മല്ലപ്പള്ളി: സ്‌കൂള്‍ വിദ്യാര്‍ഥിനിയെ കാറില്‍ പീഡിപ്പിക്കാന്‍ ശ്രമിച്ചതിന് അറസ്റ്റിലായ കായിക പരിശീലകന്‍ റിമാന്‍ഡില്‍.
കീഴ്വായ്പൂര് പാലമറ്റത്ത് റിട്ടയേർഡ് കേണല്‍ ജോസഫ് തോമസ് (ജെ.ടി.പാലമറ്റം -72 ) നെയാണ് കീഴ്വായ്പൂര് പോലീസ് ഇന്‍സ്പെക്ടര്‍ ജി.സന്തോഷ്‌കുമാര്‍ കഴിഞ്ഞ ദിവസം അറസ്റ്റ് ചെയ്തത്.
മുണ്ടിയപ്പള്ളി ഭാഗത്തുള്ള മൈതാനത്തു പെണ്‍കുട്ടികള്‍ക്കു മാത്രമായി ഇയാള്‍ സ്വകാര്യ ഹാന്‍ഡ്ബോള്‍ പരിശീലനകേന്ദ്രം നടത്തിയിരുന്നു. ഇവിടെ എത്തുന്ന കുട്ടികളെ ഇയാള്‍ കാറില്‍ വീടുകളിലും മറ്റു കളിസ്ഥലങ്ങളിലും എത്തിക്കുമായിരുന്നു. എന്നാല്‍, കുട്ടികളെ ആളൊഴിഞ്ഞ സ്ഥലങ്ങളിലേക്കു കൊണ്ടുപോകുന്നതായ വിവരം ലഭിച്ചതിനെത്തുടര്‍ന്ന് ആറു മാസമായി ഇയാളെ പോലീസ് നിരീക്ഷിച്ചിരുന്നു.
ശനിയാഴ്ച ഇത്തരത്തില്‍ നെല്ലിമൂടിനു സമീപം കാര്‍ കിടക്കുന്നതു കണ്ടു നാട്ടുകാര്‍ പോലീസില്‍ അറിയിച്ചു. തുടര്‍ന്ന് പോലീസ് എത്തി ഇയാളെ അറസ്റ്റ് ചെയ്തു. ഒപ്പമുണ്ടായിരുന്ന പെണ്‍കുട്ടിയുടെ മൊഴി രേഖപ്പെടുത്തി പോക്സോ നിയമപ്രകാരം ഇയാളെ അറസ്റ്റ് ചെയ്തതായി പോലീസ് പറഞ്ഞു. സമാന സാഹചര്യത്തിലുള്ള പീഡന ശ്രമങ്ങളുണ്ടായാല്‍ പരാതിപ്പെടണമെന്ന നിര്‍ദേശവും പോലീസ് നല്‍കി.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.