കുവൈറ്റ് സിറ്റി : ഇരുട്ട് നിറഞ്ഞ ജീവിതങ്ങൾക്ക് വെളിച്ചം പകർന്നു നൽകിയ കരുണ നിറഞ്ഞ ഹൃദയമായിരുന്നു സഗീർ തൃക്കരിപ്പൂർ എന്ന് അദ്ദേഹത്തിന്‍റെ വിയോഗ വാർഷികത്തിൽ കുവൈറ്റ് കേരള മുസ്ലിം അസോസിയേഷൻ സംഘടിപ്പിച്ച അനുസ്മരണ സെമിനാറിൽ സംബന്ധിച്ചവർ അഭിപ്രായപ്പെട്ടു. ഖൈത്താൻ കമ്മ്യൂണിറ്റി സ്കൂളിൽ സംഘടിപ്പിച്ച രണ്ടാം സഗീർ അനുസ്മരണ സമ്മേളനവും സ്മരണിക പ്രകാശനവും ഹ്രസ്വ സന്ദർശനാർത്വം കുവൈറ്റിലെത്തിയ ഫാ. ഡേവിഡ് ചിറമൽ ഉൽഘാടനം ചെയ്തു. കർമ്മ നിരതമായ മനസുകളാണ് മറ്റുള്ളവരുടെ ജീവിതത്തിന് അർത്ഥം നൽകുന്നതെന്ന് അദ്ദേഹം എടുത്തു പറഞ്ഞു.
കുവൈത്ത് കേരള മുസ്ലിം അസോസിയേഷൻ കേന്ദ്ര പ്രസിഡന്റ് ഇബ്രാഹിം കുന്നിൽ അധ്യക്ഷത വഹിച്ചു. കെകെഎംഎ മുൻ കേന്ദ്ര ചെയർമാൻ എൻ. എ. മുനീർ സാഹിബ്‌ അതിഥികളെ സദസിന് പരിചയപ്പെടുത്തി. ബാബുജി ബത്തേരി സഗീർ അനുസ്മരണ പ്രഭാഷണം നിർവഹിച്ചു. സഗീർ സാഹിബ്‌ സ്മരണിക കുവൈറ്റ് ജഹ്‌റ ട്രാഫിക് വിഭാഗം തലവൻ മിശാൻ ആയദ് അൽ – ഖാലിദ് ബി. ഇ. സി. കുവൈറ്റ് – സി ഇ ഒ മാത്യു വര്ഗീസിന് നൽകി കൊണ്ട് റിലീസ് നിർവഹിച്ചു. കുവൈറ്റിലെ പ്രമുഖ വ്യക്തിത്വങ്ങളായ ഡോ. അമീർ അഹ്‌മദ്‌, സൈമൺ ജോയി ആലുക്കാസ്, മുനവർ മുഹമ്മദ്, ഫിമ പ്രസിഡന്റ് സലീം ദേശായി, ഷംസുദീൻ ഫൈസി, അബ്ദുള്ള വടകര, സത്താർ കുന്നിൽ, പി. ടി.ഷാഫി, ഹബീബ് മുറ്റിചൂർ , കൃഷ്ണൻ കടലുണ്ടി, ബഷീർ ബാത്ത, അബ്ദുൽ നാസ്സർ, പ്രേമൻ ഇല്ലത്ത്, സലാംകളനാട്, അസീസ് തിക്കോടി, ചെസ്സിൽ രാമപുരം, ജെ. സജി എന്നിവർ സംസാരിച്ചു.
മാസ്റ്റർ മുഹമ്മദ് സൈഹാൻ അബ്ദുൽ സത്താർ ഖിറഅത്ത് നടത്തി. കെ കെ എം എ കേന്ദ്ര, സോൺ, ബ്രാഞ്ച് ഭാരവാഹികൾ പരിപാടിക്ക് നേതൃത്വം നൽകി. പ്രോഗ്രാം ചെയർമാൻ എ പി അബ്ദുൽ സലാം സ്വാഗതവും കേന്ദ്ര ജനറൽ സെക്രട്ടറിയും പ്രോഗ്രാം ജനറൽ കൺവീനറുമായ കെ.സി റഫീഖ് നന്ദിയും പറഞ്ഞു.