ജനം വീട്ടുപടിക്കൽ യാചിക്കണമെന്ന് അവർ ചിന്തിക്കുന്നു: ദുബായ് ഭരണാധികാരിയുടെ ട്വീറ്റ് വൈറലായി

Monday, August 27, 2018 6:28 PM IST

ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തുമിന്‍റെ ട്വീറ്റ് ചർച്ചയാകുന്നു. പ്രളയക്കെടുതിയിൽ അകപ്പെട്ട കേരളത്തിനുളള 700 കോടിയുടെ യുഎഇ ധനസഹായം ഇന്ത്യ നിരസിച്ചതിനു പിന്നാലെയാണ് യുഎഇ വൈസ് പ്രസിഡന്‍റുകൂടിയായ ഷെയ്ഖ് മുഹമ്മദ് ബിൻ റാഷിദ് അൽ മക്തും ജീവിതം എന്നെ പഠിപ്പിച്ചത് എന്ന തലക്കെട്ടിൽ തന്‍റെ ചിന്തകൾ ട്വീറ്റ് ചെയ്തത്.

രണ്ട് തരം അധികാരികളാണുള്ളത്. ആദ്യത്തേത് ജനങ്ങളുടെ നൻമയിലേക്കു പൂട്ട് തുറക്കുന്നവർ. ജനസേവനത്തിലും ജനജീവിതമൊരുക്കുന്നതിലും ഇവർ ആനന്ദം കണ്ടെത്തുന്നു. ജനകീയ പ്രശ്നങ്ങളുടെ പരിഹാരത്തിന് മുന്നിട്ടിറങ്ങുന്നവർ. എല്ലായ്പ്പോഴും ജനങ്ങളുടെ നേട്ടത്തിനു വഴി കണ്ടെത്തുന്നവർ. രണ്ടാമത്തെ വിഭാഗം നൻമകൾക്ക് ഉടക്കുവയ്ക്കുന്നവരാണ്. എളുപ്പമായതിനെ സങ്കീർണമാക്കുന്നവർ. സാങ്കേതികതകളുടെ പേരിലാണ് അവർ ജനങ്ങളെ മുഷിപ്പിക്കുന്നത്. ജനം അവരുടെ വീട്ടുപടിക്കൽ യാചിച്ചു നിൽക്കണമെന്ന് അവർ ചിന്തിക്കുന്നു. ആദ്യതരക്കാർ കൂടുതൽ ഉണ്ടായില്ലെങ്കിൽ ഒരു രാഷ്ട്രത്തിനും ഭരണകൂടത്തിനും വിജയിക്കാനാകില്ല- ഷെയ്ഖ് മുഹമ്മദ് ബിൻ റാഷിദ് അൽ മക്തും അറബിയിൽ ട്വീറ്റ് ചെയ്തു.

കേരളത്തിലുണ്ടായ പ്രളയത്തെ തുടർന്ന് കേന്ദ്ര-സംസ്ഥാന ഇടപെലുകൾ വിവാദമായതിന്‍റെ പശ്ചാത്തലവുമായി കൂട്ടിയോജിപ്പിച്ചാണ് ട്വീറ്റുകൾ സമൂഹമാധ്യമങ്ങളിൽ വിശകലനം ചെയ്യപ്പെടുന്നത്. സമൂഹമാധ്യമങ്ങളിൽ ഇത് വ്യാപകമായി പ്രചരിക്കുന്നുമുണ്ട്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.