ADVERTISEMENT

ADVERTISEMENT

കിഴക്കു മാലിക്കുളം നാടിന് സമർപ്പിച്ചു

ചാലക്കുടി: പൊതുജനങ്ങൾ സൗജന്യമായ് നഗരസഭയ്ക്ക് വിട്ടുതന്ന ഭൂമിയിൽ 80 ലക്ഷം രൂപ ചെലവിൽ നിർമിച്ച, 30-ാം വാർഡിലെ കിഴക്കു മാലിക്കുളം നാടിനു സമർപ്പിച്ചു.

സനീഷ്‌കുമാർ ജോസഫ് എംഎൽഎയാണ് കുളം നാടിനു സമർപ്പിച്ചത്. നഗരസഭ ചെയർമാൻ എബി ജോർജ് അധ്യക്ഷത വഹിച്ചു. വൈസ് ചെയർപേഴ്സൻ ആലീസ് ഷിബു, വാർഡ് കൗൺസിലർ റോസി ലാസർ, സ്റ്റാൻഡിംഗ് കമ്മറ്റി ചെയർമാൻമാരായ ജോർജ് തോമസ്, ജിജി ജോൺസൻ, ദീപു ദിനേശ്, സൂസമ്മ ആന്‍റണി, സൂസി സുനിൽ, യുഡിഎഫ് പാർലമെന്‍ററി പാർട്ടി ലീഡർ ഷിബു വാലപ്പൻ, സി.എസ്. സുരേഷ്, കൗൺസിലർ ബിജു. എസ്. ചിറയത്ത്, സെക്രട്ടറി കെ.ബി. വിശ്വനാഥൻ, എൻജിനീയർ എം. കെ. സുഭാഷ്, സുബി ഷാജി, ജോർജ് മല്പാൻ എന്നിവർ പ്രസംഗിച്ചു.

ADVERTISEMENT

കാണിപ്പയ്യൂരിൽ തെരുവുനായയ്ക്ക് പേവിഷബാധ സ്ഥിരീകരിച്ചു

കുന്നംകുളം: കാണിപ്പയ്യൂരിൽ കഴിഞ്ഞദിവസം ഗൃഹനാഥനെ ആക്രമിച്ച തെരുവുനായയ്ക്ക് പേവിഷബാധ സ്ഥിരീകരിച്ചു. കാണിപ്പയ്യൂർ സ്വദേശി ശശികുമാറിനാണ് (65) ഇന്നലെ വീടിനുമുന്നിൽവച്ച് തെരുവുനായയുടെ കടിയേറ്റത്. കയ്യിൽ ആഴത്തിൽ മുറിവുണ്ടായിരുന്നു. വൈകീട്ടോടെ നായ ചാവുകയും ചെയ്തു. തുടർന്ന് കുന്നംകുളം വെറ്ററിനറി ആശുപത്രിയിൽ നടത്തിയ പോസ്റ്റ്മോർട്ടത്തിലാണ് നായയ്ക്ക് പേവിഷബാധ സ്ഥിരീകരിച്ചത്. ശശികുമാറിന് ഇന്നലെത്തന്നെ മെഡിക്കൽ കോളേജ് ആശുപത്രിയിൽ പ്രതിരോധ കുത്തിവയ്പ്പ് എടുത്തു. നായയ്ക്ക് പേവിഷബാധ സ്ഥിരീകരിച്ച സാഹചര്യത്തിൽ പ്രത്യേക ഡോസും നൽകിയിട്ടുണ്ട്. ഇതിനിടെ കുന്നംകുളം നഗരസഭയില്‍ നായ്ക്കള്‍ക്കുള്ള വാക്സിനേഷന്‍ ഇന്ന് ആരംഭിക്കും. രാവിലെ എട്ടിന് കാണിപ്പയ്യൂരിലാണ് ഗവ. വെറ്ററിനറി വിഭാഗത്തിന്‍റെ നേതൃത്വത്തില്‍ വാക്സിനേഷന്‍ ആരംഭിക്കുക. തുടര്‍ന്ന് നഗരസഭയിലെ വിവിധ ഭാഗങ്ങളിൽ ക്യാമ്പ് നടത്തുമെന്ന് ചെയര്‍പേഴ്സണ്‍ സീത രവീന്ദ്രന്‍ അറിയിച്ചു. തെരുവുനായ് ശല്യം, പേ വിഷബാധ എന്നീ സാഹചര്യത്തിൽ നഗരസഭയില്‍ ഗവ. വെറ്ററിനറി പോളിക്ലിനിക്കിലെ സീനിയര്‍ വെറ്ററിനറി സർജന്‍ ഡോ. റീനു ജോൺ, ഗവ. താലൂക്ക് ആശുപത്രി സൂപ്രണ്ട് ഡോ.എ.വി. മണികണ്ഠന്‍ എന്നിവരുടെ സാന്നിധ്യത്തില്‍ അടിയന്തര യോഗംചേര്‍ന്നു. വൈസ് ചെയര്‍പേഴ്സണ്‍ സൌമ്യ അനിലന്‍, സ്ഥിരം സമിതി അധ്യക്ഷന്മാരായ പി.എം. സുരേഷ്, സജിനി പ്രേമന്‍, ടി. സോമശേഖരന്‍, സെക്രട്ടറി കെ.ബി. വിശ്വനാഥന്‍, ആരോഗ്യവിഭാഗം ജീവനക്കാര്‍ തുടങ്ങിയവര്‍ പങ്കെടുത്തു.

കെഎസ്ആർടിസി ബസും ലോറിയും കൂട്ടിയിടിച്ച് 10 പേർക്കു പരിക്ക്

എരുമപ്പെട്ടി: പന്നിത്തടം സെന്‍ററിൽ വീണ്ടും വൻ അപകടം. കെഎസ്ആർടിസി ബസും മത്സ്യം കയറ്റിവന്ന ലോറിയും കൂട്ടിയിടിച്ച് 10 പേർക്കു പരിക്ക്. ഇന്നലെ പുലർച്ചെ 1.30ഓടെയാണ് കുന്നംകുളം - വടക്കാഞ്ചേരി സംസ്ഥാനപാതയും അക്കിക്കാവ് -കേച്ചേരി ബൈപാസ് റോഡും സംഗമിക്കുന്ന സെന്‍ററിൽ അപകടമുണ്ടായത്. കെഎസ്ആർടിസി ബസിലെ ഡ്രൈവർ രാജേഷ്, കണ്ടക്ടർ ഷൈജു അബ്രഹാം, ലോറി ഡ്രൈവർ രാധാകൃഷ്ണൻ, ബസ് യാത്രക്കാരായ സജീവ്, സതീഷ്, എൽസണ്‍, ഷമീർ, ഷീന, ലിജി, ഷിജിൻ, എന്നിവർക്കാണു പരിക്കേറ്റത്. കോഴിക്കോട് നിന്നു തൃശൂർ വഴി കുമളിയിലേക്കു പോവുകയായിരുന്നു ബസ്. കുന്നംകുളത്തുനിന്ന് മത്സ്യംകയറ്റി ചെറുതുരുത്തിയിലേക്കു പോകുകയായിരുന്നു ലോറി. അക്കിക്കാവ് ഭാഗത്തുനിന്നുവന്ന് പന്നിത്തടം സെന്‍ററിലേക്കു പ്രവേശിച്ച ബസിൽ കുന്നംകുളം ഭാഗത്തുനിന്ന് വന്ന ലോറി ഇടിക്കുകയായിരുന്നു. ബസിന്‍റെ ഡ്രൈവർ ഇരിക്കുന്ന ഭാഗത്താണ് ലോറി ഇടിച്ചത്. ബസ് ഡ്രൈവർ റോഡിലേക്കു തെറിച്ചുവീണു. ഇടിയെത്തുടർന്ന് നിയന്ത്രണംവിട്ട ബസും ലോറിയും റോഡരികിലെ കടകളിൽ ഇടിച്ചാണുനിന്നത്. രണ്ടു വാഹനങ്ങളുടെയും മുൻവശം പൂർണമായും തകർന്നു. ശബ്ദംകേട്ട് ഓടിയെത്തിയ നാട്ടുകാരും യാത്രക്കാരും എരുമപ്പെട്ടി ആക്ട്സ് പ്രവർത്തകർ, കടങ്ങോട് പഞ്ചായത്ത് ആംബുലൻസ് പ്രവർത്തകർ, കുന്നംകുളം ട്രാഫിക് ആംബുലൻസ്പ്രവർത്തകർ, സിഎച്ച് സെന്‍റർ ആംബുലൻസ് പ്രവർത്തകർ എന്നിവർ ചേർന്നാണു രക്ഷാപ്രവർത്തനം നടത്തിയത്. എരുമപ്പെട്ടിയിൽനിന്നും കുന്നംകുളത്തുനിന്നും പോലീസും എത്തിയിരുന്നു. പരിക്കേറ്റവരെ ആദ്യം കുന്നംകുളം മലങ്കര ആശുപത്രിയിൽ പ്രവേശിപ്പിച്ചു. ഗുരുതരമായി പരിക്കേറ്റ ബസ് ഡ്രൈവറെ പിന്നീട് തൃശൂർ മെഡിക്കൽ കോളജ് ആശുപത്രിയിലേക്കും സാരമായി പരിക്കേറ്റ രണ്ടു യാത്രക്കാരെ തൃശൂരിലെ സ്വകാര്യ ആശുപത്രിയിലേക്കും മാറ്റി. ബസിലെ മറ്റു യാത്രക്കാരെ പുലർച്ചെ നാലോടെ കെഎസ്ആർടിസി ഗുരുവായൂർ ഡിപ്പോയിൽനിന്ന് മറ്റൊരു ബസ് എത്തിച്ച് കൊണ്ടുപോയി. പന്നിത്തടം സ്വദേശി ഷാഹിദിന്‍റെ കടകൾക്കാണു വാഹനങ്ങൾ ഇടിച്ച് കേടുപാട് സംഭവിച്ചത്. ബൈപാസ് റോഡ് നിർമാണം കഴിഞ്ഞശേഷം പന്നിത്തടം സെന്‍ററിൽ നടക്കുന്ന എട്ടാമത്തെ അപകടമാണിത്.

വിശ്വാസദീപ്തിയില്‍ ദുക്റാന തിരുനാള്‍

ഇരിങ്ങാലക്കുട കത്തീഡ്രലില്‍ ഊട്ടുനേര്‍ച്ചയ്ക്ക് കാല്‍ലക്ഷത്തിലേറെപ്പേർ ഇരിങ്ങാലക്കുട: മാർതോമ പാരമ്പര്യത്തിന്‍റെ ഓര്‍മപുതുക്കി ഇരിങ്ങാലക്കുട സെന്‍റ് തോമസ് കത്തീഡ്രലില്‍ ദുക്റാന തിരുനാള്‍ ആഘോഷിച്ചു. തോമാശ്ലീഹായുടെ രക്തസാക്ഷിത്വത്തിന്‍റെ സ്മരണയില്‍ നടന്ന തിരുക്കര്‍മങ്ങളിലും ഊട്ടുനേര്‍ച്ചയിലും കാല്‍ലക്ഷത്തിലധികംപേര്‍ പങ്കെടുത്തു. രാവിലെ 7.30ന് നടന്ന ആഘോഷമായ ദിവ്യബലിക്ക് ബിഷപ് മാര്‍ പോളി കണ്ണൂക്കാടന്‍ മുഖ്യകാര്‍മികത്വം വഹിച്ചു. തുടര്‍ന്ന് ഊട്ടുനേര്‍ച്ച വെഞ്ചരിപ്പ് ബിഷപ് നിര്‍വഹിച്ചു. 10.30ന് നടന്ന ആഘോഷമായ തിരുനാള്‍ ദിവ്യബലിക്ക് അവിട്ടത്തൂര്‍ ഹോളിഫാമിലി പള്ളി വികാരി ഫാ. റെനില്‍ കാരാത്ര മുഖ്യകാര്‍മികത്വം വഹിച്ചു. കല്ലേറ്റുംകര പാക്സ് ഡയറക്ടര്‍ ഫാ. ഫ്രീജോ പാറയ്ക്കല്‍ തിരുനാള്‍ സന്ദേശം നല്‍കി. തുടര്‍ന്ന് ആഘോഷമായ തിരുനാള്‍ പ്രദക്ഷിണം നടന്നു. വികാരി റവ.ഡോ. ലാസര്‍ കുറ്റിക്കാടന്‍, അസിസ്റ്റന്‍റ് വികാരിമാരായ ഫാ. ഓസ്റ്റിന്‍ പാറയ്ക്കല്‍, ഫാ. ബെല്‍ഫിന്‍ കോപ്പുള്ളി, ഫാ. ആന്‍റണി നമ്പളം, തിരുനാള്‍ ജനറല്‍ കണ്‍വീനര്‍ ബാബു ജോസ് പുത്തനങ്ങാടി, ജോയിന്‍റ് കണ്‍വീനര്‍മാരായ ഷാജു പന്തലിപ്പാടന്‍, ജിജി പള്ളായി, രഞ്ജി അക്കരക്കാരന്‍, ജോസ് ജി. തട്ടില്‍ എന്നിവര്‍ നേതൃത്വം നല്‍കി. പാലയൂരിൽ തർപ്പണ തിരുനാൾ കൊടിയേറി പാലയൂർ: മാർ‌തോമ മേജർ ആർക്കി എപ്പിസ്കോപ്പൽ തീർഥകേന്ദ്രത്തിൽ മാർതോമാ ശ്ലീഹായുടെ തർപ്പണ തിരുനാൾ കൊടിയേറി. മെൽബൺ രൂപത ബിഷപ് എമരിറ്റസ് മാർ ബോസ്കോ പുത്തൂർ കൊടിയേറ്റം നിർവഹിച്ചു . ആർച്ച്പ്രീസ്റ്റ് റവ.ഡോ. ഡേവിസ് കണ്ണമ്പുഴ, സഹവികാരി ഫാ. ക്ലിന്‍റ് പാണേങ്ങാടൻ എന്നിവർ സഹകാർമികരായിരുന്നു. തളിയക്കുളം രക്തസാക്ഷിമണ്ഡപത്തിൽനിന്ന് പ്രദക്ഷിണമായാണ് കൊടിയെ വരവേറ്റത്. 12, 13, 14 തീയതികളിലാണ് ആഘോഷം. മാർതോമാ ശ്ലീഹാ പാലയൂരിലെ തളിയക്കുളത്തിൽ എഡി 52ൽ അത്ഭുതം പ്രവർത്തിച്ച് ഭാരതത്തിൽ ആദ്യമായി ക്രൈസ്തവ വിശ്വാസത്തിന് തുടക്കംകുറിച്ചതിന്‍റെ ഓർമപുതുക്കലാണ് തിരുനാൾ.

ഇന്നു മുതൽ 11 വരെ ദിവസവും വൈകിട്ട് 5.30ന് ആഘോഷമായ ദിവ്യബലി, ലദീഞ്ഞ്, നൊവേന, 11ന് രാത്രി ഏഴിന് ദീപക്കാഴ്ചയുടെ സ്വിച്ച്ഓൺ, 12ന് രാവിലെ എട്ടിന് എഴുന്നള്ളിപ്പ് ആരംഭം, വൈകിട്ട് 5.30ന് തിരുക്കർമങ്ങൾ തുടർന്ന് കൂടുതുറക്കൽ ശുശ്രൂഷ, വർണമഴ എന്നിവ നടക്കും. വികാരി ജനറാൾ മോൺ. ജെയ്സൺ കൂനംപ്ലാക്കൽ മുഖ്യ കാർമികനാവും. രാത്രി 10ന് എഴുന്നള്ളിപ്പ് സമാപനം, വർണമഴ, 11.30 വരെ ബാൻഡ് വാദ്യ സംഗമം, 13ന് രാവിലെ 6.30ന് വിശുദ്ധ കുർബാന എന്നിവയുണ്ടാകും. തുടർന്ന് രാവിലെ പത്തിന് ആഘോഷമായ തിരുനാൾ പാട്ടുകുർബാനയ്ക്ക് മൈനർ സെമിനാരി റെക്ടർ ഫാ. ജോയ് പുത്തൂർ മുഖ്യകാർമികനാവും. ഉച്ചയ്ക്ക് രണ്ടിന് ദിവ്യബലി, സമൂഹമാമോദീസയ്ക്ക് അതിരൂപത സഹായമെത്രാൻ മാർ ടോണി നീലങ്കാവിൽ മുഖ്യകാർമികത്വം വഹിക്കും. 4.30ന് ദിവ്യബലി, പ്രദക്ഷിണം, വർണമഴ, 7.30 മുതൽ 11 വരെ മെഗാ ബാൻഡ് ഷോ എന്നിവ നടക്കും. മൺമറഞ്ഞവർക്കായി 14ന് രാവിലെ 6.30 ന് തിരുക്കർമങ്ങളുണ്ടാവും. രാത്രി ഏഴിന് ഗാനമേള അരങ്ങേറും. ട്രസ്റ്റിമാരായ പി.എ. ഹൈസൺ, സേവ്യർ വാകയിൽ, സി.ഒ. ഫ്രാൻസീസ്, പി.ജെ. ചാക്കോ, ജനറൽ കൺവീനർ ടി.ജെ. ഷാജു, തീർഥകേന്ദ്രം സെക്രട്ടറി ബിജു മുട്ടത്ത്, ജോയിന്‍റ് സെക്രട്ടറി ബിനു താണിക്കൽ, കൺവീനർമാരായ ഫ്രാൻസീസ് മുട്ടത്ത്, ബോബ് ഇലവത്തിങ്കൽ, സിസ്റ്റർ റോസ്മേരി, ജിഷ സുരേഷ് തുടങ്ങിയവരുടെ നേതൃത്വത്തിലാണ് പരിപാടികൾ. ദുക്റാന തിരുനാളിന് ഭക്തജന പ്രവാഹം പാലയൂർ: മാർതോമ മേജർ ആർക്കി എപ്പിസ്കോപ്പൽ തീർഥകേന്ദ്രത്തിൽ മാർതോമാ ശ്ലീഹായുടെ ദുക്റാന തിരുനാൾ ആഘോഷത്തിന് വൻ ഭക്തജനത്തിരക്ക്. ശ്ലീഹാ എഡി 72ൽ മൈലാപ്പൂരിലെ ചിന്നമലയിൽ രക്തസാക്ഷിയായതിന്‍റെ ഓർമപുതുക്കലാണ് ദുക്റാന തിരുനാൾ. ഇതിന്‍റെ ഭാഗമായിനടന്ന നേർച്ച ഊട്ടിൽ പതിനായിരങ്ങൾ പങ്കെടുത്തു. ഇത്തവണ കാലാവസ്ഥകൂടി അനുകൂലമായതിനാൽ ഊട്ടിന് വൻതിരക്കായിരുന്നു. പഴം, പപ്പടം, പായസം എന്നിവയുൾപ്പെടെ ഏഴു വിഭവങ്ങളാണ് ഒരുക്കിയിരുന്നത്. അരലക്ഷം പേർക്കുള്ള ഭക്ഷണം തയാറാക്കി. ഊട്ടിന്‍റെ ചെലവു പൂർണമായും മാർതോമ ഭക്തരുടെതാണ്. ‌രാവിലെ മുതൽ വിവിധ സമയങ്ങളിലായി ആറു ദിവ്യബലികൾ നടന്നു. തിരുനാൾ പാട്ടുകുർബാനയ്ക്ക് ബിഷപ് മാർ ബോസ്കോ പുത്തൂർ മുഖ്യകാർമികനായിരുന്നു. മറ്റു തിരുക്കർമങ്ങൾക്ക് ആർച്ച്പ്രീസ്റ്റ് റവ. ഡോ. ഡേവിസ് കണ്ണമ്പുഴ, ഫാ. അഗസ്റ്റിൻ കുളപ്പുറം, ഫാ. ലിവിൻ കുരുതുകുങ്ങര കൂള, ഫാ. മൈക്കിൾ ദീപക്സ്, ഫാ. അജിത്ത് കൊള്ളന്നൂർ, ഫാ. ക്ലിന്‍റ് പാണേങ്ങാടൻ എന്നിവർ കാർമികരായിരുന്നു. ദുക്റാന തിരുനാളിന്‍റെ ഭാഗമായി പാലയൂർ ഫൊറോന സിഎൽസിയുടെ നേതൃത്വത്തിൽ മെഗാ മാർഗംകളി പള്ളിമുറ്റത്ത് അവതരിപ്പിച്ചു. ഭാരവാഹികളായ സി.ജെ. സാബു, ജെഫിൻ ജോണി, സി.സി. ചാർളി, സി.ഡി. ലോറൻസ്, പി.എൽ. ഫ്രാങ്കോ, ഫ്രാൻസി ടിറ്റോ, ബീന ജോഷി, ഷേർളി ഷാജി, റെജി ജെയിംസ് തുടങ്ങിയവർ നേതൃത്വംനൽകി.

സി.എൽ. ജോസിന് കലാശ്രേഷ്ഠ പുരസ്കാരം സമ്മാനിച്ചു

തൃശൂർ: കണ്ണൂരിലെ ഉത്തരകേരള കവിതാസാഹിത്യവേദി ഏർപ്പെടുത്തിയ അക്ഷരഗുരു കവിയൂർ കലാശ്രേഷ്ഠ പുരസ്കാരം നാടകാചാര്യൻ സി.എൽ. ജോസിന് എഴുത്തുകാരി സുജാത ശ്രീപദം സമ്മാനിച്ചു. നാടകരംഗത്തെ സമഗ്രസംഭാവനയ്ക്കാണു പുരസ്കാരം. സി.എൽ. ജോസിന്‍റെ തൃശൂരിലെ വസതിയിൽ നടന്ന ചടങ്ങിൽ സാഹിത്യവേദി പ്രസിഡന്‍റ് സുനിൽ മടപ്പള്ളി, ഗാന്ധിമാർഗപ്രവർത്തകൻ ഡേവിസ് കണ്ണന്പുഴ, എഴുത്തുകാരി നിർമ്മല അന്പാട്ട്, ട്രഷറർ സൗമി മട്ടന്നൂർ, സി.എൽ. ജോസിന്‍റെ ഭാര്യ ലിസി ജോസ് എന്നിവർ പങ്കെടുത്തു.

കിണറുകളിൽ രാസമാലിന്യം; ആറിന് മനുഷ്യച്ചങ്ങല

തൃശൂർ: കാട്ടൂർ മിനി എസ്റ്റേറ്റിലെ രണ്ടു കന്പനികളിൽനിന്നുള്ള രാസമാലിന്യം സമീപമുള്ള കിണറുകളിൽ കലരുന്നെന്നു കാട്ടൂരിലെ ജനകീയ കുടിവെള്ളസംരക്ഷണ വേദി പ്രവർത്തകർ. 2024 മേയ് 25ന് മാലിന്യം കണ്ടെത്തി അധികൃതരെ അറിയിച്ചിട്ടും നീതി നടപ്പാക്കാത്തതിനെതിരെ മനുഷ്യച്ചങ്ങലയും പൊതുയോഗവും സംഘടിപ്പിക്കും. ആറിന് രാവിലെ പത്തിനു കുന്നത്തുപീടിക മുതൽ സോഡാവളവ് വരെയാകും മനുഷ്യച്ചങ്ങല. തുടർന്ന് എംപി ഹാളിൽ നടക്കുന്ന പൊതുയോഗം മനുഷ്യാവകാശ പരിസ്ഥിതി പ്രവർത്തകർ അഡ്വ. പി.എ. പൗരൻ ഉദ്ഘാടനം ചെയ്യും. ഏഴുമുതൽ കന്പനിക്കു മുന്നിൽ അനിശ്ചിതകാല നിരാഹാരം തുടങ്ങുമെന്നും സമരസമിതി പ്രവർത്തകർ അറിയിച്ചു. 1974ൽ രൂപംകൊണ്ട മിനി ഇൻഡസ്ട്രിയൽ എസ്റ്റേറ്റിലെ ഉടമകൾ പലരും മാറി വ്യവസായങ്ങളും മാറ്റിയതോടെയാണ് രാസമാലിന്യം രൂപപ്പെടുന്നത്. പത്ത് യൂണിറ്റുകൾ നിന്ന സ്ഥലത്ത് ഇപ്പോൾ 13 യൂണിറ്റുകളുണ്ടെന്നും ഇലക്ട്രോ പ്ലേറ്റിംഗും ഗാൽവനൈസിംഗും ഉൾപ്പെടെ രണ്ടു കന്പനികളിൽ നടക്കുന്നുണ്ടെന്നും ജനകീയ കുടിവെള്ളസംരക്ഷണ വേദി പ്രവർത്തകർ ആരോപിച്ചു. വാർത്താ സമ്മേളനത്തിൽ അരുണ്‍, പഞ്ചായത്ത് അംഗം പി.എസ്. മോളി, ടി.ടി. വിൻസെന്‍റ്, എം.ജെ. ഷാജി, ജോയ് തോമസ് എന്നിവർ പങ്കെടുത്തു.

ചാവക്കാട്ട് ബിജെപി മാർച്ചിലും ജലപീരങ്കി

ചാവക്കാട് : കവർച്ചക്കേസിൽ പ്രതിയായ സിപിഎം ലോക്കൽ സെക്രട്ടറിയെ അറസ്റ്റ് ചെയ്യാത്തതിനെതിരേ ബിജെപി ചാവക്കാട് മണ്ഡലം കമ്മിറ്റിയുടെ നേതൃത്വത്തിൽ നടത്തിയ പോലീസ് സ്റ്റേഷൻ മാർച്ച് ജലപീരങ്കി പ്രയോഗിച്ച് പിരിച്ചു വിട്ടു. പുതിയ പാലം പരിസരത്തുനിന്ന് ആരംഭിച്ച മാർച്ച് താലൂക്ക് ഓഫീസ് പരിസരത്ത് പോലീസ് തടഞ്ഞു. തുടർന്നുനടന്ന പ്രതിഷേധത്തിനിടയിൽ പോലീസ് സ്ഥാപിച്ച ബാരിക്കേഡ് തള്ളിമറിച്ചിടാൻ സമരക്കാർ ശ്രമിച്ചതാണ് ജലപീരങ്കിപ്രയോഗത്തിൽ കലാശിച്ചത്. ജില്ലാ ജനറൽ സെക്രട്ടറി വിപിൻ കുടിയേടത്ത് ഉദ്ഘാടനംചെയ്തു. മണ്ഡലം പ്രസിഡന്‍റ് വർഷ മണികണ്ഠൻ അധ്യക്ഷതവഹിച്ചു. ജില്ലാ ഉപാധ്യക്ഷൻ ദയാനന്ദൻ മാമ്പുള്ളി, മണ്ഡലം ജനറൽ സെക്രട്ടറി പ്രതീഷ് അയിനിപ്പുളി , മണ്ഡലം വൈസ് പ്രസിഡന്‍റ് ഗണേശ് ശിവജി എന്നിവർ പ്രസംഗിച്ചു.

ആരോഗ്യമന്ത്രി വീണാ ജോർജ് രാജിവയ്ക്കണം: കെ.വി. കണ്ണൻ

തൃശൂർ: ആരോഗ്യമന്ത്രിയുടെ ദുരഭിമാനമാണു പാവം സ്ത്രീയുടെ ജീവനെടുത്തതെന്നു കേരള യൂത്ത് ഫ്രണ്ട് സംസ്ഥാന പ്രസിഡന്‍റ് കെ.വി. കണ്ണൻ. ആരോഗ്യവകുപ്പ് തകർന്നതുപോലെ മെഡിക്കൽ കോളജിലെ കെട്ടിടവും തകർന്നു. സ്ഥലത്തെത്തിയ മന്ത്രിമാർക്ക് അവശിഷ്ടങ്ങൾക്കിടയിൽ ആരെങ്കിലുമുണ്ടോയെന്ന് അന്വേഷിക്കാൻ കഴിഞ്ഞില്ല. ആരും ഉപയോഗിക്കാത്ത കെട്ടിടമെന്ന വാക്കിൽ രക്ഷാപ്രവർത്തനം മന്ദഗതിയിലായി. സമയത്ത് ഇടപെട്ടിരുന്നെങ്കിൽ ബിന്ദുവിനെ രക്ഷിക്കാമായിരുന്നു. ഗുരുതരവീഴ്ചയ്ക്ക് ഇടയാക്കിയ മന്ത്രി വീണാ ജോർജ് രാജിവയ്ക്കണമെന്നും കെ.വി. കണ്ണൻ ആവശ്യപ്പെട്ടു.

കാർഷിക സർവകലാശാലയിൽ പ്രതിഷേധം

തൃശൂർ: കേരള സർവകലാശാല രജിസ്ട്രാറെ നിയമവിരുദ്ധമായി സസ്പെൻഡ് ചെയ്ത വൈസ് ചാൻസലറുടെ നടപടിക്കെതിരേ കോണ്‍ഫെഡറേഷൻ ആഹ്വാനപ്രകാരം കേരള കാർഷിക സർവകലാശാലയിൽ എംപ്ലോയീസ് അസോസിയേഷൻ പ്രതിഷേധിച്ചു. നിയമന അധികാരിയായ സിൻഡിക്കേറ്റിനെ മറികടന്ന് രജിസ്ട്രാറെ സസ്പെൻഡ് ചെയ്യുന്നതടക്കമുള്ള നിയമവിരുദ്ധനടപടികൾ കൈക്കൊള്ളുന്നവർ ശക്തമായ പ്രതിഷേധം നേരിടേണ്ടിവരുമെന്ന് പ്രകടനം ഉദ്ഘാടനം ചെയ്ത് എംപ്ലോയീസ് അസോസിയേഷൻ ജനറൽ സെക്രട്ടറി കെ.ആർ. പ്രദീഷ് പറഞ്ഞു. കേരള കാർഷിക സർവകലാശാലയുടെ വിവിധ കേന്ദ്രങ്ങളിൽ നടന്ന പ്രതിഷേധപ്രകടനത്തിന് എൻ.ആർ. സാജൻ, സി. സുജാത, പി.കെ. നൗഷാദ്, കെ.ഐ. നൗഷാദ്, പി.ബി. സുമേഷ്, കെ.യു. സരിത, പി. ജിഷ, സുബിൻ സി. ജോർജ്, എൻ. കൃഷ്ണദാസ്, സി. അഭിജിത്ത്, എം.ജി. ശ്രീരാഗ്, എ.പി. വിഘ്നേശ്, എസ്. സനൽകുമാർ എന്നിവർ നേതൃത്വം നൽകി.

ദുക്റാന തിരുനാൾ ആഘോഷിച്ചു

പുത്തൂർ സെന്‍റ് തോമസ് ഫൊറോന ദേവാലയം ദുക്റാന തിരുനാൾ ആഘോഷിച്ചു. ആഘോഷമായ തിരുനാൾ പാട്ടുകുർബാനയ്ക്ക് ഫാ. ജോർജ് തേർമഠം മുഖ്യകാർമികത്വംവഹിച്ചു. ഫാ. ഫ്രാൻസിസ് പള്ളിക്കുന്നത്ത് വചനസന്ദേശംനൽകി. ഫാ. റിഥിൻ ചിറ്റിലപ്പിള്ളി സഹകാർമികത്വംവഹിച്ചു. തിരുനാൾ പ്രദക്ഷണത്തിൽ നൂറുകണക്കിന് വിശ്വാസികൾ പങ്കെടുത്തു. വികാരി ഫാ. ജോജു പനയ്ക്കൽ, അസിസ്റ്റന്‍റ് വികാരി ഫാ. റെജി തോമസ്, കൈക്കാരൻമാരായ ഷോയ് മാളിയേക്കൽ, സണ്ണി മാളിയേക്കൽ, ഷാജി തട്ടിൽ, സന്തോഷ് ആട്ടോക്കാരൻ എന്നിവർ തിരുനാൾ ചടങ്ങുകൾക്ക് നേതൃത്വംനൽകി. മറ്റം സെന്‍റ് തോമസ് ഫൊറോന പള്ളി ഇടവക മധ്യസ്ഥനായ വിശുദ്ധ തോമസ് ശ്ലീഹായുടെയും ഈശോയുടെ തിരുഹൃദയത്തിന്‍റെയും തിരുനാളാഘോഷിച്ചു. ആഘോഷമായ പാട്ടുകുർബാനയ്ക്ക് അതിരൂപത സഹായമെത്രാൻ മാർ ടോണി നീലങ്കാവിൽ മുഖ്യകാർമികത്വംവഹിച്ചു. പ്രദക്ഷിണം, തോമസ് നാമധാരികളെ ആദരിക്കൽ, നേർച്ചപ്പായസ വിതരണം എന്നിവ നടന്നു. പ്രദക്ഷിണത്തിന് എളവള്ളി പള്ളി വികാരി ഫാ. ഫ്രാങ്ക്ളിൻ കണ്ണനായ്ക്കൽ നേതൃത്വംനൽകി. തിരുനാൾ ആഘോഷങ്ങൾക്ക് മറ്റം ഫൊറോന പള്ളി വികാരി ഫാ. ഫ്രാൻസിസ് ആളൂർ, അസിസ്റ്റന്‍റ് വികാരി ഫാ. ഫ്രാങ്കോ ചെറുതാണിക്കൽ, ട്രസ്റ്റിമാരായ സി.കെ. ജോയ്, ജോൺസൺ കാക്കശേരി, പി.എ. സ്റ്റീഫൻ, ജോൺസൺ സി.തോമസ് എന്നിവർ നേതൃത്വംനൽകി. പടവരാട് സെന്‍റ് തോമസ് ദേവാലയം ദുക്റാന തിരുനാൾ ആഘോഷിച്ചു. തിരുനാൾ ദിവ്യബലിക്ക് ഫാ. ജോസ് എടക്കളത്തൂർ മുഖ്യകാർമികത്വംവഹിച്ചു. ഫാ. മാത്യു കുറ്റിക്കോട്ടയിൽ വചനസന്ദേശം നൽകി. വികാരി ഫാ. സെബി ചിറ്റിലപ്പള്ളി, കൈക്കാരൻമാരായ വർഗീസ് പ്ലാക്കൽ, ജോഷി പൊട്ടയ്ക്കൽ, ജോബി പെരുമ്പിള്ളി, റിന്‍റോ പുതുശേരി എന്നിവർ നേതൃത്വംനൽകി.

കളക്ടറേറ്റ് മാർച്ച് ഏഴിന് കോൾ കർഷകർ പ്രക്ഷോഭത്തിന്

തൃശൂർ: നെല്ലിന്‍റെ സംഭരണവില കിലോയ്ക്ക് 35 രൂപയാക്കുക, സംസ്ഥാന സർക്കാരിന്‍റെ വെട്ടിക്കുറച്ച ഇൻസെന്‍റീവ് പുനഃസ്ഥാപിക്കുക തുടങ്ങി വിവിധ ആവശ്യങ്ങളുന്നയിച്ച് ജില്ലയിലെ കോൾ കർഷകർ പ്രക്ഷോഭത്തിലേക്ക്. ഏഴിനു രാവിലെ 10.30ന് എംജി റോഡിൽ ചുങ്കത്തുനിന്ന് കളക്ടറേറ്റിലേക്ക് മാർച്ചും ധർണയും സംഘടിപ്പിക്കും. പ്രശ്നപരിഹാരം ഉണ്ടായില്ലെങ്കിൽ കോൾകർഷകർ ഈ വർഷം കൃഷിയിറക്കില്ലെന്നും ഭാരവാഹികൾ പറഞ്ഞു. ഇൻസെന്‍റീവ് ഇനത്തിൽ 414 കോടി രൂപ സംസ്ഥാന സർക്കാർ കുടിശിക നൽകാനുണ്ട്. കോൾ മേഖലയിൽ സബ്മേഴ്സിബിൾ പന്പ് സ്ഥാപിച്ചതിലുള്ള കരാർ പൂർണമായും നടപ്പാക്കണം. കൃഷി വകുപ്പിന്‍റെ ശിപാർശ അനുസരിച്ചുള്ള കുമ്മായം വിതരണംചെയ്യണം. ഏനാമ്മാവ്, ഇടിയഞ്ചിറ, കൂത്തുമാക്കൽ, ഇല്ലിക്കൽ, കൊറ്റൻകോട്, എട്ടുമുന, ലിങ്ക് കനാൽ, കരാഞ്ചിറലോക്ക്, ചിറക്കൽതോട്, ഹെർബർട്ട് കനാൽ, റെഗുലേറ്ററുകൾ അറ്റകുറ്റപ്പണികൾ നടത്തി യന്ത്രവത്കരണം നടത്തുക, കാലാവസ്ഥാധിഷ്ഠിത വിള ഇൻഷ്വറൻസ് ക്ലെയിം രണ്ടു വർഷത്തെ നൽകുക, പന്പിംഗ് സബ്സിഡി സമയബന്ധിതമായി നൽകുക തുടങ്ങിയ ആവശ്യങ്ങളും സംഘം ഉന്നയിച്ചു. വാർത്താ സമ്മേളനത്തിൽ ജില്ലാ കോൾ കർഷക സംഘം പ്രസിഡന്‍റ് മുരളി പെരുനെല്ലി എംഎൽഎ, ജനറൽ സെക്രട്ടറി കെ.കെ. കൊച്ചുമുഹമ്മദ്, ഓർഗനൈസേഷൻ സെക്രട്ടറി എൻ.കെ. സുബ്രഹ്മണ്യൻ, ട്രഷറർ എൻ.എസ്. അയൂബ്, വൈസ് പ്രസിഡന്‍റുമാരായ കെ. രാജേന്ദ്രബാബു, ഗോപി കോളങ്ങാട്ട്, സെക്രട്ടറിമാരായ പി.ആർ. വർഗീസ്, ടി.എ. പോൾ എന്നിവർ പങ്കെടുത്തു.

അറിവുമാത്രമല്ല വീടിനു വെളിച്ചവും നൽകി വായനശാല

തിരുവില്വാമല: വായനയിലൂടെ അറിവിന്‍റെ വെളിച്ചം പകരുന്നതോടൊപ്പം വൈദ്യുതിമുടങ്ങിയ വീടിന് വെളിച്ചംനൽകി ഒരു വായനശാല. തിരുവില്വാമല ഗ്രാമീണ വായനശാലയാണ് വേറിട്ട സേവനത്തിലൂടെ ഒരു കുടുംബത്തിന് വെളിച്ചം സമ്മാനിച്ചത്. തിരുവില്വാമല പഞ്ചായത്തിലെ ഏഴാം വാർഡിൽ മലേശമംഗലം പ്ലാവിൻചുവട് പുതിയപാലം പള്ളത്തൊടി വള്ളിയെന്ന വയോധികയും അവരുടെ അസുഖബാധിതനായ മകൻ രാമനും താമസിക്കുന്ന വീട്ടിലേക്കാണ് തിരുവില്വാമല ഗ്രാമീണവായനശാല വെളിച്ചമെത്തിച്ചത്. വനാതിർത്തിയിലുള്ള വീടാണിത്. ഇവിടേക്ക് വൈദ്യുതി എത്തിക്കാൻ സാധിക്കാത്ത സാഹചര്യമായതിനാൽ സോളാർ സംവിധാനത്തിലൂടെയാണ് വൈദ്യുതിയെത്തിച്ചിരുന്നത്. എന്നാൽ സോളാർ ബാറ്ററി കേടായതോടെ ഈ വീട്ടിൽ വെളിച്ചമില്ലാതായി. മലേശമംഗലം റോഡിൽനിന്നു ഒരു കിലോമീറ്ററോളം കാടും മലയും താണ്ടി വേണം ഇവരുടെ വീട്ടിലെത്താൻ. വള്ളിയുടേയും രാമന്‍റെയും പണിതീരാത്ത വീട്ടിൽ വെളിച്ചമില്ലാത്ത ദുരവസ്ഥ അറിഞ്ഞ തിരുവില്വാമല ഗ്രാമീണ വായനശാല അധികൃതർ തങ്ങളുടെ ലൈബ്രറിയിലെ അംഗങ്ങളുടെ സഹായത്തോടെ സോളാർ ബാറ്ററി എത്തിക്കുകയും വെളിച്ചം പുന:സ്ഥാപിക്കുകയുമായിരുന്നു. ഏഴുപതിറ്റാണ്ടിന്‍റെ പ്രവർത്തനപാരമ്പര്യമുള്ള തിരുവില്വാമല ഗ്രാമീണ വായനശാലയിൽ 700ഓളം അംഗങ്ങളുണ്ട്. പ്രസിഡന്‍റ് കെ.പി. ഉമാശങ്കർ, സെക്രട്ടറി ബാബു പരുശുറാം എന്നിവരുൾപ്പെടുന്ന ഭരണസമിതിയാണ് പ്രവർത്തനങ്ങൾക്ക് നേതൃത്വം നൽകിയത്.

വടിവാൾ വിനീത് പിടിയിൽ

വടക്കാഞ്ചേരി: കുപ്രസിദ്ധ കുറ്റവാളി വടിവാൾ വിനീത് പിടിയിൽ. നിരവധി ക്രിമിനൽ കേസുകളിൽ പ്രതിയായ ആലപ്പുഴ എടത്വ കരുവാറ്റ പുത്തൻപുരയ്ക്കൽ നഗറിൽ വിനീത്(26)ആണ് പോലീസിന്‍റെ പിടിയിലായത്. വടക്കാഞ്ചേരിയിൽ പോലീസിനെ വെട്ടിച്ച് ബുള്ളറ്റുമായികടന്ന വടിവാൾ വിനീതിനെ മാസങ്ങൾക്കുശേഷമാണ് പോലീസ് പിടികൂടുന്നത്. ആലപ്പുഴയിൽനിന്നു പിടികൂടിയ പ്രതിയെ വടക്കാഞ്ചേരി സ്റ്റേഷനിൽ എത്തിച്ചു. കഴിഞ്ഞ മാർച്ച് 26നാണ് പുലർച്ചയാണിയാള്‌ വടക്കാഞ്ചേരി കുമ്പളങ്ങാടുനിന്നു ബുള്ളറ്റ് മോഷ്ടിച്ച് പോലീസിന്‍റെ കണ്ണുവെട്ടിച്ച് കടന്നുകളഞ്ഞത്. ഇയാൾക്കുവേണ്ടി പോലീസ് വ്യാപകമായി തെരച്ചിൽ നടത്തിയെങ്കിലും കണ്ടെത്താൻ കഴിഞ്ഞില്ല. മാസങ്ങൾക്കുശേഷം ആലപ്പുഴയിൽനിന്നാണ് ഇയാളെ പോലീസ് വലയിലാക്കുന്നത്. അകമലയിൽനിന്നു പൾസർ മോഷ്ടിച്ച കേസിൽ ആലപ്പുഴ സബ്ജയിൽനിന്നു വടക്കാഞ്ചേരി കോടതിയിൽ ഹാജരാക്കാൻ കൊണ്ടുവരവെയാണ് വിനീതും കൂട്ടാളി കൊല്ലം കോട്ടപ്പുറം സ്വദേശി രാഹുൽ രാജും വടക്കാഞ്ചേരി റെയിൽവേ സ്റ്റേഷനിൽ എക്സ്കോർട്ട് വന്ന പോലീസുകാരെ വെട്ടിച്ച് ചാടിപ്പോയത്. ചരൽപറമ്പ് മേഖലയിലേയ്ക്ക് കടന്നുകളഞ്ഞ പ്രതികൾക്കുള്ള വ്യാപക തെരച്ചിലിനൊടുവിൽ വൈകിട്ട് ഏഴുമണിയോടെ കൂട്ടാളി രാഹുൽ രാജിനെ പിടികൂടിയെങ്കിലും വടിവാൾ വിനീതിനെ പിടികൂടാൻ കഴിഞ്ഞില്ല. വടക്കാഞ്ചേരി സിഐ റിജിൻ എം.തോമസിന്‍റെ നേതൃത്വത്തിൽ അന്വേഷണംനടക്കുന്നതിനിടെയാണ് ഇയാളെ ആലപ്പുഴയിൽനിന്നു ബുധനാഴ്ച വൈകിട്ട് പിടികൂടുന്നത്. പ്രതിയെ ഇന്നലെ രാവിലെ വടക്കാഞ്ചേരി സ്റ്റേഷനിൽ എത്തിച്ചു. തിരുവനന്തപുരം മുതൽ മലപ്പുറം വരെയുള്ള ജില്ലകളിൽ 60 ലേറെ ക്രിമിനൽ കേസുകളിലെ പ്രതിയാണ് വടിവാൾ വിനീത്. പ്രതിയെ വടക്കാഞ്ചേരി കോടതിയിൽ ഹാജരാക്കി.

തെരുവുനായ ശല്യം രൂക്ഷം

കൈപ്പറമ്പ്: പേരാമംഗലത്തും മുണ്ടൂരിലും തെരുവുനായശല്യം രൂക്ഷം. നാട്ടിൽ ഇറങ്ങിനടക്കാൻ പറ്റാതെ ജനങ്ങൾ. മുണ്ടൂരിൽ ഞായറാഴ്ച ബൈക്കിന് കുറുകെ തെരുവുനായ ചാടി ദമ്പതികൾക്ക് പരിക്കേറ്റിരുന്നു. തിങ്കളാഴ്ച മുണ്ടൂർ പള്ളിക്കുസമീപം തെരുവുനായ ഓടിക്കൊണ്ടിരിക്കുന്ന ഓട്ടോറിക്ഷയുടെ അകത്തുകയറി ഡ്രെെവറെ കടിച്ചു. ഇയാൾ മെഡിക്കൽ കോളജ് ആശുപത്രിയിൽ ചികിത്സതേടി. പേരാമംഗലം മനപ്പടിയിൽ കഴിഞ്ഞദിവസം ഒരാളെ തെരുവുനായ കടിച്ചിരുന്നു. പേരമംഗലം സ്കൂൾ, ക്ഷേത്രം ഗ്രൗണ്ട്, കിഴക്കുമുറി, കാപ്പ് ഇന്ത്യ ടൈൽസ് മേഖലയിലും തെരുവുനായ ശല്യം രൂക്ഷമാണ്. വിദ്യാർഥികൾക്കും ജോലിക്കുപോകുന്നവര്‌ക്കും തെരുവുനായക്കൾ ശല്യമായിരിക്കുകയാണ്.

പോലീസ് സ്റ്റേഷനിലേക്ക് പ്രകടനംനടത്തി

ചേർപ്പ്: പരാതിനൽകാനെത്തിയ പട്ടികജാതിക്കാരനായ ചുമട്ടുതൊഴിലാളിയെ സബ് ഇൻസ്പെക്ടർ മർദിച്ച സംഭവത്തില്‌ പ്രതിഷേധിച്ച് സിപിഎം പ്രവർത്തകർ പോലീസ് സ്റ്റേഷനിലേക്ക് പ്രകടനംനടത്തി. മുത്തുള്ളിയാൽ തോപ്പ് തെക്കേമഠത്തിൽ സുരേഷി(48)നെ മർദിച്ച സംഭവത്തിൽ ഇൻസ്പെക്ടറെ സസ്പെൻഡ് ചെയ്യണമെന്നാവശ്യപ്പെട്ടാണ് പ്രകടനംനടത്തിയത്. ചേർപ്പ് ലോക്കൽ കമ്മിറ്റി സെക്രട്ടറി എ.വി. സഹദേവൻ, എം.എച്ച് സഗീർ, പഞ്ചായത്തംഗം നെസീജ മുത്തലിഫ്, ടി.കെ. ഷൈജു എന്നിവർ നേതൃത്വം നൽകി.

കെട്ടിടം തകര്‍ന്നുവീണു

അളഗപ്പനഗര്‍: യൂണിയന്‍ സ്റ്റോപ്പിന് സമീപം കെട്ടിടം തകര്‍ന്നുവീണു. കടമുറികള്‍ പ്രവര്‍ത്തിച്ചിരുന്ന കെട്ടിടമാണ് ഭാഗികമായി തകര്‍ന്നത്. രഞ്ജിത്ത് ഫാസ്റ്റ് ഫുഡ്, ചിയേഴ്സ് ചിക്കന്‍ സെന്‍റര്‍ എന്നീ കടകളുടെ ചുമരുകള്‍ ഇടിഞ്ഞുവീണു. രഞ്ജിത്ത് ഫാസ്റ്റ് ഫുഡ് കടയ്ക്ക് വിള്ളലുകള്‍ ഉണ്ടായിട്ടുണ്ട്. ചുമര്‍വീണ് ചിക്കന്‍ സെന്‍ററില്‍ വില്‍പനയ്ക്കായി എത്തിച്ച കോഴികള്‍ ചത്തു. ബുധനാഴ്ച രാത്രിയിലും വ്യാഴാഴ്ച പുലര്‍ച്ചെയുമാണ് കെട്ടിടം തകര്‍ന്നത്. രാത്രിയായതിനാല്‍ സ്ഥാപനങ്ങളില്‍ ആളില്ലാതിരുന്നത് വലിയ അപകടം ഒഴിവായി.

‍‍ശുചിമുറി മാലിന്യംതള്ളിയ ലോറികൾ കസ്റ്റഡിയിലെടുത്തു

അന്തിക്കാട്: കാഞ്ഞാണി പെരുമ്പുഴ പാതയോരത്ത് സെപ്റ്റിക് മാലിന്യം തള്ളിയ രണ്ടു ലോറികൾ അന്തിക്കാട് പോലീസ് പിടിച്ചെടുത്തു. ആംബുലൻസ് ഡ്രൈവർ രോഗിയെ തൃശൂരിലെ ആശുപത്രിയിലാക്കി തിരിച്ചുവരുന്നതിനിടെ പിന്തുടർന്ന് പകർത്തിയ ദൃശ്യങ്ങളാണ് പ്രതികളെ പിടികൂടുന്നതിന് സഹായകമായത്. അരിമ്പൂർ പഞ്ചായത്തിന്‍റെ പരാതിയിലാണ് പ്രതികളെ പിടികൂടിയത്. പെരുമ്പുഴ പാടത്ത് ടാങ്കർ ലോറിയിൽ സെപ്റ്റിക് മാലിന്യം ഒഴുക്കുന്നതുകണ്ട് ആംബുലൻസ് ഡ്രൈവർ വാഹനംതിരിച്ച് ലോറിയുടെ അടുത്തേക്ക് എത്തിയപ്പോഴേക്കും ടാങ്കർ അമിതവേഗത്തിൽ പോവുകയായിരുന്നു. മൂന്ന് കിലോമീറ്റർ ദൂരം ലോറിയെ പിന്തുടർന്ന് എറവ് കപ്പൽ പള്ളിക്കും അരിമ്പൂരിനും ഇടയിൽവച്ച് ലോറിയുടെ നമ്പർ ആംബുലൻസിലെ ഗാർഡ് വീഡിയോയിൽ പകർത്തി. കഴിഞ്ഞദിവസം രണ്ടു ലോറികൾ മനക്കൊടി പ്രദേശത്ത് മാലിന്യംതട്ടാൻ എത്തിയപ്പോൾ നാട്ടുകാർ തടഞ്ഞ് പോലീസിനെ വിളിച്ചുവരുത്തിയിരുന്നു. ലോറികൾ പോലീസ് കസ്റ്റഡിയിലെടുത്തു.

ചിറങ്ങരയിലെ കാന വീണ്ടും പൊളിക്കേണ്ടിവരുമെന്ന് ആശങ്ക

കൊരട്ടി: അടിപ്പാത നിർമാണത്തോടനുബന്ധിച്ച് ദേശീയപാത ചിറങ്ങര, മുരിങ്ങൂർ, കൊരട്ടി മേഖലയിൽ നടക്കുന്ന കാനനിർമാണത്തിൽ വിവാദങ്ങളും ആശങ്കകളും വിട്ടൊഴിയുന്നില്ല. ജില്ലാ കളക്ടറുടെ നിർദേശപ്രകാരം ഇന്നലെ റെയിൽവേ ഉദ്യോഗസ്ഥരും നാഷണൽ ഹൈവേ അഥോറിറ്റിയും ചാലക്കുടി തഹസിൽദാരും കൊരട്ടി പഞ്ചായത്ത് പ്രസിഡന്‍റും ചിറങ്ങരയിൽ സംയുക്ത പരിശോധന നടത്തി. ചിറങ്ങര ജംഗ്ഷനിൽ ദേശീയപാതയ്ക്കു കുറുകെ നിർമിച്ച കാനയിൽ വിവിധയിടങ്ങളിൽനിന്ന് ഒഴുകിയെത്തുന്ന വെള്ളം റെയിൽവേ ട്രാക്കിന് അടിയിലൂടെയുള്ള ചെറിയ ഓടവഴി കടത്തിവിടാനുള്ള നീക്കത്തിനെതിരേ ആശങ്ക പരന്നതോടെയാണ് പരിശോധന നടത്തിയത്. ചിറങ്ങര ജംഗ്ഷനിലെ കൾവർട്ട് പണി പൂർത്തിയാക്കുന്നതിന് റെയിൽവേയുടെ ഭാഗത്തുനിന്ന് സഹകരണം ആവശ്യമാണെന്ന് പ്രോജക്ട് ഡയറക്ടർ അറിയിച്ച സാഹചര്യത്തിലാണ് സംയുക്ത പരിശോധന നടത്താൻ കളക്ടർ തീരുമാനിച്ചത്. റെയിൽവേ ട്രാക്കിനടയിലൂടെ 25 സെന്‍റിമീറ്റർ മാത്രം വ്യാസമുള്ള ഓടയിലൂടെ വെള്ളം ഒഴുക്കിവിടാനുള്ള നീക്കം പ്രായോഗികമല്ലെന്നും വൻതോതിൽ മഴവെള്ളം താങ്ങാനുള്ള ശേഷി ചെറിയ ഓടയ്ക്ക് ഇല്ലെന്നുമാണ് റെയിൽവേയുടെ നിലപാട്. ഇതോടെ മറ്റു സാധ്യതകൾ തേടേണ്ട അവസ്ഥയിലായി ഹൈവേ അധികൃതർ. കുറച്ചു വെള്ളം ജംഗ്ഷനു തെക്കുഭാഗത്തേക്കുള്ള ഡ്രെയിനേജ് വഴി റെയിൽ പാലത്തിന് താഴേക്കും അവശേഷിക്കുന്ന വെള്ളം 500 മീറ്റർ അകലെയുള്ള പെരുമ്പി തോട്ടിലേക്കും ഒഴുക്കിവിടാനുള്ള സാധ്യതയാണ് നിലവിൽ പരിഗണിക്കുന്നത്. ഇതിനും സാങ്കേതിക തടസങ്ങളുണ്ട്. മറ്റു സാധ്യതകൾ കൂടി ആരായാൻ വിദഗ്ധസംഘത്തെ ചുമതലപ്പെടുത്താൻ തീരുമാനിച്ചിട്ടുണ്ട്. അശാസ്ത്രീയം, കാനനിർമാണം നിർമാണം ആരംഭിച്ച ഘട്ടം മുതൽ പരാതികളും ആക്ഷേപങ്ങളും ഉയർന്നിരുന്നു. വാട്ടർ ലെവൽ നോക്കാതെയുള്ള കാനനിർമാണം, സ്ലാബുകളുടെ ബലക്ഷയം, വെള്ളം ഒഴുക്കിവിടുന്നതെന്ന് എവിടേക്കെന്ന ധാരണയില്ലായ്മ തുടങ്ങി ഒട്ടേറെ കാരണങ്ങളാൽ പണിയലും പൊളിക്കലും തുടർന്നു. നിർമാണ കമ്പനിയുടെയോ ഹൈവേ അഥോറിറ്റിയുടെയോ ഭാഗത്തുനിന്ന് കാര്യപ്രാപ്തിയുള്ള ഉദ്യോഗസ്ഥർ ഉണ്ടാകുന്നില്ലെന്ന നാട്ടുകാരുടെ പരാതികളും അധികൃതർ പാടേ അവഗണിച്ചിരുന്നു. കൂടിയാലോചനകളില്ലാതെയുള്ള ഇത്തരം നിർമാണംമൂലം സമയനഷ്ടം, സാമ്പത്തിക നഷ്ടം എന്നിവയ്ക്കൊപ്പം വിഷമവൃത്തിയിലാകുന്നത് സാധാരണ ജനങ്ങളാണ്. കാന ഇനിയും പൊളിക്കേണ്ടിവരുമോയെന്ന ആശങ്കയാണ് ഇപ്പോൾ ഉയരുന്നത്.

കാറളം വൊക്കേഷണല്‍ ഹയര്‍ സെക്കന്‍ഡറി സീം ടീമിന്‍റെ ആശയത്തിന് ദേശീയമികവ്

കാറളം: കേന്ദ്ര വിദ്യാഭ്യാസ മന്ത്രാലയം, നീതി ആയോഗ്, യൂണിസെഫ്, മിനിസ്റ്ററി ഓഫ് ഇന്നവേഷന്‍ കൗണ്‍സില്‍ എന്നിവയുടെ ആഭിമുഖ്യത്തില്‍ സ്‌കൂള്‍ വിദ്യാര്‍ഥികള്‍ക്കായി നടത്തിയ ഇന്ത്യയിലെ ഏറ്റവും വലിയ സ്‌കൂള്‍ ഇന്നവേഷന്‍ ചാലഞ്ച് ആയ സ്‌കൂള്‍ ഇന്നവേഷന്‍ മാരത്തണ്‍ 2024 ല്‍ കേരളത്തില്‍നിന്നു തെരഞ്ഞെടുക്കപ്പെട്ട 181 ടീമുകളില്‍ ഒന്നാവുകയും തുടര്‍ന്ന് ഇന്ത്യയിലെ തന്നെ ആദ്യ 1000 ടീമുകളില്‍ ഒന്നാവുകയും ചെയ്ത് കാറളം വൊക്കേഷണല്‍ ഹയര്‍ സെക്കന്‍ഡറി വിഭാഗം സിം ടീം അഭിനന്ദനാര്‍ഹമായ നേട്ടം കൈവരിച്ചു. വിദ്യാര്‍ഥികളായ എ.എസ്. അക്ബര്‍ഷാ, ടി.എസ്. സൂര്യദേവ്, സി.എഫ്. സാഹില്‍, അധ്യാപികയായ കെ.എസ്. നിജി എന്നിവര്‍ അടങ്ങുന്ന ടീമാണ് ഈ നേട്ടം കൈവരിച്ചത്.

കുപ്രസിദ്ധ മോഷ്ടാവ് ഇളമനസ് റിജു അറസ്റ്റില്‍

ആളൂര്‍: കുഴിക്കാട്ടുശേരിയില്‍ സ്‌കൂട്ടര്‍ മോഷ്ടിച്ച കുപ്രസിദ്ധ മോഷ്ടാവ് ഇളമനസ് റിജു അറസ്റ്റില്‍. 15 ഓളം മോഷണകേസിലെ പ്രതിയാണ് ആളൂര്‍ പോലീസ് അറസ്റ്റ് ചെയ്ത ഇരിങ്ങാലക്കുട വെളയനാട് തറയില്‍ വീട്ടില്‍ ഇളമനസ് എന്ന് വിളിക്കുന്ന റിജു (26). ആളൂര്‍ പോലീസ് സ്റ്റേഷന്‍ പരിധിയിലെ കുഴിക്കാട്ടുശേരി വരദനാട് ക്ഷേത്രത്തിനു സമീപം താമസിക്കുന്ന ജയ്‌സണ്‍ എന്നയാളുടെ വീടിന്‍റെ മുകളിലെ തട്ടില്‍ ഉണക്കാന്‍ ഇട്ടിരുന്ന ഏകദേശം 25,000 രൂപ വില വരുന്ന ജാതിക്ക മോഷണം ചെയ്തു കൊണ്ടുപോയ സംഭവത്തിലും റിജു പ്രതിയാണ്. റിജുവിനെ ചോദ്യം ചെയ്തതില്‍ കഴിഞ്ഞ മാസം പുത്തന്‍ചിറ ഫെറോനപള്ളി കോമ്പൗണ്ടില്‍ നിന്നും ചിറയത്ത് സേവ്യറിന്‍റെ ബൈക്ക് മോഷണം നടത്തിയതും റിജുവാണെന്ന് അറിവായിട്ടുണ്ട്. ആളൂര്‍ പോലീസ് സ്റ്റേഷന്‍ ഇന്‍സ്‌പെക്ടര്‍ ബി. ഷാജിമോന്‍, സബ് ഇന്‍സ്‌പെക്ടര്‍ സുരേന്ദ്രന്‍, പ്രൊബേഷന്‍ എസ്ഐ ജിഷ്ണു, സിവില്‍ പോലീസ് ഓഫീസര്‍മാരായ ആഷിക്, അനീഷ്, അരുണ്‍ എന്നിവര്‍ ചേര്‍ന്നാണ് പ്രതിയെ പിടികൂടിയത്.

കാര്‍ യാത്രക്കാരനുനേരേ ആക്രമണം; ഒരാള്‍ അറസ്റ്റില്‍

ഇരിങ്ങാലക്കുട: കാര്‍ തട്ടിയതിനെ തുടര്‍ന്നുണ്ടായ തര്‍ക്കത്തില്‍ കാര്‍ യാത്രക്കാരനെ ആക്രമിച്ച കേസില്‍ പോലീസ് സ്റ്റേഷന്‍ റൗഡി അറസ്റ്റില്‍. മുരിയാട് ഉള്ളാട്ടിക്കുളം വീട്ടില്‍ മില്‍ജോ(29) യാണ് അറസ്റ്റിലായത്. കഴിഞ്ഞദിവസം രാത്രി എട്ടിന് കോണത്തുകുന്ന് വെച്ച് പുത്തന്‍ചിറ സ്വദേശി കൊട്ടിക്കല്‍ വീട്ടില്‍ മുഹമ്മദ് സിദ്ദിഖിന്‍റെ ബന്ധുവിന്‍റെ കാറില്‍ മില്‍ജോയുടെ കാര്‍ തട്ടിയത് ചോദ്യം ചെയ്തതിലുള്ള വിരോധത്താല്‍ സിദ്ധിഖിനേയും കൂട്ടുകാരെയും ഭീഷണിപ്പെടുത്തി കൈകൊണ്ടിടിച്ച് ഗുരുതരമായി പരിക്കേല്‍പ്പിക്കുകയായിരുന്നു. ഇരിങ്ങാലക്കുട പോലീസ് സ്റ്റേഷന്‍ ഇന്‍സ്‌പെക്ടര്‍ എം.എസ്. ഷാജന്‍, സബ് ഇന്‍സ്‌പെക്ടര്‍മാരായ സഹദ്, കെ.പി. രാജു, സീനിയര്‍ സിവില്‍ പോലീസ് ഓഫീസര്‍ കമല്‍കൃഷ്ണ എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്ത്.

വേറിട്ട അനുഭവമായി ആംഗ്യഭാഷയിലുള്ള ദിവ്യബലി

ചാവക്കാട്: സംസാരശേഷിയും കേൾവിശക്തിയുമില്ലാത്ത വിദേശിയായ വൈദികന്‍റെ ആംഗ്യ ഭാഷയിലുള്ള ദിവ്യബലിയിൽ പങ്കെടുക്കാൻ പാലയൂരിൽ എത്തിയത് നൂറുകണക്കിന് ബധിര-മൂകരായ വിശ്വാസികൾ. ബാൾട്ടിമോർ ഡെഫ് മിനിസ്ട്രിയുടെ തലവനായ ഫാ. മൈക്കിൾ ഡെപ്സിക് മുഖ്യകാർമികത്വം വഹിച്ച വിശുദ്ധ കുർബാനയിൽ ബധിര- മൂകരായ ഫാ. ജോസഫ് തേർമഠം, ഫാ. ബിജു എന്നിവർ സഹകാർമികരായിരുന്നു. രാജ്യത്തിനകത്തും പുറത്തും നിന്നുള്ള മുന്നൂറോളം ബധിര- മൂകരായ വിശ്വാസികൾ ദിവ്യബലിയിൽ പങ്കെടുത്തു. മാർതോമാ ശ്ലീഹാ സ്ഥാപിച്ച പാലയൂർ പള്ളിയിൽ ദുക്റാന ദിനത്തിൽ ദിവ്യബലി അർപ്പിക്കാൻ ആഗ്രഹമുണ്ടെന്ന് അമേരിക്കയിൽ പ്രവർത്തിക്കുന്ന ഫാ. മൈക്കിൾ അറിയിച്ചതിനെ തുടർന്നാണ് മൂകഭാഷയിൽ ദിവ്യബലി അർപ്പിച്ചതെന്ന് തീർഥകേന്ദ്രം ആർച്ച്പ്രീസ്റ്റ് റവ. ഡോ. ഡേവിസ് കണ്ണമ്പുഴ പറഞ്ഞു.

കാരുണ്യഭവനങ്ങൾക്ക് തറക്കല്ലിട്ടു

വടക്കാഞ്ചേരി: നിർധനകുടുംബങ്ങൾക്ക് താമസസൗകര്യം ഒരുക്കുന്നതിനായി ഫൊറോന ദേവാലയത്തിന്‍റെ നേതൃത്വത്തിൽ കാരുണ്യഭവനങ്ങൾ ഒരുങ്ങുന്നു. സെന്‍റ് വിൻസെന്‍റ് ഡി പോൾ സംഘടനയാണ് ഭവനനിർമാണത്തിന് നേതൃത്വം നൽകുന്നത്. ഫൊറോന വികാരി ഫാ. വർഗീസ് തരകൻ കാരുണ്യഭവനങ്ങളുടെ അടിസ്ഥാനശില ആശീർവദിച്ചു. സേവ്യർ ചിറ്റിലപ്പിള്ളി എംഎൽഎ, നഗരസഭ ചെയർമാൻ പി.എൻ. സുരേന്ദ്രൻ, സി.ജെ. സുഭാഷ്, കോഓർഡിനേറ്റർ ഷാജു ചൊവ്വല്ലൂർ എന്നിവർ സംയുക്തമായി അടിസ്ഥാന ശിലകൾ സ്ഥാപിച്ചു. അസി.വികാരി ഫാ. എബിൻ പൈനാടത്ത്, കൗൺസിലർമാരായ ജിജി സാംസൺ, സ്വപ്ന ശശി, ട്രസ്റ്റി ജോൺസൻ പുത്തൂക്കര, ജിജി എടക്കളത്തൂർ, പോളി പുത്തുക്കര, ജിൻസൺ വടക്കൻ എന്നിവർ പങ്കെടുത്തു.

വാഴാനി ട്രൈബൽ ഉന്നതിയിലേക്കുള്ള റോഡ് തകർന്നു

പുന്നംപറമ്പ്: വാഴാനി കാക്കിനിക്കാട് ട്രൈബൽ ഉന്നതി ഊരിലേക്കുള്ള റോഡ് സഞ്ചാരയോഗ്യമല്ലാതായിട്ട് വർഷങ്ങൾ പിന്നിട്ടു. നാല്പതോളം കുടുംബങ്ങൾ താമസിക്കുന്ന പ്രദേശത്തേയ്ക്കുപോകുന്നത് ഈ റോഡിലൂടെയാണ്. അവിടെ തന്നെയാണ് ട്രൈബൽ എൽപി സ്കൂളും സ്ഥിതിചെയ്യുന്നത്. റോഡിന്‍റെ പുനർനിർമാണം എത്രയുംവേഗംനടത്തി സഞ്ചാരയോഗ്യമാക്കാൻ ജില്ലാ കളക്ടർ ഉൾപ്പടെയുള്ള അധികൃതർക്ക് യൂത്ത് കോൺഗ്രസ് തെക്കുംകര മണ്ഡലം കമ്മിറ്റി പരാതി നൽകി. പരാതി കണ്ടില്ലെന്നുനടിച്ചാൽ ശക്തമായ പ്രതിഷേധ പരിപാടികൾക്ക് യൂത്ത് കോൺഗ്രസ് നേതൃത്വംനൽകുമെന്ന് യൂത്ത് കോൺഗ്രസ് തെക്കുംകര മണ്ഡലം പ്രസിഡന്‍റ് അനീഷ് കണ്ടംമാട്ടിൽ, നേതാക്കളായ അഡ്വ. അഖിൽ പി.സാമുവൽ, വി.ജെ. ജമാൽ, പി. ദുർഗദാസ്, വിജോയ് കുറ്റിക്കാടൻ എന്നിവർ അറിയിച്ചു.

കനത്തമഴയില്‍ തൊഴുത്ത് തകര്‍ന്നു പശു ചത്തു; മറ്റൊരു പശുവിന് പരിക്ക്

ചെങ്ങാലൂര്‍: രണ്ടാംകല്ലില്‍ കനത്ത മഴയില്‍ തൊഴുത്ത് തകര്‍ന്നുവീണ് പശു ചത്തു. ഒരു പശുവിന് പരിക്കേറ്റു. ഇന്നലെ രാവിലെ മഞ്ഞളി ജോസിന്‍റെ തൊഴുത്താണ് ഇടിഞ്ഞുവീണത്. കോണ്‍ക്രീറ്റ് സ്ലാബ് തകര്‍ന്ന് പശുക്കളുടെ ദേഹത്ത് പതിക്കുകയായിരുന്നു. കറവിനായി ജോസ് തോഴുത്തിന് അടുത്ത് എത്തിയപ്പോഴാണ് തൊഴുത്ത് തകര്‍ന്നുകിടക്കുന്നത് കണ്ടത്. തുടര്‍ന്ന് നാട്ടുകാരും പുതുക്കാട് നിന്നെത്തിയ ഫയര്‍ ഫോഴ്‌സും രണ്ടുമണിക്കൂറോളം പരിശ്രമിച്ചാണ് പശുക്കളെ പുറത്തെടുത്തത്. അപ്പോഴേയ്ക്കും ഒരു പശു ചത്തിരുന്നു.

ബസ്കാത്തിരിപ്പുകേന്ദ്രം സ്ഥാപിക്കണം

മൂന്നുമുറി: ജില്ലയില്‍ ജനസംഖ്യയിലും വിസ്തൃതിയിലും മുന്നിലുള്ള പഞ്ചായത്തായ മറ്റത്തൂരിന്‍റെ ഭരണസിരാകേന്ദ്രമായ മൂന്നുമുറിയില്‍ ബസ് കാത്തിരിപ്പുകേന്ദ്രം സ്ഥാപിക്കണമെന്ന ആവശ്യം ശക്തമായി. ദിവസേന നൂറുകണക്കിനാളുകള്‍ വന്നുപോകുന്ന ഇവിടെ മഴയും വെയിലുമേറ്റാണ് യാത്രക്കാര്‍ ബസ് കാത്തുനില്‍ക്കുന്നത്. മുപ്പതിലേറെ ബസുകള്‍ സര്‍വിസ് നടത്തുന്ന കൊടകര വെള്ളിക്കുളങ്ങര റൂട്ടിലാണ് മൂന്നുമുറിയുള്ളത്. മറ്റത്തൂര്‍ ഗ്രാമപഞ്ചായത്തോഫിസ്, മറ്റത്തൂര്‍ വില്ലേജോഫിസ്, മറ്റത്തൂര്‍ കൃഷിഭവന്‍ എന്നീ സ്ഥാപനങ്ങള്‍ക്കു പുറമെ ദേശസാല്‍കൃത ബാങ്ക്, മറ്റത്തൂര്‍ ശ്രീകൃഷ്ണ ഹൈസ്‌കൂള്‍, മറ്റത്തൂര്‍ സെന്‍റ് ജോസഫ്‌സ് യുപി സ്‌കൂള്‍, ദേവാലയം, ക്ഷേത്രങ്ങള്‍ എന്നിവയും സ്ഥിതിചെയ്യുന്നത് മൂന്നുമുറിയിലാണ്. ബസ് കാത്തിരിപ്പു കേന്ദ്രം ഇല്ലാത്തതിനാല്‍ ഇവിടെ വന്നുപോകുന്നവരും വിദ്യാര്‍ഥികളും വ്യാപാര സ്ഥാപനങ്ങളുടെ മുന്നിലാണ് ബസ് കാത്തുനില്‍ക്കുന്നത്. ആവശ്യമായ സ്ഥലം കണ്ടെത്തി ജനപങ്കാളിത്തത്തോടെ ഇരിപ്പിടങ്ങളോടു കൂടിയ ബസ് കാത്തിരിപ്പു കേന്ദ്രം സ്ഥാപിച്ചാല്‍ യാത്രക്കാരുടെ ദുരിതത്തിന് പരിഹാരം കാണാനാകുമെന്നും ഇതിനായി അധികൃതര്‍ നടപടി കൈക്കൊള്ളണമെന്നുമാണ് ആവശ്യമുയരുന്നത്.

കനകമല മാര്‍തോമ തീര്‍ഥാടനകേന്ദ്രത്തില്‍ ദുക്‌റാന തിരുനാള്‍ ഭക്തിനിര്‍ഭരം

കൊടകര: കനകമല മാര്‍തോമ തീര്‍ഥാടനകേന്ദ്രത്തില്‍ നടന്ന ദുക്‌റാന ഊട്ടുതിരുനാള്‍ ഭക്തിസാന്ദ്രമായി. തിരുനാളാഘോഷങ്ങളില്‍ സംബന്ധിക്കാന്‍ സനീഷ്‌കുമാര്‍ ജോസഫ് എംഎല്‍എ അടക്കമുളള ജനപ്രതിനിധികളും നിരവധി വിശ്വാസികളും എത്തി. രാവിലെ ഫാ. ജെയിംസ് ആലപ്പാട്ട് സിഎംഐയുടെ കാര്‍മികത്വത്തില്‍ നടന്ന തിരുനാള്‍ പാട്ടുകുര്‍ബാനയ്ക്കു ശേഷം സഹവികാരി ഫാ.ആശിഷ് കീരഞ്ചിറ ഊട്ടുവെഞ്ചരിപ്പ് നിര്‍വഹിച്ചു. കുരിശുമുടി തീര്‍ഥാടനകേന്ദ്രത്തില്‍ നടന്ന ദിവ്യബലിക്ക് ചാന്ദാ രൂപതയില്‍ നിന്നുള്ള ഫാ. ജോബി ഇല്ലിമൂട്ടിൽ കാര്‍മികത്വം വഹിച്ചു. അടിവാരം പള്ളിയില്‍ നടന്ന റാസ കുര്‍ബാനയ്ക്ക് കൊടുങ്ങ പള്ളി വികാരി ഫാ.ഷിബു നെല്ലിശേരി മുഖ്യകാര്‍മികത്വം വഹിച്ചു. ഫാ. ആല്‍ബിന്‍ പുതുശേരി, ഫാ. റെയ്‌സണ്‍ തട്ടില്‍ എന്നിവര്‍ സഹകാര്‍മ്മികരായി. ഫാ. ജെയിംസ് കുരുകിലാംകാട്ട് സന്ദേശം നല്‍കി. തുടര്‍ന്ന് ഫാ.ഡാനിഷ് കണ്ണാടന്‍റെ നേതൃത്വത്തില്‍ തിരുനാള്‍ പ്രദക്ഷിണവും തിരുശേഷിപ്പ് വണക്കവും ഉണ്ടായി. പതിനയ്യായിരത്തോളം പേര്‍ നേര്‍ച്ച ഊട്ടില്‍ സംബന്ധിച്ചു. തിരുനാളാഘോഷപരിപാടികള്‍ക്ക് ജനറല്‍ കണ്‍വീനര്‍ ഷോജന്‍ ഡി. വിതയത്തില്‍, ഷാജു വെളിയന്‍, കൈക്കാരന്‍മാരായ ജോസ് വെട്ടുമണിക്കല്‍, ജോസ് കറുകുറ്റിക്കാരന്‍, ജോജു ചുള്ളി, ജോയ് കളത്തിങ്കല്‍ തുടങ്ങിയവര്‍ നേതൃത്വം നല്‍കി.

കോട്ടപ്പുറം രൂപതാദിനാഘോഷവും ഊട്ടുതിരുനാളും പ്രൗഢഗംഭീരമായി

കോട്ടപ്പുറം: കോട്ടപ്പുറം മാർക്കറ്റിലെ പുരാതനമായ വിശുദ്ധ തോമാശ്ലീഹയാൽ സ്ഥാപിതമായെന്നു വിശ്വസിക്കുന്ന മുസിരിസ് സെന്‍റ് തോമസ് കപ്പേളയിൽ നടന്ന വിശുദ്ധ തോമസിന്‍റെ തിരുനാളും കോട്ടപ്പുറം രൂപതാദിനാഘോഷവും പ്രൗഢഗംഭീരമായി. ഇതോടനുബന്ധിച്ച് മുസിരിസ് സെന്‍റ് തോമസ് കപ്പേളയിൽ ബിഷപ് ഡോ. അംബ്രോസ് പുത്തൻവീട്ടിലിന്‍റെ മുഖ്യകാർമികത്വത്തിൽ ദിവ്യബലിയും വചനപ്രഘോഷണവും നടന്നു. രൂപതയിലെ വൈദികരും സന്യസ്ത വൈദികരും ദിവ്യബലിയിൽ സഹകാർമികരായി. കോട്ടപ്പുറം രൂപത വാർഷിക പദ്ധതിയുടേയും യുവജന കൂട്ടായ്മയുടെ നേതൃത്വത്തിലുള്ള ക്രിസ്ബാൻഡിന്‍റെ കവർ സോംഗിന്‍റെ പ്രകാശനവും ഫെസിലിറ്റേഷൻ സെന്‍ററിന്‍റെ ഉദ്ഘാടനവും നടന്നു. ഊട്ടുനേർച്ച ബിഷപ് ഡോ. അംബ്രോസ് പുത്തൻവീട്ടിൽ ആശീർവദിച്ചു. ആയിരങ്ങൾ ഊട്ടുനേർച്ചയിൽ പങ്കെടുത്തു. തിരുകർമങ്ങൾക്ക് മുന്നോടിയായി കോട്ടപ്പുറം സെന്‍റ്് മൈക്കിൾസ് എൽപി സ്കൂളിൽ നിന്ന് കോട്ടപ്പുറം മുസിരിസ് സെന്‍റ് തോമസ് കപ്പേളയിലേക്ക് നടന്ന പ്രവേശന പ്രദക്ഷിണത്തിൽ ബിഷപ് ഡോ. അംബ്രോസ് പുത്തൻവീട്ടിലിനൊപ്പം രൂപത, ഇടവക, സന്യസ്ത പ്രതിനിധികളും രൂപതയിലെ വൈദികരും അണിനിരന്നു.

എഐ ശില്പശാല

ഇരിങ്ങാലക്കുട: ക്രൈസ്റ്റ് കോളജ് മലയാള വിഭാഗവും ഐക്യുഎസിയും സംയുക്തമായി സ്‌കൂള്‍ കോളജ് തലങ്ങളിലെ അധ്യാപകര്‍ക്കായി ഏകദിന എഐ ശില്‍പ്പശാല സംഘടിപ്പിച്ചു. ഫാ. ഡിസ്മാസ് ലാബില്‍ വച്ച് മലയാള വിഭാഗം അധ്യക്ഷനും ഗൂഗിള്‍ സര്‍ട്ടിഫൈഡ് എഡ്യൂക്കേറ്ററുമായ ഫാ. ടെജി കെ. തോമസിന്‍റെ നേതൃത്വത്തില്‍ നടന്ന ശില്പശാല കോളജ് പ്രിന്‍സിപ്പല്‍ റവ.ഡോ. ജോളി ആന്‍ഡ്രൂസ് സിഎംഐ ഉദ്ഘാടനം ചെയ്തു.

മരിയന്‍ എക്സിബിഷന്‍ സംഘടിപ്പിച്ചു

ഇരിങ്ങാലക്കുട: ആത്മീയരംഗത്തു മരിയന്‍ ചൈതന്യംപകർന്ന് സെന്‍റ് തോമസ് കത്തീഡ്രല്‍ സിഎല്‍സി സംഘടിപ്പിച്ച മരിയന്‍ എക്സിബിഷന്‍. പരിശുദ്ധ കന്യകാമറിയത്തിന്‍റെ ജനനംമുതല്‍ സ്വര്‍ഗാരോപണം വരെയുള്ള ജീവരിത്രം, തിരുനാളുകള്‍, പ്രത്യക്ഷീകരണങ്ങള്‍ എന്നിവ പ്രദര്‍ശനത്തിലുള്‍പ്പെട്ടിരുന്നു. പ്രസിഡന്‍റ് അജയ് ബിജു, സെക്രട്ടറി റോഷന്‍ ജോഷി, ജനറല്‍ കണ്‍വീനര്‍ പോള്‍ പയസ്, ജോയിന്‍റ് കണ്‍വീനര്‍മാരായ ഡേവീസ് ഷാജു, ആഷ്‌ലിന്‍ കെ. ജെയ്സണ്‍ എന്നിവര്‍ നേതൃത്വംനല്‍കി.

കാഴ്ച വിരുന്നൊരുക്കി മാതൃവേദിയുടെ മെഗാ മാര്‍ഗംകളി

ഇരിങ്ങാലക്കുട: ദുക്‌റാന തിരുനാളിന്‍റെ ഭാഗമായി സെന്‍റ് തോമസ് കത്തീഡ്രലിലെ മാതൃവേദിയുടെ നേതൃത്വത്തില്‍ നടന്ന മെഗാ മാര്‍ഗംകളി ബിഷപ് മാര്‍ പോളി കണ്ണൂക്കാടന്‍ ഉദ്ഘാടനംചെയ്തു. മാതൃവേദി പ്രസിഡന്‍റ് ജോയ്സി ഡേവിസ് ചക്കാലക്കല്‍, സെക്രട്ടറി മൃദുല സ്റ്റാന്‍ലി, ജനറല്‍ കണ്‍വീനര്‍ ജൂലി ആന്‍റണി, കണ്‍വീനര്‍മാരായ ജോസ്മി ഷാജി, ബീന രാജേഷ്, റോസിലി പോള്‍ തട്ടില്‍, ഉണ്ണിമേരി ബോബി, ജോസ്പീന ജോയ് എന്നിവര്‍ നേതൃത്വംനല്‍കി.

ഗ്രാമികയിൽ അടിയന്തരാവസ്ഥ അനുഭവങ്ങൾ നാളെ

മാള: അടിയന്തരാവസ്ഥയ്ക്ക് അമ്പതാണ്ട് പൂർത്തിയാകുന്ന സാഹചര്യത്തിൽ കുഴിക്കാട്ടുശേരി ഗ്രാമിക ചർച്ചാവേദി പ്രത്യേക പരിപാടി സംഘടിപ്പിക്കുന്നു. നാളെ വൈകീട്ട് നാലിന് മുൻ നക്സലൈറ്റ് പ്രവർത്തകനും ഗ്രാമികയുടെ പ്രസിഡന്‍റുമായ പി.കെ. കിട്ടൻ, അടിയന്തരാവസ്ഥയിൽ 17 മാസക്കാലത്തെ ജയിൽവാസത്തിന്‍റേയും ഒരു മാസത്തിലേറെ നീണ്ട തൃശൂരിലെ കോൺസൻട്രേഷൻ ക്യാമ്പിലേയും അനുഭവങ്ങൾ പങ്കുവക്കുന്നു. അടിയന്തരാവസ്ഥ തടവുകാരനും സിപിഐ - എംഎൽ റെഡ്ഫ്ലാഗ് സംസ്ഥാന സെക്രട്ടറിയുമായ പി.സി. ഉണ്ണിച്ചെക്കൻ അധ്യക്ഷനാകും.

കാരൂർ മഠം ശിവക്ഷേത്രം കൈമാറണം

കൊടുങ്ങല്ലൂർ: കാരൂർ മഠം ശിവക്ഷേത്രം കാരൂർ കുടുംബത്തിനു കൈമാറാൻ ഇരിങ്ങാലക്കുട പ്രിൻസിപ്പൽ സബ് കോടതി ഉത്തരവായതായി കാരൂർ നന്ദകുമാർ വാർത്താസമ്മേളനത്തിൽ അറിയിച്ചു. 900 വർഷം പഴക്കമുണ്ടെന്നു കരുതുന്ന ക്ഷേത്രം കള്ളആധാരമുണ്ടാക്കി ശാന്തിക്കാർ തട്ടിയെടുക്കുകയായിരുന്നുവെന്നാണു കേസ്. ശാന്തിക്കാർക്കു ദാനമായാണു കാരൂർ കുടുംബം ഭൂമി നൽകിയതെന്നും ആ സമയത്ത് ക്ഷേത്രമുണ്ടായിരുന്നില്ലെന്നും ശിവപ്രതിഷ്ഠ നടത്തിയതു തങ്ങളാണെന്നുമുള്ള ശാന്തിക്കാരുടെ വാദം കോടതി തള്ളിയതായും കാരൂർ നന്ദകുമാർ പറഞ്ഞു. 150 വർഷംമുന്പ് തേവരുടെ പേരിൽ ഭൂമി സമർപ്പിച്ചതിന്‍റെ രേഖകൾ പുതുക്കിക്കൊണ്ടിരിക്കുകയാണെന്നും നന്ദകുമാർ വാർത്താസമ്മേളനത്തിൽ പറഞ്ഞു.

കൃഷ്ണനാട്ടം കച്ചകെട്ട് അഭ്യാസം ഇന്നുതുടങ്ങും

ഗുരുവായൂർ: അവധിക്കാലത്തിനുശേഷം കൃഷ്ണനാട്ടം കലാകാരന്മാർക്ക് എല്ലാ വർഷവും നടത്താറുള്ള കച്ചകെട്ട് അഭ്യാസം ഇന്നുരാവിലെ ഏഴിന് ആരംഭിക്കും. ആദ്യ ആഴ്ച രാവിലെ മാത്രമായിരിക്കും അഭ്യാസം. പുലർച്ചെ മുതൽ ഉഴിച്ചിൽ, അഭ്യാസം, ചൊല്ലിയാട്ടം തുടങ്ങിയവയാണ്. കണ്ണുസാധകം, കാൽസാധകം, തീവട്ടം കുടയൽ, ചില്വാനം കാൽസാധകം, പതിഞ്ഞ ഇരട്ടിവട്ടം എന്നിവ പ്രത്യേകമായി പരിശീലിപ്പിക്കും. ഉഴിച്ചിലും അവതാരം, കാളിയമർദനം, രാസക്രീഡ, കംസവധം, എന്നീ നാല് കഥകളുടെ വിശദമായ ചൊല്ലിയാട്ടവും മറ്റു കഥകളിലെ തെരഞ്ഞെടുത്ത രംഗങ്ങളുടെ പരിശീലനവുംനടക്കും. വൈകിട്ട് ആറുമുതൽ നാമംചൊല്ലൽ, സാധകം, മുദ്രാഭിനയം, കണ്ണുസാധകം, കൈവീശൽ, കൈമറിക്കൽ, ചെറിയ കുട്ടികൾക്ക് താളംപിടിക്കൽ, മുഖാഭിനയം എന്നിവ പരിശീലിപ്പിക്കും. രാത്രി എട്ടു വരെയാണ് പരിശീലനം. വേഷം, പാട്ട്, ശുദ്ധമദ്ദളം, തൊപ്പി മദ്ദളം, ചുട്ടി എന്നീ വിഭാഗങ്ങൾക്ക് പ്രത്യേകമായും പരിശീലനംനൽകും. 41 ദിവസമാണ് കച്ചകെട്ട് അഭ്യാസം. കച്ചകെട്ടഭ്യാസത്തിനുശേഷം സെപ്റ്റംബർ ഒന്നിന് അവതാരം കളിയോടെ കൃഷ്ണനാട്ടം കളി പുനരാരംഭിക്കും.

ഞാറ്റുവേലച്ചന്ത സംഘടിപ്പിച്ചു

പുന്നംപറമ്പ്: തെക്കുംകരയിൽ ഞാറ്റുവേലച്ചന്ത സംഘടിപ്പിച്ചു. തെക്കുംകര പഞ്ചായത്തിന്‍റെയും തെക്കുംകര കൃഷിഭവന്‍റെയും സംയുക്താഭിമുഖ്യത്തിൽ സംഘടിപ്പിച്ച ഞാറ്റുവേലച്ചന്ത സേവ്യർ ചിറ്റിലപ്പിള്ളി എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ടി.വി. സുനിൽകുമാർ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് ഇ. ഉമാലക്ഷ്മി, ബ്ലോക്ക് പഞ്ചായത്ത് വൈസ് പ്രസിഡന്‍റ് സി.വി. സുനിൽകുമാർ, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷ എം.കെ. ശ്രീജ, പഞ്ചായത്ത് സ്ഥിരംസമിതി അധ്യക്ഷൻമാരായ പി.ആർ. രാധാകൃഷ്ണൻ, വി.സി. സജീന്ദ്രൻ, സബിത സതീഷ്, പഞ്ചായത്ത് അംഗങ്ങളായ എ.ആർ. കൃഷ്ണൻകുട്ടി, കെ. രാമചന്ദ്രൻ, സിഡിഎസ് ചെയർപേഴ്സൻ അജിത സുനിൽ തുടങ്ങിയവർ പ്രസംഗിച്ചു.

നെടുമ്പാള്‍ പാടത്തെ വെള്ളക്കെട്ടില്‍ വയോധിക മരിച്ചനിലയില്‍

പറപ്പൂക്കര: നെടുമ്പാള്‍ പാടത്തെ വെള്ളക്കെട്ടില്‍ വയോധികയെ മരിച്ചനിലയില്‍ കണ്ടെത്തി. നെടുമ്പാള്‍ സ്വദേശി ഞാറ്റുവെട്ടി വീട്ടില്‍ പരേതനായ ചന്ദ്രന്റെ ഭാര്യ ഓമന (69) ആണ് മരിച്ചത്. ഇന്നലെ വൈകിട്ട് നാലരയോടെയാണ് നെടുമ്പാള്‍ തെക്കുമുറി പാടത്തെ വെള്ളക്കെട്ടില്‍ ഓമനയെ മരിച്ചനിലയില്‍ കണ്ടത്. പുതുക്കാട് പോലീസ് മേല്‍നടപടികള്‍ സ്വീകരിച്ചു. മൃതദേഹം പുതുക്കാട് താലൂക്ക് ആശുപത്രിയിലേക്ക് മാറ്റി. മക്കൾ: തുഷാര, തുജേഷ്. മരുമകന്‍: ബിജു.

വിശപ്പുരഹിത തൃശൂർ; മന്ന പദ്ധതി മൂന്നാംവർഷത്തിലേക്ക്

തൃശൂർ: വിശപ്പുരഹിതനഗരമെന്ന ആശയം മുൻനിർത്തി കോർപറേഷന്‍റെ ആഭിമുഖ്യത്തിൽ ലയണ്‍സ് ക്ലബ് ഇന്‍റർനാഷണൽ 318 ഡിയുടെ സഹകരണത്തോടെ നടപ്പാക്കുന്ന മന്ന പദ്ധതി മൂന്നാംവർഷത്തിലേക്കു കടന്നതിന്‍റെ ഉദ്ഘാടനം മേയർ എം.കെ. വർഗീസ് നിർവഹിച്ചു. ലയണ്‍സ് ഡിസ്ട്രിക്ട് ഗവർണർ ജയകൃഷ്ണൻ അധ്യക്ഷത വഹിച്ചു. ശക്തൻ സ്റ്റാൻഡിനു സമീപം ഒരുക്കിയ പന്തലിൽ രണ്ടുവർഷമായി ലയണ്‍സ്ക്ലബിന്‍റെ നേതൃത്വത്തിലാണു ദിവസവും ഉച്ചയ്ക്ക് അഞ്ഞൂറോളംപേർക്കു ഭക്ഷണം വിതരണംചെയ്യുന്നത്. കേരള ലയണ്‍സ് മൾട്ടിപ്പിൾ സെക്രട്ടറി ജെയിംസ് വളപ്പില, വൈസ് ഗവർണർമാരായ സുരേഷ് വാര്യർ, അഷ്റഫ്, ഹങ്കർ കോ ഓർഡിനേറ്റർ പ്രദീപ് മേനോൻ തുടങ്ങിയർ പങ്കെടുത്തു.

സഹൃദയ മാനേജ്മെന്‍റ് ഇൻസ്റ്റിറ്റ്യൂട്ടിൽ പുതിയ എംബിഎ ബാച്ച് ഉദ്ഘാടനം ചെയ്തു

കൊടകര: സഹൃദയ ഇൻസ്റ്റിറ്റ്യൂട്ട് ഓഫ് മാനേജ്മെന്‍റ് സ്റ്റഡീസിലെ പത്താമത് എംബിഎ ബാച്ച് ആഘസ് 2025-ന്‍റെ ഉദ്ഘാടനം ഇരിങ്ങാലക്കുട ബിഷപ് മാർ പോളി കണ്ണൂക്കാടൻ നിർവഹിച്ചു. കല്യാണ്‍ ജ്വല്ലേഴ്സ് ലിമിറ്റഡ് ഡയറക്ടർ ടി.എസ്. അനന്തരാമൻ വിശിഷ്ടാതിഥിയായിരുന്നു. സിംസ് മാനേജർ മോണ്‍. വിൽസണ്‍ ഈരത്തറ എംബിഎ വിദ്യാർഥികൾക്ക് വിദ്യാരംഭ പ്രതിജ്ഞ ചൊല്ലിക്കൊടുത്തു. കോളജ് ന്യൂസ്ലെറ്റർ - സ്പെക്ട്രം 2025 മുഖ്യാതിഥിക്കു കൈമാറി മാനേജർ പ്രകാശനം ചെയ്തു. 2024-25 അധ്യയനവർഷത്തിലെ സിംസിന്‍റെ അക്കാദമിക് എക്സലൻസ് അവാർഡുകളും വിതരണം ചെയ്തു. പ്രഫ. ദീപ്തികുമാർ, അസോസിയേറ്റ് പ്രഫസർ റവ. ഡോ. ബിനോയ് തോമസ്, പ്രഫ. നോയൽ വിൽസണ്‍, പ്ലേസ്മെന്‍റ് ഓഫീസർ ജോസഫ് ബാസ്റ്റിൻ, അക്കൗണ്ട് ഓഫീസർ ഡെറിൻ ഡേവിസ് തുടങ്ങിയവർ പുരസ്കാരങ്ങൾ ഏറ്റുവാങ്ങി. വിദ്യാർഥികൾക്ക് ബിഷപ് മാർ ജെയിംസ് പഴയാറ്റിൽ മെമ്മോറിയൽ സിംസ് സ്കോളർഷിപ്പുകളും മെറിറ്റ് സ്കോളർഷിപ്പുകളും സമ്മാനിച്ചു. സിംസ് എക്സിക്യൂട്ടീവ് ഡയറക്ടർ റവ. ഡോ. ജിനോ ജോണി മാളക്കാരൻ, ഡയറക്ടർ ഡോ. ധന്യ അലക്സ്, പൂർവവിദ്യാർഥി ജോസഫ് ജോർജ് എന്നിവർ പ്രസംഗിച്ചു.

പാലയൂർ തീർഥകേന്ദ്രത്തിൽ

പാലയൂർ: മാർതോമ മേജർ ആർക്കി എപ്പിസ്കോപ്പൽ തീർഥകേന്ദ്രത്തിലെ മാർതോമാ ശ്ലീഹായുടെ ദുക്റാന ഊട്ടിനുള്ള ഒരുക്കങ്ങൾ പൂർത്തിയായതായി ആർച്ച്പ്രീസ്റ്റ് റവ. ഡോ. ഡേവിസ് കണ്ണമ്പുഴ, ജനറൽ കൺവീനർ ടി.ജെ. ഷാജു, ഊട്ട് കൺവീനർ ചാക്കോ പുലിക്കോട്ടിൽ, ജോയിന്‍റ് കൺവീനർ സി.ജെ. സാബു എന്നിവർ അറിയിച്ചു. രാവിലെ എട്ടോടെ ആരംഭിക്കുന്ന നേർച്ച ഭക്ഷണവിതരണം വൈകീട്ടുവരെ തുടരും. അരലക്ഷത്തോളം തീർഥാടകരെയാണ് പ്രതീക്ഷിക്കുന്നത്. പഴം , പപ്പടം, പായസം ഉൾപ്പെടെ ഏഴുതരം വിഭവങ്ങൾ ഒരുക്കുന്നത് പാചകവിദഗ്ധൻ ഒ.കെ. നാരായണൻ നായരുടെ സംഘമാണ്. സഹായത്തിനായി ഇടവകയിലെ വിശ്വാസികൾ ഒപ്പമുണ്ട്. ഭക്ഷണവിതരണത്തിനായി പാരിഷ് ഹാളിനുപുറമേ വിശാലമായ പന്തൽ ഒരുക്കിയിട്ടുണ്ട്. അഞ്ചിടത്താണ് വിതരണം. ഇന്ന് രാവിലെ 6.30 മുതൽ നാലുവരെ വിവിധ സമയങ്ങളിലായി ആറ് ദിവ്യബലി ഉണ്ടായിരിക്കും. 12, 13, 14 തീയതികളിൽ ആഘോഷിക്കുന്ന തർപ്പണ തിരുനാളിന്‍റെ കൊടി രാവിലെ 7.30ന് തീർഥക്കുള കരയിലെ രക്തസാക്ഷി മണ്ഡപത്തിൽനിന്ന് കൊണ്ടുവരും. തിരുനാൾ കൊടിയേറ്റം രാവിലെ 9.30 ന് മാർ ബോസ്കോ പുത്തൂർ നിർവഹിക്കും. തുടർന്ന് അർപ്പിക്കുന്ന പാട്ടുകുർബാനയ്ക്ക് ബിഷപ് മുഖ്യ കാർമികനാകും. രണ്ടരയ്ക്കുള്ള വിശുദ്ധ കുർബാനയ്ക്ക് അമേരിക്കയിലെ ഡഫ് മിനിസ്ട്രിയിൽ പ്രവർത്തിക്കുന്ന ബധിര- മൂക വൈദികനായ ഫാ. മിഖായേലിന്‍റെ നേതൃത്വത്തിലുള്ള സംഘം ആംഗ്യ ഭാഷയിൽ ബലിയർപ്പിക്കും.

ദുക്റാന ഊട്ടുതിരുനാള്‍ ഇന്ന്

ഇരിങ്ങാലക്കുട കത്തീഡ്രലിൽ ഇരിങ്ങാലക്കുട: സെന്‍റ് തോമസ് കത്തീഡ്രല്‍ ഇടവക മധ്യസ്ഥനായ വിശുദ്ധ തോമാശ്ലീഹായുടെ രക്തസാക്ഷിത്വത്തിന്‍റെ ഓര്‍മയാചരിക്കുന്ന ഇന്ന് ദുക്റാന ഊട്ടുതിരുനാള്‍ നടക്കും. ഇരുപത്തയ്യായിരം പേര്‍ക്ക് ഒരുക്കുന്ന നേര്‍ച്ചസദ്യ കത്തീഡ്രല്‍ അങ്കണത്തിലെ പന്തലില്‍ രാവിലെ 8.30 മുതല്‍ ഉച്ചക്ക് രണ്ടു വരെയാണ് ക്രമീകരിച്ചിരിക്കുന്നത്. രാവിലെ 7.30ന് നടക്കുന്ന ദിവ്യബലിക്ക് ബിഷപ് മാര്‍ പോളി കണ്ണൂക്കാടന്‍ മുഖ്യകാര്‍മികത്വം വഹിക്കും. തുടര്‍ന്ന് ഊട്ടുനേര്‍ച്ച വെഞ്ചരിപ്പ്. 10.30 ന് നടക്കുന്ന ആഘോഷമായ തിരുനാള്‍ ദിവ്യബലിക്ക് അവിട്ടത്തൂര്‍ ഹോളിഫാമിലി പള്ളി വികാരി ഫാ. റെനില്‍ കാരാത്ര മുഖ്യകാര്‍മികത്വം വഹിക്കും. കല്ലേറ്റുംകര പാക്സ് ഡയറക്ടര്‍ ഫാ. ഫ്രീജോ പാറയ്ക്കല്‍ തിരുനാള്‍ സന്ദേശം നല്‍കും. തുടര്‍ന്ന് ആഘോഷമായ തിരുനാള്‍ പ്രദക്ഷിണം നടക്കും. ഊട്ടുതിരുനാളിനു ലഭിക്കുന്ന സംഭാവനയില്‍ ചെലവുകഴിഞ്ഞ് ബാക്കിവരുന്ന തുക മാനസിക വെല്ലുവിളി നേരിടുന്ന യുവതികളുടെ പുനരധിവാസത്തിനായി ഇടവകയുടെ നേതൃത്വത്തില്‍ നടത്തിവരുന്ന സാന്ത്വന സദനത്തിനായി നീക്കിവയ്ക്കും. വികാരി റവ.ഡോ. ലാസര്‍ കുറ്റിക്കാടന്‍, അസിസ്റ്റന്‍റ് വികാരിമാരായ ഫാ. ഓസ്റ്റിന്‍ പാറയ്ക്കല്‍, ഫാ. ബെല്‍ഫിന്‍ കോപ്പുള്ളി, ഫാ. ആന്‍റണി നമ്പളം, തിരുനാള്‍ ജനറല്‍ കണ്‍വീനറും ട്രസ്റ്റിയുമായ ബാബു ജോസ് പുത്തനങ്ങാടി, കൈക്കാരന്മാരായ തിമോസ് പാറേക്കാടന്‍, പോള്‍ ചാമപറമ്പില്‍, ജോമോന്‍ തട്ടില്‍ മണ്ടി ഡേവി, കേന്ദ്രസമിതി പ്രസിഡന്‍റ് ജോമി ചേറ്റുപുഴക്കാരന്‍, തിരുനാള്‍ ജോയിന്‍റ് കണ്‍വീനര്‍മാരായ ഷാജു പന്തലിപ്പാടന്‍, ജിജി പള്ളായി, രഞ്ചി അക്കരക്കാരന്‍, ജോസ് ജി. തട്ടില്‍, പബ്ലിസിറ്റി കണ്‍വീനര്‍ പി.ടി. ജോര്‍ജ് പള്ളന്‍, ജോയിന്‍റ് കണ്‍വീനര്‍ ജോബി പള്ളായി എന്നിവര്‍ നേതൃത്വംനല്‍കും.

പോട്ട ബാങ്ക് കവര്‍ച്ച; അന്വേഷണ മികവിന് അംഗീകാരം

ഇരിങ്ങാലക്കുട: ചാലക്കുടി പോട്ട ബാങ്ക് കവര്‍ച്ചക്കേസിലെ അന്വേഷണ മികവിന് തൃശൂര്‍ റൂറല്‍ പോലീസിനെ സംസ്ഥാന പോലീസ് മേധാവിയാ യിരുന്ന ഡോ. ഷെയ്ഖ് ദര്‍വേഷ് സാഹിബ് അഭിനന്ദിച്ചു. മെറിറ്റോറിയസ് സര്‍വീസ് എന്‍ട്രി സര്‍ട്ടിഫിക്കറ്റും വിതരണം ചെയ്തു. റൂറല്‍ ജില്ലാ പോലീസ് മേധാവി ബി. കൃഷ്ണകുമാര്‍, ചാലക്കുടി ഡിവൈഎസ്പി കെ. സുമേഷ്, കൊടുങ്ങല്ലൂര്‍ ഡിവൈഎസ്പി വി.കെ. രാജു, ചാലക്കുടി ഇന്‍സ്‌പെക്ടര്‍ എം.കെ. സജീവ്, കൊരട്ടി ഇന്‍സ്‌പെക്ടര്‍ അമൃത് രംഗന്‍, കൊടകര ഇന്‍സ്‌പെക്ടര്‍ പി.കെ. ദാസ്, അതിരപ്പിള്ളി ഇന്‍സ്‌പെക്ടര്‍ വി. ബിജു എന്നിവര്‍ക്കാണ് സര്‍ട്ടിഫിക്കറ്റ്. 2025 ഫെബ്രുവരി 14 ന് പോട്ട ബാങ്കിലെ ജീവനക്കാരെ കത്തി കാണിച്ച് ഭീഷണിപ്പെടുത്തി ബന്ദികളാക്കി 15 ലക്ഷം രൂപ കവര്‍ന്ന കേസില്‍, പ്രതിയായ ആശാരിപ്പാറ സ്വദേശി തെക്കന്‍ വീട്ടില്‍ റിജോ ആന്‍റണിയെ (49) മൂന്നാം ദിവസം അറസ്റ്റ് ചെയ്തിരുന്നു. പ്രതി ഇപ്പോഴും ജയിലിലാണ്.

ചാവക്കാട് യൂത്ത് കോൺഗ്രസ് മാർച്ചിൽ സംഘർഷം, ജലപീരങ്കി പ്രയോഗിച്ചു

ചാവക്കാട്: കവർച്ചക്കേസിൽ പ്രതിയായ സിപിഎം നേതാവിനെ അറസ്റ്റ് ചെയ്യണമെന്നാവശ്യപ്പെട്ട് ചാവക്കാട് പോലീസ് സ്റ്റേഷനിലേക്ക് യൂത്ത് കോൺഗ്രസ് നടത്തിയ മാർച്ചിനുനേരേ പോലീസിന്‍റെ ജലപീരങ്കി പ്രയോഗം. മാർച്ച് കഴിഞ്ഞശേഷം പിരിഞ്ഞു പോകാതിരുന്ന പ്രവർത്തകർ പോലീസ് സ്ഥാപിച്ചിരുന്ന ബാരിക്കേഡുകൾ മറിച്ചിടാൻ ശ്രമിച്ചതോടെയാണ് പോലീസും സമരക്കാരും തമ്മിൽ സംഘർഷമുണ്ടായത്. തുടർന്ന് ജലപീരങ്കി പ്രയോഗിക്കുകയായിരുന്നു. പ്രവർത്തകർ ചിതറിയോടി. ചാവക്കാട് കോടതി പരിസരത്തുനിന്ന് കാറും മൊബൈൽ ഫോണും പണവും കവർന്ന കേസിൽ തിരുവത്ര ലോക്കൽ സെക്രട്ടറി കെ.എച്ച്. സലാം പ്രതിയാണെന്നും, അറസ്റ്റ് ചെയ്യാതെ പ്രതിയെ രക്ഷപ്പെടുത്തുകയാണെന്നും ആരോപിച്ചായിരുന്നു മാർച്ച്. ബാരിക്കേഡുകൾവച്ച് താലൂക്ക് ഓഫീസ് പരിസരത്ത് പോലീസ് തടഞ്ഞു. തുടർന്നു നടന്ന പ്രതിഷേധ യോഗം കെപിസിസി മുൻ അംഗം സി.എ. ഗോപപ്രതാപൻ ഉദ്ഘടനംചെയ്തു. യൂത്ത് കോൺഗ്രസ് ജില്ലാ ജനറൽ സെക്രട്ടറി ഷർബനൂസ് പണിക്കവീട്ടിൽ അധ്യക്ഷനായിരുന്നു. സംസ്ഥാന സെക്രട്ടറി സി.എസ്. സൂരജ്, ജില്ലാ സെക്രട്ടറി റിഷിലാസർ, കെ.വി. സത്താർ, കെ.പി. ഉദയൻ , ബീന രവിശങ്കർ, എച്ച് എം. നൗഫൽ, എന്നിവർ പ്രസംഗിച്ചു. കോടതി പരിസരത്തെ കവർച്ച കേസിൽ തിരുവത്ര കോട്ടപ്പുറം തിരുവത്ത് റമളാൻ അനസിനെ (36) കഴിഞ്ഞദിവസം പോലീസ് അറസ്റ്റ് ചെയ്തിരുന്നു. സലാം ഉൾപ്പെടെ നാലുപേരാണ് കേസിൽ ഉൾപ്പെട്ടിട്ടുള്ളതെന്നാണ് പറയുന്നത്. കഴിഞ്ഞ ജനുവരി ആറിനാണ് സംഭവം. അന്നകര വടേരി രതീഷിനെയും ഭാര്യയേയും ബലംപ്രയോഗിച്ച് കാറിൽനിന്നിറക്കി കാറും 49,000 രൂപയും പരാതിക്കാരന്‍റെ കൈവശമുണ്ടായിരുന്ന മൊബൈൽ ഫോണുമായി സംഘം കടന്നുകളഞ്ഞെന്നായിരുന്നു പരാതി.

സെന്‍റ് ജോസഫ്സ് കോളജില്‍ "ഋതു' ലോഗോ പ്രകാശനം ചെയ്തു

ഇരിങ്ങാലക്കുട: സെന്‍റ് ജോസഫ്സ് കോളജ് സംഘടിപ്പിക്കുന്ന "ഋതു' അന്തര്‍ദേശീയ പരിസ്ഥിതി ചലച്ചിത്രമേളയുടെ രണ്ടാം പതിപ്പിന്‍റെ പുതുക്കിയ ലോഗോ പ്രകാശനം ഇന്നസെന്‍റ്് സോണറ്റ് നിര്‍വഹിച്ചു. കോളജ് പ്രിന്‍സിപ്പല്‍ സിസ്റ്റര്‍ ഡോ. ബ്ലെസി അധ്യ ക്ഷത വഹിച്ചു. ഇരിങ്ങാലക്കുട ഫിലിം സൊസൈറ്റി പ്രസിഡന്‍റ്് മനീഷ് അരിക്കാട്ട്, അധ്യാപകരായ ലിറ്റി ചാക്കോ, ഷിബിത ഇമ്മാനുവല്‍ എന്നിവര്‍ പ്രസംഗിച്ചു. ഫിലിം സൊസൈറ്റി സെക്രട്ടറി നവീന്‍ ഭഗീരഥന്‍, വൈസ് പ്രസിഡന്‍റ്് ടി.ജി. സിബിന്‍, എം.എസ്. ദാസന്‍ എന്നിവര്‍ പ്രസം ഗിച്ചു. തൃശൂര്‍ ചലച്ചിത്ര കേന്ദ്ര, ഇരിങ്ങാലക്കുട ഫിലിം സൊസൈറ്റി എന്നിവയുടെ സഹകരണത്തോടെ 18, 19 തീയതികളില്‍ നടക്കുന്ന ചലച്ചിത്ര മേളയില്‍ ഇരുപത്തഞ്ചിലധികം പരിസ്ഥിതി സൗഹാര്‍ദ സിനിമകളും ഡോക്യൂമെന്‍ററികളും പ്രദര്‍ശിപ്പിക്കും.

മൂക്ക് പൊത്തിക്കോ; വിസർജ്യംനിറഞ്ഞ് മാള കെഎസ്ആർടിസി ബസ് സ്റ്റാൻഡ്

മാള: മൂക്കുപൊത്തിയേ മാള കെ എസ്ആർടിസി ബസ് സ്റ്റാൻഡിൽനിന്നും ബസ് കയറാനാകൂ. സമീപ പ്രദേശത്തുള്ളവരുടെ അവസ്ഥയും ഭിന്നമല്ല. ഇവിടുത്തെ സെപ്റ്റിക് ടാങ്ക് നിറഞ്ഞു പരിസരത്തെ പറമ്പിലേക്ക് ഒഴുകുന്നതാണു കാരണം. സ്റ്റാൻഡിനു പരിസരത്ത് ഭക്ഷണശാലകൾ അടക്കം നിരവധി സ്ഥാപനങ്ങളും പ്രവർത്തി ക്കുന്നതാണ്. കൂടാതെ സ്റ്റാൻഡിൽ നിത്യംവരുന്ന യാത്രക്കാർ മൂക്കുപൊത്തി നിൽക്കേണ്ട സ്ഥിതിയിലാണ്. പരിസരവാസികൾ പലപ്രാവശ്യം കെഎസ്ആർടിസി ബസ് സ്റ്റാൻഡിലെ ഉദ്യോഗസ്ഥരോട് ഈ വിഷയം പറഞ്ഞിട്ട് പ്രയോജനമുണ്ടായില്ല. പൊയ്യ പഞ്ചായത്ത് ഹെൽത്ത് ഉദ്യോഗസ്ഥന്മാരെ വിവരം അറിയിക്കുകയും ഇവർ സ്റ്റാൻഡിൽ എത്തി പരിശോധന നടത്തുകയും ചെയ്തു. തുടർന്ന് അടിയന്തരമായി സെപ്റ്റിക് ടാങ്ക് ക്ലീൻ ആക്കി പരിസരത്ത് വൃത്തിയാക്കണമെന്നും ഉദ്യോഗസ്ഥരോട് ആവശ്യപ്പെട്ടു. എന്നാൽ പുല്ലുവില കൽപ്പിക്കാത്ത നിലപാടിലാണ് കെഎസ് ആർടിസി. ഈ നിലപാടിനെതിരെ നിയമ നടപടികൾ സ്വീകരിക്കണമെന്നും അടിയന്തരമായി സെപ്റ്റിക് ടാങ്കിലെ മാലിന്യം നീക്കം ചെയ്യണമെന്നും പരിസരങ്ങൾ വൃത്തിയാക്കണമെന്നും മാള പ്രതികരണവേദി പ്രസിഡന്‍റ്് സലാം ചൊവ്വര ആവശ്യപെട്ടു.

ഞാറ്റുവേല മഹോത്സവം: വനിതാസംഗമം

ഇരിങ്ങാലക്കുട: സ്‌നേഹവും കരുതലുമുള്ളവരാണു സ്ത്രീകളെന്ന് സിനിമാതാരം ജയരാജ് വാര്യര്‍ പറഞ്ഞു. മുനിസിപ്പല്‍ മൈതാനിയില്‍ നടക്കുന്ന ഞാറ്റുവേല മഹോത്സവത്തിലെ വനിതാ സംഗമം ഉദ്ഘാടനം ചെയ്തു സംസാരിക്കുകായിരുന്നു അദ്ദേഹം. മുനിസിപ്പല്‍ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു. എഴുത്തുകാരിയും അധ്യാപികയുമായ പ്രഫ. കുസുമം ജോസഫ് മുഖ്യാതിഥിയായിരുന്നു. മുനിസിപ്പല്‍ വൈസ് ചെയര്‍മാന്‍ ബൈജു കുറ്റിക്കാടന്‍, ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ സി.സി. ഷിബിന്‍, ആരോഗ്യകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ അംബിക പള്ളിപ്പുറത്ത്, വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ ഫെനി എബിന്‍ വെള്ളാനിക്കാരന്‍, വിദ്യാഭ്യാസകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ അഡ്വ. ജിഷ ജോബി, പാര്‍ലിമെന്‍ററി പാര്‍ട്ടി ലീഡര്‍ അഡ്വ. കെ.ആര്‍. വിജയ, കൗണ്‍സിലര്‍മാരായ നസീമ കുഞ്ഞു മോന്‍, മിനി സണ്ണി നെടുമ്പാക്കാരന്‍, സ്മിത കൃഷ്ണകുമാര്‍, സിഡിഎസ് ചെയര്‍പേഴ്‌സണ്‍മാരായ പി.കെ. പുഷ്പാവതി, ഷൈലജ ബാലന്‍, ഐസിഡിഎസ് സൂപ്പര്‍വൈസര്‍ ബീന, മുനിസിപ്പല്‍ സെക്രട്ടറി എം.എച്ച്. ഷാജിക്, കോ- ഓര്‍ഡിനേറ്റര്‍ പി.ആര്‍. സ്റ്റാന്‍ലി എന്നിവര്‍ പ്രസംഗിച്ചു.

മുരിയാട് നിയന്ത്രണംവിട്ട ക്രെയിന്‍ സ്‌കൂട്ടറില്‍ ഇടിച്ചുമറിഞ്ഞു

ഇരിങ്ങാലക്കുട: മുരിയാട് നിയന്ത്രണംവിട്ട ക്രെയിൻ സ്‌കൂട്ടറില്‍ ഇടിച്ചുമറിഞ്ഞു. സ്‌കൂട്ടര്‍ യാത്രക്കാരി രക്ഷപ്പെട്ടതു തലനാരിഴയ്ക്ക്. മുരിയാട് വല്ലക്കുന്ന് റോഡ് അണ്ടിക്കമ്പനിക്കു സമീപം ഇന്നലെ ഉച്ചയ്ക്ക് ഒന്നരയോടെയാണ് അപകടം നടന്നത്. അണ്ടിക്കമ്പനി ഭാഗത്തുനിന്നും ഇറക്കം ഇറങ്ങി വന്നിരുന്ന ക്രെയിന്‍ ബ്രേക്ക് നഷ്ടപ്പെട്ടു. എതിരെ വന്നിരുന്ന മുരിയാട് സ്വദേശി ഷാന്‍റി സഞ്ചരിച്ചിരുന്ന സ്‌കൂട്ടറില്‍ തട്ടാതിരിക്കാന്‍ ക്രെയിന്‍ വെട്ടിച്ചതിനെ തുടര്‍ന്ന് മറിയുകയായിരുന്നു. സ്‌കൂട്ടറില്‍ നിന്ന് ഷാന്‍റി കാനയിലേക്കു തെറിച്ചുവീണതിനാൽ ഗുരുതര പരിക്കേല്‍ക്കാതെ രക്ഷപ്പെടുകയായിരുന്നു. ഇവരെ തൃശൂര്‍ മെഡിക്കല്‍ കോളജ് ആശു പത്രിയിൽ പ്രവേശിപ്പിച്ചു. വല്ലക്കുന്ന് നെല്ലായി റോഡില്‍ രണ്ടു മണിക്കൂറോളം ഗതാഗതം തടസപ്പെട്ടു. പിന്നീട് ഇരിങ്ങാലക്കുടയില്‍നിന്നും മറ്റൊരു ക്രെയിന്‍ എത്തിച്ചാണ് ക്രെയിന്‍ ഉയര്‍ത്തി ഗതാഗതം പുനസ്ഥാപിച്ചത്. അപകടത്തെത്തുടര്‍ന്ന് റോഡില്‍ ഒലിച്ചിറങ്ങിയ ഓയിലും ഡീസലും ഇരിങ്ങാലക്കുട ഫയര്‍‌ഫോഴ്‌സ് കഴുകി വൃത്തിയാക്കി. ആളൂര്‍ പോലീസ് സ്ഥലത്തെത്തി ഗതാഗതം നിയന്ത്രിച്ചു.

തിരുമുടിക്കുന്ന് ത്വക് രോഗാശുപത്രി: അന്തേവാസികളെ മാറ്റിപ്പാർപ്പിച്ചു

കൊരട്ടി: തിരുമുടിക്കുന്ന് ഗാന്ധിഗ്രാം ത്വക് രോഗാശുപത്രിയിലെ 65 അന്തേവാസികളെ പുതുതായി നിർമിച്ച ഐപി ബ്ലോക്കിലേക്ക് മാറ്റിപ്പാർപ്പിച്ചു. ആകെയുള്ള 88 അന്തേവാസികളിൽ പുരുഷന്മാരായ 65 പേരെയാണ് ഇന്നലെ മാറ്റി പാർപ്പിച്ചത്. കാലപ്പഴക്കംകൊണ്ട് ജീർണാവസ്ഥയിലായ കെട്ടിടത്തിൽനിന്നും ആധുനിക രീതിയിൽ സജ്ജമാക്കിയ സൗകര്യങ്ങളേറെയുള്ള ആശുപത്രി വാർഡിൽ ഇനി അവർക്ക് സ്വൈര്യമായുറങ്ങാം. കാലവർഷം കടുത്തതോടെ ചോർന്നൊലിക്കുന്ന കെട്ടിടത്തിൽ ദുരിതം പേറിയാണ് അന്തേവാസികൾ കഴിയുന്നതെന്നുകാണിച്ച് ഗ്രാമപഞ്ചായത്തും ആശുപത്രി അധികൃതരും കളക്ടർക്കു കത്തുനൽകിയതിന്‍റെ അടിസ്ഥാനത്തിലാണ് പുതുതായി നിർമിച്ച ഐപി ബ്ലോക്കിന്‍റെ ഉദ്ഘാടനത്തിനുപോലും കാത്തുനിൽക്കാതെ മാറ്റിപ്പാർപ്പിക്കാൻ ജില്ലാ കളക്ടർ അനുമതി നൽകിയത്. അന്തേവാസികളുടെ സുരക്ഷയാണു മുഖ്യമെന്നും പുതിയ ബ്ലോക്കിലേക്ക് മാറ്റുന്നതിനാവശ്യമായ നടപടികൾ സ്വീകരിക്കണമെന്നും ആവശ്യപ്പെട്ട് ആശുപത്രി സൂപ്രണ്ടിന് കളക്ടർ കത്ത് നൽകിയിരുന്നു. 17 കോടി രൂപ വിനിയോഗിച്ച് സ്ത്രീകൾക്കും പുരുഷന്മാർക്കും പ്രത്യേകം താമസിക്കാൻ രണ്ടു ബ്ലോക്കുകളായാണ് പുതിയ ഐപി വിഭാഗം നിർമിച്ചിരിക്കുന്നത്. പുരുഷന്മാർക്കായി നിർമിച്ച ബ്ലോക്കിന്‍റെ ഇലക്ട്രിക്കൽ പ്രവർത്തികൾ അട ക്കം പൂർത്തീകരിച്ചിരുന്നു. ഇതിലേക്കാണ് ഇവർ താമസം മാറ്റിയത്. അവശേഷിക്കുന്ന പ്രവർത്തികൾ പൂർത്തിയാകുന്നതോടെ സ്ത്രീകളെയും പുതിയ കെട്ടിടത്തിലേക്ക് മാറ്റും. പുരുഷ വാർഡുകളിലേക്ക് അന്തേവാസികളെ മാറ്റുന്നതിനുമുമ്പ് ആവശ്യമായ ക്രമീകരണങ്ങൾ ഒരുക്കിയിരുന്നു. കിടക്കകൾ, തലയിണകൾ, വാഷിംഗ് മെഷീൻ, വാട്ടർ പ്യൂരിഫയർ തുടങ്ങിയ ഒട്ടേറെ സാമഗ്രികൾ സുമനസുകളുടെയും വിവിധ സ്ഥാപനങ്ങളുടെയും സഹകരണത്തോടെ പഞ്ചായത്തിന്‍റെ നേതൃത്വത്തിൽ സജ്ജമാക്കിയിരുന്നു. പുതിയ കെട്ടിടത്തിലേക്ക് മാറ്റിപ്പാർപ്പിക്കുന്നത് ഔദ്യോഗിക ചടങ്ങാക്കി മാറ്റിയിരുന്നില്ല. എങ്കിലും സനീഷ്‌കുമാർ ജോസഫ് എംഎൽഎ, ഗ്രാമ‌പഞ്ചായത്ത് പ്രസിഡന്‍റ്് പി.സി. ബിജു, വൈസ് പ്രസിഡന്‍റ്് ഷൈനി ഷാജി, പഞ്ചായത്ത് സ്ഥിരംസമിതി അധ്യക്ഷന്മാരായ കെ.ആർ. സുരേഷ്, നൈനു റിച്ചു, വാർഡ് മെമ്പർമാരായ ലിജോ ജോസ്, വർഗീസ് പയ്യപ്പിള്ളി, ബിജോയ് പെരേപ്പാടൻ, ഷിമ സുധീൻ, പി.എസ്. സുമേഷ്, റെയ്മോൾ ജോസ്, പോൾ ജിയോ, ആശുപത്രി സൂപ്രണ്ട് ഡോ. കെ. സ്നേഹജ, ലേ സെക്രട്ടറി രാജേന്ദ്രൻ തുടങ്ങിയവരുടെ സാന്നിധ്യത്തിലായിരുന്നു മാറ്റിപ്പാർപ്പിക്കൽ നടന്നത്. ഗാനമേളയും ഒരുക്കിയിരുന്നു. തിരുമുടിക്കുന്ന് ഗാന്ധിഗ്രാം ത്വക് രോഗാശുപത്രിയെയും അന്തേവാസികളെയും സനീഷ്കുമാർ ജോസഫ് എംഎൽഎ അവഗണിക്കുന്നുവെന്നാരോപിച്ച് ഇക്കഴിഞ്ഞ 20ന് എൽഡിഎഫ് പ്രതിഷേധ കൂട്ടായ്മ നടത്തിയിരു ന്നു.

സെന്‍റ് ജോസഫ്‌സ് കോളജില്‍ ബിരുദ, ബിരുദാനന്തരപഠനത്തിന്‍റെ ഉദ്ഘാടനം

ഇരിങ്ങാലക്കുട: സെന്‍റ്് ജോസഫ്‌സ് കോളജില്‍ നാലുവര്‍ഷ ബിരുദ പഠനത്തിന്‍റെയും ബിരുദാനന്തര പഠനത്തിന്‍റെയും ഉദ്ഘാടനം "നോവ ഇനിഷ്യോ' കാലടി ശ്രീശങ്കരാചാര്യ യൂണിവേഴ്‌സിറ്റി മുന്‍ വൈസ് ചാന്‍സലര്‍ ഡോ. ധര്‍മരാജ് അടാട്ട് ഉദ്ഘാടനം ചെയ്തു. പ്രിന്‍സിപ്പല്‍ സിസ്റ്റര്‍ ഡോ. ബ്ലെസി, റൂസ കോ-ഓര്‍ഡിനേറ്റര്‍ ഡോ. എ.എല്‍. മനോജ്, ഐക്യുഎസി കോ-ഓര്‍ഡിനേറ്റര്‍ ഡോ. ടി.വി. ബിനു, റെയ്ച്ചല്‍ റോസ് തുടങ്ങിയവര്‍ പ്രസംഗിച്ചു.

കാടുകുറ്റിയിൽ കുടുംബശ്രീ സിഡിഎസ് വാർഷികം

കാടുകുറ്റി: ഗ്രാമപഞ്ചായത്തിലെ കുടുംബശ്രീ സിഡിഎസിന്‍റെ വാർഷികാഘോഷം ഗ്രാമപഞ്ചായത്ത് പ്രസിഡന്‍റ് പ്രിൻസി ഫ്രാൻസിസ് ഉദ്ഘാടനം ചെയ്തു. സി ഡിഎസ് ചെയർപേഴ്സൺ അശ്വതി മഹേഷ് അധ്യക്ഷത വഹിച്ചു. സിനി ആർട്ടിസ്റ്റ് അഞ്ജലി സത്യനാഥ്‌ മുഖ്യാതിഥിയായി. വിവിധ മേഖലകളിൽ മികവുപുലർത്തിയവരെയും സിഡിഎസിലെ മുതിർന്ന അംഗത്തെയും 100 തൊഴിൽ ദിനം പൂർത്തീകരിച്ച മുതിർന്ന അംഗങ്ങളെയും ഹരിതകർമസേനാംഗങ്ങളെയും ആദരിച്ചു. മികച്ച അയൽക്കൂട്ടം, മികച്ച എഡിഎസ്, മികച്ച സംരംഭങ്ങൾ എന്നിവയ് ക്കും ആദരവ് നൽകി. ജില്ലാ മിഷൻ പ്രോഗ്രാം മാനേജർ ആദർശ്, ത്രിതലപഞ്ചായത്ത് ജനപ്രതിനിധികളായ പി.സി. അയ്യപ്പൻ, ബീന രവീന്ദ്രൻ, രാഖി സുരേഷ്, പി. വിമൽകുമാർ, മോഹിനി കുട്ടൻ, ലീന ഡേവിസ്, സഹകരണ ബാങ്ക് പ്രസിഡന്‍റ്്‌ ഹാഷിം സാബു, പഞ്ചായത്ത്‌ സെക്രട്ടറി അനുപമ എന്നിവർ പ്രസംഗിച്ചു.

പാടത്തിറങ്ങി ഞാറുനട്ട് വിദ്യാർഥികൾ

ചാലക്കുടി: പാടത്തിറങ്ങി ഞാറുനട്ട് കാര്‍മല്‍ ഹയര്‍ സെക്കൻഡറി വിദ്യാലയത്തിലെ ഏഴാം ക്ലാസ്് വിദ്യാര്‍ഥികള്‍. കൂടപ്പുഴ അഗ്രോ റിസര്‍ച്ച് സെന്‍ററിലാണു വിദ്യാര്‍ഥികള്‍ കൃഷി ഇടത്തിലേക്ക് ഇറങ്ങി ഞാറുനട്ടത്. ഞാറ് മുളപ്പിച്ചതും അതു വിഭാഗീകരിക്കുന്നതും നേരിട്ടുകാണാനുള്ള അവസരം വിദ്യാര്‍ഥി കള്‍ക്ക് ലഭിച്ചു. തുടര്‍ന്ന്, മെഷീനുപയോഗിച്ചുള്ള ഞാറുനടീല്‍ കണ്ടു. പിന്നീട് പാടത്തിറങ്ങി ഞാറ് നടാനുള്ള അവസരം വിദ്യാര്‍ഥികള്‍ക്ക് അവിടെ ഒരുക്കിയിരുന്നു. കര്‍ഷക വേഷത്തില്‍ പാടത്ത് എത്തിയ വിദ്യാര്‍ഥികള്‍ ആണ്‍, പെണ്‍ വ്യത്യാസമില്ലാതെ ഞാറുനടീൽ നടത്തിയത് പുതിയ അനുഭവമായി. മഴമാപിനി നേരിട്ടുകാണുകയും മഴയുടെ അളവ് രേഖപ്പെടുത്തിയത് മനസിലാക്കുകയും ചെയ്തു. ബഡിംഗ് - ഗ്രാഫ്റ്റിംഗ് എന്താണെന്നും മേധാവികള്‍ വിശദീകരിച്ചുനല്‍കി. കാറ്റിന്‍റെ ദിശയും വേഗതയും അളക്കുന്ന ഉപകരണങ്ങളും അന്തരീക്ഷോഷ്മാവ് അളക്കുന്നതും ബാഷ്പീകരണതോതും കു ട്ടികൾ മനസിലാക്കി. ഇതി ലൂടെ പഠനമുറിയില്‍ നിന്ന് പ്രകൃതിയിലേയ്ക്ക് ഇറങ്ങിയുള്ള പഠനരീതി വിദ്യാര്‍ഥികള്‍ക്കു സാധ്യമാക്കുകയായിരുന്നു.

ഗുരുവായൂരപ്പന് വഴിപാടായി ടാങ്കർ ലോറി

ഗുരുവായൂർ: ക്ഷേത്രത്തിൽ വഴിപാടായി പുതിയ ടാങ്കർ ലോറി സമർപ്പിച്ചു. കുടിവെള്ള വിതരണത്തിനായി 12,000 ലിറ്റർ ശേഷിയുള്ള ടാങ്കർ ലോറിയാണു സമർപ്പിച്ചത്. അങ്കമാലി കറുകുറ്റി ആഡ്ലക്സ് മെഡിസിറ്റി ആൻഡ് കണ്‍വൻഷൻ സെന്‍റർ ഗ്രൂപ്പാണ് ലോറി സമർപ്പണം നടത്തിയത്. ദേവസ്വം ചെയർമാൻ ഡോ. വി.കെ. വിജയൻ ആഡ്ലക്സ് മെഡിസിറ്റി ആൻഡ് കണ്‍വൻഷൻ സെന്‍റർ എംഡി പി.ഡി. സുധീശനിൽനിന്ന് വാഹനത്തിന്‍റെ താക്കോലും രേഖകളും ഏറ്റുവാങ്ങി. പി.ഡി. സുധീശനെ ദേവസ്വം ചെയർമാൻ ഡോ. വി.കെ. വിജയൻ പൊന്നാടയണിയിച്ചു. ദേവസ്വം ഭരണസമിതി അംഗങ്ങളായ മല്ലിശേരി പരമേശ്വരൻ നന്പൂതിരിപ്പാട്, തന്ത്രി ചേന്നാസ് ദിനേശൻ നന്പൂതിരിപ്പാട്, സി. മനോജ്, കെ.പി. വിശ്വനാഥൻ, മനോജ് ബി. നായർ, ദേവസ്വം അഡ്മിനിസ്ട്രേറ്റർ ഒ.ബി. അരുണ്‍കുമാർ, ഡിഎ കെ.എസ്. മായാദേവി, ദേവസ്വം മരാമത്ത് എക്സി. എൻജിനീയർ എം.കെ. അശോക് കുമാർ, പിആർഒ വിമൽ ജി. നാഥ് എന്നിവർ പങ്കെടുത്തു.

ചേലക്കര ഗവ. ഹയർ സെക്കൻഡറി സ്കൂളിൽ പുതിയ കെട്ടിടവും കമ്പ്യൂട്ടർ ലാബും തുറന്നു

ചേലക്കര: ശ്രീമൂലം തിരുനാൾ ഗവ. ഹയർ സെക്കൻഡറി സ്കൂളിൽ പുതുതായി നിർമിച്ച കെട്ടിട സമുച്ചയത്തിന്‍റെയും, കമ്പ്യൂട്ടർ ലാബിന്‍റെയും സ്റ്റേജിന്‍റെയും ഉദ്ഘാടനം കെ. രാധാകൃഷ്ണൻ എംപി നിർവഹിച്ചു. പൊതുവിദ്യാഭ്യാസ വകുപ്പ് 2023-24 വാർഷിക പദ്ധതിയിൽ ഉൾപ്പെടുത്തി രണ്ടു കോടി രൂപയ്ക്കാണ് പുതിയ കെട്ടിടം നിർമിച്ചത്. കെഎസ്എഫ്ഇയുടെ സാമൂഹിക ഉത്തരവാദിത്വ ഫണ്ട് വഴി 12.5 ലക്ഷം രൂപ ചെലവിലാണ് കമ്പ്യൂട്ടർ ലാബ് നവീകരണം പൂർത്തിയാക്കിയത്. എസ്എസ്എൽസി, പ്ലസ്ടു പരീക്ഷകളിൽ ഉന്നതവിജയം നേടിയ വിദ്യാർഥികളെയും, എൽഎസ്എസ് - യുഎസ്എസ് സ്കോളർഷിപ് നേടിയ വിദ്യാർഥികളെയും ചടങ്ങിൽ അനുമോദിച്ചു. ബ്ലോക്ക് പഞ്ചായത്ത് പ്രസിഡന്‍റ്് കെ.എം. അഷറഫ് അധ്യക്ഷനായി. അസിസ്റ്റന്‍റ്് എക്സിക്യൂട്ടീവ് എൻജിനീയർ സാന്‍റോ സെബാസ്റ്റ്യൻ റിപ്പോർട്ട് അവതരണം നടത്തി. ചേലക്കര ഗ്രാമ പഞ്ചായത്ത് പ്രസിഡന്‍റ്് എം.കെ. പത്മജ, ജില്ലാ പഞ്ചായത്ത് മെമ്പർ കെ.ആർ. മായ, കെഎസ്എഫ്ഇ ഫിനാൻസ് ജനറൽ മാനേജർ ശരത് ചന്ദ്രൻ എന്നിവർ വിശിഷ്ടാതിഥികളായ ചടങ്ങിൽ ബ്ലോക്ക് പഞ്ചായത്ത് ആരോഗ്യ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ അരുൺ കാളിയത്ത്, ഗ്രാമപഞ്ചായത്ത് വൈസ് പ്രസിഡന്‍റ്് എച്ച്. ഷെലീൽ, ബ്ലോക്ക് പഞ്ചായത്ത് അംഗം ഷിജിത ബിനീഷ്, ചേലക്കര ഗ്രാമപഞ്ചായത്ത് സ്ഥിരം സമിതി അംഗങ്ങളായ ജാനകി, എല്ലിശേരി വിശ്വനാഥൻ, കെ.കെ. ശ്രീവിദ്യ, ഗ്രാമപഞ്ചായത്ത് അംഗങ്ങളായ ടി. ഗോപാലകൃഷ്ണൻ, പി.എം. ജാഫർമോൻ, ഉപജില്ലാ വിദ്യാഭ്യാസ ഓഫീസർ ഷീജ കുനിയിൽ, ഹെഡ്മിസ്ട്രസ് ടി. ഫാത്തിമ സുഹറ, എസ്എംസി ചെയർമാൻ എ.ജി. രാജൻ, എംപിടിഎ പ്രസിഡന്‍റ് സുമ അയ്യപ്പൻ, ഹയർ സെക്കൻഡറി സ്കൂൾ സ്റ്റാഫ് സെക്രട്ടറി ബിജി, വിദ്യാർഥി പ്രതിനിധി എം.കെ. അനാമിക, ഹയർ സെക്കൻഡറി സ്കൂൾ പ്രിൻസിപ്പൽ എൻ. സുനിത, പി ടിഎ പ്രസിഡന്‍റ് എ.വി. മനോജ്കുമാർ എന്നിവർ പങ്കെടുത്തു.

വാടാനപ്പിള്ളിയിൽ സൂപ്പർമാർക്കറ്റിൽ മോഷണം

വാടാനപ്പള്ളി: വാടാനപ്പിള്ളി പോലീസ് സ്റ്റേഷനടുത്ത് വീണ്ടും മോഷണം. സ്റ്റേഷന് 200 മീറ്ററോളം തെക്ക് തങ്ങൾപ്പള്ളിക്കുസമീപം എം.എ. സൂപ്പർ മാർക്കറ്റിലാണ് മോഷണം നടന്നത്. കഴിഞ്ഞ ദിവസം രാത്രി കടയുടെ പിൻവശത്തെ ഷട്ടറിന്‍റെ പൂട്ടുതകർത്ത് അകത്തുകയറിയ മോഷ്ടാവ് വെളിച്ചെണ്ണ അടക്കമുള്ള 15,000 രൂപയോളം വരുന്ന വില പിടിപ്പുള്ള സാധനങ്ങളും മേശയിൽ ഉണ്ടായിരുന്ന 1500 ഓളം രൂപയുമാണ് കവർന്നത്. കടയ്ക്കു പിൻവശത്താണ് കടയുടമ മതിലകത്ത് വീട്ടിൽ റഹ്മത്തലിയുടെ വീട്. രാവിലെ കട തുറക്കാൻ റഹ്മത്തലിയും ഭാര്യയും വന്നപ്പോഴാണ് ഷട്ടർ തുറന്നു കിടക്കുന്നതുകണ്ടത്. നോക്കിയപ്പോഴാണ് ഷട്ടറിന്‍റെ പൂട്ട് തകർന്ന നിലയിൽ കാണപ്പെട്ടത്. തുടർന്ന് അകത്ത് കയറി നോക്കിയപ്പോഴാണ് സാധനങ്ങൾ നഷ്ടപ്പെട്ടതായി മനസിലായത്. പരാതിപ്രകാരം വാടാനപ്പിള്ളി പോലീസെത്തി പരിശോധന നടത്തി. കടക്കുള്ളിൽ സ്ഥാപിച്ചിട്ടുള്ള സിസിടിവി കാമറയിൽ മോഷ്ണ ദൃശ്യം പതിഞ്ഞിട്ടുണ്ട്. 2.15 ഓടെയാണ് മോഷണം നടന്നത്. മഴക്കോട്ടും മാസ്ക്കും ധരിച്ചാണ് മോഷ്ടാവ് എത്തിയത്. നടുവിൽക്കര വന്നേരി ക്ഷേത്രത്തിലടക്കം ആറോളം ക്ഷേത്രങ്ങളിലും ഭണ്ഡാരം തകർത്ത് മോഷണം നടന്നിട്ടും ദൃശ്യം സിസിടിവി കാമറയിൽ പതിഞ്ഞിട്ടും ഒരാളെപ്പോലും പിടികൂടാൻ പോലിസിനു കഴിഞ്ഞിട്ടില്ല. മോഷണം വർധിച്ചതോടെ കച്ചവടക്കാരും ക്ഷേത്രക്കമ്മിറ്റിക്കാരും പ്രദേശവാസികളും ഭീതിയിലാണ്.

ലേബർക്യാമ്പിൽ യുവാക്കളും ഇതര സംസ്ഥാന തൊഴിലാളികളും തമ്മിൽ ആളുമാറി ആക്രമണം

എരുമപ്പെട്ടി: അക്കിക്കാവ്- കേച്ചേരി ബൈപ്പാസ് റോഡ് നിർമാണത്തിനെത്തിയ ഇതര സംസ്ഥാന തൊഴിലാളികൾ താമസിക്കുന്ന എയ്യാലിലെ ലേബർ ക്യാമ്പിൽ കയറി ഒരു കൂട്ടം യുവാക്കൾ ആക്രമണം നടത്തി. കഴിഞ്ഞദിവസം രാത്രി 10.30നാണ് സംഭവമുണ്ടായത്. കാറിലെത്തിയ യുവാക്കളുടെ ആക്രമണത്തിൽ ലേബർ ക്യാമ്പിലെ മലയാളി തൊഴിലാളി സുരേഷിന് തലയ്ക്ക് ഗുരുതരമായി പരിക്ക് പറ്റി. ആളുമാറി ആക്രമണം നടത്തിയതാണെന്ന് യുവാക്കൾ പിന്നീട് പറഞ്ഞു. ആക്രമണത്തിനു മണിക്കൂറുകൾക്ക് മുമ്പ് പട്ടിക്കരയിൽ ഒരു പിക്കപ്പ് വാഹനം ബൈക്കുകാരനെ ഇടിച്ചു തെറിപ്പിക്കുകയും നിർത്താതെ പോകുകയും ചെയ്തിരുന്നു. ഈ പിക്കപ്പ് വാഹനം പിന്തുടർന്ന് കാറിലെത്തിയ യുവാക്കളാണ് ആക്രമണം നടത്തിയത്. എയ്യാലിലെ റോഡ് നിർമാണ തൊഴിലാളികളുടെ ലേബർ ക്യാമ്പിൽ ഒരു പിക്കപ്പ് വാഹനം കിടക്കുന്നത് കണ്ട യുവാക്കൾ ഈ വാഹനമാണ് ഇടിച്ചിട്ട് നിർത്താതെ പോയതെന്ന് തെറ്റിദ്ധരിക്കുകയും ക്യാമ്പിൽ കയറി വാഹനത്തിന്‍റെ ഡ്രൈവർ സുരേഷിനെ ഇരുമ്പ് ദണ്ഡ് ഉപയോഗിച്ച് ആക്രമിക്കുകയുമായിരുന്നെന്ന് നിർമാണ കമ്പനിയിലെ ഉദ്യോഗസ്ഥർ പറഞ്ഞു. തലയ്ക്ക് സാരമായി പരുക്കേറ്റ സുരേഷിനെ കുന്നംകുളം സ്വകാര്യ ആശുപത്രിയിൽ പ്രവേശിപ്പിച്ചു. അതേസമയം ഇവർ പിന്തുടർന്നെത്തിയ അപകടമുണ്ടാക്കിയ പിക്കപ്പ് വാഹനം ബൈപ്പാസ് റോഡിലെ എയ്യാൽ മന്ത്രവാദി റോഡിന് സമീപം ഇലക്ട്രിക്ക് പോസ്റ്റിൽ ഇടിച്ച് കിടക്കുന്ന നിലയിൽ കണ്ടെത്തിയിട്ടുണ്ട്. പ്രതിരോധത്തിന്‍റെ ഭാഗമായി യുവാക്കളെ ക്യാമ്പിലുള്ള തൊഴിലാളികളും തിരിച്ച് ആക്രമിച്ചു. പോലീസ് സ്ഥലത്തെത്തിയാണ് സംഘർഷം നിയന്ത്രിച്ചത്.

പരാതി നൽകാനെത്തിയയാളെ ചേർപ്പ് പോലീസ് ഇൻസ്പെക്ടർ മർദിച്ചതായി പരാതി

ചേർപ്പ്: പോലീസ് സ്റ്റേഷനിൽ പരാതി നൽകാനെത്തിയ പട്ടികജാതിക്കാരനായ ചുമട്ടുതൊഴിലാളിയെ ഇൻസ്പെക്ടർ മർദിച്ചതായി മുഖ്യമന്ത്രിക്ക് പരാതി. ചേർപ്പ് പടിഞ്ഞാട്ടുമുറി തെക്കെമഠത്തിൽ സുരേഷ് ആണ് പരാതി നൽകിയത്. പരാതിയിൽ പറയുന്നത് ഇങ്ങനെ: വീട്ടിൽ വെള്ളം കയറിയതിനെ തുടർന്ന് ചേർപ്പ് പടിഞ്ഞാട്ടുമുറിയിലെ ജിജെബി സ്കൂളിലെ ദുരിതാശ്വാസ ക്യാമ്പിലാണ് സുരേഷും കുടുംബവും താമസിക്കുന്നത്. ക്യാമ്പിന് പുറത്തു വച്ചിരുന്ന ഫ്ലക്സ് ബോർഡ് കീറിയ സംഭവത്തിൽ മകനെ ശാസിച്ചു കൊണ്ടിരുന്ന സുരേഷിനെ സമീപത്തെ ആളൊഴിഞ്ഞ വീട്ടിൽ മദ്യപിച്ചുകൊണ്ടിരുന്ന ഒരു കൂട്ടം ആളുകൾവന്ന് ചോദ്യം ചെയ്തു. അക്കൂട്ടത്തിലുണ്ടായിരുന്ന അനീഷ് എന്നയാൾ സുരേഷിനെ ചവിട്ടുകയും കഴുത്ത് ഞെരിക്കുകയും ചെയ്തു. പരിക്കേറ്റ സുരേഷിനെ സ്ഥലത്തുണ്ടായിരുന്ന വാർഡ് മെമ്പർ ചേർപ്പ് ഗവ. ആശുപത്രിയിൽ പ്രവേശിപ്പിച്ചു. തുടർന്ന് സുരേഷ് ചേർപ്പ് പോലീസിൽ പരാതി നൽകി. ഇന്നലെ രാവിലെ സുരേഷിനെയും അനീഷിനെയും സ്റ്റേഷനിലേക്ക് വിളിപ്പിപ്പിച്ചു. തുടർന്ന് ഇൻസ്പെക്ടർ സി. രമേശ് അദ്ദേഹത്തിന്‍റെ ഓഫീസിനുള്ളിൽ വച്ച് അകാരണമായി സുരേഷിന്‍റെ തലയിലും മുഖത്തും അടിച്ചുവെന്നും തലചുറ്റൽ അനുഭവപ്പെട്ടതിനെ തുടർന്ന് കുറെ നേരം സ്റ്റേഷനിനകത്തെ ബെഞ്ചിൽ ഇരുത്തി എന്നുമാണ് പരാതി. സുരേഷ് ചേർപ്പ് ഗവ. ആശുപത്രിയിൽ ചികിത്സയിലാണ്.

കെഎസ്ആർടിസി ബസിടിച്ച് വയോധിക മരിച്ചു

ചാലക്കുടി: സൗത്ത് ജംഗ്ഷനിൽ കെഎസ്ആർടിസി ബസിടിച്ച് വയോധിക മരിച്ചു. പോട്ട മഠത്തിൽ പരേതനായ വേണു ഭാര്യ ഇന്ദിര(75)യാണ് മരിച്ചത്. ലോട്ടറി തൊഴിലാളിയാണ്. ഇന്നലെ രാവിലെയാണ് സംഭവം. ഉടൻ തന്നെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. സംസ്കാരം ഇന്ന് രണ്ടിന് നഗരസഭ ക്രിമറ്റോറിയത്തിൽ. മക്കൾ: ശ്രീദേവി, ശ്രീലത. മരുമക്കൾ: ജയൻ കണക്കശേരി, ഷിബു കുന്നുമ്മേൽ (സിപിഐ പോട്ട ബ്രാഞ്ച് സെക്രട്ടറി).

ടിപ്പർ ലോറിക്ക് പിറകിൽ ബൈക്ക് ഇടിച്ച് യുവാവ് മരിച്ചു

മണ്ണുത്തി: ദേശീയപാത വെട്ടിക്കലിൽ ടയർ മാറ്റുന്നതിനായി നിർത്തിയിട്ടിരുന്ന ടിപ്പർ ലോറിക്കു പിറകിൽ ബൈക്കിടിച്ച് ബൈക്ക് യാത്രികനായ യുവാവ് മരിച്ചു. രാമവർമപുരം സ്വദേശി പണിക്കവീട്ടിൽ ഉണ്ണികൃഷ്ണൻ മകൻ അർജുൻ കൃഷ്ണൻ(22) ആണ് മരിച്ചത്. പീച്ചി ഡാമിലെ കെഎസ്ഇബി ജീവനക്കാരനാണ്. ജോലി കഴിഞ്ഞ് ബൈക്കിൽ വീട്ടിലേക്ക് വരുന്നതിനിടെയാണ് അപകടം. ഗുരുതര പരിക്കേറ്റ അർജുനെ സ്വകാര്യആശുപത്രിയിൽ എത്തിച്ചുവെങ്കിലും രക്ഷിക്കാനായില്ല. അമ്മ: ജിഷ. സഹോദരി: അമൃത കൃഷ്ണൻ.

ദേവാലയങ്ങളില്‌ തിരുനാള്‌

കനകമല തീര്‍ഥാടകേന്ദ്രം ദുക്‌റാന തിരുനാളിന് കൊടിയേറി. കൊടകര ഫൊറോന വികാരി ഫാ. ജെയ്‌സണ്‍ കരിപ്പായി കെടിയേറ്റം നിര്‍വഹിച്ചു. തുടര്‍ന്ന് കുര്‍ബാന, ലദീഞ്ഞ്, പള്ളിചുറ്റി പ്രദക്ഷിണം എന്നിയുണ്ടായി. സഹവികാരി ഫാ. ആശീഷ് കീരഞ്ചിറ, ജനറല്‍ കണ്‍വീനര്‍ ഷോജന്‍ ഡി.വിതയത്തില്‍, കൈക്കാരന്‍മാരായ ജോസ് വെട്ടുമണിക്കല്‍, ജോസ് കറുകുറ്റിക്കാരന്‍, ജോയ് കളത്തിങ്കല്‍, ജോജു ചുള്ളി, ജോയ് കുയിലാടന്‍, ജോ. കണ്‍വീനര്‍ വര്‍ഗീസ് കളത്തിങ്കല്‍, ഷാജു വെളിയന്‍ എന്നിവര്‍ നേതൃത്വം നല്‍കി. തിരുനാള്‍ദിനമായ നാളെ രാവിലെ ഏഴിന് ആഘോഷമായ തിരുനാള്‍ പാട്ടുകുര്‍ബാന, ഊട്ടു വെഞ്ചരിപ്പ്, എട്ടിന് കുരിശുമുടിയില്‍ കുര്‍ബാന, 10ന് ആഘോഷമായ റാസകുര്‍ബാന. തുടര്‍ന്ന് പ്രദക്ഷിണം, തിരുശേഷിപ്പ് വണക്കം എന്നിവയുണ്ടാകും. ചെട്ടിക്കാട് ദേവാലയം ദുക്റാന തിരുനാൾ നാളെ. വൈകിട്ട് അഞ്ചിന് ജപമാല. 5.30ന് നടക്കുന്ന തിരുനാൾ ദിവ്യബലിക്ക് ഫാ. എബ്നേസർ ആന്‍റണി കാട്ടിപ്പറമ്പിൽ മുഖ്യകാർമികനാകും. തുടർന്ന് നേർച്ച ആശിർവാദം. തിരുനാളിനോടനുബന്ധിച്ച് മാർത്തോമാ ചർച്ച് ചരിത്രമ്യൂസിയവും വിശുദ്ധന്‍റെ കാൽപാദംപതിഞ്ഞ സ്ഥലവും 1953ൽ സ്ഥാപിച്ച സ്മാരകസ്തൂപവും സന്ദർശിക്കുന്നതിനുള്ള സൗകര്യം ഒരുക്കിയിട്ടുണ്ട്. കൂടാതെ തിരുനാൾദിനത്തിൽ മത്സ്യബന്ധന ബോട്ടുകളും വള്ളങ്ങളും വെഞ്ചരിക്കുന്നതിനുള്ള സൗകര്യവുമുണ്ട്. കോട്ടപ്പുറം മാർക്കറ്റ് കപ്പേള വിശുദ്ധ തോമസിന്‍റെ തിരുനാളിനും കോട്ടപ്പുറം രൂപതാദിനാഘോഷത്തിനും കൊടിയേറി. കോട്ടപ്പുറം രൂപത വികാരി ജനറാള്‌‌ മോൺ. റോക്കി റോബി കളത്തിൽ കൊടിയേറ്റി. തുടർന്നുനടന്ന ദിവ്യബലിക്ക് രൂപത എപ്പിസ്കോപ്പൽ വികാരി റവ.ഡോ. ഫ്രാൻസിസ്കോ പടമാടൻ മുഖ്യകാർമികനായി. തിരുനാൾ സപ്ലിമെന്‍റിന്‍റെ പ്രകാശനം ഫാ. ആൽഫിൻ ജൂഡ്സനുനല്കി റവ.ഡോ. ഫ്രാൻസിസ്കോ പടമാടൻ നിർവഹിച്ചു. ഇന്ന് വൈകീട്ട് 5.30ന് ദിവ്യബലിക്ക് ഗോതുരുത്ത് ഫൊറോന വികാരി ഫാ. ജാക്സൻ വലിയപറമ്പിൽ മുഖ്യകാർമികത്വംവഹിക്കും. ഫാ. ജോബി കാട്ടാശേരി പ്രസംഗിക്കും. നാളെ വൈകീട്ട് 4.30ന് കോട്ടപ്പുറം സെന്‍റ് മൈക്കിൾസ് എൽപി സ്കൂളിൽനിന്ന് കപ്പേളയിലേക്ക് നടക്കുന്ന പ്രവേശന പ്രദക്ഷിണത്തിൽ ബിഷപ് ഡോ. അംബ്രോസ് പുത്തൻവീട്ടിലിനൊപ്പം രൂപതയിലെ വൈദികരും അണിനിരക്കും. തുടർന്ന് ദിവ്യബലി, തുടർന്ന് ഊട്ടുനേർച്ച.

ഡോക്ടേഴ്സ് ഡേ ആചരിച്ചു

ചാലക്കുടി: ലയൺസ് ക്ലബ്‌ ഡോക്ടേഴ്സ് ഡേ ആചരിച്ചു. താലൂക്ക് ആശുപത്രിയിലെ ഡോക്ടർമാരെയും ലയൺസ് മെമ്പർമാരായ ഡോക്ടർമാരെയും ആദരിച്ചു. താലൂക്ക് ഗവ.ഹോസ്പിറ്റലിൽനടന്ന ചടങ്ങിൽ പ്രസിഡന്‍റ് ഡോ. ജോർജ്‌ കോലഞ്ചേരി അധ്യക്ഷത വഹിച്ചു. ലയൺസ് ഇന്‍റർനാഷണൽ പാസ്റ്റ് മൾട്ടിപ്പിൾ കൗൺസിലിംഗ് ചെയർമാൻ സാജു പാത്താടൻ ഉദ്ഘാടനംനിർവഹിച്ചു. താലൂക്ക് ഹോസ്പിറ്റൽ സൂപ്രണ്ട് ഡോ. മിനിമോൾ മുഖ്യതിഥിയായി. യോഗത്തിൽ ക്ലബ്‌ സെക്രട്ടറി എം.ജെ. ജോബി, ട്രഷറർ പീറ്റർ, വാർഡ് കൗൺസിലർ വി.ജെ. ജോജി എന്നിവർ പ്രസംഗിച്ചു. കുറ്റിലക്കടവ്: ഡോക്ടേഴ്സ് ഡേയോടനുബന്ധിച്ച് വിദ്യാർഥികൾ ഡോക്ടമാരെ ആദരിച്ചു. പെരിഞ്ഞനം ഗവ.യുപി സ്കൂളിലെ ഹെൽത്ത് ക്ലബിന്‍റെ നേതൃത്വത്തിലാണ് വിദ്യാർഥികൾ പെരിഞ്ഞനം കുറ്റിലക്കടവ് സാമൂഹികാരോഗ്യകേന്ദ്രത്തിലെത്തി ഡോക്ടമാരെ ആദരിച്ച് സ്നേഹസമ്മാനങ്ങൾ നൽകിയത്. പ്രധാനാധ്യാപിക കദീജാബീ, പിടിഎ പ്രസിഡന്‍റ് ഇ.ആർ. ജോഷി, എസ്എംസി ചെയർമാൻ സമീർ പാറയിൽ എന്നിവർ സന്നിഹിതരായി.

ഞാറ്റുവേലച്ചന്ത ആരംഭിച്ചു

മേലൂർ: സർവീസ് സഹകരണബാങ്കിന്‍റെ നേതൃത്വത്തിൽ ഞാറ്റുവേലച്ചന്ത ആരംഭിച്ചു. അഞ്ചുവരെയാണ് ചന്ത. ഞാറ്റുവേലച്ചന്തയുടെ ഉദ്ഘാടനം ബാങ്ക് പ്രസിഡന്‍റ് ഇ.കെ. കൃഷ്ണൻ നിർവഹിച്ചു. ഡയറക്ടർബോർഡ് അംഗം മധു തൂപ്രത്ത് അധ്യക്ഷത വഹിച്ചു. എൻ.ജി. സന്തോഷ്കുമാർ, അഡ്വ. പോൾ ചുങ്കൻ, ജോമോൻ നെറ്റിക്കാടൻ, സന്ധ്യ ബാബു, ബാങ്ക് സെക്രട്ടറി എം. സിന്ധു എന്നിവർ പ്രസംഗിച്ചു. കാടുകുറ്റി: കൃഷിഭവന്‍റെ നേതൃത്വത്തിൽ ഗ്രാമപഞ്ചായത്തിന്‍റെ സഹകരണത്തോടെ ഞാറ്റുവേലച്ചന്ത തുടങ്ങി. ഉദ്ഘാടനവും ആദ്യവില്പനയും ഗ്രാമപഞ്ചായത്ത് പ്രസിഡന്‍റ് പ്രിൻസി ഫ്രാൻസിസ് നിർവഹിച്ചു. വൈസ് പ്രസിഡന്‍റ് പി.സി. അയ്യപ്പൻ അധ്യക്ഷതവഹിച്ചു. ത്രിതല പഞ്ചായത്ത് ജനപ്രതിനിധികളായ ബീന രവീന്ദ്രൻ, രാഖി സുരേഷ്, മോഹിനി കുട്ടൻ, ലീന ഡേവീസ് എന്നിവർ പ്രസംഗിച്ചു. കൊടകര: പറപ്പൂക്കര പഞ്ചായത്ത് സോഷ്യല്‍ വെല്‍ഫയര്‍ കോ-ഓപറേറ്റീവ് സൊസൈറ്റിയുടെ ആഭിമുഖ്യത്തിലുള്ള 11-ാമത് ഞാറ്റുവേല മഹോത്സവവും ആയുര്‍വേദ മെഡിക്കല്‍ ക്യാമ്പും അഞ്ച്, ആറ് തിയതികളില്‍ നടക്കുമെന്ന് ഭാരവാഹികള്‍ അറിയിച്ചു. ശനിയാഴ്ച രാവിലെ 10.30ന് സനീഷ്കുമാര്‍ ജോസഫ് എംഎല്‍എ ഉദ്ഘാടനംചെയ്യും. എസ്എസ്എല്‍സി, പ്ലസ് ടു പരീക്ഷകളില്‍ ഉന്നതവിജയം നേടിയവരേയും വിവിധ മേഖലകളിലെ പ്രതിഭകളേയും ചടങ്ങില്‍ അനുമോദിക്കും. തുടര്‍ന്ന് മഴക്കാലരോഗങ്ങളും പ്രതിവിധികളും എന്ന വിഷയത്തില്‍ സെമിനാറുണ്ടാകും. പത്രസമ്മേളനത്തില്‍ സൊസൈറ്റി പ്രസിഡന്‍റ് ആര്‍. നാരായണന്‍കുട്ടി, ഭരണസമിതി അംഗങ്ങളായ പി.കെ. പ്രസാദ്, ചന്ദ്രന്‍ ചിറ്റിയത്ത് എന്നിവര്‍ പങ്കെടുത്തു.

വെള്ളക്കെട്ട്: ചെളിവെള്ളത്തിലിറങ്ങി പ്രതിഷേധം

കോടാലി: മറ്റത്തൂര്‍ പഞ്ചായത്തിലെ കോടാലിയില്‍ പഞ്ചായത്ത് ഏറ്റെടുത്ത സ്ഥലത്ത് വെള്ളംകെട്ടിക്കിടന്ന് രോഗഭീതിപരത്തുന്നതായി പരാതി. ടാക്‌സി സ്റ്റാന്‍ഡ്, ബസ് കാത്തിരിപ്പുകേന്ദ്രം, വനിത ജിംനേഷ്യം, പൊതുടോയ്‌ലറ്റ്, മത്സ്യ- മാംസ വിപണന കേന്ദ്രങ്ങള്‍ എന്നിവ സ്ഥിതിചെയ്യുന്നതിന് സമീപത്താണ് വെള്ളംകെട്ടിക്കിടക്കുന്നത്. വെള്ളക്കെട്ട് പരിഹരിച്ച് രോഗംപടരുന്ന സാഹചര്യം ഒഴിവാക്കാന്‍ നടപടി ഉണ്ടാകാത്തതില്‍ യൂത്ത് കോണ്‍ഗ്രസ് മറ്റത്തൂര്‍ മണ്ഡലം കമ്മിറ്റിയുടെ നേതൃത്വത്തില്‍ പ്രവര്‍ത്തകര്‍ ചെളിവെള്ളത്തിലിറങ്ങിനിന്ന് പ്രതിഷേധിച്ചു. യൂത്ത് കോണ്‍ഗ്രസ് നിയോജകമണ്ഡലം ജനറല്‍സെക്രട്ടറി നൈജോ ആന്‍റോ പ്രതിഷേധസമരം ഉദ്ഘാടനം ചെയ്തു. മണ്ഡലം പ്രസിഡന്‍റ് പ്രതീഷ് പണ്ടാരത്തില്‍ അധ്യക്ഷതവഹിച്ചു. കോണ്‍ഗ്രസ് ബ്ലോക്ക് കമ്മിറ്റി വൈസ് പ്രസിഡന്‍റ് ലിന്‍റോ പള്ളിപറമ്പന്‍, സിജില്‍ ചന്ദ്രന്‍, ബ്ലോക്ക് സെക്രട്ടറി കെ.എ. ഹനീഫ, ബൂത്ത് പ്രസിഡന്‍റ് സിബി വാസുപുരം, യൂത്ത് കോണ്‍ഗ്രസ് ബ്ലോക്ക് സെക്രട്ടറി ലിനോ മൈക്കിള്‍എന്നിവര്‍ പ്രസംഗിച്ചു.

ബിഎംബിസി റോഡ് തകർന്നു

കൊരട്ടി: നിർമാണം നടക്കുന്നതിനോടനുബന്ധിച്ച് ദേശീയപാത കൊരട്ടി മേഖലയിൽ രൂപപ്പെടുന്ന ഗതാഗതക്കുരുക്ക് ഒഴിവാക്കാൻ ഭാരവണ്ടികൾ വഴിതിരിച്ചുവിടുന്നതുമൂലം കൊരട്ടി - നാലുകെട്ട് റോഡിൽ കിൻഫ്രയ്ക്കും കോനൂർ ജംഗ്ഷനും ഇടയിൽ റോഡ് തകർന്നു. ശുദ്ധജലവിതരണ പൈപ്പുകൾ പൊട്ടി വൻതോതിൽ വെള്ളം പാഴായതിനുപിന്നാലെ ആധുനികരീതിയിൽ ബിഎംബിസി രീതിയിൽ നവീകരിച്ച പൊതുമരാമത്ത് റോഡും തകർന്നു. ഗ്രാമീണ റോഡുകളിൽനിന്നു വ്യത്യസ്തമായി കോടികൾ മുടക്കി പുനരുദ്ധരിച്ച ഈ പൊതുമരാമത്ത് റോഡിലൂടെ നൂറുകണക്കിന് വാഹനങ്ങളാണ് ദിനംപ്രതി കടന്നുപോകുന്നത്. അടിയന്തര പ്രാധാന്യത്തോടെ അറ്റകുറ്റപ്പണികൾ നടത്തിയില്ലെങ്കിൽ റോഡിന് കൂടുതൽ കേടുപാടുകൾ സംഭവിച്ചേക്കാം. ദേശീയപാതയിൽനിന്നു വാഹനങ്ങൾ വഴിതിരിച്ചുവിടുന്നതുമൂലം കൊരട്ടി, കാടുകുറ്റി, മേലൂർ പഞ്ചായത്തുകളിലെ പ്രധാന ഗ്രാമീണ റോഡുകളെല്ലാം തകർന്നനിലയിലാണ്. റോഡിന്‍റെ ശോച്യാവസ്ഥയെക്കുറിച്ച് ഗ്രാമപഞ്ചായത്തുകളുടെ പ്രസിഡന്‍റുമാർ കളക്ടറെയും എൻഎച്ച്എഐ പ്രൊജക്ട് ഡയറക്ടറെയും എംഎൽഎ, എംപി അടക്കമുള്ളവരെ ബോധ്യപ്പെടുത്തിയിട്ടുണ്ടെങ്കിലും സാങ്കേതിക കാരണങ്ങൾ പറഞ്ഞ് അറ്റകുറ്റപ്പണികൾക്ക് തയാറാകാതെ ഹൈവേ അധികൃതർ ഒഴിഞ്ഞുമാറുകയാണ്. ഈ പശ്ചാത്തലത്തിൽ കോടതിയെ സമീപിക്കാനുള്ള തയാറെടുപ്പിലാണ് പ്രാദേശിക ഭരണകൂടങ്ങൾ. വഴിതിരിച്ചുവിടല്‍: മാപ്രാണം -നെടുമ്പാള്‍ റോഡിനെ അപകടമേഖലയാക്കുന്നു മാപ്രാണം: തൃശൂര്‍ - കൊടുങ്ങല്ലൂര്‍ സംസ്ഥാനപാതയുടെ കോണ്‍ക്രീറ്റിംഗ് മൂലം കരുവന്നൂരില്‍നിന്നു ആറാട്ടുപുഴ, തൊട്ടിപ്പാള്‍, മുളങ്ങ് റോഡ് വഴി മാപ്രാണം നന്തിക്കര റോഡിലെ നെടുമ്പാളിലാണ് തൃശൂരില്‍നിന്ന് ഇരിങ്ങാലക്കുട, കൊടുങ്ങല്ലൂര്‍ ഭാഗത്തേക്കുള്ള വാഹനങ്ങള്‍ വഴിതിരിഞ്ഞുപോകുന്നത്. നെടുമ്പാള്‍ മുതല്‍ മാപ്രാണംവരെ പുതിയ റോഡ് ആയതിനാല്‍, വഴി തിരിച്ചുവിടലില്‍ നഷ്ടപ്പെട്ടസമയം തിരിച്ചുപിടിക്കാന്‍ അമിതവേഗതയിലാണ് ഇതിലെ വാഹനങ്ങള്‍ പായുന്നത്. കോന്തിപുലം പാടത്തിനും അച്യുതന്‍ നായര്‍ മൂലയ്ക്കും ഇടയ്ക്കുള്ള നടുവിലാല്‍ ഭാഗത്ത് റോഡിന്‍റെ ഒത്തനടുക്ക് നില്‍ക്കുന്ന മരങ്ങളുടെ വലതുവശത്തും ഇടതുവശത്തും വണ്‍വേ പാലിച്ചു പോകേണ്ടതിന് പകരം, റോംഗ്സൈഡിലൂടെയാണ് പലപ്പോഴും സ്വകാര്യ ബസുകളുടെ മത്സരയോട്ടം. ഇവ നിയന്ത്രിച്ചില്ലെങ്കില്‍ വലിയ അപകടങ്ങള്‍ക്ക് സാധ്യതയുള്ള മേഖലയാണ് ഇവിടം.

ശുദ്ധജലവിതരണ പൈപ്പ് പൊട്ടി; പരിഹരിക്കാത്തതിൽ പ്രതിഷേധം

ചാലക്കുടി: എഴുന്നള്ളത്തുപാത റോഡിൽ പാലസ് ആശുപത്രിക്കുസമീപം വാട്ടർ അഥോറിറ്റിയുടെ കുടിവെള്ള പൈപ്പ് പൊട്ടി വെള്ളംപോകുന്നതിന് അടിയന്തരമായി പരിഹാരംകാണുക, നഗരസഭ ഭരണാധികാരിയുടെ പ്രദേശത്തോടുള്ള അവഗണന അവസാനിപ്പിക്കുക എന്നീ ആവശ്യങ്ങൾ ഉന്നയിച്ചു എൽഡിഎഫ് 35-ാം വാർഡ് കമ്മിറ്റി പ്രതിഷേധധർണ നടത്തി. എൽഡിഎഫ് കൺവീനർ ടി.പി. ജോണി ഉദ്ഘാടനം ചെയ്തു. പി.എം. സത്യപാലൻ അധ്യക്ഷതവഹിച്ചു. സിപിഎം ഏരിയകമ്മിറ്റി മെമ്പർ ജിൽ ആന്‍റണി, രാജീവ് തേവാലിൽ, എം.കെ. ചന്ദ്രൻ, റാഫി പട്ടത്ത്, ജോസ് പുല്ലൻ എന്നിവർ പ്രസംഗിച്ചു.

കാർ റൗണ്ട്എബൗട്ടിൽ ഇടിച്ചുകയറി

തൃശൂർ: കാർ റൗണ്ട്എബൗട്ടിൽ ഇടിച്ചുകയറി അപകടം. ഇക്കണ്ടവാര്യർ റോഡിലെ പൗരസമിതിയുടെ റൗണ്ട് എബൗട്ടാണ് ഇന്നലെ പുലർച്ചെ ചാലക്കുടി സ്വദേശിയുടെ കാർ ഇടിച്ചുതകർത്തത്. അപകടത്തിൽ മരത്താക്കര സ്വദേശിക്കു പരിക്കേറ്റു. കാറിന്‍റെ മുൻവശം തകർന്നു. കാറിന്‍റെ മുൻവശത്തെ രണ്ടു ടയറുകൾക്കും ഗ്രിപ്പ് ഇല്ലാത്തതും റൗണ്ട് എബൗട്ടിന്‍റെ അശാസ്ത്രീയനിർമാണവുമാണ് അപകടത്തിനു കാരണമായതെന്നു കരുതുന്നതായി ട്രാഫിക് പോലീസ് പറഞ്ഞു.

മണലിത്തറയിലെ അങ്കണവാടികെട്ടിടത്തിന് 10 വർഷമായിട്ടും അനുമതി ലഭിച്ചില്ല

പുന്നംപറമ്പ്: തെക്കുംകര മണലിത്തറയിൽ അങ്കണവാടിക്ക് കെട്ടിടം നിർമിച്ചിട്ടു 10 വർഷമായിട്ടും ഇതുവരെ പ്രവർത്തനം തുടങ്ങിയില്ല. പാടശേഖരത്തിന്‍റെ നടുവിൽ നിർമിച്ച കെട്ടിടത്തിന് അനുമതി ലഭിക്കാത്തതിനെത്തുടർന്നാണ് അങ്കണവാടി പ്രവർത്തനം അവതാളത്തിലായത്. കെട്ടിടം ഇപ്പോൾ സാമൂഹ്യവിരുദ്ധരുടെയും ഇഴജന്തുക്കളുടെയും താവളമാണ്. യുഡിഎഫ് തെക്കുംകര പഞ്ചായത്ത് കമ്മിറ്റി 2015ൽ ആറു ലക്ഷംരൂപ ചെലവിൽ നിർമിച്ച അങ്കണവാടിയാണ് പ്രവർത്തനം തുടങ്ങാനാവാത്തത്. പാടത്തിന്‍റെ നടുവിലെ കെട്ടിടനിർമാണം പൊതുജനങ്ങളിൽനിന്നു തെരഞ്ഞെടുത്ത കമ്മിറ്റിയാണു പൂർത്തീകരിച്ചത്. അന്നത്തെ ജില്ലാ കളക്ടർ കെട്ടിടത്തിന് അനുമതി നൽകാമെന്നു പറഞ്ഞിരുന്നെങ്കിലും പിന്നീട് വന്ന കളക്ടർ അനുമതി നിഷേധിക്കുകയായിരുന്നു. ഇതോടെ പഞ്ചായത്ത് ഭരണസമിതി പ്രതിസന്ധിയിലായി. അന്നു മന്ത്രിയായിരുന്ന അന്തരിച്ച സി.എൻ. ബാലകൃഷ്ണന്‍റെ പ്രാദേശിക വികസനഫണ്ടിൽ നിന്ന് ആറുലക്ഷം രൂപ ചെലവഴിച്ചാണ് കെട്ടിടം നിർമിച്ചത്. പിന്നീട് തുടർച്ചയായി രണ്ടുതവണ ഭരണത്തിലെത്തിയ എൽഡിഎഫ് അങ്കണവാടി തുറക്കാനുള്ള ഒരു നടപടിയും എടുത്തില്ല. അങ്കണവാടി 2015ൽ അന്നത്തെ പഞ്ചായത്ത് പ്രസിഡന്‍റായിരുന്ന സുനിൽ ജേക്കബ് ആണ് ഉദ്ഘാടനം ചെയ്തത്.

സമൂഹം കുട്ടികൾക്കു നല്ല മാതൃകയാകണം: മന്ത്രി

ഒല്ലൂർ: നമ്മുടെ സമൂഹം കുട്ടികൾക്കു നല്ല മാതൃകയാവണമെന്നും നല്ല മനുഷ്യനാകുകയെന്നതാണ് ഈ കാലഘട്ടം നമ്മോട് ആവശ്യപ്പെടുന്നതെന്നും റവന്യു മന്ത്രി കെ.രാജൻ പറഞ്ഞു. ഒല്ലൂർ സെന്‍റ്് മേരീസ് സ്കൂളിന്‍റെ മെറിറ്റ് ഡേ ഉദ്ഘാടനം ചെയതു സംസാരിക്കുകയായിരുന്നു മന്ത്രി. പിടിഎ പ്രസിഡന്‍റ് ജോസ് ചാക്കോള അധ്യക്ഷത വഹിച്ചു. മേരിമാത പള്ളി വികാരി ഫാ. ജോയ് ചിറ്റിലപ്പിള്ളി, ഹെഡ്‌‌മിസ്ട്രസ് സിസ്റ്റർ സിബിയ തെരേസ്, ലോക്കൽ മാനേജർ സിസ്റ്റർ ഹംബലിൻ, സ്റ്റാഫ് പ്രതിനിധികളായ പി.എൽ. ലിലു, ബിനി ജോർജ്, എംപിടിഎ പ്രസിഡന്‍റ് മിനി ഡെന്നി തുടങ്ങിയവർ പ്രസംഗിച്ചു. എസ്എസ്എൽസി പരീക്ഷയിൽ ഉന്നതവിജയം നേടിയ വിദ്യാർഥികൾക്കുള്ള അവാർഡുകൾ മന്ത്രി വിതരണം ചെയ്തു.

നെല്ലിക്കുന്ന് തിരുനാൾ കൊടിയേറി

നെല്ലിക്കുന്ന്: സെന്‍റ് സെബാസ്റ്റ്യൻ പള്ളിയിലെ ദുക്റാന ഊട്ടുതിരുനാളിനു വികാരി ഫാ. പോൾസണ്‍ തട്ടിൽ കൊടിയേറ്റി. നാളെയാണ് തിരുനാൾ. അസിസ്റ്റന്‍റ് വികാരി ഫാ. ആന്‍റണി ചിറ്റിലപ്പിള്ളി, ഡീക്കൻ പ്രവീണ്‍ കുന്നത്ത്, ജനറൽ കണ്‍വീനർ ജോണ്‍സണ്‍ അക്കര, ട്രസ്റ്റിമാരായ കെ.ഡി. ജെയിംസ്, ജോർജ് ചിറമൽ, ലിജോ ജോയ് എന്നിവർ പങ്കെടുത്തു. ഇന്നു രാവിലെ ആറിനു ദിവ്യബലി, ലദീഞ്ഞ്, നൊവേന, തുടർന്ന് എഴുന്നള്ളിക്കൽ, നാളെ രാവിലെ ആറിനും 7.30 നും ദിവ്യബലി, ഒൻപതിന് ആഘോഷമായ റാസ കുർബാന - ഫാ. ബിൽജു വാഴപ്പിള്ളി, ഫാ. ജോണ്‍ പേരാമംഗലം എന്നിവർ കാർമികരാകും. തുടർന്നു പ്രദക്ഷിണം. 11 മുതൽ സൗജന്യ നേർച്ചഭക്ഷണവിതരണം എന്നിവയും ഉണ്ടായിരിക്കും.

പോത്തൻവലയുമായി മത്സ്യബന്ധനം: നാലു വള്ളങ്ങൾ പിടിയിൽ

ചാവക്കാട്: പരമ്പരാഗത വള്ളക്കാർ എന്ന വ്യാജേന നിരോധിതവലയുമായി മത്സ്യബന്ധനം നടത്തിയ നാലു വള്ളങ്ങൾ പിടികൂടി. പഞ്ചവടി തീരക്കടലിൽ പോത്തൻ വലകൾ ഉപയോഗിച്ച് അടിയൂറ്റൽ മത്സ്യബന്ധനം നടത്തിയിരുന്ന നാലു മത്സ്യബന്ധന യാനങ്ങളെയാണ് ഫിഷറീസ് - മറൈൻ എൻഫോഴ്സ്മെന്‍റ് സംഘം സ്വകാര്യ ഫൈബർവള്ളത്തിലെത്തി പിടികൂടിയത്. അണ്ടത്തോട് സ്വദേശിയായ മാമതിന്‍റെ ബദരിയ ഒന്ന്, രണ്ട് വള്ളങ്ങളും ചാവക്കാട് മണത്തല സ്വദേശിയായ രമേഷിന്‍റെ രജിസ്ട്രേഷൻ നടത്താത്ത രണ്ടു വള്ളങ്ങളുമാണു പിടിച്ചെടുത്തത്. നിരോധിച്ച ഡബിൾനെറ്റ് പോത്തൻവല ഉപയോഗിച്ച് മത്സ്യബന്ധനം നടത്തിയ യാനങ്ങളെ കണ്ടുകെട്ടി. പുലർച്ചെ മുതൽ പഞ്ചവടി ബീച്ച് തീരക്കടലിൽ രണ്ടു വള്ളങ്ങൾ ചേർന്നു പെയർ ട്രോളിംഗ് നടത്തുന്നതായി പരമ്പരാഗത വഞ്ചിക്കാർ ഫിഷറീസ് സ്റ്റേഷനിൽ അറിയിച്ചിരുന്നു. തീരമേഖലകളില്‍ അനധികൃതമത്സ്യബന്ധനം നടക്കുന്നതു കണ്ടെത്താൻ അഴിക്കോട് ഫിഷറീസ് സ്റ്റേഷൻ അസി. ഡയറക്ടർ ഡോ. സി. സീമയുടെ നേതൃത്വത്തിലുള്ള പ്രത്യേക അന്വേഷണസംഘം പുലര്‍ച്ചെ മുതല്‍ കടലില്‍ ശക്തമായ പരിശോധന നടത്തിവരികയായിരുന്നു. ഇതിനിടയിലാണ് പോത്തൻവല മത്സ്യബന്ധനം അറിയുന്നത്. വള്ളത്തി ൽ ഉണ്ടായിരുന്ന ചെമ്മീൻ ലേലംചെയ്തു കിട്ടിയ കാൽ ലക്ഷം രൂപ സർക്കാരിലേക്ക് അടച്ചു.വള്ളങ്ങളുടെ ഉടമകൾക്കെതിരെ ജില്ല ഫിഷറീസ് ഡെപ്യൂട്ടി ഡയറക്ടർ നിയമനടപടി പൂർത്തിയാക്കി, പിഴ ചുമത്തും. അഴിക്കട് ഫിഷറീസ് മറൈൻ എൻഫോഴ്‌സ്‌മെന്‍റ്് ആൻഡ് വിജിലൻസ്‌വിംഗ് ഓഫീസർമാരായ വി.എൻ. പ്രശാന്ത്കുമാർ, വി.എം. ഷൈബു തുടങ്ങിയവരുടെ നേതൃത്വത്തിലായിരുന്നു പിടികൂടിയത്. നിരോധിച്ച മത്സ്യബന്ധനം നടത്തിയാൽ കർശനനടപടി തുടരുമെന്ന് ഡെപ്യൂട്ടി ഡയറക്ടർ അബ്ദുൽ മജീദ് പോത്തന്നൂരാൻ അറിയിച്ചു.

അന്തിക്കാട് വെള്ളക്കെട്ട് ഒഴിയുന്നില്ല; 17 കുടുംബങ്ങളെ ക്യാമ്പിലേക്കു മാറ്റി

അന്തിക്കാട്: കനത്ത മഴയെത്തുടർന്നുണ്ടായ വെള്ളക്കെട്ട് ഒഴിയുന്നില്ല. മഴ ഒഴിഞ്ഞിട്ടും വീടുകൾ ഉപയോഗിക്കാൻ പറ്റാത്തതിനാൽ അന്തിക്കാട് പഞ്ചായത്തിലെ അഞ്ച്, ആറ്, ഏഴ് വാർഡുകളിൽനിന്നായി 17 കുടുംബങ്ങളെ ദുരിതാശ്വാസക്യാമ്പിലേക്കു മാറ്റിപ്പാർപ്പിച്ചു. വീടുകൾക്കുചുറ്റും വെള്ളം നിൽക്കുന്നതിനാൽ ശുചിമുറികൾ ഉപയോഗിക്കാൻ കഴിയാത്തതിനാലും വീടിനുള്ളിൽ വെള്ളത്തിന്‍റെ ഈർപ്പവും പുറത്ത് ചെളിയും തങ്ങിനിൽക്കുന്നതിനാലും താമസിക്കാൻ കഴിയാത്തതിനാലാണ് ഇവരെ അന്തിക്കാട് കെജിഎം എൽപി സ്കൂളിലെ ക്യാമ്പിലേക്കുമാറ്റിയത്. ഉച്ചഭക്ഷണം ഇവിടത്തെ കുട്ടികൾക്കു തയാറാക്കുന്നതിൽ കൂടുൽ ചേർത്തു തയാറാക്കിയാണ് കുടുംബങ്ങൾക്കു വിളമ്പുന്നത്. രാവിലെയും രാത്രിയും ക്യാമ്പിലുള്ളവർ ഒരുമിച്ച് ഭക്ഷണം തയാറാക്കും. ഇതിനാവശ്യമായ പലചരക്ക്, പച്ചക്കറിസാധനങ്ങൾ വാങ്ങിക്കുന്നതിനാവശ്യമായ സൗകര്യങ്ങൾ ഒരുക്കിയിട്ടുണ്ടെന്ന് പഞ്ചായത്ത് - വില്ലേജ് അധികൃതർ പറഞ്ഞു. പഞ്ചായത്ത് പ്രസിഡന്‍റ്് ജീന നന്ദൻ, വൈസ് പ്രസിഡന്‍റ്് പി.എസ്. സുജിത്ത്, വാർഡ് അംഗങ്ങളായ ലീന മനോജ്, ശരണ്യ രജീഷ്, അനിത ശശി, വില്ലേജ് ഓഫീസർ ജെ. ജെനേഷ്, ഹെൽത്ത് ഇൻസ്പക്ടർ അശ്വതി മനേഷ് എന്നിവർ ദുരിതാശ്വാസകേന്ദ്രത്തിലെത്തി കാര്യങ്ങൾ വിലയിരുത്തി.

ഡോക്ടേഴ്സ് ദിനാചരണം

ജൂബിലി മിഷൻ മെഡിക്കൽ കോളജിൽ ഫ്ലാഷ്മോബ് തൃശൂർ: ജൂബിലി മിഷൻ മെഡിക്കൽ കോളജ് ആശുപത്രിയിൽ ഡോക്ടേഴ്സ് ദിനത്തോടനുബന്ധിച്ച് ഫ്ലാഷ് മോബ് നടത്തി. ആശുപത്രി ഡയറക്ടർ ഫാ. റെന്നി മുണ്ടൻകുരിയൻ, അസോസിയേറ്റ് ഡയറക്ടർ ഫാ. ടെറിൻ മുള്ളക്കര, പ്രിൻസിപ്പൽ ഡോ. എം.എ. ആൻഡ്രൂസ്, മെഡിക്കൽ സൂപ്രണ്ട് ഡോ. ഷിബു സി. കള്ളിവളപ്പിൽ, സിഇഒ ഡോ. ബെന്നി ജോസഫ് നീലങ്കാവിൽ എന്നിവർ പ്രസംഗിച്ചു. അമലയിൽ മുതിർന്ന ഡോക്ടർമാരെ ആദരിച്ചു തൃശൂർ: അമല മെഡിക്കൽ കോളജിൽനിന്നും വിരമിച്ച ഡോക്ടർമാർക്ക് ആദരമർപ്പിച്ച് ഡോക്ടേഴ്സ് ദിനാചരണം നടത്തി. ഡയറക്ടർ ഫാ. ജൂലിയസ് അറയ്ക്കൽ ഉദ്ഘാടനം നിർവഹിച്ചു. അമല മെഡിക്കൽ കോളജ് പ്രിൻസിപ്പൽ ഡോ. ബെറ്റ്സി തോമസ്, മുൻപ്രിൻസിപ്പൽ ഡോ. എൻ.വി. സ്വർണം എന്നിവർ പ്രസംഗിച്ചു. ചൂണ്ടൽ സെന്‍റ് ജോസഫ്സ് ഹോസ്പിറ്റൽ ചൂണ്ടൽ: സെന്‍റ് ജോസഫ്സ് ഹോ സ്പിറ്റലിൽ ഡോക്ടേഴ്സ് ഡേ ആഘോഷിച്ചു. സീനിയർ ഡോ ക്ടർമാരായ ഡോ. ജോസ്, ഡോ. റെജു റോയ്സ്, സിസ്റ്റർ ഡോ. ബെന സിഎംസി, ഡോ. ഷാജി ഭാസ്കർ, ഡോ. സി.വി. സുനിത എന്നിവരെ അഡ്മിനിസ്ട്രേറ്റർ സിസ്റ്റർ ചെറുപുഷ്പം പൊന്നാടയണിയിച്ച് ആദരിച്ചു. നഴ്സിംഗ് സ്റ്റാഫ് ഫ്ലാഷ് മോബ് അവതരി പ്പിച്ചു. നഴ്സിംഗ് സൂപ്രണ്ട് സിസ്റ്റ ർ മേഘ, ക്വാളിറ്റി ഓഫീസർ നിഷ രമേഷ് എന്നിവർ ആശംസകളർപ്പിച്ചു. സേക്രഡ് ഹാർട്ട് സിഎൽപി സ്കൂൾ തൃശൂർ: സേക്രഡ് ഹാർട്ട് കോണ്‍വന്‍റ് എൽപി സ്കൂളിൽ ഡോക്ടേഴ്സ് ദിനം ആചരിച്ചു. ദന്തരോഗവിഭാഗം ഡോക്ടർ ചൈത്ര കുട്ടികളിൽ വളർത്തിയെടുക്കേണ്ട ആരോഗ്യശീലത്തെക്കുറിച്ച് സംസാരിക്കുകയും കുട്ടികളുടെ സംശയങ്ങൾക്ക് ഉത്തരം നൽകുകയും ചെയ്തു. ഹെഡ്മിസ്ട്രസ് സിസ്റ്റർ ലിനി തെരേസ് ഡോക്ടറെ ഉപഹാരം നൽകി ആദരിച്ചു. പാർവതി, ജീന ടീച്ചർ എന്നിവർ പ്രസംഗിച്ചു. ദി ഇന്‍റർനാഷണൽ സ്കൂൾ ഓഫ് തൃശൂർ ചിറക്കേക്കോട്: ആരോഗ്യമുള്ളജനതയെ പ്രതീക്ഷയുടെ ലോകത്തിലേക്ക് നയിക്കുന്ന പോരാളികളായ ഡോക്ടർമാർക്ക് നന്ദി അറിയിച്ചുകൊണ്ട് ദി ഇന്‍റർനാഷണൽ സ്കൂൾ ഓഫ് തൃശൂർ ഡോ ക്ടേഴ്സ് ദിനം ആചരിച്ചു. ഡോ. എം.ആർ. അഞ്ജു മുഖ്യാതിഥി യായി. സ്കൂൾ പ്രിൻസിപ്പൽ സാനു ജോസഫ് അധ്യക്ഷത വഹി ച്ചു. ജില്ലാ സഹകരണ ആശുപത്രി തൃശൂർ: ജില്ലാ സഹകരണ ആശുപത്രിയിൽ ഡോക്ടേഴ്സ് ദിനാചരണം ജൂബിലി മെഡിക്കൽ കോളജ് പ്രഫ‌സർ ഡോ. സി.വി. ആൻഡ്രൂസ് ഉദ്ഘാടനം ചെയ്തു. ആശുപത്രി വൈസ് പ്രസിഡന്‍റ് സത്യഭാമ അധ്യക്ഷത വഹിച്ചു. ഡയറക്ടർമാരായ വർഗീസ് ജോണ്‍, ഡോ. ടോണി ജോണ്‍ അക്കര, ഡോ. അനൂപ സ്റ്റാൻലി, ഡോ. മീനു മരിയ ബാബു, ഡോ. വിനീത വേണുഗോപാൽ, ഡോ. ഹരീഷ്, ഡോ. സാജൻ, ആശുപത്രി സെക്രട്ടറി എം.എസ്. സന, എ.ആർ. രാമചന്ദ്രൻ, ജോണ്‍സണ്‍ ആലപ്പാട്ട്, ജേക്കബ് പോൾ തട്ടിൽ, ശരത്കുമാർ എന്നിവർ പങ്കെടുത്തു. മെഡിക്കൽ സൂപ്രണ്ട് ഡോ. രാമദാസ് സ്വാഗതവും ഡയറക്ടർ എ.പി. ജോസ് നന്ദിയും പറഞ്ഞു.

ശമ്പളപരിഷ്കരണ നടപടികൾ ഉടൻ ‌ ആരംഭിക്കണം: ടി.വി. ചന്ദ്രമോഹൻ

തൃശൂർ: 12-ാം ശമ്പള പരിഷ്കരണനടപടികൾ ആരംഭിക്കാതെ അധ്യാപകരെയും മറ്റു ജീവനക്കാരെയും സർക്കാർ വഞ്ചിക്കുകയാണന്നു യുഡിഎഫ് ജില്ലാ ചെയർമാൻ ടി.വി. ചന്ദ്രമോഹൻ പറഞ്ഞു. കെപിഎസ്ടിഎ പ്രതിഷേധധർണ ഉദ്ഘാടനം ചെയ്യുകയായിരുന്നു അദ്ദേഹം. ഡിഎ കുടിശിക, മുൻ ശമ്പള പരിഷ്കരണ കുടിശിക തുടങ്ങി അധ്യാപകർക്കു ലഭിക്കേണ്ട സാമ്പത്തികങ്ങൾ സർക്കാർ നിഷേധിക്കുകയാണ്. സാമ്പത്തികപ്രതിസന്ധിയുടെ പേരിൽ ആനുകൂല്യങ്ങൾ നിഷേധിക്കുമ്പോൾ സർക്കാർ ആഡംബരം നടത്തുകയാണെന്നും ചന്ദ്രമോഹൻ കുറ്റപ്പെടുത്തി. ജില്ലാ പ്രസിഡന്‍റ് പി.സി. ശ്രീപദ്മനാഭൻ അധ്യക്ഷത വഹിച്ചു. സെക്രട്ടറി ജയപ്രകാശ് പാറപ്പുറത്ത് സ്വാഗതവും ട്രഷറർ സി.എ. മുഹമ്മദ് റാഫി നന്ദിയും പറഞ്ഞു.സംസ്ഥാന വൈസ് പ്രസിഡന്‍റ് സാജു ജോർജ് മുഖ്യപ്രഭാഷണം നടത്തി.

ജെയിംസ് വളപ്പിലയ്ക്കു തൃശൂരിൽ പൗരസ്വീകരണം

തൃശൂർ: ആതുരസേവന രംഗത്ത് മികവുറ്റ സേവനം കാഴ്ചവച്ച അഞ്ചു വനിതകളെ ആദരിക്കുന്ന ചടങ്ങും വനിതാസമ്മേളനവും നടന്നു. ചടങ്ങിൽ ലയണ്‍സ് കേരള മൾട്ടിപ്പിൾ സെക്രട്ടറിയായി തെരഞ്ഞെടുക്കപ്പെട്ട ഡിസ്ട്രിക്ട് ഗവർണർ ജെയിംസ് വളപ്പിലയ്ക്ക് പൗരസ്വീകരണവും നൽകി. മന്ത്രി ആർ. ബിന്ദു ഉദ്ഘാടനം നിർവഹിച്ചു. തൃശൂർ കോർപറേഷൻ മേയർ എം.കെ. വർഗീസ് അധ്യക്ഷത വഹിച്ചു. ഡെപ്യൂട്ടി മേയർ എം.എൽ. റോസി, കല്യാണ്‍ സിൽക്സ് എംഡി ടി.എസ്. പട്ടാഭിരാമൻ തുടങ്ങിയവർ വിശിഷ്ടാതിഥികളായിരുന്നു പങ്കെടുത്തു. തുടർന്ന് കോർപറേഷനിലെ മുന്നൂറിൽപരം ഹരിതകർമസേന അംഗങ്ങൾക്ക് ലയണ്‍സ് ഹൃദയപൂർവം ഗിഫ്റ്റ് ഓഫ് ജോയ് സമ്മാനമായി സാരികൾ നൽകി. പൗരാവലി പുരസ്കാരം മേയർ എം.കെ. വർഗീസ് ജെയിംസ് വളപ്പിലയ്ക്ക് സമ്മാനിച്ചു. വിവിധ വിഭാഗങ്ങളിലെ ജോയ് ഓഫ് ഹ്യുമാനിറ്റേറിയൻ അവാർഡുകൾ സെന്‍റ് ജോസഫ് സ്പെഷ്യൽ സ്കൂൾ പ്രിൻസിപ്പൽ സിസ്റ്റർ ലെറ്റീഷ്യ, പാലിയേറ്റീവ് വർക്കർ എം.പി. പ്രീതി, ആശ്രയഭവൻ ഡയറക്ടർ ലീന പീറ്റർ, ആശാ വർക്കറായ പ്രീതി സതീഷ്, കുടുംബശ്രീയിലെ അംബിക സോമൻ എന്നിവർക്ക് സമ്മാനിച്ചു. മുൻ ഡിസ്ട്രിക്ട് ഗവർണർമാരായ എം.ഡി. ഇഗ്നേഷ്യസ്, ഇ.ഡി. ദീപക്ക്, ജോസഫ് ജോണ്‍, സീനിയർ ചേംബർ നാഷണൽ ലീഡർമാരായ എൻ.ഐ. വർഗീസ്, ഹംസ അലി, കെ3എ പ്രതിനിധി ജോസ് വള്ളൂർ, പ്ലാറ്റൂണ്‍ ക്ലബ് സെക്രട്ടറി സോജൻ തുടങ്ങിയവർ ചടങ്ങിൽ സംബന്ധിച്ചു. ‌സാമൂഹ്യ, സാംസ്കാരിക രംഗങ്ങളിലെ വിവിധ സംഘടനകൾ ജെയിംസ് വളപ്പിലയെ ആദരിച്ചു. ലയണ്‍സ് ഡിസ്ട്രിക്ട് ഗവർണറായി സ്ഥാനമേറ്റതിനുശേഷം ഇന്ത്യയിലെ തന്നെ മികച്ച ഗവർണറായി സമസ്തമേഖലകളിലും നിരവധി സേവന പ്രവർത്തനങ്ങൾ നടത്തിയതിന്‍റെ അംഗീകാരമായാണ് ലയണ്‍സ് കേരള മൾട്ടിപ്പിൾ സെക്രട്ടറി എന്ന പുതിയ സ്ഥാനത്തിനു ജെയിംസ് വളപ്പില അർഹനായത്.

ജനറൽ ആശുപത്രിയിലെ ടോക്കണ്‍ സംവിധാനം അടിച്ചുതകർത്തു

തൃശൂർ: ജനറൽ ആശുപത്രിയിലെ ഒപി ടിക്കറ്റെടുക്കുന്നതിനായുള്ള ടോക്കണ്‍ സംവിധാനം അടിച്ചുതകർത്തു. മാനസികനില തെറ്റിയ ആളാണെന്നു സൂചന. ഇന്നലെ ഉച്ചയ്ക്കായിരുന്നു സംഭവം. ഒപി ടിക്കറ്റ് എടുക്കുന്ന സമയം കഴിഞ്ഞെത്തിയ ആൾ ടോക്കണ്‍ എടുക്കുന്ന മെഷീനുസമീപം എത്തി. എന്നാൽ മെഷീൻ ഓഫായിരുന്നു. ഇതിൽ പ്രകോപിതനായ ഇയാൾ സമീപത്തെ ഫയർ ഡിസ്റ്റിൻഗ്വിഷർ എടുത്ത് ടോക്കണ്‍ സംവിധാനം അടിച്ചുതകർക്കുകയായിരുന്നു. സംഭവമറിഞ്ഞ് സെക്യൂരിറ്റി ജീവനക്കാരും തൃശൂർ ഈസ്റ്റ് പോലീസും സ്ഥലത്തെത്തി ഇയാളെ പിടികൂടി.

ഡോക്ടർമാരില്ല; ഉള്ളവർക്ക് ഇരട്ടിപ്പണി

മുളങ്കുന്നത്തുകാവ്: ഗവ. മെഡിക്കൽ കോളജ് ആശുപത്രിയിലെ സൂപ്പർ സ്പെഷാലിറ്റി വിഭാഗമടക്കം പ്രധാനപ്പെട്ട വകുപ്പുകളിൽ മേധാവികളില്ല. സൂപ്പർ സ്പെഷാലിറ്റി വിഭാഗത്തെ വകുപ്പായി ഉൾപ്പെടുത്താത്തതിനാൽ പ്രഫസർതസ്തികകളും ഒഴിഞ്ഞുകിടക്കുന്നു. പിജി വിദ്യാർഥികൾക്കു പഠിക്കാനുള്ള സാഹചര്യമില്ലെന്നും പരാതി. യോഗ്യരായ പെർഫ്യൂഷനിസ്റ്റുകളില്ലാതെ ഹൃദയംതുറന്നുള്ള ശസ്ത്രക്രിയയും ഒരുമാസമായി മുടങ്ങി. ആഴ്ചയിൽ രണ്ടു ഹൃദയ ശസ്ത്രക്രിയകളാണു നടത്തിയിരുന്നത്. രണ്ടുവർഷത്തെ കാത്തിരിപ്പിനൊടുവിലാണ് ഒരു ഡോക്ടറെത്തിയത്. ശസ്ത്രക്രിയകൾ തുടങ്ങാതിരിക്കാൻ നിരവധി തടസങ്ങളും ഉയർന്നു. ഡോക്ടറുടെ നിശ്ചയദാർഢ്യത്തിലാണു സ്വകാര്യ ആശുപത്രികളിൽ ലക്ഷങ്ങൾ ചെലവുവരുന്ന ശസ്ത്രക്രിയ സൗജന്യനിരക്കിൽ ചെയ്യുന്നത്. ശസ്ത്രക്രിയ നടത്തുന്പോൾ യന്ത്രസഹായത്തിലാണു ജീവൻ നിലനിർത്തുക. ഇതിനു യോഗ്യതയുള്ള പെർഫ്യൂഷനിസ്റ്റുകൾ ഇല്ല. മൂന്നുപേരെ നിയമിച്ചെങ്കിലും ഒരാൾ വിദേശത്തുപോയി. ആശുപത്രി വികസനപദ്ധതിയിൽ ഒരാളെ നിയമിച്ചെങ്കിലും ആവശ്യത്തിനു യോഗ്യതയില്ലെന്നാണ് ആരോപണം. ശസ്ത്രക്രിയ കഴിഞ്ഞ രോഗിക്ക് അസ്വസ്ഥത അനുഭവപ്പെട്ടതോടെ ഡോക്ടർ നടത്തിയ പരിശോധനയിലാണു പെർഫ്യൂഷനിസ്റ്റിനു യന്ത്രം ഉപയോഗിക്കാൻ പരിജ്ഞാനമില്ലെന്ന് അറിഞ്ഞത്. രോഗിയുടെ ജീവൻ നഷ്ടമാകാൻ സാധ്യതയുള്ളതിനാൽ തീരുമാനമുണ്ടാകുന്നതുവരെ ശസ്ത്രക്രിയകൾ നിർത്തിവയ്ക്കാൻ ഡോക്ടർ നിർബന്ധിതനാകുകയായിരുന്നു. ഒരുമാസമായിട്ടും പ്രതിസന്ധി പരിഹരിക്കാൻ കഴിഞ്ഞില്ല. 60 രോഗികളാണ് ശസ്ത്രക്രിയയ്ക്ക് ഊഴംകാത്തിരിക്കുന്നത്. സൂപ്പർ സ്പെഷാലിറ്റി വിദഗ്ധരുടെ സേവനമുള്ള ഗ്യാസ്ട്രോളജി, യൂറോളജി, ന്യൂറോളജി, നെഫ്രോളജി, പ്ലാസ്റ്റിക് സർജറി വിഭാഗങ്ങളിൽ ഒരു ഡോക്ടറുടെ സേവനമാണുള്ളത്. യൂറോളജി ഡോക്ടർ കൊച്ചി, തൃശൂർ മെഡിക്കൽ കോളജുകളിലാണു ജോലിചെയ്യുന്നത്. ആഴ്ചയിൽ അഞ്ചുദിവസം തൃശൂരിലും ഒരുദിവസം കൊച്ചിയിലും. ഏക വാതരോഗവിദഗ്ധനായ ഡോക്ടർ കോട്ടയത്തും തൃശൂരിലുമായി ജോലിചെയ്യുന്നു. രണ്ടു ഡോക്ടർമാരുണ്ടായിരുന്ന ഗ്യാസ്ട്രോളജി വിഭാഗത്തിൽ ഒരാളാണുള്ളത്. അസോസിയേറ്റ് പ്രഫസറെ സ്ഥലംമാറ്റി പകരംവച്ച ഡോക്ടർ അമിതജോലിഭാരത്താൽ പ്രതിസന്ധിയിലാണ്. ഗ്യാസ്ട്രോളജിയിലടക്കം ഒപിയിലെത്തുന്ന രോഗികളുടെ എണ്ണം കുറച്ചു. 200 കോടി രൂപ ചെലവിട്ടു സൂപ്പർ സ്പെഷാലിറ്റി സമുച്ചയവും അനുബന്ധസൗകര്യങ്ങളും ഒരുക്കിയെങ്കിലും രോഗികൾക്കു ഗുണമില്ല. താത്കാലികമായി ഡോക്ടർമാരെ നിയമിക്കാൻ ഇന്നലെ അപേക്ഷ ക്ഷണിച്ചതുമാത്രമാണു പുരോഗതി. നിരവധി കാൻസർരോഗികൾ എത്തുന്ന നെഞ്ചുരോഗാശുപത്രിയിലും പ്രതിസന്ധി രൂക്ഷമാണ്.

സർക്കാർ മെഡിക്കൽ കോളജുകൾ വെന്‍റിലേറ്ററിൽ: ടി.എൻ. പ്രതാപൻ

മുളങ്കുന്നത്തുകാവ്: പിണറായി വിജയൻ മുഖ്യമന്ത്രിയായിരിക്കുന്നതു സാക്ഷരകേരളത്തിലാണെന്നും അദ്ദേഹം എത്ര തലപൂഴ്ത്തിവച്ചാലും എല്ലാം ജനങ്ങൾ കാണുന്നുണ്ടെന്നു മനസിലാക്കുന്നതു നല്ലതാണെന്നും കെപിസിസി രാഷ്ട്രീയകാര്യസമിതിയംഗം ടി.എൻ. പ്രതാപൻ. രാജ്യത്ത് ഒന്നാംസ്ഥാനമെന്നു വീന്പുപറഞ്ഞ കേരളത്തിലെ ആരോഗ്യരംഗത്തെ നാഴികക്കല്ലുകളായ സർക്കാർ മെഡിക്കൽ കോളജുകൾ ഇന്നു വെന്‍റിലേറ്ററിലാണെന്നും അദ്ദേഹം പറഞ്ഞു. ആരോഗ്യമേഖലയോടുള്ള സർക്കാർ അവഗണനയ്ക്കും അനാസ്ഥയ്ക്കുമെതിരേ കോണ്‍ഗ്രസ് നടത്തിയ തൃശൂർ മെഡിക്കൽ കോളജ് മാർച്ചും ധർണയും ഉദ്ഘാടനം ചെയ്യുകയായിരുന്നു അദ്ദേഹം. ഡിസിസി പ്രസിഡന്‍റ് അഡ്വ. ജോസഫ് ടാജറ്റ് അധ്യക്ഷത വഹിച്ചു. എം.പി. വിൻസെന്‍റ്, ജോസ് വള്ളൂർ, അനിൽ അക്കര, ജോസഫ് ചാലിശേരി, രാജേന്ദ്രൻ അരങ്ങത്ത്, സുനിൽ അന്തിക്കാട്, ഷാജി കോടങ്കണ്ടത്ത്, ജോണ്‍ ഡാനിയൽ, എൻ.ആർ. സതീശൻ, കെ.സി. ബാബു തുടങ്ങിയവർ നേതൃത്വം നൽകി.

പൊതുമരാമത്തുമന്ത്രിക്ക് പ്രതിഷേധ റീൽ അയച്ചു

തൃശൂർ: റോഡിലെ കുഴികളിൽ വീണു മരണങ്ങളും ഗുരുതരപരിക്കേൽക്കുന്ന സംഭവങ്ങളും ഉണ്ടായിട്ടും കുഴികൾ സമയബന്ധിതമായി അടയ്ക്കാൻ തയാറാകാത്ത പൊതുമരാമത്തു മന്ത്രി മുഹമ്മദ് റിയാസിനു പ്രതിഷേധ റീൽ അയച്ച് കൗൺസിലർ ജോൺ ഡാനിയൽ. ഇരുചക്രവാഹനയാത്രക്കാരായ ദമ്പതികൾക്കു വീണുപരിക്കേൽക്കാനിടയാക്കിയ കോലോത്തുംപാടം റോഡിലെ കുഴിക്കരികിൽനിന്നാണു പ്രതിഷേധ റീൽ ചിത്രീകരിച്ച് അയച്ചുകൊടുത്തത്. റോഡുകളെക്കുറിച്ച് സന്തോഷ റീൽ ഇടുന്ന മന്ത്രിക്കു റോഡുകളുടെ ദയനീയാവസ്ഥ ബോധ്യപ്പെടുത്താനാണു പ്രതിഷേധ റീൽ അയച്ചതെന്നു ജോൺ ഡാനിയൽ പറഞ്ഞു. തൊഴിലാളികൾ റോഡിലെ കുഴിയടച്ചുപോകുമ്പോൾ ഉദ്യോഗസ്ഥരുടെ കൃത്യമായ മേൽനോട്ടം ഉറപ്പുവരുത്തണമെന്നും ആവശ്യപ്പെട്ടു.

റോഡുകൾ കോർപറേഷനു നൽകിയാൽ എല്ലാ റോഡുകളും നന്നാക്കും: മേയർ

തൃശൂർ: കോർപറേഷൻപരിധിയിലെ റോഡുകൾ കോർപറേഷനു നൽകിയാൽ എല്ലാ റോഡുകളും നന്നാക്കുമെന്നു മേയർ എം.കെ. വർഗീസ്. നിലവിൽ ഏതു റോഡിലും കുഴി ഉണ്ടായാൽ അടികിട്ടുന്നതു തനിക്കുമാത്രമാണ്. നഗരത്തിലെ റോഡുകളുടെ അവകാശികൾ ആരാണെന്നു പലർക്കും അറിയാത്തതാണ് തന്നെ പഴിക്കാൻ ഇടയാക്കുന്നത്. നിലവിൽ നഗരത്തിലെ റോഡുകൾ പലതും കോർപറേഷൻ, പിഡബ്ല്യുഡി, കെഎസ്ടിപി എന്നിവരുടെ അധീനതയിൽ ഉള്ളവയാണ്. ഇതിൽ പിഡബ്ല്യുഡി റോഡുകൾ പലതും തകർന്നതാണ്. ഇതിനെതിരേ പലതവണ പരാതികൾ പറഞ്ഞിട്ടും യാതൊരു പ്രയോജനവുമില്ല. ഫണ്ട് ഇല്ലാത്തതായിരിക്കാം റോഡ് നന്നാക്കാത്തതിന്‍റെ കാരണമെന്നാണ് തനിക്കു തോന്നുന്നത്. കോർപറേഷനുകീഴിലുള്ള റോഡുകളിലെ കുഴികൾ കഴിഞ്ഞ ആറിനുതന്നെ പൂർണമായും നികത്തിയതാണ്. ഏതാനും ചില റോഡുകളിൽമാത്രം മഴയിൽ ഒന്നോ രണ്ടോ കുഴികൾ ഉണ്ടായിട്ടുണ്ടാകാം. അതു സ്വാഭാവികംമാത്രമാണ്. ഓരോ ഡിവിഷനിലേക്കും റോഡ് നിർമാണത്തിനായി നൽകുന്ന തുക സ്ട്രീറ്റ് ലൈറ്റിനും മറ്റും ഉപയോഗിക്കുന്നതാണ് റോഡ് നിർമാണം താളംതെറ്റിക്കുന്നത്. കൗണ്‍സിലർമാരോടു കുഴികൾ ഉണ്ടെങ്കിൽ യഥാസമയം അറിയിക്കണമെന്നു നേരത്തേതന്നെ ആവശ്യപ്പെട്ടിട്ടുണ്ട്. മാത്രമല്ല ഓരോ ഡിവിഷനിലും ബിഎംബിസി ടാറിംഗ് ചെയ്തിട്ടുണ്ട്. സ്വന്തം കൈയിൽനിന്ന് പണമെടുത്ത് മറ്റു റോഡുകൾ നന്നാക്കാൻ ആഗ്രഹമുണ്ടങ്കിലും അതിനു പലവിധ നിയമപ്രശ്നങ്ങളുണ്ടെന്നും മേയർ പറഞ്ഞു.

എത്രയൊക്കെ പറഞ്ഞിട്ടും ഫലമില്ല; റോഡിൽ വാഴനട്ട് കൗൺസിലർ

തൃശൂർ: പൊതുമരാമത്തുവകുപ്പിന്‍റെ അനാസ്ഥയ്ക്കെതിരേ റോഡിൽ വാഴനട്ട് ഡിവിഷൻ കൗൺസിലറുടെ പ്രതിഷേധം. തകർന്നുതരിപ്പണമായ ജൂബിലി മിഷൻ ഹോസ്പിറ്റൽ റോഡിലാണ് ഡിവിഷൻ കൗൺസിലർ ലീല വർഗീസിന്‍റെ നേതൃത്വത്തിൽ വാഴനട്ടത്. പലതവണ പരാതിനൽകിയിട്ടും, പരസ്യമായി പ്രതിഷേധം നടത്തുമെന്നു പറഞ്ഞിട്ടും ഫലമില്ലാതായതോടെയാണ് വാഴനട്ടതെന്നും നിലവിൽ മഴമാറിയിട്ടും കുഴികൾ അടയ്ക്കാത്തതു ഫണ്ടില്ലാതെ അല്ലെന്നും അവർ അടയ്ക്കാത്തതു തെറ്റുതന്നെയാണെന്നും കൗൺസിലർ പറഞ്ഞു. മിഷൻ ക്വാർട്ടേഴ്സ് ഡിവിഷൻ കമ്മിറ്റി നടത്തിയ പ്രതിഷേധസമരം ഡിസിസി ജനറൽ സെക്രട്ടറിയും മുൻകൗൺസിലറുമായ ബൈജു സി. വർഗീസ് ഉദ്ഘാടനം ചെയ്തു. ലീല വർഗീസ് അധ്യക്ഷത വഹിച്ചു. ഡിവിഷൻ പ്രസിഡന്‍റ് അബി ആന്‍റണി, ബ്ലോക്ക് വൈസ് പ്രസിഡന്‍റ് കെ.എ. ടോണി എന്നിവർ പ്രസംഗിച്ചു.

കുഴികളിൽ മണ്ണിടൽ, കണ്ണിൽ പൊടിയിടൽ

തൃശൂരിലെ റോഡുകളിൽ കുഴികൾ മാത്രമല്ല, മെറ്റലും ഇനി ആളെ വീഴ്ത്തും സി.ജി. ജിജാസൽ തൃശൂർ: ലേണിംഗ് സിറ്റിയായ തൃശൂരിൽ ലേണിംഗ് എടുത്തവർക്കുമാത്രമല്ല ലൈസൻസ് എടുത്തവർക്കുപോലും നിരത്തിലിറങ്ങണമെങ്കിൽ അല്പസ്വല്പം അഭ്യാസം അറിയണം. നഗരത്തിലെ ദൈനംദിനയാത്ര വലിയൊരു ദുരിതമായി മാറുന്ന കാലത്ത്, നേരത്തേ മഴയിൽ രൂപപ്പെട്ട കുഴികളായിരുന്നു വില്ലനെങ്കിൽ ഇപ്പോൾ അവ നികത്താൻ കൊണ്ടുവന്ന മെറ്റലും പുതിയ അപകടഭീഷണി ഉയർത്തുകയാണ്. കഴിഞ്ഞദിവസം കോവിലകത്തുംപാടം റോഡിലെ കുഴിയിൽവീണ് സ്കൂട്ടർയാത്രികരായ ദന്പതികൾക്കു ഗുരുതരപരിക്കേൽക്കുകയും തുടർന്നു കുഴി നികത്തുകയും ചെയ്തിരുന്നു. എന്നാൽ ഇതിനുമുൻപ് നികത്തിയ കുഴികളിലെ മെറ്റലുകൾ റോഡിൽ പരന്നുകിടക്കുന്നതു നീക്കംചെയ്യാത്തത് പുതിയ അപകടങ്ങൾ ക്ഷണിച്ചുവരുത്തുന്ന അവസ്ഥയാണ്. സംഭവം അധികാരികളുടെ ശ്രദ്ധയിൽപ്പെട്ടെങ്കിലും, ഇത്തരത്തിലുള്ള സാഹചര്യം നഗരത്തിലെ പലയിടങ്ങളിലും ആവർത്തിക്കപ്പെടുന്നു. അയ്യന്തോൾ– പഞ്ചിക്കൽ റോഡിലും മാതൃകാറോഡിലും റോഡിനകത്തും ഇരുഭാഗത്തും മെറ്റൽ കിടക്കുന്നത് ഇരുചക്രവാഹനയാത്രികർക്കു വല്ലാതെ ബുദ്ധിമുട്ടാണ് സൃഷ്ടിക്കുന്നത്. മാതൃകാറോഡിൽ കുഴിനികത്താൻ കൊണ്ടുവന്ന മെറ്റൽമിശ്രിതം റോഡിൽതന്നെ കൂട്ടിയിട്ടിരിക്കുകയാണ്. മഴയിൽ ഈ മിശ്രിതം വഴുക്കുന്നതിനൊപ്പം, റോഡിന്‍റെ ഉയരമാറ്റവും യാത്രക്കാർക്കു പുതിയ കെണിയാണ്.

ബൈക്ക് അപകടത്തിൽ പരിക്കേറ്റ യുവതി മരിച്ചു

വടക്കാഞ്ചേരി: ബൈക്ക് അപകടത്തിൽ ചികിത്സയിൽകഴിഞ്ഞിരുന്ന യുവതി മരിച്ചു. കട്ടിലപൂവം മേലില്ലം മുട്ടപ്പിള്ളിൽ വീട്ടിൽ ബിനോയ് വർഗീസിന്‍റെ ഭാര്യ മേരി ഏലിയാസ്(46) ആണ് മരിച്ചത്. കഴിഞ്ഞ മാസം 26 ന് മകനൊപ്പം ബൈക്കിൽ സഞ്ചരിക്കുന്നതിനിടെ വേങ്ങലകുണ്ട് പ്രദേശത്തുണ്ടായ അപകടത്തിലാണ് മേരിക്ക് പരിക്കേറ്റത്. തുടർന്ന് തൃശുർ മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. സംസ്കാരം ഇന്ന് ഉച്ചയ്ക്ക് മൂന്നിന് കട്ടിലപുവം സെന്‍റ് മേരീസ് പള്ളിയിൽ. മക്കൾ: പവിത്രൻ, പ്രതിഭ, ബിനോയ്. ഭർത്താവ്: ബിനോയ് വർഗീസ് (വെള്ളാനിക്കര കാർഷിക സർവകലാശാല ജീവനക്കാരൻ).

സ്നേഹാദരവ് - 2025

ചാലക്കുടി: സെന്‍റ് മേരീസ് ഫൊറോന പള്ളി കുടുംബകൂട്ടായ്മ കേന്ദ്രസമിതിയുടെ വാർഷികം സ്നേഹദരവ് - 2025 നടത്തി. വികാരി ഫാ. വർഗീസ് പാത്താടൻ അധ്യക്ഷത വഹിച്ചു. മുരിങ്ങൂർ ഡിംസ് മീഡിയ കോളജ് ഡയറക്ടർ ഫാ. ആന്‍റണി വടക്കേക്കര ഉദ്ഘാടനം ചെയ്തു. ശാരീരിക വെല്ലുവിളികളെ അതിജീവിച്ച് എൽഎൽബി പാസായ ജോൺപോൾ കല്ലനെയും പന്ത്രണ്ടാം ക്ലാസ് ഉന്നതവിജയം കരസ്ഥമാക്കിയ സോളമൻ ജോഷിയെയും ഉന്നതവിജയം നേടിയവരെയും വിവാഹജൂബിലി ആഘോഷിക്കുന്നവരെയും 2022-25 വർഷത്തിലെ യൂണിറ്റ് ഭാരവാഹികളെയും ആദരിച്ചു. അസി. വികാരിമാരായ ഫാ. ക്രിസ്റ്റി ചിറ്റക്കര, ഫാ. അഖിൽ തണ്ടിയേക്കൽ, ഫാ. ഡിക്സൺ കാഞ്ഞൂക്കാരൻ, രൂപത കേന്ദ്രസമിതി സെക്രട്ടറി ജോജി പടിഞ്ഞാക്കര, ഫൊറോന കേന്ദ്രസമിതി പ്രസിഡന്‍റ് ജിയോ കൈതാരത്ത്, നടൻ അനിൽ ആന്‍റോ, കേന്ദ്രസമിതി പ്രസിഡന്‍റ് ജോഷി പുത്തരിക്കൽ, സെക്രട്ടറി ജോസി കൊട്ടേക്കാരൻ, ജോർജ് വാച്ചാലുക്കൽ, വർഗീസ് കാട്ടുപറമ്പിൽ തുടങ്ങിയവർ പ്രസംഗിച്ചു. നേരത്തേ ദിവ്യബലിക്ക് രൂപത വികാരി ജനറാൾ മോൺ. ജോളി വടക്കൻ കാർമികത്വം വഹിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]