മദർ തെരേസയെ ഒടുവിൽ കുന്പസാരിപ്പിച്ച ഫാ. ചെറിയാൻ കാര്യാങ്കൽ ഓർമയായി
Monday, November 22, 2021 1:54 AM IST
കോട്ടയം: വിൻസെൻഷ്യൻ സഭാഗംമായ ഫാ. ചെറിയാൻ കാര്യാങ്കൽ (88) അന്തരിച്ചു. സംസ്കാരം ഇന്നു രാവിലെ 11ന് ഒറീസയിലെ ഗോപാൽപുരിലുള്ള സെന്‍റ് ബനഡിക്ട് പള്ളിയിൽ.
വിശുദ്ധ മദർ തെരേസയെ ഏറ്റവും ഒടുവിൽ കുന്പസാരിപ്പിച്ച വൈദികൻ എന്ന നിലയിൽ ഫാ. ചെറിയാൻ കാര്യാങ്കൽ സവിശേഷ ശ്രദ്ധ നേടിയിരുന്നു. വിൻസെൻഷ്യൻ മിഷനറീസ് സഭാഗമായ ഫാ. ചെറിയാൻ ഒറീസയിലെ സ്റ്റെല്ലാ മരിയ നേവിഷേറ്റ് ഹൗസിൽ വിശ്രമ ജീവിതം നയിച്ചുവരുകയായിരുന്നു. മദർതെരേസയുടെ ആത്മീയ ജീവിതം ഏറ്റവും കൂടുതൽ തൊട്ടറിഞ്ഞ വ്യക്തിയാണ്.
1996 മുതൽ മദർ തെരേസയുടെ സന്യാസിനി സമൂഹത്തിന്‍റെ കുന്പസാരക്കാരനായിരുന്നു. നല്ല ഒരുക്കത്തോടെയായിരിക്കണം കുന്പസാരിക്കേണ്ടത് എന്നു നിർബന്ധമുള്ള അച്ചൻ മദറിന്‍റെ നിർദേശ പ്രകാരം കുന്പസാരത്തിനു മുന്പ് സന്ദേശം നൽകുകയും കൂദാശ സ്വീകരണത്തിനായി അംഗങ്ങളെ ഒരുക്കുകയും ചെയ്തിരുന്നു. വിശുദ്ധ കുർബാനയും കുന്പസാരവും കൂദാശയുമാണ് മദറിന്‍റെ ആത്മീയ ജീവിതത്തിന്‍റെ ഉൗർജമെന്ന് അച്ചൻ പറയുമായിരുന്നു. 1952ൽ വിൻസെൻഷ്യൻ മിഷനറീസിന്‍റെ കട്ടക് മിഷനിൽ ചേർന്നു. 1963ലായിരുന്നു പൗരോഹിത്യം. വിവിധ സ്ഥലങ്ങളിലെ സേവനങ്ങൾക്കു ശേഷം 1996 മുതൽ മദർ തെരേസയുടെ സന്യസിനി സമൂഹത്തിന്‍റെ കുന്പസാരക്കാരനായി. കോൽക്കത്ത അതിരൂപതയുടെ ചാപ്ലിയ്നായും സേവനം ചെയ്തിട്ടുണ്ട്.
പാലാ വേഴാങ്ങാനം കാര്യാങ്കൽ ചുമ്മാർ മാണി- പാലാ കിഴക്കേക്കര അന്ന ദന്പതികളുടെ മകനാണ്. സഹോദരങ്ങൾ: കെ.എം. മാണി, പരേതരായ കെ.എം. ജോസഫ്, ചുമ്മാർ മാണി. പരേതയായ മേരി ജോസഫ് കോച്ചേരിൽ, അന്നക്കുട്ടി ജോസഫ് കല്ലാക്കാവുങ്കൽ.