വിയന്ന: കോണ്ഗ്രസിന്റെ പ്രവാസി വിഭാഗമായ ഇന്ത്യൻ ഓവർസീസ് കോണ്ഗ്രസിന്റെ (ഐഒസി ) യൂറോപ്പ് ഭാരവാഹികളെ പ്രഖ്യാപിച്ചു. രാജ്യത്തിന്റെ താൽപര്യങ്ങളിൽ നിന്ന് അകന്നുപോയ പ്രവാസികളെ വീണ്ടും ഇന്ത്യയുടെ വിഷയങ്ങളിൽ താൽപര്യമുണ്ടാക്കുക, സമാഗതമായ തെരഞ്ഞെടുപ്പിൽ കോണ്ഗ്രസിനെ ശക്തിപ്പെടുത്തുക എന്ന ലക്ഷ്യം മുൻനിറുത്തി ഐഒസി ഗ്ലോബൽ ചെയർമാൻ സാം പിത്രോദയാണ് യൂറോപ്പ് ഭാരവാഹികളെ ഒൗപചാരികമായി ദൗത്യം ഏൽപ്പിച്ചത്.
കണ്വീനറായി സ്വിറ്റ്സർലൻഡിൽ നിന്നുള്ള രാജ് വിന്ദർ സിംഗിനെ തെരഞ്ഞെടുത്തു. സിറോഷ് ജോർജ് (ഓസ്ട്രിയ), തന്മയ് മിശ്ര, ബാൽദേവ് സിംഗ്, വേദ് പ്രകാശ് ഗുജ (മൂവരും ഫ്രാൻസ്), രാഹുൽ പതിനെട്ടിൽ രാജ്, നിയോമ ബോറ, ഗുർദീപ് സിംഗ് രന്ദ്വ, ഹർദീപ് സിംഗ്, ഹർജിന്ദർ സിംഗ് ചഹാൽ (എല്ലാവരും ജർമ്മനി), ദിൽബാഗ് സിംഗ് ചന്ന, പ്രഭാജോട്ടെ സിംഗ് (ഇരുവരും ഇറ്റലി), ഗാരിസോബാർ സിംഗ് ഗിൽ (നോർവേ) എലിസബത്ത് ലോറൻസ് (സ്വിറ്റ്സർലൻഡ്) എന്നിവരാണ് നിയമിതരായ യൂറോപ്പ് കൗണ്സിൽ അംഗങ്ങൾ.
ഇന്ത്യൻ ഓവർസീസ് കോണ്ഗ്രസിന്റെ ഗ്ലോബൽ മാനിഫെസ്റ്റോ മീറ്റ് കഴിഞ്ഞമാസം ദുബായിൽ നടത്തിയിരുന്നു. അമേരിക്ക, യൂറോപ്പ്, മിഡിൽ ഈസ്റ്റ് മേഖലകളിൽ നിന്നുള്ള പ്രവാസികൾ പങ്കെടുത്ത സമ്മേളനത്തിൽ പ്രവാസി ഇന്ത്യക്കാരുടെ പ്രശ്നങ്ങൾ നേരിട്ടു മനസിലാക്കി, രാഹുൽഗാന്ധി മുന്നോട്ടു വയ്ക്കുന്ന പ്രവാസികളുടെ യഥാർഥ പ്രശ്നങ്ങളോടു സത്യസന്ധമായ സമീപനമെന്ന ആശയം മുൻ നിറുത്തി ഭാരവാഹികൾ പ്രവർത്തിക്കണമെന്ന് സാം പിത്രോദ ആഹ്വാനം ചെയ്തു.
റിപ്പോർട്ട്: ജോബി ആന്റണി