അൽ ഐൻ : ചെറിയ പശ്ചാത്തലത്തിൽ നിന്ന് ’സൈഹ്വാനിലെ പൂച്ചക്കുട്ടി’യെന്ന വലിയ സിനിമ മെനയുവാൻ അൽ ഐനിലെ ഒരു കൃഷിത്തോട്ടത്തിലും പരിസരങ്ങളിലും ഏതാനും ആഴ്ചകളായി അഹോരാത്രം അധ്വാനിക്കുന്ന റഷീദ് പാറക്കലിനും സംഘത്തിനുമിടയിലേക്ക് മലയാളത്തിന്‍റെ പ്രിയ സംഗീതജ്ഞനും ചിത്രത്തിലെ പ്രധാന ഗായകനുമായ വിദ്യാധരൻ മാസ്റ്റർ അപ്രതീക്ഷിതമായി കടന്നുവന്നത് വലിയ ആവേശം പരത്തി.
റഷീദ് തന്നെ രചിച്ച് ശിവറാം ചിട്ടപ്പെടുത്തി വിദ്യാധരൻ മാസ്റ്റർ ആലപിച്ച് ഇതിനകം തന്നെ യൂട്യുബിലും മറ്റു സാമൂഹ്യ മാധ്യമങ്ങളിലും വന്പൻ ശ്രദ്ധ നേടിയ ’മഴ ചാറും ഇടവഴിയിൽ’ എന്ന ഗാനം നാഗ്രയിൽ കേൾപ്പിച്ചുകൊണ്ടാണ് സംഘാംഗങ്ങൾ അദ്ദേഹത്തെ സ്വീകരിച്ചത്. ഏതാനും മണിക്കൂറുകൾ ലൊക്കേഷനിൽ ചിത്രീകരണം കണ്ടുനിന്ന വിദ്യാധരൻ, ഇതുവരെ സിനിമയിൽ പറയപ്പെടാത്ത ഗൾഫ് പ്രവാസത്തിന്‍റെ വ്യത്യസ്തപുറം അവതരിപ്പിക്കുകയാണ് ഈ ചിത്രമെന്നും പുതുമുഖ നായകൻ ആനന്ദ് റോഷൻ ഉൾപ്പെടെ നടീനട·ാർ കാമറക്കു മുന്പിൽ ജീവിക്കുകയാണെന്നും അഭിപ്രായപ്പെട്ടു.
പുറംലോകം ഒരു അപൂർവ സ്വപ്നമായി കരുതി തക്കാളിത്തോട്ടത്തിൽ കഠിനജോലി ചെയ്യേണ്ടിവന്ന തന്‍റെ പ്രവാസകാലം സമീർ എന്ന നായകകഥാപാത്രത്തിന്‍റെ ജീവിതത്തിലൂടെ ആവിഷ്കരിച്ച ’ഒരു തക്കാളികൃഷിക്കാരന്‍റെ സ്വപ്നം’ എന്ന സ്വന്തം നോവലിനെ ആധാരമാക്കിയാണ് ഈ സിനിമയൊരുക്കുന്നത്. മലയാളത്തിലെ ചില പ്രമുഖ താരങ്ങളോടൊപ്പം പ്രവാസലോകത്തെയും അഭിനേതാക്കൾ ജീവസുറ്റ കഥാപാത്രങ്ങളെ അവതരിപ്പിക്കുന്ന ചിത്രത്തിന്‍റെ ഏറിയകൂറും അൽ ഐനിലും ഫുജൈറയിലുമായിട്ടാണ് ചിത്രീകരിക്കുന്നത്. പുതുവർഷ ചിത്രമായി തിയേറ്ററുകളിൽ എത്തിക്കാനാണ് ശ്രമമെന്ന് നിർമ്മാതാക്കളായ ബിയോണ്ട് ദി റീൽസ്, ദുബായ് മാസ് പ്രൊഡക്ഷൻസിന്റെയും പ്രതിനിധികൾ പറഞ്ഞു.
അഭിനേതാക്കളുടെ നിരയിൽ മുഖ്യകഥാപാത്രമായ സമീറിന് ജീവൻ നൽകുന്നത് പുതുമുഖ വാഗ്ദാനം ആനന്ദ് റോഷനാണ്. കഥ, തിരക്കഥ, സംഭാഷണം, ഗാനരചന, സംവിധാനം: റഷീദ് പാറക്കൽ, നിർമ്മാണം: പിപി അബ്ദുറഹ്മാൻ, ബാനർ: ബീയോണ്ട് ദി റീൽസ് & മാസ് പ്രൊഡക്ഷൻസ് ദുബായ്, ഛായാഗ്രഹണ സംവിധാനം: രൂപേഷ് തിക്കോടി, ക്രീയേറ്റീവ് കണ്‍സൾട്ടന്‍റ്: സനിൽ കുമാർ, അസോസിയേറ്റ് ഡയറക്ടർ: അമീർ പട്ടാന്പി, സംവിധാന സഹായി: അൻസാരി കരൂപ്പടന്ന, സംഗീതം: സുദീപ് പാലനാട്, ശിവറാം, ചമയം: സുധി സുരേന്ദ്രൻ, വസ്ത്രാലങ്കാരം: ശിവൻ ഭക്തൻ, നിർമ്മാണ നിയന്ത്രണം: താഹിർ മട്ടാഞ്ചേരി, കലാ സംവിധാനം: നിസാർ ഇബ്രാഹിം, നിർമ്മാണ ഏകോപനം: മെഹ്ബൂബ് വടക്കാഞ്ചേരി.
റിപ്പോർട്ട്: അനിൽ സി. ഇടിക്കുള