വിൽ സ്മിത്തിന്‍റെ പിറന്നാൾ ചാട്ടം!

Thursday, September 27, 2018 9:24 AM IST

തന്‍റെ അന്പതാം പിറന്നാൾ ആഘോഷം വേറിട്ടതാക്കി ഹോളിവുഡ് സൂപ്പർസ്റ്റാർ വിൽ സ്മിത്. അമേരിക്കയിലെ അരിസോണയിലുള്ള ഗ്രാൻഡ് മലയിടുക്കിൽ ബഞ്ചി ജംപിംഗ് നടത്തിയാണ് താരം ജീവിതത്തിൽ ഹാഫ് സെഞ്ചുറി തികച്ചതിന്‍റെ ആഘോഷം കെങ്കേമമാക്കിയത്. ഭൂനിരപ്പിൽനിന്ന് 550 അടി ഉയരത്തിലായിരുന്ന ഹെലികോപ്റ്ററിൽനിന്നായിരുന്നു സാഹസച്ചാട്ടം.

ഭാര്യ ജാഡ പിൻകെറ്റ് സ്മിത്, മകൾ വില്ലോ സ്മിത്, മകൻ ജാഡെൻ സ്മിത് എന്നിവരും ഏതാനും ആരാധകരും സംഭവത്തിനു ദൃക്സാക്ഷികളായി. വിൽസ്മിതിന്‍റെ ഒൗദ്യോഗിക യൂട്യൂബ് ചാനലാണ് സംഭവത്തിന്‍റെ ദൃശ്യങ്ങൾ പുറത്തുവിട്ടത്.

ചാടുന്നതിനു തൊട്ടുമുൻപ് ആശങ്കാകുലനായാണ് സ്മിത് വീഡിയോ ദൃശ്യങ്ങളിൽ പ്രത്യക്ഷപ്പെടുന്നതെങ്കിലും ചാടിക്കഴിഞ്ഞു താരം ആത്മവിശ്വാസം പ്രകടിപ്പിക്കുന്നതും വീഡിയോയിൽ കാണാം. സംഭവം കൊള്ളാമെന്നും ഇനിയും ഇതു പ്രതീക്ഷിക്കാമെന്നും താരം ചാട്ടത്തിനു ശേഷം പ്രതികരിച്ചു.

ഇലാസ്തികതയുള്ള കേബിളുമായി ബന്ധിച്ചശേഷം ഉയരങ്ങളിൽനിന്നു ചാടുന്നതാണ് ബഞ്ചി ജംപിംഗ്. ഇന്ത്യയിലെ നിരവധി വിനോദസഞ്ചാര കേന്ദ്രങ്ങളിൽ ബഞ്ചി ജംപിംഗിനു സൗകര്യമുണ്ട്.

സാധാരണയായി മലമുകളിലോ ഉയർന്ന കെട്ടിടങ്ങളിലോയുള്ള പ്ലാറ്റ്ഫോമിൽനിന്നാണ് ചാട്ടം. ഇതിനു പുറമേ ബലുണിൽനിന്നും ഹെലികോപ്റ്ററിൽനിന്നും ബഞ്ചി ജംപിംഗ് നടത്താറുണ്ട്. ഹെലികോപ്റ്ററിൽനിന്നുള്ള ബഞ്ചി ജംപിംഗ് ഏറ്റവും അപകട സാധ്യതയുള്ളതായാണ് വിലയിരുത്തൽ.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.