ചരിയംതുരുത്തില്‍ സിപിഎം കൊടികുത്തിയ സ്ഥലം വില്പന നടത്തിയത് ഇടതുഭരണകാലത്ത്
സ്വന്തം ലേഖകന്‍

കൊച്ചി: മിച്ചഭൂമി ഭൂരഹിതര്‍ക്കു നല്കുക എന്ന മുദ്രാവാക്യവുമായി സിപിഎം കഴിഞ്ഞ ദിവസം തുടങ്ങിയ സമരത്തില്‍ എറണാകുളം ജില്ലയില്‍ പാര്‍ട്ടി കൊടികുത്തിയ ചരിയംതുരുത്തിലെ നൂറേക്കറിലേറെ സ്ഥലത്തിന്റെ വില്പന നടന്നത് കഴിഞ്ഞ ഇടതുമുന്നണി ഭരണകാലത്ത്. കൊച്ചിയുടെ നെല്ലറയായി അറിയപ്പെട്ടിരുന്ന ചരിയംതുരുത്തിലെ പൊക്കാളി പാടശേഖരമാണ് വൈറ്റ് മെഡിസിറ്റി എന്ന കമ്പനിക്കായി വാങ്ങിക്കൂട്ടിയത്. ഇതിന്റെ രജിസ്ട്രേഷനും പോക്കുവരവും നടന്നത് 2010-11ല്‍ ഇടതുമുന്നണി സര്‍ക്കാര്‍ അധികാരത്തിലിരുന്ന കാലത്തും. വടക്കേക്കര എംഎല്‍എയായിരുന്ന എസ്. ശര്‍മ അന്ന് രജിസ്ട്രേഷന്‍ മന്ത്രിയായിരുന്നു.

നൂറിലേറെപേരില്‍ നിന്നാണ് 125 ഏക്കറോളം ഭൂമി 1,500 കോടി രൂപയുടെ പദ്ധതിക്കായി വാങ്ങിയിരിക്കുന്നത്. കടമക്കുടി വില്ലേജ് ഓഫീസിലാണ് ഇതിന്റെ പോക്കുവരവു നടത്തിയത്. 75 ഏക്കറോളം സ്ഥലം കൂടി കമ്പനി വാങ്ങിയതായി അറിയുന്നുണ്ട്. ഇതിന്റെ പോക്കുവരവു നടത്തിയിട്ടില്ല. ചരിയംതുരുത്തിലെ മൂന്ന് ഏക്കറോളം കരഭൂമിയാണ് ആദ്യം മെഡിസിറ്റി കമ്പനി വാങ്ങിയത്. തുടര്‍ന്നാണ് ഇതിന്റെ ചുറ്റുപാടുമുള്ള 125 ഏക്കറോളം നെല്‍പ്പാടവും തണ്ണീര്‍ത്തടങ്ങളും ഉള്‍പ്പെട്ട ഭൂമി വാങ്ങിയത്. സെന്റിന് ശരാശരി 3,000 രൂപ മാത്രം വിലയുണ്ടായിരുന്ന സ്ഥലത്തിന് 70,000 രൂപ വരെ നല്കിയാണ് ഭൂമി വാങ്ങിയത്. ടൂറിസം അനുബന്ധമായുള്ള വിവിധ പദ്ധതികള്‍ക്കാണ് ഭൂമി വാങ്ങിയിട്ടുള്ളത്. അതേസമയം, കടമക്കുടി ഗ്രാമപഞ്ചായത്തിലെ രേഖകള്‍ പ്രകാരം നീര്‍ത്തട-നെല്‍വയല്‍ പ്രദേശമായാണ് ഇതു രേഖപ്പെടുത്തിയിട്ടുള്ളത്. നിയമപ്രകാരം ഇവിടെ കെട്ടിടനിര്‍മാണം പാടില്ല. ഇക്കാര്യം പരിശോധിച്ച് രേഖ പുതുക്കേണ്ട സമയമാണിപ്പോള്‍.

നിര്‍ദിഷ്ട മെഡിസിറ്റിയുടെ വടക്കുവശം വരാപ്പുഴ-കടമക്കുടി റോഡാണ്; കിഴക്ക് പഞ്ചായത്ത് റോഡും. കീരമ്പുഴയും ഏലൂര്‍പ്പുഴയുമാണ് മറ്റ് അതിര്‍ത്തികള്‍. സ്ഥലവില്പനയുടെ ഇടനിലക്കാരായി നിന്നതും മെഡിസിറ്റിയുടെ സമീപത്തുള്ള പഞ്ചായത്ത് റോഡ് ഒമ്പതു മീറ്ററാക്കി വീതികൂട്ടണമെന്ന ആവശ്യം മുന്നോട്ടുവച്ചതും പ്രാദേശിക സിപിഎം നേതൃത്വമാണെന്നു ചൂണ്ടിക്കാണിക്കപ്പെടുന്നു. നിര്‍ദിഷ്ട മൂലമ്പിള്ളി-പിഴല പാലത്തിനു പകരം മെഡിസിറ്റിയുടെ സമീപത്തു കൂടി പോകുന്ന ചേന്നൂര്‍-ചരിയംതുരുത്ത് പാലമാണു വേണ്ടതെന്നും പാര്‍ട്ടിയുടെ പ്രാദേശിക നേതൃത്വം ആവശ്യമുന്നയിക്കുന്നുണ്ട്.


വ്യത്യസ്ത ഉടമകളുടെ പേരില്‍ അഞ്ചു തണ്ടപ്പേരിലാണ് കടമക്കുടി വില്ലേജ് ഓഫീസില്‍ പോക്കുവരവ് നടത്തിയിട്ടുള്ളത്.ഞാറയ്ക്കല്‍ സബ് രജിസ്ട്രാര്‍ ഓഫീസിലായിരുന്നു രജിസ്ട്രേഷന്‍ നടപടികള്‍. മിച്ചഭൂമി ഭൂരഹിതര്‍ക്കു നല്കുക എന്ന ആവശ്യമുയര്‍ത്തിയാണ് സിപിഎം സമരം ആരംഭിച്ചിട്ടുള്ളതെങ്കിലും ചരിയംതുരുത്തില്‍ മെഡിസിറ്റിക്കു വേണ്ടി വാങ്ങിക്കൂട്ടിയ ഭൂമിയില്‍ മിച്ചഭൂമി ഇല്ലെന്നാണ് അറിയുന്നത്.

പാര്‍ട്ടി വന്‍തോതില്‍ വിമതപ്രശ്നം നേരിടുന്ന പിഴല, ചരിയംതുരുത്ത് മേഖലയില്‍ പാര്‍ട്ടിയുടെ സ്വാധീനം തിരിച്ചുപിടിക്കാനുള്ള ശ്രമത്തിന്റെ ഭാഗമായാണ് മെഡിസിറ്റി ഭൂമിയില്‍ സമരം തുടങ്ങിയതെന്നാണു സൂചന. കഴിഞ്ഞ തെരഞ്ഞെടുപ്പുകളില്‍ ഈ മേഖലയില്‍ പാര്‍ട്ടിക്കു തിരിച്ചടി നേരിട്ടിരുന്നു. നേരത്തേ ഭൂമി വാങ്ങാന്‍ ഇടനിലക്കാരായിരുന്ന പലരും പാര്‍ട്ടി വിട്ടു പോയി വിമതപക്ഷത്തു ചേര്‍ന്നിട്ടുണ്ട്. ഈ മേഖലയിലെ ചില പ്രമുഖ സമുദായങ്ങള്‍ കൂട്ടത്തോടെ പാര്‍ട്ടി വിട്ടു പോയിരുന്നു.

അതേസമയം, ഭൂമി കച്ചവടം ഏതു സര്‍ക്കാരിന്റെ കാലത്ത് നടന്നു എന്നതു പ്രശ്നമല്ലെന്ന് സിപിഎം ജില്ലാ സെക്രട്ടറി എം.വി. ഗോവിന്ദന്‍ മാസ്റ്റര്‍ വ്യക്തമാക്കി. നെല്‍വയലില്‍ നെല്‍കൃഷി നടത്തണമെന്നതാണ് പാര്‍ട്ടി നിലപാട്. അതിനു വിരുദ്ധമായതു സംഭവിക്കാന്‍ പാടില്ല. ഭൂമി വാങ്ങിയതും പോക്കുവരവു നടത്തിയതും ഒരാളുടെ പേരിലായിരുന്നില്ല.

പലരുടെയും പേരുകളിലുള്ള ബിനാമി ഇടപാടാണിത്. ആര്‍ക്കെങ്കിലും ഭൂമി വില്ക്കാനോ വാ ങ്ങാനോ പാടില്ല എന്ന നിയമമില്ല. ഇങ്ങനെ ഭൂമി വാങ്ങിക്കൂട്ടുന്ന കാര്യം അതുകൊണ്ടുതന്നെ പാര്‍ട്ടിയുടെ ശ്രദ്ധയില്‍പെട്ടിട്ടുമുണ്ടാ കില്ല.

ഇടതുഭരണകാലത്ത് ഭൂമി വില്പന നടന്നു എന്ന രീതിയിലുള്ള പ്രചാരണം അതുകൊണ്ടുതന്നെ തള്ളിക്കളയേണ്ടതാണെന്നും അദ്ദേഹം പറഞ്ഞു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.