തപാല്‍ വോട്ടിലും വ്യാപക തിരിമറി: ചെന്നിത്തല : Deepika.com Kerala News |

Click here for detailed news of all items

തപാല്‍ വോട്ടിലും വ്യാപക തിരിമറി: ചെന്നിത്തല

Saturday, April 10, 2021 1:22 AM IST

തിരുവനന്തപുരം: സംസ്ഥാനത്ത് വോട്ടര്‍ പട്ടികയിലെ ഇരട്ടവോട്ടിനു പിന്നാലെ തപാല്‍വോട്ടിലും വ്യാപക ക്രമക്കേടെന്ന് പ്രതിപക്ഷനേതാവ് രമേശ് ചെന്നിത്തല. ഇതു സംബന്ധിച്ച് തെരഞ്ഞെടുപ്പു കമ്മീഷനു പരാതി നല്കിയതായി ചെന്നിത്തല അറിയിച്ചു. മൂന്നര ലക്ഷത്തോളം വരുന്ന ഉദ്യോഗസ്ഥര്‍ക്കാണ് തപാല്‍ വോട്ടുള്ളത്. ഈ വോട്ടിലും ഇരട്ടിപ്പുണ്ട്. ഇതു തെരഞ്ഞെടുപ്പ് അട്ടിമറിക്കു തന്നെ കാരണമായേക്കാം.

വോട്ടു ചെയ്ത പല ഉദ്യോഗസ്ഥര്‍ക്കും ഓഫീസ് വിലാസത്തിലോ വീടിന്‍റെ വിലാസത്തിലോ വീണ്ടും ബാലറ്റുകള്‍ ലഭിക്കുന്നു. ഇതു സംബന്ധിച്ചുള്ള ആശങ്ക തെരഞ്ഞെടുപ്പു കമ്മീഷനെ അറിയിച്ചു. തപാല്‍ വോട്ടിലെ ഇരട്ടിപ്പ് ഉടനെ കണ്ടെത്തണം. ഉദ്യോഗസ്ഥര്‍ രണ്ടാമത് ചെയ്ത തപാല്‍ വോട്ടുകള്‍ എണ്ണരുതെന്നുള്ള നിര്‍ദേശം തെരഞ്ഞെടുപ്പ് കമ്മീഷന്‍ നല്കണം. കൂടാതെ പോളിംഗ് ഡ്യൂട്ടിയില്‍ ഉണ്ടായിരുന്ന ഉദ്യോഗസ്ഥര്‍ക്ക് പോസ്റ്റല്‍ ബാലറ്റ് അയച്ചുകൊടുക്കുന്നതിനു മുമ്പ് അവര്‍ നേരത്തേ വോട്ട് ചെയ്തില്ല എന്നുറപ്പാക്കണം.

ഓരോ മണ്ഡലത്തിലും തപാല്‍ വോട്ടിന് ബാലറ്റ് പേപ്പറുകള്‍ പ്രിന്‍റ് ചെയ്തത് എത്ര എണ്ണം, ഉദ്യോഗസ്ഥര്‍ക്ക് അയച്ചുകൊടുത്തത് എത്ര, ബാക്കി റിട്ടേണിംഗ് ഓഫീസറുടെ കൈവശം ഉള്ളത് എത്ര എന്ന കണക്ക് പ്രസിദ്ധപ്പെടുത്തണം. കൂടാതെ, ആകെ പ്രിന്‍റ് ചെയ്ത തപാല്‍ വോട്ടുകളുടെ എണ്ണവും അവയില്‍ മുതിര്‍ന്ന പൗരന്മാര്‍ക്ക് വോട്ട് ചെയ്യാന്‍ അയച്ചതെത്ര, റിട്ടേണിംഗ് ഓഫീസറുടെ പക്കല്‍ ശേഷിക്കുന്നത് എത്ര എന്നതു സംബന്ധിച്ച കണക്കും പ്രസിദ്ധീകരിക്കണമെന്ന് ചെന്നിത്തല ആവശ്യപ്പെട്ടു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.