റിയാദ്: കേളി കലാ സാംസ്കാരിക വേദിയുടെ 2019 വർഷത്തെ കലണ്ടർ പ്രകാശനം ചെയ്തു. അൽ മാതേഷ് എസ്റ്റാബ്ലിഷ് മെന്റിന്റെ സഹകരണത്തോടെ പുറത്തിറക്കിയ കലണ്ടർ കേരളം നേരിട്ട സമാനതകളില്ലാത്ത പ്രളയത്തിന്റെ നേർകാഴ്ചകൾ ഉൾപ്പെടുത്തി റീബിൽഡ് കേരള എന്ന മുദ്രാവാക്യം ഉയർത്തിപ്പിടിച്ചാണ് രൂപകൽപ്പന ചെയ്തിരിക്കുന്നത്.
മുഖ്യമന്ത്രിയുടെ ദുരിതാസ്വാസ നിധിയുടെ വിശദാംശങ്ങൾക്ക് പുറമേ ഇന്ത്യൻ എംബസി, കേരള സംസ്ഥാന മന്ത്രിമാർ, വകുപ്പുകൾ, നോർക്ക എന്നിവയുമായി ബന്ധപ്പെട്ട വിവരങ്ങൾ, ആശുപത്രികൾ, അംബുലൻസ്, പോലീസ്, സിവിൽ ഡിഫൻസ്, വെള്ളം വൈദ്യുതി എന്നീ പ്രാദേശിക സേവന സഹായ വിശദാംശങ്ങൾ, സൗദിയിലെ മലയാളം മാധ്യമങ്ങൾ തുടങ്ങി പ്രവാസികൾക്ക് ഉപകാരപ്രദമായ നിരവധി വിവരങ്ങൾ ഉൾപ്പെടുത്തിയിട്ടുണ്ട്.
റിയാദിലും പരിസര പ്രദേശങ്ങളായ അൽഖർജ്, മുസാഹ്മിയ, ദവാദ്മി എന്നിവിടങ്ങളിലും പ്രവാസി മലയാളികൾക്കിടയിൽ സൗജന്യമായി കലണ്ടർ വിതരണം ചെയ്യുമെന്ന് കേളി ഭാരവാഹികൾ പറഞ്ഞു. ഗദ അൽ മുസ്തഷാർ ഓഡിറ്റോറിയത്തിൽ നടന്ന ചടങ്ങിൽ അൽ മാതേഷ് എസ്റ്റാബ്ലിഷ്മെന്റ് പ്രതിനിധിയും കേളി ബദിയ ഏരിയ വാദിലബൻ യൂണിറ്റ് അംഗവുമായ പ്രസാദ് കലണ്ടർ പ്രകാശനം നിർവഹിച്ചു. ചടങ്ങിൽ കേളി പ്രസിഡന്റ് ദയാനന്ദൻ ഹരിപ്പാട് അധ്യക്ഷനായി. സെക്രട്ടറി ഷൗക്കത്ത് നിലന്പൂർ സ്വാഗതം ആശംസിച്ചു. സിദ്ദിക്ക് കൊബ്ലാൻ, അറാർ പ്രവാസി സംഘം രക്ഷാധികാരിയും എഴുത്തുകാരനും, മാധ്യമ പ്രവർത്തകനും, ലോക കേരളസഭ അംഗവുമായ കുഞ്ഞഹമ്മദ് കൂരാച്ചുണ്ട് കേളി കേന്ദ്ര രക്ഷാധികാരി സമിതി ആക്ടിംഗ് കണ്വീനർ കെ.പി.എം സാദിക്ക്, രക്ഷാധികാരി സമിതി അംഗങ്ങൾ, കേന്ദ്ര കമ്മിറ്റി അംഗങ്ങൾ, കുടുംബവേദി പ്രവർത്തകർ, വിവിധ ഏരിയകളിൽ നിന്നുള്ള കേളി പ്രവർത്തകർ എന്നിവർ ചടങ്ങിൽ പങ്കെടുത്തു.