നിങ്ങളുടെ നായയെ കൂടെ കൂട്ടൂ, ജോലി ചെയ്യൂ...

Thursday, October 4, 2018 12:13 PM IST

വളർത്തുനായ്ക്കളെ യാത്രകളിൽ പലരും ഒപ്പംകൂട്ടാറുണ്ട്. എന്നാൽ, ജോലിസ്ഥലങ്ങളിലേക്ക് അവയെ അടുപ്പിക്കാറില്ല. തായ്‌ലൻഡിലെ വൈഡിഎം എന്ന ഡിജിറ്റൽ അഡ്വർട്ടൈസിംഗ് ഏജൻസി എന്ന തൊഴിൽദാതാവ് അല്പം വ്യത്യസ്തമാണ്. ഇവിടത്തെ ജോലിക്കാർക്ക് അവരുടെ വളർത്തുനായ്ക്കളെ ജോലിസ്ഥലത്ത് കൊണ്ടുവരാനുള്ള അനുമതിയുണ്ട്.

നായയെ കൂടെ കൂട്ടൂ, ജോലി ചെയ്യൂ എന്ന പ്രവണത ഇപ്പോൾ തായ്‌ലൻഡിൽ വളർന്നുവരുന്നുണ്ട്. സ്ഥിരതയില്ലാത്ത ജോലിസമയമുള്ള ജീവനക്കാരുടെ മാനസിക പിരിമുറുക്കം കുറയ്ക്കുകയാണ് ഇതിലൂടെ കമ്പനികൾ ലക്ഷ്യമിടുന്നത്.

നായ സൗഹൃദ നയങ്ങളുള്ള നിരവധി സ്ഥാപനങ്ങൾ തായ്‌ലൻഡിലുണ്ട്. എന്നാൽ, വൈഡിഎം അല്പം വ്യത്യസ്തമാണ്. 200 ജീവനക്കാരാണ് കമ്പനിക്കുള്ളത്. 20 നായ്കളും ഇവിടെയുണ്ട്. ജീവനക്കാരുടെ മേശമേൽ കയറി അവരെ ജോലിയിൽ സഹായിക്കുക, ആവശ്യമുള്ള പേപ്പറുകൾ, പേന മുതലായവ എടുത്തു നല്കുക തുടങ്ങിയവയാണ് ഇക്കൂട്ടരുടെ ജോലി.

2017 മേയിൽ ഇന്‍റർനാഷണൽ ജേർണൽ ഓഫ് എൻവയേൺമെന്‍റൽ റിസർച്ച് ആൻഡ് പബ്ലിക് ഹെൽത്ത് വളർത്തുമൃഗങ്ങളോടൊപ്പമുള്ള സഹവാസം അലർജി, മൃഗജന്യ രോഗങ്ങൾ എന്നിവ മനുഷ്യരിലേക്ക് പകരാനിടയാക്കും എന്ന മുന്നറിയിപ്പ് നല്കിയിരുന്നു. അതേസമയം, മൃഗങ്ങൾ ജോലിയിലെ മാനസിക പിരിമുറുക്കം കുറയ്ക്കാൻ മനുഷ്യരെ സഹായിക്കുമെന്നുള്ള റിപ്പോർട്ടുകളും പുറത്തുവന്നിട്ടുണ്ട്.

ജോലിസ്ഥലങ്ങളിൽ സഹപ്രവർത്തകർ തമ്മിലുള്ള ബന്ധം വർധിപ്പിക്കാനും നായ്ക്കൾ സഹായിക്കുന്നുവെന്നാണ് വൈഡിഎം പറയുന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.