കുവൈത്ത് സിറ്റി: കേരള ആർട്ട് ലവേഴ്സ് അസോസിയേഷൻ, കല കുവൈറ്റ് നടത്തി വരുന്ന ഏറ്റവും വലിയ സാംസ്കാരിക ദൗത്യമായ സൗജന്യ മാതൃഭാഷ പഠന പദ്ധതിയുടെ പ്രവർത്തനങ്ങൾ ഏകോപിപ്പിക്കുന്നതിനായി മാതൃഭാഷാ ജനകീയ സമിതി രൂപീകരിച്ചു. അബാസിയ കല സെന്‍ററിൽ കല കുവൈറ്റ് പ്രസിഡന്‍റ് ആർ. നാഗനാഥന്‍റെ അധ്യക്ഷതയിൽ ചേർന്ന രൂപീകരണ യോഗത്തിൽ കുവൈത്തിലെ സാമൂഹിക, സാംസ്കാരിക രംഗത്തെ പ്രമുഖർ പങ്കെടുത്തു. കല കുവൈറ്റ് ജനറൽ സെക്രട്ടറി സജി തോമസ് മാത്യു ഈ വർഷത്തെ പഠന പ്രവർത്തങ്ങളെക്കുറിച്ച് വിശദീകരിച്ചു. മലയാളം മിഷൻ കുവൈറ്റ് ചാപ്റ്റർ ചീഫ് കോർഡിനേറ്റർ ജെ.സജി സംസാരിച്ചു.
കുവൈത്തിലെ പ്രമുഖ സാമൂഹിക സാംസ്കാരിക പ്രവർത്തകരായ ജോണ് മാത്യു, രാഘുനാഥൻ നായർ, ജോണ് തോമസ്, ജോയ് മുണ്ടക്കാടൻ, ജോസഫ് പണിക്കർ എന്നിവർ രക്ഷാധികാരികളായും, സജീവ് എം.ജോർജ് ജനറൽ കണ്‍വീനറും, ഷാജു വി.ഹനീഫ് കണ്‍വീനറുമായുള്ള സമിതിയാണ് മാതൃഭാഷാ പഠന പ്രവർത്തനങ്ങൾക്ക് നേതൃത്വം നൽകുന്നത്. അനീഷ് കല്ലുങ്കൽ (അബാസിയ), മണിക്കുട്ടൻ (അബുഹലീഫ), സജീവ് എബ്രഹാം (ഫഹാഹീൽ), ജോർജ്ജ് തൈമ്മണ്ണിൽ (സാൽമിയ) എന്നിവരാണ് മേഖലാ കണ്‍വീനർമാർ. യോഗത്തിന് കല കുവൈറ്റ് ജോ;സെക്രട്ടറി മുസ്ഫർ സ്വാഗതവും, മാതൃഭാഷാ സമിതി ജനറൽ കണ്‍വീനർ സജീവ് എം.ജോർജ് നന്ദിയും പറഞ്ഞു.
കഴിഞ്ഞ 28 വർഷമായി ഫ്ളാറ്റുകളും, സ്കൂളുകളും കേന്ദ്രീകരിച്ച് കല നടത്തി വന്നിരുന്ന മാതൃഭാഷാ പഠന പ്രവർത്തനം, കഴിഞ്ഞ വർഷം മുതൽ കേരള സര്ക്കാരിന്‍റെ മലയാളം മിഷനുമായി ചേർന്നാണ് നടക്കുന്നത്.
’എവിടെയെല്ലാം മലയാളി അവിടെയെല്ലാം മലയാളം’ എന്ന മുദ്രാവാക്യത്തോടെ കേരള സർക്കാർ രൂപീകരിച്ച മലയാളം മിഷന്‍റെ പ്രവർത്തനങ്ങൾ ഗൾഫ് നാടുകളിലെല്ലാം സജീവമായിട്ടുണ്ട്. കണിക്കൊന്ന, സൂര്യകാന്തി, ആന്പൽ, നീലക്കുറിഞ്ഞി തുടങ്ങി നാല് കോഴ്സുകളാണ് മലയാളം മിഷൻ നടത്തുന്നത് . നാല് പരീക്ഷകളും വിജയിക്കുന്ന പക്ഷം പത്താം ക്ലാസ്സ് തത്തുല്യ സർട്ടിഫിക്കറ്റാണ് വിദ്യാർത്ഥിക്ക് ലഭിക്കുക. ആദ്യഘട്ടമായ കണിക്കൊന്നയുടെ പരീക്ഷ വിജയകരമായി നടത്തുവാൻ മലയാളം മിഷൻ കുവൈത്ത് ചാപ്റ്ററിനു സാധിച്ചു.
കല കുവൈറ്റിന്‍റെ നാല് മേഖലകളിലായി ക്ലാസുകൾ ആരംഭിച്ചിട്ടുണ്ട്. പഠന പദ്ധതിയിൽ ചേരാൻ താല്പര്യമുള്ള വിദ്യാർത്ഥികൾക്ക് കല കുവൈറ്റ് വെബ്സൈറ്റായ www.kalakuwait.com വഴി രജിസ്റ്റർ ചെയ്യാവുന്നതാണ്.
അബ്ബാസിയ - 69330304, 50292779, 24317875, അബുഹലീഫ - 51358822, 60084602, ഫഹഹീൽ 65092366, 97341639, സാൽമിയ 66736369, 66284396
റിപ്പോർട്ട്: സലിം കോട്ടയിൽ