കേച്ചേരി: ചൂണ്ടൽ പഞ്ചായത്ത് 2022-2023 വർഷത്തെ വാർഷിക പദ്ധതിയിലുൾപ്പെടുത്തി സംഘടിപ്പിക്കുന്ന ചരിത്ര സാംസ്ക്കാരികോത്സവത്തിന് ഒരുക്കങ്ങളായി.
സ്വാതന്ത്ര്യത്തിന്റെ 75-ാം വാർഷികം, സ്ത്രീപക്ഷ നവകേരളം എന്നീ പദ്ധതികളിലൂന്നി, പഞ്ചായത്തിലെ 18 വാർഡുകളിലും ഗ്രാമോത്സവങ്ങളാണ് നടക്കുക. ഗാന്ധി ജയന്തി ദിനമായ ഒക്ടോബർ രണ്ടു മുതൽ കേരളപ്പിറവി ദിനമായ നവംബർ ഒന്നു വരെ നീളുന്ന ചരിത്ര സാംസ്ക്കാരി കോത്സവത്തിൽ വിവിധ വിഷയങ്ങളിൽ സെമിനാറുകൾ, കലാ-കായിക സാഹിത്യമത്സരങ്ങൾ, വിളംബര ജാഥ, കേരളത്തിന്റെ തനിമ വെളിപ്പെടുത്തുന്ന സാംസ്ക്കാരിക ഘോഷയാത്ര, മദ്യ-മയക്കുമരുന്ന് ബോധവത്ക്കരണ ക്ലാസുകൾ, കാർഷിക വിജ്ഞാന സദസ്, മാലിന്യമുക്ത പഞ്ചായത്ത് എന്നിവയും നടത്തും.
മുന്നൊരുക്കപ്രവർത്തനങ്ങൾക്കായി ചൂണ്ടൽ പഞ്ചായത്ത് പ്രസിഡന്റ് രേഖ സുനിൽ ചെയർമാനായും പഞ്ചായത്ത് ആസൂത്രണ സമിതി അംഗം എം.ബി.പ്രവീണ് ജനൽ കണ്വീനറായും 501 അംഗ സംഘാടകസമിതിയാണ് രൂപീകരിച്ചത്.
കേച്ചേരി സിറ്റി മഹൽ ഓഡിറ്റോറിയത്തിൽ ചൊവ്വന്നൂർ പഞ്ചായത്ത് പ്രസിഡന്റ്് ആൻസി വില്യംസ് സംഘാടക സമിതി രൂപീകരണ യോഗം ഉദ്ഘാടനം ചെയ്തു. പഞ്ചായത്ത് പ്രസിഡന്റ് രേഖ സുനിൽ അധ്യക്ഷത വഹിച്ചു. വൈസ് പ്രസിഡന്റ്പി.ടി. ജോസ് വിശദീകരണവും ആസൂത്രണ സമിതി ഉപാദ്ധ്യക്ഷൻ ടി.സി.സെബാസ്റ്റ്യൻ മാസ്റ്റർ ആമുഖ പ്രഭാഷണവും നടത്തി.
സംസ്ഥാന കെൽ ചെയർമാൻ പി.കെ.രാജൻ മാസ്റ്റർ, ചൂണ്ടൽ പഞ്ചായത്ത് സ്ഥിരം സമിതി അധ്യക്ഷരായ സുനിത ഉണ്ണികൃഷ്ണൻ, ഹസനുൽ ബെന്ന, വി.പി.ലീല,വ്യാപാരി പ്രതിനിധികളായ സജി ചിറമ്മൽ, തോമസ് പട്ടിക്കര, എക്സൈസ് ഓഫീസർ രതിക ഷാജി, കുടുംബശ്രീ ചെയർപേഴ്സണ് ജിഷ സുനിൽകുമാർ എൻ. ആർ. ഇ.ജി.എ.ഇ. വി. ധന്യ, പഞ്ചായത്ത് സെക്രട്ടറി പി.എ.ഷൈല എന്നിവർ പങ്കെടുത്തു.