വനിതാ ലോകകപ്പ്: ഇന്ത്യ വിന്‍ഡീസിനെ തകര്‍ത്തു
Thursday, January 31, 2013 9:58 PM IST
മുംബൈ: വനിതാ ലോകകപ്പ് ക്രിക്കറ്റ് ഉദ്ഘാടന മത്സരത്തില്‍ ആതിഥേയരായ ഇന്ത്യ വെസ്റിന്‍ഡീസിനെ 105 റണ്‍സിന് തകര്‍ത്തു. ഓപ്പണര്‍മാരായ തിരുഷ് കാമിനിയുടെ തകര്‍പ്പന്‍ സെഞ്ചുറിയുടെയും പുനം റൌട്ടിന്റെ അര്‍ധ സെഞ്ചുറിയുടെയും ബലത്തില്‍ ആദ്യം ബാറ്റ് ചെയ്ത ഇന്ത്യ 50 ഓവറില്‍ ആറ് വിക്കറ്റിന് 284 റണ്‍സ് നേടിയിരുന്നു. 100 റണ്‍സ് നേടിയ കാമിനി റണ്‍ഔട്ടായി. റൌട്ട് 72 റണ്‍സ് നേടി. ഇരുവരും ചേര്‍ന്ന് ഒന്നാം വിക്കറ്റില്‍ 175 റണ്‍സ് കൂട്ടിച്ചേര്‍ത്തു. 146 പന്ത് നേരിട്ട കാമിനി 11 ഫോറും ഒരു സിക്സും നേടി. ജൂലന്‍ ഗോസ്വാമി, ഹര്‍മന്‍പ്രീത് കൌര്‍ എന്നിവര്‍ 36 റണ്‍സ് വീതം നേടി. കാമിനിയാണ് കളിയിലെ താരം.

വിന്‍ഡീസിന് വേണ്ടി ഡിയേന്‍ന്ദ്ര ഡോട്ടിന്‍ മൂന്ന് വിക്കറ്റ് വീഴ്ത്തി. കൂറ്റന്‍ സ്കോര്‍ പിന്തുടര്‍ന്ന വിന്‍ഡീസിന് മത്സരത്തിന്റെ ഒരുഘട്ടത്തിലും ഇന്ത്യയ്ക്ക് വെല്ലുവിളി ഉയര്‍ത്താനായില്ല. 44.3 ഓവറില്‍ 179 റണ്‍സിന് വിന്‍ഡീസ് പുറത്തായി.

മൂന്ന് വിക്കറ്റ് വീഴ്ത്തിയ നിരഞ്ജന നാഗരാജനും രണ്ടു വീതം വിക്കറ്റുകള്‍ നേടിയ ഗൌഷര്‍ സുല്‍ത്താന, ജുലാന്‍ ഗോസ്വാമി എന്നിവരുമാണ് വിന്‍ഡീസ് ബാറ്റിംഗ് നിരയെ തകര്‍ത്തത്.