"ബോബി' ഇനി ലോകത്തിലെ ഏറ്റവും പ്രായം കൂടിയ നായ

Monday, February 6, 2023 10:54 AM IST

നായകള്‍ മിക്കവര്‍ക്കും ഏറ്റവും പ്രിയപ്പെട്ട ഒരു വളര്‍ത്തുമൃഗമാണല്ലൊ. ഉടമയോടുള്ള ഈ മൃഗത്തിന്‍റെ സ്നേഹം ഏറെ പ്രശസ്തമാണല്ലൊ. ഇപ്പോഴിതാ പോര്‍ചുഗലിലുള്ള ലിയോണല്‍ കോസ്റ്റ എന്നയാളുടെ നായയാണ് സമൂഹ മാധ്യമങ്ങളിലെ താരം.

ബോബി എന്നു പേരിട്ടിരിക്കുന്ന ഈ നായ വെെറലാകാനുള്ള കാരണം അവന്‍ നേടിയ ഗിന്നസ് റിക്കാര്‍ഡാണ്. ലോകത്തിലെ ഏറ്റവും പ്രായം കൂടിയ നായയ്ക്കുള്ള ഗിന്നസ് വേള്‍ഡ് റിക്കാര്‍ഡാണ് ബോബി സ്വന്തമാക്കിയത്.

ഈ നായക്ക് ഇപ്പോള്‍ പ്രായം 30 വയസാണ്. 1992 മേയ് 11നാണ് ബോബി ജനിച്ചത്. ഓസ്ട്രേലിയന്‍ നായ ബ്ലൂയിയുടെ (1910-1939) പേരിലായിരുന്നു ഈ റിക്കാര്‍ഡ് ഇതുവരെ. 29 വയസും അഞ്ച് മാസവും ആയിരുന്നു ബ്ലൂയിയുടെ പ്രായം.

നൂറ്റാണ്ട് പഴക്കമുള്ള ഈ റിക്കാര്‍ഡാണ് ബോബി ഇപ്പോള്‍ തകര്‍ത്തിരിക്കുന്നത്. പോര്‍ച്ചുഗീസ് ഗവണ്‍മെന്‍റും വളര്‍ത്തുമൃഗങ്ങളുടെ ഡാറ്റാബേസായ എസ്ഐഎസിയും ബോബിയുടെ പ്രായം പരിശോധിച്ച് സ്ഥിരീകരിച്ചിട്ടുണ്ട്.

കാഴ്ച ഒരല്‍പം മങ്ങിയെങ്കിലും ബോബിക്ക് യജമാനനോടുള്ള സ്നേഹത്തിന് തെല്ലും കുറവില്ലെന്നാണ് ലിയോണല്‍ സാക്ഷ്യപ്പെടുത്തുന്നത്. സമൂഹ മാധ്യമങ്ങളില്‍ നിരവധിപേര്‍ ബോബിക്ക് അഭിനന്ദനങ്ങള്‍ നേരുകയുണ്ടായി.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.