഷണ ഓഫീസും മുകളിലത്തെ നിലയിൽ ഫാഷൻ ഡിസൈനിംഗും പട്ടികവർഗ വിഭാഗത്തിന്‍റെ ആരോഗ്യ മെഡിക്കൽ യൂണിറ്റുമാണ് പ്രവർത്തിക്കുന്നത്. ഗ്രൗണ്ട് ഫ്ളോറിൽ പൊതുജനങ്ങൾക്കുള്ള വെയ്റ്റിംഗ് ഷെഡുമുണ്ട്. കെട്ടിടത്തിന്‍റെ കോണ്‍ക്രീറ്റ് നിരവധിത്തവണ പൊളിഞ്ഞു വീണിരുന്നു. കോണ്‍ക്രീറ്റ് പൊളിഞ്ഞതിനെത്തുടർന്ന് കന്പി തെളിഞ്ഞ നിലയിലാണ്. കാലപ്പഴക്കമുള്ള കെട്ടിടത്തിന്‍റെ പല ഭാഗത്തും ബലക്ഷയവുമുണ്ട്. ഇതിനു പുറമേ സ്വകാര്യ ബസ്‌സ്റ്റാൻഡിൽ എത്തുന്ന സ്വകാര്യ വാഹനങ്ങൾ ഈ കെട്ടിടത്തിനടിയിലാണ് പാർക്ക് ചെയ്യുന്നത്. ഇത് ഏറെ ആശങ്ക ഉണ്ടാക്കുന്നു. കെട്ടിടം തകർന്നാൽ സമീപത്തെ വ്യാപാര സ്ഥാപനങ്ങൾക്കും ഇതുവഴി സഞ്ചരിക്കുന്നവർക്കും അപകടമുണ്ടാകുമെന്നുറപ്പാണ്. ഇക്കാര്യത്തിൽ ദുരന്തനിവാരണ അഥോറിറ്റിയും ജില്ലാ ഭരണകൂടവും അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]