ഐസിപിഎ വജ്രജൂബിലി ആഘോഷം കൊച്ചിയിൽ
Thursday, September 21, 2023 12:28 AM IST
കൊച്ചി: ഇന്ത്യന്‍ കാത്തലിക് പ്രസ് അസോസിയേഷൻ (ഐസിപിഎ) വജ്രജൂബിലി ആഘോഷങ്ങളും ദേശീയ കണ്‍വന്‍ഷനും പുരസ്കാരസമര്‍പ്പണവും നാളെ മുതല്‍ 25 വരെ കച്ചേരിപ്പടി ആശീര്‍ഭവനില്‍ നടക്കും. “സമ്മര്‍ദങ്ങള്‍ക്കിടയിലും സത്യം പറയുകയെന്ന ദൗത്യം” എന്നതാണ് കണ്‍വന്‍ഷന്‍റെ പ്രമേയം.
നാളെ വൈകുന്നേരം അഞ്ചിന് നടക്കുന്ന സമ്മേളനം ജസ്റ്റീസ് ദേവന്‍ രാമചന്ദ്രന്‍ ഉദ്ഘാടനം ചെയ്യും. പ്രസിഡന്‍റ് ഇഗ്‌നേഷ്യസ് ഗൊണ്‍സാല്‍വസ് അധ്യക്ഷത വഹിക്കും. വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍, ബെല്ലാരി ബിഷപ് ഡോ. ഹെൻ‌റി ഡിസൂസ, ഹൈബി ഈഡന്‍ എംപി, ആലുവ സെന്‍റ് സേവ്യേഴ്സ് കോളജ് പ്രിന്‍സിപ്പല്‍ ഡോ. മിലന്‍ ഫ്രാൻസിസ്, ഇന്ത്യന്‍ കറന്‍റസ് എഡിറ്റര്‍ റവ. ഡോ. സുരേഷ് മാത്യു, ഫാ. ജോ എറുപ്പക്കാട്ട് തുടങ്ങിയവര്‍ പ്രസംഗിക്കും.
23ന് രാവിലെ ഒന്പതിന് ആരംഭിക്കുന്ന സെഷനിൽ ദ ടെലഗ്രാഫ് എഡിറ്റര്‍ ആര്‍. രാജഗോപാല്‍, സുപ്രീം കോർട്ട് ഒബ്സര്‍വര്‍ എഡിറ്റർ ഇൻ ചീഫ് ലീന രഘുനാഥ്, പ്രസ് കൗണ്‍സില്‍ മുന്‍ അംഗവും മുന്‍ എംപിയുമായ ഡോ. സെബാസ്റ്റ്യന്‍ പോള്‍, ലൊയോള ഇന്‍സ്റ്റിറ്റ്യൂട്ട് ഓഫ് പീസ് ഇന്‍റര്‍നാഷണല്‍ ഡയറക്‌ടര്‍ റവ. ഡോ. ബിനോയ് പിച്ചളക്കാട്ട്, സാമൂഹ്യ സമ്പര്‍ക്ക മാധ്യമങ്ങള്‍ക്കായുള്ള സിബിസിഐ വിഭാഗത്തിന്‍റെ സെക്രട്ടറി റവ.ഡോ. ബിജു ആലപ്പാട് എന്നിവര്‍ വിഷയാവതരണം നടത്തും. മനുഷ്യാവകാശ പ്രവര്‍ത്തകനും എഴുത്തുകാരനുമായ ഫാ. സെഡ്രിക് പ്രകാശ് മോഡറേറ്ററാകും.
പുരസ്കാര സമര്‍പ്പണ സമ്മേളനം ജസ്റ്റീസ് സുനില്‍ തോമസ് ഉദ്ഘാടനം ചെയ്യും. ദളിത്, പിന്നാക്ക വിഭാഗങ്ങളെക്കുറിച്ചുള്ള മികച്ച റിപ്പോര്‍ട്ടിംഗിന് സിസ്റ്റര്‍ റൊബാന്‍സി ഹെലന്‍, ഹിന്ദി സാഹിത്യത്തിനും ഹിന്ദി മാധ്യമ മേഖലയ്ക്കും നല്‍കിയ സംഭാവനകള്‍ക്ക് ജോസഫ് ഗത്തിയ, മാതൃകാപരമായ മാധ്യമപ്രവര്‍ത്തക മികവിന് ജോസ് കവി എന്നിവരാണ് പുരസ്കാരങ്ങള്‍ ഏറ്റുവാങ്ങുക.
രാജ്യത്തിന്‍റെ വിവിധ ഭാഗങ്ങളില്‍നിന്ന് 65 പ്രതിനിധികളും നൂറോളം പ്രത്യേക ക്ഷണിതാക്കളുമാണ് കണ്‍വന്‍ഷനിൽ പങ്കെടുക്കുകയെന്ന് പ്രസിഡന്‍റ് ഇഗ്‌നേഷ്യസ് ഗൊണ്‍സാല്‍വസും സംഘാടകസമിതി കണ്‍വീനര്‍ ഫാ. യേശുദാസ് പഴമ്പിള്ളിയും അറിയിച്ചു.