കപ്പലിടിച്ച് ബോട്ട് മുങ്ങി; 3 മത്സ്യത്തൊഴിലാളികൾ മരിച്ചു : Deepika.com Kerala News |

Click here for detailed news of all items

കപ്പലിടിച്ച് ബോട്ട് മുങ്ങി; 3 മത്സ്യത്തൊഴിലാളികൾ മരിച്ചു

Wednesday, April 14, 2021 1:23 AM IST

കോഴിക്കോട്: മംഗളൂരുവിനു സമീപം പുറംകടലില്‍ ബോട്ടില്‍ കപ്പലിടിച്ചുണ്ടായ അപകടത്തില്‍ മൂന്നു പേര്‍ മരിച്ചു. അപകടത്തെത്തുടര്‍ന്നു കാണാതായ 11 പേരില്‍ രണ്ടുപേരെ കോസ്റ്റ് ഗാര്‍ഡും മറ്റു രക്ഷാസേനയും രക്ഷപ്പെടുത്തി. ബംഗാള്‍ സ്വദേശി സുനില്‍ ദാസ്(34), തമിഴ്‌നാട് സ്വദേശി വേല്‍ മുരുകന്‍ (37) എന്നിവരെയാണു രക്ഷപ്പെടുത്തിയത്. ബാക്കി ഒമ്പതു പേർക്കായി തെരച്ചില്‍ തുടരുകയാണ്.

ഞായറാഴ്ച കോഴിക്കോട് ബേപ്പൂരില്‍നിന്ന് മത്സ്യബന്ധനത്തിനായി പോയ റബ്ബ എന്ന ബോട്ടാണ് മംഗളൂരു തീരത്തുനിന്ന് 43 നോട്ടിക്കല്‍ മൈല്‍ അകലെ അപകടത്തില്‍പ്പെട്ടത്. ചൊവ്വാഴ്ച പുലര്‍ച്ചെ 2.05-നായിരുന്നു സംഭവം. സിംഗപ്പൂരില്‍നിന്നുള്ള എംവിഎപിഎല്‍ ലീ ഹാവ് റേ എന്ന ചരക്കു കപ്പലാണ് ബോട്ടില്‍ ഇടിച്ചതെന്നാണ് പ്രാഥമിക വിവരം. അപകടമുണ്ടാക്കിയ കപ്പല്‍ സംഭവസ്ഥലത്തുതന്നെയുണ്ട്.

ബേപ്പൂര്‍ സ്വദേശി ജാഫറിന്‍റെ ഉടമസ്ഥതയിലുള്ളതാണ് ബോട്ട്. ബോട്ടില്‍ 14 തൊഴിലാളികളാണുണ്ടായിരുന്നത്. ഇതില്‍ ഏഴു പേര്‍ തമിഴ്‌നാട് കുളച്ചല്‍ സ്വദേശികളും മറ്റുള്ളവര്‍ പശ്ചിമബംഗാള്‍ സ്വദേശികളുമാണ്. തെരച്ചിലിനായി കോസ്റ്റ് ഗാര്‍ഡിന്‍റെ മൂന്നു കപ്പലുകളും ഹെലികോപ്റ്ററും രംഗത്തുണ്ട്.

കോഴിക്കോട് ജില്ലാ കളക്ടര്‍ എസ്. സാംബശിവറാവു മംഗളൂരു കളക്ടറുമായി ബന്ധപ്പെട്ടു. രക്ഷാപ്രവര്‍ത്തനത്തിന് പ്രാദേശിക മത്സ്യബന്ധന ബോട്ടുകള്‍ ഉപയോഗപ്പെടുത്തിയതായി കളക്ടര്‍ അറിയിച്ചു. കര്‍ണാടക കോസ്റ്റല്‍ പോലീസും തീരസംരക്ഷണ സേനയും തെരച്ചിലില്‍ പങ്കെടുക്കുന്നുണ്ട്. നേവിയുടെ സഹായവും ആവശ്യപ്പെട്ടിട്ടുണ്ട്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.