ന്യൂഡൽഹി: കൊറോണക്കാലത്തെ ദുരിതക്കയത്തിൽ അവശത അനുഭവിക്കുന്നവർക്കായി ആയിരത്തിൽപ്പരം ഭക്ഷണ കെട്ടുകളൊരുക്കി നിസ്വാർത്ഥ സേവന ചരിത്രം രചിച്ച് വീണ്ടും മലയാളികൾ. അർഹരും ആലംബഹീനരുമായ ഡൽഹിയിലെയും പ്രാന്തപ്രദേശങ്ങളിലെയും സാധാരണക്കാരായ ജനങ്ങൾക്കു വേണ്ടി ഭക്ഷണ കിറ്റുകളൊരുക്കി പ്രമുഖ സ്വർണ വ്യാപാരികളായ മലബാർ ഗോൾഡ് & ഡയമണ്ട്സും രംഗത്ത്.
സാമൂഹിക പ്രതിബദ്ധതയുടെ ഭാഗമായാണ് മലബാർ ഗോൾഡ് & ഡയമണ്ട്സ് ദുരിതത്തിലായവരെ കരകയറ്റാൻ സഹായ ഹസ്തവുമായി വിവിധ ചേരി പ്രദേശങ്ങളിൽ എത്തിയത്. അരി, ആട്ട, ഹർഹർ ദാൾ, ലോബിയ, പഞ്ചസാര, ഭക്ഷ്യ എണ്ണ, ചായപ്പൊടി, ഉപ്പ്, മല്ലിപ്പൊടി, മഞ്ഞൾപ്പൊടി, മുളകുപൊടി, കുളിക്കാനുള്ള സോപ്പ് തുടങ്ങി ഒരു മാസത്തെ ഉപയോഗത്തിനുള്ള ആയിരത്തിൽപ്പരം ഭക്ഷണ കിറ്റുകളാണ് വിതരണത്തിനായി തയ്യാറാക്കിയത്. ഓൾ ഇന്ത്യാ മലയാളി അസോസിയേഷൻ (എയ്മ), ഡൽഹി മലയാളി അസോസിയേഷൻ (ഡിഎംഎ.) തുടങ്ങിയ സംഘടനകൾ വിതരണത്തിന് നേതൃത്വം നൽകി.
ജനക്പുരി ഉത്തംനഗർ ഭാഗങ്ങളിലെ ചേരി നിവാസികൾക്കും റിക്ഷാ തൊഴിലാളികൾക്കും എയ്മ നാഷണൽ ചെയർമാൻ ബാബു പണിക്കർ, ഡൽഹി ഏരിയ സെക്രട്ടറി പി. രവീന്ദ്രൻ, ഡിഎംഎ. ജനറൽ സെക്രട്ടറി സി. ചന്ദ്രൻ, വൈസ് പ്രസിഡന്റ് കെ.ജി. രഘുനാഥൻ നായർ, മലബാർ ഗോൾഡ് & ഡയമണ്ട്സ്, സ്റ്റോർ ഹെഡ് നൗഫൽ പി.എ., മാർക്കറ്റിംഗ് മനേജർ മനോജ് പിള്ള തുടങ്ങിയവർ സർക്കാർ നിർദ്ദേശിച്ച സുരക്ഷാ മാനദണ്ഡങ്ങൾ സ്വീകരിച്ചു വിതരണം ചെയ്യാൻ നേരിട്ടെത്തുകയായിരുന്നു.
രജൗരി ഗാർഡൻ ഏരിയാ ചെയർമാൻ ഷാജി ഇ.ജെ., ജനക്പുരി നിർവ്വാഹക സമിതി അംഗം മധു തുടങ്ങിയവരും സന്നിഹിതരായി.
റിപ്പോർട്ട്: പി.എൻ. ഷാജി