അന്നമനട പഞ്ചായത്ത്
അന്നമനട: പശ്ചാത്തല മേഖലക്കും കൃഷിക്കും സേവന മേഖലക്കും ഉൗന്നൽ നൽകി 2023-24 സാന്പത്തിക വർഷത്തെ അന്നമനട പഞ്ചായത്ത് ബജറ്റ് വൈസ് പ്രസിഡന്റ് ടെസി ടൈറ്റസ് അവതരിപ്പിച്ചു. 36,91,59,729 രൂപ വരവും 35,23,79,800 രൂപ ചെലവും 1,67,79,929 രൂപ മിച്ചവും പ്രതീക്ഷിക്കുന്ന ബജറ്റാണ് അവതരിപ്പിച്ചിരിക്കുന്നത്. ആരോഗ്യ, വിദ്യാഭ്യാസ, സാംസ്കാരിക മേഖലകൾക്കും അർഹമായ പ്രാധാന്യം നൽകിയ ബജറ്റിൽ ദേശീയ ഗ്രാമീണ തൊഴിലുറപ്പ് പദ്ധതിക്ക് രണ്ടുകോടി വകയിരുത്തിയിട്ടുണ്ട്. വികസന പ്രവർത്തനങ്ങൾക്കായി 18.89 കോടിയും ശുദ്ധജലത്തിനായി ഒരു കോടിയും നീക്കിവച്ച ബജറ്റ് പട്ടികജാതിക്കാരുടെ ഉന്നമനം, വനിതാക്ഷേമം, സ്ത്രീ ശാക്തീകരണം, വയോജനങ്ങളുടെ ക്ഷേമം എന്നിവക്കും മതിയായ പരിഗണ നൽകിയിട്ടുണ്ട്. കാർഷിക മേഖലക്ക് ഒരു കോടിയും അതിദരിദ്രരുടെ ദാരിദ്ര്യ ലഘൂകരണത്തിന് 2.25 കോടിയും നീക്കിവച്ചിട്ടുണ്ട്. സാമൂഹ്യ സുരക്ഷാ പെൻഷൻ ഇനത്തിൽ എട്ടര കോടിയാണ് വകയിരുത്തിയിരിക്കുന്നത്.
ഗ്രാമപഞ്ചായത്ത് പ്രസിഡന്റ് പി.വി. വിനോദ് അധ്യക്ഷനായി. സ്ഥിരം സമിതി അധ്യക്ഷന്മാരായ സിന്ധു ജയൻ, ടി.കെ. സതീശൻ, കെ.എ. ഇക്ബാൽ, പഞ്ചായത്ത് സെക്രട്ടറി ജോണ് ജോണ് പാറയ്ക്ക എന്നിവർ പ്രസംഗിച്ചു.
ആളൂർ പഞ്ചായത്ത്
ആളൂർ: ജനകീയ പങ്കാളിത്തത്തോടെ അടുത്ത രണ്ടു മാസം കൊണ്ട് അതിദാരിദ്ര്യ നിർമാർജനം, ശുചിത്വം, ആധുനിക ഗ്യാസ് ക്രിമറ്റോറിയം, ആധുനിക അറവുശാല, സമഗ്ര ഉറവിട ജൈവ മാലിന്യ സംസ്കരണം, ആളൂർ പഞ്ചായത്ത് കമ്മ്യൂണിറ്റി ഹാൾ ആൻഡ് ഷോപ്പിംഗ് കോംപ്ലക്സ്, ആളൂർ സെന്റർ ട്രയങ്കിൾ സൗന്ദര്യവത്കരണം എന്നി പദ്ധതികൾക്ക് പ്രാധാന്യം നൽകി ആളൂർ ഗ്രാമപഞ്ചായത്ത് ബജറ്റ് വൈസ് പ്രസിഡന്റ് രതി സുരേഷ് അവതരിപ്പിച്ചു. 34,21,52,261 രൂപയുടെ വരവും, 33,27,24,725 രൂപയുടെ ചെലവും, 94,27,936 രൂപയുടെ മിച്ചമുള്ള ബജറ്റാണ് അവതരിപ്പിച്ചത്. പഞ്ചായത്ത് പ്രസിഡന്റ് കെ.ആർ. ജോജോ അധ്യക്ഷത വഹിച്ചു.
കാട്ടൂർ പഞ്ചായത്ത്
കാട്ടൂർ: ലൈഫ് ഭവനപദ്ധതിയിലൂടെ മൂന്നുവർഷംകൊണ്ട് കാട്ടൂരിനെ സന്പൂർണ പാർപ്പിട ഗ്രാമമാക്കാനൊരുങ്ങി ഗ്രാമപ്പഞ്ചായത്തിന്റെ 2023-24 സാന്പത്തിക വർഷത്തേക്കുള്ള വാർഷിക ബജറ്റ്. ഇതിന്റെ ഭാഗമായി ഈ സാന്പത്തികവർഷം ഭവനനിർമാണത്തിന് 1.53 കോടി രൂപ വകയിരുത്തി. 15.37 കോടി വരവും 14.96 കോടി ചെലവും 40.65 ലക്ഷം മിച്ചവും പ്രതീക്ഷിക്കുന്ന ബജറ്റ് വൈസ് പ്രസിഡന്റ് വി.എം. കമറുദ്ദീൻ അവതരിപ്പിച്ചു. വെള്ളക്കെട്ട് ശാസ്ത്രീയരീതിയിൽ ഒഴിവാക്കുന്നതിന് പദ്ധതികൾ നടപ്പാക്കും. കാട്ടൂർ ഗ്രാമീണ മാർക്കറ്റ് ഈ വർഷം തുറക്കുമെന്നും ബജറ്റ് പറയുന്നു. പ്രസിഡന്റ് ടി.വി. ലത അധ്യക്ഷയായി.
മതിലകം പഞ്ചായത്ത്
മതിലകം: ഭവനനിർമാണത്തിന് പ്രാധാന്യം നൽകി മതിലകം ഗ്രാമപ്പഞ്ചായത്ത് ബജറ്റ് അവതരിപ്പിച്ചു. 24 കോടി 50 ലക്ഷത്തി 2086 രൂപ വരവും, 22 കോടി 66 ലക്ഷത്തി 28,061 രൂപ ചിലവും ഒരുകോടി 83 ലക്ഷത്തി 74,025 രൂപ മിച്ചവും പ്രതീക്ഷിക്കുന്ന ബജറ്റാണ് പഞ്ചായത്ത് വൈസ് പ്രസിഡന്റ് വി. എസ് . രവീന്ദ്രൻ അവതരിപ്പിച്ചത്. ഉത്പാദന - സേവന - പശ്ചാത്തല മേഖലകൾക്ക് പ്രാധാന്യം നൽകിക്കൊണ്ടുള്ള ബജറ്റിൽ ലൈഫ് മിഷൻ പദ്ധതി മുഖേന ഭവന നിർമാണത്തിന് സഹായധനം, മത്സരാധിഷ്ഠിത കൃഷി പ്രോത്സാഹനം, ജൽജീവൻ മിഷൻ പദ്ധതിയിലൂടെ എല്ലാ വീട്ടിലും കുടിവെള്ള കണക്ഷൻ എത്തിക്കുന്ന പദ്ധതി, പഞ്ചായത്ത് ഓഫീസും കൈമാറിക്കിട്ടിയ സ്ഥാപനങ്ങളും തെരുവുവിളക്കുകളും പാപ്പിനിവട്ടം സഹകരണ ബാങ്കുമായി സഹകരിച്ച് സോളാർ ആക്കുക, പരിശീലനത്തിനായി രണ്ട് സാംസ്കാരിക നിലയങ്ങൾ കേന്ദ്രീകരിച്ച് പഠനകേന്ദ്രം തുടങ്ങിയവയാണ് പ്രധാനമായും ബജറ്റിൽ അവതരിപ്പിച്ചത്. പഞ്ചായത്ത് പ്രസിഡന്റ് സീനത്ത് ബഷീർ അധ്യക്ഷത വഹിച്ചു. പഞ്ചായത്ത് സെക്രട്ടറി കെ. എസ് .രാമദാസ്, സ്ഥിരം സമിതി അധ്യക്ഷന്മാർ, ജനപ്രതിനിധികൾ തുടങ്ങിയവർ പങ്കെടുത്തു.
വേളൂക്കര പഞ്ചായത്ത്
കൊറ്റനെല്ലൂർ: ദാരിദ്ര്യ ലഘൂകരണത്തിനും ഭവനനിർമാണത്തിനും ഉൗന്നൽ നൽകി വേളൂക്കര പഞ്ചായത്തിലെ 2023-24 സാന്പത്തിക വർഷത്തെ ബജറ്റ് വൈസ് പ്രസിഡന്റ് ജെൻസി ബിജു അവതരിപ്പിച്ചു. പഞ്ചായത്ത് പ്രസിഡന്റ് കെ.എസ്. ധനീഷ് അധ്യക്ഷനായി. ദാരിദ്യ്രലഘൂകരണ പ്രവർത്തനങ്ങൾക്ക് 2.15 കോടിയും ഭവനനിർമാണ പ്രവർത്തനങ്ങൾക്ക് 4.4 കോടി രൂപയും ഉൾപ്പെടെ 28.18 കോടി വരവും 27.59 കോടി ചെലവും 58.63 ലക്ഷം നീക്കിയിരിപ്പുമുള്ള ബജറ്റാണ് അവതരിപ്പിച്ചത്.