നവജാത ശിശുവിന് മുലപ്പാൽ നിഷേധിച്ച സംഭവം; പിതാവിനെ ഇന്ന് അറസ്റ്റ് ചെയ്തേക്കും
Friday, November 4, 2016 3:16 AM IST
മുക്കം: നവജാത ശിശുവിന് അന്ധവിശ്വാസത്തിന്റെ പേരിൽ മുലപ്പാല് നിഷേധിച്ച സംഭവത്തിൽ കുട്ടിയുടെ പിതാവിനെ അറസ്റ്റ് ചെയ്യാൻ സാധ്യത. ഓമശേരി സ്വദേശിയായ യുവാവാണ് കഴിഞ്ഞ ദിവസം മുക്കം ഇഎംഎസ് സഹകരണ ഹോസ്പിറ്റലിൽ പിറന്ന തന്റെ കുഞ്ഞിന് ബാങ്ക് കേൾക്കാതെ മുലപ്പാൽ നൽകാൻ പാടില്ലെന്ന് പറഞ്ഞത്. ഇതോടെ ആശുപത്രി അധികൃതരും പോലീസും ഇടപെട്ടെങ്കിലും അബ്ദുറഹിമാൻ മുലപ്പാല് നൽകുന്നത് എതിർക്കുകയായിരുന്നു.

സംഭവം വിവാദമായതോടെ ചൈൽഡ് ലൈൻ, ഉന്നത പോലീസ് ഉദ്യോഗസ്ഥർ, മനുഷ്യാവകാശ പ്രവർത്തകർതുടങ്ങിയവർ വിഷയത്തിൽ ഇടപെട്ടു. സംഭവത്തിൽ ബാലാവകാശ കമ്മിഷന് സ്വമേധയാ കേസെടുക്കാനും അധികാരമുണ്ട്. പിതാവിനെതിരേ കേസെടുത്ത് അറസ്റ്റ് ചെയ്തേക്കുമെന്നാണ് സൂചന. അതിനിടെ ബുധനാഴ്ച ഒരു മണിയോടെ ജനിച്ച കുട്ടിക്ക് വ്യാഴാഴ്ച 12.20 ഓടെയാണ് മുലപ്പാൽ നൽകിയത്. കുട്ടിക്ക് മുലപ്പാൽ നൽകുന്നത് തടയുന്നതിനായി വീട്ടിൽ ബന്ധുക്കളടക്കം കാവൽ നിന്നിരുന്നതായും പറയപ്പെടുന്നു. നേരത്തെ ഇയാളുടെ ആദ്യ കുട്ടിക്കും ഇത്തരത്തിൽ അഞ്ച് ബാങ്കിന് ശേഷമാണ് മുലപ്പാൽ നൽകിയിരുന്നതെന്ന് യുവാവ് സംഭവ ദിവസം തന്നെ പോലീസിനോട് പറഞ്ഞിരുന്നു.

സംഭവം നടന്ന് ഒരു ദിവസം പിന്നിട്ടിട്ടും പോലീസും ചൈൽഡ് ലൈനും കേസ് എടുക്കാത്തതിലും പ്രതിഷേധമുയർന്നിട്ടുണ്ട്. സ്ത്രീകൾക്കും കുട്ടികൾക്കുമെതിരേ അതിക്രമം തടയൽ വകുപ്പ് പ്രകാരം പോലീസിനും സംഭവത്തിൽ സ്വമേധയാ കേസെടുക്കാവുന്നതാണെന്ന് നിയമവിദഗ്ദർ ചൂണ്ടിക്കാട്ടുന്നു. സംഭവത്തെകുറിച്ച അന്വേഷിച്ച് കർശന നടപടി സ്വീകരിക്കുമെന്ന് ജില്ലാ കളക്ടർ എൻ. പ്രശാന്ത് അറിയിച്ചു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.