നഗ്‌നത എപ്പോഴും അശ്ലീലമല്ല: ഹൈക്കോടതി : Deepika.com Kerala News |

Click here for detailed news of all items

നഗ്‌നത എപ്പോഴും അശ്ലീലമല്ല: ഹൈക്കോടതി

Tuesday, June 6, 2023 12:39 AM IST

കൊച്ചി: നഗ്‌നതയെ എല്ലായ്പ്പോഴും അശ്ലീലവും അസഭ്യവുമായി കാണാനാകില്ലെന്നു ഹൈക്കോടതി. അര്‍ധനഗ്‌ന മേനിയില്‍ മക്കളെക്കൊണ്ടു ചിത്രം വരപ്പിച്ചു വീഡിയോ നിര്‍മിച്ച കേസില്‍ ആക്ടിവിസ്റ്റായ യുവതിയെ കുറ്റവിമുക്തയാക്കിയ കേസിലാണു ഹൈക്കോടതി ഇക്കാര്യം പറഞ്ഞത്.

വീഡിയോയില്‍ യുവതി അര്‍ധനഗ്‌നമേനി പ്രദര്‍ശിപ്പിച്ചത് അശ്ലീലവും അസഭ്യവുമാണെന്നായിരുന്നു പ്രോസിക്യൂഷൻ വാദം. ഈ വാദം കോടതി തള്ളി.

സ്ത്രീശരീരത്തെ ലൈംഗികവത്കരിക്കുന്നതിലുള്ള പ്രതിഷേധമായി തയാറാക്കിയ വീഡിയോയില്‍ ഈ ദൃശ്യം അനിവാര്യമാണ്. അതിനെ അശ്ലീലവും അസഭ്യവുമായി കരുതാനാകില്ലെന്നും കോടതി പറഞ്ഞു.സിക്‌സ് പാക്ക് മസിലുള്‍പ്പെടെ കാണിച്ചുള്ള പുരുഷശരീര പ്രദര്‍ശനങ്ങള്‍ക്കു കുഴപ്പമില്ല. ഷര്‍ട്ടിടാതെ പുരുഷന്മാര്‍ നടക്കാറുണ്ട്. ഇവയൊന്നും അശ്ലീലമല്ല. എന്നാല്‍ സ്ത്രീശരീരത്തിന്‍റെ കാര്യത്തില്‍ കാഴ്ചപ്പാട് മാറുന്നുവെന്നും കോടതി പറഞ്ഞു.

അര്‍ധനഗ്‌ന മേനിയില്‍ ചിത്രം വരപ്പിച്ചു യുട്യൂബില്‍ പോസ്റ്റ് ചെയ്ത കേസില്‍
യുവതിയെ കുറ്റവിമുക്തയാക്കി

കൊച്ചി: പ്രായപൂര്‍ത്തിയാകാത്ത മക്കളെക്കൊണ്ട് തന്‍റെ അര്‍ധനഗ്‌നമേനിയില്‍ ചിത്രം വരപ്പിച്ചു യുട്യൂബില്‍ പോസ്റ്റ് ചെയ്ത കേസില്‍ സോഷ്യല്‍ ആക്ടിവിസ്റ്റും മോഡലുമായ യുവതിയെ ഹൈക്കോടതി കുറ്റവിമുക്തയാക്കി.

പോക്‌സോ നിയമപ്രകാരമുള്ള കുറ്റങ്ങള്‍ ചുമത്തിയ കേസില്‍ പോലീസ് നേരത്തേ കുറ്റപത്രം നല്‍കിയിരുന്നു. തന്നെ കുറ്റവിമുക്തയാക്കണമെന്നാവശ്യപ്പെട്ട് യുവതി നല്‍കിയ ഹര്‍ജി വിചാരണക്കോടതി തള്ളി. ഇതിനെതിരേ യുവതി നല്‍കിയ ഹര്‍ജി ജസ്റ്റീസ് ഡോ. കൗസര്‍ എടപ്പഗത്താണു പരിഗണിച്ചത്.

ലൈംഗിക സംതൃപ്തിക്കായി കുട്ടികളെ ചൂഷണം ചെയ്‌തെന്നാരോപിച്ചുമള്ള കുറ്റങ്ങളാണ് ഹര്‍ജിക്കാരിക്കെതിരേ ചുമത്തിയിരുന്നത്. രണ്ടു മിനിറ്റ് ദൈര്‍ഘ്യമുള്ള വീഡിയോ സിംഗിള്‍ബെഞ്ചില്‍ പ്രദര്‍ശിപ്പിച്ചിരുന്നു.

വീഡിയോയിലൂടെ ഹര്‍ജിക്കാരി പറയാനുദ്ദേശിച്ച കാര്യം അഭിനന്ദനാര്‍ഹമാണെന്ന് ഹൈക്കോടതി വ്യക്തമാക്കി. ലൈംഗിക ഉദ്ദേശ്യത്തോടെയാണ് ഹര്‍ജിക്കാരി ഇതു ചെയ്തതെന്നതിനു സൂചനപോലുമില്ല. പോക്‌സോ നിയമപ്രകാരമുള്ള കുറ്റങ്ങള്‍ നിലനില്‍ക്കില്ലെന്നും ഹൈക്കോടതി വ്യക്തമാക്കി.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.