റോഡിൽ മാലിന്യം തള്ളിയ വീട്ടമ്മയ്ക്ക് 5000 രൂപ പിഴ
1428761
Wednesday, June 12, 2024 3:42 AM IST
ഉടുന്പന്നൂർ: റോഡിൽ മാലിന്യം തള്ളിയതിന് 5000 രൂപ പിഴയടപ്പിച്ച് ഉടുന്പന്നൂർ പഞ്ചായത്ത്. കോതമംഗലം സ്വദേശിനിയിൽനിന്നാണ് പഞ്ചായത്ത് പിഴയീടാക്കിയത്.
കോതമംഗലത്തുനിന്ന് ഉടുന്പന്നൂർവഴി കട്ടപ്പനയ്ക്ക് യാത്ര ചെയ്ത വീട്ടമ്മയാണ് യാത്രയ്ക്കിടെ ഉപ്പുകുന്ന് ഭാഗത്ത് റോഡിൽ മാലിന്യം തള്ളിയത്. പിന്നീട് ഇതുവഴി പോയ പഞ്ചായത്ത് പ്രസിഡന്റ് എം. ലതീഷ് മാലിന്യനിക്ഷേപം ശ്രദ്ധയിൽപ്പെട്ടതിനെത്തുടർന്ന് നടത്തിയ പരിശോധനയിൽ മാലിന്യത്തിൽനിന്നു ലഭിച്ച ആശുപത്രി ബില്ലിൽ കണ്ട ഫോണ് നന്പറിൽ ബന്ധപ്പെട്ട് ആളെ വിളിച്ചുവരുത്തി പിഴ അടപ്പിക്കുകയായിരുന്നു.
പൊതു സ്ഥലത്ത് മാലിന്യങ്ങൾ വലിച്ചെറിയുന്നവർക്കെതിരേ കർശന നടപടികൾ തുടരുമെന്ന് പഞ്ചായത്ത് സെക്രട്ടറി കെ.പി.യശോധരൻ അറിയിച്ചു.