അരിയും ഗോതമ്പും സഹകരണ മേഖല വഴി നല്കും: കെ.വി. തോമസ്
ഒല്ലൂര്‍: കേരളത്തില്‍ സഹകരണമേഖല വഴി അരിയും ഗോതമ്പും കുറഞ്ഞ വിലയ്ക്കു വിതരണം ചെയ്യുമെന്നു കേന്ദ്ര ഭക്ഷ്യ-സിവില്‍ സപ്ളൈസ് വകുപ്പ് സഹമന്ത്രി കെ.വി. തോമസ് പറഞ്ഞു. ഇന്ത്യയില്‍ 55 ദശലക്ഷം ടണ്‍ ഭക്ഷ്യധാന്യമാണ് ആവശ്യം. ഇപ്പോള്‍ 85 ദശലക്ഷം ടണ്‍ ഉദ്പാദിപ്പിക്കുന്നുണ്ട്. ധാന്യങ്ങള്‍ മുമ്പ് ഇറക്കുമതി ചെയ്യുകയായിരുന്നു പതിവ്. ഇപ്പോള്‍ ആവശ്യം കഴിഞ്ഞു കയറ്റി അയയ്ക്കാന്‍ സാധിക്കുന്ന അവസ്ഥയിലേക്കെത്തിയതായും മന്ത്രി പറഞ്ഞു.

ചാനലുകളെ കാണുമ്പോള്‍ എന്തൊക്കെയാണു തങ്ങള്‍ പറയുന്നതെന്നുപോലും പല രാഷ്്ട്രീയക്കാരും മറന്നുപോകുന്ന അവസ്ഥയാണുള്ളത്. പറയേണ്ട കാര്യങ്ങള്‍ പറയേണ്ട വേദിയില്‍ പറയാനുളള ആര്‍ജവമാണു നേതാക്കള്‍ കാണിക്കേണ്ടതെന്നും മന്ത്രി പറഞ്ഞു. പി.ആര്‍. ഫ്രാന്‍സിസ് സ്മാരക സമിതി ഏര്‍പ്പെടുത്തിയ മികച്ച പൊതുപ്രവര്‍ത്തകനുള്ള അവാര്‍ഡ് സമര്‍പ്പണ ചടങ്ങ് ഒല്ലൂരില്‍ ഉദ്ഘാടനം ചെയ്യുകയായിരുന്നു മന്ത്രി.

കോണ്‍ഗ്രസ് പാര്‍ട്ടി വളര്‍ത്തിയ നേതാക്കള്‍ പാര്‍ട്ടിയെക്കുറിച്ചു തന്നെ കുറ്റംപറയുമ്പോള്‍ അതിനു ലക്ഷ്മണരേഖ നിശ്ചയിക്കേണ്ടതുണ്െടന്നും കേന്ദ്ര വ്യോമയാനവകുപ്പു സഹമന്ത്രി കെ.സി. വേണുഗോപാല്‍ അഭിപ്രായപ്പെട്ടു. കെ.വി. തോമസില്‍നിന്ന് അവാര്‍ഡ് ഏറ്റുവാങ്ങിയശേഷം മറുപടി പ്രസംഗം നടത്തുകയായിരുന്നു അദ്ദേഹം.


സര്‍ക്കാരിന്റെ വേഗത്തിനനുസരിച്ചു കൂടെനിന്നു പ്രവര്‍ത്തിക്കാത്ത ഉദ്യോഗസ്ഥ വൃന്ദത്തിന്റ പ്രവര്‍ത്തനമാണ് കേന്ദ്രമന്ത്രി എ.കെ. ആന്റണിയെകൊണ്ട് ഇപ്രകാരം പറയിക്കുന്നതെന്നും ഇത്തരം ഉദ്യോഗസ്ഥരെ നിലയ്ക്കുനിര്‍ത്താനുളള ആര്‍ജവം സര്‍ക്കാര്‍ കാണിക്കണമെന്നും മന്ത്രി ആവശ്യപ്പെട്ടു. ഇരിക്കുന്ന കൊമ്പ് മുറിച്ചിട്ടാല്‍ താനും വീഴുമെന്നു പൊതുവേദിയില്‍ പ്രസംഗിക്കുന്ന ഓരോ നേതാവും ഓര്‍ക്കണമെന്നും മന്ത്രി കൂട്ടിച്ചേര്‍ത്തു.

മന്ത്രി സി.എന്‍. ബാലകൃഷ്ണന്‍ ചടങ്ങില്‍ അധ്യക്ഷത വഹിച്ചു. എം.പി. വിന്‍സന്റ് എംഎല്‍എ വിദ്യാഭ്യാസ അവാര്‍ഡുകള്‍ വിതരണം ചെയ്തു. എംഎല്‍എമാരായ തേറമ്പില്‍ രാമകൃഷ്ണന്‍, തോമസ് ഉണ്ണിയാടന്‍, മേയര്‍ ഐ.പി. പോള്‍, ജില്ലാ പഞ്ചായത്ത് പ്രസിഡന്റ് കെ.വി. ദാസന്‍, മുന്‍മന്ത്രി കെ.പി. വിശ്വനാഥന്‍, എം.വി. കുരിയന്‍, ജെയ്ജു സെബാസ്റ്യന്‍, ജോസഫ് ടാജറ്റ്, ലീലാമ്മ തോമസ്, ജോസ് വള്ളൂര്‍ എന്നിവര്‍ സംസാരിച്ചു.