തായ്‌വാന്‍റെ പാസ്പോർട്ട്, അമേരിക്കയുടെയും..!

Sunday, December 31, 2017 1:23 AM IST

തായ്‌വാൻ പുറത്തിറക്കിയ പാസ്പോർട്ടിൽ അമേരിക്കൻ ചിത്രം. തായ്‌വാന്‍റെ വിദേശകാര്യ മന്ത്രാലയം പുറത്തിറക്കിയ 2,00,000 പാസ്പോർട്ടുകളിലാണ് അബദ്ധത്തിൽ അമേരിക്കയിലെ വാഷിംഗ്ടണിലുള്ള ഡുല്ലസ് വിമാനത്താവളത്തിന്‍റെ ചിത്രം പതിഞ്ഞത്. 1979ൽ സ്ഥാപിതമായ തായ്‌വാൻ വിമാനത്താവളത്തിന്‍റെ ചിത്രത്തിന്‍റെ സ്ഥാനത്താണ് ജീവനക്കാരുടെ നോട്ടപ്പിശകിനെത്തുടർന്നാണ് അമേരിക്കയിലെ വിമാനത്താവളത്തിന്‍റെ ചിത്രം പതിഞ്ഞത്.

അതീവ കൃത്യതയുള്ള പാസ്പോർട്ടിൽ ഗുരുതരമായ പിഴവു വന്നത് വലിയ വിവാദമായതോടെ സംഭവത്തിന്‍റെ പൂർണ ഉത്തരവാദിത്വം ഏറ്റെടുത്ത് തായ്‌വാൻ വിദേശകാര്യ മന്ത്രാലയത്തിലെ ഉന്നത ഉദ്യോഗസ്ഥൻ ആഗ്നെസ് ചെൻ രാജിവച്ചു. മറ്റാരെയും കുറ്റപ്പെടുത്തേണ്ടതില്ലെന്നും സംഭവത്തിന്‍റെ പൂർണ ഉത്തരവാദിത്വം താൻ ഏറ്റെടുക്കുകയാണെന്നും അദ്ദേഹം പറഞ്ഞു.

തെറ്റു കടന്നുകൂടിയ പാസ്പോർട്ടുകൾ‌ തിരിച്ചുവിളിച്ച് പകരം പുതിയവ നല്‌കുമെന്ന് തായ്‌വാൻ വിദേശകാര്യ മന്ത്രാലയം അറിയിച്ചു. 285 പാസ്പോർട്ടുകൾ ഇതിനോടകംതന്നെ തിരിച്ചുവിളിച്ചിട്ടുണ്ട്. പിഴവിനെത്തുടർന്ന് 27 ലക്ഷം ഡോളറിന്‍റെ നഷ്ടമാണ് സർക്കാരിനുണ്ടായത്. ആഗോളതലത്തിൽ സംഭവം രാജ്യത്തിനു വലിയ നാണക്കേടുണ്ടാക്കിയതിനാൽ മറ്റ് ഉദ്യോഗസ്ഥർക്കെതിരേ തായ്‌വാൻ സർക്കാർ കടുത്ത നടപടിയെടുക്കാനൊരുങ്ങുകയാണെന്നാണ് റിപ്പോർട്ടുകൾ.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.