ADVERTISEMENT

ADVERTISEMENT

അനാഥർക്ക് എല്ലാ ദിവസവും ഭക്ഷണമെത്തിച്ച് തേങ്കുറിശി ഗ്രാമപഞ്ചായത്ത്

കുഴൽമന്ദം: അതിദാരിദ്ര നിർമാർജന ഉപപദ്ധതിയിലുൾപ്പെടുത്തി അനാഥർക്ക് ഭക്ഷണമെത്തിച്ച് തേങ്കുറിശി ഗ്രാമപഞ്ചായത്ത്.

തേങ്കുറിശി ഗ്രാമപഞ്ചായത്ത് പരിധിയിലെ ആരുമില്ലാത്തതും അവശരുമായി വഴിയരികിലും മറ്റുമായി കണ്ടെത്തിയ അനാഥരായ ഏഴു പേർക്കാണ് ഭക്ഷണമെത്തിച്ചത്. സ്വന്തമായി വീടുണ്ടെങ്കിലും ഇവരിൽ പലരും വഴിയരികിലാണ് താമസിക്കുന്നത്. പദ്ധതി പ്രകാരം എല്ലാ ദിവസവും ഗ്രാമപഞ്ചായത്തിന്‍റെ നേതൃത്വത്തിൽ ഇവർക്ക് ഭക്ഷണമെത്തിച്ച് നൽകും. ഭക്ഷണ വിതരണോദ്ഘാടനം തേങ്കുറിശി ഗ്രാമപഞ്ചായത്ത് പ്രസിഡന്‍റ് ആർ. ഭാർഗവൻ നിർവഹിച്ചു.

വൈസ് പ്രസിഡന്‍റ് സ്വർണമണി അധ്യക്ഷയായി. വാർഡംഗം അജീഷ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ സജിനി, പഞ്ചായത്ത് ജോയിന്‍റ് ഡയറക്ടർ കെ.പി. വേലായുധൻ, സെക്രട്ടറി കെ. കിഷോർ, അസിസ്റ്റന്‍റ് സെക്രട്ടറി എം. സുധീർ, സ്റ്റാൻഡിംഗ് കമ്മിറ്റി അധ്യക്ഷന്മാർ, വാർഡംഗങ്ങൾ, ബ്ലോക്ക് ഹൗസിംഗ് ഓഫീസർ സലിം, വിഇഒ സുനിൽകുമാർ പങ്കെടുത്തു.

ADVERTISEMENT

നെന്മാറ മേഖലയിൽ പച്ചക്കറി വിളവെടുപ്പ് സജീവം

നെന്മാറ: നെന്മാറ, അയിലൂർ പഞ്ചായത്തുകളിൽ പച്ചക്കറിവിളവെടുപ്പ് സജീവം. വിഎഫ്പിസികെയുടെ കീഴിൽ പ്രവർത്തിക്കുന്ന സ്വാശ്രയ കർഷക സമിതികളുള്ള നെന്മാറ - വിത്തനശേരി, അയിലൂർ -പാളിയമംഗലം കേന്ദ്രങ്ങളിലൂടെയാണ് കർഷകർ പ്രധാനമായി പച്ചക്കറികൾ വിപണനം നടത്തുന്നത്. പ്രധാനമായും പാവൽ, പടവലം തുടങ്ങിയവയുടെ വിളവെടുപ്പാണ് തുടങ്ങിയത്. മഴയെത്തുടർന്ന് 25 ദിവസം വൈകിയാണ് വിളവിറക്കിയത്. തരക്കേടില്ലാത്ത വില ഇപ്പോൾ ലഭിക്കുന്നുണ്ടെന്നു കർഷകർ പറയുന്നു. നാടൻ പാവലിന് കിലോയ്ക്ക് 40 രൂപയാണ്. ഹൈബ്രിഡിന് 32 രൂപയും. പടവലത്തിന്‍റെ വില 10 രൂപ കുറഞ്ഞ് 30 രൂപയായത് കർഷകർക്ക് അടിയായി. പീച്ചിങ്ങ 40, പയർ 55 എന്നിങ്ങനെയാണ് നിലവിലെ വില. വിഎഫ്പിസികെയുടെ പ്രധാന സംഭരണ വിതരണ കേന്ദ്രങ്ങളായ പാളിയമംഗലം, വിത്തനശേരി എന്നിവിടങ്ങളിൽ നിന്ന് ആലുവ, കൊച്ചി, കോട്ടയം, തൃശൂർ, ആലപ്പുഴ, പെരുമ്പാവൂർ മാർക്കറ്റുകളിലേക്കും തുടങ്ങി ഗൾഫ് രാജ്യങ്ങളിലേക്കുള്ള കയറ്റുമതിക്കുമായി വിഎഫ്പിസികെ കേന്ദ്രങ്ങളിൽ നിന്നും കർഷകരിൽ നിന്ന് നേരിട്ടുമായി ദിവസേന അഞ്ചും ആറും ടൺ പച്ചക്കറിയാണ് കൊണ്ടുപോകുന്നത്. പ്രമുഖ വാണിജ്യ കേന്ദ്രങ്ങളിലെ കമ്മീഷൻ ഏജന്‍റുമാർ പാവൽ, പടവലം, പയർ എന്നിവ കർഷകരുടെ വിളവെടുപ്പ് കേന്ദ്രങ്ങളിൽ നിന്നുതന്നെ അതിരാവിലെ സംഭരിക്കുന്നുണ്ട്. മറ്റു കർഷകർ വിഎഫ്പിസികെ കേന്ദ്രങ്ങൾ മുഖേനയാണ് വ്യാപാരികൾക്ക് വിൽക്കുന്നത്. പയർ, പീച്ചിങ്ങ, ചുരയ്ക്ക, മുളക്, കുമ്പളം, മത്തൻ, വെണ്ട, വഴുതിന തുടങ്ങിയവയും അയിലൂർ നെന്മാറ പഞ്ചായത്തിലെ വിവിധ പ്രദേശങ്ങളിൽ ഒന്നാംവിള നെല്ല് ഒഴിവാക്കി വിളയിക്കുന്നുണ്ട്. അമിതമഴ വിളവെടുപ്പിനെയും ഉത്പാദനത്തെയും നേരിയ തോതിൽ ബാധിച്ചിട്ടുണ്ടെങ്കിലും തരക്കേടില്ലാത്ത വിളവ് ലഭിക്കുന്നുണ്ടെന്ന് കർഷകർ പറയുന്നു. വിത്തനശേരിയിൽ187 ഏക്കറിലാണ് പച്ചക്കറിക്കൃഷി. 180 കർഷകരുണ്ട്. അയിലൂർ പാളിയമംഗലത്ത് ഒരുമാസം മുൻപ് വിളവെടുപ്പ് തുടങ്ങി. ആഴ്ചയിൽ രണ്ടും മൂന്നും ദിവസം ഇടപെട്ട് പാവൽ, പടവലം, പയർ എന്നിവ വിളവെടുക്കുന്നുണ്ട്.

തെരുവുനായ്ക്കളുടെ ആക്രമണം : കർശനനടപടി ആവശ്യപ്പെട്ട് വ്യാപാരികൾ പ്രക്ഷോഭത്തിലേക്ക്‌

കല്ലടിക്കോട്‌: തെരുവ്‌നായ്ക്കളുടെ ആക്രമണം വ്യാപകമായതോടെ നടപടിയെടുക്കണമെന്നാവശ്യപ്പെട്ട്‌ കല്ലടിക്കോട്ടെ വ്യാപാരികൾ പ്രക്ഷോഭത്തിലേക്ക്‌. മേഖലയിൽ തെരുവ്‌നായ്ക്കളുടെ കടിയേറ്റ്‌ നിരവധിപേരാണ് ചികിത്സയിലുള്ളത്‌. കഴിഞ്ഞദിവസം സ്കൂളിൽ ഉച്ചഭക്ഷണം തയ്യാറാക്കാനെത്തിയ അമ്മയെ സഹായിക്കാൻ വന്ന മകളെ തെരുവ്‌നായ കടിച്ച്‌ പരിക്കേൽപ്പിച്ചിരുന്നു. കഴിഞ്ഞ ആഴ്ച കുന്നേമുറി ഉന്നതിയിൽ വളർത്തുപശുവിനെയടക്കം തെരുവ്‌നായ്ക്കൾ കടിച്ചിരുന്നു. രാത്രിയും പകലുമെന്നില്ലാതെ നായ്ക്കൾ കൂട്ടമായി റോഡിലൂടെ നടന്ന് കടികൂടുന്നതും കാൽനടയാത്രക്കാരുടേയും ഇരുചക്രവാഹനങ്ങളോടിക്കുന്നവരേയും ഓടിച്ചിട്ട്‌ കടിക്കുന്നതും പതിവാണ്. കാലത്ത്‌ മദ്രസയിൽ പോകുന്നവരേയും പള്ളിയിൽ പോകുന്നവരെയും നായ്ക്കൾ കടിക്കാൻ ഓടിക്കുന്നതും പതിവാണ്. നായ ഓടിക്കുമ്പോൾ കടയിലേക്ക്‌ ഓടിക്കയറുന്ന ആളുകളുടെ പിന്നാലെ കുരച്ചുകൊണ്ട്‌ വരുന്നതും സ്ഥിരമാണ്. തെരുവ്‌നായ്ക്കളെ പിടിച്ചുകൊണ്ടുപോയി നാട്ടിൽ സുരക്ഷിതത്വം ഉറപ്പുവരുത്തണെമെന്നാവശ്യപ്പെട്ട്‌ കേരള വ്യാപാരി വ്യവസായി ഏകോപന സമിതി കല്ലടിക്കോട്‌ യൂണിറ്റ്‌ അധികാരികൾക്ക്‌ നിവേദനം കൊടുക്കാനും ശക്തമായ പ്രക്ഷോഭത്തിലേക്ക്‌ നീങ്ങാനും തീരിമാനിച്ചിട്ടുണ്ട്‌. ഏകോപന സമിതി യൂണിറ്റ്‌ പ്രസിഡന്‍റ് അജോ മഞ്ഞാടിക്കൽ അധ്യക്ഷത വഹിച്ചു.

തെരുവുനായ്ക്കൾ വീട്ടുവളപ്പിലും ഭീതി പരത്തുന്നു

കൊഴിഞ്ഞാമ്പാറ: റോഡുകളിൽ മാത്രം തമ്പടിച്ചിരുന്ന തെരുവുനായ്ക്കൾ കൂട്ടമായി വീടുകളിലേക്കും വരുന്നത് ഭീതിപരത്തുന്നു. മുന്പ് കല്ലെറിഞ്ഞാൽ തിരിഞ്ഞോടിയിരുന്ന നായ്ക്കൾ ഇപ്പോൾ ആക്രമണത്തിനു മുന്നോട്ടു പാഞ്ഞുവരികയാണ്. വീടുകളിലെ ആട്, കോഴി ഉൾപ്പെടെ വളർത്തുമൃഗങ്ങൾക്കും ശുനകപ്പട ഭീഷണിയാവുന്നുണ്ട്. ഇത് കാരണം പലരും വളർത്തുമൃഗങ്ങളെ ഇരുമ്പ് കൂടുകളിലാണ് രാത്രി സമയങ്ങളിൽ കെട്ടുന്നത്. വീട്ടുവളപ്പിൽ കോഴികളെ തെരുവുനായ്ക്കൾ ആക്രമിച്ച സംഭവങ്ങൾ സ്ഥിരമാകുന്നു. വീടുകളിലെ വളർത്തുനായ്ക്കളേയും അലഞ്ഞുതിരിഞ്ഞു നടക്കുന്ന നായ്ക്കൾ കടിച്ച് പരിക്കേൽപ്പിക്കുന്നുണ്ട്. അതിനാൽ വളർത്തുമൃഗങ്ങൾക്ക് പേവിഷബാധ ഉണ്ടാകുമോ എന്ന ഭീതിയും നിലനിൽക്കുന്നു. കുട്ടികൾ വരാന്തകളിൽ കളിക്കുന്നതു പോലും രക്ഷിതാക്കൾ വിലക്കുകയാണ്. തെരുവുനായ്ക്കൾ ഇരുചക്ര വാഹനം ഓടിക്കുന്നവരേയും വെറുതെ വിടുന്നില്ല. ഒരു കിലോമീറ്റർ ദൂരം വരെ ഇവ പിറകേ ഓടിവരുന്ന സ്ഥിതിയുണ്ട്. ഇതുകാരണം വാഹനം മറിഞ്ഞ് യാത്രക്കാർക്ക് പരിക്കേൽക്കാറുമുണ്ട്.

ആരോഗ്യമന്ത്രിക്കെതിരേ കോൺഗ്രസ്, യൂത്ത് കോൺഗ്രസ് പ്രതിഷേധം

തച്ചന്പാറ: കോട്ടയം മെഡിക്കൽ കോളജ് കെട്ടിടം തകർന്നുവീണ് ഒരു ജീവൻ നഷ്ടപ്പെട്ടതിൽ ആരോഗ്യമന്ത്രിയുടെ കുറ്റകരമായ അനാസ്ഥയിൽ പ്രതിഷേധിച്ച് യൂത്ത് കോണ്‍ഗ്രസ് തച്ചന്പാറ മണ്ഡലം കമ്മിറ്റിയുടെ നേതൃത്വത്തിൽ തച്ചന്പാറയിൽ വീണാ ജോർജിന്‍റെ കോലം കത്തിച്ചു. യുഡിഎഫ് കോങ്ങാട് നിയോജകമണ്ഡലം ചെയർമാൻ പി.എസ്. ശശികുമാർ പ്രതിഷേധപ്രകടനം ഉദ്ഘാടനം ചെയ്തു. യൂത്ത് കോണ്‍ഗ്രസ് മണ്ഡലം പ്രസിഡന്‍റ് സച്ചു ജോസഫ് അധ്യക്ഷനായി. മണ്ഡലം പ്രസിഡന്‍റ് റിയാസ് തച്ചന്പാറ, പഞ്ചായത്ത് പ്രസിഡന്‍റ് നൗഷാദ് ബാബു, ബ്ലോക്ക് കോണ്‍ഗ്രസ് സെക്രട്ടറി രാമചന്ദ്രൻ, സക്കീർ, നൗഫൽ പൂന്തൊടി എന്നിവർ പ്രസംഗിച്ചു. വടക്കഞ്ചേരി: ആരോഗ്യവകുപ്പിന്‍റേയും ആരോഗ്യമന്ത്രിയുടെയും നിരുത്തരവാദിത്വപരമായ സമീപനത്തിനെതിരെ കോൺഗ്രസ് വണ്ടാഴി മണ്ഡലം കമ്മിറ്റിയുടെ നേതൃത്വത്തിൽ പ്രകടനം നടത്തി. കർഷക കോൺഗ്രസ്‌ ജില്ലാ സെക്രട്ടറി കെ.സി. അരവിന്ദാക്ഷൻ മാസ്റ്റർ ഉദ്ഘാടനം ചെയ്തു. കോൺഗ്രസ് മണ്ഡലം വൈസ് പ്രസിഡന്‍റ് വി. മനോജ്‌ അധ്യക്ഷത വഹിച്ചു. ഡിസിസി മെംബർ കെ. രാമകൃഷ്ണൻ, കോൺഗ്രസ് ബ്ലോക്ക്, മണ്ഡലം ഭാരവാഹികളായ എം. സുരേഷ്‌കുമാർ, പ്രമോദ് തണ്ടാലോട്, ഗഫൂർ മുടപ്പല്ലൂർ, എൻ.വിഷ്ണു, കെ.പി. കൃഷ്ണൻ, എ.എ. അബ്ദുൾ ലത്തീഫ്, എസ്. ലാലു യൂത്ത് കോൺഗ്രസ് മണ്ഡലം പ്രസിഡന്‍റ് ആർ. അനീഷ്, ഷൗക്കത്ത് വണ്ടാഴി, എം.പി. അരുൺ, കണ്ടമുത്തൻ എന്നിവർ പ്രസംഗിച്ചു. കൊഴിഞ്ഞാമ്പാറ: യുവതി മരിച്ച സംഭവം ആരോഗ്യമന്ത്രിയുടെയും സർക്കാരിന്‍റേയും അനാസ്ഥയാണെന്നും ഇതിനെതിരെ നടപടിയെടുക്കണമെന്നും ആവശ്യപ്പെട്ട് കൊഴിഞ്ഞാമ്പാറ മണ്ഡലം കോൺഗ്രസ് കമ്മിറ്റി പ്രതിഷേധിച്ചു. കൊഴിഞ്ഞാമ്പാറ ബസ് സ്റ്റാൻഡ് പരിസരത്ത് നടന്ന പ്രതിഷേധം ഡിസിസി ജനറൽ സെക്രട്ടറി കെ.എസ്. തണികാചലം ഉദ്ഘാടനം ചെയ്തു. മണ്ഡലം കമ്മിറ്റി പ്രസിഡന്‍റ് എം. രാമകൃഷ്ണൻ അധ്യക്ഷനായി. കെ.എം. സുരേഷ് ബാബു, എ.ടി. ശ്രീനിവാസ്, എസ്. ഷാഹുൽഹമീദ്, സി. ആനന്ദ്, എസ്.സലിം, എ. സെന്തിൽകുമാർ എച്ച്. ഹക്കീം എന്നിവർ പ്രസംഗിച്ചു. കൊല്ലങ്കോട്: കേരളത്തിലെ ആരോഗ്യ സംവിധാനത്തിന്‍റെ കെടുകാര്യസ്ഥതയിൽ പ്രതിഷേധിച്ച് പല്ലശന മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ തല്ലുമന്ദം മുതൽ ചിറാക്കോട് വരെ പ്രതിഷേധപ്രകടനവും ആരോഗ്യ വകുപ്പ് മന്ത്രി വീണ ജോർജിന്‍റെ കോലംകത്തിച്ച് പ്രതിഷേധിച്ചു. പ്രതിഷേധയോഗം ഡിസിസി ജനറൽ സെക്രട്ടറി അഡ്വ. സി.സി. സുനിൽ ഉദ്ഘാടനം ചെയ്തു. മണ്ഡലം പ്രസിഡന്‍റ് പി.എസ്. രാമനാഥൻ അധ്യക്ഷത വഹിച്ചു. യുഡിഎഫ് നെന്മാറ നിയോജകമണ്ഡലം ചെയർമാൻ എസ്. പത്മകുമാർ, യൂത്ത് കോൺഗ്രസ് നെന്മാറ നിയോജകമണ്ഡലം പ്രസിഡന്‍റ് മനു പല്ലാവൂർ, ബ്ലോക്ക് വൈസ് പ്രസിഡന്‍റ് സുധീർ പാറക്കളം, ഐഎൻടിയുസി റീജണൽ പ്രസിഡന്‍റ് എസ്. ഹനീഫ, ദളിത് കോൺഗ്രസ് നിയോജകമണ്ഡലം പ്രസിഡന്‍റ് കൃഷ്ണൻ പടിഞ്ഞാമുറി, ഗ്രാമപഞ്ചായത്ത് അംഗങ്ങളായ എസ്. അശോകൻ, ആർ. ജയനാരായണൻ, യൂത്ത് കോൺഗ്രസ് ജില്ലാ ജനറൽ സെക്രട്ടറി ശ്യാം ദേവദാസ്, എസ്.ബാബു, പി.സി. ശശീന്ദ്രൻ, വി.അനിൽ, വിഷ്ണു കുണ്ടുപറമ്പ് എന്നിവർ പ്രതിഷേധപ്രകടനത്തിന് നേതൃത്വം നൽകി. ആലത്തൂർ: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ദേശീയ മൈതാനിയിൽ പൊതുസമ്മേളനവും ടൗൺ ചുറ്റി പ്രകടനവും നടത്തി . മണ്ഡലം പ്രസിഡന്‍റ് ഹാരിസിന്‍റെ അധ്യക്ഷതയിൽ കൂടിയ ചടങ്ങിൽ ഐഎൻടിയുസി ജില്ലാ സെക്രട്ടറി തൃപ്പാളൂർ ശശി, ഷെരീഫ് സൈദ് മുഹമ്മദ്, ഷാഹിദ് ആലത്തൂർ, എ. അലാവുദ്ദീൻ, ജബ്ബാർ, ജയൻ, ശ്രീജിത്ത്, കുഞ്ഞഹമ്മദ്, ജാഫർ പൊട്ടിമട എന്നിവർ പ്രസംഗിച്ചു. ആലത്തൂർ‌: എരിമയൂർ മണ്ഡലം കോൺഗ്രസ്‌ കമ്മിറ്റിയുടെ ആഭിമുഖ്യത്തിൽ പ്രതിഷേധ പ്രകടനം നടത്തി. കെപിസിസി മെംബർ വി. സുദർശൻ ഉദ്ഘാടനം ചെയ്തു. മണ്ഡലം കോൺഗ്രസ്‌ പ്രസിഡന്‍റ് കെ.പി. മുരളീധരൻ അധ്യക്ഷത വഹിച്ചു. സംസ്കാര സാഹിതി നിയോജകമണ്ഡലം ചെയർമാൻ സജീവ് ചിറ്റിലഞ്ചേരി, ബ്ലോക്ക്‌ കോൺഗ്രസ്‌ കമ്മിറ്റി സെക്രട്ടറിമാരായ കെ.സി. രാമകൃഷ്ണൻ, കെ.കെ. രാധാകൃഷ്ണൻ, ടി. കെ. അപ്പു, സതീഷ് പുള്ളോട്, ഉണ്ണികൃഷ്ണൻ ആറുഴി, എ. കെ. വാസു, നാരായണൻ കൊള്ളക്കപ്പാടം, കെ. കൃഷ്ണൻ, പ്രകാശൻ, രാജൻ എന്നിവർ പങ്കെടുത്തു. ആലത്തൂർ: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധപ്രകടനം നടത്തി. മുൻ ബ്ലോക്ക് കോൺഗ്രസ് പ്രസിഡന്‍റ് സി. മാധവൻകുട്ടി പ്രതിഷേധപ്രകടനം ഉദ്ഘാടനം ചെയ്തു. മണ്ഡലം കോൺഗ്രസ് വൈസ് പ്രസിഡന്‍റ് വി. വിജയമോഹനൻ അധ്യക്ഷത വഹിച്ചു. വടക്കഞ്ചേരി ബ്ലോക്ക് കോൺഗ്രസ് വൈസ് പ്രസിഡന്‍റ് എൻ. രവി, പഞ്ചായത്ത് വൈസ് പ്രസിഡന്‍റ് ഉഷാദേവി സതീശൻ, പഞ്ചായത്ത് മെംബർ പി. കേശവദാസ്, മണ്ഡലം വൈസ് പ്രസിഡന്‍റ് പി. ശിവദാസൻ, ബ്ലോക്ക് കോൺഗ്രസ് സെക്രട്ടറി എസ്. സേതുമാധവൻ പ്രസംഗിച്ചു. കണ്ണന്പ്ര: കാരപ്പൊറ്റയിൽ നടന്ന പ്രകടനം ബ്ലോക്ക് പ്രസിഡന്‍റ് അഡ്വ.എം. ദിലീപ് ഉദ്ഘാടനം ചെയ്തു. മന്ധലം പ്രസിഡന്‍റ് സുദേവൻ അധ്യക്ഷത വഹിച്ചു. കെ.വി. ഗംഗാധരൻ, ജയരാജൻ കൊന്നഞ്ചേരി, സന്തോഷ് കുമാർ ആറുങ്കൽപ്പാടം, ഉമ്മലു ഹനീഫ, ടി.മോഹൻദാസ് പ്രസംഗിച്ചു. കിഴക്കഞ്ചേരി: കുണ്ടുകാട്ടിൽ നടന്ന പ്രതിഷേധ പ്രകടനവും യോഗവും ഡിസിസി സെകട്ടറി ഡോ. അർസലൻ നിസാം ഉദ്ഘാടനം ചെയ്തു. മണ്ഡലം പ്രസിഡന്‍റ് സി. ചന്ദ്രൻ അധ്യക്ഷത വഹിച്ചു. എം.കെ. ശ്രീനിവാസൻ, വി.ജെ. ജോസഫ്, ലീലാമ്മ ജോസഫ്, ടി.കെ. ഷാനവാസ്, കെ.കെ. പൗലോസ്, സുനിൽ എം.പോൾ, ബിജു മാസ്റ്റർ, സി.കെ. ഉസനാർ പ്രസംഗിച്ചു. വടക്കഞ്ചേരി: ടൗണിൽ ഡിസിസി സെക്രട്ടറി ഡോ. അർസലൻ നിസാം ഉദ്ഘാടനം ചെയ്തു. മണ്ഡലം വൈസ് പ്രസിഡന്‍റ് ബെന്നി പുതുശേരി അധ്യക്ഷത വഹിച്ചു. റെജി കെ. മാത്യു, കെ.മോഹൻദാസ്, കെ.ദേവദാസ്, ശ്രീനാഥ് വെട്ടത്ത്, ബാബു മാധവൻ, വി.എച്ച്. ബഷീർ, ഭാസ്കരൻ, വി.എ. മൊയ്‌തു, കാരയങ്കാട് ശിവരാമകൃഷ്ണൻ, നന്ദകുമാർ, ജോണി ഡയൻ, എ. ജോസ്, സുനിൽ ചുവട്ടുപാടം, പി.എസ്. മുജീബ് പ്രസംഗിച്ചു.

യൂത്ത് കോണ്‍ഗ്രസ് ഡിഎംഒ ഓഫീസിലേക്കു നടത്തിയ മാർച്ചിൽ സംഘർഷം

പാലക്കാട്: ആരോഗ്യമന്ത്രി രാജിവെക്കണമെന്ന് ആവശ്യപ്പെട്ട് യൂത്ത് കോണ്‍ഗ്രസ് ഡിഎംഒ ഓഫീസിലേക്ക് നടത്തിയ മാർച്ചിൽ സംഘർഷം. സമരക്കാർക്ക് നേരെ പോലീസ് ലാത്തിവീശി. ലാത്തിച്ചാർജിൽ ജില്ലാ പ്രസിഡന്‍റ് കെ.എസ്. ജയഘോഷ്, എൻ. സുബ്രഹ്മണ്യൻ, അന്പിളി മോഹൻദാസ്, സോനു പ്രണവ്, അഖിൽ ജോണ്‍, സുനിൽ ചുവട്ടുപാടം എന്നിവർക്ക് പരിക്കേറ്റു. ഉദ്ഘാടനത്തിന് ശേഷം മുദ്രാവാക്യം വിളിച്ച സമരക്കാരും പോലീസും തമ്മിൽ ഉന്തും തള്ളുമുണ്ടായി. തുടർന്നാണ് ലാത്തിവീശിയത്. നേരത്തെ ഡിസീസ് ഓഫീസിൽ നിന്നും ആരംഭിച്ച മാർച്ച് സിവിൽ സ്റ്റേഷന് മുന്പിൽ പോലീസ് തടഞ്ഞു. സമരം യൂത്ത് കോണ്‍ഗ്രസ് സംസ്ഥാന ജനറൽ സെക്രട്ടറി ഡോ. സോയ ജോസഫ് ഉദ്ഘാടനം ചെയ്തു. ആരോഗ്യമന്ത്രി വീണാ ജോർജ് രാജിവെക്കുംവരെ യൂത്ത് കോണ്‍ഗ്രസ് സമരം നടത്തുമെന്ന് അവർ വ്യക്തമാക്കി. ആരോഗ്യമേഖല തകർന്നതിന്‍റെ ഉത്തരവാദിത്വം മന്ത്രി വീണാ ജോർജിനും വകുപ്പിനുമാണ്. സിസ്റ്റം തകരാറിലായതുകൊണ്ടാണ് കോട്ടയത്ത് ദുരന്തം ഉണ്ടായത് എന്നാണ് മന്ത്രി തന്നെ വ്യക്തമാക്കിയത്. ഭരണപക്ഷത്തിന്‍റെ പിടിപ്പുകേടാണ് ഇത് ചൂണ്ടിക്കാണിക്കുന്നത്. ആരോഗ്യരംഗം അത്യാസന്നമായ നിലയിൽ എത്തിയതിന്‍റെ ഉത്തരവാദിത്വത്തിൽനിന്നും മന്ത്രിക്ക് ഒഴിഞ്ഞുമാറാനാവില്ല. ഭരണം നിർവഹിക്കാൻ കഴിയാത്ത ആരോഗ്യമന്ത്രി അറിയാവുന്ന പണിക്ക് പോകുന്നതാണ് നല്ലതെന്നും സോയാ ജോസഫ് പറഞ്ഞു. ജില്ലാ പ്രസിഡന്‍റ് കെ.എസ്. ജയഘോഷ് അധ്യക്ഷനായി. സംസ്ഥാന ഭാരവാഹികളായ ഷഫീഖ് അത്തിക്കോട്, പ്രതീഷ് മാധവൻ, വിനോദ് ചെറാട്, ജിതേഷ് നാരായണൻ, അരുണ്‍കുമാർ പാലക്കുറുശി, എൻ.സുബ്രഹ്മണ്യൻ, ജില്ലാ ഭാരവാഹികളായ ലിജിത്ത് ചന്ദ്രൻ, പി.ടി. അജ്മൽ, ശ്യാം ദേവദാസ്, രതീഷ് പുതുശേരി, സതീഷ് തിരുവാലത്തൂർ, ഇജാസ്, അന്പിളി മോഹൻദാസ്, എ. ഷഫീഖ്, വി.വത്സൻ, ഡി. ദിലീപ്, നിയോജകമണ്ഡലം പ്രസിഡന്‍റുമാരായ ടി.എം നഹാസ്, ജയശങ്കർ കൊട്ടാരത്തിൽ, വിനോദ് കളത്തൊടി, നസീർ മാസ്റ്റർ, നവാസ്, കെ.സാജൻ, മനു പല്ലാവൂർ, റിനാസ് യൂസഫ്, കഐസ്യു ജില്ലാ പ്രസിഡന്‍റ് നിഖിൽ കണ്ണാടി, സംസ്ഥാന ജനറൽ സെക്രട്ടറി അജാസ് കുഴൽമന്ദം, ഗൗജ വിജയകുമാർ എന്നിവർ നേതൃത്വം നൽകി.

ആരോഗ്യമന്ത്രി രാജിവയ്ക്കണം: രമേശ് ചെന്നിത്തല

പാലക്കാട്: കോട്ടയം മെഡിക്കൽ കോളജിലെ അപകടമരണത്തിന്‍റെ ധാർമിക ഉത്തരവാദിത്വം ഏറ്റെടുത്ത് ആരോഗ്യമന്ത്രി വീണാ ജോർജ് രാജിവെക്കണമെന്ന് കോണ്‍ഗ്രസ് വർക്കിംഗ് കമ്മിറ്റി മെംബർ രമേശ് ചെന്നിത്തല ആവശ്യപ്പെട്ടു. മഹിളാ കോണ്‍ഗ്രസ് ജില്ലാ പ്രസിഡന്‍റ് സിന്ധു രാധാകൃഷ്ണന്‍റെ നേതൃത്വത്തിൽ ജില്ലാ ആശുപത്രിയിലേക്ക് വാമൂടികെട്ടി സംഘടിപ്പിച്ച പ്രതിഷേധസമരം ഉദ്ഘാടനം ചെയ്ത് പ്രസംഗിക്കുകയായിരുന്നു ചെന്നിത്തല. കേരളത്തിലെ ആരോഗ്യമേഖല സന്പൂർണ പരാജയമാണെന്ന് അദ്ദേഹം ആരോപിച്ചു. കേരളത്തിലെ മെഡിക്കൽ കോളജുകളിലും ആശുപത്രികളും രോഗികളെ ചികിൽത്സിക്കാൻ വേണ്ടത്ര ഉപകരണങ്ങളോ മരുന്നുകളോ ഇല്ലാത്ത അവസ്ഥയായി മാറിയിരിക്കുന്നു. വരും ദിവസങ്ങളിൽ ഇടതു സർക്കാരിനെതിരെ സംസ്ഥാനത്തിലെ മുഴുവൻ ജനവിഭാഗങ്ങളെയും സംഘടിപ്പിച്ച് ശക്തമായ സമരം നടത്തുമെന്ന് അദ്ദേഹം പറഞ്ഞു. സമരത്തിൽ വി.എസ്. വിജയരാഘവൻ, കെപിസിസി സെക്രട്ടറി പി.വി. രാജേഷ്, ഡിസിസി സെക്രട്ടറി കെ.സി. പ്രീത്, മഹിളാ കോണ്‍ഗ്രസ് ജില്ലാ ഭാരവാഹികളായ പി.പി. പാഞ്ചാലി, ടി.ഡി. ഗീത ശിവദാസ്, കെ.എ.ഷീബ, ബിന്ദു സുരേഷ് കുമാർ, പ്രേമ രാജേന്ദ്രൻ, പി.ജെ. മോളി, പ്രകാശിനി സുന്ദരൻ, പ്രിയ ബാബു, ഡി.വിജയലക്ഷ്മി, പുഷ്പവല്ലി നന്പ്യാർ, ഉഷ പാലാട്ട്, സാവിത്രി വൽസൻ, പ്രകാശിനി സുന്ദരൻ, യു. പ്രസന്ന, രാജി ദിലീപ്, ബി. വൃന്ദ, കെ.വി. പാർവതി, കെ.എ. സുഭദ്ര, ശാരദ തുളസിദാസ്, പി. പ്രതിഭ, കോമളം, എം. തങ്കം, റോജ സുനിൽ, വാഹിദ, ശ്രീജ സജീവ്, സുജാത കൃഷ്ണദാസ്, അച്ചാമ്മ, സുനിത, ഉമൈബാൻ, കെ. സുലോചന, അനുപമ പ്രശോഭ, മിനി ബാബു, ശാന്ത ശിവൻ, ബി. ഗൗതമി, ജയമാല, ജയകുമാരി, ബിന്ദു മേലാർകോട് എന്നിവർ നേതൃത്വം നൽകി. അഞ്ചുവിളക്കിന് മുന്നിൽനിന്ന് തുടങ്ങിയ സമരം ജില്ലാ ആശുപത്രിക്ക് മുന്നിൽ സമാപിച്ചു.

ശ്രീകുറുംബ ട്രസ്റ്റിന്‍റെ സമൂഹവിവാഹത്തിൽ 13 യുവതികൾകൂടി മംഗല്യവതികളായി

വടക്കഞ്ചേരി: പി.എൻ.സി. മേനോൻ ചെയർമാനായുള്ള ശ്രീ കുറുംബ ട്രസ്റ്റ് നടത്തിയ മുപ്പതാമത് സ്ത്രീധനരഹിത സമൂഹവിവാഹത്തിൽ 13 യുവതികൾ കൂടി മംഗല്യവതികളായി. ട്രസ്റ്റിന്‍റെ മൂലങ്കോടുള്ള കല്യാണ മണ്ഡപത്തിൽ നടന്ന സമൂഹവിവാഹ ചടങ്ങുകൾക്ക് തുടക്കമിട്ട് കെ.ഡി. പ്രസേനൻ എംഎൽഎ തിരിതെളിയിച്ചു. ശോഭ മേനോൻ, മകളും ശോഭ ഗ്രൂപ്പ് ഡയറക്ടറുമായ ബിന്ദു മേനോൻ എന്നിവർ ചടങ്ങുകൾക്ക് നേതൃത്വം നൽകി. പി.പി.സുമോദ് എംഎൽഎ, മുൻ മന്ത്രിമാരായ കെ.ഇ. ഇസ്മയിൽ, വി.സി. കബീർ മാസ്റ്റർ, മുൻ എംഎൽഎ സി.ടി. കൃഷ്ണൻ, കിഴക്കഞ്ചേരി ഗ്രാമപഞ്ചായത്ത് പ്രസിഡന്‍റ് കവിത മാധവൻ, എഡിജിപി പി. വിജയൻ, കണ്ണമ്പ്ര ഗ്രാമപഞ്ചായത്ത് വൈസ് പ്രസിഡന്‍റ് കെ.ആർ. മുരളി, ഗ്രാമപഞ്ചായത്തംഗം ആർ. പ്രമോദ്, സിപിഐ ജില്ലാ സെക്രട്ടറി കെ.പി. സുരേഷ് രാജ്, ട്രസ്റ്റി എ.ആർ. കുട്ടി, ട്രസ്റ്റ് സീനിയർ മാനേജർ പി. പരമേശ്വരൻ, സാമൂഹിക ശാക്തീകരണ വിഭാഗം മാനേജർ എം. ഹരിദാസ് തുടങ്ങിയവർ പങ്കെടുത്തു. 2003 ൽ ട്രസ്റ്റിന്‍റെ നേതൃത്വത്തിൽ ആരംഭിച്ച സമൂഹ വിവാഹത്തിൽ 710 യുവതികൾ ഇതിനകം കുടുംബ ജീവിതത്തിലേക്ക് പ്രവേശിച്ചു.

നൂറുകണക്കിന് വവ്വാലുകൾ; പരാതിപ്പെട്ടിട്ടും നടപടി ഉണ്ടായില്ല

ശ്രീകൃഷ്ണപുരം: നിപ്പ ബാധയുമായി ബന്ധപ്പെട്ട് ആരോഗ്യ വകുപ്പിനുമെതിരെ പരാതിയുമായി നാട്ടുകാർ. നിപ്പ ബാധിച്ച് ചികിത്സയിൽ കഴിയുന്ന യുവതിയുടെ വീടിനു തൊട്ടുള്ള റബർതോട്ടത്തിൽ വസിക്കുന്നത് നൂറുകണക്കിന് വവ്വാലുകളാണ്. ഇക്കാര്യം പലവട്ടം അധികൃതരുടെ ശ്രദ്ധയിൽപ്പെടുത്തിയെന്നും യാതൊരു നടപടിയും ഉണ്ടായില്ലെന്ന് നാട്ടുകാർ പരാതിപ്പെടുന്നു. മഞ്ചേരി മെഡിക്കൽ കോളജിലെ വിദഗ്ധസംഘം സ്ഥലം പരിശോധിച്ചു. ഇന്ന് സംഘം നിപ്പ രോഗലക്ഷണങ്ങൾ രണ്ടുമാസത്തിനിടെ ആർക്കെങ്കിലും ഉണ്ടായിരുന്നോ എന്നും പരിശോധിക്കും. 75 അംഗ സംഘമാണ് പരിശോധന നടത്തുക. കരിമ്പുഴ പഞ്ചായത്തിൽ അതീവജാഗ്രത ശ്രീകൃഷ്ണപുരം: തച്ചനാട്ടുകര പഞ്ചായത്തിലെ കിഴക്കുംപുറം പ്രദേശവുമായി ബന്ധപ്പെട്ട് കിടക്കുന്ന കരിമ്പുഴ ഗ്രാമപഞ്ചായത്തിലെ ആറ്റാശേരി,പനാംകുന്ന്, കൊടുനോട് കരിമ്പന വരമ്പ്, ഇറക്കിങ്ങൽ ഭാഗങ്ങളിൽ അതീവജാഗ്രത നിർദേശവുമായി പഞ്ചായത്ത്, ആരോഗ്യവകുപ്പ്, പോലീസ് എന്നിവർ രംഗത്ത്. പഞ്ചായത്തിലെ രണ്ടു വാർഡുകൾ കണ്ടെയ്മെന്‍റ് സോൺ ആയി മാറിയതിനെ തുടർന്ന് കോട്ടപ്പുറം പ്രാഥമികാരോഗ്യകേന്ദ്രത്തിന്‍റെ നേതൃത്വത്തിൽ ഫീൽഡ് തല നിരീക്ഷണ പ്രവർത്തനങ്ങൾ നടത്തി. ഹെൽത്ത് ഇൻസ്പെക്ടർമാർ, ജൂണിയർ പബ്ലിക് ഹെൽത്ത് നേഴ്സുമാർ, മിഡ്‌ ലെവൽ സർവീസ് പ്രൊവൈഡർമാർ, ആശാ പ്രവർത്തകർ, രാഷ്ട്രീയപ്രവർത്തകർ അടക്കമുള്ള വിവിധ സന്നദ്ധ സംഘടന പ്രവർത്തകർ ഉൾപ്പെട്ട 12 ടീമുകളായാണ് പരിശോധന നടത്തിയത്. ആറ്റാശേരി, ചോലകുർശി വാർഡുകളിലെ 412 വീടുകളിൽ സന്ദർശനം നടത്തി ഏതെങ്കിലും തരത്തിലുള്ള അസുഖബാധിതർ ഉണ്ടോയെന്ന് എന്ന് കണക്കെടുപ്പ് നടത്തി. നിപ്പ ബോധവത്കരണവും നടത്തി. കരിമ്പുഴ ഒന്ന് വില്ലേജിൽ പഞ്ചായത്തിന് നേതൃത്വത്തിൽ മൈക്കിൽ വിളംബരം നടത്തി. രണ്ടു വാർഡുകളിലേക്കുമുള്ള പ്രവേശന കവാടങ്ങൾ പൂർണമായും അടച്ചു. കരിമ്പുഴ ഗ്രാമപഞ്ചായത്തിൽ നേരിട്ട് സമ്പർക്കപട്ടികയിൽ ഉള്ള ആരോഗ്യ പ്രവർത്തകയായ യുവതി ക്വാറന്‍റൈനിൽ തുടരുകയാണ്. നിപ്പ ബാധിച്ച യുവതി മണ്ണാർക്കാട് നഴ്സിംഗ് ഹോമിൽ ചികിത്സയ്ക്കായി എത്തിയപ്പോഴാണ് യുവതിയുമായി സമ്പർക്കം ഉണ്ടായത്. ഇവർക്ക് രോഗലക്ഷണങ്ങൾ ഇല്ലെന്ന് ഹെൽത്ത് ഇൻസ്പെക്ടർ സുരേഷ് പറഞ്ഞു.

യുവമോർച്ചയുടെ നേതൃത്വത്തിൽ ശവമഞ്ചവുമായി പ്രതിഷേധം

പാലക്കാട്: ആരോഗ്യമന്ത്രി വീണാ ജോർജിന്‍റെ രാജി ആവശ്യപ്പെട്ട് യുവമോർച്ചയുടെ നേതൃത്വത്തിൽ ഡിഎംഒ ഓഫീസിലേക്ക് ശവമഞ്ചവുമായി പ്രതിഷേധം സംഘടിപ്പിച്ചു. ബിജെപി ജില്ലാ അധ്യക്ഷൻ പ്രശാന്ത് ശിവൻ പ്രതിഷേധം ഉദ്ഘാടനം ചെയ്തു. യുവമോർച്ച ജില്ലാ ജനറൽ സെക്രട്ടറി കെ. ഷിനു, ജില്ലാ സെക്രട്ടറി വിഷ്ണു ഇടക്കാട്ട്, യുവമോർച്ച നേതാക്കളായ കെ.ആർ. ശ്രേയസ്, അഞ്ജിത്ത് കണ്ണാടി, മുകേഷ് പള്ളത്തേരി, നന്ദു ആൽത്തറ, ബിജെപി ജില്ലാ ജനറൽ സെക്രട്ടറിമാരായ എ.കെ. ഓമനക്കുട്ടൻ, എൻ. ഷണ്മുഖൻ, ജില്ലാ ഉപാധ്യക്ഷ·ാരായ ജി. പ്രഭാകരൻ, സി. മധു, എം. ശശികുമാർ, ആർ.ജി. മിലൻ എന്നിവർ നേതൃത്വം നൽകി.

മേഴ്സി കോളജ് സ്റ്റാർട്ടപ്പ് സെൽ ഉദ്ഘാടനം ചെയ്തു

പാലക്കാട്: മേഴ്സി കോളജിൽ ഇ.ഡി. ക്ലബിന്‍റെ ആഭിമുഖ്യത്തിൽ സ്റ്റാർട്ടപ്പ് സെൽ ഉദ്ഘാടനം ചെയ്തു. വിനീത ജോസഫ് ഉദ്ഘാടനം ചെയ്തു. പ്രിൻസിപ്പൽ സിസ്റ്റർ ഡോ.എൻ.എം. ലൗലി അധ്യക്ഷത വഹിച്ചു. കോയന്പത്തൂർ ഓൾമൈറ്റി ജെംസ് ഗ്രൂപ്പ് ഫൗണ്ടർ ഡോ. വിജയരാജ, ലേണ്‍ ടെക്ക് ഐടി അക്കാദമി മാനേജിംഗ് ഡയറക്ടർ രാജേഷ് ബാബു നായർ, കോയന്പത്തൂർ നിർമൽ കോളജ് ഫോർ വിമൻ പ്രിൻസിപ്പൽ സിസ്റ്റർ ഡോ.മരിയ ഫാബില, ഇൻസ്റ്റന്‍റ് ബുക്ക്സ് ഫൗണ്ടർ അജി ഫ്രാൻസിസ് തുടങ്ങിയവർ പ്രസംഗിച്ചു. ഇ.ഡി. ക്ലബ് കോ- ഓർഡിനേറ്റർ ജെൻസി ബേബി സ്വാഗതവും അധ്യാപിക ഡോ. സി.എസ്. ജിംസി നന്ദിയും പറഞ്ഞു.

കണ്ണമ്പ്രയിൽ കളംനിറഞ്ഞ് സൂംബ ഡാൻസ്

വടക്കഞ്ചേരി: അനുദിനം വ്യായാമം, ആരോഗ്യമുള്ള ജനത എന്ന ആശയവുമായി തരൂർ നിയോജകമണ്ഡലത്തിൽ വിവിധ പഞ്ചായത്തുകളിലെ കളിക്കളങ്ങൾ കേന്ദ്രീകരിച്ച് പി.പി. സുമോദ് എംഎൽഎ ആരംഭിച്ച ഹെൽത്തി തരൂരിന്‍റെ കണ്ണമ്പ്ര ഗ്രാമപഞ്ചായത്ത് ടീം അംഗങ്ങൾ സൂംബ എയ്റോബിക് എക്സസൈസ് കണ്ണമ്പ്ര പഞ്ചായത്ത് ഗ്രൗണ്ടിൽ നടത്തി. ഹെൽത്തി തരൂരിന്‍റെ ഭാഗമായി ദിവസവുമുള്ള വ്യായാമത്തിൽ പങ്കെടുക്കാൻ താത്പര്യമുള്ളവർക്ക് രാവിലെ ആറിന് കണ്ണമ്പ്ര ഗ്രാമപഞ്ചായത്ത് കളിക്കളത്തിൽ എത്തിച്ചേരണമെന്ന് ഹെൽത്തി തരൂർ അധികൃതർ അറിയിച്ചു.

പെരുമാട്ടിയിൽ ഹൈടെക് മാർക്കറ്റ് യാഥാർഥ്യമാകുന്നു

പാലക്കാട്: പ്രാദേശിക കാർഷികോത്പന്നങ്ങൾക്ക് പുതിയ വിപണി സാധ്യതകളും കർഷകർക്ക് മികച്ച വരുമാനവും ലക്ഷ്യമിട്ട് പെരുമാട്ടി ഗ്രാമപഞ്ചായത്ത് ആരംഭിക്കുന്ന ഹൈടെക് മാർക്കറ്റ് ആൻഡ് അഗ്രോ പ്രോസസിംഗ് യൂണിറ്റിന്‍റെ ഒന്നാംഘട്ട നിർമാണോദ്ഘാടനം നാളെ നടക്കും. പ്ലാച്ചിമടയിൽ രാവിലെ 10.30ന് നടക്കുന്ന പരിപാടിയിൽ മന്ത്രി എം.ബി. രാജേഷ് ഉദ്ഘാടനം നിർവഹിക്കും. മന്ത്രി കെ. കൃഷ്ണൻകുട്ടി അധ്യക്ഷനാവും.കെ. രാധാകൃഷ്ണൻ എംപി, കെ. ബാബു എംഎൽഎ, ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ, ജില്ലാ കളക്ടർ ജി. പ്രിയങ്ക, ചിറ്റൂർ ബ്ലോക്ക് പഞ്ചായത്ത് പ്രസിഡന്‍റ് എ. സുജാത എന്നിവർ പങ്കെടുക്കും. 2022-23 സാന്പത്തിക വർഷത്തെ ബജറ്റിൽ ഉൾപ്പെടുത്തി 10 കോടി രൂപ വിനിയോഗിച്ചാണ് ഒന്നാംഘട്ട നിർമാണ പ്രവർത്തനം നടത്തുന്നത്. കർഷകർക്ക് ന്യായവില ഉറപ്പാക്കാനും കാർഷിക മേഖലയ്ക്ക് ഉണർവേകാനുമാണ് പദ്ധതി ലക്ഷ്യമിടുന്നത്. 2014-15 സാന്പത്തിക വർഷത്തിൽ 1.15 കോടി രൂപ മുടക്കി മൂലത്തറ വില്ലേജിലെ കന്പാലത്തറയിൽ അഞ്ച് ഏക്കർ സ്ഥലം ഗ്രാമപഞ്ചായത്ത് ഇതിനായി വാങ്ങിയിരുന്നു. ഈസ്ഥലത്ത് വൈദ്യുതി, റോഡ് തുടങ്ങിയ അടിസ്ഥാന സൗകര്യങ്ങൾ നിലവിൽ ലഭ്യമാണ്. പ്രാദേശിക കർഷകരുടെ ഉന്നമനം, ഗുണമേന്മയുള്ള കാർഷിക ഉത്പന്നങ്ങളുടെ ഉത്പാദനം, കർഷകരുടെ ജീവിതനിലവാരം മെച്ചപ്പെടുത്തൽ, കാർഷിക വിഭവങ്ങൾ അന്താരാഷ്ട്ര നിലവാരത്തിൽ കയറ്റുമതി ചെയ്യാനുള്ള സാധ്യതകൾ എന്നിവയെല്ലാം ഈ മാർക്കറ്റിലൂടെ ലക്ഷ്യമിടുന്നു. ഉൗരാളുങ്കൽ ലേബർ കോണ്‍ട്രാക്ട് കോ-ഓപ്പറേറ്റീവ് സൊസൈറ്റിക്കാണ് നിർമാണ ചുമതല.

പുതുപ്പരിയാരത്തു റെയിൽ ഫെൻസിംഗിന് 18 കോടിയുടെ പ്രപ്പോസൽ സമർപ്പിക്കും

പാലക്കാട്: നിരന്തരം വന്യമൃഗശല്യം അനുഭവപ്പെടുന്ന പഞ്ചായത്തുകളിൽ ഒന്നായ പുതുപ്പരിയാരത്ത് റെയിൽ ഫെൻസിംഗിനായി 18 കോടി രൂപയുടെ പ്രൊപ്പോസൽ സർക്കാരിന് സമർപ്പിക്കും. മന്ത്രി കെ.കൃഷ്ണൻകുട്ടിയും ജില്ലാ കളക്ടർ ജി. പ്രിയങ്കയും വനംവകുപ്പ് മന്ത്രിയുമായി ചർച്ച നടത്തിയതിന്‍റെ അടിസ്ഥാനത്തിൽ വനംമന്ത്രി എ.കെ.ശശീന്ദ്രൻ ആവശ്യപ്പെട്ട പ്രകാരമാണ് സർക്കാരിന് പ്രപ്പോസൽ സമർപ്പിക്കുക. ജില്ലാ പഞ്ചായത്ത് കോണ്‍ഫറൻസ് ഹാളിൽ നടന്ന ജില്ലയിലെ വന്യജീവി ആക്രമണ ലഘൂകരണ ജില്ലാതല നിയന്ത്രണ സമിതി അവലോകന യോഗത്തിലാണ് പ്രപ്പോസൽ സംബന്ധിച്ച് മന്ത്രി അറിയിച്ചത്. മന്ത്രി കെ. കൃഷ്ണൻകുട്ടിയുടെ അധ്യക്ഷതയിലാണ് യോഗം ചേർന്നത്. വന്യമൃഗശല്യം അധികരിച്ചു നിൽക്കുന്ന അകത്തേത്തറ, പുതുപ്പരിയാരം, മലന്പുഴ, മുണ്ടൂർ, പുതുശേരി പഞ്ചായത്ത് ഭാരവാഹികളും ഫോറസ്റ്റ് അധികൃതരും മറ്റ് ഉദ്യോഗസ്ഥരും ഉൾപ്പെട്ട യോഗമാണ് വിളിച്ചുചേർത്തത്. വന്യമൃഗാക്രമണ പ്രതിരോധത്തിനായി ജനജാഗ്രത സമിതിയ്ക്ക് പുറമെ പഞ്ചായത്ത് തലത്തിൽ പോലീസ്് -വനംവകുപ്പ് സംഘം രൂപീകരിക്കണം. ഫോറസ്റ്റ് റേഞ്ച് തലത്തിൽ പരിശീലനം നൽകിയ പ്രദേശികമായി ലഭ്യമാകുന്ന യുവാക്കളായ ഷൂട്ടേഴ്സിനെ ഉൾപ്പെടുത്തി പാനൽ രൂപീകരിക്കണം. യൂക്കാലിപ്സ് മരങ്ങൾക്ക് പകരമായി പ്ലാവ് പോലുളള ഫലവൃക്ഷങ്ങൾ നട്ടു പിടിപ്പിക്കാനായാൽ ഒരു പരിധിവരെ മൃഗങ്ങൾ നാട്ടിലിറങ്ങുന്നതിന് പരിഹാരമാകും. വേഗത്തിൽ കായ്ക്കുന്ന ഫലവൃക്ഷതൈകൾ നടുന്നതിന് പ്രാധാന്യം നൽകണമെന്നും മന്ത്രി നിർദേശിച്ചു. ഒലവക്കോട് റേഞ്ചിലെ മുണ്ടൂർ സെക്ഷൻ പരിധിയിൽ ജനവാസമേഖലകളിലെ അടിക്കാടുകൾ വെട്ടിത്തെളിച്ചിട്ടുണ്ട.് തെരുവ് വിളക്കുകൾക്കായി 20 ലക്ഷം രൂപയുടെ പ്രൊപ്പോസൽ നൽകിയിട്ടുണ്ട്. വൈദ്യുതിലൈൻ വലിക്കാൻ സാധിക്കാത്ത വന്യമൃഗശല്യമുളള പട്ടികജാതിവർഗ കോളനികളിലുൾപ്പെടെ സോളാർ ലൈറ്റുകൾ സ്ഥാപിക്കാവുന്നതാണെന്ന് മന്ത്രി അറിയിച്ചു. സോളാർ സാധ്യമാകാത്ത പ്രദേശങ്ങളിൽ സിസി ടിവി സ്ഥാപിക്കണം. വന്യമൃഗശല്യം നേരിടുന്ന ഇടങ്ങളിൽ സോളാർ ഫെൻസിംഗ് ഉറപ്പാക്കാനും മന്ത്രി നിർദേശിച്ചു. സോളാർ ഫെൻസിംഗിനായി ഓരോ പഞ്ചായത്തും ഫണ്ട്മാറ്റി വെയ്ക്കണമെന്നും മന്ത്രി നിർദേശിച്ചു. വൈദ്യുതി ലൈൻ വലിക്കാൻ സാധിക്കാത്ത വന്യമൃഗശല്യമുളള പട്ടികജാതിവർഗ കോളനികളെ കുറിച്ച് വിവരശേഖരണം നടത്താനും മന്ത്രി അറിയിച്ചു. ഡിവിഷണൽ ഫോറസ്റ്റ് എമർജൻസി ഓപ്പറേഷൻ സെന്‍ററിന്‍റെയും ജില്ലാ എമർജൻസി ഓപ്പറേഷൻ സെന്‍ററിന്‍റെയും ഏകോപനം വഴി കൃത്യമായി വിവരങ്ങൾ ലഭിക്കുന്നുണ്ടെന്ന് ജില്ലാ കളക്ടർ ജി. പ്രിയങ്ക അറിയിച്ചു. 67 തദ്ദേശ സ്വയംഭരണ സ്ഥാപനങ്ങൾ ഇതുവരെ ജനജാഗ്രത സമിതി രൂപീകരിച്ചിട്ടുണ്ട്.ഇനിയും രൂപീകരിക്കാത്ത പഞ്ചായത്തുകൾ ജനജാഗ്രത സമിതികൾ ജൂലൈ 15നകം രൂപീകരിക്കണമെന്ന് ജില്ലാ കളക്ടർ നിർദ്ദേശിച്ചു. കാട്ടാന ആക്രമണം മൂലം മരിച്ച അലൻ ജോസഫ്, കുമാരൻ എന്നിവരുടെ കുടുംബങ്ങൾക്ക് അഞ്ച് ലക്ഷം രൂപ വീതം കൈമാറിയിട്ടുണ്ടെന്ന് ജില്ല കളക്ടർ അറിയിച്ചു. കാട്ടാന ആക്രമണം മൂലം കിടപ്പിലായ ആന്‍റണിയുടെ വീട്ടിലേക്കുള്ള വഴി സഞ്ചാര യോഗ്യമാക്കാനായി തൊഴിലുറപ്പ് പദ്ധതിയിൽ ഉൾപ്പെടുത്തി ഡിഎഫ്ഒ യുടെ നേതൃത്വത്തിൽ പ്രവൃത്തികൾ ആരംഭിക്കാൻ നിർദേശം നൽകി. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ, പാലക്കാട് ഡിഎഫ്ഒ രവികുമാർ മീണ, പഞ്ചായത്ത് പ്രതിനിധികൾ, വനം വകുപ്പ്, വിവിധ വകുപ്പ് ഉദ്യോഗസ്ഥർ എന്നിവർ പങ്കെടുത്തു.

മാർ ഈവാനിയോസ് അനുസ്മരണവും പദയാത്രയും ഇന്ന്

കല്ലടിക്കോട്: പുനരൈക്യ പ്രസ്ഥാനത്തിന്‍റെ പ്രണേതാവും മലങ്കര സുറിയാനി കത്തോലിക്ക സഭയുടെ സ്ഥാപകനുമായ മാർ ഈവാനിയോസിന്‍റെ 72- ാമത് ഓർമപ്പെരുന്നാൾ കരിമ്പ മേഖലയുടെ ആഭിമുഖ്യത്തിൽ ഇന്ന് കരിമ്പ സെന്‍റ് മേരീസ് മലങ്കര സുറിയാനി കത്തോലിക്ക തീർഥാടന പള്ളി അങ്കണത്തിൽ നടക്കും. കൂരിയ ബിഷപ് ആന്‍റണി മാർ സിൽവാനോസ് എപ്പിസ്കോപ്പ തിരുനാൾ ദിനത്തിൽ മുഖ്യ കാർമികത്വം വഹിക്കും. പദയാത്ര കാഞ്ഞിക്കുളം ഹോളി ഫാമിലി പള്ളി അങ്കണം, ചിറക്കൽപ്പടി സെന്‍റ് ജോർജ് ദേവാലയം എന്നിവിടങ്ങളിൽ നിന്നും ആരംഭിച്ച ്നിർമലഗിരി മരിയൻ തീർഥാടനപള്ളിയിൽ സംഗമിക്കും. തുടർന്ന് വിശുദ്ധ കുർബാനയും അനുസ്മരണ യോഗവും നടക്കും. അനുസ്മരണയോഗത്തിൽ സൺഡേ സ്കൂളിലും പൊതു പരീക്ഷകളിലും മറ്റ് മേഖലകളിൽ മികച്ച നേട്ടങ്ങൾ കൈവരിച്ചവരെയും ആദരിക്കും. സമാപന ആശീർവാദത്തിനുശേഷം സ്നേഹവിരുന്നും നടക്കും.

യുവാവിനു വെട്ടേറ്റു

ഒറ്റപ്പാലം: തൃക്കടീരി വീരമംഗലത്ത് യുവാവിന് നേരെ മുഖംമൂടി ആക്രമണം. കുറ്റിക്കോട് ഉറവകുണ്ടിൽ ഷംസുദീന്‍റെ മകൻ സിയാനുനേരെയാണ് ബൈക്കിൽ എത്തിയ രണ്ടംഗസംഘം ആക്രമണം അഴിച്ചുവിട്ടത്. കൈക്കും കാലിനും വെട്ടേറ്റ സിയാനെ മാങ്ങോട്ട് സ്വകാര്യ ആശുപത്രിയിൽ പ്രവേശിപ്പിച്ചു. കഴിഞ്ഞദിവസം രാത്രി 9 മണിയോടുകൂടിയാണ് സംഭവം. വീടിനടുത്തുള്ള കനാൽ ഭാഗത്ത് ഇരിക്കുകയായിരുന്ന സിയാന് നേരെ മുഖംമൂടി ധരിച്ച് എത്തിയ രണ്ടംഗസംഘം ആക്രമണം നടത്തുകയായിരുന്നു. കൂടെയുണ്ടായിരുന്ന സുഹൃത്ത് ഓടി രക്ഷപ്പെട്ടു. പോലീസ് കേസ് എടുത്ത് അന്വേഷണം ആരംഭിച്ചു.

നെല്ലിയാമ്പതിയിലേക്ക് 33 കെവി വൈദ്യുതി ടവർ ലൈൻ സ്ഥാപിക്കുന്നതിനായി പദ്ധതി

നെല്ലിയാമ്പതി: നെല്ലിയാമ്പതിയുടെ വൈദ്യുതി പ്രതിസന്ധിക്ക് പരിഹാരം കാണാൻ നിലവിലുള്ള ലൈനുകൾക്ക് പകരം 33 കെവിയുടെ ടവർലൈൻ നിർമിക്കാൻ കെഎസ്ഇബി അധികൃതർ പരിശോധനയും സർവേയും നടത്തി. നിലവിൽ കൊല്ലങ്കോട് നിന്ന് സീതാർകുണ്ട് വഴിയാണ് പുലയംപാറ ഊത്തുകുഴി റോഡിലെ പവർ സ്റ്റേഷനിലേക്ക് വൈദ്യുതി എത്തുന്നത്. നെല്ലിയാമ്പതിയിലേക്ക് നിലവിൽ സിമന്‍റ്, മരം ഉപയോഗിച്ചുള്ള ഹൈടെൻഷൻ ലൈൻ മുഖേനയാണ് വൈദ്യുതി എത്തിക്കുന്നത്. കെഎസ്ഇബി പാലക്കാട് സബ് ഡിവിഷൻ അസി. എൻജിനീയർ രഞ്ജിത്തിന്‍റെ നേതൃത്വത്തിലുള്ള സംഘമാണ് നെല്ലിയാമ്പതിയിൽ എത്തി തടസമില്ലാതെ വൈദ്യുതി എത്തിക്കുന്നതിനായി ഹൈടെൻഷൻ ടവർലൈൻ സ്ഥാപിക്കുന്നതിനായി പ്രാഥമികസാധ്യതകൾ പരിശോധിച്ചത്. സീതാർകുണ്ട് വ്യൂ പോയിന്‍റ് ഭാഗത്തുനിന്നും താഴ്ഭാഗത്തേക്കുള്ള ചെരിവ് സംഘം സന്ദർശിച്ച് വിലയിരുത്തി. ജിപിഎസ് മുഖനേ സ്ഥലം പരിശോധന നടത്തി. തുടർന്ന് ഡ്രോൺ മുഖനേ പരിശോധിക്കുമെന്നും അധികൃതർ പറഞ്ഞു. സബ് എൻജിനീയർമാരായ അനീഷ്, ശരത്, വർക്കർ ആന്‍റണി, തൊഴിലാളികളായ ബിനു, രാഹുൽ എന്നിവരും സംഘത്തോടൊപ്പം അനുഗമിച്ചിരുന്നു. വനമേഖലയിലൂടെ വരുന്ന വൈദ്യുതി ലൈനിൽ പലപ്പോഴും മരങ്ങൾ കടപുഴകിയും മരക്കൊമ്പുകൾ വീണും നെല്ലിയാമ്പതിയിലേക്ക് വൈദ്യുതി തടസം പതിവാണ്. റോഡ് ഗതാഗത സൗകര്യം ഇല്ലാത്ത വനമേഖലയിലൂടെ വരുന്ന വൈദ്യുതി ലൈനിലെ പ്രശ്നം പരിഹരിച്ച് വൈദ്യുതിബന്ധം പുനഃസ്ഥാപിക്കുന്നതിന് പലപ്പോഴും ദിവസങ്ങൾ എടുക്കാറുണ്ട്. പ്രധാന വിനോദസഞ്ചാര കേന്ദ്രമായ നെല്ലിയാമ്പതിയിലെ വൈദ്യുതി തടസം മേഖലയിലെ തൊഴിലാളികൾക്കും റിസോർട്ടുകൾക്കും ഹോട്ടൽ, വ്യാപാരസ്ഥാപനങ്ങൾ, ഫാക്ടറികൾ, വിനോദസഞ്ചാരികൾ, കുടിവെള്ളം എന്നിവക്കും പ്രതിസന്ധി സൃഷ്ടിക്കുന്നുണ്ട്. നിലവിലെ സാധാരണ ഹൈടെൻഷൻ വൈദ്യുതി ലൈൻ മാറ്റി ഉയരം കൂടിയ ടവർ ലൈൻ സ്ഥാപിക്കണമെന്ന ആവശ്യം വർഷങ്ങളായി നെല്ലിയാമ്പതിയിൽ നിന്ന് ഉയരുന്നുണ്ടെങ്കിലും പ്രശ്നത്തിന് പരിഹാരം ഉണ്ടായിട്ടില്ല. വനമേഖലയിലൂടെ ടവർ ലൈൻ സ്ഥാപിക്കുന്നതിന് കെഎസ്ഇബി വനംവകുപ്പിന് കത്ത് നൽകിയെങ്കിലും അനുമതി നൽകിയിരുന്നില്ല. വനമേഖലയിലൂടെ പുതിയ വൈദ്യുതി ലൈൻ സ്ഥാപിക്കുന്നതിന് അനുമതിക്കായി ലൈൻ വലിക്കാൻ ഉദ്ദേശിക്കുന്ന സ്ഥലത്തിന്‍റെ സ്കെച്ചും വഴിയും പ്രത്യേകം വേണമെന്ന് വനംവകുപ്പ് ആവശ്യപ്പെട്ടിരുന്നു. ഇക്കാര്യത്തിന് അനുമതി നൽകേണ്ട ആവശ്യം ഉന്നയിച്ച് മുഖ്യമന്ത്രിക്ക് നിവേദനം നൽകിയ നാഷണൽ ജനതാദൾ നെല്ലിയാമ്പതി പഞ്ചായത്ത് കമ്മിറ്റി സെക്രട്ടറി വി.എസ്. പ്രസാദും സംഘത്തിന്‍റെ കൂടെയുണ്ടായിരുന്നു. മേഖലയിലെ പല സംഘടനകളും നെന്മാറ വനം ഡിവിഷൻ ഓഫീസിലും കെഎസ്ഇബി അധികൃതർക്കും നിവേദനം നൽകിയിരുന്നു.

ക്ലീൻ കേരള ശേഖരിച്ചത് 2085 ടണ്‍ മാലിന്യം

പാലക്കാട്: ജില്ലയിൽ കഴിഞ്ഞ മൂന്ന് മാസത്തിൽ ഹരിതകർമ കണ്‍സോർഷ്യങ്ങളിൽ നിന്നും ക്ലീൻ കേരള കന്പനി ശേഖരിച്ച് ശാസ്ത്രീയമായി സംസ്കരിച്ചത് 2085 ടണ്‍ അജൈവ മാലിന്യം. ഇതിൽ 233 ടണ്‍ തരംതിരിച്ച മാലിന്യങ്ങളും1852 ടണ്‍ നിഷ്ക്രിയ മാലിന്യങ്ങളും ഉൾപ്പെടുന്നു. കഴിഞ്ഞ സാന്പത്തിക വർഷത്തിൽ 6743 ടണ്‍ അജൈവ മാലിന്യങ്ങളാണ് ക്ലീൻ കേരള കന്പനി ജില്ലയിൽ നിന്നും ശേഖരിച്ചത്. അന്താരാഷ്ട്ര പ്ലാസ്റ്റിക് ബാഗ് വിരുദ്ധ ദിനാചരണവുമായി ബന്ധപ്പെട്ട യോഗത്തിലാണ് ജില്ലയിലെ അജൈവ മാലിന്യ ശേഖരണ പ്രവർത്തനങ്ങളുടെ അവലോകനം നടന്നത്. സെക്ടർ അടിസ്ഥാനത്തിലുള്ള പ്രവർത്തനം ഉൗർജിതമാക്കുന്നതിനും മാലിന്യമുക്തം നവകേരളം കാന്പയിനിന്‍റെ ഭാഗമായി ഇ വേസ്റ്റ് ശേഖരണത്തിന്‍റെ വ്യാപ്തി വർധിപ്പിക്കുന്നതിനും തീരുമാനം കൈ കൊണ്ടതായി ജില്ലാ മാനേജർ ആദർശ് ആർ. നായർ അറിയിച്ചു.ഹരിതകർമസേനാംഗങ്ങൾ വീടുകളിൽ നിന്നും കടകളിൽ നിന്നും ശേഖരിക്കുന്ന അജൈവ മാലിന്യങ്ങൾ എംസിഎഫിൽ കൊണ്ടുവന്ന് തരംതിരിച്ച് മൂല്യവത്തായ മാലിന്യങ്ങളും നിഷ്ക്രിയ മാലിന്യങ്ങളും പ്രത്യേകമായാണ് ക്ലീൻ കേരളയ്ക്ക് കൈമാറുന്നത്. മൂല്യവത്തായ മാലിന്യങ്ങൾക്ക് (പുനരുപയോഗവും പുനഃചംക്രമണവും സാധ്യമായത്) ക്ലീൻ കേരള ഹരിതകർമസേന ഹരിതകർമ കണ്‍സോർഷ്യത്തിന് തുക നൽകും. നിഷ്ക്രിയ മാലിന്യങ്ങൾ കൊണ്ടുപോയി ശാസ്ത്രീയമായും സുരക്ഷിതമായും സംസ്കരിക്കുന്നതിന് തദ്ദേശ സ്ഥാപനങ്ങൾ ക്ലീൻ കേരളയ്ക്ക് തുക നൽകുന്നു. ക്ലീൻ കേരള കന്പനി എംസിഎഫുകളിൽ നിന്നും കൃത്യമായ ഇടവേളകളിൽ മാലിന്യം നീക്കുന്നു എന്ന് മാത്രമല്ല തദ്ദേശ സ്ഥാപനങ്ങൾക്ക് വേണ്ടി അത് സുരക്ഷിതായി കൈയ്യാഴിയുകയും ചെയ്യുന്നു എന്നത് ജില്ലയിൽ മാലിന്യ സംസ്കരണ പ്രവർത്തനത്തിൽ പ്രത്യേകിച്ച് ശാസ്ത്രീയ മാലിന്യ സംസ്കരണത്തിൽ തദ്ദേശ സ്വയംഭരണ സ്ഥാപനങ്ങൾക്ക് വലിയ പിന്തുണയാണ്.

ആരോഗ്യവകുപ്പിനെതിരേ കോൺഗ്രസ് സമരം

പാലക്കാട്: ആരോഗ്യ മേഖലയുടെ തകർച്ചക്ക് കാരണം ‘വീണാ’ വൈറസാണെന്ന് ഡിസിസി വൈസ്പ്രസിഡന്‍റ് സുമേഷ് അച്യുതൻ. സാമൂഹിക ഒരുമയിലൂടെ ഈ വൈറസിനെ തുരത്താൻ കേരളം കൈകോർക്കണമെന്നും അദ്ദേഹം ആവശ്യപ്പെട്ടു. മെഡിക്കൽ കോളജിൽ കെട്ടിടം തകർന്ന് രോഗി മരിക്കാനിടയായ സംഭവത്തിൽ പ്രതിഷേധിച്ച് പാലക്കാട് ബ്ലോക്ക് കോൺഗ്രസ് കമ്മിറ്റി സ്റ്റേഡിയം ബസ് സ്റ്റാന്‍റിലേക്ക് നടത്തിയ പ്രതിഷേധം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബ്ലോക്ക് കോൺഗ്രസ് പ്രസിഡന്‍റ് സി.വി. സതീഷ് അധ്യക്ഷത വഹിച്ചു. യുഡിഎഫ് നിയോജക മണ്ഡലം ചെയർമാൻ സുധാകരൻ പ്ലാക്കാട്ട്, ഡിസിസി അംഗം സി. കിദർ മുഹമ്മദ്, ഹരിദാസ് മച്ചിങ്ങൽ, മണ്ഡലം പ്രസിഡന്‍റുമാരായ എസ്. സേവ്യർ, രമേശ് പുത്തൂർ, എസ്.എം. താഹ, നേതാക്കളായ വി. മോഹൻ, ബോബൻ മാട്ടുമന്ത, എസ്. രവീന്ദ്രൻ, എ. കൃഷ്ണൻ, എച്ച്.എ. സത്താർ, എസ്.കുപ്ലേലൻ, മനോജ് കളത്തിൽ, റജീഷ് ബാലൻ, എഫ്.ബി. ബഷീർ, ഡി. ഷജിത്ത് കുമാർ, സജീവൻ പൂവക്കോട്, കെ. ബലറാം, പ്രഭുൽകുമാർ, വി. ആറുമുഖൻ, ഫ്രിൻന്‍റോ ഫ്രാൻസിസ്, എ. സലീം, എസ്. ശെൽവൻ കെ.എൻ. സഹീർ, ഷെറീഫ് റഹ്മാൻ, ജൈല എച്ച്. കാജാവുദ്ദീൻ, ശാന്തി നടരാജൻ, പുഷ്പവല്ലി നമ്പ്യാർ, പി.കെ. രാജൻ, ഗോപി മൂത്താൻതറ, കെ. അനീഷ്, ഉമ്മർ ഫാറൂഖ്, ഷമീർ പുതുപ്പള്ളിതെരുവ്, പി.എച്ച്. നാസർ, എം. ശെൽവരാജ് എന്നിവർ പങ്കെടുത്തു.

നിപ്പ: കരിമ്പുഴ പഞ്ചായത്തിലെ രണ്ട് വാർഡുകൾ അടച്ചിടും

ശ്രീകൃഷ്ണപുരം: തച്ചനാട്ടുകര പഞ്ചായത്തിലെ കിഴക്കും പുറത്ത് നിപ്പ സ്ഥിരീകരിച്ചതോടെ പകർച്ച തടയുന്നതിനായി സമീപപഞ്ചായത്തായ കരിമ്പുഴ നടപടികൾ തുടങ്ങി. തച്ചനാട്ടുകര പഞ്ചായത്തിനോട് ചേർന്ന് കിടക്കുന്ന കരിമ്പുഴ പഞ്ചായത്തിലെ ആറ്റാശേരി പതിനേഴാം വാർഡും ചോലകുർശി പതിനെട്ടാം വാർഡും പൂർണമായും അടച്ചിടാൻ പഞ്ചായത്തിൽ ചേർന്ന വിവിധ വകുപ്പുകളുടെയും ജനപ്രതിനിധികളുടെയും യോഗത്തിൽ തീരുമാനമായി. രണ്ടു വാർഡുകളിൽ നിന്നും പുറത്തുപോവാനോ പുറത്തുനിന്ന് വാർഡുകളിലേക്ക് വരാനോ പാടില്ല. സ്കൂൾ, മദ്രസ എന്നിവ അടച്ചിടും. വാർഡുകളിലെ വിദ്യാർഥികൾക്ക് ഓൺലൈൻ ക്ലാസിനുള്ള സൗകര്യം ഒരുക്കും. വാർഡിലെ മുഴുവൻ ആളുകളും മാസ്ക് ധരിക്കുകയും ഇടയ്ക്കിടെ കൈ കഴുകുകയും ചെയ്യണം. രണ്ടു വാർഡുകളിലെ 845 വീടുകളിലും ആരോഗ്യവകുപ്പ് 5,6,7 തിയതികളിൽ പരിശോധന നടത്തും. 12 ഗ്രൂപ്പുകളായി മൂന്നു ദിവസങ്ങളിൽ നടത്തുന്ന പരിശോധനയ്ക്ക് ഹെൽത്ത് ഇൻസ്പെക്ടറോ, ജൂണിയർ ഹെൽത്ത് ഇൻസ്പെക്ടറോ നേതൃത്വം നൽകും. രാവിലെ 7 മണിയോടെ തുടങ്ങുന്ന പരിശോധന ഉച്ചക്ക് 12ന് അവസാനിപ്പിച്ച് വൈകുന്നേരം 5ന് മന്ത്രിക്ക് റിപ്പോർട്ട് നൽകും. പനി വന്ന ഉടൻ ശ്വാസംമുട്ട്, അപസ്മാരം തുടങ്ങിയ ലക്ഷണങ്ങൾ ഉള്ളവർക്ക് അതീവ പരിഗണന നൽകി പരിചരിക്കും. കാര്യമായ അസുഖങ്ങൾ ഇല്ലാതെ പെട്ടെന്ന് ചത്ത വളര്‍ത്തു മൃഗങ്ങളെ കുറിച്ച് ആരോഗ്യവകുപ്പിനെ അറിയിക്കണം. അവശ്യവസ്തുക്കൾ ലഭിക്കുന്ന കടകൾക്ക് രാവിലെ 8 മുതൽ വൈകുന്നേരം 6 വരെ നിബന്ധനകൾക്ക് വിധേയമായി പ്രവർത്തിക്കാം തുടങ്ങിയ തീരുമാനങ്ങളാണ് യോഗത്തിൽ കൈകൊണ്ടത്. കൂടാതെ പഞ്ചായത്തിൽ ഹെൽപ് ഡെസ്ക് തുടങ്ങാനും മൈക്ക് ഉപയോഗിച്ച് വിളംബരം നടത്താനും പോസ്റ്ററുകൾ പ്രചരിപ്പിക്കാനും തീരുമാനമായി. യോഗത്തിൽ കരിമ്പുഴ ഗ്രാമപഞ്ചായത്ത് പ്രസിഡന്‍റ് കെ .എം. ഹനീഫ അധ്യക്ഷത വഹിച്ചു. വാർഡുകളിലെ സ്ഥിതിഗതികൾ വിലയിരുത്തിയതിൽ നിന്നും ആശങ്കപ്പെടാൻ ഒന്നുമില്ലെന്നും ജനങ്ങൾ ജാഗ്രത പാലിക്കണമെന്നും ആരോഗ്യവകുപ്പ് അധികൃതർ അറിയിച്ചു. ലക്ഷണങ്ങൾ ഉള്ളവർ ഉടൻതന്നെ ആരോഗ്യവകുപ്പിന് വിവരമറിയിക്കണമെന്നും അധികൃതർ അറിയിച്ചു.

വനമഹോത്സവം: പ്ലാസ്റ്റിക് നിർമാർജന ശില്പശാല

പാലക്കാട്: വനമഹോത്സവത്തിന്‍റെ ഭാഗമായി സാമൂഹ്യ വനവത്കരണ വിഭാഗം ധോണി ഇക്കോ ടൂറിസം സെന്‍ററിൽ പ്ലാസ്റ്റിക് നിർമാർജന ശില്പശാല നടത്തി. മുണ്ടൂർ ഗ്രാമപഞ്ചായത്തിലെ ഹരിതകർമസേന അംഗങ്ങൾക്കായി നടത്തിയ ശില്പശാല മുണ്ടൂർ ഗ്രാമപഞ്ചായത്ത് പ്രസിഡന്‍റ് എം.വി. സജിത ഉദ്ഘാടനം ചെയ്തു. റേഞ്ച് ഫോറസ്റ്റ് ഓഫീസർ കെ.ജി. ജെറിൻ ആന്‍റണി അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് വി.സി. ശിവദാസൻ, വൈൽഡ് ലൈഫ് ഡെപ്യൂട്ടി ഡയറക്ടർ മനോജ് ബാലകൃഷ്ണൻ, ഗ്രേഡ് ഡെപ്യൂട്ടി റേഞ്ച് ഓഫീസർ ബി.എസ്. ഭദ്രകുമാർ, വില്ലേജ് എക്സ്റ്റൻഷൻ ഓഫീസർ കെ.യു. സൗമ്യ എന്നിവർ പ്രസംഗിച്ചു. പ്ലാസ്റ്റിക് നിർമാർജനം സുസ്ഥിര വികസനത്തിന് എന്ന വിഷയത്തിൽ കെ. ശരവണകുമാർ ക്ലാസ് നയിച്ചു. സെക്ഷൻ ഫോറസ്റ്റ് ഓഫീസർമാരായ ജി.എസ്. ശ്രീലാൽ, കെ. മോഹൻദാസ് എന്നിവർ ധോണി വാട്ടർ ഫാൾസിലേക്കുള്ള വനയാത്രക്ക് നേതൃത്വം നൽകി.

കോൺഗ്രസ് പ്രവർത്തകർ റോഡിലെ കുഴികളിൽ വാഴ നട്ട് പ്രതിഷേധിച്ചു

വടക്കഞ്ചേരി: കാളാംകുളം - കണക്കൻതുരുത്തി -ആനക്കുഴിപ്പാടം മൂച്ചിക്കൽക്കുളമ്പ് റോഡിന്‍റെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് കോൺഗ്രസിന്‍റെ 17,18 വാർഡ് കമ്മിറ്റികളുടെ നേതൃത്വത്തിൽ പ്രവർത്തകർ റോഡിലെ കുഴികളിൽ വാഴനട്ട് പ്രതിഷേധിച്ചു. മാസങ്ങൾക്കു മുൻപ് ജൽജീവൻ മിഷന്‍റെ കുടിവെള്ള പദ്ധതിക്കായി പൈപ്പിടുന്നതിന് കാളാംകുളം മുതൽ 17, 18 വാർഡുകളിലായി 26 സ്ഥലത്ത് റോഡ് കുറുകെ വെട്ടിപ്പൊളിച്ചിരുന്നു. ഇതിപ്പോൾ വലിയ കുഴികളായി മാറി. അഞ്ച് കിലോമീറ്റർ ദൂരം വരുന്ന റോഡ് പൂർണമായും തകർന്ന നിലയിലായിട്ടും ബന്ധപ്പെട്ടവരുടെ ഭാഗത്തു നിന്ന് യാതൊരു നടപടികളും ഉണ്ടാകുന്നില്ലെന്ന് നാട്ടുകാർ പറയുന്നു. ജനങ്ങളുടെ യാത്രാദുരിതത്തിന് പരിഹാരം കാണാൻ പഞ്ചായത്തും നടപടി സ്വീകരിക്കുന്നില്ലെന്നതും പ്രതിഷേധത്തിന് കാരണമായി. നാലുദിവസം മുൻപ് കുട്ടിയുമായി പോയിരുന്ന സ്കൂട്ടർ യാത്രക്കാരൻ കാളാംകുളം പള്ളിമുക്കിലുള്ള ഒന്നരയടിയോളം താഴ്ചയുള്ള കുഴിയിൽ വീണു. അഞ്ചു വയസുള്ള കുട്ടി വണ്ടിയിൽനിന്ന് തെറിച്ച് റോഡിൽ വീണു. ഭാഗ്യത്തിന് കുട്ടി കാര്യമായ പരിക്കേൽക്കാതെ രക്ഷപ്പെട്ടു. പ്രതിഷേധ സമരം കോൺഗ്രസ് ബ്ലോക്ക് പ്രസിഡന്‍റ് അഡ്വ.എം. ദിലീപ് ഉദ്ഘാടനം ചെയ്തു. മണ്ഡലം മുൻ പ്രസിഡന്‍റ് റെജി കെ.മാത്യു അധ്യക്ഷത വഹിച്ചു. ഡാന്‍റിസ് വല്ലയിൽ, ബെന്നിപുതുശേരി, ബൈജു, കെ.പി. ഐപ്പ്, പി.കെ. രഞ്ജു, വി. രവി, റജു, ജോസ്, അബ്രഹാം വല്ലയിൽ, ജിജി, എൻ.കെ. സുരേഷ് ബാബു പ്രസംഗിച്ചു.

തച്ചന്പാറയിൽ കർഷകസഭയും ഞാറ്റുവേലച്ചന്തയും

കല്ലടിക്കോട്: തച്ചന്പാറ ഗ്രാമപഞ്ചായത്തിന്‍റെയും കൃഷിഭവന്‍റെയും ആഭിമുഖ്യത്തിൽ കർഷകസഭയും ബ്ലോക്ക്തല ഞാറ്റുവേല ചന്തയും നടത്തി. ഗ്രാമപഞ്ചായത്ത് കമ്യൂണിറ്റി ഹാളിൽ നടന്ന പരിപാടി മണ്ണാർക്കാട് ബ്ലോക്ക് പഞ്ചായത്ത് പ്രസിഡന്‍റ് വി. പ്രീത ഉദ്ഘാടനം ചെയ്തു. കർഷകർക്ക് ജൈവവളങ്ങൾ വിതരണം ചെയ്തു. തച്ചന്പാറ ഗ്രാമപഞ്ചായത്ത് പ്രസിഡന്‍റ് ബാബു മാസ്റ്റർ അധ്യക്ഷനായി. മണ്ണാർക്കാട് ബ്ലോക്ക് കൃഷി അസിസ്റ്റന്‍റ് ഡയറക്ടർ പി. ഗിരിജ പദ്ധതി വിശദീകരിച്ചു. ഗ്രാമപഞ്ചായത്ത് വൈസ് പ്രസിഡന്‍റ് ശാരദ പുന്നക്കല്ലടി, ജില്ലാ പഞ്ചായത്ത് അംഗം റെജി ജോസ്, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ ഐസക് ജോണ്‍, അബൂബക്കർ മുച്ചിരിപ്പാടൻ, തനൂജ രാധാകൃഷ്ണൻ, മണ്ണാർക്കാട് ബ്ലോക്ക് പഞ്ചായത്ത് അംഗങ്ങളായ പി.വി. കുര്യൻ, ഐഷാ ബാനു കാപ്പിൽ, ഗ്രാമപഞ്ചായത്ത് അംഗങ്ങളായ ഒ. നാരായണൻകുട്ടി, അലി തേക്കത്ത്, ബെറ്റി ലോറൻസ്, പി.പി. ഷഫീഖ്, ജയ ജയപ്രകാശ്, കൃഷിഭവൻ കൃഷി ഓഫീസർ ആർദ്ര എസ്. രഘുനാഥ്, കൃഷി അസിസ്റ്റന്‍റ് പി. ചിത്ര, കർഷകർ, രാഷ്ട്രീയകക്ഷി പ്രതിനിധികൾ, കൃഷിവകുപ്പ് ഉദ്യോഗസ്ഥർ പങ്കെടുത്തു.

കാട്ടുപന്നിശല്യം രൂക്ഷമായിട്ടും അധികൃത ശ്രദ്ധയെത്തുന്നില്ല

വണ്ടിത്താവളം: കാട്ടുപന്നിശല്യം രൂക്ഷമായ കൂമൻകാട്- കൊല്ലൻകുളമ്പ് പാതയിൽ തെരുവുവിളക്കുകൾ സ്ഥാപിക്കണമെന്ന ആവശ്യം ശക്തമാകുന്നു. വൈദ്യുതി പോസ്റ്റുകളുണ്ടെങ്കിലും ബൾബിടാൻപോലും അധികൃതർ മടിക്കുകയാണ്. റോഡരികിലെ കാടുപിടിച്ച പാഴ്ച്ചെടികൾക്കിടയിൽനിന്നും തന്പടിച്ച പന്നികൾ വാഹനങ്ങൾക്കു മുന്നിലേക്കു ചാടുന്നതു പതിവാണ്. ഇവിടെ നിരവധിയാളുകൾക്ക് അപകടങ്ങളുമുണ്ടായിട്ടുണ്ട്. രാത്രിയായിൽ ഒന്നരകിലോമീറ്റർ ദൈർഘ്യമുള്ള കൊല്ലൻകുളമ്പ് പാതയിൽ നടന്നുപോവാൻപോലും ജനം ഭയക്കുകയാണ്. പന്നിക്കൂട്ടത്തിനു പുറമെ തെരുവു നായ്ക്കളും കുറ്റിച്ചെടികളിൽ തമ്പടിച്ചിട്ടുണ്ട്. സമീപത്തു വീടുകൾ ഇല്ലാത്തതിനാൽ മാലിന്യം കൊണ്ടുവന്നു തള്ളുന്നതാണ് പന്നികളും നായ്ക്കളും ഇവിടെ തന്പടിക്കുന്നതിനു പ്രധാന കാരണം. ഗ്രാമപഞ്ചായത്ത് മാലിന്യംതള്ളരുതെന്ന മുന്നറിയിപ്പു ബോർഡ് സ്ഥാപിച്ചതൊഴിച്ചാൽ തിരിഞ്ഞുനോക്കിയിട്ടില്ല.

കോയമ്പത്തൂര്‌-2041: പുതിയ മാസ്റ്റർപ്ലാൻ പ്രകാശനം ചെയ്തു

കോയമ്പത്തൂർ: കോയമ്പത്തൂരിനുള്ള പുതിയ മാസ്റ്റർപ്ലാൻ പ്രകാശനംചെയ്ത‌് മുഖ്യമന്ത്രി എം.കെ. സ്റ്റാലിൻ. ചെന്നൈ സെക്രട്ടറിയേറ്റിൽ നടന്ന ചടങ്ങിലായിരുന്നു പ്രകാശനം. ഭവന, നഗരവികസന വകുപ്പിനു കീഴിൽ പ്രവർത്തിക്കുന്ന അർബൻ പ്ലാനിംഗ് മിഷൻ തയാറാക്കിയ 1531.57 ചതുരശ്ര കിലോമീറ്റർ വിസ്തൃതിയുള്ള കോയമ്പത്തൂർ ലോക്കൽ പ്ലാൻഏരിയയുടെ രണ്ടാമത്തെ സമഗ്രപദ്ധതിയാണ് പ്രകാശനംചെയ്തത്. കോയമ്പത്തൂരിന്‍റെ മാസ്റ്റർപ്ലാൻ അവസാനമായി അപ്ഡേറ്റ് ചെയ്തത് 1994ലാണ്. അതിനുശേഷം കോയമ്പത്തൂർ വികസനത്തിന്‍റെ പല ഘട്ടങ്ങളിലൂടെ കടന്നുപോയി. 2041 ആകുമ്പോഴേക്കും 45 ലക്ഷം ആളുകളെങ്കിലും കോയമ്പത്തൂരിൽ താമസമുണ്ടാകുമെന്നാണ് പഠനങ്ങൾ വെളിപ്പെടുത്തുന്നത്. 2041ൽ ആവശ്യമായ പൊതുഅടിസ്ഥാന സൗകര്യങ്ങൾ, ജനങ്ങളുടെ ജീവിത നിലവാരം മെച്ചപ്പെടുത്തുന്നതിനുള്ള സൗകര്യങ്ങൾ, മാനേജ്മെന്‍റ് പദ്ധതികൾ മുതലായവ കണക്കിലെടുത്താണ് പുതിയ മാസ്റ്റർപ്ലാൻ തയാറാക്കിയിട്ടുള്ളത്. പരിപൂർണമായി ജിഐഎസ് സാങ്കേതികവിദ്യ ഉപയോഗിച്ചാണ് മാസ്റ്റർപ്ലാൻ തയാറാക്കിയിരിക്കുന്നത്. അടിസ്ഥാന സൗകര്യങ്ങൾ, ഗതാഗതം, പരിസ്ഥിതി, സമ്പദ്‌വ്യവസ്ഥ, ഭവന നിർമാണം തുടങ്ങിയ വിവിധ മേഖലകളിലെ വിദഗ്ധരുടെ ഉപദേശപ്രകാരമാണ് ഇതു തയാറാക്കിയത്.

"ഒ.വി. വിജയന്‍റെ പ്രതിമ പുനഃസ്ഥാപിക്കണം'

പാലക്കാട്: വിഖ്യാത സാഹിത്യകാരൻ ഒ.വി. വിജയന്‍റെ പ്രതിമ പുനഃസ്ഥാപിക്കണമെന്നാവശ്യപ്പെട്ടു സൗഹൃദം ദേശീയവേദി നഗരസഭാ അധികൃതർക്കു നിവേദനം നൽകി. എസ്ബിഐ ജംഗ്ഷനിൽ സാംസ്കാരിക പ്രതീകമായി നിലകൊണ്ടിരുന്ന പ്രതിമയാണ് നീക്കംചെയ്തിട്ടുള്ളത്. തസ്രാക്കിൽ ഒ.വി. വിജയന്‍റെ എൺപത്തിയൊന്പതാം ജന്മദിനാഘോഷങ്ങൾ തകൃതിയായി നടക്കുന്പോഴാണ് പ്രതിമ നീക്കംചെയ്യൽ അവഗണന. വ്യാപക പ്രതിഷേധമാണ് ഈ വിഷയത്തിലുയരുന്നത്. സൗഹൃദം ദേശീയവേദി ഒ.വി. വിജയന്‍റെ പേരിൽ മൂന്നുവർഷത്തിലൊരിക്കൽ നൽകി വന്നിരുന്ന മലയാളഭാഷാ പുരസ്കാരം പുനഃരാരംഭിക്കുവാനും തീരുമാനിച്ചു. യോഗത്തിൽ പ്രസിഡന്‍റ് പി.വി. സഹദേവൻ അധ്യക്ഷത വഹിച്ചു. സെക്രട്ടറി ശ്രീജിത്ത് തച്ചങ്കാട്, ട്രഷറർ കെ. മണികണ്ഠൻ, പ്രവീൺ. കെ. തുടങ്ങിയവർ പ്രസംഗിച്ചു.

സുസ്ഥിര തൃത്താല പദ്ധതിയിൽ 38 പച്ചത്തുരുത്തുകൾ സജ്ജം

തൃത്താല: സുസ്ഥിര തൃത്താലയുടെ ഭാഗമായി മണ്ഡലത്തിൽ 21 വിദ്യാവനം ഉൾപ്പെടെ 38 പച്ചത്തുരുത്തുകൾ സജ്ജമാക്കിയതായി എംജിഎൻആർജിഎ മിഷൻ ഡയറക്ടർ എ. നിസാമുദ്ദീൻ പറഞ്ഞു. കളക്ടറേറ്റ് കോണ്‍ഫറൻസ് ഹാളിൽ നടന്ന സുസ്ഥിര തൃത്താല പദ്ധതിയുടെ അവലോകന യോഗത്തിൽ സംസാരിക്കുകയായിരുന്നു അദ്ദേഹം. 11 ഏക്കർ സ്ഥലത്ത് 16,154 തൈകൾ നട്ടു പിടിപ്പിച്ചുകൊണ്ടാണ് പച്ചത്തുരുത്തുകൾ നിർമിച്ചിട്ടുള്ളത്. ‌ഓണം ലക്ഷ്യമാക്കി 162 ഏക്കർ സ്ഥലത്താണ് സുസ്ഥിര തൃത്താലയുടെ ഭാഗമായി പച്ചക്കറി കൃഷി ആരംഭിക്കുന്നത്. പച്ചക്കറിക്ക് പുറമേ ചെണ്ടുമല്ലി കൃഷിയും ആരംഭിച്ചിട്ടുണ്ട്. സുസ്ഥിര തൃത്താലയുടെ ഭാഗമായി ഉൽപ്പാദിപ്പിക്കുന്ന പച്ചക്കറി, വിപണി വിലയേക്കാൾ 20 ശതമാനം ഉയർന്ന വിലക്ക് സംഭരിക്കും. വിപണി വിലയേക്കാൾ 30 ശതമാനം കുറഞ്ഞ വിലക്ക് സുസ്ഥിര തൃത്താലയുടെ വിപണന മേളയിലൂടെ ജനങ്ങൾക്ക് പച്ചക്കറി ലഭ്യമാക്കുമെന്നും അറിയിച്ചു. ഇറിഗേഷൻ, കുളംനവീകരണം, വൈദ്യുതി ഉത്പാദനം സംബന്ധിച്ച വിഷയവും അവലോകന യോഗത്തിൽ ചർച്ചയായി. നവ കേരള മിഷൻ കോ- ഓർഡിനേറ്റർ പി. സെയ്തലവി, മന്ത്രി എം.ബി. രാജേഷിന്‍റെ പ്രതിനിധി സുധീഷ് കുമാർ, വിവിധ വകുപ്പുമേധാവികൾ, പ്രതിനിധികൾ എന്നിവർ പങ്കെടുത്തു.

ചെണ്ടുമല്ലികൃഷിയുമായി നെന്മാറ കൃഷിഭവൻ ജീവനക്കാർ

നെന്മാറ: ഓണത്തെ വരവേൽക്കാൻ ചെണ്ടുമല്ലി കൃഷിയിറക്കി നെന്മാറ കൃഷിഭവൻ ജീവനക്കാർ. തേവർമണി കൽനാട് കെ. രവിചന്ദറിന്‍റെ 50 സെന്‍റ് സ്ഥലം പാട്ടത്തിനെടുത്താണ് കൃഷിയിറക്കിയത്. ഓണ വിപണി ലക്ഷ്യമിട്ടാണ് മഞ്ഞ ഓറഞ്ച് നിറത്തിലുള്ള ഹൈബ്രിഡ് ഇനങ്ങൾ വിളവിറക്കിയത്. തമിഴ്നാട്ടിൽനിന്നാണ് വിത്തുകളെത്തിച്ചത്. കർഷകർക്കിടയിൽ അധിക വരുമാനമെന്ന നിലയിൽ പൂകൃഷിയെ എങ്ങനെ പ്രയോജനപ്പെടുത്താമെന്നുള്ള സന്ദേശം നൽകുകയാണ് ജീവനക്കാരുടെ സംഘം ലക്ഷ്യമിടുന്നത്. കൂടാതെ ഇക്കോളജിക്കൽ എൻജിനീറിംഗ് എന്ന പാരിസ്ഥിതിക സൗഹൃദ കൃഷി അവലംബിച്ച് വല്ലങ്ങി, നെല്ലിപ്പാടം, പൂക്കോട്ടുപാടം എന്നീ പാടശേഖരങ്ങളിലെ വയൽവരമ്പിലും ചെണ്ടുമല്ലി കൃഷി ചെയ്യുന്നുണ്ട്. കെ .ബാബു എംഎൽഎ ചെണ്ടുമല്ലി കൃഷിനടീൽ ഉദ്ഘാടനം നിർവഹിച്ചു. നെന്മാറ ഗ്രാമപഞ്ചായത്ത് പ്രസിഡന്‍റ് പ്രബിത ജയൻ അധ്യക്ഷത വഹിച്ചു. പഞ്ചായത്ത് അംഗങ്ങളായ ആർ. ചന്ദ്രൻ, ഉഷ രവീന്ദ്രൻ, കൃഷി ഓഫീസർ വി. അരുണിമ, അസിസ്റ്റന്‍റ് കൃഷി ഓഫീസർ സി. സന്തോഷ്, കൃഷി അസിസ്റ്റന്‍റുമാരായ വി. ലിഖിത, കെ. പ്രകാശ്, കെ. രവിചന്ദർ, കെ.സുദേവൻ, കെ.ശിവരാമൻ, വി. സുധാകരൻ എന്നിവർ പങ്കെടുത്തു.

തേങ്കുറിശിയിലെ 14 കുളങ്ങൾക്കായി 98,000 മത്സ്യക്കുഞ്ഞുങ്ങളെ നൽകി

പാലക്കാട്: സംസ്ഥാന സർക്കാറിന്‍റെ നൂറുദിന കർമപരിപാടിയുടെയും ജനകീയ മത്സ്യകൃഷി പദ്ധതിയുടെയും ഭാഗമായി ജില്ലാതല മത്സ്യക്കുഞ്ഞ് വിതരണോദ്ഘാടനം ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ നിർവഹിച്ചു. ജില്ലയിൽ 1500 കുളങ്ങളാണ് തദ്ദേശസ്ഥാപനങ്ങൾവഴി മത്സ്യകൃഷിക്കായി തെരഞ്ഞെടുത്തത്. ഇതിന്‍റെ ഭാഗമായി തേങ്കുറുശ്ശിയിലെ 14 കുളങ്ങളിലായി 98,000 മത്സ്യകുഞ്ഞുങ്ങളെ വിതരണം ചെയ്തു. തേങ്കുറുശ്ശിയിൽ മത്സ്യകർഷക ക്ലബ് നടത്തുന്ന അഞ്ച് കുളങ്ങൾ, കുടുംബശ്രീ, പാടശേഖര സമിതി എന്നിവ നടത്തുന്ന ഓരോ കുളവും, സ്വകാര്യവ്യക്തികൾ പാട്ടത്തിനെടുത്ത് നടത്തുന്ന ഏഴുകുളങ്ങൾ എന്നിവയിലേക്കാണ് മത്സ്യക്കുഞ്ഞുങ്ങളെ നിക്ഷേപിച്ചത്. വിളയൻചാത്തനൂർ പുന്നൂർ കുളത്തിൽ ജില്ലാ പഞ്ചായത്ത് പ്രസിഡന്‍റും, ഫിഷറീസ് വകുപ്പ് ഉദ്യോഗസ്ഥരും ചേർന്നാണ് മത്സ്യക്കുഞ്ഞുങ്ങളെ നിക്ഷേപിച്ചത്. തേങ്കുറുശ്ശി ഗ്രാമപഞ്ചായത്ത് ഹാളിൽ നടന്ന പരിപാടിയിൽ ബ്ലോക്ക് പഞ്ചായത്ത് പ്രസിഡന്‍റ് ടി.കെ. ദേവദാസ് അധ്യക്ഷനായി. വൈസ് പ്രസിഡന്‍റ് കെ. സ്വർണമണി, പഞ്ചായത്ത് മെംബർമാർ, ഫിഷറീസ് ഡിഡി ചാർജ് കെ.എസ്. രാജി, ഫിഷറീസ് എക്സ്റ്റൻഷൻ ഓഫിസർ സി.ആർ. ദേവദാസ് എന്നിവർ പങ്കെടുത്തു.

പട്ടാന്പി ഫെർട്ടിലൈസർ ക്വാളിറ്റി കണ്‍ട്രോൾ ലാബിന് എൻഎബിഎൽ അംഗീകാരം

പട്ടാന്പി: കാർഷിക വികസന കർഷകക്ഷേമ വകുപ്പിന്‍റെ കീഴിൽ പ്രവർത്തിക്കുന്ന പട്ടാന്പി ഫെർട്ടിലൈസർ ക്വാളിറ്റി കണ്‍ട്രോൾ ലാബിനു എൻഎബിഎൽ (നാഷണൽ അക്രഡിറ്റേഷൻ ബോർഡ് ഫോർ ടെസ്റ്റിംഗ് ആൻഡ് കാലിബറേഷൻ ലബോറട്ടറീസ്) ന്‍റെ അംഗീകാരം ലഭിച്ചു. സർട്ടിഫിക്കേഷൻ ലഭിച്ചതോടെ സ്ഥാപനം ദേശീയ അന്തർദേശീയ തലത്തിലേക്കുയർന്നു. അന്തർദേശീയ നിലവാരം പുലർത്തുന്ന പരിശോധനകളും ഉപകരണങ്ങളും പരിശോധന സാമഗ്രികളുമാണ് ഫെർട്ടിലൈസർ ക്വാളിറ്റി കണ്‍ട്രോൾ ലാബിൽ ഉപയോഗിക്കുന്നത്. ദേശീയതലത്തിൽ നിഷ്കർഷിക്കപ്പെട്ട യോഗ്യതയും പരിചയ സന്പത്തുള്ള ഉദ്യോഗസ്ഥരുടെ നേതൃത്വത്തിലാണ് പരിശോധനകൾ നടക്കുന്നത്. ഐഎസ്ഒ/ ഐഇഎസ് 17025 നിലവാരത്തിലാണ് ലാബ് പ്രവർത്തിക്കുന്നത്. രാസവളം, സൂക്ഷ്മമൂലകങ്ങൾ, ജൈവവളങ്ങൾ, ബയോ ഫെർട്ടിലൈസർ എന്നിവയുടെ കൃത്യമായ ഫലം ലഭിക്കാൻ കർഷകർക്കും സ്ഥാപനങ്ങൾക്കും ഫെർട്ടിലൈസർ ക്വാളിറ്റി കണ്‍ട്രോൾ ലാബിനെ സമീപിക്കാം.

തിരുവിഴാംകുന്ന് കന്നുകാലി ഫാമിൽ വീണ്ടും തമ്പടിച്ച് കാട്ടാനക്കൂട്ടം

മണ്ണാർക്കാട്: ഇടവേളയ്ക്കുശേഷം വീണ്ടും തിരുവിഴാംകുന്ന് കന്നുകാലി ഗവേഷണകേന്ദ്രത്തിൽ തമ്പടിച്ച് കാട്ടാനക്കൂട്ടം. മൂന്ന് ആനകളാണ് തിരുവിഴാംകുന്ന് ഫാമിൽ വിലസുന്നത്. ഇതോടെ ഫാമിനകത്തെ ജീവനക്കാരും തൊഴിലാളികളും വിദ്യാർഥികളും അധ്യാപകരും ഒരുപോലെ ഭയപ്പാടിലാണ്. ഫാമിനകത്തു പ്രവർത്തിക്കുന്ന ഏവിയൻ സയൻസ് കോളജിൽ പഠിക്കുന്ന ഭൂരിഭാഗം വിദ്യാർഥികളും ഫാമിലെ ക്വാർട്ടേഴ്സുകളിലാണ് താമസിക്കുന്നത്. ഇവർക്ക് പുറത്തിറങ്ങാനാവാത്ത അവസ്ഥയാണ്. ഫാമിനു ചുറ്റും താമസിക്കുന്ന കുടുംബങ്ങളും ഭീതിയിലാണ്. ഫാമിനകത്തുള്ള കൃഷികളും കാട്ടാനകൾ നശിപ്പിക്കുന്നുണ്ട്. ഇതിനിടെ നിരവധി തവണ ഫാമിനകത്തു കാട്ടാനക്കൂട്ടം എത്തുകയും ജനങ്ങളെ ഭീതിയിലാക്കുകയും ചെയ്തിട്ടുണ്ട്. വനപാലകരും നാട്ടുകാരും ചേർന്ന് കാട്ടിലേക്ക് ഓടിച്ചാലും വീണ്ടും കാട്ടാനകൾ ഫാമിലെത്തുന്നതു പതിവാണ്. കാട്ടാനകൾ ഫാമിനകത്തു കയറാതിരിക്കാനുള്ള ശാശ്വത പരിഹാരമാണ് വനംവകുപ്പ് സ്വീകരിക്കേണ്ടതെന്നു നാട്ടുകാരും ഫാമിനകത്തുള്ളവരും ആവശ്യപ്പെട്ടു.

ഇതു ബസ് സ്റ്റാൻഡല്ലേ, കാറും ചരക്കുവാഹനങ്ങളും എന്തിന്?

വണ്ടിത്താവളം: ടൗണ്‍ ബസ്‌സ്റ്റാൻഡിനകത്ത് കാർപാർക്കിംഗ് യാത്രക്കാർക്ക് അപകട ഭീഷണിയാകുന്നു. വിവിധ ആവശ്യങ്ങൾക്കു വണ്ടിത്താവളം ടൗണിലെത്തുന്നവർ ബസ്‌സ്റ്റാൻഡികത്ത് ബസ്ട്രാക്കിൽ കാർനിർത്തിയിട്ടു പോവുകയും രണ്ടുംമൂന്നും മണിക്കൂർ കഴിഞ്ഞാണ് തിരിച്ചു കൊണ്ടുപോവുന്നത്. ബുധനാഴ്ച സ്റ്റാൻഡിൽ നിർത്തിയിട്ട ബസ് പുറകോട്ടെടുത്തപ്പോൾ പിന്നിൽ നിർത്തിയിരുന്ന കാറിലിടിച്ച സംഭവമുണ്ടായി. കാറിന്‍റെ ഡോറിന് കേടുപാടുകളും സംഭവിച്ചു. സമീപത്ത് പൊതുപരിപാടികൾ നടക്കുന്ന സമയത്ത് സ്റ്റാൻഡിനകത്ത് ബസുകൾക്കോ യാത്രക്കാർക്കോ കയറാൻപറ്റാത്തവിധം കാറുകൾ നിറഞ്ഞിരിക്കും. വൈകുന്നേര സമയങ്ങളിൽ നൂറുകണക്കിനു വിദ്യാർഥികൾ സ്റ്റാൻഡിനകത്ത് വിവിധ സ്ഥലങ്ങളിലേക്ക് ബസ് കയറാനെത്തുന്നതു അപകടഭീഷണിയിലാണ്. പ്രതിദിനം മുപ്പതോളം ബസുകൾ സ്റ്റാൻഡിൽ കയറിയിറങ്ങാറുണ്ട്. പലപ്പോഴും കാറുകളുടെ തടസം കാരണം സ്റ്റാൻഡിനു മുൻഭാഗത്ത് ബസ് നിർത്തി യാത്രക്കാരെ കയറ്റിപ്പോവാൻ നിർബന്ധിരാവുകയാണ്. സ്റ്റാൻഡിനകത്ത് നാലു പാർക്കിംഗ് യാർഡുകളിലും കാറുകൾ നിർത്തിയിടാറുണ്ട്. ചില സമയങ്ങളിൽ ചരക്കുലോറികളും നിർത്തിയിടുന്നതു പതിവാണ്. പഞ്ചായത്ത് അധികൃതർ ഇടപെട്ട് മുന്നറിയിപ്പ് ബോർഡുകൾ സ്ഥാപിക്കണമെന്നാണ് യാത്രികരുടെ ആവശ്യം.

സ്കൂൾബസും ബൈക്കും കൂട്ടിയിടിച്ച് യുവാവ് മരിച്ചു

ഒറ്റപ്പാലം: സ്കൂൾബസ് തലയിലൂടെ കയറിയിറങ്ങി ബൈക്ക് യാത്രക്കാരൻ മരിച്ചു. മണ്ണൂർ കിഴക്കുമ്പുറം അനിൽകുമാർ(38)ആണ് മരിച്ചത്. പാലക്കാട് - കുളപ്പുള്ളി പ്രധാനപാതയിൽ പഴയ ലക്കിടി ജംഗ്ഷനിൽവച്ചാണ് സംഭവം. അനിൽകുമാർ സഞ്ചരിച്ച ബൈക്കും സ്കൂൾബസും കൂട്ടിയിടിക്കുകയായിരുന്നു. താഴെവീണ അനിൽകുമാറിന്‍റെ തലയിലൂടെ ബസ് കയറിയിറങ്ങി. ഇന്നലെ വൈകുന്നേരം നാലരയോടെയാണ് സംഭവം. ഉടൻതന്നെ നാട്ടുകാർ അനിൽകുമാറിനെ ആശുപത്രിയിൽ എത്തിക്കാൻ ശ്രമിച്ചെങ്കിലും മരിച്ചു. മൃതദേഹം പോസ്റ്റുമോർട്ടത്തിനായി ഒറ്റപ്പാലം താലൂക്ക് ആശുപത്രിയിൽ സൂക്ഷിച്ചിട്ടുണ്ട്. ഒറ്റപ്പാലം പോലീസ് മേൽനടപടികൾ സ്വീകരിച്ചു.

കെഎസ്ആർടിസി ബസും കാറും കൂട്ടിയിടിച്ചു

നെന്മാറ: കെഎസ്ആർടിസി ബസും കാറും കൂട്ടിയിടിച്ച് അപകടം. ഇന്നലെ രാവിലെ 7.30 ഓടെ മംഗലം-ഗോവിന്ദാപുരം പാതയിലെ വിത്തനശേരിയിലാണ് അപകടം. നെന്മാറ ഭാഗത്തുനിന്ന് കൊല്ലങ്കോട് ദിശയിലേക്ക് സഞ്ചരിച്ച കാറും എതിർദിശയിൽ സഞ്ചരിച്ച കെഎസ്ആർടിസി ബസുമാണ് കൂട്ടിയിടിച്ചത്. കാർ ഓടിച്ച വല്ലങ്ങി സ്വദേശിയായ ഡ്രൈവർക്കും സഹയാത്രികനും പരിക്കേറ്റു. കാറിന്‍റെ മുൻഭാഗം തകർന്നു. അരമണിക്കൂറോളം ഗതാഗതം തടസപ്പെട്ടു. കെഎസ്ആർടിസി ഡ്രൈവറുടെ പരാതിയെ തുടർന്ന് അശ്രദ്ധമായി വാഹനമോടിച്ച കാർ ഡ്രൈവർക്കെതിരെ നെന്മാറ പോലീസ് കേസെടുത്തു.

മണ്ണാർക്കാട് ടൂറിസം ഹബ് ഉദ്ഘാടനം

മണ്ണാർക്കാട്: നഗരസഭയുടെ നൂതന പദ്ധതിയായ ടൂറിസം ഹബ് ചെയർമാൻ സി. മുഹമ്മദ് ബഷീർ ഉദ്ഘാടനം ചെയ്തു. മണ്ണാർക്കാടുള്ള ടൂറിസ്റ്റ് കേന്ദ്രങ്ങളിലേക്ക് ജനങ്ങളെ ആകർഷിപ്പിക്കുക എന്നതാണ് പദ്ധതിയുടെ ലക്ഷ്യം. ഇതിനായി നഗരസഭയുടെ വെബ്സൈറ്റ്, ഓഫീസ്, സ്റ്റാഫ്, മറ്റ് അനുബന്ധ സൗകര്യങ്ങൾ എന്നിവ സജ്ജമാക്കി. പരിപാടിയിൽ വികസനകാര്യ സ്ഥിരം സമിതി ചെയർമാൻ കെ. ബാലകൃഷ്ണൻ അധ്യക്ഷനായി. നഗരസഭാ വൈസ് ചെയർപേഴ്സണ്‍ കെ. പ്രസീത, സ്ഥിരം സമിതി അധ്യക്ഷരായ മാസിത സത്താർ, ഷെഫീക്ക് റഹ്മാൻ, ഹംസ കുറുവണ്ണ, കൗണ്‍സിലർ ഷമീർ വേളക്കാടൻ, നഗരസഭാ സെക്രട്ടറി സതീഷ് കുമാർ തുടങ്ങിയവർ പ്രസംഗിച്ചു. മറ്റു കൗണ്‍സിലർമാർ, രാഷ്ട്രീയകക്ഷി പ്രതിനിധികൾ തുടങ്ങിയവർ പങ്കെടുത്തു.

ശ്രീകുറുംബ ട്രസ്റ്റിന്‍റെ മുപ്പതാമത് സമൂഹവിവാഹം നാളെ

വടക്കഞ്ചേരി: ശ്രീ കുറുംബ എഡ്യുക്കേഷണൽ ആൻഡ് ചാരിറ്റബിൾ ട്രസ്റ്റിന്‍റെ മുപ്പതാമത് സ്ത്രീധനരഹിത സമൂഹവിവാഹം നാളെ നടക്കും. ട്രസ്റ്റിന്‍റെ മൂലങ്കോടുള്ള ശ്രീകുറുംബ കല്യാണമണ്ഡപത്തിൽ രാവിലെ 9.30ന് നടക്കുന്ന സമൂഹ വിവാഹ ചടങ്ങിൽ വിവിധ തുറകളിലെ വിശിഷ്ട വ്യക്തികൾ പങ്കെടുക്കുമെന്ന് ട്രസ്റ്റ് അധികൃതർ പത്രസമ്മേളനത്തിൽ അറിയിച്ചു. കിഴക്കഞ്ചേരി, വടക്കഞ്ചേരി, കണ്ണമ്പ്ര എന്നീ മൂന്ന് പഞ്ചായത്തുകളിൽ നിന്നായി 13 യുവതികളാണ് മംഗല്യവതികളാകുന്നത്. പിഎൻസി മേനോൻ ചെയർമാനായുള്ള ട്രസ്റ്റിന്‍റെ നേതൃത്വത്തിൽ 2003 ലാണ് സാമ്പത്തികമായി പിന്നോക്കം നില്ക്കുന്ന കുടുംബങ്ങളിലെ യുവതികളെ വിവാഹം ചെയ്ത് കൊടുക്കുന്ന പദ്ധതിക്ക് തുടക്കം കുറിച്ചത്. കഴിഞ്ഞ 22 വർഷങ്ങളിലായി നടന്നുവരുന്ന സമൂഹവിവാഹങ്ങളിൽ ഇതുവരെയായി 697 യുവതികൾ ട്രസ്റ്റിന്‍റെ തണലിൽ കുടുംബ ജീവിതത്തിലേക്ക് പ്രവേശിച്ചിട്ടുണ്ട്.നാലര പവന്‍റെ സ്വർണാഭരണവും അത്യാവശ്യം വേണ്ട വീട്ടുപാത്രങ്ങളും വസ്ത്രങ്ങളും വിവാഹസദ്യയും ട്രസ്റ്റിന്‍റെ വകയാണ്. ട്രസ്റ്റി എ.ആർ. കുട്ടി, സീനിയർ മാനേജർ പി.പരമേശ്വരൻ, സോഷ്യൽ എംപവർമെന്‍റ് മാനേജർ എം.ഹരിദാസ് എന്നിവരുടെ നേതൃത്വത്തിലാണ് ചടങ്ങുകൾ. ഇക്കുറി 22 അപേക്ഷകളാണ് ലഭിച്ചത്. ഇതിൽ നിന്നാണ് 13 പേരെ തെരഞ്ഞെടുത്തത്. വിവാഹത്തിനു മുമ്പും വിവാഹത്തിനു ശേഷവുമുള്ള കൗൺസിലിംഗും കുടുംബജീവിതത്തെക്കുറിച്ച് ബോധവത്കരണവും വരനും വധുവിനും അവരുടെ മാതാപിതാക്കൾക്കും നല്കുന്നുണ്ട്. കൂടുതൽ പഞ്ചായത്തുകളിലേക്ക് ട്രസ്റ്റിന്‍റെ പ്രവർത്തനം വ്യാപിപ്പിക്കുന്നതിനെക്കുറിച്ചും ആലോചനയുണ്ട്.

കാരാകുറുശിയിലും കല്ലടിക്കോട്ടും തെരുവുനായ് ആക്രമണം: ആറുപേർക്ക് കടിയേറ്റു

കല്ലടിക്കോട്: ടിബിക്ക് സമീപവും കാരാകുർശി അരപ്പാറ കവലയിലും ആറുപേരെ തെരുവുനായ കടിച്ചുപരിക്കേൽപ്പിച്ചു. കല്ലടിക്കോട് കളിപ്പറമ്പിൽ വീട്ടിൽ ജയപ്രദീഷിന്‍റെ ഭാര്യ പ്രിയങ്ക (33 ) യ്ക്കാണ്് കല്ലടിക്കോട് യുപി സ്കൂളിന് സമീപത്തുനിന്നു കടിയേറ്റത്. ഉടനെ പാലക്കാട് ജില്ലാ ആശുപത്രിയിൽ എത്തിച്ചു ചികിത്സതേടി. സ്കൂളിലെ പാചക തൊഴിലാളിയായ അമ്മയെ സഹായിക്കാനായി പോയി വരികയായിരുന്നു അവർ. ഗേറ്റിനുപുറത്ത് എത്തിയതോടെ ഒരുകൂട്ടം നായ്ക്കൾ ഓടി അടുത്തേക്ക് വന്നു. നായ്ക്കളെ കണ്ട് ഭയന്ന് തിരിച്ചു സ്കൂളിലേക്ക് കയറിയ പ്രിയങ്കയെ ഒരു നായ ഓടിയെത്തി കടിക്കുകയായിരുന്നു. കല്ലടിക്കോട്, കരിമ്പ, ഇടക്കുർശി, പൊന്നംകോട്, തച്ചമ്പാറ തുടങ്ങിയ പ്രദേശങ്ങളിലെല്ലാം തെരുവുനായ്ക്കൾ വ്യാപകമാണ്. സ്കൂളിൽ പോകുന്ന കുട്ടികളും വഴിയാത്രക്കാരും നായ്ക്കളെ പേടിച്ചാണ് പുറത്തിറങ്ങുന്നത്. മണ്ണാർക്കാട്: കാരാകുറുശിയിൽ അഞ്ചുപേരെ തെരുവുനായ ആക്രമിച്ചു. രൂപൽ (24), സ്വാമിനാഥൻ (72), ഷാജുദ്ദീൻ (35), അമൽ (14), ബൈജു (48) എന്നിവരെയാണ് തെരുവുനായ ആക്രമിച്ചത്. ഇവരെ മണ്ണാർക്കാട് താലൂക്ക് ആശുപത്രിയിൽ എത്തിച്ച് ചികിത്സനൽകി. അരപ്പാറ കവലയിൽ നിന്നിരുന്ന ഇവരെ തെരുവുനായ ഓടിവന്ന് കടിക്കുകയായിരുന്നു. കാരാകുറുശിയിൽ തെരുവുനായ ശല്യം രൂക്ഷമാണെന്നും ഇവയെ നിയന്ത്രിക്കാൻ ഗ്രാമപഞ്ചായത്ത് ഇടപെടണമെന്നും നാട്ടുകാർ ആവശ്യപ്പെട്ടു. ഇതിനുമുമ്പും കാരാകുറുശിയിൽ തെരുവുനായ്ക്കളുടെ ആക്രമണം ഉണ്ടായിട്ടുണ്ടെന്നും അധികൃതർ യാതൊരു നടപടിയും സ്വീകരിച്ചിട്ടില്ലെന്നും നാട്ടുകാർ ആരോപിച്ചു.

കൊലപാതകശ്രമം: കഠിനതടവും പിഴയും

മണ്ണാർക്കാട്: റോഡരികിൽ നിന്നിരുന്നയാളെ വാഹനമിടിച്ച് കൊലപ്പെടുത്താൻ ശ്രമിച്ച പ്രതിക്ക് നാലുവർഷം കഠിനതടവും 25,000 രൂപ പിഴയും ശിക്ഷ. നാട്ടുകൽ തള്ളച്ചിറ പള്ളിത്താഴത്ത് പുതിയ മാളിയേക്കൽ ഷിഹാബുദ്ദീനെയാണ് മണ്ണാർക്കാട് അഡീഷണൽ സെഷൻസ് കോടതി ജഡ്ജ് ജോമോൻ ജോൺ ശിക്ഷിച്ചത്. പിഴയടച്ചില്ലെങ്കിൽ ആറുമാസത്തെ അധിക കഠിനതടവ് അനുഭവിക്കണം. 2016 ഫെബ്രുവരി നാലിന് വൈകുന്നേരം ഏഴരയോടെ നാട്ടുകൽ തള്ളച്ചിറ റോഡരികിൽ നിന്നിരുന്ന തള്ളച്ചിറമലയിൻ കണ്ടത്തിൽ വീട്ടിൽ ജനാർദനന്‍റെ മകൻ നിഖിലിനെയാണ് പ്രതി വാഹനമിടിച്ചു കൊലപ്പെടുത്താൻ ശ്രമിച്ചത്. തനിക്കെതിരെ കേസ് നൽകിയതിന്‍റെ വിരോധത്തിലാണ് കൃത്യം നടത്തിയത്. നാട്ടുകൽ പോലീസ് സ്റ്റേഷനിൽ രജിസ്റ്റർ ചെയ്ത കേസിൽ അന്നത്തെ സബ് ഇൻസ്പെക്ടർ വി.എസ്. മുരളീധരനാണ് കേസ് അന്വേഷിച്ചത്. പ്രോസിക്യൂഷന് വേണ്ടി അഡ്വ. പി. ജയൻ ഹാജരായി.

കാട്ടുപന്നിയെ വെടിവച്ചുകൊന്നു

നെന്മാറ: വല്ലങ്ങി ചേരാമംഗലം കോരാംപറമ്പിൽ വീട്ടുവളപ്പിൽ ഭീഷണി ഉയർത്തിയ കാട്ടുപന്നിയെ വെടിവെച്ചുകൊന്നു. കോരാൻപറമ്പ് നന്ദനം വീട്ടിൽ രാമകൃഷ്ണന്‍റെ വീട്ടുവളപ്പിലാണ് ദിവസങ്ങളായി രാത്രിസമയങ്ങളിൽ കാട്ടുപന്നികൾ വിഹാരം നടത്തുന്നതും പച്ചക്കറി, ചേന, ചേമ്പ്, വാഴ തുടങ്ങിയ കാർഷികവിളകൾ നശിപ്പിക്കുകയും വീട്ടുകാർക്ക് പുറത്തിറങ്ങാൻ കഴിയാത്ത സ്ഥിതിയുമായിരുന്നു. സമീപത്തെ റോഡിലൂടെയുള്ള ഇരുചക്രവാഹനക്കാർക്ക് നേരെയും പുറകെ ഓടിയും കാട്ടുപന്നി ഭീഷണി ഉണ്ടാക്കിയിരുന്നു. സഹികെട്ട രാമകൃഷ്ണനും പ്രദേശവാസികളും ചേർന്നാണ് വനംവകുപ്പിന്‍റെ ഷൂട്ടർമാരുടെ പാനലിൽ ഉൾപ്പെട്ട പി. വിജയൻ ചാത്തമംഗലം, എം. ശിവദാസൻ പെരുമാങ്കോട് എന്നിവരുടെ സഹായം തേടിയത്. കഴിഞ്ഞദിവസം രാത്രി പത്തുമണിയോടെ വീടിന് സമീപം എത്തിയ രണ്ടു കാട്ടുപന്നികളിൽ ഒന്നിനെ ഷൂട്ടർമാർ വെടിവെച്ചുകൊന്നു. വനം വകുപ്പ് മാനദണ്ഡപ്രകാരം കുഴിച്ചുമൂടി.

ഹരിത ഡെസ്റ്റിനേഷനാകാനൊരുങ്ങി നെല്ലിയാന്പതി; ഒക്ടോബർ രണ്ടുമുതൽ പ്ലാസ്റ്റിക് നിരോധനം

പാലക്കാട്: ജില്ലയിലെ പ്രമുഖ വിനോദസഞ്ചാര കേന്ദ്രമായ നെല്ലിയാന്പതിയെ സന്പൂർണ പ്ലാസ്റ്റിക് വിമുക്ത മേഖലയാക്കി ഹരിത ഡെസ്റ്റിനേഷൻ പദവിയിലേക്ക് ഉയർത്താൻ ജില്ലാ ഭരണകൂടം ഒരുങ്ങുന്നു. ഇതിന്‍റെ ഭാഗമായി ഒക്ടോബർ രണ്ട് മുതൽ ഇവിടെ ഒറ്റത്തവണ ഉപയോഗിക്കുന്ന പ്ലാസ്റ്റിക് ഉത്പന്നങ്ങൾക്ക് കർശന നിരോധനം ഏർപ്പെടുത്തും. മലയോര ടൂറിസം കേന്ദ്രങ്ങളിൽ പ്ലാസ്റ്റിക് നിരോധിക്കണമെന്ന ഹൈക്കോടതി ഉത്തരവിന്‍റെ പശ്ചാത്തലത്തിൽ കളക്ടറേറ്റ് ചേംബറിൽ ചേർന്ന യോഗത്തിലാണ് ജില്ലാ കളക്ടർ ജി. പ്രിയങ്ക ഇതു സംബന്ധിച്ച നിർദേശം നൽകിയത്. പദ്ധതിയുടെ സുഗമമായ നടത്തിപ്പിനായി വിവിധ വകുപ്പുകളെ ഏകോപിപ്പിച്ച് കൃത്യമായ കർമപദ്ധതി രൂപീകരിക്കാൻ ജില്ല കളക്ടർ ഉദ്യോഗസ്ഥർക്ക് നിർദേശം നൽകി. അഞ്ച് ലിറ്ററിൽ താഴെയുള്ള വെള്ളക്കുപ്പികൾ, ഒറ്റത്തവണ ഉപയോഗിക്കുന്ന പ്ലാസ്റ്റിക് കണ്ടെയ്നറുകൾ, പാത്രങ്ങൾ, കന്പോസ്റ്റ് ചെയത് ഉപയോഗിക്കാവുന്ന പ്ലാസ്റ്റിക് കപ്പുകൾ, പ്ലേറ്റുകൾ, ബാഗുകൾ, പ്ലാസ്റ്റിക് സാഷെകൾ, വിനൈൽ അസറ്റേറ്റ്, മാലിക് ആസിഡ്, വിനൈൽ ക്ലോറൈഡ് കോപോളിമർ എന്നിവ അടങ്ങിയ സ്റ്റോറേജ് ഐറ്റംസ്, നോണ്‍ വുവണ്‍ കാരി ബാഗുകൾ, ലാമിനേറ്റ് ചെയത ബേക്കറി ബോക്സുകൾ, രണ്ട് ലിറ്ററിൽ താഴെയുള്ള സോഫ്റ്റ് ഡ്രിങ്ക് കുപ്പികൾ എന്നിവ നിരോധിച്ചവയിൽ ഉൾപ്പെടും. പകരമായി വാട്ടർകിയോസ്കുകൾ, സ്റ്റെയിൻലസ് സ്റ്റീൽ ഗ്ലാസ്, കോപ്പർ ബോട്ടിലുകൾ, പാള പോലുള്ള പ്രകൃതിദത്തവസ്തുക്കൾ ഉപയോഗിച്ചുള്ള കണ്ടെയ്നറുകൾ, സ്റ്റീൽ, മരം, മണ്ണ്, കോപ്പർ ഉപയോഗിച്ചുള്ള പാത്രങ്ങൾ, ഫില്ലിംഗ് സ്റ്റേഷനുകൾ, തുണിയോ പേപ്പറോ ഉപയോഗിച്ചുള്ള ബാഗുകൾ, മെറ്റൽ കണ്ടെയ്നറുകൾ, എന്നിവയാണ് ഉപയോഗിക്കേണ്ടത്. നെല്ലിയാന്പതി ഹിൽ സ്റ്റേഷനുമായി ബന്ധപ്പെട്ട തദ്ദേശ സ്വയംഭരണ സ്ഥാപനങ്ങളിലെ പ്രതിനിധികൾ, വിവിധ വകുപ്പുകൾ, അസോസിയേഷനുകൾ, സന്നദ്ധ സംഘടനകൾ എന്നിവരെ ഉൾപ്പെടുത്തി സബ് കമ്മിറ്റി രൂപീകരിക്കും. പിന്നീട് ഹരിത ചെക്ക്പോസ്റ്റ്, പ്രചാരണം, ബോധവത്കരണ എക്സിബിഷൻ, കുടിവെള്ള ലഭ്യത എന്നീ വിഷയങ്ങളെ അടിസ്ഥാനമാക്കി 15 ദിവസത്തിനുള്ളിൽ ആക്ഷൻ പ്ലാൻ തയ്യാറാക്കി യോഗം ചേരും. ഭാവി തലമുറയ്ക്ക് കരുതലും വിനോദ സഞ്ചാരികൾക്ക് നെല്ലിയാന്പതിയുടെ യഥാർഥ സൗന്ദര്യം കലർപ്പില്ലാതെ ആസ്വദിക്കുന്നതിന് പ്ലാസ്റ്റിക് നിരോധനം ഗുണകരമാകുമെന്ന് ജില്ലാ കളക്ടർ പറഞ്ഞു. തദ്ദേശ സ്വയം ഭരണ വകുപ്പ് ജോയിന്‍റ് ഡയറക്ടർ സജി തോമസ്, ജില്ലാ ശുചിത്വ മിഷൻ കോ-ഓർഡിനേറ്റർ ജി. വരുണ്‍, ത്രിതല പഞ്ചായത്ത് പ്രതിനിധികൾ, വിവിധ വകുപ്പ് ഉദ്യോഗസ്ഥർ, പ്ലാന്‍റേഷൻ ഹോട്ടൽ ആൻഡ് റസ്റ്റോറന്‍റ് വ്യാപാരി സംഘടനാ പ്രതിനിധികൾ, സന്നദ്ധ സംഘടനാ പ്രവർത്തകർ തുടങ്ങിയവർ യോഗത്തിൽ പങ്കെടുത്തു.

നെല്ലിയാമ്പതി മട്ടത്ത്പാടിയിൽ കാട്ടാനയിറങ്ങി; നാട്ടുകാർക്ക് ഉറക്കമില്ലാത്ത രാത്രി

നെല്ലിയാമ്പതി: ജനവാസമേഖലയിൽ ഇറങ്ങിയ കാട്ടാന പ്രദേശവാസികളെ ഭീതിയിലാക്കി. കഴിഞ്ഞദിവസം രാത്രി എട്ടോടെ ചന്ദ്രാമല എസ്റ്റേറ്റിലെ മട്ടത്ത്പാടിയിൽ എത്തിയ ഒറ്റയാനാണ് പ്രദേശത്തെ 40 ഓളം വീട്ടുകാരെ കഴിഞ്ഞദിവസം രാത്രി ഭീതിയിലാക്കിയത്. കാട്ടാന നടന്ന വഴിയിലെ വൈദ്യുതി വയറുകൾ പോസ്റ്റിൽ നിന്നു പൊട്ടിവീണതോടെ വീടുകളിലെ വൈദ്യുതി നിലച്ചു. പട്ടികളും പശുക്കളും പേടിച്ച് ഒച്ച വച്ചതോടെയാണ് ആനയുടെ സാന്നിധ്യം പാടിയിൽ ഉള്ളവർ അറിയുന്നത്. നെല്ലിയാമ്പതി കൈകാട്ടിയിലെ വനംസ്റ്റേഷനിൽ വിവരമറിയിച്ചതിനെ തുടർന്ന് വനപാലകൻ എത്തിയെങ്കിലും ആനയെ തുരത്താൻ നടപടി കൈക്കൊണ്ടില്ല. ഏറെനേരം പാടികൾക്ക് സമീപത്തും നിർത്തിയിട്ടിരുന്ന വാഹനങ്ങൾക്ക് സമീപത്തുകൂടെയും കറങ്ങിനടന്നെങ്കിലും വാഹനങ്ങൾ ആക്രമിച്ചില്ല. താമസക്കാർ ബഹളംവച്ചതോടെ ആന പ്രകോപനത്തോടെ ആളുകൾക്ക് നേരെ പാഞ്ഞുവന്നുവെന്ന് പ്രദേശവാസികൾ പറഞ്ഞു. വീടുകളിലെ ജനലുകളും വാതിലുകളിലും മുട്ടി തുറക്കാൻ ശ്രമിച്ചശേഷം പാടികൾക്ക് സമീപമുള്ള പ്ലാവിലെ ചക്ക പറിച്ചുതിന്നാണ് കാട്ടാന മടങ്ങിയത്. ആന കൂടുതൽ ശല്യമായാൽ പടക്കം പൊട്ടിക്കാൻ നിർദേശിച്ച് വനം ജീവനക്കാർ രാത്രി മടങ്ങി. പ്രദേശത്ത് പതിവായി കാണാറുള്ള കാട്ടാനയല്ല ഇതെന്നും ആക്രമണസ്വഭാവം കാണിക്കുന്നതിനാൽ മറ്റു പ്രദേശത്തുനിന്ന് വന്നവയാണെന്നും പാടിയിലുള്ളവർ പറഞ്ഞു. കഴിഞ്ഞയാഴ്ച പുലയമ്പാറ, സീതാർകുണ്ട്, ഊത്തുകുഴി മേഖലകളിൽ ഭീതി പടർത്തിയ കാട്ടാനയാണിതെന്നും കൊല്ലങ്കോട് റേഞ്ച് വനംജീവനക്കാർ വനത്തിലേക്ക് തുരത്തിയ കാട്ടാന മടങ്ങിയെത്തിയതാണ് ഇതെന്നും പ്രദേശവാസികൾ സാക്ഷ്യപ്പെടുത്തുന്നു. പകൽസമയം വനമേഖലയോട് ചേർന്ന സ്ഥലങ്ങളിൽ ഒളിച്ചു കഴിയുന്ന ഒറ്റയാൻ രാത്രിയാണ് ജനവാസ മേഖലകളിലേക്ക് എത്തുന്നത്. ആക്രമണസ്വഭാവം കാണിക്കുന്ന ഈ ആനയെ പറമ്പിക്കുളം വനമേഖലയിലേക്ക് തുരത്തണമെന്ന് പ്രദേശവാസികൾ ആവശ്യപ്പെട്ടു. രണ്ടാഴ്ചമുമ്പ് ചന്ദ്രാമല എസ്റ്റേറ്റ് സൂപ്പർവൈസറുടെ വീട്ടിലെ വാതിൽ തള്ളിത്തുറന്ന് വീട്ടുസാധനങ്ങളും ചക്കയും എടുത്തുകൊണ്ടുപോയ ആനയാണിതെന്ന് ചന്ദ്രാമല എസ്റ്റേറ്റിലെ തൊഴിലാളികൾ പറയുന്നു.

വാഹനാപകടത്തിൽ പരിക്കേറ്റ സുബ്രഹ്മണ്യന്‍റെ കുടുംബത്തിന് താങ്ങായി സുമനസുകളെത്തി

വടക്കഞ്ചേരി: വാഹനാപകടത്തിൽ പരിക്കേറ്റ് ചികിത്സയിൽ കഴിയുന്ന വണ്ടാഴി പഞ്ചായത്ത് ഓഫീസിനടുത്തെ സുബ്രഹ്മണ്യനും കുടുംബത്തിനും സുമനസുകളുടെ സഹായഹസ്തം. വടക്കഞ്ചേരി കേന്ദ്രീകരിച്ച് പ്രവർത്തിക്കുന്ന സിഗ്നേച്ചർ കൂട്ടായ്മ ഇടപ്പെട്ട് ഏറ്റവും അടിയന്തരമായി ആവശ്യമുള്ള കട്ടിൽ നൽകി. പഞ്ചായത്ത് പ്രസിഡന്‍റ് കെ.എൽ. രമേഷ് മരത്തിന്‍റെ കട്ടിൽ കൈമാറി. സ്റ്റാൻഡിംഗ് കമ്മിറ്റി ചെയർമാൻ പി.ശശികുമാർ, വാർഡ് മെംബർ സുരേഷ്, ഗഫൂർ മുടപ്പല്ലൂർ എന്നിവരുമുണ്ടായിരുന്നു. മറ്റു അടിസ്ഥാന ആവശ്യങ്ങൾ നിറവേറ്റുന്നതിനും ഉദാരമതികളുടെയും പഞ്ചായത്തിന്‍റെയും ഇടപെടലുകളുമുണ്ട്. സുബ്രഹ്മണ്യന്‍റെ ദൈന്യസ്ഥിതി സംബന്ധിച്ച് ചൊവ്വാഴ്ചയിലെ ദീപിക പത്രത്തിലാണ് തറയിൽ കിടക്കുന്ന സുബ്രഹ്മണ്യന്‍റെ പടം സഹിതം വാർത്ത നൽകിയത്. വാർത്ത കണ്ട് ഫാ. ബെറ്റ്സൺ തുക്കുപറമ്പിൽ സുബ്രഹ്മണ്യനെ സഹായിക്കണമെന്ന ആവശ്യവുമായി സിഗ്നേച്ചർ കൂട്ടായ്മയുമായി ബന്ധപ്പെട്ട് ഇടപെടലുകൾക്ക് വേഗത കൂട്ടി. പിന്നെ വൈകിയില്ല. സിഗ്നേച്ചർ കോ-ഓർഡിനേറ്റർ സി.കെ. ഉണ്ണികൃഷ്ണൻ കൂട്ടായ്മയിലെ തന്നെ ടി.എം. ശശി ഉൾപ്പെടെയുള്ളവരെ ഇതിനായി ചുമതലപ്പെടുത്തി. മണിക്കൂറുകൾക്കുള്ളിൽ തന്നെ സഹായമെത്താൻ തുടങ്ങി. കട്ടിൽ സ്പോൺസർ ചെയ്തയാൾ പേര് വെളിപ്പെടുത്താൻ ആഗ്രഹിക്കുന്നില്ല. സുബ്രഹ്മണ്യന് ഇനി ചികിത്സ തുടരണം. 11 മാസം മുമ്പാണ് വീടിനടുത്ത് വച്ച് സുബ്രഹ്മണ്യ (53)നെ ബൈക്ക് ഇടിച്ചത്. അപകടത്തിൽ ഇടുപ്പിലും കാലിനും ഗുരുതരമായി പരിക്കേറ്റിരുന്നു. താലൂക്ക്, ജില്ലാ ആശുപത്രികളിലെ ചികിത്സകൾക്കു ശേഷവും ഇപ്പോഴും സ്വയം എഴുന്നേറ്റു നടക്കാനോ സ്വന്തം കാര്യങ്ങൾക്കോ സുബ്രഹ്മണ്യന് ആകുന്നില്ല. ഭാര്യ കൂലിപ്പണിക്ക് പോയി കിട്ടുന്ന തുച്ഛമായ വരുമാനം കൊണ്ടാണ് ചികിത്സകളും വീട്ടു ചെലവുകളും നടക്കുന്നത്. ഇത്രയും വേഗത്തിൽ ആഗ്രഹം സഫലമായതിന്‍റെ സന്തോഷവും സഹായം നൽകിയവരോട് പ്രത്യേകം നന്ദിയുമുണ്ടെന്നും സുബ്രഹ്മണ്യൻ പറഞ്ഞു.

ഒറ്റപ്പാലത്തു തെരുവുനായ്ക്കൾക്കു വാക്സിനേഷൻ പുരോഗമിക്കുന്നു

ഒറ്റപ്പാലം: നഗരസഭാ പ്രദേശത്ത് തെരുനായ്ക്കൾക്കു വാക്സിനേഷൻ നൽകുന്ന പ്രവർത്തനങ്ങൾ പുരോഗമിക്കുന്നു. ഒറ്റപ്പാലം നഗരത്തിൽ നിന്നുമാത്രം ഇതിനകം നൂറിലധികം തെരുവുനായ്ക്കൾക്കു വാക്സിൻ നൽകിക്കഴിഞ്ഞതായി അധികൃതർ പറഞ്ഞു. വാക്സിൻ കൊടുത്തു കഴിഞ്ഞാൽ പെയിന്‍റടിച്ചു വിടുകയാണ് ചെയ്യുന്നത്. ഓരോ ദിവസവും എത്ര നായ്ക്കൾക്കു വാക്സിൻ നൽകിയെന്നു പരിശോധിക്കാൻ നഗരസഭയിൽനിന്ന് ഒരു ജീവനക്കാരനെയും ചുമതലപ്പെടുത്തിയിട്ടുണ്ട്. വളരെ ശ്രമകരമായ ദൗത്യമാണ് ദ്രുതഗതിയിൽ നടക്കുന്നത്. അതേസമയം പിടിക്കാനെത്തുന്ന വാഹനങ്ങളെ കാണുമ്പോഴെക്കും നായ്ക്കൾ ഓടിമാറുകയാണ്. മുഴുവൻ തെരുവുനായ്ക്കൾക്കും വാക്സിൻ നൽകണമെന്നാണ് നഗരസഭയുടെ നിർദേശം.

എലിപ്പനി പടരുന്നു; ജാഗ്രത പാലിക്കണം

പാലക്കാട്: ജില്ലയുടെ വിവിധ ഭാഗങ്ങളിൽ എലിപ്പനി റിപ്പോർട്ടുചെയ്ത സാഹചര്യത്തിൽ പൊതുജനങ്ങൾ അതീവജാഗ്രത പാലിക്കണമെന്നു ജില്ലാ മെഡിക്കൽ ഓഫീസർ (ആരോഗ്യം) അറിയിച്ചു. സ്വയം ചികിത്സ ഒഴിവാക്കണമെന്നും രോഗലക്ഷണങ്ങൾ കണ്ടാൽ അടുത്തുളള ആരോഗ്യപ്രവർത്തകരെ വിവരമറിയിച്ചു ചികിത്സ തേടേണ്ടതാണെന്നും അറിയിച്ചു.ലെപ്റ്റോസ്പൈറ എന്ന ബാക്ടീരിയയാണ് എലിപ്പനിക്കു കാരണമാകുന്നത്. പ്രധാനമായും എലികളുടെ മൂത്രത്തിലൂടെയാണു രോഗാണുക്കൾ വ്യാപിക്കുന്നത്. നായ്ക്കൾ, ആടുമാടുകൾ, പന്നികൾ തുടങ്ങിയ വളർത്തുമൃഗങ്ങളും ചിലപ്പോൾ രോഗാണുവാഹകരാകാൻ സാധ്യതയുണ്ടെന്നും മുന്നറിയിപ്പിൽ പറയുന്നു. എലിമൂത്രം കലർന്നമണ്ണും കെട്ടിക്കിടക്കുന്ന വെള്ളവുമാണ് രോഗവ്യാപനത്തിനുള്ള പ്രധാന കാരണം. മഴ പെയ്യുന്പോൾ എലിമാളങ്ങളിൽ വെള്ളം കയറുന്നത് എലികളെ പുറത്തു കൊണ്ടുവരികയും വെള്ളം വ്യാപകമായി മലിനമാകുകയും ചെയ്യുന്നതിലൂടെ രോഗം പടരാനുള്ള സാധ്യത വർധിക്കുന്നു. കെട്ടിക്കിടക്കുന്ന വെള്ളത്തിലും ഈർപ്പമുള്ള മണ്ണിലും രണ്ടോ മൂന്നോ മാസം വരെ എലിപ്പനി ഭീഷണി നിലനിൽക്കും. രോഗാണു ശരീരത്തിൽ പ്രവേശിച്ചാൽ പത്തു പതിനാലു ദിവസങ്ങൾക്കകം രോഗലക്ഷണങ്ങൾ പ്രത്യക്ഷപ്പെടും. മറ്റു പകർച്ച പനികൾക്കുണ്ടാകുന്ന സമാന ലക്ഷണങ്ങളാണ് ആരംഭത്തിൽ എലിപ്പനിക്ക് ഉണ്ടാകുന്നതെങ്കിലും അൽപം ശ്രദ്ധിച്ചാൽ എലിപ്പനിയാണോ എന്നു മനസിലാക്കാം. രോഗവ്യാപനത്തെപ്പറ്റിയും രോഗലക്ഷണങ്ങളെപ്പറ്റിയുമുളള അറിവില്ലായ്മയും വൈറൽ പനി ആയിരിക്കാമെന്നു കരുതി ചികിത്സ വൈകിപ്പിക്കുന്നതുമാണ് എലിപ്പനിമൂലം മരണം സംഭവിക്കുന്നതിന്‍റെ പ്രധാന കാരണം. ഏതു പനി ആയാലും തുടങ്ങി ദിവസങ്ങൾക്കകംതന്നെ രോഗനിർണയം നടത്തി ശരിയായ ചികിത്സ ലഭ്യമാക്കണമെന്നും ജില്ലാ മെഡിക്കൽ ഓഫീസർ അറിയിച്ചു.

നെന്മാറ ബ്ലോക്ക് പഞ്ചായത്തിന്‍റെ വനിതാഹോസ്റ്റൽ മൂന്നുമാസത്തിനകം

നെന്മാറ: ബ്ലോക്ക് പഞ്ചായത്തിന്‍റെ നേതൃത്വത്തിൽ ജില്ലാ പഞ്ചായത്തിന്‍റെയും എലവഞ്ചേരി ഗ്രാമപഞ്ചായത്തിന്‍റെയും സഹകരണത്തോടെ നിർമിക്കുന്ന വനിതാഹോസ്റ്റലിന്‍റെ പ്രവൃത്തി അന്തിമഘട്ടത്തിൽ. എലവഞ്ചേരി ഗ്രാമപഞ്ചായത്തിൽ പതിനാലാം വാർഡ് തെന്മലയോരത്താണ് ഹോസ്റ്റലിന്‍റെ നിർമാണം. കഴിഞ്ഞ മൂന്ന് സാന്പത്തിക വർഷങ്ങളിലായി നെന്മാറ ബ്ലോക്ക് പഞ്ചായത്ത് വിഹിതമായ 1.5 കോടി രൂപയും ജില്ലാ പഞ്ചായത്ത് വിഹിതമായ ഒരുകോടിരൂപയും ഉൾപ്പെടെ ആകെ 2.5 കോടി രൂപയോളം വകയിരുത്തിയാണ് പദ്ധതി നടപ്പാക്കുന്നത്. ഏകദേശം 100 വനിതകൾക്ക് താമസിക്കാവുന്ന ഹോസ്റ്റൽ കെട്ടിടമാണ് നിർമിക്കുന്നത്. മൂന്നുമാസത്തിനുള്ളിൽ ഹോസ്റ്റൽ പ്രവർത്തനമാരംഭിക്കുമെന്നു ബ്ലോക്ക് പഞ്ചായത്ത് പ്രസിഡന്‍റ് സി. ലീലാമണി അറിയിച്ചു.

"ഇവിടം മനോഹരമാണ്’പ്രകാശനം ചെയ്തു

ഒറ്റപ്പാലം: സമഗ്രശിക്ഷ കേരള ഒറ്റപ്പാലം ബിആർസിയുടെ കീഴിൽ പ്രവർത്തിക്കുന്ന ഓട്ടിസം സെന്‍ററിലെ കുട്ടികളും രക്ഷിതാക്കളും അധ്യാപരും സംയുക്തമായി തയാറാക്കിയ "ഇവിടം മനോഹരമാണ്’ മാസിക പി. മമ്മിക്കുട്ടി എംഎൽഎ പ്രകാശനം ചെയ്തു. ഓട്ടിസം സെന്‍ററിലെ കുട്ടികൾക്കുള്ള പഠനോപകരണങ്ങളും ചടങ്ങിൽ വിതരണം ചെയ്തു. പത്താംക്ലാസ് പരീക്ഷയിൽ വിജയിച്ച സെന്‍ററിലെ കുട്ടികളെ അനുമോദിച്ചു. സേവനത്തിൽനിന്ന് വിരമിച്ച മുൻ ഒറ്റപ്പാലം ബിപിസി കെ. പ്രഭാകരനെ ആദരിച്ചു. അനങ്ങനടി ഗ്രാമപഞ്ചായത്ത് പ്രസിഡന്‍റ് പി. ചന്ദ്രൻ അധ്യക്ഷനായി. വൈസ് പ്രസിഡന്‍റ് അനിത ടീച്ചർ, സ്ഥിരംസമിതി അധ്യക്ഷർ, സമഗ്ര ശിക്ഷ കേരള ജില്ലാ പ്രോജക്ട് കോ- ഓർഡിനേറ്റർ കെ. കൃഷ്ണകുമാർ, ഒറ്റപ്പാലം ബ്ലോക്ക് പ്രോഗ്രാം കോ- ഓർഡിനേറ്റർ പി.എം. വെങ്കിടേശ്വരൻ എന്നിവർ പ്രസംഗിച്ചു.

പുഴപ്പാലം- പാറക്കളം റോഡ് നവീകരണത്തിനു മുറവിളി

ചിറ്റൂർ: കെഎസ്ആർടിസി ചിറ്റൂർഡിപ്പോ, പുഴപ്പാലം- പാറക്കളം റോഡ് തകർന്നു വാഹനയാത്രികർക്കും കാൽനടക്കാർക്കും ഒരുപോലെ ദുരിതം. കെഎസ്ആർടിസി ജീവനക്കാർക്കു പുറമെ ദീർഘദൂര യാത്രക്കാരും ഡിപ്പോയിൽ എത്തിയാണ് ബസ് കയറുന്നത്. യാത്രക്കാർ കൊണ്ടുവരുന്ന വാഹനങ്ങൾ നിർത്തിയിടുന്നതും ഡിപ്പോ കോമ്പൗണ്ടിലാണ്. ചിറ്റൂർ - തത്തമംഗലം നഗരസഭാ പരിധിയിൽ വരുന്ന ഈ റോഡ് പാലത്തുള്ളി, പാറക്കളം ഭാഗത്തേക്കുള്ള സഞ്ചാരമാർഗം കൂടിയാണ്. നഗരസഭാ ഗുണഭോക്താക്കളുടെ യോഗങ്ങളിൽ സ്ഥിരം പരാതി ഉയരാരുണ്ടെങ്കിലും റോഡ് എപ്പോഴും തകർന്നുതന്നെ. വലിയ കുഴികളെങ്കിലും നികത്തി സഞ്ചാരയോഗ്യമാക്കണമെന്നാണ് ഇതിലൂടെ കടന്നുപോകുന്നവരുടെ ആവശ്യം.

റോഡരികിൽ പാഴ്ചെടികൾ പന്തലിച്ചു; കാട്ടുപന്നി, വിഷപ്പാന്പ്, തെരുവുനായശല്യം രൂക്ഷം

തത്തമംഗലം: മേട്ടുപ്പാളയത്തുനിന്നും ചിറ്റൂരിലേക്കുള്ള റോഡിലൂടെ യാത്ര ഭീതിജനകം. റോഡരികിൽ പടർന്നുപന്തലിച്ച പാഴ്ചെടികൾക്കിടയിൽനിന്ന് ഏതുസമയവും കാട്ടുപന്നി, തെരുവുനായകൾ ചാടിവീഴാം. പകൽസമയത്തുപോലും കൂറ്റൻ പന്നികൾ റോഡുമുറിച്ചു കടക്കുന്നതാണ് യാത്രികരെ ഏറെ വലയ്ക്കുന്നത്. പാന്പുകളുണ്ടാകാൻ സാധ്യതയുള്ളതിനാൽ കാൽനടയാത്രക്കാരും ഭീതിയോടെയാണ് ഇതിലൂടെ സഞ്ചരിക്കുന്നത്. പാഴ്ചെ ടികൾ വെട്ടിമാറ്റി ദുരിതത്തിനു പരിഹാരം കാണണമെന്നാണ് പ്രദേശവാസികളുടെയും ആവശ്യം.

അർഹതപ്പെട്ടവർക്കെല്ലാം വീട് നൽകും: കാഞ്ഞിരപ്പുഴ പഞ്ചായത്ത് ഭരണസമിതി

മണ്ണാർക്കാട്: ലൈഫ് മിഷൻ പദ്ധതിയുടെ പേരിൽ പഞ്ചായത്തിനേയോ സർക്കാരിനെയോ ഇകഴ്ത്തി കാണിക്കാനുള്ള യുഡിഎഫിന്‍റെ ഒരു നടപടിയും വിലപ്പോവില്ലെന്ന് കാഞ്ഞിരപ്പുഴ പഞ്ചായത്ത് ഭരണസമിതി പത്രസമ്മേളനത്തിൽ പറഞ്ഞു. പഞ്ചായത്ത് ഭരണസമിതി 2025 - 26 സാമ്പത്തിക വർഷത്തിൽ സിഎഫ്സി ബേസിക് ഗ്രാൻഡിൽ നിന്ന് 52,58,500 രൂപയും പഞ്ചായത്ത് തനത് ഫണ്ടിൽനിന്ന് 47,41,500 രൂപയും ഉപയോഗപ്പെടുത്തി ഒരുകോടി രൂപ ലൈഫ് ഭവന പദ്ധതിക്കായി നീക്കിവെച്ചിരുന്നു. പട്ടികജാതി വിഭാഗത്തിൽപ്പെട്ടവർക്ക് വീട് നിർമാണത്തിന് 25,20,000 രൂപയും പട്ടികവർഗവിഭാഗത്തിന് 9, 20,000 രൂപയും വകയിരുത്തി. പിഎംഎവൈയിൽ ഉൾപ്പെട്ട ഉപഭോക്താക്കൾക്ക് ജനറൽ വിഭാഗത്തിൽ 59,88,000 രൂപയും പട്ടികജാതി വിഭാഗത്തിൽ 20 ലക്ഷവും പട്ടികവർഗ വിഭാഗത്തിൽ അഞ്ചുലക്ഷം രൂപയും അനുവദിച്ചു. സർവേ പൂർത്തിയായി മാനദണ്ഡങ്ങൾക്കനുസരിച്ച് 250 വീടുകൾ നിർമിക്കുന്നതിന് ആദ്യഗഡുവായി 40,000 രൂപ നൽകുന്നതിനാണ് ഈ തുക മാറ്റിവച്ചത്. ഈ തുക കൊടുത്താലുടൻ സംസ്ഥാന ഗവൺമെന്‍റിന്‍റെ ഒരു ലക്ഷം രൂപ ഓരോ വീടിനുമുള്ള വിഹിതവും ഇതോടൊപ്പം ലഭിക്കും. എന്നാൽ പ്രവർത്തനങ്ങൾ ഏറ്റെടുത്ത് നടത്തേണ്ട ഗ്രാമസേവകൻ തികഞ്ഞ അലംഭാവമാണ് കാണിച്ചത്. പഞ്ചായത്ത് ഭരണസമിതിയോട് സഹകരിച്ചു പോകാൻ തയാറായില്ല. ഇതിനെതിരായാണ് കഴിഞ്ഞദിവസം പഞ്ചായത്ത് ഭരണസമിതി യോഗത്തിൽ പഞ്ചായത്തംഗം ഷാജഹാന്‍റെ ഇടപെടൽ ഉണ്ടായത്. ലൈഫ് ലിസ്റ്റിൽ ഉൾപ്പെട്ട ആളുകൾക്കെല്ലാം വീട് ലഭ്യമാക്കുന്നതിനുള്ള പ്രവർത്തനങ്ങൾ നടന്നുകൊണ്ടിരിക്കുന്ന ഘട്ടത്തിൽ ഇതിൽ നിന്നും ശ്രദ്ധ തിരിക്കാനാണ് യുഡിഎഫും ബിജെപിയും പദ്ധതി അട്ടിമറിക്കാൻ ഭരണസമിതി ശ്രമിക്കുന്നു എന്ന വാദമുയർത്തി കൊണ്ടുവരുന്നത്. മുഴുവൻ ആളുകൾക്കും വീട് ലഭ്യമാക്കുന്നതിന് വേണടിയുള്ള പ്രവർത്തനങ്ങളുമായി പഞ്ചായത്ത് ഭരണസമിതി മുന്നോട്ടുപോകുമെന്ന് നേതാക്കൾ പറഞ്ഞു. സിപിഎം ലോക്കൽ സെക്രട്ടറി നിസാർ മുഹമ്മദ്, പഞ്ചായത്ത് പ്രസിഡന്‍റ് സതി രാമരാജൻ, വൈസ് പ്രസിഡന്‍റ് സിദ്ദിഖ് ചേപ്പൊടൻ, പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻമാരായ കെ. പ്രദീപ്, സിബി കുര്യൻ, മിനിമോൾ ജോൺ, വാർഡ് മെമ്പർമാരായ എം.കെ. ഷാജഹാൻ, മണി, അംബിക എന്നിവർ പങ്കെടുത്തു.

പാടങ്ങളിൽ അനധികൃത നിർമാണം: പ്രതിഷേധവുമായി കോൺഗ്രസ്

ആലത്തൂർ: കാവശ്ശേരി പഞ്ചായത്തിൽ നീർത്തട സംരക്ഷണ നിയമങ്ങളും ചട്ടങ്ങളും ലംഘിച്ചുകൊണ്ട് വിവിധ നെൽപ്പാടങ്ങളിൽ അനധികൃതമായി നിർമാണ പ്രവൃത്തികൾ നടത്തിയതിനെതിരെ കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ കാവശ്ശേരി കൃഷിഭവനുമുമ്പിൽ പ്രതിഷേധ ധർണ നടത്തി. ഡിസിസി ജനറൽ സെക്രട്ടറി അഡ്വ. തോലന്നൂർ ശശിധരൻ ഉദ്ഘാടനം ചെയ്തു. മണ്ഡലം പ്രസിഡന്‍റ് കെ. ഉദയകുമാർ അധ്യക്ഷത വഹിച്ചു. ബ്ലോക്ക്, മണ്ഡലം ഭാരവാഹികൾ പങ്കെടുത്തു.

വിദഗ്ധസമിതിയെ നിയോഗിക്കണം: വ്യാപാരി സമ്മേളനം

ഒറ്റപ്പാലം: അടച്ചുപൂട്ടുന്ന ചെറുകിട വ്യാപാരികളുടെ പ്രശ്നങ്ങൾ പഠിക്കാൻ സർക്കാർ വിദഗ്ധസമിതിയെ നിയമിക്കണമെന്നു വ്യാപാരി വ്യവസായി ഏകോപനസമിതി ഒറ്റപ്പാലം യൂണിറ്റ് വാർഷിക പൊതുയോഗം ആവശ്യപ്പെട്ടു. ജില്ലാ പ്രസിഡന്‍റ് ബാബു കോട്ടയിൽ ഉദ്ഘാടനംചെയ്തു. യൂണിറ്റ് പ്രസിഡന്‍റ് പി.പി. അബ്ദുൾ ലത്തീഫ് അധ്യക്ഷനായി. യൂത്ത് വിംഗ് ജില്ലാ പ്രസിഡന്‍റ് ഷമീർ മണ്ണാർക്കാട് ഉദ്ഘാടനംചെയ്തു. എസ്എസ്എൽസി, പ്ലസ്ടു പരീക്ഷകളിൽ ഉന്നതവിജയം നേടിയ വ്യാപാരികളുടെ മക്കളെ അനുമോദിച്ചു. ജില്ലാ, മണ്ഡലം നേതാക്കളെ ആദരിച്ചു. സ്നേഹസ്പർശം പരസ്പര സഹായ പദ്ധതിയുടെ നറുക്കെടുപ്പ് മണ്ഡലം പ്രസിഡന്‍റ് മരക്കാർ മുരുക്കുംപറ്റ നിർവഹിച്ചു. ജില്ലാ വൈസ് പ്രസിഡന്‍റ് മുസ്തഫ മുളയങ്കാവ്, ജില്ലാ സെക്രട്ടറി ഒ. അരവിന്ദാക്ഷൻ, യൂത്ത് വിംഗ് ജില്ലാ ജനറൽ സെക്രട്ടറി ഷിഹാബ് കൊപ്പം, ഗിരീഷ് പത്തിരിപ്പാല, കരീം കൂട്ടിലക്കടവ്, ജിനീഷ് നെന്മാറ, യൂണിറ്റ് ജനറൽ സെക്രട്ടറി കെ.പി. മുഹമ്മദ്‌ സലീം, ട്രഷറർ കെ.ടി. സുരേഷ് ബാബു, വർക്കിംഗ് പ്രസിഡന്‍റ് പി.വി. ബഷീർ, മുഹമ്മദ്‌ അഫ്സൽ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]