തൃശൂർ: ജ്യോതി എൻജിനീയറിംഗ് കോളജിൽ 31, ഏപ്രിൽ ഒന്ന് ദിവസങ്ങളിൽ ടെക്ഫെസ്റ്റ് നടക്കും. വിദ്യാർഥികൾ രൂപകൽപ്പന ചെയ്ത പ്രോജക്ട് മത്സരത്തിൽ കേരളത്തിലെ വിവിധ കലാലയങ്ങളിൽനിന്നുള്ളവർ പങ്കെടുക്കുമെന്നു കോളജ് ഫിനാൻസ് മാനേജർ ഫാ. ഡേവിഡ് നെട്ടിക്കാടൻ പത്രസമ്മേളനത്തിൽ പറഞ്ഞു. വിജയികൾക്ക് അറുപതിനായിരം രൂപ സമ്മാനം നൽകും. വെള്ളിയാഴ്ച്ച രാവിലെ പത്തിനു പരിപാടികൾ ആരംഭിക്കും. ദക്ഷിണേന്ത്യയിലെ വിവിധ കോളജുകളിൽ നിന്നുള്ള വിദ്യാർഥികളുടെ സംഘനൃത്ത മത്സരവും ഉണ്ടാകും. 12 ടീമുകൾ പങ്കെടുക്കും. വിജയികൾക്ക് ഒരു ലക്ഷം രൂപയാണ് സമ്മാനം.
വെർച്വൽ റിയാലിറ്റി ടെക്നോളജി, പ്രോഗ്രാമിംഗ് കോഡ് കോന്പറ്റീഷൻ, റോബോട്ടിക് ലൈൻ ഫോളോവർ, ഇലക്ട്രിക്കൽ ഹൈബ്രിഡ് വാഹനങ്ങളുടെ എക്സിബിഷൻ, ആർട്ടിഫിഷ്യൽ ഇന്‍റലിജൻസ് വർക്ക്ഷോപ്പ്, ബിൽഡിംഗ് മോഡലുകളുടെ പ്രദർശനം, പ്ലാനിറ്റോറിയം, റിമോട്ട് കണ്ട്രോളിൽ വിമാനങ്ങളും ഹെലികോപ്റ്ററുകളും പറത്തൽ, തുടങ്ങി നിരവധി പ്രോഗ്രാമുകൾ വിവിധ ഡിപ്പാർട്ട്മെന്‍റുകളുടെ കീഴിൽ നടക്കും. ഏറ്റവും മുന്തിയ വണ്ടികളുടെയും വിന്‍റേജ് വാഹനങ്ങളുടെയും മോട്ടോർ ഷോ, ബൈക്ക് ബൊണാൻസ്, തുടങ്ങി നിരവധി മത്സരങ്ങൾ ഈ ദിവസങ്ങളിൽ നടക്കും. പത്രസമ്മേളനത്തിൽ വിവേക് ലൂക്കോസ്, ജോർജ് ചിറമ്മൽ, സി.ജെ. ടോണി, എവിൻ സാജൻ എന്നിവർ പങ്കെടുത്തു.