ഫീൽഡർ എന്ന നിലയിൽ ഏറ്റവും കൂടുതൽ ക്യാച്ച് ദക്ഷിണാഫ്രിക്കയുടെ എബി ഡിവില്യേഴ്സിന്‍റെ (23) പേരിലാണ്. ഓസീസ് താരം ഡേവിഡ് വാർണർ (21) രണ്ടാമതുണ്ട്. 2024 ലോകകപ്പിൽ വാർണർ ഈ റിക്കാർഡ് തിരുത്താനുള്ള സാധ്യതയുണ്ട്.
റണ്‍ വേട്ടക്കാരൻ കോഹ്ലി ട്വന്‍റി-20 ലോകകപ്പിൽ ഏറ്റവും കൂടുതൽ റണ്‍സ് സ്വന്തമാക്കിയതിന്‍റെ റിക്കാർഡ് ഇന്ത്യൻ സൂപ്പർ സ്റ്റാർ വിരാട് കോഹ്ലിക്കു സ്വന്തം. 2014 എഡിഷനിൽ ആറ് മത്സരങ്ങളിൽനിന്ന് 319 റണ്‍സുമായി കോഹ്ലി ടോപ് സ്കോററായിരുന്നു.
ഒരു ലോകകപ്പിൽ ഏറ്റവും കൂടുതൽ റണ്‍സ് എന്നതിൽ റിക്കാർഡാണിത്. ട്വന്‍റി-20 ലോകകപ്പിൽ ഇതുവരെ 1141 റണ്‍സ് കോഹ്ലിക്കുണ്ട്. മഹേല ജയവർധന (1016), ക്രിസ് ഗെയ്ൽ (965), രോഹിത് ശർമ (963), ദിൽഷൻ (897) എന്നിവരാണ് തുടർന്നുള്ള സ്ഥാനങ്ങളിൽ.
2024 ഐപിഎൽ ട്വന്‍റി-20 ക്രിക്കറ്റിൽ 15 മത്സരങ്ങളിൽനിന്ന് 741 റണ്‍സ് അടിച്ചുകൂട്ടിയശേഷമാണ് കോഹ്ലി ഐസിസി ലോകകപ്പിന് എത്തിയിരിക്കുന്നത്. ഐപിഎല്ലിലെ റണ്‍ വേട്ട ലോകകപ്പിലും കോഹ്ലി തുടരുന്നതിനായാണ് ആരാധകരുടെ കാത്തിരിപ്പ്.
എല്ലാ ലോകകപ്പിലും രോഹിത് ഇതുവരെ നടന്ന എല്ലാ ട്വന്‍റി-20 ലോകകപ്പിലും കളിച്ച നേട്ടം ഇന്ത്യൻ ക്യാപ്റ്റൻ രോഹിത് ശർമയ്ക്കു സ്വന്തം. 2007 മുതൽ 2022 വരെയുള്ള എട്ട് ലോകകപ്പിലും രോഹിത് കളിച്ചു. 2024 ലോകകപ്പിൽ ഇന്ത്യയുടെ ക്യാപ്റ്റനാണ് രോഹിത്.
രോഹിത്തിന് ഒപ്പം ബംഗ്ലാദേശിന്‍റെ ഷക്കീബ് അൽ ഹസനും ഇതുവരെ നടന്ന എല്ലാ ട്വന്‍റി-20 ലോകകപ്പിലും കളിച്ചിട്ടുണ്ട്. ഇത്തവത്തെ ലോകകപ്പിനുള്ള ബംഗ്ലാദേശ് ടീമിലും ഷക്കീബ് ഉണ്ട്.
ലോകകപ്പിൽ ഏറ്റവും കൂടുതൽ മത്സരം കളിച്ചതിന്‍റെ റിക്കാർഡും രോഹിത് ശർമയ്ക്കു സ്വന്തം. ട്വന്‍റി-20 ലോകകപ്പിൽ 39 മത്സരങ്ങൾ രോഹിത് കളിച്ചു. എല്ലാ ലോകകപ്പിലുമുണ്ടായിരുന്നെങ്കിലും ഷക്കീബ് അൽ ഹസൻ 36 മത്സരങ്ങളുമായി രോഹിത്തിനു പിന്നിൽ രണ്ടാം സ്ഥാനത്താണ്.
ശ്രീലങ്കൻ മുൻതാരം തിലകരത്നെ ദിൽഷൻ (35) മൂന്നാം സ്ഥാനത്തുണ്ട്. ഡ്വെയ്ൻ ബ്രാവൊ, ഷാഹിദ് അഫ്രീദി, ഷൊയ്ബ് മാലിക്ക്, ഡേവിഡ് വാർണർ എന്നിവർ 34 മത്സരങ്ങൾ വീതം കളിച്ച് നാലാം സ്ഥാനം പങ്കിടുന്നു. ഇതിൽ ഡേവിഡ് വാർണർ മാത്രമാണ് സജീവമായി രംഗത്തുള്ളത്.