കാഞ്ഞൂര്‍: കിഴക്കുംഭാഗം ഉണ്ണിമിശിഹാ പള്ളിയില്‍ മെഗാ മെഡിക്കല്‍ ക്യാമ്പ് (സൗഖ്യം 2022) ഡിസംബര്‍ നാലിനു നടക്കും. അങ്കമാലി ലിറ്റില്‍ ഫ്ളവര് ആശുപത്രിയുടെയും ജോയ് ആലൂക്കാസ് ഫൗണ്ടേഷന്‍റെയും സഹകരണത്തോടെ കിഴക്കുംഭാഗം ഇന്‍ഫന്‍റ് ജീസസ് ചാരിറ്റി സംഘടിപ്പിക്കുന്ന മെഗാ മെഡിക്കല്‍ ക്യാമ്പില്‍ വിദഗ്ധ ഡോക്ടര്‍മാര്‍ ഉള്‍പ്പടെ അറുപതംഗ മെഡിക്കല്‍ സംഘത്തിന്‍റെ സേവനം ലഭിക്കും. രാവിലെ എട്ടു മുതല്‍ ഉച്ചയ്ക്ക് രണ്ടു വരെയാണു ക്യാമ്പ്.
ജനറല്‍ മെഡിസിന്‍, കാര്‍ഡിയോളജി, പീഡിയാട്രിക്‌സ്, ഇഎന്‍ടി, ഓര്‍ത്തോപീഡിക്‌സ്, ഗൈനക്കോളജി, നേത്രരോഗം, ദന്തരോഗം തുടങ്ങിയ വിഭാഗങ്ങളിലെ ഡോക്ടര്‍മാരുടെ പരിശോധനയും വിവിധ ടെസ്റ്റുകളും മരുന്നുകളും സൗജന്യമായി ക്യാമ്പില്‍ ലഭ്യമാക്കും. കാഴ്ചയ്ക്കു ബുദ്ധിമുട്ടുള്ള 150 പേര്‍ക്ക് ക്യാമ്പുവഴി സൗജന്യമായി കണ്ണടകള്‍ വിതരണം ചെയ്യും. അര്‍ഹതപ്പെട്ടവര്‍ക്കു ലിറ്റില്‍ ഫ്ളവര് ആശുപത്രിയില്‍ തിമിര ശസ്ത്രക്രിയ സൗജന്യമായി നടത്തും. ബിപി, ഇസിജി, ഷുഗര്‍, കാഴ്ച, കേള്‍വി പരിശോധനകള്‍ക്കുള്ള പ്രത്യേക സൗകര്യം ക്യാമ്പിലുണ്ടാകുമെന്നു കിഴക്കുംഭാഗം പള്ളി വികാരി ഫാ. സുഭാഷ് മാളിയേക്കല്‍ അറിയിച്ചു. കാഞ്ഞൂര്‍ ഗ്രാമപഞ്ചായത്ത് പ്രസിഡന്‍റ് ഗ്രേസി ദയാനന്ദന്‍, പഞ്ചായത്തംഗം സിമി ടിജോ, പുതിയേടം സര്‍വീസ് സഹകരണ ബാങ്ക് പ്രസിഡന്‍റ് ടി.ഐ. ശശി തുടങ്ങിയവര്‍ ഉദ്ഘാടനച്ചടങ്ങില്‍ പങ്കെടുക്കും. രജിസ്ടേഷന് 9846595498, 9846878190 എന്നീ നന്പറുകളിൽ വിളിക്കുക.