"കാന്താര’യില്‍ ശിവയായി പുനീത്; സോഷ്യല്‍ മീഡിയയില്‍ നൊമ്പരമായി ഫാന്‍ മേഡ് പോസ്റ്റര്‍

Friday, November 11, 2022 3:22 PM IST

16 കോടി മുതല്‍ മുടക്കില്‍ നിര്‍മിച്ച കാന്താര എന്ന കന്നഡ ചിത്രം ഇപ്പോള്‍ 400 കോടി ക്ലബില്‍ ഇടം പിടിച്ചിരിക്കുകയാണല്ലൊ. മിക്ക ഇന്ത്യന്‍ ഭാഷയിലേക്കും മൊഴിമാറ്റം ചെയ്യപ്പെട്ട ഈ ചിത്രം വലിയൊരു വിജയംതന്നെയാണ് കരസ്ഥമാക്കിയിരിക്കുന്നത്.

ചിത്രത്തിലെ അഭിനയത്തിലൂടേയും സംവിധാനത്തിലൂടേയും പ്രേക്ഷകരുടെ ഹൃദയം കീഴടക്കാന്‍ ഋഷഭ് ഷെട്ടിക്ക് കഴിഞ്ഞു. എന്തിനേറെ സാക്ഷാല്‍ രജനികാന്ത് പോലും കാന്താരയെ പ്രകീര്‍ത്തിച്ച് രംഗത്തെത്തിയിരുന്നു.

എന്നാല്‍ ഹോംബലെ ഫിലിംസ് നിര്‍മിച്ച ഈ ചിത്രത്തില്‍ ഋഷഭ് ഷെട്ടി അവതരിപ്പിച്ച കടുബെട്ടു ശിവയായി എത്തേണ്ടിയിരുന്നത് അടുത്തിടെ മരണപ്പെട്ട കന്നഡ പവര്‍ സ്റ്റാര്‍ പുനീത് രാജ്കുമാറായിരുന്നു.

പക്ഷെ തന്‍റെ തിരക്കുകള്‍ നിമിത്തം സാന്‍ഡല്‍വുഡിന്‍റെ പ്രിയപ്പെട്ട അപ്പുവിന് ഈ ചിത്രത്തിന് ഡേറ്റ് നല്‍കാനായില്ല. പുനീത് തന്നെയാണ് ഋഷഭിനെ ഈ വേഷം ചെയ്യാന്‍ നിര്‍ബന്ധിച്ചത്.

എന്നാല്‍ കാന്താരയില്‍ തങ്ങളുടെ അപ്പു ആയിരുന്നുവെങ്കില്‍ പോസ്റ്റര്‍ എങ്ങനെ ആയിരിക്കുമെന്ന് ഒരുക്കിയിരിക്കുകയാണ് അദ്ദേഹത്തിന്‍റെ ഒരു ആരാധകന്‍. ഡിജിറ്റല്‍ ആര്‍ട്ടിസ്റ്റ് കുശാല്‍ ഹിരേമത്താണ് ഈ പോസ്റ്റര്‍ തയ്യാറാക്കിയത്.

പുനീതിന്‍റെ വ്യത്യസ്തമായ ഫോട്ടോ ഉപയോഗിച്ചാണ് കുശാല്‍ ഇത്തരത്തില്‍ ഡിസൈന്‍ ചെയ്തിരിക്കുന്നത്. അദ്ദേഹം തന്‍റെ ഇന്‍സ്റ്റഗ്രാമില്‍ പങ്കുവച്ച ഈ ഡിസൈന്‍ വൈറലായി മാറി.

ഈ ചിത്രം കണ്ട് അപ്പുവിന്‍റെ ആരാധകര്‍ വികാരഭരിതരായി. "ഇന്ന് എല്ലായിടത്തും കാന്താര വിജയിക്കുകയാണ്. പക്ഷെ ഈ ആഘോഷത്തിന് സാക്ഷ്യം വഹിക്കാന്‍ പുനീത് ഒപ്പമില്ല' എന്നാണൊരു ആരാധകന്‍ കമന്‍റിൽ കുറിച്ചത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.