ഡോ. തിയഡോഷ്യസ് മാർത്തോമ്മാ മെത്രാപ്പോലീത്തയ്ക്ക് ഡിട്രോയിറ്റിൽ സ്വീകരണം
Monday, September 19, 2022 11:19 PM IST
അലൻ ചെന്നിത്തല
മിഷിഗൺ: മലങ്കര മാർത്തോമ്മാ സുറിയാനി സഭയുടെ പരമാധ്യക്ഷൻ ഡോ. തിയഡോഷ്യസ് മാർത്തോമ്മാ മെത്രാപ്പോലീത്തയ്ക്ക് ഡിട്രോയിറ്റ് മാർത്തോമാ ഇടവകയുടെ ആഭിമുഖ്യത്തിൽ സ്വീകരണം നൽകും.

22-മത് മാർത്തോമ്മാ മെത്രാപ്പോലീത്തയായി സ്ഥാനാരോഹിതനായ ശേഷം ആദ്യമായി അമേരിക്കയിൽ സന്ദർശനം നടത്തുന്ന ഡോ. തിയഡോഷ്യസ് മാർത്തോമാ മെത്രാപ്പോലീത്ത ഡിട്രോയിറ്റ് മാർത്തോമാ പള്ളിയിൽ ഒക്ടോബർ രണ്ടിനു ഞായാറാഴ്ച രാവിലെ വിശുദ്ധ കുർബാന അനുഷ്ഠിക്കും. സഭയുടെ പൂർണ അംഗത്വത്തിലേക്ക് പ്രവേശിക്കുന്നതിന്‍റെ ഭാഗമായി കുട്ടികൾക്കു മെത്രാപ്പോലീത്ത ആദ്യകുർബാന നൽകും.

തുടർന്ന് നടക്കുന്ന അനുമോദന സമ്മേളനത്തിൽ ഡോ. തിയഡോഷ്യസ് മാർത്തോമാ മെത്രാപ്പോലീത്തയ്ക്ക് ഡിട്രോയിറ്റ് മാർത്തോമ്മാ ഇടവകയുടെ ആദരവുകളും ആശംസകളും അർപ്പിക്കും. ഡിട്രോയിറ്റ് മാർത്തോമ്മാ ഇടവകയുടെ നാലരപതിറ്റാണ്ടിന്‍റെ ചരിത്ര പന്ഥാവിൽ ഇടവകയുടെ വളർച്ചക്ക് കൈത്താങ്ങൽ നൽകിയ മുതിർന്ന അംഗങ്ങളെ പൊന്നാട നൽകി മാർത്തോമ്മാ മെത്രാപ്പോലീത്ത ആദരിക്കും.

ഡിട്രോയിറ്റ് മാർത്തോമ്മാ ഇടവക വികാരി റവ. വർഗ്ഗീസ് തോമസ്, വൈസ് പ്രസിഡന്റ് ഷോൺ തോമസ്, സെക്രട്ടറി ജോൺ മാത്യൂസ്, ട്രസ്റ്റീസ് ജോർജി മാത്യൂസ്, കെ. കെ. ജോർജ്‌ എന്നിവരുടെ നേതൃത്വത്തിൽ പാരിഷ് എക്സിക്യൂട്ടിവ് കമ്മറ്റി വിപുലമായ ക്രമീകരണങ്ങൾ ചെയ്യുന്നു. ഡിട്രോയിറ്റ് മാർത്തോമ്മാ ഇടവകയുടെ ഗായകസംഘങ്ങളും മറ്റു പോഷക സംഘടനകളും വിവിധ പരിപാടികളിൽ പങ്കാളിത്തം വഹിക്കും..
Copyright @ 2022 , Rashtra Deepika Ltd.