ലോക മുട്ടദിനം ആചരിച്ചുവരുന്നത് എല്ലാവർഷവും ഒക്ടോബറിലെ രണ്ടാംവെള്ളിയാഴ്ചയാണ്. ഈവർഷത്തെ മുട്ടദിനം ഈമാസം 12-ാം തീയതിയാണ്. ചില പാചകക്കുറിപ്പുകൾ ശ്രദ്ധിക്കുക.
പഞ്ചാബി എഗ്ഗ് കറി
ചേരുവകൾ: പുഴുങ്ങിയ മുട്ട - 4, 5 എണ്ണം, സവാള ചെറു ക്യൂബുകളായി അരിഞ്ഞത് - ഒന്നരകപ്പ്, വെള്ളം - ഒന്ന്, ഒന്നേകാൽ കപ്പ്, മല്ലിയില - ഒരു ടേബിൾസ്പൂൺ ചെറുതായരിഞ്ഞത്, എണ്ണ - രണ്ടു ടേബിൾസ്പൂൺ, ഉലുവയില ഉണക്കിപ്പൊടിച്ചത് - കാൽ ടീസ്പൂൺ, ഇഞ്ചി, വെളുത്തുള്ളി പേസ്റ്റ് - ഒന്ന്, ഒന്നര ടേബിൾസ്പൂൺ, മഞ്ഞൾപൊടി - എട്ടിലൊന്ന് ടേബിൾസ്പൂൺ, ഗരംമസാലപ്പൊടി - ഒരു ടേബിൾസ്പൂൺ, ഗ്രാന്പു, ഏലയ്ക്കാ - രണ്ടെണ്ണംവീതം, പട്ട - ഒരിഞ്ച് നീളത്തിൽ ഒരെണ്ണം, ബേലീഫ് - ഒരെണ്ണം, തക്കാളി ചെറുതായരിഞ്ഞത് - ഒരുകപ്പ്.
തക്കാളി മിക്സിയിൽ അടിച്ച് പൾപ്പാക്കുക. ഇനി ഇതൊരു ബൗളിലേക്ക് പകരുക. സവാള അടിച്ച് പൾപ്പാക്കുക. ഇത് പ്രത്യേക ബൗളിൽ എടുക്കുക. മുട്ട പുഴുങ്ങി തോട് കളഞ്ഞ് ഒരു ഫോർക്ക്കൊണ്ട് അവിടവിടെ കുത്തിവയ്ക്കുക. ഒരു പാനിൽ എണ്ണയൊഴിച്ച് ചൂടാക്കുക. പുഴുങ്ങിയ മുട്ടയിട്ട് വറുത്ത് പൊൻനിറമാക്കി കോരുക. ഇതേ പാനിൽ പട്ട, ബേലീഫ്, ഗ്രാന്പു, ഏലയ്ക്ക എന്നിവയിട്ട് വഴറ്റുക. സവാള അരച്ചതിട്ട് വഴറ്റി പൊൻനിറമാക്കുക. ഇഞ്ചി, വെളുത്തുള്ളി പേസ്റ്റിട്ട് അൽപമൊന്ന് കുറുകുംവരെ വഴറ്റുക. മുളകുപൊടി, ഉപ്പ്, ഗരംമസാലപൊടി, മഞ്ഞൾ എന്നിവ ചേർത്ത് മണംവരുംവരെ വഴറ്റുക. ഇനി തക്കാളി പൾപ്പ് ചേർത്ത് പച്ചമണം മാറുംവരെ വറുക്കുക. വെള്ളം ചേർത്ത് ചാറിന്റെ പാകം ക്രമീകരിക്കുക. ചാറ് കുറുകുംവരെ വേവിക്കുക. എണ്ണ വേർതിരിയുന്പോൾ ഉപ്പ് പാകമാണോയെന്ന് പരിശോധിക്കുക. പുഴുങ്ങിയ മുട്ട ചേർക്കുക. കസൂർമേത്തി ചേർത്ത് 2-3 മിനിറ്റ് അടച്ചുവേവിക്കുക. മല്ലിയില അരിഞ്ഞതിട്ട് അലങ്കരിച്ച് ചപ്പാത്തി, നാൻ, ചോറ് എന്നിവയ്ക്കൊപ്പം വിളന്പുക.
എഗ്ഗ് റോസ്റ്റ്
പുഴുങ്ങിയ മുട്ട - രണ്ടെണ്ണം, തക്കാളി - ഒന്ന്, സവാള - ഒരെണ്ണത്തിന്റെ മുക്കാൽഭാഗം, മുളകുപൊടി - കാൽ ടീസ്പൂൺ, ഗരംമസാലപ്പൊടി - കാൽ, അര ടീസ്പൂൺ, ജീരകം - അരടീസ്പൂൺ, ഇഞ്ചി, വെളുത്തുള്ളി പേസ്റ്റ് - ഒരു ടേബിൾസ്പൂൺ, എണ്ണ-ഒരു ടേബിൾസ്പൂൺ.
മുട്ട പുഴുങ്ങുക. തോട് കളയുക. ഫോർക്കുകൊണ്ട് അവിടവിടെ കുത്തുക. ഒരു പാനിൽ എണ്ണയൊഴിച്ച് ചൂടാക്കുക. ജീരകമിട്ട് വറുക്കുക. പൊട്ടുന്പോൾ സവാളയിട്ട് ഉപ്പ് വിതറുക. പൊൻനിറമാകുന്പോൾ ഇഞ്ചി, വെളുത്തുള്ളി പേസ്റ്റ് ചേർക്കുക. പച്ചമണം മാറുംവരെ വറുക്കുക. തക്കാളി ചേർത്ത് വെന്ത് ഉടയുംവരെ വഴറ്റുക. മുട്ട പുഴുങ്ങിയത്, കറിവേപ്പില, മുളകുപൊടി, മഞ്ഞൾ, ഗരംമസാലപ്പൊടി എന്നിവ ചേർത്ത് 3-5 മിനിറ്റ് വറുക്കുക. എല്ലാ ചേരുവകളും തമ്മിൽ യോജിച്ചാൽ 1-2 ടേബിൾസ്പൂൺ വെള്ളം തളിക്കാം. തക്കാളിയുടെ പച്ചമണം മാറിയിരിക്കും. റൊട്ടി, ചപ്പാത്തി, ചോറ് എന്നിവയ്ക്കൊപ്പം വിളന്പാം.
എഗ്ഗ് സാൻഡ്വിച്ച്
മുട്ട - രണ്ടെണ്ണം, ബട്ടർ - ഒരൗൺസ്, റൊട്ടി - രണ്ടു സ്ലൈസ്, ഉപ്പ്, കുരുമുളക് - പാകത്തിന്.
മുട്ട പൊട്ടിച്ച് ഒരു പരന്ന ബൗളിൽ ഒഴിക്കുക. ഉപ്പും കുരുമുളകുപൊടിയും ചേർത്ത് നന്നായി ബീറ്റ് ചെയ്യുക. ക്രീം പരുവത്തിലായിരിക്കണം ഇത്. ബട്ടർ ഒഴിച്ച പാക്കിലേക്കിത് പകരുക. സെറ്റായാൽ വാങ്ങി ആറാൻ വയ്ക്കുക. ഒരു റൊട്ടികഷ്ണത്തിൽ ബട്ടർ തേക്കുക. ഇതിലേക്ക് തയാറാക്കിയ മുട്ടദോശ വച്ച് മറ്റേ റൊട്ടിക്കഷ്ണംകൊണ്ട് മൂടുക, അതിരുകൾ മുറിച്ച് ആകൃതിവരുത്തുക. സോസും ചേർത്ത് വിളന്പുക.
ഇന്ദു നാരായൺ