എത്തിപ്പോയി... കുട്ടികൾക്കായി ഫേസ്ബുക്ക് മെസഞ്ചർ കിഡ്സ്..!

സമൂഹമാധ്യമ ലോകത്തേക്ക് കുട്ടികളെ സ്വാഗതം ചെയ്ത് ഫേസ്ബുക്ക്. ആറു മുതൽ 12 വയസുവരെയുള്ള കുട്ടികൾക്ക് ഉപയോഗിക്കാവുന്ന ഫെസ്ബുക്ക് മെസഞ്ചർ കിഡ്സ് എന്ന ആപ്പാണ് സമൂഹമാധ്യമ വന്പൻ ഫേസ്ബുക്ക് തയാറാക്കിയിരിക്കുന്നത്. ഈ പ്രായപരിധിയിൽ പെടാത്തവർക്ക് ഈ ലോകത്തേക്ക് പ്രവേശനമില്ല.

എന്നാൽ കുട്ടികളൾക്ക് തങ്ങളുടെ സുഹൃത്തുക്കളുമായി ചാറ്റിംഗിന് അവസരം നൽകുന്ന ആപ്പിനെയോർത്ത് മാതാപിതാക്കൾ ഒട്ടും ആശങ്കപ്പെടേണ്ടതില്ലെന്നാണ് ഫേസ്ബുക്ക് പറയുന്നത്. പേര് മെസഞ്ചർ കിഡ്സ് എന്നൊക്കെയാണെങ്കിലും ആപ്പിന്‍റെ പൂർണ നിയന്ത്രണം മാതാപിതാക്കൾക്കാണത്രേ...തന്‍റെ കുട്ടിയുടെ ഫ്രണ്ടസ് ലിസ്റ്റിൽ ആരൊക്കെ ഉൾപ്പെടണമെന്ന് മാതാപിതാക്കൾക്ക് തീരുമാനിക്കാം. എന്നു മാത്രമല്ല മാതാപിതാക്കളുടെ സഹായത്തോടെ മാത്രമേ കുട്ടികൾക്ക് ഈ ആപ്പിൽ അക്കൗണ്ട് തുറക്കാനും സാധിക്കു. കുട്ടികൾ ഇതിലൂടെ പങ്കുവയ്ക്കുന്ന കാര്യങ്ങൾ മാതാപിതാക്കൾക്കു കണ്ടെത്താനും സംവിധാനമൊരുക്കിയിട്ടുണ്ട്.

പരസ്യ ലിങ്കുകളോ കുട്ടികളെ മോശമായി സ്വാധീനിക്കുന്ന മറ്റു സംഗ്രഹങ്ങളോ ഒന്നും തന്നെ തങ്ങളുടെ ആപ്പിൽ ഉണ്ടാകില്ലെന്നും ഫേസ്ബുക്ക് പറയുന്നു. കുട്ടികൾക്ക് ഈ ആപ്പിൽ ഉപയോഗിക്കാനായുള്ള പ്രത്യേക ഇമോജികൾ, ജിഫ്, വീഡിയോ ചിത്രങ്ങൾ എന്നിവയെല്ലാം അധികൃതർ തയാറാക്കിയിട്ടുണ്ട്. ദ്വയാർത്ഥപ്രയോഗമുള്ള വീഡിയോയോ മറ്റു ചിത്രങ്ങളോ ഈ അപ്പിൽ ഉണ്ടാവില്ലെന്നും ഫേസ്ബുക്ക് അറിയിച്ചു.

അമേരിക്കയിലേ ഐഒസ് പതിപ്പുകൾക്കായുള്ള കിഡ്സ്മെസഞ്ചറിന്‍റെ പ്രിവ്യു മാത്രമാണ് നിലവിൽ ഫേസ്ബുക്ക് പുറത്തു വിട്ടിരിക്കുന്നത്. വൈകാതെതന്നെ എല്ലാ സ്മാർട്ഫോണ്‍ ഓസ് പ്ലാറ്റ്ഫോമിലുമുള്ള മെസഞ്ചർ കിഡ്സ് പതിപ്പ് മറ്റുരാജ്യങ്ങളലേക്കും എത്തുമെന്നാണ് റിപ്പോർട്ടുകൾ.